𑁮. 𑀘𑁄𑀤𑀓𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀓𑀣𑀸

𑁩𑁯𑁯. ‘‘𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦𑀸’’𑀢𑀺𑀆𑀤𑀻𑀲𑀼 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀙𑀺𑀤𑁆𑀤𑀲𑀧𑁆𑀧𑀝𑀺𑀫𑀁𑀲𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀧𑀭𑀻𑀢𑀯𑀲𑁂𑀦 𑀅𑀘𑁆𑀙𑀺𑀤𑁆𑀤𑀅𑀧𑁆𑀧𑀝𑀺𑀫𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁂𑀦 𑀓𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀺𑀚𑁆𑀚𑀢𑀻𑀢𑀺 𑀙𑀺𑀤𑁆𑀤𑁄, 𑀧𑀝𑀺 𑀧𑀼𑀦𑀧𑁆𑀧𑀼𑀦𑀁 𑀫𑀲𑀺𑀬𑀢𑀺 𑀆𑀫𑀲𑀺𑀬𑀢𑀻𑀢𑀺 𑀧𑀝𑀺𑀫𑀁𑀲𑁄, 𑀦𑀺𑀕𑁆𑀕𑀳𑀺𑀢𑀸𑀕𑀫𑁄, 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀲𑀳 𑀧𑀝𑀺𑀫𑀁𑀲𑁂𑀦𑀸𑀢𑀺 𑀲𑀧𑁆𑀧𑀝𑀺𑀫𑀁𑀲𑁄, 𑀓𑀸𑀬𑀲𑀫𑀸𑀘𑀸𑀭𑁄. 𑀯𑀺𑀧𑀭𑀻𑀢𑁄𑀢𑀺 𑀯𑀺𑀧𑀭𑀺𑀯𑀢𑁆𑀢𑀯𑀲𑁂𑀦 𑀇𑀢𑁄 𑀧𑀯𑀢𑁆𑀢𑁄, 𑀓𑀸𑀬𑀲𑀫𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀫𑀽𑀮𑀓𑀸𑀦𑀼𑀤𑁆𑀥𑀁𑀲𑀦𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺.

𑀫𑁂𑀢𑁆𑀢𑀁 𑀦𑀼 𑀔𑁄 𑀫𑁂 𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀧𑁆𑀧𑀦𑀸𑀪𑀸𑀯𑀧𑁆𑀧𑀢𑁆𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀮𑀺𑀩𑁄𑀥𑁂𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑀸𑀤𑀺𑀓𑁂 𑀧𑀮𑀺𑀩𑁄𑀥𑁂. ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀳𑀢𑀸𑀖𑀸𑀢’’𑀦𑁆𑀢𑀺 𑀇𑀫𑀺𑀦𑀸 𑀅𑀧𑁆𑀧𑀦𑀸𑀪𑀸𑀯𑀧𑁆𑀧𑀢𑁆𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀇𑀤𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀏𑀢𑁆𑀣 𑀇𑀤𑀁𑀲𑀤𑁆𑀤𑀓𑀺𑀁𑀲𑀤𑁆𑀤𑀸𑀦𑀁 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀓𑀢𑀭𑀲𑁆𑀫𑀺𑀁 𑀦𑀕𑀭𑁂’’𑀢𑀺.