𑁯. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀁

𑁧. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀓𑀣𑀸

𑁩𑁮𑁩. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀦𑀦𑁆𑀤𑀺𑀬𑀢𑀺 𑀢𑀼𑀲𑀺𑀬𑀢𑀻𑀢𑀺 𑀦𑀦𑁆𑀤𑀺, 𑀇𑀓𑀸𑀭𑀦𑁆𑀢𑁄𑀬𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑁄. ‘‘𑀦𑀦𑁆𑀤𑀺𑀲𑁂𑀦𑁄 (𑀚𑀸. 𑀅𑀝𑁆𑀞. 𑁩.𑁪.𑁧) 𑀦𑀦𑁆𑀤𑀺𑀯𑀺𑀲𑀸𑀮𑁄’’𑀢𑀺𑀆𑀤𑀻𑀲𑀼 𑀇𑀓𑀸𑀭𑀦𑁆𑀢𑁄𑀬𑀁 𑀧𑀼𑀮𑁆𑀮𑀺𑀗𑁆𑀕𑁄 𑀳𑁄𑀢𑀺, 𑀇𑀥 𑀧𑀦 𑀫𑀼𑀔𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀇𑀓𑀸𑀭𑀦𑁆𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀳𑁄𑀢𑀺. 𑀅𑀭𑀼𑀡𑀼𑀝𑁆𑀞𑀺𑀢𑀓𑀸𑀮𑁂 𑀑𑀤𑀸𑀢𑀤𑀺𑀲𑀸𑀫𑀼𑀔𑀢𑀸𑀬 𑀦𑀦𑁆𑀤𑀺 𑀫𑀼𑀔𑀁 𑀏𑀢𑀺𑀲𑁆𑀲𑀁 𑀭𑀢𑁆𑀢𑀺𑀬𑀦𑁆𑀢𑀺 𑀦𑀦𑁆𑀤𑀺𑀫𑀼𑀔𑀻, 𑀭𑀢𑁆𑀢𑀺, 𑀢𑀸𑀬 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀭𑀼𑀡𑀼𑀝𑁆𑀞𑀺𑀢𑀓𑀸𑀮𑁂𑀧𑀺 𑀳𑀺 𑀦𑀦𑁆𑀤𑀻𑀫𑀼𑀔𑀸 𑀯𑀺𑀬 𑀭𑀢𑁆𑀢𑀺 𑀔𑀸𑀬𑀢𑀻’’𑀢𑀺. 𑀅𑀦𑁆𑀢𑁄𑀧𑀽𑀢𑀺𑀦𑁆𑀢𑀺 𑀏𑀢𑁆𑀣 𑀓𑀸𑀬𑀲𑁆𑀲 𑀅𑀦𑁆𑀢𑁄 𑀓𑀼𑀡𑀧𑀧𑀽𑀢𑀺𑀦𑁆𑀢𑀺 𑀅𑀢𑁆𑀣𑀁 𑀧𑀝𑀺𑀧𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂’’𑀢𑀺𑀆𑀤𑀺. ‘‘𑀓𑀺𑀮𑁂𑀲𑀯𑀲𑁆𑀲𑀦𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀉𑀤𑀓𑀯𑀲𑁆𑀲𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀯𑀲𑁆𑀲𑀼𑀢𑀦𑁆𑀢𑀺 𑀢𑀺𑀦𑁆𑀢𑀁, 𑀓𑀺𑀮𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀲𑀫𑁆𑀩𑀼𑀚𑀸𑀢𑀦𑁆𑀢𑀺 𑀏𑀢𑁆𑀣 𑀓𑀲𑀫𑁆𑀩𑀽𑀢𑀺 𑀲𑀗𑁆𑀓𑀸𑀭𑁄. 𑀲𑁄 𑀳𑀺 𑀲𑀫𑁆𑀫𑀼𑀜𑁆𑀘𑀦𑀺𑀬𑀸 𑀓𑀲𑀺𑀬𑀫𑀸𑀦𑁂 𑀯𑀺𑀮𑁂𑀔𑀺𑀬𑀫𑀸𑀦𑁂 𑀲𑀫𑁆𑀩𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀓𑀲𑀫𑁆𑀩𑀼, 𑀢𑀁 𑀯𑀺𑀬 𑀚𑀸𑀢𑀦𑁆𑀢𑀺 𑀓𑀲𑀫𑁆𑀩𑀼𑀚𑀸𑀢𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 ‘‘𑀆𑀓𑀺𑀮𑀺𑀝𑁆𑀞𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀢𑀺𑀯𑀺𑀬 𑀓𑀺𑀮𑀺𑀝𑁆𑀞𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀆𑀓𑀺𑀡𑁆𑀡𑀤𑁄𑀲𑀢𑀸𑀬 𑀓𑀺𑀮𑀺𑀝𑁆𑀞𑀚𑀸𑀢’’𑀦𑁆𑀢𑀺𑀧𑀺 𑀧𑀸𑀞𑁄. ‘‘𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀧𑀸𑀞𑁂𑀦 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑀁. 𑀢𑁂𑀦𑀸𑀢𑀺 𑀫𑁄𑀖𑀧𑀼𑀭𑀺𑀲𑁂𑀦. ‘‘𑀬𑀸𑀯𑀸’’𑀢𑀺 𑀦𑀺𑀧𑀸𑀢𑀧𑀬𑁄𑀕𑀢𑁆𑀢𑀸 ‘‘𑀩𑀸𑀳𑀸𑀕𑀳𑀡𑀸𑀧𑀻’’𑀢𑀺 𑀏𑀢𑁆𑀣 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀅𑀯𑀥𑀺𑀅𑀢𑁆𑀣𑁂 𑀳𑁄𑀢𑀺. 𑀦𑀸𑀫-𑀲𑀤𑁆𑀤𑁄 𑀕𑀭𑀳𑀢𑁆𑀣𑀚𑁄𑀢𑀓𑁄, 𑀢𑀲𑁆𑀲 𑀧𑀬𑁄𑀕𑀢𑁆𑀢𑀸 ‘‘𑀆𑀕𑀫𑁂𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀅𑀢𑀻𑀢𑀢𑁆𑀣𑁂 𑀅𑀦𑀸𑀕𑀢𑀯𑀘𑀦𑀁 (𑀲𑀤𑁆𑀤𑀦𑀻𑀢𑀺𑀲𑀼𑀢𑁆𑀢𑀫𑀸𑀮𑀸𑀬 𑁮𑁯𑁩 𑀲𑀼𑀢𑁆𑀢𑁂). 𑀆𑀕𑀫𑁂𑀲𑁆𑀲𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀆𑀕𑀫𑁂𑀲𑁆𑀲𑀢𑀻𑀢𑀺 𑀈𑀲𑀁 𑀅𑀥𑀺𑀯𑀸𑀲𑁂𑀲𑁆𑀲𑀢𑀺. ‘‘𑀆𑀢𑁄 𑀕𑀫𑀼𑀈𑀲𑀫𑀥𑀺𑀯𑀸𑀲𑀦𑁂’’𑀢𑀺 𑀳𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁮 𑀫𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀁.

𑁩𑁮𑁪. 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄𑀢𑀺 𑀏𑀢𑁆𑀣 𑀤𑀻𑀖𑁂𑀦𑁂𑀯 𑀧𑀧𑀸𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀧𑀞𑀫𑀫𑁂𑀯 𑀕𑀫𑁆𑀪𑀻𑀭𑁄’’𑀢𑀺. 𑀆𑀬𑀢𑀲𑀤𑁆𑀤𑁄 𑀳𑀺 𑀤𑀻𑀖𑀧𑀭𑀺𑀬𑀸𑀬𑁄. ‘‘𑀦 𑀆𑀬𑀢𑀓𑁂𑀦 𑀕𑀻𑀢𑀲𑁆𑀲𑀭𑁂𑀦 𑀥𑀫𑁆𑀫𑁄 𑀕𑀸𑀬𑀺𑀢𑀩𑁆𑀩𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁨𑁪𑁯) 𑀯𑀺𑀬 𑀧𑀧𑀸𑀢𑁄 𑀤𑀻𑀖𑁂𑀦 𑀢𑀻𑀭𑀲𑁆𑀲 𑀆𑀤𑀺𑀫𑁆𑀳𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀞𑀫𑀫𑁂𑀯𑀸𑀢𑀺 𑀢𑀻𑀭𑀲𑁆𑀲 𑀆𑀤𑀺𑀫𑁆𑀳𑀺𑀬𑁂𑀯. ‘‘𑀅𑀦𑀼𑀧𑀼𑀩𑁆𑀩𑁂𑀦 𑀕𑀫𑁆𑀪𑀻𑀭𑁄’’𑀢𑀺 𑀇𑀫𑀺𑀦𑀸 ‘‘𑀦 𑀧𑀞𑀫𑀫𑁂𑀯 𑀕𑀫𑁆𑀪𑀻𑀭𑁄’’𑀢𑀺 𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀞𑀺𑀢𑀥𑀫𑁆𑀫𑁄𑀢𑀺 𑀢𑀻𑀭𑀲𑁆𑀲 𑀅𑀦𑁆𑀢𑁄𑀬𑁂𑀯 𑀞𑀺𑀢𑀲𑀪𑀸𑀯𑁄. 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀏𑀢𑁆𑀣 𑀯𑁂𑀮𑀸𑀲𑀤𑁆𑀤𑀲𑁆𑀲 𑀢𑀻𑀭𑀫𑀭𑀺𑀬𑀸𑀤𑀢𑁆𑀣𑁂𑀲𑀼 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀑𑀲𑀓𑁆𑀓𑀦𑀓𑀦𑁆𑀤𑀭𑀁 𑀫𑀭𑀺𑀬𑀸𑀤𑀯𑁂𑀮’’𑀦𑁆𑀢𑀺. 𑀢𑀢𑁆𑀣 ‘‘𑀑𑀲𑀓𑁆𑀓𑀦𑀓𑀦𑁆𑀤𑀭’’𑀇𑀢𑀺 𑀧𑀤𑁂𑀦 𑀢𑀻𑀭𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀫𑀭𑀺𑀬𑀸𑀤’’ 𑀇𑀢𑀺 𑀧𑀤𑁂𑀦 𑀫𑀭𑀺𑀬𑀸𑀤𑀢𑁆𑀣𑀁. 𑀓𑁂𑀦 𑀉𑀤𑀓𑁂𑀦 𑀤𑀭𑀺𑀢𑀩𑁆𑀩𑁄𑀢𑀺 𑀓𑀦𑁆𑀤𑀭𑁄, 𑀉𑀤𑀓𑁂𑀦 𑀑𑀲𑀓𑁆𑀓𑀦𑁄 𑀓𑀦𑁆𑀤𑀭𑁄 𑀏𑀢𑁆𑀣𑀸𑀢𑀺 𑀑𑀲𑀓𑁆𑀓𑀦𑀓𑀦𑁆𑀤𑀭𑀁, 𑀢𑀻𑀭𑀁. 𑀑𑀲𑀓𑁆𑀓𑀦𑀓𑀦𑁆𑀤𑀭𑀪𑀽𑀢𑀜𑁆𑀘 𑀫𑀭𑀺𑀬𑀸𑀤𑀪𑀽𑀢𑀜𑁆𑀘 𑀯𑁂𑀮𑀁 𑀢𑀻𑀭𑀁 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀅𑀢𑁆𑀣𑁄. 𑀢𑀻𑀭𑀁 𑀯𑀸𑀳𑁂𑀢𑀻𑀢𑀺 𑀏𑀢𑁆𑀣 𑀯𑀳𑀥𑀸𑀢𑀼𑀬𑀸 𑀧𑀸𑀧𑀼𑀡𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀻𑀭𑀁 𑀅𑀧𑁆𑀧𑁂𑀢𑀻’’𑀢𑀺. 𑀢𑀢𑁆𑀣 𑀅𑀧𑁆𑀧𑁂𑀢𑀻𑀢𑀺 𑀧𑀸𑀧𑀼𑀡𑀸𑀧𑁂𑀢𑀺. ‘‘𑀉𑀲𑁆𑀲𑀸𑀭𑁂𑀢𑀻’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 ‘‘𑀣𑀮𑀁 𑀉𑀲𑁆𑀲𑀸𑀭𑁂𑀢𑀻’’𑀢𑀺 𑀧𑀤𑁂𑀦 ‘‘𑀢𑀻𑀭𑀁 𑀯𑀸𑀳𑁂𑀢𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀉𑀲𑁆𑀲𑀸𑀭𑁂𑀢𑀻𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀕𑀫𑀸𑀧𑁂𑀢𑀺. 𑀅𑀜𑁆𑀜𑀸𑀧𑀝𑀺𑀯𑁂𑀥𑁄𑀢𑀺 𑀏𑀢𑁆𑀣 𑀆𑀚𑀸𑀦𑀸𑀢𑀺, 𑀆𑀚𑀸𑀦𑀺𑀢𑁆𑀣𑀸𑀢𑀺 𑀯𑀸 𑀅𑀜𑁆𑀜𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀯𑀸 𑀅𑀭𑀳𑀢𑁆𑀢𑀨𑀮𑀁 𑀯𑀸, 𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀁 𑀅𑀜𑁆𑀜𑀸𑀧𑀝𑀺𑀯𑁂𑀥𑁄, 𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀁 𑀫𑀚𑁆𑀛𑁂 𑀤𑀻𑀖𑁄, 𑀅𑀜𑁆𑀜𑀸𑀧𑀝𑀺𑀯𑁂𑀥𑁄 𑀦𑀸𑀫 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀻’’𑀢𑀺.

𑁩𑁮𑁫. 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻𑀢𑀺 𑀉𑀤𑀸𑀦𑀧𑀸𑀴𑀺𑀬𑀸 𑀲𑀦𑁆𑀥𑀸𑀬𑀪𑀸𑀲𑀺𑀢𑀧𑀸𑀴𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀧𑀢𑁆𑀢𑀺’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀇𑀤𑀦𑁆𑀢𑀺 ‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀻’’𑀢𑀺 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 𑀦𑀯𑀸𑀧𑀢𑁆𑀢𑀺𑀆𑀧𑀚𑁆𑀚𑀦𑀁 𑀲𑀦𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪. 𑀧𑀸𑀢𑀺𑀫𑁄𑀓𑁆𑀔𑀲𑀯𑀦𑀸𑀭𑀳𑀓𑀣𑀸

𑁩𑁮𑁬. 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸𑀢𑀺 𑀜𑀢𑁆𑀢𑀺𑀢𑁄 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸. 𑀔𑁂𑀢𑁆𑀢𑁂𑀢𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀲𑁆𑀲 𑀔𑁂𑀢𑁆𑀢𑁂. 𑀔𑁂𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀭𑁂𑀓𑀸𑀭𑀁 𑀪𑀡𑀢𑀻𑀢𑀺 𑀙𑀢𑁆𑀢𑀺𑀁𑀲𑀢𑁆𑀬𑀓𑁆𑀔𑀭𑁂𑀲𑀼 𑀭𑁂-𑀓𑀸𑀭𑀁 𑀜𑀢𑁆𑀢𑀺𑀝𑁆𑀞𑀧𑀦𑀓𑁄 𑀪𑀡𑀢𑀺. 𑀇𑀤𑀦𑁆𑀢𑀺 𑀧𑀜𑁆𑀘𑀢𑀺𑀁𑀲𑀢𑁆𑀬𑀓𑁆𑀔𑀭𑀸𑀦𑀁 𑀉𑀘𑁆𑀘𑀸𑀭𑀡𑀝𑁆𑀞𑀸𑀦𑀁. 𑀯𑀼𑀢𑁆𑀢𑁂𑀢𑀺 𑀜𑀢𑁆𑀢𑀺𑀝𑁆𑀞𑀧𑀦𑀓𑁂𑀦 𑀯𑀼𑀢𑁆𑀢𑁂. ‘‘𑀲𑀼𑀡𑀸𑀢𑀼 𑀫𑁂’’𑀢𑀺 𑀯𑀘𑀦𑁂 𑀅𑀦𑀸𑀭𑀤𑁆𑀥𑁂𑀬𑁂𑀯𑀸𑀢𑀺 𑀬𑁄𑀚𑀦𑀸.

𑁫. 𑀥𑀫𑁆𑀫𑀺𑀓𑀸𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸

𑁩𑁮𑁭. 𑀢𑁂𑀦 𑀧𑀼𑀕𑁆𑀕𑀮𑁂𑀦𑀸𑀢𑀺 𑀢𑁂𑀦 𑀘𑀼𑀤𑀺𑀢𑀓𑁂𑀦 𑀧𑀼𑀕𑁆𑀕𑀮𑁂𑀦. 𑀲𑀸 𑀯𑀺𑀧𑀢𑁆𑀢𑀻𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀺𑀲𑀗𑁆𑀔𑀸𑀢𑀸 𑀲𑀸 𑀯𑀺𑀧𑀢𑁆𑀢𑀺. 𑀲𑀜𑁆𑀜𑀸𑀅𑀫𑀽𑀮𑀺𑀓𑀯𑀲𑁂𑀦𑀸𑀢𑀺 ‘‘𑀓𑀢𑀸’’ 𑀇𑀢𑀺 𑀲𑀜𑁆𑀜𑀸𑀬 𑀅𑀫𑀽𑀮𑀺𑀓𑀯𑀲𑁂𑀦. 𑀓𑀢𑀜𑁆𑀘𑀸𑀢𑀺 𑀏𑀓𑀦𑁆𑀢𑁂𑀦 𑀓𑀢𑀜𑁆𑀘. 𑀅𑀓𑀢𑀜𑁆𑀘𑀸𑀢𑀺 𑀏𑀓𑀦𑁆𑀢𑁂𑀦 𑀅𑀓𑀢𑀜𑁆𑀘.

𑀓𑁄𑀧𑁂𑀢𑀼𑀓𑀸𑀫𑀢𑀸𑀬 𑀦𑁂𑀯 𑀆𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀅𑀦𑀸𑀕𑀫𑀦𑀸𑀤𑀺𑀓𑀸𑀭𑀡𑁂𑀦. 𑀆𑀧𑀚𑁆𑀚𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁄 𑀆𑀧𑀚𑁆𑀚𑀢𑀺. 𑀇𑀘𑁆𑀘𑀲𑁆𑀲𑀸𑀧𑀻𑀢𑀺 𑀇𑀢𑀺 𑀏𑀯𑀁 𑀅𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀲𑁆𑀲𑀸𑀧𑀺. 𑀧𑀘𑁆𑀘𑀸𑀤𑀺𑀬𑀢𑀻𑀢𑀺 𑀧𑀢𑀺 𑀆𑀤𑀺𑀬𑀢𑀺, ‘‘𑀅𑀓𑀢𑀁 𑀓𑀫𑁆𑀫𑀁, 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀦 𑀆𑀤𑀻𑀬𑀢𑀺, 𑀧𑀼𑀦 𑀆𑀭𑀪𑀢𑀻𑀢𑀺 𑀅𑀢𑁆𑀣𑁄.

𑁬. 𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸

𑁩𑁮𑁮. 𑀫𑀕𑁆𑀕𑀧𑀝𑀺𑀧𑀸𑀤𑀦𑀸𑀤𑀻𑀲𑀽𑀢𑀺 𑀫𑀕𑁆𑀕𑀲𑁆𑀫𑀺𑀁 𑀧𑀝𑀺𑀧𑀸𑀤𑀦𑀸𑀤𑀻𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀅𑀯𑀳𑀸𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀓𑀸𑀭𑀸𑀤𑀺𑀲𑀜𑁆𑀜𑀸𑀢𑀺 𑀆𑀓𑀸𑀭𑀲𑀜𑁆𑀜𑀸 𑀮𑀺𑀗𑁆𑀕𑀲𑀜𑁆𑀜𑀸 𑀦𑀺𑀫𑀺𑀢𑁆𑀢𑀲𑀜𑁆𑀜𑀸. 𑀢𑀦𑁆𑀢𑀺 𑀧𑀭𑀺𑀲𑀗𑁆𑀓𑀁 𑀲𑀦𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁭. 𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀓𑀣𑀸

𑁩𑁯𑁮. 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦𑀸𑀢𑀺 𑀏𑀢𑁆𑀣 𑀓𑀺𑀁 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀆𑀳 ‘‘𑀲𑀸𑀲𑀦𑀁 𑀲𑁄𑀥𑁂𑀢𑀼𑀓𑀸𑀫𑁄’’𑀢𑀺𑀆𑀤𑀺. 𑀇𑀫𑀺𑀦𑀸 𑀧𑀭𑀁 𑀘𑁄𑀤𑁂𑀢𑀼𑀁 𑀅𑀢𑁆𑀢𑀦𑀸 𑀆𑀤𑀸𑀢𑀩𑁆𑀩𑀁 𑀅𑀥𑀺𑀓𑀭𑀡𑀁 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀓𑀸𑀮𑁄 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀦𑁆𑀢𑀺 𑀏𑀢𑁆𑀣 𑀅𑀓𑀸𑀮𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀸𑀚𑀪𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀯𑀲𑁆𑀲𑀸𑀭𑀢𑁆𑀢𑁄𑀢𑀺 𑀯𑀲𑁆𑀲𑀓𑀸𑀮𑁄. 𑀲𑁄 𑀳𑀺 𑀯𑀲𑁆𑀲𑁄 𑀅𑀢𑀺𑀯𑀺𑀬 𑀭𑀜𑁆𑀚𑀢𑀺 𑀏𑀢𑁆𑀣 𑀓𑀸𑀮𑁂𑀢𑀺 𑀯𑀲𑁆𑀲𑀸𑀭𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀲𑁆𑀲𑀸𑀭𑀢𑁆𑀢𑁄𑀧𑀺 𑀅𑀥𑀺𑀓𑀭𑀡𑀯𑀽𑀧𑀲𑀫𑀢𑁆𑀣𑀁 𑀮𑀚𑁆𑀚𑀺𑀧𑀭𑀺𑀲𑀸𑀬 𑀤𑀽𑀭𑀢𑁄 𑀆𑀦𑀬𑀦𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀅𑀓𑀸𑀮𑁄 𑀦𑀸𑀫. 𑀇𑀢𑀻𑀢𑀺 𑀅𑀬𑀁 𑀭𑀸𑀚𑀪𑀬𑀸𑀤𑀺𑀓𑀸𑀮𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀭𑀻𑀢𑁄𑀢𑀺 𑀭𑀸𑀚𑀪𑀬𑀸𑀤𑀻𑀦𑀁 𑀅𑀪𑀸𑀯𑀓𑀸𑀮𑁄.

𑀅𑀪𑀽𑀢𑀁 𑀇𑀤𑀁 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀅𑀪𑀽𑀢𑀲𑀤𑁆𑀤𑁄 𑀅𑀯𑀺𑀚𑁆𑀚𑀫𑀸𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀲𑀦𑁆𑀢𑀫𑀺𑀤’’𑀦𑁆𑀢𑀺, 𑀇𑀤𑀁 𑀅𑀢𑁆𑀢𑀸𑀤𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀬𑀸 𑀕𑀳𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀻𑀮𑀯𑀸 𑀧𑀼𑀕𑁆𑀕𑀮𑁄𑀢𑀺 𑀬𑁄𑀚𑀦𑀸. 𑀬𑀦𑁆𑀢𑀺 𑀅𑀢𑁆𑀢𑀸𑀤𑀸𑀦𑀁 𑀲𑀁𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀦𑁆𑀢𑀺 𑀅𑀢𑁆𑀢𑀸𑀤𑀸𑀦𑀁.

𑀦 𑀮𑀪𑀺𑀲𑁆𑀲𑀸𑀫𑀺 𑀲𑀦𑁆𑀤𑀺𑀝𑁆𑀞𑁂, 𑀮𑀪𑀺𑀲𑁆𑀲𑀸𑀫𑀺 𑀲𑀦𑁆𑀤𑀺𑀝𑁆𑀞𑁂𑀢𑀺 𑀏𑀢𑁆𑀣 ‘‘𑀦 𑀮𑀪𑀺𑀲𑁆𑀲𑀸𑀫𑀺, 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀓𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀧𑁆𑀧𑁂𑀓𑀤𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀧𑁆𑀧𑁂𑀓𑀤𑀸𑀢𑀺 𑀅𑀧𑀺 𑀏𑀓𑀤𑀸. 𑀳𑀺𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀏𑀯𑀭𑀽𑀧𑀸𑀢𑀺 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀲𑀪𑀸𑀯𑀸. 𑀢𑀦𑁆𑀢𑀺 𑀉𑀧𑀢𑁆𑀣𑀫𑁆𑀪𑀓𑀪𑀺𑀓𑁆𑀔𑀼𑀮𑀪𑀦𑀁 𑀲𑀦𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀓𑁄𑀲𑀫𑁆𑀩𑀓𑀸𑀦𑀁 𑀪𑀡𑁆𑀟𑀦𑀸𑀤𑀺 𑀪𑀯𑀢𑀺 𑀯𑀺𑀬 𑀪𑀡𑁆𑀟𑀦𑀸𑀤𑀺 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀧𑀘𑁆𑀙𑀸𑀧𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀓𑁂𑀲𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀁 𑀪𑀯𑀢𑀺 𑀯𑀺𑀬 𑀧𑀜𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑀸𑀕𑀢𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀬𑀢𑁄 𑀧𑀘𑁆𑀙𑀸𑀧𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀁 𑀪𑀯𑀢𑀻𑀢𑀺 𑀆𑀳 ‘‘𑀲𑀼𑀪𑀤𑁆𑀤𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀦𑁆𑀢𑀺 𑀧𑀜𑁆𑀘𑀲𑀢𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀓𑀢𑁆𑀢𑀩𑁆𑀩𑀁 𑀲𑀗𑁆𑀕𑀻𑀢𑀺𑀁. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀧𑀘𑁆𑀙𑀸 𑀲𑀫𑀦𑀼𑀲𑁆𑀲𑀭𑀡𑀓𑀭𑀁 𑀳𑁄𑀢𑀺 𑀇𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑀦𑀼𑀲𑁆𑀲𑀭𑀡𑀓𑀭𑀦𑁆𑀢𑀺 𑀲𑀫𑁆𑀫𑁄𑀤𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀲𑁆𑀲𑀭𑀡𑀲𑁆𑀲 𑀓𑀭𑀁. 𑀇𑀫𑀺𑀦𑀸 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀸𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀲𑀦𑀲𑁆𑀲 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀸𑀲𑀦𑀲𑁆𑀲 𑀘 𑀲𑀲𑁆𑀲𑀺𑀭𑀺𑀓𑀢𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀕𑀢𑀉𑀧𑀓𑁆𑀓𑀺𑀮𑁂𑀲𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀯𑀺𑀬 𑀲𑀸𑀲𑀦𑀲𑁆𑀲 𑀘 𑀲𑀲𑁆𑀲𑀺𑀭𑀺𑀓𑀢𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮. 𑀘𑁄𑀤𑀓𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀓𑀣𑀸

𑁩𑁯𑁯. ‘‘𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦𑀸’’𑀢𑀺𑀆𑀤𑀻𑀲𑀼 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀙𑀺𑀤𑁆𑀤𑀲𑀧𑁆𑀧𑀝𑀺𑀫𑀁𑀲𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀧𑀭𑀻𑀢𑀯𑀲𑁂𑀦 𑀅𑀘𑁆𑀙𑀺𑀤𑁆𑀤𑀅𑀧𑁆𑀧𑀝𑀺𑀫𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁂𑀦 𑀓𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀺𑀚𑁆𑀚𑀢𑀻𑀢𑀺 𑀙𑀺𑀤𑁆𑀤𑁄, 𑀧𑀝𑀺 𑀧𑀼𑀦𑀧𑁆𑀧𑀼𑀦𑀁 𑀫𑀲𑀺𑀬𑀢𑀺 𑀆𑀫𑀲𑀺𑀬𑀢𑀻𑀢𑀺 𑀧𑀝𑀺𑀫𑀁𑀲𑁄, 𑀦𑀺𑀕𑁆𑀕𑀳𑀺𑀢𑀸𑀕𑀫𑁄, 𑀪𑀸𑀯𑀧𑁆𑀧𑀥𑀸𑀦𑁄𑀬𑀁 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀲𑀳 𑀧𑀝𑀺𑀫𑀁𑀲𑁂𑀦𑀸𑀢𑀺 𑀲𑀧𑁆𑀧𑀝𑀺𑀫𑀁𑀲𑁄, 𑀓𑀸𑀬𑀲𑀫𑀸𑀘𑀸𑀭𑁄. 𑀯𑀺𑀧𑀭𑀻𑀢𑁄𑀢𑀺 𑀯𑀺𑀧𑀭𑀺𑀯𑀢𑁆𑀢𑀯𑀲𑁂𑀦 𑀇𑀢𑁄 𑀧𑀯𑀢𑁆𑀢𑁄, 𑀓𑀸𑀬𑀲𑀫𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀫𑀽𑀮𑀓𑀸𑀦𑀼𑀤𑁆𑀥𑀁𑀲𑀦𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺.

𑀫𑁂𑀢𑁆𑀢𑀁 𑀦𑀼 𑀔𑁄 𑀫𑁂 𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀧𑁆𑀧𑀦𑀸𑀪𑀸𑀯𑀧𑁆𑀧𑀢𑁆𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀮𑀺𑀩𑁄𑀥𑁂𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑀸𑀤𑀺𑀓𑁂 𑀧𑀮𑀺𑀩𑁄𑀥𑁂. ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀳𑀢𑀸𑀖𑀸𑀢’’𑀦𑁆𑀢𑀺 𑀇𑀫𑀺𑀦𑀸 𑀅𑀧𑁆𑀧𑀦𑀸𑀪𑀸𑀯𑀧𑁆𑀧𑀢𑁆𑀢𑀁 𑀫𑁂𑀢𑁆𑀢𑀘𑀺𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀇𑀤𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀏𑀢𑁆𑀣 𑀇𑀤𑀁𑀲𑀤𑁆𑀤𑀓𑀺𑀁𑀲𑀤𑁆𑀤𑀸𑀦𑀁 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀓𑀢𑀭𑀲𑁆𑀫𑀺𑀁 𑀦𑀕𑀭𑁂’’𑀢𑀺.

𑁯. 𑀘𑁄𑀤𑀓𑁂𑀦 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀓𑀣𑀸

𑁪𑁦𑁦. ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀻𑀲𑀼 𑀘𑁄𑀤𑀦𑀸𑀬 𑀓𑀸𑀮𑀅𑀓𑀸𑀮𑀸𑀤𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑁄 𑀏𑀓’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀏𑀓𑁄𑀢𑀺 𑀏𑀓𑀓𑁄 𑀘𑁄𑀤𑀓𑁄. 𑀏𑀓𑀦𑁆𑀢𑀺 𑀏𑀓𑀓𑀁 𑀘𑀼𑀤𑀺𑀢𑀓𑀁. 𑀲𑀗𑁆𑀖𑀫𑀚𑁆𑀛…𑀧𑁂… 𑀅𑀲𑀦𑀲𑀸𑀮𑀸𑀤𑀻𑀲𑀼 𑀯𑀸 𑀧𑀭𑀺𑀯𑀸𑀭𑀺𑀢𑀓𑁆𑀔𑀡𑁂 𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀲𑀗𑁆𑀖𑀫𑀚𑁆𑀛…𑀧𑁂… 𑀅𑀲𑀦𑀲𑀸𑀮𑀸𑀤𑀻𑀲𑀽’’𑀢𑀺 𑀇𑀫𑀺𑀦𑀸 𑀞𑀸𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, ‘‘𑀉𑀧𑀝𑁆𑀞𑀸𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑀓𑁆𑀔𑀡𑁂’’𑀢𑀺 𑀇𑀫𑀺𑀦𑀸 𑀓𑀸𑀮𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀫𑁂𑀳𑀺 𑀧𑀤𑁂𑀳𑀺 𑀞𑀸𑀦𑀫𑁆𑀧𑀺 𑀓𑀸𑀮𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀘𑁆𑀙𑁂𑀦𑀸𑀢𑀺 𑀲𑀘𑁆𑀘𑁂𑀦. 𑀳𑀫𑁆𑀪𑁄𑀢𑀺 𑀦𑀺𑀧𑀸𑀢𑁄 𑀧𑀘𑁆𑀙𑀺𑀫𑀧𑀤𑁂𑀲𑀼 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀳𑀫𑁆𑀪𑁄 𑀫𑀳𑀮𑁆𑀮𑀓, 𑀳𑀫𑁆𑀪𑁄 𑀧𑀭𑀺𑀲𑀸𑀯𑀘𑀭, 𑀳𑀫𑁆𑀪𑁄 𑀧𑀁𑀲𑀼𑀓𑀽𑀮𑀺𑀓, 𑀳𑀫𑁆𑀪𑁄 𑀥𑀫𑁆𑀫𑀓𑀣𑀺𑀓𑀸𑀢𑀺 𑀳𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀓𑀫𑁆𑀫𑀁. 𑀓𑀸𑀭𑀡𑀦𑀺𑀲𑁆𑀲𑀺𑀢𑀦𑁆𑀢𑀺 𑀫𑀳𑀮𑁆𑀮𑀓𑀪𑀸𑀯𑀓𑀸𑀭𑀡𑀸𑀤𑀻𑀲𑀼 𑀦𑀺𑀲𑁆𑀲𑀺𑀢𑀁. ‘‘𑀪𑀦𑁆𑀢𑁂’’𑀢𑀺 𑀦𑀺𑀧𑀸𑀢𑁄𑀧𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀏𑀢𑁆𑀣 𑀘 ‘‘𑀳𑀫𑁆𑀪𑁄’’𑀢𑀺 𑀦𑀺𑀧𑀸𑀢𑁂𑀦 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀅𑀦𑀸𑀤𑀭𑀲𑁆𑀲 𑀧𑀓𑀸𑀲𑀓𑀢𑁆𑀢𑀸 𑀨𑀭𑀼𑀲𑁂𑀦 𑀯𑀤𑀢𑀺 𑀦𑀸𑀫, ‘‘𑀪𑀦𑁆𑀢𑁂’’𑀢𑀺 𑀦𑀺𑀧𑀸𑀢𑁂𑀦 𑀲𑀸𑀤𑀭𑀲𑁆𑀲 𑀧𑀓𑀸𑀲𑀓𑀢𑁆𑀢𑀸 𑀲𑀡𑁆𑀳𑁂𑀦 𑀯𑀤𑀢𑀺 𑀦𑀸𑀫. 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸𑀢𑀺 𑀇𑀫𑀲𑁆𑀫𑀺𑀁 𑀯𑀻𑀢𑀺𑀓𑁆𑀓𑀫𑁂 𑀅𑀬𑀁 𑀦𑀸𑀫 𑀤𑁄𑀲𑁄𑀢𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸. ‘‘𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀫𑁂𑀢𑁆𑀢𑀘𑀺𑀢𑁆𑀢𑁄𑀢𑀺 𑀧𑀤𑀲𑁆𑀲 ‘‘𑀯𑀓𑁆𑀔𑀸𑀫𑀻’’𑀢𑀺 𑀧𑀤𑁂 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑀏𑀢𑁆𑀣 𑀅𑀦𑁆𑀢𑀭𑀲𑀤𑁆𑀤𑀲𑁆𑀲 𑀘𑀺𑀢𑁆𑀢𑀯𑀸𑀘𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀤𑀼𑀝𑁆𑀞𑀘𑀺𑀢𑁆𑀢𑁄’’𑀢𑀺. ‘‘𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁧𑁦. 𑀘𑁄𑀤𑀓𑀘𑀼𑀤𑀺𑀢𑀓𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸

𑁪𑁦𑁧. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀢𑁆𑀢𑀲𑀤𑁆𑀤𑀲𑁆𑀲 𑀘𑀺𑀢𑁆𑀢𑀯𑀸𑀘𑀓𑀪𑀸𑀯𑀜𑁆𑀘 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀸𑀧𑀺 𑀅𑀫𑀸𑀤𑁂𑀲𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀘𑀺𑀢𑁆𑀢𑁂’’𑀢𑀺. 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 ‘‘𑀫𑀦𑀲𑀺𑀓𑀭𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀸𑀭𑀼𑀜𑁆𑀜𑀢𑀸𑀢𑀺 𑀏𑀢𑁆𑀣 𑀤𑁆𑀯𑀻𑀲𑀼 𑀡𑁆𑀬𑀧𑀘𑁆𑀘𑀬𑀢𑀸𑀧𑀘𑁆𑀘𑀬𑁂𑀲𑀼 𑀏𑀓𑀲𑁆𑀲𑁂𑀯 𑀪𑀸𑀯𑀯𑀸𑀘𑀓𑀢𑁆𑀢𑀸 𑀏𑀓𑁄 𑀲𑁆𑀯𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀭𑀼𑀡𑀪𑀸𑀯𑁄’’𑀢𑀺. 𑀢𑀢𑁆𑀣 𑀓𑀭𑀼𑀡𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀸𑀯𑁄 𑀓𑀸𑀭𑀼𑀜𑁆𑀜𑀁, 𑀢𑀤𑁂𑀯 𑀓𑀸𑀭𑀼𑀜𑁆𑀜𑀢𑀸. 𑀅𑀣 𑀯𑀸 𑀓𑀭𑀼𑀡𑁄 𑀏𑀯 𑀧𑀼𑀕𑁆𑀕𑀮𑁄 𑀓𑀸𑀭𑀼𑀜𑁆𑀜𑀁, 𑀢𑀲𑁆𑀲 𑀪𑀸𑀯𑁄 𑀓𑀸𑀭𑀼𑀜𑁆𑀜𑀢𑀸𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀇𑀫𑀺𑀦𑀸𑀢𑀺 ‘‘𑀓𑀸𑀭𑀼𑀜𑁆𑀜𑀢𑀸’’𑀢𑀺 𑀧𑀤𑁂𑀦. 𑀓𑀭𑀼𑀡𑀜𑁆𑀘𑀸𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀁 𑀓𑀭𑀼𑀡𑀜𑁆𑀘. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀜𑁆𑀘𑀸𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀸𑀬 𑀓𑀭𑀼𑀡𑀸𑀬 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀓𑀫𑁆𑀫𑀽𑀧𑀘𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀓𑀸𑀫𑀸𑀯𑀘𑀭𑀓𑀭𑀼𑀡𑀜𑁆𑀘. 𑀤𑁆𑀯𑀻𑀳𑀺𑀧𑀻𑀢𑀺 ‘‘𑀳𑀺𑀢𑁂𑀲𑀺𑀢𑀸, 𑀅𑀦𑀼𑀓𑀫𑁆𑀧𑀺𑀢𑀸’’𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺. 𑀫𑁂𑀢𑁆𑀢𑀜𑁆𑀘𑀸𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀫𑁂𑀢𑁆𑀢𑀜𑁆𑀘. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀜𑁆𑀘𑀸𑀢𑀺 𑀅𑀧𑁆𑀧𑀦𑀸𑀧𑀢𑁆𑀢𑀸𑀬 𑀫𑁂𑀢𑁆𑀢𑀸𑀬 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀓𑀫𑁆𑀫𑀽𑀧𑀘𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀓𑀸𑀫𑀸𑀯𑀘𑀭𑀫𑁂𑀢𑁆𑀢𑀜𑁆𑀘. 𑀲𑀼𑀤𑁆𑀥𑀦𑁆𑀢𑁂𑀢𑀺 𑀲𑀼𑀤𑁆𑀥𑁂 𑀓𑁄𑀝𑁆𑀞𑀸𑀲𑁂. 𑀧𑀝𑀺𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀘𑀼𑀤𑀺𑀢𑀓𑀁 𑀧𑀝𑀺𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸. 𑀬𑁂 𑀏𑀢𑁂𑀢𑀺 ‘‘𑀓𑀸𑀭𑀼𑀜𑁆𑀜𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁂 𑀏𑀢𑁂 𑀧𑀜𑁆𑀘 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂𑀢𑀺 𑀏𑀢𑁆𑀣 𑀇𑀫𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺 𑀏𑀢𑁆𑀣 𑀲𑀘𑁆𑀘𑀲𑀤𑁆𑀤𑀲𑁆𑀲 𑀯𑀺𑀭𑀢𑀺𑀲𑀘𑁆𑀘𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀯𑀘𑀻𑀲𑀘𑁆𑀘𑁂 𑀘𑀸’’𑀢𑀺. ‘‘𑀅𑀓𑀼𑀧𑁆𑀧𑀦𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀦𑀓𑀼𑀧𑀲𑁆𑀲 𑀪𑀸𑀯𑁄 𑀅𑀓𑀼𑀧𑁆𑀧𑀦𑁆𑀢𑀺 𑀓𑀢𑁆𑀯𑀸 𑀡𑁆𑀬𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀯𑀺𑀢𑁆𑀣𑀸𑀭𑁄 𑀯𑀸. 𑀦 𑀧𑀭𑁄 𑀖𑀝𑁆𑀝𑁂𑀢𑀩𑁆𑀩𑁄𑀢𑀺 𑀦 𑀧𑀭𑁄 𑀓𑀼𑀚𑁆𑀛𑀸𑀧𑁂𑀢𑀩𑁆𑀩𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.