𑁮. 𑀯𑀢𑁆𑀢𑀓𑁆𑀔𑀦𑁆𑀥𑀓𑀁

𑁧. 𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸

𑁩𑁫𑁭. 𑀯𑀢𑁆𑀢𑀓𑁆𑀔𑀦𑁆𑀥𑀓𑁂 𑀆𑀭𑀸𑀫𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀧𑀘𑀸𑀭𑀲𑀻𑀫𑀲𑀫𑀻𑀧’’𑀦𑁆𑀢𑀺. ‘‘𑀕𑀳𑁂𑀢𑁆𑀯𑀸’’𑀢𑀺 𑀧𑀤𑀲𑁆𑀲 ‘‘𑀉𑀧𑀸𑀳𑀦𑀸’’𑀢𑀺 𑀓𑀫𑁆𑀫𑀁 𑀧𑀸𑀓𑀝𑀁, 𑀓𑀭𑀡𑀁 𑀧𑀦 𑀅𑀧𑀸𑀓𑀝𑀁. 𑀢𑀲𑁆𑀫𑀸 𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀸𑀳𑀦𑀤𑀡𑁆𑀟𑀓𑁂𑀦 𑀕𑀳𑁂𑀢𑁆𑀯𑀸’’𑀢𑀺. 𑀇𑀫𑀺𑀦𑀸 ‘‘𑀳𑀢𑁆𑀣𑁂𑀦𑀸’’𑀢𑀺 𑀓𑀭𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁆𑀣 𑀧𑀯𑀺𑀲𑀦𑁆𑀢𑀻𑀢𑀺 𑀘 𑀅𑀧𑀓𑁆𑀓𑀫𑀦𑁆𑀢𑀻𑀢𑀺 𑀘 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀲𑀦𑁆𑀦𑀺𑀧𑀢𑀦𑁆𑀢𑀻’’𑀢𑀺. 𑀉𑀧𑀸𑀳𑀦𑀸…𑀧𑁂… 𑀧𑀼𑀘𑁆𑀙𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 ‘‘𑀧𑀼𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀧𑀤𑀲𑁆𑀲 𑀲𑀳 𑀓𑀫𑁆𑀫𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀢𑀭𑀲𑁆𑀫𑀺𑀁 𑀞𑀸𑀦𑁂’’𑀢𑀺𑀆𑀤𑀺. 𑀢𑀢𑁆𑀣 ‘‘𑀓𑀢𑀭𑀲𑁆𑀫𑀺𑀁…𑀧𑁂… 𑀘𑁄𑀴𑀓’’𑀦𑁆𑀢𑀺 𑀇𑀫𑀺𑀦𑀸 𑀧𑀼𑀘𑁆𑀙𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. ‘‘𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽’’𑀢𑀺 𑀇𑀫𑀺𑀦𑀸 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. ‘‘𑀧𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀲𑀚𑀥𑀸𑀢𑀼𑀬𑀸 𑀘𑀚𑀦𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀕𑁄𑀘𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 𑀕𑁄𑀘𑀭𑀲𑀤𑁆𑀤𑁄 𑀪𑀺𑀓𑁆𑀔𑀸𑀘𑀸𑀭𑀲𑀤𑁆𑀤𑁂𑀦 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀸𑀘𑀸𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺. 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑁄, 𑀕𑁄𑀘𑀭𑀕𑀸𑀫𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀕𑀸𑀫𑁂. ‘‘𑀓𑀺’’𑀦𑁆𑀢𑀺𑀆𑀤𑀺𑀦𑀸 𑀧𑀸𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀧𑀼𑀘𑁆𑀙𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀓𑀁 𑀓𑀸𑀮𑀦𑁆𑀢𑀺 𑀓𑀲𑁆𑀫𑀺𑀁 𑀓𑀸𑀮𑁂.

𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀲𑁆𑀲𑀸𑀢𑀺 𑀯𑀺𑀳𑀸𑀭𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀲𑁆𑀲. 𑀦𑀺𑀮𑁆𑀮𑁄𑀓𑁂𑀢𑀩𑁆𑀩𑁄𑀢𑀺 𑀑𑀮𑁄𑀓𑁂𑀢𑀩𑁆𑀩𑁄. ‘‘𑀬𑀤𑀺 𑀲𑀓𑁆𑀓𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀘𑁂 𑀉𑀲𑁆𑀲𑀳𑀢𑀻𑀢𑀺 𑀏𑀢𑁆𑀣 𑀲𑀘𑁂𑀲𑀤𑁆𑀤𑁄 𑀬𑀤𑀺𑀧𑀭𑀺𑀬𑀸𑀬𑁄, 𑀉𑀲𑁆𑀲𑀳𑀢𑀺𑀲𑀤𑁆𑀤𑁄 𑀲𑀓𑁆𑀓𑁄𑀢𑀺 𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀓𑁆𑀓𑁄𑀦𑁆𑀢𑀲𑁆𑀲 𑀯𑀺𑀳𑀸𑀭𑀲𑁄𑀥𑀦𑀯𑀢𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁨. 𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸

𑁩𑁫𑁯. 𑀆𑀯𑀸𑀲𑀺𑀓𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀯𑀼𑀟𑁆𑀠𑀢𑀭𑀲𑁆𑀲 𑀆𑀕𑀦𑁆𑀢𑀼𑀓𑀲𑁆𑀲. ‘‘𑀧𑀡𑁆𑀟𑀺𑀢𑁄’’𑀢𑀺𑀆𑀤𑀺𑀦𑀸 𑀲𑀘𑁂 𑀩𑀸𑀮𑁄 ‘‘𑀲𑀫𑁆𑀫𑀚𑁆𑀚𑀸𑀳𑀺 𑀢𑀸𑀯 𑀘𑁂𑀢𑀺𑀬𑀗𑁆𑀕𑀡’’𑀦𑁆𑀢𑀺 𑀦 𑀯𑀤𑀢𑀺, 𑀲𑀫𑁆𑀫𑀚𑁆𑀚𑀦𑀺𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀯𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀪𑁂𑀲𑀚𑁆𑀚𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀲𑀳𑀸𑀯𑀥𑀸𑀭𑀡𑁂𑀦 𑀯𑀼𑀢𑁆𑀢𑀢𑁆𑀢𑀸 𑀩𑀸𑀮𑁄 ‘‘𑀓𑀭𑁄𑀳𑀺 𑀢𑀸𑀯 𑀪𑁂𑀲𑀚𑁆𑀚’’𑀦𑁆𑀢𑀺 𑀅𑀯𑀤𑀦𑁆𑀢𑁄𑀧𑀺 𑀪𑁂𑀲𑀚𑁆𑀚𑀫𑁂𑀯 𑀓𑀸𑀢𑀩𑁆𑀩𑀁. ‘‘𑀧𑀡𑁆𑀟𑀺𑀢𑁄 𑀳𑀻’’𑀢𑀺𑀆𑀤𑀺𑀦𑀸 𑀧𑀦 𑀆𑀕𑀦𑁆𑀢𑀼𑀓𑀲𑁆𑀲 𑀯𑀢𑁆𑀢𑀩𑁆𑀩𑀪𑀸𑀯𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀧𑀸𑀴𑀺𑀫𑀼𑀢𑁆𑀢𑀓𑀯𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀩𑀻𑀚𑀦𑁂𑀦𑀸𑀢𑀺 𑀩𑀻𑀚𑀦𑀺𑀬𑀸. ‘‘𑀩𑀻𑀚𑀦’’𑀦𑁆𑀢𑀺 𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, ‘‘𑀩𑀻𑀚𑀦𑀻’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑁄. ‘‘𑀩𑀻𑀚𑀺𑀢𑀩𑁆𑀩𑁄’’𑀢𑀺 𑀘 ‘‘𑀩𑀻𑀚𑀺𑀢𑀩𑁆𑀩’’𑀦𑁆𑀢𑀺 𑀘 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀩𑀻𑀚𑀺𑀬𑀢𑀺 𑀅𑀦𑁂𑀦𑀸𑀢𑀺 𑀩𑀻𑀚𑀦𑀁, 𑀩𑀻𑀚𑀺𑀬𑀢𑀺 𑀏𑀢𑀸𑀬𑀸𑀢𑀺 𑀩𑀻𑀚𑀦𑀻𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀅𑀲𑁆𑀲𑀸𑀢𑀺 𑀯𑀼𑀟𑁆𑀠𑀢𑀭𑀆𑀕𑀦𑁆𑀢𑀼𑀓𑀲𑁆𑀲. 𑀫𑀓𑁆𑀔𑁂𑀢𑀩𑁆𑀩𑀸𑀢𑀺 𑀅𑀜𑁆𑀚𑁂𑀢𑀩𑁆𑀩𑀸. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀣𑀸𑀢𑀺 𑀉𑀧𑀸𑀳𑀦𑀧𑀼𑀜𑁆𑀙𑀦𑁂. 𑀓𑀢𑁆𑀣𑀸𑀢𑀺 𑀓𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀧𑀼𑀘𑁆𑀙𑀺𑀢𑁂𑀦 𑀆𑀯𑀸𑀲𑀺𑀓𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁…𑀧𑁂… 𑀦 𑀮𑀪𑀢𑀻’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀅𑀦𑀸𑀕𑀘𑁆𑀙𑀦𑁆𑀢𑁄𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀲𑁆𑀲 𑀆𑀕𑀦𑁆𑀢𑀼𑀓𑀲𑁆𑀲 𑀯𑀢𑁆𑀢𑀁 𑀅𑀓𑀸𑀢𑀼𑀁 𑀦 𑀮𑀪𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁩. 𑀕𑀫𑀺𑀓𑀯𑀢𑁆𑀢𑀓𑀣𑀸

𑁩𑁬𑁦. 𑀕𑀫𑀺𑀓𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂. 𑀢𑀁 𑀲𑀩𑁆𑀩𑀁 𑀧𑀝𑀺𑀲𑀸𑀫𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀬𑁂𑀲𑀼 𑀧𑀸𑀲𑀸𑀡𑀧𑀺𑀝𑁆𑀞𑀺𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀉𑀧𑀘𑀺𑀓𑀸 𑀦𑀸𑀭𑁄𑀳𑀦𑁆𑀢𑀺, 𑀢𑀲𑁆𑀲𑀁 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀢𑁂𑀲𑀼 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀬𑀁 𑀓𑀢𑀲𑁂𑀦𑀸𑀲𑀦𑀁 𑀅𑀢𑁆𑀣𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀽𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀉𑀧𑀘𑀺𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀓𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀦𑁆𑀢𑀺 𑀆𑀦𑀺𑀲𑀁𑀲𑁄. 𑀑𑀯𑀲𑁆𑀲𑀓𑀕𑁂𑀳𑁂 𑀧𑀦 𑀞𑀧𑀺𑀢𑀸𑀦𑀁 𑀫𑀜𑁆𑀘𑀧𑀻𑀞𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪. 𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸

𑁩𑁬𑁨. 𑀇𑀤𑁆𑀥𑀁 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀇𑀥𑀥𑀸𑀢𑀼𑀬𑀸 𑀯𑀟𑁆𑀠𑀦𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀻’’𑀢𑀺. 𑀲𑀗𑁆𑀖𑀢𑁆𑀣𑁂𑀭𑁂 𑀦𑀺𑀲𑀺𑀦𑁆𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀣𑁂𑀭𑁂 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁂𑀢𑀺 𑀬𑁄𑀚𑀦𑀸. 𑀲𑀗𑁆𑀖𑀢𑁆𑀣𑁂𑀭𑁂𑀦 𑀅𑀚𑁆𑀛𑀺𑀝𑁆𑀞𑁂𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼𑀫𑁄𑀤𑀓𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁, 𑀧𑀘𑁆𑀙𑀸 𑀯𑀸 𑀤𑀸𑀬𑀓𑁂 𑀥𑀫𑁆𑀫𑀓𑀣𑀸𑀬 𑀫𑁄𑀤𑁂𑀢𑀻𑀢𑀺 𑀅𑀦𑀼𑀫𑁄𑀤𑀓𑁄. ‘‘𑀕𑀘𑁆𑀙𑀣𑀸’’𑀢𑀺 𑀲𑀘𑁂 𑀯𑀤𑀢𑀺 𑀅𑀦𑀼𑀫𑁄𑀤𑀓𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀅𑀦𑀼𑀫𑁄𑀤𑀓𑀲𑁆𑀲. 𑀫𑀦𑀼𑀲𑁆𑀲𑀸 𑀓𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀓𑁂𑀦𑀸’’𑀢𑀺 𑀧𑀤𑀁 ‘‘𑀓𑀸𑀭𑁂𑀦𑁆𑀢𑀻’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀢𑀲𑁆𑀲𑀸𑀢𑀺 𑀓𑀸𑀭𑀺𑀢𑀪𑀺𑀓𑁆𑀔𑀼𑀲𑁆𑀲. 𑀅𑀦𑀼𑀫𑁄𑀤𑀦𑀢𑁄𑀢𑀺 𑀅𑀦𑀼𑀫𑁄𑀤𑀦𑀓𑀸𑀭𑀡𑀸. 𑀉𑀧𑀦𑀺𑀲𑀺𑀦𑁆𑀦𑀓𑀣𑀸𑀢𑀺 𑀉𑀧𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑀸𑀦𑀁 𑀓𑀣𑀺𑀬𑀢𑀺 𑀏𑀢𑀸𑀬𑀸𑀢𑀺 𑀉𑀧𑀦𑀺𑀲𑀺𑀦𑁆𑀦𑀓𑀣𑀸. 𑀅𑀦𑀼𑀫𑁄𑀤𑀦𑀸𑀬𑀸𑀢𑀺 𑀅𑀦𑀼𑀫𑁄𑀤𑀦𑀢𑁆𑀣𑀸𑀬. 𑀅𑀚𑁆𑀛𑀺𑀝𑁆𑀞𑁄𑀯𑀸𑀢𑀺 𑀲𑀬𑀁 𑀅𑀚𑁆𑀛𑀺𑀝𑁆𑀞𑁄 𑀏𑀯. 𑀏𑀢𑁆𑀣𑀸𑀢𑀺 𑀅𑀦𑀼𑀫𑁄𑀤𑀦𑀯𑀢𑁆𑀣𑀼𑀲𑁆𑀫𑀺𑀁. ‘‘𑀲𑀜𑁆𑀚𑀸𑀢𑀯𑀘𑁆𑀘𑁄’’𑀢𑀺 𑀇𑀫𑀺𑀦𑀸 𑀯𑀘𑁆𑀘𑁄 𑀲𑀜𑁆𑀚𑀸𑀢𑁄 𑀇𑀫𑀲𑁆𑀲𑀸𑀢𑀺 𑀯𑀘𑁆𑀘𑀺𑀢𑁄𑀢𑀺 𑀓𑀢𑁆𑀯𑀸 𑀲𑀜𑁆𑀚𑀸𑀢𑀢𑁆𑀣𑁂 𑀇𑀢 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺.

𑁫. 𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸

𑁩𑁬𑁪. 𑀪𑀢𑁆𑀢𑀕𑁆𑀕𑀯𑀢𑁆𑀢𑁂𑀢𑀺 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀢𑁆𑀢𑀕𑁆𑀕𑀁, 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀁. 𑀢𑀲𑁆𑀫𑀺𑀁 𑀓𑀢𑁆𑀢𑀩𑁆𑀩𑀁 𑀯𑀢𑁆𑀢𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑀁, 𑀢𑀲𑁆𑀫𑀺𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀁 𑀦𑀸𑀫 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀲𑀧𑀼𑀢𑁆𑀢𑀤𑀸𑀭𑀸 𑀆𑀯𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀪𑁄𑀚𑁂𑀦𑁆𑀢𑀺. ‘‘𑀅𑀢𑀺𑀅𑀮𑁆𑀮𑀻𑀬𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑀼𑀧𑀔𑀚𑁆𑀚𑀸𑀢𑀺 𑀏𑀢𑁆𑀣 𑀔𑀤𑀥𑀸𑀢𑀼𑀲𑁆𑀲 𑀳𑀺𑀁𑀲𑀦𑀁 𑀦𑀸𑀫 𑀅𑀢𑀺𑀅𑀮𑁆𑀮𑀻𑀬𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀆𑀲𑀦𑁂𑀲𑀼 𑀲𑀢𑀻𑀢𑀺 𑀆𑀲𑀦𑁂𑀲𑀼 𑀲𑀦𑁆𑀢𑁂𑀲𑀼. 𑀦𑀺𑀲𑀻𑀤𑀦𑁆𑀢𑀲𑁆𑀲 𑀦𑀯𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀚𑁆𑀚𑀢𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀆𑀧𑀼𑀘𑁆𑀙𑀺𑀢𑁂 𑀅𑀦𑀦𑀼𑀚𑀸𑀦𑀦𑁆𑀢𑁄 𑀣𑁂𑀭𑁄 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀲𑀗𑁆𑀖𑀸𑀝𑀺𑀦𑁆𑀢𑀺 𑀧𑀸𑀭𑀼𑀢𑀲𑀗𑁆𑀖𑀸𑀝𑀺𑀁.

𑀧𑀢𑁆𑀢𑀥𑁄𑀯𑀦𑀉𑀤𑀓𑀦𑁆𑀢𑀺 𑀪𑀼𑀜𑁆𑀚𑀦𑀢𑁆𑀣𑀸𑀬 𑀧𑀢𑁆𑀢𑀸𑀦𑀁 𑀥𑁄𑀯𑀦𑀉𑀤𑀓𑀁. 𑀕𑀳𑁂𑀢𑀩𑁆𑀩𑀦𑁆𑀢𑀺 𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑀁.

𑀬𑀣𑀸 𑀕𑀡𑁆𑀳𑀺𑀬𑀫𑀸𑀦𑁂𑀢𑀺 𑀬𑁄𑀚𑀦𑀸. 𑀫𑀢𑁆𑀢𑀸𑀬𑀸𑀢𑀺 𑀧𑀫𑀸𑀡𑀸𑀬. 𑀲𑀩𑁆𑀩𑀺𑀆𑀤𑀻𑀲𑀼 𑀏𑀯𑀸𑀢𑀺 𑀏𑀯𑀲𑀤𑁆𑀤𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄. 𑀲𑀩𑁆𑀩𑀺𑀆𑀤𑀻𑀲𑀽𑀢𑀺 𑀲𑀩𑁆𑀩𑀺𑀢𑁂𑀮𑀉𑀢𑁆𑀢𑀭𑀺𑀪𑀗𑁆𑀕𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀬𑀦𑁆𑀢𑀺 𑀲𑀩𑁆𑀩𑀺𑀆𑀤𑀺𑀓𑀁. 𑀅𑀧𑁆𑀧𑀳𑁄𑀢𑀻𑀢𑀺 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀦𑀧𑁆𑀧𑀳𑁄𑀢𑀺. 𑀢𑀦𑁆𑀢𑀺 𑀲𑀩𑁆𑀩𑀺𑀆𑀤𑀺𑀓𑀁, 𑀲𑀫𑁆𑀧𑀸𑀤𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀤𑀺𑀲𑀁 𑀲𑀩𑁆𑀩𑀺𑀆𑀤𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀁 𑀪𑀢𑁆𑀢𑀕𑁆𑀕𑀦𑁆𑀢𑀺 𑀬𑁄𑀚𑀦𑀸. 𑀳𑀢𑁆𑀣𑀥𑁄𑀯𑀦𑀉𑀤𑀓𑀦𑁆𑀢𑀺 𑀪𑀼𑀢𑁆𑀢𑀸𑀯𑀻𑀦𑀁 𑀳𑀢𑁆𑀣𑀲𑁆𑀲 𑀥𑁄𑀯𑀦𑀉𑀤𑀓𑀁. 𑀅𑀦𑁆𑀢𑀭𑀸𑀢𑀺 𑀪𑁄𑀚𑀦𑀲𑁆𑀲 𑀫𑀚𑁆𑀛𑁂. 𑀧𑀺𑀧𑀸𑀲𑀺𑀢𑁂𑀦𑀸𑀢𑀺 𑀧𑀺𑀯𑀺𑀢𑀼𑀁 𑀇𑀘𑁆𑀙𑀦𑁆𑀢𑁂𑀦. 𑀕𑀮𑁂𑀢𑀺 𑀓𑀡𑁆𑀞𑁂.

𑀦𑀺𑀯𑀢𑁆𑀢𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀞𑀸𑀦𑀸 𑀦𑀺𑀯𑀢𑁆𑀢𑀦𑁆𑀢𑁂𑀦𑀸𑀢𑀺 𑀆𑀳 ‘‘𑀪𑀢𑁆𑀢𑀕𑁆𑀕𑀢𑁄’’𑀢𑀺. 𑀓𑀣𑀁 𑀓𑁂𑀦𑀸𑀓𑀸𑀭𑁂𑀦 𑀦𑀺𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀦𑀯𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀦𑀺𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀫𑁆𑀩𑀸𑀥𑁂𑀲𑀼 𑀳𑀻’’𑀢𑀺𑀆𑀤𑀺. 𑀦𑀺𑀓𑁆𑀔𑀫𑀦𑁄𑀓𑀸𑀲𑁄𑀢𑀺 𑀧𑀞𑀫𑀢𑀭𑀁 𑀦𑀺𑀓𑁆𑀔𑀦𑁆𑀢𑁄𑀓𑀸𑀲𑁄. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀬𑀸. 𑀥𑀼𑀭𑁂𑀢𑀺 𑀕𑁂𑀳𑀤𑁆𑀯𑀸𑀭𑀲𑁆𑀲 𑀲𑀫𑀻𑀧𑁂. 𑀥𑀼𑀭𑀲𑀤𑁆𑀤𑁄 𑀳𑀺 𑀇𑀥 𑀲𑀫𑀻𑀧𑀯𑀸𑀘𑀓𑁄. 𑀦𑀯𑀓𑀸 𑀅𑀦𑁆𑀢𑁄𑀕𑁂𑀳𑁂 𑀘𑁂 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀦𑁆𑀢𑀭𑁂𑀦𑀸𑀢𑀺 𑀪𑀺𑀓𑁆𑀔𑀽𑀦𑀁 𑀯𑀺𑀯𑀭𑁂𑀦, 𑀫𑀚𑁆𑀛𑁂𑀦 𑀯𑀸. 𑀯𑀺𑀭𑀴𑀸𑀬𑀸𑀢𑀺 𑀢𑀦𑀼𑀓𑀸𑀬.

𑁬. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸

𑁩𑁬𑁬. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀓𑀧𑁆𑀧𑀸𑀲𑀁 𑀯𑀸 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀜𑁆𑀘𑀸𑀢𑀺 𑀬𑀜𑁆𑀘 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁, 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀭𑁄𑀦𑁆𑀢𑀻 𑀞𑀺𑀢𑀸 𑀯𑀸𑀢𑀺 𑀓𑀭𑁄𑀦𑁆𑀢𑀻 𑀳𑀼𑀢𑁆𑀯𑀸 𑀞𑀺𑀢𑀸 𑀯𑀸. 𑀢𑀦𑁆𑀢𑀺 𑀓𑀫𑁆𑀫𑀁. 𑀦 𑀘 𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀬𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀢𑁆𑀣𑀺𑀬𑀸 𑀏𑀯 𑀫𑀼𑀔𑀁 𑀦 𑀉𑀮𑁆𑀮𑁄𑀓𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀇𑀢𑁆𑀣𑀻 𑀯𑀸 𑀳𑁄𑀢𑀽’’𑀢𑀺𑀆𑀤𑀺. ‘‘𑀪𑀺𑀓𑁆𑀔𑀸𑀤𑀸𑀦𑀲𑀫𑀬𑁂’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀲𑁆𑀫𑀺𑀁 𑀲𑀫𑀬𑁂 𑀑𑀮𑁄𑀓𑁂𑀦𑁆𑀢𑁄𑀧𑀺 𑀦𑀢𑁆𑀣𑀺 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀪𑀺𑀓𑁆𑀔𑀸𑀬 𑀤𑀤𑀫𑀸𑀦𑀸𑀬 𑀲𑀩𑁆𑀩𑀓𑀸𑀮𑀫𑁆𑀧𑀺 𑀦 𑀑𑀮𑁄𑀓𑁂𑀢𑀩𑁆𑀩𑀦𑁆𑀢𑀺 𑀅𑀦𑀺𑀘𑁆𑀙𑀺𑀢𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺.

𑁭. 𑀆𑀭𑀜𑁆𑀜𑀺𑀓𑀯𑀢𑁆𑀢𑀓𑀣𑀸

𑁩𑁬𑁮. 𑀆𑀭𑀜𑁆𑀜𑀺𑀓𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑁂𑀦𑀸𑀲𑀦𑀸 𑀑𑀢𑀭𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀯𑀺𑀳𑀸𑀭𑀸𑀪𑀸𑀯𑀢𑁄 𑀲𑁂𑀦𑀸𑀲𑀦𑀁 𑀦𑀸𑀫 𑀯𑀲𑀦𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀲𑀦𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺.

𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀣𑀁 𑀧𑀢𑁆𑀢𑁄 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀘𑁂 𑀩𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀢𑁆𑀢𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀥𑁄𑀯𑀺𑀢𑁆𑀯𑀸 𑀓𑀢𑁆𑀯𑀸𑀢𑀺 𑀧𑀤𑁂𑀲𑀼 ‘‘𑀧𑀢𑁆𑀢𑀁 𑀯𑁄𑀤𑀓’’𑀦𑁆𑀢𑀺 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀫𑁆𑀧𑀻𑀢𑀺 𑀯𑁂𑀴𑀼𑀦𑀸𑀴𑀺𑀓𑀫𑁆𑀧𑀺. 𑀲𑀫𑀻𑀧𑁂𑀢𑀺 𑀆𑀭𑀜𑁆𑀜𑀓𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑀫𑀻𑀧𑁂. 𑀬𑀣𑀸 𑀘 𑀆𑀭𑀜𑁆𑀜𑀓𑀲𑁆𑀲 𑀅𑀭𑀡𑀺𑀲𑀳𑀺𑀢𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀓𑀦𑁆𑀢𑀸𑀭𑀁 𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀅𑀭𑀡𑀺𑀲𑀳𑀺𑀢𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀕𑀡𑀯𑀸𑀲𑀺𑀦𑁄𑀢𑀺 𑀕𑀡𑁂𑀦 𑀲𑀳 𑀯𑀸𑀲𑀺𑀦𑁄, 𑀆𑀭𑀜𑁆𑀜𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀅𑀭𑀡𑀺𑀲𑀳𑀺𑀢𑁂𑀦. ‘‘𑀦𑀓𑁆𑀔𑀢𑁆𑀢𑀸𑀦𑁂𑀯 𑀦𑀓𑁆𑀔𑀢𑁆𑀢𑀧𑀤𑀸𑀦𑀻’’𑀢𑀺 𑀇𑀫𑀺𑀦𑀸 𑀅𑀲𑁆𑀲𑀬𑀼𑀚𑀸𑀤𑀺𑀦𑀓𑁆𑀔𑀢𑁆𑀢𑀸𑀦𑁂𑀯 (𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁫𑁮-𑁬𑁦 𑀕𑀸𑀣𑀸𑀲𑀼) 𑀤𑀺𑀲𑀸𑀪𑀸𑀕𑀚𑀸𑀦𑀦𑀲𑁆𑀲, 𑀘 𑀲𑀫𑀬𑀚𑀸𑀦𑀦𑀲𑁆𑀲 𑀘 𑀓𑀸𑀭𑀡𑀢𑁆𑀢𑀸 𑀦𑀓𑁆𑀔𑀢𑁆𑀢𑀧𑀤𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑁮. 𑀲𑁂𑀦𑀸𑀲𑀦𑀯𑀢𑁆𑀢𑀓𑀣𑀸

𑁩𑁬𑁯. 𑀲𑁂𑀦𑀸𑀲𑀦𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀤𑁆𑀯𑀸𑀭𑀁 𑀦𑀸𑀫𑀸𑀢𑀺 𑀫𑀳𑀸𑀤𑁆𑀯𑀸𑀭𑀁. 𑀫𑀳𑀸𑀯𑀴𑀜𑁆𑀚𑀦𑁆𑀢𑀺 𑀫𑀳𑀦𑁆𑀢𑁂𑀳𑀺 𑀚𑀦𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀤𑁆𑀯𑀸𑀭𑁂. 𑀆𑀧𑀼𑀘𑁆𑀙𑀺𑀢𑁆𑀯𑀸𑀯𑀸𑀢𑀺 𑀯𑀼𑀟𑁆𑀠𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀯, 𑀲𑀪𑀸𑀕𑀲𑁆𑀲 𑀯𑀼𑀟𑁆𑀠𑀢𑀭𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀬𑀣𑀸𑀲𑀼𑀔𑀁 𑀯𑀺𑀳𑀭𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀭𑀺𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀧𑀭𑀺𑀫𑀼𑀔𑀁 𑀯𑀢𑁆𑀢𑀺𑀢𑀩𑁆𑀩𑀁.

𑁯. 𑀚𑀦𑁆𑀢𑀸𑀖𑀭𑀯𑀢𑁆𑀢𑀸𑀤𑀺𑀓𑀣𑀸

𑁩𑁭𑁧. 𑀚𑀦𑁆𑀢𑀸𑀖𑀭𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀩𑀳𑀺𑀚𑀕𑀢𑀻𑀢𑀺 𑀩𑀳𑀺𑀆𑀮𑀺𑀦𑁆𑀤𑁄.

𑁩𑁭𑁩. 𑀆𑀘𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀉𑀤𑀓𑀁 𑀦𑀻𑀳𑀭𑀺𑀢𑁆𑀯𑀸. 𑀆𑀘𑀫𑀺𑀢𑀩𑁆𑀩𑀦𑁆𑀢𑀺 𑀥𑁄𑀯𑀺𑀢𑀩𑁆𑀩𑀁. ‘‘𑀆𑀧𑀼𑀩𑁆𑀩𑁄 𑀘𑀫𑀼 𑀥𑁄𑀯𑀦𑁂’’𑀢𑀺 𑀳𑀺 𑀥𑀸𑀢𑀼𑀧𑀸𑀞𑁂𑀲𑀼 𑀯𑀼𑀢𑁆𑀢𑀁. 𑀇𑀤𑀁 𑀅𑀢𑀺𑀯𑀺𑀯𑀝𑀦𑁆𑀢𑀺 𑀇𑀤𑀁 𑀞𑀸𑀦𑀁 𑀅𑀢𑀺𑀯𑀺𑀯𑀝𑀁, 𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀤𑀓𑀁 𑀅𑀮𑀪𑀦𑁆𑀢𑀲𑁆𑀲𑁂𑀯𑀸𑀢𑀺 𑀉𑀤𑀓𑀁 𑀅𑀮𑀪𑀦𑁆𑀢𑁂𑀬𑁂𑀯.

𑁩𑁭𑁪. 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀬𑀦𑁆𑀢𑀺 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀢𑁄 𑀯𑀘𑁆𑀘𑀓𑀭𑀡𑀁. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀏𑀯 𑀞𑀸𑀦𑁂. ‘‘𑀦 𑀨𑀭𑀼𑀲𑁂𑀦 𑀓𑀝𑁆𑀞𑁂𑀦𑀸’’𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀔𑀭𑀓𑀝𑁆𑀞𑀫𑁂𑀯, 𑀨𑀸𑀮𑀺𑀢𑀓𑀝𑁆𑀞𑀸𑀤𑀬𑁄𑀧𑀺 𑀙𑀯𑀺𑀅𑀯𑀮𑁂𑀔𑀦𑀓𑀝𑁆𑀞𑀸 𑀨𑀭𑀼𑀲𑀸𑀬𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀨𑀸𑀮𑀺𑀢𑀓𑀝𑁆𑀞𑁂𑀦 𑀯𑀸’’𑀢𑀺𑀆𑀤𑀺. 𑀧𑀯𑀺𑀝𑁆𑀞𑀲𑁆𑀲𑀸𑀢𑀺 𑀯𑀘𑁆𑀘𑀓𑀼𑀝𑀺𑀁 𑀧𑀯𑀺𑀝𑁆𑀞𑀲𑁆𑀲.

𑀲𑀩𑁆𑀩𑀲𑀸𑀥𑀸𑀭𑀡𑀝𑁆𑀞𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁, 𑀲𑀩𑁆𑀩𑁂𑀳𑀺 𑀯𑀸 𑀲𑀸𑀥𑀸𑀭𑀡𑀁 𑀯𑀘𑁆𑀘𑀓𑀼𑀝𑀺𑀲𑀗𑁆𑀔𑀸𑀢𑀁 𑀞𑀸𑀦𑀁. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀲𑀩𑁆𑀩𑀲𑀸𑀥𑀸𑀭𑀡𑁂 𑀞𑀸𑀦𑁂. 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑁄 𑀦𑀺𑀩𑀤𑁆𑀥𑀕𑀫𑀦𑀢𑁆𑀣𑀸𑀬 𑀓𑀢𑀁 𑀬𑀁 𑀞𑀸𑀦𑀁 𑀯𑀸 𑀬𑀁 𑀧𑀼𑀕𑁆𑀕𑀮𑀺𑀓𑀝𑁆𑀞𑀸𑀦𑀁 𑀯𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀉𑀳𑀢𑀸𑀢𑀺 𑀏𑀢𑁆𑀣 𑀉𑀧𑀼𑀩𑁆𑀩𑁄 𑀳𑀤𑀥𑀸𑀢𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀳𑀤𑀺𑀢𑀸’’𑀢𑀺. ‘‘𑀳𑀤 𑀓𑀭𑀻𑀲𑁄𑀲𑁆𑀲𑀕𑁆𑀕𑁂’’𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀧𑀸𑀡𑀺𑀦𑀻 𑁯𑁭𑁭 𑀥𑀸𑀢𑀼𑀧𑀸𑀞𑁂; 𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁫 𑀤𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀢𑁆𑀢𑀸 𑀯𑀘𑁆𑀘𑀓𑀽𑀧𑀢𑁄 𑀩𑀳𑀺 𑀓𑀭𑀻𑀲𑀲𑁆𑀲 𑀑𑀲𑁆𑀲𑀚𑁆𑀚𑀦𑀦𑁆𑀢𑀺 𑀆𑀳 ‘‘𑀩𑀳𑀺 𑀯𑀘𑁆𑀘𑀫𑀓𑁆𑀔𑀺𑀢𑀸’’𑀢𑀺. 𑀥𑁄𑀯𑀺𑀢𑀩𑁆𑀩𑀸𑀢𑀺 𑀉𑀤𑀓𑁂𑀦 𑀥𑁄𑀯𑀺𑀢𑀩𑁆𑀩𑀸. 𑀏𑀢𑀫𑁆𑀧𑀻𑀢𑀺 𑀉𑀤𑀓𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀯𑀢𑁆𑀢𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀯𑀢𑁆𑀢𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.