𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀲𑀺𑀓𑁆𑀔𑀸-𑀫𑀽𑀮𑀲𑀺𑀓𑁆𑀔𑀸

𑀔𑀼𑀤𑁆𑀤𑀲𑀺𑀓𑁆𑀔𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

(𑀓)

𑀆𑀤𑀺𑀢𑁄 𑀉𑀧𑀲𑀫𑁆𑀧𑀦𑁆𑀦-𑀲𑀺𑀓𑁆𑀔𑀺𑀢𑀩𑁆𑀩𑀁 𑀲𑀫𑀸𑀢𑀺𑀓𑀁;

𑀔𑀼𑀤𑁆𑀤𑀲𑀺𑀓𑁆𑀔𑀁 𑀧𑀯𑀓𑁆𑀔𑀸𑀫𑀺, 𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀁.

𑀢𑀢𑁆𑀭𑀸𑀬𑀁 𑀫𑀸𑀢𑀺𑀓𑀸 𑁋

(𑀔)

𑀧𑀸𑀭𑀸𑀚𑀺𑀓𑀸 𑀘 𑀘𑀢𑁆𑀢𑀸𑀭𑁄, 𑀕𑀭𑀼𑀓𑀸 𑀦𑀯 𑀘𑀻𑀯𑀭𑀁;

𑀭𑀚𑀦𑀸𑀦𑀺 𑀘 𑀧𑀢𑁆𑀢𑁄 𑀘, 𑀣𑀸𑀮𑀓𑀸 𑀘 𑀧𑀯𑀸𑀭𑀡𑀸.

(𑀕)

𑀓𑀸𑀮𑀺𑀓𑀸 𑀘 𑀧𑀝𑀺𑀕𑁆𑀕𑀸𑀳𑁄, 𑀫𑀁𑀲𑁂𑀲𑀼 𑀘 𑀅𑀓𑀧𑁆𑀧𑀺𑀬𑀁;

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀧𑀸𑀘𑀺𑀢𑁆𑀢𑀺, 𑀲𑀫𑀡𑀓𑀧𑁆𑀧 𑀪𑀽𑀫𑀺𑀬𑁄.

(𑀖)

𑀉𑀧𑀚𑁆𑀛𑀸𑀘𑀭𑀺𑀬𑀯𑀢𑁆𑀢𑀸𑀦𑀺, 𑀯𑀘𑁆𑀘𑀧𑁆𑀧𑀲𑁆𑀲𑀸𑀯𑀞𑀸𑀦𑀺𑀓𑀁;

𑀆𑀧𑀼𑀘𑁆𑀙𑀓𑀭𑀡𑀁 𑀦𑀕𑁆𑀕𑁄, 𑀦𑁆𑀳𑀸𑀦𑀓𑀧𑁆𑀧𑁄 𑀅𑀯𑀦𑁆𑀤𑀺𑀬𑁄.

(𑀗)

𑀘𑀫𑁆𑀫𑀁 𑀉𑀧𑀸𑀳𑀦𑀸 𑀘𑁂𑀯, 𑀅𑀦𑁄𑀮𑁄𑀓𑀺𑀬𑀫𑀜𑁆𑀚𑀦𑀻;

𑀅𑀓𑀧𑁆𑀧𑀺𑀬𑀲𑀬𑀦𑀸𑀦𑀺, 𑀲𑀫𑀸𑀦𑀸𑀲𑀦𑀺𑀓𑁄𑀧𑀺 𑀘.

(𑀘)

𑀅𑀲𑀁𑀯𑀸𑀲𑀺𑀓𑁄 𑀘 𑀓𑀫𑁆𑀫𑀁, 𑀫𑀺𑀘𑁆𑀙𑀸𑀚𑀻𑀯𑀯𑀺𑀯𑀚𑁆𑀚𑀦𑀸;

𑀯𑀢𑁆𑀢𑀁 𑀯𑀺𑀓𑀧𑁆𑀧𑀦𑀸 𑀘𑁂𑀯, 𑀦𑀺𑀲𑁆𑀲𑀬𑁄 𑀓𑀸𑀬𑀩𑀦𑁆𑀥𑀦𑀁.

(𑀙)

𑀧𑀣𑀯𑀻 𑀘 𑀧𑀭𑀺𑀓𑁆𑀔𑀸𑀭𑁄, 𑀪𑁂𑀲𑀚𑁆𑀚𑀼𑀕𑁆𑀕𑀳𑀤𑀽𑀲𑀦𑀁;

𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀘𑁂𑀯𑀸𑀯𑁂𑀪𑀗𑁆𑀕𑀺𑀬𑀁 𑀧𑀓𑀺𑀡𑁆𑀡𑀓𑀁.

(𑀚)

𑀤𑁂𑀲𑀦𑀸 𑀙𑀦𑁆𑀤𑀤𑀸𑀦𑀸𑀤𑀺, 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸;

𑀲𑀁𑀯𑀭𑁄 𑀲𑀼𑀤𑁆𑀥𑀺 𑀲𑀦𑁆𑀢𑁄𑀲𑁄, 𑀘𑀢𑀼𑀭𑀓𑁆𑀔𑀸 𑀯𑀺𑀧𑀲𑁆𑀲𑀦𑀸𑀢𑀺.

𑁧. 𑀧𑀸𑀭𑀸𑀚𑀺𑀓𑀦𑀺𑀤𑁆𑀤𑁂𑀲𑁄

𑀧𑀸𑀭𑀸𑀚𑀺𑀓𑀸 𑀘 𑀘𑀢𑁆𑀢𑀸𑀭𑁄𑀢𑀺 𑁋

𑁧. 𑀫𑀕𑁆𑀕𑀢𑁆𑀢𑀬𑁂 𑀅𑀦𑀺𑀓𑁆𑀔𑀺𑀢𑁆𑀢𑀲𑀺𑀓𑁆𑀔𑁄 𑀲𑀦𑁆𑀣𑀢𑀲𑀦𑁆𑀣𑀢𑁂;

𑀅𑀮𑁆𑀮𑁄𑀓𑀸𑀲𑁂 𑀦𑀺𑀫𑀺𑀢𑁆𑀢𑀁 𑀲𑀁, 𑀢𑀺𑀮𑀫𑀢𑁆𑀢𑀫𑁆𑀧𑀺 𑀲𑀦𑁆𑀣𑀢𑀁.

𑁨. 𑀅𑀲𑀦𑁆𑀣𑀢𑀫𑀼𑀧𑀸𑀤𑀺𑀡𑁆𑀡𑀁, 𑀧𑀯𑁂𑀲𑀦𑁆𑀢𑁄 𑀘𑀼𑀢𑁄𑀣 𑀯𑀸;

𑀧𑀯𑁂𑀲𑀦𑀝𑁆𑀞𑀺𑀢𑀼𑀤𑁆𑀥𑀸𑀭𑀧𑀯𑀺𑀝𑁆𑀞𑀓𑁆𑀔𑀡𑀲𑀸𑀤𑀓𑁄.

𑁩. 𑀆𑀤𑀺𑀬𑁂𑀬𑁆𑀬 𑀳𑀭𑁂𑀬𑁆𑀬𑀸𑀯𑀳𑀭𑁂𑀬𑁆𑀬 𑀇𑀭𑀺𑀬𑀸𑀧𑀣𑀁;

𑀓𑁄𑀧𑁂𑀬𑁆𑀬 𑀞𑀸𑀦𑀸 𑀘𑀸𑀯𑁂𑀬𑁆𑀬, 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑀬𑁂.

𑁪. 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦, 𑀪𑀯𑁂 𑀧𑀸𑀭𑀸𑀚𑀺𑀓𑁄𑀣 𑀯𑀸;

𑀣𑁂𑀬𑁆𑀬𑀸𑀩𑀮𑀓𑀼𑀲𑀘𑁆𑀙𑀦𑁆𑀦𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀓𑁄;

𑀪𑀡𑁆𑀟𑀓𑀸𑀮𑀕𑁆𑀖𑀤𑁂𑀲𑁂𑀳𑀺, 𑀧𑀭𑀺𑀪𑁄𑀕𑁂𑀢𑁆𑀣 𑀦𑀺𑀘𑁆𑀙𑀬𑁄.

𑁫. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀘𑀺𑀘𑁆𑀘, 𑀚𑀻𑀯𑀺𑀢𑀸 𑀯𑀸 𑀯𑀺𑀬𑁄𑀚𑀬𑁂;

𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀫𑀭𑀡𑀘𑁂𑀢𑀦𑁄 𑀉𑀧𑀦𑀺𑀓𑁆𑀔𑀺𑀧𑁂.

𑁬. 𑀕𑀸𑀳𑁂𑀬𑁆𑀬 𑀫𑀭𑀡𑀽𑀧𑀸𑀬𑀁, 𑀯𑀤𑁂𑀬𑁆𑀬 𑀫𑀭𑀡𑁂 𑀕𑀼𑀡𑀁;

𑀘𑀼𑀢𑁄 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀦𑀺𑀲𑁆𑀲𑀕𑁆𑀕𑀸𑀡𑀢𑁆𑀢𑀺𑀣𑀸𑀯𑀭𑀸.

𑁭. 𑀇𑀤𑁆𑀥𑀺𑀯𑀺𑀚𑁆𑀚𑀸𑀫𑀬𑀸 𑀓𑀸𑀮𑀯𑀢𑁆𑀣𑀸𑀯𑀼𑀥𑀺𑀭𑀺𑀬𑀸𑀧𑀣𑀸;

𑀓𑁆𑀭𑀺𑀬𑀸𑀯𑀺𑀲𑁂𑀲𑁄 𑀑𑀓𑀸𑀲𑁄, 𑀙 𑀆𑀡𑀢𑁆𑀢𑀺𑀦𑀺𑀬𑀸𑀫𑀓𑀸.

𑁮. 𑀛𑀸𑀦𑀸𑀤𑀺𑀪𑁂𑀤 𑀦𑁄𑀲𑀦𑁆𑀢𑀫𑀢𑁆𑀢𑀦𑀢𑁆𑀢𑀼𑀧𑀦𑀸𑀬𑀺𑀓𑀁;

𑀓𑀢𑁆𑀯𑀸 𑀓𑁄𑀝𑁆𑀞𑀸𑀲𑀫𑁂𑀓𑁂𑀓𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀲𑁆𑀲𑀺𑀢𑀁.

𑁯. 𑀅𑀜𑁆𑀜𑀸𑀧𑀤𑁂𑀲𑀭𑀳𑀺𑀢𑀁, 𑀤𑀻𑀧𑁂𑀦𑁆𑀢𑁄𑀦𑀥𑀺𑀫𑀸𑀦𑀺𑀓𑁄;

𑀓𑀸𑀬𑁂𑀦 𑀯𑀸𑀘𑀸 𑀯𑀺𑀜𑁆𑀜𑀢𑁆𑀢𑀺-𑀧𑀣𑁂 𑀜𑀸𑀢𑁂 𑀘𑀼𑀢𑁄 𑀪𑀯𑁂.

𑁧𑁦. 𑀧𑀸𑀭𑀸𑀚𑀺𑀓𑁂𑀢𑁂 𑀘𑀢𑁆𑀢𑀸𑀭𑁄, 𑀅𑀲𑀁𑀯𑀸𑀲𑀸 𑀬𑀣𑀸 𑀧𑀼𑀭𑁂;

𑀅𑀪𑀩𑁆𑀩𑀸 𑀪𑀺𑀓𑁆𑀔𑀼𑀪𑀸𑀯𑀸𑀬, 𑀲𑀻𑀲𑀘𑁆𑀙𑀺𑀦𑁆𑀦𑁄𑀯 𑀚𑀻𑀯𑀺𑀢𑀼𑀁.

𑁧𑁧. 𑀧𑀭𑀺𑀬𑀸𑀬𑁄 𑀘 𑀆𑀡𑀢𑁆𑀢𑀺, 𑀢𑀢𑀺𑀬𑁂 𑀤𑀼𑀢𑀺𑀬𑁂 𑀧𑀦;

𑀆𑀡𑀢𑁆𑀢𑀺𑀬𑁂𑀯 𑀲𑁂𑀲𑁂𑀲𑀼, 𑀤𑁆𑀯𑀬𑀫𑁂𑀢𑀁 𑀦 𑀮𑀩𑁆𑀪𑀢𑀺.

𑁧𑁨. 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁, 𑀫𑀕𑁆𑀕𑁂 𑀫𑀕𑁆𑀕𑀧𑁆𑀧𑀯𑁂𑀲𑀦𑀁;

𑀇𑀫𑀁 𑀫𑁂𑀣𑀼𑀦𑀥𑀫𑁆𑀫𑀲𑁆𑀲, 𑀆𑀳𑀼 𑀅𑀗𑁆𑀕𑀤𑁆𑀯𑀬𑀁 𑀩𑀼𑀥𑀸.

𑁧𑁩. 𑀫𑀦𑀼𑀲𑁆𑀲𑀲𑀁 𑀢𑀣𑀸𑀲𑀜𑁆𑀜𑀻, 𑀣𑁂𑀬𑁆𑀬𑀘𑀺𑀢𑁆𑀢𑀜𑁆𑀘 𑀯𑀢𑁆𑀣𑀼𑀦𑁄;

𑀕𑀭𑀼𑀢𑀸 𑀅𑀯𑀳𑀸𑀭𑁄 𑀘, 𑀅𑀤𑀺𑀦𑁆𑀦𑀸𑀤𑀸𑀦𑀳𑁂𑀢𑀼𑀬𑁄.

𑁧𑁪. 𑀧𑀸𑀡𑁄 𑀫𑀸𑀦𑀼𑀲𑁆𑀲𑀓𑁄 𑀧𑀸𑀡-𑀲𑀜𑁆𑀜𑀺𑀢𑀸 𑀖𑀸𑀢𑀘𑁂𑀢𑀦𑀸;

𑀧𑀬𑁄𑀕𑁄 𑀢𑁂𑀦 𑀫𑀭𑀡𑀁, 𑀧𑀜𑁆𑀘𑁂𑀢𑁂 𑀯𑀥𑀳𑁂𑀢𑀼𑀬𑁄.

𑁧𑁫. 𑀅𑀲𑀦𑁆𑀢𑀢𑀸 𑀅𑀢𑁆𑀢𑀦𑀺 𑀧𑀸𑀧𑀫𑀺𑀘𑁆𑀙𑀢𑀸-

𑀬𑀸𑀭𑁄𑀘𑀦𑀸 𑀢𑀲𑁆𑀲 𑀫𑀦𑀼𑀲𑁆𑀲𑀚𑀸𑀢𑀺𑀢𑀸;

𑀦𑀸𑀜𑁆𑀜𑀸𑀧𑀤𑁂𑀲𑁄 𑀘 𑀢𑀤𑁂𑀯 𑀚𑀸𑀦𑀦𑀁,

𑀧𑀜𑁆𑀘𑁂𑀢𑁆𑀣 𑀅𑀗𑁆𑀕𑀸𑀦𑀺 𑀅𑀲𑀦𑁆𑀢𑀤𑀻𑀧𑀦𑁂.

𑁧𑁬. 𑀅𑀲𑀸𑀥𑀸𑀭𑀡𑀸 𑀘𑀢𑁆𑀢𑀸𑀭𑁄, 𑀪𑀺𑀓𑁆𑀔𑀼𑀦𑀻𑀦𑀫𑀪𑀩𑁆𑀩𑀓𑀸;

𑀏𑀓𑀸𑀤𑀲 𑀘 𑀯𑀺𑀩𑁆𑀪𑀦𑁆𑀢𑀸, 𑀪𑀺𑀓𑁆𑀔𑀼𑀦𑀻 𑀫𑀼𑀤𑀼𑀧𑀺𑀝𑁆𑀞𑀺𑀓𑁄.

𑁧𑁭. 𑀮𑀫𑁆𑀩𑀻 𑀫𑀼𑀔𑁂𑀦 𑀕𑀡𑁆𑀳𑀦𑁆𑀢𑁄, 𑀅𑀗𑁆𑀕𑀚𑀸𑀢𑀁 𑀧𑀭𑀲𑁆𑀲 𑀘;

𑀢𑀢𑁆𑀣𑁂𑀯𑀸𑀪𑀺𑀦𑀺𑀲𑀻𑀤𑀦𑁆𑀢𑁄, 𑀘𑀢𑁆𑀢𑀸𑀭𑁄 𑀅𑀦𑀼𑀮𑁄𑀫𑀺𑀓𑀸.

𑁧𑁮. 𑀫𑀕𑁆𑀕𑁂 𑀫𑀕𑁆𑀕𑀧𑁆𑀧𑀯𑁂𑀲𑀦𑀸, 𑀫𑁂𑀣𑀼𑀦𑀲𑁆𑀲 𑀇𑀥𑀸𑀕𑀢𑀸;

𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀩𑁆𑀩𑀻𑀲, 𑀲𑀫𑁄𑀥𑀸𑀦𑀸 𑀧𑀭𑀸𑀚𑀺𑀓𑀸𑀢𑀺.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀦𑀺𑀤𑁆𑀤𑁂𑀲𑁄

𑀕𑀭𑀼𑀓𑀸 𑀦𑀯𑀸𑀢𑀺 𑁋

𑁧𑁯. 𑀫𑁄𑀘𑁂𑀢𑀼𑀓𑀸𑀫𑀢𑀸 𑀲𑀼𑀓𑁆𑀓-𑀲𑁆𑀲𑀼𑀧𑀓𑁆𑀓𑀫𑁆𑀫 𑀯𑀺𑀫𑁄𑀘𑀬𑀁;

𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑁂𑀦, 𑀲𑀫𑀡𑁄 𑀕𑀭𑀼𑀓𑀁 𑀨𑀼𑀲𑁂.

𑁨𑁦. 𑀇𑀢𑁆𑀣𑀺𑀲𑀜𑁆𑀜𑀻 𑀫𑀦𑀼𑀲𑁆𑀲𑀺𑀢𑁆𑀣𑀺𑀁, 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀯𑀸;

𑀲𑀫𑁆𑀨𑀼𑀲𑀦𑁆𑀢𑁄 𑀉𑀧𑀓𑁆𑀓𑀫𑁆𑀫, 𑀲𑀫𑀡𑁄 𑀕𑀭𑀼𑀓𑀁 𑀨𑀼𑀲𑁂.

𑁨𑁧. 𑀢𑀣𑀸 𑀲𑀼𑀡𑀦𑁆𑀢𑀺𑀁 𑀯𑀺𑀜𑁆𑀜𑀼𑀜𑁆𑀘, 𑀫𑀕𑁆𑀕𑀁 𑀯𑀸𑀭𑀩𑁆𑀪 𑀫𑁂𑀣𑀼𑀦𑀁;

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀭𑀸𑀕𑁂𑀦, 𑀑𑀪𑀸𑀲𑁂𑀢𑁆𑀯𑀸 𑀕𑀭𑀼𑀁 𑀨𑀼𑀲𑁂.

𑁨𑁨. 𑀯𑀢𑁆𑀯𑀸𑀢𑁆𑀢𑀓𑀸𑀫𑀼𑀧𑀝𑁆𑀞𑀸𑀦-𑀯𑀡𑁆𑀡𑀁 𑀫𑁂𑀣𑀼𑀦𑀭𑀸𑀕𑀺𑀦𑁄;

𑀯𑀸𑀘𑀸 𑀫𑁂𑀣𑀼𑀦𑀬𑀼𑀢𑁆𑀢𑁂𑀦, 𑀕𑀭𑀼𑀁 𑀫𑁂𑀣𑀼𑀦𑀬𑀸𑀘𑀦𑁂.

𑁨𑁩. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀦𑁆𑀤𑁂𑀲𑀁, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀯𑀻𑀫𑀁𑀲𑀺𑀢𑁆𑀯𑀸 𑀳𑀭𑀁 𑀧𑀘𑁆𑀘𑀸, 𑀲𑀫𑀡𑁄 𑀕𑀭𑀼𑀓𑀁 𑀨𑀼𑀲𑁂.

𑁨𑁪. 𑀲𑀁𑀬𑀸𑀘𑀺𑀢𑀧𑀭𑀺𑀓𑁆𑀔𑀸𑀭𑀁, 𑀓𑀢𑁆𑀯𑀸𑀤𑁂𑀲𑀺𑀢𑀯𑀢𑁆𑀣𑀼𑀓𑀁;

𑀓𑀼𑀝𑀺𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁, 𑀅𑀢𑁆𑀢𑀼𑀤𑁆𑀤𑁂𑀲𑀁 𑀕𑀭𑀼𑀁 𑀨𑀼𑀲𑁂.

𑁨𑁫. 𑀫𑀳𑀮𑁆𑀮𑀓𑀁 𑀯𑀺𑀳𑀸𑀭𑀁 𑀯𑀸, 𑀓𑀢𑁆𑀯𑀸𑀤𑁂𑀲𑀺𑀢𑀯𑀢𑁆𑀣𑀼𑀓𑀁;

𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀸𑀬, 𑀲𑀫𑀡𑁄 𑀕𑀭𑀼𑀓𑀁 𑀨𑀼𑀲𑁂.

𑁨𑁬. 𑀅𑀫𑀽𑀮𑀓𑁂𑀦 𑀘𑁄𑀤𑁂𑀦𑁆𑀢𑁄, 𑀘𑁄𑀤𑀸𑀧𑁂𑀦𑁆𑀢𑁄𑀯 𑀯𑀢𑁆𑀣𑀼𑀦𑀸;

𑀅𑀦𑁆𑀢𑀺𑀫𑁂𑀦 𑀘 𑀘𑀸𑀯𑁂𑀢𑀼𑀁, 𑀲𑀼𑀡𑀫𑀸𑀦𑀁 𑀕𑀭𑀼𑀁 𑀨𑀼𑀲𑁂.

𑁨𑁭. 𑀅𑀜𑁆𑀜𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸, 𑀢𑁂𑀦 𑀮𑁂𑀲𑁂𑀦 𑀘𑁄𑀤𑀬𑀁;

𑀯𑀢𑁆𑀣𑀼𑀦𑀸 𑀅𑀦𑁆𑀢𑀺𑀫𑁂𑀦𑀸𑀜𑁆𑀜𑀁, 𑀘𑀸𑀯𑁂𑀢𑀼𑀁 𑀕𑀭𑀼𑀓𑀁 𑀨𑀼𑀲𑁂.

𑁨𑁮. 𑀙𑀸𑀤𑁂𑀢𑀺 𑀚𑀸𑀦𑀫𑀸𑀧𑀦𑁆𑀦𑀁, 𑀧𑀭𑀺𑀯𑀲𑁂𑀬𑁆𑀬 𑀢𑀸𑀯𑀢𑀸;

𑀘𑀭𑁂𑀬𑁆𑀬 𑀲𑀗𑁆𑀖𑁂 𑀫𑀸𑀦𑀢𑁆𑀢𑀁, 𑀧𑀭𑀺𑀯𑀼𑀢𑁆𑀣𑁄 𑀙 𑀭𑀢𑁆𑀢𑀺𑀬𑁄.

𑀘𑀺𑀡𑁆𑀡𑀫𑀸𑀦𑀢𑁆𑀢𑀫𑀩𑁆𑀪𑁂𑀬𑁆𑀬, 𑀢𑀁 𑀲𑀗𑁆𑀖𑁄 𑀯𑀻𑀲𑀢𑀻𑀕𑀡𑁄.

𑁨𑁯. 𑀆𑀧𑀢𑁆𑀢𑀺𑀦𑀼𑀓𑁆𑀔𑀺𑀢𑁆𑀢𑀫𑀦𑀦𑁆𑀢𑀭𑀸𑀬

𑀧𑀳𑀼𑀢𑁆𑀢𑀢𑀸𑀬𑁄 𑀢𑀣𑀲𑀜𑁆𑀜𑀺𑀢𑀸 𑀘;

𑀙𑀸𑀤𑁂𑀢𑀼𑀓𑀸𑀫𑁄 𑀅𑀣 𑀙𑀸𑀤𑀦𑀸𑀢𑀺,

𑀙𑀦𑁆𑀦𑀸 𑀤𑀲𑀗𑁆𑀕𑁂𑀳𑁆𑀬𑀭𑀼𑀡𑀼𑀕𑁆𑀕𑀫𑀫𑁆𑀳𑀻𑀢𑀺.

𑁩. 𑀘𑀻𑀯𑀭𑀦𑀺𑀤𑁆𑀤𑁂𑀲𑁄

𑀘𑀻𑀯𑀭𑀦𑁆𑀢𑀺 𑁋

𑁩𑁦. 𑀔𑁄𑀫𑀓𑁄𑀲𑁂𑀬𑁆𑀬𑀓𑀧𑁆𑀧𑀸𑀲-𑀲𑀸𑀡𑀪𑀗𑁆𑀕𑀸𑀦𑀺 𑀓𑀫𑁆𑀩𑀮𑀁;

𑀓𑀧𑁆𑀧𑀺𑀬𑀸𑀦𑀺 𑀙𑀴𑁂𑀢𑀸𑀦𑀺, 𑀲𑀸𑀦𑀼𑀮𑁄𑀫𑀸𑀦𑀺 𑀚𑀸𑀢𑀺𑀢𑁄.

𑁩𑁧. 𑀤𑀼𑀓𑀽𑀮𑀜𑁆𑀘𑁂𑀯 𑀧𑀝𑁆𑀝𑀼𑀡𑁆𑀡-𑀧𑀝𑀁 𑀲𑁄𑀫𑀸𑀭𑀘𑀻𑀦𑀚𑀁;

𑀇𑀤𑁆𑀥𑀺𑀚𑀁 𑀤𑁂𑀯𑀤𑀺𑀦𑁆𑀦𑀜𑁆𑀘, 𑀢𑀲𑁆𑀲 𑀢𑀲𑁆𑀲𑀸𑀦𑀼𑀮𑁄𑀫𑀺𑀓𑀁.

𑁩𑁨. 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭-𑀘𑁄𑀴𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁;

𑀅𑀥𑀺𑀝𑁆𑀞𑁂 𑀦 𑀯𑀺𑀓𑀧𑁆𑀧𑁂𑀬𑁆𑀬, 𑀫𑀼𑀔𑀧𑀼𑀜𑁆𑀙𑀦𑀦𑀺𑀲𑀻𑀤𑀦𑀁.

𑁩𑁩. 𑀧𑀘𑁆𑀘𑀢𑁆𑀣𑀭𑀡𑀓𑀁 𑀓𑀡𑁆𑀟𑀼-𑀘𑁆𑀙𑀸𑀤𑀺𑀫𑁂𑀢𑁆𑀣 𑀢𑀺𑀘𑀻𑀯𑀭𑀁;

𑀦 𑀯𑀲𑁂𑀬𑁆𑀬 𑀯𑀺𑀦𑁂𑀓𑀸𑀳𑀁, 𑀘𑀸𑀢𑀼𑀫𑀸𑀲𑀁 𑀦𑀺𑀲𑀻𑀤𑀦𑀁.

𑁩𑁪. ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁𑀥𑀺𑀝𑁆𑀞𑀸𑀫𑀺’’, 𑀲𑀗𑁆𑀖𑀸𑀝𑀺𑀫𑀺𑀘𑁆𑀘𑀥𑀺𑀝𑁆𑀞𑀬𑁂;

𑀅𑀳𑀢𑁆𑀣𑀧𑀸𑀲𑀫𑁂𑀢𑀦𑁆𑀢𑀺, 𑀲𑁂𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄.

𑁩𑁫. 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀗𑁆𑀖𑀸𑀝𑀺-𑀧𑁆𑀧𑀪𑀼𑀢𑀺𑀁 𑀧𑀼𑀩𑁆𑀩𑀘𑀻𑀯𑀭𑀁;

𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸𑀥𑀺𑀝𑁆𑀞𑁂𑀬𑁆𑀬, 𑀧𑀢𑁆𑀢𑀸𑀥𑀺𑀝𑁆𑀞𑀳𑀦𑁂 𑀢𑀣𑀸.

𑁩𑁬. 𑀏𑀢𑀁 𑀇𑀫𑀁 𑀯 𑀲𑀗𑁆𑀖𑀸𑀝𑀺𑀁, 𑀲𑀁𑀲𑁂 𑀧𑀘𑁆𑀘𑀼𑀤𑁆𑀥𑀭𑀸𑀫𑀺𑀢𑀺;

𑀏𑀯𑀁 𑀲𑀩𑁆𑀩𑀸𑀦𑀺 𑀦𑀸𑀫𑁂𑀦, 𑀯𑀢𑁆𑀯𑀸 𑀧𑀘𑁆𑀘𑀼𑀤𑁆𑀥𑀭𑁂 𑀯𑀺𑀤𑀽.

𑁩𑁭. 𑀲𑀗𑁆𑀖𑀸𑀝𑀺 𑀧𑀘𑁆𑀙𑀺𑀫𑀦𑁆𑀢𑁂𑀦, 𑀤𑀻𑀖𑀲𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑁄;

𑀉𑀢𑁆𑀢𑀫𑀦𑁆𑀢𑁂𑀦 𑀲𑀼𑀕𑀢-𑀘𑀻𑀯𑀭𑀽𑀦𑀸𑀧𑀺 𑀯𑀝𑁆𑀝𑀢𑀺.

𑁩𑁮. 𑀫𑀼𑀝𑁆𑀞𑀺𑀢𑁆𑀢𑀺𑀓𑀜𑁆𑀘 𑀢𑀺𑀭𑀺𑀬𑀁, 𑀢𑀣𑀸 𑀏𑀓𑀁𑀲𑀺𑀓𑀲𑁆𑀲𑀧𑀺;

𑀅𑀦𑁆𑀢𑀭𑀯𑀸𑀲𑀓𑁄 𑀘𑀸𑀧𑀺, 𑀤𑀻𑀖𑀲𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑁄;

𑀅𑀟𑁆𑀠𑀢𑁂𑀬𑁆𑀬𑁄 𑀤𑁆𑀯𑀺𑀳𑀢𑁆𑀣𑁄 𑀯𑀸, 𑀢𑀺𑀭𑀺𑀬𑀦𑁆𑀢𑁂𑀦 𑀯𑀝𑁆𑀝𑀢𑀺.

𑁩𑁯. 𑀦𑀺𑀲𑀻𑀤𑀦𑀲𑁆𑀲 𑀤𑀻𑀖𑁂𑀦, 𑀯𑀺𑀤𑀢𑁆𑀣𑀺 𑀤𑁆𑀯𑁂 𑀯𑀺𑀲𑀸𑀮𑀢𑁄;

𑀤𑀺𑀬𑀟𑁆𑀠𑀁 𑀤𑀲𑀸 𑀯𑀺𑀤𑀢𑁆𑀣𑀺, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸.

𑁪𑁦. 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀲𑁆𑀲, 𑀢𑀺𑀭𑀺𑀬𑀁 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄;

𑀤𑀻𑀖𑀦𑁆𑀢𑀢𑁄 𑀘𑀢𑀲𑁆𑀲𑁄𑀯, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸.

𑁪𑁧. 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬𑀸𑀧𑀺, 𑀤𑀻𑀖𑀲𑁄 𑀙 𑀯𑀺𑀤𑀢𑁆𑀣𑀺𑀬𑁄;

𑀢𑀺𑀭𑀺𑀬𑀁 𑀅𑀟𑁆𑀠𑀢𑁂𑀬𑁆𑀬𑀸𑀯, 𑀲𑀼𑀕𑀢𑀲𑁆𑀲 𑀯𑀺𑀤𑀢𑁆𑀣𑀺𑀬𑀸.

𑁪𑁨. 𑀏𑀢𑁆𑀣 𑀙𑁂𑀤𑀦𑀧𑀸𑀘𑀺𑀢𑁆𑀢𑀺, 𑀓𑀭𑁄𑀦𑁆𑀢𑀲𑁆𑀲 𑀢𑀤𑀼𑀢𑁆𑀢𑀭𑀺;

𑀧𑀘𑁆𑀘𑀢𑁆𑀣𑀭𑀡 𑀫𑀼𑀔𑀘𑁄𑀴𑀸, 𑀆𑀓𑀗𑁆𑀔𑀺𑀢𑀧𑁆𑀧𑀫𑀸𑀡𑀺𑀓𑀸.

𑁪𑁩. 𑀧𑀭𑀺𑀓𑁆𑀔𑀸𑀭𑀘𑁄𑀴𑁂 𑀕𑀡𑀦𑀸, 𑀧𑀫𑀸𑀡𑀁 𑀯𑀸 𑀦 𑀤𑀻𑀧𑀺𑀢𑀁;

𑀢𑀣𑀸 𑀯𑀢𑁆𑀯𑀸 𑀅𑀥𑀺𑀝𑁆𑀞𑁂𑀬𑁆𑀬, 𑀣𑀯𑀺𑀓𑀸𑀤𑀺𑀁 𑀯𑀺𑀓𑀧𑁆𑀧𑀺𑀬𑀁.

𑁪𑁪. 𑀅𑀳𑀢𑀸𑀳𑀢𑀓𑀧𑁆𑀧𑀸𑀦𑀁, 𑀲𑀗𑁆𑀖𑀸𑀝𑀺 𑀤𑀺𑀕𑀼𑀡𑀸 𑀲𑀺𑀬𑀸;

𑀏𑀓𑀘𑁆𑀘𑀺𑀬𑁄𑀢𑁆𑀢𑀭𑀸𑀲𑀗𑁆𑀕𑁄, 𑀢𑀣𑀸 𑀅𑀦𑁆𑀢𑀭𑀯𑀸𑀲𑀓𑁄.

𑁪𑁫. 𑀉𑀢𑀼𑀤𑁆𑀥𑀝𑀸𑀦 𑀤𑀼𑀲𑁆𑀲𑀸𑀦𑀁, 𑀲𑀗𑁆𑀖𑀸𑀝𑀺 𑀘 𑀘𑀢𑀼𑀕𑁆𑀕𑀼𑀡𑀸;

𑀪𑀯𑁂𑀬𑁆𑀬𑀼𑀁 𑀤𑀺𑀕𑀼𑀡𑀸 𑀲𑁂𑀲𑀸, 𑀧𑀁𑀲𑀼𑀓𑀽𑀮𑁂 𑀬𑀣𑀸𑀭𑀼𑀘𑀺.

𑁪𑁬. 𑀢𑀻𑀲𑀼 𑀤𑁆𑀯𑁂 𑀯𑀸𑀧𑀺 𑀏𑀓𑀁 𑀯𑀸, 𑀙𑀺𑀦𑁆𑀤𑀺𑀢𑀩𑁆𑀩𑀁 𑀧𑀳𑁄𑀢𑀺 𑀬𑀁;

𑀲𑀩𑁆𑀩𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼, 𑀅𑀦𑁆𑀯𑀸𑀥𑀺𑀫𑀸𑀤𑀺𑀬𑁂𑀬𑁆𑀬 𑀯𑀸;

𑀅𑀘𑁆𑀙𑀺𑀦𑁆𑀦𑀜𑁆𑀘 𑀅𑀦𑀸𑀤𑀺𑀡𑁆𑀡𑀁, 𑀦 𑀥𑀸𑀭𑁂𑀬𑁆𑀬 𑀢𑀺𑀘𑀻𑀯𑀭𑀁.

𑁪𑁭. 𑀕𑀸𑀫𑁂 𑀦𑀺𑀯𑁂𑀲𑀦𑁂 𑀉𑀤𑁆𑀤𑁄-𑀲𑀺𑀢𑀧𑀸𑀲𑀸𑀤𑀳𑀫𑁆𑀫𑀺𑀬𑁂;

𑀦𑀸𑀯𑀸𑀝𑁆𑀝𑀫𑀸𑀴𑀆𑀭𑀸𑀫𑁂, 𑀲𑀢𑁆𑀣𑀔𑁂𑀢𑁆𑀢𑀔𑀮𑁂 𑀤𑀼𑀫𑁂.

𑁪𑁮. 𑀅𑀚𑁆𑀛𑁄𑀓𑀸𑀲𑁂 𑀯𑀺𑀳𑀸𑀭𑁂 𑀯𑀸, 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀘𑀻𑀯𑀭𑀁;

𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀜𑁆𑀜𑀢𑁆𑀭, 𑀯𑀺𑀧𑁆𑀧𑀯𑀢𑁆𑀣𑀼𑀁 𑀦 𑀯𑀝𑁆𑀝𑀢𑀺.

𑁪𑁯. 𑀭𑁄𑀕𑀯𑀲𑁆𑀲𑀸𑀦𑀧𑀭𑀺𑀬𑀦𑁆𑀢𑀸, 𑀓𑀡𑁆𑀟𑀼𑀘𑁆𑀙𑀸𑀤𑀺𑀓𑀲𑀸𑀝𑀺𑀓𑀸;

𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀬𑁆𑀬, 𑀲𑁂𑀲𑀸 𑀅𑀧𑀭𑀺𑀬𑀦𑁆𑀢𑀺𑀓𑀸.

𑁫𑁦. 𑀧𑀘𑁆𑀘𑀢𑁆𑀣𑀭𑀡 𑀧𑀭𑀺𑀓𑁆𑀔𑀸𑀭-𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀓𑀁;

𑀤𑀲𑀁 𑀧𑁆𑀬𑀭𑀢𑁆𑀢𑀦𑀸𑀤𑀺𑀡𑁆𑀡𑀓𑀧𑁆𑀧𑀁 𑀮𑀩𑁆𑀪𑀁 𑀦𑀺𑀲𑀻𑀤𑀦𑀁.

𑁫𑁧. 𑀅𑀤𑀲𑀁 𑀭𑀚𑀺𑀢𑀁𑀬𑁂𑀯, 𑀲𑁂𑀲𑀘𑀻𑀯𑀭𑀧𑀜𑁆𑀘𑀓𑀁;

𑀓𑀧𑁆𑀧𑀢𑀸𑀤𑀺𑀡𑁆𑀡𑀓𑀧𑁆𑀧𑀁𑀯, 𑀲𑀤𑀲𑀁𑀯 𑀦𑀺𑀲𑀻𑀤𑀦𑀁.

𑁫𑁨. 𑀅𑀦𑀥𑀺𑀝𑁆𑀞𑀺𑀢𑀦𑀺𑀲𑁆𑀲𑀝𑁆𑀞𑀁, 𑀓𑀧𑁆𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀬𑁂;

𑀳𑀢𑁆𑀣𑀤𑀻𑀖𑀁 𑀢𑀢𑁄𑀧𑀟𑁆𑀠-𑀯𑀺𑀢𑁆𑀣𑀸𑀭𑀜𑁆𑀘 𑀯𑀺𑀓𑀧𑁆𑀧𑀺𑀬𑀁.

𑁫𑁩. 𑀢𑀺𑀘𑀻𑀯𑀭𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀲𑀩𑁆𑀩𑀫𑁂𑀢𑀁 𑀧𑀓𑀸𑀲𑀺𑀢𑀁;

𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀬𑁄 𑀲𑀩𑁆𑀩𑀁, 𑀢𑀣𑀸 𑀯𑀢𑁆𑀯𑀸 𑀅𑀥𑀺𑀝𑁆𑀞𑀢𑀺.

𑁫𑁪. 𑀅𑀘𑁆𑀙𑁂𑀤𑀯𑀺𑀲𑁆𑀲𑀚𑁆𑀚𑀦𑀕𑀸𑀳𑀯𑀺𑀩𑁆𑀪𑀫𑀸,