𑁧𑁦. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀁

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸

𑁪𑁦𑁨. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 𑀓𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀘𑁄𑀤𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑀸 𑀆𑀪𑁄𑀕𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀦𑀽’’𑀢𑀺𑀆𑀤𑀺. ‘‘𑀓𑀸𑀫’’𑀦𑁆𑀢𑀺𑀆𑀤𑀺𑀦𑀸 𑀅𑀪𑁆𑀬𑀽𑀧𑀕𑀫𑀧𑀭𑀺𑀳𑀸𑀭𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀢𑁆𑀣 𑀓𑀸𑀫𑀁𑀲𑀤𑁆𑀤𑁄 𑀅𑀦𑀼𑀕𑁆𑀕𑀳𑀢𑁆𑀣𑁄, 𑀧𑀦 𑀲𑀤𑁆𑀤𑁄 𑀕𑀭𑀳𑀢𑁆𑀣𑁄, 𑀧𑀦 𑀢𑀣𑀸𑀧𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁. 𑀬𑀸𑀘𑀺𑀢𑁂𑀦 𑀳𑀼𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀬𑁄𑀚𑀦𑀸. 𑀅𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀸. 𑀪𑀤𑁆𑀤𑀓𑀁 𑀓𑀢𑁆𑀯𑀸𑀢𑀺 𑀮𑀤𑁆𑀥𑀓𑀁 𑀓𑀢𑁆𑀯𑀸, 𑀫𑀦𑀸𑀧𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁪𑁦𑁩. 𑀓𑀼𑀫𑁆𑀪𑀣𑁂𑀦𑀓𑁂𑀳𑀻𑀢𑀺 𑀏𑀢𑁆𑀣 𑀓𑀼𑀫𑁆𑀪𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑁂𑀦𑀸𑀮𑁄𑀓𑁂𑀦 𑀣𑁂𑀦𑁂𑀦𑁆𑀢𑀻𑀢𑀺 𑀓𑀼𑀫𑁆𑀪𑀣𑁂𑀦𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀼𑀫𑁆𑀪𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸’’𑀢𑀺𑀆𑀤𑀺.

𑀦𑀸𑀴𑀺𑀫𑀚𑁆𑀛𑀕𑀢𑀦𑁆𑀢𑀺 𑀲𑀲𑁆𑀲𑀦𑀸𑀴𑀲𑁆𑀲 𑀫𑀚𑁆𑀛𑁂 𑀕𑀢𑀁. 𑀕𑀡𑁆𑀞𑀺𑀦𑁆𑀢𑀺 𑀨𑀴𑀼𑀁. ‘‘𑀓𑀡𑁆𑀟’’𑀦𑁆𑀢𑀺𑀧𑀺 𑀧𑀸𑀞𑁄, 𑀤𑀡𑁆𑀟𑀦𑁆𑀢𑀺 𑀅𑀢𑁆𑀣𑁄. 𑀬𑁂𑀦𑀸𑀢𑀺 𑀧𑀸𑀡𑀓𑁂𑀦. 𑀅𑀬𑀜𑁆𑀳𑀺 𑀬𑀁𑀲𑀤𑁆𑀤𑁄 𑀢𑀁𑀲𑀤𑁆𑀤𑀸𑀦𑀧𑁂𑀓𑁆𑀔𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀦𑁆𑀢𑁄𑀭𑀢𑁆𑀢𑀪𑀸𑀯𑁄𑀢𑀺 𑀅𑀦𑁆𑀢𑁄𑀮𑁄𑀳𑀺𑀢𑀪𑀸𑀯𑁄. 𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀁 𑀯𑀓𑁆𑀔𑀫𑀸𑀦𑀁 𑀅𑀢𑁆𑀣𑀁. 𑀆𑀴𑀺𑀬𑀸𑀢𑀺 𑀆𑀯𑀭𑀡𑀸𑀬. 𑀅𑀩𑀤𑁆𑀥𑀸𑀬𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀦𑀼𑀕𑁆𑀕𑀳𑀢𑁆𑀣𑁄, 𑀩𑀤𑁆𑀥𑀸𑀬 𑀧𑀦 𑀧𑀕𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀁. 𑀬𑀦𑁆𑀢𑀺 𑀉𑀤𑀓𑀁. 𑀢𑀫𑁆𑀧𑀻𑀢𑀺 𑀉𑀤𑀓𑀫𑁆𑀧𑀺. 𑀧𑀺𑀲𑀤𑁆𑀤𑁄 𑀅𑀩𑀤𑁆𑀥𑀸𑀬 𑀞𑀺𑀢𑀁 𑀓𑀺𑀜𑁆𑀘𑀺 𑀉𑀤𑀓𑀁 𑀅𑀧𑁂𑀓𑁆𑀔𑀢𑀺. 𑀬𑁂 𑀇𑀫𑁂 𑀕𑀭𑀼𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀧𑀝𑀺𑀓𑀘𑁆𑀘𑁂𑀯𑀸𑀢𑀺 𑀧𑀕𑁂𑀯, 𑀧𑀞𑀫𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀽𑀢𑀺 𑀕𑀭𑀼𑀥𑀫𑁆𑀫𑁂𑀲𑀼. 𑀅𑀧𑀜𑁆𑀜𑀢𑁆𑀢𑁂𑀲𑀼 𑀲𑀦𑁆𑀢𑁂𑀲𑀼𑀧𑀻𑀢𑀺 𑀬𑁄𑀚𑀦𑀸. 𑀧𑀞𑀫𑀁 𑀯𑀼𑀢𑁆𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀞𑀲𑁆𑀲𑀢𑀺 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀲𑁆𑀲𑀲𑀳𑀲𑁆𑀲’’𑀦𑁆𑀢𑀺 𑀘 𑀏𑀢𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀯𑀲𑁆𑀲𑀲𑀳𑀲𑁆𑀲𑀢𑁄. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀁 𑀅𑀧𑁂𑀓𑁆𑀔𑀢𑀺. 𑀤𑁆𑀯𑀻𑀲𑀼 𑀲𑀤𑁆𑀥𑀫𑁆𑀫𑁂𑀲𑀼 𑀞𑀺𑀢𑁂𑀲𑀼 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀞𑀺𑀢𑁄𑀬𑁂𑀯𑀸𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀁. 𑀢𑀸𑀦𑀺𑀬𑁂𑀯𑀸𑀢𑀺 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺𑀬𑁂𑀯. 𑀧𑀭𑀺𑀬𑀢𑁆𑀢𑀺𑀬𑀸 𑀲𑀢𑀺 𑀧𑀝𑀺𑀯𑁂𑀥𑁄 𑀦 𑀳𑁄𑀢𑀻𑀢𑀺 𑀦𑀸𑀧𑀺 𑀯𑀢𑁆𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀮𑀺𑀗𑁆𑀕𑀦𑁆𑀢𑀺 𑀲𑀫𑀡𑀯𑁂𑀲𑀁, 𑀲𑀫𑀡𑀸𑀓𑀸𑀭𑀦𑁆𑀢𑀺 𑀅𑀢𑁆𑀣𑁄.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀓𑀣𑀸

𑁪𑁦𑁪. 𑀇𑀫𑀸𑀬 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀫𑀳𑀸𑀧𑀚𑀸𑀧𑀢𑀺𑀬𑀸 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀁 𑀉𑀧𑀦𑀺𑀥𑀸𑀬 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀢𑀸𑀬 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀬𑁄 𑀓𑀢𑁆𑀯𑀸𑀢𑀺 𑀫𑀳𑀸𑀧𑀚𑀸𑀧𑀢𑀺𑀁 𑀉𑀧𑀚𑁆𑀛𑀁 𑀓𑀢𑁆𑀯𑀸 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀢𑀲𑁆𑀲𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀬𑁄 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀢𑀲𑁆𑀫𑀸 𑀅𑀳𑁂𑀲𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀑𑀯𑀸𑀤𑁂𑀦𑀸𑀢𑀺 𑀪𑀕𑀯𑀢𑁄 𑀇𑀫𑀺𑀦𑀸 𑀑𑀯𑀸𑀤𑁂𑀦.

𑁪𑁧𑁦. 𑀏𑀢𑀺𑀲𑁆𑀲𑀸𑀢𑀺 𑀏𑀢𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸. 𑀢𑀦𑁆𑀢𑀺 𑀓𑀫𑁆𑀫𑀁. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀜𑁆𑀜𑀲𑁆𑀫𑀺𑀁 𑀓𑀫𑁆𑀫𑁂. 𑀅𑀜𑁆𑀜𑀦𑁆𑀢𑀺 𑀭𑁄𑀧𑀺𑀢𑀩𑁆𑀩𑀓𑀫𑁆𑀫𑀢𑁄 𑀅𑀜𑁆𑀜𑀁 𑀓𑀫𑁆𑀫𑀁.

𑁪𑁧𑁧. 𑀓𑀤𑁆𑀤𑀫𑁄𑀤𑀓𑁂𑀦𑀸𑀢𑀺 𑀓𑀤𑁆𑀤𑀫𑁂𑀦 𑀆𑀮𑀼𑀴𑀺𑀢𑁂𑀦 𑀉𑀤𑀓𑁂𑀦𑁂𑀯. 𑀓𑀤𑁆𑀤𑀫𑀸𑀤𑀻𑀲𑀼𑀧𑀻𑀢𑀺 𑀧𑀻𑀲𑀤𑁆𑀤𑁄 ‘‘𑀬𑁂𑀦 𑀓𑁂𑀦𑀘𑀻’’𑀢𑀺 𑀏𑀢𑁆𑀣 𑀬𑁄𑀚𑁂𑀢𑀩𑁆𑀩𑁄. 𑀬𑁂𑀦 𑀓𑁂𑀦𑀘𑀺𑀧𑀻𑀢𑀺 𑀳𑀺 𑀅𑀢𑁆𑀣𑁄. 𑀲𑀦𑁆𑀦𑀺𑀧𑀢𑀺𑀢𑁆𑀯𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀅𑀧𑀲𑀸𑀤𑀦𑀻𑀬𑀦𑁆𑀢𑀺 𑀅𑀧𑀲𑀸𑀤𑁂𑀢𑀩𑁆𑀩𑀁 𑀓𑀫𑁆𑀫𑀁. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀲𑀸𑀯𑀦𑀫𑀢𑁆𑀢𑁂𑀦. 𑀅𑀯𑀦𑁆𑀤𑀺𑀬𑁄𑀢𑀺 𑀦 𑀯𑀦𑁆𑀤𑁂𑀢𑀩𑁆𑀩𑁄, 𑀯𑀦𑁆𑀤𑀺𑀢𑀼𑀁 𑀦 𑀅𑀭𑀳𑁄𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑀩𑁆𑀩𑀢𑁄. 𑀦 𑀯𑀦𑁆𑀤𑀦𑁆𑀢𑀻𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀯𑀦𑁆𑀤𑀦𑁆𑀢𑀺. 𑀤𑀺𑀲𑁆𑀯𑀸𑀧𑀻𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸𑀧𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀅𑀧𑀲𑀸𑀤𑀦𑀻𑀬𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸, 𑀔𑀫𑀸𑀧𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀳𑀸𑀭𑁂𑀬𑁂𑀯𑀸𑀢𑀺 𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑁂𑀬𑁂𑀯. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁂𑀦 𑀪𑀺𑀓𑁆𑀔𑀼𑀦𑀸, 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀯𑀢𑁆𑀢𑀩𑁆𑀩𑀓𑀸𑀮𑀢𑁄. 𑀲𑁄𑀢𑀺 𑀅𑀧𑀲𑀸𑀤𑀦𑀻𑀬𑀁 𑀤𑀲𑁆𑀲𑁂𑀦𑁆𑀢𑁄 𑀪𑀺𑀓𑁆𑀔𑀼. 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂. 𑀓𑀫𑁆𑀫𑀯𑀺𑀪𑀗𑁆𑀕𑁂𑀢𑀺 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀸𑀦𑀁 𑀯𑀺𑀪𑀗𑁆𑀕𑀝𑁆𑀞𑀸𑀦𑁂 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬).

𑀑𑀪𑀸𑀲𑀦𑁆𑀢𑀻𑀢𑀺 𑀅𑀯 𑀳𑀻𑀦𑁂𑀦 𑀪𑀸𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀤𑁆𑀥𑀫𑁆𑀫𑁂𑀦 𑀑𑀪𑀸𑀲𑀦𑁆𑀢𑀻’’𑀢𑀺. ‘‘𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀓𑀫𑁆𑀫𑀓𑀭𑀡𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑀺𑀲𑁂 𑀅𑀲𑀤𑁆𑀥𑀫𑁆𑀫𑁂𑀦𑀸’’𑀢𑀺. 𑀏𑀢𑁆𑀣 ‘‘𑀧𑀼𑀭𑀺𑀲𑁂’’𑀢𑀺 𑀇𑀫𑀺𑀦𑀸 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺, ‘‘𑀅𑀲𑀤𑁆𑀥𑀫𑁆𑀫𑁂𑀦𑀸’’𑀢𑀺 𑀇𑀫𑀺𑀦𑀸 𑀓𑀭𑀡𑀁. 𑀯𑀺𑀳𑀸𑀭𑀧𑁆𑀧𑀯𑁂𑀲𑀦𑁂𑀢𑀺 𑀪𑀺𑀓𑁆𑀔𑀽𑀦𑀁 𑀯𑀺𑀳𑀸𑀭𑀧𑁆𑀧𑀯𑁂𑀲𑀦𑁂. 𑀑𑀯𑀸𑀤𑀁 𑀞𑀧𑁂𑀢𑀼𑀦𑁆𑀢𑀺 𑀏𑀢𑁆𑀣 𑀑𑀯𑀸𑀤𑀝𑁆𑀞𑀧𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬’’𑀦𑁆𑀢𑀺𑀆𑀤𑀺. 𑀑𑀯𑀸𑀤𑀢𑁆𑀣𑀸𑀬𑀸𑀢𑀺 𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀢𑁆𑀣𑀸𑀬. 𑀫𑀸 𑀓𑀭𑀺𑀢𑁆𑀣𑀸𑀢𑀺 𑀫𑀸 𑀓𑀭𑁂𑀬𑁆𑀬𑀸𑀣.

𑁪𑁧𑁬. 𑀕𑀺𑀳𑀺𑀤𑀸𑀭𑀺𑀓𑀸𑀬𑁄𑀢𑀺 𑀕𑀺𑀳𑀺𑀪𑀽𑀢𑀸 𑀤𑀸𑀭𑀺𑀓𑀸𑀬𑁄 𑀩𑀦𑁆𑀥𑀦𑁆𑀢𑀺 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀖𑀦𑀧𑀝𑁆𑀝𑀓𑁂𑀦𑀸𑀢𑀺 𑀖𑀦𑀪𑀽𑀢𑁂𑀦 𑀧𑀝𑁆𑀝𑁂𑀦 𑀦𑀺𑀬𑀼𑀢𑁆𑀢𑁂𑀦. 𑀏𑀓𑀧𑀭𑀺𑀬𑀓𑀦𑁆𑀢𑀺 𑀏𑀢𑁆𑀣 𑀏𑀓𑀯𑀸𑀭𑀁 𑀓𑀝𑀺𑀬𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀁 𑀓𑀸𑀬𑀩𑀦𑁆𑀥𑀦𑀁 𑀏𑀓𑀧𑀭𑀺𑀬𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀯𑀸𑀭𑀁 𑀧𑀭𑀺𑀓𑁆𑀔𑀺𑀧𑀦𑀓’’𑀦𑁆𑀢𑀺. 𑀢𑀢𑁆𑀣 𑀧𑀭𑀺𑀓𑁆𑀔𑀺𑀧𑀦𑀓𑀦𑁆𑀢𑀺 𑀓𑀝𑀺𑀬𑀁 𑀧𑀭𑀺𑀓𑁆𑀔𑀺𑀧𑀦𑀸𑀭𑀳𑀁.

𑀯𑀺𑀮𑀻𑀯𑁂𑀦𑀸𑀢𑀺 𑀏𑀢𑁆𑀣 𑀩𑀳𑀼𑀢𑁆𑀣𑁂 𑀏𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀡𑁆𑀳𑁂𑀳𑀺 𑀯𑀺𑀮𑀻𑀯𑁂𑀳𑀻’’𑀢𑀺. ‘‘𑀓𑀢𑀧𑀝𑁆𑀝𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 ‘‘𑀓𑀢𑁂𑀦𑀸’’𑀢𑀺 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀲𑁂𑀢𑀯𑀢𑁆𑀣𑀧𑀝𑁆𑀝𑁂𑀦𑀸𑀢𑀺 𑀲𑁂𑀢𑀯𑀢𑁆𑀣𑁂𑀦 𑀓𑀢𑁂𑀦 𑀧𑀝𑁆𑀝𑁂𑀦. 𑀓𑀢𑀯𑁂𑀡𑀺𑀬𑀸𑀢𑀺 𑀓𑀢𑀸𑀬 𑀯𑁂𑀡𑀺𑀬𑀸. 𑀇𑀫𑀺𑀦𑀸 𑀤𑀼𑀲𑁆𑀲𑁂𑀦 𑀓𑀢𑀸 𑀯𑁂𑀡𑀺 𑀤𑀼𑀲𑁆𑀲𑀯𑁂𑀡𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑁂𑀲𑀼𑀧𑀺. 𑀘𑁄𑀴𑀓𑀸𑀲𑀸𑀯𑀦𑁆𑀢𑀺 𑀘𑁄𑀴𑀫𑁂𑀯 𑀓𑀲𑀸𑀯𑁂𑀦 𑀭𑀢𑁆𑀢𑀢𑁆𑀢𑀸 𑀘𑁄𑀴𑀓𑀸𑀲𑀸𑀯𑀁.

𑀅𑀝𑁆𑀞𑀺𑀮𑁆𑀮𑁂𑀦𑀸𑀢𑀺 𑀅𑀤𑁆𑀤𑁂𑀦 𑀅𑀝𑁆𑀞𑀺𑀦𑀸. ‘‘𑀕𑁄𑀚𑀗𑁆𑀖𑀝𑁆𑀞𑀺𑀓𑁂’’𑀢𑀺 𑀇𑀫𑀺𑀦𑀸 𑀅𑀝𑁆𑀞𑀺𑀦𑁄 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀳𑀢𑁆𑀣𑀁 𑀓𑁄𑀝𑁆𑀝𑀸𑀧𑁂𑀦𑁆𑀢𑀻𑀢𑀺 𑀏𑀢𑁆𑀣 𑀳𑀢𑁆𑀣𑀁 𑀦𑀸𑀫 𑀅𑀕𑁆𑀕𑀩𑀸𑀳𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀦 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀕𑁆𑀕𑀩𑀸𑀳’’𑀦𑁆𑀢𑀺. 𑀧𑀺𑀝𑁆𑀞𑀺𑀳𑀢𑁆𑀣𑀦𑁆𑀢𑀺 𑀳𑀢𑁆𑀣𑀧𑀺𑀝𑁆𑀞𑀺𑀁. 𑀧𑀺𑀝𑁆𑀞𑀺𑀧𑀸𑀤𑀦𑁆𑀢𑀺 𑀧𑀸𑀤𑀧𑀺𑀝𑁆𑀞𑀺𑀁.

𑁪𑁧𑁭. 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀫𑀼𑀔𑀮𑀺𑀫𑁆𑀧𑀦𑀸𑀤𑀻𑀲𑀼 (𑀘𑀽𑀴𑀯. 𑀅𑀝𑁆𑀞. 𑁨𑁪𑁭) 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀅𑀗𑁆𑀕𑀤𑁂𑀲𑁂𑀢𑀺 𑀲𑀭𑀻𑀭𑀧𑁆𑀧𑀤𑁂𑀲𑁂. 𑀕𑀡𑁆𑀟𑀧𑁆𑀧𑀤𑁂𑀲𑁂𑀢𑀺 𑀓𑀧𑁄𑀮𑀧𑁆𑀧𑀤𑁂𑀲𑁂. 𑀲𑀸𑀮𑁄𑀓𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀏𑀢𑁆𑀣 𑀲𑀁𑀯𑀺𑀚𑁆𑀚𑀢𑀺 𑀆𑀮𑁄𑀓𑁄 𑀏𑀢𑁆𑀣𑀸𑀢𑀺 𑀲𑀸𑀮𑁄𑀓𑀦𑁆𑀢𑀺 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀕𑀳𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸’’𑀢𑀺. 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀲𑀽𑀦𑀁 𑀞𑀧𑁂𑀦𑁆𑀢𑀻𑀢𑀺 𑀏𑀢𑁆𑀣 𑀲𑀽𑀦𑀸𑀲𑀤𑁆𑀤𑁄 𑀫𑀁𑀲𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀁𑀲𑀁 𑀯𑀺𑀓𑁆𑀓𑀺𑀡𑀦𑁆𑀢𑀻’’𑀢𑀺. 𑀢𑁂𑀦𑀸𑀢𑀺 𑀤𑀸𑀲𑁂𑀦. 𑀇𑀤𑀁 𑀧𑀤𑀁 ‘‘𑀓𑀸𑀭𑁂𑀦𑁆𑀢𑀻’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. ‘‘𑀳𑀭𑀺𑀢𑀓𑀜𑁆𑀘𑁂𑀯 𑀧𑀓𑁆𑀓𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀳𑀭𑀺𑀢𑀓𑀧𑀓𑁆𑀓𑀺𑀓𑀦𑁆𑀢𑀺 𑀧𑀤𑀲𑁆𑀲 𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀭𑀺𑀢𑀓𑀦𑁆𑀢𑀺 𑀳𑀭𑀺𑀢𑀫𑁂𑀯 𑀧𑀡𑁆𑀡𑀁. 𑀧𑀓𑁆𑀓𑀦𑁆𑀢𑀺 𑀲𑁂𑀤𑀺𑀢𑀁 𑀧𑀡𑁆𑀡𑀁.

𑁪𑁧𑁮. 𑀓𑀣𑀺𑀢𑀸𑀬𑁂𑀯𑀸𑀢𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀓𑀣𑀺𑀢𑀸𑀬𑁂𑀯.

𑁪𑁧𑁯. 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀢𑁄 𑀫𑀼𑀢𑁆𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀬𑁄 𑀓𑁄𑀘𑀺 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀫𑀘𑁆𑀘𑀬𑁂𑀦𑀸𑀢𑀺 𑀫𑀫 𑀅𑀢𑀺𑀓𑁆𑀓𑀫𑁂𑀦. 𑀅𑀜𑁆𑀜𑀲𑁆𑀲𑀸𑀢𑀺 𑀯𑀼𑀢𑁆𑀢𑁂𑀳𑀺 𑀉𑀧𑀚𑁆𑀛𑀸𑀬𑀸𑀤𑀻𑀳𑀺 𑀅𑀜𑁆𑀜𑀲𑁆𑀲. 𑀢𑁂𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸𑀤𑀻𑀦𑀁. 𑀦 𑀳𑁄𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑁄 𑀦 𑀳𑁄𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀅𑀘𑁆𑀘𑀬𑀤𑀸𑀦𑀦𑁆𑀢𑀺 𑀅𑀘𑁆𑀘𑀬𑁂𑀦 𑀳𑁄𑀢𑀽𑀢𑀺 𑀤𑀸𑀦𑀁. 𑀦 𑀭𑀼𑀳𑀢𑀻𑀢𑀺 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀘𑁆𑀘𑀬𑀤𑀸𑀦𑀁 𑀢𑁂𑀲𑀁 𑀦 𑀭𑀼𑀳𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀭𑀼𑀳𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀺𑀳𑀻𑀦𑀁 𑀧𑀦 𑀅𑀘𑁆𑀘𑀬𑀤𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀼𑀳𑀢𑀻𑀢𑀺 𑀕𑀺𑀳𑀻𑀦𑀁 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀘𑁆𑀘𑀬𑀤𑀸𑀦𑀁 𑀢𑁂𑀲𑀁 𑀭𑀼𑀳𑀢𑀺, 𑀢𑁂𑀲𑀁𑀬𑁂𑀯 𑀲𑀦𑁆𑀢𑀓𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁨𑁦. 𑀧𑀼𑀭𑀸𑀡𑀫𑀮𑁆𑀮𑀻𑀢𑀺 𑀏𑀢𑁆𑀣 𑀫𑀮𑁆𑀮𑀲𑁆𑀲 𑀪𑀭𑀺𑀬𑀸 𑀫𑀮𑁆𑀮𑀻, 𑀧𑀼𑀭𑀸𑀡𑁂 𑀫𑀮𑁆𑀮𑀻 𑀧𑀼𑀭𑀸𑀡𑀫𑀮𑁆𑀮𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑀸𑀡𑁂’’𑀢𑀺𑀆𑀤𑀺. ‘‘𑀕𑀺𑀳𑀺𑀓𑀸𑀮𑁂’’𑀢𑀺 𑀇𑀫𑀺𑀦𑀸 ‘‘𑀧𑀼𑀭𑀸𑀡𑁂’’𑀢𑀺 𑀏𑀢𑁆𑀣 𑀡𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀫𑀮𑁆𑀮𑀲𑁆𑀲𑀸𑀢𑀺 𑀫𑀼𑀝𑁆𑀞𑀺𑀫𑀮𑁆𑀮𑀲𑁆𑀲. 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀢𑁆𑀣 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀦𑀺𑀫𑀺𑀢𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀼𑀭𑀺𑀲𑀦𑀺𑀫𑀺𑀢𑁆𑀢’’𑀦𑁆𑀢𑀺. 𑀘𑀺𑀢𑁆𑀢𑀦𑁆𑀢𑀺 𑀭𑀸𑀕𑀘𑀺𑀢𑁆𑀢𑀁.

𑁪𑁨𑁧. 𑀬𑀦𑁆𑀢𑀺 𑀬𑀁 𑀯𑀢𑁆𑀣𑀼, 𑀅𑀕𑁆𑀕𑀦𑁆𑀢𑀺 𑀧𑀞𑀫𑀪𑀸𑀕𑀁. 𑀅𑀲𑀧𑁆𑀧𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀅𑀲𑀧𑁆𑀧𑀸𑀬𑀁.

𑀳𑀺𑀬𑁆𑀬𑁄𑀢𑀺 𑀅𑀢𑀻𑀢𑀸𑀦𑀦𑁆𑀢𑀭𑀸𑀳𑀦𑀺. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀜𑁆𑀜𑀲𑁆𑀫𑀺𑀁. ‘‘𑀪𑀺𑀓𑁆𑀔𑀼𑀦𑀻𑀳𑀻’’𑀢𑀺 𑀧𑀤𑀁 ‘‘𑀧𑀝𑀺𑀕𑁆𑀕𑀸𑀳𑀸𑀧𑁂𑀢𑁆𑀯𑀸’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑁪𑁨𑁬. ‘‘𑀪𑁄𑀚𑀦𑀓𑀸𑀮’’𑀦𑁆𑀢𑀺 𑀇𑀫𑀺𑀦𑀸 ‘‘𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀼’’𑀦𑁆𑀢𑀺 𑀏𑀢𑁆𑀣 𑀓𑀸𑀮𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺.

𑀧𑀼𑀭𑁂𑀢𑀺 𑀆𑀤𑀺𑀫𑁆𑀳𑀺. 𑀢𑀸𑀲𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀁. 𑀅𑀩𑁆𑀪𑀦𑁆𑀢𑀭𑀺𑀫𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀧𑀭𑀺𑀬𑀸𑀧𑀦𑁆𑀦𑀸. 𑀅𑀜𑁆𑀜𑀸𑀢𑀺 𑀅𑀝𑁆𑀞𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀜𑁆𑀜𑀸. 𑀦𑀯𑀓𑀢𑀭𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀞𑀧𑁂𑀢𑁆𑀯𑀸 𑀪𑀢𑁆𑀢𑀕𑁆𑀕’’𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑀢𑁆𑀣 𑀲𑀩𑁆𑀩𑀢𑁆𑀣 𑀬𑀣𑀸𑀯𑀼𑀟𑁆𑀠𑀁 𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀲𑀤𑁆𑀤𑀲𑁆𑀲 𑀅𑀧𑀸𑀤𑀸𑀦𑀁 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀲𑁆𑀫𑀺𑀁𑀯𑀘𑀦𑁂𑀦 𑀢𑁆𑀣𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀻𑀬𑀝𑁆𑀞𑀸𑀦𑁂’’𑀢𑀺 𑀇𑀫𑀺𑀦𑀸 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

𑁪𑁩𑁦. 𑀤𑀽𑀢𑁂𑀦𑀧𑀺 𑀉𑀧𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺 𑀏𑀢𑁆𑀣 𑀓𑀺𑀁 𑀲𑀩𑁆𑀩𑀣𑀸 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀤𑀽𑀢𑁂𑀦…𑀧𑁂… 𑀯𑀝𑁆𑀝𑀢𑀻’’𑀢𑀺. 𑀬𑁂𑀦 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 𑀦 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀲𑀫𑁆𑀧𑀦𑁆𑀦𑀸𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀯𑀤𑁂𑀯𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀓𑁆𑀔𑀡𑁂𑀬𑁂𑀯.

𑁪𑁩𑁧. 𑀦𑀯𑀓𑀫𑁆𑀫𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀉𑀤𑁄𑀲𑀺𑀢𑀉𑀧𑀲𑁆𑀲𑀬𑁂 𑀅𑀧𑁂𑀓𑁆𑀔𑀢𑀺.

𑁪𑁩𑁨. 𑀢𑀲𑁆𑀲𑀸𑀢𑀺 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸. 𑀬𑀸𑀯 𑀲𑁄 𑀤𑀸𑀭𑀓𑁄 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀏𑀢𑁆𑀣 𑀓𑀣𑀁 𑀯𑀺𑀜𑁆𑀜𑀼𑀪𑀸𑀯𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀬𑀸𑀯 𑀔𑀸𑀤𑀺𑀢𑀼’’𑀦𑁆𑀢𑀺𑀆𑀤𑀺.

𑀞𑀧𑁂𑀢𑁆𑀯𑀸 𑀲𑀸𑀕𑀸𑀭𑀦𑁆𑀢𑀺 𑀏𑀢𑁆𑀣 𑀲𑀓𑀸𑀭𑁄 𑀲𑀳𑀲𑀤𑁆𑀤𑀓𑀸𑀭𑀺𑀬𑁄, 𑀅𑀕𑀸𑀭𑀦𑁆𑀢𑀺 𑀘 𑀲𑁂𑀬𑁆𑀬𑀸𑀕𑀸𑀭𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀳𑀸𑀕𑀸𑀭𑀲𑁂𑀬𑁆𑀬𑀫𑀢𑁆𑀢𑀁 𑀞𑀧𑁂𑀢𑁆𑀯𑀸’’𑀢𑀺. 𑀬𑀣𑀸 𑀅𑀜𑁆𑀜𑀲𑁆𑀫𑀺𑀁 𑀧𑀼𑀭𑀺𑀲𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀢𑀣𑀸𑀢𑀺 𑀬𑁄𑀚𑀦𑀸. ‘‘𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀅𑀜𑁆𑀜𑁂 𑀧𑀼𑀭𑀺𑀲𑁂𑀢𑀺 𑀏𑀢𑁆𑀣 𑀲𑁆𑀫𑀺𑀁𑀯𑀘𑀦𑀲𑁆𑀲 𑀲𑀩𑁆𑀩𑀦𑀸𑀫𑀢𑁄 𑀏𑀓𑀸𑀭𑀸𑀤𑁂𑀲𑁄 𑀤𑀲𑁆𑀲𑀺𑀢𑁄, 𑀢𑀁𑀤𑀲𑁆𑀲𑀦𑁂𑀦 𑀘 𑀓𑀘𑁆𑀘𑀸𑀬𑀦𑁂 (𑀓𑀘𑁆𑀘𑀸𑀬𑀦𑁂 𑁧𑁧𑁦 𑀲𑀼𑀢𑁆𑀢𑁂) 𑀲𑀩𑁆𑀩𑀦𑀸𑀫𑀢𑁄 𑀲𑁆𑀫𑀺𑀁𑀯𑀘𑀦𑀲𑁆𑀲 𑀏𑀓𑀸𑀭𑀸𑀤𑁂𑀲𑀦𑀺𑀲𑁂𑀥𑀦𑀁 𑀅𑀦𑀺𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁪𑁩𑁪. ‘‘𑀬𑀤𑁂𑀯 𑀲𑀸 𑀯𑀺𑀩𑁆𑀪𑀦𑁆𑀢𑀸’’𑀢𑀺 𑀇𑀫𑀺𑀦𑀸 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀲𑁆𑀫𑀸’’𑀢𑀺 𑀇𑀫𑀺𑀦𑀸 𑀬𑀤𑁂𑀯𑀸𑀢𑀺 𑀏𑀢𑁆𑀣 𑀬𑀁𑀲𑀤𑁆𑀤𑀲𑁆𑀲 𑀓𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀲𑁆𑀫𑀸𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀤𑁂𑀯𑀸𑀢𑀺 𑀧𑀤𑀲𑁆𑀲 𑀓𑀸𑀭𑀡𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀺. ‘‘𑀦 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀏𑀯𑀢𑁆𑀣𑀨𑀮𑀁 𑀤𑀲𑁆𑀲𑁂𑀢𑀺. 𑀲𑀸 𑀧𑀼𑀦 𑀉𑀧𑀲𑀫𑁆𑀧𑀤𑀁 𑀦 𑀮𑀪𑀢𑀻𑀢𑀺 𑀲𑀸 𑀯𑀺𑀩𑁆𑀪𑀦𑁆𑀢𑀸 𑀪𑀺𑀓𑁆𑀔𑀼𑀦𑀻 𑀧𑀼𑀦 𑀉𑀧𑀲𑀫𑁆𑀧𑀤𑀁 𑀦 𑀮𑀪𑀢𑀺.

𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀻𑀢𑀺 𑀢𑀺𑀢𑁆𑀣𑀸𑀬𑀢𑀦𑀲𑀗𑁆𑀓𑀦𑁆𑀢𑀸 𑀪𑀺𑀓𑁆𑀔𑀼𑀦𑀻 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀮𑀪𑀢𑀺, 𑀧𑀕𑁂𑀯 𑀉𑀧𑀲𑀫𑁆𑀧𑀤𑀁.

𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑀸𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑀸. 𑀓𑁂𑀲𑁂𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀓𑁂𑀲𑁂. 𑀢𑀢𑁆𑀭𑀸𑀢𑀺 ‘‘𑀓𑀼𑀓𑁆𑀓𑀼𑀘𑁆𑀘𑀬𑀦𑁆𑀢𑀸 𑀦 𑀲𑀸𑀤𑀺𑀬𑀦𑁆𑀢𑀻’’𑀢𑀺 𑀯𑀘𑀦𑁂. 𑀏𑀓𑁂 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀭𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀧𑀼𑀭𑀺𑀲𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀻𑀲𑀼. 𑀇𑀤𑀦𑁆𑀢𑀺 𑀧𑀼𑀭𑀺𑀲𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺, ‘‘𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀧𑀤𑁂 𑀯𑀼𑀢𑁆𑀢𑀓𑀫𑁆𑀫𑀁 ‘‘𑀯𑀝𑁆𑀝𑀢𑀻’’𑀢𑀺 𑀧𑀤𑁂 𑀯𑀼𑀢𑁆𑀢𑀓𑀢𑁆𑀢𑀸. 𑀅𑀣 𑀯𑀸 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀇𑀤𑀁 𑀧𑀼𑀭𑀺𑀲𑀸𑀦𑀁 𑀅𑀪𑀺𑀯𑀸𑀤𑀦𑀸𑀤𑀺 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀜𑁆𑀳𑀺 𑀲𑀢𑀺 ‘‘𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀧𑀤𑀁 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀁, 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀯𑀘𑀦𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑁪𑁩𑁫. 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑀻𑀢𑀺 𑀏𑀢𑁆𑀣 𑀆𑀲𑀦𑀧𑀮𑁆𑀮𑀗𑁆𑀓𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀻’’𑀢𑀺. 𑀢𑀢𑁆𑀣 𑀆𑀪𑀼𑀚𑀺𑀢𑁆𑀯𑀸𑀢𑀺 𑀆𑀩𑀦𑁆𑀥𑀺𑀢𑁆𑀯𑀸. 𑀓𑀽𑀧𑁄𑀢𑀺 𑀯𑀘𑁆𑀘𑀓𑀽𑀧𑁄. 𑀉𑀧𑀭𑀻𑀢𑀺 𑀓𑀽𑀧𑀢𑁄 𑀉𑀧𑀭𑀺. ‘‘𑀲𑀩𑁆𑀩𑀤𑀺𑀲𑀸𑀲𑀼 𑀧𑀜𑁆𑀜𑀸𑀬𑀢𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀘𑁆𑀙𑀦𑁆𑀦𑀫𑁂𑀯 𑀅𑀢𑁆𑀣𑀺, 𑀦 𑀉𑀧𑀭𑀺 𑀙𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁪𑁩𑁬. 𑀓𑀼𑀡𑁆𑀟𑀓𑀦𑁆𑀢𑀺 𑀓𑀡𑀁. 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.