𑁭. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀁

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸

𑁩𑁩𑁦. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸𑀢𑀺 𑀏𑀢𑁆𑀣 𑀅𑀪𑀺𑀧𑀼𑀩𑁆𑀩𑁄 𑀜𑀸𑀢𑀲𑀤𑁆𑀤𑁄 𑀧𑀸𑀓𑀝𑀢𑁆𑀣𑁄𑀢𑀺 𑀆𑀳 ‘‘𑀧𑀸𑀓𑀝𑀸 𑀧𑀸𑀓𑀝𑀸’’𑀢𑀺. 𑀓𑀸𑀴𑀼𑀤𑀸𑀬𑀺𑀧𑁆𑀧𑀪𑀽𑀢𑀬𑁄𑀢𑀺 𑀓𑀸𑀴𑀼𑀤𑀸𑀬𑀺𑀆𑀤𑀬𑁄. 𑀧𑀭𑀺𑀯𑀸𑀭𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀤𑀽𑀢𑀸 𑀘 𑀅𑀜𑁆𑀜𑁂 𑀘 𑀩𑀳𑀽 𑀚𑀦𑀸 𑀲𑀓𑁆𑀬𑀓𑀼𑀫𑀸𑀭𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀫𑁆𑀳𑁂𑀲𑀽𑀢𑀺 𑀲𑀓𑁆𑀬𑀓𑀼𑀮𑀲𑀗𑁆𑀔𑀸𑀢𑁂𑀲𑀼 𑀅𑀫𑁆𑀳𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. ‘‘𑀓𑀼𑀮𑀢𑁄’’𑀢𑀺 𑀇𑀫𑀺𑀦𑀸 ‘‘𑀓𑀼𑀮𑀸’’𑀢𑀺 𑀏𑀢𑁆𑀣 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀖𑀭𑀸𑀯𑀸𑀲𑀢𑁆𑀣𑀦𑁆𑀢𑀺 𑀏𑀢𑁆𑀣 𑀖𑀭𑁂 𑀆𑀯𑀲𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀓𑀺𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀖𑀭𑀸𑀯𑀸𑀲𑁂 𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀬𑀦𑁆𑀢𑀺 𑀬𑀁𑀓𑀺𑀜𑁆𑀘𑀺. 𑀉𑀤𑀓𑀁 𑀦𑀺𑀦𑁆𑀦𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀉𑀤𑀓𑀁 𑀦𑀻𑀳𑀭𑀺𑀢𑁆𑀯𑀸 𑀦𑁂𑀢𑀩𑁆𑀩𑀁 𑀅𑀧𑀦𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀉𑀤𑀓𑀁 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀼𑀲𑀁 𑀳𑁄𑀢𑀻’’𑀢𑀺. 𑀲𑀼𑀲𑀦𑁆𑀢𑀺 𑀲𑀼𑀓𑁆𑀔𑀁. 𑀢𑀺𑀡𑀸𑀦𑀻𑀢𑀺 𑀲𑀲𑁆𑀲𑀤𑀽𑀲𑀓𑀸𑀦𑀺 𑀢𑀺𑀡𑀸𑀦𑀺. ‘‘𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀻’’𑀢𑀺 𑀇𑀫𑀺𑀦𑀸 𑀦𑀺𑀤𑁆𑀥𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀥𑀼𑀥𑀸𑀢𑀼𑀬𑀸 𑀧𑀧𑁆𑀨𑁄𑀝𑀦𑀥𑀁𑀲𑀦𑀢𑁆𑀣𑁂 𑀤𑀲𑁆𑀲𑁂𑀢𑀺. 𑀪𑀼𑀲𑀸𑀢𑀺 𑀲𑀲𑁆𑀲𑀦𑀸𑀴𑀤𑀡𑁆𑀟𑀸, 𑀢𑁂𑀳𑀺 𑀫𑀺𑀲𑁆𑀲𑀸 𑀧𑀮𑀸𑀮𑀸 𑀪𑀼𑀲𑀺𑀓𑀸. 𑀑𑀨𑀼𑀡𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀨𑀼𑀡𑀥𑀸𑀢𑀼𑀬𑀸 𑀅𑀯𑀓𑀺𑀭𑀡𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀦𑁂𑀢𑀩𑁆𑀩’’𑀦𑁆𑀢𑀺. 𑀢𑁆𑀯𑀜𑁆𑀜𑁂𑀯 𑀖𑀭𑀸𑀯𑀸𑀲𑀢𑁆𑀣𑁂𑀦 𑀉𑀧𑀚𑀸𑀦𑀸𑀢𑀺 𑀏𑀢𑁆𑀣 𑀖𑀭𑀸𑀯𑀸𑀲𑀢𑁆𑀣𑁂𑀦𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀉𑀧𑀚𑀸𑀦𑀸𑀢𑀺 𑀉𑀧𑀢𑁆𑀬𑀽𑀧𑀲𑀕𑁆𑀕𑁄 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑁄, 𑀳𑀺𑀯𑀺𑀪𑀢𑁆𑀢𑀺 𑀘 𑀮𑁄𑀧𑁄 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁆𑀯𑀜𑁆𑀜𑁂𑀯 𑀖𑀭𑀸𑀯𑀸𑀲𑀢𑁆𑀣𑀁 𑀚𑀸𑀦𑀸𑀳𑀻’’𑀢𑀺. 𑀅𑀳𑀦𑁆𑀢𑀺 𑀪𑀤𑁆𑀤𑀺𑀬𑀓𑀼𑀫𑀸𑀭𑀦𑀸𑀫𑀓𑁄 𑀅𑀳𑀁. 𑀢𑀬𑀸𑀢𑀺 𑀅𑀦𑀼𑀭𑀼𑀤𑁆𑀥𑀓𑀼𑀫𑀸𑀭𑀦𑀸𑀫𑀓𑁂𑀦 𑀢𑀬𑀸. ‘‘𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀦𑁆𑀢𑀺 ‘‘𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀁.

𑁩𑁩𑁧. 𑀦𑀺𑀧𑁆𑀧𑀸𑀢𑀺𑀢𑀸𑀢𑀺 𑀏𑀢𑁆𑀣 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀫𑀸𑀧𑀺𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀓𑁆𑀔𑀸𑀫𑀺𑀢𑀸’’𑀢𑀺. 𑀫𑀸𑀦𑀲𑁆𑀲𑀺𑀦𑁄𑀢𑀺 𑀏𑀢𑁆𑀣 𑀫𑀸𑀦𑀁 𑀲𑀬𑀦𑁆𑀢𑀺 𑀦𑀺𑀲𑁆𑀲𑀬𑀦𑁆𑀢𑀻𑀢𑀺 𑀫𑀸𑀦𑀲𑁆𑀲𑀺𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀦𑀲𑁆𑀲𑀬𑀺𑀦𑁄’’𑀢𑀺.

𑁩𑁩𑁨. 𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸𑀢𑀺 𑀏𑀢𑁆𑀣 𑀅𑀦𑁆𑀢𑀭𑀲𑀤𑁆𑀤𑁄 𑀘𑀺𑀢𑁆𑀢𑀯𑀸𑀘𑀓𑁄, 𑀢𑁄𑀧𑀘𑁆𑀘𑀬𑁄 𑀘 𑀲𑀢𑁆𑀢𑀫𑁆𑀬𑀢𑁆𑀣𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲 𑀘𑀺𑀢𑁆𑀢𑁂’’𑀢𑀺. 𑀓𑀲𑁆𑀫𑀸 𑀓𑁄𑀧𑀸 𑀦 𑀲𑀦𑁆𑀢𑀻𑀢𑀺 𑀆𑀳 ‘‘𑀢𑀢𑀺𑀬𑀫𑀕𑁆𑀕𑁂𑀦 𑀲𑀫𑀽𑀳𑀢𑀢𑁆𑀢𑀸’’𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀤𑁄𑀲𑀲𑁆𑀲 𑀲𑀫𑀽𑀳𑀢𑀢𑁆𑀢𑀸 𑀬𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑁂 𑀓𑁄𑀧𑀸 𑀦 𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀺 𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄𑀢𑀺 𑀏𑀢𑁆𑀣 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀧𑀦 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀯𑀺𑀪𑀯𑁄𑀢𑀺 𑀧𑀸𑀧𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑀼 𑀧𑀸𑀴𑀺𑀬𑀁 ‘‘𑀯𑀺𑀪𑀯𑁄’’𑀢𑀺 𑀦𑀢𑁆𑀣𑀺, ‘‘𑀅𑀪𑀯𑁄’’𑀢𑀺 𑀏𑀯 𑀅𑀢𑁆𑀣𑀺, 𑀅𑀣 𑀓𑀲𑁆𑀫𑀸 ‘‘𑀯𑀺𑀪𑀯𑁄𑀢𑀺 𑀅𑀪𑀯𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀪𑀯𑁄𑀢𑀺 𑀘 𑀅𑀪𑀯𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀫𑁂𑀯𑀸’’𑀢𑀺. 𑀇𑀫𑀺𑀦𑀸 𑀲𑀤𑁆𑀤𑀢𑁄𑀬𑁂𑀯 𑀦𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀸 𑀏𑀲𑀸 𑀪𑀯𑀸𑀪𑀯𑀢𑀸 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑁂𑀓𑀧𑁆𑀧𑀓𑀸𑀭𑀸’’𑀢𑀺 𑀇𑀫𑀺𑀦𑀸 𑀇𑀢𑀺𑀲𑀤𑁆𑀤𑀲𑁆𑀲 𑀧𑀓𑀸𑀭𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑀢𑀽𑀳𑀺𑀧𑀺 𑀫𑀕𑁆𑀕𑁂𑀳𑀺 𑀯𑀻𑀢𑀺𑀯𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑀲𑁆𑀲.

𑁩𑁩𑁩. 𑀅𑀳𑀺𑀫𑁂𑀔𑀮𑀺𑀓𑀸𑀢𑀺 𑀫𑁂𑀔𑀮𑀸 𑀯𑀺𑀬 𑀫𑁂𑀔𑀮𑀺𑀓𑀸, 𑀅𑀳𑀺𑀫𑁂𑀯 𑀫𑁂𑀔𑀮𑀺𑀓𑀸 𑀅𑀳𑀺𑀫𑁂𑀔𑀮𑀺𑀓𑀸. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀺𑀁 𑀓𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺.

𑁩𑁩𑁪. 𑀲𑀫𑁆𑀫𑀦𑁆𑀦𑀢𑀻𑀢𑀺 𑀏𑀢𑁆𑀣 ‘‘𑀲𑀫𑁆𑀫𑀸𑀦𑁂𑀢𑀻’’𑀢𑀺 𑀘𑀼𑀭𑀸𑀤𑀺𑀕𑀡𑀺𑀓𑀥𑀸𑀢𑀼𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀤𑀺𑀯𑀸𑀤𑀺𑀕𑀡𑀺𑀓𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀫𑀸𑀦𑁂𑀢𑀻’’𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀧𑀸𑀴𑀺𑀦𑀬𑁄. 𑀲𑀫𑁆𑀫𑀸𑀦𑁂𑀢𑀻𑀢𑀺 𑀲𑀫𑁆𑀫𑀸𑀦𑀁 𑀓𑀭𑁄𑀢𑀺. 𑀬𑀦𑁆𑀢𑀺 𑀓𑀫𑁆𑀫𑀁. 𑀲𑁄𑀢𑀺 𑀲𑀢𑁆𑀣𑀸. 𑀇𑀫𑀺𑀦𑀸 𑀬𑀁 𑀢𑀼𑀫𑁄𑀢𑀺 𑀏𑀢𑁆𑀣 𑀢𑀼𑀫𑁄𑀢𑀺 𑀭𑀼𑀴𑁆𑀳𑀻𑀲𑀤𑁆𑀤𑁄 𑀇𑀥 ‘‘𑀲𑁄’’𑀢𑀺 𑀲𑀩𑁆𑀩𑀦𑀸𑀫𑀲𑀤𑁆𑀤𑁂𑀦 𑀲𑀤𑀺𑀲𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀓𑀸𑀲𑀦𑀻𑀬𑀓𑀫𑁆𑀫𑀸𑀤𑀺𑀓𑀣𑀸

𑁩𑁩𑁬. ‘‘𑀔𑁂𑀴𑀲𑀤𑀺𑀲𑀸’’𑀢𑀺 𑀇𑀫𑀺𑀦𑀸 𑀫𑀺𑀘𑁆𑀙𑀸𑀚𑀻𑀯𑁂𑀦 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀸𑀦𑀁 𑀲𑀤𑀺𑀲𑀽𑀧𑀘𑀸𑀭𑁂𑀦 𑀔𑁂𑀴𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀔𑁂𑀴𑀸 𑀯𑀺𑀬𑀸𑀢𑀺 𑀔𑁂𑀴𑁄, 𑀫𑀺𑀘𑁆𑀙𑀸𑀚𑀻𑀯𑀧𑀘𑁆𑀘𑀬𑀸, 𑀔𑁂𑀴𑁂 𑀅𑀲𑀢𑀺 𑀪𑀓𑁆𑀔𑀢𑀺 𑀅𑀚𑁆𑀛𑁄𑀳𑀭𑀢𑀻𑀢𑀺 𑀔𑁂𑀴𑀸𑀲𑀓𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀏𑀢𑀭𑀳𑀺 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀔𑁂𑀴𑀸𑀧𑀓𑀲𑁆𑀲𑀸’’𑀢𑀺 𑀑𑀝𑁆𑀞𑀚𑁂𑀦 𑀧𑀞𑀫𑀓𑁆𑀔𑀭𑁂𑀦 𑀧𑀸𑀞𑁄 𑀅𑀢𑁆𑀣𑀺.

𑁩𑁪𑁦. 𑀧𑀢𑁆𑀣𑀤𑁆𑀥𑁂𑀦𑀸𑀢𑀺 𑀏𑀢𑁆𑀣 𑀪𑀽𑀲𑁄 𑀣𑀤𑁆𑀥𑁄 𑀧𑀢𑁆𑀣𑀤𑁆𑀥𑁄, 𑀩𑀸𑀴𑁆𑀳𑀣𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀘𑁆𑀘𑀮𑁂𑀦𑀸’’𑀢𑀺. 𑀧𑁄𑀢𑁆𑀣𑀓𑀭𑀽𑀧𑀲𑀤𑀺𑀲𑁂𑀦𑀸𑀢𑀺 𑀏𑀢𑁆𑀣 𑀧𑁄𑀢𑁆𑀣𑀓𑀭𑀽𑀧𑀁 𑀦𑀸𑀫 𑀯𑀢𑁆𑀣𑀤𑀦𑁆𑀢𑀸𑀤𑀺𑀫𑀬𑀁, 𑀢𑁂𑀦 𑀲𑀤𑀺𑀲𑁄 𑀧𑁄𑀢𑁆𑀣𑀓𑀭𑀽𑀧𑀲𑀤𑀺𑀲𑁄, 𑀢𑁂𑀦.

𑁩𑁪𑁨. 𑀭𑀸𑀚𑀜𑀸𑀢𑀓𑀸 𑀦𑀸𑀫𑀸𑀢𑀺 𑀏𑀢𑁆𑀣 𑀭𑀜𑁆𑀜𑀸 𑀚𑀸𑀦𑀺𑀬𑀦𑁆𑀢𑀺 ‘‘𑀅𑀫𑁆𑀳𑀸𑀓𑀁 𑀕𑀭𑀽’’𑀢𑀺 𑀭𑀸𑀚𑀜𑀸𑀢𑀸, 𑀢𑁂𑀬𑁂𑀯 𑀭𑀸𑀚𑀜𑀸𑀢𑀓𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀤𑀢𑁆𑀣𑀁 𑀅𑀥𑀺𑀧𑁆𑀧𑀸𑀬𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀸𑀚𑀸 𑀅𑀫𑁆𑀳𑁂 𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀧𑀳𑀝𑁆𑀞𑀓𑀡𑁆𑀡𑀯𑀸𑀮𑁄𑀢𑀺 𑀧𑀳𑀝𑁆𑀞𑁄 𑀓𑀡𑁆𑀡𑁄 𑀘 𑀯𑀸𑀮𑁄 𑀘 𑀏𑀢𑀲𑁆𑀲𑀸𑀢𑀺 𑀧𑀳𑀝𑁆𑀞𑀓𑀡𑁆𑀡𑀯𑀸𑀮𑁄. 𑀩𑀦𑁆𑀥𑀦𑀺𑀘𑁆𑀘𑀮𑁂𑀢𑀺 𑀭𑀚𑁆𑀚𑀼𑀯𑀮𑁆𑀮𑀻𑀳𑀺 𑀩𑀦𑁆𑀥𑁄 𑀯𑀺𑀬 𑀦𑀺𑀘𑁆𑀘𑀮𑁂, 𑀧𑀳𑀝𑁆𑀞𑀓𑀡𑁆𑀡𑀯𑀸𑀮𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀅𑀪𑀺𑀥𑀸𑀯𑀻’’𑀢𑀺 𑀧𑀤𑁂 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀤𑀼𑀓𑁆𑀔𑀜𑁆𑀳𑀺 𑀓𑀼𑀜𑁆𑀚𑀭 𑀦𑀸𑀕𑀫𑀸𑀲𑀤𑁄𑀢𑀺 𑀏𑀢𑁆𑀣 𑀓𑀼𑀜𑁆𑀚𑀭𑀲𑀤𑁆𑀤𑀲𑁆𑀲 𑀆𑀫𑀦𑁆𑀢𑀦𑀧𑀤𑀪𑀸𑀯𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀪𑁄 𑀓𑀼𑀜𑁆𑀚𑀭𑀸’’𑀢𑀺. 𑀦𑀸𑀕𑀲𑀤𑁆𑀤𑀲𑁆𑀲 𑀅𑀳𑀺𑀦𑀸𑀕𑀳𑀢𑁆𑀣𑀺𑀦𑀸𑀕𑁂𑀲𑀼 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀦𑀸𑀕’’𑀦𑁆𑀢𑀺. 𑀆𑀲𑀤𑁄𑀢𑀺 𑀧𑀤𑀲𑁆𑀲 𑀆𑀓𑁄𑀥𑁂𑀦 𑀲𑀤𑀦𑀁 𑀉𑀧𑀕𑀫𑀦𑀁 𑀆𑀲𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀥𑀓𑀘𑀺𑀢𑁆𑀢𑁂𑀦 𑀉𑀧𑀕𑀫𑀦𑀁 𑀦𑀸𑀫𑀸’’𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀏𑀢𑀭𑀳𑀺 𑀘 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀓𑀸𑀭𑀡𑀁. 𑀤𑀼𑀓𑁆𑀔𑀁 𑀳𑀻𑀢𑀺 𑀳𑀺𑀲𑀤𑁆𑀤𑁄 𑀧𑀤𑀧𑀽𑀭𑀡𑀫𑀢𑁆𑀢𑀁, 𑀅𑀣 𑀯𑀸 𑀤𑀼𑀓𑁆𑀔𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀩𑀼𑀤𑁆𑀥𑀦𑀸𑀕𑀁 𑀖𑀸𑀢𑀓𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀦𑀸𑀕𑀁 𑀳𑀦𑀢𑀻𑀢𑀺 𑀦𑀸𑀕𑀳𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀧𑀝𑀺𑀓𑀼𑀝𑀺𑀬𑁄𑀯 𑀑𑀲𑀓𑁆𑀓𑀻𑀢𑀺 𑀏𑀢𑁆𑀣 𑀢𑀣𑀸𑀕𑀢𑀲𑁆𑀲 𑀧𑀝𑀺𑀫𑀼𑀔𑀁 𑀓𑀼𑀝𑁂𑀦 𑀕𑀫𑀦𑀫𑁂𑀢𑀲𑁆𑀲𑀸𑀢𑀺 𑀧𑀝𑀺𑀓𑀼𑀝𑀺𑀬𑁄, 𑀧𑀝𑀺𑀓𑀼𑀝𑀺𑀬𑁄 𑀏𑀯 𑀳𑀼𑀢𑁆𑀯𑀸 𑀑𑀲𑀓𑁆𑀓𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀣𑀸𑀕𑀢𑀸𑀪𑀺𑀫𑀼𑀔𑁄𑀬𑁂𑀯 𑀧𑀺𑀝𑁆𑀞𑀺𑀫𑁂𑀳𑀺 𑀧𑀸𑀤𑁂𑀳𑀺 𑀑𑀲𑀓𑁆𑀓𑀻’’𑀢𑀺. ‘‘𑀦 𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀮𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀽𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀧𑀸𑀡𑀺𑀦𑀻 𑁧𑁫𑁩𑁯 𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁮 𑀤𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑁂𑀲𑀼 𑀅𑀢𑁆𑀣𑁂𑀲𑀼 𑀇𑀥 𑀤𑀲𑁆𑀲𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀮𑀓𑁆𑀔𑀺𑀢𑀩𑁆𑀩𑁄𑀢𑀺 𑀅𑀜𑁆𑀜𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀦 𑀮𑀓𑁆𑀔𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀡𑁆𑀬𑀧𑀘𑁆𑀘𑀬𑁄 𑀓𑀢𑁆𑀢𑀼𑀓𑀫𑁆𑀫𑁂𑀲𑀼 𑀳𑁄𑀢𑀺, 𑀬𑀓𑀸𑀭𑀲𑁆𑀲 𑀓𑀓𑀸𑀭𑀁 𑀓𑀢𑁆𑀯𑀸 𑀅𑀮𑀓𑁆𑀔𑀺𑀓𑁄𑀢𑀺 𑀯𑀼𑀢𑁆𑀢𑀁.

𑁩𑁪𑁩. ‘‘𑀪𑀼𑀜𑁆𑀚𑀺𑀢𑀩𑁆𑀩𑀪𑁄𑀚𑀦’’𑀦𑁆𑀢𑀺 𑀇𑀫𑀺𑀦𑀸 𑀢𑀺𑀓𑀪𑁄𑀚𑀦𑀦𑁆𑀢𑀺 𑀏𑀢𑁆𑀣 𑀬𑀼𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀢𑀺𑀓𑀪𑁄𑀚𑀦𑀁. 𑀬𑀣𑀸𑀥𑀫𑁆𑀫𑁄𑀢𑀺 ‘‘𑀕𑀡𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁦𑁯) 𑀯𑀼𑀢𑁆𑀢𑀸𑀬 𑀫𑀸𑀢𑀺𑀓𑀸𑀯𑀺𑀪𑀗𑁆𑀕𑀧𑀸𑀴𑀺𑀬𑀸 𑀅𑀦𑀼𑀭𑀽𑀧𑀁. 𑀧𑀜𑁆𑀘𑀯𑀢𑁆𑀣𑀼𑀬𑀸𑀘𑀦𑀓𑀣𑀸𑀢𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀬𑀸𑀘𑀦𑀲𑁆𑀲 𑀓𑀣𑀸. 𑀆𑀬𑀼𑀓𑀧𑁆𑀧𑀦𑁆𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀆𑀬𑀼𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀆𑀬𑀼𑀓𑀧𑁆𑀧𑁄 𑀦𑀸𑀫 𑀏𑀓𑁄 𑀅𑀦𑁆𑀢𑀭𑀓𑀧𑁆𑀧𑁄𑀢𑀺 𑀚𑀺𑀦𑀸𑀮𑀗𑁆𑀓𑀸𑀭𑀝𑀻𑀓𑀸𑀤𑀻𑀲𑀼 (𑀫𑀺. 𑀧. 𑁪.𑁧.𑁩; 𑀓𑀣𑀸. 𑀅𑀝𑁆𑀞. 𑁬𑁫𑁪-𑁬𑁫𑁭; 𑀇𑀢𑀺𑀯𑀼. 𑀅𑀝𑁆𑀞. 𑁧𑁮; 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁩𑁪𑁩; 𑀅. 𑀦𑀺. 𑀝𑀻. 𑁩.𑁬𑁬𑁨) 𑀯𑀼𑀢𑁆𑀢𑁄. ‘‘𑀏𑀓𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄’’𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀸𑀤𑀻𑀲𑀼 (𑀯𑀺𑀪. 𑀅𑀝𑁆𑀞. 𑁮𑁦𑁯; 𑀫. 𑀦𑀺. 𑀅𑀝𑁆𑀞. 𑁩.𑁧𑁨𑁮; 𑀯𑀺. 𑀯𑀺. 𑀝𑀻. 𑁧.𑁪𑁧𑁦; 𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓𑀡𑁆𑀟 𑁪𑁧𑁦) 𑀯𑀼𑀢𑁆𑀢𑁄. 𑀲𑁂𑀝𑁆𑀞𑀁 𑀧𑀼𑀜𑁆𑀜𑀦𑁆𑀢𑀺 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁. 𑀇𑀫𑀺𑀦𑀸 𑀩𑁆𑀭𑀳𑀁 𑀧𑀼𑀜𑁆𑀜𑀦𑁆𑀢𑀺 𑀩𑁆𑀭𑀳𑀲𑀤𑁆𑀤𑁄 𑀫𑀳𑀦𑁆𑀢𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀩𑁆𑀭𑀳 𑀯𑀼𑀤𑁆𑀥𑀺𑀬𑀦𑁆𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀧𑀸𑀡𑀺𑀦𑀻 𑁭𑁩𑁫; 𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀳𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀢𑁆𑀢𑀸 𑀩𑁆𑀭𑀳𑀲𑀤𑁆𑀤𑁄 𑀫𑀳𑀦𑁆𑀢𑀯𑀸𑀘𑀓𑁄 𑀳𑁄𑀢𑀺. 𑀩𑁆𑀭𑀳𑀥𑀸𑀢𑀼𑀢𑁄 𑀅𑀧𑀘𑁆𑀘𑀬𑀁 𑀓𑀢𑁆𑀯𑀸 ‘‘𑀩𑁆𑀭𑀳𑀸’’𑀢𑀺𑀧𑀺, 𑀫𑀧𑀘𑁆𑀘𑀬𑀁 𑀓𑀢𑁆𑀯𑀸 ‘‘𑀩𑁆𑀭𑀳𑁆𑀫𑀸’’𑀢𑀺𑀧𑀺 𑀧𑀸𑀞𑁄 𑀅𑀢𑁆𑀣𑀺. 𑀆𑀬𑀼𑀓𑀧𑁆𑀧𑀫𑁂𑀯𑀸𑀢𑀺 𑀲𑀕𑁆𑀕𑁂𑀲𑀼 𑀆𑀬𑀼𑀓𑀧𑁆𑀧𑀫𑁂𑀯.

𑀲𑀗𑁆𑀖𑀪𑁂𑀤𑀓𑀣𑀸

𑁩𑁪𑁪. 𑀲𑁄𑀢𑀺 𑀤𑁂𑀯𑀤𑀢𑁆𑀢𑁄, 𑀕𑀢𑁄 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑁂𑀯𑀸𑀢𑀺 𑀯𑀺𑀳𑀸𑀭𑀲𑀻𑀫𑀸𑀬𑀫𑁂𑀯. 𑀆𑀯𑁂𑀡𑀺𑀓𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀆𑀯𑁂𑀡𑀺𑀓𑀁.

𑁩𑁪𑁫. 𑀆𑀕𑀺𑀮𑀸𑀬𑀢𑀻𑀢𑀺 𑀏𑀢𑁆𑀣 𑀆𑀢𑁆𑀬𑀽𑀧𑀲𑀕𑁆𑀕𑁄 𑀅𑀪𑀺𑀪𑀯𑀦𑀢𑁆𑀣𑁄, 𑀕𑀺𑀮𑁂𑀥𑀸𑀢𑀼 𑀩𑀸𑀥𑀦𑀢𑁆𑀣𑁄𑀢𑀺 𑀆𑀳 ‘‘𑀯𑁂𑀤𑀦𑀸𑀪𑀺𑀪𑀽𑀢𑀸 𑀩𑀸𑀥𑀢𑀻’’𑀢𑀺. 𑀢𑀦𑁆𑀢𑀺 𑀧𑀺𑀝𑁆𑀞𑀺𑀁. 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀆𑀤𑀺𑀲𑀺𑀢𑁆𑀯𑀸 𑀤𑁂𑀲𑀬𑀢𑀺 𑀏𑀢𑀸𑀬𑀸𑀢𑀺 𑀆𑀤𑁂𑀲𑀦𑀸, 𑀲𑀸 𑀏𑀯 𑀧𑀸𑀝𑀺𑀳𑀸𑀭𑀺𑀬𑀁 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. 𑀅𑀦𑀼𑀲𑀸𑀲𑀢𑀺 𑀏𑀢𑀸𑀬𑀸𑀢𑀺 𑀅𑀦𑀼𑀲𑀸𑀲𑀦𑀻, 𑀇𑀫𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀫𑁆𑀧𑀺 𑀢𑁂’’𑀢𑀺𑀆𑀤𑀺.

𑁩𑁪𑁬. 𑀫𑀫𑀸𑀦𑀼𑀓𑁆𑀭𑀼𑀩𑁆𑀩𑀦𑁆𑀢𑀺 𑀏𑀢𑁆𑀣 𑀅𑀦𑀼𑀢𑁆𑀬𑀽𑀧𑀲𑀕𑁆𑀕𑁄 𑀅𑀦𑀼𑀓𑀺𑀭𑀺𑀬𑀢𑁆𑀣𑁄 𑀓𑀭𑀥𑀸𑀢𑀼 𑀅𑀦𑁆𑀢𑀧𑀘𑁆𑀘𑀬𑁄 𑀕𑀘𑁆𑀙𑀦𑁆𑀢𑀸𑀤𑀺𑀕𑀡𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀫𑀸𑀦𑀼𑀓𑀺𑀭𑀺𑀬𑀁 𑀓𑀼𑀭𑀼𑀫𑀸𑀦𑁄’’𑀢𑀺. ‘‘𑀤𑀼𑀓𑁆𑀔𑀺𑀢𑁄’’𑀢𑀺 𑀇𑀫𑀺𑀦𑀸 𑀓𑀧𑀡𑁄𑀢𑀺 𑀏𑀢𑁆𑀣 𑀓𑀧𑀥𑀸𑀢𑀼 𑀳𑀺𑀁𑀲𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀸𑀯𑀭𑀸𑀳𑀲𑁆𑀲𑀸𑀢𑀺 𑀯𑀭𑀸𑀳𑀲𑀤𑁆𑀤𑀲𑁆𑀲 𑀲𑀽𑀓𑀭𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀫𑀳𑀸𑀦𑀸𑀕𑀲𑁆𑀲𑀸’’𑀢𑀺. ‘‘𑀧𑀣𑀯𑀺’’𑀦𑁆𑀢𑀺 𑀇𑀫𑀺𑀦𑀸 𑀫𑀳𑀺𑀁 𑀯𑀺𑀓𑀼𑀩𑁆𑀩𑀢𑁄𑀢𑀺 𑀏𑀢𑁆𑀣 𑀫𑀳𑀻𑀲𑀤𑁆𑀤𑀲𑁆𑀲 𑀏𑀯𑀁𑀦𑀸𑀫𑀓𑀁 𑀫𑀳𑀸𑀦𑀤𑀺𑀁 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀧𑀤𑀸𑀮𑁂𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀓𑀭𑀥𑀸𑀢𑀼𑀬𑀸 𑀯𑀺𑀢𑁆𑀬𑀽𑀧𑀲𑀕𑁆𑀕𑀯𑀲𑁂𑀦 𑀧𑀤𑀸𑀮𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀪𑀺𑀲𑀁 𑀖𑀲𑀫𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀫𑀸𑀦𑀲𑀤𑁆𑀤𑁄 𑀓𑀢𑁆𑀯𑀢𑁆𑀣𑁄𑀢𑀺 𑀆𑀳 ‘‘𑀪𑀺𑀲𑀁 𑀖𑀲𑀦𑁆𑀢𑀲𑁆𑀲𑀸’’𑀢𑀺. 𑀖𑀲𑀦𑁆𑀢𑀲𑁆𑀲𑀸𑀢𑀺 𑀪𑀓𑁆𑀔𑀦𑁆𑀢𑀲𑁆𑀲. 𑀦𑀤𑀻𑀦𑀸𑀫𑀓𑀁 𑀢𑀁 𑀧𑁄𑀓𑁆𑀔𑀭𑀡𑀺𑀦𑁆𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀦𑀤𑀻𑀲𑀼 𑀚𑀕𑁆𑀕𑀢𑁄𑀢𑀺 𑀏𑀢𑁆𑀣 𑀦𑀤𑀻 𑀦𑀸𑀫 𑀧𑁄𑀓𑁆𑀔𑀭𑀡𑀻𑀢𑀺 𑀤𑀲𑁆𑀲𑁂𑀢𑀺. 𑀚𑀕𑁆𑀕𑀢𑁄𑀢𑀺 𑀳𑀢𑁆𑀣𑀺𑀬𑀽𑀣𑀁 𑀧𑀸𑀮𑁂𑀦𑁆𑀢𑀲𑁆𑀲.

𑁩𑁪𑁭. ‘‘𑀲𑀼𑀢𑀸𑀢𑀺 𑀲𑁄𑀢𑀸’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀸 𑀤𑁆𑀯𑀺𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀦𑀺𑀲𑁆𑀲𑀦𑁆𑀤𑁂𑀳𑁄’’𑀢𑀺 𑀇𑀫𑀺𑀦𑀸 𑀅𑀲𑀦𑁆𑀤𑀺𑀤𑁆𑀥𑁄𑀢𑀺 𑀏𑀢𑁆𑀣 𑀤𑀺𑀳𑀥𑀸𑀢𑀼𑀁 𑀤𑀲𑁆𑀲𑁂𑀢𑀺, 𑀤𑀺𑀲𑀥𑀸𑀢𑀼𑀁 𑀦𑀺𑀯𑀢𑁆𑀢𑁂𑀢𑀺.

𑁩𑁫𑁦. 𑀩𑀼𑀤𑁆𑀥𑀲𑀳𑀲𑁆𑀲𑁂𑀦𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄, 𑀧𑀕𑁂𑀯 𑀏𑀓𑁂𑀦 𑀩𑀼𑀤𑁆𑀥𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀲𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀓𑁄𑀘𑀺𑀲𑀤𑁆𑀤𑀲𑁆𑀲 𑀧𑀥𑀸𑀦𑀧𑀤𑀁 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀸𑀢𑀺 𑀆𑀔𑁆𑀬𑀸𑀢𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀞𑀺𑀢𑁄’’𑀢𑀺. 𑀤𑁂𑀯𑀤𑀢𑁆𑀢𑁄𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀏𑀢𑁆𑀣 ‘‘𑀫𑁂’’𑀢𑀺 𑀧𑀤𑀁 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀕𑀯𑀢𑀸’’𑀢𑀺. 𑀢𑀤𑁂𑀯𑀸𑀢𑀺 𑀲𑀼𑀢𑀫𑁂𑀯. 𑀇𑀤𑀦𑁆𑀢𑀺 ‘‘𑀤𑁂𑀯𑀤𑀢𑁆𑀢𑁄𑀢𑀺 𑀫𑁂 𑀲𑀼𑀢’’𑀦𑁆𑀢𑀺 𑀯𑀘𑀦𑀁. 𑀅𑀦𑀼𑀘𑀺𑀦𑀸𑀢𑀻𑀢𑀺 𑀅𑀦𑀼𑀯𑀟𑁆𑀠𑁂𑀢𑀺. ‘‘𑀧𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀲𑀚𑁆𑀚𑀦𑀦𑁆𑀢𑀺 𑀏𑀢𑁆𑀣 𑀲𑀤𑀥𑀸𑀢𑀼𑀬𑀸 𑀕𑀢𑁆𑀬𑀢𑁆𑀣𑀁, 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄𑀢𑀺 𑀏𑀢𑁆𑀣 𑀇𑀤𑀸𑀦𑀺 𑀦 𑀤𑁂𑀯𑀤𑀢𑁆𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄 𑀳𑁄𑀢𑀺, 𑀆𑀬𑀢𑀺𑀁 𑀧𑀦 𑀅𑀯𑀻𑀘𑀺𑀦𑀺𑀭𑀬𑁂 𑀅𑀯𑀲𑁆𑀲𑀫𑁆𑀪𑀸𑀯𑀺𑀬𑀢𑁆𑀢𑀸 ‘‘𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀆𑀲𑀁𑀲𑀸𑀬𑀁 𑀅𑀢𑀻𑀢𑀯𑀘𑀦’’𑀦𑁆𑀢𑀺. 𑀆𑀲𑀁𑀲𑀸𑀬𑀦𑁆𑀢𑀺 𑀅𑀯𑀲𑁆𑀲𑀫𑁆𑀪𑀸𑀯𑀺𑀬𑀢𑁆𑀣𑁂. 𑀪𑁂𑀲𑁆𑀫𑀸 𑀳𑀺 𑀉𑀤𑀥𑀻 𑀫𑀳𑀸𑀢𑀺 𑀏𑀢𑁆𑀣 𑀪𑁂𑀲𑁆𑀫𑀸𑀲𑀤𑁆𑀤𑁄 𑀪𑀬𑀸𑀦𑀓𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀪𑀬𑀸𑀦𑀓𑁄’’𑀢𑀺.

𑀉𑀧𑀸𑀮𑀺𑀧𑀜𑁆𑀳𑀸𑀓𑀣𑀸

𑁩𑁫𑁧. 𑀏𑀓𑀢𑁄𑀢𑀺 𑀏𑀢𑁆𑀣 𑀢𑁄𑀧𑀘𑁆𑀘𑀬𑀲𑁆𑀲 𑀲𑀢𑁆𑀢𑀫𑁆𑀬𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀥𑀫𑁆𑀫𑀯𑀸𑀤𑀻𑀧𑀓𑁆𑀔𑁂’’𑀢𑀺. ‘‘𑀅𑀦𑀼𑀦𑀬𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀅𑀦𑀼𑀲𑁆𑀲𑀸𑀯𑁂𑀢𑀻𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀦𑀬𑀦𑁆𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀬𑀦𑁆𑀢𑁄. 𑀲𑀸𑀯𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀢𑀼𑀫𑁆𑀳𑀸𑀓𑀁𑀬𑁂𑀯𑀸’’𑀢𑀺𑀆𑀤𑀺. 𑀅𑀬𑀁 𑀅𑀥𑀫𑁆𑀫𑁄 𑀯𑀸 𑀅𑀬𑀁 𑀅𑀯𑀺𑀦𑀬𑁄 𑀯𑀸 𑀇𑀤𑀁 𑀅𑀲𑀢𑁆𑀣𑀼𑀲𑀸𑀲𑀦𑀁 𑀯𑀸 𑀬𑀤𑀺 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. ‘‘𑀩𑁄𑀥𑁂𑀢𑀻’’𑀢𑀺 𑀇𑀫𑀺𑀦𑀸 𑀲𑀸𑀯𑁂𑀢𑀻𑀢𑀺 𑀏𑀢𑁆𑀣 𑀲𑀼𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀻’’𑀢𑀺 𑀏𑀢𑁆𑀣 𑀅𑀦𑀼𑀲𑁆𑀲𑀸𑀯𑀦𑀓𑀺𑀭𑀺𑀬𑀸 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀸, 𑀲𑀮𑀸𑀓𑀕𑁆𑀕𑀸𑀳𑀓𑀺𑀭𑀺𑀬𑀸 𑀧𑀘𑁆𑀙𑀸𑀪𑀸𑀕𑁂𑀢𑀺 𑀤𑀲𑁆𑀲𑁂𑀢𑀺.

𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀅𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀫𑀢𑁆𑀢𑁂𑀦. 𑀦 𑀧𑀦 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀺, 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀲𑀗𑁆𑀖𑀓𑀫𑁆𑀫𑁂 𑀓𑀢𑁂𑀬𑁂𑀯 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 𑀞𑀢𑁆𑀯𑀸 𑀓𑀲𑁆𑀲𑀘𑀺 𑀘𑁄𑀤𑀓𑀲𑁆𑀲 𑀅𑀦𑀼𑀬𑁄𑀕𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀓𑀺𑀦𑁆𑀢𑀺 𑀲𑀺𑀬𑀸𑀢𑀺 𑀆𑀳 ‘‘𑀏𑀯𑀁 𑀤𑁂𑀯𑀤𑀢𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀦𑁆𑀢𑀺 𑀧𑀓𑀢𑀢𑁆𑀢𑁂 𑀲𑀗𑁆𑀖𑁂 𑀪𑀺𑀦𑁆𑀤𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀦𑁆𑀢𑀺 𑀓𑁂𑀦𑀸𑀓𑀸𑀭𑁂𑀦. 𑀧𑀼𑀦 𑀓𑀣𑀦𑁆𑀢𑀺 𑀓𑀲𑁆𑀫𑀸 𑀓𑀸𑀭𑀡𑀸. 𑀭𑀜𑁆𑀜𑁄𑀢𑀺 𑀅𑀚𑀸𑀢𑀲𑀢𑁆𑀢𑀼𑀭𑀜𑁆𑀜𑁄, 𑀓𑀸𑀭𑀺𑀢𑀓𑀫𑁆𑀫𑀁. ‘‘𑀖𑀸𑀢𑀸𑀧𑀺𑀢𑀢𑁆𑀢𑀸’’𑀢𑀺 𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀸𑀦𑀁 𑀖𑀸𑀢𑀸𑀧𑀺𑀢𑀢𑁆𑀢𑀸. 𑀢𑀢𑁆𑀣𑀸𑀢𑀺 ‘‘𑀪𑀺𑀓𑁆𑀔𑀼 𑀔𑁄 𑀉𑀧𑀸𑀮𑀻’’𑀢𑀺𑀆𑀤𑀺𑀯𑀘𑀦𑁂, 𑀞𑀢𑁆𑀯𑀸 𑀧𑀭𑀺𑀳𑀸𑀭𑀁 𑀯𑀤𑀸𑀫𑀸𑀢𑀺 𑀬𑁄𑀚𑀦𑀸. 𑀯𑀺𑀭𑀤𑁆𑀥𑀢𑁆𑀢𑀸𑀢𑀺 𑀯𑀺𑀭𑀸𑀥𑀺𑀢𑀢𑁆𑀢𑀸. 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑁂𑀦 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑁂𑀦 𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀏𑀯𑀜𑁆𑀳𑀻𑀢𑀺 𑀏𑀯𑀫𑁂𑀯. 𑀢𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀲𑁆𑀲. 𑀓𑀼𑀫𑀸𑀭𑁄 𑀧𑀦𑀸𑀢𑀺 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄 𑀧𑀦, 𑀓𑀢𑀫𑀢𑁆𑀢𑁂𑀬𑁂𑀯 𑀦 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀲𑁆𑀲. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀗𑁆𑀖𑀪𑁂𑀤𑀢𑁄 𑀧𑀼𑀩𑁆𑀩𑁂 𑀭𑀼𑀳𑀺𑀢𑀼𑀧𑁆𑀧𑀸𑀤𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀧𑀘𑁆𑀙𑀸 𑀅𑀪𑀩𑁆𑀩𑀪𑀸𑀯𑁄 𑀭𑁄𑀧𑀺𑀢𑁄, 𑀢𑀲𑁆𑀫𑀸.

𑀪𑁂𑀤𑀓𑀭𑀯𑀢𑁆𑀣𑀽𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀥𑀫𑁆𑀫𑀸𑀥𑀫𑁆𑀫𑀸𑀤𑀻𑀦𑀁 𑀲𑀼𑀢𑁆𑀢𑀦𑁆𑀢𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬, 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀦𑀬𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀢𑀺 𑀢𑀢𑁄 𑀅𑀜𑁆𑀜𑀣𑀸.

𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀥𑀫𑁆𑀫𑀸𑀥𑀫𑁆𑀫𑁂𑀲𑀼. 𑀏𑀯𑀁 𑀅𑀫𑁆𑀳𑀸𑀓𑀦𑁆𑀢𑀺 𑀏𑀯𑀁 𑀓𑀭𑀺𑀬𑀫𑀸𑀦𑁂 𑀅𑀫𑁆𑀳𑀸𑀓𑀁. 𑀏𑀯𑀁 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀸𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑁂𑀲𑀁 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀧𑀦𑀸’’𑀢𑀺𑀆𑀤𑀺. 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 ‘‘𑀅𑀪𑀽𑀢𑁂𑀦 𑀯𑀢𑁆𑀣𑀼𑀦𑀸’’𑀢𑀺 𑀏𑀢𑁆𑀣𑀸𑀧𑀺.

𑀏𑀯𑀁 𑀤𑁆𑀯𑀺𑀦𑁆𑀦𑀁 𑀧𑀭𑀺𑀬𑀸𑀬𑀸𑀦𑀁 𑀯𑀲𑁂𑀦 𑀥𑀫𑁆𑀫𑀸𑀥𑀫𑁆𑀫𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀦𑀬𑀸𑀯𑀺𑀦𑀬𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀭𑀸𑀕𑀸𑀤𑀬𑁄 𑀯𑀺𑀦𑁂𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑀬𑀦𑀬𑁂𑀦 𑀓𑀸𑀬𑀁 𑀯𑀸𑀘𑀁 𑀯𑀺𑀦𑁂𑀢𑀻𑀢𑀺 𑀯𑀺𑀦𑀬𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄.

𑀏𑀯𑀁 𑀤𑁆𑀯𑀺𑀦𑁆𑀦𑀁 𑀧𑀭𑀺𑀬𑀸𑀬𑀸𑀦𑀁 𑀯𑀲𑁂𑀦 𑀯𑀺𑀦𑀬𑀸𑀯𑀺𑀦𑀬𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀸𑀲𑀺𑀢𑀸𑀪𑀸𑀲𑀺𑀢𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀇𑀤𑀁 𑀯𑀘𑀦𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀦𑁆𑀢𑀺 𑀬𑁄𑀚𑀦𑀸.

𑀏𑀯𑀁 𑀤𑁆𑀯𑀺𑀦𑁆𑀦𑀁 𑀧𑀭𑀺𑀬𑀸𑀬𑀸𑀦𑀁 𑀯𑀲𑁂𑀦 𑀪𑀸𑀲𑀺𑀢𑀸𑀪𑀸𑀲𑀺𑀢𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀘𑀺𑀡𑁆𑀡𑀸𑀦𑀸𑀘𑀺𑀡𑁆𑀡𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀤𑁂𑀯𑀲𑀺𑀓’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀤𑁂𑀯𑀲𑀺𑀓’’𑀦𑁆𑀢𑀺 𑀧𑀤𑀁 ‘‘𑀲𑀫𑀸𑀧𑀚𑁆𑀚𑀦𑀁, 𑀯𑁄𑀮𑁄𑀓𑀦’’𑀦𑁆𑀢𑀺 𑀢𑀻𑀲𑀼𑀬𑁂𑀯 𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀓𑀸𑀭𑀡𑀼𑀧𑁆𑀧𑀢𑁆𑀢𑀺𑀯𑀲𑁂𑀦. 𑀓𑀸𑀭𑀡𑀜𑁆𑀳𑀺 𑀅𑀭𑀢𑀺 𑀨𑀮𑀁 𑀏𑀢𑀲𑁆𑀫𑀸𑀢𑀺 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺, 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀲𑀸𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀁 𑀓𑀢𑁆𑀯𑀸, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀯𑀲𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁄, 𑀢𑁂𑀦. 𑀇𑀤𑀁 𑀧𑀤𑀁 ‘‘𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀚𑀸𑀢𑀓𑀓𑀣𑀸’’𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀸𑀤𑀺. 𑀆𑀘𑀺𑀡𑁆𑀡𑀦𑁆𑀢𑀺 𑀆 𑀩𑀦𑁆𑀥𑀺𑀢𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀉𑀧𑀘𑀺𑀢𑀁 𑀯𑀟𑁆𑀠𑀺𑀢𑀁, 𑀧𑀕𑀼𑀡𑀁 𑀯𑀸. 𑀘𑀸𑀭𑀺𑀬𑀧𑀓𑁆𑀓𑀫𑀦𑀦𑁆𑀢𑀺 𑀘𑀸𑀭𑀺𑀬𑀢𑁆𑀣𑀁 𑀧𑀓𑁆𑀓𑀫𑀦𑀁.

𑀏𑀯𑀁 𑀤𑁆𑀯𑀺𑀦𑁆𑀦𑀁 𑀧𑀭𑀺𑀬𑀸𑀬𑀸𑀦𑀁 𑀯𑀲𑁂𑀦 𑀆𑀘𑀺𑀡𑁆𑀡𑀸𑀦𑀸𑀘𑀺𑀡𑁆𑀡𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀜𑀢𑁆𑀢𑀤𑀼𑀓𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺. 𑀢𑀁 𑀪𑀸𑀲𑀺𑀢𑀸𑀪𑀸𑀲𑀺𑀢𑀤𑀼𑀓𑀲𑀤𑀺𑀲𑀫𑁂𑀯. 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀲𑀼𑀢𑁆𑀢𑀦𑁆𑀢𑀯𑀺𑀦𑀬𑀧𑀭𑀺𑀬𑀸𑀬𑀸𑀦𑀁 𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀤𑀼𑀓𑀸𑀦𑀁 𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄.

𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀤𑀼𑀓𑁂 ‘‘𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀧𑀸𑀞𑀲𑁆𑀲 𑀅𑀦𑀦𑁆𑀢𑀭𑁂 𑀧𑀘𑁆𑀙𑀺𑀫𑀯𑀸𑀓𑁆𑀬𑁂 𑀞𑀺𑀢𑁄 𑀆𑀤𑀺𑀲𑀤𑁆𑀤𑁄 𑀆𑀦𑁂𑀢𑀩𑁆𑀩𑁄. 𑀇𑀢𑀺 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀇𑀤𑀁 𑀧𑀤𑀁 𑀧𑀘𑁆𑀙𑀺𑀫𑀯𑀸𑀓𑁆𑀬𑁂𑀧𑀺 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑀁.

𑀮𑀳𑀼𑀓𑀕𑀭𑀼𑀓𑀤𑀼𑀓𑁂 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀣𑀼𑀮𑁆𑀮𑀘𑁆𑀘𑀬𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀯𑀲𑁂𑀦 𑀧𑀜𑁆𑀘 𑀆𑀧𑀢𑁆𑀢𑀺𑀭𑀸𑀲𑀬𑁄. 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀭𑀸𑀲𑀬𑁄.

𑀲𑀸𑀯𑀲𑁂𑀲𑀸𑀦𑀸𑀯𑀲𑁂𑀲𑀤𑀼𑀓𑁂 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀢𑁄 𑀅𑀯𑀲𑁂𑀲𑀸 𑀙 𑀆𑀧𑀢𑁆𑀢𑀺𑀭𑀸𑀲𑀬𑁄.

𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀤𑀼𑀓𑁂 𑀮𑀳𑀼𑀓𑀕𑀭𑀼𑀓𑀤𑀼𑀓𑀲𑀤𑀺𑀲𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀕𑀭𑀼𑀓𑀸𑀧𑀢𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫, 𑀮𑀳𑀼𑀓𑀸𑀧𑀢𑁆𑀢𑀺 𑀅𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫𑀸𑀢𑀺 𑀏𑀯𑀁 𑀯𑀺𑀦𑀬𑀧𑀭𑀺𑀬𑀸𑀬𑀯𑀲𑁂𑀦𑁂𑀯 𑀘𑀢𑀼𑀦𑁆𑀦𑀁 𑀤𑀼𑀓𑀸𑀦𑀁 𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄.

𑀏𑀢𑁆𑀣𑀸𑀢𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑁂. 𑀘𑀢𑀼𑀦𑁆𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀦𑁆𑀢𑀺 𑀅𑀧𑀮𑁄𑀓𑀦𑀸𑀤𑀺𑀯𑀲𑁂𑀦 𑀘𑀢𑀼𑀦𑁆𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁. 𑀓𑀭𑁄𑀦𑁆𑀢𑁂𑀳𑀺 𑀳𑁂𑀢𑀼𑀪𑀽𑀢𑁂𑀳𑀺, 𑀳𑁂𑀢𑁆𑀯𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁.

𑀢𑀢𑁆𑀣𑀸𑀢𑀺 ‘‘𑀢𑁂 𑀇𑀫𑁂𑀳𑀻’’𑀢𑀺𑀆𑀤𑀺𑀯𑀘𑀦𑁂. 𑀅𑀧𑀓𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀓𑀲𑀥𑀸𑀢𑀼𑀲𑁆𑀲 𑀕𑀢𑁆𑀬𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀲𑀁 𑀆𑀓𑀟𑁆𑀠𑀦𑁆𑀢𑀻’’𑀢𑀺. 𑀯𑀺𑀚𑀝𑁂𑀦𑁆𑀢𑀻𑀢𑀺 𑀯𑀺𑀚𑀝𑀁 𑀓𑀭𑁄𑀦𑁆𑀢𑀺, 𑀯𑀺𑀲𑀼𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀉𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀉𑀲𑁆𑀲𑀤𑀁 𑀓𑀭𑁄𑀦𑁆𑀢𑀺. 𑀅𑀯𑀧𑀓𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀉𑀧𑀲𑀕𑁆𑀕𑀸𑀦𑀁 𑀯𑀲𑁂𑀦 𑀅𑀢𑀺𑀯𑀺𑀬𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀅𑀢𑀺 𑀯𑀺𑀬 𑀆𑀓𑀟𑁆𑀠𑀦𑁆𑀢𑀻’’𑀢𑀺. 𑀅𑀢𑀺𑀯𑀺𑀬𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀬𑀣𑀸 𑀯𑀺𑀲𑀁𑀲𑀝𑁆𑀞𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀻’’𑀢𑀺. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀓𑀭𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀲𑀼’’𑀦𑁆𑀢𑀺 𑀇𑀫𑀺𑀦𑀸 𑀆𑀯𑁂𑀡𑀺𑀲𑀤𑁆𑀤𑁄 ‘‘𑀯𑀺𑀲𑀼’’𑀦𑁆𑀢𑀺𑀅𑀢𑁆𑀣𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀽𑀲𑀽𑀢𑀺 𑀪𑁂𑀤𑀓𑀭𑀯𑀢𑁆𑀣𑀽𑀲𑀼. 𑀇𑀫𑀁 𑀕𑀡𑁆𑀳𑀣𑀸𑀢𑀺 𑀇𑀫𑀁 𑀯𑀸𑀤𑀁 𑀕𑀡𑁆𑀳𑀣. 𑀯𑀺𑀲𑀼𑀦𑁆𑀢𑀺 𑀆𑀯𑁂𑀡𑀺𑀁. 𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑁂 𑀯𑀼𑀢𑁆𑀢𑀯𑀘𑀦𑀁 𑀧𑀭𑀺𑀯𑀸𑀭𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀻𑀢𑀺 ‘‘𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮) 𑀏𑀯𑀁 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺. 𑀢𑀲𑁆𑀲𑀸𑀢𑀺 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀯𑀘𑀦𑀲𑁆𑀲. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂, 𑀯𑀼𑀢𑁆𑀢𑁂𑀦 𑀇𑀫𑀺𑀦𑀸 𑀲𑀗𑁆𑀖𑀪𑁂𑀤𑀮𑀓𑁆𑀔𑀡𑁂𑀦𑀸𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀣𑀢𑁄 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀲𑀤𑁆𑀤𑀢𑁄 𑀦𑀸𑀦𑀸𑀓𑀭𑀡𑀁 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀅𑀲𑁆𑀲𑀸𑀢𑀺 𑀲𑀗𑁆𑀖𑀪𑁂𑀤𑀮𑀓𑁆𑀔𑀡𑀲𑁆𑀲. 𑀢𑀁 𑀧𑀦 𑀦𑀸𑀦𑀸𑀓𑀭𑀡𑀸𑀪𑀸𑀯𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀧𑀭𑀺𑀯𑀸𑀭𑁂 𑀏𑀯. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.