𑁧𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑁧. 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸

𑁪𑁪𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂 ‘‘𑀘𑀢𑁆𑀢𑀸𑀭𑀺…𑀧𑁂… 𑀔𑀼𑀤𑁆𑀤𑀓𑀸𑀦𑀻’’𑀢𑀺 𑀏𑀯𑀫𑀸𑀤𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀥𑀽𑀫𑀓𑀸𑀮𑀺𑀓𑀦𑁆𑀢𑀺 𑀏𑀢𑁆𑀣 𑀥𑀽𑀫𑀲𑁆𑀲 𑀓𑀸𑀮𑁄 𑀥𑀽𑀫𑀓𑀸𑀮𑁄, 𑀥𑀽𑀫𑀲𑁆𑀲 𑀉𑀝𑁆𑀞𑀺𑀢𑀓𑀸𑀮𑁄𑀢𑀺 𑀅𑀢𑁆𑀣𑁄. 𑀲𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀥𑀽𑀫𑀓𑀸𑀮𑀺𑀓𑀁, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀁. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸𑀯𑀸’’𑀢𑀺𑀆𑀤𑀺.

𑁪𑁪𑁩. 𑀇𑀤𑀦𑁆𑀢𑀺 ‘‘𑀓𑀢𑀫𑀸𑀦𑀺 𑀧𑀦 𑀪𑀦𑁆𑀢𑁂 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀅𑀧𑀼𑀘𑁆𑀙𑀦𑀁. ‘‘𑀢𑀬𑀸’’𑀢𑀺 𑀇𑀫𑀺𑀦𑀸 𑀇𑀤𑀁 𑀢𑁂𑀢𑀺 𑀏𑀢𑁆𑀣 𑀢𑁂𑀲𑀤𑁆𑀤𑀲𑁆𑀲 ‘‘𑀢𑀼𑀬𑁆𑀳𑀁, 𑀢𑀯𑀸’’𑀢𑀺 𑀅𑀢𑁆𑀣𑁂 𑀧𑀝𑀺𑀓𑁆𑀔𑀺𑀧𑀢𑀺. 𑀆𑀧𑀢𑁆𑀢𑀺𑀦𑁆𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑁂𑀢𑀺 𑀣𑁂𑀭𑀸. ‘‘𑀲𑀗𑁆𑀖𑁄…𑀧𑁂… 𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀻’’𑀢𑀺 𑀏𑀢𑀁 𑀯𑀘𑀦𑀁 𑀅𑀦𑀼𑀲𑁆𑀲𑀸𑀯𑀺𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀤𑁂𑀲𑁂𑀳𑀺 𑀢𑀁 𑀆𑀯𑀼𑀲𑁄 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀤𑀫𑁆𑀧𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀭𑁄 𑀧𑀦𑀸𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀧𑀼𑀘𑁆𑀙𑀦𑁂. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀘𑀢𑀽𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀪𑀕𑀯𑀢𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑀺𑀩𑁆𑀩𑁂𑀲𑀻’’𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼. 𑀏𑀢𑁆𑀣𑀸𑀢𑀺 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.