𑁧𑁨. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑀤𑀲𑀯𑀢𑁆𑀣𑀼𑀓𑀣𑀸

𑁪𑁪𑁭. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀦𑁆𑀢𑀺 𑀏𑀢𑁆𑀣 𑀓𑀝𑀲𑀻𑀲𑀤𑁆𑀤𑁄 𑀲𑀼𑀲𑀸𑀦𑀪𑀽𑀫𑀺𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀴𑁂𑀯𑀭𑀁 𑀦𑀺𑀓𑁆𑀔𑀺𑀧𑀫𑀸𑀦𑀸 𑀪𑀽𑀫𑀺𑀁 𑀯𑀟𑁆𑀠𑁂𑀦𑁆𑀢𑀻’’𑀢𑀺. 𑀢𑀢𑁆𑀣 𑀓𑀴𑁂𑀯𑀭𑀦𑁆𑀢𑀺 𑀤𑁂𑀳𑀁. 𑀢𑀜𑁆𑀳𑀺 𑀓𑀴𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀅𑀯𑀬𑀯𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀯𑀭𑀺𑀬𑀢𑀺 𑀇𑀘𑁆𑀙𑀺𑀬𑀢𑀻𑀢𑀺 𑀓𑀴𑁂𑀯𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀖𑁄𑀭𑀁 𑀓𑀝𑀲𑀺𑀁 𑀯𑀟𑁆𑀠𑁂𑀦𑁆𑀢𑀸𑀯 𑀧𑀼𑀦𑀩𑁆𑀪𑀯𑀁 𑀆𑀤𑀺𑀬𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁪𑁫𑁪. 𑀧𑀸𑀧𑀓𑀁 𑀦𑁄 𑀆𑀯𑀼𑀲𑁄 𑀓𑀢𑀦𑁆𑀢𑀺 𑀏𑀢𑁆𑀣 𑀦𑁄𑀲𑀤𑁆𑀤𑁄 𑀅𑀫𑁆𑀳𑀲𑀤𑁆𑀤𑀓𑀸𑀭𑀺𑀬𑁄, 𑀙𑀝𑁆𑀞𑀻𑀓𑀢𑁆𑀢𑀸 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀯𑀼𑀲𑁄 𑀅𑀫𑁆𑀳𑁂𑀳𑀺 𑀧𑀸𑀧𑀓𑀁 𑀓𑀢’’𑀦𑁆𑀢𑀺.

𑁪𑁫𑁫. ‘‘𑀧𑀺𑀬𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀓𑀢𑀫𑁂𑀦 𑀢𑁆𑀯𑀁 𑀪𑀽𑀫𑀺-𑀯𑀺𑀳𑀸𑀭𑁂𑀦𑀸𑀢𑀺 𑀏𑀢𑁆𑀣 𑀪𑀽𑀫𑀺𑀲𑀤𑁆𑀤𑁄 𑀧𑀺𑀬𑀯𑀸𑀘𑀓𑁄 𑀭𑀼𑀴𑁆𑀳𑀻𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀆𑀫𑀦𑁆𑀢𑁂𑀢𑀻’’𑀢𑀺 𑀇𑀫𑀺𑀦𑀸 𑀆𑀮𑀧𑀦𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀆𑀯𑀼𑀲𑁄 𑀪𑀽𑀫𑀻𑀢𑀺 𑀅𑀢𑁆𑀣𑁄. 𑀓𑀼𑀮𑁆𑀮𑀯𑀺𑀳𑀸𑀭𑁄 𑀦𑀸𑀫 𑀫𑁂𑀢𑁆𑀢𑀸𑀯𑀺𑀳𑀸𑀭𑁄, 𑀲𑁄 𑀘 𑀳𑁂𑀝𑁆𑀞𑀺𑀫𑀛𑀸𑀦𑀢𑁆𑀢𑀬𑁂 𑀬𑀼𑀢𑁆𑀢𑀢𑁆𑀢𑀸 𑀉𑀢𑁆𑀢𑀸𑀦𑀯𑀺𑀳𑀸𑀭𑁄𑀢𑀺 𑀆𑀳 ‘‘𑀉𑀢𑁆𑀢𑀸𑀦𑀯𑀺𑀳𑀸𑀭𑁂𑀦𑀸’’𑀢𑀺.

𑁪𑁫𑁭. 𑀲𑀸𑀯𑀢𑁆𑀣𑀺𑀬𑀸𑀢𑀺 𑀲𑀸𑀯𑀢𑁆𑀣𑀺𑀦𑀕𑀭𑁂. 𑀲𑀼𑀢𑁆𑀢𑀯𑀺𑀪𑀗𑁆𑀕𑁂𑀢𑀺 𑀧𑀤𑀪𑀸𑀚𑀦𑀻𑀬𑁂. 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀭 𑀳𑀻’’𑀢𑀺𑀆𑀤𑀺. 𑀢𑀢𑁆𑀭𑀸𑀢𑀺 𑀲𑀼𑀢𑁆𑀢𑀯𑀺𑀪𑀗𑁆𑀕𑁂, 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀸𑀢𑀺 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻’’𑀢𑀺𑀆𑀤𑀺𑀯𑀘𑀦𑁂. 𑀏𑀓𑁂 𑀆𑀘𑀭𑀺𑀬𑀸 𑀏𑀯𑀁 𑀫𑀜𑁆𑀜𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀓𑀺𑀦𑁆𑀢𑀺 𑀫𑀜𑁆𑀜𑀦𑁆𑀢𑀻𑀢𑀺 𑀆𑀳 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀅𑀮𑁄𑀡𑀓𑀁 𑀬𑀫𑁆𑀧𑀺 𑀆𑀫𑀺𑀲𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀢𑀺 𑀧𑀼𑀭𑁂𑀧𑀭𑀺𑀕𑁆𑀕𑀳𑀺𑀢𑀮𑁄𑀡𑁂𑀦. 𑀢𑀦𑁆𑀢𑀺 𑀆𑀫𑀺𑀲𑀁. 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀢𑀲𑁆𑀫𑀺𑀁 𑀅𑀳𑀦𑀺 𑀧𑀝𑀺𑀕𑁆𑀕𑀳𑀺𑀢𑀫𑁂𑀯. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀫𑁂𑀯, 𑀢𑀲𑁆𑀫𑀸. 𑀯𑀤𑀢𑁄𑀢𑀺 𑀯𑀤𑀦𑁆𑀢𑀲𑁆𑀲, 𑀪𑀕𑀯𑀢𑁄 𑀯𑀘𑀦𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀅𑀮𑁄𑀡𑀓𑀸𑀫𑀺𑀲𑀧𑀭𑀺𑀪𑀼𑀜𑁆𑀚𑀦𑁂, 𑀤𑀼𑀓𑁆𑀓𑀝𑁂𑀦 𑀪𑀯𑀺𑀢𑀩𑁆𑀩𑀁 𑀇𑀢𑀺 𑀫𑀜𑁆𑀜𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀏𑀓𑁂 𑀆𑀘𑀭𑀺𑀬𑀸. 𑀤𑀼𑀓𑁆𑀓𑀝𑁂𑀦𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀧𑀕𑁂𑀯 𑀧𑀸𑀘𑀺𑀢𑁆𑀢𑀺𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁆𑀣𑀸𑀢𑀺 𑀬𑀸𑀯𑀚𑀻𑀯𑀺𑀓𑀬𑀸𑀯𑀓𑀸𑀮𑀺𑀓𑁂𑀲𑀼. 𑀬𑀸𑀯𑀚𑀻𑀯𑀺𑀓𑀁 𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁, 𑀬𑀸𑀯𑀓𑀸𑀮𑀺𑀓𑀫𑁂𑀯 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀜𑁆𑀘 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀤𑀼𑀓𑁆𑀓𑀝𑀁 𑀢𑀼𑀫𑁆𑀳𑁂 𑀬𑀤𑀺 𑀫𑀜𑁆𑀜𑀣𑀸𑀢𑀺 𑀬𑁄𑀚𑀦𑀸. 𑀬𑀸𑀯𑀚𑀻𑀯𑀺𑀓𑀫𑀺𑀲𑁆𑀲𑀦𑁆𑀢𑀺 𑀮𑁄𑀡𑀲𑀗𑁆𑀔𑀸𑀢𑁂𑀦 𑀬𑀸𑀯𑀚𑀻𑀯𑀺𑀓𑁂𑀦 𑀲𑀁𑀲𑀝𑁆𑀞𑀁. 𑀩𑁆𑀬𑀜𑁆𑀚𑀦𑀫𑀢𑁆𑀢𑀦𑁆𑀢𑀺 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀻𑀢𑀺 𑀩𑁆𑀬𑀜𑁆𑀚𑀦𑀫𑀢𑁆𑀢𑀁.

𑀏𑀢𑁆𑀣𑀸𑀢𑀺 ‘‘𑀬𑀸𑀯𑀓𑀸𑀮𑀺𑀓𑁂𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑁂 (𑀫𑀳𑀸𑀯. 𑁩𑁦𑁫) 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀬𑁄𑀚𑀦𑀸. 𑀬𑀸𑀯𑀓𑀸𑀮𑀺𑀓𑀲𑁆𑀲 𑀕𑀢𑀺 𑀯𑀺𑀬 𑀕𑀢𑀺 𑀏𑀢𑀲𑁆𑀲𑀸𑀢𑀺 𑀬𑀸𑀯𑀓𑀸𑀮𑀺𑀓𑀕𑀢𑀺𑀓𑀁. 𑀢𑀲𑁆𑀫𑀸 𑀤𑀼𑀓𑁆𑀓𑀝𑀁 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀮𑁄𑀡𑁂𑀦 𑀆𑀫𑀺𑀲𑀧𑀭𑀺𑀪𑀼𑀜𑁆𑀚𑀦𑁂. 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀓𑀸𑀮𑀺𑀓𑁂𑀦 𑀲𑀫𑁆𑀪𑀺𑀦𑁆𑀦𑀭𑀲𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀬𑀸𑀯𑀚𑀻𑀯𑀺𑀓𑀁, 𑀯𑀺𑀓𑀸𑀮𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀸 𑀏𑀯 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺 𑀢𑀣𑀸, 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀭𑀚𑁆𑀚𑀼 𑀧𑀝𑀺𑀕𑁆𑀕𑀳𑀺𑀢𑁂𑀦 𑀬𑀸𑀯𑀓𑀸𑀮𑀺𑀓𑁂𑀦𑀸𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀬𑀸𑀯𑀚𑀻𑀯𑀺𑀓𑁂𑀦 𑀲𑀫𑁆𑀫𑀺𑀲𑁆𑀲𑀁 𑀬𑀸𑀯𑀓𑀸𑀮𑀺𑀓𑀁, 𑀅𑀚𑀸𑀦𑀦𑁆𑀢𑁄𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀬𑀸𑀯𑀓𑀸𑀮𑀺𑀓𑀁. 𑀢𑀢𑁄𑀢𑀺 𑀲𑀦𑁆𑀦𑀺𑀥𑀺𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀢𑁄. 𑀳𑀻𑀢𑀺 𑀲𑀘𑁆𑀘𑀁. ‘‘𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺 𑀇𑀤𑀁 𑀩𑁆𑀬𑀸𑀓𑀭𑀡𑀁 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀬𑁄𑀚𑀦𑀸.

‘‘𑀭𑀸𑀚𑀕𑀳𑁂 𑀉𑀧𑁄𑀲𑀣𑀲𑀁𑀬𑀼𑀢𑁆𑀢𑁂’’𑀢𑀺 𑀇𑀤𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁄𑀲𑀣𑀲𑀁𑀬𑀼𑀢𑁆𑀢𑁂𑀢𑀺 𑀉𑀧𑁄𑀲𑀣𑁂𑀦 𑀲𑀫𑁆𑀩𑀦𑁆𑀥𑁂 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂. 𑀓𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦 𑀪𑀺𑀓𑁆𑀔𑀯𑁂…𑀧𑁂… 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 (𑀫𑀳𑀸𑀯. 𑁧𑁪𑁧) 𑀏𑀢𑀁 𑀲𑀦𑁆𑀥𑀸𑀬𑀸’’𑀢𑀺. 𑀅𑀢𑀺𑀲𑀸𑀭𑁂𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀭𑀡𑁂 𑀕𑀫𑀦𑁂 𑀧𑀯𑀢𑁆𑀢𑀦𑁂𑀢𑀺 𑀅𑀢𑁆𑀣𑁄. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁. ‘‘𑀘𑀫𑁆𑀧𑁂𑀬𑁆𑀬𑀓𑁂 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀆𑀕𑀢’’𑀦𑁆𑀢𑀺 𑀇𑀫𑀺𑀦𑀸 𑀘𑀫𑁆𑀧𑁂𑀬𑁆𑀬𑁂 𑀆𑀕𑀢𑀁 𑀘𑀫𑁆𑀧𑁂𑀬𑁆𑀬𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀥𑀫𑁆𑀫𑀺𑀓𑀦𑁆𑀢𑀺 𑀪𑀽𑀢𑁂𑀦 𑀧𑀯𑀢𑁆𑀢𑀁. 𑀲𑀼𑀢𑁆𑀢𑀯𑀺𑀪𑀗𑁆𑀕𑁂 𑀳𑀺 𑀬𑀲𑁆𑀫𑀸 𑀆𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀲𑀸𑀬𑁂𑀯𑀸𑀢𑀺 𑀤𑀲𑀸𑀬𑀫𑁂𑀯, 𑀆𑀥𑀸𑀭𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀯𑀺𑀤𑀢𑁆𑀣𑀺𑀫𑀢𑁆𑀢𑀸𑀢𑀺 𑀯𑀺𑀤𑀢𑁆𑀣𑀺𑀧𑀫𑀸𑀡𑀸. 𑀤𑀲𑀸𑀬 𑀯𑀺𑀦𑀸𑀢𑀺 𑀤𑀲𑀁 𑀯𑀚𑁆𑀚𑁂𑀢𑁆𑀯𑀸. 𑀢𑀁 𑀧𑀫𑀸𑀡𑀦𑁆𑀢𑀺 𑀯𑀺𑀤𑀢𑁆𑀣𑀺𑀢𑁆𑀢𑀬𑀲𑀗𑁆𑀔𑀸𑀢𑀁 𑀢𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀲𑁆𑀲 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁫𑁩𑁩) 𑀇𑀤𑀁 𑀯𑀘𑀦𑀁 𑀆𑀕𑀢𑀫𑁂𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀤𑁆𑀯𑀺𑀯𑀕𑁆𑀕𑀲𑀗𑁆𑀕𑀳𑀸𑀢𑀺 𑀫𑀳𑀸𑀯𑀕𑁆𑀕𑀘𑀽𑀴𑀯𑀕𑁆𑀕𑀯𑀲𑁂𑀦 𑀤𑁆𑀯𑀻𑀳𑀺 𑀯𑀕𑁆𑀕𑁂𑀳𑀺 𑀲𑀗𑁆𑀕𑀳𑀺𑀢𑀸. 𑀤𑁆𑀯𑀸𑀯𑀻𑀲𑀢𑀺𑀧𑀪𑁂𑀤𑀦𑀸𑀢𑀺 𑀫𑀳𑀸𑀯𑀕𑁆𑀕𑁂 𑀤𑀲, 𑀘𑀽𑀴𑀯𑀕𑁆𑀕𑁂 𑀤𑁆𑀯𑀸𑀤𑀲𑀸𑀢𑀺 𑀏𑀯𑀁 𑀤𑁆𑀯𑀸𑀯𑀻𑀲𑀢𑀺𑀧𑀓𑀸𑀭𑀸. 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀧𑁆𑀧𑀳𑀸𑀬𑀺𑀦𑁄𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀁 𑀧𑀚𑀳𑀦𑀲𑀻𑀮𑀲𑁆𑀲, 𑀪𑀕𑀯𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀲𑀸𑀧𑀻𑀢𑀺 𑀇𑀘𑁆𑀙𑀸𑀧𑀺. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸-𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀧𑁆𑀧𑀳𑀸𑀬𑀺𑀦𑁄 𑀪𑀕𑀯𑀢𑁄 𑀲𑀸𑀲𑀦𑁂 𑀤𑁆𑀯𑀺𑀯𑀕𑁆𑀕𑀲𑀗𑁆𑀕𑀳𑀸 𑀤𑁆𑀯𑀸𑀯𑀻𑀲𑀢𑀺𑀧𑀪𑁂𑀤𑀦𑀸 𑀬𑁂 𑀔𑀦𑁆𑀥𑀓𑀸 𑀪𑀕𑀯𑀢𑀸 𑀯𑀼𑀢𑁆𑀢𑀸, 𑀢𑁂𑀲𑀁 𑀔𑀦𑁆𑀥𑀓𑀸𑀦𑀁 𑀏𑀲𑀸 𑀯𑀡𑁆𑀡𑀦𑀸 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀬𑀣𑀸 𑀲𑀺𑀤𑁆𑀥𑀸, 𑀏𑀯𑀁 𑀢𑀣𑀸 𑀧𑀸𑀡𑀻𑀦𑀁 𑀓𑀮𑁆𑀬𑀸𑀡𑀸 𑀆𑀲𑀸𑀧𑀺 𑀲𑀺𑀚𑁆𑀛𑀦𑁆𑀢𑀽𑀢𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀘𑀽𑀴𑀯𑀕𑁆𑀕𑀲𑀁𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀚𑀸𑀤𑀺𑀮𑀜𑁆𑀙𑀺𑀢𑀦𑀸𑀫𑁂𑀦, 𑀦𑁂𑀓𑀸𑀦𑀁 𑀯𑀸𑀘𑀺𑀢𑁄 𑀫𑀬𑀸;

𑀘𑀽𑀴𑀯𑀕𑁆𑀕𑀔𑀦𑁆𑀥𑀓𑀲𑁆𑀲, 𑀲𑀫𑀢𑁆𑀢𑁄 𑀬𑁄𑀚𑀦𑀸𑀦𑀬𑁄𑀢𑀺.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀧𑀸𑀘𑀺𑀢𑁆𑀬𑀸𑀤𑀺𑀬𑁄𑀚𑀦𑀸