𑁭. 𑀆𑀭𑀜𑁆𑀜𑀺𑀓𑀯𑀢𑁆𑀢𑀓𑀣𑀸

𑁩𑁬𑁮. 𑀆𑀭𑀜𑁆𑀜𑀺𑀓𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑁂𑀦𑀸𑀲𑀦𑀸 𑀑𑀢𑀭𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀯𑀺𑀳𑀸𑀭𑀸𑀪𑀸𑀯𑀢𑁄 𑀲𑁂𑀦𑀸𑀲𑀦𑀁 𑀦𑀸𑀫 𑀯𑀲𑀦𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺.

𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀣𑀁 𑀧𑀢𑁆𑀢𑁄 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀘𑁂 𑀩𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀢𑁆𑀢𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀥𑁄𑀯𑀺𑀢𑁆𑀯𑀸 𑀓𑀢𑁆𑀯𑀸𑀢𑀺 𑀧𑀤𑁂𑀲𑀼 ‘‘𑀧𑀢𑁆𑀢𑀁 𑀯𑁄𑀤𑀓’’𑀦𑁆𑀢𑀺 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀫𑁆𑀧𑀻𑀢𑀺 𑀯𑁂𑀴𑀼𑀦𑀸𑀴𑀺𑀓𑀫𑁆𑀧𑀺. 𑀲𑀫𑀻𑀧𑁂𑀢𑀺 𑀆𑀭𑀜𑁆𑀜𑀓𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑀫𑀻𑀧𑁂. 𑀬𑀣𑀸 𑀘 𑀆𑀭𑀜𑁆𑀜𑀓𑀲𑁆𑀲 𑀅𑀭𑀡𑀺𑀲𑀳𑀺𑀢𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀓𑀦𑁆𑀢𑀸𑀭𑀁 𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀅𑀭𑀡𑀺𑀲𑀳𑀺𑀢𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀕𑀡𑀯𑀸𑀲𑀺𑀦𑁄𑀢𑀺 𑀕𑀡𑁂𑀦 𑀲𑀳 𑀯𑀸𑀲𑀺𑀦𑁄, 𑀆𑀭𑀜𑁆𑀜𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀅𑀭𑀡𑀺𑀲𑀳𑀺𑀢𑁂𑀦. ‘‘𑀦𑀓𑁆𑀔𑀢𑁆𑀢𑀸𑀦𑁂𑀯 𑀦𑀓𑁆𑀔𑀢𑁆𑀢𑀧𑀤𑀸𑀦𑀻’’𑀢𑀺 𑀇𑀫𑀺𑀦𑀸 𑀅𑀲𑁆𑀲𑀬𑀼𑀚𑀸𑀤𑀺𑀦𑀓𑁆𑀔𑀢𑁆𑀢𑀸𑀦𑁂𑀯 (𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁫𑁮-𑁬𑁦 𑀕𑀸𑀣𑀸𑀲𑀼) 𑀤𑀺𑀲𑀸𑀪𑀸𑀕𑀚𑀸𑀦𑀦𑀲𑁆𑀲, 𑀘 𑀲𑀫𑀬𑀚𑀸𑀦𑀦𑀲𑁆𑀲 𑀘 𑀓𑀸𑀭𑀡𑀢𑁆𑀢𑀸 𑀦𑀓𑁆𑀔𑀢𑁆𑀢𑀧𑀤𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.