𑁫. 𑀥𑀫𑁆𑀫𑀺𑀓𑀸𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀣𑀸

𑁩𑁮𑁭. 𑀢𑁂𑀦 𑀧𑀼𑀕𑁆𑀕𑀮𑁂𑀦𑀸𑀢𑀺 𑀢𑁂𑀦 𑀘𑀼𑀤𑀺𑀢𑀓𑁂𑀦 𑀧𑀼𑀕𑁆𑀕𑀮𑁂𑀦. 𑀲𑀸 𑀯𑀺𑀧𑀢𑁆𑀢𑀻𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀺𑀲𑀗𑁆𑀔𑀸𑀢𑀸 𑀲𑀸 𑀯𑀺𑀧𑀢𑁆𑀢𑀺. 𑀲𑀜𑁆𑀜𑀸𑀅𑀫𑀽𑀮𑀺𑀓𑀯𑀲𑁂𑀦𑀸𑀢𑀺 ‘‘𑀓𑀢𑀸’’ 𑀇𑀢𑀺 𑀲𑀜𑁆𑀜𑀸𑀬 𑀅𑀫𑀽𑀮𑀺𑀓𑀯𑀲𑁂𑀦. 𑀓𑀢𑀜𑁆𑀘𑀸𑀢𑀺 𑀏𑀓𑀦𑁆𑀢𑁂𑀦 𑀓𑀢𑀜𑁆𑀘. 𑀅𑀓𑀢𑀜𑁆𑀘𑀸𑀢𑀺 𑀏𑀓𑀦𑁆𑀢𑁂𑀦 𑀅𑀓𑀢𑀜𑁆𑀘.

𑀓𑁄𑀧𑁂𑀢𑀼𑀓𑀸𑀫𑀢𑀸𑀬 𑀦𑁂𑀯 𑀆𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀅𑀦𑀸𑀕𑀫𑀦𑀸𑀤𑀺𑀓𑀸𑀭𑀡𑁂𑀦. 𑀆𑀧𑀚𑁆𑀚𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁄 𑀆𑀧𑀚𑁆𑀚𑀢𑀺. 𑀇𑀘𑁆𑀘𑀲𑁆𑀲𑀸𑀧𑀻𑀢𑀺 𑀇𑀢𑀺 𑀏𑀯𑀁 𑀅𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑀲𑁆𑀲𑀸𑀧𑀺. 𑀧𑀘𑁆𑀘𑀸𑀤𑀺𑀬𑀢𑀻𑀢𑀺 𑀧𑀢𑀺 𑀆𑀤𑀺𑀬𑀢𑀺, ‘‘𑀅𑀓𑀢𑀁 𑀓𑀫𑁆𑀫𑀁, 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀦 𑀆𑀤𑀻𑀬𑀢𑀺, 𑀧𑀼𑀦 𑀆𑀭𑀪𑀢𑀻𑀢𑀺 𑀅𑀢𑁆𑀣𑁄.