𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀧𑀸𑀘𑀺𑀢𑁆𑀬𑀸𑀤𑀺𑀬𑁄𑀚𑀦𑀸

𑀧𑀸𑀘𑀺𑀢𑁆𑀢𑀺𑀬𑀬𑁄𑀚𑀦𑀸

𑀫𑀳𑀸𑀓𑀸𑀭𑀼𑀡𑀺𑀓𑀁 𑀦𑀸𑀣𑀁, 𑀅𑀪𑀺𑀦𑀢𑁆𑀯𑀸 𑀲𑀫𑀸𑀲𑀢𑁄;

𑀧𑀸𑀘𑀺𑀢𑁆𑀬𑀸𑀤𑀺𑀯𑀡𑁆𑀡𑀦𑀸𑀬, 𑀓𑀭𑀺𑀲𑁆𑀲𑀸𑀫𑀢𑁆𑀣𑀬𑁄𑀚𑀦𑀁.

𑁫. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀁

𑁧. 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑀔𑀼𑀤𑁆𑀤𑀓𑀸𑀦𑀦𑁆𑀢𑀺 𑀲𑀼𑀔𑀼𑀫𑀸𑀧𑀢𑁆𑀢𑀺𑀧𑀓𑀸𑀲𑀓𑀢𑁆𑀢𑀸 𑀅𑀧𑁆𑀧𑀓𑀸𑀦𑀁, 𑀕𑀡𑀦𑀢𑁄 𑀯𑀸 𑀧𑀘𑀼𑀭𑀢𑁆𑀢𑀸 𑀩𑀳𑀼𑀓𑀸𑀦𑀁. 𑀬𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑁂𑀲’’𑀦𑁆𑀢𑀺 𑀧𑀤𑀁 ‘‘𑀲𑀗𑁆𑀕𑀳𑁄’’𑀢𑀺 𑀧𑀤𑁂 𑀲𑀸𑀫𑁆𑀬𑀢𑁆𑀣𑀙𑀝𑁆𑀞𑀻. 𑀲𑀗𑁆𑀕𑀳𑀻𑀬𑀢𑁂 𑀲𑀗𑁆𑀕𑀳𑁄. ‘‘𑀦𑀯𑀳𑀺 𑀯𑀕𑁆𑀕𑁂𑀳𑀻’’𑀢𑀺𑀧𑀤𑀁 ‘‘𑀲𑀗𑁆𑀕𑀳𑁄, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀧𑀤𑀤𑁆𑀯𑀬𑁂 𑀓𑀭𑀡𑀁. 𑀤𑀸𑀦𑀻𑀢𑀺 𑀓𑀸𑀮𑀯𑀸𑀘𑀓𑁄 𑀲𑀢𑁆𑀢𑀫𑁆𑀬𑀦𑁆𑀢𑀦𑀺𑀧𑀸𑀢𑁄 𑀇𑀤𑀸𑀦𑀺-𑀧𑀭𑀺𑀬𑀸𑀬𑁄, 𑀇𑀫𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀔𑀼𑀤𑁆𑀤𑀓𑀸𑀦𑀁, 𑀅𑀬𑀁 𑀯𑀡𑁆𑀡𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀯𑀢𑀻𑀢𑀺 𑀏𑀢𑁆𑀣 𑀢𑀺-𑀲𑀤𑁆𑀤𑁄 𑀏𑀓𑀁𑀲𑀢𑁆𑀣𑁂 𑀅𑀦𑀸𑀕𑀢𑀓𑀸𑀮𑀺𑀓𑁄 𑀳𑁄𑀢𑀺 ‘‘𑀦𑀺𑀭𑀬𑀁 𑀦𑀽𑀦 𑀕𑀘𑁆𑀙𑀸𑀫𑀺, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁩𑁩𑁧) 𑀯𑀺𑀬. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀳𑀺 𑀬𑀣𑀸 𑀏𑀓𑀁𑀲𑀯𑀸𑀘𑀓𑁄 𑀦𑀽𑀦𑀲𑀤𑁆𑀤𑁄 𑀅𑀢𑁆𑀣𑀺, 𑀦 𑀏𑀯𑀁 ‘‘𑀪𑀯𑀢𑀻’’𑀢𑀺 𑀧𑀤𑁂, 𑀅𑀢𑁆𑀣𑀢𑁄 𑀧𑀦 𑀅𑀬𑀁 𑀯𑀡𑁆𑀡𑀦𑀸 𑀦𑀽𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀅𑀯𑀲𑁆𑀲𑀫𑁆𑀪𑀸𑀯𑀺𑀬𑀢𑁆𑀣𑁂 𑀅𑀦𑀸𑀕𑀢𑀓𑀸𑀮𑀯𑀸𑀘𑀓𑁄 𑀳𑁄𑀢𑀺 ‘‘𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀸𑀫𑀳’’𑀦𑁆𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁨.𑁧𑁦𑁯-𑁧𑁧𑁪) 𑀯𑀺𑀬. 𑀓𑀸𑀫𑀜𑁆𑀳𑁂𑀢𑁆𑀣 𑀬𑀣𑀸 𑀅𑀯𑀲𑁆𑀲𑀫𑁆𑀪𑀸𑀯𑀺𑀬𑀢𑁆𑀣𑀯𑀸𑀘𑀓𑁄 𑀥𑀼𑀯𑀲𑀤𑁆𑀤𑁄 𑀅𑀢𑁆𑀣𑀺, 𑀦 𑀏𑀯𑀁 ‘‘𑀪𑀯𑀢𑀻’’𑀢𑀺 𑀧𑀤𑁂, 𑀅𑀢𑁆𑀣𑀢𑁄 𑀧𑀦 𑀥𑀼𑀯𑀁 𑀪𑀯𑀺𑀲𑁆𑀲𑀢𑀺 𑀅𑀬𑀁 𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁧. ‘‘𑀢𑀢𑁆𑀣𑀸’’𑀢𑀺 𑀧𑀤𑀁 ‘‘𑀫𑀼𑀲𑀸𑀯𑀸𑀤𑀯𑀕𑁆𑀕𑀲𑁆𑀲𑀸’’𑀢𑀺 𑀧𑀤𑁂 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁄, 𑀢𑁂𑀲𑀼 𑀦𑀯𑀲𑀼 𑀯𑀕𑁆𑀕𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀞𑀫𑀲𑀺𑀓𑁆𑀔𑀸𑀧𑀤𑁂𑀢𑀺 𑀯𑀸, 𑀢𑁂𑀲𑀼 𑀔𑀼𑀤𑁆𑀤𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀅𑀢𑁆𑀣𑁄. 𑀲𑀓𑁆𑀬𑀸𑀦𑀁 𑀧𑀼𑀢𑁆𑀢𑁄𑀢𑀺 𑀪𑀕𑀺𑀦𑀻𑀳𑀺 𑀲𑀁𑀯𑀸𑀲𑀓𑀭𑀡𑀢𑁄 𑀮𑁄𑀓𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑀼𑀁, 𑀚𑀸𑀢𑀺𑀲𑀫𑁆𑀪𑁂𑀤𑀢𑁄 𑀯𑀸 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑀼𑀡𑀦𑁆𑀢𑀻𑀢𑀺 𑀲𑀓𑁆𑀬𑀸. 𑀲𑀸𑀓𑀯𑀦𑀲𑀡𑁆𑀟𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻𑀢𑀺 𑀯𑀸 𑀲𑀓𑁆𑀬𑀸, 𑀧𑀼𑀩𑁆𑀩𑀭𑀸𑀚𑀸𑀦𑁄. 𑀢𑁂𑀲𑀁 𑀯𑀁𑀲𑁂 𑀪𑀽𑀢𑀢𑁆𑀢𑀸 𑀏𑀢𑀭𑀳𑀺𑀧𑀺 𑀭𑀸𑀚𑀸𑀦𑁄 𑀲𑀓𑁆𑀬𑀸 𑀦𑀸𑀫, 𑀢𑁂𑀲𑀁 𑀧𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀩𑀼𑀤𑁆𑀥𑀓𑀸𑀮𑁂’’𑀢𑀺 𑀧𑀤𑀁 ‘‘𑀧𑀩𑁆𑀩𑀚𑀺𑀁𑀲𑀽’’𑀢𑀺 𑀧𑀤𑁂 𑀆𑀥𑀸𑀭𑁄. 𑀲𑀓𑁆𑀬𑀓𑀼𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀸𑀤𑀓𑁆𑀔𑀺𑀢𑁆𑀢𑁄’’𑀢𑁆𑀬𑀸𑀤𑀺𑀦𑀸 𑀯𑀸𑀤𑁂𑀦 𑀔𑀺𑀢𑁆𑀢𑁄, 𑀯𑀸𑀤𑀫𑁆𑀳𑀺 𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀢𑁆𑀭 𑀬𑀢𑁆𑀭𑀸𑀢𑀺 𑀬𑀲𑁆𑀲𑀁 𑀬𑀲𑁆𑀲𑀁 𑀤𑀺𑀝𑁆𑀞𑀺𑀬𑀁 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀚𑀸𑀦𑀺𑀢𑁆𑀯𑀸𑀢𑀺 𑀧𑀝𑀺𑀲𑁆𑀲𑀯𑁂𑀦 𑀯𑀺𑀬𑁄𑀕𑀁 𑀓𑀢𑁆𑀯𑀸. 𑀅𑀯𑀲𑀤𑁆𑀤𑁄 𑀳𑀺 𑀯𑀺𑀬𑁄𑀕𑀢𑁆𑀣𑀯𑀸𑀘𑀓𑁄. ‘‘𑀅𑀧𑀚𑀸𑀦𑀺𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀧𑀝𑀺𑀜𑁆𑀜𑀸𑀢𑀁 𑀅𑀧𑀦𑀻𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑁄𑀲𑀦𑁆𑀢𑀺 𑀅𑀬𑀼𑀢𑁆𑀢𑀺𑀤𑁄𑀲𑀁, 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑁂𑀦𑁆𑀢𑁄 𑀓𑀣𑁂𑀦𑁆𑀢𑁄𑀢𑀺 𑀅𑀦𑁆𑀢𑀲𑀤𑁆𑀤𑁄 𑀫𑀸𑀦𑀲𑀤𑁆𑀤𑀓𑀸𑀭𑀺𑀬𑁄. 𑀓𑀣𑀺𑀬𑀫𑀸𑀦𑁄 𑀓𑀣𑀺𑀬𑀫𑀸𑀦𑁄𑀢𑀺 𑀳𑀺 𑀅𑀢𑁆𑀣𑁄. 𑀧𑀝𑀺𑀚𑀸𑀦𑀺𑀢𑁆𑀯𑀸𑀢𑀺 𑀧𑀝𑀺𑀜𑁆𑀜𑀸𑀢𑀁 𑀓𑀢𑁆𑀯𑀸. 𑀆𑀦𑀺𑀲𑀁𑀲𑀦𑁆𑀢𑀺 𑀦𑀺𑀤𑁆𑀤𑁄𑀲𑀁 𑀕𑀼𑀡𑀁. 𑀧𑀝𑀺𑀧𑀼𑀩𑁆𑀩𑁄 𑀘𑀭𑀲𑀤𑁆𑀤𑁄 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀝𑀺𑀘𑀭𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀻’’𑀢𑀺. ‘‘𑀓𑀺𑀁 𑀧𑀦 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀤𑀢𑀺. 𑀓𑀲𑁆𑀫𑀸𑀢𑀺 𑀯𑀼𑀢𑁆𑀢𑁂 ‘‘𑀚𑀸𑀦𑀺𑀢𑀩𑁆𑀩𑀢𑁄’’𑀢𑀺 𑀯𑀤𑀢𑀺. 𑀬𑀤𑀺 𑀏𑀯𑀁 𑀦𑀺𑀩𑁆𑀩𑀸𑀦𑀫𑁆𑀧𑀺 𑀚𑀸𑀦𑀺𑀢𑀩𑁆𑀩𑀢𑁆𑀢𑀸 𑀅𑀦𑀺𑀘𑁆𑀘𑀁 𑀦𑀸𑀫 𑀲𑀺𑀬𑀸𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀳𑁂𑀢𑀼𑀫𑁆𑀳𑀺 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀳𑀁 ‘‘𑀚𑀸𑀦𑀺𑀢𑀩𑁆𑀩𑀢𑁄’’𑀢𑀺 𑀳𑁂𑀢𑀼𑀁 𑀦 𑀯𑀤𑀸𑀫𑀺, ‘‘𑀚𑀸𑀢𑀺𑀥𑀫𑁆𑀫𑀢𑁄’’𑀢𑀺 𑀧𑀦 𑀯𑀤𑀸𑀫𑀺. 𑀢𑀬𑀸 𑀧𑀦 𑀤𑀼𑀲𑁆𑀲𑀼𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑀢𑁆𑀯𑀸 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺. ‘‘𑀓𑀼𑀭𑀼𑀦𑁆𑀤𑀺𑀬’’𑀦𑁆𑀢𑀺 𑀧𑀤𑀁 ‘‘𑀯𑀼𑀢𑁆𑀢’’𑀦𑁆𑀢𑀺 𑀧𑀤𑁂 𑀆𑀥𑀸𑀭𑁄. 𑀏𑀢𑀲𑁆𑀲𑀸𑀢𑀺 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀁 𑀚𑀸𑀦𑀺𑀢𑀩𑁆𑀩𑀢𑁄’’𑀢𑀺 𑀯𑀘𑀦𑀲𑁆𑀲. 𑀢𑀢𑁆𑀭𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁. 𑀢𑀲𑁆𑀲𑀸𑀢𑀺 𑀧𑀝𑀺𑀚𑀸𑀦𑀦𑀸𑀯𑀚𑀸𑀦𑀦𑀲𑁆𑀲. ‘‘𑀧𑀝𑀺𑀘𑁆𑀙𑀸𑀤𑀦𑀢𑁆𑀣’’𑀦𑁆𑀢𑀺 𑀧𑀤𑀁 ‘‘𑀪𑀸𑀲𑀢𑀻’’𑀢𑀺𑀧𑀤𑁂 𑀲𑀫𑁆𑀧𑀤𑀸𑀦𑀁. ‘‘𑀫𑀳𑀸𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺𑀧𑀤𑀁 ‘‘𑀯𑀼𑀢𑁆𑀢’’𑀦𑁆𑀢𑀺 𑀧𑀤𑁂 𑀆𑀥𑀸𑀭𑁄. ‘‘𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀲𑀽’’𑀢𑀺 𑀧𑀤𑀁 𑀉𑀧𑀦𑁂𑀢𑀩𑁆𑀩𑀁. 𑀇𑀤𑀁 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫𑀧𑀤𑁂𑀲𑁂’’𑀢𑀺 𑀧𑀤𑁂 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁄.

𑁩. 𑀲𑀫𑁆𑀫𑀸 𑀯𑀤𑀢𑀺 𑀅𑀦𑁂𑀦𑀸𑀢𑀺 𑀲𑀁𑀯𑀸𑀤𑀦𑀁, 𑀉𑀚𑀼𑀚𑀸𑀢𑀺𑀓𑀘𑀺𑀢𑁆𑀢𑀁, 𑀦 𑀲𑀁𑀯𑀸𑀤𑀦𑀁 𑀯𑀺𑀲𑀁𑀯𑀸𑀤𑀦𑀁, 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀯𑀲𑀧𑁆𑀧𑀯𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢’’𑀦𑁆𑀢𑀺. ‘‘𑀯𑀸𑀘𑀸’’𑀢𑁆𑀬𑀸𑀤𑀺𑀦𑀸 𑀯𑀘𑀢𑀺 𑀏𑀢𑀸𑀬𑀸𑀢𑀺 𑀯𑀸𑀘𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀤𑀴𑁆𑀳𑀻𑀓𑀭𑀡𑀚𑁄𑀢𑀓𑀁, 𑀢𑀤𑀫𑀺𑀦𑀸 𑀲𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. ‘‘𑀯𑀸𑀘𑀸𑀬𑁂𑀯𑀸’’𑀢𑀺 𑀧𑀤𑀁 ‘‘𑀩𑁆𑀬𑀧𑁆𑀧𑀣𑁄’’𑀢𑀺 𑀧𑀤𑁂 𑀢𑀼𑀮𑁆𑀬𑀢𑁆𑀣𑀁, ‘‘𑀯𑀼𑀘𑁆𑀘𑀢𑀻’’𑀢𑀺 𑀧𑀤𑁂 𑀓𑀫𑁆𑀫𑀁. 𑀧𑀣𑀲𑀤𑁆𑀤𑀧𑀭𑀢𑁆𑀢𑀸 𑀯𑀸𑀘𑀸𑀲𑀤𑁆𑀤𑀲𑁆𑀲 𑀩𑁆𑀬𑀸𑀤𑁂𑀲𑁄 𑀓𑀢𑁄. 𑀲𑀼𑀤𑁆𑀥𑀘𑁂𑀢𑀦𑀸 𑀓𑀣𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁𑀲𑀫𑀼𑀝𑁆𑀞𑀺𑀢𑀲𑀤𑁆𑀤𑀲𑀳𑀺𑀢𑀸𑀢𑀺 𑀢𑀸𑀬 𑀘𑁂𑀢𑀦𑀸𑀬 𑀲𑀫𑀼𑀝𑁆𑀞𑀺𑀢𑁂𑀦 𑀲𑀤𑁆𑀤𑁂𑀦 𑀲𑀳 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸.

‘‘𑀏𑀯’’𑀦𑁆𑀢𑀺 𑀧𑀤𑀁 ‘‘𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀧𑀤𑁂 𑀦𑀺𑀤𑀲𑁆𑀲𑀦𑀁, 𑀓𑀭𑀡𑀁 𑀯𑀸. ‘‘𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀧𑀤𑀁 ‘‘𑀤𑀲𑁆𑀲𑁂𑀦𑁆𑀢𑁄 𑀆𑀳𑀸’’𑀢𑀺 𑀧𑀤𑀤𑁆𑀯𑀬𑁂 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸. 𑀅𑀦𑁆𑀢𑁂𑀢𑀺 ‘‘𑀯𑀸𑀘𑀸’’𑀢𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀧𑀤𑀸𑀦𑀁 𑀅𑀯𑀲𑀸𑀦𑁂. ‘‘𑀆𑀳𑀸’’𑀢𑀺 𑀏𑀢𑁆𑀣 𑀯𑀢𑁆𑀢𑀫𑀸𑀦-𑀢𑀺𑀯𑀘𑀦𑀲𑁆𑀲 𑀅𑀓𑀸𑀭𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀸𑀘𑀓𑁂𑀦 ‘‘𑀇𑀤𑀸𑀦𑀻’’𑀢𑀺 𑀧𑀤𑁂𑀦 𑀬𑁄𑀚𑀺𑀢𑀢𑁆𑀢𑀸. ‘‘𑀢𑀢𑁆𑀣𑀸’’𑀢𑀺 𑀧𑀤𑀁 ‘‘𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀧𑀤𑁂 𑀆𑀥𑀸𑀭𑁄. 𑀏𑀢𑁆𑀣𑀸𑀢𑀺 ‘‘𑀅𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀫𑁂’’𑀢𑀺𑀆𑀤𑀻𑀲𑀼. ‘‘𑀧𑀸𑀴𑀺𑀬’’𑀦𑁆𑀢𑀺 𑀧𑀤𑀁 ‘‘𑀤𑁂𑀲𑀦𑀸 𑀓𑀢𑀸’’𑀢𑀺 𑀧𑀤𑁂 𑀆𑀥𑀸𑀭𑁄. 𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑀯𑀲𑁂𑀦 𑀅𑀯𑀢𑁆𑀯𑀸 𑀦𑀺𑀲𑁆𑀲𑀬𑀧𑀲𑀸𑀤𑀯𑀲𑁂𑀦 ‘‘𑀘𑀓𑁆𑀔𑀼𑀦𑀸 𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀑𑀴𑀸𑀭𑀺𑀓𑁂𑀦𑁂𑀯𑀸’’𑀢𑀺.

𑁪. 𑀢𑀲𑁆𑀲𑀸𑀢𑀺 ‘‘𑀢𑀻𑀳𑀸𑀓𑀸𑀭𑁂𑀳𑀻’’𑀢𑀺𑀆𑀤𑀺𑀯𑀘𑀦𑀲𑁆𑀲. ‘‘𑀅𑀢𑁆𑀣𑁄’’𑀢𑀺 𑀧𑀤𑀁 ‘‘𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀧𑀤𑁂 𑀓𑀫𑁆𑀫𑀁. 𑀳𑀻𑀢𑀺 𑀯𑀺𑀲𑁂𑀲𑀚𑁄𑀢𑀓𑀁, 𑀯𑀺𑀲𑁂𑀲𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑁯. 𑀆𑀤𑀻𑀦𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄.

𑁧𑁧. 𑀫𑀦𑁆𑀤𑀲𑀤𑁆𑀤𑁄 𑀚𑀴𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀫𑀦𑁆𑀤𑀢𑁆𑀢𑀸 𑀚𑀴𑀢𑁆𑀢𑀸’’𑀢𑀺. 𑀬𑁄 𑀧𑀦 𑀅𑀜𑁆𑀜𑀁 𑀪𑀡𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀸𑀫𑀡𑁂𑀭𑁂𑀦𑀸’’𑀢𑀺 𑀧𑀤𑀁 ‘‘𑀯𑀼𑀢𑁆𑀢𑁄’’𑀢𑀺 𑀧𑀤𑁂 𑀓𑀢𑁆𑀢𑀸. 𑀅𑀧𑀺𑀲𑀤𑁆𑀤𑁄 𑀧𑀼𑀘𑁆𑀙𑀸𑀯𑀸𑀘𑀓𑁄, ‘‘𑀧𑀲𑁆𑀲𑀺𑀢𑁆𑀣𑀸’’𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄, 𑀅𑀧𑀺 𑀧𑀲𑁆𑀲𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. ‘‘𑀅𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀫𑁂’’𑀢𑀺𑀆𑀤𑀺𑀯𑀘𑀦𑀢𑁄 𑀅𑀜𑁆𑀜𑀸 𑀧𑀽𑀭𑀡𑀓𑀣𑀸𑀧𑀺 𑀢𑀸𑀯 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀸 𑀧𑀽𑀭𑀡𑀓𑀣𑀸 𑀦𑀸𑀫 𑀳𑁄𑀢𑀻’’𑀢𑀺. 𑀅𑀧𑁆𑀧𑀢𑀸𑀬 𑀊𑀦𑀲𑁆𑀲 𑀅𑀢𑁆𑀣𑀲𑁆𑀲 𑀧𑀽𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀧𑀽𑀭𑀡𑀓𑀣𑀸. 𑀏𑀲𑀸 𑀧𑀽𑀭𑀡𑀓𑀣𑀸 𑀦𑀸𑀫 𑀓𑀸𑀢𑀺 𑀆𑀳 ‘‘𑀏𑀓𑁄’’𑀢𑀺𑀆𑀤𑀺. 𑀏𑀲𑀸 𑀳𑀺 𑀕𑀸𑀫𑁂 𑀅𑀧𑁆𑀧𑀓𑀫𑁆𑀧𑀺 𑀢𑁂𑀮𑀁 𑀯𑀸 𑀧𑀽𑀯𑀔𑀡𑁆𑀟𑀁 𑀯𑀸 𑀧𑀲𑁆𑀲𑀺𑀢𑁆𑀯𑀸 𑀯𑀸 𑀮𑀪𑀺𑀢𑁆𑀯𑀸 𑀯𑀸 𑀩𑀳𑀼𑀓𑀁 𑀓𑀢𑁆𑀯𑀸 𑀧𑀽𑀭𑀡𑀯𑀲𑁂𑀦 𑀓𑀣𑀺𑀢𑀢𑁆𑀢𑀸 𑀧𑀽𑀭𑀡𑀓𑀣𑀸 𑀦𑀸𑀫. 𑀩𑀳𑀼𑀓𑀸𑀦𑀺 𑀢𑁂𑀮𑀸𑀦𑀺 𑀯𑀸 𑀧𑀽𑀯𑁂 𑀯𑀸 𑀧𑀲𑁆𑀲𑀦𑁆𑀢𑁄𑀧𑀺 𑀮𑀪𑀦𑁆𑀢𑁄𑀧𑀺 𑀅𑀧𑁆𑀧𑀓𑀁 𑀓𑀢𑁆𑀯𑀸 𑀊𑀦𑀯𑀲𑁂𑀦 𑀓𑀣𑀺𑀢𑀢𑁆𑀢𑀸 𑀊𑀦𑀓𑀣𑀸𑀧𑀺 𑀅𑀢𑁆𑀣𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀯𑀼𑀢𑁆𑀢𑀢𑁆𑀢𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀩𑀳𑀼𑀓𑀸𑀬 𑀧𑀽𑀭𑀡𑀲𑁆𑀲 𑀅𑀢𑁆𑀣𑀲𑁆𑀲 𑀊𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀊𑀦𑀓𑀣𑀸𑀢𑀺 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺. 𑀧𑀞𑀫𑀁.

𑁨. 𑀑𑀫𑀲𑀯𑀸𑀤 𑀲𑀺𑀓𑁆𑀔𑀸𑀧𑀤𑀁

𑁧𑁨. 𑀤𑀼𑀢𑀺𑀬𑁂 𑀫𑀲𑀥𑀸𑀢𑀼 𑀯𑀺𑀚𑁆𑀛𑀦𑀢𑁆𑀣𑁂 𑀧𑀯𑀢𑁆𑀢𑀢𑀺 ‘‘𑀑𑀫𑀝𑁆𑀞𑀁 𑀉𑀫𑁆𑀫𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁧) 𑀯𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀑𑀫𑀲𑀦𑁆𑀢𑀻𑀢𑀺 𑀑𑀯𑀺𑀚𑁆𑀛𑀦𑁆𑀢𑀻’’𑀢𑀺.

𑁧𑁩. ‘‘𑀇𑀤𑀁 𑀯𑀢𑁆𑀣𑀼’’𑀦𑁆𑀢𑀺 𑀧𑀤𑀁 ‘‘𑀆𑀳𑀭𑀻’’𑀢𑀺 𑀧𑀤𑁂 𑀓𑀫𑁆𑀫𑀁. 𑀦𑀦𑁆𑀤𑀺𑀢𑀩𑁆𑀩𑁄𑀢𑀺 𑀦𑀦𑁆𑀤𑁄 𑀯𑀡𑁆𑀡𑀩𑀮𑀸𑀤𑀺, 𑀲𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀦𑀦𑁆𑀤𑀻. 𑀯𑀺𑀲𑀸𑀮𑀸𑀦𑀺 𑀫𑀳𑀦𑁆𑀢𑀸𑀦𑀺 𑀯𑀺𑀲𑀸𑀡𑀸𑀦𑀺 𑀏𑀢𑀲𑁆𑀲𑀢𑁆𑀣𑀻𑀢𑀺 𑀯𑀺𑀲𑀸𑀮𑁄, 𑀦𑀦𑁆𑀤𑀻 𑀘 𑀲𑁄 𑀯𑀺𑀲𑀸𑀮𑁄 𑀘𑁂𑀢𑀺 𑀦𑀦𑁆𑀤𑀺𑀯𑀺𑀲𑀸𑀮𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀦𑀦𑁆𑀤𑀺𑀯𑀺𑀲𑀸𑀮𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀲𑁄𑀢𑀺 𑀦𑀦𑁆𑀤𑀺𑀯𑀺𑀲𑀸𑀮𑁄, ‘‘𑀆𑀳𑀸’’𑀢𑀺 𑀧𑀤𑁂 𑀓𑀢𑁆𑀢𑀸. 𑀢𑀢𑁆𑀣𑁂𑀯𑀸𑀢𑀺 𑀬𑀼𑀜𑁆𑀚𑀺𑀢𑀝𑁆𑀞𑀸𑀦𑁂𑀬𑁂𑀯. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀅𑀦𑀼𑀕𑁆𑀕𑀳𑀢𑁆𑀣𑀯𑀸𑀘𑀓𑁄, 𑀧𑀕𑁂𑀯 𑀤𑁆𑀯𑀺𑀳𑁂𑀢𑀼𑀓 𑀢𑀺𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀢𑀺 𑀅𑀢𑁆𑀣𑁄. ‘‘𑀢𑁂𑀦 𑀘𑀸’’𑀢𑀺 𑀘𑀓𑀸𑀭𑀲𑁆𑀲 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀢𑁆𑀢𑀸 ‘‘𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀘𑀸’’𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀘𑀸’’𑀢𑀺. 𑀅𑀢𑁆𑀢𑀦𑁄𑀢𑀺 𑀦𑀦𑁆𑀤𑀺𑀯𑀺𑀲𑀸𑀮𑀲𑁆𑀲.

𑁧𑁫. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀧𑀤𑀪𑀸𑀚𑀦𑀺𑀬𑀁, ‘‘𑀆𑀳𑀸’’𑀢𑀺 𑀧𑀤𑁂 𑀆𑀥𑀸𑀭𑁄. ‘‘𑀬𑀲𑁆𑀫𑀸’’𑀢𑀺 𑀧𑀤𑀁 𑀯𑀺𑀪𑀚𑀺𑀢𑀼𑀓𑀸𑀫𑁄’’𑀢𑀺 𑀧𑀤𑁂 𑀳𑁂𑀢𑀼. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁𑀬𑁂𑀯 ‘‘𑀳𑀻𑀦𑁂𑀦𑀸𑀧𑀻’’𑀢𑀺 𑀯𑀢𑁆𑀯𑀸 𑀧𑀤𑀪𑀸𑀚𑀦𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑁂𑀡𑀼𑀓𑀸𑀭𑀚𑀸𑀢𑀻𑀢𑀺 𑀯𑀺𑀮𑀻𑀯𑀓𑀸𑀭𑀚𑀸𑀢𑀺. 𑀦𑁂𑀲𑀸𑀤𑀚𑀸𑀢𑀻𑀢𑀺 𑀏𑀢𑁆𑀣 𑀓𑁂𑀯𑀝𑁆𑀝𑀚𑀸𑀢𑀺𑀧𑀺 𑀲𑀗𑁆𑀕𑀳𑀺𑀢𑀸.

𑀧𑀼 𑀯𑀼𑀘𑁆𑀘𑀢𑀺 𑀓𑀭𑀻𑀲𑀁, 𑀢𑀁 𑀓𑀼𑀲𑀢𑀺 𑀅𑀧𑀦𑁂𑀢𑀻𑀢𑀺 𑀧𑀼𑀓𑁆𑀓𑀼𑀲𑁄. 𑀧𑀼𑀧𑁆𑀨𑀁 𑀯𑀼𑀘𑁆𑀘𑀢𑀺 𑀓𑀭𑀻𑀲𑀁, 𑀓𑀼𑀲𑀼𑀫𑀁 𑀯𑀸, 𑀢𑀁 𑀙𑀟𑁆𑀟𑁂𑀢𑀻𑀢𑀺 𑀧𑀼𑀧𑁆𑀨𑀙𑀟𑁆𑀟𑀓𑁄.

𑀓𑀼𑀝𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑁄𑀝𑁆𑀞𑁄, 𑀲𑁄𑀬𑁂𑀯 𑀓𑁄𑀝𑁆𑀞𑀓𑁄. 𑀬𑀓𑀸𑀭𑀪𑀓𑀸𑀭𑁂 𑀏𑀓𑀢𑁄 𑀬𑁄𑀚𑁂𑀢𑁆𑀯𑀸 ‘‘𑀬𑀪𑀸’’𑀢𑀺 𑀬𑁄 𑀅𑀓𑁆𑀓𑁄𑀲𑁄 𑀅𑀢𑁆𑀣𑀺, 𑀏𑀲𑁄 𑀳𑀻𑀦𑁄 𑀦𑀸𑀫 𑀅𑀓𑁆𑀓𑁄𑀲𑁄𑀢𑀺 𑀬𑁄𑀚𑀦𑀸.

𑁧𑁬. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀦𑀸𑀫𑀸𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀅𑀮𑀺𑀓𑀦𑁆𑀢𑀺 𑀅𑀲𑀘𑁆𑀘𑀁, 𑀫𑀺𑀘𑁆𑀙𑀸𑀯𑀸𑀘𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄𑀧𑀺 𑀯𑀤𑀢𑀻𑀢𑀺 𑀬𑁄𑀚𑀦𑀸.

𑁨𑁬. 𑀧𑀭𑀺𑀳𑀭𑀺𑀢𑁆𑀯𑀸𑀢𑀺 𑀧𑀭𑀺𑀫𑀼𑀔𑀁 𑀓𑀣𑀦𑀁 𑀅𑀧𑀦𑁂𑀢𑁆𑀯𑀸. 𑀤𑀯𑀁 𑀧𑀭𑀺𑀳𑀸𑀲𑀁 𑀓𑀸𑀫𑁂𑀢𑀻𑀢𑀺 𑀤𑀯𑀓𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀤𑀯𑀓𑀫𑁆𑀬𑀁, 𑀢𑀁𑀬𑁂𑀯 𑀤𑀯𑀓𑀫𑁆𑀬𑀢𑀸. 𑀅𑀦𑀼𑀧𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀲𑀤𑀺𑀲𑀢𑁆𑀣𑀫𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼’’𑀦𑁆𑀢𑀺𑀆𑀤𑀺. 𑀬𑀤𑀺 𑀳𑀺 𑀲𑀤𑀺𑀲𑀢𑁆𑀣𑁄 𑀪𑀯𑁂𑀬𑁆𑀬, 𑀲𑀸𑀫𑀡𑁂𑀭𑁄𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀸𑀫 𑀲𑀺𑀬𑀸 𑀲𑀡𑁆𑀞𑀸𑀦𑁂𑀦 𑀘 𑀧𑀼𑀭𑀺𑀲𑀪𑀸𑀯𑁂𑀦 𑀘 𑀲𑀤𑀺𑀲𑀢𑁆𑀢𑀸, 𑀢𑀲𑁆𑀫𑀸 𑀅𑀜𑁆𑀜𑀢𑁆𑀣𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀲𑀢𑁆𑀢𑀸𑀢𑀺 𑀏𑀢𑁆𑀣 𑀲𑀩𑁆𑀩𑀲𑀤𑁆𑀤𑁄 𑀅𑀦𑀯𑀲𑁂𑀲𑀢𑁆𑀣𑁄 𑀫𑀦𑀼𑀲𑁆𑀲𑁂 𑀉𑀧𑀸𑀤𑀸𑀬 𑀯𑀘𑀦𑀢𑁆𑀣𑀚𑀸𑀦𑀦𑀸𑀚𑀸𑀦𑀦𑀧𑀓𑀢𑀺𑀓𑀸𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀫𑁆𑀧𑀺 𑀕𑀳𑀺𑀢𑀢𑁆𑀢𑀸.

𑁩𑁫. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀓𑁆𑀔𑀸𑀧𑀤𑀫𑀧𑁂𑀓𑁆𑀔𑀺𑀬 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 ‘‘𑀓𑀺𑀭𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀫𑀧𑁂𑀓𑁆𑀔𑀺𑀬 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 ‘‘𑀓𑀺𑀭𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀚𑁆𑀚𑀓𑀫𑁆𑀫𑀲𑀤𑁆𑀤𑀸 𑀲𑀺𑀓𑁆𑀔𑀸𑀧𑀤𑀫𑀧𑁂𑀓𑁆𑀔𑀦𑁆𑀢𑀸𑀧𑀺 𑀆𑀧𑀢𑁆𑀢𑀺, 𑀫𑀧𑁂𑀓𑁆𑀔𑀦𑁆𑀢𑀸𑀧𑀺 𑀦𑀺𑀬𑀢𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀸 𑀦𑀧𑀼𑀁𑀲𑀓𑀸𑀬𑁂𑀯, 𑀢𑀲𑁆𑀫𑀸 𑀢𑁂 𑀤𑁆𑀯𑁂 𑀆𑀧𑀢𑁆𑀢𑀺𑀝𑁆𑀞𑀸𑀦𑁂 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀁

𑁩𑁬. 𑀢𑀢𑀺𑀬𑁂 ‘‘𑀚𑀸𑀢𑀪𑀡𑁆𑀟𑀦𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀕𑁆𑀬𑀸𑀳𑀺𑀢𑁄𑀢𑀺𑀆𑀤𑀻𑀲𑀼 𑀯𑀺𑀬 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑀯𑀲𑁂𑀦 ‘‘𑀪𑀡𑁆𑀟𑀦𑀚𑀸𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀜𑁆𑀚𑀸𑀢𑀪𑀡𑁆𑀟𑀦𑀸𑀦’’𑀦𑁆𑀢𑀺. ‘‘𑀧𑀼𑀩𑁆𑀩𑀪𑀸𑀕𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘𑀸’’𑀢𑀺𑀆𑀤𑀺𑀦𑀸. 𑀯𑀺𑀭𑀼𑀤𑁆𑀥𑀁 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀯𑀺𑀯𑀸𑀤𑁄, 𑀯𑀺𑀕𑁆𑀕𑀸𑀳𑀺𑀓𑀓𑀣𑀸, 𑀢𑀁 𑀆𑀧𑀦𑁆𑀦𑀸𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸, 𑀢𑁂𑀲𑀁. 𑀧𑀺𑀲𑀢𑀺 𑀲𑀜𑁆𑀘𑀼𑀡𑁆𑀡𑁂𑀢𑀻𑀢𑀺 𑀧𑀺𑀲𑀼𑀡𑁄, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀇𑀤𑀦𑁆𑀢𑀺 𑀧𑁂𑀲𑀼𑀜𑁆𑀜𑀁, 𑀯𑀘𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑁂𑀲𑀼𑀜𑁆𑀜𑀦𑁆𑀢𑀺 𑀧𑀺𑀲𑀼𑀡𑀯𑀸𑀘’’𑀦𑁆𑀢𑀺.

𑁩𑁭. 𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂𑀢𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀉𑀧𑀲𑀁𑀳𑀝𑁂 𑀧𑁂𑀲𑀼𑀜𑁆𑀜𑀯𑀘𑀦𑁂𑀢𑀺 𑀙𑀝𑁆𑀞𑀻𑀲𑀫𑀸𑀲𑁄.

𑁩𑁮. ‘‘𑀤𑀺𑀲𑁆𑀯𑀸’’𑀢𑀺 𑀧𑀤𑀁 ‘‘𑀪𑀡𑀦𑁆𑀢𑀲𑁆𑀲𑀸’’𑀢𑀺 𑀧𑀤𑁂 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸, 𑀤𑀲𑁆𑀲𑀦𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀁.

𑁪. 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀁

𑁪𑁪. 𑀘𑀢𑀼𑀢𑁆𑀣𑁂 𑀧𑀝𑀺𑀫𑀼𑀔𑀁 𑀆𑀤𑀭𑁂𑀦 𑀲𑀼𑀡𑀦𑁆𑀢𑀻𑀢𑀺 𑀧𑀢𑀺𑀲𑁆𑀲𑀸, 𑀦 𑀧𑀢𑀺𑀲𑁆𑀲𑀸 𑀅𑀧𑁆𑀧𑀢𑀺𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑁆𑀧𑀢𑀺𑀲𑁆𑀲𑀯𑀸’’𑀢𑀺.

𑁪𑁫. ‘‘𑀧𑀤𑀲𑁄’’𑀢𑀺 𑀏𑀢𑁆𑀣 𑀲𑁄-𑀧𑀘𑁆𑀘𑀬𑁄 𑀯𑀺𑀘𑁆𑀙𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀧𑀤𑀁 𑀧𑀤’’𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀼𑀩𑁆𑀩𑀺𑀥𑁂𑀲𑀼. 𑀧𑀤𑀁 𑀦𑀸𑀫 𑀇𑀥 𑀅𑀢𑁆𑀣𑀚𑁄𑀢𑀓𑀁 𑀯𑀸 𑀯𑀺𑀪𑀢𑁆𑀬𑀦𑁆𑀢𑀁 𑀯𑀸 𑀦 𑀳𑁄𑀢𑀺, 𑀅𑀣 𑀔𑁄 𑀮𑁄𑀓𑀺𑀬𑁂𑀳𑀺 𑀮𑀓𑁆𑀔𑀺𑀢𑁄 𑀕𑀸𑀣𑀸𑀬 𑀘𑀢𑀼𑀢𑁆𑀣𑀁𑀲𑁄 𑀧𑀸𑀤𑁄𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀧𑀤𑀦𑁆𑀢𑀺 𑀏𑀓𑁄 𑀕𑀸𑀣𑀸𑀧𑀸𑀤𑁄’’𑀢𑀺. 𑀅𑀦𑀼 𑀧𑀘𑁆𑀙𑀸 𑀯𑀼𑀢𑁆𑀢𑀧𑀤𑀢𑁆𑀢𑀸 𑀤𑀼𑀢𑀺𑀬𑀧𑀸𑀤𑁄 𑀅𑀦𑀼𑀧𑀤𑀁 𑀦𑀸𑀫. 𑀅𑀦𑀼 𑀲𑀤𑀺𑀲𑀁 𑀩𑁆𑀬𑀜𑁆𑀚𑀦𑀁 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀦𑀼𑀩𑁆𑀬𑀜𑁆𑀚𑀦’’𑀦𑁆𑀢𑀺𑀆𑀤𑀺𑀦𑀸. 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀧𑀤-𑀧𑀭𑀺𑀬𑀸𑀬𑁄. 𑀬𑀁𑀓𑀺𑀜𑁆𑀘𑀺 𑀧𑀤𑀁 𑀅𑀦𑀼𑀩𑁆𑀬𑀜𑁆𑀚𑀦𑀁 𑀦𑀸𑀫 𑀦 𑀳𑁄𑀢𑀺, 𑀧𑀼𑀭𑀺𑀫𑀧𑀤𑁂𑀦 𑀧𑀦 𑀲𑀤𑀺𑀲𑀁 𑀧𑀘𑁆𑀙𑀺𑀫𑀧𑀤𑀫𑁂𑀯 𑀅𑀦𑀼𑀩𑁆𑀬𑀜𑁆𑀚𑀦𑀁 𑀦𑀸𑀫.

𑀯𑀸𑀘𑁂𑀦𑁆𑀢𑁄 𑀳𑀼𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀏𑀓𑀫𑁂𑀓𑀁 𑀧𑀤’’𑀦𑁆𑀢𑀺 𑀧𑀤𑀁 ‘‘𑀦𑀺𑀝𑁆𑀞𑀸𑀧𑁂𑀢𑀻’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. ‘‘𑀣𑁂𑀭𑁂𑀦𑀸’’𑀢𑀺 𑀧𑀤𑀁 ‘‘𑀯𑀼𑀢𑁆𑀢𑁂’’𑀢𑀺 𑀧𑀤𑁂 𑀓𑀢𑁆𑀢𑀸, ‘‘𑀏𑀓𑀢𑁄’’𑀢𑀺 𑀧𑀤𑁂 𑀲𑀳𑀢𑁆𑀣𑁄. 𑀲𑀸𑀫𑀡𑁂𑀭𑁄 𑀅𑀧𑀸𑀧𑀼𑀡𑀺𑀢𑁆𑀯𑀸 𑀪𑀡𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑁄 𑀫𑀢𑁆𑀢𑀲𑀤𑁆𑀤𑀲𑁆𑀲 𑀅𑀯𑀥𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀧𑀓𑀸𑀭𑀁 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀘 ‘‘𑀅𑀦𑀺𑀘𑁆𑀘𑀸’’𑀢𑀺 𑀘 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀢𑀺𑀧𑀺 𑀮𑀺𑀗𑁆𑀕𑀯𑀺𑀲𑁂𑀲𑀢𑁆𑀢𑁂 𑀅𑀦𑀼𑀩𑁆𑀬𑀜𑁆𑀚𑀦𑀢𑁆𑀢𑀸 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀅𑀦𑀼𑀩𑁆𑀬𑀜𑁆𑀚𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸’’𑀢𑀺.

𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀸𑀤𑀻𑀦𑀺 𑀤𑀻𑀖𑀲𑀼𑀢𑁆𑀢𑀸𑀦𑀺 (𑀤𑀻. 𑀦𑀺. 𑁧.𑁧𑁫𑁦 𑀆𑀤𑀬𑁄) 𑀲𑀗𑁆𑀕𑀳𑀺𑀢𑀸𑀦𑀺. 𑀘𑀲𑀤𑁆𑀤𑁂𑀦 𑀑𑀖𑀢𑀭𑀡𑀲𑀼𑀢𑁆𑀢𑀸𑀤𑀻𑀦𑀺 𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀸𑀦𑀺 (𑀲𑀁. 𑀦𑀺. 𑁧.𑁧) 𑀘 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀸𑀤𑀻𑀦𑀺 𑀅𑀗𑁆𑀕𑀼𑀢𑁆𑀢𑀭𑀲𑀼𑀢𑁆𑀢𑀸𑀦𑀺 (𑀅. 𑀦𑀺. 𑁧.𑁨 𑀆𑀤𑀬𑁄) 𑀘 𑀲𑀗𑁆𑀕𑀳𑀺𑀢𑀸𑀦𑀺. 𑀲𑁄𑀢𑀺 𑀤𑁂𑀯𑀢𑀸𑀪𑀸𑀲𑀺𑀢𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀓𑀺𑀜𑁆𑀘𑀸𑀧𑀺 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑀯𑀸𑀘𑀓𑁄, 𑀧𑀦𑀲𑀤𑁆𑀤𑁄 𑀅𑀦𑀼𑀕𑁆𑀕𑀳𑀢𑁆𑀣𑀯𑀸𑀘𑀓𑁄. 𑀫𑁂𑀡𑁆𑀟𑀓𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀲𑀽𑀢𑀺 𑀫𑁂𑀡𑁆𑀟𑀓𑀧𑀜𑁆𑀳𑁂 𑀘 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 𑀘. 𑀬𑀦𑁆𑀢𑀺 𑀲𑀼𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀭𑀫𑁆𑀫𑀡𑀓𑀣𑀸 𑀩𑀼𑀤𑁆𑀥𑀺𑀓𑀓𑀣𑀸 𑀤𑀡𑁆𑀟𑀓𑀓𑀣𑀸 𑀜𑀸𑀡𑀯𑀢𑁆𑀣𑀼𑀓𑀣𑀸𑀢𑀺 𑀬𑁄𑀚𑁂𑀢𑀩𑁆𑀩𑀁 𑀧𑁂𑀬𑁆𑀬𑀸𑀮𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀇𑀫𑀸𑀬𑁄 𑀧𑀓𑀭𑀡𑀸𑀦𑀺 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀢𑁆𑀯𑀸 𑀧𑀭𑀺𑀕𑁆𑀕𑀳𑀺𑀢𑁄𑀢𑀺 𑀬𑁄𑀚𑀦𑀸. 𑀬𑀦𑁆𑀢𑀺 𑀲𑀼𑀢𑁆𑀢𑀁.

𑁪𑁮. 𑀢𑀢𑁆𑀭𑀸𑀢𑀺 ‘‘𑀏𑀓𑀢𑁄 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁄’’𑀢𑀺 𑀯𑀘𑀦𑁂. 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀻𑀢𑀺 𑀆𑀘𑀭𑀺𑀬𑀁 𑀤𑁂𑀲𑀸𑀧𑁂𑀦𑁆𑀢𑀺 𑀩𑀳𑀼𑀓𑀢𑁆𑀢𑀸𑀭𑀫𑀧𑁂𑀓𑁆𑀔𑀺𑀬 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀳𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺. 𑀤𑁆𑀯𑁂𑀧𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑁄 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀘.

𑀉𑀧𑀘𑀸𑀭𑀦𑁆𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑀁. 𑀬𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀧𑀮𑀸𑀬𑀦𑀓𑀕𑀦𑁆𑀣𑀦𑁆𑀢𑀺 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀧𑀓𑀭𑀡𑀁. 𑀲𑀸𑀫𑀡𑁂𑀭𑁄 𑀕𑀡𑁆𑀳𑀸𑀢𑀻𑀢𑀺 𑀬𑁄𑀚𑀦𑀸.

𑀑𑀧𑀸𑀢𑁂𑀢𑀻𑀢𑀺 𑀅𑀯𑀧𑀸𑀢𑁂𑀢𑀺, 𑀕𑀴𑀺𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂𑀧𑀻𑀢𑀺 𑀯𑁂𑀬𑁆𑀬𑀸𑀓𑀭𑀡𑀲𑀼𑀢𑁆𑀢𑁂𑀧𑀺. 𑀢𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀕𑀦𑁆𑀣𑀁. 𑀧𑀭𑀺𑀲𑀗𑁆𑀓𑀫𑀸𑀦𑀦𑁆𑀢𑀺 𑀲𑀸𑀭𑀚𑁆𑀚𑀫𑀸𑀦𑀁. 𑀬𑀁 𑀧𑀦 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑁆𑀢𑀸𑀢𑀺 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑁆𑀢𑀸𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀁

𑁪𑁯. 𑀧𑀜𑁆𑀘𑀫𑁂 𑀫𑀼𑀝𑁆𑀞𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀻. 𑀦𑀢𑁆𑀣𑀺 𑀲𑀫𑁆𑀧𑀚𑀸𑀦𑀁 𑀏𑀢𑁂𑀲𑀦𑁆𑀢𑀺 𑀅𑀲𑀫𑁆𑀧𑀚𑀸𑀦𑀸. 𑀪𑀯𑀗𑁆𑀕𑁄𑀢𑀺𑀡𑁆𑀡𑀓𑀸𑀮𑁂𑀢𑀺 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑁂.

𑁫𑁦. ‘‘𑀧𑀓𑀢𑀺𑀬𑀸’’𑀢𑀺 𑀧𑀤𑀁 ‘‘𑀤𑁂𑀦𑁆𑀢𑀻’’𑀢𑀺 𑀧𑀤𑁂 𑀯𑀺𑀲𑁂𑀲𑀦𑀁. 𑀢𑁂 𑀪𑀺𑀓𑁆𑀔𑀽 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀕𑀸𑀭𑀯𑁂𑀦𑀸’’𑀢𑀺 𑀧𑀤𑀜𑁆𑀘 ‘‘𑀲𑀺𑀓𑁆𑀔𑀸𑀓𑀸𑀫𑀢𑀸𑀬𑀸’’𑀢𑀺 𑀧𑀤𑀜𑁆𑀘 ‘‘𑀤𑁂𑀦𑁆𑀢𑀻’’𑀢𑀺 𑀧𑀤𑁂 𑀳𑁂𑀢𑀼. 𑀲𑀻𑀲𑀲𑁆𑀲 𑀉𑀧𑀥𑀸𑀦𑀁 𑀉𑀲𑁆𑀲𑀻𑀲𑀁, 𑀢𑀲𑁆𑀲 𑀓𑀭𑀻𑀬𑀢𑁂 𑀉𑀲𑁆𑀲𑀻𑀲𑀓𑀭𑀡𑀁, 𑀢𑀁𑀬𑁂𑀯 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀉𑀲𑁆𑀲𑀻𑀲𑀓𑀭𑀡𑀢𑁆𑀣𑁄, 𑀢𑀤𑀢𑁆𑀣𑀸𑀬. 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁, ‘‘𑀲𑀺𑀓𑁆𑀔𑀸𑀓𑀸𑀫𑀢𑀸𑀬𑀸’’𑀢𑀺 𑀯𑀘𑀦𑁂𑀢𑀺 𑀅𑀢𑁆𑀣𑁄. 𑀦𑀺𑀤𑀲𑁆𑀲𑀦𑀦𑁆𑀢𑀺 𑀲𑁂𑀲𑁄. 𑀅𑀣 𑀯𑀸 𑀲𑀺𑀓𑁆𑀔𑀸𑀓𑀸𑀫𑀢𑀸𑀬𑀸𑀢𑀺 𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀁. ‘‘𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁯𑁫 𑀆𑀤𑀬𑁄) 𑀯𑀺𑀬. 𑀇𑀤𑀫𑁆𑀧𑀺 𑀲𑀺𑀓𑁆𑀔𑀸𑀓𑀸𑀫𑀢𑀸𑀬 𑀅𑀬𑀁 𑀲𑀺𑀓𑁆𑀔𑀸𑀓𑀸𑀫𑀢𑀸 𑀲𑀺𑀓𑁆𑀔𑀸𑀓𑀸𑀫𑀪𑀸𑀯𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 ‘‘𑀢𑀢𑁆𑀭𑀺𑀤𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀪𑀺𑀓𑁆𑀔𑀽 𑀔𑀺𑀧𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁. 𑀅𑀣𑀸𑀢𑀺 𑀔𑀺𑀧𑀦𑀢𑁄 𑀧𑀘𑁆𑀙𑀸. 𑀇𑀤𑀦𑁆𑀢𑀺 𑀯𑀢𑁆𑀣𑀼. 𑀲𑀫𑁆𑀫𑀼𑀜𑁆𑀘𑀦𑀺𑀓𑀘𑀯𑀭𑀙𑀟𑁆𑀟𑀦𑀓𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀬𑀲𑁆𑀫𑀢𑀸 𑀭𑀸𑀳𑀼𑀮𑁂𑀦 𑀧𑀸𑀢𑀺𑀢𑀁 𑀦𑀼 𑀔𑁄𑀢𑀺 𑀬𑁄𑀚𑀦𑀸. 𑀲𑁄 𑀧𑀦𑀸𑀬𑀲𑁆𑀫𑀸 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀭𑀺𑀪𑁄𑀕𑀸 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁂𑀳𑀺 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸.

𑁫𑁧. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑀬𑀦𑀁 𑀲𑁂𑀬𑁆𑀬𑀸, 𑀓𑀸𑀬𑀧𑀲𑀸𑀭𑀡𑀓𑀺𑀭𑀺𑀬𑀸, 𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸, 𑀫𑀜𑁆𑀘𑀧𑀻𑀞𑀸𑀤𑀺. 𑀢𑀤𑀼𑀪𑀬𑀫𑁆𑀧𑀺 𑀏𑀓𑀲𑁂𑀲𑁂𑀦 𑀯𑀸 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀯𑀸 𑀏𑀓𑀢𑁄 𑀓𑀢𑁆𑀯𑀸 ‘‘𑀲𑀳𑀲𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁂𑀬𑁆𑀬𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀲𑁂𑀬𑁆𑀬𑀸𑀲𑀼. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑁆𑀯𑁂 𑀲𑁂𑀬𑁆𑀬𑀸 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸. ‘‘𑀲𑀩𑁆𑀩𑀘𑁆𑀙𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀓𑀝𑀯𑁄𑀳𑀸𑀭𑀦𑁆𑀢𑀺 𑀮𑁄𑀓𑁂 𑀯𑀺𑀤𑀺𑀢𑀁 𑀯𑀘𑀦𑀁. 𑀤𑀼𑀲𑁆𑀲𑀓𑀼𑀝𑀺𑀬𑀦𑁆𑀢𑀺 𑀤𑀼𑀲𑁆𑀲𑁂𑀦 𑀙𑀸𑀤𑀺𑀢𑀓𑀼𑀝𑀺𑀬𑀁. 𑀅𑀝𑁆𑀞𑀓𑀣𑀸𑀲𑀼 𑀬𑀣𑀸𑀯𑀼𑀢𑁆𑀢𑁂 𑀧𑀜𑁆𑀘𑀯𑀺𑀥𑀘𑁆𑀙𑀤𑀦𑁂𑀬𑁂𑀯 𑀕𑀬𑁆𑀳𑀫𑀸𑀦𑁂 𑀓𑁄 𑀤𑁄𑀲𑁄𑀢𑀺 𑀆𑀳 ‘‘𑀧𑀜𑁆𑀘𑀯𑀺𑀥𑀘𑁆𑀙𑀤𑀦𑁂𑀬𑁂𑀯𑀸’’𑀢𑀺𑀆𑀤𑀺. 𑀬𑀁 𑀧𑀦 𑀲𑁂𑀦𑀸𑀲𑀦𑀁 𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀓𑀸𑀭𑁂𑀦 𑀯𑀸𑀢𑀺 𑀇𑀝𑁆𑀞𑀓𑀲𑀺𑀮𑀸𑀤𑀸𑀭𑀼𑀦𑀸 𑀯𑀸. 𑀅𑀜𑁆𑀜𑁂𑀦 𑀯𑀸𑀢𑀺 𑀓𑀺𑀮𑀜𑁆𑀚𑀸𑀤𑀺𑀦𑀸 𑀯𑀸. 𑀯𑀢𑁆𑀣𑁂𑀦𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀇𑀝𑁆𑀞𑀓𑀸𑀤𑀺𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀲𑀸𑀢𑀺 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀸𑀬 𑀲𑁂𑀬𑁆𑀬𑀸𑀬. 𑀉𑀧𑀭𑀻𑀢𑀺 𑀯𑀸 𑀲𑀫𑀦𑁆𑀢𑀢𑁄𑀢𑀺 𑀯𑀸 𑀬𑁄𑀚𑀦𑀸. 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑀧𑀸𑀲𑀸𑀤𑀲𑁆𑀲 𑀯𑀴𑀜𑁆𑀚𑀺𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀏𑀓𑀽𑀧𑀘𑀸𑀭𑁄’’𑀢𑀺. 𑀲𑀢𑀕𑀩𑁆𑀪𑀁 𑀯𑀸 𑀘𑀢𑀼𑀲𑁆𑀲𑀸𑀮𑀁 𑀏𑀓𑀽𑀧𑀘𑀸𑀭𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁.

𑀢𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀸𑀬𑀁 𑀲𑁂𑀬𑁆𑀬𑀸𑀬𑀁. 𑀲𑀫𑁆𑀩𑀳𑀼𑀮𑀸 𑀲𑀸𑀫𑀡𑁂𑀭𑀸 𑀲𑀘𑁂 𑀳𑁄𑀦𑁆𑀢𑀺, 𑀏𑀓𑁄 𑀪𑀺𑀓𑁆𑀔𑀼 𑀲𑀘𑁂 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀸𑀫𑀡𑁂𑀭𑀸’’𑀢𑀺 𑀇𑀤𑀁 𑀧𑀘𑁆𑀘𑀸𑀲𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀸 𑀅𑀜𑁆𑀜𑁂𑀳𑀺𑀧𑀺 𑀲𑀳𑀲𑁂𑀬𑁆𑀬𑀸𑀦𑀁 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄. 𑀢𑁂𑀢𑀺 𑀲𑀸𑀫𑀡𑁂𑀭𑀸. 𑀲𑀩𑁆𑀩𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀢𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀏𑀲𑁂𑀯 𑀦𑀬𑁄𑀢𑀺 𑀏𑀲𑁄 𑀏𑀯 𑀦𑀬𑁄, 𑀦 𑀅𑀜𑁆𑀜𑁄 𑀦𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀏𑀲𑁂𑀯 𑀦𑀬𑁄𑀢𑀺 𑀏𑀲𑁄 𑀇𑀯 𑀦𑀬𑁄, 𑀏𑀲𑁄 𑀏𑀢𑀸𑀤𑀺𑀲𑁄 𑀦𑀬𑁄 𑀇𑀯 𑀅𑀬𑀁 𑀦𑀬𑁄 𑀤𑀝𑁆𑀞𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀅𑀧𑀺 𑀘𑀸𑀢𑀺 𑀏𑀓𑀁𑀲𑁂𑀦. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀘𑀢𑀼𑀓𑁆𑀓𑀦𑁆𑀢𑀺 𑀏𑀓𑀸𑀯𑀸𑀲𑀏𑀓𑀸𑀦𑀼𑀧𑀲𑀫𑁆𑀧𑀦𑁆𑀦𑀁, 𑀏𑀓𑀸𑀯𑀸𑀲𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑀁, 𑀦𑀸𑀦𑀸𑀯𑀸𑀲𑀏𑀓𑀸𑀦𑀼𑀧𑀲𑀫𑁆𑀧𑀦𑁆𑀦𑀁, 𑀦𑀸𑀦𑀸𑀯𑀸𑀲𑀦𑀸𑀦𑀼𑀧𑀲𑀫𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀲𑀫𑀽𑀳𑀁, 𑀘𑀢𑀼𑀧𑀭𑀺𑀫𑀸𑀡𑀁 𑀯𑀸. 𑀬𑁄𑀢𑀺 𑀪𑀺𑀓𑁆𑀔𑀼. 𑀳𑀺𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄, 𑀢𑀁 𑀯𑀘𑀦𑀁 𑀯𑀺𑀢𑁆𑀣𑀸𑀭𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄, 𑀯𑀺𑀢𑁆𑀣𑀸𑀭𑁄 𑀫𑀬𑀸 𑀯𑀼𑀘𑁆𑀘𑀢𑁂𑀢𑀺 𑀯𑀸. 𑀤𑁂𑀯𑀲𑀺𑀓𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂. 𑀡𑀺𑀓𑀧𑀘𑁆𑀘𑀬𑁄 𑀳𑀺 𑀯𑀺𑀘𑁆𑀙𑀢𑁆𑀣𑀯𑀸𑀘𑀓𑁄. 𑀬𑁄𑀧𑀺 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀭𑀸𑀢𑀺 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀸𑀧𑀻’’𑀢𑀺 𑀯𑀘𑀦𑁂.

‘‘𑀅𑀧𑀤𑀸𑀦𑀁 𑀅𑀳𑀺𑀫𑀘𑁆𑀙𑀸, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀓𑀼𑀓𑁆𑀓𑀼𑀝𑀻;

𑀘𑀢𑀼𑀧𑁆𑀧𑀤𑀸𑀦𑀁 𑀫𑀚𑁆𑀚𑀸𑀭𑀻, 𑀯𑀢𑁆𑀣𑀼 𑀧𑀸𑀭𑀸𑀚𑀺𑀓𑀲𑁆𑀲𑀺𑀫𑀸’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁫𑁫);

𑀇𑀫𑀁 𑀕𑀸𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀸. 𑀕𑁄𑀥𑀸𑀢𑀺 𑀓𑀼𑀡𑁆𑀟𑁄. 𑀩𑀺𑀴𑀸𑀮𑁄𑀢𑀺 𑀆𑀔𑀼𑀪𑀼𑀚𑁄. 𑀫𑀗𑁆𑀕𑀼𑀲𑁄𑀢𑀺 𑀦𑀓𑀼𑀮𑁄.

𑀅𑀲𑀫𑁆𑀩𑀤𑁆𑀥𑀪𑀺𑀢𑁆𑀢𑀺𑀓𑀲𑁆𑀲 𑀓𑀢𑀧𑀸𑀲𑀸𑀤𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀼𑀮𑀸𑀢𑀺 𑀏𑀢𑁆𑀣 𑀢𑀼𑀮𑀸 𑀦𑀸𑀫 𑀣𑀫𑁆𑀪𑀸𑀦, 𑀫𑀼𑀧𑀭𑀺 𑀤𑀓𑁆𑀔𑀺𑀡𑀼𑀢𑁆𑀢𑀭𑀯𑀺𑀢𑁆𑀣𑀸𑀭𑀯𑀲𑁂𑀦 𑀞𑀧𑀺𑀢𑁄 𑀤𑀸𑀭𑀼𑀯𑀺𑀲𑁂𑀲𑁄 𑀣𑀮𑀢𑀺 𑀣𑀫𑁆𑀪𑁂𑀲𑀼 𑀧𑀢𑀺𑀝𑁆𑀞𑀸𑀢𑀻𑀢𑀺 𑀓𑀢𑁆𑀯𑀸. 𑀢𑀸 𑀧𑀦 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀢𑀺𑀲𑁆𑀲𑁄, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀦 𑀧𑀜𑁆𑀘𑀲𑀢𑁆𑀢𑀦𑀯𑀸𑀤𑀬𑁄. 𑀦𑀸𑀦𑀽𑀧𑀘𑀸𑀭𑁂 𑀧𑀸𑀲𑀸𑀤𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀸𑀴𑀲𑀗𑁆𑀖𑀸𑀝𑀸𑀤𑀻𑀲𑀽𑀢𑀺 𑀯𑀸𑀴𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁂𑀲𑀼 𑀲𑀗𑁆𑀖𑀸𑀝𑀸𑀤𑀻𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀢𑀼𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀘 𑀲𑀗𑁆𑀖𑀸𑀝𑁄 𑀦𑀸𑀫 𑀢𑀼𑀮𑀸𑀦, 𑀫𑀼𑀧𑀭𑀺 𑀧𑀼𑀩𑁆𑀩𑀧𑀘𑁆𑀙𑀺𑀫𑀸𑀬𑀸𑀫𑀯𑀲𑁂𑀦 𑀞𑀧𑀺𑀢𑁄 𑀓𑀝𑁆𑀞𑀯𑀺𑀲𑁂𑀲𑁄 𑀲𑀫𑁆𑀫𑀸 𑀖𑀝𑁂𑀦𑁆𑀢𑀺 𑀏𑀢𑁆𑀣 𑀕𑁄𑀧𑀸𑀦𑀲𑁆𑀬𑀸𑀤𑀬𑁄𑀢𑀺 𑀓𑀢𑁆𑀯𑀸. 𑀢𑁂 𑀧𑀦 𑀢𑀬𑁄 𑀳𑁄𑀦𑁆𑀢𑀺. 𑀦𑀺𑀩𑁆𑀩𑀓𑁄𑀲𑀩𑁆𑀪𑀦𑁆𑀢𑀭𑁂𑀢𑀺 𑀙𑀤𑀦𑀓𑁄𑀝𑀺𑀅𑀩𑁆𑀪𑀦𑁆𑀢𑀭𑁂. 𑀧𑀭𑀺𑀫𑀡𑁆𑀟𑀮𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀲𑁂𑀦𑀸𑀲𑀦𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂. 𑀅𑀧𑀭𑀺𑀘𑁆𑀙𑀺𑀦𑁆𑀦𑁄 𑀕𑀩𑁆𑀪𑀲𑁆𑀲 𑀉𑀧𑀘𑀸𑀭𑁄 𑀏𑀢𑁂𑀲𑀦𑁆𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀩𑁆𑀪𑀽𑀧𑀘𑀸𑀭𑀸 𑀲𑀩𑁆𑀩𑀕𑀩𑁆𑀪𑀸, 𑀢𑁂 𑀧𑀯𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀧𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀫𑀼𑀔𑁂. 𑀧𑀫𑀼𑀔𑀲𑁆𑀲 𑀲𑀩𑁆𑀩𑀘𑁆𑀙𑀦𑁆𑀦𑀢𑁆𑀢𑀸, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀢𑁆𑀢𑀸 𑀘 𑀆𑀧𑀢𑁆𑀢𑀺𑀁 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. 𑀦𑀦𑀼 𑀧𑀫𑀼𑀔𑁂 𑀙𑀦𑁆𑀦𑀫𑁂𑀯 𑀅𑀢𑁆𑀣𑀺, 𑀦𑁄 𑀧𑀭𑀺𑀘𑁆𑀙𑀦𑁆𑀦𑀦𑁆𑀢𑀺 𑀆𑀳 ‘‘𑀕𑀩𑁆𑀪𑀧𑀭𑀺𑀓𑁆𑀔𑁂𑀧𑁄’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁.

𑀬𑀁 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀕𑀢𑀻𑀢𑀺 𑀧𑀣𑀯𑀺𑀬𑀸 𑀘 𑀫𑀦𑁆𑀤𑀺𑀭𑀸𑀮𑀺𑀦𑁆𑀤𑀯𑀢𑁆𑀣𑀼𑀲𑁆𑀲 𑀘 𑀦𑀸𑀫𑀫𑁂𑀢𑀁. 𑀇𑀥 𑀧𑀦 𑀫𑀦𑁆𑀤𑀺𑀭𑀸𑀮𑀺𑀦𑁆𑀤𑀯𑀢𑁆𑀣𑀼𑀲𑀗𑁆𑀔𑀸𑀢𑀸 𑀪𑀽𑀪𑁂𑀤𑀸 𑀕𑀳𑀺𑀢𑀸. 𑀢𑀢𑁆𑀣𑀸𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁. 𑀓𑀲𑁆𑀫𑀸 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀆𑀳 ‘‘𑀤𑀲𑀳𑀢𑁆𑀣𑀼𑀩𑁆𑀩𑁂𑀥𑀸𑀧𑀻’’𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸. 𑀢𑀢𑁆𑀣𑀸𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁. 𑀬𑁂𑀧𑀺 𑀫𑀳𑀸𑀧𑀸𑀲𑀸𑀤𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀼𑀧𑀻𑀢𑀺 𑀫𑀳𑀸𑀧𑀸𑀲𑀸𑀤𑁂𑀲𑀼𑀧𑀺.

𑀲𑀼𑀥𑀸𑀙𑀤𑀦𑀫𑀡𑁆𑀟𑀧𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀲𑀼𑀥𑀸’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁 𑀬𑁂𑀦 𑀓𑁂𑀦𑀘𑀺 𑀙𑀤𑀦𑀫𑀡𑁆𑀟𑀧𑀲𑁆𑀲𑀸𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀫𑀡𑁆𑀟𑀁 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑀭𑀲𑁆𑀫𑀺, 𑀢𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀢𑁄 𑀯𑀸 𑀚𑀦𑀦𑁆𑀢𑀺 𑀫𑀡𑁆𑀟𑀧𑀁. 𑀦𑀦𑀼 𑀏𑀓𑀽𑀧𑀘𑀸𑀭𑀁 𑀳𑁄𑀢𑀺 𑀧𑀸𑀓𑀸𑀭𑀲𑁆𑀲 𑀙𑀺𑀤𑁆𑀤𑀢𑁆𑀢𑀸𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀯𑀴𑀜𑁆𑀚𑀦𑀢𑁆𑀣𑀸𑀬 𑀏𑀯𑀸𑀢𑀺 𑀏𑀯𑀓𑀸𑀭𑁄 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀦 𑀯𑀴𑀜𑁆𑀚𑀦𑀽𑀧𑀘𑁆𑀙𑁂𑀤𑀦𑀢𑁆𑀣𑀸𑀬𑀸’’𑀢𑀺. 𑀅𑀣 𑀯𑀸 ‘‘𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻’’𑀢𑀺 (𑀉𑀤𑀸. 𑀅𑀝𑁆𑀞. 𑁧; 𑀤𑀻. 𑀦𑀺. 𑀝𑀺. 𑁧.𑁧; 𑀫. 𑀦𑀺. 𑀝𑀻. 𑁧.𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀲𑀁. 𑀦𑀺. 𑀝𑀻. 𑁧.𑁧.𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁧.𑁧.𑀭𑀼𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸 ‘‘𑀦 𑀯𑀴𑀜𑁆𑀚𑀦𑀽𑀧𑀘𑁆𑀙𑁂𑀤𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀓𑀯𑀸𑀝𑀦𑁆𑀢𑀺 𑀏𑀢𑁆𑀣 𑀤𑁆𑀯𑀸𑀭𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀅𑀲𑀢𑀺 𑀘 𑀤𑁆𑀯𑀸𑀭𑁂 𑀓𑀯𑀸𑀝𑀲𑁆𑀲𑀸𑀪𑀸𑀯𑀢𑁄. 𑀲𑀁𑀯𑀭𑀡𑀯𑀺𑀯𑀭𑀡𑀓𑀸𑀮𑁂 𑀓𑀯𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀓𑀯𑀸𑀝𑀁.

𑀢𑀢𑁆𑀭𑀸𑀢𑀺 ‘‘𑀏𑀓𑀽𑀧𑀘𑀸𑀭𑀢𑁆𑀢𑀸’’𑀢𑀺 𑀯𑀘𑀦𑁂. 𑀬𑀲𑁆𑀲𑀸𑀢𑀺 𑀧𑀭𑀯𑀸𑀤𑀺𑀦𑁄. 𑀅𑀦𑀼𑀬𑁄𑀕𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀧𑀺𑀳𑀺𑀢𑀤𑁆𑀯𑀸𑀭𑁂 𑀕𑀩𑁆𑀪𑁂. 𑀲𑁄𑀢𑀺 𑀧𑀭𑀯𑀸𑀤𑀻. 𑀲𑀩𑁆𑀩𑀘𑁆𑀙𑀦𑁆𑀦𑀢𑁆𑀢𑀸 𑀆𑀧𑀢𑁆𑀢𑀺 𑀇𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 ‘‘𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀢𑀸 𑀦 𑀳𑁄𑀢𑀻’’𑀢𑀺 𑀏𑀢𑁆𑀣𑀸𑀧𑀺. 𑀧𑀘𑁆𑀘𑀸𑀕𑀫𑀺𑀲𑁆𑀲𑀢𑀻𑀢𑀺 𑀧𑀢𑀺 𑀆𑀕𑀫𑀺𑀲𑁆𑀲𑀢𑀺, 𑀧𑀼𑀦 𑀆𑀕𑀫𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀦𑁂𑀯𑀸𑀢𑀺 ‘‘𑀲𑀩𑁆𑀩𑀘𑁆𑀙𑀦𑁆𑀦𑀸’’𑀢𑀺𑀆𑀤𑀺𑀅𑀓𑁆𑀔𑀭𑀧𑀤𑀫𑀢𑁆𑀢𑁂𑀦𑁂𑀯, 𑀦 𑀅𑀢𑁆𑀣𑀯𑀲𑁂𑀦. ‘‘𑀏𑀯𑀜𑁆𑀘 𑀲𑀢𑀻’’𑀢𑀺 𑀇𑀫𑀺𑀦𑀸 𑀅𑀩𑁆𑀬𑀸𑀧𑀺𑀢𑀤𑁄𑀲𑀁 𑀤𑀲𑁆𑀲𑁂𑀢𑀺. 𑀢𑀢𑁄𑀢𑀺 𑀅𑀦𑀸𑀧𑀢𑁆𑀢𑀺𑀢𑁄, 𑀧𑀭𑀺𑀳𑀸𑀬𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀦𑀺𑀬𑀢𑁂𑀲𑀼 𑀯𑀼𑀢𑁆𑀢𑀁, 𑀢𑀲𑁆𑀫𑀸. 𑀢𑀢𑁆𑀣𑀸𑀢𑀺 𑀅𑀦𑀺𑀬𑀢𑁂𑀲𑀼. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂𑀧𑀺. 𑀬𑀁 𑀬𑀦𑁆𑀢𑀺 𑀲𑁂𑀦𑀸𑀲𑀦𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑁂𑀦𑀸𑀲𑀦𑁂𑀲𑀼, 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁩. 𑀤𑁆𑀯𑀻𑀲𑀼 𑀅𑀝𑁆𑀞𑀓𑀣𑀸𑀯𑀸𑀤𑁂𑀲𑀼 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁄𑀯 𑀬𑀼𑀢𑁆𑀢𑁄𑀢𑀺 𑀲𑁄 𑀧𑀘𑁆𑀙𑀸 𑀯𑀼𑀢𑁆𑀢𑁄.

𑀇𑀫𑀺𑀦𑀸𑀧𑀻𑀢𑀺 𑀲𑁂𑀦𑀫𑁆𑀩𑀫𑀡𑁆𑀟𑀧𑁂𑀦𑀸𑀧𑀺. 𑀏𑀢𑀦𑁆𑀢𑀺 𑀚𑀕𑀢𑀺𑀬𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀢𑀁. 𑀬𑀣𑀸𑀢𑀺 𑀬𑀁𑀲𑀤𑁆𑀤𑀢𑁆𑀣𑁄 𑀢𑀢𑀺𑀬𑀦𑁆𑀢𑀦𑀺𑀧𑀸𑀢𑁄, 𑀬𑁂𑀦 𑀲𑁂𑀦𑀫𑁆𑀩𑀫𑀡𑁆𑀟𑀧𑁂𑀦𑀸𑀢𑀺 𑀅𑀢𑁆𑀣𑁄𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀁

𑁫𑁫. 𑀙𑀝𑁆𑀞𑁂 𑀆𑀕𑀦𑁆𑀢𑀼𑀓𑀸 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀯𑀲𑀣𑁄, 𑀆𑀯𑀲𑀣𑁄 𑀘 𑀲𑁄 𑀅𑀕𑀸𑀭𑀜𑁆𑀘𑁂𑀢𑀺 𑀆𑀯𑀲𑀣𑀸𑀕𑀸𑀭𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀕𑀦𑁆𑀢𑀼𑀓𑀸𑀦𑀁 𑀯𑀲𑀦𑀸𑀕𑀸𑀭’’𑀦𑁆𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀺𑀓𑀸 𑀯𑀘𑀦𑀁 𑀲𑀼𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀸𑀝𑀓𑀦𑁆𑀢𑀺 𑀉𑀢𑁆𑀢𑀭𑀲𑀸𑀝𑀓𑀁, 𑀦𑀺𑀯𑀢𑁆𑀣𑀯𑀢𑁆𑀣𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀘𑁆𑀘𑀸𑀕𑀫𑁆𑀫𑀸𑀢𑀺 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀧𑀤𑀲𑁆𑀲 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀯𑀢𑁆𑀢𑁄’’𑀢𑀺. 𑀬𑀣𑀸 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂 𑀅𑀓𑁆𑀓𑁄𑀲𑁂𑀢𑀼𑀓𑀸𑀫𑀢𑀸𑀬 𑀔𑀢𑁆𑀢𑀺𑀬𑀁 ‘‘𑀘𑀡𑁆𑀟𑀸𑀮𑁄’’𑀢𑀺 𑀯𑀤𑀢𑁄 𑀅𑀮𑀺𑀓𑀁 𑀪𑀡𑀢𑁄𑀧𑀺 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀆𑀧𑀢𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀫𑀸𑀢𑀼𑀕𑀸𑀫𑁂𑀦 𑀲𑀳 𑀲𑀬𑀢𑁄 𑀧𑀞𑀫𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀇𑀫𑀺𑀦𑀸𑀯 𑀆𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀙𑀝𑁆𑀞𑀁.

𑁭. 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀁

𑁬𑁦. 𑀲𑀢𑁆𑀢𑀫𑁂 𑀫𑀳𑀸𑀤𑁆𑀯𑀸𑀭𑁂𑀢𑀺 𑀩𑀳𑀺 𑀞𑀺𑀢𑁂 𑀫𑀳𑀸𑀤𑁆𑀯𑀸𑀭𑁂. 𑀆𑀕𑀫𑁆𑀫, 𑀧𑀯𑀺𑀲𑀺𑀢𑁆𑀯𑀸 𑀯𑀸 𑀯𑀲𑀦𑀝𑁆𑀞𑀸𑀦𑀢𑁆𑀢𑀸 𑀑𑀯𑀭𑀓𑁄 𑀆𑀯𑀲𑀣𑁄 𑀦𑀸𑀫𑀸𑀢𑀺 𑀆𑀳 ‘‘𑀑𑀯𑀭𑀓𑀤𑁆𑀯𑀸𑀭𑁂’’𑀢𑀺. 𑀲𑀼𑀦𑀺𑀕𑁆𑀕𑀢𑁂𑀦𑀸𑀢𑀺 𑀲𑀼𑀝𑁆𑀞𑀼 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁂𑀦 𑀲𑀤𑁆𑀤𑁂𑀦. ‘‘𑀅𑀜𑁆𑀜𑀸𑀢𑀼’’𑀦𑁆𑀢𑀺 𑀧𑀤𑀲𑁆𑀲 ‘‘𑀦 𑀜𑀸𑀢𑀼’’𑀦𑁆𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀆𑀚𑀸𑀦𑀺𑀢𑀼’’𑀦𑁆𑀢𑀺. 𑀇𑀫𑀺𑀦𑀸 𑀦𑀓𑀸𑀭𑀯𑀺𑀓𑀸𑀭𑁄 𑀅𑀇𑀢𑀺 𑀦𑀺𑀧𑀸𑀢𑁄 𑀦 𑀳𑁄𑀢𑀺, 𑀆𑀇𑀢𑀺 𑀉𑀧𑀲𑀕𑁆𑀕𑁄𑀢𑀺 𑀧𑀦 𑀤𑀲𑁆𑀲𑁂𑀢𑀺. ‘‘𑀯𑀺𑀜𑁆𑀜𑀼𑀦𑀸 𑀧𑀼𑀭𑀺𑀲𑁂𑀦𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑀢𑁆𑀯𑀸 ‘‘𑀧𑀼𑀭𑀺𑀲𑀯𑀺𑀕𑁆𑀕𑀳𑁂𑀦𑀸’’𑀢𑀺 𑀯𑀤𑀦𑁆𑀢𑁄 𑀫𑀦𑀼𑀲𑁆𑀲𑀧𑀼𑀭𑀺𑀲𑀯𑀺𑀕𑁆𑀕𑀳𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀦 𑀬𑀓𑁆𑀔𑁂𑀦 𑀧𑁂𑀢𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑁂𑀦 𑀲𑀤𑁆𑀥𑀺𑀁 𑀞𑀺𑀢𑀸𑀬 𑀫𑀸𑀢𑀼𑀕𑀸𑀫𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀬𑀓𑁆𑀔𑁂𑀦𑀸𑀢𑀺 𑀬𑀓𑁆𑀔𑁂𑀦 𑀲𑀤𑁆𑀥𑀺𑀁 𑀞𑀺𑀢𑀸𑀬 𑀫𑀸𑀢𑀼𑀕𑀸𑀫𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 ‘‘𑀦 𑀧𑁂𑀢𑁂𑀦, 𑀦 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀸’’𑀢𑀺 𑀏𑀢𑁆𑀣𑀸𑀧𑀺.

𑁬𑁬. 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀻𑀢𑀺 𑀏𑀢𑁆𑀣 ‘‘𑀧𑀜𑁆𑀘𑀸’’𑀢𑀺 𑀯𑀸𑀘𑀸𑀲𑀺𑀮𑀺𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁 𑀓𑀲𑁆𑀲𑀘𑀺 𑀧𑀬𑁄𑀚𑀦𑀲𑁆𑀲𑀸𑀪𑀸𑀯𑀸. 𑀢𑀢𑁆𑀣𑀸𑀢𑀺 ‘‘𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀻’’𑀢𑀺 𑀧𑀤𑁂. 𑀏𑀓𑁄 𑀕𑀸𑀣𑀸𑀧𑀸𑀤𑁄 𑀏𑀓𑀸 𑀯𑀸𑀘𑀸𑀢𑀺 𑀯𑀤𑀦𑁆𑀢𑁄 𑀘𑀼𑀡𑁆𑀡𑀺𑀬𑁂 𑀯𑀺𑀪𑀢𑁆𑀬𑀦𑁆𑀢𑀁 𑀏𑀓𑀁 𑀧𑀤𑀁 𑀏𑀓𑀸 𑀯𑀸𑀘𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺, 𑀅𑀢𑁆𑀣𑀚𑁄𑀢𑀓𑀧𑀤𑀁 𑀯𑀸 𑀯𑀸𑀓𑁆𑀬𑀧𑀤𑀁 𑀯𑀸 𑀦 𑀕𑀳𑁂𑀢𑀩𑁆𑀩𑀁. ‘‘𑀏𑀓𑀁 𑀧𑀤𑀁 𑀧𑀸𑀴𑀺𑀢𑁄, 𑀧𑀜𑁆𑀘 𑀅𑀝𑁆𑀞𑀓𑀣𑀸𑀢𑁄’’𑀢𑀺 𑀇𑀫𑀺𑀦𑀸 ‘‘𑀤𑁆𑀯𑁂 𑀧𑀤𑀸𑀦𑀺 𑀧𑀸𑀴𑀺𑀢𑁄, 𑀘𑀢𑁆𑀢𑀸𑀭𑀺 𑀅𑀝𑁆𑀞𑀓𑀣𑀸𑀢𑁄’’𑀢𑀺𑀆𑀤𑀺𑀦𑀬𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀙𑀧𑀤𑀸𑀦𑀢𑀺𑀓𑁆𑀓𑀫𑁄𑀬𑁂𑀯 𑀳𑀺 𑀧𑀫𑀸𑀡𑀁. 𑀢𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀲𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂 𑀮𑀺𑀗𑁆𑀕𑀲𑁆𑀲𑀸𑀧𑀺 𑀯𑀺𑀧𑀮𑁆𑀮𑀸𑀲𑁄 𑀳𑁄𑀢𑀺 ‘‘𑀢𑀲𑁆𑀫𑀺’’𑀦𑁆𑀢𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑀢𑀺 𑀘 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁂 ‘‘𑀢𑀲𑁆𑀲𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂𑀦 𑀧𑀯𑀢𑁆𑀢𑀸. ‘‘𑀫𑀸𑀢𑀼𑀕𑀸𑀫𑀲𑁆𑀲𑀸’’𑀢𑀺 𑀦𑀺𑀬𑀢𑀧𑀼𑀮𑁆𑀮𑀺𑀗𑁆𑀕𑀸𑀧𑁂𑀓𑁆𑀔𑀦𑀲𑁆𑀲 𑀅𑀲𑀫𑁆𑀪𑀯𑀢𑁄 𑀅𑀢𑁆𑀣𑀯𑀲𑁂𑀦 ‘‘𑀏𑀓𑀺𑀲𑁆𑀲𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀪𑁂𑀤𑀮𑀺𑀗𑁆𑀕𑀦𑀺𑀲𑁆𑀲𑀺𑀢𑁄 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑁄𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀼𑀫𑁆𑀳𑀸𑀓𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁄. ‘‘𑀲𑀼𑀡𑀸𑀣𑀸’’𑀢𑀺 𑀅𑀯𑀢𑁆𑀯𑀸 𑀆𑀪𑁄𑀕𑁄𑀧𑀺 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀧𑀞𑀫’’𑀦𑁆𑀢𑀺𑀆𑀤𑀺. 𑀧𑀞𑀫𑀦𑁆𑀢𑀺 𑀘 𑀧𑀞𑀫𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀧𑀘𑁆𑀙𑀸’’𑀢𑀺. 𑀧𑀼𑀝𑁆𑀞𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼 𑀓𑀣𑁂𑀢𑀻𑀢𑀺 𑀬𑁄𑀚𑀦𑀸𑀢𑀺. 𑀲𑀢𑁆𑀢𑀫𑀁.

𑁮. 𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀁

𑁬𑁭. 𑀅𑀝𑁆𑀞𑀫𑁂 𑀢𑀢𑁆𑀣𑀸𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂. 𑀇𑀥𑀸𑀢𑀺 𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀧𑀬𑀼𑀢𑁆𑀢𑀯𑀸𑀘𑀸𑀢𑀺 𑀧𑀘𑁆𑀘𑀬𑁂𑀳𑀺 𑀬𑀼𑀢𑁆𑀢𑀸 𑀯𑀸𑀘𑀸. 𑀢𑀣𑀸𑀢𑀺 𑀢𑀢𑁄 𑀕𑀼𑀡𑀸𑀭𑁄𑀘𑀦𑀓𑀸𑀭𑀡𑀸, 𑀅𑀭𑀺𑀬𑀸 𑀲𑀸𑀤𑀺𑀬𑀺𑀁𑀲𑀽𑀢𑀺 𑀬𑁄𑀚𑀦𑀸.

𑀬𑀢𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀬𑁂’’𑀢𑀺𑀆𑀤𑀺. 𑀲𑀩𑁆𑀩𑁂𑀧𑀻𑀢𑀺 𑀧𑀼𑀣𑀼𑀚𑁆𑀚𑀦𑀸𑀭𑀺𑀬𑀸𑀧𑀺. 𑀪𑀽𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀁. 𑀓𑀲𑁆𑀫𑀸 𑀲𑀩𑁆𑀩𑁂𑀧𑀺 𑀧𑀝𑀺𑀚𑀸𑀦𑀺𑀁𑀲𑀼, 𑀦𑀦𑀼 𑀅𑀭𑀺𑀬𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑀸𑀦𑀁 𑀅𑀦𑀸𑀭𑁄𑀘𑀺𑀢𑀢𑁆𑀢𑀸 𑀦 𑀧𑀝𑀺𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀭𑀺𑀬𑀸𑀦𑀫𑁆𑀧𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀅𑀭𑀺𑀬𑀸𑀦𑀫𑁆𑀧𑀺 𑀅𑀩𑁆𑀪𑀦𑁆𑀢𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀬𑀲𑁆𑀫𑀸 𑀪𑀽𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 ‘‘𑀪𑀽𑀢𑀁 𑀪𑀕𑀯𑀸’’𑀢𑀺 𑀧𑀝𑀺𑀚𑀸𑀦𑀺𑀁𑀲𑀽𑀢𑀺 𑀬𑁄𑀚𑀦𑀸. 𑀬𑀲𑁆𑀫𑀸 𑀪𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸𑀢𑀺 𑀬𑁄𑀚𑀦𑀸. 𑀅𑀭𑀺𑀬𑀸 𑀧𑀝𑀺𑀚𑀸𑀦𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀦𑁄𑀢𑀺 𑀤𑁄𑀲𑀲𑁆𑀲 𑀅𑀤𑀲𑁆𑀲𑀦𑀥𑀫𑁆𑀫𑀸. 𑀢𑁂𑀳𑀻𑀢𑀺 𑀅𑀭𑀺𑀬𑁂𑀳𑀺, 𑀪𑀸𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀧𑀺𑀡𑁆𑀟𑀧𑀸𑀢𑀁 𑀉𑀧𑁆𑀧𑀸𑀤𑁂𑀲𑀼𑀦𑁆𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁂𑀦𑁂𑀯𑀸𑀢𑀺 𑀲𑀩𑁆𑀩𑁂𑀲𑀁 𑀧𑀼𑀣𑀼𑀚𑁆𑀚𑀦𑀸𑀭𑀺𑀬𑀸𑀦𑀁 𑀲𑀗𑁆𑀕𑀳𑀡𑁂 𑀧𑀯𑀢𑁆𑀢𑁂𑀦𑁂𑀯. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂𑀧𑀻𑀢𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀤𑀪𑀸𑀚𑀦𑀺𑀬𑁂𑀧𑀺. 𑀢𑀢𑁆𑀣𑀸𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑁭𑁭. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀼𑀢𑀸𑀤𑀺𑀕𑀼𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀸 𑀯𑀸𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀯𑀸. 𑀅𑀢𑀺𑀓𑀟𑁆𑀠𑀺𑀬𑀫𑀸𑀦𑁂𑀦𑀸𑀢𑀺 𑀅𑀢𑀺𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁂𑀦. 𑀉𑀫𑁆𑀫𑀢𑁆𑀢𑀓𑀲𑁆𑀲𑀸𑀢𑀺 𑀇𑀤𑀁 𑀧𑀦𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄. 𑀢𑁂𑀦 ‘‘𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀦𑁆𑀢𑀺 𑀫𑀕𑁆𑀕𑀧𑀜𑁆𑀜𑀸𑀬, 𑀨𑀮𑀧𑀜𑁆𑀜𑀸𑀬 𑀘 𑀲𑀫𑁆𑀧𑀦𑁆𑀦𑀸𑀦𑀁. 𑀅𑀦𑀸𑀧𑀢𑁆𑀢𑀻𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀆𑀧𑀢𑁆𑀢𑀺𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺. 𑀅𑀝𑁆𑀞𑀫𑀁.

𑁯. 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀁

𑁭𑁮. 𑀦𑀯𑀫𑁂 𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 ‘‘𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫𑀸’’𑀢𑀺𑀆𑀤𑀺𑀧𑀸𑀴𑀺𑀬𑀁, 𑀢𑀸𑀲𑀼 𑀯𑀸 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀼. 𑀯𑀺𑀘𑀸𑀭𑀡𑀸𑀢𑀺 𑀯𑀻𑀫𑀁𑀲𑀦𑀸. 𑀉𑀧𑀲𑀫𑁆𑀧𑀦𑁆𑀦𑀲𑀤𑁆𑀤𑁂𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑀤𑁆𑀤𑀢𑁆𑀣𑀪𑀸𑀯𑁂. 𑀏𑀢𑁆𑀣 𑀳𑀺 𑀲𑀤𑁆𑀤𑁂 𑀯𑀼𑀘𑁆𑀘𑀫𑀸𑀦𑁂 𑀅𑀯𑀺𑀦𑀸𑀪𑀸𑀯𑀢𑁄 𑀲𑀤𑁆𑀤𑁂𑀦 𑀅𑀢𑁆𑀣𑁄𑀧𑀺 𑀯𑀼𑀢𑁆𑀢𑁄, 𑀯𑀺𑀦𑀸𑀧𑀺 𑀪𑀸𑀯𑀧𑀘𑁆𑀘𑀬𑁂𑀦 𑀪𑀸𑀯𑀢𑁆𑀣𑀲𑁆𑀲 𑀜𑀸𑀢𑀩𑁆𑀩𑀢𑁆𑀢𑀸 𑀪𑀸𑀯𑁄𑀧𑀺 𑀕𑀳𑁂𑀢𑀩𑁆𑀩𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀧𑀲𑀫𑁆𑀧𑀦𑁆𑀦𑀲𑀤𑁆𑀤𑀢𑁆𑀣𑀪𑀸𑀯𑁂’’𑀢𑀺. 𑀏𑀲𑁂𑀯 𑀦𑀬𑁄 ‘‘𑀤𑀼𑀝𑁆𑀞𑀼𑀮𑁆𑀮𑀲𑀤𑁆𑀤𑁂’’𑀢𑀺 𑀏𑀢𑁆𑀣𑀸𑀧𑀺. 𑀏𑀢𑀁 𑀧𑀭𑀺𑀫𑀸𑀡𑀁 𑀬𑀲𑁆𑀲𑀸𑀢𑀺 𑀏𑀢𑀁, ‘‘𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸’’𑀢𑀺 𑀯𑀘𑀦𑀁. 𑀏𑀢𑀁 𑀏𑀯 𑀯𑀢𑁆𑀢𑀩𑁆𑀩𑀁, 𑀦 ‘‘𑀘𑀢𑁆𑀢𑀸𑀭𑀺 𑀘 𑀧𑀸𑀭𑀸𑀚𑀺𑀓𑀸𑀦𑀻’’𑀢𑀺 𑀇𑀤𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀧𑀸𑀴𑀺𑀬𑀁. 𑀓𑀲𑁆𑀲𑀘𑀺 𑀯𑀺𑀫𑀢𑀺 𑀪𑀯𑁂𑀬𑁆𑀬, 𑀓𑀺𑀁 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀦𑁆𑀢𑁂𑀦 𑀅𑀓𑁆𑀓𑁄𑀲𑀦𑁆𑀢𑀲𑁆𑀲 𑀲𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀯𑀁 𑀲𑀢𑀻’’𑀢𑀺𑀆𑀤𑀺. 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀘𑀸𑀢𑀺 𑀘𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄, 𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀚𑁆𑀚𑀦𑀢𑀁, ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺…𑀧𑁂… 𑀑𑀫𑀲𑀯𑀸𑀤𑀲𑁆𑀲𑀸’’𑀢𑀺 𑀯𑀘𑀦𑀁 𑀯𑀸, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀧𑀸𑀴𑀺𑀬𑀁. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀯𑁂𑀢𑀺 𑀏𑀢𑁆𑀣 𑀏𑀯𑀓𑀸𑀭𑁄 𑀅𑀝𑁆𑀞𑀸𑀦𑀬𑁄𑀕𑁄, 𑀧𑀫𑀸𑀡𑀦𑁆𑀢𑀺 𑀏𑀢𑁆𑀣 𑀬𑁄𑀚𑁂𑀢𑀩𑁆𑀩𑁄, 𑀓𑀸𑀭𑀡𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀅𑀜𑁆𑀜𑀸 𑀯𑀺𑀘𑀸𑀭𑀡𑀸’’𑀢𑀺. 𑀅𑀣 𑀯𑀸 𑀅𑀜𑁆𑀜𑀸𑀢𑀺 𑀲𑀸𑀫𑁆𑀬𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀫𑁂𑀢𑀁, 𑀦 𑀅𑀜𑁆𑀜𑁂𑀲𑀁 𑀯𑀺𑀘𑀸𑀭𑀡𑀸 𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀲𑀢𑀺 𑀏𑀯𑀓𑀸𑀭𑁄 𑀞𑀸𑀦𑀬𑁄𑀕𑁄𑀯. 𑀧𑀼𑀩𑁆𑀩𑁂𑀧𑀺 𑀘𑀸𑀢𑀺 𑀕𑀦𑁆𑀣𑀸𑀭𑀫𑁆𑀪𑀓𑀸𑀮𑁂𑀧𑀺 𑀘.

𑀏𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀧𑀫𑀸𑀡𑀢𑀁. 𑀲𑀁𑀯𑀭𑀢𑁆𑀣𑀸𑀬 𑀏𑀯, 𑀅𑀦𑀸𑀧𑀚𑁆𑀚𑀦𑀢𑁆𑀣𑀸𑀬 𑀏𑀯 𑀘 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀦 𑀢𑀲𑁆𑀲’’𑀢𑁆𑀬𑀸𑀤𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀪𑀺𑀓𑁆𑀔𑀼𑀪𑀸𑀯𑁄 𑀦𑀸𑀫 𑀦 𑀅𑀢𑁆𑀣𑀺, 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁦. 𑀲𑀸𑀢𑀺 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺, 𑀲𑀗𑁆𑀖𑁂𑀦 𑀓𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀓𑀢𑁆𑀣𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. ‘‘𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀧𑀤𑀁 ‘‘𑀓𑀸𑀢𑀩𑁆𑀩𑀸’’𑀢𑀺 𑀧𑀤𑁂 𑀳𑁂𑀢𑀼. 𑀏𑀲𑀸𑀢𑀺 𑀏𑀲𑁄 𑀪𑀺𑀓𑁆𑀔𑀼. 𑀳𑀺𑀢𑁂𑀲𑀺𑀢𑀸𑀬𑀸𑀢𑀺 𑀳𑀺𑀢𑀲𑁆𑀲 𑀏𑀲𑀺𑀢𑀸𑀬, 𑀅𑀢𑁆𑀣𑀲𑁆𑀲 𑀇𑀘𑁆𑀙𑀢𑀸𑀬𑀸𑀢𑀺 𑀅𑀢𑁆𑀣𑁄.

𑁮𑁨. 𑀲𑁂𑀲𑀸𑀦𑀻𑀢𑀺 𑀆𑀤𑀺𑀫𑁆𑀳𑀺 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀢𑁄 𑀲𑁂𑀲𑀸𑀦𑀺 𑀉𑀧𑀭𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀅𑀲𑁆𑀲𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲. 𑀖𑀝𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸𑀢𑀺. 𑀦𑀯𑀫𑀁.

𑁧𑁦. 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀁

𑁮𑁬. 𑀤𑀲𑀫𑁂 𑀪𑀕𑀯𑀸 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀧𑀣𑀯𑀺𑀬𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀸𑀲𑀸𑀡𑀸𑀤𑀻𑀲𑀼. 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀢𑁄𑀢𑀺 𑀔𑀝𑀓𑀧𑀫𑀸𑀡𑀢𑁄. 𑀲𑀸𑀢𑀺 𑀅𑀤𑀟𑁆𑀠𑀧𑀣𑀯𑀻. 𑀳𑀢𑁆𑀣𑀺𑀓𑀼𑀘𑁆𑀙𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀞𑀸𑀦𑁂. 𑀏𑀓𑀧𑀘𑁆𑀙𑀺𑀧𑀽𑀭𑀁 𑀧𑀣𑀯𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁𑀬𑁂𑀯𑀸𑀢𑀺 𑀅𑀧𑁆𑀧𑀧𑀁𑀲𑀼𑀅𑀧𑁆𑀧𑀫𑀢𑁆𑀢𑀺𑀓𑀸𑀧𑀤𑀸𑀦𑀁 𑀏𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦𑀧𑀸𑀲𑀸𑀡𑀸𑀤𑀺𑀧𑀜𑁆𑀘𑀓𑀁. 𑀢𑀦𑁆𑀢𑀺 𑀓𑀼𑀲𑀻𑀢𑀁. 𑀆𑀡𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀆𑀡 𑀧𑁂𑀲𑀦𑁂’’𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 𑀆𑀡𑀥𑀸𑀢𑀼𑀬𑁂𑀯 𑀧𑁂𑀲𑀦𑀲𑀗𑁆𑀔𑀸𑀢𑀁 𑀳𑁂𑀢𑁆𑀯𑀢𑁆𑀣𑀁 𑀯𑀤𑀢𑀺, 𑀦 𑀡𑀸𑀧𑁂𑀧𑀘𑁆𑀘𑀬𑁄, 𑀲𑁄 𑀧𑀦 𑀥𑀸𑀢𑁆𑀯𑀢𑁆𑀣𑁂𑀬𑁂𑀯 𑀯𑀢𑁆𑀢𑀢𑀺. 𑀦 𑀳𑀺 𑀢𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑁄 𑀅𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑀺 𑀥𑀸𑀢𑁆𑀯𑀢𑁆𑀣𑀢𑁄 𑀅𑀜𑁆𑀜𑀲𑁆𑀲 𑀅𑀪𑀺𑀥𑁂𑀬𑁆𑀬𑀲𑁆𑀲𑀸𑀪𑀸𑀯𑀸. 𑀢𑀸𑀯𑀸𑀢𑀺 𑀧𑀞𑀫𑀁 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀲𑁆𑀲, 𑀢𑀢𑁄 𑀯𑀸.

𑀧𑁄𑀓𑁆𑀔𑀭𑀁 𑀧𑀤𑀼𑀫𑀁 𑀦𑁂𑀢𑀻𑀢𑀺 𑀧𑁄𑀓𑁆𑀔𑀭𑀡𑀻. ‘‘𑀲𑁄𑀥𑁂𑀦𑁆𑀢𑁂𑀳𑀻’’𑀢𑀺 𑀧𑀤𑀁 ‘‘𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀅𑀧𑀦𑁂𑀢𑀼’’𑀦𑁆𑀢𑀺 𑀧𑀤𑁂𑀲𑀼 𑀪𑀸𑀯𑀓𑀢𑁆𑀢𑀸. 𑀬𑁄𑀢𑀺 ‘‘𑀢𑀦𑀼𑀓𑀤𑁆𑀤𑀫𑁄’’𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀬𑁄 𑀢𑀦𑀼𑀓𑀤𑁆𑀤𑀫𑁄𑀢𑀺 𑀳𑀺 𑀅𑀢𑁆𑀣𑁄. 𑀓𑀼𑀝𑁂𑀳𑀻𑀢𑀺 𑀖𑀝𑁂𑀳𑀺. 𑀉𑀲𑁆𑀲𑀺𑀜𑁆𑀘𑀺𑀢𑀼𑀦𑁆𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀲𑀺𑀜𑁆𑀘𑀺𑀢𑀼𑀁. 𑀢𑀢𑁆𑀭𑀸𑀢𑀺 𑀲𑀼𑀓𑁆𑀔𑀓𑀤𑁆𑀤𑀫𑁂, ‘‘𑀬𑁄’’𑀢𑀺 𑀧𑀤𑁂 𑀅𑀯𑀬𑀯𑀻𑀆𑀥𑀸𑀭𑁄. 𑀬𑁄𑀢𑀺 𑀲𑀼𑀓𑁆𑀔𑀓𑀤𑁆𑀤𑀫𑁄.

𑀢𑀝𑀦𑁆𑀢𑀺 𑀓𑀽𑀮𑀁. 𑀉𑀤𑀓𑀲𑀸𑀫𑀦𑁆𑀢𑀸𑀢𑀺 𑀉𑀤𑀓𑀲𑁆𑀲 𑀲𑀫𑀻𑀧𑁂. 𑀑𑀫𑀓𑀘𑀢𑀼𑀫𑀸𑀲𑀦𑁆𑀢𑀺 𑀘𑀢𑀼𑀫𑀸𑀲𑀢𑁄 𑀊𑀦𑀓𑀁. 𑀑𑀯𑀝𑁆𑀞𑀦𑁆𑀢𑀺 𑀤𑁂𑀯𑁂𑀦 𑀑𑀯𑀲𑁆𑀲𑀺𑀢𑀁 𑀳𑁄𑀢𑀺 𑀲𑀘𑁂𑀢𑀺 𑀬𑁄𑀚𑀦𑀸. 𑀧𑀢𑀢𑀻𑀢𑀺 𑀢𑀝𑀁 𑀧𑀢𑀢𑀺. 𑀉𑀤𑀓𑁂𑀬𑁂𑀯𑀸𑀢𑀺 𑀧𑀓𑀢𑀺𑀉𑀤𑀓𑁂𑀬𑁂𑀯. 𑀉𑀤𑀓𑀲𑁆𑀲𑀸𑀢𑀺 𑀯𑀲𑁆𑀲𑁄𑀤𑀓𑀲𑁆𑀲. 𑀢𑀢𑁆𑀣𑀸𑀢𑀺 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁. 𑀧𑀞𑀫𑀫𑁂𑀯𑀸𑀢𑀺 𑀲𑁄𑀡𑁆𑀟𑀺𑀔𑀡𑀦𑀢𑁄 𑀧𑀞𑀫𑀁 𑀏𑀯. 𑀉𑀤𑀓𑁂 𑀧𑀭𑀺𑀬𑀸𑀤𑀺𑀡𑁆𑀡𑁂𑀢𑀺 𑀉𑀤𑀓𑁂 𑀲𑀼𑀓𑁆𑀔𑁂. 𑀧𑀘𑁆𑀙𑀸𑀢𑀺 𑀉𑀤𑀓𑀧𑀽𑀭𑀢𑁄 𑀧𑀘𑁆𑀙𑀸. 𑀢𑀢𑁆𑀣𑀸𑀢𑀺 𑀲𑁄𑀡𑁆𑀟𑀺𑀬𑀁. 𑀉𑀤𑀓𑁂𑀬𑁂𑀯𑀸𑀢𑀺 𑀫𑀽𑀮𑀉𑀤𑀓𑁂𑀬𑁂𑀯. 𑀉𑀤𑀓𑀦𑁆𑀢𑀺 𑀆𑀕𑀦𑁆𑀢𑀼𑀓𑀉𑀤𑀓𑀁. 𑀅𑀮𑁆𑀮𑀻𑀬𑀢𑀻𑀢𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀮𑀕𑁆𑀕𑀢𑀺. 𑀢𑀫𑁆𑀧𑀻𑀢𑀺 𑀲𑀼𑀔𑀼𑀫𑀭𑀚𑀫𑁆𑀧𑀺. 𑀅𑀓𑀢𑀧𑀩𑁆𑀪𑀸𑀭𑁂𑀢𑀺 𑀯𑀴𑀜𑁆𑀚𑁂𑀦 𑀅𑀓𑀢𑁂 𑀧𑀩𑁆𑀪𑀸𑀭𑁂. 𑀉𑀧𑀘𑀺𑀓𑀸𑀳𑀺 𑀯𑀫𑀻𑀬𑀢𑀺, 𑀖𑀭𑀕𑁄𑀴𑀺𑀓𑀸𑀤𑀬𑁄 𑀯𑀸 𑀲𑀢𑁆𑀢𑁂 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄.

𑀕𑀸𑀯𑀻𑀦𑀁 𑀔𑀼𑀭𑁄 𑀓𑀡𑁆𑀝𑀓𑀲𑀤𑀺𑀲𑀢𑁆𑀢𑀸 𑀕𑁄𑀓𑀡𑁆𑀝𑀓𑁄 𑀦𑀸𑀫, 𑀢𑁂𑀦 𑀙𑀺𑀦𑁆𑀦𑁄 𑀓𑀤𑁆𑀤𑀫𑁄 ‘‘𑀕𑁄𑀓𑀡𑁆𑀝𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀘𑁆𑀙𑀤𑀦𑀁 𑀯𑀸 𑀯𑀺𑀦𑀝𑁆𑀞𑀘𑁆𑀙𑀤𑀦𑀁 𑀯𑀸 𑀧𑀼𑀭𑀸𑀡𑀲𑁂𑀦𑀸𑀲𑀦𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀧𑀼𑀭𑀸𑀡𑀲𑁂𑀦𑀸𑀲𑀦𑀢𑁄, 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀲𑁂𑀲𑀦𑁆𑀢𑀺 𑀯𑀺𑀦𑀝𑁆𑀞𑀘𑁆𑀙𑀤𑀦𑀢𑁄. 𑀅𑀯𑀲𑁂𑀲𑀁 𑀇𑀝𑁆𑀞𑀓𑀁 𑀕𑀡𑁆𑀳𑀸𑀫𑀺 𑀇𑀢𑀺 𑀲𑀜𑁆𑀜𑀸𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀇𑀝𑁆𑀞𑀓𑀸𑀤𑀺𑀦𑀸. 𑀬𑀸 𑀬𑀸𑀢𑀺 𑀫𑀢𑁆𑀢𑀺𑀓𑀸. 𑀅𑀢𑀺𑀦𑁆𑀢𑀸𑀢𑀺 𑀅𑀦𑀮𑁆𑀮𑀸, 𑀅𑀓𑀺𑀮𑀺𑀦𑁆𑀦𑀸𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀺𑀦𑁆𑀢𑀺 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁂. 𑀲𑀩𑁆𑀩𑁄𑀢𑀺 𑀲𑀓𑀮𑁄 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄. 𑀅𑀲𑁆𑀲𑀸𑀢𑀺 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑀲𑁆𑀲. ‘‘𑀓𑀧𑁆𑀧𑀺𑀬𑀓𑀸𑀭𑀓𑁂𑀳𑀻’’𑀢𑀺 𑀧𑀤𑀁 ‘‘𑀅𑀧𑀦𑀸𑀫𑁂𑀢𑁆𑀯𑀸’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀓𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀉𑀤𑀓𑁂𑀦𑀸’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑀢𑀢𑁆𑀣𑀸𑀢𑀺 𑀫𑀢𑁆𑀢𑀺𑀓𑀸𑀧𑀸𑀓𑀸𑀭𑁂. 𑀅𑀜𑁆𑀜𑀫𑁆𑀧𑀻𑀢𑀺 𑀫𑀡𑁆𑀟𑀧𑀣𑀫𑁆𑀪𑀢𑁄 𑀅𑀜𑁆𑀜𑀫𑁆𑀧𑀺. 𑀢𑁂𑀦 𑀅𑀧𑀤𑁂𑀲𑁂𑀦𑀸𑀢𑀺 𑀢𑁂𑀦 𑀧𑀸𑀲𑀸𑀡𑀸𑀤𑀺𑀧𑀯𑀝𑁆𑀝𑀦𑀮𑁂𑀲𑁂𑀦.

𑀧𑀲𑁆𑀲𑀸𑀯𑀥𑀸𑀭𑀸𑀬𑀸𑀢𑀺 𑀫𑀼𑀢𑁆𑀢𑀲𑁄𑀢𑀸𑀬. 𑀓𑀢𑁆𑀢𑀭𑀬𑀝𑁆𑀞𑀺𑀬𑀸𑀢𑀺 𑀓𑀢𑁆𑀢𑀭𑀤𑀡𑁆𑀟𑁂𑀦. 𑀏𑀢𑁆𑀣 𑀳𑀺 𑀓𑀢𑁆𑀢𑀭𑀬𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀺𑀣𑀺𑀮𑀪𑀸𑀯𑁂𑀦 𑀲𑀺𑀣𑀺𑀮𑁄 𑀳𑀼𑀢𑁆𑀯𑀸 𑀪𑀯𑀢𑀻𑀢𑀺 𑀓𑀢𑁆𑀯𑀸 𑀓𑀢𑁆𑀢𑀭𑁄 𑀯𑀼𑀘𑁆𑀘𑀢𑀺 𑀚𑀺𑀡𑁆𑀡𑀫𑀦𑀼𑀲𑁆𑀲𑁄, 𑀢𑁂𑀦 𑀏𑀓𑀦𑁆𑀢𑀢𑁄 𑀕𑀳𑁂𑀢𑀩𑁆𑀩𑀢𑁆𑀢𑀸 𑀓𑀢𑁆𑀢𑀭𑁂𑀦 𑀕𑀳𑀺𑀢𑀸 𑀬𑀝𑁆𑀞𑀺, 𑀓𑀢𑁆𑀢𑀭𑀲𑁆𑀲 𑀬𑀝𑁆𑀞𑀻𑀢𑀺 𑀯𑀸 𑀓𑀢𑁆𑀯𑀸 𑀓𑀢𑁆𑀢𑀭𑀬𑀝𑁆𑀞𑀺 𑀯𑀼𑀘𑁆𑀘𑀢𑀺 𑀓𑀢𑁆𑀢𑀭𑀤𑀡𑁆𑀟𑁄. 𑀤𑀦𑁆𑀢𑀚𑀧𑀞𑀫𑀓𑁆𑀔𑀭𑁂𑀦 𑀲𑀚𑁆𑀛𑀸𑀬𑀺𑀢𑀩𑁆𑀩𑁄. 𑀯𑀻𑀭𑀺𑀬𑀲𑀫𑁆𑀧𑀕𑁆𑀕𑀳𑀡𑀢𑁆𑀣𑀦𑁆𑀢𑀺 𑀯𑀻𑀭𑀺𑀬𑀲𑁆𑀲 𑀲𑀼𑀝𑁆𑀞𑀼 𑀧𑀕𑁆𑀕𑀡𑁆𑀳𑀦𑀢𑁆𑀣𑀁, 𑀯𑀻𑀭𑀺𑀬𑀲𑁆𑀲 𑀉𑀓𑁆𑀔𑀺𑀧𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸.

𑁮𑁭. 𑀢𑀢𑁆𑀭𑀸𑀧𑀻𑀢𑀺 𑀇𑀝𑁆𑀞𑀓𑀓𑀧𑀸𑀮𑀸𑀤𑀻𑀲𑀼𑀧𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑁂𑀲𑀁 𑀅𑀦𑀼𑀧𑀸𑀤𑀸𑀦𑀢𑁆𑀢𑀸𑀢𑀺 𑀢𑁂𑀲𑀁 𑀇𑀝𑁆𑀞𑀓𑀸𑀤𑀻𑀦𑀁 𑀅𑀕𑁆𑀕𑀺𑀲𑁆𑀲 𑀅𑀦𑀺𑀦𑁆𑀥𑀦𑀢𑁆𑀢𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸𑀯𑀸. 𑀢𑀸𑀦𑀻𑀢𑀺 𑀇𑀝𑁆𑀞𑀓𑀸𑀤𑀻𑀦𑀺. 𑀅𑀯𑀺𑀲𑀬𑀢𑁆𑀢𑀸𑀢𑀺 𑀆𑀧𑀢𑁆𑀢𑀺𑀬𑀸 𑀅𑀦𑁄𑀓𑀸𑀲𑀢𑁆𑀢𑀸. 𑀢𑀺𑀡𑀼𑀓𑁆𑀓𑀦𑁆𑀢𑀺 𑀢𑀺𑀡𑀫𑀬𑀁 𑀉𑀓𑁆𑀓𑀁. 𑀢𑀢𑁆𑀣𑁂𑀯𑀸𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀏𑀯. 𑀅𑀭𑀻𑀬𑀢𑀺 𑀅𑀕𑁆𑀕𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀖𑀁𑀲𑀻𑀬𑀢𑀺 𑀏𑀢𑁆𑀣𑀸𑀢𑀺 𑀅𑀭𑀡𑀻, 𑀳𑁂𑀝𑁆𑀞𑀸 𑀦𑀺𑀫𑀦𑁆𑀣𑀦𑀻𑀬𑀤𑀸𑀭𑀼. 𑀲𑀳 𑀥𑀦𑀼𑀦𑀸 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀳𑀺𑀢𑁄, 𑀉𑀧𑀭𑀺 𑀦𑀺𑀫𑀦𑁆𑀣𑀦𑀤𑀸𑀭𑀼. 𑀅𑀭𑀡𑀻 𑀘 𑀲𑀳𑀺𑀢𑁄 𑀘 𑀅𑀭𑀡𑀻𑀲𑀳𑀺𑀢𑁄, 𑀢𑁂𑀦 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀓𑀭𑀺𑀬𑀫𑀸𑀦𑁂 𑀦 𑀟𑀬𑁆𑀳𑀢𑀺, 𑀢𑀣𑀸 𑀓𑀭𑁄𑀳𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁮𑁮. 𑀆𑀯𑀸𑀝𑀁 𑀚𑀸𑀦𑀸𑀢𑀺 𑀆𑀯𑀸𑀝𑀁 𑀓𑀸𑀢𑀼𑀁, 𑀔𑀡𑀺𑀢𑀼𑀁 𑀯𑀸 𑀚𑀸𑀦𑀸𑀳𑀻𑀢𑀺 𑀅𑀢𑁆𑀣𑁄. ‘‘𑀏𑀯𑀁 𑀫𑀳𑀸𑀫𑀢𑁆𑀢𑀺𑀓𑀁 𑀚𑀸𑀦, 𑀣𑀼𑀲𑀫𑀢𑁆𑀢𑀺𑀓𑀁 𑀚𑀸𑀦𑀸’’𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀮𑀸𑀪𑀁 𑀲𑀫𑁆𑀧𑀤𑀸𑀦𑀯𑀸𑀘𑀓𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀲𑀸𑀢𑀺 𑀧𑀣𑀯𑀻. 𑀢𑁂𑀦𑀸𑀢𑀺 𑀧𑀯𑀝𑁆𑀝𑀦𑀸𑀤𑀺𑀦𑀸𑀢𑀺. 𑀤𑀲𑀫𑀁.

𑀫𑀼𑀲𑀸𑀯𑀸𑀤𑀯𑀕𑁆𑀕𑁄 𑀧𑀞𑀫𑁄.

𑁨. 𑀪𑀽𑀢𑀕𑀸𑀫𑀯𑀕𑁆𑀕𑁄

𑁧. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁮𑁯. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀢𑀲𑁆𑀲𑀸𑀢𑀺 𑀤𑁂𑀯𑀢𑀸𑀬. 𑀉𑀓𑁆𑀔𑀺𑀢𑁆𑀢𑀁 𑀨𑀭𑀲𑀼𑀦𑁆𑀢𑀺 𑀉𑀤𑁆𑀥𑀁 𑀔𑀺𑀢𑁆𑀢𑀁 𑀓𑀼𑀞𑀸𑀭𑀺𑀁. 𑀦𑀺𑀕𑁆𑀕𑀳𑁂𑀢𑀼𑀦𑁆𑀢𑀺 𑀲𑀡𑁆𑀞𑀸𑀢𑀼𑀁, 𑀦𑀺𑀯𑀢𑁆𑀢𑁂𑀢𑀼𑀁 𑀯𑀸. 𑀘𑀓𑁆𑀔𑀼𑀯𑀺𑀲𑀬𑀸𑀢𑀻𑀢𑁂𑀢𑀺 𑀧𑀲𑀸𑀤𑀘𑀓𑁆𑀔𑀼𑀲𑁆𑀲 𑀕𑁄𑀘𑀭𑀸𑀢𑀺𑀓𑁆𑀓𑀦𑁆𑀢𑁂. 𑀫𑀳𑀸𑀭𑀸𑀚𑀲𑀦𑁆𑀢𑀺𑀓𑀸𑀢𑀺 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀸. 𑀣𑀦𑀫𑀽𑀮𑁂𑀬𑁂𑀯𑀸𑀢𑀺 𑀣𑀦𑀲𑀫𑀻𑀧𑁂𑀬𑁂𑀯. 𑀳𑀺𑀫𑀯𑀦𑁆𑀢𑁂𑀢𑀺 𑀳𑀺𑀫𑀉𑀕𑁆𑀕𑀺𑀭𑀡𑁂 𑀯𑀦𑁂, 𑀳𑀺𑀫𑀬𑀼𑀢𑁆𑀢𑁂 𑀯𑀸. 𑀢𑀢𑁆𑀣𑀸𑀢𑀺 𑀳𑀺𑀫𑀯𑀦𑁆𑀢𑁂, 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁂 𑀯𑀸. 𑀭𑀼𑀓𑁆𑀔𑀥𑀫𑁆𑀫𑁄𑀢𑀺 𑀭𑀼𑀓𑁆𑀔𑀲𑀪𑀸𑀯𑁄. 𑀭𑀼𑀓𑁆𑀔𑀥𑀫𑁆𑀫𑁄 𑀘 𑀦𑀸𑀫 𑀙𑁂𑀤𑀦𑀪𑁂𑀤𑀦𑀸𑀤𑀻𑀲𑀼 𑀭𑀼𑀓𑁆𑀔𑀸𑀦𑀁 𑀅𑀘𑁂𑀢𑀦𑀢𑁆𑀢𑀸 𑀓𑁄𑀧𑀲𑁆𑀲 𑀅𑀓𑀭𑀡𑀁, 𑀢𑀲𑁆𑀫𑀺𑀁 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑀸 𑀤𑁂𑀯𑀢𑀸 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑀸 𑀦𑀸𑀫, 𑀙𑁂𑀤𑀦𑀪𑁂𑀤𑀦𑀸𑀤𑀻𑀲𑀼 𑀭𑀼𑀓𑁆𑀔𑀲𑁆𑀲 𑀯𑀺𑀬 𑀭𑀼𑀓𑁆𑀔𑀝𑁆𑀞𑀓𑀤𑁂𑀯𑀢𑀸𑀬 𑀅𑀓𑁄𑀧𑀦𑀁 𑀭𑀼𑀓𑁆𑀔𑀥𑀫𑁆𑀫𑁂 𑀞𑀺𑀢𑀸 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀲𑀦𑁆𑀦𑀺𑀧𑀸𑀢𑀤𑁂𑀯𑀢𑀸𑀲𑀼. 𑀇𑀢𑀻𑀢𑀺 𑀇𑀫𑀲𑁆𑀲 𑀅𑀮𑀪𑀦𑀲𑁆𑀲, 𑀇𑀫𑀲𑁆𑀫𑀺𑀁 𑀅𑀮𑀪𑀦𑁂 𑀯𑀸, 𑀆𑀤𑀻𑀦𑀯𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀢𑁄 𑀘𑀸𑀢𑀺 𑀘-𑀲𑀤𑁆𑀤𑁄 ‘‘𑀧𑀼𑀩𑁆𑀩𑀘𑀭𑀺𑀢’’𑀦𑁆𑀢𑀺 𑀏𑀢𑁆𑀣 𑀬𑁄𑀚𑁂𑀢𑀩𑁆𑀩𑁄. 𑀇𑀫𑀜𑁆𑀘 𑀆𑀤𑀻𑀦𑀯𑀁 𑀅𑀤𑁆𑀤𑀲, 𑀪𑀕𑀯𑀢𑁄 𑀧𑀼𑀩𑁆𑀩𑀘𑀭𑀺𑀢𑀜𑁆𑀘 𑀅𑀦𑀼𑀲𑁆𑀲𑀭𑀻𑀢𑀺 𑀯𑀸𑀓𑁆𑀬𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑁂𑀦𑀸𑀢𑀺 𑀤𑀲𑁆𑀲𑀦𑀸𑀦𑀼𑀲𑁆𑀲𑀭𑀡𑀓𑀸𑀭𑀡𑁂𑀦. 𑀅𑀲𑁆𑀲𑀸𑀢𑀺 𑀤𑁂𑀯𑀢𑀸𑀬. 𑀲𑀁𑀯𑀺𑀚𑁆𑀚𑀢𑀺 𑀧𑀺𑀢𑀸 𑀅𑀲𑁆𑀲𑀸𑀢𑀺 𑀲𑀧𑀺𑀢𑀺𑀓𑁄, 𑀧𑀼𑀢𑁆𑀢𑁄. (𑀢𑀸𑀯𑀸𑀢𑀺 𑀅𑀢𑀺𑀯𑀺𑀬, 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑁆𑀢𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄) ‘‘𑀫𑀭𑀺𑀬𑀸𑀤𑀁 𑀩𑀦𑁆𑀥𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀻’’𑀢𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑁆𑀢𑀺𑀬𑀸 𑀅𑀲𑁆𑀲𑀸 𑀤𑁂𑀯𑀢𑀸𑀬 𑀏𑀢𑀤𑀳𑁄𑀲𑀻𑀢𑀺 𑀬𑁄𑀚𑀦𑀸.

𑀬𑁄𑀢𑀺 𑀬𑁄 𑀓𑁄𑀘𑀺 𑀚𑀦𑁄. 𑀯𑁂𑀢𑀺 𑀏𑀓𑀦𑁆𑀢𑁂𑀦. 𑀉𑀧𑁆𑀧𑀢𑀺𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀢𑀺𑀢𑀁. 𑀪𑀦𑁆𑀢𑀦𑁆𑀢𑀺 𑀪𑀫𑀦𑁆𑀢𑀁 𑀥𑀸𑀯𑀦𑁆𑀢𑀁, 𑀯𑀸𑀭𑀬𑁂𑀢𑀺 𑀦𑀺𑀯𑀸𑀭𑁂𑀬𑁆𑀬 𑀦𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀚𑀦𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀲𑀸𑀭𑀣𑀺 𑀪𑀦𑁆𑀢𑀁 𑀭𑀣𑀁 𑀯𑀸𑀭𑀬𑁂 𑀇𑀯, 𑀢𑀣𑀸 𑀬𑁄 𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁 𑀯𑀸𑀭𑀬𑁂, 𑀢𑀁 𑀅𑀳𑀁 𑀲𑀸𑀭𑀣𑀺𑀁 𑀇𑀢𑀺 𑀩𑁆𑀭𑀽𑀫𑀺. 𑀇𑀢𑀭𑁄 𑀓𑁄𑀥𑀦𑀺𑀯𑀸𑀭𑀓𑀢𑁄 𑀅𑀜𑁆𑀜𑁄 𑀭𑀸𑀚𑀉𑀧𑀭𑀸𑀚𑀸𑀤𑀻𑀦𑀁 𑀲𑀸𑀭𑀣𑀺𑀪𑀽𑀢𑁄 𑀚𑀦𑁄 𑀭𑀲𑁆𑀫𑀺𑀕𑁆𑀕𑀸𑀳𑁄 𑀭𑀚𑁆𑀚𑀼𑀕𑁆𑀕𑀸𑀳𑁄 𑀦𑀸𑀫𑀸𑀢𑀺.

𑀤𑀼𑀢𑀺𑀬𑀕𑀸𑀣𑀸𑀬 𑀯𑁂𑀚𑁆𑀚𑁄 𑀯𑀺𑀲𑀝𑀁 𑀯𑀺𑀢𑁆𑀣𑀢𑀁 𑀲𑀧𑁆𑀧𑀯𑀺𑀲𑀁 𑀲𑀧𑁆𑀧𑀲𑁆𑀲 𑀆𑀲𑀻𑀯𑀺𑀲𑀲𑁆𑀲 𑀯𑀺𑀲𑀁 𑀕𑀭𑀴𑀁 𑀑𑀲𑀥𑁂𑀳𑀺 𑀪𑁂𑀲𑀚𑁆𑀚𑁂𑀦, 𑀫𑀦𑁆𑀢𑁂𑀦 𑀘 𑀯𑀺𑀦𑁂𑀢𑀺 𑀇𑀯, 𑀢𑀣𑀸 𑀬𑁄 𑀪𑀺𑀓𑁆𑀔𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁 𑀫𑁂𑀢𑁆𑀢𑀸𑀬 𑀯𑀺𑀦𑁂𑀢𑀺, 𑀲𑁄 𑀪𑀺𑀓𑁆𑀔𑀼 𑀉𑀭𑀕𑁄 𑀪𑀼𑀚𑀕𑁄 𑀧𑀼𑀭𑀸𑀡𑀁 𑀧𑀼𑀭𑁂 𑀪𑀯𑀁 𑀚𑀺𑀡𑁆𑀡𑀁 𑀧𑀼𑀭𑀸𑀡𑀢𑁆𑀢𑀸 𑀚𑀺𑀡𑁆𑀡𑀁 𑀢𑀘𑀁 𑀚𑀳𑀸𑀢𑀺 𑀇𑀯, 𑀢𑀣𑀸 𑀑𑀭𑀧𑀸𑀭𑀁 𑀅𑀧𑀸𑀭𑀲𑀗𑁆𑀔𑀸𑀢𑀁 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀁 𑀚𑀳𑀸𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀢𑀢𑁆𑀭𑀸𑀢𑀺 𑀤𑁆𑀯𑀻𑀲𑀼 𑀕𑀸𑀣𑀸𑀲𑀼. 𑀯𑀢𑁆𑀣𑀼 𑀧𑀦 𑀯𑀺𑀦𑀬𑁂 𑀆𑀭𑀽𑀴𑁆𑀳𑀦𑁆𑀢𑀺 𑀬𑁄𑀚𑀦𑀸. 𑀅𑀣𑀸𑀢𑀺 𑀧𑀘𑁆𑀙𑀸. 𑀬𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲𑀸𑀢𑀺 𑀬𑁂𑀦 𑀤𑁂𑀯𑀧𑀼𑀢𑁆𑀢𑁂𑀦. 𑀧𑀭𑀺𑀕𑁆𑀕𑀳𑁄𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. 𑀲𑁄𑀢𑀺 𑀤𑁂𑀯𑀧𑀼𑀢𑁆𑀢𑁄. 𑀢𑀢𑁄𑀢𑀺 𑀉𑀧𑀕𑀫𑀦𑀢𑁄. 𑀬𑀤𑀸 𑀳𑁄𑀢𑀺, 𑀢𑀤𑀸𑀢𑀺 𑀬𑁄𑀚𑀦𑀸. 𑀫𑀳𑁂𑀲𑀓𑁆𑀔𑀤𑁂𑀯𑀢𑀸𑀲𑀽𑀢𑀺 𑀫𑀳𑀸𑀧𑀭𑀺𑀯𑀸𑀭𑀸𑀲𑀼 𑀤𑁂𑀯𑀢𑀸𑀲𑀼, 𑀫𑀳𑀸𑀢𑁂𑀚𑀸𑀲𑀼 𑀯𑀸. 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀧𑁂𑀦𑁆𑀢𑀺. 𑀤𑁂𑀯𑀢𑀸 𑀬𑀫𑁆𑀧𑀺 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀬𑁂𑀯. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀉𑀧𑀝𑁆𑀞𑀸𑀦𑀢𑁆𑀣𑀸𑀬, 𑀲𑀫𑁆𑀧𑀤𑀸𑀦𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀣 𑀯𑀸 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀉𑀧𑀝𑁆𑀞𑀸𑀦𑀁, 𑀪𑀕𑀯𑀢𑁄 𑀲𑀫𑀻𑀧𑀝𑁆𑀞𑀸𑀦𑀁, 𑀢𑀁 𑀆𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀦𑁆𑀢𑀺 𑀢𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑁯𑁦. ‘‘𑀪𑀯𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀭𑀽𑀴𑁆𑀳𑁂 𑀫𑀽𑀮𑁂 𑀦𑀻𑀮𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀟𑁆𑀠𑀫𑀸𑀦𑀓𑁂 𑀢𑀭𑀼𑀡𑀭𑀼𑀓𑁆𑀔𑀕𑀘𑁆𑀙𑀸𑀤𑀺𑀓𑁂 𑀤𑀲𑁆𑀲𑁂𑀢𑀺. ‘‘𑀅𑀳𑀼𑀯𑀢𑁆𑀣𑀼’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑁂 𑀫𑀳𑀦𑁆𑀢𑀭𑀼𑀓𑁆𑀔𑀕𑀘𑁆𑀙𑀸𑀤𑀺𑀓𑁂 𑀤𑀲𑁆𑀲𑁂𑀢𑀺. ‘‘𑀅𑀳𑀼𑀯𑀢𑁆𑀣𑀼’’𑀦𑁆𑀢𑀺 𑀘 𑀳𑀺𑀬𑁆𑀬𑀢𑁆𑀢𑀦𑀺𑀲𑀗𑁆𑀔𑀸𑀢𑀸𑀬 𑀢𑁆𑀣𑀼𑀁-𑀯𑀺𑀪𑀢𑁆𑀢𑀺𑀬𑀸 𑀳𑀽-𑀥𑀸𑀢𑀼𑀲𑁆𑀲 𑀊𑀓𑀸𑀭𑀲𑁆𑀲 𑀉𑀯𑀸𑀤𑁂𑀲𑁄 𑀳𑁄𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀅𑀳𑀼𑀯𑀢𑀻’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀅𑀧𑀸𑀞𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀚𑀸𑀬𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀪𑀽-𑀥𑀸𑀢𑀼𑀲𑁆𑀲 𑀲𑀢𑁆𑀢𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺, ‘‘𑀯𑀟𑁆𑀠𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀟𑁆𑀠𑀦𑀢𑁆𑀣𑀪𑀸𑀯𑀁. 𑀏𑀢𑀦𑁆𑀢𑀺 ‘‘𑀪𑀽𑀢𑀕𑀸𑀫𑁄’’𑀢𑀺 𑀦𑀸𑀫𑀁. 𑀧𑀻𑀬𑀢𑁂 𑀬𑀣𑀸𑀓𑀸𑀫𑀁 𑀧𑀭𑀺𑀪𑀼𑀜𑁆𑀚𑀻𑀬𑀢𑁂, 𑀧𑀸𑀢𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀸 𑀧𑀸𑀢𑀩𑁆𑀬𑀁, 𑀧𑀸𑀲𑀤𑁆𑀤𑁄 𑀬𑀣𑀸𑀓𑀸𑀫𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀙𑁂𑀤𑀦𑀪𑁂𑀤𑀦𑀸𑀤𑀻𑀳𑀺 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀢𑀺 𑀅𑀢𑁆𑀣𑁄’’𑀢𑀺.

𑁯𑁧. ‘‘𑀇𑀤𑀸𑀦𑀻’’𑀢𑀺 𑀧𑀤𑀁 ‘‘𑀆𑀳𑀸’’𑀢𑀺 𑀧𑀤𑁂 𑀓𑀸𑀮𑀲𑀢𑁆𑀢𑀫𑀻. 𑀬𑀲𑁆𑀫𑀺𑀦𑁆𑀢𑀺 𑀩𑀻𑀚𑁂. 𑀢𑀦𑁆𑀢𑀺 𑀩𑀻𑀚𑀁. 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻𑀢𑀺 𑀏𑀢𑁆𑀣 𑀚𑀸𑀢𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀢𑁆𑀣𑀢𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 𑀏𑀯𑀁 𑀯𑀼𑀢𑁆𑀢𑀁. 𑀢𑀩𑁆𑀪𑀸𑀯𑀢𑁆𑀣𑀲𑁆𑀲 ‘‘𑀫𑀽𑀮𑁂 𑀚𑀸𑀬𑀦𑁆𑀢𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀅𑀲𑀁𑀲𑀦𑁆𑀤𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀗𑁆𑀕𑀳𑀓𑀸𑀭𑁂𑀦 ‘‘𑀦 𑀲𑀫𑁂𑀦𑁆𑀢𑀻’’𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀫𑀢𑁂𑀦 𑀲𑀢𑀺 𑀚𑀸𑀢𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀢𑁆𑀣𑀪𑀸𑀯𑁂 ‘‘𑀫𑀽𑀮𑁂 𑀚𑀸𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀫𑀽𑀮𑁂 𑀫𑀽𑀮𑀸𑀦𑀺 𑀚𑀸𑀬𑀦𑁆𑀢𑀻𑀢𑀺 𑀤𑁄𑀲𑁄 𑀪𑀯𑁂𑀬𑁆𑀬𑀸𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀸𑀦𑀻𑀢𑀺 𑀭𑀼𑀓𑁆𑀔𑀸𑀤𑀻𑀦𑀺. 𑀢𑀲𑁆𑀲𑀸𑀢𑀺 ‘‘𑀪𑀽𑀢𑀕𑀸𑀫𑁄 𑀦𑀸𑀫 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻’’𑀢𑀺 𑀧𑀤𑀲𑁆𑀲. 𑀏𑀢𑀦𑁆𑀢𑀺 ‘‘𑀩𑀻𑀚𑀚𑀸𑀢𑀸𑀦𑀻’’𑀢𑀺 𑀦𑀸𑀫𑀁. 𑀩𑀻𑀚𑁂𑀲𑀼 𑀚𑀸𑀢𑀸𑀦𑀺 𑀩𑀻𑀚𑀚𑀸𑀢𑀸𑀦𑀻𑀢𑀺 𑀯𑀼𑀢𑁆𑀢𑁂 ‘‘𑀫𑀽𑀮𑁂 𑀚𑀸𑀬𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀲𑀫𑁂𑀢𑀺. 𑀏𑀢𑁂𑀦𑀸𑀢𑀺 ‘‘𑀩𑀻𑀚𑀢𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀕𑀳𑁄𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀬𑁂𑀳𑀻’’𑀢𑀺 𑀧𑀤𑀁 ‘‘𑀚𑀸𑀢𑀢𑁆𑀢𑀸’’𑀢𑀺 𑀧𑀤𑁂 𑀅𑀧𑀸𑀤𑀸𑀦𑀁, 𑀳𑁂𑀢𑀼 𑀯𑀸 ‘‘𑀯𑀼𑀢𑁆𑀢𑀸𑀦𑀻’’𑀢𑀺 𑀧𑀤𑁂 𑀓𑀭𑀡𑀁, 𑀓𑀢𑁆𑀢𑀸 𑀯𑀸. 𑀢𑁂𑀲𑀦𑁆𑀢𑀺 𑀩𑀻𑀚𑀸𑀦𑀁. 𑀭𑀼𑀓𑁆𑀔𑀸𑀤𑀻𑀦𑀁 𑀯𑀺𑀭𑀼𑀳𑀦𑀁 𑀚𑀦𑁂𑀢𑀻𑀢𑀺 𑀩𑀻𑀚𑀁. ‘‘𑀩𑀻𑀚𑀢𑁄’’𑀢𑀺𑀆𑀤𑀺𑀦𑀸 𑀓𑀸𑀭𑀺𑀬𑁄𑀧𑀘𑀸𑀭𑁂𑀦 𑀓𑀸𑀭𑀡𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀓𑀸𑀭𑀡𑀽𑀧𑀘𑀸𑀭𑀁 𑀧𑀤𑀻𑀧𑁂𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑀸𑀦𑀺 𑀯𑀸 𑀧𑀦 𑀕𑀘𑁆𑀙𑀯𑀮𑁆𑀮𑀺𑀭𑀼𑀓𑁆𑀔𑀸𑀤𑀻𑀦𑀺 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀕𑀘𑁆𑀙𑀯𑀮𑁆𑀮𑀺𑀭𑀼𑀓𑁆𑀔𑀸𑀤𑀻𑀦𑀺 𑀚𑀸𑀬𑀦𑁆𑀢𑀺 𑀲𑀜𑁆𑀚𑀸𑀬𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀸𑀦𑀻𑀢𑀺 𑀕𑀘𑁆𑀙𑀯𑀮𑁆𑀮𑀺𑀭𑀼𑀓𑁆𑀔𑀸𑀤𑀻𑀦𑀺. 𑀢𑀜𑁆𑀘 𑀫𑀽𑀮𑀁, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀳𑀮𑀺𑀤𑁆𑀤𑀸𑀤𑀺 𑀘 𑀅𑀢𑁆𑀣𑀺, 𑀲𑀩𑁆𑀩𑀫𑁆𑀧𑀺 𑀏𑀢𑀁 𑀫𑀽𑀮𑀩𑀻𑀚𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀩𑀻𑀚𑁂𑀲𑀼, 𑀔𑀦𑁆𑀥𑀩𑀻𑀚𑁂𑀲𑀼 𑀯𑀸.

𑁯𑁨. 𑀲𑀜𑁆𑀜𑀸𑀯𑀲𑁂𑀦𑀸𑀢𑀺 ‘‘𑀩𑀻𑀚’’𑀦𑁆𑀢𑀺 𑀲𑀜𑁆𑀜𑀸𑀯𑀲𑁂𑀦. ‘‘𑀢𑀢𑁆𑀣𑀸’’𑀢𑀺 𑀧𑀤𑀁 ‘‘𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀧𑀤𑁂 𑀆𑀥𑀸𑀭𑁄. ‘‘𑀬𑀣𑀸’’𑀢𑀺𑀆𑀤𑀺𑀦𑀸 𑀓𑀸𑀭𑀡𑁄𑀧𑀘𑀸𑀭𑁂𑀦 𑀓𑀸𑀭𑀺𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀨𑀮𑀽𑀧𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀬𑀁 𑀩𑀻𑀚𑀁 𑀯𑀼𑀢𑁆𑀢𑀁, 𑀢𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀬𑁄𑀚𑀦𑀸. 𑀬𑀤𑁂𑀢𑀁 𑀆𑀤𑀺𑀧𑀤𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀢𑀺 𑀆𑀤𑀺𑀧𑀤𑁂𑀦. 𑀭𑀯𑀻𑀬𑀢𑀺 𑀪𑀕𑀯𑀢𑀸 𑀓𑀣𑀻𑀬𑀢𑀻𑀢𑀺 𑀭𑀼𑀢𑀁, 𑀧𑀸𑀴𑀺, 𑀢𑀲𑁆𑀲 𑀅𑀦𑀼𑀭𑀽𑀧𑀁 𑀬𑀣𑀸𑀭𑀼𑀢𑀁, 𑀧𑀸𑀴𑀺𑀅𑀦𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀢𑀺 ‘‘𑀩𑀻𑀚𑁂 𑀩𑀻𑀚𑀲𑀜𑁆𑀜𑀻’’𑀢𑀺𑀆𑀤𑀺𑀧𑀤𑁂, 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀯𑀸. 𑀉𑀤𑀓𑁂 𑀞𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀉𑀤𑀓𑀝𑁆𑀞𑁄, 𑀏𑀯𑀁 𑀣𑀮𑀝𑁆𑀞𑁄𑀧𑀺. 𑀢𑀢𑁆𑀣𑀸𑀢𑀺 𑀉𑀤𑀓𑀝𑁆𑀞𑀣𑀮𑀝𑁆𑀞𑁂𑀲𑀼. 𑀲𑀸𑀲𑀧𑀲𑁆𑀲 𑀫𑀢𑁆𑀢𑀁 𑀧𑀫𑀸𑀡𑀁 𑀅𑀲𑁆𑀲 𑀲𑁂𑀯𑀸𑀮𑀲𑁆𑀲𑀸𑀢𑀺 𑀲𑀸𑀲𑀧𑀫𑀢𑁆𑀢𑀺𑀓𑁄. 𑀢𑀺𑀮𑀲𑁆𑀲 𑀩𑀻𑀚𑀧𑀫𑀸𑀡𑀁 𑀅𑀲𑁆𑀲 𑀲𑁂𑀯𑀸𑀮𑀲𑁆𑀲𑀸𑀢𑀺 𑀢𑀺𑀮𑀩𑀻𑀚𑀓𑁄. 𑀧𑀫𑀸𑀡𑀢𑁆𑀣𑁂 𑀓𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀔𑀧𑀡𑀓𑀸𑀤𑀬𑁄 𑀲𑁂𑀯𑀸𑀮𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀺𑀮𑀩𑀻𑀚𑀧𑀫𑀸𑀡𑁄 𑀚𑀮𑀲𑀡𑁆𑀞𑀺𑀢𑁄 𑀦𑀻𑀮𑀸𑀤𑀺𑀯𑀡𑁆𑀡𑀬𑀼𑀢𑁆𑀢𑁄 𑀲𑁂𑀯𑀸𑀮𑁄 𑀢𑀺𑀮𑀩𑀻𑀚𑀁 𑀦𑀸𑀫, 𑀲𑀧𑀢𑁆𑀢𑁄 𑀅𑀧𑁆𑀧𑀓𑀡𑁆𑀟𑁄 𑀉𑀓𑁆𑀔𑀮𑀺𑀧𑀺𑀥𑀸𑀦𑀸𑀤𑀺𑀧𑀫𑀸𑀡𑁄 𑀲𑀫𑀽𑀮𑁄 𑀏𑀓𑁄 𑀲𑁂𑀯𑀸𑀮𑀯𑀺𑀲𑁂𑀲𑁄 𑀲𑀗𑁆𑀔𑁄 𑀦𑀸𑀫, 𑀪𑀫𑀭𑀲𑀡𑁆𑀞𑀸𑀦𑁄 𑀦𑀻𑀮𑀯𑀡𑁆𑀡𑁄 𑀏𑀓𑁄 𑀲𑁂𑀯𑀸𑀮𑀯𑀺𑀲𑁂𑀲𑁄 𑀧𑀡𑀓𑁄 𑀦𑀸𑀫. 𑀉𑀤𑀓𑀁 𑀲𑁂𑀯𑀢𑀻𑀢𑀺 𑀲𑁂𑀯𑀸𑀮𑁄. 𑀢𑀢𑁆𑀣𑀸𑀢𑀺 𑀲𑁂𑀯𑀸𑀮𑁂𑀲𑀼. 𑀬𑁄𑀢𑀺 𑀲𑁂𑀯𑀸𑀮𑁄. 𑀧𑀢𑀺𑀝𑁆𑀞𑀺𑀢𑀁 𑀲𑁂𑀯𑀸𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀫𑀽𑀮𑁂 𑀯𑀸 𑀦𑀴𑁂 𑀯𑀸 𑀧𑀢𑁆𑀢𑁂 𑀯𑀸. 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸. ‘‘𑀳𑀢𑁆𑀣𑁂𑀳𑀻’’𑀢𑀺 𑀧𑀤𑀁 ‘‘𑀯𑀺𑀬𑀽𑀳𑀺𑀢𑁆𑀯𑀸’’𑀢𑀺 𑀧𑀤𑁂 𑀓𑀭𑀡𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀲𑁆𑀲𑀸𑀢𑀺 𑀲𑁂𑀯𑀸𑀮𑀲𑁆𑀲. 𑀏𑀢𑁆𑀢𑀸𑀯𑀢𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀬𑀽𑀳𑀦𑀫𑀢𑁆𑀢𑁂𑀦. 𑀬𑁄 𑀲𑁂𑀯𑀸𑀮𑁄 𑀦𑀺𑀓𑁆𑀔𑀫𑀢𑀺, 𑀢𑀁 𑀲𑁂𑀯𑀸𑀮𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀺𑀲𑁆𑀲𑀸𑀯𑀦𑀦𑁆𑀢𑀭𑁂𑀦𑀸𑀢𑀺 𑀧𑀭𑀺𑀲𑁆𑀲𑀸𑀯𑀦𑀙𑀺𑀤𑁆𑀤𑁂𑀦. 𑀉𑀧𑁆𑀧𑀮𑀸𑀦𑀺 𑀅𑀲𑁆𑀫𑀺𑀁 𑀕𑀘𑁆𑀙𑁂𑀢𑀺 𑀉𑀧𑁆𑀧𑀮𑀺𑀦𑀻. 𑀧𑀤𑀼𑀫𑀸𑀦𑀺 𑀅𑀲𑁆𑀫𑀺𑀁 𑀕𑀘𑁆𑀙𑁂𑀢𑀺 𑀧𑀤𑀼𑀫𑀺𑀦𑀻, 𑀇𑀦𑁄, 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓𑁄 𑀈. 𑀢𑀢𑁆𑀣𑁂𑀯𑀸𑀢𑀺 𑀉𑀤𑀓𑁂𑀬𑁂𑀯. 𑀢𑀸𑀦𑀻𑀢𑀺 𑀯𑀮𑁆𑀮𑀻𑀢𑀺𑀡𑀸𑀦𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀅𑀦𑀦𑁆𑀢𑀓𑁄𑀢𑀺 𑀲𑀸𑀲𑀧𑀫𑀢𑁆𑀢𑀺𑀓𑁄 𑀲𑁂𑀯𑀸𑀮𑁄. 𑀲𑁄 𑀳𑀺 𑀦𑀢𑁆𑀣𑀺 𑀅𑀢𑁆𑀢𑀢𑁄 𑀅𑀦𑁆𑀢𑁄 𑀮𑀸𑀫𑀓𑁄 𑀲𑁂𑀯𑀸𑀮𑁄 𑀏𑀢𑀲𑁆𑀲𑀸𑀢𑀺 𑀓𑀢𑁆𑀯𑀸 ‘‘𑀅𑀦𑀦𑁆𑀢𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀢𑀦𑀸𑀬𑁂𑀯 𑀳𑀺 𑀲𑀼𑀔𑀼𑀫𑁄, 𑀢𑀢𑁄 𑀲𑀼𑀔𑀼𑀫𑁄 𑀲𑁂𑀯𑀸𑀮𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣𑀸𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀪𑀸𑀯𑁂. 𑀢𑀫𑁆𑀧𑀻𑀢𑀺 ‘‘𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑀁 𑀦 𑀳𑁄𑀢𑀻’’𑀢𑀺 𑀯𑀘𑀦𑀫𑁆𑀧𑀺. 𑀧𑀺𑀲𑀤𑁆𑀤𑁄 𑀫𑀳𑀸𑀧𑀘𑁆𑀘𑀭𑀺𑀆𑀤𑀺𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀘𑀦𑀸𑀧𑁂𑀓𑁆𑀔𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀦 𑀆𑀕𑀢𑁄, 𑀢𑀲𑁆𑀫𑀸 𑀦 𑀲𑀫𑁂𑀢𑀻𑀢𑀺 𑀬𑁄𑀚𑀦𑀸. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀅𑀦𑀸𑀕𑀢𑁂. 𑀏𑀢𑀦𑁆𑀢𑀺 𑀅𑀦𑀦𑁆𑀢𑀓𑀲𑁂𑀯𑀸𑀮𑀸𑀤𑀺𑀁. 𑀕𑀘𑁆𑀙𑀺𑀲𑁆𑀲𑀢𑀻𑀢𑀺 𑀯𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁆𑀧𑀻𑀢𑀺 ‘‘𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀫𑁆𑀧𑀺. 𑀧𑀺𑀲𑀤𑁆𑀤𑁄 𑀧𑀼𑀭𑀺𑀫𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀘𑀦𑀸𑀧𑁂𑀓𑁆𑀔𑁄.

𑀅𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀩𑀻𑀚𑀕𑀸𑀫𑀲𑁆𑀲𑀸𑀢𑀺 𑀏𑀢𑁆𑀣 𑀩𑀻𑀚𑀕𑀸𑀫𑁄 𑀢𑀺𑀯𑀺𑀥𑁄 𑀳𑁄𑀢𑀺 𑁋 𑀬𑁄 𑀲𑀬𑀁 𑀪𑀽𑀢𑀕𑀸𑀫𑀢𑁄 𑀳𑀼𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀪𑀽𑀢𑀕𑀸𑀫𑀁 𑀚𑀦𑁂𑀢𑀺, 𑀅𑀫𑁆𑀩𑀝𑁆𑀞𑀺𑀆𑀤𑀺𑀓𑁄. 𑀬𑁄 𑀧𑀦 𑀲𑀬𑀁 𑀪𑀽𑀢𑀕𑀸𑀫𑀢𑁄 𑀳𑀼𑀢𑁆𑀯𑀸 𑀅𑀜𑁆𑀜𑀁 𑀧𑀦 𑀪𑀽𑀢𑀕𑀸𑀫𑀁 𑀦 𑀚𑀦𑁂𑀢𑀺, 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀔𑀸𑀡𑀼. 𑀬𑁄 𑀧𑀦 𑀲𑀬𑀫𑁆𑀧𑀺 𑀪𑀽𑀢𑀕𑀸𑀫𑀢𑁄 𑀅𑀳𑀼𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀪𑀽𑀢𑀕𑀸𑀫𑀁 𑀦 𑀚𑀦𑁂𑀢𑀺. 𑀧𑀸𑀦𑀻𑀬𑀖𑀝𑀸𑀤𑀻𑀦𑀁 𑀩𑀳𑀺 𑀲𑁂𑀯𑀸𑀮𑁄𑀢𑀺. 𑀪𑀽𑀢𑀕𑀸𑀫𑁄 𑀧𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺 𑁋 𑀬𑁄 𑀲𑀬𑀁 𑀩𑀻𑀚𑀕𑀸𑀫𑀢𑁄 𑀳𑀼𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀩𑀻𑀚𑀕𑀸𑀫𑀁 𑀚𑀦𑁂𑀢𑀺, 𑀏𑀢𑀭𑀳𑀺 𑀅𑀫𑁆𑀩𑀭𑀼𑀓𑁆𑀔𑀸𑀤𑀺𑀓𑁄. 𑀬𑁄 𑀧𑀦 𑀲𑀬𑀁 𑀩𑀻𑀚𑀕𑀸𑀫𑀢𑁄 𑀅𑀳𑀼𑀢𑁆𑀯𑀸𑀯 𑀅𑀜𑁆𑀜𑀁 𑀩𑀻𑀚𑀕𑀸𑀫𑀁 𑀚𑀦𑁂𑀢𑀺, 𑀆𑀤𑀺𑀓𑀧𑁆𑀧𑀓𑀸𑀮𑁂 𑀅𑀫𑁆𑀩𑀭𑀼𑀓𑁆𑀔𑀸𑀤𑀺𑀓𑁄. 𑀬𑁄 𑀧𑀦 𑀲𑀬𑀁 𑀩𑀻𑀚𑀕𑀸𑀫𑀢𑁄 𑀳𑀼𑀢𑁆𑀯𑀸 𑀅𑀜𑁆𑀜𑀁 𑀧𑀦 𑀩𑀻𑀚𑀕𑀸𑀫𑀁 𑀦 𑀚𑀦𑁂𑀢𑀺, 𑀦𑀻𑀮𑀯𑀡𑁆𑀡𑁄 𑀨𑀮𑀺𑀢𑀓𑀤𑀮𑀻𑀭𑀼𑀓𑁆𑀔𑀸𑀤𑀺𑀓𑁄. 𑀬𑁄 𑀧𑀦 𑀲𑀬𑀫𑁆𑀧𑀺 𑀩𑀻𑀚𑀕𑀸𑀫𑀢𑁄 𑀅𑀳𑀼𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀩𑀻𑀚𑀕𑀸𑀫𑀁 𑀦 𑀚𑀦𑁂𑀢𑀺, 𑀇𑀥 𑀯𑀼𑀢𑁆𑀢𑁄 𑀅𑀦𑀦𑁆𑀢𑀓𑀲𑁂𑀯𑀸𑀮𑀸𑀤𑀺𑀓𑁄𑀢𑀺. 𑀢𑀢𑁆𑀣 𑀘𑀢𑀼𑀢𑁆𑀣𑀁 𑀪𑀽𑀢𑀕𑀸𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀪𑀽𑀢𑀕𑀸𑀫𑀫𑀽𑀮𑀓𑀢𑁆𑀢𑀸 𑀢𑀸𑀤𑀺𑀲𑀲𑁆𑀲 𑀩𑀻𑀚𑀲𑁆𑀲𑀸’’𑀢𑀺. 𑀅𑀬𑀁 𑀧𑀦 𑀢𑀢𑀺𑀬𑀩𑀻𑀚𑀕𑀸𑀫𑀲𑁆𑀲 𑀘 𑀘𑀢𑀼𑀢𑁆𑀣𑀪𑀽𑀢𑀕𑀸𑀫𑀲𑁆𑀲 𑀘 𑀯𑀺𑀲𑁂𑀲𑁄 𑁋 𑀢𑀢𑀺𑀬𑀩𑀻𑀚𑀕𑀸𑀫𑁂 𑀫𑀽𑀮𑀧𑀡𑁆𑀡𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀘𑀢𑀼𑀢𑁆𑀣𑀪𑀽𑀢𑀕𑀸𑀫𑁂 𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀻𑀢𑀺. 𑀫𑀽𑀮𑀧𑀡𑁆𑀡𑀸𑀦𑀁 𑀅𑀧𑀜𑁆𑀜𑀸𑀬𑀦𑀢𑁆𑀢𑀸 𑀩𑀻𑀚𑀕𑀸𑀫𑁄𑀢𑀺 𑀯𑀼𑀢𑁆𑀢𑁄, 𑀢𑁂𑀲𑀁 𑀧𑀜𑁆𑀜𑀸𑀬𑀦𑀢𑁆𑀢𑀸 𑀪𑀽𑀢𑀕𑀸𑀫𑁄𑀢𑀺 𑀯𑀼𑀢𑁆𑀢𑁄. 𑀇𑀢𑀭𑀣𑀸 𑀳𑀺 𑀯𑀺𑀭𑁄𑀥𑁄 𑀪𑀯𑁂𑀬𑁆𑀬𑀸𑀢𑀺. 𑀅𑀢𑁆𑀢𑀦𑁄 𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀪𑀸𑀯𑀢𑁄 𑀕𑀭𑀼𑀓𑀁, 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀦𑀁 𑀯𑀸𑀤𑁂 𑀤𑀼𑀓𑁆𑀓𑀝𑀫𑀢𑁆𑀢𑀪𑀸𑀯𑀢𑁄 𑀮𑀳𑀼𑀓𑀁. 𑀏𑀢𑀦𑁆𑀢𑀺 𑀞𑀸𑀦𑀁.

𑀏𑀯𑀁 𑀉𑀤𑀓𑀝𑁆𑀞𑀁 𑀤𑀲𑁆𑀲𑁂𑀢𑁆𑀯𑀸 𑀣𑀮𑀝𑁆𑀞𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀣𑀮𑀝𑁆𑀞𑁂’’𑀢𑀺𑀆𑀤𑀺. 𑀣𑀮𑀝𑁆𑀞𑁂 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀳𑀭𑀺𑀢𑀔𑀸𑀡𑀽𑀲𑀼. 𑀉𑀤𑁆𑀥𑀁 𑀯𑀟𑁆𑀠𑀢𑀻𑀢𑀺 𑀦𑀯𑀲𑀸𑀔𑀸𑀦𑀺𑀕𑁆𑀕𑀫𑀦𑁂𑀦 𑀙𑀺𑀦𑁆𑀦𑀢𑁄 𑀉𑀧𑀭𑀺 𑀯𑀟𑁆𑀠𑀢𑀺. 𑀲𑁄𑀢𑀺 𑀔𑀸𑀡𑀼. 𑀨𑀮𑀺𑀢𑀸𑀬 𑀓𑀤𑀮𑀺𑀬𑀸 𑀔𑀸𑀡𑀼 𑀩𑀻𑀚𑀕𑀸𑀫𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀬𑁄𑀚𑀦𑀸. 𑀨𑀮𑀁 𑀲𑀜𑁆𑀚𑀸𑀢𑀁 𑀏𑀢𑀺𑀲𑁆𑀲𑀸𑀢𑀺 𑀨𑀮𑀺𑀢𑀸. 𑀢𑀣𑀸𑀢𑀺 ‘‘𑀪𑀽𑀢𑀕𑀸𑀫𑁂𑀦𑁂𑀯 𑀲𑀗𑁆𑀕𑀳𑀺𑀢𑀸’’𑀢𑀺 𑀧𑀤𑀸𑀦𑀺 𑀆𑀓𑀟𑁆𑀠𑀢𑀺. 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀭𑀢𑀦𑀧𑁆𑀧𑀫𑀸𑀡𑀸𑀧𑀻𑀢𑀺 𑀳𑀢𑁆𑀣𑀧𑁆𑀧𑀫𑀸𑀡𑀸𑀧𑀺. 𑀅𑀣𑀸𑀢𑀺 𑀅𑀧𑀸𑀤𑀸𑀦𑀢𑁆𑀣𑁄, 𑀢𑀢𑁄 𑀭𑀸𑀲𑀺𑀓𑀭𑀡𑀢𑁄 𑀅𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. 𑀪𑀽𑀫𑀺𑀬𑀁 𑀦𑀺𑀔𑀡𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑀽𑀮𑁂𑀲𑀼 𑀘𑁂𑀯 𑀧𑀡𑁆𑀡𑁂𑀲𑀼 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄𑀯, 𑀦 𑀯𑀺𑀓𑀧𑁆𑀧𑀢𑁆𑀣𑁄𑀢𑀺 𑀆𑀳 ‘‘𑀫𑀽𑀮𑀫𑀢𑁆𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺.

𑀩𑀻𑀚𑀸𑀦𑀻𑀢𑀺 𑀫𑀽𑀮𑀸𑀤𑀺𑀩𑀻𑀚𑀸𑀦𑀺. 𑀞𑀧𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀉𑀧𑀭𑀻’’𑀢𑀺 𑀧𑀤𑁂𑀦 𑀳𑁂𑀝𑁆𑀞𑀸 𑀫𑀽𑀮𑀸𑀦𑀺 𑀘𑀸𑀢𑀺 𑀅𑀢𑁆𑀣𑀁 𑀦𑀬𑁂𑀦 𑀜𑀸𑀧𑁂𑀢𑀺. 𑀦 𑀅𑀗𑁆𑀓𑀼𑀭𑁂 𑀦𑀺𑀕𑁆𑀕𑀢𑀫𑀢𑁆𑀢𑁂𑀬𑁂𑀯, 𑀅𑀣 𑀔𑁄 𑀳𑀭𑀺𑀢𑁂 𑀦𑀻𑀮𑀧𑀡𑁆𑀡𑀯𑀡𑁆𑀡𑁂 𑀚𑀸𑀢𑁂𑀬𑁂𑀯 𑀪𑀽𑀢𑀕𑀸𑀫𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀳𑀭𑀺𑀢𑁂’’𑀢𑀺𑀆𑀤𑀺. 𑀢𑀸𑀮𑀝𑁆𑀞𑀻𑀦𑀁 𑀫𑀽𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀦𑁆𑀢𑀲𑀽𑀘𑀺 𑀯𑀺𑀬𑀸𑀢𑀺 𑀳𑀢𑁆𑀣𑀺𑀤𑀦𑁆𑀢𑀲𑀽𑀘𑀺 𑀯𑀺𑀬. 𑀬𑀣𑀸 𑀅𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀢𑀢𑀺𑀬𑁄 𑀓𑁄𑀝𑁆𑀞𑀸𑀲𑁄 𑀦 𑀆𑀕𑀢𑁄, 𑀦 𑀏𑀯𑀁 𑀅𑀫𑀽𑀮𑀓𑀪𑀽𑀢𑀕𑀸𑀫𑁄. 𑀲𑁄 𑀧𑀦 𑀆𑀕𑀢𑁄𑀬𑁂𑀯𑀸𑀢𑀺 𑀆𑀳 ‘‘𑀅𑀫𑀽𑀮𑀓𑀪𑀽𑀢𑀕𑀸𑀫𑁂’’𑀢𑀺. 𑀅𑀫𑀽𑀮𑀺𑀓𑀮𑀢𑀸 𑀯𑀺𑀬 𑀅𑀫𑀽𑀮𑀓𑀪𑀽𑀢𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀯𑀦𑁆𑀤𑀸𑀓𑀸𑀢𑀺 𑀭𑀼𑀓𑁆𑀔𑀸𑀤𑀦𑀻. 𑀲𑀸 𑀳𑀺 𑀲𑀬𑀁 𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀚𑀸𑀬𑀦𑁆𑀢𑀻𑀧𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀸𑀦𑀁 𑀭𑀼𑀓𑁆𑀔𑀸𑀦𑀁 𑀅𑀤𑀦𑀢𑁆𑀢𑀸 𑀪𑀓𑁆𑀔𑀦𑀢𑁆𑀢𑀸 𑀯𑀤𑀻𑀬𑀢𑀺 𑀣𑀼𑀢𑀻𑀬𑀢𑀻𑀢𑀺 ‘‘𑀯𑀦𑁆𑀤𑀸𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀸 𑀯𑀸𑀢𑀺 𑀯𑀦𑁆𑀤𑀸𑀓𑀸𑀬 𑀅𑀜𑁆𑀜𑀸 𑀯𑀸. 𑀢𑀦𑁆𑀢𑀺 𑀯𑀦𑁆𑀤𑀸𑀓𑀸𑀤𑀺𑀁. 𑀢𑀢𑁄𑀢𑀺 𑀭𑀼𑀓𑁆𑀔𑀢𑁄. 𑀯𑀦𑀦𑁆𑀢𑀺 𑀔𑀼𑀤𑁆𑀤𑀓𑁄 𑀕𑀘𑁆𑀙𑁄. 𑀧𑀕𑀼𑀫𑁆𑀩𑁄𑀢𑀺 𑀫𑀳𑀸𑀕𑀘𑁆𑀙𑁄. 𑀤𑀡𑁆𑀟𑀓𑁄𑀢𑀺 𑀭𑀼𑀓𑁆𑀔𑁄 𑀤𑀡𑁆𑀟𑀬𑁄𑀕𑀢𑁄. 𑀢𑀲𑁆𑀲𑀸𑀧𑀻𑀢𑀺 𑀅𑀫𑀽𑀮𑀺𑀓𑀮𑀢𑀸𑀬𑀧𑀺. 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀦𑁆𑀤𑀸𑀓𑀸𑀤𑀺𑀓𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀯𑀺𑀬 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀤𑁆𑀯𑁂 𑀢𑀻𑀡𑀺 𑀧𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑀧𑀢𑁆𑀢𑁄 𑀲𑀜𑁆𑀚𑀸𑀬𑀦𑁆𑀢𑁄𑀧𑀺 𑀅𑀕𑁆𑀕𑀩𑀻𑀚𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸’’𑀢𑀺 𑀧𑀤𑀁 ‘‘𑀮𑀺𑀢𑁆𑀢𑀲𑁆𑀲𑀸’’𑀢𑀺 𑀧𑀤𑁂 𑀓𑀢𑁆𑀢𑀸. 𑀦𑀺𑀤𑀸𑀖𑀲𑀫𑀬𑁂𑀢𑀺 𑀕𑀺𑀫𑁆𑀳𑀓𑀸𑀮𑁂. 𑀅𑀩𑁆𑀩𑁄𑀳𑀸𑀭𑀺𑀓𑁄𑀢𑀺 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀦𑁆𑀢𑀺 𑀦 𑀯𑁄𑀳𑀭𑀺𑀢𑀩𑁆𑀩𑁄. 𑀯𑁄𑀳𑀭𑀺𑀢𑀼𑀁 𑀦 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀢𑀁, ‘‘𑀲𑀘𑁂…𑀧𑁂… 𑀧𑀫𑀚𑁆𑀚𑀺𑀢𑀩𑁆𑀩𑀸’’𑀢𑀺 𑀯𑀘𑀦𑀁 𑀯𑀸.

𑀅𑀳𑀺𑀁 𑀲𑀧𑁆𑀧𑀁 𑀙𑀸𑀤𑁂𑀢𑀻𑀢𑀺 𑀅𑀳𑀺𑀘𑁆𑀙𑀢𑁆𑀢𑀁, 𑀢𑀁𑀬𑁂𑀯 𑀅𑀳𑀺𑀘𑁆𑀙𑀢𑁆𑀢𑀓𑀁. 𑀬𑀣𑀸𑀓𑀣𑀜𑁆𑀘𑀺 𑀳𑀺 𑀩𑁆𑀬𑀼𑀧𑁆𑀧𑀢𑁆𑀢𑀺, 𑀭𑀼𑀴𑁆𑀳𑀺𑀬𑀸 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄. 𑀢𑀲𑁆𑀫𑀸𑀢𑀺 𑀢𑀢𑁄 𑀯𑀺𑀓𑁄𑀧𑀦𑀢𑁄. 𑀢𑀢𑁆𑀣𑀸𑀢𑀺 𑀅𑀳𑀺𑀘𑁆𑀙𑀢𑁆𑀢𑀓𑁂. 𑀳𑁂𑀝𑁆𑀞𑀸 ‘‘𑀉𑀤𑀓𑀧𑀧𑁆𑀧𑀝𑀓𑁄’’𑀢𑀺 𑀯𑀢𑁆𑀯𑀸 𑀇𑀥 ‘‘𑀭𑀼𑀓𑁆𑀔𑀧𑀧𑁆𑀧𑀝𑀺𑀓𑀸𑀬𑀧𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀧𑁆𑀧𑀝𑀓𑀲𑀤𑁆𑀤𑁄 𑀤𑁆𑀯𑀺𑀮𑀺𑀗𑁆𑀕𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀦𑁆𑀢𑀺 𑀧𑀧𑁆𑀧𑀝𑀺𑀓𑀁. 𑀞𑀺𑀢𑀁 𑀦𑀺𑀬𑁆𑀬𑀸𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 ‘‘𑀮𑀕𑁆𑀕’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑁂𑀦𑀸𑀢𑀺 𑀳𑀢𑁆𑀣𑀮𑁄𑀮𑁂𑀦. ‘‘𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀧𑀻’’𑀢𑀺 𑀧𑀤𑁂 𑀳𑁂𑀢𑀼.

𑀯𑀸𑀲𑀢𑁆𑀣𑀺𑀓𑁂𑀦𑀸𑀢𑀺 𑀯𑀸𑀲𑀁 𑀇𑀘𑁆𑀙𑀦𑁆𑀢𑁂𑀦. ‘‘𑀑𑀘𑀺𑀦𑀸𑀧𑁂𑀢𑀩𑁆𑀩𑀸’’𑀢𑀺 𑀧𑀤𑁂 𑀓𑀢𑁆𑀢𑀸. 𑀉𑀧𑁆𑀧𑀸𑀝𑁂𑀦𑁆𑀢𑁂𑀳𑀻𑀢𑀺 𑀉𑀤𑁆𑀥𑀭𑀦𑁆𑀢𑁂𑀳𑀺. 𑀢𑁂𑀲𑀦𑁆𑀢𑀺 𑀲𑀸𑀫𑀡𑁂𑀭𑀸𑀦𑀁. 𑀲𑀸𑀔𑀁 𑀕𑀳𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀞𑀧𑀺𑀢𑀲𑁆𑀲 𑀲𑀺𑀗𑁆𑀕𑀻𑀯𑁂𑀭𑀲𑁆𑀲𑀸𑀢𑀺 𑀬𑁄𑀚𑀦𑀸.

𑀙𑀺𑀚𑁆𑀚𑀦𑀓𑀦𑁆𑀢𑀺 𑀙𑀺𑀚𑁆𑀚𑀦𑀬𑀼𑀢𑁆𑀢𑀁, 𑀙𑀺𑀚𑁆𑀚𑀦𑀸𑀭𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀘𑀗𑁆𑀓𑀫𑀺𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀯𑀢𑁆𑀢𑀲𑀻𑀲𑁂𑀦 𑀘𑀗𑁆𑀓𑀫𑀦𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀪𑀺𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀅𑀪𑀺𑀚𑁆𑀚𑀫𑀸𑀦𑁂 𑀕𑀡𑁆𑀞𑀺𑀧𑀺 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀭𑀼𑀫𑀓𑁆𑀓𑀝𑀓𑀦𑁆𑀢𑀺 𑀫𑀓𑁆𑀓𑀝𑀲𑁆𑀲 𑀳𑀢𑁆𑀣𑁄 𑀫𑀓𑁆𑀓𑀝𑁄 𑀉𑀧𑀘𑀸𑀭𑁂𑀦, 𑀫𑀓𑁆𑀓𑀝𑁄 𑀯𑀺𑀬𑀸𑀢𑀺 𑀫𑀓𑁆𑀓𑀝𑀓𑁄, 𑀲𑀤𑀺𑀲𑀢𑁆𑀣𑁂 𑀓𑁄. 𑀤𑀸𑀭𑀼𑀲𑀗𑁆𑀔𑀸𑀢𑁄 𑀫𑀓𑁆𑀓𑀝𑀓𑁄 𑀤𑀸𑀭𑀼𑀫𑀓𑁆𑀓𑀝𑀓𑁄. 𑀢𑀁 𑀆𑀓𑁄𑀝𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀺𑀬𑀸𑀫𑀺𑀢𑀢𑁆𑀢𑀸𑀢𑀺 𑀇𑀫𑀦𑁆𑀢𑀺 𑀅𑀦𑀺𑀬𑀸𑀫𑀺𑀢𑀢𑁆𑀢𑀸 𑀯𑀘𑀦𑀲𑁆𑀲. 𑀇𑀤𑀁 𑀫𑀳𑀸𑀲𑀸𑀫𑀜𑁆𑀜𑀁, 𑀯𑀺𑀲𑁂𑀲𑀲𑀸𑀫𑀜𑁆𑀜𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀦𑀸𑀫𑀁 𑀕𑀳𑁂𑀢𑁆𑀯𑀸𑀧𑀻’’𑀢𑀺𑀆𑀤𑀺. 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀯𑀘𑀦𑀁.

‘‘𑀇𑀫𑀁 𑀚𑀸𑀦𑀸𑀢𑀺𑀆𑀤𑀻𑀲𑀽’’𑀢𑀺 𑀧𑀤𑀁 ‘‘𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀧𑀤𑁂 𑀆𑀥𑀸𑀭𑁄. 𑀇𑀫𑀁 𑀫𑀽𑀮𑀪𑁂𑀲𑀚𑁆𑀚𑀁 𑀚𑀸𑀦𑀸𑀢𑀺 𑀇𑀫𑀁 𑀫𑀽𑀮𑀪𑁂𑀲𑀚𑁆𑀚𑀁 𑀬𑁄𑀚𑀺𑀢𑀼𑀁 𑀚𑀸𑀦𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀇𑀫𑀁 𑀚𑀸𑀦𑀸’’𑀢𑀺𑀆𑀤𑀺𑀯𑀘𑀦𑀫𑀢𑁆𑀢𑁂𑀦. 𑀓𑀧𑁆𑀧𑀺𑀬𑀦𑁆𑀢𑀺 𑀲𑀫𑀡𑀯𑁄𑀳𑀸𑀭𑁂𑀦, 𑀯𑁄𑀳𑀸𑀭𑀲𑁆𑀲 𑀯𑀸 𑀬𑀼𑀢𑁆𑀢𑀁 𑀅𑀦𑀼𑀭𑀽𑀧𑀁. 𑀏𑀢𑁆𑀣𑀸𑀢𑀺 ‘‘𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑁂. 𑀦𑀺𑀩𑁆𑀩𑀝𑁆𑀝𑀩𑀻𑀚𑀫𑁂𑀯𑀸𑀢𑀺 𑀨𑀮𑀢𑁄 𑀦𑀺𑀩𑁆𑀩𑀝𑁆𑀝𑁂𑀢𑁆𑀯𑀸 𑀯𑀺𑀲𑀼𑀁 𑀓𑀢𑀁 𑀩𑀻𑀚𑀁 𑀏𑀯. 𑀢𑀢𑁆𑀣𑀸𑀢𑀺 𑀲𑀼𑀢𑁆𑀢𑁂. 𑀓𑀭𑁄𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀯𑀸𑀯𑀸’’𑀢𑀺 𑀇𑀫𑀺𑀦𑀸 𑀧𑀞𑀫𑀁 𑀓𑀢𑁆𑀯𑀸 𑀅𑀕𑁆𑀕𑀺𑀲𑀢𑁆𑀣𑀦𑀔𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀧𑀘𑁆𑀙𑀸 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀳𑀫𑀬𑀲𑀢𑁆𑀣𑀲𑁆𑀲𑀸𑀢𑀺 𑀅𑀬𑀢𑀫𑁆𑀩𑀸𑀤𑀺𑀮𑁄𑀳𑀫𑀬𑀲𑁆𑀲 𑀲𑀢𑁆𑀣𑀲𑁆𑀲. 𑀢𑁂𑀳𑀻𑀢𑀺 𑀫𑀦𑀼𑀲𑁆𑀲𑀸𑀤𑀻𑀦𑀁 𑀦𑀔𑁂𑀳𑀺. 𑀢𑁂𑀳𑀻𑀢𑀺 𑀅𑀲𑁆𑀲𑀸𑀤𑀻𑀦𑀁 𑀔𑀼𑀭𑁂𑀳𑀺. 𑀢𑁂𑀳𑀻𑀢𑀺 𑀳𑀢𑁆𑀣𑀺𑀦𑀔𑁂𑀳𑀺. 𑀬𑁂𑀳𑀻𑀢𑀺 𑀦𑀔𑁂𑀳𑀺. 𑀢𑀢𑁆𑀣𑀚𑀸𑀢𑀓𑁂𑀳𑀺𑀧𑀻𑀢𑀺 𑀢𑀲𑁆𑀫𑀺𑀁 𑀲𑀢𑁆𑀣𑁂 𑀚𑀸𑀢𑀓𑁂𑀳𑀺𑀧𑀺, 𑀦𑀔𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. ‘‘𑀓𑀧𑁆𑀧𑀺𑀬𑀁 𑀓𑀭𑁄𑀦𑁆𑀢𑁂𑀦𑀸’’𑀢𑀺𑀆𑀤𑀺𑀯𑀘𑀦𑀫𑀧𑁂𑀓𑁆𑀔𑀢𑀺. ‘‘𑀉𑀘𑁆𑀙𑀼𑀁 𑀓𑀧𑁆𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀘𑁆𑀙𑀼𑀫𑁂𑀯 𑀯𑀺𑀚𑁆𑀛𑀢𑀺, 𑀧𑀕𑁂𑀯. ‘‘𑀤𑀸𑀭𑀼𑀁 𑀓𑀧𑁆𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀘𑁆𑀙𑀼𑀁 𑀯𑀺𑀚𑁆𑀛𑀢𑀺, ‘‘𑀤𑀸𑀭𑀼𑀁 𑀓𑀧𑁆𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀸𑀭𑀼𑀫𑁂𑀯 𑀯𑀸 𑀯𑀺𑀚𑁆𑀛𑀢𑀺, 𑀯𑀝𑁆𑀝𑀢𑀺 𑀏𑀓𑀸𑀩𑀤𑁆𑀥𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀦𑁆𑀢𑀺 𑀭𑀚𑁆𑀚𑀼𑀁 𑀯𑀸 𑀯𑀮𑁆𑀮𑀺𑀁 𑀯𑀸. 𑀲𑀩𑁆𑀩𑀁 𑀔𑀡𑁆𑀟𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀫𑀭𑀺𑀘𑀧𑀓𑁆𑀓𑁂𑀲𑀼. 𑀓𑀝𑀸𑀳𑀦𑁆𑀢𑀺 𑀏𑀓𑀸𑀬 𑀪𑀸𑀚𑀦𑀯𑀺𑀓𑀢𑀺𑀬𑀸 𑀦𑀸𑀫𑀫𑁂𑀢𑀁. 𑀇𑀥 𑀧𑀦 𑀩𑀻𑀚𑀸𑀦𑀁 𑀪𑀸𑀚𑀦𑀪𑀸𑀯𑁂𑀦 𑀢𑀁𑀲𑀤𑀺𑀲𑀢𑁆𑀢𑀸 𑀨𑀮𑀨𑁂𑀕𑁆𑀕𑀼𑀧𑀺 ‘‘𑀓𑀝𑀸𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸𑀩𑀤𑁆𑀥𑀦𑁆𑀢𑀺 𑀓𑀝𑀸𑀳𑁂𑀦 𑀏𑀓𑀢𑁄 𑀆𑀩𑀤𑁆𑀥𑀁.

𑀢𑀸𑀦𑀻𑀢𑀺 𑀢𑀺𑀡𑀸𑀦𑀺. 𑀢𑁂𑀦𑀸𑀢𑀺 𑀭𑀼𑀓𑁆𑀔𑀧𑀯𑀝𑁆𑀝𑀦𑀸𑀤𑀺𑀦𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀞𑀧𑀦𑀧𑀸𑀢𑀦𑀝𑁆𑀞𑀸𑀦𑁂. ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬’’𑀦𑁆𑀢𑀺 𑀧𑀤𑀁 ‘‘𑀯𑀼𑀢𑁆𑀢’’𑀦𑁆𑀢𑀺 𑀧𑀤𑁂 𑀲𑀸𑀫𑀜𑁆𑀜𑀸𑀥𑀸𑀭𑁄. 𑀪𑀺𑀓𑁆𑀔𑀼 𑀅𑀚𑁆𑀛𑁄𑀢𑁆𑀣𑀝𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀧𑀸𑀢𑁂𑀢𑀺 𑀆𑀯𑀸𑀝𑁂. 𑀲𑁄 𑀳𑀺 𑀅𑀯𑀧𑀢𑀦𑀝𑁆𑀞𑀸𑀦𑀢𑁆𑀢𑀸 ‘‘𑀑𑀧𑀸𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀭𑀼𑀓𑁆𑀔𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀝𑀭𑀼𑀓𑁆𑀔𑀁. 𑀪𑀽𑀫𑀺𑀦𑁆𑀢𑀺 𑀑𑀧𑀸𑀢𑀣𑀺𑀭𑀪𑀽𑀫𑀺𑀁. 𑀚𑀻𑀯𑀺𑀢𑀳𑁂𑀢𑀽𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀚𑀻𑀯𑀺𑀢𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀧𑀤𑀁 ‘‘𑀦𑀺𑀓𑁆𑀔𑀸𑀫𑁂𑀢𑀼’’𑀦𑁆𑀢𑀺 𑀧𑀤𑁂 𑀪𑀸𑀯𑀓𑀢𑁆𑀢𑀸, 𑀓𑀸𑀭𑀺𑀢𑀓𑀢𑁆𑀢𑀸 𑀯𑀸. ‘‘𑀅𑀚𑁆𑀛𑁄𑀢𑁆𑀣𑀝𑀪𑀺𑀓𑁆𑀔𑀼’’𑀦𑁆𑀢𑀺 𑀯𑀸 ‘‘𑀑𑀧𑀸𑀢𑀪𑀺𑀓𑁆𑀔𑀼’’𑀦𑁆𑀢𑀺 𑀯𑀸 𑀓𑀸𑀭𑀺𑀢𑀓𑀫𑁆𑀫𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁂, 𑀅𑀦𑀸𑀧𑀢𑁆𑀢𑀺𑀪𑀸𑀯𑀲𑁆𑀲 𑀯𑀸. 𑀏𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀲𑁆𑀲. 𑀧𑀭𑁄 𑀧𑀦 𑀓𑀸𑀭𑀼𑀜𑁆𑀜𑁂𑀦 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀫𑁆𑀧𑀻𑀢𑀺 𑀓𑀸𑀭𑀼𑀜𑁆𑀜𑀫𑁆𑀧𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸𑀢𑀺. 𑀧𑀞𑀫𑀁.

𑁨. 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀁

𑁯𑁪. 𑀤𑀼𑀢𑀺𑀬𑁂 𑀅𑀦𑀸𑀘𑀸𑀭𑀦𑁆𑀢𑀺 𑀅𑀘𑀭𑀺𑀢𑀩𑁆𑀩𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀯𑀻𑀢𑀺𑀓𑁆𑀓𑀫𑀁. 𑀲𑀩𑁆𑀩𑀦𑀸𑀫𑀲𑁆𑀲 𑀅𑀦𑀺𑀬𑀫𑀢𑁆𑀣𑀢𑁆𑀢𑀸 𑀇𑀥 𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀦 𑀯𑀘𑀦𑁂𑀦 𑀅𑀜𑁆𑀜𑀁 𑀯𑀘𑀦’’𑀦𑁆𑀢𑀺. 𑀲𑁄𑀢𑀺 𑀪𑀺𑀓𑁆𑀔𑀼, 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁄𑀢𑀺 𑀓𑁄 𑀧𑀼𑀕𑁆𑀕𑀮𑁄. 𑀓𑀺𑀦𑁆𑀢𑀺 𑀓𑀺𑀁 𑀆𑀧𑀢𑁆𑀢𑀺𑀁. 𑀓𑀺𑀲𑁆𑀫𑀺𑀦𑁆𑀢𑀺 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁. 𑀓𑀺𑀦𑁆𑀢𑀺 𑀓𑀺𑀁 𑀓𑀫𑁆𑀫𑀁. 𑀓𑀦𑁆𑀢𑀺 𑀓𑀁 𑀧𑀼𑀕𑁆𑀕𑀮𑀁. 𑀓𑀺𑀦𑁆𑀢𑀺 𑀓𑀺𑀁 𑀯𑀘𑀦𑀁.

𑀏𑀢𑁆𑀣𑀸𑀢𑀺 ‘‘𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀧𑀸𑀴𑀺𑀬𑀁. ‘‘𑀪𑀺𑀓𑁆𑀔𑀽𑀳𑀻’’𑀢𑀺 𑀧𑀤𑀁 ‘‘𑀯𑀼𑀢𑁆𑀢𑁄’’𑀢𑀺 𑀧𑀤𑁂 𑀓𑀢𑁆𑀢𑀸. 𑀅𑀲𑀸𑀭𑀼𑀧𑁆𑀧𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀅𑀲𑀸𑀭𑀼𑀧𑁆𑀧𑀁. 𑀏𑀲𑁄𑀢𑀺 𑀏𑀲𑁄 𑀅𑀢𑁆𑀣𑁄, 𑀯𑀺𑀪𑀯𑁄𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀯𑀢𑁆𑀣𑀼. 𑀪𑀡𑀦𑁆𑀢𑁄 𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀸𑀲𑀦𑁂. 𑀲𑁄𑀢𑀦𑁆𑀢𑀺 𑀲𑁄𑀢𑀤𑁆𑀯𑀸𑀭𑀁. 𑀘𑀓𑁆𑀔𑀼𑀦𑁆𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀁.

𑁯𑁮. 𑀅𑀜𑁆𑀜𑀦𑁆𑀢𑀺 𑀧𑀼𑀘𑁆𑀙𑀺𑀢𑀢𑁆𑀣𑀢𑁄 𑀅𑀜𑁆𑀜𑀁 𑀅𑀧𑀼𑀘𑁆𑀙𑀺𑀢𑀫𑀢𑁆𑀣𑀁. 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀡𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀢𑀼𑀡𑁆𑀳𑀻𑀪𑀸𑀯𑀲𑁆𑀲𑀸𑀢𑀺 𑀅𑀪𑀸𑀲𑀦𑀲𑁆𑀲. 𑀆𑀢𑁆𑀬𑀽𑀧𑀲𑀕𑁆𑀕𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀆𑀭𑁄𑀧𑁂𑀢𑀽’’𑀢𑀺. 𑀏𑀯𑀁 ‘‘𑀅𑀭𑁄𑀧𑀺𑀢𑁂’’𑀢𑀺 𑀏𑀢𑁆𑀣𑀧𑀺. 𑀢𑁂𑀦𑀸𑀳 ‘‘𑀅𑀦𑀸𑀭𑁄𑀧𑀺𑀢𑁂’’𑀢𑀺.

𑁧𑁦𑁧. 𑀢𑀦𑁆𑀢𑀺 𑀅𑀜𑁆𑀜𑀯𑀸𑀤𑀓𑀯𑀺𑀳𑁂𑀲𑀓𑀭𑁄𑀧𑀦𑀓𑀫𑁆𑀫𑀁. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬, 𑀳𑁄𑀢𑀺 𑀯𑀸.

𑁧𑁦𑁨. 𑀓𑀺𑀦𑁆𑀢𑀺 𑀓𑀺𑀁 𑀯𑀘𑀦𑀁. 𑀬𑁂𑀦𑀸𑀢𑀺 𑀬𑁂𑀦 𑀩𑁆𑀬𑀸𑀥𑀺𑀦𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀤𑀺𑀲𑁄 𑀩𑁆𑀬𑀸𑀥𑀺 𑀫𑀼𑀔𑁂 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀧𑁆𑀧𑀘𑁆𑀘𑀬𑀸𑀢𑀺 𑀢𑀢𑁄 𑀓𑀣𑀺𑀢𑀓𑀸𑀭𑀡𑀸𑀢𑀺. 𑀤𑀼𑀢𑀺𑀬𑀁.

𑁩. 𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀁

𑁧𑁦𑁩. 𑀢𑀢𑀺𑀬𑁂 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀽’’𑀢𑀺 𑀓𑀸𑀭𑀺𑀢𑀓𑀫𑁆𑀫𑀢𑁆𑀢𑀸 𑀓𑀭𑀡𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀢𑁂𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺. 𑀑𑀓𑀸𑀭𑀯𑀺𑀧𑀭𑀻𑀢𑁄 𑀉𑀓𑀸𑀭𑁄𑀢𑀺 𑀘 𑀛𑁂𑀲𑀤𑁆𑀤𑁄 𑀜𑀸𑀡𑀢𑁆𑀣𑁄𑀢𑀺 𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀚𑀸𑀦𑀸𑀧𑁂𑀦𑁆𑀢𑀻’’𑀢𑀺. ‘‘𑀢𑀁 𑀆𑀬𑀲𑁆𑀫𑀦𑁆𑀢’’𑀦𑁆𑀢𑀺 𑀧𑀤𑀁 ‘‘𑀅𑀯𑀚𑀸𑀦𑀸𑀧𑁂𑀦𑁆𑀢𑀻’’𑀢𑀺 𑀧𑀤𑁂 𑀥𑀸𑀢𑀼𑀓𑀫𑁆𑀫𑀁. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀛𑁂𑀲𑀤𑁆𑀤𑁄 𑀑𑀮𑁄𑀓𑀦𑀢𑁆𑀣𑁄 𑀘 𑀘𑀺𑀦𑁆𑀢𑀦𑀢𑁆𑀣𑁄 𑀘 𑀳𑁄𑀢𑀺, 𑀢𑁂𑀦𑀸𑀳 ‘‘𑀑𑀮𑁄𑀓𑀸𑀧𑁂𑀦𑁆𑀢𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 ‘‘𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀦𑁆𑀢𑀻’’𑀢𑀺 𑀧𑀤𑁂. 𑀙𑀦𑁆𑀤𑀸𑀬𑀸𑀢𑀺 𑀙𑀦𑁆𑀤𑀢𑁆𑀣𑀁. 𑀬𑁂𑀲𑀁 𑀲𑁂𑀦𑀸𑀲𑀦𑀸𑀦𑀺 𑀘 𑀧𑀜𑁆𑀜𑀧𑁂𑀢𑀺, 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑀢𑀺, 𑀢𑁂𑀲𑀁 𑀅𑀢𑁆𑀢𑀦𑀺 𑀧𑁂𑀫𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀙𑀦𑁆𑀤𑀸𑀬𑀸𑀢𑀺 𑀙𑀦𑁆𑀤𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀦𑀬𑁄 𑀯𑀼𑀢𑁆𑀢𑁄. 𑀧𑀭𑁂𑀲𑀁 𑀅𑀢𑁆𑀢𑀦𑁄 𑀧𑁂𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀧𑀸𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀧𑀓𑁆𑀔𑁂 𑀧𑀸𑀢𑀸𑀧𑀦𑁂𑀦.

𑁧𑁦𑁫. 𑀉𑀚𑁆𑀛𑀸𑀧𑁂𑀦𑁆𑀢𑀺 𑀅𑀦𑁂𑀦𑀸𑀢𑀺 𑀉𑀚𑁆𑀛𑀸𑀧𑀦𑀓𑀁. 𑀔𑀺𑀬𑁆𑀬𑀦𑁆𑀢𑀺 𑀅𑀦𑁂𑀦𑀸𑀢𑀺 𑀔𑀺𑀬𑁆𑀬𑀦𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦 𑀯𑀘𑀦𑁂𑀦𑀸’’𑀢𑀺𑀆𑀤𑀺.

𑁧𑁦𑁬. 𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀫𑀗𑁆𑀓𑀼𑀓𑀢𑁆𑀢𑀼𑀓𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢’’𑀦𑁆𑀢𑀺𑀆𑀤𑀺. 𑀲𑀫𑁆𑀩𑀚𑁆𑀛𑀦𑀁 𑀲𑀫𑁆𑀩𑀦𑁆𑀥𑁄, 𑀓𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀗𑁆𑀖𑁂𑀦 𑀲𑀫𑁆𑀫𑀢𑀲𑁆𑀲 𑀅𑀯𑀡𑁆𑀡𑀁 𑀓𑀢𑁆𑀢𑀼𑀓𑀸𑀫𑁄 𑀅𑀬𑀲𑀁 𑀓𑀢𑁆𑀢𑀼𑀓𑀸𑀫𑁄𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀸𑀢𑀩𑁆𑀩𑁄’’𑀢𑀺. ‘‘𑀯𑀲𑁂𑀦𑀸’’𑀢𑀺 𑀧𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀸𑀢𑀩𑁆𑀩𑁄’’𑀢𑀺 𑀧𑀤𑁂 𑀯𑀺𑀲𑁂𑀲𑀦𑀁. 𑀬𑀲𑁆𑀫𑀸 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 ‘‘𑀔𑀺𑀬𑁆𑀬𑀦𑀓’’𑀦𑁆𑀢𑀺 𑀧𑀤𑀁. 𑀲𑁄 𑀘 𑀪𑀺𑀓𑁆𑀔𑀽𑀢𑀺 𑀉𑀚𑁆𑀛𑀸𑀧𑀦𑀓𑁄 𑀘 𑀔𑀺𑀬𑁆𑀬𑀦𑀓𑁄 𑀘 𑀲𑁄 𑀘 𑀪𑀺𑀓𑁆𑀔𑀼. 𑀅𑀣𑀸𑀢𑀺 𑀢𑀲𑁆𑀫𑀸 𑀉𑀚𑁆𑀛𑀸𑀧𑀦𑀓𑀔𑀺𑀬𑁆𑀬𑀦𑀓𑀓𑀭𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬.

‘‘𑀉𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀧𑀤𑀁 ‘‘𑀉𑀚𑁆𑀛𑀸𑀧𑁂𑀢𑀻’’𑀢𑀺 𑀧𑀤𑁂 𑀥𑀸𑀢𑀼𑀓𑀫𑁆𑀫𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀧𑀤𑀁 𑀓𑀸𑀭𑀺𑀢𑀓𑀫𑁆𑀫𑀁, ‘‘𑀅𑀦𑀼𑀧𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀧𑀤𑀁 ‘‘𑀉𑀚𑁆𑀛𑀸𑀧𑁂𑀢𑀻’’𑀢𑀺 𑀓𑀸𑀭𑀺𑀢𑀓𑀺𑀭𑀺𑀬𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀫𑁆𑀫𑀁 𑀳𑁄𑀢𑀺. ‘‘𑀔𑀺𑀬𑁆𑀬𑀢𑀻’’𑀢𑀺 𑀲𑀼𑀤𑁆𑀥𑀓𑀺𑀭𑀺𑀬𑀸𑀬 𑀅𑀧𑁂𑀓𑁆𑀔𑀸𑀬 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀲 𑀯𑀸’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀉𑀧𑀲𑀫𑁆𑀧𑀦𑁆𑀦𑀁. ‘‘𑀲𑀗𑁆𑀖𑁂𑀦 𑀅𑀲𑀫𑁆𑀫𑀢’’𑀦𑁆𑀢𑀺 𑀏𑀢𑁆𑀣 𑀦 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀅𑀲𑀫𑁆𑀫𑀢𑀁, 𑀓𑀫𑁆𑀫𑀯𑀸𑀘𑀸𑀬 𑀧𑀦 𑀅𑀲𑀫𑁆𑀫𑀢𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀯𑀸𑀘𑀸𑀬𑀸’’𑀢𑀺𑀆𑀤𑀺. 𑀤𑁆𑀯𑁂 𑀢𑀬𑁄 𑀳𑀼𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀲𑀫𑁆𑀫𑀢𑀦𑁆𑀢𑀺 𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀭𑀸’’𑀢𑀺𑀆𑀤𑀺. 𑀬𑀢𑁆𑀭𑀸𑀢𑀺 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢’’𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑁆𑀫𑀼𑀢𑀺𑀬𑁄 𑀤𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀧𑀼𑀩𑁆𑀩𑀯𑁄𑀳𑀸𑀭𑀯𑀲𑁂𑀦 𑀲𑀫𑁆𑀫𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀢𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀪𑀸𑀯𑁂 𑀞𑀺𑀢𑀁. 𑀩𑁆𑀬𑀢𑁆𑀢𑀲𑁆𑀲𑀸𑀢𑀺 𑀯𑀺𑀬𑀢𑁆𑀢𑀲𑁆𑀲. 𑀲𑀗𑁆𑀖𑁂𑀦 𑀯𑀸 𑀓𑀢𑁄𑀢𑀺 𑀬𑁄𑀚𑀦𑀸𑀢𑀺. 𑀢𑀢𑀺𑀬𑀁.

𑁪. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀁

𑁧𑁦𑁮. 𑀘𑀢𑀼𑀢𑁆𑀣𑁂 𑀳𑀺𑀫𑀫𑁂𑀯 𑀳𑀺𑀫𑀦𑁆𑀢𑁄, 𑀳𑀺𑀫𑀦𑁆𑀢𑁂 𑀦𑀺𑀬𑀼𑀢𑁆𑀢𑁄 𑀳𑁂𑀫𑀦𑁆𑀢𑀺𑀓𑁄, 𑀓𑀸𑀮𑁄𑀢𑀺 𑀆𑀳 ‘‘𑀳𑁂𑀫𑀦𑁆𑀢𑀓𑀸𑀮𑁂’’𑀢𑀺. 𑀑𑀢𑀸𑀧𑁂𑀦𑁆𑀢𑀸 𑀧𑀓𑁆𑀓𑀫𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀮𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸 𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑁄𑀢𑀺 𑀆𑀳 ‘‘𑀬𑀲𑁆𑀲 𑀓𑀲𑁆𑀲𑀘𑀻’’𑀢𑀺. 𑀳𑀺𑀫𑀯𑀲𑁆𑀲𑁂𑀦𑀸𑀢𑀺 𑀳𑀺𑀫𑁂𑀦 𑀘 𑀯𑀲𑁆𑀲𑁂𑀦 𑀘.

𑁧𑁧𑁦. ‘‘𑀯𑀲𑁆𑀲𑀺𑀓𑁄’’𑀢𑀺 𑀦 𑀲𑀗𑁆𑀓𑁂𑀢𑀸𑀢𑀺 𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀸. ‘‘𑀅𑀝𑁆𑀞 𑀫𑀸𑀲𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 ‘‘𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀳𑁂𑀫𑀦𑁆𑀢𑀺𑀓𑀕𑀺𑀫𑁆𑀳𑀺𑀓𑀫𑀸𑀲𑀸𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀳𑁂𑀫𑀦𑁆𑀢𑀺𑀓𑁂’’𑀢𑀺𑀆𑀤𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀭𑀼𑀓𑁆𑀔𑁂. 𑀦 𑀊𑀳𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀸𑀓𑀸 𑀯𑀸’’𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑁂 𑀯𑀸 𑀲𑀓𑀼𑀦𑁆𑀢𑀸’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀦𑀼𑀚𑀸𑀦𑀸𑀢𑀺, 𑀢𑀲𑁆𑀫𑀸. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀭𑀼𑀓𑁆𑀔𑁂, 𑀯𑀺𑀲𑁆𑀲𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀬𑀲𑁆𑀫𑀺𑀦𑁆𑀢𑀺 𑀭𑀼𑀓𑁆𑀔𑁂, 𑀓𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀝𑁆𑀞 𑀫𑀸𑀲𑁂 𑀏𑀯𑀸𑀢𑀺 𑀲𑀫𑁆𑀪𑀯𑀢𑁄 𑀆𑀳 ‘‘𑀬𑁂𑀲𑀼 𑀚𑀦𑀧𑀤𑁂𑀲𑀽’’𑀢𑀺𑀆𑀤𑀺. 𑀢𑁂𑀲𑀼𑀧𑀻𑀢𑀺 𑀚𑀦𑀧𑀤𑁂𑀲𑀼𑀧𑀺. 𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂 𑀏𑀯𑀸𑀢𑀺 𑀲𑀫𑁆𑀪𑀯𑀢𑁄 𑀆𑀳 ‘‘𑀬𑀢𑁆𑀣𑀸’’𑀢𑀺𑀆𑀤𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀚𑀦𑀧𑀤𑁂𑀲𑀼. ‘‘𑀯𑀺𑀕𑀢𑀯𑀮𑀸𑀳𑀓𑀁 𑀯𑀺𑀲𑀼𑀤𑁆𑀥𑀁 𑀦𑀪𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀘𑁂 𑀅𑀯𑀺𑀕𑀢𑀯𑀮𑀸𑀳𑀓𑀁 𑀅𑀯𑀺𑀲𑀼𑀤𑁆𑀥𑀁 𑀦𑀪𑀁 𑀳𑁄𑀢𑀺, 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀏𑀯𑀭𑀽𑀧𑁂 𑀓𑀸𑀮𑁂’’𑀢𑀺 𑀧𑀤𑀁 ‘‘𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀤𑁂 𑀆𑀥𑀸𑀭𑁄.

𑀅𑀩𑁆𑀪𑁄𑀓𑀸𑀲𑀺𑀓𑁂𑀦𑀸𑀧𑀻𑀢𑀺 𑀅𑀩𑁆𑀪𑁄𑀓𑀸𑀲𑀥𑀼𑀢𑀗𑁆𑀕𑀬𑀼𑀢𑁆𑀢𑁂𑀦𑀸𑀧𑀺. 𑀧𑀺𑀲𑀤𑁆𑀤𑁄 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲 𑀅𑀧𑁂𑀓𑁆𑀔𑀓𑁄. 𑀯𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲. 𑀳𑀺𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀢𑀢𑁆𑀣𑁂𑀯𑀸𑀢𑀺 𑀧𑀼𑀕𑁆𑀕𑀮𑀺𑀓𑀫𑀜𑁆𑀘𑀓𑁂𑀬𑁂𑀯. 𑀲𑀗𑁆𑀖𑀺𑀓𑀁 𑀫𑀜𑁆𑀘𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀻𑀢𑀫𑀜𑁆𑀘𑀓𑁄𑀢𑀺 𑀯𑀸𑀬𑀺𑀢𑀫𑀜𑁆𑀘𑀓𑁄. 𑀢𑀲𑁆𑀫𑀺𑀦𑁆𑀢𑀺 𑀯𑀻𑀢𑀫𑀜𑁆𑀘𑀓𑁂. 𑀧𑀼𑀭𑀸𑀡𑀫𑀜𑁆𑀘𑀓𑁄 𑀦𑀲𑁆𑀲𑀦𑁆𑀢𑁄𑀧𑀺 𑀅𑀦𑀕𑁆𑀖𑁄𑀢𑀺 𑀆𑀳 ‘‘𑀧𑀼𑀭𑀸𑀡𑀫𑀜𑁆𑀘𑀓𑁄 𑀕𑀳𑁂𑀢𑀩𑁆𑀩𑁄’’𑀢𑀺. 𑀘𑀫𑁆𑀫𑁂𑀦 𑀅𑀯𑀦𑀳𑀺𑀢𑀩𑁆𑀩𑁄𑀢𑀺 𑀑𑀦𑀤𑁆𑀥𑁄, 𑀲𑁄 𑀏𑀯 𑀑𑀦𑀤𑁆𑀥𑀓𑁄. 𑀕𑀳𑁂𑀢𑁆𑀯𑀸 𑀘 𑀧𑀦 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀅𑀲𑀫𑀬𑁂𑀢𑀺 𑀯𑀲𑁆𑀲𑀺𑀓𑀲𑀗𑁆𑀔𑀸𑀢𑁂 𑀅𑀓𑀸𑀮𑁂. 𑀘𑀢𑀼𑀕𑁆𑀕𑀼𑀡𑁂𑀦𑀸𑀧𑀻𑀢𑀺 𑀘𑀢𑀼𑀧𑀝𑀮𑁂𑀦𑀧𑀺. 𑀯𑀝𑁆𑀝𑀦𑁆𑀢𑀺 𑀯𑀮𑀸𑀳𑀓𑀸 𑀆𑀯𑀝𑁆𑀝𑀦𑁆𑀢𑀺 𑀅𑀲𑁆𑀫𑀺𑀁 𑀲𑀫𑀬𑁂𑀢𑀺 𑀯𑀝𑁆𑀝𑀼𑀮𑁄, 𑀲𑁄 𑀏𑀯 𑀯𑀝𑁆𑀝𑀮𑀺𑀓𑁄, 𑀲𑀢𑁆𑀢𑀸𑀳𑀁 𑀯𑀝𑁆𑀝𑀮𑀺𑀓𑁄, 𑀲𑀢𑁆𑀢𑀸𑀳𑁄 𑀯𑀸 𑀯𑀝𑁆𑀝𑀮𑀺𑀓𑁄 𑀲𑀢𑁆𑀢𑀸𑀳𑀯𑀝𑁆𑀝𑀮𑀺𑀓𑁄, 𑀲𑁄 𑀆𑀤𑀺 𑀬𑁂𑀲𑀁 𑀢𑀸𑀦𑀻𑀢𑀺 𑀲𑀢𑁆𑀢𑀸𑀳𑀯𑀝𑁆𑀝𑀮𑀺𑀓𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀲𑀢𑁆𑀢𑀸𑀳𑀢𑁄 𑀊𑀦𑀸𑀥𑀺𑀓𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀓𑀸𑀬𑀸𑀦𑀼𑀕𑀢𑀺𑀓𑀢𑁆𑀢𑀸𑀢𑀺 𑀓𑀸𑀬𑀁 𑀅𑀦𑀼𑀕𑀫𑀓𑀢𑁆𑀢𑀸 𑀓𑀸𑀬𑀲𑀤𑀺𑀲𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀧𑀡𑁆𑀡𑀓𑀼𑀝𑀻𑀲𑀽𑀢𑀺 𑀧𑀡𑁆𑀡𑁂𑀦 𑀙𑀸𑀤𑀺𑀢𑀓𑀼𑀝𑀻𑀲𑀼. 𑀲𑀪𑀸𑀕𑀪𑀺𑀓𑁆𑀔𑀽𑀦𑀦𑁆𑀢𑀺 𑀅𑀢𑁆𑀢𑀦𑀸 𑀲𑀪𑀸𑀕𑀪𑀺𑀓𑁆𑀔𑀽𑀦𑀁, 𑀲𑀦𑁆𑀢𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁄𑀯𑀲𑁆𑀲𑀓𑁂 𑀞𑀸𑀦𑁂𑀢𑀺 𑀬𑁄𑀚𑀦𑀸. 𑀮𑀕𑁆𑀕𑁂𑀢𑁆𑀯𑀸𑀢𑀺 𑀮𑀫𑁆𑀩𑁂𑀢𑁆𑀯𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. ‘‘𑀲𑀫𑁆𑀫𑀚𑁆𑀚𑀦𑀺’’𑀦𑁆𑀢𑀺 𑀧𑀤𑀁 ‘‘𑀕𑀳𑁂𑀢𑁆𑀯𑀸’’𑀢𑀺 𑀧𑀤𑁂 𑀅𑀯𑀼𑀢𑁆𑀢𑀓𑀫𑁆𑀫𑀁, ‘‘𑀞𑀧𑁂𑀢𑀩𑁆𑀩𑀸’’𑀢𑀺 𑀧𑀤𑁂 𑀯𑀼𑀢𑁆𑀢𑀓𑀫𑁆𑀫𑀁. 𑀥𑁄𑀯𑀺𑀢𑁆𑀯𑀸𑀢𑀺 𑀲𑀫𑁆𑀫𑀚𑁆𑀚𑀦𑀺𑀁 𑀲𑀼𑀤𑁆𑀥𑀁 𑀓𑀢𑁆𑀯𑀸. 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀽𑀢𑀺𑀆𑀤𑀺𑀲𑀤𑁆𑀤𑁂𑀦 𑀧𑀭𑀺𑀯𑁂𑀡𑀸𑀤𑀻𑀦𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀬𑁄 𑀧𑀦 𑀪𑀺𑀓𑁆𑀔𑀼 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀦𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀲𑀸𑀮𑀸𑀬𑀁. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂. 𑀧𑀸𑀓𑀢𑀺𑀓𑀝𑁆𑀞𑀸𑀦𑁂𑀢𑀺 𑀧𑀓𑀢𑀺𑀬𑀸 𑀕𑀳𑀺𑀢𑀝𑁆𑀞𑀸𑀦𑁂. 𑀢𑀢𑁆𑀭 𑀢𑀢𑁆𑀭𑁂𑀯𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀲𑀼𑀬𑁂𑀯. 𑀅𑀲𑀦𑀲𑀸𑀮𑀦𑁆𑀢𑀺 𑀅𑀲𑀦𑁆𑀢𑀺 𑀪𑀓𑁆𑀔𑀦𑁆𑀢𑀺 𑀅𑀲𑁆𑀲𑀁 𑀲𑀸𑀮𑀸𑀬𑀦𑁆𑀢𑀺 𑀅𑀲𑀦𑀸, 𑀅𑀲𑀦𑀸 𑀘 𑀲𑀸 𑀲𑀸𑀮𑀸 𑀘𑁂𑀢𑀺 𑀅𑀲𑀦𑀲𑀸𑀮𑀸, 𑀪𑁄𑀚𑀦𑀲𑀸𑀮𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀢𑀺 𑀢𑀲𑁆𑀲 𑀲𑀫𑁆𑀫𑀚𑁆𑀚𑀦𑁆𑀢𑀲𑁆𑀲, 𑀢𑀲𑁆𑀫𑀺𑀁 ‘‘𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺 𑀧𑀸𑀞𑁂 𑀯𑀸. 𑀫𑀚𑁆𑀛𑀢𑁄𑀢𑀺 𑀧𑀯𑀺𑀢𑁆𑀢𑀢𑁄, 𑀲𑀼𑀤𑁆𑀥𑀝𑁆𑀞𑀸𑀦𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀸𑀢𑀺 𑀲𑀫𑁆𑀫𑀚𑁆𑀚𑀦𑁆𑀢𑀲𑁆𑀲 𑀧𑀸𑀤𑀝𑁆𑀞𑀸𑀦𑀁 𑀅𑀪𑀺𑀫𑀼𑀔𑀸. 𑀯𑀸𑀮𑀺𑀓𑀸 𑀳𑀭𑀺𑀢𑀩𑁆𑀩𑀸𑀢𑀺 𑀧𑀁𑀲𑀼 𑀘 𑀯𑀸𑀮𑀺𑀓𑀸 𑀘 𑀅𑀧𑀦𑁂𑀢𑀩𑁆𑀩𑀸. 𑀲𑀫𑁆𑀫𑀼𑀜𑁆𑀘𑀦𑀻𑀲𑀮𑀸𑀓𑀸𑀬 𑀧𑀭𑀁 𑀧𑁂𑀮𑁆𑀮𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀳𑀻𑀢𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀢𑀮𑀢𑁄 𑀩𑀳𑀺.

𑁧𑁧𑁧. 𑀫𑀲𑀸𑀭𑀓𑁄𑀢𑀻𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀦𑀸𑀫𑀧𑀭𑀺𑀬𑀸𑀬𑁄, 𑀫𑀲𑀸𑀭𑀓𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄𑀢𑀻𑀢𑀺𑀆𑀤𑀻𑀲𑀼𑀧𑀺. 𑀧𑀸𑀤𑁂 𑀫𑀲𑀺𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀅𑀝𑀦𑀺𑀬𑁄 𑀧𑀯𑁂𑀲𑁂𑀢𑀩𑁆𑀩𑀸 𑀏𑀢𑁆𑀣𑀸𑀢𑀺 𑀫𑀲𑀸𑀭𑀓𑁄. 𑀩𑀼𑀦𑁆𑀤𑁄 𑀏𑀯 𑀩𑀼𑀦𑁆𑀤𑀺𑀓𑁄, 𑀧𑀸𑀤𑁄, 𑀢𑀲𑁆𑀫𑀺𑀁 𑀆𑀩𑀤𑁆𑀥𑀸 𑀩𑀦𑁆𑀥𑀺𑀢𑀸 𑀅𑀝𑀦𑀻 𑀬𑀲𑁆𑀲𑀸𑀢𑀺 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄. 𑀓𑀼𑀴𑀻𑀭𑀲𑁆𑀲 𑀧𑀸𑀤𑁄 𑀯𑀺𑀬 𑀧𑀸𑀤𑁄 𑀬𑀲𑁆𑀲𑀸𑀢𑀺 𑀓𑀼𑀴𑀻𑀭𑀧𑀸𑀤𑀓𑁄, 𑀬𑀣𑀸 𑀓𑀼𑀴𑀻𑀭𑁄 𑀯𑀗𑁆𑀓𑀧𑀸𑀤𑁄 𑀳𑁄𑀢𑀺, 𑀏𑀯𑀁 𑀯𑀗𑁆𑀓𑀧𑀸𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀳𑀘𑁆𑀘 𑀅𑀗𑁆𑀕𑁂 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀧𑀯𑁂𑀲𑀺𑀢𑁄 𑀧𑀸𑀤𑁄 𑀬𑀲𑁆𑀲𑀸𑀢𑀺 𑀆𑀳𑀘𑁆𑀘𑀧𑀸𑀤𑀓𑁄. 𑀆𑀡𑀺𑀦𑁆𑀢𑀺 𑀅𑀕𑁆𑀕𑀔𑀺𑀮𑀁. 𑀫𑀜𑁆𑀘𑀢𑀺 𑀧𑀼𑀕𑁆𑀕𑀮𑀁 𑀥𑀸𑀭𑁂𑀢𑀻𑀢𑀺 𑀫𑀜𑁆𑀘𑁄. 𑀧𑀻𑀞𑀢𑀺 𑀯𑀺𑀲𑀫𑀤𑀼𑀓𑁆𑀔𑀁 𑀳𑀺𑀁𑀲𑀢𑀻𑀢𑀺 𑀧𑀻𑀞𑀁. 𑀧𑀡𑀯𑁄𑀢𑀺 𑀏𑀓𑁄 𑀢𑀽𑀭𑀺𑀬𑀯𑀺𑀲𑁂𑀲𑁄, 𑀢𑀲𑁆𑀲 𑀲𑀡𑁆𑀞𑀸𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀏𑀢𑀭𑀳𑀺 𑀩𑀼𑀤𑁆𑀥𑀧𑀝𑀺𑀫𑀲𑁆𑀲 𑀧𑀮𑁆𑀮𑀗𑁆𑀓𑀲𑀡𑁆𑀞𑀸𑀦𑀁 𑀳𑁄𑀢𑀺. 𑀢𑀦𑁆𑀢𑀺 𑀓𑁄𑀘𑁆𑀙𑀁. 𑀓𑀭𑁄𑀦𑁆𑀢𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂. 𑀳𑀻𑀢𑀺 𑀲𑀘𑁆𑀘𑀁. 𑀢𑀦𑁆𑀢𑀺 𑀓𑁄𑀘𑁆𑀙𑀁 𑀫𑀳𑀕𑁆𑀖𑀁 𑀳𑁄𑀢𑀺, 𑀫𑀳𑀕𑁆𑀖𑀢𑁆𑀢𑀸 𑀪𑀤𑁆𑀤𑀧𑀻𑀞𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀬𑁂𑀦𑀸𑀢𑀺 𑀬𑁂𑀦 𑀪𑀺𑀓𑁆𑀔𑀼𑀦𑀸. ‘‘𑀣𑀸𑀫𑀫𑀚𑁆𑀛𑀺𑀫𑀲𑁆𑀲𑀸’’𑀢𑀺 𑀧𑀤𑁂𑀦 𑀧𑀫𑀸𑀡𑀫𑀚𑁆𑀛𑀺𑀫𑀁 𑀦𑀺𑀯𑀢𑁆𑀢𑁂𑀢𑀺.

𑀏𑀢𑁆𑀣𑀸𑀢𑀺 ‘‘𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀧𑀤𑁂. 𑀣𑁂𑀭𑁄 𑀆𑀡𑀸𑀧𑁂𑀢𑀻𑀢𑀺 𑀬𑁄𑀚𑀦𑀸. 𑀆𑀡𑀸𑀧𑁂𑀢𑀻𑀢𑀺 𑀘 𑀆𑀡-𑀥𑀸𑀢𑀼𑀬𑀸 𑀏𑀯 𑀧𑁂𑀲𑀦𑀲𑀗𑁆𑀔𑀸𑀢𑀲𑁆𑀲 𑀳𑁂𑀢𑁆𑀯𑀢𑁆𑀣𑀲𑁆𑀲 𑀯𑀸𑀘𑀓𑀢𑁆𑀢𑀸 𑀡𑀸𑀧𑁂𑀲𑀤𑁆𑀤𑁄 𑀲𑁆𑀯𑀢𑁆𑀣𑁄𑀯. 𑀲𑁄𑀢𑀺 𑀤𑀳𑀭𑁄. 𑀢𑀣𑀸𑀢𑀺 𑀬𑀣𑀸 𑀣𑁂𑀭𑁂𑀦 𑀯𑀼𑀢𑁆𑀢𑁄, 𑀢𑀣𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀤𑀺𑀯𑀸𑀝𑁆𑀞𑀸𑀦𑁂, 𑀫𑀜𑁆𑀘𑀧𑀻𑀞𑁂 𑀯𑀸. 𑀢𑀢𑁄𑀢𑀺 𑀞𑀧𑀦𑀓𑀸𑀮𑀢𑁄. 𑀧𑀭𑀺𑀩𑀼𑀦𑁆𑀥𑁂𑀢𑀺 𑀳𑀺𑀁 𑀲𑁂𑀢𑀻𑀢𑀺 𑀧𑀮𑀺𑀩𑁄𑀥𑁄, 𑀧𑀭𑀺𑀲𑀤𑁆𑀤𑁄 𑀉𑀧𑀲𑀕𑁆𑀕𑁄, 𑀲𑁄 𑀯𑀺𑀓𑀸𑀭𑀯𑀲𑁂𑀦 𑀅𑀜𑁆𑀜𑀣𑀸 𑀚𑀸𑀢𑁄. 𑀲𑁄 𑀧𑀮𑀺𑀩𑁄𑀥𑁄 𑀅𑀜𑁆𑀜𑀢𑁆𑀣 𑀆𑀯𑀸𑀲𑀸𑀤𑀺𑀓𑁄, 𑀇𑀥 𑀧𑀦 𑀲𑀦𑁆𑀣𑀭𑀸𑀧𑀺𑀢𑀫𑀜𑁆𑀘𑀸𑀤𑀺𑀓𑁄. 𑀲𑀸𑀬𑀦𑁆𑀢𑀺 𑀲𑀸𑀬𑀦𑁆𑀳𑁂, 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀣𑁂𑀭𑁄 𑀪𑀡𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀫𑀜𑁆𑀘𑀧𑀻𑀞𑁂. ‘‘𑀩𑀸𑀮𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼𑀕𑁆𑀕𑀳𑀺𑀢𑀯𑀢𑁆𑀢𑁄’’𑀢𑀺. 𑀅𑀦𑀼𑀕𑁆𑀕𑀳𑀺𑀢𑀁 𑀯𑀢𑁆𑀢𑀁 𑀬𑁂𑀦𑀸𑀢𑀺 𑀅𑀦𑀼𑀕𑁆𑀕𑀳𑀺𑀢𑀯𑀢𑁆𑀢𑁄, 𑀣𑁂𑀭𑁄. 𑀢𑀚𑁆𑀚𑁂𑀢𑀻𑀢𑀺 𑀉𑀩𑁆𑀩𑁂𑀚𑁂𑀢𑀺. 𑀢𑀲𑁆𑀫𑀺𑀦𑁆𑀢𑀺 𑀤𑀳𑀭𑁂. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲.

𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯𑀸𑀢𑀺 𑀣𑁂𑀭𑀲𑁆𑀲 𑀧𑁂𑀲𑀦𑀓𑁆𑀔𑀡𑁂𑀬𑁂𑀯. 𑀤𑀳𑀭𑁄 𑀯𑀤𑀢𑀻𑀢𑀺 𑀬𑁄𑀚𑀦𑀸. ‘‘𑀣𑁂𑀭𑁄’’𑀢𑀺 𑀧𑀤𑀁 ‘‘𑀯𑀢𑁆𑀯𑀸 𑀕𑀘𑁆𑀙𑀢𑀻’’𑀢𑀺 𑀧𑀤𑀤𑁆𑀯𑀬𑁂 𑀓𑀢𑁆𑀢𑀸, ‘‘𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀧𑀤𑁂 𑀓𑀫𑁆𑀫𑀁. 𑀦𑀦𑁆𑀢𑀺 𑀫𑀜𑁆𑀘𑀧𑀻𑀞𑀁, ‘‘𑀧𑀜𑁆𑀜𑀧𑁂𑀢𑁆𑀯𑀸’’𑀢𑀺𑀧𑀤𑀫𑀧𑁂𑀓𑁆𑀔𑀺𑀬 𑀏𑀯𑀁 𑀯𑀼𑀢𑁆𑀢𑀁. 𑀦𑀦𑁆𑀢𑀺 𑀤𑀳𑀭𑀁 𑀯𑀸. ‘‘𑀯𑀢𑁆𑀯𑀸’’𑀢𑀺 𑀧𑀤𑀫𑀧𑁂𑀓𑁆𑀔𑀺𑀬 𑀏𑀯𑀁 𑀯𑀼𑀢𑁆𑀢𑀁. 𑀢𑀢𑁆𑀣𑁂𑀯𑀸𑀢𑀺 𑀫𑀜𑁆𑀘𑀧𑀻𑀞𑁂𑀬𑁂𑀯. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀢𑀢𑁆𑀣𑀸𑀢𑀺 𑀤𑀺𑀯𑀸𑀝𑁆𑀞𑀸𑀦𑁂. 𑀪𑁄𑀚𑀦𑀲𑀸𑀮𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑁄𑀢𑀺 𑀪𑁄𑀚𑀦𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀞𑀸𑀦𑀁 𑀕𑀘𑁆𑀙𑀦𑁆𑀢𑁄, 𑀣𑁂𑀭𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀤𑀺𑀯𑀸𑀝𑁆𑀞𑀸𑀦𑁂𑀬𑁂𑀯. 𑀬𑀢𑁆𑀭𑀺𑀘𑁆𑀙𑀢𑀻𑀢𑀺 𑀬𑀁 𑀞𑀸𑀦𑀁 𑀕𑀦𑁆𑀢𑀼𑀫𑀺𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀲𑀦𑁆𑀦𑀺𑀧𑀸𑀢𑁂𑀢𑀺 𑀲𑀓𑀮𑀁 𑀅𑀳𑁄𑀭𑀢𑁆𑀢𑀁 𑀅𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀦𑁆𑀢𑀭𑁂 𑀲𑀦𑁆𑀦𑀺𑀧𑀸𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂. 𑀆𑀕𑀦𑁆𑀢𑀼𑀓𑀸 𑀕𑀡𑁆𑀳𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀕𑀡𑁆𑀳𑀦𑀢𑁄. 𑀢𑁂𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁. 𑀬𑁂𑀳𑀻𑀢𑀺 𑀆𑀯𑀸𑀲𑀺𑀓𑁄 𑀯𑀸 𑀳𑁄𑀢𑀼, 𑀆𑀕𑀦𑁆𑀢𑀼𑀓𑁄 𑀯𑀸, 𑀬𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀢𑁂𑀢𑀺 𑀦𑀺𑀲𑀺𑀦𑁆𑀦𑀓𑀪𑀺𑀓𑁆𑀔𑀽. 𑀉𑀤𑁆𑀥𑀁 𑀧𑀸𑀴𑀺𑀧𑀸𑀞𑀁 𑀲𑀸𑀭𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀉𑀲𑁆𑀲𑀸𑀭𑀓𑁄. 𑀥𑀫𑁆𑀫𑀓𑀣𑀸𑀬𑀁 𑀲𑀸𑀥𑀽𑀢𑀺 𑀥𑀫𑁆𑀫𑀓𑀣𑀺𑀓𑁄. 𑀢𑀲𑁆𑀫𑀺𑀦𑁆𑀢𑀺 𑀉𑀲𑁆𑀲𑀸𑀭𑀓𑁂 𑀯𑀸 𑀥𑀫𑁆𑀫𑀓𑀣𑀺𑀓𑁂 𑀯𑀸. 𑀅𑀳𑁄𑀭𑀢𑁆𑀢𑀦𑁆𑀢𑀺 𑀅𑀳𑁄 𑀘 𑀭𑀢𑁆𑀢𑀺 𑀘 𑀅𑀳𑁄𑀭𑀢𑁆𑀢𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀧𑀤𑀁. 𑀇𑀢𑀭𑀲𑁆𑀫𑀺𑀦𑁆𑀢𑀺 𑀧𑀞𑀫𑀁 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑀲𑁆𑀫𑀺𑀁 𑀪𑀺𑀓𑁆𑀔𑀼𑀫𑁆𑀳𑀻𑀢𑀺 𑀬𑁄𑀚𑀦𑀸. 𑀅𑀦𑁆𑀢𑁄𑀉𑀧𑀘𑀸𑀭𑀝𑁆𑀞𑁂𑀬𑁂𑀯𑀸𑀢𑀺 𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑀲𑁆𑀲 𑀉𑀧𑀘𑀸𑀭𑀲𑁆𑀲 𑀅𑀦𑁆𑀢𑁄 𑀞𑀺𑀢𑁂𑀬𑁂𑀯, 𑀅𑀦𑀸𑀤𑀭𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀆𑀧𑀢𑁆𑀢𑀺𑀯𑀸𑀭𑀅𑀦𑀸𑀧𑀢𑁆𑀢𑀺𑀯𑀸𑀭𑁂𑀲𑀼.

𑁧𑁧𑁨. 𑀘𑀺𑀫𑀺𑀮𑀺𑀓𑀁 𑀯𑀸𑀢𑀺𑀆𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀘𑀺𑀫𑀺𑀮𑀺𑀓𑀢𑁆𑀣𑀭𑀡𑀁. 𑀉𑀢𑁆𑀢𑀭𑀺 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀉𑀢𑁆𑀢𑀭𑀢𑁆𑀣𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀢𑁆𑀢𑀭𑀢𑁆𑀣𑀭𑀡𑀁 𑀦𑀸𑀫𑀸’’𑀢𑀺𑀆𑀤𑀺. 𑀪𑀽𑀫𑀺𑀬𑀦𑁆𑀢𑀺 𑀲𑀼𑀥𑀸𑀤𑀺𑀧𑀭𑀺𑀓𑀫𑁆𑀫𑁂𑀦 𑀅𑀓𑀢𑀸𑀬𑀁 𑀧𑀓𑀢𑀺𑀪𑀽𑀫𑀺𑀬𑀁. 𑀘𑀫𑁆𑀫𑀔𑀡𑁆𑀟𑁄𑀢𑀺 𑀏𑀢𑁆𑀣 𑀘𑀫𑁆𑀫𑀁𑀬𑁂𑀯 𑀅𑀦𑁆𑀢𑁂 𑀔𑀡𑁆𑀟𑀢𑁆𑀢𑀸 𑀙𑀺𑀦𑁆𑀦𑀢𑁆𑀢𑀸 𑀘𑀫𑁆𑀫𑀔𑀡𑁆𑀟𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀦𑀼 𑀲𑀻𑀳𑀘𑀫𑁆𑀫𑀸𑀤𑀻𑀦𑀺 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀆𑀳 ‘‘𑀅𑀝𑁆𑀞𑀓𑀣𑀸𑀲𑀼 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸. 𑀧𑀭𑀺𑀳𑀭𑀡𑁂𑀬𑁂𑀯𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀧𑀼𑀕𑁆𑀕𑀮𑀺𑀓𑀦𑁆𑀢𑀺 𑀯𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀁 𑀢𑀁 𑀞𑀸𑀦𑀁 𑀳𑀭𑀡𑁂𑀬𑁂𑀯. 𑀧𑀸𑀤𑁄 𑀧𑀼𑀜𑁆𑀙𑀻𑀬𑀢𑀺 𑀲𑁄𑀥𑀻𑀬𑀢𑀺 𑀏𑀢𑀸𑀬𑀸𑀢𑀺 𑀧𑀸𑀤𑀧𑀼𑀜𑁆𑀙𑀦𑀻𑀢𑀺 𑀓𑀢𑁆𑀯𑀸 𑀭𑀚𑁆𑀚𑀼𑀧𑀺𑀮𑁄𑀢𑀺𑀓𑀸𑀬𑁄 𑀧𑀸𑀤𑀧𑀼𑀜𑁆𑀙𑀦𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀸𑀤𑀧𑀼𑀜𑁆𑀙𑀦𑀻 𑀦𑀸𑀫𑀸’’𑀢𑀺𑀆𑀤𑀺. 𑀫𑀬𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀨𑀮𑀓𑀧𑀻𑀞𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀨𑀮𑀓𑀧𑀻𑀞𑀁 𑀦𑀸𑀫 𑀨𑀮𑀓𑀫𑀬𑀁 𑀧𑀻𑀞’’𑀦𑁆𑀢𑀺. 𑀨𑀮𑀓𑀜𑁆𑀘 𑀧𑀻𑀞𑀜𑁆𑀘 𑀨𑀮𑀓𑀧𑀻𑀞𑀦𑁆𑀢𑀺 𑀯𑀸 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀣 𑀯𑀸’’𑀢𑀺. 𑀏𑀢𑁂𑀦𑀸𑀢𑀺 ‘‘𑀨𑀮𑀓𑀧𑀻𑀞’’𑀦𑁆𑀢𑀺 𑀧𑀤𑁂𑀦. ‘‘𑀲𑀗𑁆𑀕𑀳𑀺𑀢’’𑀦𑁆𑀢𑀺 𑀧𑀤𑁂 𑀓𑀭𑀡𑀁, 𑀓𑀢𑁆𑀢𑀸 𑀯𑀸. 𑀩𑀻𑀚𑀦𑀺𑀧𑀢𑁆𑀢𑀓𑀦𑁆𑀢𑀺 𑀘𑀢𑀼𑀭𑀲𑁆𑀲𑀩𑀻𑀚𑀦𑀻𑀬𑁂𑀯 𑀲𑀓𑀼𑀡𑀧𑀢𑁆𑀢𑀲𑀤𑀺𑀲𑀢𑁆𑀢𑀸 𑀩𑀻𑀚𑀦𑀺𑀧𑀢𑁆𑀢𑀓𑀁, 𑀲𑀤𑀺𑀲𑀢𑁆𑀣𑁂 𑀓𑁄. ‘‘𑀅𑀚𑁆𑀛𑁄𑀓𑀸𑀲𑁂’’𑀢𑀺 𑀧𑀤𑀁 ‘‘𑀧𑀘𑀺𑀢𑁆𑀯𑀸’’𑀢𑀺 𑀧𑀤𑁂 𑀆𑀥𑀸𑀭𑁄. 𑀅𑀕𑁆𑀕𑀺𑀲𑀸𑀮𑀸𑀬𑀦𑁆𑀢𑀺 𑀅𑀕𑁆𑀕𑀺𑀦𑀸 𑀧𑀘𑀦𑀲𑀸𑀮𑀸𑀬𑀁. 𑀧𑀩𑁆𑀪𑀸𑀭𑁂𑀢𑀺 𑀮𑁂𑀡𑀲𑀤𑀺𑀲𑁂 𑀧𑀩𑁆𑀪𑀸𑀭𑁂. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂.

𑀬𑀲𑁆𑀫𑀺𑀦𑁆𑀢𑀺 𑀧𑀼𑀕𑁆𑀕𑀮𑁂. ‘‘𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑀫𑀺𑀯 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁧𑁩. 𑀬𑁄 𑀪𑀺𑀓𑁆𑀔𑀼 𑀯𑀸 𑀮𑀚𑁆𑀚𑀻 𑀳𑁄𑀢𑀺, 𑀢𑀣𑀸𑀭𑀽𑀧𑀁 𑀪𑀺𑀓𑁆𑀔𑀼𑀁 𑀯𑀸 𑀢𑀺 𑀬𑁄𑀚𑀦𑀸. ‘‘𑀮𑀚𑁆𑀚𑀻 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀁 𑀯𑀺𑀬 𑀫𑀜𑁆𑀜𑀢𑀻’’𑀢𑀺. 𑀬𑁄𑀢𑀺 𑀆𑀧𑀼𑀘𑁆𑀙𑀓𑁄 𑀪𑀺𑀓𑁆𑀔𑀼. ‘‘𑀓𑁂𑀦𑀘𑀺 𑀉𑀧𑀤𑁆𑀤𑀼𑀢𑀁 𑀳𑁄𑀢𑀻’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀲𑀘𑁂𑀧𑀺 𑀳𑀻’’𑀢𑀺𑀆𑀤𑀺. 𑀳𑀺𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀤𑁂𑀲𑀦𑁆𑀢𑀺 𑀲𑁂𑀦𑀸𑀲𑀦𑀝𑁆𑀞𑀧𑀺𑀢𑀝𑁆𑀞𑀸𑀦𑀁. 𑀆𑀧𑀤𑀸𑀲𑀽𑀢𑀺 𑀯𑀺𑀧𑀢𑁆𑀢𑀻𑀲𑀽𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀁

𑁧𑁧𑁬. 𑀧𑀜𑁆𑀘𑀫𑁂 𑀫𑀜𑁆𑀘𑀓𑀪𑀺𑀲𑀻𑀢𑀺 𑀫𑀜𑁆𑀘𑁂 𑀅𑀢𑁆𑀣𑀭𑀺𑀢𑀩𑁆𑀩𑁄 𑀫𑀜𑁆𑀘𑀓𑁄, 𑀲𑁄𑀬𑁂𑀯 𑀪𑀺𑀲𑀻𑀢𑀺 𑀫𑀜𑁆𑀘𑀓𑀪𑀺𑀲𑀺. 𑀏𑀯𑀁 𑀧𑀻𑀞𑀓𑀪𑀺𑀲𑀺𑀧𑀺. 𑀧𑀸𑀯𑀸𑀭𑁄 𑀓𑁄𑀚𑀯𑁄𑀢𑀺 𑀤𑁆𑀯𑁂𑀬𑁂𑀯 𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀧𑀸𑀯𑀸𑀭𑁄’’𑀢𑀺𑀆𑀤𑀺. 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀸𑀢𑀺𑀓𑁆𑀓𑀫𑁂𑀢𑀺 𑀤𑀼𑀢𑀺𑀬𑀧𑀸𑀤𑀸𑀢𑀺𑀓𑁆𑀓𑀫𑁂. 𑀲𑁂𑀦𑀸𑀲𑀦𑀢𑁄𑀢𑀺 𑀲𑀘𑁂 𑀏𑀓𑀁 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀢𑀢𑁄. 𑀅𑀣 𑀩𑀳𑀽𑀦𑀺 𑀲𑁂𑀦𑀸𑀲𑀦𑀸𑀦𑀺 𑀳𑁄𑀦𑁆𑀢𑀺, 𑀲𑀩𑁆𑀩𑀧𑀘𑁆𑀙𑀺𑀫𑀲𑁂𑀦𑀸𑀲𑀦𑀢𑁄. 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀲𑁂𑀦𑀸𑀲𑀦𑀲𑁆𑀲 𑀉𑀧𑀘𑀸𑀭𑁄 𑀳𑁄𑀢𑀺, 𑀏𑀓𑁄 𑀧𑀭𑀺𑀓𑁆𑀔𑁂𑀧𑀸𑀭𑀳𑁄𑀢𑀺 𑀆𑀳 ‘‘𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸’’𑀢𑀺.

𑀲𑀘𑁂 𑀪𑀺𑀓𑁆𑀔𑀼, 𑀲𑀸𑀫𑀡𑁂𑀭𑁄, 𑀆𑀭𑀸𑀫𑀺𑀓𑁄 𑀘𑀸𑀢𑀺 𑀢𑀬𑁄 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀦 𑀆𑀧𑀼𑀘𑁆𑀙𑀺𑀢𑀩𑁆𑀩𑁄. 𑀅𑀣 𑀲𑀸𑀫𑀡𑁂𑀭𑁄, 𑀆𑀭𑀸𑀫𑀺𑀓𑁄 𑀘𑀸𑀢𑀺 𑀤𑁆𑀯𑁂 𑀳𑁄𑀦𑁆𑀢𑀺, 𑀲𑀸𑀫𑀡𑁂𑀭𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀆𑀭𑀸𑀫𑀺𑀓𑁄𑀯 𑀦 𑀆𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀻’’𑀢𑀺𑀆𑀤𑀺. 𑀢𑀻𑀲𑀼𑀧𑀺 𑀅𑀲𑀦𑁆𑀢𑁂𑀲𑀼 𑀆𑀧𑀼𑀘𑁆𑀙𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀻’’𑀢𑀺𑀆𑀤𑀺. 𑀬𑁂𑀦𑀸𑀢𑀺 𑀉𑀧𑀸𑀲𑀓𑁂𑀦, ‘‘𑀓𑀸𑀭𑀺𑀢𑁄’’𑀢𑀺 𑀧𑀤𑁂 𑀓𑀢𑁆𑀢𑀸. 𑀢𑀲𑁆𑀲𑀸𑀢𑀺 𑀯𑀺𑀳𑀸𑀭𑀲𑀸𑀫𑀺𑀓𑀲𑁆𑀲. 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀲𑀸𑀡𑁂𑀲𑀽𑀢𑀺 𑀧𑀸𑀲𑀸𑀡𑀨𑀮𑀓𑁂𑀲𑀼. 𑀲𑀘𑁂 𑀉𑀲𑁆𑀲𑀳𑀢𑀻𑀢𑀺 𑀲𑀘𑁂 𑀲𑀓𑁆𑀓𑁄𑀢𑀺. 𑀉𑀲𑁆𑀲𑀳𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀞𑀧𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀧𑀻𑀢𑀺 𑀉𑀧𑀸𑀲𑀓𑀸𑀧𑀺, 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀤𑀸𑀭𑀼𑀪𑀡𑁆𑀟𑀸𑀤𑀻𑀲𑀼.

𑀧𑀭𑀺𑀘𑁆𑀙𑁂𑀤𑀸𑀓𑀸𑀭𑁂𑀦 𑀯𑁂𑀡𑀻𑀬𑀢𑀺 𑀤𑀺𑀲𑁆𑀲𑀢𑀻𑀢𑀺 𑀧𑀭𑀺𑀯𑁂𑀡𑀁. ‘‘𑀅𑀣 𑀔𑁄’’𑀢𑀺 𑀧𑀤𑀁 ‘‘𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀧𑀤𑁂 𑀅𑀭𑀼𑀘𑀺𑀮𑀓𑁆𑀔𑀡𑀁. ‘‘𑀆𑀲𑀦𑁆𑀦𑁂’’𑀢𑀺 𑀇𑀫𑀺𑀦𑀸 𑀉𑀧𑀘𑀸𑀭𑀲𑀤𑁆𑀤𑀲𑁆𑀲 𑀉𑀧𑀝𑁆𑀞𑀸𑀦𑀢𑁆𑀣𑀅𑀜𑁆𑀜𑀭𑁄𑀧𑀦𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀬𑀲𑁆𑀫𑀸 𑀯𑀫𑁆𑀫𑀺𑀓𑀭𑀸𑀲𑀺𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸𑀢𑀺 𑀬𑁄𑀚𑀦𑀸. 𑀉𑀧𑀘𑀺𑀦𑀦𑁆𑀢𑀻𑀢𑀺 𑀉𑀧𑀘𑀺𑀓𑀸, 𑀢𑀸𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑀸𑀳𑀺 𑀧𑀮𑀼𑀚𑁆𑀚𑀢𑀺 𑀦𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀦𑀸𑀲𑀦𑀦𑁆𑀢𑀺 𑀯𑀺𑀳𑀸𑀭𑀁. 𑀔𑀸𑀬𑀺𑀢𑀼𑀦𑁆𑀢𑀺 𑀔𑀸𑀤𑀺𑀢𑀼𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀦𑁆𑀢𑀺 𑀫𑀜𑁆𑀘𑀧𑀻𑀞𑀁. 𑀫𑀜𑁆𑀘𑀧𑀻𑀞𑀁 𑀯𑀺𑀳𑀸𑀭𑁂 𑀅𑀧𑀜𑁆𑀜𑀧𑁂𑀢𑁆𑀯𑀸 𑀯𑀺𑀳𑀸𑀭𑀽𑀧𑀘𑀸𑀭𑁂 𑀧𑀜𑁆𑀜𑀸𑀧𑀦𑀲𑁆𑀲 𑀯𑀺𑀲𑁂𑀲𑀨𑀮𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀯𑀺𑀳𑀸𑀭𑀽𑀧𑀘𑀸𑀭𑁂 𑀧𑀦𑀸’’𑀢𑀺𑀆𑀤𑀺. 𑀯𑀺𑀳𑀸𑀭𑀽𑀧𑀘𑀸𑀭𑁂 𑀧𑀜𑁆𑀜𑀧𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁮. ‘‘𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺 𑀧𑀤𑀁 ‘‘𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀧𑀤𑁂 𑀓𑀢𑁆𑀢𑀸. 𑀢𑀣𑁂𑀯𑀸𑀢𑀺 𑀬𑀣𑀸 𑀧𑀼𑀭𑀺𑀫𑀪𑀺𑀓𑁆𑀔𑀼 𑀓𑀭𑁄𑀢𑀺, 𑀢𑀣𑁂𑀯. 𑀯𑀲𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀭𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀭𑀢𑁆𑀢𑀺𑀁 𑀯𑀲𑀦𑀝𑁆𑀞𑀸𑀦𑀁.

𑀬𑀸 𑀤𑀻𑀖𑀲𑀸𑀮𑀸 𑀯𑀸 𑀬𑀸 𑀧𑀡𑁆𑀡𑀲𑀸𑀮𑀸 𑀯𑀸 𑀉𑀧𑀘𑀺𑀓𑀸𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀢𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀦𑁆𑀢𑀺 𑀤𑀻𑀖𑀲𑀸𑀮𑀸𑀤𑀺𑀓𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸, 𑀲𑀦𑁆𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀮𑀼𑀘𑁆𑀘𑀬𑁄𑀢𑀺 𑀧𑀩𑁆𑀩𑀢𑁄, 𑀢𑀲𑁆𑀫𑀺𑀁 𑀮𑁂𑀡𑀁 𑀲𑀺𑀮𑀼𑀘𑁆𑀘𑀬𑀮𑁂𑀡𑀁, 𑀧𑀩𑁆𑀩𑀢𑀕𑀼𑀳𑀸𑀢𑀺 𑀅𑀢𑁆𑀣𑁄. 𑀉𑀧𑀘𑀺𑀓𑀸𑀲𑀗𑁆𑀓𑀸𑀢𑀺 𑀉𑀧𑀘𑀺𑀓𑀸𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀦𑁆𑀢𑀺 𑀆𑀲𑀗𑁆𑀓𑀸. 𑀢𑀢𑁄𑀢𑀺 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀧𑀸𑀲𑀸𑀡𑀣𑀫𑁆𑀪𑁂𑀲𑀼 𑀯𑀸 𑀓𑀢𑀲𑁂𑀦𑀸𑀲𑀦𑀸𑀤𑀺𑀢𑁄. 𑀆𑀕𑀦𑁆𑀢𑀼𑀓𑁄 𑀬𑁄 𑀪𑀺𑀓𑁆𑀔𑀼 𑀅𑀦𑀼𑀯𑀢𑁆𑀢𑀦𑁆𑀢𑁄 𑀯𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼. 𑀧𑀼𑀦 𑀲𑁄𑀢𑀺 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼𑀬𑁂𑀯. 𑀢𑀢𑁄𑀢𑀺 𑀕𑀳𑁂𑀢𑁆𑀯𑀸 𑀇𑀲𑁆𑀲𑀭𑀺𑀬𑁂𑀦 𑀯𑀲𑀦𑀢𑁄. 𑀉𑀪𑁄𑀧𑀻𑀢𑀺 𑀆𑀯𑀸𑀲𑀺𑀓𑁄𑀧𑀺 𑀆𑀕𑀦𑁆𑀢𑀼𑀓𑁄𑀧𑀺 𑀤𑁆𑀯𑁂 𑀪𑀺𑀓𑁆𑀔𑀽. 𑀢𑁂𑀲𑀽𑀢𑀺 𑀤𑁆𑀯𑀻𑀲𑀼 𑀢𑀻𑀲𑀼. 𑀧𑀘𑁆𑀙𑀺𑀫𑀲𑁆𑀲𑀸𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲. 𑀆𑀪𑁄𑀕𑁂𑀦𑀸𑀢𑀺 𑀆𑀪𑁄𑀕𑀫𑀢𑁆𑀢𑁂𑀦 𑀫𑀼𑀢𑁆𑀢𑀺 𑀦𑀢𑁆𑀣𑀺, 𑀆𑀧𑀼𑀘𑁆𑀙𑀺𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀢𑁄𑀢𑀺 𑀅𑀜𑁆𑀜𑀸𑀯𑀸𑀲𑀢𑁄. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀆𑀯𑀸𑀲𑁂. 𑀢𑀢𑁆𑀣𑁂𑀯𑀸𑀢𑀺 𑀆𑀦𑀻𑀢𑀸𑀯𑀸𑀲𑁂𑀬𑁂𑀯. 𑀢𑁂𑀦𑀸𑀢𑀺 𑀯𑀼𑀟𑁆𑀠𑀢𑀭𑁂𑀦, ‘‘𑀲𑀫𑁆𑀧𑀝𑀺𑀘𑁆𑀙𑀺𑀢𑁂’’𑀢𑀺 𑀧𑀤𑁂 𑀓𑀢𑁆𑀢𑀸. 𑀲𑀫𑁆𑀧𑀝𑀺𑀘𑁆𑀙𑀺𑀢𑁂𑀢𑀺 𑀯𑀼𑀟𑁆𑀠𑀢𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂𑀧𑀺 𑀇𑀢𑀭𑀲𑁆𑀲 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺 𑀆𑀧𑀼𑀘𑁆𑀙𑀺𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀦𑀝𑁆𑀞𑀁 𑀯𑀸𑀢𑀺 𑀦𑀝𑁆𑀞𑁂 𑀯𑀸 𑀲𑁂𑀦𑀸𑀲𑀦𑁂 𑀲𑀢𑀺 𑀕𑀻𑀯𑀸 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀲𑁆𑀲𑀸𑀢𑀺 𑀅𑀯𑀺𑀲𑁆𑀲𑀸𑀲𑀺𑀓𑀧𑀼𑀕𑁆𑀕𑀮𑀲𑁆𑀲. 𑀦𑀝𑁆𑀞𑀸𑀦𑀻𑀢𑀺 𑀦𑀝𑁆𑀞𑁂𑀲𑀼 𑀫𑀜𑁆𑀘𑀧𑀻𑀞𑁂𑀲𑀼 𑀲𑀦𑁆𑀢𑁂𑀲𑀼.

𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼 𑀘 𑀇𑀲𑁆𑀲𑀭𑀺𑀬𑁄 𑀘 𑀬𑀓𑁆𑀔𑁄 𑀘 𑀲𑀻𑀳𑁄 𑀘 𑀯𑀸𑀴𑀫𑀺𑀕𑁄 𑀘 𑀓𑀡𑁆𑀳𑀲𑀧𑁆𑀧𑁄 𑀘 𑀯𑀼𑀟𑁆𑀠…𑀧𑁂… 𑀓𑀡𑁆𑀳𑀲𑀧𑁆𑀧𑀸, 𑀢𑁂 𑀆𑀤𑀬𑁄 𑀬𑁂𑀲𑀁 𑀢𑁂𑀢𑀺 𑀯𑀼𑀟𑁆𑀠…𑀧𑁂… 𑀓𑀡𑁆𑀳𑀲𑀧𑁆𑀧𑀸𑀤𑀬𑁄, 𑀢𑁂𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀧𑁂𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. ‘‘𑀧𑀮𑀺𑀩𑀼𑀤𑁆𑀥𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀧𑀤𑁆𑀤𑀼𑀢𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀁

𑁧𑁧𑁯. 𑀙𑀝𑁆𑀞𑁂 𑀭𑀽𑀫𑁆𑀪𑀺𑀢𑁆𑀯𑀸𑀢𑀺 𑀦𑀺𑀯𑀸𑀭𑁂𑀢𑁆𑀯𑀸, 𑀆𑀯𑀭𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀲𑁆𑀲𑀕𑁆𑀕𑁂𑀦𑀸𑀢𑀺 𑀯𑀲𑁆𑀲𑀕𑀡𑀦𑀸𑀬. 𑀅𑀦𑀼𑀧𑀔𑀚𑁆𑀚𑀸𑀢𑀺 𑀏𑀢𑁆𑀣 𑀔𑀤 𑀳𑀺𑀁𑀲𑀸𑀬𑀦𑁆𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁫 𑀤𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀢𑁆𑀢𑀸 𑀔𑀤𑀲𑀤𑁆𑀤𑁄 𑀳𑀺𑀁𑀲𑀢𑁆𑀣𑁄 𑀳𑁄𑀢𑀺. 𑀅𑀦𑀼𑀲𑀫𑀻𑀧𑀁 𑀉𑀧𑀕𑀦𑁆𑀢𑁆𑀯𑀸 𑀔𑀤𑀦𑀁 𑀳𑀺𑀁 𑀲𑀦𑀁 𑀦𑀸𑀫 𑀅𑀦𑀼𑀲𑀫𑀻𑀧𑀁 𑀧𑀯𑀺𑀲𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼𑀧𑀯𑀺𑀲𑀺𑀢𑁆𑀯𑀸’’𑀢𑀺.

𑁧𑁨𑁦. ‘‘𑀚𑀸𑀦’’𑀦𑁆𑀢𑀺 𑀏𑀢𑁆𑀣 𑀚𑀸𑀦𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑀼𑀝𑁆𑀞𑀸𑀧𑀦𑀻𑀬𑁄 𑀅𑀬’’𑀦𑁆𑀢𑀺. 𑀢𑁂𑀦𑁂𑀯𑀸𑀢𑀺 𑀚𑀸𑀦𑀦𑀳𑁂𑀢𑀼𑀦𑀸 𑀏𑀯. 𑀅𑀲𑁆𑀲𑀸𑀢𑀺 ‘‘𑀚𑀸𑀦’’𑀦𑁆𑀢𑀺𑀧𑀤𑀲𑁆𑀲. 𑀳𑀻𑀢𑀺 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀲𑀗𑁆𑀖𑁄 𑀧𑀦 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲𑀸𑀢𑀺 𑀯𑀼𑀟𑁆𑀠𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲. 𑀏𑀢𑁆𑀣𑀸𑀢𑀺 𑀯𑀼𑀟𑁆𑀠𑀕𑀺𑀮𑀸𑀦𑀸𑀤𑀻𑀲𑀼. 𑀕𑀺𑀮𑀸𑀦𑀲𑁆𑀲𑀧𑀺 𑀤𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀕𑀺𑀮𑀸𑀦𑁄’’𑀢𑀺 𑀧𑀤𑀁 ‘‘𑀦 𑀧𑀻𑀴𑁂𑀢𑀩𑁆𑀩𑁄, 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑁄’’𑀢𑀺𑀧𑀤𑀤𑁆𑀯𑀬𑁂 𑀯𑀼𑀢𑁆𑀢𑀓𑀫𑁆𑀫𑀁. ‘‘𑀓𑀸𑀫𑀜𑁆𑀘𑀸’’𑀢𑀺 𑀧𑀤𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀚𑁄𑀢𑀓𑀢𑁆𑀢𑀸 𑀧𑀦𑀲𑀤𑁆𑀤𑁄 𑀕𑀭𑀳𑀢𑁆𑀣𑀚𑁄𑀢𑀓𑁄.

𑁧𑁨𑁧. 𑀫𑀜𑁆𑀘𑀧𑀻𑀞𑀸𑀦𑀁 𑀉𑀧𑀘𑀸𑀭𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁄𑀢𑀺 𑀬𑀢𑁄 𑀓𑀼𑀢𑁄𑀘𑀺 𑀞𑀸𑀦𑀢𑁄. 𑀬𑀸𑀯 𑀫𑀜𑁆𑀘𑀧𑀻𑀞𑀁 𑀅𑀢𑁆𑀣𑀺, 𑀢𑀸𑀯 𑀉𑀧𑀘𑀸𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀁 𑀉𑀧𑀘𑀸𑀭𑁂 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀘𑀸𑀭𑁂𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀅𑀪𑀺𑀦𑀺𑀲𑀻𑀤𑀢𑀺 𑀯𑀸 𑀅𑀪𑀺𑀦𑀺𑀧𑀚𑁆𑀚𑀢𑀺 𑀯𑀸’’𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀪𑀺𑀦𑀺𑀲𑀻𑀤𑀦𑀫𑀢𑁆𑀢𑁂𑀦𑀸’’𑀢𑀺𑀆𑀤𑀺.

𑁧𑁨𑁨. 𑀇𑀢𑁄𑀢𑀺 𑀯𑀸𑀭𑀢𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬𑀯𑀸𑀭𑁂. 𑀬𑀣𑀸 𑀯𑀼𑀢𑁆𑀢𑁄, 𑀏𑀯𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑁂𑀲𑀼 𑀏𑀯 𑀯𑀺𑀳𑀸𑀭𑀧𑀭𑀺𑀯𑁂𑀡𑁂𑀲𑀼. 𑀅𑀲𑁆𑀲𑀸𑀢𑀺 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑀲𑁆𑀲. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑁂. 𑀢𑀢𑁆𑀣𑀸𑀢𑀺 𑀯𑀺𑀲𑁆𑀲𑀸𑀲𑀺𑀓𑀧𑀼𑀕𑁆𑀕𑀮𑁂.

𑁧𑁨𑁩. 𑀧𑀸𑀴𑀺𑀬𑀁 ‘‘𑀆𑀧𑀤𑀸𑀲𑀽’’𑀢𑀺𑀧𑀤𑀁 ‘‘𑀧𑀯𑀺𑀲𑀢𑀻’’𑀢𑀺 𑀅𑀚𑁆𑀛𑀸𑀳𑀸𑀭𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀆𑀧𑀤𑀸𑀲𑀽𑀢𑀺𑀆𑀤𑀻’’𑀢𑀺. 𑀙𑀝𑁆𑀞𑀁.

𑁭. 𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀁

𑁧𑁨𑁬. 𑀲𑀢𑁆𑀢𑀫𑁂 𑀬𑁂 𑀧𑀸𑀲𑀸𑀤𑀸 𑀯𑀸 𑀬𑀸𑀦𑀺 𑀯𑀸 𑀘𑀢𑀼𑀲𑁆𑀲𑀸𑀮𑀸𑀦𑀻𑀢𑀺 𑀬𑁄𑀚𑀦𑀸. 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀏𑀢𑁂𑀲𑀦𑁆𑀢𑀺 𑀘𑀢𑀼𑀪𑀽𑀫𑀓𑀸. 𑀏𑀯𑀁 𑀧𑀜𑁆𑀘𑀪𑀽𑀫𑀓𑀸. 𑀓𑁄𑀝𑁆𑀞𑀓𑀸𑀦𑀻𑀢𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀦𑀺. ‘‘𑀧𑀸𑀲𑀸𑀤𑀸’’𑀢𑀺𑀧𑀤𑀫𑀧𑁂𑀓𑁆𑀔𑀺𑀬 𑀯𑀼𑀢𑁆𑀢𑀁 ‘‘𑀬𑁂’’𑀢𑀺𑀧𑀤𑀁, ‘‘𑀘𑀢𑀼𑀲𑁆𑀲𑀸𑀮𑀸𑀦𑀻’’𑀢𑀺𑀧𑀤𑁂 𑀅𑀧𑁂𑀓𑁆𑀔𑀺𑀢𑁂 ‘‘𑀬𑀸𑀦𑀻’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀳𑁄𑀢𑀺. 𑀲𑁂𑀦𑀸𑀲𑀦𑁂𑀲𑀼 𑀏𑀓𑁂𑀦 𑀧𑀬𑁄𑀕𑁂𑀦 𑀩𑀳𑀼𑀓𑁂 𑀤𑁆𑀯𑀸𑀭𑁂 𑀪𑀺𑀓𑁆𑀔𑀼𑀁 𑀅𑀢𑀺𑀓𑁆𑀓𑀸𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀦𑀸𑀧𑀬𑁄𑀕𑁂𑀳𑀺 𑀦𑀸𑀦𑀸𑀤𑁆𑀯𑀸𑀭𑁂 𑀪𑀺𑀓𑁆𑀔𑀼𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. ‘‘𑀤𑁆𑀯𑀸𑀭𑀕𑀡𑀦𑀸𑀬𑀸’’𑀢𑀺𑀇𑀫𑀺𑀦𑀸 𑀧𑀬𑁄𑀕𑀕𑀡𑀦𑀸𑀬𑀸𑀢𑀺𑀧𑀺 𑀅𑀢𑁆𑀣𑀁 𑀜𑀸𑀧𑁂𑀢𑀺 𑀅𑀢𑁆𑀣𑀢𑁄 𑀧𑀸𑀓𑀝𑀢𑁆𑀢𑀸. 𑀅𑀦𑀸𑀫𑀲𑀺𑀢𑁆𑀯𑀸𑀢𑀺 𑀅𑀙𑀼𑀧𑀺𑀢𑁆𑀯𑀸.

𑀏𑀢𑁆𑀢𑀓𑀸𑀦𑀻𑀢𑀺 𑀏𑀢𑀧𑀫𑀸𑀡𑀸𑀦𑀺. 𑀢𑀲𑁆𑀲𑀸𑀢𑀺 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. 𑀕𑀸𑀴𑁆𑀳𑀦𑁆𑀢𑀺 𑀤𑀴𑁆𑀳𑀁.

𑁧𑁨𑁭. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑁂. 𑀧𑀺𑀲𑀤𑁆𑀤𑁄 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑀸𑀧𑁂𑀓𑁆𑀔𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀬𑀢𑁆𑀭𑀸𑀢𑀺 𑀬𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑁧𑁨𑁮. 𑀲𑁄𑀢𑀺 𑀪𑀡𑁆𑀟𑀦𑀓𑀸𑀭𑀓𑀓𑀮𑀳𑀓𑀸𑀭𑀓𑁄 𑀪𑀺𑀓𑁆𑀔𑀼. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀧𑀓𑁆𑀔𑀦𑁆𑀢𑀺 𑀅𑀢𑁆𑀢𑀦𑁄 𑀧𑀓𑁆𑀔𑀁. 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑀧𑀼𑀕𑁆𑀕𑀮𑀧𑀓𑁆𑀔𑁂 𑀉𑀫𑁆𑀫𑀢𑁆𑀢𑀓𑀲𑁆𑀲 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀦𑀺𑀓𑁆𑀓𑀟𑁆𑀠𑀓𑀧𑀼𑀕𑁆𑀕𑀮𑀧𑀓𑁆𑀔𑁂 𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀁

𑁧𑁨𑁯. 𑀅𑀝𑁆𑀞𑀫𑁂 𑀅𑀘𑁆𑀙𑀦𑁆𑀦𑀢𑀮𑀢𑁆𑀢𑀸 𑀉𑀧𑀭𑀺 𑀯𑁂𑀳𑀸𑀲𑁄 𑀏𑀢𑀺𑀲𑁆𑀲𑀸𑀢𑀺 𑀉𑀧𑀭𑀺𑀯𑁂𑀳𑀸𑀲𑀸, 𑀲𑀸 𑀘 𑀲𑀸 𑀓𑀼𑀝𑀺 𑀘𑁂𑀢𑀺 𑀉𑀧𑀭𑀺𑀯𑁂𑀳𑀸𑀲𑀓𑀼𑀝𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀭𑀺𑀅𑀘𑁆𑀙𑀦𑁆𑀦𑀢𑀮𑀸𑀬𑀸’’𑀢𑀺. 𑀢𑀲𑁆𑀲𑀸 𑀓𑀼𑀝𑀺𑀬𑀸 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀤𑁆𑀯𑀺𑀪𑀽𑀫𑀺𑀓𑀓𑀼𑀝𑀺𑀬𑀸 𑀯𑀸’’𑀢𑀺𑀆𑀤𑀺. ‘‘𑀫𑀜𑁆𑀘’’𑀦𑁆𑀢𑀺 𑀧𑀤𑀁 ‘‘𑀅𑀪𑀻’’𑀢𑀺𑀉𑀧𑀲𑀕𑁆𑀕𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺. ‘‘𑀦𑀺𑀲𑀻𑀤𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑁂𑀦 𑀯𑀸 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀪𑀼𑀫𑁆𑀫𑀢𑁆𑀣𑁂 𑀯𑀸’’𑀢𑀺𑀆𑀤𑀺. 𑀏𑀢𑀦𑁆𑀢𑀺 ‘‘𑀫𑀜𑁆𑀘’’𑀦𑁆𑀢𑀺𑀧𑀤𑁂 𑀏𑀢𑀁 𑀯𑀘𑀦𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀣 𑀯𑀸 𑀏𑀢𑀦𑁆𑀢𑀺 ‘‘𑀫𑀜𑁆𑀘’’𑀦𑁆𑀢𑀺𑀧𑀤𑀁 𑀉𑀧𑀬𑁄𑀕𑀯𑀘𑀦𑀯𑀦𑁆𑀢𑀁. 𑀏𑀢𑁆𑀣 𑀘 𑀧𑀘𑁆𑀙𑀺𑀫𑀲𑀫𑁆𑀩𑀦𑁆𑀥𑁂 𑀅𑀪𑀻𑀢𑁆𑀬𑀽𑀧𑀲𑀕𑁆𑀕𑁄 𑀧𑀤𑀸𑀮𑀗𑁆𑀓𑀸𑀭𑀫𑀢𑁆𑀢𑁄 𑀧𑀤𑀯𑀺𑀪𑀽𑀲𑀦𑀫𑀢𑁆𑀢𑁄𑀢𑀺 𑀆𑀳 ‘‘𑀅𑀪𑀻𑀢𑀺 𑀇𑀤𑀁 𑀧𑀦𑀸’’𑀢𑀺𑀆𑀤𑀺. 𑀧𑀤𑀲𑁄𑀪𑀡𑀢𑁆𑀣𑀦𑁆𑀢𑀺 𑀧𑀤𑀲𑁆𑀲 𑀅𑀮𑀗𑁆𑀓𑀸𑀭𑀢𑁆𑀣𑀁 𑀯𑀺𑀪𑀽𑀲𑀦𑀢𑁆𑀣𑀁 𑀧𑀤𑀲𑁆𑀲 𑀨𑀼𑀮𑁆𑀮𑀺𑀢𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀧𑀢𑀺𑀢𑁆𑀯𑀸𑀢𑀺 𑀏𑀢𑁆𑀣 𑀦𑀻𑀢𑁆𑀬𑀽𑀧𑀲𑀕𑁆𑀕𑁄 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑁄𑀢𑀺 𑀆𑀳 ‘‘𑀧𑀢𑀺𑀢𑁆𑀯𑀸’’𑀢𑀺. 𑀅𑀣 𑀯𑀸 𑀦𑀺𑀓𑁆𑀔𑀦𑁆𑀢𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀸’’𑀢𑀺. 𑀇𑀫𑀺𑀦𑀸 𑀦𑀻𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀥𑀸𑀢𑁆𑀯𑀢𑁆𑀣𑀯𑀺𑀲𑁂𑀲𑀓𑀢𑀁 𑀤𑀻𑀧𑁂𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀳𑀼𑀢𑁆𑀯𑀸 𑀧𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀬𑀲𑁆𑀫𑀸. 𑀆𑀡𑀻𑀢𑀺 𑀅𑀕𑁆𑀕𑀔𑀻𑀮𑀸.

𑁧𑁩𑁧. 𑀬𑀸 𑀓𑀼𑀝𑀺 𑀲𑀻𑀲𑀁 𑀦 𑀖𑀝𑁆𑀝𑁂𑀢𑀺, 𑀲𑀸 𑀅𑀲𑀻𑀲𑀖𑀝𑁆𑀝𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲𑀸’’𑀢𑀺𑀇𑀫𑀺𑀦𑀸 𑀣𑀸𑀫𑀫𑀚𑁆𑀛𑀺𑀫𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀩𑁆𑀩𑀳𑁂𑀝𑁆𑀞𑀺𑀫𑀸𑀳𑀻𑀢𑀺 𑀲𑀩𑁆𑀩𑁂𑀲𑀁 𑀤𑀩𑁆𑀩𑀲𑀫𑁆𑀪𑀸𑀭𑀸𑀦𑀁 𑀳𑁂𑀝𑁆𑀞𑀸 𑀞𑀺𑀢𑀸𑀳𑀺. 𑀢𑀼𑀮𑀸𑀳𑀻𑀢𑀺 𑀕𑁂𑀳𑀣𑀫𑁆𑀪𑀸𑀦𑀫𑀼𑀧𑀭𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀞𑀺𑀢𑁂𑀳𑀺 𑀓𑀝𑁆𑀞𑀯𑀺𑀲𑁂𑀲𑁂𑀳𑀺. 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀘 𑀢𑀼𑀮𑀸𑀬 𑀲𑀭𑀽𑀧𑀁 𑀧𑀸𑀓𑀝𑀁. 𑀓𑁂𑀘𑀺 𑀧𑀦 𑀢𑀼𑀮𑀸𑀬 𑀲𑀭𑀽𑀧𑀁 𑀅𑀜𑁆𑀜𑀣𑀸 𑀯𑀤𑀦𑁆𑀢𑀺. 𑀏𑀢𑁂𑀦𑀸𑀢𑀺 ‘‘𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀲𑀻𑀲𑀖𑀝𑁆𑀝𑀸’’𑀢𑀺𑀯𑀘𑀦𑁂𑀦 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀬𑀸 𑀓𑀸𑀘𑀺 𑀓𑀼𑀝𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀉𑀧𑀭𑀻𑀢𑀺 𑀤𑁆𑀯𑀺𑀪𑀽𑀫𑀺𑀓𑀓𑀼𑀝𑀺𑀬𑀁 𑀪𑀽𑀫𑀺𑀢𑁄 𑀉𑀧𑀭𑀺 𑀪𑀽𑀫𑀺𑀬𑀁. 𑀅𑀘𑁆𑀙𑀦𑁆𑀦𑀢𑀮𑀸𑀢𑀺 𑀅𑀦𑀼𑀮𑁆𑀮𑁄𑀘𑀢𑀮𑀸, 𑀅𑀯𑀺𑀢𑀸𑀦𑀢𑀮𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑁂.

𑁧𑁩𑁩. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀬𑀸𑀬𑀦𑁆𑀢𑀺 𑀬𑀸 𑀅𑀬𑀁 𑀓𑀼𑀝𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀲𑀻𑀲𑀖𑀝𑁆𑀝𑀓𑀼𑀝𑀺𑀬𑀁. 𑀅𑀦𑁄𑀡𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀬𑁄𑀚𑀦𑀸. 𑀬𑀲𑁆𑀲𑀸𑀢𑀺 𑀓𑀼𑀝𑀺𑀬𑀸. 𑀅𑀧𑀭𑀺𑀪𑁄𑀕𑀦𑁆𑀢𑀺 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀧𑀭𑀺𑀪𑀼𑀜𑁆𑀚𑀦𑀸𑀭𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀢𑀸𑀡𑀻𑀢𑀺 𑀧𑀢𑀦𑀲𑁆𑀲 𑀦𑀺𑀯𑀸𑀭𑀡𑀸 𑀆𑀡𑀺 𑀅𑀕𑁆𑀕𑀔𑀻𑀮𑀸. 𑀲𑀸 𑀳𑀺 𑀆𑀩𑀦𑁆𑀥𑀁 𑀦𑀬𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀆𑀡𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀫𑀜𑁆𑀘𑀧𑀻𑀞𑁂. 𑀦 𑀦𑀺𑀧𑁆𑀧𑀢𑀦𑁆𑀢𑀻𑀢𑀺 𑀦𑀺𑀓𑁆𑀔𑀦𑁆𑀢𑁄 𑀳𑀼𑀢𑁆𑀯𑀸 𑀦 𑀧𑀢𑀦𑁆𑀢𑀺. 𑀆𑀳𑀘𑁆𑀘𑀧𑀸𑀤𑀓𑁂𑀢𑀺 𑀅𑀗𑁆𑀕𑁂 𑀆𑀳𑀦𑀺𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀢𑀢𑁆𑀣 𑀧𑀯𑁂𑀲𑀺𑀢𑀧𑀸𑀤𑀓𑁂. 𑀦𑀸𑀕𑀤𑀦𑁆𑀢𑀓𑀸𑀤𑀻𑀲𑀽𑀢𑀺 𑀦𑀸𑀕𑀲𑁆𑀲 𑀤𑀦𑁆𑀢𑁄 𑀯𑀺𑀬𑀸𑀢𑀺 𑀦𑀸𑀕𑀤𑀦𑁆𑀢𑀓𑁄, 𑀲𑀤𑀺𑀲𑀢𑁆𑀣𑁂 𑀓𑁄, 𑀲𑁄 𑀆𑀤𑀺 𑀬𑁂𑀲𑀁 𑀢𑁂𑀢𑀺 𑀦𑀸𑀕𑀤𑀦𑁆𑀢𑀓𑀸𑀤𑀬𑁄, 𑀢𑁂𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀪𑀺𑀢𑁆𑀢𑀺𑀔𑀻𑀮𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀻𑀢𑀺. 𑀅𑀝𑁆𑀞𑀫𑀁.

𑁯. 𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀁

𑁧𑁩𑁫. 𑀦𑀯𑀫𑁂 𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲𑀸𑀢𑀺 𑀤𑁆𑀯𑀸𑀭𑀩𑀸𑀳𑀸𑀬. 𑀲𑀸 𑀳𑀺 𑀧𑀺𑀝𑁆𑀞𑁂 𑀤𑁆𑀯𑀺𑀦𑁆𑀦𑀁 𑀓𑀯𑀸𑀝𑀸𑀦𑀁 𑀲𑀁 𑀏𑀓𑀢𑁄 𑀖𑀸𑀝𑁄 𑀖𑀝𑀦𑀁 𑀲𑀫𑀸𑀕𑀫𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀧𑀺𑀝𑁆𑀞𑀲𑀗𑁆𑀖𑀸𑀝𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀯𑀘𑀦𑀁. 𑀏𑀯𑀁 ‘‘𑀢𑀤𑁂𑀯𑀸’’𑀢𑀺 𑀏𑀢𑁆𑀣𑀸𑀧𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀪𑀕𑀯𑀢𑀸𑀧𑀻𑀢𑀺 𑀦 𑀫𑀳𑀸𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀏𑀯 𑀯𑀼𑀢𑁆𑀢𑀁, 𑀅𑀣 𑀔𑁄 𑀪𑀕𑀯𑀢𑀸𑀧𑀺 𑀓𑀢𑁄𑀢𑀺 𑀬𑁄𑀚𑀦𑀸. 𑀤𑁆𑀯𑀸𑀭𑀩𑀦𑁆𑀥𑁂𑀦 𑀅𑀕𑁆𑀕𑀴𑀲𑁆𑀲 𑀅𑀯𑀺𑀦𑀸𑀪𑀸𑀯𑀢𑁄 ‘‘𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀕𑁆𑀕𑀴𑁂𑀦 𑀲𑀳 𑀤𑁆𑀯𑀸𑀭𑀩𑀦𑁆𑀥𑀝𑁆𑀞𑀧𑀦𑀸𑀬𑀸𑀢𑀺 𑀅𑀢𑁆𑀣𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀓𑀯𑀸𑀝𑀓𑀤𑁆𑀯𑀸𑀭𑀩𑀦𑁆𑀥𑀝𑁆𑀞𑀧𑀦𑀸𑀬𑀸’’𑀢𑀺. 𑀅𑀕𑁆𑀕𑀴𑁄𑀢𑀺 𑀓𑀯𑀸𑀝𑀨𑀮𑀓𑁄. 𑀇𑀫𑀫𑁂𑀯𑀢𑁆𑀣𑀦𑁆𑀢𑀺 𑀫𑀬𑀸 𑀯𑀼𑀢𑁆𑀢𑀁 𑀇𑀫𑀁 𑀏𑀯 𑀅𑀢𑁆𑀣𑀁 𑀲𑀦𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 ‘‘𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸’’𑀢𑀺𑀯𑀘𑀦𑁂. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀪𑀕𑀯𑀢𑁄 𑀅𑀪𑀺𑀲𑀦𑁆𑀥𑀺. 𑀳𑀺-𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀓𑀫𑁆𑀧𑀢𑀻𑀢𑀺 𑀪𑀼𑀲𑀁 𑀓𑀫𑁆𑀧𑀢𑀺. 𑀘𑀮𑀢𑀻𑀢𑀺 𑀈𑀲𑀁 𑀘𑀮𑀢𑀺. 𑀢𑁂𑀦𑀸𑀢𑀺 𑀢𑁂𑀦 𑀲𑀺𑀣𑀺𑀮𑀧𑀢𑀦𑀳𑁂𑀢𑀼𑀦𑀸. 𑀫𑀸𑀢𑀺𑀓𑀸𑀬𑀁, 𑀧𑀤𑀪𑀸𑀚𑀦𑀻𑀬𑀜𑁆𑀘 ‘‘𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸’’𑀢𑀺𑀧𑀤𑀲𑁆𑀲 𑀲𑀫𑁆𑀩𑀦𑁆𑀥𑀸𑀪𑀸𑀯𑀢𑁄 𑀢𑀲𑁆𑀲 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀅𑀕𑁆𑀕𑀴𑀝𑁆𑀞𑀧𑀦𑀸𑀬𑀸’’𑀢𑀺𑀯𑀘𑀦𑁂 𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑀲𑁆𑀲 𑀓𑀸𑀭𑀡𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀲𑀸𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀁 𑀓𑀢𑁆𑀯𑀸. 𑀅𑀥𑀺𑀓𑀸𑀭𑀢𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀬𑀁 𑀧𑀦 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲𑀸𑀢𑀺 𑀫𑀳𑀸𑀯𑀺𑀳𑀸𑀭𑀲𑁆𑀲. 𑀉𑀧𑀭𑀻𑀢𑀺 𑀤𑁆𑀯𑀸𑀭𑀢𑁄 𑀉𑀧𑀭𑀺. 𑀢𑀻𑀲𑀼 𑀤𑀺𑀲𑀸𑀲𑀽𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼, 𑀉𑀧𑀭𑀻𑀢𑀺 𑀢𑀻𑀲𑀼 𑀤𑀺𑀲𑀸𑀲𑀼. 𑀢𑀢𑁆𑀭𑀸𑀧𑀻𑀢𑀺 𑀔𑀼𑀤𑁆𑀤𑀓𑁂 𑀯𑀺𑀳𑀸𑀭𑁂𑀧𑀺. 𑀲𑀸𑀢𑀺 𑀪𑀺𑀢𑁆𑀢𑀺. 𑀅𑀧𑀭𑀺𑀧𑀽𑀭𑀉𑀧𑀘𑀸𑀭𑀸𑀧𑀻𑀢𑀺 𑀲𑀫𑀦𑁆𑀢𑀸 𑀓𑀯𑀸𑀝𑀧𑀫𑀸𑀡𑁂𑀦 𑀅𑀧𑀭𑀺𑀧𑀽𑀭𑀉𑀧𑀘𑀸𑀭𑀸𑀧𑀺. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀉𑀓𑁆𑀓𑀁𑀲𑀧𑀫𑀸𑀡𑁂𑀦. 𑀳𑀢𑁆𑀣𑀧𑀸𑀲𑀢𑁄 𑀅𑀢𑀺𑀭𑁂𑀓𑀁 𑀦 𑀮𑀺𑀫𑁆𑀧𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀻𑀲𑀼 𑀤𑀺𑀲𑀸𑀲𑀼 𑀏𑀯 𑀮𑀺𑀫𑁆𑀧𑀺𑀢𑀩𑁆𑀩𑁄 𑀦 𑀳𑁄𑀢𑀺, 𑀮𑁂𑀧𑁄𑀓𑀸𑀲𑁂 𑀲𑀢𑀺 𑀅𑀥𑁄𑀪𑀸𑀕𑁂𑀧𑀺 𑀮𑀺𑀫𑁆𑀧𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀘𑁂 𑀧𑀦𑀲𑁆𑀲𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀯𑀺𑀳𑀸𑀭𑀲𑁆𑀲. 𑀆𑀮𑁄𑀓𑀁 𑀲𑀦𑁆𑀥𑁂𑀦𑁆𑀢𑀺 𑀧𑀺𑀤𑀳𑀦𑁆𑀢𑀻𑀢𑀺 ‘‘𑀆𑀮𑁄𑀓𑀲𑀦𑁆𑀥𑀻’’𑀢𑀺 𑀯𑀼𑀢𑁆𑀢𑁂 𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀸𑀢𑀧𑀸𑀦𑀓𑀯𑀸𑀝𑀓𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀯𑀸𑀢𑀁 𑀧𑀺𑀯𑀢𑀻𑀢𑀺 𑀯𑀸𑀢𑀧𑀸𑀦𑀁, 𑀤𑁆𑀯𑀸𑀭𑀁, 𑀢𑀲𑁆𑀫𑀺𑀁 𑀞𑀺𑀢𑀸 𑀓𑀯𑀸𑀝𑀓𑀸 𑀯𑀸𑀢𑀧𑀸𑀦𑀓𑀯𑀸𑀝𑀓𑀸. 𑀢𑁂𑀢𑀺 𑀯𑀸𑀢𑀧𑀸𑀦𑀓𑀯𑀸𑀝𑀓𑀸 𑀧𑀳𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀆𑀮𑁄𑀓𑀲𑀦𑁆𑀥𑀺𑀫𑁆𑀳𑀺. 𑀲𑀩𑁆𑀩𑀤𑀺𑀲𑀸𑀲𑀽𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼, 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼. ‘‘𑀢𑀲𑁆𑀫𑀸’’𑀢𑀺𑀧𑀤𑀁 ‘‘𑀮𑀺𑀫𑁆𑀧𑀺𑀢𑀩𑁆𑀩𑁄 𑀯𑀸 𑀮𑁂𑀧𑀸𑀧𑁂𑀢𑀩𑁆𑀩𑁄 𑀯𑀸’’𑀢𑀺𑀧𑀤𑀤𑁆𑀯𑀬𑁂 𑀳𑁂𑀢𑀼. 𑀏𑀢𑁆𑀣𑀸𑀢𑀺 ‘‘𑀆𑀮𑁄𑀓𑀲𑀦𑁆𑀥𑀺𑀧𑀭𑀺𑀓𑀫𑁆𑀫𑀸𑀬𑀸’’𑀢𑀺𑀧𑀤𑁂.