𑁩. 𑀕𑀫𑀺𑀓𑀯𑀢𑁆𑀢𑀓𑀣𑀸

𑁩𑁬𑁦. 𑀕𑀫𑀺𑀓𑀯𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂. 𑀢𑀁 𑀲𑀩𑁆𑀩𑀁 𑀧𑀝𑀺𑀲𑀸𑀫𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀬𑁂𑀲𑀼 𑀧𑀸𑀲𑀸𑀡𑀧𑀺𑀝𑁆𑀞𑀺𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀉𑀧𑀘𑀺𑀓𑀸 𑀦𑀸𑀭𑁄𑀳𑀦𑁆𑀢𑀺, 𑀢𑀲𑁆𑀲𑀁 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀯𑀸 𑀢𑁂𑀲𑀼 𑀧𑀸𑀲𑀸𑀡𑀢𑁆𑀣𑀫𑁆𑀪𑁂𑀲𑀼 𑀯𑀸 𑀬𑀁 𑀓𑀢𑀲𑁂𑀦𑀸𑀲𑀦𑀁 𑀅𑀢𑁆𑀣𑀺, 𑀢𑀁 𑀅𑀦𑀸𑀧𑀼𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀽𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀉𑀧𑀘𑀺𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑁂 𑀓𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀦𑁆𑀢𑀺 𑀆𑀦𑀺𑀲𑀁𑀲𑁄. 𑀑𑀯𑀲𑁆𑀲𑀓𑀕𑁂𑀳𑁂 𑀧𑀦 𑀞𑀧𑀺𑀢𑀸𑀦𑀁 𑀫𑀜𑁆𑀘𑀧𑀻𑀞𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.