𑁭. 𑀫𑀳𑀸𑀯𑀕𑁆𑀕𑁄

𑁧. 𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. ‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢𑀁, 𑀉𑀧𑀥𑀸𑀭𑀡𑀁 𑀯𑀸 𑀲𑀼𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀢𑀯𑀸, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀲𑀼𑀢𑀯𑀸𑀢𑀺 𑀅𑀲𑁆𑀲𑀼𑀢𑀯𑀸. 𑀯𑀸-𑀲𑀤𑁆𑀤𑁄 𑀘𑀸𑀬𑀁 𑀧𑀲𑀁𑀲𑀸𑀬𑀁, 𑀅𑀢𑀺𑀲𑀬𑀲𑁆𑀲 𑀯𑀸 𑀩𑁄𑀥𑀦𑀓𑁄, 𑀢𑀲𑁆𑀫𑀸 𑀬𑀲𑁆𑀲 𑀧𑀲𑀁𑀲𑀺𑀢𑀁, 𑀅𑀢𑀺𑀲𑀬𑁂𑀦 𑀯𑀸 𑀲𑀼𑀢𑀁 𑀅𑀢𑁆𑀣𑀺, 𑀲𑁄 ‘‘𑀲𑀼𑀢𑀯𑀸’’𑀢𑀺 𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑀭𑀺𑀘𑀬𑁄 ‘‘𑀢𑀁 𑀲𑀼𑀢𑁆𑀯𑀸 𑀢𑀣𑀢𑁆𑀢𑀸𑀬 𑀧𑀝𑀺𑀧𑀢𑁆𑀢𑀺 𑀘 𑀲𑀼𑀢𑀯𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀓𑀸𑀲𑀺𑀢𑁄. 𑀅𑀣 𑀯𑀸 𑀲𑁄𑀢𑀩𑁆𑀩𑀬𑀼𑀢𑁆𑀢𑀁 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀦𑀺𑀧𑁆𑀨𑀢𑁆𑀢𑀺𑀁 𑀲𑀼𑀡𑀻𑀢𑀺 𑀲𑀼𑀢𑀯𑀸. 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀲𑀼𑀢𑀯𑀸𑀢𑀺 𑀅𑀲𑁆𑀲𑀼𑀢𑀯𑀸. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸, 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀻’’𑀢𑀺. 𑀢𑀣𑀸 𑀘𑀸𑀳 ‘‘𑀔𑀦𑁆𑀥𑀥𑀸𑀢𑀼…𑀧𑁂… 𑀯𑀺𑀦𑀺𑀘𑁆𑀙𑀬𑀭𑀳𑀺𑀢𑁄’’𑀢𑀺. 𑀢𑀢𑁆𑀣 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄, 𑀢𑀢𑁆𑀣 𑀧𑀭𑀺𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸, 𑀓𑀼𑀲𑀮𑁂𑀳𑀺 𑀲𑀳 𑀘𑁄𑀤𑀦𑀸𑀧𑀭𑀺𑀳𑀭𑀡𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀲𑁆𑀲 𑀓𑀸𑀭𑀡𑀁 𑀯𑀺𑀦𑀺𑀘𑁆𑀙𑀬𑁄. 𑀧𑀼𑀣𑀽𑀦𑀦𑁆𑀢𑀺 𑀩𑀳𑀽𑀦𑀁. 𑀓𑀺𑀮𑁂𑀲𑀸𑀤𑀻𑀦𑀁 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀦𑀺𑀤𑁆𑀤𑁂𑀲𑁂𑀲𑀼 (𑀫𑀳𑀸𑀦𑀺. 𑁫𑁧, 𑁯𑁪) 𑀆𑀕𑀢𑀦𑀬𑁂𑀦. 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀕𑀳𑀺𑀢𑁄 ‘‘𑀦𑀸𑀮𑀁 𑀦𑀺𑀩𑁆𑀩𑀺𑀦𑁆𑀤𑀺𑀢𑀼’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄. 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀸𑀘𑀻 𑀇𑀤𑀁-𑀲𑀤𑁆𑀤𑁄𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀓𑁆𑀔𑀓𑀸𑀬𑀁 𑀤𑀲𑁆𑀲𑁂𑀢𑀻’’𑀢𑀺. 𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼 𑀦𑀺𑀬𑀼𑀢𑁆𑀢𑁄𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄. 𑀬𑀣𑀸 𑀧𑀦 𑀫𑀳𑀸𑀫𑀢𑁆𑀢𑀺𑀓𑀸𑀬 𑀦𑀺𑀩𑁆𑀩𑀢𑁆𑀢𑀁 𑀫𑀢𑁆𑀢𑀺𑀓𑀸𑀫𑀬𑀁, 𑀏𑀯𑀫𑀬𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁄 ‘‘𑀘𑀢𑀼𑀫𑀳𑀸𑀪𑀽𑀢𑀫𑀬𑁄’’𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀸𑀢𑀺 𑀦𑀺𑀩𑁆𑀩𑀺𑀦𑁆𑀤𑀦𑀫𑁆𑀧𑀺 𑀆𑀧𑀚𑁆𑀚𑁂𑀬𑁆𑀬. 𑀦𑀺𑀩𑁆𑀩𑀺𑀦𑁆𑀤𑀦𑀸 𑀦𑀸𑀫 𑀉𑀓𑁆𑀓𑀡𑁆𑀞𑀦𑀸 𑀅𑀦𑀪𑀺𑀭𑀢𑀺𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀉𑀓𑁆𑀓𑀡𑁆𑀞𑁂𑀬𑁆𑀬𑀸’’𑀢𑀺. 𑀯𑀺𑀭𑀚𑁆𑀚𑁂𑀬𑁆𑀬𑀸𑀢𑀺 𑀯𑀻𑀢𑀭𑀸𑀕𑁄 𑀪𑀯𑁂𑀬𑁆𑀬. 𑀢𑁂𑀦𑀸𑀳 ‘‘𑀦 𑀭𑀚𑁆𑀚𑁂𑀬𑁆𑀬𑀸’’𑀢𑀺. 𑀯𑀺𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀇𑀥 𑀧𑀦 𑀅𑀘𑁆𑀘𑀦𑁆𑀢𑀸𑀬 𑀯𑀺𑀫𑀼𑀘𑁆𑀘𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀪𑀯𑁂𑀬𑁆𑀬𑀸’’𑀢𑀺. 𑀘𑀢𑀽𑀳𑀺 𑀘 𑀭𑀽𑀧𑀚𑀦𑀓𑀧𑀘𑁆𑀘𑀬𑁂𑀳𑀺 𑀆𑀕𑀢𑁄 𑀘𑀬𑁄𑀢𑀺, 𑀆𑀘𑀬𑁄, 𑀯𑀼𑀤𑁆𑀥𑀺. 𑀘𑀬𑀢𑁄 𑀅𑀧𑀓𑁆𑀓𑀫𑁄𑀢𑀺 𑀅𑀧𑀘𑀬𑁄, 𑀧𑀭𑀺𑀳𑀸𑀦𑀺. 𑀆𑀤𑀸𑀦𑀦𑁆𑀢𑀺 𑀕𑀳𑀡𑀁, 𑀧𑀝𑀺𑀲𑀦𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀺. 𑀪𑁂𑀤𑁄𑀢𑀺 𑀔𑀦𑁆𑀥𑀸𑀦𑀁 𑀪𑁂𑀤𑁄. 𑀲𑁄 𑀳𑀺 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀪𑁂𑀤𑁄’’𑀢𑀺.

𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀧𑀓𑀸𑀭𑀢𑁄 𑀜𑀸𑀬𑀦𑁆𑀢𑀺. 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦𑀧𑀺 𑀭𑀽𑀧𑀁 𑀆𑀮𑀫𑁆𑀩𑀺𑀢𑀼𑀁. 𑀅𑀬𑀼𑀢𑁆𑀢𑀭𑀽𑀧𑀁 𑀓𑀢𑁆𑀯𑀸 𑀢𑀡𑁆𑀳𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀓𑀭𑁄𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀧𑁆𑀧𑀸𑀬𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀦𑀺𑀓𑁆𑀓𑀟𑁆𑀠𑀦𑁆𑀢𑁄𑀢𑀺 𑀢𑀢𑁄 𑀕𑀸𑀳𑀢𑁄 𑀦𑀻𑀳𑀭𑀦𑁆𑀢𑁄.

𑀫𑀦𑀸𑀬𑀢𑀦𑀲𑁆𑀲𑁂𑀯 𑀦𑀸𑀫𑀁, 𑀦 𑀲𑀫𑀸𑀥𑀺𑀧𑀜𑁆𑀜𑀢𑁆𑀢𑀻𑀦𑀁 ‘‘𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁧.𑁯.𑁯), 𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑀅𑀝𑁆𑀞. 𑁭𑁪) 𑀯𑀺𑀬. 𑀘𑀺𑀢𑁆𑀢𑀻𑀓𑀸𑀢𑀩𑁆𑀩𑀪𑀽𑀢𑀁 𑀯𑀢𑁆𑀣𑀼 𑀏𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀯𑀢𑁆𑀣𑀼, 𑀢𑀲𑁆𑀲 𑀪𑀸𑀯𑁄 𑀘𑀺𑀢𑁆𑀢𑀯𑀢𑁆𑀣𑀼𑀢𑀸, 𑀢𑁂𑀦 𑀓𑀸𑀭𑀡𑁂𑀦 𑀘𑀺𑀢𑁆𑀢𑀪𑀸𑀯𑀫𑀸𑀳. 𑀘𑀺𑀢𑁆𑀢𑀕𑁄𑀘𑀭𑀢𑀸𑀬𑀸𑀢𑀺 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀯𑀺𑀲𑀬𑀢𑀸𑀬. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀘𑀺𑀢𑁆𑀢𑀢𑀸𑀬𑀸𑀢𑀺 𑀭𑀸𑀕𑀸𑀤𑀺𑀲𑀤𑁆𑀥𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀲𑀪𑀸𑀯𑀢𑁆𑀢𑀸. 𑀢𑁂𑀦 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀢𑁆𑀢𑀫𑀸𑀳. 𑀯𑀺𑀚𑀸𑀦𑀦𑀝𑁆𑀞𑁂𑀦𑀸𑀢𑀺 𑀩𑀼𑀚𑁆𑀛𑀦𑀝𑁆𑀞𑁂𑀦. 𑀅𑀚𑁆𑀛𑁄𑀲𑀺𑀢𑀦𑁆𑀢𑀺 𑀅𑀚𑁆𑀛𑁄𑀲𑀸𑀪𑀽𑀢𑀸𑀬 𑀢𑀡𑁆𑀳𑀸𑀬 𑀕𑀳𑀺𑀢𑀁. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀬𑀸’’𑀢𑀺𑀆𑀤𑀺. 𑀧𑀭𑀸𑀫𑀲𑀺𑀢𑁆𑀯𑀸𑀢𑀺 𑀥𑀫𑁆𑀫𑀲𑀪𑀸𑀯𑀁 𑀅𑀦𑀺𑀘𑁆𑀘𑀢𑀸𑀤𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀦𑀺𑀘𑁆𑀘𑀸𑀤𑀺𑀢𑁄 𑀆𑀫𑀲𑀺𑀢𑁆𑀯𑀸. 𑀅𑀝𑁆𑀞𑀲𑀢𑀦𑁆𑀢𑀺 𑀅𑀝𑁆𑀞𑀸𑀥𑀺𑀓𑀁 𑀲𑀢𑀁. 𑀦𑀯 𑀫𑀸𑀦𑀸𑀢𑀺 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀆𑀕𑀢𑀸 𑀦𑀯𑀯𑀺𑀥𑀫𑀸𑀦𑀸. 𑀩𑁆𑀭𑀳𑁆𑀫𑀚𑀸𑀮𑁂 𑀆𑀕𑀢𑀸 𑀲𑀲𑁆𑀲𑀢𑀯𑀸𑀤𑀸𑀤𑀬𑁄 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀬𑀲𑁆𑀫𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 𑀧𑀼𑀣𑀼𑀚𑁆𑀚𑀦𑁂𑀦 𑀤𑀴𑁆𑀳𑀕𑁆𑀕𑀸𑀳𑀁 𑀕𑀳𑀺𑀢𑀁, 𑀢𑀲𑁆𑀫𑀸 𑀲𑁄 𑀢𑀢𑁆𑀣 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀦𑀺𑀩𑁆𑀩𑀺𑀤𑀸𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀫𑀢𑁆𑀣𑁄.

𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 ‘‘𑀯𑀭’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀤𑀁 𑀅𑀦𑀼𑀲𑀦𑁆𑀥𑀺𑀯𑀘𑀦𑀁 ‘‘𑀓𑀲𑁆𑀫𑀸 𑀆𑀳𑀸’’𑀢𑀺 𑀓𑀣𑁂𑀢𑀼𑀓𑀸𑀫𑀢𑀸𑀬 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀧𑀞𑀫𑀁 𑀳𑀻’’𑀢𑀺𑀆𑀤𑀺. 𑀅𑀲𑁆𑀲𑀼𑀢𑀯𑀢𑀸 𑀧𑀼𑀣𑀼𑀚𑁆𑀚𑀦𑁂𑀦. 𑀢𑁂𑀦𑀸𑀢𑀺 𑀪𑀕𑀯𑀢𑀸. 𑀅𑀬𑀼𑀢𑁆𑀢𑀭𑀽𑀧𑀁 𑀓𑀢𑀁 ‘‘𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑀲𑁆𑀲 𑀯𑀺𑀪𑀸𑀯𑀺𑀢𑀢𑁆𑀢𑀸. 𑀅𑀭𑀽𑀧𑁂 𑀧𑀦 𑀢𑀣𑀸 𑀆𑀤𑀻𑀦𑀯𑀲𑁆𑀲 𑀅𑀯𑀺𑀪𑀸𑀯𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑀭𑀽𑀧’’𑀦𑁆𑀢𑀺, 𑀬𑀼𑀢𑁆𑀢𑀭𑀽𑀧𑀁 𑀯𑀺𑀬 𑀓𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀸𑀳𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑁄. ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀽𑀧𑀁 𑀕𑀢𑁄’’𑀢𑀺 𑀇𑀤𑀁 𑀪𑀕𑀯𑀢𑀸 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀭𑀽𑀧𑁂 𑀕𑀸𑀳𑁄 𑀧𑀝𑀺𑀓𑁆𑀔𑀺𑀢𑁆𑀢𑁄, 𑀦 𑀅𑀭𑀽𑀧𑁂, 𑀢𑀲𑁆𑀫𑀸 ‘‘𑀓𑀸𑀢𑀩𑁆𑀩𑁄 𑀦𑀼 𑀔𑁄 𑀲𑁄 𑀢𑀢𑁆𑀣𑀸’’𑀢𑀺 𑀫𑀺𑀘𑁆𑀙𑀸𑀕𑀡𑁆𑀳𑀦𑁆𑀢𑀸𑀦𑀁 𑀲𑁄 𑀢𑀢𑁄 𑀭𑀽𑀧𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀽𑀧𑀁 𑀕𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀺𑀝𑁆𑀞𑀫𑀸𑀦𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀁. ‘‘𑀆𑀧𑀚𑁆𑀚𑀺𑀢𑁆𑀯𑀸 𑀯𑀺𑀬 𑀳𑁄𑀢𑀻’’𑀢𑀺 𑀲𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 ‘‘𑀧𑀞𑀫𑀯𑀬𑁂’’𑀢𑀺𑀆𑀤𑀺𑀦𑀸 𑀭𑀽𑀧𑀲𑁆𑀲 𑀪𑁂𑀤𑀁 𑀯𑀬𑀸𑀤𑀻𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀧𑀸𑀤𑀲𑁆𑀲 𑀉𑀤𑁆𑀥𑀭𑀡𑁂𑀢𑀺 𑀬𑀣𑀸 𑀞𑀧𑀺𑀢𑀲𑁆𑀲 𑀧𑀸𑀤𑀲𑁆𑀲 𑀉𑀓𑁆𑀔𑀺𑀧𑀦𑁂. 𑀅𑀢𑀺𑀳𑀭𑀡𑀦𑁆𑀢𑀺 𑀬𑀣𑀸𑀉𑀤𑁆𑀥𑀢𑀁 𑀬𑀣𑀸𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀳𑀭𑀡𑀁. 𑀯𑀻𑀢𑀺𑀳𑀭𑀡𑀦𑁆𑀢𑀺 𑀉𑀤𑁆𑀥𑀢𑁄 𑀧𑀸𑀤𑁄 𑀬𑀣𑀸𑀝𑁆𑀞𑀺𑀢𑀁 𑀧𑀸𑀤𑀁 𑀬𑀣𑀸 𑀦 𑀖𑀝𑁆𑀝𑁂𑀢𑀺, 𑀏𑀯𑀁 𑀣𑁄𑀓𑀁 𑀧𑀲𑁆𑀲𑀢𑁄 𑀧𑀭𑀺𑀡𑀸𑀫𑁂𑀢𑁆𑀯𑀸 𑀳𑀭𑀡𑀁. 𑀯𑁄𑀲𑁆𑀲𑀚𑁆𑀚𑀦𑀦𑁆𑀢𑀺 𑀢𑀣𑀸 𑀧𑀭𑀧𑀸𑀤𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑀢𑁆𑀣𑀁 𑀅𑀯𑁄𑀲𑁆𑀲𑀚𑁆𑀚𑀦𑀁. 𑀲𑀦𑁆𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀯𑁄𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑀽𑀫𑀺𑀬𑀁 𑀲𑀫𑀁 𑀦𑀺𑀓𑁆𑀔𑀺𑀧𑀦𑀁 𑀞𑀧𑀦𑀁. 𑀲𑀦𑁆𑀦𑀺𑀭𑀼𑀚𑁆𑀛𑀦𑀦𑁆𑀢𑀺 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀩𑁆𑀩𑀲𑁄 𑀦𑀺𑀭𑀼𑀚𑁆𑀛𑀦𑀁 𑀉𑀧𑁆𑀧𑀻𑀴𑀦𑀁. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀞𑀫𑀯𑀬𑀸𑀤𑀺𑀓𑁂 𑀏𑀯. 𑀅𑀯𑀥𑀸𑀭𑀡𑁂𑀦 𑀢𑁂𑀲𑀁 𑀓𑁄𑀝𑁆𑀞𑀸𑀲𑀦𑁆𑀢𑀭𑀲𑀗𑁆𑀓𑀫𑀦𑀸𑀪𑀸𑀯𑀫𑀸𑀳. 𑀑𑀥𑀻𑀢𑀺 𑀪𑀸𑀯𑁄, 𑀧𑀩𑁆𑀩𑀦𑁆𑀢𑀺 𑀲𑀦𑁆𑀥𑀺. 𑀧𑀞𑀫𑀯𑀬𑀸𑀤𑀬𑁄 𑀏𑀯 𑀳𑁂𑀢𑁆𑀣 𑀑𑀥𑀺 𑀧𑀩𑁆𑀩𑀦𑁆𑀢𑀺 𑀘 𑀅𑀥𑀺𑀧𑁆𑀧𑁂𑀢𑀸. 𑀧𑀝𑀧𑀝𑀸𑀬𑀦𑁆𑀢𑀸𑀢𑀺 ‘‘𑀧𑀝𑀧𑀝𑀸’’𑀇𑀢𑀺 𑀓𑀭𑁄𑀦𑁆𑀢𑀸 𑀯𑀺𑀬, 𑀢𑁂𑀦 𑀦𑁂𑀲𑀁 𑀧𑀯𑀢𑁆𑀢𑀺𑀓𑁆𑀔𑀡𑀲𑁆𑀲 𑀇𑀢𑁆𑀢𑀭𑀢𑀁 𑀤𑀲𑁆𑀲𑁂𑀢𑀺. 𑀏𑀢𑀦𑁆𑀢𑀺 𑀏𑀢𑀁 𑀭𑀽𑀧𑀥𑀫𑁆𑀫𑀸𑀦𑀁 𑀬𑀣𑀸𑀯𑀼𑀢𑁆𑀢𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑀁 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯. 𑀯𑀝𑁆𑀝𑀺𑀧𑁆𑀧𑀤𑁂𑀲𑀦𑁆𑀢𑀺 𑀯𑀝𑁆𑀝𑀺𑀬𑀸 𑀧𑀼𑀮𑀓𑀁 𑀩𑀭𑀳𑀁. 𑀢𑀜𑁆𑀳𑀺 𑀯𑀝𑁆𑀝𑀺𑀬𑀸 𑀧𑀼𑀮𑀓𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀲𑀸 𑀤𑀻𑀧𑀚𑀸𑀮𑀸 𑀪𑀺𑀚𑁆𑀚𑀢𑀺. 𑀧𑀯𑁂𑀡𑀺𑀲𑀫𑁆𑀩𑀦𑁆𑀥𑀯𑀲𑁂𑀦𑀸𑀢𑀺 𑀲𑀦𑁆𑀢𑀢𑀺𑀯𑀲𑁂𑀦.

𑀭𑀢𑁆𑀢𑀺𑀦𑁆𑀢𑀺 𑀭𑀢𑁆𑀢𑀺𑀬𑀁. 𑀪𑀼𑀫𑁆𑀫𑀢𑁆𑀣𑁂 𑀳𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀏𑀯𑀁 𑀧𑀦 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀦𑀺𑀭𑁄𑀥𑀸𑀪𑀸𑀯𑀢𑁄. 𑀧𑀼𑀭𑀺𑀫𑀧𑀯𑁂𑀡𑀺𑀢𑁄𑀢𑀺 𑀭𑀽𑀧𑁂 𑀯𑀼𑀢𑁆𑀢𑀧𑀯𑁂𑀡𑀺𑀢𑁄. 𑀅𑀦𑁂𑀓𑀸𑀦𑀺 𑀘𑀺𑀢𑁆𑀢𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀣𑁂𑀭𑀯𑀸𑀤𑁂𑀦 𑀤𑀻𑀧𑁂𑀢𑀼𑀁 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀟𑁆𑀠𑀘𑀽𑀴𑀦𑁆𑀢𑀺 𑀣𑁄𑀓𑁂𑀦 𑀊𑀦𑀁 𑀉𑀧𑀟𑁆𑀠𑀁, 𑀢𑀲𑁆𑀲 𑀧𑀦 𑀉𑀧𑀟𑁆𑀠𑀁 𑀅𑀥𑀺𑀓𑀸𑀭𑀢𑁄 𑀯𑀸𑀳𑀲𑀢𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀟𑁆𑀠𑀘𑀼𑀤𑁆𑀤𑀲’’𑀦𑁆𑀢𑀺 𑀓𑁂𑀘𑀺, ‘‘𑀅𑀟𑁆𑀠𑀘𑀢𑀼𑀢𑁆𑀣’’𑀦𑁆𑀢𑀺 𑀅𑀧𑀭𑁂. ‘‘𑀲𑀸𑀥𑀺𑀓𑀁 𑀤𑀺𑀬𑀟𑁆𑀠𑀲𑀢𑀁 𑀯𑀸𑀳𑀸’’𑀢𑀺 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀤𑀦𑁆𑀢𑀻𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀘𑀢𑀼𑀦𑀸𑀴𑀺𑀓𑁄 𑀢𑀼𑀫𑁆𑀩𑁄. 𑀫𑀳𑀸𑀭𑀜𑁆𑀜𑀢𑀸𑀬 𑀧𑀯𑀤𑁆𑀥𑀁 𑀯𑀦𑀁 𑀧𑀯𑀦𑀦𑁆𑀢𑀺 𑀆𑀳 ‘‘𑀧𑀯𑀦𑁂𑀢𑀺 𑀫𑀳𑀸𑀯𑀦𑁂’’𑀢𑀺. 𑀢𑀦𑁆𑀢𑀺 𑀧𑀞𑀫𑀁 𑀕𑀳𑀺𑀢𑀲𑀸𑀔𑀁. 𑀅𑀬𑀫𑀢𑁆𑀣𑁄𑀢𑀺 𑀅𑀬𑀁 𑀪𑀽𑀫𑀺𑀁 𑀅𑀦𑁄𑀢𑀭𑀺𑀢𑁆𑀯𑀸 𑀞𑀺𑀢𑀲𑀸𑀔𑀸𑀬 𑀏𑀯 𑀕𑀳𑀡𑀲𑀗𑁆𑀔𑀸𑀢𑁄 𑀅𑀢𑁆𑀣𑁄. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀪𑀕𑀯𑀸 ‘‘𑀅𑀭𑀜𑁆𑀜𑁂’’𑀢𑀺 𑀯𑀢𑁆𑀯𑀸𑀧𑀺 ‘‘𑀧𑀯𑀦𑁂’’𑀢𑀺 𑀆𑀳.

𑀅𑀭𑀜𑁆𑀜𑀫𑀳𑀸𑀯𑀦𑀁 𑀯𑀺𑀬𑀸𑀢𑀺 𑀅𑀭𑀜𑁆𑀜𑀝𑁆𑀞𑀸𑀦𑁂 𑀩𑁆𑀭𑀳𑀸𑀭𑀜𑁆𑀜𑁂 𑀯𑀺𑀬. 𑀆𑀭𑀫𑁆𑀫𑀡𑁄𑀮𑀫𑁆𑀩𑀦𑀦𑁆𑀢𑀺 𑀆𑀭𑀫𑁆𑀫𑀡𑀲𑁆𑀲 𑀅𑀯𑀮𑀫𑁆𑀩𑀦𑀁. 𑀦 𑀯𑀢𑁆𑀢𑀩𑁆𑀩𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀯𑀺𑀦𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀏𑀓𑀚𑀸𑀢𑀺𑀬𑀦𑁆𑀢𑀺 𑀭𑀽𑀧𑀸𑀤𑀺𑀦𑀻𑀮𑀸𑀤𑀺𑀏𑀓𑀲𑀪𑀸𑀯𑀁. ‘‘𑀤𑀺𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀆𑀘𑀬𑁄𑀧𑀺 𑀅𑀧𑀘𑀬𑁄𑀧𑀻’’𑀢𑀺 𑀯𑀤𑀦𑁆𑀢𑁂𑀦 𑀭𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸 𑀅𑀭𑀽𑀧𑁂 𑀕𑀸𑀳𑁄 𑀧𑀢𑀺𑀝𑁆𑀞𑀸𑀧𑀺𑀢𑁄 𑀦𑀸𑀫, ‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁂𑀦 𑀅𑀭𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸 𑀭𑀽𑀧𑁂 𑀕𑀸𑀳𑁄 𑀧𑀢𑀺𑀝𑁆𑀞𑀸𑀧𑀺𑀢𑁄 𑀦𑀸𑀫.

𑀦𑀦𑁆𑀢𑀺 𑀕𑀸𑀳𑀁. 𑀉𑀪𑀬𑀢𑁄𑀢𑀺 𑀭𑀽𑀧𑀢𑁄 𑀘 𑀅𑀭𑀽𑀧𑀢𑁄 𑀘. 𑀳𑀭𑀺𑀲𑁆𑀲𑀸𑀫𑀻𑀢𑀺 𑀦𑀻𑀳𑀭𑀺𑀲𑁆𑀲𑀸𑀫𑀺. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀫𑀦𑁆𑀢𑀁 𑀚𑀧𑁆𑀧𑀺𑀢𑁆𑀯𑀸. 𑀓𑀡𑁆𑀡𑁂 𑀥𑀼𑀫𑁂𑀢𑁆𑀯𑀸𑀢𑀺 𑀓𑀡𑁆𑀡𑁂 𑀥𑀫𑁂𑀢𑁆𑀯𑀸. 𑀅𑀲𑁆𑀲𑀸𑀢𑀺 𑀯𑀺𑀲𑀲𑁆𑀲. 𑀦𑀺𑀫𑁆𑀫𑀣𑁂𑀢𑁆𑀯𑀸𑀢𑀺 𑀦𑀺𑀫𑁆𑀫𑀤𑁆𑀤𑀺𑀢𑁆𑀯𑀸, 𑀦𑀻𑀳𑀭𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀕𑁆𑀕𑁄𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄. ‘‘𑀦𑀺𑀩𑁆𑀩𑀺𑀦𑁆𑀤’’𑀦𑁆𑀢𑀺 𑀇𑀫𑀺𑀦𑀸 𑀩𑀮𑀯𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸.

𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀧𑀘𑁆𑀘𑀬𑀪𑀸𑀯𑁂𑀦 𑀲𑀼𑀔𑀯𑁂𑀤𑀦𑀸𑀬 𑀳𑀺𑀢𑀦𑁆𑀢𑀺 𑀲𑀼𑀔𑀯𑁂𑀤𑀦𑀺𑀬𑀁. 𑀢𑁂𑀦𑀸𑀳 ‘‘𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬’’𑀦𑁆𑀢𑀺. 𑀧𑀘𑁆𑀘𑀬𑀪𑀸𑀯𑁄 𑀘 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸, 𑀦 𑀲𑀳𑀚𑀸𑀢𑀓𑁄𑀝𑀺𑀬𑀸. 𑀢𑁂𑀦𑀸𑀳 ‘‘𑀦𑀦𑀼 𑀘𑀸’’𑀢𑀺𑀆𑀤𑀺. 𑀚𑀯𑀦𑀯𑁂𑀤𑀦𑀸𑀬𑀸𑀢𑀺 𑀚𑀯𑀦𑀘𑀺𑀢𑁆𑀢𑀲𑀳𑀕𑀢𑀸𑀬 𑀯𑁂𑀤𑀦𑀸𑀬. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬. 𑀏𑀢𑀦𑁆𑀢𑀺 𑀏𑀢𑀁 ‘‘𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬’’𑀦𑁆𑀢𑀺 𑀯𑀘𑀦𑀁 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀦𑀦𑀼 𑀘 𑀲𑁄𑀢𑀲𑀫𑁆𑀨𑀲𑁆𑀲𑁄 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀦 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀁 𑀅𑀢𑀺𑀤𑀺𑀲𑀢𑀺. 𑀲𑁄 𑀲𑀫𑁆𑀨𑀲𑁆𑀲𑁄 𑀚𑀸𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀢𑀚𑁆𑀚𑀸𑀢𑀺𑀓𑀁, 𑀯𑁂𑀤𑀬𑀺𑀢𑀁. 𑀢𑀁 𑀧𑀦 𑀬𑀲𑁆𑀫𑀸 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀸𑀭𑀼𑀧𑁆𑀧𑀁 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 𑀘 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀺𑀅𑀦𑀼𑀲𑀸𑀭𑁂𑀦. 𑀅𑀥𑀭𑀸𑀭𑀡𑀺𑀬𑀁 𑀉𑀢𑁆𑀢𑀭𑀸𑀭𑀡𑀺𑀬𑀸 𑀫𑀦𑁆𑀢𑀦𑀯𑀲𑁂𑀦 𑀖𑀝𑁆𑀝𑀦𑀁 𑀇𑀯 𑀲𑀗𑁆𑀖𑀝𑁆𑀝𑀦𑀁 𑀨𑀲𑁆𑀲𑁂𑀦 𑀬𑀼𑀕𑀕𑁆𑀕𑀸𑀳𑁄, 𑀢𑀲𑁆𑀲 𑀧𑀦 𑀖𑀝𑁆𑀝𑀦𑀲𑁆𑀲 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀺𑀡𑁆𑀟𑀺𑀢𑀪𑀸𑀯𑁄 𑀇𑀥 𑀲𑀫𑁄𑀥𑀸𑀦𑀁, 𑀦 𑀓𑁂𑀲𑀜𑁆𑀘𑀺 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀲𑀳𑀸𑀯𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀖𑀝𑁆𑀝𑀦𑀲𑀫𑁆𑀧𑀺𑀡𑁆𑀟𑀦𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀕𑁆𑀕𑀺𑀘𑀼𑀡𑁆𑀡𑁄𑀢𑀺 𑀯𑀺𑀧𑁆𑀨𑀼𑀮𑀺𑀗𑁆𑀕𑀁. 𑀯𑀢𑁆𑀣𑀽𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀼 𑀯𑀺𑀲𑀬𑀲𑀗𑁆𑀖𑀝𑁆𑀝𑀦𑀢𑁄. 𑀮𑀩𑁆𑀪𑀫𑀸𑀦𑁄𑀯 𑀥𑀫𑁆𑀫𑁄 𑀲𑀗𑁆𑀖𑀝𑁆𑀝𑀦𑀁 𑀯𑀺𑀬 𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀖𑀝𑁆𑀝𑀦𑀁 𑀯𑀺𑀬 𑀨𑀲𑁆𑀲𑁄’’𑀢𑀺. 𑀉𑀲𑁆𑀫𑀸𑀥𑀸𑀢𑀼 𑀯𑀺𑀬 𑀯𑁂𑀤𑀦𑀸 𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸.

𑀤𑀼𑀢𑀺𑀬𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀼𑀢𑁆𑀢𑀫𑀁𑀲𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀳𑁂𑀝𑁆𑀞𑀸 𑀆𑀳𑀸𑀭𑀯𑀕𑁆𑀕𑀲𑁆𑀲 𑀧𑀞𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀮𑀸𑀪𑀲𑀓𑁆𑀓𑀸𑀭𑁂𑀦𑀸𑀢𑀺 𑀮𑀸𑀪𑀲𑀓𑁆𑀓𑀸𑀭𑀲𑀗𑁆𑀔𑀸𑀢𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀓𑁂𑀘𑀺. 𑀮𑀸𑀪𑀲𑀓𑁆𑀓𑀸𑀭𑁂 𑀯𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀧𑀭𑁂. 𑀬𑁄 𑀳𑀺 𑀮𑀸𑀪𑀲𑀓𑁆𑀓𑀸𑀭𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀬𑁂𑀲𑀼 𑀕𑁂𑀥𑁂𑀦 𑀪𑀺𑀓𑁆𑀔𑀽𑀦𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀚𑀸𑀢𑁄, 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀪𑀕𑀯𑀸 𑀇𑀫𑀁 𑀤𑁂𑀲𑀦𑀁 𑀦𑀺𑀓𑁆𑀔𑀺𑀧𑀺. 𑀬𑀫𑀓𑀫𑀳𑀸𑀫𑁂𑀖𑁄𑀢𑀺 𑀳𑁂𑀝𑁆𑀞𑀸 𑀑𑀮𑀫𑁆𑀩𑀦𑀉𑀧𑀭𑀺𑀉𑀕𑁆𑀕𑀫𑀦𑀯𑀲𑁂𑀦 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑁄 𑀬𑀼𑀕𑀴𑀫𑀳𑀸𑀫𑁂𑀖𑁄.

𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀪𑀕𑀯𑀢𑀺 𑀓𑀢𑁆𑀣𑀘𑀺 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑁂, 𑀘𑀸𑀭𑀺𑀓𑀫𑁆𑀧𑀺 𑀕𑀘𑁆𑀙𑀦𑁆𑀢𑁂 𑀅𑀦𑀼𑀩𑀦𑁆𑀥𑀦𑁆𑀢𑀺 𑀘. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀬𑁂𑀪𑀼𑀬𑁆𑀬𑁂𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀧𑀽𑀭𑀺𑀢𑀤𑀸𑀦𑀧𑀸𑀭𑀫𑀺𑀲𑀜𑁆𑀘𑀬𑀢𑁆𑀢𑀸 𑀢𑀤𑀸 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀻’’𑀢𑀺. 𑀲𑀓𑁆𑀓𑀢𑁄𑀢𑀺 𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑁄. 𑀕𑀭𑀼𑀓𑀢𑁄𑀢𑀺 𑀕𑀭𑀼𑀓𑀸𑀭𑀧𑁆𑀧𑀢𑁆𑀢𑁄. 𑀫𑀸𑀦𑀺𑀢𑁄𑀢𑀺 𑀩𑀳𑀼𑀫𑀢𑁄 𑀫𑀦𑀲𑀸 𑀧𑀺𑀬𑀸𑀬𑀺𑀢𑁄 𑀘. 𑀧𑀽𑀚𑀺𑀢𑁄𑀢𑀺 𑀫𑀸𑀮𑀸𑀤𑀺𑀧𑀽𑀚𑀸𑀬 𑀘𑁂𑀯 𑀘𑀢𑀼𑀧𑀘𑁆𑀘𑀬𑀸𑀪𑀺𑀧𑀽𑀚𑀸𑀬 𑀘 𑀧𑀽𑀚𑀺𑀢𑁄. 𑀅𑀧𑀘𑀺𑀢𑁄𑀢𑀺 𑀅𑀧𑀘𑀸𑀬𑀦𑀧𑁆𑀧𑀢𑁆𑀢𑁄. 𑀬𑀲𑁆𑀲 𑀳𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀓𑁆𑀓𑀢𑁆𑀯𑀸 𑀲𑀼𑀅𑀪𑀺𑀲𑀗𑁆𑀔𑀢𑁂 𑀧𑀡𑀻𑀢𑀧𑀡𑀻𑀢𑁂 𑀉𑀧𑀦𑁂𑀦𑁆𑀢𑀺, 𑀲𑁄 𑀲𑀓𑁆𑀓𑀢𑁄. 𑀬𑀲𑁆𑀫𑀺𑀁 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀲𑁄 𑀕𑀭𑀼𑀓𑀢𑁄. 𑀬𑀁 𑀫𑀦𑀲𑀸 𑀧𑀺𑀬𑀸𑀬𑀦𑁆𑀢𑀺 𑀩𑀳𑀼𑀫𑀜𑁆𑀜𑀦𑁆𑀢𑀺, 𑀲𑁄 𑀩𑀳𑀼𑀫𑀢𑁄. 𑀬𑀲𑁆𑀲 𑀲𑀩𑁆𑀩𑀫𑁂𑀢𑀁 𑀧𑀽𑀚𑀸𑀯𑀲𑁂𑀦 𑀓𑀭𑁄𑀦𑁆𑀢𑀺, 𑀲𑁄 𑀧𑀽𑀚𑀺𑀢𑁄. 𑀬𑀲𑁆𑀲 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀲𑁄 𑀅𑀧𑀘𑀺𑀢𑁄. 𑀪𑀕𑀯𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀮𑁄𑀓𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀉𑀤𑀸. 𑁧𑁪; 𑀲𑀁. 𑀦𑀺. 𑁨.𑁭𑁦). 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀦𑁆𑀢𑀺 𑀮𑀸𑀪𑀲𑁆𑀲 𑀘 𑀬𑀲𑀲𑁆𑀲 𑀘 𑀅𑀕𑁆𑀕𑀁 𑀉𑀓𑁆𑀓𑀁𑀲𑀁 𑀧𑀢𑁆𑀢𑀁.

𑀧𑀞𑀫𑀸𑀳𑀸𑀭𑀯𑀡𑁆𑀡𑀦𑀸

𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀥𑀫𑁆𑀫𑀲𑀁𑀯𑁂𑀕𑁄. 𑀥𑀼𑀯𑀧𑀝𑀺𑀲𑁂𑀯𑀦𑀝𑁆𑀞𑀸𑀦𑀜𑁆𑀳𑁂𑀢𑀁 𑀲𑀢𑁆𑀢𑀸𑀦𑀁, 𑀬𑀤𑀺𑀤𑀁 𑀆𑀳𑀸𑀭𑀧𑀭𑀺𑀪𑁄𑀕𑁄, 𑀢𑀲𑁆𑀫𑀸 𑀦 𑀢𑀢𑁆𑀣 𑀅𑀧𑀘𑁆𑀘𑀯𑁂𑀓𑁆𑀔𑀡𑀫𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀢𑀼𑀁 𑀲𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀳𑀸𑀭𑀸𑀢𑀺 ‘‘𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀆𑀳𑀸𑀭𑁂𑀲𑀼 𑀯𑀼𑀢𑁆𑀢𑀯𑀺𑀥𑀺𑀁 𑀲𑀦𑁆𑀥𑀸𑀬 𑀆𑀳 ‘‘𑀆𑀳𑀸𑀭𑀸’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀢𑁆𑀣 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀯𑀡𑁆𑀡𑀦𑀁 𑀲𑀦𑁆𑀥𑀸𑀬 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀆𑀤𑀻𑀦𑀯𑀦𑁆𑀢𑀺 𑀤𑁄𑀲𑀁. 𑀚𑀸𑀬𑀸𑀢𑀺 𑀪𑀭𑀺𑀬𑀸. 𑀧𑀢𑀻𑀢𑀺 𑀪𑀢𑁆𑀢𑀸. 𑀅𑀧𑁂𑀓𑁆𑀔𑀸𑀲𑀤𑁆𑀤𑀸 𑀘𑁂𑀢𑁂 𑀧𑀺𑀢𑀸𑀧𑀼𑀢𑁆𑀢𑀲𑀤𑁆𑀤𑀸 𑀯𑀺𑀬, 𑀧𑀸𑀴𑀺𑀬𑀁 𑀧𑀦 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀲𑀸𑀦𑀼𑀦𑀸𑀲𑀺𑀓𑀜𑁆𑀘 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀚𑀸𑀬𑀫𑁆𑀧𑀢𑀺𑀓𑀸’’𑀢𑀺. 𑀲𑀫𑁆𑀫𑀸 𑀨𑀮𑀁 𑀯𑀳𑀢𑀻𑀢𑀺 𑀲𑀫𑁆𑀩𑀮𑀁, 𑀲𑀼𑀔𑀸𑀯𑀳𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀢𑀁 ‘‘𑀧𑀣𑁂 𑀳𑀺𑀢𑀦𑁆𑀢𑀺 𑀧𑀸𑀣𑁂𑀬𑁆𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀕𑁆𑀕𑀲𑁆𑀲 𑀓𑀦𑁆𑀢𑀸𑀭𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀦𑁆𑀢𑀸𑀭𑀪𑀽𑀢𑀁 𑀫𑀕𑁆𑀕’’𑀦𑁆𑀢𑀺. 𑀤𑀼𑀮𑁆𑀮𑀪𑀢𑀸𑀬 𑀢𑀁 𑀉𑀤𑀓𑀁 𑀢𑀢𑁆𑀣 𑀢𑀸𑀭𑁂𑀢𑀻𑀢𑀺 𑀓𑀦𑁆𑀢𑀸𑀭𑀁, 𑀦𑀺𑀭𑀼𑀤𑀓𑀁 𑀫𑀳𑀸𑀯𑀦𑀁. 𑀭𑀼𑀴𑁆𑀳𑀻𑀯𑀲𑁂𑀦 𑀇𑀢𑀭𑀫𑁆𑀧𑀺 𑀫𑀳𑀸𑀯𑀦𑀁 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀘𑁄𑀭𑀓𑀦𑁆𑀢𑀸𑀭’’𑀦𑁆𑀢𑀺𑀆𑀤𑀺. 𑀧𑀭𑀭𑀸𑀚𑀽𑀦𑀁 𑀯𑁂𑀭𑀺𑀆𑀤𑀻𑀦𑀜𑁆𑀘 𑀯𑀲𑁂𑀦 𑀲𑀧𑁆𑀧𑀝𑀺𑀪𑀬𑀫𑁆𑀧𑀺 𑀅𑀭𑀜𑁆𑀜𑀁 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀯𑀺𑀥’’𑀦𑁆𑀢𑀺.

𑀖𑀦𑀖𑀦𑀝𑁆𑀞𑀸𑀦𑀢𑁄𑀢𑀺 𑀫𑀁𑀲𑀲𑁆𑀲 𑀩𑀳𑀮𑀩𑀳𑀮𑀁 𑀣𑀽𑀮𑀣𑀽𑀮𑀁 𑀳𑀼𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄. ‘‘𑀢𑀸𑀤𑀺𑀲𑀜𑁆𑀳𑀺 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀲𑀼𑀓𑁆𑀔𑀸𑀧𑀺𑀢𑀁 𑀯𑀮𑁆𑀮𑀽𑀭𑀁. 𑀲𑀽𑀮𑁂 𑀆𑀯𑀼𑀦𑀺𑀢𑁆𑀯𑀸 𑀧𑀓𑁆𑀓𑀫𑀁𑀲𑀁 𑀲𑀽𑀮𑀫𑀁𑀲𑀁. 𑀯𑀺𑀭𑀴𑀘𑁆𑀙𑀸𑀬𑀸𑀬𑀁 𑀦𑀺𑀲𑀻𑀤𑀺𑀁𑀲𑀼 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑁄 𑀳𑀼𑀢𑁆𑀯𑀸. 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀤𑁂𑀯𑀢𑀸𑀬𑀸𑀘𑀦𑀸𑀤𑀻𑀳𑀻𑀢𑀺 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀸𑀤𑀺𑀯𑀢𑀘𑀭𑀡𑁂𑀳𑀺 𑀘𑁂𑀯 𑀤𑁂𑀯𑀢𑀸𑀬𑀸𑀘𑀦𑀸𑀤𑀻𑀳𑀺 𑀧𑀡𑀺𑀥𑀺𑀓𑀫𑁆𑀫𑁂𑀳𑀺 𑀘 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁.

𑀬𑀲𑁆𑀫𑀸 𑀧𑀦 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀳𑀸𑀭𑀧𑀭𑀺𑀪𑁄𑀕𑀲𑁆𑀲 𑀑𑀧𑀫𑁆𑀫𑀪𑀸𑀯𑁂𑀦 𑀢𑁂𑀲𑀁 𑀚𑀸𑀬𑀫𑁆𑀧𑀢𑀺𑀓𑀸𑀦𑀁 𑀧𑀼𑀢𑁆𑀢𑀫𑀁𑀲𑀧𑀭𑀺𑀪𑁄𑀕𑁄 𑀇𑀥 𑀪𑀕𑀯𑀢𑀸 𑀆𑀦𑀻𑀢𑁄, 𑀢𑀲𑁆𑀫𑀸𑀲𑁆𑀲 𑀦𑀸𑀦𑀸𑀓𑀸𑀭𑁂𑀳𑀺 𑀑𑀧𑀫𑁆𑀫𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑁂𑀲𑀁 𑀲𑁄 𑀧𑀼𑀢𑁆𑀢𑀫𑀁𑀲𑀸𑀳𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀲𑀚𑀸𑀢𑀺𑀫𑀁𑀲𑀢𑀸𑀬𑀸𑀢𑀺 𑀲𑀫𑀸𑀦𑀚𑀸𑀢𑀺𑀓𑀫𑀁𑀲𑀪𑀸𑀯𑁂𑀦, 𑀫𑀦𑀼𑀲𑁆𑀲𑀫𑀁𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀲𑀼𑀲𑁆𑀲𑀫𑀁𑀲𑀜𑁆𑀳𑀺 𑀓𑀼𑀮𑀧𑁆𑀧𑀲𑀼𑀢𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀼𑀜𑁆𑀜𑀁 𑀳𑁄𑀢𑀺 𑀅𑀧𑀭𑀺𑀘𑀺𑀢𑀪𑀸𑀯𑀢𑁄 𑀕𑀸𑀭𑀬𑁆𑀳𑀪𑀸𑀯𑀢𑁄 𑀘, 𑀢𑀢𑁄 𑀏𑀯 𑀜𑀸𑀢𑀺𑀆𑀤𑀺𑀫𑀁𑀲𑀢𑀸𑀬𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀭𑀼𑀡𑀫𑀁𑀲𑀢𑀸𑀬𑀸𑀢𑀺𑀆𑀤𑀺 𑀧𑀦 𑀲𑀪𑀸𑀯𑀢𑁄 𑀅𑀦𑀪𑀺𑀲𑀗𑁆𑀔𑀸𑀭𑀢𑁄 𑀘 𑀅𑀫𑀦𑀼𑀜𑁆𑀜𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀥𑀽𑀧𑀺𑀢𑀢𑀸𑀬𑀸𑀢𑀺 𑀅𑀥𑀽𑀧𑀺𑀢𑀪𑀸𑀯𑀢𑁄. 𑀫𑀚𑁆𑀛𑀢𑁆𑀢𑀪𑀸𑀯𑁂𑀬𑁂𑀯 𑀞𑀺𑀢𑀸. 𑀢𑀢𑁄 𑀏𑀯 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂 𑀞𑀺𑀢𑀸𑀢𑀺 𑀯𑀼𑀢𑁆𑀢𑀁 𑀓𑀦𑁆𑀢𑀸𑀭𑀢𑁄 𑀦𑀺𑀢𑁆𑀣𑀭𑀡𑀚𑁆𑀛𑀸𑀲𑀬𑀢𑀸𑀬. 𑀇𑀤𑀸𑀦𑀺 𑀬𑁂 𑀘 𑀢𑁂 𑀅𑀦𑀧𑀦𑀻𑀢𑀸𑀳𑀸𑀭𑁄, 𑀦 𑀬𑀸𑀯𑀤𑀢𑁆𑀣𑀧𑀭𑀺𑀪𑁄𑀕𑁄 𑀯𑀺𑀕𑀢𑀫𑀘𑁆𑀙𑁂𑀭𑀫𑀮𑀢𑀸 𑀲𑀫𑁆𑀫𑁄𑀳𑀸𑀪𑀸𑀯𑁄 𑀆𑀬𑀢𑀺𑀁 𑀢𑀢𑁆𑀣 𑀧𑀢𑁆𑀣𑀦𑀸𑀪𑀸𑀯𑁄 𑀲𑀦𑁆𑀦𑀺𑀥𑀺𑀓𑀸𑀭𑀸𑀪𑀸𑀯𑁄 𑀅𑀧𑀭𑀺𑀘𑁆𑀘𑀚𑀦𑀫𑀤𑀢𑁆𑀣𑀸𑀪𑀸𑀯𑁄 𑀅𑀳𑀻𑀴𑀦𑀸 𑀅𑀯𑀺𑀯𑀸𑀤𑀧𑀭𑀺𑀪𑁄𑀕𑁄 𑀘𑀸𑀢𑀺 𑀉𑀧𑀫𑀸𑀬𑀁 𑀮𑀩𑁆𑀪𑀫𑀸𑀦𑀸 𑀧𑀓𑀸𑀭𑀯𑀺𑀲𑁂𑀲𑀸, 𑀢𑁂 𑀢𑀣𑀸 𑀦𑀻𑀳𑀭𑀺𑀢𑁆𑀯𑀸 𑀉𑀧𑀫𑁂𑀬𑁆𑀬𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀦 𑀅𑀝𑁆𑀞𑀺𑀦𑁆𑀳𑀸𑀭𑀼𑀘𑀫𑁆𑀫𑀦𑀺𑀲𑁆𑀲𑀺𑀢𑀝𑁆𑀞𑀸𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀓𑀸𑀭𑀡𑀦𑁆𑀢𑀺 𑀢𑀁 𑀢𑁂𑀲𑀁 𑀚𑀸𑀬𑀫𑁆𑀧𑀢𑀻𑀦𑀁 𑀬𑀸𑀯𑀤𑁂𑀯 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀼𑀢𑁆𑀢𑀫𑀁𑀲𑀧𑀭𑀺𑀪𑁄𑀕𑀲𑀗𑁆𑀔𑀸𑀢𑀁 𑀓𑀸𑀭𑀡𑀁.

𑀦𑀺𑀲𑁆𑀲𑀦𑁆𑀤𑀧𑀸𑀝𑀺𑀓𑀼𑀮𑁆𑀬𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀯𑀻𑀫𑀁𑀲𑀢𑀺. 𑀬𑀣𑀸 𑀢𑁂 𑀚𑀸𑀬𑀫𑁆𑀧𑀢𑀺𑀓𑀸𑀢𑀺𑀆𑀤𑀺𑀧𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁. ‘‘𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄 𑀆𑀳𑀸𑀭𑁄’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀦𑀧𑀦𑁂𑀢𑁆𑀯𑀸. 𑀯𑀝𑁆𑀝𑀓𑁂𑀦 𑀯𑀺𑀬 𑀓𑀼𑀓𑁆𑀓𑀼𑀝𑁂𑀦 𑀯𑀺𑀬 𑀘𑀸𑀢𑀺 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀁. 𑀑𑀥𑀺𑀁 𑀅𑀤𑀲𑁆𑀲𑁂𑀢𑁆𑀯𑀸𑀢𑀺 𑀫𑀳𑀦𑁆𑀢𑀕𑁆𑀕𑀳𑀡𑀯𑀲𑁂𑀦 𑀑𑀥𑀺𑀁 𑀅𑀓𑀢𑁆𑀯𑀸. 𑀲𑀻𑀳𑁂𑀦 𑀯𑀺𑀬𑀸𑀢𑀺 𑀲𑀤𑀺𑀲𑀽𑀤𑀸𑀳𑀭𑀡𑀁. 𑀲𑁄 𑀓𑀺𑀭 𑀲𑀧𑀤𑀸𑀦𑀫𑁂𑀯 𑀔𑀸𑀤𑀢𑀺.

𑀅𑀕𑀥𑀺𑀢𑀅𑀫𑀼𑀘𑁆𑀙𑀺𑀢𑀸𑀤𑀺𑀪𑀸𑀯𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 ‘‘𑀅𑀫𑀘𑁆𑀙𑀭𑀸𑀬𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀻𑀢𑀺 𑀤𑀺𑀝𑁆𑀞𑀺 𑀅𑀢𑁆𑀢𑀽𑀧𑀮𑀤𑁆𑀥𑀺, 𑀢𑀁𑀲𑀳𑀕𑀢𑁂𑀦 𑀲𑀫𑁆𑀫𑁄𑀳𑁂𑀦 𑀅𑀢𑁆𑀢𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀻𑀢𑀺. 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦𑀧𑀻𑀢𑀺 ‘‘𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦𑀧𑀺.

‘‘𑀅𑀳𑁄 𑀯𑀢 𑀫𑀬𑀁…𑀧𑁂… 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀯𑀸, ‘‘𑀳𑀺𑀬𑁆𑀬𑁄 𑀯𑀺𑀬…𑀧𑁂… 𑀦 𑀮𑀤𑁆𑀥’’𑀦𑁆𑀢𑀺 𑀅𑀦𑀼𑀲𑁄𑀘𑀦𑀁 𑀯𑀸 𑀅𑀓𑀢𑁆𑀯𑀸𑀢𑀺 𑀬𑁄𑀚𑀦𑀸.

‘‘𑀲𑀦𑁆𑀦𑀺𑀥𑀺𑀁 𑀦 𑀅𑀓𑀁𑀲𑀼, 𑀪𑀽𑀫𑀺𑀬𑀁 𑀯𑀸 𑀦𑀺𑀔𑀡𑀺𑀁𑀲𑀼, 𑀅𑀕𑁆𑀕𑀺𑀦𑀸 𑀯𑀸 𑀛𑀸𑀧𑀬𑀺𑀁𑀲𑀽’’𑀢𑀺 𑀦-𑀓𑀸𑀭𑀁 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀏𑀯𑀁 𑀲𑀩𑁆𑀩𑀢𑁆𑀣.

𑀧𑀺𑀡𑁆𑀟𑀧𑀸𑀢𑀁 𑀯𑀸 𑀅𑀳𑀻𑀴𑁂𑀦𑁆𑀢𑁂𑀦 𑀤𑀸𑀬𑀓𑀁 𑀯𑀸 𑀅𑀳𑀻𑀴𑁂𑀦𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲 𑀧𑀢𑁆𑀢𑀧𑀸𑀡𑀻𑀢𑀺 𑀲𑁄 𑀧𑀢𑁆𑀢𑀳𑀢𑁆𑀣𑁄. 𑀦𑀸𑀯𑀚𑀸𑀦𑀺𑀬𑀸𑀢𑀺 𑀦 𑀅𑀯𑀚𑀸𑀦𑀺𑀬𑀸. 𑀅𑀢𑀺𑀫𑀜𑁆𑀜𑀢𑀻𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺, 𑀅𑀯𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄.

‘‘𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑁂’’𑀢𑀺 𑀯𑀢𑁆𑀯𑀸 𑀢𑀸𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀧𑀭𑀺𑀚𑀸𑀦𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀯𑀢𑁆𑀣𑀼𑀓𑀯𑀲𑁂𑀦𑀸𑀢𑀺 𑀲𑀲𑀫𑁆𑀪𑀸𑀭𑀯𑀲𑁂𑀦, 𑀲𑀪𑀸𑀯𑀢𑁄 𑀧𑀦 𑀭𑀽𑀧𑀸𑀳𑀭𑀡𑀁 𑀑𑀚𑀫𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀮𑀓𑁆𑀔𑀡𑀁. 𑀓𑀸𑀫𑀁 𑀭𑀲𑀸𑀭𑀫𑁆𑀫𑀡𑀁 𑀚𑀺𑀯𑁆𑀳𑀸𑀧𑀲𑀸𑀤𑁂 𑀧𑀝𑀺𑀳𑀜𑁆𑀜𑀢𑀺, 𑀢𑁂𑀦 𑀧𑀦 𑀅𑀯𑀺𑀦𑀸𑀪𑀸𑀯𑀢𑁄 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑀸𑀳𑀺𑀢𑀸𑀬 𑀘 𑀚𑀺𑀯𑁆𑀳𑀸𑀧𑀲𑀸𑀤𑀲𑁆𑀲 ‘‘𑀑𑀚𑀝𑁆𑀞𑀫𑀓𑀭𑀽𑀧𑀁 𑀓𑀢𑁆𑀣 𑀧𑀝𑀺𑀳𑀜𑁆𑀜𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀚𑀺𑀯𑁆𑀳𑀸𑀧𑀲𑀸𑀤𑀲𑁆𑀲. 𑀇𑀫𑁂 𑀥𑀫𑁆𑀫𑀸𑀢𑀺 𑀇𑀫𑁂 𑀬𑀣𑀸𑀯𑀼𑀢𑁆𑀢𑀪𑀽𑀢𑀼𑀧𑀸𑀤𑀸𑀬𑀥𑀫𑁆𑀫𑀸. 𑀢𑀦𑁆𑀢𑀺 𑀭𑀽𑀧𑀔𑀦𑁆𑀥𑀁. 𑀧𑀭𑀺𑀕𑁆𑀕𑀡𑁆𑀳𑀢𑁄𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲. 𑀉𑀧𑁆𑀧𑀦𑁆𑀦𑀸 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸𑀢𑀺 𑀲𑀩𑁆𑀩𑁂𑀧𑀺 𑀬𑁂 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀸, 𑀢𑁂𑀳𑀺 𑀲𑀳𑀧𑁆𑀧𑀯𑀢𑁆𑀢𑀸𑀯 𑀲𑀩𑁆𑀩𑁂𑀧𑀺 𑀇𑀫𑁂. 𑀲𑀭𑀲𑀮𑀓𑁆𑀔𑀡𑀢𑁄𑀢𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀢𑁄 𑀮𑀓𑁆𑀔𑀡𑀢𑁄 𑀘. 𑀢𑁂𑀲𑀁 𑀦𑀸𑀫𑀭𑀽𑀧𑀪𑀸𑀯𑁂𑀦 𑀯𑀯𑀢𑁆𑀣𑀧𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑁄 𑀯𑀺𑀜𑁆𑀜𑀸𑀡𑀁. ‘‘𑀢𑀲𑁆𑀲 𑀲𑀗𑁆𑀔𑀸𑀭𑀸 𑀢𑁂𑀲𑀁 𑀅𑀯𑀺𑀚𑁆𑀚𑀸’’𑀢𑀺 𑀏𑀯𑀁 𑀉𑀤𑁆𑀥𑀁 𑀆𑀭𑁄𑀳𑀦𑀯𑀲𑁂𑀦 𑀧𑀘𑁆𑀘𑀬𑀁. 𑀅𑀥𑁄𑀑𑀭𑁄𑀳𑀦𑀯𑀲𑁂𑀦 𑀧𑀦 𑀲𑀴𑀸𑀬𑀢𑀦𑀸𑀤𑀺𑀓𑁂 𑀧𑀭𑀺𑀬𑁂𑀲𑀦𑁆𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀲𑁆𑀲𑀢𑀺. 𑀲𑀴𑀸𑀬𑀢𑀦𑀸𑀤𑀬𑁄𑀧𑀺 𑀳𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀬𑀣𑀸𑀭𑀳𑀁 𑀧𑀘𑁆𑀘𑀬𑀪𑀸𑀯𑁂𑀦 𑀯𑀯𑀢𑁆𑀣𑀧𑁂𑀢𑀩𑁆𑀩𑀸𑀢𑀺. 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑀢𑁆𑀢𑀸𑀢𑀺 ‘‘𑀇𑀤𑀁 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀪𑀺𑀬𑁆𑀬𑁄, 𑀇𑀤𑀁 𑀦𑀸𑀫𑀁, 𑀏𑀢𑁆𑀢𑀓𑀁 𑀦𑀸𑀫𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀘 𑀬𑀣𑀸𑀪𑀽𑀢𑀁 𑀤𑀺𑀝𑁆𑀞𑀢𑁆𑀢𑀸. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀢𑀺 𑀇𑀫𑀸𑀲𑀁 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦. 𑀲𑁄𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀢𑀺𑀮𑀓𑁆𑀔𑀡…𑀧𑁂… 𑀲𑀗𑁆𑀔𑀸𑀢𑀸𑀬𑀸𑀢𑀺 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀮𑀓𑁆𑀔𑀡𑀯𑀦𑁆𑀢𑀲𑀫𑁆𑀫𑀲𑀦𑀯𑀲𑁂𑀦 𑀘 𑀧𑀯𑀢𑁆𑀢𑀜𑀸𑀡𑀲𑀗𑁆𑀔𑀸𑀢𑀸𑀬. 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀺 𑀅𑀦𑀯𑀲𑁂𑀲𑀢𑁄 𑀦𑀸𑀫𑀭𑀽𑀧𑀲𑁆𑀲 𑀜𑀸𑀢𑀢𑁆𑀢𑀸 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘 𑀆𑀳𑀸𑀭𑀲𑁆𑀲. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀬𑁂𑀯𑀸’’𑀢𑀺𑀆𑀤𑀺. 𑀙𑀦𑁆𑀤𑀭𑀸𑀕𑀸𑀯𑀓𑀟𑁆𑀠𑀦𑁂𑀦𑀸𑀢𑀺 𑀙𑀦𑁆𑀤𑀭𑀸𑀕𑀲𑁆𑀲 𑀧𑀚𑀳𑀦𑁂𑀦.

𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀸𑀭𑀡𑀪𑀽𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄. 𑀢𑁂𑀦𑀸𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑁆𑀪𑀯𑁄’’𑀢𑀺. 𑀏𑀓𑀺𑀲𑁆𑀲𑀸 𑀢𑀡𑁆𑀳𑀸𑀬 𑀧𑀭𑀺𑀜𑁆𑀜𑀸 𑀏𑀓𑀧𑀭𑀺𑀜𑁆𑀜𑀸. 𑀲𑀩𑁆𑀩𑀲𑁆𑀲 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀲𑁆𑀲 𑀭𑀸𑀕𑀲𑁆𑀲 𑀧𑀭𑀺𑀜𑁆𑀜𑀸, 𑀲𑀩𑁆𑀩𑀧𑀭𑀺𑀜𑁆𑀜𑀸. 𑀢𑀤𑀼𑀪𑀬𑀲𑁆𑀲𑀧𑀺 𑀫𑀽𑀮𑀪𑀽𑀢𑀲𑁆𑀲 𑀆𑀳𑀸𑀭𑀲𑁆𑀲 𑀧𑀭𑀺𑀜𑁆𑀜𑀸 𑀫𑀽𑀮𑀧𑀭𑀺𑀜𑁆𑀜𑀸. 𑀇𑀤𑀸𑀦𑀺 𑀇𑀫𑀸 𑀢𑀺𑀲𑁆𑀲𑁄𑀧𑀺 𑀧𑀭𑀺𑀜𑁆𑀜𑀸𑀬𑁄 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀏𑀓𑀭𑀲𑀢𑀡𑁆𑀳𑀁 𑀧𑀭𑀺𑀚𑀸𑀦𑀸𑀢𑀻𑀢𑀺 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀬𑁄 𑀬𑀫𑁂𑀢𑁆𑀣 𑀭𑀲𑁄, 𑀲𑁄 𑀯𑀢𑁆𑀣𑀼𑀓𑀸𑀫𑀯𑀲𑁂𑀦 𑀑𑀚𑀝𑁆𑀞𑀫𑀓𑀭𑀽𑀧𑀁 𑀳𑁄𑀢𑀺 𑀚𑀺𑀯𑁆𑀳𑀸𑀬𑀢𑀦𑀁 𑀧𑀲𑀸𑀤𑁄. 𑀲𑁄 𑀓𑀺𑀁 𑀦𑀺𑀲𑁆𑀲𑀺𑀢𑁄? 𑀘𑀢𑀼𑀫𑀳𑀸𑀪𑀽𑀢𑀦𑀺𑀲𑁆𑀲𑀺𑀢𑁄. 𑀢𑀁𑀲𑀳𑀚𑀸𑀢𑁄 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫. 𑀬𑁄 𑀢𑀲𑁆𑀫𑀺𑀁 𑀭𑀲𑁂 𑀅𑀲𑁆𑀲𑀸𑀤𑁄, 𑀅𑀬𑀁 𑀭𑀲𑀢𑀡𑁆𑀳𑀸. 𑀢𑀁𑀲𑀳𑀕𑀢𑀸 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀯𑀲𑁂𑀦. 𑀲𑀩𑁆𑀩𑀁 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄𑀯 𑀳𑁄𑀢𑀻’’𑀢𑀺. 𑀢𑀢𑁆𑀣 𑀢𑁂𑀦𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀭𑀲𑀢𑀡𑁆𑀳𑀁 𑀧𑀭𑀺𑀚𑀸𑀦𑀸𑀢𑀺, 𑀢𑁂𑀦. 𑀓𑀣𑀁 𑀧𑀦 𑀏𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀢𑀡𑁆𑀳𑀁 𑀧𑀭𑀺𑀚𑀸𑀦𑀢𑁄 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀢𑀲𑁆𑀲𑀸𑀬𑁂𑀯𑀸𑀢𑀺 𑀢𑀡𑁆𑀳𑀸𑀬 𑀏𑀯 𑀢𑀡𑁆𑀳𑀸𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑀦𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼. 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀭𑀽𑀧𑀭𑀸𑀕𑀸𑀤𑀺𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀢𑁄. 𑀮𑁄𑀪𑁄 𑀏𑀯 𑀳𑀺 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 ‘‘𑀢𑀡𑁆𑀳𑀸’’𑀢𑀺𑀧𑀺, 𑀭𑀚𑁆𑀚𑀦𑀝𑁆𑀞𑁂𑀦 ‘‘𑀭𑀸𑀕𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀲𑀸𑀬𑁂𑀯 𑀳𑀻’’𑀢𑀺𑀆𑀤𑀺. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀬𑀣𑀸’’𑀢𑀺𑀆𑀤𑀺𑀦𑀸 𑀉𑀧𑀫𑀸𑀬 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀧𑀜𑁆𑀘𑀫𑀕𑁆𑀕𑁂 𑀳𑀦𑀢𑁄𑀢𑀺 𑀧𑀜𑁆𑀘𑀲𑀼 𑀫𑀕𑁆𑀕𑁂𑀲𑀼 𑀲𑀜𑁆𑀘𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁂𑀦 𑀫𑀕𑁆𑀕𑀕𑀸𑀫𑀺𑀦𑁄 𑀳𑀦𑀦𑁆𑀢𑁄 ‘‘𑀫𑀕𑁆𑀕𑁂 𑀳𑀦𑀢𑁄’’𑀢𑀺 𑀯𑀼𑀢𑁆𑀢𑁄.

𑀲𑀩𑁆𑀬𑀜𑁆𑀚𑀦𑁂 𑀧𑀺𑀡𑁆𑀟𑀧𑀸𑀢𑀲𑀜𑁆𑀜𑀺𑀢𑁂 𑀪𑀢𑁆𑀢𑀲𑀫𑀽𑀳𑁂 𑀫𑀦𑀼𑀜𑁆𑀜𑁂 𑀭𑀽𑀧𑁂 𑀭𑀽𑀧𑀲𑀤𑁆𑀤𑀸𑀤𑀬𑁄 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀭𑀸𑀕𑀲𑁆𑀲 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀲𑀩𑁆𑀩𑀪𑀸𑀕𑀺𑀬𑁂𑀦 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀧𑀸𑀮𑀓𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂𑀦𑀸𑀢𑀺 𑀫𑀕𑁆𑀕𑀸𑀥𑀺𑀕𑀫𑀲𑀺𑀤𑁆𑀥𑁂𑀦 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀢𑁆𑀢𑁂. 𑀲𑁄𑀢𑀺 𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄.

𑀢𑀲𑁆𑀫𑀺𑀁 𑀲𑀢𑀻𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀲𑀢𑀺. 𑀢𑀲𑁆𑀲𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲. 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀉𑀧𑁆𑀧𑀚𑁆𑀚𑀦𑀢𑁄. 𑀦 𑀳𑀺 𑀆𑀳𑀸𑀭𑀸𑀮𑀸𑀪𑁂𑀦 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑀲𑁆𑀲 𑀓𑀸𑀫𑀧𑀭𑀺𑀪𑁄𑀕𑀺𑀘𑁆𑀙𑀸 𑀲𑀫𑁆𑀪𑀯𑀢𑀺. 𑀉𑀧𑀦𑀺𑀚𑁆𑀛𑀸𑀦𑀘𑀺𑀢𑁆𑀢𑀦𑁆𑀢𑀺 𑀭𑀸𑀕𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑀦𑀘𑀺𑀢𑁆𑀢𑀁.

𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑀫𑁆𑀧𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑁂𑀦 𑀭𑀸𑀕𑁂𑀦…𑀧𑁂… 𑀦𑀢𑁆𑀣𑀻’’𑀢𑀺. 𑀢𑁂𑀦𑀸𑀢𑀺 𑀓𑀸𑀫𑀭𑀸𑀕𑁂𑀦. 𑀏𑀢𑁆𑀢𑀓𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀤𑁂𑀲𑀦𑀸𑀬. 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀇𑀫𑀁 𑀧𑀞𑀫𑀸𑀳𑀸𑀭𑀓𑀣𑀁 𑀓𑀣𑁂𑀦𑁆𑀢𑁂𑀦 𑀥𑀫𑁆𑀫𑀓𑀣𑀺𑀓𑁂𑀦.

𑀧𑀞𑀫𑀸𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀸𑀳𑀸𑀭𑀯𑀡𑁆𑀡𑀦𑀸

𑀤𑀼𑀢𑀺𑀬𑁂𑀢𑀺 𑀤𑀼𑀢𑀺𑀬𑁂 𑀆𑀳𑀸𑀭𑁂. 𑀉𑀤𑁆𑀤𑀸𑀮𑀺𑀢𑀘𑀫𑁆𑀫𑀸𑀢𑀺 𑀉𑀧𑁆𑀧𑀸𑀝𑀺𑀢𑀘𑀫𑁆𑀫𑀸, 𑀲𑀩𑁆𑀩𑀲𑁄 𑀅𑀧𑀦𑀻𑀢𑀘𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀦 𑀲𑀓𑁆𑀓𑁄𑀢𑀺 𑀤𑀼𑀩𑁆𑀩𑀮𑀪𑀸𑀯𑀢𑁄, 𑀢𑀣𑀸 𑀳𑀺 𑀇𑀢𑁆𑀣𑀻 ‘‘𑀅𑀩𑀮𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀺𑀮𑀸𑀓𑀼𑀝𑁆𑀝𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀝𑁆𑀞𑀓𑀓𑀼𑀝𑁆𑀝𑀫𑀢𑁆𑀢𑀺𑀓𑀸𑀓𑀼𑀝𑁆𑀝𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀉𑀡𑁆𑀡𑀦𑀸𑀪𑀻𑀢𑀺 𑀫𑀓𑁆𑀓𑀝𑀓𑀁. 𑀲𑀭𑀩𑀽𑀢𑀺 𑀖𑀭𑀕𑁄𑀴𑀺𑀓𑀸. 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀸 𑀦𑀸𑀫 𑀮𑁄𑀫𑀲𑀸 𑀧𑀸𑀡𑀓𑀸. 𑀆𑀓𑀸𑀲𑀦𑀺𑀲𑁆𑀲𑀺𑀢𑀸𑀢𑀺 𑀆𑀓𑀸𑀲𑀘𑀸𑀭𑀺𑀦𑁄. 𑀮𑀼𑀜𑁆𑀘𑀺𑀢𑁆𑀯𑀸𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸.

𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀜𑀸𑀢𑀧𑀭𑀺𑀜𑁆𑀜𑀸𑀤𑀬𑁄 𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸. 𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺 𑀨𑀲𑁆𑀲𑀫𑀽𑀮𑀓𑀢𑁆𑀢𑀸. 𑀤𑁂𑀲𑀦𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀣𑀺𑀢𑀸 𑀲𑀩𑁆𑀩𑀲𑁄 𑀯𑁂𑀤𑀦𑀸𑀲𑀼 𑀧𑀭𑀺𑀜𑁆𑀜𑀸𑀢𑀸𑀲𑀼 𑀓𑀺𑀮𑁂𑀲𑀸𑀦𑀁 𑀮𑁂𑀲𑀲𑁆𑀲𑀧𑀺 𑀅𑀪𑀸𑀯𑀢𑁄.

𑀤𑀼𑀢𑀺𑀬𑀸𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀸𑀳𑀸𑀭𑀯𑀡𑁆𑀡𑀦𑀸

𑀅𑀗𑁆𑀕𑀸𑀭𑀓𑀸𑀲𑀼𑀦𑁆𑀢𑀺 𑀅𑀗𑁆𑀕𑀸𑀭𑀭𑀸𑀲𑀺𑀁. 𑀨𑀼𑀡𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀉𑀧𑀭𑀺 𑀲𑀬𑀫𑁂𑀯 𑀆𑀓𑀺𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀭𑀸 𑀭𑀼𑀤𑀦𑁆𑀢𑀸 𑀧𑀭𑀺𑀤𑀟𑁆𑀠𑀕𑀢𑁆𑀢𑀸’’𑀢𑀺. 𑀦𑀭𑀸𑀢𑀺 𑀧𑀼𑀭𑀺𑀲𑀸𑀢𑀺 𑀅𑀢𑁆𑀣𑁄, 𑀦 𑀫𑀦𑀼𑀲𑁆𑀲𑀸. 𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀻𑀢𑀺 𑀪𑀬𑀲𑁆𑀲 𑀯𑀲𑁂𑀦 𑀓𑀭𑁄𑀦𑁆𑀢𑁄 𑀪𑀬𑀁 𑀮𑀪𑀢𑀺 𑀦𑀸𑀫. 𑀲𑀦𑁆𑀢𑀭𑀫𑀸𑀦𑁄𑀯𑀸𑀢𑀺 𑀲𑀼𑀝𑁆𑀞𑀼 𑀢𑀭𑀫𑀸𑀦𑁄 𑀏𑀯 𑀳𑀼𑀢𑁆𑀯𑀸. 𑀧𑁄𑀭𑀺𑀲𑀁 𑀯𑀼𑀘𑁆𑀘𑀢𑀺 𑀧𑀼𑀭𑀺𑀲𑀧𑁆𑀧𑀫𑀸𑀡𑀁, 𑀢𑀲𑁆𑀫𑀸 𑀅𑀢𑀺𑀭𑁂𑀓𑀧𑁄𑀭𑀺𑀲𑀸 𑀧𑀼𑀭𑀺𑀲𑀧𑁆𑀧𑀫𑀸𑀡𑀢𑁄 𑀅𑀥𑀺𑀓𑀸. 𑀢𑁂𑀦𑀸𑀳 ‘‘𑀧𑀜𑁆𑀘𑀭𑀢𑀦𑀧𑁆𑀧𑀫𑀸𑀡𑀸’’𑀢𑀺. 𑀅𑀲𑁆𑀲𑀸𑀢𑀺 𑀓𑀸𑀲𑀼𑀬𑀸. 𑀢𑀤𑀪𑀸𑀯𑁂𑀢𑀺 𑀢𑁂𑀲𑀁 𑀚𑀸𑀮𑀸𑀥𑀽𑀫𑀸𑀦𑀁 𑀅𑀪𑀸𑀯𑁂. 𑀆𑀭𑀓𑀸𑀯𑀲𑁆𑀲𑀸𑀢𑀺 𑀆𑀭𑀓𑀸 𑀏𑀯 𑀅𑀲𑁆𑀲.

𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀢𑁂𑀪𑀽𑀫𑀓𑀯𑀝𑁆𑀝𑀁 𑀏𑀓𑀸𑀤𑀲𑀦𑁆𑀦𑀁 𑀅𑀕𑁆𑀕𑀻𑀦𑀁 𑀯𑀲𑁂𑀦 𑀫𑀳𑀸𑀧𑀭𑀺𑀴𑀸𑀳𑀢𑁄. 𑀚𑀺𑀯𑀺…𑀧𑁂… 𑀧𑀼𑀣𑀼𑀚𑁆𑀚𑀦𑁄 𑀢𑁂𑀳𑀺 𑀅𑀕𑁆𑀕𑀻𑀳𑀺 𑀤𑀳𑀺𑀢𑀩𑁆𑀩𑀢𑁄. 𑀤𑁆𑀯𑁂 𑀩𑀮…𑀧𑁂… 𑀓𑀫𑁆𑀫𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀢𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑁂 𑀧𑀸𑀢𑀦𑀢𑁄. 𑀆𑀬𑀽𑀳𑀦𑀽𑀧𑀓𑀟𑁆𑀠𑀦𑀸𑀦𑀁 𑀓𑀸𑀮𑀪𑁂𑀤𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄 𑀏𑀓𑀦𑁆𑀢𑀪𑀸𑀯𑀺𑀦𑁄 𑀨𑀮𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸𑀢𑀺 𑀆𑀳 ‘‘𑀓𑀫𑁆𑀫𑀁 𑀳𑀻’’𑀢𑀺𑀆𑀤𑀺.

𑀨𑀲𑁆𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀢𑀢𑁆𑀣 ‘‘𑀨𑀲𑁆𑀲𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁, 𑀇𑀥 ‘‘𑀫𑀦𑁄𑀲𑀜𑁆𑀘𑁂𑀢𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’’𑀢𑀺 𑀯𑀘𑀦𑀢𑁄 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀢𑀡𑁆𑀳𑀸 𑀫𑀽𑀮𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀢𑀡𑁆𑀳𑀸𑀫𑀽𑀮𑀓𑀢𑁆𑀢𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀬𑀸’’𑀢𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 𑀬𑀲𑁆𑀫𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀨𑀮𑀪𑀽𑀢𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀢𑀢𑀺𑀬𑀸𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀸𑀳𑀸𑀭𑀯𑀡𑁆𑀡𑀦𑀸

𑀅𑀦𑀺𑀝𑁆𑀞𑀧𑀸𑀧𑀦𑀯𑀲𑁂𑀦 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀆𑀕𑀘𑁆𑀙𑀢𑀻𑀢𑀺 𑀆𑀕𑀼, 𑀧𑀸𑀧𑀁, 𑀢𑀁 𑀘𑀭𑀢𑀺 𑀲𑀻𑀮𑁂𑀦𑀸𑀢𑀺 𑀆𑀕𑀼𑀘𑀸𑀭𑀻. 𑀢𑁂𑀦𑀸𑀳 ‘‘𑀧𑀸𑀧𑀘𑀸𑀭𑀺’’𑀦𑁆𑀢𑀺.

𑀭𑀸𑀚𑀸 𑀯𑀺𑀬 𑀓𑀫𑁆𑀫𑀁 𑀧𑀭𑀫𑀺𑀲𑁆𑀲𑀭𑀪𑀸𑀯𑀢𑁄. 𑀆𑀕𑀼𑀘𑀸𑀭𑀻 𑀧𑀼𑀭𑀺𑀲𑁄 𑀯𑀺𑀬…𑀧𑁂… 𑀧𑀼𑀣𑀼𑀚𑁆𑀚𑀦𑁄 𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑀢𑁄. 𑀆𑀤𑀺𑀦𑁆𑀦𑀧𑁆𑀧𑀳𑀸𑀭𑀯𑀡𑀸𑀦𑀺 𑀢𑀻𑀡𑀺 𑀲𑀢𑁆𑀢𑀺𑀲𑀢𑀸𑀦𑀺 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲 𑀆𑀢𑀼𑀭𑀫𑀸𑀦𑀫𑀳𑀸𑀤𑀼𑀓𑁆𑀔𑀧𑀢𑀺𑀝𑁆𑀞𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁. 𑀢𑁂𑀦𑀸𑀳 𑀲𑀢𑁆𑀢𑀺…𑀧𑁂… 𑀤𑀼𑀓𑁆𑀔𑀦𑁆𑀢𑀺.

𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑀽𑀮𑀓𑀢𑁆𑀢𑀸 𑀇𑀢𑁄 𑀧𑀭𑀁 𑀧𑀯𑀢𑁆𑀢𑀦𑀸𑀫𑀭𑀽𑀧𑀲𑁆𑀲.

𑀘𑀢𑀼𑀢𑁆𑀣𑀸𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀢𑁆𑀢𑀫𑀁𑀲𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀢𑁆𑀣𑀺𑀭𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀘𑀢𑀼𑀢𑁆𑀣𑁂 𑀲𑁄𑀢𑀺 𑀮𑁄𑀪𑁄. 𑀭𑀜𑁆𑀚𑀦𑀯𑀲𑁂𑀦𑀸𑀢𑀺 𑀭𑀗𑁆𑀕𑀚𑀸𑀢𑀁 𑀯𑀺𑀬 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀼𑀭𑀜𑁆𑀚𑀦𑀯𑀲𑁂𑀦. 𑀦𑀦𑁆𑀤𑀦𑀯𑀲𑁂𑀦𑀸𑀢𑀺 𑀲𑀧𑁆𑀧𑀻𑀢𑀺𑀓𑀢𑀸𑀬 𑀆𑀭𑀫𑁆𑀫𑀡𑀲𑁆𑀲 𑀅𑀪𑀺𑀦𑀦𑁆𑀤𑀦𑀯𑀲𑁂𑀦. 𑀢𑀡𑁆𑀳𑀸𑀬𑀦𑀯𑀲𑁂𑀦𑀸𑀢𑀺 𑀯𑀺𑀲𑀬𑀓𑀢𑁆𑀢𑀼𑀓𑀸𑀫𑀢𑀸𑀬 𑀯𑀲𑁂𑀦. 𑀏𑀓𑁄 𑀏𑀯 𑀳𑀺 𑀮𑁄𑀪𑁄 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑁄. 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀮𑀤𑁆𑀥𑀲𑀪𑀸𑀯𑀁. 𑀢𑀢𑁆𑀣𑀸𑀢𑀺 𑀯𑀝𑁆𑀝𑁂. 𑀆𑀳𑀸𑀭𑁂𑀢𑀺 𑀓𑁂𑀘𑀺. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁. 𑀯𑀺𑀭𑀼𑀴𑁆𑀳𑀦𑁆𑀢𑀺 𑀨𑀮𑀦𑀺𑀩𑁆𑀩𑀢𑁆𑀢𑀺𑀬𑀸 𑀯𑀺𑀭𑀼𑀴𑁆𑀳𑀺𑀧𑁆𑀧𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀚𑀯𑀸𑀧𑁂𑀢𑁆𑀯𑀸𑀢𑀺 𑀨𑀮𑀁 𑀕𑀸𑀳𑀸𑀧𑁂𑀢𑁆𑀯𑀸. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀜𑁆𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀘𑁂𑀯 𑀆𑀳𑀸𑀭𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀨𑀮𑀼𑀧𑁆𑀧𑀸𑀤𑀦𑁂 𑀲𑀸𑀫𑀢𑁆𑀣𑀺𑀬𑀢𑁆𑀢𑀸 𑀯𑀺𑀭𑀼𑀴𑁆𑀳𑀺𑀧𑁆𑀧𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑀫𑁆𑀫𑀁 𑀲𑀦𑁆𑀢𑀸𑀦𑁂 𑀮𑀤𑁆𑀥𑀪𑀸𑀯𑀁 𑀯𑀺𑀭𑀼𑀴𑁆𑀳𑀺𑀧𑁆𑀧𑀢𑁆𑀢𑀜𑁆𑀘𑀲𑁆𑀲 𑀳𑁄𑀢𑀻’’𑀢𑀺. 𑀯𑀝𑁆𑀝𑀓𑀣𑀸 𑀏𑀲𑀸𑀢𑀺 𑀓𑀢𑁆𑀯𑀸 ‘‘𑀬𑀢𑁆𑀣𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑁂 𑀪𑀼𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼. 𑀧𑀼𑀭𑀺𑀫𑀧𑀤𑁂 𑀏𑀢𑀁 𑀪𑀼𑀫𑁆𑀫𑀦𑁆𑀢𑀺 ‘‘𑀬𑀢𑁆𑀣 𑀢𑀢𑁆𑀣𑀸’’𑀢𑀺 𑀆𑀕𑀢𑀁 𑀏𑀢𑀁 𑀪𑀼𑀫𑁆𑀫𑀯𑀘𑀦𑀁 𑀧𑀼𑀭𑀺𑀫𑀲𑁆𑀫𑀺𑀁 𑀧𑀼𑀭𑀺𑀫𑀲𑁆𑀫𑀺𑀁 𑀧𑀤𑁂 𑀯𑀺𑀲𑀬𑀪𑀽𑀢𑁂. 𑀢𑀜𑁆𑀳𑀺 𑀆𑀭𑀩𑁆𑀪 𑀏𑀢𑀁 ‘‘𑀬𑀢𑁆𑀣 𑀢𑀢𑁆𑀣𑀸’’𑀢𑀺 𑀪𑀼𑀫𑁆𑀫𑀯𑀘𑀦𑀁 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀯𑀺𑀧𑀸𑀓𑀯𑀝𑁆𑀝𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀺𑀧𑀸𑀓𑀯𑀝𑁆𑀝𑁂. 𑀆𑀬𑀢𑀺𑀁 𑀯𑀝𑁆𑀝𑀳𑁂𑀢𑀼𑀓𑁂 𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀯𑀘𑀦𑀢𑁄. 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀘 𑀧𑀝𑀺𑀲𑀦𑁆𑀥𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡’’𑀦𑁆𑀢𑀺. 𑀚𑀸𑀢𑀻𑀢𑀺 𑀘𑁂𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀬𑀲𑁆𑀫𑀺𑀁 𑀞𑀸𑀦𑁂𑀢𑀺 𑀬𑀲𑁆𑀫𑀺𑀁 𑀓𑀸𑀭𑀡𑁂 𑀲𑀢𑀺.

𑀓𑀸𑀭𑀡𑀜𑁆𑀘𑁂𑀢𑁆𑀣 𑀲𑀗𑁆𑀔𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀳𑁂𑀢𑀽, 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀬𑁄, 𑀓𑀸𑀮𑀕𑀢𑀺𑀆𑀤𑀬𑁄 𑀘 𑀓𑀫𑁆𑀫𑀲𑁆𑀲 𑀲𑀫𑁆𑀪𑀸𑀭𑀸. 𑀓𑁂𑀘𑀺 𑀧𑀦 𑀓𑀺𑀮𑁂𑀲𑀯𑀝𑁆𑀝𑀓𑀫𑁆𑀫𑀕𑀢𑀺𑀓𑀸𑀮𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀸𑀮𑀕𑀢𑀺𑀆𑀤𑀬𑁄 𑀘 𑀓𑀫𑁆𑀫𑀲𑁆𑀲 𑀲𑀫𑁆𑀪𑀸𑀭𑀸’’𑀢𑀺 𑀯𑀤𑀦𑁆𑀢𑀺. 𑀢𑀁𑀢𑀁𑀪𑀯𑀧𑀢𑁆𑀣𑀦𑀸𑀬 𑀢𑀣𑀸 𑀢𑀣𑀸 𑀕𑀢𑁄 𑀢𑀺𑀯𑀺𑀥𑁄 𑀪𑀯𑁄𑀯 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀢𑁂𑀦𑀸𑀳 ‘‘𑀬𑀢𑁆𑀣𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑁂’’𑀢𑀺. 𑀢𑀣𑀸 𑀘𑀸𑀳 ‘‘𑀲𑀲𑀫𑁆𑀪𑀸𑀭𑀓𑀓𑀫𑁆𑀫𑀁 𑀪𑀯𑁂𑀲𑀼 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺. 𑀭𑀽𑀧𑀦𑁆𑀢𑀺 𑀅𑀢𑁆𑀢𑀪𑀸𑀯𑀁.

𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺 𑀢𑀻𑀲𑀼 𑀅𑀓𑀢𑁆𑀯𑀸 𑀯𑀺𑀜𑁆𑀜𑀸𑀡𑁂𑀦 𑀏𑀓𑀲𑀗𑁆𑀔𑁂𑀧𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑁄 𑀲𑀦𑁆𑀥𑀻𑀢𑀺 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀺. 𑀯𑀺𑀧𑀸𑀓𑀯𑀺𑀥𑀺𑀦𑁆𑀢𑀺 𑀲𑀴𑀸𑀬𑀢𑀦𑀸𑀤𑀺𑀓𑀁 𑀯𑁂𑀤𑀦𑀸𑀯𑀲𑀸𑀦𑀁 𑀯𑀺𑀧𑀸𑀓𑀯𑀺𑀥𑀺𑀁. ‘‘𑀦𑀸𑀫𑀭𑀽𑀧𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀦𑀸𑀫𑀭𑀽𑀧𑁂𑀦𑀸𑀢𑀺 𑀯𑀸 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑀁. 𑀇𑀥 𑀏𑀓𑁄 𑀲𑀦𑁆𑀥𑀻𑀢𑀺 𑀏𑀓𑁄 𑀳𑁂𑀢𑀼𑀨𑀮𑀲𑀦𑁆𑀥𑀺. 𑀆𑀬𑀢𑀺𑀪𑀯𑀲𑁆𑀲𑀸𑀢𑀺 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀲. 𑀢𑁂𑀦 𑀘𑁂𑀢𑁆𑀣 𑀏𑀓𑁄 𑀲𑀦𑁆𑀥𑀺 𑀳𑁂𑀢𑀼𑀨𑀮𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀔𑀻𑀡𑀸𑀲𑀯𑀲𑁆𑀲 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀦𑀢𑁄𑀯 𑀧𑀯𑀢𑁆𑀢𑀓𑀫𑁆𑀫𑀲𑁆𑀲 𑀫𑀕𑁆𑀕𑁂𑀦 𑀲𑀳𑀸𑀬𑀯𑁂𑀓𑀮𑁆𑀮𑀲𑁆𑀲 𑀓𑀢𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑀁. 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑀦𑁆𑀢𑀺 𑀢𑀢𑁄 𑀏𑀯 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀧𑁆𑀧𑀢𑀺𑀝𑁆𑀞𑀺𑀢𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑀁. 𑀲𑀸𑀢𑀺 𑀭𑀲𑁆𑀫𑀺. 𑀓𑀸𑀬𑀸𑀤𑀬𑁄𑀢𑀺 𑀓𑀸𑀬𑀤𑁆𑀯𑀸𑀭𑀸𑀤𑀬𑁄. 𑀓𑀢𑀓𑀫𑁆𑀫𑀦𑁆𑀢𑀺 𑀧𑀘𑁆𑀘𑀬𑁂𑀳𑀺 𑀓𑀢𑀪𑀸𑀯𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁, 𑀦 𑀓𑀫𑁆𑀫𑀮𑀓𑁆𑀔𑀡𑀧𑀢𑁆𑀢𑀢𑁄. 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀦𑀸𑀫 𑀦 𑀳𑁄𑀢𑀻’’𑀢𑀺. 𑀓𑀺𑀭𑀺𑀬𑀫𑀢𑁆𑀢𑁂𑀢𑀺 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸 𑀓𑀸𑀬𑀺𑀓𑀸𑀤𑀺𑀧𑀬𑁄𑀕𑀫𑀢𑁆𑀢𑁂 𑀞𑀢𑁆𑀯𑀸. 𑀅𑀯𑀺𑀧𑀸𑀓𑀁 𑀳𑁄𑀢𑀺 𑀢𑁂𑀲𑀁 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸.

𑀅𑀢𑁆𑀣𑀺𑀭𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀧𑀜𑁆𑀘𑀫𑀲𑀼𑀢𑁆𑀢𑁂 ‘‘𑀧𑀼𑀩𑁆𑀩𑁂𑀯 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸’’𑀢𑀺𑀆𑀤𑀺 𑀳𑁂𑀝𑁆𑀞𑀸 𑀲𑀁𑀯𑀡𑁆𑀡𑀺𑀢𑀫𑁂𑀯𑀸𑀢𑀺 𑀅𑀯𑀼𑀢𑁆𑀢𑀫𑁂𑀯 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀦𑀸𑀫𑀭𑀽𑀧𑁂 𑀔𑁄 𑀲𑀢𑀻’’𑀢𑀺 𑀆𑀭𑀤𑁆𑀥𑁄. 𑀢𑀢𑁆𑀣 𑀤𑁆𑀯𑀸𑀤𑀲𑀧𑀤𑀺𑀓𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀬𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀅𑀕𑁆𑀕𑀳𑀺𑀢𑀸𑀦𑀺, 𑀦𑁂𑀲𑀁 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀓𑀸𑀫𑁄 𑀢𑁂𑀲𑀁 𑀕𑀳𑁂𑀢𑀩𑁆𑀩𑀓𑀸𑀭𑀡𑀁 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀘𑀓𑁆𑀔𑀪𑀽𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀪𑀯𑀁 𑀧𑀞𑀫𑀁 𑀕𑀳𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀅𑀦𑀸𑀕𑀢𑀲𑁆𑀲 ‘‘𑀤𑀼𑀢𑀺𑀬’’𑀦𑁆𑀢𑀺 𑀕𑀳𑀡𑁂 𑀅𑀢𑀻𑀢𑁄 𑀢𑀢𑀺𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀳𑀺 𑀢𑀢𑀺𑀬𑁄 𑀪𑀯𑁄’’𑀢𑀺. 𑀦𑀦𑀼 𑀘𑁂𑀢𑁆𑀣 𑀅𑀦𑀸𑀕𑀢𑀲𑁆𑀲 𑀪𑀯𑀲𑁆𑀲 𑀕𑀳𑀡𑀁 𑀦 𑀲𑀫𑁆𑀪𑀯𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀲𑁆𑀲 𑀚𑁄𑀢𑀺𑀢𑀢𑁆𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀓𑀸𑀭𑀡𑁂 𑀧𑀦 𑀕𑀳𑀺𑀢𑁂 𑀨𑀮𑀁 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀺𑀘𑁂𑀢𑁆𑀣 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀅𑀢𑁆𑀣𑀢𑁄 𑀲𑀗𑁆𑀕𑀳𑀺𑀢𑁄 𑀏𑀯 𑀬𑀢𑁄 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀸𑀕𑀢𑀤𑁆𑀥𑀲𑀁𑀕𑀸𑀳𑀺𑀢𑀸 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀦𑁆𑀢𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀢𑀲𑁆𑀫𑀸 ‘‘𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀳𑀻𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑁂𑀳𑀺 𑀆𑀭𑀫𑁆𑀫𑀡𑀪𑀽𑀢𑁂𑀳𑀺. 𑀅𑀬𑀁 𑀯𑀺𑀧𑀲𑁆𑀲𑀦𑀸𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀯𑀢𑁆𑀢𑀯𑀺𑀧𑀲𑁆𑀲𑀦𑀸. 𑀦 𑀖𑀝𑀻𑀬𑀢𑀻𑀢𑀺 𑀦 𑀲𑀫𑀺𑀚𑁆𑀛𑀢𑀺. 𑀫𑀳𑀸…𑀧𑁂… 𑀅𑀪𑀺𑀦𑀺𑀯𑀺𑀝𑁆𑀞𑁄𑀢𑀺 𑀦 𑀖𑀝𑀦𑁂 𑀓𑀸𑀭𑀡𑀫𑀸𑀳, 𑀳𑁂𑀝𑁆𑀞𑀸 𑀕𑀳𑀺𑀢𑀢𑁆𑀢𑀸 𑀧𑀸𑀝𑀺𑀬𑁂𑀓𑁆𑀓𑀁 𑀲𑀫𑁆𑀫𑀲𑀦𑀻𑀬𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀤𑀺𑀝𑁆𑀞𑁂𑀲𑀽𑀢𑀺 𑀅𑀦𑀯𑀩𑀼𑀤𑁆𑀥𑁂𑀲𑀼. 𑀘𑀢𑀼𑀲𑀘𑁆𑀘𑀲𑁆𑀲 𑀅𑀦𑀼𑀩𑁄𑀥𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦 𑀲𑀓𑁆𑀓𑀸 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼’’𑀦𑁆𑀢𑀺. 𑀇𑀫𑀺𑀦𑀸𑀢𑀺 𑀫𑀳𑀸𑀲𑀢𑁆𑀢𑁂𑀦. 𑀢𑁂𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸. 𑀪𑀯𑀉𑀧𑀸𑀤𑀸𑀦𑀢𑀡𑁆𑀳𑀸𑀯𑀲𑁂𑀦𑀸𑀢𑀺 𑀪𑀯𑀉𑀧𑀸𑀤𑀸𑀦𑀢𑀡𑁆𑀳𑀸𑀤𑀲𑁆𑀲𑀦𑀯𑀲𑁂𑀦. 𑀤𑀺𑀝𑁆𑀞𑀸𑀯 ‘‘𑀢𑀁𑀲𑀳𑀕𑀢𑀸’’𑀢𑀺 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑁆𑀢𑀸. 𑀦 𑀧𑀭𑀪𑀸𑀕𑀁 𑀔𑀦𑁂𑀬𑁆𑀬 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀲𑁆𑀲 𑀕𑀳𑀺𑀢𑀢𑁆𑀢𑀸 𑀧𑀭𑀪𑀸𑀕𑁂 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 𑀘. 𑀢𑁂𑀦𑀸𑀳 ‘‘𑀓𑀲𑁆𑀲𑀘𑀺 𑀦𑀢𑁆𑀣𑀺𑀢𑀸𑀬𑀸’’𑀢𑀺. 𑀧𑀝𑀺𑀦𑀺𑀯𑀢𑁆𑀢𑁂𑀲𑀻𑀢𑀺 𑀧𑀝𑀺𑀲𑀁𑀳𑀭𑀺. 𑀧𑀝𑀺𑀦𑀺𑀯𑀢𑁆𑀢𑀦𑁂 𑀧𑀦 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀤𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀅𑀔𑀡𑀺𑀢𑀝𑁆𑀞𑀸𑀦𑀁.

𑀧𑀘𑁆𑀘𑀬𑀢𑁄𑀢𑀺 𑀳𑁂𑀢𑀼𑀢𑁄, 𑀲𑀗𑁆𑀔𑀸𑀭𑀢𑁄𑀢𑀺 𑀅𑀢𑁆𑀣𑁄. ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀧𑀭𑀫𑁆𑀧𑀭𑀯𑀲𑁂𑀦 𑀨𑀮𑀧𑀭𑀫𑁆𑀧𑀭𑀸𑀬 𑀓𑀺𑀢𑁆𑀢𑀫𑀸𑀦𑀸𑀬, 𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀘 𑀯𑀺𑀘𑀸𑀭𑀡𑀸𑀬 𑀲𑀗𑁆𑀔𑀸𑀭𑁂 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑁂𑀲𑀢𑁄 𑀓𑀸𑀭𑀡𑀪𑀽𑀢𑁄 𑀲𑀗𑁆𑀔𑀸𑀭𑁄 𑀅𑀕𑁆𑀕𑀳𑀺𑀢𑁄, 𑀢𑀢𑁄 𑀯𑀺𑀜𑁆𑀜𑀸𑀡𑀁 𑀧𑀝𑀺𑀦𑀺𑀯𑀢𑁆𑀢𑀢𑀺 𑀦𑀸𑀫, 𑀦 𑀲𑀩𑁆𑀩𑀧𑀘𑁆𑀘𑀬𑀢𑁄. 𑀢𑁂𑀦𑁂𑀯𑀸𑀳 ‘‘𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’’𑀢𑀺. 𑀓𑀺𑀁 𑀦𑀸𑀫 𑀳𑁂𑀢𑁆𑀣 𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑁂𑀯 𑀧𑀘𑁆𑀘𑀬𑀪𑀽𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀲𑁆𑀲 𑀚𑁄𑀢𑀺𑀢𑀢𑁆𑀢𑀸. 𑀆𑀭𑀫𑁆𑀫𑀡𑀢𑁄𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀆𑀭𑀫𑁆𑀫𑀡𑀢𑁄, 𑀅𑀢𑀻𑀢𑀪𑀯𑀲𑀗𑁆𑀔𑀸𑀢𑀆𑀭𑀫𑁆𑀫𑀡𑀢𑁄. 𑀅𑀢𑀻𑀢𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀳𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸. 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀪𑀯𑁄𑀧𑀺 𑀧𑀝𑀺𑀦𑀺𑀯𑀢𑁆𑀢𑀢𑀺 𑀦𑀸𑀫. 𑀉𑀪𑀬𑀫𑁆𑀧𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀫𑁆𑀧𑀺. 𑀦𑀸𑀫𑀭𑀽𑀧𑀁 𑀦 𑀅𑀢𑀺𑀓𑁆𑀓𑀫𑀢𑀻𑀢𑀺 𑀧𑀘𑁆𑀘𑀬𑀪𑀽𑀢𑀁 𑀆𑀭𑀫𑁆𑀫𑀡𑀪𑀽𑀢𑀜𑁆𑀘 𑀦𑀸𑀫𑀭𑀽𑀧𑀁 𑀦 𑀅𑀢𑀺𑀓𑁆𑀓𑀫𑀢𑀺 𑀢𑁂𑀦 𑀯𑀺𑀦𑀸 𑀅𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀦𑀸𑀫𑀭𑀽𑀧𑀢𑁄 𑀧𑀭𑀁 𑀦 𑀕𑀘𑁆𑀙𑀢𑀻’’𑀢𑀺. 𑀯𑀺𑀜𑁆𑀜𑀸𑀡𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂. 𑀦𑀸𑀫𑀭𑀽𑀧𑁂 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂𑀢𑀺 𑀦𑀸𑀫𑀭𑀽𑀧𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂. 𑀘𑀢𑀼𑀯𑁄𑀓𑀸𑀭𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀬𑀣𑀸𑀭𑀳𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀤𑁆𑀯𑀻𑀲𑀼𑀧𑀺 𑀅𑀜𑁆𑀜𑀫𑀜𑁆𑀜𑀁 𑀧𑀘𑁆𑀘𑀬𑁂𑀲𑀼 𑀳𑁄𑀦𑁆𑀢𑁂𑀲𑀽𑀢𑀺 𑀧𑀦 𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦. 𑀏𑀢𑁆𑀢𑀓𑁂𑀦𑀸𑀢𑀺 𑀏𑀯𑀁 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑀯𑀲𑁂𑀦 𑀧𑀯𑀢𑁆𑀢𑀺𑀬𑀸. 𑀚𑀸𑀬𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸𑀢𑀺 ‘‘𑀲𑀢𑁆𑀢𑁄 𑀚𑀸𑀬𑀢𑀺 𑀉𑀧𑀧𑀚𑁆𑀚𑀢𑀻’’𑀢𑀺 𑀲𑀫𑀜𑁆𑀜𑀸 𑀳𑁄𑀢𑀺 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀇𑀢𑁄 𑀳𑀻’’𑀢𑀺𑀆𑀤𑀺. 𑀏𑀢𑀤𑁂𑀯𑀸𑀢𑀺 ‘‘𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧’’𑀦𑁆𑀢𑀺 𑀏𑀢𑀁 𑀤𑁆𑀯𑀬𑀫𑁂𑀯.

𑀅𑀧𑀭𑀸𑀧𑀭𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀳𑀻𑀢𑀺 𑀅𑀧𑀭𑀸𑀧𑀭𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀤𑀻𑀧𑀓𑁂𑀳𑀺 ‘‘𑀘𑀯𑀢𑀺, 𑀉𑀧𑀧𑀚𑁆𑀚𑀢𑀻’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺. 𑀧𑀜𑁆𑀘 𑀧𑀤𑀸𑀦𑀻𑀢𑀺 ‘‘𑀚𑀸𑀬𑁂𑀣 𑀯𑀸’’𑀢𑀺𑀆𑀤𑀻𑀦𑀺 𑀧𑀜𑁆𑀘 𑀧𑀤𑀸𑀦𑀺. 𑀦𑀦𑀼 𑀢𑀢𑁆𑀣 𑀧𑀞𑀫𑀢𑀢𑀺𑀬𑁂𑀳𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀸𑀦𑀻𑀢𑀺? 𑀲𑀘𑁆𑀘𑀁, 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀦𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀧𑀭𑀸𑀧𑀭𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀳𑀻’’𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀦𑁆𑀢𑀺 𑀬𑁄 ‘‘𑀏𑀢𑁆𑀢𑀸𑀯𑀢𑀸’’𑀢𑀺 𑀧𑀤𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄, 𑀢𑀫𑁂𑀯 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 ‘‘𑀬𑀤𑀺𑀤’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀧𑀼𑀦 𑀯𑀢𑁆𑀯𑀸. 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦𑀸𑀢𑀺 𑀧𑀘𑁆𑀘𑀬𑀥𑀫𑁆𑀫𑀤𑀲𑁆𑀲𑀦𑀧𑀼𑀩𑁆𑀩𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀤𑀲𑁆𑀲𑀦𑀯𑀲𑁂𑀦. 𑀧𑀘𑁆𑀘𑀬𑀥𑀫𑁆𑀫𑀸𑀦𑀜𑁆𑀳𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀘𑁆𑀘𑀬𑀸𑀓𑀸𑀭𑁄, 𑀲𑁄 𑀘 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀲𑀗𑁆𑀔𑀸𑀭𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀮𑁄𑀫𑀦𑀢𑁄 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀲 𑀯𑀲𑁂𑀦.

𑀆𑀧𑀢𑁄𑀢𑀺 𑀧𑀭𑀺𑀔𑀸𑀕𑀢𑀉𑀤𑀓𑀢𑁄. 𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀧𑀯𑁂𑀲𑀦𑀦𑀺𑀕𑁆𑀕𑀫𑀦𑀨𑀸𑀲𑀼𑀢𑀸𑀬 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀬𑀸 𑀲𑀭𑀻𑀭𑀘𑀺𑀢𑁆𑀢𑀲𑀼𑀔𑀢𑀸𑀬 𑀦𑀕𑀭𑀲𑁆𑀲 𑀫𑀦𑀼𑀜𑁆𑀜𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀸 …𑀧𑁂… 𑀭𑀫𑀡𑀻𑀬’’𑀦𑁆𑀢𑀺. 𑀧𑀼𑀩𑁆𑀩𑁂 𑀲𑀼𑀜𑁆𑀜𑀪𑀸𑀯𑁂𑀦 𑀅𑀭𑀜𑁆𑀜𑀲𑀤𑀺𑀲𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀚𑀦𑀯𑀸𑀲𑀁 𑀓𑀭𑁄𑀦𑁆𑀢𑁂 𑀦𑀕𑀭𑀲𑁆𑀲 𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀤𑁆𑀥𑀜𑁆𑀘𑁂𑀯 𑀅𑀲𑁆𑀲 𑀨𑀻𑀢𑀜𑁆𑀘𑀸’’𑀢𑀺.

‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀘 𑀲𑀼𑀧𑀭𑀺𑀲𑀼𑀤𑁆𑀥𑁄’’𑀢𑀺 𑀯𑀘𑀦𑀢𑁄 𑀢𑀻𑀳𑀺 𑀯𑀺𑀭𑀢𑀻𑀳𑀺 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄𑀧𑀺 𑀅𑀝𑁆𑀞𑀗𑁆𑀕𑀺𑀓𑀯𑁄𑀳𑀸𑀭𑀁 𑀮𑀤𑁆𑀥𑀼𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀲𑁆𑀲𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀬 𑀘𑀺𑀡𑁆𑀡𑀦𑁆𑀢𑁂𑀢𑀺 𑀯𑀺𑀧𑀲𑁆𑀲𑀦𑀸𑀬 𑀲𑀜𑁆𑀘𑀭𑀺𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀻𑀭𑀺𑀢𑁂 𑀧𑀭𑀺𑀬𑁂𑀲𑀺𑀢𑁂. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀤𑀲𑁆𑀲𑀦𑀦𑁆𑀢𑀺 𑀅𑀦𑀼𑀫𑀸𑀦𑀸𑀤𑀺𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑀁. 𑀢𑀣𑀸 𑀳𑀺 𑀦𑀺𑀩𑁆𑀩𑀸𑀦𑀦𑀕𑀭𑀲𑁆𑀲 𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀤𑀺𑀝𑁆𑀞𑀓𑀸𑀮𑁄𑀢𑀺 𑀅𑀥𑀺𑀕𑀫𑀯𑀲𑁂𑀦 𑀤𑀺𑀝𑁆𑀞𑀓𑀸𑀮𑁄. 𑀫𑀕𑁆𑀕𑀨𑀮𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀧𑀭𑁄𑀧𑀡𑁆𑀡𑀸𑀲 𑀅𑀦𑀯𑀚𑁆𑀚𑀥𑀫𑁆𑀫𑀸, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀧𑀦 𑀢𑁂𑀲𑀁 𑀯𑀯𑀢𑁆𑀣𑀸𑀧𑀓𑀁. 𑀬𑀸𑀧𑁂𑀢𑁆𑀯𑀸𑀢𑀺 𑀘𑀭𑀸𑀧𑁂𑀢𑁆𑀯𑀸.

𑀅𑀯𑀢𑁆𑀢𑀫𑀸𑀦𑀓𑀝𑁆𑀞𑁂𑀦𑀸𑀢𑀺 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀓𑀲𑁆𑀲𑀘𑀺 𑀲𑀦𑁆𑀢𑀸𑀦𑁂 𑀅𑀧𑁆𑀧𑀯𑀢𑁆𑀢𑀦𑀢𑁄𑀯 𑀉𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀯𑀢𑁆𑀢𑀫𑀸𑀦𑀯𑀲𑁂𑀦. 𑀢𑀣𑀸 𑀳𑀺 𑀪𑀕𑀯𑀸 ‘‘𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀲𑀜𑁆𑀚𑀦𑁂𑀢𑀸’’𑀢𑀺𑀆𑀤𑀺𑀓𑁂𑀳𑀺 𑀣𑁄𑀫𑀺𑀢𑁄. 𑀧𑀼𑀩𑁆𑀩𑀓𑁂𑀳𑀺 𑀫𑀳𑁂𑀲𑀻𑀳𑀺 𑀧𑀝𑀺𑀧𑀦𑁆𑀦𑁄 𑀳𑀺 𑀅𑀭𑀺𑀬𑀫𑀕𑁆𑀕𑁄 𑀇𑀢𑀭𑁂𑀳𑀺 𑀅𑀦𑁆𑀢𑀭𑀸 𑀓𑁂𑀳𑀺𑀘𑀺 𑀅𑀯𑀴𑀜𑁆𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀴𑀜𑁆𑀚𑀦𑀝𑁆𑀞𑁂𑀦 𑀧𑀼𑀭𑀸𑀡𑀫𑀕𑁆𑀕𑁄’’𑀢𑀺. 𑀛𑀸𑀦𑀲𑁆𑀲𑀸𑀤𑁂𑀦𑀸𑀢𑀺 𑀛𑀸𑀦𑀲𑀼𑀔𑁂𑀦 𑀛𑀸𑀦𑀧𑀻𑀢𑀺𑀬𑀸. 𑀲𑀼𑀪𑀺𑀓𑁆𑀔𑀁 𑀧𑀡𑀻𑀢𑀥𑀫𑁆𑀫𑀸𑀫𑀢𑀢𑀸𑀬 𑀢𑀺𑀢𑁆𑀢𑀺𑀆𑀯𑀳𑀁. 𑀧𑀼𑀧𑁆𑀨𑀺𑀢𑀁 𑀉𑀧𑀲𑁄𑀪𑀺𑀢𑀁. 𑀬𑀸𑀯 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀩𑀼𑀤𑁆𑀥𑀔𑁂𑀢𑁆𑀢𑀢𑁆𑀢𑀸. 𑀢𑀲𑁆𑀲 𑀅𑀢𑁆𑀣𑀺𑀢𑀸𑀬 𑀳𑀺 𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀑𑀓𑀸𑀲𑁂.

𑀦𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑁆𑀫𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀙𑀝𑁆𑀞𑁂 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀧𑀭𑀺𑀤𑀻𑀧𑀦𑀢𑁄 𑀲𑀼𑀔𑀼𑀫𑀸. 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀅𑀗𑁆𑀓𑀺𑀬𑀢𑁆𑀢𑀸 𑀢𑀺𑀮𑀓𑁆𑀔𑀡𑀸𑀳𑀢𑀸, 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀧𑀭𑀺𑀤𑀻𑀧𑀺𑀦𑀻𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀦 𑀳𑁂𑀢𑀼𑀦𑀸 𑀲𑀳𑁂𑀢𑀼𑀓𑀸. 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬 𑀧𑀸𑀝𑀺𑀳𑀸𑀭𑀺𑀬𑀧𑀜𑁆𑀜𑀸𑀬 𑀘 𑀅𑀢𑁆𑀣𑀺𑀢𑀸𑀬 𑀧𑀜𑁆𑀜𑀯𑀦𑁆𑀢𑁄 𑀦 𑀓𑁂𑀯𑀮𑀁 𑀅𑀚𑁆𑀛𑀢𑁆𑀢𑀺𑀓𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑁂𑀯, 𑀩𑀸𑀳𑀺𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀧𑀺 𑀦𑁂𑀲𑀫𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀺𑀦𑀺𑀤𑁆𑀥𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀅𑀚𑁆𑀛𑀢𑁆𑀢𑀁. 𑀧𑀘𑁆𑀘𑀬𑀲𑀫𑁆𑀫𑀲𑀦𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑀯𑀻𑀫𑀁𑀲𑀁.

𑀆𑀭𑀫𑁆𑀪𑀸𑀦𑀼𑀭𑀽𑀧𑀸 𑀅𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀺. 𑀦 𑀕𑀢𑀸𑀢𑀺 𑀦 𑀲𑀫𑁆𑀧𑀢𑁆𑀢𑀸. 𑀅𑀲𑀫𑁆𑀪𑀺𑀦𑁆𑀦𑀧𑀤𑀦𑁆𑀢𑀺 𑀅𑀯𑁄𑀫𑀺𑀲𑁆𑀲𑀓𑀧𑀤𑀁, 𑀅𑀜𑁆𑀜𑀢𑁆𑀣 𑀏𑀯𑀁 𑀅𑀦𑀸𑀕𑀢𑀁 𑀯𑀸𑀓𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑀢𑁆𑀣 𑀳𑀺 𑀏𑀯𑀁 𑀯𑀼𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀯𑀦𑁆𑀢𑀺 ‘‘𑀢𑁂𑀦𑀳𑀸𑀦𑀦𑁆𑀤𑀸’’𑀢𑀺 𑀏𑀓𑀯𑀘𑀦𑀁, ‘‘𑀲𑀼𑀡𑀸𑀣 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀩𑀳𑀼𑀯𑀘𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀢𑁂𑀦𑀳𑀸𑀦𑀦𑁆𑀤𑀸’’𑀢𑀺 𑀇𑀥𑀸𑀧𑀺 𑀩𑀳𑀼𑀯𑀘𑀦𑀫𑁂𑀯 𑀓𑀢𑁆𑀯𑀸 𑀧𑀞𑀦𑁆𑀢𑀺 ‘‘𑀲𑀸𑀥𑀼 𑀅𑀦𑀼𑀭𑀼𑀤𑁆𑀥𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀉𑀧𑀥𑀻𑀢𑀺 𑀅𑀥𑀺𑀧𑁆𑀧𑁂𑀢𑀁 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺. 𑀉𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀁 𑀉𑀤𑀬𑀁 𑀧𑀝𑀺𑀮𑀪𑀢𑀺 ‘‘𑀧𑀸𑀓𑀝𑀪𑀸𑀯𑁄 𑀞𑀺𑀢𑀺𑀓𑁄, 𑀅𑀢𑁆𑀢𑀮𑀸𑀪𑁄 𑀉𑀤𑀬𑁄’’𑀢𑀺. 𑀦𑀺𑀯𑀺𑀲𑀢𑀺 𑀦𑀺𑀯𑁂𑀲𑀁 𑀑𑀓𑀸𑀲𑀁 𑀧𑀝𑀺𑀮𑀪𑀢𑀺. 𑀏𑀓𑀯𑀸𑀭𑀫𑁂𑀯 𑀳𑀺 𑀉𑀧𑁆𑀧𑀦𑁆𑀦𑀫𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀤𑀼𑀩𑁆𑀩𑀮𑀢𑁆𑀢𑁂𑀦 𑀑𑀓𑀸𑀲𑁂 𑀯𑀺𑀬 𑀧𑀢𑀺𑀝𑁆𑀞𑀳𑀦𑀁 𑀦𑀢𑁆𑀣𑀺, 𑀧𑀼𑀦𑀧𑁆𑀧𑀼𑀦𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀁 𑀦𑀺𑀯𑀺𑀝𑁆𑀞𑀁 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀦𑀺𑀯𑀺𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀢𑀺𑀝𑁆𑀞𑀳𑀢𑀻’’𑀢𑀺.

𑀧𑀺𑀬𑀲𑀪𑀸𑀯𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀚𑀸𑀢𑀺𑀓𑀁. 𑀫𑀥𑀼𑀭𑀲𑀪𑀸𑀯𑀦𑁆𑀢𑀺 𑀇𑀝𑁆𑀞𑀚𑀸𑀢𑀺𑀓𑀁. 𑀅𑀪𑀺𑀦𑀺𑀯𑀺𑀝𑁆𑀞𑀸𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑁂𑀦 𑀑𑀢𑀺𑀡𑁆𑀡𑀸. 𑀲𑀫𑁆𑀧𑀢𑁆𑀢𑀺𑀬𑀦𑁆𑀢𑀺 𑀪𑀯𑀲𑀫𑁆𑀧𑀢𑁆𑀢𑀺𑀬𑀁. 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦𑀸𑀢𑀺 𑀧𑀝𑀺𑀩𑀺𑀫𑁆𑀩𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦. 𑀓𑀡𑁆𑀡𑀲𑁆𑀲 𑀙𑀺𑀤𑁆𑀤𑀧𑀤𑁂𑀲𑀁 𑀭𑀚𑀢𑀦𑀸𑀴𑀺𑀓𑀁 𑀯𑀺𑀬, 𑀓𑀡𑁆𑀡𑀩𑀤𑁆𑀥𑀁 𑀧𑀦 𑀧𑀸𑀫𑀗𑁆𑀕𑀲𑀼𑀢𑁆𑀢𑀁 𑀯𑀺𑀬. 𑀢𑀼𑀗𑁆𑀕𑀸 𑀉𑀘𑁆𑀘𑀸 𑀤𑀻𑀖𑀸 𑀦𑀸𑀲𑀺𑀓𑀸 𑀢𑀼𑀗𑁆𑀕𑀦𑀸𑀲𑀸. 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀁 𑀅𑀢𑁆𑀢𑀦𑁄 𑀖𑀸𑀦𑀁. ‘‘𑀮𑀤𑁆𑀥𑀯𑁄𑀳𑀸𑀭𑀸’’𑀢𑀺 𑀯𑀸 𑀧𑀸𑀞𑁄. 𑀢𑀲𑁆𑀫𑀺𑀁 𑀲𑀢𑀺 𑀢𑀼𑀗𑁆𑀕𑀸 𑀦𑀸𑀲𑀸 𑀬𑁂𑀲𑀁 𑀢𑁂 𑀢𑀼𑀗𑁆𑀕𑀦𑀸𑀲𑀸. 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀖𑀸𑀦𑀦𑁆𑀢𑀺 𑀬𑁄𑀚𑀦𑀸 𑀯𑀡𑁆𑀡𑀲𑀡𑁆𑀞𑀸𑀦𑀢𑁄 𑀭𑀢𑁆𑀢𑀓𑀫𑁆𑀩𑀮𑀧𑀝𑀮𑀁 𑀯𑀺𑀬. 𑀲𑀫𑁆𑀨𑀲𑁆𑀲𑀢𑁄 𑀫𑀼𑀤𑀼𑀲𑀺𑀦𑀺𑀤𑁆𑀥𑀁 𑀓𑀺𑀘𑁆𑀘𑀢𑁄 𑀲𑀺𑀦𑀺𑀤𑁆𑀥𑀫𑀥𑀼𑀭𑀭𑀲𑀤𑀁. 𑀲𑀸𑀮𑀮𑀝𑁆𑀞𑀺𑀦𑁆𑀢𑀺 𑀲𑀸𑀮𑀓𑁆𑀔𑀦𑁆𑀥𑀁.

𑀅𑀤𑁆𑀤𑀲𑀁𑀲𑀽𑀢𑀺 𑀧𑀲𑁆𑀲𑀺𑀁𑀲𑀼. 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀓𑀁𑀲𑁂’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀥𑀺𑀝𑁆𑀞𑀸𑀦𑀯𑁄𑀳𑀸𑀭𑁂𑀦.

𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀯𑀡𑁆𑀡𑀸𑀤𑀺𑀕𑀼𑀡𑀁. 𑀆𑀤𑀻𑀦𑀯𑀦𑁆𑀢𑀺 𑀫𑀭𑀡𑀕𑁆𑀕𑀢𑀢𑁄.

𑀲𑀢𑁆𑀢𑀼𑀧𑀸𑀦𑀻𑀬𑁂𑀦𑀸𑀢𑀺 𑀲𑀢𑁆𑀢𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀮𑁄𑀮𑀺𑀢𑀧𑀸𑀦𑀻𑀬𑁂𑀦. 𑀘𑀢𑁆𑀢𑀸𑀭𑀺 𑀧𑀸𑀦𑀸𑀦𑀺 𑀯𑀺𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀢𑀡𑁆𑀳𑀸𑀧𑀺𑀧𑀸𑀲𑀸𑀯𑀽𑀧𑀲𑀫𑀦𑀢𑁄.

𑀲𑀫𑁆𑀫𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀴𑀓𑀮𑀸𑀧𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀓𑀲𑁆𑀫𑀸 𑀧𑀼𑀘𑁆𑀙𑀢𑀻𑀢𑀺 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁄 𑀲𑀬𑀁 𑀢𑀢𑁆𑀣 𑀦𑀺𑀓𑁆𑀓𑀗𑁆𑀔𑁄 𑀲𑀫𑀸𑀦𑁄 𑀓𑀲𑁆𑀫𑀸 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀚𑁆𑀛𑀸𑀲𑀬𑀚𑀸𑀦𑀦𑀢𑁆𑀣𑀦𑁆𑀢𑀺 𑀇𑀤𑀫𑁆𑀧𑀺 𑀢𑀲𑁆𑀲 𑀫𑀳𑀸𑀲𑀸𑀯𑀓𑀲𑁆𑀲 𑀧𑀭𑀘𑀺𑀢𑁆𑀢𑀚𑀸𑀦𑀦𑁂𑀦 𑀅𑀧𑁆𑀧𑀸𑀝𑀺𑀳𑀻𑀭𑀁 𑀲𑀺𑀬𑀸, 𑀢𑁂𑀦 𑀢𑀁 𑀅𑀧𑀭𑀺𑀢𑀼𑀲𑁆𑀲𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀉𑀢𑁆𑀢𑀫𑀲𑀸𑀯𑀓𑀸𑀢𑀺 𑀅𑀢𑁆𑀣𑁄, 𑀦 𑀳𑀺 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁄 𑀅𑀕𑁆𑀕𑀲𑀸𑀯𑀓𑀮𑀓𑁆𑀔𑀡𑀧𑁆𑀧𑀢𑁆𑀢𑁄, 𑀅𑀣 𑀔𑁄 𑀫𑀳𑀸𑀲𑀸𑀯𑀓𑀮𑀓𑁆𑀔𑀡𑀧𑁆𑀧𑀢𑁆𑀢𑁄. 𑀇𑀤𑀸𑀦𑁂𑀯 𑀔𑁄 𑀫𑀬𑀦𑁆𑀢𑀺𑀆𑀤𑀺 𑀳𑁂𑀝𑁆𑀞𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀅𑀦𑀸𑀮𑁄𑀴𑁂𑀦𑁆𑀢𑁂𑀦 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀆𑀳𑀝𑀸, 𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀯𑀲𑁂𑀦, 𑀇𑀥 𑀧𑀦 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀢𑀁 𑀆𑀮𑁄𑀴𑁂𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀣𑀺𑀢𑀁 𑀫𑀳𑀸𑀣𑁂𑀭𑁂𑀦, 𑀢𑀫𑁂𑀯𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀢𑁂𑀦𑁂𑀯 𑀧𑀓𑀸𑀲𑁂𑀢𑀼𑀓𑀸𑀫𑁄 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁄 𑀆𑀳 ‘‘𑀇𑀤𑀸𑀦𑁂𑀯 𑀔𑁄 𑀫𑀬’’𑀦𑁆𑀢𑀺𑀆𑀤𑀺. 𑀢𑁂𑀦𑀸𑀳 ‘‘𑀇𑀤𑀁 𑀣𑁂𑀭𑁄’’𑀢𑀺𑀆𑀤𑀺.

𑀏𑀢𑁆𑀢𑀓𑁂 𑀞𑀸𑀦𑁂𑀢𑀺 ‘‘𑀓𑀺𑀁 𑀦𑀼 𑀔𑁄 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀧𑀞𑀫𑀸𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺 𑀧𑀤𑀁, 𑀏𑀢𑁆𑀢𑀓𑁂 𑀞𑀸𑀦𑁂. 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑁂 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸 ‘‘𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀤𑁂𑀲𑀦𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀨𑀮𑁂 𑀕𑀳𑀺𑀢𑁂 𑀓𑀸𑀭𑀡𑀁 𑀕𑀳𑀺𑀢𑀫𑁂𑀯𑀸’’𑀢𑀺 𑀯𑀺𑀜𑁆𑀜𑀸𑀡𑁂 𑀕𑀳𑀺𑀢𑁂 𑀲𑀗𑁆𑀔𑀸𑀭𑀸, 𑀢𑁂𑀲𑀜𑁆𑀘 𑀓𑀸𑀭𑀡𑀪𑀽𑀢𑀸 𑀅𑀯𑀺𑀚𑁆𑀚𑀸 𑀕𑀳𑀺𑀢𑀸 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀳𑁂𑀝𑁆𑀞𑀸 𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀧𑀤𑁂𑀲𑀽’’𑀢𑀺. 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀤𑁂. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦𑀸𑀢𑀺 ‘‘𑀦𑀺𑀭𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸𑀯𑀺𑀦𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀕𑀢𑀸𑀦𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀸𑀭𑀸𑀦𑀁 𑀯𑀲𑁂𑀦. ‘‘𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁪𑁬𑁮) 𑀯𑀺𑀬 𑀇𑀥 𑀯𑀢𑁆𑀣𑀼𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀙𑀢𑁆𑀢𑀺𑀁𑀲𑀸𑀬 𑀓𑀸𑀭𑀡𑁂𑀳𑀻’’𑀢𑀺. 𑀧𑀞𑀫𑁄 𑀅𑀦𑀼𑀫𑁄𑀤𑀦𑀸𑀯𑀺𑀥𑀺. 𑀥𑀫𑁆𑀫𑀓𑀣𑀺𑀓𑀕𑀼𑀡𑁄𑀢𑀺 𑀯𑀺𑀧𑀲𑁆𑀲𑀦𑀸𑀯𑀺𑀲𑀬𑁄 𑀅𑀪𑁂𑀤𑁄𑀧𑀘𑀸𑀭𑁂𑀦 𑀯𑀼𑀢𑁆𑀢𑁄. 𑀲𑁂𑀲𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀢𑀺𑀬𑁄 𑀅𑀦𑀼𑀫𑁄𑀤𑀦𑀸, 𑀢𑀢𑀺𑀬𑀁 𑀅𑀦𑀼𑀫𑁄𑀤𑀦𑀦𑁆𑀢𑀺 𑀅𑀪𑀺𑀥𑁂𑀬𑁆𑀬𑀸𑀦𑀼𑀭𑀽𑀧𑀁 𑀯𑀢𑁆𑀢𑀩𑁆𑀩𑀁. 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺 𑀓𑀣𑀺𑀢𑀸 ‘‘𑀦𑀺𑀩𑁆𑀩𑀺𑀤𑀸𑀬…𑀧𑁂… 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀓𑁆𑀔𑀪𑀽𑀫𑀺 𑀓𑀣𑀺𑀢𑀸 ‘‘𑀦𑀺𑀩𑁆𑀩𑀺𑀤𑀸𑀬…𑀧𑁂… 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀅𑀲𑁂𑀓𑁆𑀔𑀪𑀽𑀫𑀺 𑀓𑀣𑀺𑀢𑀸 ‘‘𑀦𑀺𑀩𑁆𑀩𑀺𑀤𑀸 …𑀧𑁂… 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀦𑀴𑀓𑀮𑀸𑀧𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑁄𑀲𑀫𑁆𑀩𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀅𑀝𑁆𑀞𑀫𑁂 𑀧𑀭𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸𑀢𑀺 𑀧𑀭𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀬𑀁 𑀏𑀲 𑀪𑀡𑀢𑀺, 𑀢𑀁 𑀪𑀽𑀢𑀦𑁆𑀢𑀺 𑀕𑀡𑁆𑀳𑀸𑀢𑀻’’𑀢𑀺. 𑀧𑀭𑀧𑀢𑁆𑀢𑀺𑀬𑁄 𑀳𑀺 𑀏𑀲𑁄 𑀧𑀭𑀦𑁂𑀬𑁆𑀬𑀩𑀼𑀤𑁆𑀥𑀺𑀓𑁄. 𑀬𑀁 𑀓𑀸𑀭𑀡𑀦𑁆𑀢𑀺 𑀬𑀁 𑀅𑀢𑁆𑀢𑀦𑀸 𑀘𑀺𑀦𑁆𑀢𑀺𑀢𑀯𑀢𑁆𑀣𑀼. 𑀭𑀼𑀘𑁆𑀘𑀢𑀻𑀢𑀺 ‘‘𑀏𑀯𑀫𑁂𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀅𑀜𑁆𑀜𑀣𑀸’’𑀢𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀭𑀼𑀘𑁆𑀘𑀢𑀺. 𑀭𑀼𑀘𑀺𑀬𑀸 𑀕𑀡𑁆𑀳𑀸𑀢𑀻𑀢𑀺 𑀧𑀭𑀧𑀢𑁆𑀢𑀺𑀬𑁄 𑀅𑀳𑀼𑀢𑁆𑀯𑀸 𑀲𑀬𑀫𑁂𑀯 𑀢𑀣𑀸 𑀭𑁄𑀘𑁂𑀦𑁆𑀢𑁄 𑀕𑀡𑁆𑀳𑀸𑀢𑀺. 𑀅𑀦𑀼𑀲𑁆𑀲𑀯𑁄𑀢𑀺 ‘‘𑀅𑀦𑀼 𑀅𑀦𑀼 𑀲𑀼𑀢’’𑀦𑁆𑀢𑀺 𑀏𑀯𑀁 𑀘𑀺𑀭𑀓𑀸𑀮𑀕𑀢𑀸𑀬 𑀅𑀦𑀼𑀲𑁆𑀲𑀼𑀢𑀺𑀬𑀸 𑀮𑀩𑁆𑀪𑀫𑀸𑀦𑀁 ‘‘𑀓𑀣𑀫𑀺𑀤𑀁 𑀲𑀺𑀬𑀸, 𑀓𑀲𑁆𑀫𑀸 𑀪𑀽𑀢𑀫𑁂𑀢’’𑀦𑁆𑀢𑀺 𑀅𑀦𑀼𑀲𑁆𑀲𑀯𑁂𑀦 𑀕𑀡𑁆𑀳𑀸𑀢𑀺. 𑀯𑀺𑀢𑀓𑁆𑀓𑀬𑀢𑁄𑀢𑀺 ‘‘𑀏𑀯𑀫𑁂𑀢𑀁 𑀲𑀺𑀬𑀸’’𑀢𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀲𑁆𑀲. 𑀏𑀓𑀁 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀻𑀢𑀺 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀯𑀢𑁆𑀣𑀼 𑀘𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀢𑀺. 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦𑀸𑀢𑀺 𑀅𑀢𑁆𑀢𑀦𑀸 𑀓𑀧𑁆𑀧𑀺𑀢𑀸𑀓𑀸𑀭𑁂𑀦𑀸 𑀢𑀁 𑀕𑀡𑁆𑀳𑀸𑀢𑀺. 𑀏𑀓𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 ‘‘𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀁 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀏𑀯𑀫𑁂𑀢𑀁, 𑀦𑀸𑀜𑁆𑀜𑀣𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀏𑀓𑁄 𑀅𑀪𑀺𑀦𑀺𑀯𑁂𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀸𑀬𑀲𑁆𑀲𑀸𑀢𑀺 𑀬𑀸𑀬 𑀤𑀺𑀝𑁆𑀞𑀺𑀬𑀸 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀦𑀺𑀭𑀽𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲. 𑀔𑀫𑀢𑀻𑀢𑀺 𑀢𑀣𑀸 𑀕𑀳𑀡𑀓𑁆𑀔𑀫𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑁄…𑀧𑁂… 𑀕𑀡𑁆𑀳𑀸𑀢𑀻’’𑀢𑀺. 𑀏𑀢𑀸𑀦𑀻𑀢𑀺 𑀲𑀤𑁆𑀥𑀸𑀤𑀻𑀦𑀺. 𑀢𑀸𑀦𑀺 𑀳𑀺 𑀲𑀤𑁆𑀥𑁂𑀬𑁆𑀬𑀸𑀦𑀁 𑀯𑀢𑁆𑀣𑀽𑀦𑀁 𑀕𑀳𑀡𑀳𑁂𑀢𑀼𑀪𑀸𑀯𑀢𑁄 ‘‘𑀓𑀸𑀭𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑀯𑀯𑀺𑀥𑁄𑀧𑀺 𑀪𑀯𑁄 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂𑀢𑀺 𑀪𑀯𑀦𑀺𑀭𑁄𑀥𑁄, 𑀦𑀺𑀩𑁆𑀩𑀸𑀦𑀁. 𑀲𑁆𑀯𑀸𑀬𑀁 𑀪𑀯𑁄 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀕𑀳𑁄 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫𑀸𑀢𑀺 ‘‘𑀦𑀺𑀩𑁆𑀩𑀸𑀦𑀁 𑀦𑀸𑀫 𑀪𑀯𑀦𑀺𑀭𑁄𑀥𑁄’’𑀢𑀺 𑀏𑀲 𑀧𑀜𑁆𑀳𑁄 𑀲𑁂𑀓𑁆𑀔𑁂𑀳𑀺𑀧𑀺 𑀚𑀸𑀦𑀺𑀢𑀩𑁆𑀩𑁄, 𑀦 𑀅𑀲𑁂𑀓𑁆𑀔𑁂𑀳𑁂𑀯. 𑀇𑀫𑀁 𑀞𑀸𑀦𑀦𑁆𑀢𑀺 𑀇𑀫𑀁 𑀬𑀸𑀣𑀸𑀯𑀓𑀸𑀭𑀡𑀁.

𑀲𑀼𑀝𑁆𑀞𑀼 𑀤𑀺𑀝𑁆𑀞𑀦𑁆𑀢𑀺 ‘‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀫𑀬𑀸 𑀲𑀼𑀝𑁆𑀞𑀼 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑀁, 𑀪𑀯𑀲𑁆𑀲 𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑀸𑀦𑀁, 𑀪𑀯𑀦𑀺𑀭𑁄𑀥𑀲𑁆𑀲 𑀘 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸𑀲𑀗𑁆𑀔𑀢𑀸𑀫𑀢𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀝𑁆𑀞𑀢𑁆𑀢𑀸. 𑀅𑀦𑀸𑀕𑀸𑀫𑀺𑀨𑀮𑁂 𑀞𑀺𑀢𑁄 𑀳𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀞𑀺𑀢𑁄 𑀏𑀯 𑀦𑀸𑀫 𑀉𑀧𑀭𑀺𑀫𑀕𑁆𑀕𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀞𑀺𑀢𑀢𑁆𑀢𑀸’’𑀢𑀺. 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑁆𑀧𑀺 𑀣𑁂𑀭𑀲𑁆𑀲𑁂𑀢𑀁 𑀜𑀸𑀡𑀁 ‘‘𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 𑀯𑀼𑀢𑁆𑀢𑀜𑀸𑀡𑀁 𑀯𑀺𑀬 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀽𑀦𑀯𑀻𑀲𑀢𑀺𑀬𑀸…𑀧𑁂… 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡’’𑀦𑁆𑀢𑀺. 𑀏𑀢𑁂𑀦 𑀏𑀢𑀁 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀺𑀬 𑀦 𑀳𑁄𑀢𑀺 𑀲𑀧𑁆𑀧𑀤𑁂𑀲𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀥 𑀉𑀤𑀧𑀸𑀦𑀦𑀺𑀤𑀲𑁆𑀲𑀦𑀫𑁆𑀧𑀺 𑀲𑀫𑀢𑁆𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦𑀸𑀢𑀺 𑀅𑀯𑀲𑁂𑀲𑀓𑀺𑀮𑁂𑀲𑀸𑀦𑀁, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦. 𑀉𑀧𑀭𑀺 𑀅𑀭𑀳𑀢𑁆𑀢𑀨𑀮𑀲𑀫𑀬𑁄𑀢𑀺 𑀉𑀧𑀭𑀺 𑀲𑀺𑀚𑁆𑀛𑀦𑀢𑁄 𑀅𑀭𑀳𑀢𑁆𑀢𑀧𑀝𑀺𑀮𑀸𑀪𑁄 𑀢𑀣𑀸 𑀅𑀢𑁆𑀣𑀺. ‘‘𑀬𑁂𑀦𑀸𑀳𑀁 𑀢𑀁 𑀧𑀭𑀺𑀬𑁂𑀲𑀢𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀚𑀸𑀦𑀸𑀢𑀺.

𑀓𑁄𑀲𑀫𑁆𑀩𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀧𑀬𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 𑀉𑀤𑀓𑀯𑀟𑁆𑀠𑀦𑀲𑀫𑀬𑁂𑀢𑀺 𑀲𑀩𑁆𑀩𑀤𑀺𑀯𑀲𑁂𑀲𑀼 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀅𑀦𑁆𑀢𑁄 𑀫𑀳𑀦𑁆𑀢𑀘𑀦𑁆𑀤𑀓𑀦𑁆𑀢𑀫𑀡𑀺𑀧𑀩𑁆𑀩𑀢𑀸𑀦𑀁 𑀚𑀼𑀡𑁆𑀳𑀲𑀫𑁆𑀨𑀲𑁆𑀲𑁂𑀦 𑀧𑀳𑀢𑀢𑁆𑀢𑀸 𑀚𑀮𑀸𑀪𑀺𑀲𑀦𑁆𑀤𑀦𑀯𑀲𑁂𑀦 𑀉𑀤𑀓𑀲𑁆𑀲 𑀯𑀟𑁆𑀠𑀦𑀲𑀫𑀬𑁂. 𑀉𑀧𑀭𑀺 𑀕𑀘𑁆𑀙𑀦𑁆𑀢𑁄𑀢𑀺 𑀧𑀓𑀢𑀺𑀬𑀸 𑀉𑀤𑀓𑀲𑁆𑀲 𑀢𑀺𑀝𑁆𑀞𑀝𑁆𑀞𑀸𑀦𑀲𑁆𑀲 𑀢𑀢𑁄 𑀉𑀧𑀭𑀺 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀭𑀺 𑀬𑀸𑀧𑁂𑀢𑀻𑀢𑀺 𑀉𑀤𑀓𑀁 𑀢𑀢𑁆𑀣 𑀉𑀧𑀭𑀽𑀧𑀭𑀺 𑀯𑀟𑁆𑀠𑁂𑀢𑀺. 𑀢𑀣𑀸𑀪𑀽𑀢𑁄 𑀘 𑀢𑀁 𑀩𑁆𑀭𑀽𑀳𑁂𑀦𑁆𑀢𑁄 𑀧𑀽𑀭𑁂𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀯𑀟𑁆𑀠𑁂𑀢𑀺 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀬𑀲𑁆𑀫𑀸 𑀧𑀘𑁆𑀘𑀬𑀥𑀫𑁆𑀫𑀸 𑀅𑀢𑁆𑀢𑀦𑁄 𑀨𑀮𑀲𑀫𑀯𑀸𑀬𑀧𑀘𑁆𑀘𑀬𑁂 𑀳𑁄𑀦𑁆𑀢𑁂 𑀢𑀲𑁆𑀲 𑀉𑀧𑀭𑀺 𑀞𑀺𑀢𑁄 𑀯𑀺𑀬 𑀳𑁄𑀢𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀸 𑀉𑀧𑀭𑀺 𑀕𑀘𑁆𑀙𑀦𑁆𑀢𑀻’’𑀢𑀺. 𑀧𑀘𑁆𑀘𑀬𑀪𑀸𑀯𑁂𑀦 𑀳𑀺 𑀲𑀸 𑀢𑀣𑀸 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑀼𑀡𑀦𑁆𑀢𑀻’’𑀢𑀺. 𑀅𑀧𑀕𑀘𑁆𑀙𑀦𑁆𑀢𑁄 𑀬𑀸𑀬𑀦𑁆𑀢𑁄. 𑀢𑁂𑀦𑀸𑀳 ‘‘𑀑𑀲𑀭𑀦𑁆𑀢𑁄’’𑀢𑀺, 𑀅𑀯𑀟𑁆𑀠𑀦𑁆𑀢𑁄 𑀧𑀭𑀺𑀳𑀻𑀬𑀫𑀸𑀦𑁄𑀢𑀺 𑀅𑀢𑁆𑀣𑁄.

𑀉𑀧𑀬𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀼𑀲𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 𑀕𑀭𑀼𑀓𑀢𑁄𑀢𑀺 𑀕𑀭𑀼𑀪𑀸𑀯𑀳𑁂𑀢𑀽𑀦𑀁 𑀉𑀢𑁆𑀢𑀫𑀕𑀼𑀡𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀕𑀭𑀼𑀓𑀸𑀭𑁂𑀦 𑀕𑀭𑀼𑀓𑀢𑁄. 𑀫𑀸𑀦𑀺𑀢𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀸𑀦𑀺𑀢𑁄. 𑀢𑀸𑀬 𑀳𑀺 𑀯𑀺𑀜𑁆𑀜𑀽𑀦𑀁 𑀫𑀦𑀸𑀧𑀢𑀸𑀢𑀺 𑀆𑀳 ‘‘𑀫𑀦𑁂𑀦 𑀧𑀺𑀬𑀸𑀬𑀺𑀢𑁄’’𑀢𑀺. 𑀘𑀢𑀼𑀧𑀘𑁆𑀘𑀬𑀧𑀽𑀚𑀸𑀬 𑀘 𑀧𑀽𑀚𑀺𑀢𑁄𑀢𑀺 𑀇𑀤𑀁 𑀅𑀢𑁆𑀣𑀯𑀘𑀦𑀁. 𑀬𑀤𑀢𑁆𑀣𑀁 𑀲𑀁𑀕𑀻𑀢𑀺𑀓𑀸𑀭𑁂𑀳𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀅𑀁𑀲𑀓𑀽𑀝𑀢𑁄𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀉𑀪𑁄 𑀅𑀁𑀲𑀓𑀽𑀝𑁂 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀸 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄, 𑀉𑀪𑀬𑀢𑁄 𑀯𑀸 𑀅𑀧𑀦𑁂𑀦𑁆𑀢𑀺. 𑀧𑀭𑀺𑀘𑀺𑀢𑀕𑀦𑁆𑀣𑀯𑀲𑁂𑀦 𑀧𑀡𑁆𑀟𑀺𑀢𑀧𑀭𑀺𑀩𑁆𑀩𑀸𑀚𑀓𑁄, 𑀬𑀢𑁄 𑀧𑀘𑁆𑀙𑀸 𑀯𑀺𑀲𑁂𑀲𑀪𑀸𑀕𑀻 𑀚𑀸𑀢𑁄. 𑀯𑀺𑀘𑀺𑀢𑁆𑀢𑀦𑀬𑀸𑀬 𑀥𑀫𑁆𑀫𑀓𑀣𑀸𑀬 𑀓𑀣𑀦𑀢𑁄 ‘‘𑀓𑀯𑀺𑀲𑁂𑀝𑁆𑀞𑁄’’𑀢𑀺 𑀆𑀳𑀁𑀲𑀼.

𑀢𑁂𑀚𑀼𑀲𑁆𑀲𑀤𑁄𑀢𑀺 𑀫𑀳𑀸𑀢𑁂𑀚𑁄. 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀸𑀤𑀻𑀦𑀁 𑀦𑀺𑀬𑀢𑀪𑀸𑀯𑁂𑀦 𑀦𑀺𑀬𑀫𑀫𑀦𑀼𑀬𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀫𑁆𑀳𑀻𑀢𑀺 𑀜𑀸𑀡𑀁 𑀢𑀢𑁆𑀣 𑀓𑀣𑀺𑀢𑀁. 𑀥𑀫𑁆𑀫𑀦𑁆𑀢𑀺 𑀢𑀲𑁆𑀲𑀁 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀣𑁂𑀭𑀲𑁆𑀲 𑀅𑀲𑀫𑁆𑀫𑀼𑀔𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁. 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀺 𑀢𑀣𑀸 𑀯𑀭𑀲𑁆𑀲 𑀤𑀺𑀦𑁆𑀦𑀢𑁆𑀢𑀸.

𑀓𑀺𑀜𑁆𑀘𑀸𑀧𑀺 𑀲𑀼𑀲𑀺𑀫𑁄 𑀧𑀽𑀭𑀡𑀸𑀤𑀬𑁄 𑀯𑀺𑀬 𑀲𑀢𑁆𑀣𑀼𑀧𑀝𑀺𑀜𑁆𑀜𑁄 𑀦 𑀳𑁄𑀢𑀺, 𑀢𑀺𑀢𑁆𑀣𑀺𑀬𑁂𑀳𑀺 𑀧𑀦 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑁄 𑀧𑀜𑁆𑀜𑀯𑀸 𑀯𑁂𑀤𑀗𑁆𑀕𑀓𑀼𑀲𑀮𑁄’’𑀢𑀺 𑀕𑀡𑀸𑀘𑀭𑀺𑀬𑀝𑁆𑀞𑀸𑀦𑁂 𑀞𑀧𑀺𑀢𑁄, 𑀢𑀣𑀸 𑀘𑀲𑁆𑀲 𑀲𑀫𑁆𑀪𑀸𑀯𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀳𑀁 𑀲𑀢𑁆𑀣𑀸𑀢𑀺 𑀧𑀝𑀺𑀚𑀸𑀦𑀦𑁆𑀢𑁄’’𑀢𑀺, 𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀓𑀢𑁆𑀢𑀸. 𑀢𑀣𑀸 𑀳𑁂𑀲 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀉𑀧𑀕𑀦𑁆𑀢𑀼𑀁 𑀅𑀲𑀓𑁆𑀔𑀺.

𑀅𑀜𑁆𑀜𑀸𑀢𑀺 𑀅𑀭𑀳𑀢𑁆𑀢𑀲𑁆𑀲 𑀦𑀸𑀫𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀺𑀡𑁆𑀡𑀦𑁆𑀢𑁂 𑀧𑀯𑀢𑁆𑀢𑀢𑁆𑀢𑀸. 𑀢𑀁 𑀧𑀯𑀢𑁆𑀢𑀺𑀦𑁆𑀢𑀺 𑀬𑀁 𑀅𑀜𑁆𑀜𑀩𑁆𑀬𑀸𑀓𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀢𑁆𑀯𑀸. 𑀅𑀲𑁆𑀲 𑀲𑀼𑀲𑀺𑀫𑀲𑁆𑀲, 𑀧𑀭𑀫𑀧𑁆𑀧𑀫𑀸𑀡𑀦𑁆𑀢𑀺 𑀉𑀢𑁆𑀢𑀫𑀓𑁄𑀝𑀺. 𑀆𑀘𑀭𑀺𑀬𑀫𑀼𑀝𑁆𑀞𑀻𑀢𑀺 𑀆𑀘𑀭𑀺𑀬𑀲𑁆𑀲 𑀫𑀼𑀝𑁆𑀞𑀺𑀓𑀢𑀥𑀫𑁆𑀫𑁄.

𑀅𑀗𑁆𑀕𑀲𑀦𑁆𑀢𑀢𑀸𑀬𑀸𑀢𑀺 𑀦𑀻𑀯𑀭𑀡𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀯𑀺𑀤𑀽𑀭𑀪𑀸𑀯𑁂𑀦 𑀛𑀸𑀦𑀗𑁆𑀕𑀸𑀦𑀁 𑀯𑀽𑀧𑀲𑀦𑁆𑀢𑀢𑀸𑀬. 𑀦𑀺𑀩𑁆𑀩𑀼𑀢𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀢𑀸𑀬 𑀳𑀺 𑀢𑁂𑀲𑀁 𑀛𑀸𑀦𑀸𑀦𑀁 𑀧𑀡𑀻𑀢𑀢𑀭𑀪𑀸𑀯𑁄. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀸𑀢𑀺 𑀭𑀽𑀧𑀧𑀢𑀺𑀪𑀸𑀕𑀯𑀺𑀕𑀫𑁂𑀦 𑀲𑀡𑁆𑀳𑀲𑀼𑀔𑀼𑀫𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀲𑀦𑁆𑀢𑀪𑀸𑀯𑁂𑀦. 𑀬𑀤𑀕𑁆𑀕𑁂𑀦 𑀳𑀺 𑀢𑁂𑀲𑀁 𑀪𑀸𑀯𑀦𑀸𑀢𑀺𑀲𑀬𑀲𑀫𑁆𑀪𑀸𑀯𑀺𑀢𑀲𑀡𑁆𑀳𑀲𑀼𑀔𑀼𑀫𑀧𑁆𑀧𑀓𑀸𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀲𑀦𑁆𑀢𑀸𑀦𑀺, 𑀢𑀤𑀕𑁆𑀕𑁂𑀦 𑀛𑀸𑀦𑀗𑁆𑀕𑀸𑀦𑀁 𑀲𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀯𑀸 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑀸𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀤𑀻𑀧𑁂𑀢𑀩𑁆𑀩𑀸. 𑀆𑀭𑀼𑀧𑁆𑀧𑀯𑀺𑀫𑁄𑀓𑁆𑀔𑀸𑀢𑀺 𑀅𑀭𑀽𑀧𑀚𑁆𑀛𑀸𑀦𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀧𑀜𑁆𑀜𑀸𑀫𑀢𑁆𑀢𑁂𑀦𑁂𑀯 𑀯𑀺𑀫𑀼𑀢𑁆𑀢𑀸, 𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸. 𑀥𑀫𑁆𑀫𑀸𑀦𑀁 𑀞𑀺𑀢𑀢𑀸 𑀢𑀁𑀲𑀪𑀸𑀯𑀢𑀸 𑀥𑀫𑁆𑀫𑀝𑁆𑀞𑀺𑀢𑀺, 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀢𑀸, 𑀢𑀢𑁆𑀣 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺. 𑀏𑀯𑀫𑀸𑀳𑀸𑀢𑀺 ‘‘𑀧𑀼𑀩𑁆𑀩𑁂 𑀔𑁄, 𑀲𑀼𑀲𑀺𑀫, 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡’’𑀦𑁆𑀢𑀺 𑀏𑀯𑀫𑀸𑀤𑀺.

𑀯𑀺𑀦𑀸𑀧𑀺 𑀲𑀫𑀸𑀥𑀺𑀦𑁆𑀢𑀺 𑀲𑀫𑀣𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀧𑀼𑀭𑀺𑀫𑀲𑀺𑀤𑁆𑀥𑀁 𑀯𑀺𑀦𑀸𑀧𑀺 𑀲𑀫𑀸𑀥𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀸𑀓𑀸𑀭𑁂𑀦. 𑀦 𑀲𑀫𑀸𑀥𑀺𑀦𑀺𑀲𑁆𑀲𑀦𑁆𑀤𑁄 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸 𑀯𑀺𑀬. 𑀦 𑀲𑀫𑀸𑀥𑀺𑀆𑀦𑀺𑀲𑀁𑀲𑁄 𑀮𑁄𑀓𑀺𑀬𑀸𑀪𑀺𑀜𑁆𑀜𑀸 𑀯𑀺𑀬. 𑀦 𑀲𑀫𑀸𑀥𑀺𑀲𑁆𑀲 𑀦𑀺𑀧𑁆𑀨𑀢𑁆𑀢𑀺 𑀲𑀩𑁆𑀩𑀪𑀯𑀕𑁆𑀕𑀁 𑀯𑀺𑀬. 𑀯𑀺𑀧𑀲𑁆𑀲𑀦𑀸𑀬 𑀦𑀺𑀧𑁆𑀨𑀢𑁆𑀢𑀺 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸𑀢𑀺 𑀬𑁄𑀚𑀦𑀸.

𑀭𑀽𑀧𑀸𑀤𑀻𑀲𑀼 𑀘𑁂𑀢𑁂𑀲𑀼 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀁 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀤𑁂𑀲𑀦𑀸 𑀢𑁂𑀧𑀭𑀺𑀯𑀝𑁆𑀝𑀤𑁂𑀲𑀦𑀸. 𑀅𑀦𑀼𑀬𑁄𑀕𑀁 𑀆𑀭𑁄𑀧𑁂𑀦𑁆𑀢𑁄𑀢𑀺 𑀦𑀦𑀼 𑀯𑀼𑀢𑁆𑀢𑀁, 𑀲𑀼𑀲𑀺𑀫, 𑀇𑀤𑀸𑀦𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦 𑀲𑀩𑁆𑀩𑀲𑁄 𑀧𑀘𑁆𑀘𑀬𑀸𑀓𑀸𑀭𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀯𑀺𑀕𑀢𑀲𑀫𑁆𑀫𑁄𑀳𑁄𑀢𑀺 𑀅𑀦𑀼𑀬𑁄𑀕𑀁 𑀓𑀭𑁄𑀦𑁆𑀢𑁄. 𑀧𑀸𑀓𑀝𑀓𑀭𑀡𑀢𑁆𑀣𑀦𑁆𑀢𑀺 𑀬𑀣𑀸 𑀢𑁆𑀯𑀁, 𑀲𑀼𑀲𑀺𑀫, 𑀦𑀺𑀚𑁆𑀛𑀸𑀦𑀓𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀘 𑀳𑀼𑀢𑁆𑀯𑀸 𑀆𑀲𑀯𑀸𑀦𑀁 𑀔𑀬𑀲𑀫𑁆𑀫𑀲𑀦𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀏𑀯𑀫𑁂𑀢𑁂𑀧𑀺 𑀪𑀺𑀓𑁆𑀔𑀽, 𑀢𑀲𑁆𑀫𑀸 ‘‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀦 𑀢𑁂 𑀢𑀬𑀸 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀸𑀢𑀺.

𑀲𑀼𑀲𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.