𑀘𑀽𑀴𑀯𑀕𑁆𑀕𑀬𑁄𑀚𑀦𑀸
𑀫𑀳𑀸𑀯𑀕𑁆𑀕𑀔𑀦𑁆𑀥𑀓𑀲𑁆𑀲𑁂𑀯𑀁, 𑀓𑀢𑁆𑀯𑀸𑀦 𑀬𑁄𑀚𑀦𑀸𑀦𑀬𑀁;
𑀅𑀥𑀼𑀦𑀸 𑀘𑀽𑀴𑀯𑀕𑁆𑀕𑀲𑁆𑀲, 𑀓𑀭𑀺𑀲𑁆𑀲𑀁 𑀬𑁄𑀚𑀦𑀸𑀦𑀬𑀁.
𑁧. 𑀓𑀫𑁆𑀫𑀓𑁆𑀔𑀦𑁆𑀥𑀓𑀁
𑁧. 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸
𑁧. 𑀘𑀽𑀴𑀯𑀕𑁆𑀕𑀲𑁆𑀲 𑀧𑀞𑀫𑁂 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀘𑀽𑀴𑀯𑀕𑁆𑀕𑀲𑁆𑀲𑀸’’𑀢𑀺 𑀧𑀤𑀁 ‘‘𑀓𑀫𑁆𑀫𑀓𑁆𑀔𑀦𑁆𑀥𑀓𑁂’’𑀢𑀺 𑀧𑀤𑁂 𑀅𑀯𑀬𑀯𑀺𑀲𑀫𑁆𑀩𑀦𑁆𑀥𑁄. 𑀢𑀸𑀯𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀸𑀤𑀺𑀢𑁄, 𑀧𑀸𑀭𑀺𑀯𑀸𑀲𑀺𑀓𑁆𑀔𑀦𑁆𑀥𑀓𑀸𑀤𑀻𑀦𑀁 𑀯𑀸 𑀧𑀞𑀫𑀁. 𑀘𑁂𑀯𑀲𑀤𑁆𑀤𑁄 𑀘 𑀘𑀲𑀤𑁆𑀤𑁄 𑀘 ‘‘𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸’’𑀢𑀺 𑀧𑀤𑀲𑁆𑀲 𑀅𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀻𑀧𑁂𑀦𑁆𑀢𑀺. 𑀦𑀺𑀲𑁆𑀲𑀬𑀸𑀦𑀁 𑀦𑀸𑀫𑀁 𑀦𑀺𑀲𑁆𑀲𑀺𑀢𑁂𑀲𑀼 𑀉𑀧𑀘𑀸𑀭𑀯𑀲𑁂𑀦 𑀢𑁂𑀲𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀸𑀧𑀺 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀦𑀸𑀫𑀸𑀬𑁂𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀲𑀁 𑀦𑀺𑀲𑁆𑀲𑀺𑀢𑀓𑀸𑀧𑀻’’𑀢𑀺𑀆𑀤𑀺. 𑀧𑀺𑀲𑀤𑁆𑀤𑁂𑀦 𑀉𑀧𑀘𑀸𑀭𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. ‘‘𑀲𑀼𑀝𑁆𑀞𑀼 𑀩𑀮𑀯’’𑀦𑁆𑀢𑀺 𑀇𑀫𑀺𑀦𑀸 𑀩𑀮𑀯𑀸𑀩𑀮𑀯𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀢𑀺𑀲𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀩𑀮𑀯𑀩𑀮𑀯’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀯𑀸𑀘𑀸𑀲𑀺𑀮𑀺𑀝𑁆𑀞𑀯𑀲𑁂𑀦 𑀤𑀻𑀖𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀧𑀝𑀺𑀯𑀤𑀣𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀓𑀣𑁂𑀣. 𑀇𑀫𑀺𑀦𑀸 𑀧𑀝𑀺𑀫𑀦𑁆𑀢𑁂𑀣𑀸𑀢𑀺 𑀏𑀢𑁆𑀣 𑀫𑀦𑁆𑀢𑀥𑀸𑀢𑀼𑀬𑀸 𑀕𑀼𑀢𑁆𑀢𑀪𑀸𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀣𑁂𑀲𑀼 𑀓𑀭𑀡𑀪𑀸𑀲𑀦𑀓𑀺𑀘𑁆𑀘𑁂𑀲𑀼 𑀅𑀮𑀁 𑀲𑀫𑀢𑁆𑀣𑀸𑀢𑀺 𑀅𑀮𑀫𑀢𑁆𑀣𑀸, 𑀢𑁂𑀲𑀁 𑀯𑀺𑀲𑁂𑀲𑁂𑀦𑀸𑀢𑀺 𑀅𑀮𑀫𑀢𑁆𑀣𑀢𑀭𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀢𑁆𑀣𑀢𑀭𑀸’’𑀢𑀺.
𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀓𑀣𑀸
𑁪. 𑀅𑀲𑀫𑁆𑀫𑀼𑀔𑀸 𑀓𑀢𑀦𑁆𑀢𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀫𑁆𑀫𑀼𑀔𑁂𑀳𑀺 𑀯𑀺𑀭𑀳𑀺𑀢𑀸 𑀅𑀲𑀫𑁆𑀫𑀼𑀔𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀸𑀦𑀁 𑀯𑀺𑀦𑀸 𑀓𑀢’’𑀦𑁆𑀢𑀺. ‘‘𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 𑀢𑁆𑀯𑀸𑀧𑀘𑁆𑀘𑀬𑀲𑁆𑀲𑀸𑀓𑀸𑀭𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑁂𑀯𑀸𑀢𑀺 𑀘𑀼𑀤𑀺𑀢𑀓𑀲𑁆𑀲𑁂𑀯. 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀅𑀜𑁆𑀜𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀭𑀸𑀚𑀺𑀓𑀸…𑀧𑁂… 𑀯𑀸’’𑀢𑀺. 𑀏𑀢𑁆𑀣𑀸𑀢𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑁂. 𑀦𑀯 𑀧𑀤𑀸𑀢𑀺 𑀦𑀯𑀲𑀼 𑀧𑀤𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀧𑀼𑀭𑀺𑀫𑀓𑁂𑀲𑀼 𑀢𑀻𑀲𑀼 𑀢𑀺𑀓𑁂𑀲𑀼 𑀯𑀼𑀢𑁆𑀢𑁂𑀲𑀼 𑀦𑀯𑀲𑀼 𑀧𑀤𑁂𑀲𑀽𑀢𑀺 𑀬𑁄𑀚𑀦𑀸. ‘‘𑀏𑀓𑁂𑀓’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀫𑁂𑀳𑀻𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺. 𑀤𑁆𑀯𑀸𑀤𑀲 𑀢𑀺𑀓𑀸𑀢𑀺 𑀧𑀼𑀭𑀺𑀫𑁂𑀳𑀺 𑀢𑀻𑀳𑀺 𑀢𑀺𑀓𑁂𑀳𑀺 𑀦𑀯 𑀢𑀺𑀓𑁂 𑀫𑀺𑀲𑁆𑀲𑁂𑀢𑁆𑀯𑀸 𑀤𑁆𑀯𑀸𑀤𑀲. 𑀲𑀼𑀓𑁆𑀓𑀧𑀓𑁆𑀔𑁂𑀲𑀼𑀧𑀻𑀢𑀺 𑀧𑀝𑀺𑀲𑁂𑀥𑀯𑀺𑀭𑀳𑀯𑀲𑁂𑀦 𑀲𑀼𑀓𑁆𑀓𑁂𑀲𑀼 𑀧𑀓𑁆𑀔𑁂𑀲𑀼𑀧𑀺.
𑁬. ‘‘𑀧𑀩𑁆𑀩𑀚𑀺𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀕𑀺𑀳𑀻𑀦𑀁 𑀅𑀦𑀦𑀼𑀮𑁄𑀫𑀺𑀓𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀳𑀲𑁄𑀓𑀺𑀢𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀳𑀦𑀦𑁆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀩𑁆𑀩𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺 𑀧𑀸𑀞𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀦 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀬𑁄𑀚𑁂𑀢𑁆𑀯𑀸 𑀓𑀮𑀳𑁄 𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀧𑀸𑀞𑁄 𑀅𑀢𑁆𑀣𑀺, 𑀢𑀸𑀯 𑀅𑀝𑁆𑀞𑀸𑀭𑀲𑀲𑀫𑁆𑀫𑀸𑀯𑀢𑁆𑀢𑀦𑀯𑀢𑁆𑀢𑀸𑀦𑀁 𑀲𑀁𑀯𑀡𑁆𑀡𑀦𑀸𑀧𑀸𑀞𑁄 𑀮𑀺𑀔𑀺𑀢𑁄, 𑀲𑁄 𑀧𑀸𑀞𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦 𑀮𑀺𑀔𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀧𑀸𑀴𑀺𑀓𑁆𑀓𑀫𑀸𑀦𑀼𑀧𑁆𑀧𑀢𑁆𑀢𑀸𑀪𑀸𑀯𑀢𑁄, 𑀅𑀝𑁆𑀞𑀓𑀣𑀸𑀬𑀫𑁂𑀯 ‘‘𑀅𑀝𑁆𑀞𑀸𑀭𑀲 𑀲𑀫𑁆𑀫𑀸𑀯𑀢𑁆𑀢𑀦𑀯𑀢𑁆𑀢𑀸𑀦𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀯𑀡𑁆𑀡𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀬𑀣𑀸𑀯𑀘𑀦𑀜𑁆𑀘 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑀅𑀝𑁆𑀞. 𑁭𑁬) 𑀲𑀁𑀯𑀡𑁆𑀡𑀺𑀢𑀢𑁆𑀣𑀸 𑀘. 𑀢𑀲𑁆𑀫𑀸 𑀲𑁄 𑀧𑀸𑀞𑁄 𑀦 𑀧𑁄𑀭𑀸𑀡𑀧𑀸𑀞𑁄 𑀳𑁄𑀢𑀺, 𑀧𑀘𑁆𑀙𑀸 𑀧𑀓𑁆𑀔𑀺𑀢𑁆𑀢𑀧𑀸𑀞𑁄𑀢𑀺 𑀤𑀝𑁆𑀞𑀩𑁆𑀩𑁄.
𑀢𑀺𑀡𑁆𑀡𑀁 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁂𑀓𑁂𑀦𑀸𑀧𑀻𑀢𑀺 𑀢𑀻𑀲𑀼 𑀅𑀗𑁆𑀕𑁂𑀲𑀼 𑀏𑀓𑁂𑀓𑁂𑀦𑀸𑀧𑀺. 𑀇𑀫𑀺𑀦𑀸 𑀅𑀯𑀬𑀯𑀯𑀸𑀓𑁆𑀬𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀓𑀫𑁆𑀫𑀸𑀭𑀳𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀦𑀺𑀬𑀲𑁆𑀲𑀲𑁆𑀲 𑀯𑀺𑀲𑁂𑀲𑁂𑀦 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀢𑁆𑀢𑀁 𑀅𑀗𑁆𑀕𑀁 𑀇𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀆𑀓𑀸𑀭𑀯𑀸𑀘𑀓𑁄 𑀇𑀢𑀺𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀅𑀦𑀦𑁆𑀢𑀭𑁂𑀧𑀺. 𑀢𑀚𑁆𑀚𑀻𑀬𑀢𑀺 𑀅𑀦𑁂𑀦 𑀯𑀺𑀦𑀬𑀓𑀫𑁆𑀫𑁂𑀦𑀸𑀢𑀺 𑀢𑀚𑁆𑀚𑀦𑀻𑀬𑀁, 𑀢𑀫𑁂𑀯 𑀓𑀫𑁆𑀫𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁. ‘‘𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀦𑀺𑀬𑀲𑁆𑀲𑀻𑀬𑀢𑀺 𑀩𑀸𑀮𑁄 𑀪𑀚𑀸𑀧𑀻𑀬𑀢𑀺 𑀅𑀦𑁂𑀦 𑀯𑀺𑀦𑀬𑀓𑀫𑁆𑀫𑁂𑀦𑀸𑀢𑀺 𑀦𑀺𑀬𑀲𑁆𑀲𑀁, 𑀤𑀺𑀯𑀸𑀤𑀺𑀕𑀡𑀺𑀓𑀢𑁆𑀢𑀸 𑀲𑀓𑀸𑀭𑀲𑁆𑀲 𑀤𑁆𑀯𑁂𑀪𑀸𑀯𑁄 𑀳𑁄𑀢𑀺 ‘‘𑀦𑀲𑁆𑀲𑀁 𑀯𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬, 𑀦𑀺𑀬𑀲𑁆𑀲𑀫𑁂𑀯 𑀓𑀫𑁆𑀫𑀁 𑀦𑀺𑀬𑀲𑁆𑀲𑀓𑀫𑁆𑀫𑀁. 𑀕𑀸𑀫𑀸𑀤𑀺𑀢𑁄 𑀧𑀩𑁆𑀩𑀸𑀚𑀺𑀬𑀢𑀺 𑀅𑀦𑁂𑀦 𑀯𑀺𑀦𑀬𑀓𑀫𑁆𑀫𑁂𑀦𑀸𑀢𑀺 𑀧𑀩𑁆𑀩𑀸𑀚𑀦𑀻𑀬𑀁, 𑀢𑀫𑁂𑀯 𑀓𑀫𑁆𑀫𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁. 𑀢𑀻𑀲𑀽𑀢𑀺 𑀪𑀡𑁆𑀟𑀦𑀓𑀸𑀭𑀓𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀓𑀼𑀮𑀤𑀽𑀲𑀓𑀯𑀲𑁂𑀦 𑀢𑀺𑀯𑀺𑀥𑁂𑀲𑀼 𑀅𑀗𑁆𑀕𑁂𑀲𑀼. 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀤𑀺 𑀲𑀩𑁆𑀩𑀸𑀦𑀺 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁦𑁦 𑀆𑀤𑀬𑁄) 𑀯𑀼𑀢𑁆𑀢𑀁 𑀇𑀤𑀁 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀘𑀦𑀢𑁆𑀣𑀦𑀸𑀦𑀢𑁆𑀢𑀢𑁄𑀢𑀺 𑀯𑀘𑀦𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀘 𑀦𑀸𑀦𑀸𑀪𑀸𑀯𑀢𑁄. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲𑀸𑀢𑀺 𑀇𑀫𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 ‘‘𑀢𑀺𑀡𑁆𑀡𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀗𑁆𑀕𑀲𑀫𑁆𑀪𑀯𑁄 𑀅𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸. 𑀲𑀗𑁆𑀖𑁂𑀦 𑀓𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀸𑀭𑀳𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀓𑀫𑁆𑀫𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀅𑀗𑁆𑀕𑀲𑀫𑁆𑀪𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲, 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀡𑁆𑀟𑀦𑀓𑀸𑀭𑀓𑀸𑀤𑀻𑀲𑀽𑀢𑀺𑀆𑀤𑀺𑀲𑀤𑁆𑀤𑁂𑀦 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑀓𑀼𑀮𑀤𑀽𑀲𑀓𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀓𑀭𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑁆𑀫𑀸𑀭𑀳𑀦𑁆𑀢𑀺 𑀓𑀫𑁆𑀫𑀲𑁆𑀲, 𑀓𑀫𑁆𑀫𑁂 𑀯𑀸 𑀅𑀭𑀳𑀁. 𑀏𑀢𑁆𑀣𑀸𑀢𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑁂. 𑀧𑀼𑀩𑁆𑀩𑁂𑀦𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂𑀦. 𑀅𑀧𑀭𑀦𑁆𑀢𑀺 𑀅𑀧𑀭𑁂 𑀯𑀼𑀢𑁆𑀢𑀁 𑀓𑀫𑁆𑀫𑀓𑁆𑀔𑀦𑁆𑀥𑀓𑀁. 𑀲𑀫𑁂𑀢𑀻𑀢𑀺 𑀲𑀫𑀁 𑀕𑀘𑁆𑀙𑀢𑀺.
𑀢𑀢𑁆𑀣𑀸𑀢𑀺 𑀓𑀫𑁆𑀫𑁂𑀲𑀼, 𑀢𑀚𑁆𑀚𑀦𑀻𑀬𑀓𑀫𑁆𑀫𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀗𑁆𑀕𑁂𑀲𑀼 𑀯𑀸, 𑀪𑀡𑁆𑀟𑀦𑀓𑀸𑀭𑀓𑀯𑀲𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀔𑁄𑀢𑀺 𑀢𑀣𑀸 𑀯𑀼𑀢𑁆𑀢𑀸𑀧𑀻𑀢𑀺 𑀅𑀢𑁆𑀣𑁄. 𑀓𑀭𑁄𑀦𑁆𑀢𑁂𑀦 𑀓𑀫𑁆𑀫𑀯𑀸𑀘𑀸𑀯𑀸𑀘𑀓𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸𑀢𑀺 𑀢𑀘𑁆𑀙𑁂𑀦 𑀯𑀢𑁆𑀣𑀼𑀦𑀸. 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲. 𑀓𑀲𑁆𑀫𑀸 𑀩𑀸𑀮𑀲𑁆𑀲 𑀅𑀩𑁆𑀬𑀢𑁆𑀢𑀲𑁆𑀲 𑀆𑀧𑀢𑁆𑀢𑀺𑀩𑀳𑀼𑀮𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀇𑀤𑀫𑁆𑀧𑀻𑀢𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀫𑁆𑀧𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀓𑀫𑁆𑀫𑁂𑀲𑀼.
𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀸𑀤𑀺𑀓𑀣𑀸
𑁮. 𑀧𑀦𑁆𑀦𑀮𑁄𑀫𑀸𑀢𑀺 𑀧𑀢𑀺𑀢𑀫𑀸𑀦𑀮𑁄𑀫𑀸. 𑀏𑀢𑀦𑁆𑀢𑀺 𑀯𑀢𑁆𑀢𑀁. 𑀦𑁂𑀢𑁆𑀣𑀸𑀭𑀦𑁆𑀢𑀺 𑀏𑀢𑁆𑀣 𑀅𑀨𑀼𑀝𑁆𑀞𑀓𑁆𑀔𑀭𑀲𑀁𑀬𑁄𑀕𑁂 𑀧𑀭𑀲𑁆𑀲 𑀢𑀓𑀸𑀭𑀲𑁆𑀲 𑀣𑀓𑀸𑀭𑁄 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀢𑀺𑀬𑀓𑁆𑀔𑀭𑁂𑀦 𑀧𑀸𑀞𑁄 𑀬𑀼𑀢𑁆𑀢𑁄. 𑀬𑁂𑀦𑀸𑀢𑀺 𑀯𑀢𑁆𑀢𑁂𑀦. 𑀦𑀺𑀲𑁆𑀲𑀸𑀭𑀡𑀸𑀢𑀺 𑀦𑀺𑀲𑁆𑀲𑀸𑀭𑀡𑀢𑁄. 𑀤𑀲 𑀯𑀸 𑀤𑀺𑀯𑀲𑀸𑀦𑀺, 𑀧𑀜𑁆𑀘 𑀯𑀸 𑀤𑀺𑀯𑀲𑀸𑀦𑀺 𑀧𑀽𑀭𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑀧𑁆𑀧𑀫𑀸𑀡𑁂𑀦 𑀤𑀲𑀧𑀜𑁆𑀘𑀤𑀺𑀯𑀲𑁂𑀦.
𑁨. 𑀦𑀺𑀬𑀲𑁆𑀲𑀓𑀫𑁆𑀫𑀓𑀣𑀸
𑁧𑁧. 𑀅𑀧𑀺𑀲𑁆𑀲𑀼 𑀪𑀺𑀓𑁆𑀔𑀽 𑀧𑀓𑀢𑀸𑀢𑀺 𑀏𑀢𑁆𑀣 𑀦𑀺𑀧𑀸𑀢𑀸𑀦𑀫𑀦𑁂𑀓𑀢𑁆𑀣𑀢𑁆𑀢𑀸 𑀇𑀥 𑀅𑀧𑀺𑀲𑁆𑀲𑀼𑀲𑀤𑁆𑀤𑁄 𑀦𑀺𑀘𑁆𑀘𑀢𑁆𑀣𑁄 𑀳𑁄𑀢𑀺. 𑀧𑀓𑀢𑀲𑀤𑁆𑀤𑁄 ‘‘𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀘𑀺. 𑀅𑀝𑁆𑀞. 𑁪𑁩𑁮) 𑀅𑀪𑀺𑀪𑀯𑀦𑀢𑁆𑀣𑁄, 𑀇𑀥 𑀧𑀦 𑀩𑁆𑀬𑀸𑀯𑀝𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀘𑁆𑀘𑀁 𑀩𑁆𑀬𑀸𑀯𑀝𑀸 𑀳𑁄𑀦𑁆𑀢𑀻’’𑀢𑀺.
𑁩. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀣𑀸
𑁨𑁭. 𑀏𑀢𑁆𑀣𑀸𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀯𑀢𑁆𑀣𑀼𑀫𑁆𑀳𑀺. 𑀓𑀸𑀬𑀺𑀓𑁄𑀢𑀺 𑀏𑀢𑁆𑀣 𑀓𑀸𑀬𑁂𑀦 𑀓𑀻𑀴𑀢𑀻𑀢𑀺 𑀓𑀸𑀬𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀬𑀓𑀻𑀴𑀸 𑀯𑀼𑀘𑁆𑀘𑀢𑀻’’𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀯𑀸𑀘𑀸𑀬 𑀓𑀻𑀴𑀢𑀻𑀢𑀺 𑀯𑀸𑀘𑀲𑀺𑀓𑁄, 𑀓𑀸𑀬𑀺𑀓𑁄 𑀘 𑀯𑀸𑀘𑀲𑀺𑀓𑁄 𑀘 𑀓𑀸𑀬𑀺𑀓𑀯𑀸𑀘𑀲𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 𑀧𑀘𑁆𑀙𑀺𑀫𑀯𑀘𑀦𑀢𑁆𑀣𑁄 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄, 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂𑀧𑀺 𑀓𑀢𑁆𑀣𑀘𑀺 𑀧𑀼𑀮𑁆𑀮𑀺𑀗𑁆𑀕𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽 ‘‘𑀥𑀫𑁆𑀫𑀯𑀺𑀦𑀬𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑀅𑀝𑁆𑀞. 𑁫𑁦𑁯) 𑀯𑀺𑀬. 𑀓𑀸𑀬𑀤𑁆𑀯𑀸𑀭𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀢𑀻𑀢𑀺 𑀓𑀸𑀬𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄 𑀯𑀼𑀘𑁆𑀘𑀢𑀻’’𑀢𑀺. 𑀓𑀸𑀬𑁂𑀦 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑁂𑀢𑀻𑀢𑀺 𑀓𑀸𑀬𑀺𑀓𑁄𑀢𑀺 𑀯𑀘𑀦𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. ‘‘𑀉𑀧𑀳𑀦𑀦𑀁 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀉𑀧𑀳𑀦𑀦𑀁 𑀉𑀧𑀖𑀸𑀢𑀁, 𑀢𑀫𑁂𑀯 𑀉𑀧𑀖𑀸𑀢𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀦𑀸𑀲𑀦’’𑀦𑁆𑀢𑀺 𑀇𑀫𑀺𑀦𑀸 𑀳𑀦𑀥𑀸𑀢𑀼𑀬𑀸 𑀳𑀺𑀁𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀢𑁂𑀮𑀧𑀘𑀦𑀅𑀭𑀺𑀝𑁆𑀞𑀧𑀘𑀦𑀸𑀤𑀻𑀦𑀺 𑀓𑀸𑀬𑀺𑀓𑁄 𑀫𑀺𑀘𑁆𑀙𑀸𑀚𑀻𑀯𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.
𑁪. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀣𑀸
𑁩𑁩. 𑀲𑀼𑀥𑀫𑁆𑀫𑀯𑀢𑁆𑀣𑀼𑀲𑁆𑀫𑀺𑀁 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀧𑀧𑀼𑀩𑁆𑀩𑁄 𑀮𑁄𑀓𑀲𑀤𑁆𑀤𑁄 𑀆𑀧𑀼𑀘𑁆𑀙𑀦𑀢𑁆𑀣𑁄𑀢𑀺 𑀆𑀳 ‘‘𑀦 𑀆𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺.
𑁩𑁪. 𑀓𑀺𑀦𑁆𑀢𑀺 𑀓𑀺𑀁 𑀦𑀸𑀫 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. 𑀯𑁄𑀢𑀺 𑀢𑀼𑀫𑁆𑀳𑁂𑀳𑀺. 𑀕𑀳𑀧𑀢𑀻𑀢𑀺 𑀆𑀮𑀧𑀦𑀧𑀤𑀁. 𑀣𑁂𑀭𑀸𑀦𑀁 𑀅𑀢𑁆𑀣𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀝𑀺𑀬𑀢𑁆𑀢𑀦𑁆𑀢𑀺 𑀧𑀝𑀺𑀬𑀸𑀤𑀺𑀢𑀁. ‘‘𑀏𑀢𑀁 𑀅𑀯𑁄𑀘𑀸’’𑀢𑀺 𑀇𑀫𑀺𑀦𑀸 𑀏𑀢𑀤𑀯𑁄𑀘𑀸𑀢𑀺 𑀏𑀢𑁆𑀣 𑀦𑀺𑀕𑁆𑀕𑀳𑀺𑀢𑀸𑀤𑁂𑀲𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀬𑀤𑀺𑀤𑀦𑁆𑀢𑀺 𑀲𑀤𑁆𑀤𑁄 ‘‘𑀢𑀺𑀮𑀲𑀁𑀕𑀼𑀴𑀺𑀓𑀸’’𑀢𑀺 𑀧𑀤𑁂𑀦 𑀬𑁄𑀚𑀺𑀢𑀢𑁆𑀢𑀸 𑀇𑀢𑁆𑀣𑀺𑀮𑀺𑀗𑁆𑀕𑁄𑀢𑀺 𑀆𑀳 ‘‘𑀬𑀸 𑀅𑀬’’𑀦𑁆𑀢𑀺. 𑀢𑀺𑀮𑀲𑀓𑁆𑀔𑀮𑀺𑀓𑀸𑀢𑀺 𑀢𑀺𑀮𑁂𑀦 𑀲𑀁𑀲𑀝𑁆𑀞𑀸 𑀲𑀓𑁆𑀔𑀮𑀺𑀓𑀸. ‘‘𑀲𑀸 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀯𑀸𑀓𑁆𑀬𑁂 𑀬𑀁𑀲𑀤𑁆𑀤𑀲𑁆𑀲 𑀧𑀼𑀩𑁆𑀩𑀯𑀸𑀓𑁆𑀬𑁂 𑀢𑀁𑀲𑀤𑁆𑀤𑀸𑀧𑁂𑀓𑁆𑀔𑀢𑀁 𑀤𑀲𑁆𑀲𑁂𑀢𑀺. 𑀏𑀓𑁄 𑀧𑀼𑀭𑀺𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀽𑀯𑀺𑀬𑁄𑀢𑀺 𑀧𑀽𑀯𑀁, 𑀧𑀽𑀯𑁂𑀦 𑀯𑀸 𑀓𑀬𑀯𑀺𑀓𑁆𑀓𑀬𑁄. 𑀢𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀦𑀦𑁆𑀢𑀺 𑀕𑀳𑀧𑀢𑀺𑀁. 𑀣𑁂𑀭𑁄𑀢𑀺 𑀲𑀼𑀥𑀫𑁆𑀫𑀢𑁆𑀣𑁂𑀭𑁄. 𑀬𑀤𑁂𑀯 𑀓𑀺𑀜𑁆𑀘𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀺 𑀏𑀯 𑀬𑀁 𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀜𑁆𑀘𑀺𑀤𑁂𑀯 𑀢𑀺𑀮𑀲𑀁𑀕𑀼𑀴𑀺𑀓𑀸𑀯𑀘𑀦’’𑀦𑁆𑀢𑀺. 𑀇𑀤𑀦𑁆𑀢𑀺 𑀇𑀫𑀁 𑀅𑀢𑁆𑀣𑀁. 𑀲𑁄𑀢𑀺 𑀓𑀼𑀓𑁆𑀓𑀼𑀝𑀧𑁄𑀢𑀓𑁄. 𑀓𑀸𑀓𑀯𑀲𑁆𑀲𑀺𑀢𑀦𑁆𑀢𑀺 𑀓𑀸𑀓𑀲𑁆𑀲 𑀯𑀲𑁆𑀲𑀺𑀢𑀁, 𑀦𑁂𑀯 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀬𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀓𑀼𑀓𑁆𑀓𑀼𑀝𑀧𑁄𑀢𑀓𑀁 𑀅𑀧𑁂𑀓𑁆𑀔𑀢𑀺. 𑀦𑁂𑀯 𑀪𑀺𑀓𑁆𑀔𑀼𑀯𑀘𑀦𑀁 𑀯𑀼𑀢𑁆𑀢𑀁, 𑀦 𑀕𑀺𑀳𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸.
𑀅𑀥𑀫𑁆𑀫𑀓𑀫𑁆𑀫𑀸𑀤𑀺𑀤𑁆𑀯𑀸𑀤𑀲𑀓𑀓𑀣𑀸
𑁩𑁯. 𑀧𑀼𑀭𑀺𑀫𑁂𑀳𑀺 𑀓𑀫𑁆𑀫𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀗𑁆𑀕𑁂𑀲𑀼. 𑀬𑀣𑀸 𑀧𑀭𑀺𑀲𑀓𑁆𑀓𑀺𑀬𑀫𑀸𑀦𑁂 𑀕𑀺𑀳𑀺𑀦𑁄 𑀮𑀸𑀪𑀁 𑀦 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀭𑀺𑀧𑀼𑀩𑁆𑀩𑁄 𑀲𑀓𑁆𑀓𑀥𑀸𑀢𑀼 𑀧𑀭𑀓𑁆𑀓𑀫𑀢𑁆𑀣𑁄𑀢𑀺 𑀆𑀳 ‘‘𑀧𑀭𑀓𑁆𑀓𑀫𑀦𑁆𑀢𑁄’’𑀢𑀺. 𑀢𑀢𑁆𑀣𑀸𑀢𑀺 𑀅𑀦𑀢𑁆𑀣𑀸𑀤𑀻𑀲𑀼. 𑀅𑀢𑁆𑀣𑀪𑀗𑁆𑀕𑁄𑀢𑀺 𑀕𑀺𑀳𑀻𑀦𑀁 𑀅𑀢𑁆𑀣𑀲𑁆𑀲 𑀪𑀗𑁆𑀕𑁄. 𑀅𑀯𑀲𑀦𑀦𑁆𑀢𑀺 𑀕𑀺𑀳𑀻𑀦𑀁 𑀅𑀯𑀲𑀦𑀁. 𑀕𑀺𑀳𑀻𑀦𑀦𑁆𑀢𑀺 𑀏𑀢𑁆𑀣 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀕𑀺𑀳𑀻𑀦𑀁 𑀲𑀦𑁆𑀢𑀺𑀓𑁂’’𑀢𑀺. 𑀬𑀣𑀸 𑀓𑀭𑀺𑀬𑀫𑀸𑀦𑁂 𑀲𑀘𑁆𑀘𑁄 𑀳𑁄𑀢𑀺, 𑀏𑀯𑀁 𑀦 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀓𑀗𑁆𑀕𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄, 𑀢𑀢𑁄 𑀅𑀥𑀺𑀓𑁂𑀳𑀺 𑀅𑀗𑁆𑀕𑁂𑀳𑀺 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂. 𑀧𑀝𑀺𑀫𑀼𑀔𑀁 𑀅𑀢𑁆𑀢𑀦𑁄 𑀤𑁄𑀲𑀁 𑀲𑀭𑀸𑀧𑁂𑀢𑀩𑁆𑀩𑀁 𑀅𑀦𑁂𑀦 𑀯𑀺𑀦𑀬𑀓𑀫𑁆𑀫𑁂𑀦𑀸𑀢𑀺 𑀧𑀝𑀺𑀲𑀸𑀭𑀡𑀻𑀬𑀁, 𑀢𑀫𑁂𑀯 𑀓𑀫𑁆𑀫𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁.
𑁫. 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀣𑀸
𑁪𑁬. 𑀲𑀁𑀲𑀣𑀸𑀢𑀺 𑀏𑀢𑁆𑀣 𑀲𑀁𑀲𑀥𑀸𑀢𑀼𑀬𑀸 𑀓𑀣𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀭𑁄𑀘𑁂𑀣𑀸’’𑀢𑀺. 𑀢𑀼𑀫𑁆𑀳𑁂 𑀲𑀁𑀲𑀣, 𑀓𑀣𑁂𑀣𑀸𑀢𑀺 𑀅𑀢𑁆𑀣𑁄.
𑁫𑁦. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀻𑀢𑀺𑀆𑀤𑀺 𑀓𑀸𑀭𑀡𑀽𑀧𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀪𑀡𑁆𑀟𑀦𑀸𑀤𑀺𑀧𑀘𑁆𑀘𑀬𑀸’’𑀢𑀺𑀆𑀤𑀺. 𑀪𑀡𑁆𑀟𑀦𑀓𑀸𑀭𑀓𑀸𑀤𑀺 𑀓𑀸𑀭𑀡𑀁, 𑀢𑁂𑀦 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺 𑀨𑀮𑀁, 𑀢𑀲𑁆𑀲𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑀸𑀢𑀺 𑀆𑀧𑀢𑁆𑀢𑀺𑀬𑀸.
𑁫𑁧. 𑀏𑀢𑁆𑀣𑀸𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂. 𑀢𑀢𑁆𑀣𑀸𑀢𑀺 𑀢𑁂𑀘𑀢𑁆𑀢𑀸𑀮𑀻𑀲𑀯𑀢𑁆𑀢𑁂𑀲𑀼. 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀥𑀁𑀲𑀥𑀸𑀢𑀼𑀬𑀸 𑀕𑀢𑁆𑀬𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀦 𑀘𑁄𑀤𑁂𑀢𑀩𑁆𑀩𑁄’’𑀢𑀺. ‘‘𑀭𑀚𑁄𑀦𑀼𑀤𑁆𑀥𑀁𑀲𑀢𑀻’’𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁨.𑁧𑁦𑁧) 𑀳𑀺 𑀥𑀁𑀲𑀥𑀸𑀢𑀼 𑀕𑀢𑁆𑀬𑀢𑁆𑀣𑁂 𑀯𑀢𑁆𑀢𑀢𑀺. ‘‘𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀻’’𑀢𑀺 𑀏𑀢𑁆𑀣 𑀲𑁄𑀬𑁂𑀯 𑀪𑀺𑀓𑁆𑀔𑀼 𑀢𑁂𑀳𑁂𑀯 𑀪𑀺𑀓𑁆𑀔𑀽𑀳𑀻𑀢𑀺 𑀅𑀢𑁆𑀣𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑁄 𑀪𑀺𑀓𑁆𑀔𑀼 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺. 𑀦 𑀕𑀺𑀳𑀺𑀤𑁆𑀥𑀚𑁄𑀢𑀺 𑀏𑀢𑁆𑀣 𑀕𑀺𑀳𑀻𑀦𑀁 𑀥𑀚𑁄 𑀕𑀺𑀳𑀺𑀤𑁆𑀥𑀚𑁄𑀢𑀺 𑀯𑀼𑀢𑁆𑀢𑁂 𑀑𑀤𑀸𑀢𑀯𑀢𑁆𑀣𑀸𑀤𑀻𑀦𑀻𑀢𑀺 𑀆𑀳 ‘‘𑀑𑀤𑀸𑀢𑀯𑀢𑁆𑀣𑀸𑀦𑀻’’𑀢𑀺𑀆𑀤𑀺. 𑀦 𑀢𑀺𑀢𑁆𑀣𑀺𑀬𑀸𑀤𑀺𑀧𑀤𑀢𑁆𑀢𑀬𑀦𑁆𑀢𑀺 ‘‘𑀦 𑀢𑀺𑀢𑁆𑀣𑀺𑀬𑀸 𑀲𑁂𑀯𑀺𑀢𑀩𑁆𑀩𑀸, 𑀪𑀺𑀓𑁆𑀔𑀽 𑀲𑁂𑀯𑀺𑀢𑀩𑁆𑀩𑀸, 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀧𑀤𑀸𑀦𑀁 𑀢𑀬𑀁. ‘‘𑀦 𑀅𑀧𑀲𑀸𑀤𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀦 𑀆𑀲𑀸𑀤𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀆𑀧𑀼𑀩𑁆𑀩𑀲𑀤𑀥𑀸𑀢𑀼𑀬𑀸 𑀅𑀧𑀧𑀼𑀩𑁆𑀩𑀲𑀤𑀥𑀸𑀢𑀼𑀬𑀸 𑀲𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸𑀢𑀺’’ 𑀏𑀢𑁆𑀣 𑀓𑀲𑁆𑀲 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸𑀢𑀺 𑀆𑀳 ‘‘𑀯𑀺𑀳𑀸𑀭𑀲𑁆𑀲𑀸’’𑀢𑀺. 𑀲𑁂𑀲𑀁 𑀲𑀩𑁆𑀩𑀁𑀯𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂𑀦.
𑁬𑁫. 𑀢𑀲𑁆𑀲𑀸𑀢𑀺 𑀆𑀧𑀢𑁆𑀢𑀺𑀬𑀸. 𑀇𑀥𑀸𑀢𑀺 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀓𑀢𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑁂. 𑀆𑀧𑀢𑁆𑀢𑀺𑀅𑀤𑀲𑁆𑀲𑀦𑀸𑀤𑀻𑀲𑀼 𑀉𑀤𑁆𑀥𑀭𑀺𑀢𑁆𑀯𑀸 𑀔𑀺𑀧𑀻𑀬𑀢𑀺 𑀅𑀧𑀦𑀻𑀬𑀢𑀺 𑀅𑀦𑁂𑀦 𑀯𑀺𑀦𑀬𑀓𑀫𑁆𑀫𑁂𑀦𑀸𑀢𑀺 𑀉𑀓𑁆𑀔𑁂𑀧𑀦𑀻𑀬𑀁, 𑀢𑀫𑁂𑀯 𑀓𑀫𑁆𑀫𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁.
𑀇𑀢𑀺 𑀓𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.
𑁨. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀁
𑁧. 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸
𑁭𑁫. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀧𑀸𑀭𑀺𑀯𑀸𑀲𑀺𑀓𑀸𑀢𑀺 𑀧𑀤𑀲𑁆𑀲 𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑁆𑀢𑀻𑀢𑀺 𑀧𑀸𑀭𑀺𑀯𑀸𑀲𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑁆𑀢𑀸’’𑀢𑀺. 𑀢𑀢𑁆𑀣𑀸𑀢𑀺 ‘‘𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑁆𑀢𑀸’’𑀢𑀺 𑀢𑀤𑁆𑀥𑀺𑀢𑀯𑀸𑀓𑁆𑀬𑁂. 𑀢𑁂𑀲𑀽𑀢𑀺 𑀘𑀢𑀼𑀩𑁆𑀩𑀺𑀥𑁂𑀲𑀼 𑀧𑀭𑀺𑀯𑀸𑀲𑁂𑀲𑀼. 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀯𑀸𑀲𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄, 𑀢𑀺𑀢𑁆𑀣𑀺𑀬𑁂𑀳𑀺 𑀯𑀸 𑀧𑀭𑀺𑀯𑀲𑀺𑀢𑀩𑁆𑀩𑁄 𑀧𑀭𑀺𑀯𑀸𑀲𑁄 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀧𑀭𑀺𑀯𑀸𑀲𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄. 𑀢𑀢𑁆𑀣𑀸𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁂. 𑀬𑀦𑁆𑀢𑀺 𑀯𑀘𑀦𑀁. 𑀅𑀬𑀁 𑀧𑀦𑀸𑀢𑀺 𑀅𑀬𑀁 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄 𑀧𑀦. 𑀇𑀥𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂. 𑀲𑁂𑀲𑀸𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀢𑁄 𑀲𑁂𑀲𑀸. 𑀢𑀬𑁄𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀸𑀤𑀬𑁄 𑀢𑀬𑁄, 𑀤𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀲 𑀤𑀸𑀢𑀩𑁆𑀩𑀸𑀢𑀺 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀆𑀧𑀦𑁆𑀦𑀸 𑀘𑁂𑀯𑀸𑀢𑀺 𑀆𑀧𑀚𑁆𑀚𑀺𑀢𑀩𑁆𑀩𑀸 𑀘𑁂𑀯. 𑀢𑁂𑀲𑀽𑀢𑀺 𑀢𑀺𑀯𑀺𑀥𑁂𑀲𑀼 𑀧𑀭𑀺𑀯𑀸𑀲𑁂𑀲𑀼. 𑀏𑀢𑁂 𑀧𑀦𑀸𑀢𑀺 𑀢𑀬𑁄 𑀧𑀦. 𑀇𑀥𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸. 𑀏𑀢𑁂𑀲𑀽𑀢𑀺 𑀢𑀺𑀯𑀺𑀥𑁂𑀲𑀼 𑀧𑀭𑀺𑀯𑀸𑀲𑁂𑀲𑀼.
𑀧𑀓𑀢𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀧𑀓𑀢𑀢𑁆𑀢𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀻𑀦𑀫𑁆𑀧𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀫𑀸𑀦𑀢𑁆𑀢𑀸𑀭𑀳𑀫𑀸𑀦𑀢𑁆𑀢𑀘𑀸𑀭𑀺𑀓𑀅𑀩𑁆𑀪𑀸𑀦𑀸𑀭𑀳𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀺𑀲𑀤𑁆𑀤𑁂𑀦 𑀧𑀓𑀢𑀺𑀧𑀓𑀢𑀢𑁆𑀢𑀁 𑀅𑀧𑁂𑀓𑁆𑀔𑀢𑀺. 𑀢𑁂𑀢𑀺 𑀧𑀓𑀢𑀢𑁆𑀢𑀸. 𑀬𑀁 𑀅𑀪𑀺𑀯𑀸𑀤𑀦𑀸𑀤𑀺𑀁 𑀓𑀭𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀸𑀤𑀺𑀬𑀦𑁆𑀢𑀻𑀢𑀺 𑀏𑀢𑁆𑀣 𑀲𑀸𑀤𑀺𑀬𑀦𑀁 𑀦𑀸𑀫 𑀲𑀫𑁆𑀧𑀝𑀺𑀘𑁆𑀙𑀦𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻’’𑀢𑀺. 𑀢𑀢𑁆𑀣𑀸𑀢𑀺 𑀅𑀪𑀺𑀯𑀸𑀤𑀦𑀸𑀤𑀻𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀲𑀸𑀫𑀻𑀘𑀺𑀓𑀫𑁆𑀫𑀦𑁆𑀢𑀺 𑀏𑀢𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑁆𑀲 𑀅𑀥𑀺𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀅𑀪𑀺𑀯𑀸𑀤𑀦𑀸𑀤𑀻𑀦𑀻𑀢𑀺 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀸𑀦𑀺. 𑀩𑀻𑀚𑀦𑀯𑀸𑀢𑀤𑀸𑀦𑀸𑀤𑀺𑀦𑁄𑀢𑀺 𑀩𑀻𑀚𑀦𑀺𑀬𑀸 𑀧𑀳𑀭𑀺𑀢𑁂𑀦 𑀧𑀯𑀢𑁆𑀢𑀲𑁆𑀲 𑀯𑀸𑀢𑀲𑁆𑀲 𑀤𑀸𑀦𑀸𑀤𑀺𑀦𑁄. 𑀆𑀲𑀦𑀸𑀪𑀺𑀳𑀸𑀭𑀦𑁆𑀢𑀺 𑀏𑀢𑁆𑀣 𑀅𑀪𑀺𑀳𑀭𑀡𑀁 𑀅𑀪𑀺𑀳𑀸𑀭𑁄, 𑀆𑀲𑀦𑀲𑁆𑀲 𑀅𑀪𑀺𑀳𑀸𑀭𑁄 𑀆𑀲𑀦𑀸𑀪𑀺𑀳𑀸𑀭𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀲𑀦𑀲𑁆𑀲 𑀅𑀪𑀺𑀳𑀭𑀡’’𑀦𑁆𑀢𑀺. 𑀧𑀜𑁆𑀜𑀸𑀧𑀦𑀫𑁆𑀧𑀺 𑀅𑀪𑀺𑀳𑀭𑀺𑀢𑁆𑀯𑀸 𑀧𑀜𑁆𑀜𑀸𑀧𑀺𑀢𑀢𑁆𑀢𑀸 𑀅𑀪𑀺𑀳𑀸𑀭𑁄𑀬𑁂𑀯 𑀦𑀸𑀫𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀧𑀦𑀫𑁂𑀯 𑀯𑀸’’𑀢𑀺. ‘‘𑀧𑀸𑀤𑀥𑁄𑀯𑀦𑀉𑀤𑀓’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀤𑀲𑁆𑀲 𑀥𑁄𑀯𑀦𑀁 𑀉𑀤𑀓𑀁 𑀧𑀸𑀤𑁄𑀤𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀧𑀸𑀤𑀝𑁆𑀞𑀧𑀦𑀓’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀤𑀲𑁆𑀲 𑀞𑀧𑀦𑀓𑀁 𑀧𑀻𑀞𑀁 𑀧𑀸𑀤𑀧𑀻𑀞𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀧𑀸𑀤𑀖𑀁𑀲𑀦𑀁 𑀯𑀸’’𑀢𑀺 𑀇𑀫𑀺𑀦𑀸 𑀧𑀸𑀤𑀲𑁆𑀲 𑀖𑀁𑀲𑀦𑀁 𑀓𑀣𑀮𑀺𑀓𑀁 𑀧𑀸𑀤𑀓𑀣𑀮𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀫𑁆𑀧𑀺 𑀅𑀪𑀺𑀯𑀸𑀤𑀦𑀸𑀤𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁂𑀦 𑀅𑀜𑁆𑀜𑁂𑀲𑀁 𑀲𑀸𑀤𑀺𑀬𑀦𑁆𑀢𑀲𑁆𑀲 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸. 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑀸. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸, 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀘. 𑀓𑀭𑁄𑀦𑁆𑀢𑀺, 𑀆𑀧𑀼𑀘𑁆𑀙𑀦𑁆𑀢𑀺𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸𑀭𑀺𑀢𑀫𑁆𑀧𑀺 𑀅𑀲𑀸𑀤𑀺𑀬𑀦𑀁 𑀦𑀸𑀫𑀸𑀢𑀺 𑀆𑀳 ‘‘𑀯𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑀸𑀧𑀢𑁆𑀢𑀻’’𑀢𑀺. 𑀫𑀺𑀣𑀼 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀏𑀢𑁆𑀣 𑀫𑀺𑀣𑀼𑀲𑀤𑁆𑀤𑁄 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀸𑀬𑁄, 𑀬𑀣𑀸𑀲𑀤𑁆𑀤𑁄 𑀬𑀁𑀲𑀤𑁆𑀤𑀧𑀭𑀺𑀬𑀸𑀬𑁄, 𑀯𑀺𑀘𑁆𑀙𑀢𑁆𑀣𑁄 𑀘𑀸𑀢𑀺 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀬𑁄 𑀬𑁄 𑀯𑀼𑀟𑁆𑀠𑁄’’𑀢𑀺. 𑀅𑀜𑁆𑀜𑀫𑀜𑁆𑀜𑀜𑁆𑀳𑀺 𑀫𑀺𑀣𑀢𑀺 𑀲𑀗𑁆𑀕𑀫𑀁 𑀓𑀭𑁄𑀢𑀻𑀢𑀺 𑀫𑀺𑀣𑀽𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀢𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸, ‘‘𑀲𑀸𑀤𑀺𑀢𑀼’’𑀦𑁆𑀢𑀺 𑀧𑀤𑁂 𑀪𑀸𑀯𑀓𑀢𑁆𑀢𑀸. 𑀲𑀸𑀤𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.
‘‘𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸’’𑀢𑀺 𑀇𑀫𑀺𑀦𑀸 𑀯𑀼𑀟𑁆𑀠𑀸𑀦𑀁 𑀧𑀝𑀺𑀧𑀸𑀝𑀺 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀘𑀢𑀼𑀢𑁆𑀣𑀻𑀅𑀩𑁆𑀬𑀬𑀻𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀧𑀤𑁂 𑀧𑀦 𑀧𑀞𑀫𑀸𑀅𑀩𑁆𑀬𑀬𑀻𑀪𑀸𑀯𑁄. 𑀧𑀸𑀴𑀺𑀬𑀸𑀢𑀺 𑀧𑀦𑁆𑀢𑀺𑀬𑀸. 𑀢𑀢𑁆𑀣𑁂𑀯𑀸𑀢𑀺 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀏𑀯. 𑀧𑀯𑀸𑀭𑀡𑀸𑀬𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀉𑀧𑁄𑀲𑀣𑁂𑀬𑁂𑀯, 𑀅𑀣 𑀔𑁄 𑀧𑀯𑀸𑀭𑀡𑀸𑀬𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀗𑁆𑀖𑁂𑀦 𑀪𑀸𑀚𑀺𑀬𑀫𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.
𑀑𑀡𑁄𑀚𑀦𑀦𑁆𑀢𑀺 𑀅𑀯𑀦𑀼𑀤𑀢𑁂 𑀑𑀡𑁄𑀚𑀦𑀁. 𑀅𑀯𑀧𑀼𑀩𑁆𑀩𑁄 𑀦𑀼𑀤𑀥𑀸𑀢𑀼 𑀦𑀓𑀸𑀭𑀲𑁆𑀲 𑀡𑀓𑀸𑀭𑀁, 𑀤𑀓𑀸𑀭𑀲𑁆𑀲 𑀘 𑀚𑀓𑀸𑀭𑀁 𑀓𑀢𑁆𑀯𑀸 𑀑𑀡𑁄𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀼𑀤𑀥𑀸𑀢𑀼 𑀅𑀧𑀦𑀬𑀦𑀢𑁆𑀣𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀲𑁆𑀲𑀚𑁆𑀚𑀦𑀁 𑀯𑀼𑀘𑁆𑀘𑀢𑀻’’𑀢𑀺. 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲. 𑀢𑀸𑀦𑀻𑀢𑀺 𑀤𑁆𑀯𑁂 𑀢𑀻𑀡𑀺 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺. 𑀳𑁂𑀝𑁆𑀞𑀸𑀢𑀺 𑀅𑀢𑁆𑀢𑀦𑁄 𑀳𑁂𑀝𑁆𑀞𑀸. 𑀕𑀸𑀳𑁂𑀣𑀸𑀢𑀺 𑀦𑀯𑀓𑀢𑀭𑁂 𑀪𑀺𑀓𑁆𑀔𑀽 𑀕𑀸𑀳𑀸𑀧𑁂𑀣. 𑀪𑀢𑁆𑀢𑀧𑀘𑁆𑀘𑀸𑀲𑀸𑀢𑀺 𑀪𑀢𑁆𑀢𑀫𑁂𑀯 𑀧𑀘𑁆𑀘𑀸𑀲𑀸 𑀪𑀢𑁆𑀢𑀧𑀘𑁆𑀘𑀸𑀲𑀸, 𑀧𑀘𑁆𑀘𑀸𑀲𑀸𑀪𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀻’’𑀢𑀺 𑀇𑀫𑀺𑀦𑀸 𑀅𑀯𑀦𑀼𑀤𑀺𑀢𑀩𑁆𑀩𑀦𑁆𑀢𑀺 𑀑𑀡𑁄𑀚𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀯𑀦𑁆𑀢𑀺 𑀕𑀳𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀫𑀸𑀦𑁂𑀢𑀺 𑀬𑁄𑀚𑀦𑀸. 𑀢𑀸𑀦𑀻𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺. 𑀬𑀤𑀺 𑀧𑀦 𑀦 𑀕𑀡𑁆𑀳𑀸𑀢𑀻𑀢𑀺 𑀲𑀘𑁂 𑀲𑀗𑁆𑀖𑀢𑁄 𑀯𑀲𑁆𑀲𑀕𑁆𑀕𑁂𑀦 𑀦 𑀕𑀡𑁆𑀳𑀸𑀢𑀺. 𑀦 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀲𑀘𑁂 𑀅𑀜𑁆𑀜𑀲𑁆𑀲 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀑𑀤𑀺𑀲𑁆𑀲𑀸𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲. 𑀳𑀻𑀢𑀺 𑀬𑀲𑁆𑀫𑀸. 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀪𑀢𑁆𑀢𑀕𑁆𑀕𑁂𑀢𑀺 𑀪𑀢𑁆𑀢𑀲𑁆𑀲 𑀕𑀳𑀡𑀝𑁆𑀞𑀸𑀦𑁂. 𑀲𑁄𑀢𑀺 𑀧𑀸𑀭𑀺𑀯𑀸𑀲𑀺𑀓𑁄, 𑀫𑀸 𑀓𑀺𑀮𑀫𑀺𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀦𑁆𑀢𑀺 𑀑𑀡𑁄𑀚𑀦𑀁. 𑀅𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲, 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.
𑀆𑀕𑀢𑀸𑀕𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀦𑁆𑀢𑀺 𑀘𑀢𑀼𑀫𑀼𑀔𑀸 𑀲𑀸𑀮𑀸 𑀘𑀢𑀼𑀲𑁆𑀲𑀸𑀮𑀸 𑀪𑁄𑀚𑀦𑀲𑀸𑀮𑀸, 𑀢𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀤𑀺𑀦𑁆𑀦𑀁 𑀪𑀢𑁆𑀢𑀁 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀁. 𑀏𑀢𑀦𑁆𑀢𑀺 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀁. 𑀧𑀸𑀴𑀺𑀬𑀸𑀢𑀺 𑀪𑀺𑀓𑁆𑀔𑀽𑀦𑀁 𑀧𑀸𑀴𑀺𑀬𑀸. 𑀑𑀲𑀓𑁆𑀓𑀺𑀢𑁆𑀯𑀸𑀢𑀺 𑀳𑁂𑀝𑁆𑀞𑀸 𑀲𑀓𑁆𑀓𑀺𑀢𑁆𑀯𑀸. 𑀳𑀢𑁆𑀣𑀧𑀸𑀲𑁂𑀢𑀺 𑀪𑀢𑁆𑀢𑀤𑀸𑀬𑀓𑀲𑁆𑀲 𑀳𑀢𑁆𑀣𑀧𑀸𑀲𑁂. 𑀲𑁂𑀦𑁄𑀢𑀺 𑀓𑀼𑀮𑀮𑁄. ‘‘𑀆𑀭𑀸𑀫𑀺𑀓𑀲𑀫𑀡𑀼𑀤𑁆𑀤𑁂𑀲𑁂𑀳𑀻’’𑀢𑀺 𑀧𑀤𑀁 ‘‘𑀆𑀳𑀭𑀸𑀧𑁂𑀢𑀼’’𑀦𑁆𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀲𑀬𑀫𑁂𑀯𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑁂𑀦 𑀅𑀦𑀸𑀡𑀢𑁆𑀢𑁄 𑀳𑀼𑀢𑁆𑀯𑀸 𑀲𑀬𑀫𑁂𑀯. 𑀫𑀳𑀸𑀧𑁂𑀴𑀪𑀢𑁆𑀢𑁂𑀧𑀻𑀢𑀺 𑀫𑀳𑀢𑀺𑀬𑀁 𑀧𑁂𑀴𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀦𑁆𑀦𑁂 𑀪𑀢𑁆𑀢𑁂𑀧𑀺. 𑀬𑀢𑁆𑀣 𑀧𑀦𑀸𑀢𑀺 𑀧𑀭𑀺𑀯𑀺𑀲𑀝𑁆𑀞𑀸𑀦𑁂 𑀧𑀦.
𑁭𑁬. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀸𑀦𑀺 𑀬𑀸 𑀅𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑀯𑀼𑀢𑁆𑀢𑀸’’𑀢𑀺. 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁 𑀏𑀢𑀸𑀬𑀸𑀢𑀺 𑀲𑀫𑁆𑀫𑀸𑀯𑀢𑁆𑀢𑀦𑀸. 𑀢𑀢𑁆𑀣𑀸𑀢𑀺 𑀲𑀫𑁆𑀫𑀸𑀯𑀢𑁆𑀢𑀦𑀸𑀬𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀆𑀘𑀭𑀺𑀬𑁂𑀦 𑀳𑀼𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀲𑀸𑀯𑀦𑀫𑁆𑀧𑀺 𑀉𑀧𑀲𑀫𑁆𑀧𑀸𑀤𑀦𑀫𑁂𑀯𑀸𑀢𑀺 𑀆𑀳 ‘‘𑀆𑀘𑀭𑀺𑀬𑁂𑀦 𑀳𑀼𑀢𑁆𑀯𑀸𑀧𑀺 𑀓𑀫𑁆𑀫𑀯𑀸𑀘𑀸 𑀦 𑀲𑀸𑀯𑁂𑀢𑀩𑁆𑀩𑀸’’𑀢𑀺. 𑀅𑀜𑁆𑀜𑀲𑁆𑀫𑀺𑀁 𑀅𑀲𑀢𑀻𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑀲𑁆𑀫𑀺𑀁 𑀓𑀫𑁆𑀫𑀯𑀸𑀘𑀸𑀯𑀸𑀘𑀓𑁂 𑀅𑀲𑀢𑀺. 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄𑀢𑀺 𑀏𑀢𑁆𑀣 𑀆𑀕𑀦𑁆𑀢𑀼𑀓𑀸𑀦𑀫𑁂𑀯 𑀦𑀺𑀲𑁆𑀲𑀬𑁄 𑀦 𑀤𑀸𑀢𑀩𑁆𑀩𑁄, 𑀦 𑀤𑀺𑀦𑁆𑀦𑀦𑀺𑀲𑁆𑀲𑀬𑀸𑀦𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀕𑀦𑁆𑀢𑀼𑀓𑀸𑀦𑀁 𑀦𑀺𑀲𑁆𑀲𑀬𑁄 𑀦 𑀤𑀸𑀢𑀩𑁆𑀩𑁄’’𑀢𑀺𑀆𑀤𑀺, 𑀬𑁂𑀳𑀺𑀧𑀺 𑀪𑀺𑀓𑁆𑀔𑀽𑀳𑀺 𑀕𑀳𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.
𑀅𑀜𑁆𑀜𑁄 𑀲𑀸𑀫𑀡𑁂𑀭𑁄𑀢𑀺 𑀧𑀓𑀢𑀢𑁆𑀢𑀓𑀸𑀮𑁂 𑀉𑀧𑀚𑁆𑀛𑀁 𑀤𑀢𑁆𑀯𑀸 𑀕𑀳𑀺𑀢𑀲𑀸𑀫𑀡𑁂𑀭𑁂𑀳𑀺 𑀅𑀜𑁆𑀜𑁄 𑀲𑀸𑀫𑀡𑁂𑀭𑁄. 𑀆𑀥𑀺𑀧𑀘𑁆𑀘𑀝𑁆𑀞𑀸𑀦𑀪𑀽𑀢𑀸𑀢𑀺 𑀲𑀩𑁆𑀩𑀲𑀫𑁆𑀫𑀼𑀢𑀻𑀦𑀁 𑀅𑀥𑀺𑀧𑀢𑀺𑀪𑀸𑀯𑀲𑁆𑀲 𑀞𑀸𑀦𑀪𑀽𑀢𑀸. 𑀧𑀝𑀺𑀩𑀮𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀁 𑀧𑀝𑀺𑀩𑀮𑀲𑁆𑀲. 𑀇𑀫𑀺𑀦𑀸 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁂𑀦 𑀆𑀡𑀢𑁆𑀢𑁄 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄𑀧𑀺 𑀕𑀭𑀼𑀥𑀫𑁆𑀫𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀁 𑀮𑀪𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀆𑀕𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁. 𑀲𑁄𑀢𑀺 𑀪𑀺𑀓𑁆𑀔𑀼. 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁, 𑀤𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.
𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸𑀢𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀆𑀧𑀢𑁆𑀢𑀺𑀓𑀸𑀭𑀡𑀸. 𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀕𑀭𑀼𑀓𑀸𑀧𑀢𑁆𑀢𑀺 𑀦𑀸𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀯𑀲𑁂𑀦 𑀆𑀧𑀢𑁆𑀢𑀺𑀯𑀢𑁆𑀣𑀽𑀦𑀁 𑀧𑀸𑀧𑀺𑀝𑁆𑀞𑀪𑀸𑀯𑀜𑁆𑀘 𑀧𑀸𑀧𑀺𑀝𑁆𑀞𑀢𑀭𑀪𑀸𑀯𑀜𑁆𑀘 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀲𑀢𑁆𑀢𑀲𑀼 𑀳𑀻’’𑀢𑀺𑀆𑀤𑀺. 𑀧𑀸𑀧𑀺𑀝𑁆𑀞𑀢𑀭𑀸𑀢𑀺 𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀢𑁄 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀧𑀸𑀧𑀺𑀝𑁆𑀞𑀢𑀭𑀸. 𑀢𑀸𑀲𑀦𑁆𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀻𑀦𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀼𑀭𑀺𑀫𑀸𑀦𑀁 𑀆𑀧𑀢𑁆𑀢𑀻𑀦𑀁 𑀦𑀬𑁂𑀦𑁂𑀯. 𑀪𑁂𑀤𑁄𑀢𑀺 𑀯𑀢𑁆𑀣𑀽𑀦𑀁 𑀯𑀺𑀲𑁂𑀲𑁄. 𑀏𑀯𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀯𑀲𑁂𑀦 𑀆𑀧𑀢𑁆𑀢𑀺𑀯𑀢𑁆𑀣𑀽𑀦𑀁 𑀧𑀸𑀧𑀺𑀝𑁆𑀞𑀧𑀸𑀧𑀺𑀝𑁆𑀞𑀢𑀭𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀢𑁂𑀲𑀁 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑀺𑀓𑁆𑀔𑀸𑀧𑀤𑁂 𑀧𑀦𑀸’’𑀢𑀺𑀆𑀤𑀺. 𑀉𑀪𑀬𑀫𑁆𑀧𑀻𑀢𑀺 𑀯𑀢𑁆𑀣𑀼𑀆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀉𑀪𑀬𑀫𑁆𑀧𑀺.
𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀓𑀸𑀭𑀡𑀪𑀽𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀸𑀫𑀁 𑀓𑀸𑀭𑀺𑀬𑀪𑀽𑀢𑀸𑀬𑀁 𑀓𑀫𑁆𑀫𑀯𑀸𑀘𑀸𑀬𑀁 𑀉𑀧𑀘𑀸𑀭𑀯𑀲𑁂𑀦 𑀓𑀸𑀭𑀺𑀬𑀪𑀽𑀢𑀸 𑀓𑀫𑁆𑀫𑀯𑀸𑀘𑀸 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸 𑀯𑀼𑀘𑁆𑀘𑀢𑀻’’𑀢𑀺. 𑀓𑀫𑁆𑀫𑀲𑁆𑀫𑀺𑀁 𑀲𑀢𑀺, 𑀓𑀫𑁆𑀫𑁂𑀦 𑀯𑀸 𑀯𑀘𑀺𑀢𑀩𑁆𑀩𑀸𑀢𑀺 𑀓𑀫𑁆𑀫𑀯𑀸𑀘𑀸𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀓𑀲𑀺𑀓𑀫𑁆𑀫𑀦𑁆𑀢𑀺 𑀓𑀲𑀺𑀲𑀗𑁆𑀔𑀸𑀢𑀁 𑀓𑀫𑁆𑀫𑀁. 𑀕𑁄𑀭𑀓𑁆𑀔𑀓𑀫𑁆𑀫𑀦𑁆𑀢𑀺 𑀕𑁄𑀭𑀓𑁆𑀔𑀲𑀗𑁆𑀔𑀸𑀢𑀁 𑀓𑀫𑁆𑀫𑀁. ‘‘𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 𑀓𑀫𑁆𑀫𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀢𑀺 𑀓𑀫𑁆𑀫𑀺𑀓𑀸 𑀪𑀺𑀓𑁆𑀔𑀽, 𑀦 𑀕𑀭𑀳𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄.
𑀯𑀘𑀺𑀢𑀩𑁆𑀩𑀁 𑀅𑀦𑁂𑀦 𑀤𑁄𑀲𑁂𑀦𑀸𑀢𑀺 𑀯𑀘𑀦𑀻𑀬𑀁, 𑀲𑀁𑀯𑀺𑀚𑁆𑀚𑀢𑀺 𑀯𑀘𑀦𑀻𑀬𑀁 𑀅𑀲𑁆𑀲𑀸𑀢𑀺 𑀲𑀯𑀘𑀦𑀻𑀬𑀁, 𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀧𑀮𑀺𑀩𑁄𑀥𑀢𑁆𑀣𑀸𑀬 𑀳𑀻’’𑀢𑀺𑀆𑀤𑀺. 𑀬𑀸𑀯 𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺, 𑀢𑀸𑀯 𑀇𑀫𑀫𑁆𑀳𑀸 𑀆𑀯𑀸𑀲𑀸 𑀏𑀓𑀧𑀤𑀫𑁆𑀧𑀺 𑀫𑀸 𑀧𑀓𑁆𑀓𑀸𑀫𑀻𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀢𑀼𑀬𑁆𑀳𑀁.
𑀅𑀦𑀼𑀯𑀸𑀤𑁄𑀢𑀺 𑀏𑀢𑁆𑀣 𑀅𑀦𑀼𑀲𑀸𑀲𑀦𑀯𑀲𑁂𑀦 𑀅𑀜𑁆𑀜𑁂 𑀯𑀤𑀢𑀻𑀢𑀺 𑀅𑀦𑀼𑀯𑀸𑀤𑁄𑀢𑀺 𑀯𑀼𑀢𑁆𑀢𑁂 𑀚𑁂𑀝𑁆𑀞𑀓𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀯𑀺𑀳𑀸𑀭𑁂 𑀚𑁂𑀝𑁆𑀞𑀓𑀝𑁆𑀞𑀸𑀦𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺. 𑀚𑁂𑀝𑁆𑀞𑀓𑀝𑁆𑀞𑀸𑀦𑀁 𑀲𑀭𑀽𑀧𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀸’’𑀢𑀺𑀆𑀤𑀺. 𑀫𑁂𑀢𑀺 𑀫𑀬𑁆𑀳𑀁. 𑀢𑀦𑁆𑀢𑀺 𑀢𑀯𑀁. 𑀦 𑀘𑁄𑀤𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀓𑁂𑀦 𑀦 𑀘𑁄𑀤𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀯𑀢𑁆𑀣𑀼𑀦𑀸 𑀯𑀸 𑀆𑀧𑀢𑁆𑀢𑀺𑀬𑀸 𑀯𑀸’’𑀢𑀺. 𑀦 𑀲𑀸𑀭𑁂𑀢𑀩𑁆𑀩𑁄𑀢𑀺 𑀦 𑀲𑀭𑀸𑀧𑁂𑀢𑀩𑁆𑀩𑁄. 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀦𑀸 𑀓𑀮𑀳𑀯𑀲𑁂𑀦 𑀦 𑀲𑀫𑁆𑀧𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀬𑁄𑀚𑁂𑀢𑁆𑀯𑀸 𑀓𑀮𑀳𑁄 𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺.
𑀲𑀗𑁆𑀖𑀢𑁆𑀣𑁂𑀭𑁂𑀦 𑀳𑀼𑀢𑁆𑀯𑀸𑀢𑀺 𑀲𑀗𑁆𑀖𑀢𑁆𑀣𑁂𑀭𑁂𑀦 𑀳𑁄𑀦𑁆𑀢𑁂𑀦𑀧𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀢𑁄 𑀅𑀕𑀦𑁆𑀢𑀩𑁆𑀩𑁂 𑀲𑀫𑀸𑀦𑁂 𑀓𑀺𑀁 𑀧𑀘𑁆𑀙𑀢𑁄 𑀕𑀦𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀤𑁆𑀯𑀸𑀤𑀲𑀳𑀢𑁆𑀣’’𑀦𑁆𑀢𑀺𑀆𑀤𑀺. 𑀆𑀲𑀦𑀧𑀭𑀺𑀬𑀦𑁆𑀢𑁄𑀢𑀺 𑀆𑀲𑀦𑀫𑁂𑀯 𑀧𑀭𑀺𑀬𑀦𑁆𑀢𑁄 𑀮𑀸𑀫𑀓𑁄𑀢𑀺 𑀆𑀲𑀦𑀧𑀭𑀺𑀬𑀦𑁆𑀢𑁄, 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀦𑀯𑀓𑀸𑀲𑀦𑀁 𑀯𑀼𑀘𑁆𑀘𑀢𑀻’’𑀢𑀺. 𑀲𑁆𑀯𑀸𑀲𑁆𑀲𑀸𑀢𑀺 𑀲𑁄 𑀅𑀲𑁆𑀲. 𑀲𑁄𑀢𑀺 𑀆𑀲𑀦𑀧𑀭𑀺𑀬𑀦𑁆𑀢𑁄. 𑀅𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲. 𑀢𑀢𑁆𑀣𑀸𑀢𑀺 𑀆𑀲𑀦𑀧𑀭𑀺𑀬𑀦𑁆𑀢𑁂. 𑀅𑀬𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑁄, 𑀦 𑀮𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀳𑀺𑀢𑀸𑀯𑀲𑁂𑀲𑀸𑀢𑀺 𑀕𑀳𑀺𑀢𑀸𑀳𑀺 𑀲𑁂𑀬𑁆𑀬𑀸𑀳𑀺 𑀅𑀯𑀲𑁂𑀲𑀸. 𑀫𑀗𑁆𑀕𑀼𑀮𑀕𑀽𑀣𑀪𑀭𑀺𑀢𑀸𑀢𑀺 𑀫𑀗𑁆𑀕𑀼𑀮𑀸𑀦𑀁 𑀕𑀽𑀣𑁂𑀳𑀺 𑀧𑀽𑀭𑀺𑀢𑀸. 𑀅𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲. 𑀭𑀚𑁂𑀳𑀺 𑀳𑀢𑀸 𑀦𑀸𑀲𑀺𑀢𑀸 𑀪𑀽𑀫𑀺 𑀏𑀢𑁆𑀣𑀸𑀢𑀺 𑀭𑀚𑁄𑀳𑀢𑀪𑀽𑀫𑀺. 𑀚𑀢𑀼𑀓𑀫𑀽𑀲𑀺𑀓𑀪𑀭𑀺𑀢𑀸𑀢𑀺 𑀚𑀢𑀽𑀳𑀺 𑀘 𑀫𑀽𑀲𑀺𑀓𑀸𑀳𑀺 𑀘 𑀧𑀽𑀭𑀺𑀢𑀸. 𑀧𑀡𑁆𑀡𑀲𑀸𑀮𑀸𑀢𑀺 𑀧𑀡𑁆𑀡𑁂𑀳𑀺 𑀙𑀸𑀤𑀺𑀢𑀸 𑀲𑀸𑀮𑀸. 𑀅𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲. 𑀲𑀩𑁆𑀩𑁂𑀧𑀺 𑀆𑀯𑀸𑀲𑀸𑀢𑀺 𑀬𑁄𑀚𑀦𑀸. 𑀏𑀢𑁂𑀳𑀻𑀢𑀺 𑀧𑀓𑀢𑀢𑁆𑀢𑁂𑀳𑀺. 𑀢𑁂𑀲𑀽𑀢𑀺 𑀆𑀯𑀸𑀲𑁂𑀲𑀼. 𑀬𑀦𑁆𑀢𑀺 𑀆𑀯𑀸𑀲𑀁. 𑀧𑀘𑁆𑀘𑀬𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀁. 𑀏𑀓𑀧𑀲𑁆𑀲𑁂𑀢𑀺 𑀪𑀺𑀓𑁆𑀔𑀽𑀦𑀁 𑀧𑀸𑀴𑀺𑀬𑀁 𑀅𑀝𑁆𑀞𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀲𑁆𑀲𑁂.
𑀅𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲, 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄 𑀏𑀯𑀸𑀢𑀺 𑀆𑀲𑀦𑀸𑀤𑀺𑀧𑀭𑀺𑀬𑀦𑁆𑀢𑁄 𑀏𑀯. 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀦𑀺𑀫𑀦𑁆𑀢𑀺𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀢𑀁 𑀓𑀼𑀮𑀁. 𑀲𑀁𑀯𑀺𑀥𑀸𑀬𑀸𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸. 𑀅𑀲𑁆𑀲𑀸𑀢𑀺 𑀓𑀼𑀮𑀲𑁆𑀲, 𑀪𑀯𑁂𑀬𑁆𑀬 𑀯𑀸.
𑀳𑀭𑀸𑀬𑀫𑀸𑀦𑁂𑀦𑀸𑀢𑀺 𑀮𑀚𑁆𑀚𑀫𑀸𑀦𑁂𑀦. 𑀬𑁂𑀦𑀸𑀧𑀻𑀢𑀺 𑀧𑀸𑀭𑀺𑀯𑀸𑀲𑀺𑀓𑁂𑀦𑀧𑀺. 𑀲𑀫𑀸𑀤𑀺𑀦𑁆𑀦𑀦𑁆𑀢𑀺 𑀆𑀭𑀜𑁆𑀜𑀺𑀓𑀥𑀼𑀢𑀗𑁆𑀕𑀲𑀫𑀸𑀤𑀺𑀦𑁆𑀦𑀁. 𑀢𑀣𑀸𑀢𑀺 𑀬𑀣𑀸 𑀆𑀭𑀜𑁆𑀜𑀺𑀓𑀗𑁆𑀕𑀁 𑀦 𑀲𑀫𑀸𑀤𑀸𑀢𑀩𑁆𑀩𑀁, 𑀢𑀣𑀸. 𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀆𑀭𑀜𑁆𑀜𑀺𑀓𑀗𑁆𑀕𑀁 𑀅𑀧𑁂𑀓𑁆𑀔𑀢𑀺. 𑀬𑁄 𑀧𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑁄 𑀧𑀦.
𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀫𑁂𑀢𑀺 𑀬𑁄𑀚𑀦𑀸. 𑀅𑀦𑀸𑀭𑁄𑀘𑁂𑀦𑁆𑀢𑁂 𑀲𑀢𑀻𑀢𑀺 𑀯𑀸 𑀬𑁄𑀚𑀦𑀸. ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀧𑁆𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄, 𑀦𑀺𑀲𑁆𑀲𑀓𑁆𑀓𑀯𑀘𑀦𑀜𑁆𑀘 𑀓𑀸𑀭𑀡𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀭𑀢𑁆𑀢𑀺𑀘𑁆𑀙𑁂𑀤𑁄 𑀏𑀯 𑀧𑀘𑁆𑀘𑀬𑁄 𑀢𑀧𑁆𑀧𑀘𑁆𑀘𑀬𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. ‘‘𑀲𑀸𑀫𑀡𑁂𑀭𑁂𑀳𑀻’’𑀢𑀺 𑀧𑀤𑀁 ‘‘𑀧𑀘𑀸𑀧𑁂𑀢𑁆𑀯𑀸’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀏𑀢𑁆𑀣𑀸𑀧𑀺 𑀧𑀓𑀢𑀺𑀬𑀸 𑀦𑀻𑀳𑀭𑀸𑀧𑁂𑀢𑁆𑀯𑀸𑀧𑀺 𑀯𑀺𑀳𑀸𑀭𑁂 𑀧𑀘𑀸𑀧𑁂𑀢𑁆𑀯𑀸𑀧𑀺 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀝𑀺𑀲𑁂𑀥𑁄 𑀦𑀢𑁆𑀣𑀺. 𑀓𑀲𑁆𑀫𑀸? ‘‘𑀢𑀧𑁆𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀕𑀸𑀫𑁂𑀢𑀺 𑀫𑀳𑀸𑀕𑀸𑀫𑁂, 𑀲𑀩𑁆𑀩𑀓𑀸𑀮𑀁 𑀅𑀦𑁂𑀓𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀯𑀺𑀯𑀺𑀢𑁆𑀢𑁂 𑀕𑀸𑀫𑁂𑀢𑀺 𑀅𑀢𑁆𑀣𑁄. 𑀕𑀸𑀫𑀓𑀸𑀯𑀸𑀲𑀦𑁆𑀢𑀺 𑀕𑀸𑀫𑁄𑀬𑁂𑀯 𑀔𑀼𑀤𑁆𑀤𑀓𑀝𑁆𑀞𑁂𑀦 𑀕𑀸𑀫𑀓𑁄, 𑀢𑀲𑁆𑀫𑀺𑀁 𑀓𑀸𑀭𑀺𑀢𑁄 𑀆𑀯𑀸𑀲𑁄 𑀕𑀸𑀫𑀓𑀸𑀯𑀸𑀲𑁄, 𑀢𑀁.
𑀕𑀢𑁂𑀦 𑀆𑀕𑀦𑁆𑀢𑀼𑀓𑀧𑀸𑀭𑀺𑀯𑀸𑀲𑀺𑀓𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀯𑀺𑀳𑀸𑀭𑁂, 𑀲𑀩𑁆𑀩𑁂 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀺𑀢𑀝𑁆𑀞𑀸𑀦𑁂. 𑀦 𑀏𑀓𑀘𑁆𑀘𑁂 𑀧𑀲𑁆𑀲𑀢𑀺, 𑀅𑀧𑀲𑁆𑀲𑀺𑀢𑀢𑁆𑀢𑀸 𑀦𑀸𑀭𑁄𑀘𑁂𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀏𑀓𑀲𑁆𑀲 𑀯𑀸 𑀩𑀳𑀽𑀦𑀁 𑀯𑀸 𑀆𑀕𑀦𑁆𑀢𑀼𑀓𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 ‘‘𑀆𑀕𑀦𑁆𑀢𑀼𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩’’𑀦𑁆𑀢𑀺 𑀧𑀤𑁂. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀆𑀕𑀦𑁆𑀢𑀼𑀓𑁂𑀦 𑀆𑀭𑁄𑀘𑁂𑀢𑀩𑁆𑀩’’𑀦𑁆𑀢𑀺 𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀢𑀁 𑀯𑀼𑀢𑁆𑀢𑀦𑀬𑀫𑀸𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀲𑀘𑁂’’𑀢𑀺𑀆𑀤𑀺. 𑀢𑁂𑀲𑀫𑁆𑀧𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀫𑁆𑀧𑀺. 𑀢𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲. 𑀅𑀚𑀸𑀦𑀦𑁆𑀢𑀲𑁆𑀲𑁂𑀯𑀸𑀢𑀺 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀬𑀜𑁆𑀘 𑀧𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑁄 𑀘. 𑀕𑀢𑀓𑀸𑀮𑁂𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀕𑀢𑀓𑀸𑀮𑁂. 𑀬𑁂𑀧𑀻𑀢𑀺 𑀆𑀕𑀦𑁆𑀢𑀼𑀓𑀸𑀧𑀺. 𑀑𑀓𑁆𑀓𑀫𑀺𑀢𑁆𑀯𑀸𑀢𑀺 𑀑𑀲𑀭𑀺𑀢𑁆𑀯𑀸, 𑀧𑀯𑀺𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑁄 𑀘, 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑁂𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁. 𑀬𑁄𑀧𑀻𑀢𑀺 𑀆𑀕𑀦𑁆𑀢𑀼𑀓𑁄𑀧𑀺. 𑀅𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲. 𑀅𑀜𑁆𑀜𑀸𑀢𑀢𑁆𑀢𑀸𑀢𑀺 𑀆𑀕𑀢𑀪𑀸𑀯𑀲𑁆𑀲 𑀅𑀚𑀸𑀦𑀺𑀢𑀢𑁆𑀢𑀸. ‘‘𑀅𑀩𑁆𑀪𑀸𑀦’’𑀦𑁆𑀢𑀺 𑀧𑀤𑀁 ‘‘𑀓𑀭𑁄𑀢𑀻’’𑀢𑀺 𑀧𑀤𑁂 𑀓𑀫𑁆𑀫𑀁, ‘‘𑀳𑁄𑀢𑀻’’𑀢𑀺 𑀧𑀤𑁂 𑀓𑀢𑁆𑀢𑀸. 𑀅𑀥𑀺𑀓𑀸 𑀭𑀢𑁆𑀢𑀺𑀬𑁄𑀢𑀺 𑀆𑀧𑀢𑁆𑀢𑀺𑀧𑀝𑀺𑀘𑁆𑀙𑀦𑁆𑀦𑀭𑀢𑁆𑀢𑀺𑀢𑁄 𑀅𑀥𑀺𑀓𑀸 𑀭𑀢𑁆𑀢𑀺𑀬𑁄. 𑀅𑀬𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀧𑀝𑀺𑀧𑀤𑀸. 𑀅𑀧𑀡𑁆𑀡𑀓𑀧𑀝𑀺𑀧𑀤𑀸𑀢𑀺 𑀅𑀯𑀺𑀭𑀤𑁆𑀥𑀧𑀝𑀺𑀧𑀤𑀸, 𑀏𑀓𑀁𑀲𑀧𑀝𑀺𑀧𑀤𑀸𑀢𑀺 𑀅𑀢𑁆𑀣𑁄.
𑀕𑀘𑁆𑀙𑀦𑁆𑀢𑀫𑁆𑀧𑀺 𑀪𑀺𑀓𑁆𑀔𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀯𑁂𑀢𑀼𑀦𑁆𑀢𑀺 𑀲𑀼𑀡𑀸𑀧𑁂𑀢𑀼𑀁. 𑀯𑀺𑀲𑀬𑀸𑀯𑀺𑀲𑀬𑁂𑀦𑀸𑀢𑀺 𑀆𑀭𑁄𑀘𑁂𑀢𑀼𑀁 𑀤𑁂𑀲𑀸𑀤𑁂𑀲𑁂𑀦. 𑀓𑀭𑀯𑀻𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄.
‘‘𑀉𑀧𑁄𑀲𑀣𑀤𑀺𑀯𑀲𑁂’’𑀢𑀺 𑀇𑀫𑀺𑀦𑀸 𑀉𑀧𑁄𑀲𑀣𑁂𑀢𑀺 𑀏𑀢𑁆𑀣 𑀉𑀧𑁄𑀲𑀣𑀲𑀤𑁆𑀤𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀬𑁄 𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀧𑀯𑀸𑀭𑀡𑀸𑀬𑀧𑀻𑀢𑀺 𑀧𑀯𑀸𑀭𑀡𑀤𑀺𑀯𑀲𑁂𑀧𑀺. 𑀕𑀦𑁆𑀢𑀼𑀦𑁆𑀢𑀺 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑀼𑀁. 𑀤𑀽𑀢𑁂𑀦𑀸𑀧𑀻𑀢𑀺 𑀏𑀢𑁆𑀣 𑀅𑀦𑀥𑀺𑀧𑁆𑀧𑁂𑀢𑀤𑀽𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀤𑀽𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀁…𑀧𑁂… 𑀆𑀭𑁄𑀘𑀸𑀧𑁂𑀢𑀩𑁆𑀩’’𑀦𑁆𑀢𑀺.
𑀲𑀼𑀜𑁆𑀜𑀯𑀺𑀳𑀸𑀭𑁄𑀢𑀺 𑀪𑀺𑀓𑁆𑀔𑀽𑀳𑀺 𑀯𑀺𑀯𑀺𑀢𑁆𑀢𑀯𑀺𑀳𑀸𑀭𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀆𑀯𑀸𑀲𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀢𑁆𑀣𑀸𑀢𑀺 𑀲𑀼𑀜𑁆𑀜𑀯𑀺𑀳𑀸𑀭𑁂. 𑀤𑀲𑀯𑀺𑀥𑀦𑁆𑀢𑀭𑀸𑀬𑁂 𑀲𑀢𑀺 𑀧𑀦 𑀕𑀦𑁆𑀢𑀩𑁆𑀩𑀫𑁂𑀯𑀸𑀢𑀺 𑀬𑁄𑀚𑀦𑀸. 𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀻𑀢𑀺 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀳𑀺.
𑁮𑁧. 𑀆𑀯𑀸𑀲𑀸𑀤𑀻𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀯𑀸𑀲𑁄 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑀺𑀬𑀧𑀤𑁂𑀦𑀸𑀢𑀺 ‘‘𑀆𑀯𑀸𑀲𑁂 𑀯𑀸 𑀅𑀦𑀸𑀯𑀸𑀲𑁂 𑀯𑀸’’𑀢𑀺 𑀢𑀢𑀺𑀬𑀧𑀤𑁂𑀦. 𑀏𑀢𑁂𑀲𑀽𑀢𑀺 𑀆𑀯𑀸𑀲𑀸𑀤𑀻𑀲𑀼. 𑀙𑀤𑀦𑀢𑁄𑀢𑀺 𑀙𑀤𑀦𑀓𑁄𑀝𑀺𑀢𑁄. 𑀅𑀦𑁆𑀢𑁄𑀆𑀯𑀸𑀲𑁂𑀢𑀺 𑀪𑀺𑀢𑁆𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑁂 𑀅𑀦𑁆𑀢𑁄𑀆𑀯𑀸𑀲𑁂. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀉𑀓𑁆𑀔𑀺𑀢𑁆𑀢𑀓𑁄’’𑀢𑀺 𑀯𑀸 ‘‘𑀧𑀸𑀭𑀺𑀯𑀸𑀲𑀺𑀓𑁄’’𑀢𑀺 𑀯𑀸 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀲𑀸𑀫𑀜𑁆𑀜𑁂𑀦. 𑀉𑀤𑀓𑀧𑀸𑀢𑁂𑀦𑀸𑀢𑀺 𑀙𑀤𑀦𑀢𑁄 𑀉𑀤𑀓𑀁 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀉𑀤𑀓𑀧𑀸𑀢𑁄, 𑀢𑁂𑀦. 𑀧𑀜𑁆𑀘𑀯𑀡𑁆𑀡𑀘𑁆𑀙𑀤𑀦𑀩𑀤𑁆𑀥𑀝𑁆𑀞𑀸𑀦𑁂𑀲𑀽𑀢𑀺 𑀧𑀜𑁆𑀘𑀧𑀫𑀸𑀡𑁂𑀦 𑀙𑀤𑀦𑁂𑀦 𑀩𑀤𑁆𑀥𑀝𑁆𑀞𑀸𑀦𑁂𑀲𑀼 𑀏𑀢𑁂𑀲𑀼 𑀆𑀯𑀸𑀲𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀘 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀘 𑀧𑀓𑀢𑀢𑁆𑀢𑁂𑀦 𑀲𑀤𑁆𑀥𑀺𑀁 𑀯𑀸𑀭𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀦𑀸𑀦𑀽𑀧𑀘𑀸𑀭𑁂𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀏𑀓𑀽𑀧𑀘𑀸𑀭𑁂 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑀸𑀤𑀺𑀓𑁂, 𑀲𑀘𑁂 𑀦𑀺𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀦𑁆𑀢𑀺 𑀲𑀝𑁆𑀞𑀺𑀯𑀲𑁆𑀲𑁂𑀧𑀺 𑀧𑀸𑀭𑀺𑀯𑀸𑀲𑀺𑀓𑁂.
𑀯𑀼𑀝𑁆𑀞𑀸𑀢𑀩𑁆𑀩𑀁, 𑀦𑀺𑀫𑀦𑁆𑀢𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀓𑀺𑀁 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀭𑀁 𑀧𑀓𑀢𑀢𑁆𑀢𑀁 𑀤𑀺𑀲𑁆𑀯𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀦𑀺𑀫𑀦𑁆𑀢𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑀫𑁆𑀧𑀻’’𑀢𑀺𑀆𑀤𑀺. 𑀑𑀩𑀼𑀤𑁆𑀥𑀦𑁆𑀢𑀺 𑀧𑀮𑀺𑀩𑀼𑀤𑁆𑀥𑀁. 𑀏𑀓𑀸𑀲𑀦𑁂𑀢𑀺 𑀏𑀢𑁆𑀣 𑀏𑀓𑀲𑀤𑁆𑀤𑁄 𑀲𑀫𑀸𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀫𑀸𑀦𑀯𑀲𑁆𑀲𑀺𑀓𑀸𑀲𑀦𑁂’’𑀢𑀺, 𑀲𑀫𑀸𑀦𑀯𑀲𑁆𑀲𑀺𑀓𑀸𑀦𑀁 𑀆𑀲𑀦𑁂𑀢𑀺 𑀅𑀢𑁆𑀣𑁄. 𑀙𑀫𑀸𑀬𑀁 𑀦𑀺𑀲𑀺𑀦𑁆𑀦𑁂𑀢𑀺 𑀏𑀢𑁆𑀣 𑀙𑀫𑀸𑀲𑀤𑁆𑀤𑁄 𑀪𑀽𑀫𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀪𑀽𑀫𑀺𑀬𑀁 𑀦𑀺𑀲𑀺𑀦𑁆𑀦𑁂’’𑀢𑀺. 𑀇𑀢𑀭𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑁂𑀦. 𑀲𑀳𑀸𑀬𑁂𑀦 𑀲𑀤𑁆𑀥𑀺𑀁 𑀘𑀗𑁆𑀓𑀫𑀢𑀺 𑀯𑀺𑀬𑀸𑀢𑀺 𑀬𑁄𑀚𑀦𑀸. ‘‘𑀏𑀓𑀲𑁆𑀫𑀺𑀁 𑀘𑀗𑁆𑀓𑀫𑁂’’𑀢𑀺 𑀇𑀫𑀺𑀦𑀸 𑀏𑀓𑀘𑀗𑁆𑀓𑀫𑀲𑀤𑁆𑀤𑀲𑁆𑀲 𑀢𑀼𑀮𑁆𑀬𑀸𑀥𑀺𑀓𑀭𑀡𑀲𑀫𑀸𑀲𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺.
𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑀦𑁆𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂’’𑀢𑀺. 𑀅𑀬𑀁 𑀧𑀦𑀸𑀢𑀺 𑀯𑀓𑁆𑀔𑀫𑀸𑀦𑁄 𑀧𑀦. 𑀏𑀢𑁆𑀣𑀸𑀢𑀺 ‘‘𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂’’𑀢𑀺 𑀧𑀸𑀞𑁂. 𑀘𑀗𑁆𑀓𑀫𑀦𑁆𑀢𑁂𑀢𑀺 𑀧𑀓𑀢𑀢𑁆𑀢𑁂 𑀘𑀗𑁆𑀓𑀫𑀦𑁆𑀢𑁂. 𑀦 𑀘𑀗𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑁂𑀦 𑀦 𑀘𑀗𑁆𑀓𑀫𑀺𑀢𑀩𑁆𑀩𑀁. 𑀓𑁄 𑀧𑀦 𑀯𑀸𑀤𑁄 𑀇𑀝𑁆𑀞𑀓𑀸𑀘𑀬𑀲𑀫𑁆𑀧𑀦𑁆𑀦𑁂 𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑁂 𑀇𑀢𑀺 𑀅𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀢𑀦𑁆𑀢𑀭𑀯𑀦𑀦𑁆𑀢𑀭𑀕𑀼𑀫𑁆𑀩𑀦𑁆𑀢𑀭𑁂𑀲𑀽𑀢𑀺 𑀧𑀩𑁆𑀩𑀢𑀫𑀚𑁆𑀛𑀯𑀦𑀫𑀚𑁆𑀛𑀕𑀼𑀫𑁆𑀩𑀫𑀚𑁆𑀛𑁂𑀲𑀼, 𑀧𑀩𑁆𑀩𑀢𑀯𑀺𑀯𑀭𑀯𑀦𑀯𑀺𑀯𑀭𑀕𑀼𑀫𑁆𑀩𑀯𑀺𑀯𑀭𑁂𑀲𑀼 𑀯𑀸. 𑀉𑀧𑀘𑀸𑀭𑀦𑁆𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀁 𑀉𑀧𑀘𑀸𑀭𑀁.
𑁮𑁨. 𑀇𑀢𑀭𑁄𑀢𑀺 𑀦𑀯𑀓𑁄. 𑀅𑀲𑁆𑀲𑀸𑀢𑀺 𑀦𑀯𑀓𑀲𑁆𑀲. 𑀦 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀅𑀜𑁆𑀜𑀸𑀢𑀢𑁆𑀢𑀸 𑀦 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑀘𑁆𑀙𑀸𑀧𑀼𑀭𑀺𑀫𑀦𑁆𑀢𑀺 𑀅𑀧𑀘𑁆𑀙𑀸 𑀅𑀧𑀼𑀭𑀺𑀫𑀁, 𑀏𑀓𑀧𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀯𑀲𑁆𑀲𑀸 𑀤𑁆𑀯𑁂 𑀧𑀸𑀭𑀺𑀯𑀸𑀲𑀺𑀓𑀸𑀢𑀺 𑀬𑁄𑀚𑀦𑀸. 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀏𑀓𑀢𑁄 𑀯𑀲𑀦𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀺 𑀤𑁆𑀯𑁂’’𑀢𑀺𑀆𑀤𑀺. 𑀦𑁂𑀲𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀯𑀸𑀲𑀺𑀓𑀸𑀦𑀁. 𑀏𑀢𑁆𑀣𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀲𑀼 𑀧𑀜𑁆𑀘𑀲𑀼 𑀪𑀺𑀓𑁆𑀔𑀽𑀲𑀼. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀬𑁄 𑀘𑀢𑁆𑀢𑀸𑀭𑁄𑀢𑀺 𑀬𑁄𑀚𑀦𑀸.
𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀦𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀫𑀸𑀦𑀢𑁆𑀢𑀤𑀸𑀦𑀅𑀩𑁆𑀪𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁂𑀲𑁆𑀯𑁂𑀯𑀸𑀢𑀺 𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀲𑀼 𑀏𑀯. 𑀅𑀬𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑁄.
𑁮𑁩. ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀻’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀫𑀁 𑀧𑀦𑀸’’𑀢𑀺𑀆𑀤𑀺. 𑀭𑀳𑁄𑀕𑀢𑀲𑁆𑀲 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁 𑀓𑀢𑁆𑀯𑀸 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀭𑀳𑁄𑀕𑀢𑀲𑁆𑀲𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀢𑁆𑀣𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑁂. 𑀲𑁄𑀢𑀺 𑀉𑀧𑀸𑀮𑀺𑀢𑁆𑀣𑁂𑀭𑁄. 𑀅𑀲𑁆𑀲𑀸𑀢𑀺 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲. 𑀢𑀢𑁆𑀣𑀸𑀢𑀺 𑀢𑀻𑀲𑀼 𑀭𑀢𑁆𑀢𑀺𑀘𑁆𑀙𑁂𑀤𑁂𑀲𑀼. 𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁, 𑀏𑀓𑀢𑁄 𑀯𑀸𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄 𑀯𑀸𑀲𑁄 𑀲𑀳𑀯𑀸𑀲𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀯𑀺𑀧𑁆𑀧𑀯𑀸𑀲𑁄𑀢𑀺 𑀏𑀢𑁆𑀣 𑀧𑀓𑀢𑀢𑁆𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀸𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀓𑀲𑁆𑀲𑁂𑀯 𑀯𑀸𑀲𑁄’’𑀢𑀺. 𑀆𑀕𑀦𑁆𑀢𑀼𑀓𑀸𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀆𑀯𑀸𑀲𑀺𑀓𑀸 𑀕𑀳𑁂𑀢𑀩𑁆𑀩𑀸.
𑁮𑁪. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀁 𑀢𑀁 𑀞𑀸𑀦𑀁. 𑀤𑁆𑀯𑀻𑀲𑀼 𑀧𑀤𑁂𑀲𑀽𑀢𑀺 𑀤𑁆𑀯𑀻𑀲𑀼 𑀯𑀸𑀓𑁆𑀬𑀲𑀗𑁆𑀔𑀸𑀢𑁂𑀲𑀼 𑀧𑀤𑁂𑀲𑀼. 𑀏𑀓𑁂𑀦𑁂𑀓𑁂𑀦𑀧𑀻𑀢𑀺 𑀏𑀓𑁂𑀦 𑀏𑀓𑁂𑀦 𑀯𑀸𑀓𑁆𑀬𑀧𑀤𑁂𑀦𑀧𑀺. 𑀧𑀭𑀺𑀯𑀲𑀺𑀬𑀺𑀢𑁆𑀣𑀸𑀢𑀺 𑀧𑀭𑀺𑀯𑀼𑀢𑁆𑀣𑁄, 𑀧𑀭𑀺𑀯𑀼𑀢𑁆𑀣𑁄 𑀧𑀭𑀺𑀯𑀸𑀲𑁄 𑀏𑀢𑀲𑁆𑀲𑀸𑀢𑀺 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄, 𑀢𑀲𑁆𑀲. 𑀳𑀻𑀢𑀺 𑀲𑀘𑁆𑀘𑀁. 𑀏𑀲𑀸𑀢𑀺 𑀏𑀲𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀤𑁆𑀥𑀦𑁆𑀢𑁂𑀢𑀺 𑀲𑀼𑀤𑁆𑀥𑀓𑁄𑀝𑁆𑀞𑀸𑀲𑁂. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀅𑀦𑁆𑀢𑀦𑁆𑀢𑀺 𑀅𑀯𑀲𑀸𑀦𑀁, 𑀯𑀺𑀦𑀸𑀲𑀁 𑀯𑀸.
𑁨. 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀯𑀢𑁆𑀢𑀓𑀣𑀸
𑁮𑁬. 𑀦𑀯𑀓𑀢𑀭𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀁 𑀞𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀧𑀓𑀢𑀢𑁆𑀢𑀸 𑀏𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑁂𑀲𑀦𑁆𑀢𑀺 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀫𑀸𑀦𑀢𑁆𑀢𑀸𑀭𑀳𑀫𑀸𑀦𑀢𑁆𑀢𑀘𑀸𑀭𑀺𑀓𑀅𑀩𑁆𑀪𑀸𑀦𑀸𑀭𑀳𑀸𑀦𑀁 𑀘𑀢𑀼𑀦𑁆𑀦𑀁, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀤𑀺𑀮𑀓𑁆𑀔𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀯𑀢𑁆𑀢𑁂. 𑀇𑀢𑁄𑀢𑀺 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀯𑀢𑁆𑀢𑀢𑁄.
𑁮𑁭. 𑀬𑀣𑁂𑀯 𑀧𑀸𑀭𑀺𑀯𑀸𑀲𑀺𑀓𑁄 𑀕𑀡𑀧𑀽𑀭𑀓𑁄 𑀦 𑀳𑁄𑀢𑀺, 𑀏𑀯𑀁 𑀏𑀢𑁂𑀧𑀺 𑀦 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.
𑁪. 𑀫𑀸𑀦𑀢𑁆𑀢𑀸𑀘𑀸𑀭𑀺𑀓𑀯𑀢𑁆𑀢𑀓𑀣𑀸
𑁯𑁨. 𑀊𑀦𑁂 𑀕𑀡𑁂𑀢𑀺 𑀏𑀢𑁆𑀣 𑀕𑀡𑁄 𑀦𑀸𑀫 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁨𑁧𑁭 𑀆𑀤𑀬𑁄) 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂.
𑀇𑀢𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.
𑁩. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀁
𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸
𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑁂 𑀢𑀢𑁆𑀣𑀸𑀢𑀺 𑀘𑀢𑀼𑀩𑁆𑀩𑀺𑀥𑁂𑀲𑀼 𑀫𑀸𑀦𑀢𑁆𑀢𑁂𑀲𑀼. 𑀬𑀁 𑀫𑀸𑀦𑀢𑁆𑀢𑀁 𑀤𑀺𑀬𑁆𑀬𑀢𑀺, 𑀇𑀤𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀅𑀦𑀦𑁆𑀢𑀭𑀯𑀸𑀓𑁆𑀬𑁂𑀲𑀼𑀧𑀺. 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸𑀢𑀺 𑀳𑁂𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀓𑀸𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀯𑀸. 𑀅𑀤𑁆𑀥𑀫𑀸𑀲𑀦𑁆𑀢𑀺 𑀧𑀦𑁆𑀦𑀭𑀲𑀤𑀺𑀯𑀲𑀓𑀸𑀮𑀁. 𑀑𑀥𑀸𑀬𑀸𑀢𑀺 𑀲𑀫𑀽𑀳𑀁 𑀓𑀢𑁆𑀯𑀸. ‘‘𑀏𑀓𑀢𑁄 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀑𑀥𑀸𑀬𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀲𑀽𑀢𑀺 𑀘𑀢𑀼𑀩𑁆𑀩𑀺𑀥𑁂𑀲𑀼 𑀫𑀸𑀦𑀢𑁆𑀢𑁂𑀲𑀼. 𑀇𑀤𑀦𑁆𑀢𑀺 𑀫𑀸𑀦𑀢𑁆𑀢𑀁. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬…𑀧𑁂… 𑀯𑀘𑀦𑀢𑁄𑀢𑀺 𑀜𑀸𑀧𑀓𑀳𑁂𑀢𑀼. 𑀏𑀢𑁂𑀦 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀤𑀸𑀢𑀩𑁆𑀩𑀁 𑀫𑀸𑀦𑀢𑁆𑀢𑀁 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀧𑀸𑀴𑀺𑀬𑀁. 𑀢𑀢𑀼𑀢𑁆𑀢𑀭𑀻𑀢𑀺 𑀢𑀢𑁄 𑀢𑀻𑀳𑀺𑀧𑀺 𑀉𑀢𑁆𑀢𑀭𑀺. 𑀦𑀸𑀦𑀸𑀯𑀢𑁆𑀣𑀽𑀦𑀺 𑀏𑀢𑀸𑀲𑀦𑁆𑀢𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄. 𑀢𑀸𑀲𑀦𑁆𑀢𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀁.
𑀫𑀸𑀴𑀓𑀲𑀻𑀫𑀸𑀬𑀫𑁂𑀯𑀸𑀢𑀺 𑀲𑀻𑀫𑀫𑀸𑀴𑀓𑁂 𑀏𑀯, 𑀲𑀻𑀫𑀗𑁆𑀕𑀡𑁂 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑁂𑀯𑀸𑀢𑀺 𑀫𑀸𑀴𑀓𑀲𑀻𑀫𑀸𑀬𑀫𑁂𑀯.
𑀯𑁂𑀤𑀬𑀸𑀫𑀳𑀦𑁆𑀢𑀺 𑀯𑁂𑀤𑀬𑀸𑀫𑀺 𑀅𑀳𑀁. 𑀫𑀫 𑀫𑀸𑀦𑀢𑁆𑀢𑀘𑀭𑀪𑀸𑀯𑀁 𑀲𑀗𑁆𑀖𑀁 𑀚𑀸𑀦𑀸𑀧𑁂𑀫𑀻𑀢𑀺 𑀅𑀢𑁆𑀣𑁄. 𑀯𑁂𑀤𑀬𑀢𑀻𑀢𑀺 𑀫𑀦𑁆𑀢𑀺 𑀚𑀸𑀦𑀸𑀧𑁂𑀢𑀺, 𑀇𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 ‘‘𑀫𑀸𑀦𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀺, 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀫𑀸𑀴𑀓𑀢𑁄𑀢𑀺 𑀲𑀻𑀫𑀗𑁆𑀕𑀡𑀢𑁄. 𑀲𑁄𑀧𑀻𑀢𑀺 𑀲𑀳 𑀕𑀘𑁆𑀙𑀦𑁆𑀢𑁄𑀧𑀺. ‘‘𑀫𑀸𑀴𑀓𑁂 𑀦𑀸𑀭𑁄𑀘𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀬𑀲𑁆𑀲 𑀫𑀸𑀴𑀓𑁂 𑀆𑀭𑁄𑀘𑀺𑀢𑀁, 𑀢𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸𑀧𑀺 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀆𑀭𑁄𑀘𑁂𑀦𑁆𑀢𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.
𑀯𑀺𑀲𑀪𑀸𑀕𑁂𑀳𑀺 𑀲𑀳 𑀯𑀲𑀦𑁆𑀢𑀲𑁆𑀲 𑀯𑀢𑁆𑀢𑀲𑁆𑀲 𑀤𑀼𑀧𑁆𑀧𑀽𑀭𑀺𑀢𑀢𑁆𑀢𑀸 𑀯𑀼𑀢𑁆𑀢𑀁’’𑀲𑀪𑀸𑀕𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀻’’𑀢𑀺. 𑀘𑀢𑀽𑀳𑀺, 𑀧𑀜𑁆𑀘𑀳𑀺 𑀯𑀸𑀢𑀺 𑀯𑀸𑀲𑀤𑁆𑀤𑁂𑀦 𑀢𑀢𑁄 𑀅𑀢𑀺𑀭𑁂𑀓𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄𑀢𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄. ‘‘𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀇𑀤𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀲𑀚𑁆𑀛𑀸𑀬𑀸𑀤𑀺𑀲𑀤𑁆𑀤𑀲𑀯𑀦𑀽𑀧𑀘𑀸𑀭𑀧𑀳𑀸𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀘𑁂 𑀲𑀯𑀦𑀽𑀧𑀘𑀸𑀭𑀢𑁄 𑀦 𑀫𑀼𑀘𑁆𑀘𑀢𑀺, 𑀢𑀢𑁄 𑀅𑀢𑀺𑀭𑁂𑀓𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁. 𑀑𑀓𑁆𑀓𑀫𑁆𑀫𑀸𑀢𑀺 𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀘𑀦𑀲𑀤𑁆𑀤𑀲𑀯𑀦𑀽𑀧𑀘𑀸𑀭𑀧𑀳𑀸𑀦𑀢𑁆𑀣𑀁 𑀑𑀓𑁆𑀓𑀫𑀺𑀢𑁆𑀯𑀸. ‘‘𑀕𑀼𑀫𑁆𑀩𑁂𑀦 𑀯𑀸 𑀯𑀢𑀺𑀬𑀸 𑀯𑀸’’𑀢𑀺 𑀤𑀲𑁆𑀲𑀦𑀽𑀧𑀘𑀸𑀭𑀧𑀳𑀸𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀥 𑀉𑀧𑀘𑀸𑀭𑁄 𑀦𑀸𑀫 𑀬𑀢𑁆𑀣 𑀞𑀢𑁆𑀯𑀸 𑀧𑀲𑁆𑀲𑀢𑀺 𑀲𑀼𑀡𑀸𑀢𑀺, 𑀲𑁄𑀬𑁂𑀯 𑀤𑁂𑀲𑁄. 𑀅𑀜𑁆𑀜𑁄𑀢𑀺 𑀘𑀢𑀽𑀳𑀺 𑀧𑀜𑁆𑀘𑀳𑀺 𑀯𑀸 𑀪𑀺𑀓𑁆𑀔𑀽𑀳𑀺 𑀅𑀜𑁆𑀜𑁄. 𑀏𑀲𑀸𑀢𑀺 𑀏𑀲𑁄 𑀫𑀸𑀦𑀢𑁆𑀢𑀘𑀸𑀭𑀺𑀓𑁄.
‘‘𑀤𑁆𑀯𑀸𑀤𑀲𑀳𑀢𑁆𑀣𑀁 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑁄𑀓𑁆𑀓𑀫𑀺𑀢𑁆𑀯𑀸 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀢𑀺, 𑀦𑀢𑁆𑀣𑀺 𑀭𑀢𑁆𑀢𑀺𑀘𑁆𑀙𑁂𑀤𑁄𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀤𑀺𑀝𑁆𑀞𑀭𑀽𑀧𑀸𑀦𑀁 𑀲𑀼𑀢𑀲𑀤𑁆𑀤𑀸𑀦𑀁 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑀢𑁄 𑀩𑀳𑀺 𑀞𑀺𑀢𑀸𑀦𑀫𑁆𑀧𑀺 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀤𑀺𑀝𑁆𑀞𑀸𑀲𑀼𑀢𑀸𑀦𑀫𑁆𑀧𑀺 𑀅𑀦𑁆𑀢𑁄 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑀕𑀢𑀸𑀦𑀁 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀢𑀺 𑀓𑀭𑀡𑀻𑀬𑁂𑀢𑀺 𑀇𑀤𑀁 𑀕𑀦𑁆𑀢𑀼𑀲𑁆𑀲 𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀲𑀢𑀺 𑀓𑀭𑀡𑀻𑀬𑁂𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀲𑁄𑀧𑀻𑀢𑀺 𑀏𑀓𑁄 𑀪𑀺𑀓𑁆𑀔𑀼𑀧𑀺. ‘‘𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀭𑁄𑀘𑀦𑁂 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀬𑀫𑀸𑀦𑁂 𑀓𑀺𑀁 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑁄 𑀯𑀸 𑀯𑀺𑀧𑁆𑀧𑀯𑀸𑀲𑁄 𑀯𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀬𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀬𑀜𑁆𑀘𑀸𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀓𑁄 𑀧𑀦. 𑀬𑀲𑁆𑀫𑀸 𑀓𑀸𑀭𑀡𑀸 𑀯𑀲𑀺, 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀽𑀦𑀜𑁆𑀘 𑀅𑀢𑁆𑀣𑀺𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀧𑀓𑀢𑀢𑁆𑀢𑀸𑀕𑀢𑀓𑀸𑀮𑁂 𑀢𑀲𑁆𑀲 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀽𑀦𑀜𑁆𑀘 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑁂 𑀅𑀢𑁆𑀣𑀺𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀕𑀡𑀲𑁆𑀲 𑀆𑀭𑁄𑀘𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀅𑀢𑁆𑀣𑀺𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀺𑀧𑁆𑀧𑀯𑀸𑀲𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀧𑀼𑀩𑁆𑀩𑁂 𑀅𑀦𑀸𑀭𑁄𑀘𑀺𑀢𑀁 𑀬𑀁 𑀪𑀺𑀓𑁆𑀔𑀼𑀁. 𑀅𑀬𑀦𑁆𑀢𑀺 𑀧𑀞𑀫𑀁 𑀧𑀲𑁆𑀲𑀺𑀢𑀩𑁆𑀩𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑀁. ‘‘𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀲𑁆𑀲 𑀧𑀭𑀺𑀳𑀸𑀭𑁄’’𑀢𑀺 𑀇𑀫𑀺𑀦𑀸 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂 𑀅𑀦𑁆𑀢𑁄𑀉𑀧𑀘𑀸𑀭𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.
𑀅𑀬𑀦𑁆𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀓𑁄, 𑀞𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀧𑀻𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦𑀧𑀺, 𑀬𑀸𑀘𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀪𑀺𑀓𑁆𑀔𑀼. 𑀢𑀢𑁆𑀭𑀸𑀢𑀺 ‘‘𑀲𑁄 𑀅𑀩𑁆𑀪𑁂𑀢𑀩𑁆𑀩𑁄’’𑀢𑀺 𑀯𑀘𑀦𑁂. 𑀅𑀬𑀁 𑀅𑀩𑁆𑀪𑀸𑀦𑀯𑀺𑀥𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀅𑀬𑀜𑁆𑀘𑀸𑀢𑀺 𑀅𑀩𑁆𑀪𑀸𑀦𑀯𑀺𑀥𑀺 𑀘. 𑀢𑀸𑀲𑀦𑁆𑀢𑀺 𑀆𑀧𑀢𑁆𑀢𑀻𑀦𑀁. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀧𑀦 𑀤𑀸𑀢𑀩𑁆𑀩𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀝𑀺𑀘𑁆𑀙𑀦𑁆𑀦𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸 𑀤𑀸𑀢𑀩𑁆𑀩𑀁 𑀫𑀸𑀦𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁.
𑁨. 𑀧𑀭𑀺𑀯𑀸𑀲𑀓𑀣𑀸
𑁧𑁦𑁨. 𑀢𑀲𑁆𑀲𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀲𑁆𑀲. 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀇𑀥𑁂𑀯 𑀧𑀭𑀺𑀯𑀸𑀲𑀓𑀣𑀸𑀬𑀁 𑀲𑀫𑁄𑀥𑀸𑀦𑁂𑀢𑁆𑀯𑀸. 𑀇𑀥𑁂𑀯 𑀧𑀭𑀺𑀯𑀸𑀲𑀓𑀣𑀸𑀬𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀥𑁂𑀯𑀲𑀤𑁆𑀤𑁄 𑀳𑀺 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑁄.
𑀇𑀥 𑀅𑀥𑀺𑀧𑁆𑀧𑁂𑀢𑀁 𑀧𑀭𑀺𑀯𑀸𑀲𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀇𑀥 𑀅𑀥𑀺𑀧𑁆𑀧𑁂𑀢𑁄 𑀧𑀭𑀺𑀯𑀸𑀲𑁄 𑀦𑀸𑀫 𑀢𑀺𑀯𑀺𑀥𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑀺𑀯𑀺𑀥𑁂𑀲𑀼 𑀧𑀭𑀺𑀯𑀸𑀲𑁂𑀲𑀼. ‘‘𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀬 𑀆𑀧𑀢𑁆𑀢𑀺𑀬𑀸’’𑀢𑀺 𑀯𑀘𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀓𑀲𑁆𑀲𑀘𑀺 𑀳𑀻’’𑀢𑀺𑀆𑀤𑀺. 𑀬𑀣𑀸 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸 𑀅𑀬𑀁 𑀆𑀧𑀢𑁆𑀢𑀺 𑀳𑁄𑀢𑀺, 𑀢𑀣𑀸 𑀓𑀲𑁆𑀲𑀘𑀺 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸 𑀘 𑀧𑀭𑀢𑁄 𑀆𑀕𑀢𑀸 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲𑁂𑀯 𑀆𑀧𑀢𑁆𑀢𑀺 𑀳𑁄𑀢𑀺, 𑀢𑀣𑀸 𑀓𑀲𑁆𑀲𑀘𑀺 𑀤𑁆𑀯𑀺𑀳𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀧𑀭𑀢𑁄𑀧𑀺 𑀦𑀬𑁄 𑀦𑁂𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑀸𑀳𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀸 𑀏𑀓𑀸𑀤𑀺𑀆𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.
𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 ‘‘𑀤𑀲𑀳𑀸𑀓𑀸𑀭𑁂𑀳𑀻’’𑀢𑀺 𑀧𑀸𑀞𑁂. 𑀆𑀧𑀢𑁆𑀢𑀺𑀇𑀢𑀺 𑀲𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀆𑀧𑀢𑁆𑀢𑀺𑀲𑀜𑁆𑀜𑀻 . 𑀧𑀳𑀼 𑀘𑀸𑀢𑀺 𑀲𑀫𑀢𑁆𑀣𑁄 𑀘. 𑀧𑀧𑀼𑀩𑁆𑀩𑁄 𑀳𑀽𑀥𑀸𑀢𑀼 𑀲𑀫𑀢𑁆𑀣𑀢𑁆𑀣𑁂 𑀳𑁄𑀢𑀺.
𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀫𑀸𑀢𑀺𑀓𑀸𑀬𑀁. 𑀬𑀦𑁆𑀢𑀺 𑀆𑀧𑀢𑁆𑀢𑀺𑀁. 𑀲𑁄𑀧𑀺 𑀘𑀸𑀢𑀺 𑀪𑀺𑀓𑁆𑀔𑀼𑀧𑀺 𑀘. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀆𑀧𑀢𑁆𑀢𑀺𑀬𑀁. 𑀅𑀬𑀦𑁆𑀢𑀺 𑀪𑀺𑀓𑁆𑀔𑀼. 𑀢𑀢𑁆𑀣𑀸𑀢𑀺 𑀆𑀧𑀢𑁆𑀢𑀺𑀬𑀁. 𑀅𑀮𑀚𑁆𑀚𑀺𑀧𑀓𑁆𑀔𑁂 𑀢𑀺𑀝𑁆𑀞𑀢𑀻𑀢𑀺 ‘‘𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀻’’𑀢𑀺 (𑀧𑀭𑀺. 𑁩𑁫𑁯) 𑀯𑀼𑀢𑁆𑀢𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀅𑀮𑀚𑁆𑀚𑀺𑀧𑀓𑁆𑀔𑁂 𑀢𑀺𑀝𑁆𑀞𑀢𑀺.
𑀧𑀓𑀢𑀢𑁆𑀢𑁄𑀢𑀺 𑀏𑀢𑁆𑀣 ‘‘𑀧𑀸𑀭𑀸𑀚𑀺𑀓𑀁 𑀅𑀦𑀚𑁆𑀛𑀸𑀧𑀦𑁆𑀦𑁄’’𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀢𑀺𑀯𑀺𑀥𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀅𑀓𑀢𑁄’’𑀢𑀺. 𑀏𑀢𑀦𑁆𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁, ‘‘𑀆𑀧𑀚𑁆𑀚𑀢𑀺…𑀧𑁂… 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺 𑀯𑀘𑀦𑀁 𑀯𑀸.
𑀕𑀸𑀣𑀸𑀬 ‘‘𑀲𑀸𑀯𑀲𑁂𑀲’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀭𑀸𑀚𑀺𑀓𑀁 𑀦𑀺𑀯𑀢𑁆𑀢𑁂𑀢𑀺. 𑀕𑀭𑀼𑀓𑀦𑁆𑀢𑀺 𑀏𑀢𑁆𑀣 𑀲𑀗𑁆𑀖𑀸𑀤𑀺𑀲𑁂𑀲𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀸𑀤𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀤𑀭𑀺𑀬𑀁. 𑀯𑀚𑁆𑀚𑀦𑁆𑀢𑀺 𑀤𑀼𑀓𑁆𑀓𑀝𑀁. 𑀉𑀓𑁆𑀔𑀺𑀢𑁆𑀢𑀓𑁂𑀦 𑀓𑀭𑀡𑀪𑀽𑀢𑁂𑀦.
𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲, 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀻𑀭𑀼𑀓𑀚𑀸𑀢𑀺𑀓𑀢𑀸𑀬𑀸𑀢𑀺 𑀪𑀻𑀭𑀼𑀓𑀲𑀪𑀸𑀯𑀢𑀸𑀬. 𑀧𑀩𑁆𑀩𑀢𑀯𑀺𑀳𑀸𑀭𑁂 𑀯𑀲𑀦𑁆𑀢𑀲𑁆𑀲 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀢𑀯𑀺𑀳𑀸𑀭𑁂𑀢𑀺 𑀧𑀩𑁆𑀩𑀢𑀲𑁆𑀲 𑀢𑀮𑁂, 𑀅𑀦𑁆𑀢𑀭𑁂 𑀯𑀸 𑀓𑀸𑀭𑀺𑀢𑁂 𑀯𑀺𑀳𑀸𑀭𑁂. 𑀏𑀢𑀲𑁆𑀫𑀺𑀦𑁆𑀢𑀺 𑀏𑀢𑀸𑀤𑀺𑀲𑁂. 𑀅𑀦𑁆𑀢𑀭𑀸𑀬𑁂 𑀲𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀅𑀘𑁆𑀙𑀦𑁆𑀦𑀸𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀸𑀬 𑀙𑀸𑀤𑀬𑀢𑁄 𑀅𑀘𑁆𑀙𑀦𑁆𑀦𑀸𑀯𑀸𑀢𑀺 𑀅𑀦𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀸𑀬 𑀙𑀸𑀤𑁂𑀦𑁆𑀢𑀲𑁆𑀲𑀸𑀧𑀺 𑀏𑀓𑀦𑁆𑀢𑁂𑀦 𑀅𑀦𑁆𑀢𑀭𑀸𑀬𑀺𑀓𑀢𑁆𑀢𑀸 𑀅𑀘𑁆𑀙𑀦𑁆𑀦𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀳𑀦𑀼𑀓𑀯𑀸𑀢𑁄𑀢𑀺 𑀳𑀦𑀼𑀓𑀲𑁆𑀲 𑀕𑁂𑀮𑀜𑁆𑀜𑀓𑀭𑁄 𑀯𑀸𑀢𑁄. 𑀯𑀺𑀚𑁆𑀛𑀢𑀻𑀢𑀺 𑀳𑀦𑀼𑀓𑀁 𑀯𑀺𑀚𑁆𑀛𑀢𑀺. 𑀇𑀫𑀺𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀧𑀳𑀼𑀲𑀜𑁆𑀜𑀺𑀦𑁄 𑀙𑀸𑀤𑀺𑀢𑀸𑀧𑀺 𑀏𑀓𑀦𑁆𑀢𑁂𑀦 𑀅𑀧𑀳𑀼𑀢𑁆𑀢𑀸 𑀅𑀘𑁆𑀙𑀸𑀤𑀺𑀢𑀸𑀯 𑀳𑁄𑀢𑀺.
𑀙𑀸𑀤𑁂𑀢𑀼𑀓𑀸𑀫𑁄 𑀘𑀸𑀢𑀺 𑀏𑀢𑁆𑀣 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑀙𑀸𑀤𑁂𑀢𑀼𑀓𑀸𑀫𑁄 𑀙𑀸𑀤𑁂𑀢𑀺, 𑀙𑀸𑀤𑁂𑀢𑀼𑀓𑀸𑀫𑁄 𑀦𑀘𑁆𑀙𑀸𑀤𑁂𑀢𑀺, 𑀅𑀘𑁆𑀙𑀸𑀤𑁂𑀢𑀼𑀓𑀸𑀫𑁄 𑀙𑀸𑀤𑁂𑀢𑀺, 𑀦𑀘𑁆𑀙𑀸𑀤𑁂𑀢𑀼𑀓𑀸𑀫𑁄 𑀦𑀘𑁆𑀙𑀸𑀤𑁂𑀢𑀻𑀢𑀺. 𑀢𑀢𑁆𑀣 𑀧𑀞𑀫𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸’’𑀢𑀺. 𑀏𑀯𑀁 𑀲𑁂𑀲𑀸𑀲𑀼𑀧𑀺 𑀫𑀸𑀢𑀺𑀓𑀸𑀲𑀼 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀽𑀲𑀼 𑀘𑀢𑀼𑀓𑁆𑀓𑁂𑀲𑀼 𑀧𑀞𑀫𑀧𑀤𑁂 𑀏𑀯 𑀙𑀦𑁆𑀦𑀸 𑀳𑁄𑀢𑀺, 𑀦 𑀲𑁂𑀲𑀧𑀤𑁂𑀲𑀼. 𑀅𑀦𑀼𑀢𑁆𑀢𑀸𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀧𑀼𑀭𑁂𑀪𑀢𑁆𑀢𑁂 𑀯𑀸𑀢𑀺 𑀧𑀼𑀭𑁂𑀪𑀢𑁆𑀢𑀁 𑀯𑀸, 𑀪𑀢𑁆𑀢𑀢𑁄, 𑀪𑀢𑁆𑀢𑀲𑁆𑀲 𑀯𑀸 𑀧𑀼𑀭𑁂𑀢𑀺 𑀧𑀼𑀭𑁂𑀪𑀢𑁆𑀢𑀁. 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁂 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀸 𑀅𑀫𑀺𑀢𑀺𑀓𑀸𑀭𑀺𑀬𑀲𑁆𑀲 𑀅𑀦𑀺𑀘𑁆𑀘𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀼𑀭𑁂𑀪𑀢𑁆𑀢𑁂’’𑀢𑀺. 𑀏𑀲𑁂𑀯 𑀦𑀬𑁄 ‘‘𑀧𑀘𑁆𑀙𑀸𑀪𑀢𑁆𑀢𑁂’’𑀢𑀺 𑀏𑀢𑁆𑀣𑀸𑀧𑀺. 𑀤𑀼𑀢𑀺𑀬𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑀺𑀬𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀅𑀪𑀺𑀓𑁆𑀔𑀼𑀓𑁂 𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀬𑀲𑁆𑀲 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀆𑀕𑀫𑁂𑀦𑁆𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀅𑀦𑀸𑀤𑀭𑁂 𑀘𑁂𑀢𑀸𑀦𑀺 𑀲𑀸𑀫𑀺𑀯𑀘𑀦𑀸𑀦𑀺.
𑀘𑀢𑀼𑀢𑁆𑀣𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁄 𑀧𑀦𑀸𑀢𑀺 𑀪𑀺𑀓𑁆𑀔𑀼 𑀧𑀦, 𑀆𑀯𑀺 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀪𑀸𑀕𑀦𑁆𑀢𑀺 𑀅𑀯𑁂𑀭𑀺𑀁. 𑀅𑀬𑀦𑁆𑀢𑀺 𑀪𑀺𑀓𑁆𑀔𑀼. 𑀉𑀧𑀚𑁆𑀛𑀸𑀬𑁄 𑀇𑀢𑀺 𑀯𑀸 𑀆𑀘𑀭𑀺𑀬𑁄 𑀇𑀢𑀺 𑀯𑀸𑀢𑀺 𑀬𑁄𑀚𑀦𑀸. 𑀮𑀚𑁆𑀚𑀸𑀬𑀸𑀢𑀺 𑀮𑀚𑁆𑀚𑀦𑀺𑀫𑀺𑀢𑁆𑀢𑀁, 𑀮𑀚𑁆𑀚𑀓𑀸𑀭𑀡𑀸, 𑀮𑀚𑁆𑀚𑀳𑁂𑀢𑀼 𑀯𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸, 𑀇𑀥𑀸𑀢𑀺 𑀆𑀧𑀢𑁆𑀢𑀺𑀆𑀭𑁄𑀘𑀦𑀝𑁆𑀞𑀸𑀦𑁂. 𑀅𑀯𑁂𑀭𑀺𑀲𑀪𑀸𑀕𑀲𑁆𑀲𑀸𑀢𑀺 𑀅𑀯𑁂𑀭𑀻 𑀳𑀼𑀢𑁆𑀯𑀸 𑀲𑀪𑀸𑀕𑀲𑁆𑀲.
𑀧𑀓𑀸𑀲𑁂𑀢𑀼𑀓𑀸𑀫𑁄𑀢𑀺 𑀅𑀜𑁆𑀜𑁂𑀲𑀁 𑀧𑀓𑀸𑀲𑁂𑀢𑀼𑀓𑀸𑀫𑁄. 𑀉𑀧𑀚𑁆𑀛𑀸𑀬𑀲𑁆𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀆𑀧𑀢𑁆𑀢𑀺𑀆𑀭𑁄𑀘𑀦𑀝𑁆𑀞𑀸𑀦𑁂. 𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺 𑀯𑀢𑁆𑀣𑀼𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁. 𑀲𑀼𑀤𑁆𑀥𑀲𑁆𑀲𑀸𑀢𑀺 𑀯𑀢𑁆𑀣𑀼𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀢𑁄 𑀲𑀼𑀤𑁆𑀥𑀲𑁆𑀲. 𑀆𑀯𑀺𑀓𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀯𑀺𑀓𑀭𑁄𑀦𑁆𑀢𑁄 𑀘𑀸’’𑀢𑀺𑀆𑀤𑀺. 𑀇𑀢𑀺 𑀇𑀫𑀸𑀦𑀻𑀢𑀺𑀆𑀤𑀺 𑀦𑀺𑀕𑀫𑀦𑀁.
𑀢𑀢𑁄𑀢𑀺 𑀚𑀸𑀦𑀺𑀢𑀩𑁆𑀩𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀏𑀓𑀸𑀳𑁂𑀦 𑀧𑀝𑀺𑀘𑁆𑀙𑀦𑁆𑀦𑀸. 𑀬𑀸𑀯 𑀘𑀼𑀤𑁆𑀤𑀲 𑀤𑀺𑀯𑀲𑀸𑀦𑀺, 𑀢𑀸𑀯 𑀤𑀺𑀯𑀲𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀧𑀓𑁆𑀔𑁂𑀦 𑀧𑀝𑀺𑀘𑁆𑀙𑀦𑁆𑀦𑀁. 𑀅𑀢𑀺𑀭𑁂𑀓𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀧𑀓𑁆𑀔𑀢𑁄 𑀅𑀢𑀺𑀭𑁂𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀁.
𑀲𑀁𑀯𑀘𑁆𑀙𑀭𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀲𑀁𑀯𑀘𑁆𑀙𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁. 𑀢𑀢𑁄 𑀯𑀸𑀢𑀺 𑀅𑀢𑀺𑀭𑁂𑀓𑀲𑀝𑁆𑀞𑀺𑀲𑀁𑀯𑀘𑁆𑀙 𑀭𑀢𑁄 𑀯𑀸. 𑀪𑀺𑀬𑁆𑀬𑁄𑀧𑀻𑀢𑀺 𑀅𑀢𑀺𑀭𑁂𑀓𑀫𑁆𑀧𑀺.
𑀢𑀢𑁄𑀢𑀺 𑀢𑀻𑀳𑀺 𑀆𑀧𑀢𑁆𑀢𑀻𑀳𑀺. 𑀧𑀭𑀦𑁆𑀢𑀺 𑀅𑀢𑀺𑀭𑁂𑀓𑀁. 𑀕𑀡𑀦𑀯𑀲𑁂𑀦𑀸𑀢𑀺 𑀆𑀧𑀢𑁆𑀢𑀺𑀕𑀡𑀦𑀯𑀲𑁂𑀦. 𑀯𑀢𑁆𑀣𑀼𑀓𑀺𑀢𑁆𑀢𑀦𑀯𑀲𑁂𑀦 𑀯𑀸𑀢𑀺 𑀆𑀧𑀢𑁆𑀢𑀻𑀦𑀁 𑀯𑀢𑁆𑀣𑀼𑀓𑀺𑀢𑁆𑀢𑀦𑀯𑀲𑁂𑀦 𑀯𑀸. 𑀦𑀸𑀫𑀫𑀢𑁆𑀢𑀯𑀲𑁂𑀦 𑀯𑀸𑀢𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑁄’’𑀢𑀺 𑀏𑀯𑀁 𑀦𑀸𑀫𑀲𑁆𑀲𑁂𑀯 𑀯𑀲𑁂𑀦 𑀯𑀸. 𑀏𑀢𑁆𑀣 𑀳𑀺 𑀫𑀢𑁆𑀢𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀢𑁂𑀦 𑀯𑀢𑁆𑀣𑀼𑀁 𑀦𑀺𑀯𑀢𑁆𑀢𑁂𑀢𑀺.
𑀢𑀢𑁆𑀣𑀸𑀢𑀺 ‘‘𑀦𑀸𑀫𑀫𑀢𑁆𑀢𑀯𑀲𑁂𑀦𑀸’’𑀢𑀺 𑀧𑀤𑁂. 𑀲𑀚𑀸𑀢𑀺𑀲𑀸𑀥𑀸𑀭𑀡𑀦𑁆𑀢𑀺 𑀲𑀲𑁆𑀲 𑀅𑀢𑁆𑀢𑀦𑁄 𑀚𑀸𑀢𑀺 𑀲𑀚𑀸𑀢𑀺, 𑀢𑀸𑀬 𑀲𑀸𑀥𑀸𑀭𑀡𑀁 𑀲𑀚𑀸𑀢𑀺𑀲𑀸𑀥𑀸𑀭𑀡𑀁. 𑀲𑀩𑁆𑀩𑁂𑀲𑀁, 𑀲𑀩𑁆𑀩𑁂𑀳𑀺 𑀯𑀸 𑀆𑀧𑀢𑁆𑀢𑀻𑀳𑀺 𑀲𑀸𑀥𑀸𑀭𑀡𑀁 𑀲𑀩𑁆𑀩𑀲𑀸𑀥𑀸𑀭𑀡𑀁. 𑀢𑀢𑁆𑀣𑀸𑀢𑀺 𑀤𑀼𑀯𑀺𑀥𑁂𑀲𑀼 𑀦𑀸𑀫𑁂𑀲𑀼. 𑀲𑀩𑁆𑀩𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦𑀸𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 ‘‘𑀅𑀳𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀲𑀚𑀸𑀢𑀺𑀲𑀸𑀥𑀸𑀭𑀡𑀦𑀸𑀫𑀯𑀲𑁂𑀦𑀧𑀺 ‘‘𑀅𑀳𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀁 𑀏𑀓𑀸𑀳𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀏𑀯𑀁 𑀉𑀪𑀬𑀲𑀸𑀥𑀸𑀭𑀡𑀯𑀲𑁂𑀦𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀲𑀩𑁆𑀩𑀫𑁆𑀧𑀺 𑀧𑀭𑀺𑀯𑀸𑀲𑀸𑀤𑀺𑀓𑀁 𑀇𑀤𑀁 𑀯𑀺𑀦𑀬𑀓𑀫𑁆𑀫𑀦𑁆𑀢𑀺 𑀬𑁄𑀚𑀦𑀸. 𑀯𑀲𑀢𑀺 𑀆𑀧𑀢𑁆𑀢𑀺 𑀏𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀯𑀢𑁆𑀣𑀼. 𑀕𑁄 𑀯𑀼𑀘𑁆𑀘𑀢𑀺 𑀯𑀘𑀦𑀁 𑀯𑀸 𑀜𑀸𑀡𑀁 𑀯𑀸, 𑀢𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁.
𑀢𑀢𑁆𑀣𑀸𑀢𑀺 𑀯𑀢𑁆𑀣𑀸𑀤𑀻𑀲𑀼 𑀘𑀢𑀼𑀩𑁆𑀩𑀺𑀥𑁂𑀲𑀼. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀯𑀘𑀦𑁂𑀲𑀼. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀓𑀸𑀬𑀲𑀁𑀲𑀕𑁆𑀕𑀦𑁆𑀢𑀺𑀆𑀤𑀺𑀦𑀸 𑀯𑀘𑀦𑁂𑀦𑀸𑀧𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀤𑀼𑀝𑁆𑀞𑀼𑀮𑁆𑀮𑀸𑀤𑀺𑀯𑀘𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂. 𑀬𑁄 𑀬𑁄𑀢𑀺 𑀢𑀺𑀲𑁆𑀲𑁄 𑀯𑀸 𑀨𑀼𑀲𑁆𑀲𑁄 𑀯𑀸 𑀆𑀧𑀦𑁆𑀦𑁄 𑀳𑁄𑀢𑀺.
𑀏𑀯𑀁 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀏𑀯𑀁 𑀯𑀓𑁆𑀔𑀫𑀸𑀦𑀦𑀬𑁂𑀦 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀓𑀺𑀁 𑀆𑀭𑁄𑀘𑁂𑀢𑀩𑁆𑀩𑀁? ‘‘𑀅𑀳𑀁 𑀪𑀦𑁆𑀢𑁂…𑀧𑁂… 𑀲𑀗𑁆𑀖𑁄 𑀥𑀸𑀭𑁂𑀢𑀼’’ 𑀇𑀢𑀺 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.
𑀯𑁂𑀤𑀬𑀸𑀫𑀳𑀦𑁆𑀢𑀺 𑀯𑁂𑀤𑀬𑀸𑀫𑀺 𑀅𑀳𑀁. 𑀫𑀫 𑀧𑀸𑀭𑀺𑀯𑀸𑀲𑀺𑀓𑀪𑀸𑀯𑀁 𑀲𑀗𑁆𑀖𑀁, 𑀲𑀗𑁆𑀖𑀲𑁆𑀲 𑀯𑀸 𑀚𑀸𑀦𑀸𑀧𑁂𑀫𑀻𑀢𑀺 𑀅𑀢𑁆𑀣𑁄. 𑀯𑁂𑀤𑀬𑀢𑀻𑀢𑀺 𑀫𑀦𑁆𑀢𑀺 𑀯𑁂𑀤𑀬𑀢𑀺 𑀇𑀢𑀺 𑀫𑀁. 𑀧𑀸𑀭𑀺𑀯𑀸𑀲𑀺𑀓𑀪𑀸𑀯𑀁 𑀲𑀗𑁆𑀖𑀁, 𑀲𑀗𑁆𑀖𑀲𑁆𑀲 𑀯𑀸 𑀚𑀸𑀦𑀸𑀧𑁂𑀢𑀻𑀢𑀺 𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀩𑀳𑀽𑀲𑀼 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 ‘‘𑀢𑀺𑀡𑁆𑀡𑀁 𑀯𑀸 𑀅𑀢𑀺𑀭𑁂𑀓𑀸𑀦𑀁 𑀯𑀸 𑀆𑀭𑁄𑀘𑁂𑀦𑁆𑀢𑁂𑀦 𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀧𑀸𑀞𑁄 𑀅𑀢𑁆𑀣𑀺. 𑀓𑁂𑀲𑀼𑀘𑀺 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 ‘‘𑀢𑀺𑀡𑁆𑀡𑀁 𑀆𑀭𑁄𑀘𑁂𑀦𑁆𑀢𑁂𑀦 𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀏𑀢𑁆𑀢𑀓𑁄𑀬𑁂𑀯 𑀧𑀸𑀞𑁄 𑀅𑀢𑁆𑀣𑀺. 𑀳𑁂𑀝𑁆𑀞𑀸 𑀫𑀸𑀦𑀢𑁆𑀢𑀓𑀣𑀸𑀬𑀫𑁆𑀧𑀺 𑀏𑀯𑀫𑁂𑀯 𑀅𑀢𑁆𑀣𑀺. 𑀢𑀢𑁆𑀣 ‘‘𑀅𑀢𑀺𑀭𑁂𑀓𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀢𑀻𑀳𑀺 𑀅𑀢𑀺𑀭𑁂𑀓𑀸𑀦𑀁 𑀆𑀭𑁄𑀘𑁂𑀦𑁆𑀢𑁂𑀦 𑀲𑀗𑁆𑀖𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀘𑁂 𑀏𑀓𑀯𑀘𑀦𑀯𑀲𑁂𑀦 𑀯𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, ‘‘𑀫𑀁 𑀲𑀗𑁆𑀖𑁄 𑀥𑀸𑀭𑁂𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀣 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀘𑁂 𑀩𑀳𑀼𑀯𑀘𑀦𑀯𑀲𑁂𑀦 𑀯𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀬𑀣𑀸 𑀢𑀺𑀡𑁆𑀡𑀁, 𑀏𑀯𑀁 ‘‘𑀫𑀁 𑀆𑀬𑀲𑁆𑀫𑀦𑁆𑀢𑁄 𑀥𑀸𑀭𑁂𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀜𑁆𑀘 𑀲𑀤𑁆𑀤𑀲𑀢𑁆𑀣𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀦 𑀯𑀺𑀦𑀬𑀓𑀫𑁆𑀫𑀯𑀺𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.
‘‘𑀯𑀺𑀳𑀸𑀭𑁂𑀬𑁂𑀯 𑀭𑀢𑁆𑀢𑀺𑀧𑀭𑀺𑀕𑁆𑀕𑀳𑁄’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀫𑁆𑀧𑀺 𑀧𑀭𑀺𑀯𑀲𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀉𑀧𑀘𑀸𑀭𑀲𑀻𑀫𑀦𑁆𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁. 𑀏𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑁄 𑀪𑀺𑀓𑁆𑀔𑀼. 𑀅𑀲𑁆𑀲𑀸𑀢𑀺 𑀆𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.
𑀢𑀢𑁄𑀢𑀺 𑀆𑀧𑀢𑁆𑀢𑀺𑀧𑀝𑀺𑀘𑁆𑀙𑀦𑁆𑀦𑀤𑀺𑀯𑀲𑀢𑁄. 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀸𑀬𑀸𑀢𑀺 𑀆𑀧𑀢𑁆𑀢𑀺𑀧𑀝𑀺𑀘𑁆𑀙𑀦𑁆𑀦𑀤𑀺𑀯𑀲𑁂𑀦 𑀲𑀫𑀁 𑀧𑀭𑀺𑀯𑀲𑀺𑀢𑀩𑁆𑀩𑀁 𑀦𑀼𑀔𑁄, 𑀦 𑀦𑀼𑀔𑁄𑀢𑀺 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀸𑀬. 𑀧𑀭𑀺𑀯𑀼𑀢𑁆𑀣𑀢𑁆𑀢𑀸𑀢𑀺 𑀧𑀭𑀺𑀯𑀲𑀺𑀢𑀢𑁆𑀢𑀸. 𑀲𑁄𑀢𑀺 𑀧𑀭𑀺𑀯𑀼𑀢𑁆𑀣𑁄 𑀪𑀺𑀓𑁆𑀔𑀼. 𑀇𑀤𑀦𑁆𑀢𑀺 𑀤𑀸𑀢𑀩𑁆𑀩𑀫𑀸𑀦𑀢𑁆𑀢𑀁. 𑀢𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁. 𑀙𑀸𑀭𑀢𑁆𑀢𑀦𑁆𑀢𑀺 𑀙𑀭𑀢𑁆𑀢𑀺𑀬𑁄 𑀲𑀫𑀸𑀳𑀝𑀸𑀢𑀺 𑀙𑀸𑀭𑀢𑁆𑀢𑀁, 𑀲𑀫𑀸𑀳𑀸𑀭𑁂 𑀤𑀺𑀕𑀼. ‘‘𑀙𑀭𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀁 𑀙𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁.
𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀧𑀢𑁆𑀢𑀺𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁 𑀇𑀫𑀲𑁆𑀫𑀺𑀁 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑁂 𑀲𑀫𑁄𑀥𑀸𑀦𑁂𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀽𑀮𑀫𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.
𑀅𑀲𑁆𑀲𑀸𑀢𑀺 𑀫𑀸𑀦𑀢𑁆𑀢𑀁 𑀬𑀸𑀘𑀦𑁆𑀢𑀲𑁆𑀲. 𑀢𑀤𑀦𑀼𑀭𑀽𑀧𑀦𑁆𑀢𑀺 𑀢𑀲𑁆𑀲 𑀬𑀸𑀘𑀦𑀲𑁆𑀲 𑀅𑀦𑀼𑀭𑀽𑀧𑀁. 𑀲𑀘𑁂 𑀧𑀝𑀺𑀘𑁆𑀙𑀦𑁆𑀦𑀸 𑀤𑁆𑀯𑁂𑀢𑀺 𑀏𑀢𑁆𑀣 𑀤𑁆𑀯𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀢𑀢𑁄 𑀅𑀢𑀺𑀭𑁂𑀓𑀫𑁆𑀧𑀺 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀏𑀓𑀩𑀳𑀽𑀲𑀼. 𑀢𑀤𑀦𑀼𑀭𑀽𑀧𑀫𑁂 𑀯𑀸𑀢𑀺 𑀢𑀲𑁆𑀲 𑀫𑀸𑀦𑀢𑁆𑀢𑀤𑀸𑀦𑀲𑁆𑀲 𑀅𑀦𑀼𑀭𑀽𑀧𑀫𑁂𑀯. 𑀇𑀥 𑀧𑀦𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑁂 𑀧𑀦. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑀁 𑀫𑀸𑀦𑀢𑁆𑀢𑀁 𑀤𑀺𑀬𑁆𑀬𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑁂.
𑀅𑀯𑀲𑁂𑀲𑀸𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁂𑀳𑀺 𑀅𑀯𑀲𑁂𑀲𑀸. 𑀢𑀢𑁆𑀣𑀸𑀢𑀺 𑀅𑀯𑀲𑁂𑀲𑁂𑀲𑀼 𑀤𑁆𑀯𑀻𑀲𑀼 𑀧𑀭𑀺𑀯𑀸𑀲𑁂𑀲𑀼. 𑀅𑀥𑀫𑁆𑀫𑀺𑀓𑀫𑀸𑀦𑀢𑁆𑀢𑀘𑀸𑀭𑀸𑀯𑀲𑀸𑀦𑁂 𑀅𑀦𑀼𑀜𑁆𑀜𑀸𑀢𑀧𑀭𑀺𑀯𑀸𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀦𑀼𑀜𑁆𑀜𑀸𑀢𑁄𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺. 𑀏𑀲𑀸𑀢𑀺 𑀲𑀼𑀤𑁆𑀥𑀦𑁆𑀢𑁄, 𑀤𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 𑀚𑀸𑀦𑀦𑀸𑀚𑀸𑀦𑀦𑀁.
𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀲𑀼𑀤𑁆𑀥𑀦𑁆𑀢𑁂𑀲𑀼, 𑀘𑀽𑀴𑀲𑀼𑀤𑁆𑀥𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄𑀢𑀺 𑀪𑀺𑀓𑁆𑀔𑀼, 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀭𑁄𑀘𑀺𑀢𑀤𑀺𑀯𑀲𑀢𑁄𑀢𑀺 𑀆𑀧𑀢𑁆𑀢𑀺𑀆𑀭𑁄𑀘𑀺𑀢𑀤𑀺𑀯𑀲𑀢𑁄.
𑀢𑀦𑁆𑀢𑀺 𑀘𑀽𑀴𑀲𑀼𑀤𑁆𑀥𑀦𑁆𑀢𑀁, 𑀧𑀭𑀺𑀯𑀲𑀦𑁆𑀢𑁂𑀦 𑀧𑀭𑀺𑀯𑀲𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀕𑁆𑀕𑀳𑁂𑀲𑀻𑀢𑀺 𑀧𑀭𑀺𑀯𑀸𑀲𑀁 𑀅𑀕𑁆𑀕𑀳𑁂𑀲𑀺. 𑀅𑀜𑁆𑀜𑀦𑁆𑀢𑀺 𑀕𑀳𑀺𑀢𑀫𑀸𑀲𑀢𑁄 𑀅𑀜𑁆𑀜𑀁. ‘‘𑀧𑀭𑀺𑀯𑀸𑀲𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀧𑀭𑀺𑀯𑀸𑀲𑀕𑀳𑀡𑀓𑀺𑀘𑁆𑀘𑀫𑁆𑀧𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀢𑁆𑀢𑀸, 𑀤𑁂𑀦𑁆𑀢𑀲𑁆𑀲𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸 𑀯𑀸. 𑀉𑀤𑁆𑀥𑀫𑁆𑀧𑀺 𑀆𑀭𑁄𑀳𑀢𑀻𑀢𑀺 𑀧𑀭𑀺𑀯𑀸𑀲𑀕𑀳𑀡𑀓𑀸𑀮𑀢𑁄 𑀅𑀜𑁆𑀜𑀫𑁆𑀧𑀺 𑀓𑀸𑀮𑀁 𑀧𑀭𑀺𑀯𑀲𑀺𑀢𑀩𑁆𑀩𑀢𑁆𑀢𑀸 𑀉𑀤𑁆𑀥𑀫𑁆𑀧𑀺 𑀆𑀭𑁄𑀳𑀢𑀺. 𑀳𑁂𑀝𑁆𑀞𑀸𑀧𑀺 𑀑𑀭𑁄𑀳𑀢𑀻𑀢𑀺 𑀧𑀭𑀺𑀯𑀸𑀲𑀕𑀳𑀡𑀓𑀸𑀮𑀢𑁄 𑀊𑀦𑀫𑁆𑀧𑀺 𑀓𑀸𑀮𑀁 𑀧𑀭𑀺𑀯𑀲𑀺𑀢𑀩𑁆𑀩𑀢𑁆𑀢𑀸 𑀳𑁂𑀝𑁆𑀞𑀸𑀧𑀺 𑀑𑀭𑁄𑀳𑀢𑀺. 𑀇𑀤𑀦𑁆𑀢𑀺 𑀆𑀭𑁄𑀳𑀦𑁄𑀭𑁄𑀳𑀦𑀁. 𑀢𑀲𑁆𑀲𑀸𑀢𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀲𑁆𑀲. 𑀏𑀓𑀫𑁂𑀯 𑀧𑀝𑀺𑀘𑁆𑀘 𑀤𑁆𑀯𑁂, 𑀢𑀺𑀲𑁆𑀲𑁄, 𑀲𑀫𑁆𑀩𑀳𑀼𑀮𑀸 𑀯𑀸 𑀪𑀯𑀦𑁆𑀢𑀻𑀢𑀺 𑀆𑀳 ‘‘𑀏𑀓𑀁 𑀯𑀺𑀦𑀸 𑀲𑀫𑁆𑀩𑀳𑀼𑀮𑀸𑀦𑀁 𑀅𑀪𑀸𑀯𑀢𑁄’’𑀢𑀺.
𑀏𑀯𑀁 𑀘𑀽𑀴𑀲𑀼𑀤𑁆𑀥𑀦𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀫𑀳𑀸𑀲𑀼𑀤𑁆𑀥𑀦𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀢𑀦𑁆𑀢𑀺 𑀫𑀳𑀸𑀲𑀼𑀤𑁆𑀥𑀦𑁆𑀢𑀁. 𑀬𑀸𑀯 𑀬𑀢𑁆𑀢𑀓𑁄 𑀉𑀧𑀲𑀫𑁆𑀧𑀤𑀤𑀺𑀯𑀲𑁄 𑀳𑁄𑀢𑀺, 𑀢𑀸𑀯 𑀢𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀬𑁄𑀚𑀦𑀸. 𑀉𑀤𑁆𑀥𑀁 𑀦𑀸𑀭𑁄𑀳𑀢𑀻𑀢𑀺 𑀉𑀤𑁆𑀥𑀁 𑀆𑀭𑁄𑀳𑀦𑀓𑀸𑀮𑀲𑁆𑀲 𑀅𑀪𑀸𑀯𑀢𑁄 𑀉𑀤𑁆𑀥𑀁 𑀦 𑀆𑀭𑁄𑀳𑀢𑀺. 𑀏𑀢𑁆𑀣𑀸𑀢𑀺 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁂. 𑀅𑀬𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀦𑀸𑀫𑀸𑀢𑀺 𑀦𑀺𑀕𑀫𑀦𑀁.
𑀢𑀢𑁆𑀣𑀸𑀢𑀺 𑀢𑀺𑀯𑀺𑀥𑁂𑀲𑀼 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁂𑀲𑀼. ‘‘𑀑𑀥𑀼𑀦𑀺𑀢𑁆𑀯𑀸 𑀲𑀫𑁄𑀤𑀳𑀺𑀢𑁆𑀯𑀸 𑀤𑀸𑀢𑀩𑁆𑀩𑀧𑀭𑀺𑀯𑀸𑀲𑁄’’𑀢𑀺 𑀇𑀫𑀺𑀦𑀸 𑀑𑀥𑀼𑀦𑀺𑀢𑁆𑀯𑀸 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄 𑀑𑀥𑀸𑀦𑀲𑀫𑁄𑀥𑀸𑀦𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀧𑀭𑀺𑀯𑀸𑀲𑁄’’𑀢𑀺 𑀇𑀫𑀺𑀦𑀸 𑀢𑀤𑁆𑀥𑀺𑀢𑀡𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀅𑀯𑀥𑀼𑀦𑀺𑀬𑀢𑁂, 𑀅𑀯𑀥𑀼𑀦𑀺𑀢𑀩𑁆𑀩𑀦𑁆𑀢𑀺 𑀯𑀸 𑀑𑀥𑀸𑀦𑀁, 𑀲𑀁 𑀏𑀓𑀢𑁄 𑀑𑀤𑀳𑀻𑀬𑀢𑁂 𑀲𑀫𑁆𑀧𑀺𑀡𑁆𑀟𑀻𑀬𑀢𑁂, 𑀉𑀤𑀳𑀺𑀬𑀢𑀺 𑀲𑀫𑁆𑀧𑀺𑀡𑁆𑀟𑀺𑀬𑀢𑀻𑀢𑀺 𑀯𑀸 𑀲𑀫𑁄𑀥𑀸𑀦𑀦𑁆𑀢𑀺 𑀅𑀯𑀬𑀯𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. ‘‘𑀫𑀓𑁆𑀔𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀥𑀼𑀥𑀸𑀢𑀼𑀬𑀸 𑀧𑀧𑁆𑀧𑁄𑀝𑀦𑀥𑀁𑀲𑀦𑀥𑁄𑀯𑀦𑀸𑀦𑀺 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀑𑀥𑀸𑀦𑀲𑀫𑁄𑀥𑀸𑀦𑁄, 𑀆𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.
𑀏𑀢𑁆𑀣𑀸𑀢𑀺 𑀑𑀥𑀸𑀦𑀲𑀫𑁄𑀥𑀸𑀦𑁂. 𑀬𑁄𑀢𑀺 𑀪𑀺𑀓𑁆𑀔𑀼, 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀯𑀲𑀦𑁆𑀢𑁄 𑀯𑀸 𑀫𑀸𑀦𑀢𑁆𑀢𑀸𑀭𑀳𑁄 𑀯𑀸 𑀫𑀸𑀦𑀢𑁆𑀢𑀁 𑀘𑀭𑀦𑁆𑀢𑁄 𑀯𑀸 𑀅𑀩𑁆𑀪𑀸𑀦𑀸𑀭𑀳𑁄 𑀯𑀸 𑀬𑁄 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸. ‘‘𑀧𑀼𑀭𑀺𑀫𑀸𑀬 𑀆𑀧𑀢𑁆𑀢𑀺𑀬𑀸’’𑀢𑀺 𑀧𑀤𑀁 ‘‘𑀲𑀫𑀸 𑀯𑀸’’𑀢𑀺 𑀧𑀤𑁂 𑀲𑀳𑀸𑀤𑀺𑀬𑁄𑀕𑁄. ‘‘𑀊𑀦𑀢𑀭𑀸’’𑀢𑀺𑀧𑀤𑁂 𑀯𑀺𑀪𑀢𑁆𑀢𑀺𑀅𑀧𑀸𑀤𑀸𑀦𑀁, 𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑀅𑀧𑀸𑀤𑀸𑀦𑀁 𑀯𑀸. ‘‘𑀅𑀤𑀺𑀯𑀲𑁂 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀑𑀥𑀼𑀦𑀺𑀢𑁆𑀯𑀸𑀢𑀺 𑀏𑀢𑁆𑀣 𑀥𑀼𑀥𑀸𑀢𑀼𑀬𑀸 𑀬𑀣𑀸𑀯𑀼𑀢𑁆𑀢𑀢𑁆𑀣𑁂𑀬𑁂𑀯 𑀤𑀲𑁆𑀲𑁂𑀢𑀺. 𑀊𑀦𑀓𑀧𑀓𑁆𑀔𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀧𑀓𑁆𑀔𑀢𑁄 𑀊𑀦𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀸. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀧𑀓𑁆𑀔𑁂 𑀯𑀼𑀢𑁆𑀢𑁂𑀦 𑀏𑀢𑁂𑀦 𑀉𑀧𑀸𑀬𑁂𑀦.
𑀢𑀢𑁆𑀣𑀸𑀢𑀺 𑀫𑀽𑀮𑀸𑀧𑀢𑁆𑀢𑀺𑀢𑁄 𑀅𑀢𑀺𑀭𑁂𑀓𑀧𑀝𑀺𑀘𑁆𑀙𑀦𑁆𑀦𑁂. 𑀆𑀯𑀺 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀫𑀽𑀮𑀸𑀧𑀢𑁆𑀢𑀺𑀢𑁄 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀆𑀯𑀺 𑀓𑀸𑀭𑀸𑀧𑁂𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀆𑀧𑀢𑁆𑀢𑀺𑀧𑀝𑀺𑀘𑁆𑀙𑀦𑁆𑀦𑁂. 𑀧𑀫𑀸𑀡𑀦𑁆𑀢𑀺 𑀓𑀸𑀭𑀡𑀁. 𑀬𑀸𑀢𑀺 𑀆𑀧𑀢𑁆𑀢𑀺. 𑀢𑀢𑁆𑀣𑀸𑀢𑀺 𑀫𑀽𑀮𑀪𑀸𑀯𑁂𑀦 𑀓𑀢𑁆𑀢𑀩𑁆𑀩𑀸𑀬𑀁 𑀫𑀽𑀮𑀺𑀆𑀧𑀢𑁆𑀢𑀺𑀬𑀁. 𑀇𑀢𑀭𑀦𑁆𑀢𑀺 𑀫𑀽𑀮𑀺𑀪𑀸𑀯𑁂𑀦 𑀓𑀢𑁆𑀢𑀩𑁆𑀩𑀁 𑀫𑀽𑀮𑀸𑀧𑀢𑁆𑀢𑀺𑀁. 𑀲𑀫𑁄𑀥𑀸𑀬𑀸𑀢𑀺 𑀲𑀫𑁄𑀤𑀳𑀺𑀢𑁆𑀯𑀸. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.
𑀏𑀓𑀸 𑀯𑀸 𑀬𑀸 𑀆𑀧𑀢𑁆𑀢𑀺 𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀢𑀺 𑀲𑀩𑁆𑀩𑀸𑀲𑀁 𑀆𑀧𑀢𑁆𑀢𑀻𑀦𑀁 𑀘𑀺𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀸𑀬𑁄. 𑀢𑀸𑀲𑀦𑁆𑀢𑀺 𑀆𑀧𑀢𑁆𑀢𑀻𑀦𑀁. 𑀅𑀕𑁆𑀖𑁂𑀦𑀸𑀢𑀺 𑀧𑀭𑀺𑀘𑁆𑀙𑁂𑀤𑁂𑀦. 𑀅𑀕𑁆𑀖𑀲𑀤𑁆𑀤𑁄 𑀳𑁂𑀢𑁆𑀣 𑀧𑀭𑀺𑀘𑁆𑀙𑁂𑀤𑀢𑁆𑀣𑀯𑀸𑀘𑀓𑁄. 𑀅𑀪𑀺𑀥𑀸𑀦𑁂 (𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁧𑁦𑁪𑁮 𑀕𑀸𑀣𑀸𑀬𑀁) 𑀯𑀼𑀢𑁆𑀢𑀁 ‘‘𑀅𑀕𑁆𑀖𑁄 𑀫𑀼𑀮𑁆𑀬𑁂 𑀘 𑀧𑀽𑀚𑀦𑁂’’𑀢𑀺. 𑀏𑀢𑁆𑀣 ‘‘𑀫𑀼𑀮𑁆𑀬𑁂 𑀘𑀸’’𑀢𑀺 𑀧𑀤𑀲𑁆𑀲 𑀫𑀽𑀮𑀧𑀭𑀺𑀘𑁆𑀙𑁂𑀤𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀸𑀲𑀁 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸’’𑀢𑀺. 𑀇𑀫𑁂𑀳𑀺 𑀧𑀤𑁂𑀳𑀺 𑀅𑀕𑁆𑀖𑁂𑀦 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄 𑀅𑀕𑁆𑀖𑀲𑀫𑁄𑀥𑀸𑀦𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 ‘‘𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀸𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀓𑁄𑀝𑀺𑀅𑀢𑁆𑀣𑀯𑀸𑀘𑀓𑁄 𑀢𑀢𑀺𑀬𑀓𑁆𑀔𑀭𑁂𑀦 𑀧𑀸𑀞𑁄 𑀬𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀢𑀣𑀸𑀧𑀺 𑀲𑁄 𑀧𑀸𑀞𑁄 𑀦 𑀕𑀳𑁂𑀢𑀩𑁆𑀩𑁄. 𑀓𑀲𑁆𑀫𑀸? 𑀩𑀳𑀽𑀲𑀼 𑀧𑀸𑀴𑀺𑀧𑁄𑀢𑁆𑀣𑀓𑁂𑀲𑀼, 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 𑀘 𑀅𑀮𑀺𑀔𑀺𑀢𑀢𑁆𑀢𑀸. 𑀩𑀳𑀽𑀲𑀼 𑀳𑀺 𑀧𑁄𑀭𑀸𑀡𑀧𑁄𑀢𑁆𑀣𑀓𑁂𑀲𑀼 𑀘𑀢𑀼𑀢𑁆𑀣𑀓𑁆𑀔𑀭𑁂𑀦 𑀧𑀸𑀞𑁄𑀬𑁂𑀯 𑀮𑀺𑀔𑀺𑀢𑁄, 𑀢𑀲𑁆𑀫𑀸 𑀲𑁄 𑀧𑀸𑀞𑁄𑀬𑁂𑀯 𑀕𑀳𑁂𑀢𑀩𑁆𑀩𑁄, 𑀦 𑀅𑀜𑁆𑀜𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄𑀢𑀺 𑀅𑀕𑁆𑀖𑀲𑀫𑁄𑀥𑀸𑀦𑁄. 𑀆𑀕𑀢𑁄𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.
𑀬𑀲𑁆𑀲 𑀧𑀦𑀸𑀢𑀺 𑀪𑀺𑀓𑁆𑀔𑀼𑀲𑁆𑀲, 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀦𑁆𑀢𑀺 𑀲𑀓𑀮𑀁. 𑀆𑀧𑀢𑁆𑀢𑀺𑀲𑀳𑀲𑁆𑀲𑀕𑀸𑀣𑀸𑀬 𑁋
𑀤𑀲𑀲𑀢𑀁 𑀆𑀧𑀢𑁆𑀢𑀺𑀬𑁄 𑀭𑀢𑁆𑀢𑀺𑀲𑀢𑀁 𑀙𑀸𑀤𑀬𑀺𑀢𑁆𑀯𑀸𑀦𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀦𑀬𑁂𑀦𑀧𑀺 𑀅𑀕𑁆𑀖𑀲𑀫𑁄𑀥𑀸𑀦𑁄𑀢𑀺 𑀏𑀢𑁆𑀣 𑀅𑀕𑁆𑀖𑀲𑀤𑁆𑀤𑀲𑁆𑀲 𑀘𑀢𑀼𑀢𑁆𑀣𑀓𑁆𑀔𑀭𑁂𑀦 𑀧𑀸𑀞𑀲𑁆𑀲 𑀬𑀼𑀢𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀕𑁆𑀖𑁂𑀦 𑀤𑀲𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁂𑀦 𑀲𑀫𑁄𑀥𑀸𑀬 𑀤𑀸𑀢𑀩𑁆𑀩𑁄 𑀅𑀕𑁆𑀖𑀲𑀫𑁄𑀥𑀸𑀦𑁄.
𑀬𑁄 𑀧𑀭𑀺𑀯𑀸𑀲𑁄 𑀦𑀸𑀦𑀸𑀯𑀢𑁆𑀣𑀼𑀓𑀸𑀬𑁄 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄 𑀓𑀢𑁆𑀯𑀸 𑀤𑀺𑀬𑁆𑀬𑀢𑀺, 𑀅𑀬𑀁 𑀧𑀭𑀺𑀯𑀸𑀲𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀯𑀢𑁆𑀣𑀼𑀯𑀲𑁂𑀦 𑀫𑀺𑀲𑁆𑀲𑀓𑀸 𑀆𑀧𑀢𑁆𑀢𑀺𑀬𑁄 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀸𑀢𑀩𑁆𑀩𑁄 𑀧𑀭𑀺𑀯𑀸𑀲𑁄 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀭𑀸𑀢𑀺 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁂. 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀢𑀲𑁆𑀲 𑀬𑀸𑀘𑀦𑀲𑁆𑀲 𑀅𑀦𑀼𑀭𑀽𑀧𑀸𑀬.
𑀏𑀢𑁆𑀣 𑀘𑀸𑀢𑀺 𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑁂 𑀘, 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.
‘‘𑀧𑀓𑁆𑀔𑀫𑀸𑀦𑀢𑁆𑀢𑀜𑁆𑀘 …𑀧𑁂… 𑀓𑀣𑀬𑀺𑀲𑁆𑀲𑀸𑀫𑀸’’𑀢𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀯𑀘𑀦𑀲𑁆𑀲 𑀑𑀓𑀸𑀲𑁄𑀢𑀺 𑀬𑁄𑀚𑀦𑀸. 𑀢𑀁 𑀧𑀦𑀸𑀢𑀺 𑀧𑀓𑁆𑀔𑀫𑀸𑀦𑀢𑁆𑀢𑀁 𑀧𑀦. ‘‘𑀅𑀟𑁆𑀠𑀫𑀸𑀲𑀫𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀧𑀓𑁆𑀔𑀫𑁂𑀯 𑀤𑀸𑀢𑀩𑁆𑀩𑀁 𑀫𑀸𑀦𑀢𑁆𑀢𑀁 𑀧𑀓𑁆𑀔𑀫𑀸𑀦𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑀁 𑀧𑀦𑀸𑀢𑀺 𑀧𑀓𑁆𑀔𑀫𑀸𑀦𑀢𑁆𑀢𑀁 𑀧𑀦, 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑁄 𑀲𑀻𑀫𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀳𑀸𑀭𑀲𑀻𑀫𑀁, 𑀫𑀳𑀸𑀲𑀻𑀫𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀥𑁂𑀢𑁆𑀯𑀸𑀢𑀺 𑀲𑀩𑁆𑀩𑀸𑀲𑀁 𑀳𑀢𑁆𑀣𑀧𑀸𑀲𑀦𑀬𑀦𑀯𑀲𑁂𑀦, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀦𑀬𑀦𑀯𑀲𑁂𑀦, 𑀲𑀻𑀫𑀢𑁄 𑀩𑀳𑀺𑀓𑀭𑀡𑀯𑀲𑁂𑀦 𑀘 𑀲𑁄𑀥𑁂𑀢𑁆𑀯𑀸. 𑀘𑀢𑀼𑀯𑀕𑁆𑀕𑀕𑀡𑀦𑁆𑀢𑀺 𑀘𑀢𑀼𑀯𑀕𑁆𑀕𑀲𑀗𑁆𑀖𑀁. 𑀕𑀡𑁄𑀢𑀺 𑀘𑁂𑀢𑁆𑀣 𑀲𑀗𑁆𑀖𑁄𑀬𑁂𑀯𑀸𑀥𑀺𑀧𑁆𑀧𑁂𑀢𑁄.
𑀢𑀢𑁆𑀭𑀸𑀢𑀺 ‘‘𑀬𑁄𑀚𑀦𑀸 𑀓𑀸𑀢𑀩𑁆𑀩𑀸’’𑀢𑀺 𑀯𑀘𑀦𑁂. 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀦𑁆𑀢𑀺 𑀉𑀧𑀸𑀬𑀫𑀢𑁆𑀢𑀤𑀲𑁆𑀲𑀦𑀁, 𑀆𑀤𑀺𑀫𑀢𑁆𑀢𑀤𑀲𑁆𑀲𑀦𑀁 𑀯𑀸. ‘‘𑀆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀧𑀤𑀁 ‘‘𑀏𑀯𑀫𑀲𑁆𑀲 𑀯𑀘𑀦𑀻𑀬𑁄’’𑀢𑀺 𑀧𑀤𑁂 𑀓𑀢𑁆𑀢𑀸, ‘‘𑀬𑀸𑀘𑀸𑀧𑁂𑀢𑁆𑀯𑀸’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. ‘‘𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀧𑀤𑀁 ‘‘𑀜𑀸𑀧𑁂𑀢𑀩𑁆𑀩𑁄’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀢𑁆𑀢𑀸, ‘‘𑀲𑀗𑁆𑀖𑁄’’𑀢𑀺 𑀧𑀤𑀁 𑀢𑀢𑁆𑀣𑁂𑀯 𑀓𑀸𑀭𑀺𑀢𑀓𑀫𑁆𑀫𑀁. ‘‘𑀏𑀢𑀁 𑀓𑀸𑀭𑀡’’𑀦𑁆𑀢𑀺 𑀥𑀸𑀢𑀼𑀓𑀫𑁆𑀫𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀢𑀩𑁆𑀩𑀧𑀘𑁆𑀘𑀬𑁂𑀦 𑀓𑀸𑀭𑀺𑀢𑀓𑀫𑁆𑀫𑀫𑁂𑀯 𑀯𑀼𑀢𑁆𑀢𑀁. 𑀜𑀸𑀧𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀡𑀸𑀢𑀼 𑀫𑁂’’𑀢𑀺𑀆𑀤𑀺.
𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀦𑁆𑀢𑀺 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀢𑀢𑁆𑀣𑁂𑀯𑀸𑀢𑀺 𑀫𑀸𑀴𑀓𑀲𑀻𑀫𑀸𑀬𑀫𑁂𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀅𑀲𑁆𑀲𑀸𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀸 𑀓𑀢𑁆𑀢𑀩𑁆𑀩𑀯𑀺𑀦𑀬𑀓𑀫𑁆𑀫𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀦𑁄𑀢𑀺 𑀅𑀫𑁆𑀳𑀸𑀓𑀁, 𑀲𑀦𑁆𑀢𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀽𑀳𑀺 𑀧𑀓𑀢𑀢𑁆𑀢𑀪𑀺𑀓𑁆𑀔𑀼𑀦𑀻𑀳𑀺 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀸𑀫𑀽𑀧𑀘𑀸𑀭𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀇𑀤𑀁 𑀪𑀺𑀓𑁆𑀔𑀼𑀦𑀻𑀯𑀺𑀳𑀸𑀭𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀽𑀧𑀘𑀸𑀭𑀢𑁄𑀧𑀻𑀢𑀺 𑀪𑀺𑀓𑁆𑀔𑀼𑀯𑀺𑀳𑀸𑀭𑀽𑀧𑀘𑀸𑀭𑀢𑁄𑀧𑀺. 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁. 𑀓𑀼𑀭𑀼𑀦𑁆𑀤𑀺𑀫𑀳𑀸𑀧𑀘𑁆𑀘𑀭𑀻𑀲𑀼 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀳𑀸𑀭𑀲𑁆𑀲 𑀘𑀸𑀢𑀺 𑀪𑀺𑀓𑁆𑀔𑀼𑀯𑀺𑀳𑀸𑀭𑀲𑁆𑀲 𑀘. 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸 𑀕𑀸𑀫𑀽𑀧𑀘𑀸𑀭𑁂𑀧𑀺 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.
𑀢𑀢𑁆𑀣𑁂𑀯𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑁂𑀬𑁂𑀯. 𑀞𑀸𑀦𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀞𑀸𑀦𑀁. 𑀏𑀢𑀻𑀢𑀺 𑀆𑀕𑀘𑁆𑀙𑀢𑀺. 𑀧𑀕𑁂𑀯𑀸𑀢𑀺 𑀧𑀸𑀢𑁄𑀬𑁂𑀯. 𑀢𑀸𑀬𑀸𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀦𑀺𑀬𑀸.
𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀸𑀬 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀚𑀸𑀦𑀦𑀧𑀘𑁆𑀘𑀬𑀸𑀢𑀺 𑀅𑀚𑀸𑀦𑀦𑀓𑀸𑀭𑀡𑀸. 𑀢𑀦𑁆𑀢𑀺 𑀯𑀘𑀦𑀁. 𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀸𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀆𑀕𑀦𑁆𑀢𑀼𑀓𑀯𑀢𑁆𑀢𑀧𑀽𑀭𑀡𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀼𑀢𑁆𑀢𑀢𑀭𑀁 𑀤𑀺𑀲𑁆𑀲𑀢𑀻𑀢𑀺 𑀬𑀼𑀢𑁆𑀢𑀢𑀭𑀁 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀪𑀺𑀓𑁆𑀔𑀼𑀦𑀸 𑀯𑀺𑀬 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀕𑀢𑀸𑀦𑀁𑀬𑁂𑀯 𑀆𑀭𑁄𑀘𑁂𑀢𑀩𑁆𑀩𑀁, 𑀦 𑀕𑀸𑀫𑁂 𑀞𑀺𑀢𑀸𑀦𑀫𑁆𑀧𑀺 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀺. 𑀉𑀧𑁄𑀲𑀣𑁂𑀢𑀺 𑀉𑀧𑁄𑀲𑀣𑀤𑀺𑀯𑀲𑁂. 𑀏𑀲𑁂𑀯 𑀦𑀬𑁄 𑀧𑀯𑀸𑀭𑀡𑀸𑀬𑀧𑀺. 𑀤𑁂𑀯𑀲𑀺𑀓𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂. 𑀢𑀲𑁆𑀫𑀺𑀁 𑀕𑀸𑀫𑁂𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑀦𑀕𑀸𑀫𑁂. 𑀅𑀜𑁆𑀜𑀢𑁆𑀭𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑀦𑀕𑀸𑀫𑀢𑁄 𑀅𑀜𑁆𑀜𑀲𑁆𑀫𑀺𑀁 𑀕𑀸𑀫𑁂. 𑀢𑀢𑁆𑀭𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑀦𑀕𑀸𑀫𑀁. 𑀤𑀲𑁆𑀲𑁂𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲𑁆𑀲𑁂𑀢𑁆𑀯𑀸. 𑀢𑀸𑀬𑀸𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀦𑀺𑀬𑀸. 𑀯𑀺𑀳𑀸𑀭𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑀁. 𑀉𑀧𑀘𑀸𑀭𑀲𑀻𑀫𑀸𑀬𑀸𑀢𑀺 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀦𑁆𑀢𑀺 𑀫𑀸𑀦𑀢𑁆𑀢𑀘𑀸𑀭𑀺𑀦𑀻.
𑀯𑀻𑀲𑀢𑀺 𑀕𑀡𑁄 𑀇𑀫𑀲𑁆𑀲𑀸𑀢𑀺 𑀯𑀻𑀲𑀢𑀺𑀕𑀡𑁄, 𑀲𑀗𑁆𑀖𑁄, 𑀢𑀲𑁆𑀫𑀺𑀁. 𑀫𑀸𑀦𑀢𑁆𑀢𑀁 𑀘𑀭𑀫𑀸𑀦𑀸 𑀪𑀺𑀓𑁆𑀔𑀼𑀦𑀻𑀢𑀺 𑀬𑁄𑀚𑀦𑀸. 𑀇𑀤𑀁 𑀧𑀓𑁆𑀔𑀫𑀸𑀦𑀢𑁆𑀢𑀁 𑀦𑀸𑀫𑀸𑀢𑀺 𑀇𑀤𑀁 𑀧𑀼𑀩𑁆𑀩𑀯𑀘𑀦𑀲𑁆𑀲 𑀦𑀺𑀕𑀫𑀯𑀲𑁂𑀦 𑀧𑀭𑀯𑀘𑀦𑀲𑁆𑀲 𑀓𑀣𑀦𑀢𑁆𑀣𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.
𑀢𑀢𑁆𑀣𑀸𑀢𑀺 𑀢𑀺𑀯𑀺𑀥𑁂𑀲𑀼 𑀫𑀸𑀦𑀢𑁆𑀢𑁂𑀲𑀼. 𑀬𑀤𑁂𑀢𑀁 𑀫𑀸𑀦𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁. 𑀧𑀭𑀺𑀯𑀸𑀲𑀁 𑀧𑀭𑀺𑀯𑀲𑀦𑁆𑀢𑀲𑁆𑀲 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀺𑀢𑀲𑁆𑀲 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 𑀆𑀧𑀚𑁆𑀚𑀦𑀢𑁄. 𑀇𑀤𑀦𑁆𑀢𑀺 𑀫𑀸𑀦𑀢𑁆𑀢𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀑𑀥𑀸𑀦𑀲𑀫𑁄𑀥𑀸𑀦𑀦𑁆𑀢𑀺 𑀏𑀢𑁆𑀣 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀫𑁆𑀧𑀻𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀯𑀘𑀦𑀫𑁆𑀧𑀺.
𑀢𑀦𑁆𑀢𑀺 𑀅𑀕𑁆𑀖𑀲𑀫𑁄𑀥𑀸𑀦𑀫𑀺𑀲𑁆𑀲𑀓𑀲𑀫𑁄𑀥𑀸𑀦𑀁, 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑀧𑀭𑀺𑀫𑀸𑀡𑁂𑀦 𑀯𑀘𑀦𑀓𑁆𑀓𑀫𑁂𑀦, ‘‘𑀅𑀬𑀜𑁆𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄 𑀧𑀭𑀺𑀯𑀸𑀲𑁄 𑀦𑀸𑀫𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀯𑀘𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀁, 𑀢𑀸𑀯 𑀯𑀘𑀦𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀢𑁂𑀦 𑀳𑀺 𑀪𑀺𑀓𑁆𑀔𑀯𑁂…𑀧𑁂… 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀣𑀢𑁄’’𑀢𑀺 𑀇𑀫𑀺𑀦𑀸 𑀲𑀤𑁆𑀤𑁄𑀧𑀺 𑀕𑀳𑁂𑀢𑀩𑁆𑀩𑁄 𑀅𑀯𑀺𑀦𑀸𑀪𑀸𑀯𑀢𑁄.
𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀓𑀣𑀸
𑁧𑁦𑁨. 𑀬𑀸 𑀧𑀸𑀴𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.
𑁧𑁦𑁮. 𑀢𑀢𑁄𑀢𑀺 𑀧𑀸𑀴𑀺𑀢𑁄. 𑀢𑀁 𑀆𑀧𑀢𑁆𑀢𑀺𑀦𑁆𑀢𑀺 𑀢𑀁 𑀅𑀦𑁆𑀢𑀭𑀸𑀧𑀢𑁆𑀢𑀺𑀁. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄, 𑀳𑀼𑀢𑁆𑀯𑀸𑀢𑀺 𑀯𑀸. 𑀲𑁄𑀢𑀺 𑀪𑀺𑀓𑁆𑀔𑀼, 𑀞𑀺𑀢𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸𑀢𑀺 𑀢𑀲𑁆𑀲𑀸 𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑀸. 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀻𑀢𑀺 𑀅𑀦𑁆𑀢𑀭𑀸𑀧𑀢𑁆𑀢𑀺𑀧𑀺 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑁂𑀧𑀺. 𑀫𑀓𑁆𑀔𑀺𑀢𑀸𑀢𑀺 𑀧𑀺𑀲𑀺𑀢𑀸, 𑀥𑀁𑀲𑀺𑀢𑀸 𑀯𑀸. 𑀫𑀓𑁆𑀔𑀺𑀬𑀦𑁆𑀢𑀺 𑀧𑀺𑀲𑀺𑀬𑀦𑁆𑀢𑀺, 𑀥𑀁𑀲𑀺𑀬𑀦𑁆𑀢𑀻𑀢𑀺 𑀯𑀸 𑀫𑀓𑁆𑀔𑀺𑀢𑀸, 𑀧𑀭𑀺𑀯𑀼𑀢𑁆𑀣𑀤𑀺𑀯𑀲𑀸. 𑀢𑀢𑁄𑀢𑀺 𑀧𑀸𑀴𑀺𑀢𑁄 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀧𑀝𑀺𑀘𑁆𑀙𑀦𑁆𑀦𑀯𑀸𑀭𑁂 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.
𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸
𑁧𑁨𑁫. 𑀢𑀢𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀯𑀸𑀭𑀢𑁄, 𑀧𑀭𑀁 𑀤𑀲𑁆𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘𑀸𑀢𑀺 𑀏𑀢𑀲𑁆𑀫𑀺𑀁 𑀯𑀸𑀭𑁂 𑀘. 𑀬𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑀸𑀭𑀡𑀸, 𑀬𑁂𑀦 𑀓𑀸𑀭𑀡𑁂𑀦 𑀯𑀸. 𑀢𑁂𑀦𑁂𑀯𑀸𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦, 𑀢𑀲𑁆𑀫𑀸 𑀓𑀸𑀭𑀡𑀸 𑀯𑀸, ‘‘𑀫𑀽𑀮𑀸𑀬…𑀧𑁂… 𑀤𑁂𑀢𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸 𑀲𑀩𑁆𑀩𑁂 𑀫𑀓𑁆𑀔𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀯𑀸𑀭𑀢𑁄 𑀧𑀭𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.
𑀅𑀕𑁆𑀖𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑀓𑀣𑀸
𑁧𑁩𑁪. 𑀢𑀢𑁄𑀢𑀺 𑀯𑀸𑀭𑀢𑁄 𑀧𑀭𑀁 𑀤𑀲𑁆𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀯𑀸𑀭𑀢𑁄 𑀧𑀭𑀁 𑀧𑀸𑀴𑀺 𑀞𑀧𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀚𑁆𑀚𑀺𑀥𑀫𑁆𑀫𑁂 𑀯𑀸 𑀉𑀧𑁆𑀧𑀦𑁆𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀓𑀫𑁆𑀫𑀁. 𑀢𑀢𑁄𑀢𑀺 𑀯𑀸𑀭𑀢𑁄 𑀧𑀭𑀁 𑀢𑀣𑁂𑀯 𑀧𑀸𑀴𑀺 𑀞𑀧𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.
𑁧𑁩𑁮. 𑀢𑀢𑁄𑀢𑀺 𑀯𑀸𑀭𑀢𑁄 𑀧𑀭𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀸𑀴𑀺 𑀞𑀧𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.
𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑀸𑀤𑀺𑀓𑀣𑀸
𑁧𑁫𑁬. 𑀢𑀢𑁄𑀢𑀺 𑀯𑀸𑀭𑀢𑁄 𑀧𑀭𑀁 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀤𑀲𑁆𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.
𑁧𑁬𑁦. 𑀢𑀢𑁄𑀢𑀺 𑀧𑀸𑀴𑀺𑀢𑁄 𑀧𑀭𑀁 𑀧𑀸𑀴𑀺 𑀞𑀧𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.
𑁧𑁬𑁫. 𑀢𑀢𑁆𑀣𑀸𑀢𑀺 𑀧𑀸𑀴𑀺𑀬𑀁. 𑀅𑀦𑁆𑀢𑀭𑀸…𑀧𑁂… 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀬𑁄𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.
𑁧𑁬𑁬. 𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀲𑁆𑀲 𑀪𑁂𑀤𑀪𑀸𑀯𑀢𑁄 𑀓𑀺𑀁 ‘‘𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀓𑁄𑀯 𑀲𑁄 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁄’’𑀢𑀺. 𑀅𑀣 𑀓𑀲𑁆𑀫𑀸 ‘‘𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀘𑁆𑀙𑀸 𑀙𑀸𑀤𑀺𑀢𑀢𑁆𑀢𑀸 𑀧𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀧𑀦𑀲𑀤𑁆𑀤𑁄 𑀕𑀭𑀳𑀢𑁆𑀣𑀯𑀸𑀘𑀓𑁄, 𑀢𑀣𑀸𑀧𑀻𑀢𑀺 𑀳𑀺 𑀅𑀢𑁆𑀣𑁄. 𑀏𑀓𑁄𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑀧𑀘𑁆𑀙𑀸 𑀙𑀸𑀤𑀺𑀢𑀢𑁆𑀢𑀸 𑀧𑀘𑁆𑀙𑀺𑀫𑀲𑁆𑀫𑀺𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.
𑁧𑁮𑁦. ‘‘𑀯𑀯𑀢𑁆𑀣𑀺𑀢𑀸 𑀲𑀫𑁆𑀪𑀺𑀦𑁆𑀦𑀸’’𑀢𑀺 𑀏𑀢𑀁 𑀯𑀘𑀦𑀦𑁆𑀢𑀺 𑀬𑁄𑀚𑀦𑀸.
𑁮. 𑀤𑁆𑀯𑁂𑀪𑀺𑀓𑁆𑀔𑀼𑀯𑀸𑀭𑀏𑀓𑀸𑀤𑀲𑀓𑀸𑀤𑀺𑀓𑀣𑀸
𑁧𑁮𑁧. 𑀢𑀢𑁄𑀢𑀺 𑀧𑀸𑀴𑀺𑀢𑁄 𑀧𑀭𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀧𑀸𑀴𑀺𑀬𑀁. 𑀫𑀺𑀲𑁆𑀲𑀓𑀦𑁆𑀢𑀺 𑀏𑀢𑁆𑀣 𑀓𑁂𑀳𑀺 𑀫𑀺𑀲𑁆𑀲𑀓𑀦𑁆𑀢𑀺 𑀆𑀳 ‘‘𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀳𑀺 𑀫𑀺𑀲𑁆𑀲𑀓’’𑀦𑁆𑀢𑀺.
𑁧𑁮𑁪. 𑀢𑀢𑁄𑀢𑀺 𑀧𑀸𑀴𑀺𑀢𑁄 𑀧𑀭𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀞𑁂. 𑀢𑀜𑁆𑀘𑀸𑀢𑀺 ‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀜𑁆𑀘 𑀇𑀢𑁄 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑀁 𑀲𑀩𑁆𑀩𑀁 𑀯𑀘𑀦𑀜𑁆𑀘𑀸𑀢𑀺 𑀬𑁄𑀚𑀦𑀸.
𑀇𑀢𑀺 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.
𑁪. 𑀲𑀫𑀣𑀓𑁆𑀔𑀦𑁆𑀥𑀓𑀁
𑁧. 𑀲𑀫𑁆𑀫𑀼𑀔𑀸𑀯𑀺𑀦𑀬𑀓𑀣𑀸
𑁧𑁮𑁬-𑁭. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀙 𑀫𑀸𑀢𑀺𑀓𑀸𑀧𑀤𑀸𑀦𑀻𑀢𑀺 𑀯𑀸𑀓𑁆𑀬𑀫𑁆𑀧𑀺 𑀲𑀫𑀸𑀲𑁄𑀧𑀺 𑀬𑀼𑀢𑁆𑀢𑁄𑀬𑁂𑀯. 𑀢𑀢𑁆𑀣 𑀲𑀫𑀸𑀲𑁄 𑀧𑀦 𑀅𑀲𑀫𑀸𑀳𑀸𑀭𑀤𑀺𑀕𑀼𑀬𑁂𑀯. ‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀧𑀤𑀁 ‘‘𑀯𑀼𑀢𑁆𑀢𑁄’’𑀢𑀺 𑀧𑀤𑁂 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀢𑀼𑀮𑁆𑀬𑀢𑁆𑀣𑁄 𑀯𑀸. 𑀯𑀺𑀢𑁆𑀣𑀸𑀭𑁄𑀢𑀺 𑀯𑀺𑀪𑀗𑁆𑀕𑁄. 𑀢𑀢𑁆𑀣𑀸𑀢𑀺 𑀯𑀺𑀪𑀗𑁆𑀕𑁂. 𑀲𑀜𑁆𑀜𑀸𑀧𑁂𑀢𑀻𑀢𑀺 𑀏𑀢𑁆𑀣 𑀲𑀜𑁆𑀜𑀁 𑀓𑀢𑁆𑀯𑀸 𑀚𑀸𑀦𑀸𑀧𑁂𑀢𑀻𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀧𑀭𑀺𑀢𑁄𑀲𑁂𑀢𑁆𑀯𑀸 𑀚𑀸𑀦𑀸𑀧𑁂𑀢𑀻’’𑀢𑀺. 𑀇𑀫𑀺𑀦𑀸 𑀲𑀁𑀧𑀼𑀩𑁆𑀩𑁄 𑀜𑀸𑀥𑀸𑀢𑀼 𑀧𑀭𑀺𑀢𑁄𑀲𑀦𑀢𑁆𑀣𑀁 𑀅𑀦𑁆𑀢𑁄𑀓𑀢𑁆𑀯𑀸 𑀅𑀯𑀩𑁄𑀥𑀦𑀢𑁆𑀣𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀭𑀡𑀧𑀢𑀺𑀭𑀽𑀧𑀓𑀸𑀦𑀻𑀢𑀺 𑀓𑀸𑀭𑀡𑀲𑁆𑀲 𑀧𑀝𑀺𑀪𑀸𑀕𑀸𑀦𑀺. 𑀦𑀺𑀚𑁆𑀛𑀸𑀧𑁂𑀢𑀻𑀢𑀺 𑀏𑀢𑁆𑀣 𑀛𑁂𑀥𑀸𑀢𑀼 𑀑𑀮𑁄𑀓𑀦𑀢𑁆𑀣𑁄𑀢𑀺 𑀆𑀳 ‘‘𑀑𑀮𑁄𑀓𑁂𑀢𑀻’’𑀢𑀺. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦, 𑀓𑀭𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀥𑀫𑁆𑀫𑀯𑀸𑀤𑀻. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀧𑁂𑀓𑁆𑀔𑀢𑀻𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀦 𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀧𑁂𑀓𑁆𑀔𑀢𑀺 𑀅𑀦𑀼𑀧𑁂𑀓𑁆𑀔𑀢𑀻𑀢𑀺 𑀏𑀢𑁆𑀣 𑀇𑀓𑁆𑀔𑀥𑀸𑀢𑀼 ‘‘𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀻’’𑀢𑀺 𑀏𑀢𑁆𑀣 𑀤𑀺𑀲𑀥𑀸𑀢𑀼𑀬𑀸 𑀲𑀤𑀺𑀲𑀢𑁆𑀣𑁄𑀢𑀺 𑀆𑀳 ‘‘𑀤𑀲𑁆𑀲𑁂𑀢𑀺…𑀧𑁂… 𑀧𑀭𑀺𑀬𑀸𑀬𑀯𑀘𑀦𑀸𑀦𑀻’’𑀢𑀺. 𑀢𑁂𑀲𑀜𑁆𑀜𑁂𑀯𑀸𑀢𑀺 ‘‘𑀧𑁂𑀓𑁆𑀔𑀢𑀺 𑀅𑀦𑀼𑀧𑁂𑀓𑁆𑀔𑀢𑀻’’𑀢𑀺 𑀧𑀤𑀸𑀦𑀜𑁆𑀜𑁂𑀯. 𑀧𑀭𑀺𑀬𑀸𑀬𑀯𑀘𑀦𑀸𑀦𑀻𑀢𑀺 𑀯𑁂𑀯𑀘𑀦𑀲𑀤𑁆𑀤𑀸 𑀅𑀢𑁆𑀣𑁂 𑀧𑀭𑀺𑀩𑁆𑀬𑀢𑁆𑀢𑀺𑀁 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀇𑀫𑁂𑀳𑀻𑀢𑀺 𑀧𑀭𑀺𑀬𑀸𑀬𑀸𑀦𑀺, 𑀢𑀸𑀦𑀺𑀬𑁂𑀯 𑀯𑀘𑀦𑀸𑀦𑀺 𑀧𑀭𑀺𑀬𑀸𑀬𑀯𑀘𑀦𑀸𑀦𑀺. 𑀲𑁄𑀢𑀺 𑀅𑀥𑀫𑁆𑀫𑀯𑀸𑀤𑀻. 𑀫𑁄𑀳𑁂𑀢𑁆𑀯𑀸𑀢𑀺 𑀥𑀫𑁆𑀫𑀯𑀸𑀤𑀻𑀧𑀼𑀕𑁆𑀕𑀮𑀸𑀤𑀺𑀁 𑀫𑁄𑀳𑀸𑀧𑁂𑀢𑁆𑀯𑀸.
𑁧𑁮𑁮. 𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑁄𑀳𑁂𑀢𑁆𑀯𑀸𑀢𑀺 𑀅𑀥𑀫𑁆𑀫𑀯𑀸𑀤𑀻𑀧𑀼𑀕𑁆𑀕𑀮𑀸𑀤𑀺𑀁 𑀅𑀫𑁄𑀳𑀸𑀧𑁂𑀢𑁆𑀯𑀸, 𑀅𑀯𑀺𑀧𑀭𑀻𑀢𑀁 𑀚𑀸𑀦𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.
𑁨. 𑀲𑀢𑀺𑀯𑀺𑀦𑀬𑀓𑀣𑀸
𑁧𑁯𑁫. 𑀧𑀭𑀫𑁆𑀫𑀼𑀔𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀦𑀬𑁄, 𑀧𑀭𑀫𑁆𑀫𑀼𑀔𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄, 𑀯𑀺𑀦𑀬𑀓𑀫𑁆𑀫𑀁. 𑀲𑀗𑁆𑀖𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀸𑀦𑀁 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄. 𑀧𑀜𑁆𑀘𑀺𑀫𑀸𑀦𑀻𑀢𑀺 𑀏𑀢𑁆𑀣 𑀧𑀜𑁆𑀘𑀦𑁆𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀤𑁆𑀥𑀲𑁆𑀲𑀸’’𑀢𑀺𑀆𑀤𑀺. 𑀅𑀦𑀼𑀯𑀤𑀺𑀢𑀲𑁆𑀲 𑀤𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀸𑀦𑀻𑀢𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺. ‘‘𑀏𑀓𑁂𑀓𑀅𑀗𑁆𑀕𑀯𑀲𑁂𑀦 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀼𑀤𑀸𑀬𑀯𑀸𑀓𑁆𑀬𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄 𑀧𑀜𑁆𑀘𑀗𑁆𑀕𑀯𑀲𑁂𑀦𑁂𑀯 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 ‘‘𑀧𑀜𑁆𑀘𑀺𑀫𑀸𑀦𑀻’’𑀢𑀺 𑀏𑀢𑀁 𑀯𑀘𑀦𑀁 𑀤𑁂𑀲𑀦𑀸𑀫𑀢𑁆𑀢𑀫𑁂𑀯, 𑀦 𑀅𑀯𑀬𑀯𑀯𑀸𑀓𑁆𑀬𑀦𑀺𑀩𑁆𑀩𑀢𑁆𑀢𑀺𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀦𑁆𑀢𑀺 𑀪𑀽𑀢𑀁. 𑀏𑀢𑁆𑀣𑀸𑀢𑀺 ‘‘𑀧𑀜𑁆𑀘𑀺𑀫𑀸𑀦𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑁂. 𑀢𑀢𑁆𑀣 𑀘𑀸𑀢𑀺 ‘‘𑀧𑀜𑁆𑀘𑀺𑀫𑀸𑀦𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑁂 𑀘. 𑀅𑀦𑀼𑀯𑀤𑀦𑁆𑀢𑀻𑀢𑀺 𑀏𑀢𑁆𑀣 𑀅𑀦𑀼𑀤𑁆𑀥𑀁𑀲𑀦𑁂𑀦 𑀯𑀤𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑁄𑀤𑁂𑀦𑁆𑀢𑀻’’𑀢𑀺. 𑀅𑀬𑀁 𑀧𑀦 𑀲𑀢𑀺𑀯𑀺𑀦𑀬𑁄 𑀤𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀕𑀸𑀫𑀺𑀦𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀲𑀓𑀤𑀸𑀕𑀸𑀫𑀺𑀆𑀤𑀺𑀓𑁂 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀘 𑀔𑁄𑀢𑀺 𑀲𑀢𑀺𑀯𑀺𑀦𑀬𑁄 𑀘. 𑀘𑁄𑀤𑀺𑀬𑀫𑀸𑀦𑁂𑀬𑁂𑀯𑀸𑀢𑀺 𑀘𑁄𑀤𑀺𑀬𑀫𑀸𑀦𑀲𑁆𑀲𑁂𑀯, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀲𑁆𑀫𑀺𑀦𑁆𑀢𑀺 𑀲𑀢𑀺𑀯𑀺𑀦𑀬𑀲𑁆𑀫𑀺𑀁 𑀤𑀺𑀦𑁆𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁄𑀤𑀺𑀢𑀢𑁆𑀢𑀸 𑀓𑀣𑀸 𑀦 𑀭𑀽𑀳𑀢𑀻𑀢𑀺 𑀆𑀳 ‘‘𑀘𑁄𑀤𑁂𑀦𑁆𑀢𑁄𑀧𑀻’’𑀢𑀺𑀆𑀤𑀺. 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀓𑁄 𑀆𑀧𑀚𑁆𑀚𑀢𑀺. 𑀘𑁄𑀤𑀦𑀸𑀤𑀺𑀅𑀲𑀸𑀭𑀼𑀧𑁆𑀧𑁂 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄, 𑀯𑀺𑀦𑀬𑀓𑀫𑁆𑀫𑀁. 𑀲𑀢𑀺𑀯𑁂𑀧𑀼𑀮𑁆𑀮𑀧𑀢𑁆𑀢𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀲𑀢𑀺𑀯𑀺𑀦𑀬𑁄.
𑁩. 𑀅𑀫𑀽𑀴𑁆𑀳𑀯𑀺𑀦𑀬𑀓𑀣𑀸
𑁧𑁯𑁬. 𑀪𑀸𑀲𑀺𑀢𑀧𑀭𑀺𑀓𑀦𑁆𑀢𑀦𑁆𑀢𑀺 𑀏𑀢𑁆𑀣 𑀪𑀸𑀲𑀺𑀢𑀧𑀭𑀺𑀓𑀦𑁆𑀢𑀲𑀤𑁆𑀤𑀸𑀦𑀁 𑀓𑀭𑀡𑀸𑀧𑁂𑀓𑁆𑀔𑀢𑁆𑀢𑀸 𑀯𑀺𑀲𑀼𑀁 𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀸𑀘𑀸𑀬 𑀪𑀸𑀲𑀺𑀢𑀁, 𑀓𑀸𑀬𑁂𑀦 𑀧𑀭𑀺𑀓𑀦𑁆𑀢’’𑀦𑁆𑀢𑀺. ‘‘𑀧𑀭𑀺𑀓𑁆𑀓𑀫𑁂𑀢𑁆𑀯𑀸 𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀓𑀫𑀢𑀻𑀢𑀺 𑀧𑀭𑀺𑀓𑀦𑁆𑀢𑀁, 𑀧𑀭𑀺𑀓𑀦𑁆𑀢𑀁 𑀳𑀼𑀢𑁆𑀯𑀸 𑀓𑀢𑀁 𑀧𑀭𑀺𑀓𑀦𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀓𑁆𑀓𑀫𑁂𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀭𑀢𑀸𑀬𑀲𑁆𑀫𑀸𑀢𑀺 𑀏𑀢𑁆𑀣 𑀉𑀓𑀸𑀭𑀮𑁄𑀧𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀭𑀢𑀼 𑀆𑀬𑀲𑁆𑀫𑀸’’𑀢𑀺. ‘‘𑀏𑀯𑀭𑀽𑀧𑀺𑀬𑀸 𑀆𑀧𑀢𑁆𑀢𑀺𑀬𑀸’’𑀢𑀺 𑀇𑀫𑀺𑀦𑀸 𑀆𑀧𑀚𑁆𑀚𑀺𑀢𑀸𑀢𑀺 𑀏𑀢𑁆𑀣 𑀢𑀼𑀧𑀘𑁆𑀘𑀬𑀬𑁄𑀕𑀪𑀸𑀯𑀢𑁄 𑀓𑀫𑁆𑀫𑀢𑁆𑀣𑀙𑀝𑁆𑀞𑀺𑀬𑀸𑀧𑀺 𑀲𑀫𑁆𑀪𑀯𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀼𑀧𑀘𑁆𑀘𑀬𑀬𑁄𑀕𑁂 𑀓𑀫𑁆𑀫𑀢𑁆𑀣𑀙𑀝𑁆𑀞𑀻 𑀅𑀦𑀺𑀘𑁆𑀘𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀏𑀯𑀭𑀽𑀧𑀺𑀬𑀸 𑀆𑀧𑀢𑁆𑀢𑀺𑀬𑀸’’𑀢𑀺 𑀓𑀫𑁆𑀫𑀢𑁆𑀣𑀙𑀝𑁆𑀞𑀻𑀪𑀸𑀯𑁂𑀦 𑀅𑀯𑀢𑁆𑀯𑀸 ‘‘𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀓𑀫𑁆𑀫𑀢𑁆𑀣𑀤𑀼𑀢𑀺𑀬𑀸𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲𑀸𑀢𑀺 ‘‘𑀆𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀧𑀸𑀞𑀲𑁆𑀲. ‘‘𑀧𑀞𑀫𑀁 𑀧𑀘𑁆𑀙𑀸’’𑀢𑀺 𑀧𑀤𑁂𑀳𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑁄𑀤𑀓𑀲𑁆𑀲 𑀓𑀣𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀦𑀬𑁄, 𑀘𑁄𑀤𑀓𑀲𑁆𑀲 𑀓𑀣𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄. 𑀧𑀞𑀫𑀁 𑀫𑀽𑀴𑁆𑀳𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀧𑀘𑁆𑀙𑀸 𑀅𑀫𑀽𑀴𑁆𑀳𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄.
𑁪. 𑀧𑀝𑀺𑀜𑁆𑀜𑀸𑀢𑀓𑀭𑀡𑀓𑀣𑀸
𑁨𑁦𑁦. 𑀧𑀝𑀺𑀚𑀸𑀦𑀺𑀬𑀢𑁂, 𑀧𑀝𑀺𑀚𑀸𑀦𑀦𑀁 𑀯𑀸 𑀧𑀝𑀺𑀜𑁆𑀜𑀸, 𑀢𑀸𑀬 𑀓𑀸𑀭𑁂𑀢𑀩𑁆𑀩𑀁.
𑁫. 𑀬𑁂𑀪𑀼𑀬𑁆𑀬𑀲𑀺𑀓𑀸𑀓𑀣𑀸
𑁨𑁦𑁨. 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀏𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀸 𑀬𑁂𑀪𑀼𑀬𑁆𑀬𑀲𑀺𑀓𑀸, 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀲𑀫𑁆𑀧𑀸𑀤𑀺𑀓𑀸 𑀓𑀺𑀭𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲𑀸 𑀓𑀺𑀭𑀺𑀬𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲𑀸 𑀓𑀺𑀭𑀺𑀬𑀸𑀬𑀸𑀢𑀺 𑀬𑀲𑁆𑀲𑀸 𑀬𑁂𑀪𑀼𑀬𑁆𑀬𑀢𑀸𑀲𑀫𑁆𑀧𑀸𑀤𑀺𑀓𑀸𑀬 𑀓𑀺𑀭𑀺𑀬𑀸𑀬. 𑀏𑀲𑀸𑀢𑀺 𑀬𑁂𑀪𑀼𑀬𑁆𑀬𑀢𑀸𑀲𑀫𑁆𑀧𑀸𑀤𑀺𑀓𑀸 𑀓𑀺𑀭𑀺𑀬𑀸.
𑁨𑁦𑁪. 𑀑𑀭𑀫𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 𑀑𑀭𑀲𑀤𑁆𑀤𑁄 𑀘 𑀫𑀢𑁆𑀢𑀲𑀤𑁆𑀤𑁄 𑀘 𑀲𑀫𑀽𑀳𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀯𑀸𑀘𑀓𑁄 𑀅𑀧𑁆𑀧𑀫𑀢𑁆𑀢𑀯𑀸𑀘𑀓𑁄𑀢𑀺 𑀆𑀳 ‘‘𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑀓’’𑀦𑁆𑀢𑀺. ‘‘𑀪𑀡𑁆𑀟𑀦𑀫𑀢𑁆𑀢𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀦 𑀫𑀳𑀦𑁆𑀢𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀕𑀢𑀺𑀕𑀢𑀦𑁆𑀢𑀺 𑀏𑀢𑁆𑀣 𑀘𑀺𑀭𑀓𑀸𑀮𑀪𑀸𑀯𑀁 𑀦 𑀘 𑀕𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁆𑀯𑁂 𑀢𑀬𑁄…𑀧𑁂… 𑀅𑀯𑀺𑀦𑀺𑀘𑁆𑀙𑀺𑀢’’𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀚𑀸𑀢𑀆𑀯𑀸𑀲𑁂 𑀏𑀯, 𑀦 𑀘 𑀲𑀭𑀺𑀢𑀲𑀸𑀭𑀺𑀢𑀧𑀤𑀸𑀦𑀁 𑀲𑀼𑀤𑁆𑀥𑀓𑀸𑀭𑀺𑀢𑀓𑀺𑀭𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀬𑀁 𑀲𑀭𑀺𑀢𑀁 𑀯𑀸 𑀅𑀜𑁆𑀜𑁂𑀳𑀺 𑀲𑀸𑀭𑀺𑀢𑀁 𑀯𑀸 𑀦 𑀳𑁄𑀢𑀻’’𑀢𑀺. 𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀯𑀺𑀯𑀸𑀤𑀓𑀸𑀭𑀓𑁂𑀳𑀺 𑀪𑀺𑀓𑁆𑀔𑀽𑀳𑀺. ‘‘𑀲𑀮𑀸𑀓𑀁 𑀕𑀸𑀳𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸 ‘‘𑀚𑀸𑀦𑀸𑀢𑀻’’𑀢𑀺 𑀧𑀤𑀲𑁆𑀲 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀅𑀧𑀺 𑀦𑀸𑀫𑀸𑀢𑀺 𑀇𑀫𑀺𑀦𑀸 𑀅𑀧𑁆𑀧𑁂𑀯𑀦𑀸𑀫𑀲𑀤𑁆𑀤𑁄 𑀅𑀧𑀺𑀦𑀸𑀫𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀽𑀢𑀺 𑀪𑀯𑁂𑀬𑁆𑀬𑀼𑀁. 𑀇𑀫𑀺𑀦𑀸 ‘‘𑀧𑀸𑀴𑀺𑀬𑀁 𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸 𑀪𑀯𑁂𑀬𑁆𑀬𑀼𑀁, 𑀅𑀧𑁆𑀧𑁂𑀯 𑀦𑀸𑀫 𑀲𑀸𑀥𑀽’’𑀢𑀺 𑀬𑁄𑀚𑀦𑀸𑀦𑀬𑀁 𑀤𑀲𑁆𑀲𑁂𑀢𑀺. ‘‘𑀅𑀬𑀫𑀲𑁆𑀲 𑀅𑀚𑁆𑀛𑀸𑀲𑀬𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀲𑀮𑀸𑀓𑀕𑀸𑀳𑀲𑁆𑀲. 𑀤𑁆𑀯𑀻𑀲𑀼𑀧𑀻𑀢𑀺 ‘‘𑀚𑀸𑀦𑀸𑀢𑀺 𑀲𑀗𑁆𑀖𑁄 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀗𑁆𑀖𑁄 𑀪𑀺𑀚𑁆𑀚𑁂𑀬𑁆𑀬𑀸’’𑀢𑀺 𑀘 𑀤𑁆𑀯𑀻𑀲𑀼𑀧𑀺 𑀧𑀤𑁂𑀲𑀼.
‘‘𑀅𑀥𑀫𑁆𑀫𑁂𑀦 𑀕𑀡𑁆𑀳𑀦𑁆𑀢𑀻’’𑀢𑀺 𑀏𑀢𑁆𑀣 ‘‘𑀕𑀡𑁆𑀳𑀦𑁆𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀲𑁆𑀲 𑀅𑀥𑀫𑁆𑀫𑀯𑀸𑀤𑀺𑀦𑁄 𑀏𑀯 𑀓𑀢𑁆𑀢𑀸 𑀦𑀸𑀫𑀸𑀢𑀺 𑀆𑀳 ‘‘𑀅𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺. ‘‘𑀤𑁆𑀯𑁂 𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺 𑀇𑀫𑀺𑀦𑀸 ‘‘𑀯𑀕𑁆𑀕𑀸 𑀕𑀡𑁆𑀳𑀦𑁆𑀢𑀻’’𑀢𑀺 𑀏𑀢𑁆𑀣 ‘‘𑀕𑀡𑁆𑀳𑀦𑁆𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀲𑁆𑀲 𑀥𑀫𑁆𑀫𑀯𑀸𑀤𑀺𑀦𑁄 𑀏𑀯 𑀓𑀢𑁆𑀢𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀬𑀣𑀸𑀤𑀺𑀝𑁆𑀞𑀺𑀬𑀸 𑀕𑀡𑁆𑀳𑀦𑁆𑀢𑀻𑀢𑀺 𑀏𑀢𑁆𑀣 𑀥𑀫𑁆𑀫𑀯𑀸𑀤𑀺𑀦𑁄 𑀳𑀼𑀢𑁆𑀯𑀸 𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀲𑁆𑀲 𑀕𑀳𑀡𑀁 𑀦 𑀘 𑀬𑀣𑀸𑀤𑀺𑀝𑁆𑀞𑀺𑀬𑀸 𑀕𑀡𑁆𑀳𑀦𑁆𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀥𑀫𑁆𑀫𑀯𑀸𑀤𑀺𑀦𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀧𑀝𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀇𑀫𑀫𑁂𑀯𑀢𑁆𑀣𑀁 𑀧𑀝𑀺𑀲𑁂𑀥𑁂𑀢𑁆𑀯𑀸. ‘‘𑀧𑀭𑀺𑀯𑀢𑁆𑀢𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀥𑀫𑁆𑀫𑀯𑀸𑀤𑀺𑀦𑁄. 𑀏𑀢𑁆𑀣𑀸𑀢𑀺 𑀲𑀫𑀣𑀓𑁆𑀔𑀦𑁆𑀥𑀓𑁂.
𑁬. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀣𑀸
𑁨𑁦𑁭. 𑀅𑀲𑀼𑀘𑀻𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀲𑀼𑀘𑀻𑀦𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀏𑀢𑀲𑁆𑀲𑀸𑀢𑀺 𑀅𑀲𑀼𑀘𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀼𑀘𑀻𑀳𑀺 𑀓𑀸𑀬𑀯𑀘𑀻𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀏𑀲𑁂𑀯 𑀦𑀬𑁄 𑀅𑀮𑀚𑁆𑀚𑀻𑀢𑀺 𑀏𑀢𑁆𑀣𑀸𑀧𑀺. 𑀲𑀸𑀦𑀼𑀯𑀸𑀤𑁄𑀢𑀺 𑀏𑀢𑁆𑀣 𑀅𑀦𑀼𑀯𑀸𑀤𑀉𑀧𑀯𑀸𑀤𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀉𑀧𑀯𑀸𑀤𑁄’’𑀢𑀺. 𑀇𑀢𑀺 𑀧𑀜𑁆𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀏𑀢𑁆𑀣𑀸𑀢𑀺 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑁂. 𑀇𑀤𑀦𑁆𑀢𑀺 𑀓𑀫𑁆𑀫𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀬𑁄 𑀧𑀼𑀕𑁆𑀕𑀮𑁄 𑀧𑀸𑀧𑀺𑀬𑁄𑀢𑀺 𑀬𑁄𑀚𑀦𑀸. 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬𑀸𑀢𑀺 𑀮𑀸𑀫𑀓𑀼𑀲𑁆𑀲𑀦𑁆𑀦𑀢𑀸𑀬. 𑀇𑀫𑀺𑀦𑀸 𑀅𑀬𑀜𑁆𑀘 𑀧𑀸𑀧𑁄 𑀅𑀬𑀜𑁆𑀘 𑀧𑀸𑀧𑁄, 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀧𑀸𑀧𑁄𑀢𑀺 𑀧𑀸𑀧𑀺𑀬𑁄𑀢𑀺 𑀘 𑀧𑀸𑀧𑀸𑀦𑀁 𑀅𑀢𑀺𑀲𑀬𑁂𑀦 𑀧𑀸𑀧𑁄𑀢𑀺 𑀧𑀸𑀧𑀺𑀬𑁄𑀢𑀺 𑀘 𑀯𑀘𑀦𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀲𑁆𑀲. 𑀇𑀫𑀺𑀦𑀸 𑀢𑀲𑁆𑀲 𑀧𑀸𑀧𑀺𑀬𑀲𑁆𑀲 𑀓𑀢𑁆𑀢𑀩𑁆𑀩𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀁, 𑀢𑀫𑁂𑀯 𑀓𑀫𑁆𑀫𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀬𑀓𑀸𑀭𑁂 𑀤𑁆𑀯𑁂𑀪𑀸𑀯𑁄 𑀅𑀢𑁆𑀣𑀺, 𑀲𑁄 𑀅𑀬𑀼𑀢𑁆𑀢𑁄𑀬𑁂𑀯. ‘‘𑀬𑁂𑀪𑀼𑀬𑁆𑀬𑀲𑀺𑀓𑀸’’𑀢𑀺 𑀏𑀢𑁆𑀣 𑀬𑀓𑀸𑀭𑁂 𑀤𑁆𑀯𑁂𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄 𑀏𑀢𑁆𑀣𑀸𑀧𑀺 𑀤𑁆𑀯𑁂𑀪𑀸𑀯𑁄 𑀬𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀢𑀺 𑀮𑀺𑀔𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.