𑁬. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀁

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸

𑁨𑁯𑁪. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀅𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀦 𑀜𑀧𑀥𑀸𑀢𑀼 𑀳𑁄𑀢𑀺, 𑀅𑀧𑀺𑀘 𑀜𑀸𑀥𑀸𑀢𑀼𑀬𑁂𑀯, 𑀲𑁄 𑀘 𑀔𑁄 𑀅𑀦𑀼𑀚𑀸𑀦𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀦𑀦𑀼𑀜𑁆𑀜𑀸𑀢𑀁 𑀳𑁄𑀢𑀻’’𑀢𑀺. 𑀇𑀫𑀺𑀦𑀸 𑀜𑀸𑀥𑀸𑀢𑀼𑀲𑁆𑀲 𑀅𑀯𑀩𑁄𑀥𑀦𑀸𑀤𑀬𑁄 𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺, 𑀅𑀦𑀼𑀚𑀸𑀦𑀦𑀢𑁆𑀣𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀅𑀟𑁆𑀠𑀬𑁄𑀕𑀸𑀤𑀻𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀯𑀺𑀳𑀸𑀭𑀲𑀤𑁆𑀤𑁂𑀦 𑀧𑀸𑀭𑀺𑀲𑁂𑀲𑀢𑁄 𑀅𑀯𑀲𑁂𑀲𑀸𑀯𑀸𑀲𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀟𑁆𑀠𑀬𑁄𑀕𑀸𑀤𑀺𑀫𑀼𑀢𑁆𑀢𑀓𑁄 𑀅𑀯𑀲𑁂𑀲𑀸𑀯𑀸𑀲𑁄’’𑀢𑀺. 𑀲𑀼𑀯𑀡𑁆𑀡𑀯𑀗𑁆𑀓𑀕𑁂𑀳𑀦𑁆𑀢𑀺 𑀲𑀼𑀯𑀡𑁆𑀡𑀯𑀗𑁆𑀓𑀙𑀤𑀦𑁂𑀦 𑀙𑀸𑀤𑀺𑀢𑀁 𑀕𑁂𑀳𑀁. 𑀇𑀝𑁆𑀞𑀓𑀸𑀕𑀼𑀳𑀸𑀢𑀺 𑀇𑀝𑁆𑀞𑀓𑀸𑀬 𑀓𑀢𑀸 𑀕𑀼𑀳𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀆𑀕𑀢𑀲𑁆𑀲 𑀘 𑀅𑀦𑀸𑀕𑀢𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺. 𑀆𑀕𑀘𑁆𑀙𑀢𑀻𑀢𑀺 𑀆𑀕𑀢𑁄, 𑀦 𑀆𑀕𑀢𑁄 𑀅𑀦𑀸𑀕𑀢𑁄, 𑀲𑀗𑁆𑀖𑁄. 𑀆𑀕𑀢𑁄 𑀘 𑀅𑀦𑀸𑀕𑀢𑁄 𑀘 𑀆𑀕𑀢𑀸𑀦𑀸𑀕𑀢𑁄, 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄 𑀧𑀼𑀁𑀮𑀺𑀗𑁆𑀕𑁄, 𑀢𑀲𑁆𑀲. ‘‘𑀅𑀧𑁆𑀧𑀝𑀺𑀳𑀢𑀘𑀸𑀭𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀘𑀸𑀭𑁄 𑀘𑀸𑀢𑀼𑀤𑁆𑀤𑀺𑀲𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁨𑁯𑁫. 𑀅𑀦𑀼𑀫𑁄𑀤𑀦𑀕𑀸𑀣𑀸𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀢𑀼𑀯𑀺𑀲𑀪𑀸𑀕𑀯𑀲𑁂𑀦𑀸𑀢𑀺 𑀲𑀻𑀢𑀉𑀡𑁆𑀳𑀸𑀦𑀁 𑀉𑀢𑀽𑀦𑀁 𑀯𑀺𑀲𑀪𑀸𑀕𑀯𑀲𑁂𑀦. 𑀲𑀁𑀨𑀼𑀲𑀺𑀢𑀓𑀯𑀸𑀢𑁄𑀢𑀺 𑀲𑀳 𑀉𑀤𑀓𑀩𑀺𑀦𑁆𑀤𑀼𑀦𑀸 𑀆𑀕𑀢𑁄 𑀯𑀸𑀢𑁄. 𑀏𑀢𑁆𑀣 𑀳𑀺 𑀲𑀁𑀲𑀤𑁆𑀤𑁄 𑀲𑀳𑀢𑁆𑀣𑁄, 𑀨𑀼𑀲𑀺𑀢𑀲𑀤𑁆𑀤𑁄 𑀉𑀤𑀓𑀩𑀺𑀦𑁆𑀤𑀼𑀯𑀸𑀘𑀓𑁄. 𑀉𑀚𑀼𑀓𑀫𑁂𑀖𑀯𑀼𑀝𑁆𑀞𑀺𑀬𑁄 𑀏𑀯𑀸𑀢𑀺 𑀯𑀸𑀢𑁂𑀦 𑀅𑀧𑀳𑀭𑀺𑀢𑀢𑁆𑀢𑀸 𑀉𑀚𑀼𑀓𑀁 𑀧𑀢𑀺𑀢𑀸 𑀫𑁂𑀖𑀯𑀼𑀝𑁆𑀞𑀺𑀬𑁄 𑀏𑀯. 𑀧𑀸𑀴𑀺𑀬𑀁 𑀢𑀢𑁄𑀢𑀺 𑀏𑀢𑁆𑀣 𑀢𑁄𑀧𑀘𑁆𑀘𑀬𑁄 𑀧𑀘𑁆𑀘𑀢𑁆𑀢𑀢𑁆𑀣𑁂 𑀯𑀢𑁆𑀢𑀢𑀺. 𑀲𑁄 𑀯𑀺𑀳𑀸𑀭𑁄𑀢𑀺 𑀳𑀺 𑀅𑀢𑁆𑀣𑁄. 𑀯𑀸𑀴𑀫𑀺𑀕𑀸𑀦𑀺 𑀘𑀸𑀢𑀺 𑀯𑀸𑀴𑀫𑀺𑀕𑁂 𑀘. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀳𑁂𑀲. 𑀏𑀢𑀸𑀦𑀺 𑀲𑀩𑁆𑀩𑀸𑀦𑀻𑀢𑀺 ‘‘𑀲𑀻𑀢’’𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀢𑁆𑀢 𑀧𑀤𑀸𑀦𑀺. 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺 𑀲𑁄 𑀯𑀺𑀳𑀸𑀭𑁄 𑀲𑀻𑀢𑀁 𑀧𑀝𑀺𑀳𑀦𑀢𑀺…𑀧𑁂… 𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄.

‘‘𑀯𑀺𑀳𑀸𑀭𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀢𑀢𑁄𑀢𑀺 𑀏𑀢𑁆𑀣 𑀢𑁄𑀧𑀘𑁆𑀘𑀬𑁄 𑀓𑀢𑁆𑀢𑀼𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦 𑀯𑀺𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀳𑀦𑀻𑀬𑀢𑀺. 𑀲𑀼𑀔𑀢𑁆𑀣𑀦𑁆𑀢𑀺 𑀏𑀢𑁆𑀣 𑀉𑀢𑁆𑀢𑀭𑀧𑀤𑀮𑁄𑀧𑁄𑀢𑀺 𑀆𑀳 ‘‘𑀲𑀼𑀔𑀯𑀺𑀳𑀸𑀭𑀢𑁆𑀣’’𑀦𑁆𑀢𑀺. ‘‘𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘𑀸’’𑀢𑀺 𑀧𑀤𑀤𑁆𑀯𑀬𑀁 ‘‘𑀳𑁄𑀢𑀻’’𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀳𑀸𑀭𑀤𑀸𑀦𑀁 𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘 𑀳𑁄𑀢𑀻𑀢𑀺 𑀳𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑁄. 𑀯𑀺𑀳𑀸𑀭𑀤𑀸𑀦𑀁 𑀲𑀼𑀔𑀢𑁆𑀣𑀜𑁆𑀘 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀛𑀸𑀬𑀺𑀢𑀼𑀁 𑀯𑀺𑀧𑀲𑁆𑀲𑀺𑀢𑀼𑀜𑁆𑀘 𑀬𑀁 𑀲𑀼𑀔𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀤𑀢𑁆𑀣𑀦𑁆𑀢𑀺 𑀢𑀲𑁆𑀲 𑀲𑀼𑀔𑀲𑁆𑀲 𑀅𑀢𑁆𑀣𑀸𑀬. 𑀧𑀭𑀧𑀤𑁂𑀦𑀧𑀻𑀢𑀺 ‘‘𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼’’𑀦𑁆𑀢𑀺 𑀧𑀤𑀤𑁆𑀯𑀬𑀢𑁄 𑀧𑀭𑀁 𑀞𑀺𑀢𑁂𑀦 ‘‘𑀯𑀺𑀳𑀸𑀭𑀤𑀸𑀦’’𑀦𑁆𑀢𑀺 𑀧𑀤𑁂𑀦𑀧𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀯𑀺𑀳𑀸𑀭𑀤𑀸𑀦𑀦𑁆𑀢𑀺 𑀯𑀺𑀳𑀸𑀭𑀲𑁆𑀲 𑀤𑀸𑀦𑀁, 𑀤𑀸𑀢𑀩𑁆𑀩𑀯𑀺𑀳𑀸𑀭𑀁 𑀯𑀸, 𑀯𑀡𑁆𑀡𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀦𑁆𑀢𑀺 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀯𑀼𑀢𑁆𑀢𑀁. 𑀲𑀸𑀥𑀓𑀧𑀸𑀴𑀺𑀬𑀁 𑀬𑁄 𑀉𑀧𑀲𑁆𑀲𑀬𑀁 𑀤𑀤𑀸𑀢𑀺, 𑀲𑁄 𑀘 𑀲𑀩𑁆𑀩𑀤𑀤𑁄 𑀲𑀩𑁆𑀩𑁂𑀲𑀁 𑀩𑀮𑀸𑀤𑀻𑀦𑀁 𑀤𑀤𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁄 𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄. 𑀲𑁄 𑀏𑀯𑀸𑀢𑀺 𑀳𑀺 𑀅𑀢𑁆𑀣𑁄.

‘‘𑀯𑀺𑀳𑀸𑀭𑁂’’𑀢𑀺 𑀇𑀫𑀺𑀦𑀸 𑀯𑀸𑀲𑀬𑁂𑀢𑁆𑀣𑀸𑀢𑀺 𑀏𑀢𑁆𑀣 𑀏𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀯𑀸𑀲𑀬𑁂𑀢𑀺 𑀯𑀸𑀲𑁂𑀬𑁆𑀬. 𑀢𑁂𑀲𑀁 𑀅𑀦𑁆𑀦𑀜𑁆𑀘𑀸𑀢𑀺 𑀏𑀢𑁆𑀣 ‘‘𑀢𑁂𑀲’’𑀦𑁆𑀢𑀺 𑀧𑀤𑀁 ‘‘𑀅𑀦𑀼𑀘𑁆𑀙𑀯𑀺𑀬’’𑀦𑁆𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀲𑀁 𑀅𑀦𑀼𑀘𑁆𑀙𑀯𑀺𑀬’’𑀦𑁆𑀢𑀺. 𑀢𑀢𑁆𑀣 𑀅𑀦𑀼𑀘𑁆𑀙𑀯𑀺𑀬𑀁 𑀅𑀦𑁆𑀦𑀜𑁆𑀘 𑀅𑀦𑀼𑀘𑁆𑀙𑀯𑀺𑀬𑀸𑀦𑀺 𑀯𑀢𑁆𑀣𑀸𑀦𑀺 𑀘𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀢𑁂𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀲𑀽’’𑀢𑀺, 𑀪𑀺𑀓𑁆𑀔𑀽𑀲𑀽𑀢𑀺 𑀅𑀢𑁆𑀣𑁄. 𑀉𑀚𑀼𑀪𑀽𑀢𑁂𑀲𑀽𑀢𑀺 𑀏𑀢𑁆𑀣 𑀲𑀫𑁆𑀧𑀤𑀸𑀦𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁 𑀓𑀢𑁆𑀯𑀸 𑀉𑀚𑀼𑀪𑀽𑀢𑀸𑀦𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. ‘‘𑀅𑀓𑀼𑀝𑀺𑀮𑀘𑀺𑀢𑁆𑀢𑁂𑀲𑀽’’𑀢𑀺 𑀇𑀫𑀺𑀦𑀸 ‘‘𑀉𑀚𑀼𑀪𑀽𑀢𑁂𑀲𑀽’’𑀢𑀺 𑀏𑀢𑁆𑀣 𑀉𑀚𑀼𑀲𑀤𑁆𑀤𑀲𑁆𑀲 𑀅𑀓𑀼𑀝𑀺𑀮𑀢𑁆𑀣𑀜𑁆𑀘 𑀪𑀽𑀢𑀲𑀤𑁆𑀤𑁂𑀦 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀜𑁆𑀘 𑀤𑀲𑁆𑀲𑁂𑀢𑀺. 𑀉𑀚𑀼𑀪𑀽𑀢𑀁 𑀘𑀺𑀢𑁆𑀢𑀫𑁂𑀢𑁂𑀲𑀦𑁆𑀢𑀺 𑀉𑀚𑀼𑀪𑀽𑀢𑀸𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀦𑀺𑀤𑀳𑁂𑀬𑁆𑀬𑀸𑀢𑀺 𑀦𑀺𑀔𑀡𑀺𑀢𑁆𑀯𑀸 𑀞𑀧𑁂𑀬𑁆𑀬. ‘‘𑀦 𑀘𑀺𑀢𑁆𑀢𑀧𑀲𑀸𑀤𑀁 𑀯𑀺𑀭𑀸𑀥𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸𑀢𑀺 𑀏𑀢𑁆𑀣 𑀏𑀯𑀢𑁆𑀣𑀨𑀮𑀁 𑀯𑀸 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑀁 𑀯𑀸 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀏𑀯𑀁 𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑀲𑁆𑀲 𑀢𑀲𑁆𑀲 𑀯𑀺𑀳𑀸𑀭𑀤𑀸𑀬𑀓𑀲𑁆𑀲 𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨𑁯𑁬. 𑀆𑀯𑀺𑀜𑁆𑀙𑀦𑀙𑀺𑀤𑁆𑀤𑀦𑁆𑀢𑀺 𑀅𑀗𑁆𑀕𑀼𑀮𑀺𑀁 𑀅𑀯 𑀧𑀯𑁂𑀲𑁂𑀢𑁆𑀯𑀸 𑀅𑀜𑁆𑀙𑀢𑀺 𑀆𑀓𑀟𑁆𑀠𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀆𑀯𑀺𑀜𑁆𑀙𑀦𑀁. 𑀅𑀯𑀧𑀼𑀩𑁆𑀩𑁄 𑀅𑀙𑀺𑀥𑀸𑀢𑀼, 𑀉𑀧𑀲𑀕𑁆𑀕𑀅𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸, 𑀥𑀸𑀢𑀼𑀅𑀓𑀸𑀭𑀲𑁆𑀲 𑀘 𑀇𑀓𑀸𑀭𑀁 𑀓𑀢𑁆𑀯𑀸 ‘‘𑀆𑀯𑀺𑀜𑁆𑀙𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁂𑀯 𑀙𑀺𑀤𑁆𑀤𑀁 𑀆𑀯𑀺𑀜𑁆𑀙𑀦𑀙𑀺𑀤𑁆𑀤𑀁. 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀦𑁆𑀢𑀺 𑀓𑀯𑀸𑀝𑀘𑁆𑀙𑀺𑀤𑁆𑀤𑁂 𑀅𑀯 𑀧𑀯𑁂𑀲𑁂𑀢𑁆𑀯𑀸 𑀅𑀜𑁆𑀙𑀢𑀺 𑀆𑀓𑀟𑁆𑀠𑀢𑀺 𑀇𑀫𑀸𑀬𑀸𑀢𑀺 𑀆𑀯𑀺𑀜𑁆𑀙𑀦𑀸, 𑀲𑀸𑀬𑁂𑀯 𑀭𑀚𑁆𑀚𑀽𑀢𑀺 𑀆𑀯𑀺𑀜𑁆𑀙𑀦𑀭𑀚𑁆𑀚𑀼. 𑀓𑀸𑀘𑀺 𑀭𑀚𑁆𑀚𑀼 𑀦 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀦 𑀯𑀝𑁆𑀝𑀢𑀺 𑀦 𑀳𑁄𑀢𑀺, 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀢𑀻𑀡𑀺 𑀢𑀸𑀮𑀸𑀦𑀻𑀢𑀺 𑀏𑀢𑁆𑀣 𑀢𑀸𑀮𑀲𑀤𑁆𑀤𑁄 𑀓𑀼𑀜𑁆𑀘𑀺𑀓𑀸𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀢𑀺𑀲𑁆𑀲𑁄 𑀓𑀼𑀜𑁆𑀘𑀺𑀓𑀸𑀬𑁄’’𑀢𑀺. 𑀇𑀫𑀺𑀦𑀸 𑀢𑀸𑀮𑀲𑀤𑁆𑀤𑀲𑁆𑀲 𑀭𑀼𑀓𑁆𑀔𑀢𑀽𑀭𑀺𑀬𑀯𑀺𑀲𑁂𑀲𑁂 𑀦𑀺𑀯𑀢𑁆𑀢𑁂𑀢𑀺. 𑀬𑀁 𑀬𑀦𑁆𑀢𑀺 𑀉𑀧𑀓𑀭𑀡𑀁. 𑀢𑀲𑁆𑀲𑀸𑀢𑀺 𑀬𑀦𑁆𑀢𑀓𑀲𑁆𑀲. 𑀯𑁂𑀤𑀺𑀓𑀸𑀯𑀸𑀢𑀧𑀸𑀦𑀦𑁆𑀢𑀺 𑀯𑀸𑀢𑀁 𑀧𑀺𑀯𑀢𑀺 𑀅𑀦𑁂𑀦𑀸𑀢𑀺 𑀯𑀸𑀢𑀧𑀸𑀦𑀁, 𑀯𑁂𑀤𑀺𑀓𑀸𑀬 𑀓𑀢𑀁 𑀯𑀸𑀢𑀧𑀸𑀦𑀁 𑀯𑁂𑀤𑀺𑀓𑀸𑀯𑀸𑀢𑀧𑀸𑀦𑀁. 𑀘𑀓𑁆𑀓𑀮𑀺𑀓𑀦𑁆𑀢𑀺 𑀏𑀢𑁆𑀣 𑀘𑀓𑁆𑀓𑀸𑀓𑀸𑀭𑁂𑀦 𑀅𑀮𑀢𑀺 𑀧𑀯𑀢𑁆𑀢𑀢𑀻𑀢𑀺 𑀘𑀓𑁆𑀓𑀮𑀁, 𑀘𑁄𑀴𑀓𑀧𑀸𑀤𑀧𑀼𑀜𑁆𑀚𑀦𑀁. 𑀢𑁂𑀦 𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀘𑀓𑁆𑀓𑀮𑀺𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑁄𑀴𑀓𑀧𑀸𑀤𑀧𑀼𑀜𑁆𑀚𑀦𑀁 𑀩𑀦𑁆𑀥𑀺𑀢𑀼’’𑀦𑁆𑀢𑀺. ‘‘𑀯𑀸𑀢𑀧𑀸𑀦𑀧𑁆𑀧𑀫𑀸𑀡𑁂𑀦 𑀪𑀺𑀲𑀺𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀸𑀢𑀧𑀸𑀦𑀧𑀫𑀸𑀡𑁂𑀦 𑀓𑀢𑀸 𑀪𑀺𑀲𑀺 𑀯𑀸𑀢𑀧𑀸𑀦𑀪𑀺𑀲𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁨𑁯𑁭. ‘‘𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓’’𑀦𑁆𑀢𑀺 𑀯𑀘𑀦𑀢𑁄 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀢𑁄𑀪𑀸𑀕𑁂𑀦 𑀤𑀻𑀖𑀧𑀻𑀞𑀁 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀫𑁂𑀯 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁄 𑀅𑀥𑀺𑀓𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀫𑀸𑀡𑀬𑀼𑀢𑁆𑀢𑁄 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀗𑁆𑀕𑁄𑀢𑀺 𑀢𑀻𑀲𑀼 𑀤𑀺𑀲𑀸𑀲𑀼 𑀅𑀧𑀲𑁆𑀲𑀬𑁄, 𑀘𑀢𑁆𑀢𑀸𑀭𑁄 𑀧𑀸𑀤𑀸𑀢𑀺 𑀲𑀢𑁆𑀢 𑀅𑀗𑁆𑀕𑀸𑀦𑀺 𑀏𑀢𑀲𑁆𑀲𑀸𑀢𑀺 𑀲𑀢𑁆𑀢𑀗𑁆𑀕𑁄. 𑀅𑀬𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀆𑀲𑀦𑁆𑀤𑀺𑀓𑀁 𑀅𑀧𑁂𑀓𑁆𑀔𑀢𑀺. 𑀏𑀴𑀓𑀧𑀸𑀤𑀧𑀻𑀞𑀁 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀴𑀓𑀲𑁆𑀲 𑀧𑀸𑀤𑁄 𑀯𑀺𑀬 𑀧𑀸𑀤𑁄 𑀏𑀢𑁆𑀣𑀸𑀢𑀺 𑀏𑀴𑀓𑀧𑀸𑀤𑀁, 𑀢𑀫𑁂𑀯 𑀧𑀻𑀞𑀁 𑀏𑀴𑀓𑀧𑀸𑀤𑀧𑀻𑀞𑀁. 𑀆𑀫𑀮𑀓𑀯𑀡𑁆𑀡𑀺𑀓𑀧𑀻𑀞𑀦𑁆𑀢𑀺 𑀆𑀫𑀮𑀓𑀸𑀬 𑀯𑀡𑁆𑀡𑁄 𑀲𑀡𑁆𑀞𑀸𑀦𑁄 𑀆𑀫𑀮𑀓𑀯𑀡𑁆𑀡𑁄, 𑀢𑁂𑀦 𑀬𑁄𑀚𑀺𑀢𑀁 𑀆𑀫𑀮𑀓𑀯𑀡𑁆𑀡𑀺𑀓𑀁, 𑀢𑀤𑁂𑀯 𑀧𑀻𑀞𑀁 𑀆𑀫𑀮𑀓𑀯𑀡𑁆𑀡𑀺𑀓𑀧𑀻𑀞𑀁. ‘‘𑀆𑀓𑀸𑀭𑁂𑀦𑀸’’𑀢𑀺 𑀇𑀫𑀺𑀦𑀸 𑀯𑀡𑁆𑀡𑀲𑀤𑁆𑀤𑀲𑁆𑀲 𑀲𑀡𑁆𑀞𑀸𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀫𑀸𑀦𑀻𑀢𑀺 𑀧𑀻𑀞𑀸𑀦𑀺. 𑀏𑀢𑁆𑀣𑀸𑀢𑀺 𑀧𑀻𑀞𑁂. 𑀫𑀼𑀜𑁆𑀘𑀧𑀩𑁆𑀩𑀚𑀫𑀬𑀦𑁆𑀢𑀺 𑀫𑀼𑀜𑁆𑀚𑁂𑀦 𑀘 𑀧𑀩𑁆𑀩𑀚𑁂𑀦 𑀘 𑀓𑀢𑀁.

𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀯𑀟𑁆𑀠𑀓𑀻𑀫𑀦𑀼𑀲𑁆𑀲𑀸𑀦𑀁. 𑀙𑀯𑀺𑀲𑀁𑀭𑀓𑁆𑀔𑀦𑀢𑁆𑀣𑀸𑀬𑀸𑀢𑀺 𑀙𑀯𑀺𑀬𑀸 𑀯𑀺𑀦𑀸𑀲𑀦𑀢𑁄 𑀲𑀼𑀝𑁆𑀞𑀼 𑀭𑀓𑁆𑀔𑀦𑀢𑁆𑀣𑀸𑀬. 𑀲𑀺𑀫𑁆𑀩𑀮𑀺𑀭𑀼𑀓𑁆𑀔𑀸𑀤𑀻𑀦𑀦𑁆𑀢𑀺𑀆𑀤𑀺𑀲𑀤𑁆𑀤𑁂𑀦 𑀢𑀽𑀮𑀦𑀺𑀩𑁆𑀩𑀢𑁆𑀢𑀓𑁂 𑀲𑀩𑁆𑀩𑀭𑀼𑀓𑁆𑀔𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀔𑀻𑀭𑀯𑀮𑁆𑀮𑀺𑀆𑀤𑀻𑀦𑀦𑁆𑀢𑀺𑀆𑀤𑀺𑀲𑀤𑁆𑀤𑁂𑀦 𑀢𑀽𑀮𑀦𑀺𑀩𑁆𑀩𑀢𑁆𑀢𑀓𑀸 𑀲𑀩𑁆𑀩𑀸 𑀮𑀢𑀸𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀧𑁄𑀝𑀓𑀻𑀢𑀺𑀡𑀸𑀤𑀻𑀦𑀦𑁆𑀢𑀺𑀆𑀤𑀺𑀲𑀤𑁆𑀤𑁂𑀦 𑀢𑀽𑀮𑀦𑀺𑀩𑁆𑀩𑀢𑁆𑀢𑀓𑀸 𑀲𑀩𑁆𑀩𑀸 𑀢𑀺𑀡𑀚𑀸𑀢𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀻𑀳𑀻𑀢𑀺 𑀭𑀼𑀓𑁆𑀔𑀮𑀢𑀸𑀧𑁄𑀝𑀓𑀻𑀳𑀺. 𑀦𑀦𑀼 𑀪𑀽𑀢𑀕𑀸𑀫𑀸𑀦𑀁 𑀅𑀦𑁂𑀓𑀢𑁆𑀢𑀸 𑀏𑀢𑁂𑀳𑀺 𑀢𑀻𑀳𑀺 𑀫𑀼𑀢𑁆𑀢𑁄 𑀪𑀽𑀢𑀕𑀸𑀫𑁄 𑀅𑀢𑁆𑀣𑀺, 𑀓𑀲𑁆𑀫𑀸 𑀧𑀦 𑀲𑀩𑁆𑀩𑀪𑀽𑀢𑀕𑀸𑀫𑀸 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀭𑀼𑀓𑁆𑀔𑀯𑀮𑁆𑀮𑀺𑀢𑀺𑀡𑀚𑀸𑀢𑀺𑀬𑁄 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀺 𑀬𑀲𑁆𑀫𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦𑀢𑁆𑀣𑀺, 𑀢𑀲𑁆𑀫𑀸. 𑀲𑀩𑁆𑀩𑀫𑁆𑀧𑀺 𑀏𑀢𑀁 𑀢𑀽𑀮𑀦𑁆𑀢𑀺 𑀬𑁄𑀚𑀦𑀸. 𑀩𑀺𑀩𑁆𑀩𑁄𑀳𑀦𑁂 𑀮𑁄𑀫𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑁄𑀫𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀢𑀽𑀮𑀁 𑀅𑀧𑁂𑀓𑁆𑀔𑀢𑀺. 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀦𑁆𑀢𑀺 𑀲𑀩𑁆𑀩𑀁 𑀧𑀼𑀧𑁆𑀨𑀁. 𑀧𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀲𑀼𑀤𑁆𑀥𑀁 𑀢𑀫𑀸𑀮𑀧𑀢𑁆𑀢𑀫𑁂𑀯 𑀦 𑀯𑀝𑁆𑀝𑀢𑀺, 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀧𑀢𑁆𑀢𑀁 𑀲𑀼𑀤𑁆𑀥𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀘𑀯𑀺𑀥𑀦𑁆𑀢𑀺 𑀉𑀡𑁆𑀡𑀘𑁄𑀴𑀯𑀸𑀓𑀢𑀺𑀡𑀧𑀡𑁆𑀡𑀯𑀲𑁂𑀦 𑀧𑀜𑁆𑀘𑀧𑀓𑀸𑀭𑀁.

‘‘𑀉𑀧𑀟𑁆𑀠𑀓𑀸𑀬𑀧𑀫𑀸𑀡𑀸𑀦𑀻’’𑀢𑀺 𑀇𑀫𑀺𑀦𑀸 𑀅𑀤𑁆𑀥𑀓𑀸𑀬𑀺𑀓𑀸𑀦𑀻𑀢𑀺 𑀏𑀢𑁆𑀣 𑀅𑀤𑁆𑀥𑀲𑁆𑀲 𑀓𑀸𑀬𑀲𑁆𑀲 𑀧𑀫𑀸𑀡𑁂𑀦 𑀓𑀢𑀸𑀦𑀺 𑀅𑀤𑁆𑀥𑀓𑀸𑀬𑀺𑀓𑀸𑀦𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑁂𑀲𑀼 𑀩𑀺𑀩𑁆𑀩𑁄𑀳𑀦𑁂𑀲𑀼 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀻𑀲𑀁 𑀉𑀧𑀤𑀳𑀦𑁆𑀢𑀺, 𑀢𑀸𑀦𑀺 𑀩𑀺𑀩𑁆𑀩𑁄𑀳𑀦𑀸𑀦𑀺 𑀅𑀤𑁆𑀥𑀓𑀸𑀬𑀺𑀓𑀸𑀦𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀲𑁆𑀲𑀸𑀢𑀺 𑀩𑀺𑀩𑁆𑀩𑁄𑀳𑀦𑀲𑁆𑀲. 𑀯𑀺𑀢𑁆𑀣𑀸𑀭𑀢𑁄 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀬𑀢𑁆𑀣 𑀲𑀳 𑀕𑀻𑀯𑀸𑀬 𑀲𑀓𑀮𑀁 𑀲𑀻𑀲𑀁 𑀞𑀧𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀫𑀼𑀝𑁆𑀞𑀺𑀭𑀢𑀦𑀁 𑀯𑀺𑀢𑁆𑀣𑀸𑀭𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦’’𑀦𑁆𑀢𑀺 𑀇𑀤𑀁 𑀩𑀺𑀩𑁆𑀩𑁄𑀳𑀦𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀞𑀧𑁂𑀢𑀩𑁆𑀩𑀘𑁄𑀴𑀧𑀫𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀁 𑀧𑀦 𑀩𑀺𑀩𑁆𑀩𑁄𑀳𑀦𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀞𑀧𑀺𑀢𑀘𑁄𑀴𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀆𑀳𑀘𑁆𑀘 𑀤𑁆𑀯𑀺𑀕𑀼𑀡𑀁 𑀓𑀢𑀁 𑀢𑀺𑀓𑀡𑁆𑀡𑀁 𑀳𑁄𑀢𑀺, 𑀢𑁂𑀲𑀼 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀫𑀦𑁆𑀢𑀭𑀁 𑀯𑀺𑀤𑀢𑁆𑀣𑀺 𑀘𑀢𑀼𑀭𑀗𑁆𑀕𑀼𑀮𑀁 𑀳𑁄𑀢𑀺, 𑀫𑀚𑁆𑀛𑀝𑁆𑀞𑀸𑀦𑀁 𑀓𑁄𑀝𑀺𑀢𑁄 𑀓𑁄𑀝𑀺𑀫𑀸𑀳𑀘𑁆𑀘 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀇𑀤𑀁 𑀧𑀦 𑀩𑀺𑀩𑁆𑀩𑁄𑀳𑀦𑀁 𑀢𑀺𑀓𑀡𑁆𑀡𑀁 𑀳𑁄𑀢𑀺. 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀸𑀤𑀺𑀁 𑀯𑀸 𑀓𑀢𑁆𑀯𑀸 𑀲𑀺𑀩𑁆𑀩𑀺𑀢𑀁 𑀬𑀣𑀸 𑀓𑁄𑀝𑀺𑀢𑁄 𑀓𑁄𑀝𑀺 𑀯𑀺𑀢𑁆𑀣𑀸𑀭𑀢𑁄 𑀧𑀼𑀣𑀼𑀮𑀝𑁆𑀞𑀸𑀦𑀁 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀏𑀯𑀁 𑀲𑀺𑀩𑁆𑀩𑀺𑀢𑀩𑁆𑀩𑀁. 𑀇𑀢𑁄 𑀅𑀥𑀺𑀓𑀁 𑀦 𑀯𑀝𑁆𑀝𑀢𑀺, 𑀊𑀦𑀁 𑀧𑀦 𑀯𑀝𑁆𑀝𑀢𑀺𑀬𑁂𑀯. 𑀲𑀻𑀲𑀽𑀧𑀥𑀸𑀦𑀦𑁆𑀢𑀺 𑀲𑀻𑀲𑀁 𑀉𑀧𑀤𑀳𑀦𑁆𑀢𑀺 𑀞𑀧𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀻𑀲𑀽𑀧𑀥𑀸𑀦𑀁. 𑀩𑀺𑀩𑁆𑀩𑁄𑀳𑀦𑀸𑀦𑀻𑀢𑀺 𑀯𑀺𑀲𑁂𑀲𑁂𑀦, 𑀯𑀺𑀲𑁂𑀲𑀁 𑀯𑀸 𑀲𑀼𑀔𑀁 𑀯𑀳𑀦𑁆𑀢𑀻𑀢𑀺 𑀩𑀺𑀩𑁆𑀩𑁄𑀳𑀦𑀸𑀦𑀺. 𑀉𑀧𑀭𑀻𑀢𑀺 𑀩𑀺𑀩𑁆𑀩𑁄𑀳𑀦𑀸𑀦𑀁 𑀉𑀧𑀭𑀺. 𑀬𑀸𑀦𑀺 𑀧𑀦 𑀓𑀧𑁆𑀧𑀺𑀬𑀢𑀽𑀮𑀸𑀦𑀺 𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀫𑀳𑀦𑁆𑀢𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀔𑀼𑀤𑁆𑀤𑀓𑀁 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀦𑀬𑀥𑀭𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀦𑀬𑀥𑀭’’ 𑀇𑀢𑀺 𑀧𑀤𑁂𑀦 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑀢𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀅𑀓𑀧𑁆𑀧𑀺𑀬𑀢𑀽𑀮𑀁 𑀯𑀸𑀢𑀺 𑀪𑀺𑀲𑀺𑀬𑀁 𑀅𑀓𑀧𑁆𑀧𑀺𑀬𑀢𑀽𑀮𑀁 𑀯𑀸. 𑀩𑀺𑀩𑁆𑀩𑁄𑀳𑀦𑁂 𑀳𑀺 𑀅𑀓𑀧𑁆𑀧𑀺𑀬𑀢𑀽𑀮𑀁 𑀦𑀸𑀫 𑀦𑀢𑁆𑀣𑀺.

𑀧𑀜𑁆𑀘𑀪𑀺𑀲𑀺𑀬𑁄𑀢𑀺 𑀏𑀢𑁆𑀣 𑀯𑀸𑀓𑁆𑀬𑀪𑀸𑀯𑀜𑁆𑀘 𑀅𑀲𑀫𑀸𑀳𑀸𑀭𑀤𑀺𑀕𑀼𑀪𑀸𑀯𑀜𑁆𑀘 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀧𑀜𑁆𑀘𑀳𑀺 𑀉𑀡𑁆𑀡𑀸𑀤𑀻𑀳𑀺 𑀧𑀽𑀭𑀺𑀢𑀸 𑀪𑀺𑀲𑀺𑀬𑁄’’𑀢𑀺. 𑀇𑀫𑀺𑀦𑀸 𑀧𑀜𑁆𑀘𑀳𑀺 𑀉𑀡𑁆𑀡𑀸𑀤𑀻𑀳𑀺 𑀧𑀽𑀭𑀺𑀢𑀸 𑀪𑀺𑀲𑀺𑀬𑁄 𑀧𑀜𑁆𑀘𑀪𑀺𑀲𑀺𑀬𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀢𑁄 𑀧𑀦 𑀯𑀸𑀓𑁆𑀬𑀫𑁆𑀧𑀺 𑀅𑀲𑀫𑀸𑀳𑀸𑀭𑀤𑀺𑀕𑀼𑀧𑀺 𑀬𑀼𑀚𑁆𑀚𑀢𑁂𑀯. 𑀓𑀲𑁆𑀫𑀸 𑀧𑀜𑁆𑀘𑀕𑀡𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀢𑀽𑀮𑀕𑀡𑀦𑀸𑀬 𑀳𑀻’’𑀢𑀺𑀆𑀤𑀺. 𑀳𑀺 𑀬𑀲𑁆𑀫𑀸 𑀢𑀽𑀮𑀕𑀡𑀦𑀸𑀬 𑀏𑀢𑀸𑀲𑀁 𑀕𑀡𑀦𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀧𑀜𑁆𑀘𑀪𑀺𑀲𑀺𑀬𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀉𑀡𑁆𑀡𑀸𑀤𑀻𑀲𑀼 𑀧𑀜𑁆𑀘𑀲𑀼. 𑀉𑀡𑁆𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑁆𑀩𑀮𑀫𑁂𑀯𑀸𑀢𑀺 𑀉𑀡𑁆𑀡𑀸𑀫𑀬𑀁 𑀓𑀫𑁆𑀩𑀮𑀫𑁂𑀯. 𑀉𑀡𑁆𑀡𑀸𑀬, 𑀉𑀡𑁆𑀡𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸 𑀪𑀺𑀲𑀺 𑀉𑀡𑁆𑀡𑀸𑀪𑀺𑀲𑀺. 𑀏𑀲𑁂𑀯 𑀦𑀬𑁄 𑀘𑁄𑀴𑀪𑀺𑀲𑀺𑀆𑀤𑀻𑀲𑀼.

𑀧𑀫𑀸𑀡𑀦𑀺𑀬𑀫𑁄𑀢𑀺 𑀏𑀢𑁆𑀢𑀓𑀸 𑀧𑀫𑀸𑀡𑀸𑀢𑀺 𑀧𑀫𑀸𑀡𑀲𑁆𑀲 𑀦𑀺𑀬𑀫𑁄. 𑀫𑀜𑁆𑀘𑁂 𑀅𑀢𑁆𑀣𑀭𑀺𑀢𑀩𑁆𑀩𑀸 𑀪𑀺𑀲𑀺 𑀫𑀜𑁆𑀘𑀪𑀺𑀲𑀺. 𑀏𑀢𑀸𑀲𑀦𑁆𑀢𑀺 𑀫𑀜𑁆𑀘𑀪𑀺𑀲𑀺𑀆𑀤𑀻𑀦𑀁. 𑀬𑀁 𑀏𑀢𑀁 𑀢𑀽𑀮𑀦𑁆𑀢𑀺 𑀬𑁄𑀚𑀦𑀸. 𑀲𑀽𑀭𑀓𑁂𑀧𑀻𑀢𑀺 𑀘𑀫𑁆𑀫𑀫𑀬𑀪𑀺𑀲𑀺𑀬𑀫𑁆𑀧𑀺. 𑀏𑀢𑁂𑀦𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀯𑀘𑀦𑁂𑀦 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀫𑀜𑁆𑀘𑀪𑀺𑀲𑀺𑀦𑁆𑀢𑀺 𑀫𑀜𑁆𑀘𑁂 𑀅𑀢𑁆𑀣𑀭𑀺𑀢𑀩𑁆𑀩𑀁 𑀪𑀺𑀲𑀺𑀁. ‘‘𑀅𑀢𑁆𑀣𑀭𑀡𑀢𑁆𑀣𑀸𑀬 𑀲𑀁𑀳𑀭𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 ‘‘𑀅𑀢𑁆𑀣𑀭𑀦𑁆𑀢𑀻’’𑀢𑀺 𑀏𑀢𑁆𑀣 𑀓𑀸𑀭𑀺𑀬𑀽𑀧𑀘𑀸𑀭𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀭𑀡𑀸𑀬 𑀳𑀺 𑀲𑀁𑀳𑀭𑀡𑀁 𑀓𑀸𑀭𑀡𑀁 𑀦𑀸𑀫, 𑀅𑀢𑁆𑀣𑀭𑀡𑀁 𑀓𑀸𑀭𑀺𑀬𑀁 𑀦𑀸𑀫. 𑀉𑀧𑀭𑀻𑀢𑀺 𑀪𑀺𑀲𑀺𑀙𑀯𑀺𑀬𑀸 𑀉𑀧𑀭𑀺. 𑀨𑀼𑀲𑀺𑀢𑀸𑀦𑀻𑀢𑀺 𑀩𑀺𑀦𑁆𑀤𑀽𑀦𑀺. 𑀪𑀺𑀢𑁆𑀢𑀺𑀓𑀫𑁆𑀫𑀦𑁆𑀢𑀺 𑀪𑀺𑀢𑁆𑀢𑀺𑀬𑀁 𑀦𑀸𑀦𑀸𑀯𑀡𑁆𑀡𑁂𑀳𑀺 𑀭𑀸𑀚𑀺𑀓𑀭𑀡𑀁 𑀯𑀺𑀬 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁.

𑁨𑁯𑁮. ‘‘𑀇𑀓𑁆𑀓𑀸𑀲’’𑀦𑁆𑀢𑀺 𑀦𑀸𑀫𑀁 𑀦𑀺𑀬𑁆𑀬𑀸𑀲𑀲𑀺𑀮𑁂𑀲𑀸𑀦𑀁 𑀦𑀸𑀫𑀦𑁆𑀢𑀺 𑀆𑀳 ‘‘𑀭𑀼𑀓𑁆𑀔𑀦𑀺𑀬𑁆𑀬𑀸𑀲𑀁 𑀯𑀸 𑀲𑀺𑀮𑁂𑀲𑀁 𑀯𑀸’’𑀢𑀺. ‘‘𑀓𑀼𑀡𑁆𑀟𑀓𑀫𑀺𑀲𑁆𑀲𑀓𑀫𑀢𑁆𑀢𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀓𑀼𑀡𑁆𑀟𑀓𑁂𑀦 𑀫𑀺𑀲𑁆𑀲𑀓𑀸 𑀫𑀢𑁆𑀢𑀺𑀓𑀸 𑀓𑀼𑀡𑁆𑀟𑀓𑀫𑀢𑁆𑀢𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀸𑀲𑀧𑀧𑀺𑀝𑁆𑀞𑀦𑁆𑀢𑀺 𑀲𑀸𑀲𑀧𑀘𑀼𑀡𑁆𑀡𑀁. ‘‘𑀩𑀺𑀦𑁆𑀤𑀼 𑀩𑀺𑀦𑁆𑀤𑀼 𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀘𑁆𑀘𑀼𑀲𑁆𑀲𑀦𑁆𑀦𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀸𑀭𑀡𑀽𑀧𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀅𑀘𑁆𑀘𑀼𑀲𑁆𑀲𑀦𑁆𑀦𑀜𑁆𑀳𑀺 𑀓𑀸𑀭𑀡𑀁 𑀳𑁄𑀢𑀺, ‘‘𑀩𑀺𑀦𑁆𑀤𑀼 𑀩𑀺𑀦𑁆𑀤𑀼 𑀳𑀼𑀢𑁆𑀯𑀸’’𑀢𑀺 𑀞𑀸𑀦𑀁 𑀓𑀸𑀭𑀺𑀬𑀁 𑀳𑁄𑀢𑀺. ‘‘𑀧𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀲𑁄𑀥𑁂𑀢𑀼𑀁. 𑀕𑀡𑁆𑀟𑀼𑀧𑁆𑀧𑀸𑀤𑀕𑀽𑀣𑀫𑀢𑁆𑀢𑀺𑀓𑀦𑁆𑀢𑀺 𑀫𑀳𑀺𑀮𑀢𑀸𑀬 𑀕𑀽𑀣𑀫𑀬𑀁 𑀫𑀢𑁆𑀢𑀺𑀓𑀁. 𑀇𑀫𑀺𑀦𑀸 𑀮𑀡𑁆𑀟𑀫𑀢𑁆𑀢𑀺𑀓𑀦𑁆𑀢𑀺 𑀏𑀢𑁆𑀣 𑀮𑀡𑁆𑀟𑀲𑀤𑁆𑀤𑁄 𑀕𑀽𑀣𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺.

𑁨𑁯𑁯. 𑀦 𑀪𑀺𑀓𑁆𑀔𑀯𑁂 𑀧𑀝𑀺𑀪𑀸𑀦𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 ‘‘𑀇𑀢𑁆𑀣𑀺𑀭𑀽𑀧𑀓𑀁 𑀧𑀼𑀭𑀺𑀲𑀭𑀽𑀧𑀓’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀓𑀺𑀁 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀫𑁂𑀯 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀢𑀺𑀭𑀘𑁆𑀙𑀸𑀦𑀭𑀽𑀧𑀫𑁆𑀧𑀺 𑀓𑀸𑀢𑀼𑀁 𑀯𑀸 ‘‘𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀸𑀭𑀧𑀸𑀮𑀦𑁆𑀢𑀺 𑀤𑁆𑀯𑀸𑀭𑀧𑀸𑀮𑀭𑀽𑀧𑀁. 𑀧𑀲𑀸𑀤𑀦𑀻𑀬𑀸𑀦𑀻𑀢𑀺 𑀧𑀲𑀸𑀤𑁂𑀢𑀩𑁆𑀩𑀸𑀦𑀺, 𑀧𑀲𑀸𑀤𑁂𑀢𑀼𑀁 𑀅𑀭𑀳𑀸𑀦𑀻𑀢𑀺 𑀅𑀢𑁆𑀣𑁄.

𑁩𑁦𑁦. 𑀏𑀓𑀗𑁆𑀕𑀡𑀸𑀢𑀺 𑀅𑀯𑀺𑀳𑀸𑀭𑀝𑁆𑀞𑀸𑀦𑁂𑀦 𑀲𑀫𑀸𑀦𑀪𑀽𑀫𑀺𑀪𑀸𑀕𑀸. 𑀫𑀼𑀡𑁆𑀟𑀘𑁆𑀙𑁂𑀤𑀦𑀕𑀩𑁆𑀪𑁄𑀢𑀺 𑀫𑀼𑀡𑁆𑀟𑁂𑀦 𑀙𑀸𑀤𑁂𑀢𑀩𑁆𑀩𑁄 𑀕𑀩𑁆𑀪𑁄.

𑀢𑀢𑁆𑀣𑀸𑀢𑀺 𑀯𑀺𑀚𑁆𑀛𑀺𑀢𑀩𑁆𑀩𑀭𑀼𑀓𑁆𑀔𑁂. ‘‘𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀓𑀼𑀮𑀗𑁆𑀓𑀧𑀸𑀤𑀓𑀦𑁆𑀢𑀺 𑀏𑀢𑁆𑀣 𑀡𑀺𑀓𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀁 𑀆𑀳𑀭𑀺𑀫𑀁 𑀪𑀺𑀢𑁆𑀢𑀺𑀧𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀲𑁆𑀲𑀧𑀭𑀺𑀢𑁆𑀢𑀸𑀡𑀢𑁆𑀣𑀦𑁆𑀢𑀺 𑀯𑀲𑁆𑀲𑁄𑀤𑀓𑀧𑀭𑀺𑀢𑁆𑀢𑀸𑀡𑀢𑁆𑀣𑀁. ‘‘𑀫𑀤𑁆𑀤𑀺𑀢𑀫𑀢𑁆𑀢𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀉𑀤𑁆𑀤𑀲𑀼𑀥𑀦𑁆𑀢𑀺 𑀏𑀢𑁆𑀣 𑀲𑀼𑀥𑀸𑀲𑀤𑁆𑀤𑀲𑁆𑀲 𑀮𑁂𑀧𑀦𑀲𑀼𑀥𑀁 𑀤𑀲𑁆𑀲𑁂𑀢𑀺, 𑀪𑁄𑀚𑀦𑀲𑀼𑀥𑀁 𑀦𑀺𑀯𑀢𑁆𑀢𑁂𑀢𑀺.

𑀧𑀫𑀼𑀔𑀦𑁆𑀢𑀺 𑀯𑀺𑀳𑀸𑀭𑀲𑁆𑀲 𑀧𑀫𑀼𑀔𑀁. 𑀬𑀦𑁆𑀢𑀺 𑀧𑀤𑁂𑀲𑀁, 𑀳𑀦𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀓𑀢𑀧𑀤𑁂𑀲𑀲𑁆𑀲𑀸𑀢𑀺 𑀬𑁄𑀚𑀦𑀸. ‘‘𑀧𑀖𑀸𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀤𑀻𑀖𑀯𑀲𑁂𑀦 ‘‘𑀧𑀖𑀸𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀧𑀼𑀭𑀺𑀫𑀧𑀸𑀞𑁂 𑀭𑀲𑁆𑀲𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀧𑀓𑀼𑀝𑁆𑀝’’𑀦𑁆𑀢𑀺𑀧𑀺 𑀧𑀸𑀞𑁄𑀢𑀺 𑀲𑀲𑀁𑀬𑁄𑀕𑀯𑀲𑁂𑀦 ‘‘𑀧𑀓𑀼𑀝𑁆𑀝’’𑀦𑁆𑀢𑀺𑀧𑀺 𑀧𑀸𑀞𑁄. 𑀇𑀫𑀺𑀦𑀸 𑀧𑀼𑀭𑀺𑀫𑀧𑀸𑀞𑁂 𑀦𑀺𑀲𑀁𑀬𑁄𑀕𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀁𑀲𑀦𑁆𑀢𑀺 𑀯𑁂𑀴𑀼𑀁. 𑀢𑀢𑁄𑀢𑀺 𑀯𑀁𑀲𑀢𑁄. ‘‘𑀑𑀲𑀸𑀭𑁂𑀢𑁆𑀯𑀸 𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀑𑀲𑀸𑀭𑁂𑀢𑁆𑀯𑀸 𑀓𑀢𑀁 𑀑𑀲𑀸𑀭𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀙𑀤𑀦𑀧𑀫𑀼𑀔’’𑀦𑁆𑀢𑀺 𑀇𑀫𑀺𑀦𑀸 𑀡𑀺𑀓𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀘𑀓𑁆𑀓𑀮𑀬𑀼𑀢𑁆𑀢𑁄𑀢𑀺 𑀘𑀓𑁆𑀓𑀮𑁂𑀦 𑀬𑀼𑀢𑁆𑀢𑁄.

𑁩𑁦𑁧. 𑀧𑀸𑀦𑀻𑀬𑀤𑀸𑀦𑀪𑀸𑀚𑀦𑀦𑁆𑀢𑀺 𑀧𑀸𑀦𑀻𑀬𑀁 𑀤𑁂𑀢𑀺 𑀅𑀦𑁂𑀦𑀸𑀢𑀺 𑀧𑀸𑀦𑀻𑀬𑀤𑀸𑀦𑀁, 𑀢𑀫𑁂𑀯 𑀪𑀸𑀚𑀦𑀁 𑀧𑀸𑀦𑀻𑀬𑀤𑀸𑀦𑀪𑀸𑀚𑀦𑀁. ‘‘𑀉𑀴𑀼𑀗𑁆𑀓𑁄 𑀘 𑀣𑀸𑀮𑀓𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀤𑁆𑀯𑁂 𑀧𑀸𑀦𑀻𑀬𑀲𑀗𑁆𑀔𑀲𑁆𑀲 𑀅𑀦𑀼𑀮𑁄𑀫𑀸𑀦𑀻𑀢𑀺 𑀬𑁄𑀚𑀦𑀸.

𑁩𑁦𑁩. 𑀤𑁆𑀯𑀸𑀭𑀣𑀓𑀦𑀓𑀦𑁆𑀢𑀺 𑀤𑁆𑀯𑀸𑀭𑀁 𑀣𑀓𑁂𑀢𑀺 𑀅𑀦𑁂𑀦𑀸𑀢𑀺 𑀤𑁆𑀯𑀸𑀭𑀣𑀓𑀦𑀓𑀁. 𑀕𑀸𑀫𑀤𑁆𑀯𑀸𑀭𑁂𑀲𑀼 𑀤𑁆𑀯𑀸𑀭𑀣𑀓𑀦𑀓𑀁 𑀯𑀺𑀬 𑀘𑀓𑁆𑀓𑀮𑀬𑀼𑀢𑁆𑀢𑀁 𑀤𑁆𑀯𑀸𑀭𑀣𑀓𑀦𑀓𑀦𑁆𑀢𑀺 𑀬𑁄𑀚𑀦𑀸.

𑁩𑁦𑁫. 𑀅𑀲𑁆𑀲𑀢𑀭𑀺𑀭𑀣𑀸𑀢𑀺 𑀅𑀲𑁆𑀲𑀸𑀦𑀁 𑀯𑀺𑀲𑁂𑀲𑁂𑀦, 𑀅𑀢𑀺𑀲𑀬𑁂𑀦 𑀯𑀸𑀢𑀺 𑀅𑀲𑁆𑀲𑀢𑀭𑁄, 𑀅𑀣 𑀯𑀸 𑀧𑀓𑀢𑀺𑀅𑀲𑁆𑀲𑁂 𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀅𑀲𑁆𑀲𑀢𑀭𑁄, 𑀲𑁄 𑀏𑀢𑁂𑀲𑀼 𑀭𑀣𑁂𑀲𑀼 𑀬𑀼𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀲𑁆𑀲𑀢𑀭𑀻, 𑀢𑁂𑀬𑁂𑀯 𑀭𑀣𑀸𑀢𑀺 𑀅𑀲𑁆𑀲𑀢𑀭𑀺𑀭𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑁆𑀲𑀢𑀭𑀬𑀼𑀢𑁆𑀢𑀸 𑀭𑀣𑀸 𑀅𑀲𑁆𑀲𑀢𑀭𑀺𑀭𑀣𑀸’’𑀢𑀺. 𑀢𑀢𑁆𑀣 ‘‘𑀅𑀲𑁆𑀲𑀢𑀭𑀬𑀼𑀢𑁆𑀢𑀸’’𑀢𑀺 𑀇𑀫𑀺𑀦𑀸 ‘‘𑀅𑀲𑁆𑀲𑀢𑀭𑀻’’𑀢𑀺 𑀧𑀤𑀲𑁆𑀲 𑀅𑀲𑁆𑀲𑀢𑁆𑀣𑀺𑀢𑀤𑁆𑀥𑀺𑀢𑀁 𑀤𑀲𑁆𑀲𑁂𑀢𑀺. 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀢𑀺 𑀧𑀤𑀲𑁆𑀲 ‘‘𑀲𑀢𑀁 𑀓𑀜𑁆𑀜𑀸 𑀲𑀳𑀲𑁆𑀲𑀸𑀦𑀻’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀦𑀻’’𑀢𑀺. 𑀇𑀫𑀺𑀦𑀸 𑀦𑀺𑀓𑀸𑀭𑀲𑁆𑀲 𑀆𑀓𑀸𑀭𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀡𑁆𑀡𑁂𑀲𑀼 𑀆𑀫𑀼𑀢𑁆𑀢𑀁 𑀫𑀡𑀺𑀓𑀼𑀡𑁆𑀟𑀮𑀁 𑀏𑀢𑀸𑀲𑀦𑁆𑀢𑀺 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸 𑀓𑀜𑁆𑀜𑀸𑀬𑁄.

𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀲𑀻𑀢𑀺𑀪𑀽𑀢𑁄𑀢𑀺 𑀏𑀢𑁆𑀣 𑀓𑀺𑀮𑁂𑀲𑀸𑀢𑀧𑀸𑀦𑀁 𑀅𑀪𑀸𑀯𑁂𑀦𑁂𑀯 𑀲𑀻𑀢𑀺𑀪𑀽𑀢𑁄, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀆𑀳 ‘‘𑀓𑀺𑀮𑁂𑀲𑀸𑀢𑀧𑀸𑀪𑀸𑀯𑁂𑀦𑀸’’𑀢𑀺. ‘‘𑀓𑀺𑀮𑁂𑀲𑀽𑀧𑀥𑀺𑀅𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 𑀦𑀺𑀭𑀼𑀧𑀥𑀻𑀢𑀺 𑀏𑀢𑁆𑀣 𑀔𑀦𑁆𑀥𑀽𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀺𑀅𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀆𑀲𑀢𑁆𑀢𑀺𑀬𑁄𑀢𑀺 𑀏𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀬𑁂𑀲𑀼, 𑀪𑀯𑁂𑀲𑀼 𑀯𑀸 𑀲𑀜𑁆𑀚𑀦𑁆𑀢𑀻𑀢𑀺 𑀆𑀲𑀢𑁆𑀢𑀺𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀸𑀤𑀻𑀲𑀽’’𑀢𑀺𑀆𑀤𑀺. 𑀧𑀢𑁆𑀣𑀦𑀸𑀬𑁄𑀢𑀺 𑀢𑀡𑁆𑀳𑀸𑀬𑁄. 𑀇𑀫𑀺𑀦𑀸 𑀆𑀲𑀢𑁆𑀢𑀻𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀙𑁂𑀢𑁆𑀯𑀸𑀢𑀺 𑀏𑀢𑁆𑀣 𑀙𑁂𑀥𑀸𑀢𑀼𑀬𑀸 𑀙𑁂𑀤𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀦𑁂𑀬𑁆𑀬𑀳𑀤𑀬𑁂 𑀤𑀭𑀦𑁆𑀢𑀺 𑀏𑀢𑁆𑀣 ‘‘𑀯𑀺𑀦𑁂𑀬𑁆𑀬𑀸’’𑀢𑀺 𑀧𑀤𑀲𑁆𑀲 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀜𑁆𑀘 𑀳𑀤𑀬𑀲𑀤𑁆𑀤𑀲𑁆𑀲 𑀘𑀺𑀢𑁆𑀢𑀯𑀸𑀘𑀓𑀪𑀸𑀯𑀜𑁆𑀘 𑀤𑀭𑀣𑀲𑀭𑀽𑀧𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀺𑀢𑁆𑀢𑁂 𑀓𑀺𑀮𑁂𑀲𑀤𑀭𑀣𑀁 𑀯𑀺𑀦𑁂𑀢𑁆𑀯𑀸’’𑀢𑀺. 𑀢𑀢𑁆𑀣 ‘‘𑀘𑀺𑀢𑁆𑀢𑁂’’𑀢𑀺 𑀇𑀫𑀺𑀦𑀸 𑀳𑀤𑀬𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀓𑀺𑀮𑁂𑀲’’ 𑀇𑀢𑀺 𑀧𑀤𑁂𑀦 𑀤𑀭𑀣𑀲𑀭𑀽𑀧𑀁, ‘‘𑀯𑀺𑀦𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀬𑀓𑀭𑀡𑀦𑁆𑀢𑀺 𑀧𑀭𑀺𑀩𑁆𑀩𑀬𑀫𑀽𑀮𑀁. 𑀢𑀜𑁆𑀳𑀺 𑀯𑀬𑀁 𑀓𑀭𑀺𑀬𑀢𑀺 𑀅𑀦𑁂𑀦𑀸𑀢𑀺 𑀯𑀬𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀯𑀬𑀲𑁆𑀲 𑀓𑀭𑀡𑀁 𑀯𑀬𑀸𑀬𑀺𑀓𑀁, 𑀓𑀭𑀡𑀢𑁆𑀣𑁂 𑀆𑀬𑀺𑀓𑀧𑀘𑁆𑀘𑀬𑁄, 𑀯𑀬𑀸𑀬𑀺𑀓𑀫𑁂𑀯 𑀯𑁂𑀬𑁆𑀬𑀸𑀬𑀺𑀓𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁩𑁦𑁭. 𑀆𑀤𑁂𑀬𑁆𑀬𑀯𑀸𑀘𑁄𑀢𑀺 𑀏𑀢𑁆𑀣 𑀆𑀤𑀺𑀬𑀺𑀢𑀩𑁆𑀩𑀸𑀢𑀺 𑀆𑀤𑁂𑀬𑁆𑀬𑀸, 𑀲𑀸 𑀯𑀸𑀘𑀸 𑀏𑀢𑀲𑁆𑀲𑀸𑀢𑀺 𑀆𑀤𑁂𑀬𑁆𑀬𑀯𑀸𑀘𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀲 𑀯𑀘𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲. 𑀲𑀥𑀦𑀸𑀢𑀺 𑀲𑀁𑀯𑀺𑀚𑁆𑀚𑀫𑀸𑀦 𑀥𑀦𑀸, 𑀅𑀢𑁆𑀢𑀦𑁄 𑀯𑀸 𑀥𑀦𑀯𑀦𑁆𑀢𑁄. 𑀫𑀦𑁆𑀤𑀥𑀦𑀸𑀢𑀺 𑀅𑀧𑁆𑀧𑀥𑀦𑀸. 𑀅𑀤𑀸𑀲𑀻𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀅𑀤𑀸𑀲𑀺. 𑀇𑀢𑀻𑀢𑀺 𑀏𑀯𑀁, 𑀤𑀢𑁆𑀯𑀸 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄, 𑀅𑀕𑀫𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀳𑀸𑀧𑀡𑁂 𑀲𑀦𑁆𑀣𑀭𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁄𑀝𑀺𑀬𑀸 𑀓𑀭𑀡𑀪𑀽𑀢𑀸𑀬, 𑀆𑀥𑀸𑀭𑀪𑀽𑀢𑀸𑀬 𑀯𑀸. 𑀧𑀝𑀺𑀧𑀸𑀢𑁂𑀢𑁆𑀯𑀸𑀢𑀺 𑀧𑀝𑀺𑀳𑀦𑀸𑀧𑁂𑀢𑁆𑀯𑀸. 𑀢𑀢𑁆𑀣 𑀢𑀲𑁆𑀫𑀺𑀁 𑀞𑀸𑀦𑁂 𑀬𑁂 𑀭𑀼𑀓𑁆𑀔𑀸 𑀯𑀸 𑀬𑀸 𑀧𑁄𑀓𑁆𑀔𑀭𑀡𑀺𑀬𑁄 𑀯𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀢𑀸𑀲𑀁 𑀭𑀼𑀓𑁆𑀔𑀧𑁄𑀓𑁆𑀔𑀭𑀡𑀻𑀦𑀁. 𑀲𑀸𑀫𑀜𑁆𑀜𑀜𑁆𑀳𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀭𑀺𑀓𑁆𑀔𑁂𑀧𑀧𑀫𑀸𑀡𑀦𑁆𑀢𑀺 𑀧𑀭𑀺𑀡𑀸𑀳𑀲𑁆𑀲 𑀧𑀫𑀸𑀡𑀁. 𑀅𑀲𑁆𑀲𑀸𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲.

𑀏𑀯𑀁 𑀩𑀳𑀼𑀥𑀦𑀁 𑀘𑀚𑀦𑁆𑀢𑀲𑁆𑀲𑀸𑀧𑀺 𑀕𑀳𑀧𑀢𑀺𑀦𑁄𑀢𑀺 𑀬𑁄𑀚𑀦𑀸. 𑀓𑁄𑀝𑁆𑀞𑀓𑀁 𑀫𑀸𑀧𑁂𑀲𑀻𑀢𑀺 𑀏𑀢𑁆𑀣 𑀅𑀜𑁆𑀜𑁂 𑀓𑁄𑀝𑁆𑀞𑀓𑁂 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀸𑀲𑀸𑀤’’𑀦𑁆𑀢𑀺.

𑀯𑀺𑀳𑀸𑀭𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀧𑀸𑀴𑀺𑀬𑀁 𑀆𑀕𑀢𑁂 𑀧𑀭𑀺𑀯𑁂𑀡𑀸𑀤𑀬𑁄 𑀘𑀼𑀤𑁆𑀤𑀲 𑀉𑀧𑀓𑀭𑀡𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀯𑀺𑀳𑀸𑀭𑀓𑀸𑀭𑀸𑀧𑀦𑀧𑀲𑀗𑁆𑀕𑁂𑀦 𑀲𑀢𑁆𑀢𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀯𑀺𑀳𑀸𑀭𑀓𑀸𑀭𑀸𑀧𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀧𑀲𑁆𑀲𑀺𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀺𑀳𑀸𑀭𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁨) 𑀓𑀸𑀭𑀸𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀪𑀽𑀫𑀺𑀁 𑀲𑀼𑀯𑀡𑁆𑀡𑀬𑀝𑁆𑀞𑀺𑀲𑀦𑁆𑀣𑀭𑁂𑀦 𑀓𑀺𑀡𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀧𑀭𑀢𑁄𑀧𑀺. 𑀅𑀝𑁆𑀞𑀓𑀭𑀻𑀲𑀧𑁆𑀧𑀫𑀸𑀡𑀸 𑀪𑀽𑀫𑀺 𑀉𑀲𑀪𑁂𑀦 𑀤𑀲𑀉𑀲𑀪𑀧𑁆𑀧𑀫𑀸𑀡𑀸 𑀬𑀝𑁆𑀞𑀺𑀬𑀸 𑀤𑁆𑀯𑀺𑀲𑀢𑀬𑀝𑁆𑀞𑀺𑀧𑁆𑀧𑀫𑀸𑀡𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀚𑀦𑀁 𑀲𑀁𑀯𑁂𑀚𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀧𑀢𑁆𑀢𑀺𑀬𑁄 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀮𑀫𑁂𑀯 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀲𑀼 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀏𑀯 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀯𑀺𑀫𑀼𑀘𑁆𑀘𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. ‘‘𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀲𑀽’’𑀢𑀺 𑀧𑀤𑀜𑁆𑀳𑀺 ‘‘𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺 𑀧𑀤𑁂𑀦 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑁩𑁦𑁮. 𑀔𑀡𑁆𑀟𑀨𑀼𑀮𑁆𑀮𑀲𑀤𑁆𑀤𑀸𑀦𑀁 𑀅𑀥𑀺𑀓𑀭𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀡𑁆𑀟𑀦𑁆𑀢𑀺 𑀙𑀺𑀦𑁆𑀦𑁄𑀓𑀸𑀲𑁄. 𑀨𑀼𑀮𑁆𑀮𑀦𑁆𑀢𑀺 𑀨𑀮𑀺𑀢𑁄𑀓𑀸𑀲𑁄’’𑀢𑀺. 𑀢𑀢𑁆𑀣 ‘‘𑀙𑀺𑀦𑁆𑀦𑁄𑀓𑀸𑀲𑁄’’𑀢𑀺 𑀇𑀫𑀺𑀦𑀸 𑀔𑀡𑁆𑀟𑀢𑀺 𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀔𑀡𑁆𑀟𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀨𑀮𑀺𑀢𑁄𑀓𑀸𑀲𑁄’’𑀢𑀺 𑀇𑀫𑀺𑀦𑀸 𑀨𑀼𑀮𑁆𑀮𑀢𑀺 𑀨𑀮𑀢𑀺 𑀏𑀢𑁆𑀣𑀸𑀢𑀺 𑀨𑀼𑀮𑁆𑀮𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀲𑀗𑁆𑀔𑀭𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀧𑀸𑀝𑀺𑀲𑀤𑁆𑀤𑀲𑁆𑀲 𑀧𑀸𑀓𑀢𑀺𑀓𑀢𑁆𑀣𑀪𑀸𑀯𑀁, 𑀲𑀗𑁆𑀔𑀭𑀺𑀲𑁆𑀲𑀢𑀺𑀲𑀤𑁆𑀤𑀲𑁆𑀲 𑀘 𑀓𑀭𑀥𑀸𑀢𑀼𑀬𑀸 𑀦𑀺𑀧𑁆𑀨𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀸𑀓𑀢𑀺𑀓𑀁 𑀓𑀭𑀺𑀬𑀢𑀻’’𑀢𑀺.

𑁩𑁧𑁦. 𑀣𑁂𑀭𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀆𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀦𑁆𑀢𑀺 𑀕𑀺𑀮𑀸𑀦𑀧𑀝𑀺𑀚𑀕𑁆𑀕𑀦𑀸𑀤𑀺. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀅𑀕𑁆𑀕𑀸𑀲𑀦𑀦𑁆𑀢𑀺𑀆𑀤𑀻𑀲𑀼 𑀅𑀕𑁆𑀕𑀲𑀤𑁆𑀤𑁄 𑀧𑀞𑀫𑀢𑁆𑀣𑁄𑀧𑀺 𑀉𑀢𑁆𑀢𑀫𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀣𑁂𑀭𑀸𑀲𑀦’’𑀦𑁆𑀢𑀺𑀆𑀤𑀺. 𑀅𑀦𑁆𑀢𑀭𑀸 𑀲𑀢𑁆𑀣𑀻𑀦𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀲𑀢𑁆𑀣𑀺𑀲𑀤𑁆𑀤𑁄 𑀘 𑀊𑀭𑀼𑀲𑀗𑁆𑀔𑀸𑀢𑁄 𑀧𑀸𑀤𑀯𑀸𑀘𑀓𑁄𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀅𑀦𑁆𑀢𑀭𑁂’’𑀢𑀺.

𑁩𑁧𑁫. 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀏𑀢𑁆𑀣 𑀓𑀁 𑀯𑀬𑀁 𑀓𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀆𑀳 ‘‘𑀅𑀝𑁆𑀞𑀸𑀭𑀲𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸’’𑀢𑀺. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀆𑀲𑀦𑀧𑁆𑀧𑀝𑀺𑀩𑀸𑀳𑀦𑀸𑀤𑀺𑀓𑀣𑀸

𑁩𑁧𑁬. 𑀯𑀺𑀧𑁆𑀧𑀓𑀢𑀪𑁄𑀚𑀦𑁂𑀦𑀸𑀢𑀺 𑀏𑀢𑁆𑀣 𑀯𑀺𑀧𑁆𑀧𑀓𑀢𑀲𑀤𑁆𑀤𑁄 𑀅𑀦𑀺𑀝𑁆𑀞𑀺𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀦𑀺𑀝𑁆𑀞𑀺𑀢𑁂 𑀪𑁄𑀚𑀦𑁂’’𑀢𑀺. 𑀧𑀓𑀺𑀭𑀺𑀬𑀺𑀢𑁆𑀣, 𑀧𑀓𑀺𑀭𑀺𑀬𑀺𑀲𑁆𑀲𑀢𑁂 𑀯𑀸 𑀧𑀓𑀢𑀁, 𑀦 𑀧𑀓𑀢𑀁 𑀯𑀺𑀧𑁆𑀧𑀓𑀢𑀦𑁆𑀢𑀺 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄, 𑀅𑀢𑁆𑀣𑀢𑁄 𑀧𑀦 ‘‘𑀓𑀭𑀺𑀬𑀫𑀸𑀦𑁄 𑀅𑀦𑀺𑀝𑁆𑀞𑀺𑀢𑁄’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣𑀸𑀢𑀺 𑀞𑀸𑀦𑁂. 𑀅𑀢𑀺𑀲𑀫𑀻𑀧𑀦𑁆𑀢𑀺 𑀪𑀼𑀜𑁆𑀚𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀅𑀢𑀺𑀆𑀲𑀦𑁆𑀦𑀁. 𑀢𑀲𑁆𑀲𑀸𑀢𑀺 𑀪𑀼𑀜𑁆𑀚𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. 𑀧𑀺𑀯𑀺𑀢𑁆𑀯𑀸 𑀯𑀸𑀢𑀺 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀯𑀸. 𑀔𑀸𑀤𑀺𑀢𑁆𑀯𑀸 𑀯𑀸𑀢𑀺 𑀔𑀚𑁆𑀚𑀓𑀁 𑀔𑀸𑀤𑀺𑀢𑁆𑀯𑀸 𑀯𑀸. 𑀭𑀺𑀢𑁆𑀢𑀳𑀢𑁆𑀣𑀫𑁆𑀧𑀻𑀢𑀺 𑀢𑀼𑀘𑁆𑀙𑀳𑀢𑁆𑀣𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀆𑀫𑀺𑀲𑀳𑀢𑁆𑀣𑀁 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑁄𑀢𑀺 𑀭𑀺𑀢𑁆𑀢𑀳𑀢𑁆𑀣𑁄 𑀪𑀺𑀓𑁆𑀔𑀼.

𑀆𑀧𑀢𑁆𑀢𑀺𑀦𑁆𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁. 𑀬𑀦𑁆𑀢𑀺 𑀯𑀺𑀧𑁆𑀧𑀓𑀢𑀪𑁄𑀚𑀦𑀁 𑀪𑀺𑀓𑁆𑀔𑀼𑀁. 𑀲𑁄𑀢𑀺 𑀧𑀘𑁆𑀙𑀸 𑀆𑀕𑀢𑁄 𑀪𑀺𑀓𑁆𑀔𑀼. 𑀅𑀬𑀜𑁆𑀘 𑀪𑀺𑀓𑁆𑀔𑀽𑀢𑀺 𑀯𑀺𑀧𑁆𑀧𑀓𑀢𑀪𑁄𑀚𑀦𑁄 𑀅𑀬𑀜𑁆𑀘 𑀪𑀺𑀓𑁆𑀔𑀼. 𑀢𑁂𑀦𑀸𑀢𑀺 𑀯𑀺𑀧𑁆𑀧𑀓𑀢𑀪𑁄𑀚𑀦𑁂𑀦 𑀦𑀯𑀓𑁂𑀦 𑀯𑀸 𑀯𑀼𑀟𑁆𑀠𑀢𑀭𑁂𑀦 𑀯𑀸 𑀪𑀺𑀓𑁆𑀔𑀼𑀦𑀸. 𑀓𑀺𑀁 𑀦𑀯𑀓𑁂𑀦 𑀯𑀼𑀟𑁆𑀠𑀢𑀭𑀁 𑀆𑀡𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀯𑀼𑀟𑁆𑀠𑀢𑀭𑀁 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑁄𑀢𑀺 𑀯𑀼𑀟𑁆𑀠𑀢𑀭𑁄 𑀪𑀺𑀓𑁆𑀔𑀼. 𑀢𑀢𑁄𑀢𑀺 𑀉𑀤𑀓𑀁 𑀆𑀳𑀭𑀸𑀧𑁂𑀢𑀼𑀁 𑀆𑀡𑀢𑁆𑀢𑀺𑀢𑁄. 𑀬𑀦𑁆𑀢𑀺 𑀓𑀫𑁆𑀫𑀁.

𑀬𑁄𑀢𑀺 𑀪𑀺𑀓𑁆𑀔𑀼. ‘‘𑀏𑀯𑀭𑀽𑀧𑀲𑁆𑀲𑀸’’𑀢𑀺 𑀧𑀤𑁂𑀦 𑀢𑀲𑁆𑀲 𑀦𑀺𑀬𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀲𑀲𑁆𑀲 𑀔𑁂𑀴𑀫𑀮𑁆𑀮𑀓𑀁 𑀞𑀧𑁂𑀢𑀩𑁆𑀩𑀁. 𑀪𑀕𑀦𑁆𑀤𑀭𑀅𑀢𑀺𑀲𑀸𑀭𑀸𑀦𑀁 𑀯𑀘𑁆𑀘𑀓𑀧𑀸𑀮𑀁 𑀞𑀧𑁂𑀢𑀩𑁆𑀩𑀁. 𑀅𑀜𑁆𑀜𑁂𑀲𑀁 𑀅𑀜𑁆𑀜𑀸𑀦𑀺 𑀞𑀧𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑁂𑀴…𑀧𑁂… 𑀳𑁄𑀦𑁆𑀢𑀻’’𑀢𑀺. 𑀬𑀲𑁆𑀫𑀺𑀁𑀢𑀺 𑀬𑀲𑁆𑀫𑀺𑀁 𑀕𑀺𑀮𑀸𑀦𑁂. 𑀬𑁄𑀧𑀺 𑀪𑁂𑀲𑀚𑁆𑀚𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑁂𑀲𑀓𑀧𑁆𑀧𑁂𑀦𑀸𑀢𑀺 𑀏𑀢𑁆𑀣 𑀮𑁂𑀲𑀓𑀧𑁆𑀧𑀲𑀤𑁆𑀤𑀸𑀦𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀓𑁂𑀦 𑀲𑀻𑀲𑀸𑀩𑀸𑀥𑀸𑀤𑀺𑀫𑀢𑁆𑀢𑁂𑀦𑀸’’𑀢𑀺. 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸𑀢𑀺 𑀏𑀢𑁆𑀣 𑀕𑀡𑀁 𑀜𑀢𑁆𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀘𑁆𑀙𑁂𑀤𑀁 𑀜𑀢𑁆𑀯𑀸’’𑀢𑀺. 𑀢𑀢𑁆𑀣 ‘‘𑀧𑀭𑀺𑀘𑁆𑀙𑁂𑀤’’𑀦𑁆𑀢𑀺 𑀇𑀫𑀺𑀦𑀸 𑀕𑀡𑀲𑀤𑁆𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀜𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀇𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸

𑁩𑁧𑁮. 𑀲𑁂𑀬𑁆𑀬𑀸𑀢𑀺 𑀓𑀸𑀬𑀧𑀲𑀸𑀭𑀡𑀲𑀗𑁆𑀔𑀸𑀢𑀁 𑀲𑀬𑀦𑀓𑀺𑀭𑀺𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑁂𑀦𑀸𑀲𑀦𑀲𑀗𑁆𑀔𑀸𑀢𑀁 𑀲𑁂𑀬𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀜𑁆𑀘𑀝𑁆𑀞𑀸𑀦𑀸𑀦𑀻’’𑀢𑀺. ‘‘𑀲𑁂𑀬𑁆𑀬𑀸𑀧𑀭𑀺𑀘𑁆𑀙𑁂𑀤𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑁂𑀬𑁆𑀬𑀕𑁆𑀖𑁂𑀦𑀸𑀢𑀺 𑀏𑀢𑁆𑀣 𑀅𑀕𑁆𑀖𑀲𑀤𑁆𑀤𑀲𑁆𑀲 𑀧𑀽𑀚𑀦𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑀁 𑀤𑀻𑀧𑁂𑀢𑀺. 𑀏𑀢𑁆𑀣 𑀘 𑀅𑀕𑁆𑀖𑀲𑀤𑁆𑀤𑀲𑁆𑀲 𑀘𑀢𑀼𑀢𑁆𑀣𑀓𑁆𑀔𑀭𑁂𑀦 𑀬𑀼𑀢𑁆𑀢𑀪𑀸𑀯𑁄 𑀳𑁂𑀝𑁆𑀞𑀸 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 (𑀘𑀽𑀴𑀯. 𑀅𑀝𑁆𑀞. 𑁧𑁦𑁨) 𑀬𑁄𑀚𑀦𑀸𑀬 𑀯𑀼𑀢𑁆𑀢𑁄𑀬𑁂𑀯. 𑀓𑀸𑀮𑀦𑁆𑀢𑀺 𑀲𑁂𑀬𑁆𑀬𑀸𑀧𑀝𑀺𑀕𑁆𑀕𑀳𑀡𑀲𑁆𑀲 𑀓𑀸𑀮𑀁. 𑀕𑀸𑀳𑀺𑀬𑀫𑀸𑀦𑀸𑀢𑀺 𑀕𑀸𑀳𑀸𑀧𑀺𑀬𑀫𑀸𑀦𑀸. ‘‘𑀅𑀢𑀺𑀭𑁂𑀓𑀸𑀦𑀺 𑀅𑀳𑁂𑀲𑀼’’𑀦𑁆𑀢𑀺 𑀇𑀫𑀺𑀦𑀸 𑀉𑀲𑁆𑀲𑀸𑀭𑀬𑀺𑀁𑀲𑀽𑀢𑀺 𑀏𑀢𑁆𑀣 𑀉𑀤𑁆𑀥𑀁 𑀲𑀸𑀭𑀬𑀺𑀁𑀲𑀼 𑀕𑀘𑁆𑀙𑀺𑀁𑀲𑀼 𑀧𑀯𑀢𑁆𑀢𑀺𑀁𑀲𑀽𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀢𑀺𑀭𑁂𑀓𑀸𑀦𑀻𑀢𑀺 𑀘 𑀪𑀺𑀓𑁆𑀔𑀼𑀧𑀭𑀺𑀘𑁆𑀙𑁂𑀤𑀢𑁄 𑀲𑁂𑀬𑁆𑀬𑀸𑀧𑀭𑀺𑀘𑁆𑀙𑁂𑀤𑀸𑀦𑀺 𑀅𑀢𑀺𑀭𑁂𑀓𑀸𑀦𑀺. 𑀅𑀦𑀼𑀪𑀸𑀕𑀦𑁆𑀢𑀺 𑀏𑀢𑁆𑀣 𑀅𑀦𑀼 𑀧𑀘𑁆𑀙𑀸 𑀤𑀸𑀢𑀩𑁆𑀩𑁄 𑀪𑀸𑀕𑁄 𑀅𑀦𑀼𑀪𑀸𑀕𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀦 𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺. 𑀅𑀢𑀺𑀫𑀦𑁆𑀤𑁂𑀲𑀽𑀢𑀺𑀆𑀤𑀺𑀯𑀘𑀦𑁂𑀦 𑀓𑀺𑀜𑁆𑀘𑀺𑀫𑀦𑁆𑀤𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀢𑀺𑀲𑁆𑀲𑁄 𑀲𑁂𑀬𑁆𑀬𑀸 𑀤𑀸𑀢𑀩𑁆𑀩𑀸. 𑀬𑀢𑁄 𑀓𑀺𑀜𑁆𑀘𑀺𑀫𑀦𑁆𑀤𑁂𑀲𑀼 𑀪𑀺𑀓𑁆𑀔𑀽𑀲𑀼 𑀤𑁆𑀯𑁂 𑀢𑀬𑁄 𑀯𑀺𑀳𑀸𑀭𑀸 𑀤𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 ‘‘𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑁄’’𑀢𑀺 𑀯𑀘𑀦𑁂. 𑀅𑀦𑀼𑀪𑀸𑀕𑁂 𑀕𑀳𑀺𑀢𑁂𑀢𑀺 𑀬𑁄𑀚𑀦𑀸. 𑀬𑁂𑀦 𑀅𑀦𑀼𑀪𑀸𑀕𑁄 𑀘 𑀧𑀞𑀫𑀪𑀸𑀕𑁄 𑀘 𑀕𑀳𑀺𑀢𑁄, 𑀲𑁄 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸.

‘‘𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀻’’𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀻𑀫𑁂𑀢𑀺 𑀏𑀢𑁆𑀣 𑀲𑀻𑀫𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀁, 𑀦𑀺𑀲𑀺𑀦𑁆𑀦𑀁 𑀯𑀸 𑀦𑀺𑀲𑁆𑀲𑀻𑀫𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀧𑀘𑀸𑀭𑀲𑀻𑀫𑀸𑀬 𑀆𑀯𑀸𑀲𑀯𑀟𑁆𑀠𑀦𑀯𑀲𑁂𑀦 𑀅𑀢𑀺𑀯𑀺𑀢𑁆𑀣𑀸𑀭𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀤𑀽𑀭𑁂 𑀞𑀺𑀢𑀲𑁆𑀲𑀸𑀧𑀻’’𑀢𑀺. 𑀉𑀢𑀼𑀓𑀸𑀮𑁂𑀧𑀻𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑀓𑀸𑀮𑁂𑀧𑀺. 𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀲𑀻𑀢𑀉𑀡𑁆𑀳𑀉𑀢𑀼 𑀢𑀺𑀔𑀺𑀡𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀯𑀺𑀲𑁂𑀲𑁂𑀦 𑀉𑀢𑀼𑀓𑀸𑀮𑁄𑀢𑀺 𑀦𑀸𑀫𑀁 𑀧𑀸𑀓𑀝𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀫𑀦𑁆𑀢𑀕𑀺𑀫𑁆𑀳𑀓𑀸𑀮𑁂𑀧𑀻’’𑀢𑀺. 𑀧𑀺𑀲𑀤𑁆𑀤𑁂𑀦 𑀯𑀲𑁆𑀲𑀓𑀸𑀮𑀁 𑀅𑀧𑁂𑀓𑁆𑀔𑀢𑀺. 𑀧𑀼𑀭𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀕𑀸𑀳𑁄 𑀧𑀼𑀭𑀺𑀫𑀓𑁄, 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀕𑀸𑀳𑁄 𑀧𑀘𑁆𑀙𑀺𑀫𑀓𑁄.

𑀅𑀦𑁆𑀢𑀭𑀸 𑀤𑁆𑀯𑀻𑀳𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂𑀳𑀺 𑀫𑀼𑀢𑁆𑀢𑁂 𑀓𑀸𑀮𑁂 𑀕𑀸𑀳𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄. 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀏𑀓𑀺𑀲𑁆𑀲𑀁 𑀯𑀺𑀳𑀸𑀭𑀲𑀻𑀫𑀸𑀬𑀁. 𑀲𑁂𑀦𑀸𑀲𑀦𑀲𑀸𑀫𑀺𑀓𑀸𑀢𑀺 𑀲𑁂𑀦𑀸𑀲𑀦𑀤𑀸𑀬𑀓𑀸, 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀲𑁂𑀦𑀸𑀲𑀦𑀁. 𑀆𑀯𑀸𑀲𑀺𑀓𑀸 𑀦 𑀑𑀮𑁄𑀓𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑁂. 𑀧𑀮𑀼𑀚𑁆𑀚𑀦𑁆𑀢𑀫𑁆𑀧𑀻𑀢𑀺 𑀯𑀺𑀦𑀲𑁆𑀲𑀦𑁆𑀢𑀫𑁆𑀧𑀺. 𑀪𑀕𑀯𑀸 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀲𑁂𑀦𑀸𑀲𑀦𑀲𑁆𑀲. 𑀅𑀧𑀭𑀚𑁆𑀚𑀽𑀢𑀺 𑀅𑀧𑀭𑀲𑁆𑀫𑀺𑀁 𑀅𑀳𑀦𑀺 𑀅𑀧𑀭𑀚𑁆𑀚𑀼. 𑀕𑀢𑀸𑀬𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑀸𑀬. 𑀧𑀯𑀸𑀭𑀡𑀸𑀬 𑀕𑀢𑀸𑀬 𑀧𑀯𑀸𑀭𑀡𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑀺𑀢𑁂 𑀲𑀢𑀺 𑀅𑀧𑀭𑀚𑁆𑀚𑀼 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀕𑀸𑀳𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀢𑀦𑁆𑀢𑀺 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁. 𑀕𑀸𑀳𑁂𑀦𑁆𑀢𑁂𑀦𑀸𑀢𑀺 𑀕𑀸𑀳𑀸𑀧𑁂𑀦𑁆𑀢𑁂𑀦. 𑀢𑁂𑀦𑀸𑀢𑀺 𑀕𑀡𑁆𑀳𑀦𑁆𑀢𑁂𑀦. 𑀅𑀝𑁆𑀞𑀫𑀸𑀲𑁂𑀢𑀺 𑀘𑀢𑁆𑀢𑀸𑀭𑁄 𑀳𑁂𑀫𑀦𑁆𑀢𑀫𑀸𑀲𑁂, 𑀘𑀢𑁆𑀢𑀸𑀭𑁄 𑀘 𑀕𑀺𑀫𑁆𑀳𑀫𑀸𑀲𑁂𑀢𑀺 𑀅𑀝𑁆𑀞𑀫𑀸𑀲𑁂. 𑀓𑀤𑀸𑀘𑀺 𑀧𑀜𑁆𑀘 𑀕𑀺𑀫𑁆𑀳𑀫𑀸𑀲𑁂𑀢𑀺 𑀦𑀯𑀫𑀸𑀲𑁂 𑀯𑀸. 𑀔𑀡𑁆𑀟𑀁 𑀯𑀸𑀢𑀺 𑀙𑀺𑀦𑁆𑀦𑀝𑁆𑀞𑀸𑀦𑀁 𑀯𑀸. 𑀨𑀼𑀮𑁆𑀮𑀁 𑀯𑀸𑀢𑀺 𑀨𑀮𑀺𑀢𑀝𑁆𑀞𑀸𑀦𑀁 𑀯𑀸. 𑀧𑀝𑀺𑀲𑀗𑁆𑀔𑀭𑀺𑀢𑀩𑁆𑀩𑀦𑁆𑀢𑀺 𑀧𑀸𑀓𑀢𑀺𑀓𑀁 𑀓𑀸𑀢𑀩𑁆𑀩𑀁. 𑀤𑀺𑀯𑀲𑀁 𑀔𑁂𑀧𑁂𑀢𑁆𑀯𑀸𑀢𑀺 𑀧𑀭𑀺𑀯𑁂𑀡𑁂 𑀤𑀺𑀯𑀲𑀁 𑀔𑁂𑀧𑁂𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀕𑀳𑀺𑀢𑀲𑁂𑀦𑀸𑀲𑀦𑁂. 𑀭𑀢𑁆𑀢𑀺𑀦𑁆𑀤𑀺𑀯𑀦𑁆𑀢𑀺 𑀭𑀢𑁆𑀢𑀺 𑀘 𑀤𑀺𑀯𑁄 𑀘 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦 𑀮𑀩𑁆𑀪𑀢𑀻𑀢𑀺 𑀲𑀗𑁆𑀖𑀢𑁆𑀣𑁂𑀭𑁂𑀦 𑀦 𑀮𑀩𑁆𑀪𑀢𑀺. 𑀇𑀤𑀦𑁆𑀢𑀺 𑀲𑁂𑀦𑀸𑀲𑀦𑀁.

𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀕𑀸𑀳𑁂𑀦 𑀅𑀕𑀳𑁂𑀢𑀩𑁆𑀩𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁 𑀧𑀦𑀸’’𑀢𑀺𑀆𑀤𑀺. 𑀢𑁂𑀫𑀸𑀲𑀘𑁆𑀘𑀬𑁂𑀦 𑀢𑁂𑀫𑀸𑀲𑀘𑁆𑀘𑀬𑁂𑀦𑀸𑀢𑀺 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀢𑀺𑀓𑁆𑀓𑀫𑁂𑀦 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀢𑀺𑀓𑁆𑀓𑀫𑁂𑀦. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀬𑀲𑁆𑀫𑀺𑀁 𑀧𑀦𑀸𑀢𑀺 𑀲𑁂𑀦𑀸𑀲𑀦𑁂 𑀧𑀦. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀯𑀸𑀭𑀫𑁂𑀯. 𑀅𑀬𑀦𑁆𑀢𑀺 𑀏𑀲𑀸 𑀓𑀣𑀸.

𑀢𑀢𑁆𑀣𑀸𑀢𑀺 𑀤𑀼𑀯𑀺𑀥𑁂𑀲𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑁂𑀲𑀼. 𑀉𑀢𑀼𑀓𑀸𑀮𑀦𑁆𑀢𑀺 𑀉𑀢𑀼𑀓𑀸𑀮𑁂 𑀆𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀢𑀤𑀸𑀯 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀸𑀮𑁄 𑀦𑀸𑀫𑀸𑀢𑀺 𑀉𑀝𑁆𑀞𑀸𑀧𑀦𑀲𑁆𑀲 𑀅𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺. 𑀏𑀓𑀁 𑀯𑀸 𑀫𑀜𑁆𑀘𑀝𑁆𑀞𑀸𑀦𑀁 𑀯𑀸 𑀞𑀧𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀏𑀓𑁄 𑀯𑀸 𑀣𑁂𑀭𑁄 𑀆𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀉𑀩𑁆𑀪𑀡𑁆𑀟𑀺𑀓𑀸𑀢𑀺 𑀉𑀓𑁆𑀔𑀺𑀢𑁆𑀢𑀪𑀡𑁆𑀟𑀺𑀓𑀸.

𑀩𑀳𑀽𑀲𑀽𑀢𑀺 𑀢𑀬𑁄 𑀆𑀤𑀺𑀁 𑀓𑀢𑁆𑀯𑀸 𑀩𑀳𑀽𑀲𑀼 𑀪𑀺𑀓𑁆𑀔𑀽𑀲𑀼. 𑀧𑀳𑁄𑀢𑀻𑀢𑀺 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀧𑀭𑀺𑀯𑁂𑀡𑁂. 𑀢𑀲𑁆𑀲𑁂𑀯𑀸𑀢𑀺 𑀧𑀭𑀺𑀯𑁂𑀡𑀲𑀸𑀫𑀺𑀓𑀲𑁆𑀲𑁂𑀯. 𑀏𑀯𑀁 𑀅𑀧𑀳𑁄𑀦𑁆𑀢𑁂𑀲𑀽𑀢𑀺 𑀏𑀯𑀁 𑀧𑀭𑀺𑀯𑁂𑀡𑀕𑁆𑀖𑁂𑀦 𑀅𑀧𑀳𑁄𑀦𑁆𑀢𑁂𑀲𑀼. 𑀧𑀸𑀲𑀸𑀤𑀕𑁆𑀖𑁂𑀦𑀸𑀢𑀺 𑀯𑀺𑀳𑀸𑀭𑀲𑀗𑁆𑀔𑀸𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀧𑀭𑀺𑀘𑁆𑀙𑁂𑀤𑁂𑀦. 𑀑𑀯𑀭𑀓𑀕𑁆𑀖𑁂𑀦𑀸𑀢𑀺 𑀕𑀩𑁆𑀪𑀲𑁆𑀲 𑀧𑀭𑀺𑀘𑁆𑀙𑁂𑀤𑁂𑀦. 𑀲𑁂𑀬𑁆𑀬𑀕𑁆𑀖𑁂𑀦𑀸𑀢𑀺 𑀘𑀢𑀼𑀧𑀜𑁆𑀘𑀳𑀢𑁆𑀣𑀧𑁆𑀧𑀫𑀸𑀡𑀸𑀬 𑀲𑁂𑀬𑁆𑀬𑀸𑀬 𑀧𑀭𑀺𑀘𑁆𑀙𑁂𑀤𑁂𑀦. 𑀫𑀜𑁆𑀘𑀝𑁆𑀞𑀸𑀦𑁂𑀦𑀸𑀢𑀺 𑀤𑁆𑀯𑀺𑀳𑀢𑁆𑀣𑀯𑀺𑀢𑁆𑀣𑀸𑀭𑀲𑁆𑀲 𑀘𑀢𑀼𑀳𑀢𑁆𑀣𑀆𑀬𑀸𑀫𑀲𑁆𑀲 𑀫𑀜𑁆𑀘𑀲𑁆𑀲 𑀞𑀸𑀦𑁂𑀦. 𑀏𑀓𑀫𑀜𑁆𑀘𑀝𑁆𑀞𑀸𑀦𑀲𑁆𑀲 𑀤𑁆𑀯𑀺𑀦𑁆𑀦𑀁 𑀧𑀻𑀞𑀓𑀸𑀦𑀁 𑀞𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀓𑀧𑀻𑀞𑀓𑀝𑁆𑀞𑀸𑀦𑀯𑀲𑁂𑀦𑀸’’𑀢𑀺. 𑀇𑀤𑀁 𑀦𑀺𑀲𑀻𑀤𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑁂 𑀦 𑀲𑀓𑁆𑀓𑀸 𑀦𑀺𑀲𑀻𑀤𑀺𑀢𑀼𑀁, 𑀦 𑀤𑀸𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀦𑁄 𑀧𑀦 𑀞𑀺𑀢𑁄𑀓𑀸𑀲𑀫𑀢𑁆𑀢𑀁 𑀦 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺. 𑀏𑀢𑀦𑁆𑀢𑀺 𑀞𑀺𑀢𑁄𑀓𑀸𑀲𑀫𑀢𑁆𑀢𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀓𑀫𑀜𑁆𑀘𑀝𑁆𑀞𑀸𑀦𑀲𑁆𑀲 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀏𑀓𑀧𑀻𑀞𑀓𑀝𑁆𑀞𑀸𑀦𑀪𑀸𑀯𑁂𑀦 𑀅𑀧𑀳𑁄𑀦𑁆𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀯𑀸 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺. 𑀳𑀻𑀢𑀺 𑀲𑀘𑁆𑀘𑀁. ‘‘𑀲𑀻𑀢𑀲𑀫𑀬𑁂’’𑀢𑀺 𑀇𑀫𑀺𑀦𑀸 𑀉𑀡𑁆𑀳𑀲𑀫𑀬𑁂𑀧𑀺 𑀲𑀩𑁆𑀩𑀤𑀺𑀯𑀲𑀁 𑀅𑀚𑁆𑀛𑁄𑀓𑀸𑀲𑁂 𑀯𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀻𑀧𑁂𑀢𑀺. 𑀧𑀭𑀺𑀴𑀸𑀳𑀲𑀫𑀬𑁂 𑀧𑀦 𑀲𑀓𑁆𑀓𑀸 𑀲𑀩𑁆𑀩𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀯𑀲𑀺𑀢𑀼𑀁. 𑀓𑀺𑀜𑁆𑀘𑀸𑀧𑀺 𑀲𑀓𑁆𑀓𑀸, 𑀲𑀻𑀢𑀼𑀡𑁆𑀳𑀓𑀸𑀮𑁂 𑀧𑀦 𑀦 𑀤𑀸𑀢𑀩𑁆𑀩𑀢𑁆𑀢𑀸 𑀧𑀭𑀺𑀴𑀸𑀳𑀲𑀫𑀬𑁂𑀧𑀺 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀫𑀜𑁆𑀘𑀝𑁆𑀞𑀸𑀦𑁂 𑀯𑀸 𑀏𑀓𑀧𑀻𑀞𑀓𑀝𑁆𑀞𑀸𑀦𑁂 𑀯𑀸 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀦𑀺𑀲𑀻𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀸𑀣𑁂𑀭𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀫𑀳𑀸𑀣𑁂𑀭𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀤𑁆𑀤𑀸𑀕𑀭𑀼𑀓𑁄𑀢𑀺 𑀦𑀺𑀤𑁆𑀤𑀸𑀬 𑀕𑀭𑀼𑀓𑀸𑀭𑀓𑁄. 𑀲𑀻𑀢𑀁 𑀅𑀦𑀼𑀤𑀳𑀢𑀻𑀢𑀺 𑀲𑀻𑀢𑀁 𑀫𑀁 𑀧𑀻𑀴𑁂𑀢𑀺. 𑀢𑁂𑀦𑀸𑀢𑀺 𑀫𑀳𑀸𑀣𑁂𑀭𑁂𑀦. 𑀤𑀼𑀢𑀺𑀬𑀢𑁆𑀣𑁂𑀭𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀫𑀳𑀸𑀣𑁂𑀭𑀁 𑀅𑀧𑁂𑀓𑁆𑀔𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀉𑀓𑁆𑀓𑀸𑀲𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀚𑀫𑁆𑀩𑀼𑀤𑀻𑀧𑁂 𑀧𑀦 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀕𑀸𑀳𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘𑀺𑀤𑁂𑀯 𑀫𑀜𑁆𑀘𑀝𑁆𑀞𑀸𑀦𑀁 𑀯𑀸 𑀧𑀻𑀞𑀝𑁆𑀞𑀸𑀦𑀁 𑀯𑀸𑀢𑀺 𑀬𑁄𑀚𑀦𑀸. 𑀅𑀬𑀦𑁆𑀢𑀺𑀆𑀤𑀺 𑀧𑀼𑀭𑀺𑀫𑀯𑀘𑀦𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀧𑀘𑁆𑀙𑀺𑀫𑀯𑀘𑀦𑀲𑁆𑀲 𑀓𑀣𑀦𑀢𑁆𑀣𑀸𑀬 𑀯𑀼𑀢𑁆𑀢𑀯𑀘𑀦𑀁.

𑀯𑀲𑁆𑀲𑀸𑀯𑀸𑀲𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀆𑀕𑀦𑁆𑀢𑀼𑀓𑀯𑀢𑁆𑀢𑀦𑁆𑀢𑀺 𑀆𑀕𑀦𑁆𑀢𑀼𑀓𑀲𑁆𑀲 𑀯𑀢𑁆𑀢𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂. 𑀕𑀦𑁆𑀢𑁆𑀯𑀸 𑀯𑀲𑀺𑀢𑀼𑀓𑀸𑀫𑁂𑀦 𑀆𑀕𑀦𑁆𑀢𑀼𑀓𑁂𑀦𑀸𑀢𑀺 𑀬𑁄𑀚𑀦𑀸. 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀫𑁂𑀯𑀸𑀢𑀺 𑀯𑀲𑁆𑀲𑀁 𑀉𑀧𑀕𑀫𑀦𑀤𑀺𑀯𑀲𑁂𑀬𑁂𑀯. 𑀢𑀢𑁆𑀣𑀸𑀢𑀺 𑀅𑀜𑁆𑀜𑀁 𑀞𑀸𑀦𑀁. 𑀦𑀕𑀦𑁆𑀢𑀩𑁆𑀩𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀲𑀦𑀝𑁆𑀞𑀸𑀦𑀁 𑀯𑀸 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀬𑀲𑁆𑀫𑀸. 𑀢𑀢𑁆𑀭𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂. 𑀢𑁂𑀦𑀸𑀢𑀺 𑀲𑀫𑁆𑀩𑀸𑀥𑀅𑀲𑀫𑁆𑀧𑀚𑁆𑀚𑀦𑀓𑀸𑀭𑀡𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬, 𑀢𑀲𑁆𑀫𑀸. 𑀢𑀁 𑀯𑀺𑀳𑀸𑀭𑀦𑁆𑀢𑀺 𑀬𑀲𑁆𑀫𑀺𑀁 𑀯𑀲𑀺𑀢𑀼𑀓𑀸𑀫𑁄, 𑀢𑀁 𑀯𑀺𑀳𑀸𑀭𑀁. 𑀢𑀢𑁆𑀣𑀸𑀢𑀺 𑀯𑀺𑀳𑀸𑀭𑁂, 𑀯𑀲𑀦𑁆𑀢𑁄 𑀲𑀼𑀔𑀁 𑀯𑀲𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀤𑁂𑀲𑀢𑁆𑀣𑀺𑀓𑁄𑀢𑀺 𑀉𑀤𑁆𑀤𑁂𑀲𑀁 𑀅𑀢𑁆𑀣𑀺𑀓𑁄, 𑀉𑀤𑁆𑀤𑁂𑀲𑁂𑀦 𑀯𑀸. 𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑁂𑀦, 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀸 𑀲𑀧𑁆𑀧𑀸𑀬𑀪𑀸𑀯𑀁.

𑀢𑀢𑁆𑀣𑀸𑀢𑀺 𑀅𑀜𑁆𑀜𑀯𑀺𑀳𑀸𑀭𑀁. 𑀕𑀘𑁆𑀙𑀦𑁆𑀢𑁂𑀦 𑀖𑀝𑁆𑀝𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀖𑀝𑁆𑀝𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀲𑀓𑀝𑁆𑀞𑀸𑀦𑁂. 𑀓𑀺𑀁 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀆𑀳 ‘‘𑀢𑀼𑀫𑁆𑀳𑁂’’𑀢𑀺𑀆𑀤𑀺. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀯𑀸 𑀦𑀢𑁆𑀣𑀺 𑀦 𑀯𑀺𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀉𑀧𑁄𑀲𑀣𑀸𑀕𑀸𑀭𑀲𑁆𑀲 𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀼𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀇𑀤𑀁 𑀢𑀸𑀴𑀜𑁆𑀘𑁂𑀯 𑀇𑀫𑀁 𑀲𑀽𑀘𑀺𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀣𑀸𑀢𑀺 𑀬𑁄𑀚𑀦𑀸. 𑀕𑀫𑀺𑀬𑀯𑀢𑁆𑀢𑀦𑁆𑀢𑀺 𑀕𑀫𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁. ‘‘𑀤𑀳𑀭𑁂𑀳𑀻’’𑀢𑀺 𑀧𑀤𑀁 ‘‘𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸’’𑀢𑀺 𑀘 ‘‘𑀕𑀸𑀳𑀸𑀧𑁂𑀢𑁆𑀯𑀸’’𑀢𑀺 𑀘 𑀧𑀤𑀤𑁆𑀯𑀬𑁂 𑀓𑀸𑀭𑀺𑀢𑀓𑀫𑁆𑀫𑀁, ‘‘𑀧𑀢𑁆𑀢𑀘𑀻𑀯𑀭𑀪𑀡𑁆𑀟𑀺𑀓𑀸𑀬𑁄’’𑀢𑀺 𑀧𑀤𑀁 ‘‘𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸’’𑀢𑀺 𑀧𑀤𑁂 𑀥𑀸𑀢𑀼𑀓𑀫𑁆𑀫𑀁, ‘‘𑀢𑁂𑀮𑀦𑀸𑀴𑀺𑀓𑀢𑁆𑀢𑀭𑀤𑀡𑁆𑀟𑀸𑀤𑀻𑀦𑀻’’𑀢𑀺 𑀧𑀤𑀁 ‘‘𑀕𑀸𑀳𑀸𑀧𑁂𑀢𑁆𑀯𑀸’’𑀢𑀺 𑀧𑀤𑁂 𑀥𑀸𑀢𑀼𑀓𑀫𑁆𑀫𑀫𑁂𑀯. 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁂𑀦𑀸𑀢𑀺 𑀅𑀢𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀧𑀓𑀸𑀲𑁂𑀦𑁆𑀢𑁂𑀦. 𑀯𑀺𑀢𑀓𑁆𑀓𑀦𑁆𑀢𑀺 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑀯𑀺𑀢𑀓𑁆𑀓𑀁. ‘‘𑀲𑀧𑀭𑀺𑀯𑀸𑀭’’𑀦𑁆𑀢𑀺 𑀧𑀤𑀁 ‘‘𑀕𑀘𑁆𑀙𑀦𑁆𑀢𑀜𑁆𑀘𑀸’’𑀢𑀺 𑀧𑀤𑁂 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀧𑀭𑀺𑀯𑀸𑀭𑀁 𑀕𑀘𑁆𑀙𑀦𑁆𑀢𑀜𑁆𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦’’𑀦𑁆𑀢𑀺 𑀧𑀤𑁂 𑀧𑀦 𑀓𑀸𑀭𑀓𑀯𑀺𑀲𑁂𑀲𑀦𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀧𑀭𑀺𑀯𑀸𑀭𑀁 𑀦𑀁 𑀪𑀺𑀓𑁆𑀔𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑀺𑀲𑁆𑀯𑀸’’𑀢𑀺 𑀧𑀤𑁂 𑀘 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀫𑁂𑀯. 𑀏𑀯𑀜𑁆𑀳𑀺 𑀲𑀢𑀺 𑀕𑀘𑁆𑀙𑀦𑁆𑀢𑀜𑁆𑀘 𑀦𑀁 𑀪𑀺𑀓𑁆𑀔𑀼𑀁 𑀲𑀧𑀭𑀺𑀯𑀸𑀭𑀁 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀦𑀼𑀲𑁆𑀲𑀸 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀽𑀢𑀺 𑀫𑀦𑀼𑀲𑁆𑀲𑁂𑀲𑀼. 𑀏𑀓𑁄 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀓𑀸𑀮𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀢𑁆𑀣𑀸𑀢𑀺 𑀞𑀸𑀦𑁂. 𑀢𑀲𑁆𑀲𑀸𑀢𑀺 𑀏𑀓𑀲𑁆𑀲 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀲𑁆𑀲, 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂 𑀫𑀦𑀼𑀲𑁆𑀲𑀸 𑀬𑀸𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀢𑁆𑀣𑀸𑀢𑀺 𑀅𑀜𑁆𑀜𑀁 𑀞𑀸𑀦𑀁. 𑀫𑁂𑀚𑁆𑀚𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀺𑀦𑁂𑀳𑀦𑁆𑀢𑀻𑀢𑀺 𑀫𑀺𑀢𑁆𑀢𑀸. 𑀲𑀼𑀔𑀤𑀼𑀓𑁆𑀔𑁂𑀲𑀼 𑀅𑀫𑀸 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀅𑀫𑀘𑁆𑀘𑀸. 𑀫𑀺𑀢𑁆𑀢𑀸𑀬𑁂𑀯 𑀅𑀫𑀘𑁆𑀘𑀸𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑀸, 𑀢𑁂. 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸𑀢𑀺 𑀲𑀫𑀁, 𑀲𑀫𑁆𑀫𑀸 𑀯𑀸 𑀫𑀦𑁆𑀢𑀬𑀺𑀢𑁆𑀯𑀸. 𑀇𑀥𑁂𑀯𑀸𑀢𑀺 𑀕𑀸𑀫𑁂 𑀏𑀯, 𑀯𑀺𑀳𑀸𑀭𑁂 𑀏𑀯 𑀯𑀸. 𑀓𑀲𑁆𑀫𑀸 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀦𑀦𑀼 𑀲𑀩𑁆𑀩𑀫𑁂𑀢𑀁 𑀅𑀓𑀧𑁆𑀧𑀺𑀬𑀜𑁆𑀘 𑀲𑀸𑀯𑀚𑁆𑀚𑀜𑁆𑀘𑀸𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀳𑁂𑀢𑀁 𑀓𑀧𑁆𑀧𑀺𑀬𑀜𑁆𑀘𑁂𑀯 𑀅𑀦𑀯𑀚𑁆𑀚𑀜𑁆𑀘𑀸’’𑀢𑀺. 𑀳𑀺 𑀬𑀲𑁆𑀫𑀸 𑀏𑀢𑀁 𑀲𑀩𑁆𑀩𑀁 𑀓𑀧𑁆𑀧𑀺𑀬𑀜𑁆𑀘 𑀅𑀦𑀯𑀚𑁆𑀚𑀜𑁆𑀘, 𑀢𑀲𑁆𑀫𑀸 𑀲𑀩𑁆𑀩𑀁 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑀬𑀫𑁆𑀧𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀓𑀼𑀭𑀼𑀦𑁆𑀤𑀻𑀲𑀼 𑀯𑀼𑀢𑁆𑀢𑀯𑀘𑀦𑀯𑀲𑁂𑀦 𑀉𑀪𑀬𑀫𑁆𑀧𑀺 𑀏𑀢𑀁 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀆𑀯𑀸𑀲𑀺𑀓𑀯𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀓𑀘𑁆𑀘𑁂𑀯 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀓𑀘𑁆𑀘𑁂𑀯𑀸𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀆𑀕𑀢𑀢𑁄 𑀧𑀞𑀫𑀫𑁂𑀯. 𑀧𑀥𑀸𑀦𑀖𑀭𑀯𑀺𑀳𑀸𑀭𑀫𑀕𑁆𑀕𑁄𑀢𑀺 𑀧𑀥𑀸𑀦𑀖𑀭𑀫𑀕𑁆𑀕𑁄 𑀘 𑀯𑀺𑀳𑀸𑀭𑀫𑀕𑁆𑀕𑁄 𑀘. 𑀫𑀼𑀤𑁆𑀤𑀯𑁂𑀤𑀺𑀓𑀸𑀬𑀸𑀢𑀺 𑀘𑁂𑀢𑀺𑀬𑀲𑁆𑀲 𑀳𑀫𑁆𑀫𑀺𑀬𑀯𑁂𑀤𑀺𑀓𑀸𑀬. 𑀓𑀲𑁆𑀫𑀸 𑀇𑀤𑀫𑁆𑀧𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀯𑀲𑁆𑀲𑀁 𑀯𑀲𑀺𑀢𑀼𑀓𑀸𑀫𑀸 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀯𑀲𑁆𑀲𑀁 𑀯𑀲𑀺𑀢𑀼𑀓𑀸𑀫𑀸 𑀲𑀼𑀔𑀁 𑀯𑀲𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑀧𑀭𑀺𑀓𑀫𑁆𑀫𑁂𑀳𑀺 𑀆𑀯𑀸𑀲𑀺𑀓𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁄 𑀓𑀼𑀮𑀢𑁄 𑀧𑀓𑀢𑀺𑀬𑀸 𑀮𑀩𑁆𑀪𑀢𑀺, 𑀢𑀲𑁆𑀫𑀺𑀁 𑀓𑀼𑀮𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀦 𑀤𑀺𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀦 𑀤𑀺𑀦𑁆𑀦𑀁. 𑀳𑀻𑀢𑀺 𑀬𑀲𑁆𑀫𑀸. 𑀉𑀧𑀤𑁆𑀤𑀼𑀢𑀸𑀢𑀺 𑀉𑀧𑀕𑀦𑁆𑀢𑁆𑀯𑀸, 𑀪𑀼𑀲𑀁 𑀯𑀸 𑀧𑀻𑀴𑀺𑀢𑀸. 𑀢𑀢𑁆𑀣𑀸𑀢𑀺 𑀫𑀦𑀼𑀲𑁆𑀲𑁂𑀲𑀼. 𑀬𑁂𑀢𑀺 𑀫𑀦𑀼𑀲𑁆𑀲𑀸. 𑀯𑀲𑁆𑀲𑀸𑀯𑀸𑀲𑀺𑀓𑁂 𑀕𑀸𑀳𑀺𑀢𑁂𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑁂 𑀲𑁂𑀦𑀸𑀲𑀦𑁂 𑀕𑀸𑀳𑀸𑀧𑀺𑀬𑀫𑀸𑀦𑁂. 𑀕𑀸𑀳𑀺𑀢𑀪𑀺𑀓𑁆𑀔𑀽𑀦𑀦𑁆𑀢𑀺 𑀕𑀸𑀳𑀸𑀧𑀺𑀢𑀪𑀺𑀓𑁆𑀔𑀽𑀦𑀁. 𑀯𑀲𑁆𑀲𑀸𑀯𑀸𑀲𑀺𑀓𑀦𑁆𑀢𑀺 𑀯𑀲𑁆𑀲𑀁 𑀆𑀯𑀲𑀦𑁆𑀢𑀸𑀦𑀁 𑀤𑀸𑀢𑀩𑁆𑀩𑀁 𑀘𑀻𑀯𑀭𑀁. 𑀕𑀸𑀳𑀡𑀓𑀸𑀮𑁄𑀢𑀺 𑀕𑀸𑀳𑀸𑀧𑀦𑀓𑀸𑀮𑁄. 𑀉𑀧𑀓𑀝𑁆𑀞𑁄𑀢𑀺 𑀆𑀲𑀦𑁆𑀦𑁄. 𑀙𑀸𑀢𑀓𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀭𑁄𑀕𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀦𑁆𑀢𑀺 𑀘𑀻𑀯𑀭𑀁. 𑀢𑀢𑁄𑀢𑀺 𑀘𑀻𑀯𑀭𑀢𑁄. 𑀢𑀦𑁆𑀢𑀺 𑀯𑀘𑀦𑀁. 𑀢𑀤𑀦𑀼𑀭𑀽𑀧𑁂𑀦𑀸𑀢𑀺 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀲𑁆𑀲𑀸𑀦𑀼𑀭𑀽𑀧𑁂𑀦. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀲𑁄𑀢𑀺 𑀪𑀺𑀓𑁆𑀔𑀼. 𑀇𑀢𑀺 𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀘𑀻𑀯𑀭𑀁. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀧𑀝𑀺𑀓𑁆𑀓𑀫𑀺𑀢𑁆𑀯𑀸. 𑀯𑀺𑀳𑀸𑀭𑀢𑁄 𑀅𑀧𑀲𑀓𑁆𑀓𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀢𑀺 𑀕𑀸𑀫𑁂. 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸𑀢𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀯𑀸 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀯𑀸 𑀆𑀭𑀸𑀫𑀺𑀓𑀸𑀤𑀻𑀦𑀁 𑀳𑀢𑁆𑀣𑁂 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸. 𑀯𑀺𑀳𑀸𑀭𑁂𑀢𑀺 𑀯𑀺𑀳𑀸𑀭𑀲𑁆𑀲, 𑀯𑀺𑀳𑀸𑀭𑁂 𑀯𑀲𑁆𑀲𑀁 𑀯𑀲𑀦𑁆𑀢𑀲𑁆𑀲 𑀯𑀸. 𑀅𑀧𑀼𑀘𑁆𑀙𑀺𑀢𑁆𑀯𑀸𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 ‘‘𑀧𑀼𑀘𑁆𑀙𑀺𑀢𑁆𑀯𑀸𑀧𑀻’’𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀲𑀦𑁆𑀢𑀺𑀓𑀼𑀮𑀸𑀦𑀁. 𑀯𑀢𑁆𑀢𑀦𑁆𑀢𑀺 𑀚𑀕𑁆𑀕𑀦𑀸𑀤𑀺𑀯𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀓𑀼𑀮𑀸𑀦𑀁. 𑀆𑀕𑀢𑀜𑁆𑀘 𑀢𑀦𑁆𑀢𑀺 𑀢𑀁 𑀧𑀁𑀲𑀼𑀓𑀽𑀮𑀺𑀓𑀁 𑀆𑀕𑀢𑀜𑁆𑀘 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁂𑀦. 𑀤𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀻𑀢𑀺 𑀲𑀗𑁆𑀖𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁂𑀧𑀺 𑀲𑀗𑁆𑀖𑀲𑁆𑀲 𑀤𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺. 𑀲𑀪𑀸𑀕𑁄 𑀪𑀺𑀓𑁆𑀔𑀽𑀢𑀺 𑀅𑀢𑁆𑀢𑀦𑀸 𑀲𑀪𑀸𑀕𑁄 𑀪𑀺𑀓𑁆𑀔𑀼. 𑀏𑀢𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀁. 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀦 𑀯𑀝𑁆𑀝𑀢𑀺, 𑀓𑀲𑁆𑀫𑀸? 𑀕𑀳𑀧𑀢𑀺𑀘𑀻𑀯𑀭𑀢𑁆𑀢𑀸. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀲𑀤𑁆𑀥𑀸𑀤𑁂𑀬𑁆𑀬𑁂𑀢𑀺 𑀲𑀤𑁆𑀥𑀸𑀬 𑀤𑀸𑀢𑀩𑁆𑀩𑁂 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀯𑀺𑀲𑀬𑁂.

𑀢𑀢𑁆𑀭𑀼𑀧𑁆𑀧𑀸𑀤𑁂𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀚𑁆𑀚𑀦𑀓𑀮𑀸𑀪𑀯𑀺𑀲𑀬𑁂. 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀘𑀻𑀯𑀭𑀪𑀡𑁆𑀟𑀁. 𑀘𑀻𑀯𑀭𑀪𑀡𑁆𑀟𑀫𑁂𑀯 𑀳𑀺 𑀬𑀲𑁆𑀫𑀸 𑀅𑀦𑁂𑀦 𑀲𑀭𑀻𑀭𑀁 𑀧𑀝𑀺𑀘𑁆𑀙𑀸𑀤𑀺𑀬𑀢𑀺, 𑀢𑀲𑁆𑀫𑀸 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑀸𑀳𑁂𑀣𑀸𑀢𑀺 𑀪𑀺𑀓𑁆𑀔𑀽𑀳𑀺 𑀕𑀸𑀳𑀸𑀧𑁂𑀣. 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀕𑀸𑀳𑀸𑀧𑁂𑀢𑀩𑁆𑀩𑀁. 𑀯𑀢𑁆𑀣𑀼 𑀧𑀦𑀸𑀢𑀺 𑀲𑀸𑀝𑀓𑀢𑁄 𑀅𑀜𑁆𑀜𑀁 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸 𑀯𑀢𑁆𑀣𑀼 𑀧𑀦. 𑀓𑀲𑁆𑀫𑀸 𑀯𑀝𑁆𑀝𑀢𑀺𑀬𑁂𑀯, 𑀦𑀦𑀼 𑀅𑀓𑀧𑁆𑀧𑀺𑀬𑀯𑀢𑁆𑀣𑀼 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀜𑁆𑀳𑀺’’𑀢𑀺𑀆𑀤𑀺. 𑀢𑀢𑁆𑀣 𑀳𑀺 𑀬𑀲𑁆𑀫𑀸 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀤𑀺𑀦𑁆𑀦𑀯𑀢𑁆𑀣𑀼𑀢𑁄 𑀉𑀧𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀦𑁆𑀢𑀺 𑀯𑀢𑁆𑀣𑀼 𑀤𑀺𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂 𑀤𑀺𑀦𑁆𑀦𑀯𑀢𑁆𑀣𑀽𑀲𑀼. 𑀢𑀦𑁆𑀢𑀺 𑀯𑀢𑁆𑀣𑀼 𑀉𑀧𑀦𑀸𑀫𑁂𑀦𑁆𑀢𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺, 𑀕𑀭𑀼𑀪𑀡𑁆𑀟𑀢𑁆𑀢𑀸 𑀅𑀜𑁆𑀜𑁂𑀲𑀼 𑀧𑀘𑁆𑀘𑀬𑁂𑀲𑀼 𑀦 𑀉𑀧𑀦𑀸𑀫𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀕𑁆𑀕𑀮𑀯𑀲𑁂𑀦𑁂𑀯𑀸𑀢𑀺 ‘‘𑀪𑀺𑀓𑁆𑀔𑀽 𑀘𑀻𑀯𑀭𑁂𑀦 𑀓𑀺𑀮𑀫𑀦𑁆𑀢𑀺, 𑀏𑀢𑁆𑀢𑀓𑀁 𑀦𑀸𑀫 𑀢𑀡𑁆𑀟𑀼𑀮𑀪𑀸𑀕𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀁 𑀧𑀭𑀸𑀫𑀲𑀺𑀢𑁆𑀯𑀸 𑀧𑀼𑀕𑁆𑀕𑀮𑀯𑀲𑁂𑀦𑁂𑀯. 𑀲𑀗𑁆𑀖𑀯𑀲𑁂𑀦𑀸𑀢𑀺 ‘‘𑀲𑀗𑁆𑀖𑁄 𑀘𑀻𑀯𑀭𑁂𑀦 𑀓𑀺𑀮𑀫𑀢𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀯𑀲𑁂𑀦 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀢𑁆𑀣𑀼𑀯𑀲𑁂𑀦 𑀢𑀲𑁆𑀲𑁂𑀯 𑀅𑀓𑀢𑁆𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀸𑀢𑀭𑀽𑀧𑀭𑀚𑀢𑀯𑀲𑁂𑀦𑀸𑀧𑀻’’𑀢𑀺𑀆𑀤𑀺. 𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦𑀸𑀢𑀺 𑀘𑀻𑀯𑀭𑀢𑀡𑁆𑀟𑀼𑀮𑁂𑀳𑀺 𑀅𑀯𑀲𑁂𑀲𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀲𑁆𑀲 𑀯𑀲𑁂𑀦. 𑀘𑀻𑀯𑀭𑀢𑀡𑁆𑀟𑀼𑀮𑀸𑀦𑀜𑁆𑀳𑀺 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 ‘‘𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦𑀸’’𑀢𑀺 𑀏𑀢𑁆𑀣 𑀢𑁂𑀳𑀺 𑀅𑀯𑀲𑁂𑀲𑁄 𑀓𑀧𑁆𑀧𑀺𑀬𑀪𑀡𑁆𑀟𑁄𑀯 𑀕𑀳𑁂𑀢𑀩𑁆𑀩𑁄. 𑀢𑀁 𑀧𑀦𑀸𑀢𑀺 𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀦. 𑀓𑀢𑁆𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀲𑀼𑀪𑀺𑀓𑁆𑀔𑀦𑁆𑀢𑀺 𑀲𑀫𑀺𑀤𑁆𑀥𑀪𑀺𑀓𑁆𑀔𑀁. 𑀲𑀼𑀮𑀪𑀧𑀺𑀡𑁆𑀟𑀦𑁆𑀢𑀺 𑀲𑀼𑀔𑁂𑀦 𑀮𑀪𑀧𑀺𑀡𑁆𑀟𑀁. 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺, 𑀲𑀼𑀪𑀺𑀓𑁆𑀔𑀢𑁆𑀢𑀸 𑀲𑀼𑀮𑀪𑀧𑀺𑀡𑁆𑀟𑀁, 𑀲𑀼𑀮𑀪𑀧𑀺𑀡𑁆𑀟𑀢𑁆𑀢𑀸 𑀲𑀼𑀪𑀺𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀘𑀻𑀯𑀭𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀮𑁂𑀢𑀺 𑀕𑀸𑀳𑀸𑀧𑀦𑀲𑁆𑀲 𑀓𑀸𑀮𑁂. 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀤𑁆𑀯𑁂 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀦𑀦𑀼 𑀏𑀓𑀫𑁆𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀺 𑀬𑀲𑁆𑀫𑀸 𑀕𑀸𑀳𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀤𑁆𑀯𑁂 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀏𑀓𑁂𑀦 𑀳𑀺 𑀲𑀫𑁆𑀫𑀼𑀢𑀺𑀮𑀤𑁆𑀥𑁂𑀦 𑀲𑀓𑁆𑀓𑀸 𑀧𑀭𑀁 𑀕𑀸𑀳𑀸𑀧𑁂𑀢𑀼𑀁, 𑀅𑀢𑁆𑀢𑀦𑀸 𑀧𑀦 𑀅𑀢𑁆𑀢𑀦𑁄 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀲𑀫𑁆𑀫𑀢𑁂𑀲𑀼 𑀦𑀯𑀓𑁄 𑀯𑀼𑀟𑁆𑀠𑀲𑁆𑀲, 𑀯𑀼𑀟𑁆𑀠𑁄 𑀘 𑀦𑀯𑀓𑀲𑁆𑀲𑀸𑀢𑀺 𑀉𑀪𑁄 𑀅𑀜𑁆𑀜𑀫𑀜𑁆𑀜𑀁 𑀕𑀸𑀳𑁂𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺 𑀏𑀓𑀢𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀅𑀝𑁆𑀞𑀧𑀺 𑀲𑁄𑀴𑀲𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀢𑀢𑁄 𑀅𑀥𑀺𑀓𑀫𑁆𑀧𑀺 𑀏𑀓𑀢𑁄 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀉𑀩𑁆𑀩𑀸𑀳𑀺𑀓𑀲𑀫𑁆𑀫𑀼𑀢𑀺𑀬𑀁 (𑀘𑀽𑀴𑀯. 𑁪𑁫𑁬) 𑀅𑀝𑁆𑀞𑀧𑀺 𑀚𑀦𑀸 𑀏𑀓𑀢𑁄𑀯 𑀲𑀫𑁆𑀫𑀢𑀸𑀢𑀺 𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. 𑀦𑀺𑀕𑁆𑀕𑀳𑀓𑀫𑁆𑀫𑀫𑁂𑀯 𑀳𑀺 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀦 𑀓𑀭𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀦𑁆𑀢𑀺 𑀅𑀝𑁆𑀞𑀲𑁄𑀴𑀲𑀚𑀦𑀸𑀦𑀁, 𑀲𑀫𑁆𑀫𑀼𑀢𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀘𑁂𑀢𑀺𑀬𑀖𑀭’’𑀦𑁆𑀢𑀺𑀆𑀤𑀺.

𑀆𑀲𑀦𑀖𑀭𑀦𑁆𑀢𑀺 𑀧𑀝𑀺𑀫𑀸𑀖𑀭𑀁. 𑀫𑀕𑁆𑀕𑀧𑁄𑀓𑁆𑀔𑀭𑀡𑀻𑀦𑀁 𑀲𑀫𑀻𑀧𑁂 𑀓𑀢𑀸 𑀲𑀸𑀮𑀸𑀬𑁄 𑀉𑀧𑀘𑀸𑀭𑀯𑀲𑁂𑀦 𑀯𑀼𑀘𑁆𑀘𑀦𑁆𑀢𑀺 ‘‘𑀫𑀕𑁆𑀕𑁄’’𑀢𑀺 𑀘 ‘‘𑀧𑁄𑀓𑁆𑀔𑀭𑀡𑀻’’𑀢𑀺 𑀘. 𑀢𑀸 𑀳𑀺 𑀲𑀸𑀮𑀸𑀬𑁄 𑀉𑀧𑀘𑀸𑀭𑀲𑀻𑀫𑀩𑁆𑀪𑀦𑁆𑀢𑀭𑀕𑀢𑁂 𑀕𑀸𑀫𑀸𑀪𑀺𑀫𑀼𑀔𑀫𑀕𑁆𑀕𑁂 𑀘 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀔𑀡𑀺𑀢𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑁄𑀓𑁆𑀔𑀭𑀡𑀺𑀬𑁄 𑀘 𑀓𑀭𑀻𑀬𑀦𑁆𑀢𑀺, 𑀇𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀅𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀳𑀸𑀭𑁄’’𑀢𑀺𑀆𑀤𑀺. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀙𑀦𑁆𑀦𑀓𑀯𑀸𑀝𑀩𑀤𑁆𑀥𑀭𑀼𑀓𑁆𑀔𑀫𑀽𑀮𑀁. 𑀏𑀲𑁂𑀯 𑀦𑀬𑁄 𑀯𑁂𑀴𑀼𑀕𑀼𑀫𑁆𑀩𑁂𑀧𑀺. 𑀕𑀸𑀳𑁂𑀦𑁆𑀢𑁂𑀦 𑀘 𑀕𑀸𑀳𑁂𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀺𑀓𑁄𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑁄. 𑀢𑁂𑀲𑀽𑀢𑀺 𑀤𑁆𑀯𑀻𑀲𑀼 𑀘𑀻𑀯𑀭𑀧𑀘𑁆𑀘𑀬𑁂𑀲𑀼. 𑀬𑀦𑁆𑀢𑀺 𑀘𑀻𑀯𑀭𑀧𑀘𑁆𑀘𑀬𑀁. 𑀢𑀲𑁆𑀲𑀸𑀢𑀺 𑀘𑀻𑀯𑀭𑀧𑀘𑁆𑀘𑀬𑀲𑁆𑀲. 𑀞𑀺𑀢𑀺𑀓𑀢𑁄𑀢𑀺 𑀧𑀩𑀦𑁆𑀥𑀯𑀲𑁂𑀦 𑀞𑀺𑀢𑀝𑁆𑀞𑀸𑀦𑀢𑁄. 𑀇𑀢𑀭𑁄𑀢𑀺 𑀧𑀞𑀫𑀁 𑀕𑀳𑀺𑀢𑀘𑀻𑀯𑀭𑀧𑀘𑁆𑀘𑀬𑀢𑁄 𑀇𑀢𑀭𑁄.

𑀅𑀧𑁆𑀧𑀢𑀸𑀬𑀸𑀢𑀺 𑀅𑀧𑁆𑀧𑀪𑀸𑀯𑀢𑁄, 𑀕𑀸𑀳𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀯𑁂𑀡𑀕𑁆𑀖𑁂𑀦𑀸𑀢𑀺 𑀧𑀭𑀺𑀯𑁂𑀡𑀧𑀭𑀺𑀘𑁆𑀙𑁂𑀤𑁂𑀦. 𑀮𑀪𑀦𑁆𑀢𑀻𑀢𑀺 𑀧𑀭𑀺𑀯𑁂𑀡𑀲𑀸𑀫𑀺𑀓𑀸 𑀪𑀺𑀓𑁆𑀔𑀽 𑀮𑀪𑀦𑁆𑀢𑀺. 𑀢𑀦𑁆𑀢𑀺 𑀧𑀭𑀺𑀯𑁂𑀡𑀁. 𑀯𑀺𑀚𑀝𑁂𑀢𑁆𑀯𑀸𑀢𑀺 𑀯𑀺𑀚𑀝𑀁 𑀓𑀢𑁆𑀯𑀸, 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀪𑀸𑀕𑀓𑁄𑀝𑁆𑀞𑀸𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀦 𑀏𑀯𑀁 𑀓𑀸𑀢𑀩𑁆𑀩𑀦𑁆𑀢𑀺 𑀬𑀣𑀸 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳, 𑀢𑀣𑀸 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀸𑀢𑀩𑁆𑀩𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀦𑀼𑀲𑁆𑀲𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀧𑀭𑀺𑀯𑁂𑀡𑁂, 𑀧𑀯𑀺𑀲𑀺𑀢𑀩𑁆𑀩𑀁 𑀇𑀢𑀺 𑀆𑀳𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀕𑀸𑀳𑀡𑀝𑁆𑀞𑀸𑀦𑁂. 𑀧𑀝𑀺𑀓𑁆𑀓𑁄𑀲𑀢𑀻𑀢𑀺 𑀧𑀝𑀺𑀲𑁂𑀥𑁂𑀢𑀺. 𑀧𑀝𑀺𑀓𑁆𑀓𑁄𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸 𑀆𑀯𑀼𑀲𑁄’’𑀢𑀺𑀆𑀤𑀺. 𑀇𑀢𑀺 𑀯𑀼𑀢𑁆𑀢𑀁, 𑀇𑀢𑀺 𑀧𑀝𑀺𑀓𑁆𑀓𑁄𑀲𑀢𑀻𑀢𑀺 𑀬𑁄𑀚𑀦𑀸. 𑀏𑀓𑁄 𑀳𑀺 𑀇𑀢𑀺𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑀲𑁆𑀲𑀸𑀢𑀺 𑀫𑀳𑀸𑀣𑁂𑀭𑀲𑁆𑀲. 𑀲𑀗𑁆𑀕𑀳𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀲𑀗𑁆𑀕𑀳𑀁. 𑀢𑀦𑁆𑀢𑀺 𑀫𑀳𑀸𑀣𑁂𑀭𑀁.

𑀏𑀯𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀏𑀯𑀁 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑀢𑁆𑀢𑀩𑁆𑀩𑀁. 𑀧𑀘𑁆𑀘𑀬𑀁 𑀥𑀸𑀭𑁂𑀣, 𑀇𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀧𑀼𑀡𑀸𑀢𑀺 𑀆𑀯𑀼𑀲𑁄 𑀇𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. ‘‘𑀕𑀳𑀺𑀢𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 ‘‘𑀕𑀡𑁆𑀳𑀣, 𑀕𑀡𑁆𑀳𑀸𑀫𑀻’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀕𑀳𑀺𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀢𑀻𑀢𑀅𑀦𑀸𑀕𑀢𑀓𑀸𑀮𑀯𑀲𑁂𑀦 𑀅𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀲𑀢𑀼𑀧𑁆𑀧𑀸𑀤𑀫𑀢𑁆𑀢𑀦𑁆𑀢𑀺 𑀕𑀳𑀡𑁂 𑀲𑀢𑀺𑀬𑀸 𑀉𑀧𑁆𑀧𑀸𑀤𑀦𑀫𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀧𑀘𑁆𑀘𑀬𑀕𑀳𑀡𑀝𑁆𑀞𑀸𑀦𑁂.

𑀬𑁄𑀧𑀻𑀢𑀺 𑀬𑀫𑁆𑀧𑀺. 𑀉𑀧𑀬𑁄𑀕𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀬𑀫𑁆𑀧𑀺 𑀧𑀘𑁆𑀘𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀬𑁄𑀚𑀦𑀸. 𑀧𑀘𑁆𑀘𑀬𑀦𑁆𑀢𑀺 𑀘 𑀘𑀻𑀯𑀭𑀧𑀘𑁆𑀘𑀬𑀁. 𑀅𑀬𑀫𑁆𑀧𑀻𑀢𑀺 𑀅𑀬𑀫𑁆𑀧𑀺 𑀧𑀘𑁆𑀘𑀬𑁄. 𑀧𑀺𑀲𑀤𑁆𑀤𑁄 𑀫𑀳𑀸𑀮𑀸𑀪𑀧𑀭𑀺𑀯𑁂𑀡𑁂 𑀧𑀘𑁆𑀘𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀧𑀭𑀺𑀯𑁂𑀡𑁂𑀢𑀺 𑀢𑀲𑁆𑀫𑀺𑀁 𑀧𑀁𑀲𑀼𑀓𑀽𑀮𑀺𑀓𑁂𑀦 𑀕𑀳𑀺𑀢𑀧𑀭𑀺𑀯𑁂𑀡𑁂 𑀏𑀯. 𑀅𑀜𑁆𑀜𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑀢𑁄 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. 𑀧𑀁𑀲𑀼𑀓𑀽𑀮𑀺𑀓𑁄 ‘‘𑀅𑀳𑀁 𑀯𑀲𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀁 𑀚𑀕𑁆𑀕𑀺𑀲𑁆𑀲𑀢𑀺. 𑀇𑀢𑀭𑁄 ‘‘𑀅𑀳𑀁 𑀧𑀘𑁆𑀘𑀬𑀁 𑀕𑀡𑁆𑀳𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀁 𑀚𑀕𑁆𑀕𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀯𑀲𑀦𑀕𑀳𑀡𑀯𑀲𑁂𑀦 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀧𑀁𑀲𑀼𑀓𑀽𑀮𑀺𑀓𑁂 𑀕𑀡𑁆𑀳𑀦𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀢𑀺 𑀲𑁂𑀦𑀸𑀲𑀦𑁂. 𑀢𑁂𑀦𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁂𑀦. 𑀳𑁂𑀝𑁆𑀞𑀸𑀢𑀺 𑀲𑁂𑀦𑀸𑀲𑀦𑀲𑁆𑀲 𑀳𑁂𑀝𑁆𑀞𑀸, 𑀞𑀺𑀢𑀁 𑀅𑀜𑁆𑀜𑀁 𑀪𑀺𑀓𑁆𑀔𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁂𑀦, 𑀓𑀺𑀜𑁆𑀘𑀺 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀣𑀯𑀲𑁆𑀲𑀲𑁆𑀲 𑀧𑀁𑀲𑀼𑀓𑀽𑀮𑀺𑀓𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀯𑀝𑁆𑀝𑀢𑀻𑀢𑀺 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀯𑀝𑁆𑀝𑀢𑀺. 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂𑀢𑀺 𑀧𑀁𑀲𑀼𑀓𑀽𑀮𑀺𑀓𑁂𑀦 𑀕𑀳𑀺𑀢𑀲𑁂𑀦𑀸𑀲𑀦𑁂. 𑀬𑁂𑀲𑀁 𑀧𑀦𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀧𑀦. 𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁.

𑀣𑀽𑀧𑀁 𑀓𑀢𑁆𑀯𑀸𑀢𑀺 𑀘𑁂𑀢𑀺𑀬𑀁 𑀓𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀣𑀽𑀧𑀲𑁆𑀲. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑀓𑀪𑀺𑀓𑁆𑀔𑀼𑀦𑀸. 𑀢𑀦𑁆𑀢𑀺 𑀪𑁄𑀚𑀦𑀲𑀸𑀮𑀁. 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀫𑀺𑀤𑀦𑁆𑀢𑀺 𑀲𑀩𑁆𑀩𑀁 𑀇𑀤𑀁 𑀯𑀘𑀦𑀁.

𑀧𑀸𑀝𑀺𑀧𑀤𑀅𑀭𑀼𑀡𑀢𑁄𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀲𑀗𑁆𑀔𑀸𑀢𑀲𑁆𑀲 𑀧𑀸𑀝𑀺𑀧𑀤𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀢𑁄. 𑀯𑀺𑀢𑀓𑁆𑀓𑀘𑀸𑀭𑀺𑀓𑁄𑀢𑀺 ‘‘𑀓𑀢𑁆𑀣 𑀦𑀼 𑀔𑁄 𑀯𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀺𑀢𑀓𑁆𑀓𑁂𑀦 𑀘𑀭𑀡𑁂 𑀅𑀦𑀼𑀬𑀼𑀢𑁆𑀢𑁄. 𑀲𑁂𑀦𑀸𑀲𑀦𑀁 𑀬𑀸𑀘𑀢𑀻𑀢𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑁂𑀦𑀸𑀲𑀦𑀁 𑀬𑀸𑀘𑀢𑀺. 𑀕𑀳𑀺𑀢𑀦𑁆𑀢𑀺 𑀲𑀗𑁆𑀖𑁂𑀦 𑀕𑀳𑀺𑀢𑀁. 𑀬𑀢𑁆𑀣𑀸𑀢𑀺 𑀞𑀸𑀦𑁂. 𑀯𑀲𑁆𑀲𑀽𑀧𑀕𑀢𑁂𑀳𑀺 𑀯𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀦𑀧𑁆𑀧𑀼𑀦𑀁, 𑀲𑀫𑀁 𑀯𑀸 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀁 𑀫𑀼𑀜𑁆𑀘𑀦𑁆𑀢𑀺 𑀲𑁄𑀥𑁂𑀦𑁆𑀢𑀺 𑀇𑀫𑀸𑀳𑀻𑀢𑀺 𑀲𑀫𑁆𑀫𑀼𑀜𑁆𑀘𑀦𑀺𑀬𑁄. 𑀫𑀼𑀘𑀺𑀥𑀸𑀢𑀼 𑀲𑁄𑀥𑀦𑀢𑁆𑀣𑁂 𑀬𑀼𑀧𑀘𑁆𑀘𑀬𑁄 𑀓𑀭𑀡𑀢𑁆𑀣𑁂 𑀳𑁄𑀢𑀺. 𑀢𑀸𑀮𑀼𑀚𑁄 𑀧𑀞𑀫𑀓𑁆𑀔𑀭𑁄. 𑀲𑀼𑀮𑀪𑀸 𑀘𑁂 𑀤𑀡𑁆𑀟𑀓𑀸, 𑀏𑀓𑁂𑀓𑁂𑀦 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀘𑀦𑀺𑀬𑁄 𑀩𑀦𑁆𑀥𑀺𑀢𑀩𑁆𑀩𑀸. 𑀲𑀼𑀮𑀪𑀸 𑀘𑁂 𑀲𑀮𑀸𑀓𑀸, 𑀙𑀧𑀜𑁆𑀘𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀘𑀦𑀺𑀬𑁄 𑀩𑀦𑁆𑀥𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘 𑀧𑀜𑁆𑀘 𑀉𑀓𑁆𑀓𑀸𑀢𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀲𑀼 𑀧𑀭𑀺𑀲𑁆𑀲𑀬𑀯𑀺𑀚𑀸𑀦𑀦𑀢𑁆𑀣𑀁 𑀧𑀜𑁆𑀘 𑀧𑀜𑁆𑀘 𑀅𑀕𑁆𑀕𑀺𑀉𑀓𑁆𑀓𑀸 𑀓𑁄𑀝𑁆𑀝𑁂𑀢𑀩𑁆𑀩𑀸 𑀙𑀺𑀦𑁆𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

‘‘𑀦𑀺𑀩𑀤𑁆𑀥𑀯𑀢𑁆𑀢𑀁 𑀞𑀧𑁂𑀢𑁆𑀯𑀸’’𑀢𑀺 𑀏𑀢𑁆𑀣 𑀅𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀳𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀳𑀺 𑀘 𑀏𑀯𑀭𑀽𑀧𑀁 𑀅𑀥𑀫𑁆𑀫𑀺𑀓𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀺 𑀲𑀘𑁆𑀘𑀁, 𑀲𑀩𑁆𑀩𑁂𑀯 𑀏𑀢𑁂 𑀉𑀤𑁆𑀤𑁂𑀲𑀸𑀤𑀬𑁄 𑀧𑀧𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀧𑀧𑀜𑁆𑀘𑁂𑀦𑁆𑀢𑀺 𑀲𑀁𑀲𑀸𑀭𑁂 𑀘𑀺𑀭𑀁 𑀞𑀧𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸. 𑀫𑀽𑀕𑀩𑁆𑀩𑀢𑀦𑁆𑀢𑀺 𑀫𑀽𑀕𑀸𑀦𑀁 𑀯𑀢𑀁, 𑀫𑀽𑀕𑁂𑀳𑀺 𑀓𑀢𑁆𑀢𑀩𑁆𑀩𑀁 𑀯𑀸, 𑀫𑀽𑀕𑁂𑀦 𑀯𑀺𑀬 𑀯𑀸 𑀅𑀫𑀽𑀕𑁂𑀳𑀺 𑀓𑀢𑁆𑀢𑀩𑁆𑀩𑀁 𑀯𑀢𑀁. 𑀏𑀯𑀁 𑀅𑀓𑀸𑀢𑀩𑁆𑀩𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀸𑀢𑀩𑁆𑀩𑀯𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀦𑀸𑀫𑀸’’𑀢𑀺𑀆𑀤𑀺. 𑀢𑀺𑀯𑀺𑀥𑀫𑁆𑀧𑀻𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀧𑁆𑀧𑀓𑀸𑀭𑀫𑁆𑀧𑀺. 𑀅𑀯𑀬𑀯𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀅𑀯𑀬𑀯𑀺𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁, 𑀅𑀯𑀬𑀯𑀺𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀯𑀸 𑀅𑀯𑀬𑀯𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀲𑁆𑀫𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀤𑁆𑀤𑀺𑀲𑀣𑀸𑀢𑀺 𑀧𑀭𑀺𑀬𑀢𑁆𑀢𑀺𑀁 𑀉𑀤𑁆𑀤𑀺𑀲𑀣. 𑀲𑁄𑀥𑁂𑀢𑁆𑀯𑀸…𑀧𑁂… 𑀉𑀧𑀲𑀫𑁆𑀧𑀸𑀤𑁂𑀣𑀸𑀢𑀺 𑀏𑀢𑁆𑀣 𑀲𑁄𑀥𑀦𑀁 𑀦𑀸𑀫 𑀲𑀩𑁆𑀩𑁂𑀲𑀁 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸𑀦𑀁 𑀉𑀧𑀧𑀭𑀺𑀓𑁆𑀔𑀦𑀁. 𑀲𑁄𑀥𑁂𑀢𑁆𑀯𑀸 𑀦𑀺𑀲𑁆𑀲𑀬𑀁 𑀤𑁂𑀣𑀸𑀢𑀺 𑀏𑀢𑁆𑀣 𑀲𑁄𑀥𑀦𑀁 𑀦𑀸𑀫 𑀪𑀺𑀓𑁆𑀔𑀼𑀲𑀪𑀸𑀕𑀢𑀁 𑀉𑀧𑀧𑀭𑀺𑀓𑁆𑀔𑀦𑀁. 𑀳𑀻𑀢𑀺 𑀲𑀘𑁆𑀘𑀁. 𑀓𑀼𑀮𑀧𑀼𑀢𑁆𑀢𑁄𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄. 𑀬𑀢𑁆𑀢𑀓𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑀼𑀁 𑀲𑀓𑁆𑀓𑁄𑀣𑀸𑀢𑀺 𑀬𑁄𑀚𑀦𑀸. 𑀅𑀦𑁆𑀢𑁄𑀯𑀲𑁆𑀲𑀁 𑀦𑀸𑀫𑁂𑀢𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀫𑁂𑀢𑀁. 𑀏𑀢𑀲𑁆𑀫𑀺𑀁 𑀅𑀦𑁆𑀢𑁄𑀯𑀲𑁆𑀲𑁂𑀢𑀺 𑀳𑀺 𑀅𑀢𑁆𑀣𑁄, 𑀪𑀯𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀓𑀮𑀤𑀺𑀯𑀲𑀦𑁆𑀢𑀺 𑀲𑀓𑀮𑀤𑀺𑀯𑀲𑀫𑁆𑀳𑀺, 𑀅𑀧𑁆𑀧𑀫𑀢𑁆𑀢𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀘𑀸𑀭𑀺𑀓𑀯𑀢𑁆𑀢𑀦𑁆𑀢𑀺 𑀏𑀓𑀓𑁂𑀦 𑀘𑀭𑀺𑀢𑀩𑁆𑀩𑀁 𑀯𑀢𑁆𑀢𑀁. 𑀪𑀲𑁆𑀲𑁂𑀢𑀺 𑀯𑀘𑀦𑁂. 𑀤𑀲𑀯𑀢𑁆𑀣𑀼𑀓𑀓𑀣𑀦𑁆𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀤𑀲𑀯𑀢𑁆𑀣𑀼𑀓 𑀓𑀣𑀁.

𑀯𑀺𑀕𑁆𑀕𑀸𑀳𑀺𑀓𑀧𑀺𑀲𑀼𑀡𑀨𑀭𑀼𑀲𑀯𑀘𑀦𑀸𑀦𑀻𑀢𑀺 𑀯𑀺𑀕𑁆𑀕𑀳𑀁 𑀓𑀮𑀳𑀁 𑀚𑀦𑁂𑀢𑀻𑀢𑀺 𑀯𑀺𑀕𑁆𑀕𑀸𑀳𑀺𑀓𑀁, 𑀯𑀺𑀕𑁆𑀕𑀸𑀳𑀺𑀓𑀯𑀘𑀦𑀜𑁆𑀘 𑀧𑀺𑀲𑀼𑀡𑀯𑀘𑀦𑀜𑁆𑀘 𑀨𑀭𑀼𑀲𑀯𑀘𑀦𑀜𑁆𑀘 𑀯𑀺𑀕𑁆𑀕𑀸𑀳𑀺𑀓𑀧𑀺𑀲𑀼𑀡𑀨𑀭𑀼𑀲𑀯𑀘𑀦𑀸𑀦𑀺. 𑀫𑀦𑀲𑀺𑀓𑀸𑀭𑀩𑀳𑀼𑀮𑀸 𑀯𑀺𑀳𑀭𑀣 𑀇𑀢𑀺 𑀑𑀯𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀦𑁆𑀢𑀺 𑀳𑁂𑀝𑁆𑀞𑀸 𑀅𑀤𑀺𑀦𑁆𑀦𑀸𑀤𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑁂, 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀲𑁆𑀲 𑀯𑀸 𑀯𑀢𑁆𑀢𑀁. ‘‘𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀦𑁆𑀢𑁂𑀦 𑀦 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀓𑀣𑁂𑀦𑁆𑀢𑁂 𑀧𑀫𑀸𑀤𑁂𑀦 𑀧𑀢𑁆𑀢𑁄 𑀪𑀺𑀚𑁆𑀚𑁂𑀬𑁆𑀬𑀸𑀢𑀺 𑀧𑀢𑁆𑀢𑀲𑁆𑀲 𑀕𑀼𑀢𑁆𑀢𑀢𑁆𑀣𑀸𑀬 𑀓𑀣𑀦𑀁 𑀦𑀺𑀯𑀸𑀭𑁂𑀢𑀺. 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑀓𑁄𑀘𑀺 𑀤𑀸𑀬𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀽𑀢𑀺 𑀘𑀻𑀯𑀭𑀕𑁆𑀕𑀸𑀳𑀺𑀢𑀢𑁄 𑀧𑀘𑁆𑀙𑀸 𑀆𑀕𑀢𑁄 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼. 𑀲𑀗𑁆𑀖𑀢𑁆𑀣𑁂𑀭𑁄𑀢𑀺 𑀆𑀯𑀸𑀲𑀺𑀓𑀲𑀗𑁆𑀖𑀢𑁆𑀣𑁂𑀭𑁄. 𑀧𑀞𑀫𑀪𑀸𑀕𑀦𑁆𑀢𑀺 𑀧𑀼𑀩𑁆𑀩𑁂 𑀕𑀸𑀳𑀺𑀢𑀁 𑀧𑀞𑀫𑀪𑀸𑀕𑀁, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀕𑀸𑀳𑀺𑀢𑀪𑀸𑀕𑁂𑀦 𑀧𑀘𑁆𑀙𑀸 𑀤𑀸𑀢𑀩𑁆𑀩𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀆𑀕𑀦𑁆𑀢𑀼𑀓𑀲𑁆𑀲 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀝𑁆𑀞𑀸𑀦𑁂 𑀆𑀕𑀦𑁆𑀢𑀼𑀓𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀆𑀕𑀦𑁆𑀢𑀼𑀓𑀲𑁆𑀲𑀸’’𑀢𑀺 𑀧𑀤𑀁 𑀧𑀼𑀩𑁆𑀩𑀸𑀧𑀭𑀁 𑀅𑀧𑁂𑀓𑁆𑀔𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀫𑀚𑁆𑀛𑁂 𑀯𑀼𑀢𑁆𑀢𑀁. 𑀧𑀞𑀫𑀯𑀲𑁆𑀲𑀽𑀧𑀕𑀢𑀸𑀢𑀺 𑀧𑀞𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀯𑀲𑁆𑀲𑀽𑀧𑀕𑀢𑀸. ‘‘𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀻’’𑀢𑀺 𑀯𑀘𑀦𑀲𑁆𑀲 𑀯𑀸 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀯𑀸 𑀩𑁆𑀬𑀸𑀧𑀦𑀢𑁆𑀣𑀸𑀬 ‘‘𑀮𑀤𑁆𑀥𑀁 𑀮𑀤𑁆𑀥’’𑀦𑁆𑀢𑀺 𑀯𑀺𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦 𑀧𑀦𑀸𑀢𑀺 𑀆𑀕𑀦𑁆𑀢𑀼𑀓𑁂𑀦 𑀧𑀦. 𑀧𑀞𑀫𑀯𑀲𑁆𑀲𑀽𑀧𑀕𑀢𑁂𑀳𑀺 𑀅𑀧𑁆𑀧𑀓𑁂 𑀮𑀤𑁆𑀥𑁂 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀤𑀸𑀢𑀩𑁆𑀩𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀸𑀦𑀁 𑀩𑀳𑀼𑀓𑁂𑀧𑀺 𑀅𑀬𑀁 𑀦𑀬𑁄 𑀜𑀸𑀢𑀩𑁆𑀩𑁄𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑁄.

𑀤𑁆𑀯𑀻𑀲𑀼𑀧𑀻𑀢𑀺 𑀧𑀞𑀫 𑀤𑀼𑀢𑀺𑀬𑀯𑀲𑁂𑀦 𑀤𑁆𑀯𑀻𑀲𑀼𑀧𑀺. 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀸𑀬 𑀓𑀺𑀮𑀫𑀦𑁆𑀢𑀸 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀢𑀺 𑀞𑀸𑀦𑁂. 𑀯𑀲𑀦𑁆𑀢𑀸𑀢𑀺 𑀏𑀓𑀢𑁄 𑀯𑀲𑀦𑁆𑀢𑀸. 𑀤𑁆𑀯𑁂 𑀪𑀸𑀕𑀸 𑀳𑁄𑀫 𑀲𑀸𑀥𑀼 𑀯𑀢𑀸𑀢𑀺 𑀬𑁄𑀚𑀦𑀸. 𑀲𑀸𑀥𑀼 𑀯𑀢𑀸𑀢𑀺 𑀏𑀓𑀁𑀲𑁂𑀦 𑀲𑀼𑀦𑁆𑀤𑀭𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀬𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀢𑀢𑁆𑀣𑀸𑀢𑀺 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑁂𑀲𑀼. 𑀧𑀯𑀸𑀭𑀡𑀸𑀬𑀸𑀢𑀺 𑀧𑀯𑀸𑀭𑀡𑀸𑀤𑀺𑀯𑀲𑁂. 𑀢𑁂𑀲𑀽𑀢𑀺 𑀪𑀺𑀓𑁆𑀔𑀽𑀲𑀼. 𑀬𑁂𑀢𑀺 𑀪𑀺𑀓𑁆𑀔𑀽. 𑀢𑀢𑁆𑀣𑀸𑀢𑀺 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑁂𑀲𑀼. 𑀓𑀲𑁆𑀫𑀸 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀦𑀦𑀼 𑀢𑁂 𑀲𑀸𑀤𑀺𑀬𑀦𑁆𑀢𑀻𑀢𑀺 𑀆𑀳 ‘‘𑀲𑀸𑀤𑀺 𑀬𑀦𑁆𑀢𑀸𑀧𑀺 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀻𑀢𑀺 𑀬𑀲𑁆𑀫𑀸. ‘‘𑀦𑁂𑀯 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲 𑀲𑀸𑀫𑀺𑀦𑁄’’𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀯𑀲𑁆𑀲𑀘𑁆𑀙𑀺𑀦𑁆𑀦𑀢𑀁 𑀤𑀻𑀧𑁂𑀢𑀺. 𑀦𑁂𑀯 𑀅𑀤𑀸𑀢𑀼𑀁 𑀮𑀪𑀦𑁆𑀢𑀻𑀢𑀺 𑀧𑀞𑀫𑀫𑁂𑀯 𑀓𑀢𑀺𑀓𑀯𑀢𑁆𑀢𑀲𑁆𑀲 𑀓𑀢𑀢𑁆𑀢𑀸 𑀅𑀤𑀸𑀢𑀼𑀁 𑀦𑁂𑀯 𑀮𑀪𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀦𑁄 𑀅𑀫𑁆𑀳𑀸𑀓𑀦𑁆𑀢𑀺 𑀬𑁄𑀚𑀦𑀸. 𑀇𑀥𑀸𑀢𑀺 𑀞𑀸𑀦𑁂. 𑀢𑀦𑁆𑀢𑀺 𑀓𑀢𑀺𑀓𑀯𑀢𑁆𑀢𑀁. 𑀏𑀓𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀢𑀢𑁆𑀣𑀸𑀢𑀺 𑀲𑀪𑀸𑀕𑀝𑁆𑀞𑀸𑀦𑁂. 𑀯𑀲𑀺𑀢𑁆𑀯𑀸 𑀆𑀕𑀢𑀸𑀦𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀬𑁄𑀚𑀦𑀸. 𑀦 𑀮𑀩𑁆𑀪𑀢𑀺 𑀇𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀇𑀫𑁂𑀲𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀅𑀧𑁆𑀧𑀢𑁆𑀢𑀓𑀸𑀦𑀁 𑀏𑀓𑀘𑁆𑀘𑀸𑀦𑀁. 𑀕𑀸𑀳𑀺𑀢𑀲𑀤𑀺𑀲𑀫𑁂𑀯𑀸𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲 𑀕𑀸𑀳𑀺𑀢𑁂𑀦 𑀲𑀤𑀺𑀲𑀫𑁂𑀯. 𑀢𑁂𑀲𑀫𑁂𑀯𑀸𑀢𑀺 𑀏𑀓𑀘𑁆𑀘𑀸𑀦𑀫𑁂𑀯.

𑀧𑀓𑁆𑀓𑀦𑁆𑀢𑁄𑀧𑀻𑀢𑀺 𑀅𑀜𑁆𑀜𑀁 𑀞𑀸𑀦𑀁 𑀧𑀓𑁆𑀓𑀫𑀦𑁆𑀢𑁄𑀧𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀓𑀢𑀁 𑀧𑀸𑀦𑀻𑀬𑀉𑀧𑀝𑁆𑀞𑀧𑀦𑀸𑀤𑀺𑀓𑀫𑁆𑀫𑀁 𑀪𑀢𑀺𑀦𑀺𑀯𑀺𑀝𑁆𑀞𑀁 𑀪𑀢𑀺𑀬𑀸 𑀞𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢𑀁 𑀲𑀗𑁆𑀖𑀺𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀺𑀓𑀦𑁆𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀩𑁆𑀪𑀦𑁆𑀢𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀙𑀺𑀦𑁆𑀦𑀯𑀲𑁆𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀯𑀲𑁂𑀦𑁂𑀯𑀸𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑀧𑀘𑁆𑀘𑀬𑀯𑀲𑁂𑀦. 𑀯𑀤𑀦𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺.

𑀤𑀺𑀲𑀁𑀕𑀫𑀺𑀓𑁄 𑀪𑀺𑀓𑁆𑀔𑀼 𑀯𑀺𑀩𑁆𑀪𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀦𑀼𑀲𑁆𑀲𑁂𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀤𑀸𑀬𑀓𑀫𑀦𑀼𑀲𑁆𑀲𑁂. 𑀲𑀫𑁆𑀫𑀼𑀔𑀸𑀢𑀺 𑀆𑀯𑀸𑀲𑀺𑀓𑀲𑁆𑀲 𑀲𑀫𑁆𑀫𑀼𑀔𑀸. 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸𑀢𑀺 ‘‘𑀲𑀼𑀝𑁆𑀞𑀼 𑀤𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸. 𑀬𑀲𑁆𑀲 𑀕𑀸𑀳𑀺𑀢𑀦𑁆𑀢𑀺 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀕𑀸𑀳𑀺𑀢𑀁. 𑀲𑁂𑀦𑀸𑀲𑀦𑀲𑀸𑀫𑀺𑀓𑀲𑁆𑀲𑀸𑀢𑀺 𑀲𑁂𑀦𑀸𑀲𑀦𑀤𑀸𑀬𑀓𑀲𑁆𑀲 𑀧𑀼𑀢𑁆𑀢𑀥𑀻𑀢𑀸𑀤𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀦𑀸𑀲𑀦𑁂 𑀤𑁂𑀫𑀸𑀢𑀺 𑀲𑁂𑀦𑀸𑀲𑀦𑀲𑁆𑀲 𑀤𑁂𑀫. 𑀢𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑁂. 𑀏𑀓𑀫𑁂𑀯 𑀯𑀢𑁆𑀣𑀁 𑀤𑀸𑀢𑀩𑁆𑀩𑀁. 𑀓𑀲𑁆𑀫𑀸? 𑀧𑀼𑀕𑁆𑀕𑀮𑀲𑁆𑀲 𑀅𑀤𑀢𑁆𑀯𑀸 𑀲𑁂𑀦𑀸𑀲𑀦𑀲𑁆𑀲𑁂𑀯 𑀤𑀸𑀢𑀩𑁆𑀩𑀢𑁆𑀢𑀸. 𑀯𑀲𑁆𑀲𑀸𑀯𑀸𑀲𑀺𑀓𑀝𑁆𑀞𑀺𑀢𑀺𑀓𑀸𑀬𑀸𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀕𑀸𑀳𑀺𑀢𑀲𑁆𑀲 𑀞𑀺𑀢𑀺𑀓𑀸𑀬. 𑀏𑀲𑁂𑀯 𑀦𑀬𑁄𑀢𑀺 𑀲𑁂𑀦𑀸𑀲𑀦𑀲𑁆𑀲𑁂𑀯 𑀤𑀺𑀦𑁆𑀦𑀢𑁆𑀢𑀸 𑀏𑀲𑁂𑀯 𑀦𑀬𑁄. 𑀢𑀲𑁆𑀲𑁂𑀯 𑀳𑁄𑀦𑁆𑀢𑀻𑀢𑀺 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑀺𑀦𑁆𑀦𑀢𑁆𑀢𑀸 𑀢𑀲𑁆𑀲𑁂𑀯 𑀳𑁄𑀦𑁆𑀢𑀺.

𑀤𑀼𑀢𑀺𑀬𑁄 𑀣𑁂𑀭𑀸𑀲𑀦𑁂 𑀕𑀸𑀳𑀺𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀞𑀫𑀪𑀸𑀕𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀕𑀸𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀭𑀪𑀸𑀕𑀁 𑀲𑀸𑀫𑀡𑁂𑀭𑀲𑁆𑀲 𑀤𑀢𑁆𑀯𑀸’’𑀢𑀺. 𑀉𑀪𑁄𑀧𑀻𑀢𑀺 𑀤𑁆𑀯𑁂 𑀣𑁂𑀭𑀲𑀸𑀫𑀡𑁂𑀭𑁂𑀧𑀺. 𑀲𑀬𑀫𑁂𑀯𑀸𑀢𑀺 𑀤𑀸𑀬𑀓𑁄 𑀲𑀬𑀫𑁂𑀯. 𑀬𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀁. 𑀬𑀲𑁆𑀲𑀸𑀢𑀺 𑀣𑁂𑀭𑀲𑁆𑀲 𑀯𑀸 𑀲𑀸𑀫𑀡𑁂𑀭𑀲𑁆𑀲 𑀯𑀸.

𑀇𑀢𑁄𑀢𑀺 𑀯𑀼𑀢𑁆𑀢𑀦𑀬𑀢𑁄. 𑀤𑀳𑀭𑀲𑀸𑀫𑀡𑁂𑀭𑀲𑁆𑀲𑀸𑀢𑀺 𑀢𑀭𑀼𑀡𑀲𑁆𑀲 𑀲𑀸𑀫𑀡𑁂𑀭𑀲𑁆𑀲. 𑀲𑁄𑀢𑀺 𑀖𑀭𑀲𑀸𑀫𑀺𑀓𑁄. 𑀦𑀦𑁆𑀢𑀺 𑀧𑀢𑁆𑀢𑀚𑀦𑀁. 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁. 𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀯𑀺𑀩𑁆𑀪𑀫𑀓𑀸𑀮𑀗𑁆𑀓𑀢𑀓𑀸𑀭𑀡𑀁 𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀼𑀤𑁆𑀥𑀧𑀁𑀲𑀼𑀓𑀽𑀮𑀺𑀓𑀸𑀬𑁂𑀯𑀸𑀢𑀺 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀸 𑀲𑀼𑀤𑁆𑀥𑀸 𑀧𑀁𑀲𑀼𑀓𑀽𑀮𑀺𑀓𑀸𑀬𑁂𑀯𑀸𑀢𑀺. 𑀇𑀤𑀁 𑀦𑁂𑀯𑀸𑀲𑀺𑀓𑀯𑀢𑁆𑀢𑀦𑁆𑀢𑀺 𑀦𑀺𑀕𑀫𑀦𑀁.

𑀉𑀧𑀦𑀦𑁆𑀤𑀯𑀢𑁆𑀣𑀼𑀓𑀣𑀸

𑁩𑁧𑁯. 𑀅𑀬𑀫𑀢𑁆𑀣𑁄𑀢𑀺 𑀅𑀬𑀁 𑀯𑀓𑁆𑀔𑀫𑀸𑀦𑁄 𑀅𑀢𑁆𑀣𑁄, 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀕𑀸𑀫𑀓𑁂. 𑀢𑀦𑁆𑀢𑀺 𑀲𑁂𑀦𑀸𑀲𑀦𑀁, 𑀕𑀡𑁆𑀳𑀦𑁆𑀢𑁂𑀦𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀢𑀺 𑀲𑀸𑀯𑀢𑁆𑀣𑀺𑀬𑀁. 𑀫𑀼𑀢𑁆𑀢𑀦𑁆𑀢𑀺 𑀢𑁂 𑀲𑁂𑀦𑀸𑀲𑀦𑀁 𑀫𑀼𑀜𑁆𑀘𑀺𑀢𑀁 𑀳𑁄𑀢𑀺. 𑀢𑀢𑁆𑀭𑀸𑀧𑀻𑀢𑀺 𑀕𑀸𑀫𑀓𑁂𑀧𑀺. 𑀉𑀪𑀬𑀢𑁆𑀣𑀸𑀢𑀺 𑀲𑀸𑀯𑀢𑁆𑀣𑀺𑀬𑀁, 𑀕𑀸𑀫𑀓𑁂 𑀘𑀸𑀢𑀺 𑀉𑀪𑀬𑀢𑁆𑀣.

𑀏𑀢𑁆𑀣𑀸𑀢𑀺 𑀉𑀧𑀦𑀦𑁆𑀤𑀯𑀢𑁆𑀣𑀼𑀲𑁆𑀫𑀺𑀁. 𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀇𑀥𑀸𑀢𑀺 𑀲𑀸𑀲𑀦𑁂. 𑀏𑀓𑀘𑁆𑀘𑁄 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀸𑀧𑀻𑀢𑀺 𑀲𑀸𑀫𑀦𑁆𑀢𑀯𑀺𑀳𑀸𑀭𑁂𑀧𑀺. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀇𑀥𑀸𑀢𑀺 𑀲𑁂𑀦𑀸𑀲𑀦𑁂. 𑀆𑀮𑀬𑀫𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀁. 𑀇𑀘𑁆𑀘𑀲𑁆𑀲𑀸𑀢𑀺 𑀇𑀢𑀺 𑀅𑀲𑁆𑀲, 𑀏𑀯𑀁 𑀅𑀲𑁆𑀲 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 ‘‘𑀕𑀳𑀡𑁂𑀦 𑀕𑀳𑀡’’𑀦𑁆𑀢𑀺𑀆𑀤𑀺𑀓𑁂 𑀘𑀢𑀼𑀓𑁆𑀓𑁂. 𑀬𑁄 𑀧𑀦 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁, 𑀪𑀸𑀯𑁂𑀦 𑀪𑀸𑀯𑀮𑀓𑁆𑀔𑀡𑁂 𑀯𑀸. 𑀢𑀢𑁆𑀣𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀘𑁆𑀘𑀸𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺, 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁨𑁦. 𑀬𑁄𑀢𑀺 𑀪𑀺𑀓𑁆𑀔𑀼. 𑀫𑀳𑀦𑁆𑀢𑀢𑀭𑁄 𑀯𑀸 𑀤𑀳𑀭𑀢𑀭𑁄 𑀯𑀸𑀢𑀺 𑀅𑀢𑁆𑀢𑀦𑁄 𑀫𑀳𑀦𑁆𑀢𑀢𑀭𑁄 𑀯𑀸 𑀤𑀳𑀭𑀢𑀭𑁄 𑀯𑀸 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀼 𑀢𑀺𑀯𑀲𑁆𑀲𑀦𑁆𑀢𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀫𑀦𑁆𑀢𑀭𑁂 𑀞𑀺𑀢𑁄 𑀢𑀺𑀯𑀲𑁆𑀲𑀦𑁆𑀢𑀭𑁄 𑀅𑀜𑁆𑀜𑁄 𑀪𑀺𑀓𑁆𑀔𑀼. 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀽𑀲𑀼. 𑀇𑀫𑁂 𑀲𑀩𑁆𑀩𑁂𑀢𑀺 𑀢𑀺𑀯𑀲𑁆𑀲𑀦𑁆𑀢𑀭𑀤𑁆𑀯𑀺𑀯𑀲𑁆𑀲𑀦𑁆𑀢𑀭𑀲𑀫𑀸𑀦𑀯𑀲𑁆𑀲𑀺𑀓𑁂 𑀇𑀫𑁂 𑀪𑀺𑀓𑁆𑀔𑀽, 𑀮𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀢𑀺𑀡𑁆𑀡𑀁 𑀧𑀳𑁄𑀢𑀻𑀢𑀺 𑀫𑀜𑁆𑀘𑀧𑀻𑀞𑀯𑀺𑀦𑀺𑀫𑀼𑀢𑁆𑀢𑀁 𑀬𑀁 𑀆𑀲𑀦𑀁 𑀢𑀺𑀡𑁆𑀡𑀁 𑀲𑀼𑀔𑀁 𑀦𑀺𑀲𑀻𑀤𑀺𑀢𑀼𑀁 𑀧𑀳𑁄𑀢𑀺, 𑀢𑀣𑀸𑀭𑀽𑀧𑁂 𑀆𑀲𑀦𑁂𑀧𑀺 𑀤𑁆𑀯𑁂 𑀤𑁆𑀯𑁂 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀧𑀺𑀲𑀤𑁆𑀤𑁂𑀦 𑀫𑀜𑁆𑀘𑀧𑀻𑀞𑀸𑀦𑀺 𑀅𑀧𑁂𑀓𑁆𑀔𑀢𑀺. 𑀇𑀤𑀁 𑀧𑀘𑁆𑀙𑀺𑀫𑀤𑀻𑀖𑀸𑀲𑀦𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀉𑀧𑀲𑀫𑁆𑀧𑀦𑁆𑀦𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀳𑀢𑁆𑀣𑀺𑀓𑀼𑀫𑁆𑀪𑁂𑀢𑀺 𑀳𑀢𑁆𑀣𑀺𑀲𑀺𑀭𑁄𑀧𑀺𑀡𑁆𑀟𑁂. 𑀇𑀫𑀺𑀦𑀸 𑀳𑀢𑁆𑀣𑀺𑀲𑀤𑁆𑀤𑁂𑀦 𑀳𑀢𑁆𑀣𑀺𑀓𑀼𑀫𑁆𑀪𑁄 𑀕𑀳𑀺𑀢𑁄 𑀅𑀯𑀬𑀯𑀽𑀧𑀘𑀸𑀭𑁂𑀦 𑀯𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀳𑀢𑁆𑀣𑀻 𑀯𑀺𑀬𑀸𑀢𑀺 𑀳𑀢𑁆𑀣𑀻, 𑀪𑀽𑀫𑀺𑀪𑀸𑀕𑁄, 𑀳𑀢𑁆𑀣𑀺𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑁄 𑀧𑀸𑀤𑀲𑀗𑁆𑀔𑀸𑀢𑁄 𑀦𑀔𑁄 𑀇𑀫𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀔𑀓𑁄, 𑀧𑀸𑀲𑀸𑀤𑁄. 𑀏𑀢𑀁 ‘‘𑀳𑀢𑁆𑀣𑀺𑀦𑀔𑀓𑁄’’𑀢𑀺 𑀦𑀸𑀫𑀁 𑀏𑀯𑀁𑀓𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀦𑀸𑀫𑀦𑁆𑀢𑀺 𑀬𑁄𑀚𑀦𑀸. ‘‘𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀻’’𑀢𑀺 𑀧𑀤𑀁 ‘‘𑀓𑀯𑀸𑀝𑀸𑀦𑀺 𑀫𑀜𑁆𑀘𑀧𑀻𑀞𑀸𑀦𑀺 𑀢𑀸𑀮𑀯𑀡𑁆𑀝𑀸𑀦𑀻’’𑀢𑀺 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀬𑀁𑀓𑀺𑀜𑁆𑀘𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀁 𑀅𑀢𑁆𑀣𑀺, 𑀲𑀩𑁆𑀩𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀧𑀸𑀲𑀸𑀤𑀲𑁆𑀲 𑀤𑁂𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀝𑁂𑀓𑁆𑀓𑀦𑁆𑀢𑀺 𑀧𑀸𑀲𑀸𑀤𑀢𑁄 𑀯𑀺𑀲𑀼𑀁. 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀲𑀩𑁆𑀩𑀁 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀕𑁄𑀦𑀓𑀸𑀤𑀻𑀦𑀺 𑀅𑀝𑁆𑀞𑀸𑀭𑀲 𑀅𑀢𑁆𑀣𑀭𑀡𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑁂𑀦𑀸𑀢𑀺 𑀕𑀺𑀳𑀻𑀳𑀺 𑀯𑀺𑀲𑁂𑀲𑁂𑀦 𑀬𑀣𑀸𑀓𑀸𑀫𑀁 𑀓𑀭𑀺𑀬𑀢𑀻𑀢𑀺 𑀕𑀺𑀳𑀺𑀯𑀺𑀓𑀝𑀁, 𑀕𑀺𑀳𑀺𑀲𑀦𑁆𑀢𑀓𑀁. ‘‘𑀕𑀺𑀳𑀺𑀯𑀺𑀓𑀝’’𑀦𑁆𑀢𑀺 𑀦𑀻𑀳𑀸𑀭𑁄 𑀅𑀪𑀺𑀦𑀻𑀳𑀸𑀭𑁄 𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑁄, 𑀢𑁂𑀦. 𑀮𑀩𑁆𑀪𑀦𑁆𑀢𑀻𑀢𑀺 𑀦𑀺𑀲𑀻𑀤𑀺𑀢𑀼𑀫𑁂𑀯 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀭𑀸𑀧𑀻𑀢𑀺 𑀥𑀫𑁆𑀫𑀸𑀲𑀦𑁂𑀧𑀺.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼𑀓𑀣𑀸

𑁩𑁨𑁧. 𑀏𑀢𑀸𑀦𑀻𑀢𑀺 𑀕𑀭𑀼𑀪𑀡𑁆𑀟𑀸𑀦𑀺. 𑀢𑀢𑁆𑀣𑀸𑀢𑀺 𑀭𑀸𑀲𑀺𑀯𑀲𑁂𑀦 𑀧𑀜𑁆𑀘𑀲𑀼 𑀲𑀭𑀽𑀧𑀯𑀲𑁂𑀦 𑀧𑀜𑁆𑀘𑀯𑀻𑀲𑀢𑀺𑀬𑀸 𑀕𑀭𑀼𑀪𑀡𑁆𑀟𑁂𑀲𑀼. 𑀆𑀕𑀦𑁆𑀢𑁆𑀯𑀸, 𑀆𑀪𑀼𑀲𑁄 𑀯𑀸 𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄. 𑀢𑁂𑀲𑀁𑀬𑁂𑀯𑀸𑀢𑀺 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀦𑀫𑁂𑀯. ‘‘𑀞𑀧𑀺𑀢𑁄𑀓𑀸𑀲𑁄’’𑀢𑀺 𑀇𑀫𑀺𑀦𑀸 𑀯𑀢𑁆𑀣𑀼𑀲𑀤𑁆𑀤𑀲𑁆𑀲 𑀪𑀽𑀫𑀺𑀪𑁂𑀤𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀲𑀢𑀺 𑀆𑀭𑀸𑀫𑁄 𑀧𑀢𑀺𑀝𑁆𑀞𑀳𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑀯𑀢𑁆𑀣𑀼. 𑀢𑁂𑀲𑀼 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁂𑀦 𑀦𑀯𑀪𑀽𑀫𑀺𑀪𑀸𑀕𑀢𑁄 𑀅𑀜𑁆𑀜𑀲𑁆𑀲 𑀧𑁄𑀭𑀸𑀡𑀪𑀽𑀫𑀺𑀪𑀸𑀕𑀲𑁆𑀲𑀧𑀺 𑀆𑀭𑀸𑀫𑀯𑀢𑁆𑀣𑀼𑀪𑀸𑀯𑀁 𑀯𑀺𑀓𑀧𑁆𑀧𑁂𑀢𑀺. 𑀯𑀺𑀲𑁂𑀲𑁂𑀦 𑀘𑀢𑀼𑀇𑀭𑀺𑀬𑀸𑀧𑀣𑁂 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁄. 𑀢𑀲𑁆𑀲𑀸𑀢𑀺 𑀯𑀺𑀳𑀸𑀭𑀲𑁆𑀲. 𑀘𑀢𑀼𑀦𑁆𑀦𑀁 𑀫𑀜𑁆𑀘𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀜𑁆𑀜𑀢𑀭𑁄 𑀫𑀜𑁆𑀘𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. ‘‘𑀮𑁄𑀳𑁂𑀦 𑀓𑀢𑀸 𑀓𑀼𑀫𑁆𑀪𑀻’’𑀢𑀺 𑀇𑀫𑀺𑀦𑀸 𑀮𑁄𑀳𑀓𑀼𑀫𑁆𑀪𑀻𑀢𑀺 𑀏𑀢𑁆𑀣 𑀫𑀚𑁆𑀛𑁂𑀮𑁄𑀧𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀮𑁄𑀳𑀫𑀬𑀸 𑀓𑀼𑀫𑁆𑀪𑀻 𑀮𑁄𑀳𑀓𑀼𑀫𑁆𑀪𑀻𑀢𑀺 𑀯𑀘𑀦𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀮𑁄𑀳𑁂𑀦 𑀓𑀢𑀁 𑀪𑀸𑀡𑀓𑀁, 𑀮𑁄𑀳𑁂𑀦 𑀓𑀢𑁄 𑀯𑀸𑀭𑀓𑁄, 𑀮𑁄𑀳𑁂𑀦 𑀓𑀢𑀁 𑀓𑀝𑀸𑀳𑀦𑁆𑀢𑀺 𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀏𑀢𑁆𑀣𑀸𑀢𑀺 𑀪𑀸𑀡𑀓𑀯𑀸𑀭𑀓𑀓𑀝𑀸𑀳𑁂𑀲𑀼. 𑀅𑀭𑀜𑁆𑀚𑀭𑁄𑀢𑀺 𑀅𑀢𑀺𑀫𑀳𑀦𑁆𑀢𑀢𑁆𑀢𑀸 𑀅𑀭𑀁 𑀔𑀺𑀧𑁆𑀧𑀁 𑀚𑀭𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀅𑀭𑀜𑁆𑀚𑀭𑁄. 𑀅𑀣 𑀯𑀸 𑀚𑀮𑀁 𑀕𑀡𑁆𑀳𑀺𑀢𑀼𑀁 𑀅𑀮𑀦𑁆𑀢𑀺 𑀅𑀭𑀜𑁆𑀚𑀭𑁄 𑀮𑀓𑀸𑀭𑀸𑀦𑀁 𑀭𑀓𑀸𑀭𑁂 𑀓𑀢𑁆𑀯𑀸.

𑀕𑀸𑀣𑀸𑀯𑀲𑁂𑀦 𑀦𑀺𑀕𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀁 𑀧𑀓𑀸𑀲𑀬𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑁂 𑀕𑀭𑀼𑀪𑀡𑁆𑀟𑀸𑀦𑀺 𑀤𑁆𑀯𑀺𑀲𑀗𑁆𑀕𑀳𑀸𑀦𑀺 𑀳𑁄𑀦𑁆𑀢𑀺, 𑀢𑀢𑀺𑀬𑀁 𑀕𑀭𑀼𑀪𑀡𑁆𑀟𑀁 𑀘𑀢𑀼𑀲𑀗𑁆𑀕𑀳𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀁 𑀕𑀭𑀼𑀪𑀡𑁆𑀟𑀁 𑀦𑀯𑀓𑁄𑀝𑁆𑀞𑀸𑀲𑀁 𑀳𑁄𑀢𑀺, 𑀧𑀜𑁆𑀘𑀫𑀁 𑀕𑀭𑀼𑀪𑀡𑁆𑀟𑀁 𑀅𑀝𑁆𑀞𑀪𑁂𑀤𑀦𑀁 𑀳𑁄𑀢𑀺, 𑀇𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄 𑀦𑀸𑀣𑁄 𑀧𑀜𑁆𑀘𑀳𑀺 𑀭𑀸𑀲𑀻𑀳𑀺 𑀧𑀜𑁆𑀘𑀯𑀻𑀲𑀯𑀺𑀥𑀁 𑀕𑀭𑀼𑀪𑀡𑁆𑀟𑀁 𑀧𑀓𑀸𑀲𑀬𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀭𑀸𑀢𑀺 𑀕𑀭𑀼𑀪𑀡𑁆𑀟𑁂. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀲𑀩𑁆𑀩𑀫𑁆𑀧𑀺 𑀇𑀤𑀁 𑀕𑀭𑀼𑀪𑀡𑁆𑀟𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁. 𑀧𑀭𑀺𑀯𑀸𑀭𑁂 𑀧𑀦 𑀆𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀜𑁆𑀘 𑀭𑀸𑀲𑀬𑁄 𑀫𑀳𑁂𑀲𑀺𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀧𑀭𑀺𑀯𑀸𑀭𑁂.

𑀢𑀢𑁆𑀭𑀸𑀢𑀺 ‘‘𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑀸’’𑀢𑀺 𑀯𑀘𑀦𑁂. 𑀇𑀤𑀁 𑀕𑀭𑀼𑀪𑀡𑁆𑀟𑀁 𑀉𑀧𑀦𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀘𑁆𑀘𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀣𑀸𑀯𑀭𑀸, 𑀞𑀸𑀥𑀸𑀢𑀼 𑀯𑀭𑀧𑀘𑁆𑀘𑀬𑁄, 𑀞𑀸𑀓𑀸𑀭𑀲𑁆𑀲 𑀣𑀸𑀓𑀸𑀭𑁄. 𑀇𑀫𑀺𑀦𑀸 𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀽𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀅𑀯𑀺𑀲𑁆𑀲𑀚𑁆𑀚𑀺𑀬𑀅𑀯𑁂𑀪𑀗𑁆𑀕𑀻𑀬𑀢𑁆𑀢𑀸 𑀕𑀭𑀼 𑀅𑀮𑀳𑀼𑀓𑀁 𑀪𑀡𑁆𑀟𑀁 𑀕𑀭𑀼𑀪𑀡𑁆𑀟𑀁. 𑀇𑀫𑀺𑀦𑀸 𑀫𑀜𑁆𑀘𑀸𑀤𑀻𑀦𑀺 𑀏𑀓𑀯𑀻𑀲𑀢𑀺 𑀕𑀭𑀼𑀪𑀡𑁆𑀟𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀣𑀸𑀯𑀭𑁂𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, 𑀣𑀸𑀯𑀭𑁂𑀲𑀽𑀢𑀺 𑀳𑀺 𑀅𑀢𑁆𑀣𑁄, 𑀔𑁂𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀔𑀺𑀧𑀢𑀺 𑀧𑀼𑀩𑁆𑀩𑀡𑁆𑀡𑀩𑀻𑀚𑀫𑁂𑀢𑁆𑀣𑀸𑀢𑀺 𑀔𑁂𑀢𑁆𑀢𑀁. 𑀯𑀲𑀢𑀺 𑀅𑀧𑀭𑀡𑁆𑀡𑀩𑀻𑀚𑀁 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀢𑀮𑁂 𑀪𑀽𑀫𑀺𑀪𑀸𑀕𑁂 𑀏𑀓𑀢𑁄 𑀯𑀸 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀞𑀸𑀦𑁂𑀳𑀺 𑀆𑀯𑀭𑀡𑀁 𑀓𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀢𑀴𑀸𑀓𑁄, 𑀲𑀭𑁄. 𑀓𑀲𑁆𑀲𑀓𑀸𑀦𑀁 𑀫𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀫𑀸𑀢𑀺𑀓𑀸. 𑀆𑀭𑀸𑀫𑁂𑀦 𑀧𑀭𑀺𑀯𑀢𑁆𑀢𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑀼𑀦𑁆𑀢𑀺 𑀆𑀳 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀻’’𑀢𑀺. 𑀧𑀺𑀲𑀤𑁆𑀤𑁄 𑀅𑀯𑀬𑀯𑀲𑀫𑁆𑀧𑀺𑀡𑁆𑀟𑀦𑁄.

𑀢𑀢𑁆𑀭𑀸𑀢𑀺 ‘‘𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑁂. 𑀤𑀽𑀭𑁂𑀢𑀺 𑀲𑀗𑁆𑀖𑀸𑀭𑀸𑀫𑀢𑁄 𑀤𑀽𑀭𑀝𑁆𑀞𑀸𑀦𑁂. 𑀬𑀫𑁆𑀧𑀻𑀢𑀺 𑀦𑀸𑀴𑀺𑀓𑁂𑀭𑀨𑀮𑀫𑁆𑀧𑀺. 𑀳𑀭𑀦𑁆𑀢𑀻𑀢𑀺 𑀲𑀗𑁆𑀖𑀲𑁆𑀲 𑀳𑀭𑀦𑁆𑀢𑀺. 𑀅𑀜𑁆𑀜𑁂𑀲𑀦𑁆𑀢𑀺 𑀲𑀗𑁆𑀖𑀢𑁄 𑀅𑀜𑁆𑀜𑁂𑀲𑀁 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀫𑀦𑀼𑀲𑁆𑀲𑀸. 𑀲𑀗𑁆𑀖𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀼𑀘𑁆𑀘𑀢𑀻𑀢𑀺 𑀲𑀗𑁆𑀖𑀲𑁆𑀲𑀸𑀭𑀸𑀫𑁂𑀦 𑀫𑀦𑀼𑀲𑁆𑀲𑀸𑀦𑀫𑀸𑀭𑀸𑀫𑀁, 𑀫𑀦𑀼𑀲𑁆𑀲𑀸𑀦𑀫𑀸𑀭𑀸𑀫𑁂𑀦 𑀯𑀸 𑀲𑀗𑁆𑀖𑀲𑁆𑀲𑀸𑀭𑀸𑀫𑀁 𑀧𑀭𑀺𑀯𑀢𑁆𑀢𑁂𑀢𑀼𑀁 𑀭𑀼𑀘𑀻𑀬𑀢𑀺 𑀇𑀘𑁆𑀙𑀻𑀬𑀢𑀺. 𑀪𑀺𑀓𑁆𑀔𑀽𑀦𑀁 𑀆𑀭𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀫𑀸𑀭𑀸𑀫𑁄. 𑀔𑀼𑀤𑁆𑀤𑀓𑁄𑀢𑀺 𑀲𑀗𑁆𑀖𑀸𑀭𑀸𑀫𑀢𑁄 𑀔𑀼𑀤𑁆𑀤𑀓𑁄. 𑀆𑀬𑀦𑁆𑀢𑀺 𑀅𑀬𑀢𑀺 𑀆𑀬𑀲𑀸𑀫𑀺𑀓𑁄 𑀥𑀦𑁂𑀦 𑀯𑀟𑁆𑀠𑀺𑀁 𑀕𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀆𑀬𑁄, 𑀢𑀁. 𑀲𑀫𑀓𑀫𑁂𑀯𑀸𑀢𑀺 𑀲𑀫𑀧𑁆𑀧𑀫𑀸𑀡𑀫𑁂𑀯, 𑀆𑀬𑀁 𑀲𑀘𑁂 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀫𑀸𑀡𑀢𑁆𑀣𑁂 𑀓𑀧𑀘𑁆𑀘𑀬𑁄. 𑀫𑀦𑀼𑀲𑁆𑀲𑀸𑀦𑀁 𑀭𑀼𑀓𑁆𑀔𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑀺𑀭𑁂𑀓𑀁 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀸𑀦𑀸𑀧𑁂𑀢𑁆𑀯𑀸𑀢𑀺 ‘‘𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 (𑀫. 𑀦𑀺. 𑁩.𑁩𑁭𑁬) 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀲𑁆𑀲 𑀆𑀦𑀺𑀲𑀁𑀲𑀁 𑀫𑀦𑀼𑀲𑁆𑀲𑀸𑀦𑀁 𑀚𑀸𑀦𑀸𑀧𑁂𑀢𑁆𑀯𑀸. 𑀨𑀮𑀥𑀸𑀭𑀺𑀦𑁄 𑀳𑁄𑀦𑁆𑀢𑀺 𑀦𑀦𑀽𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀏𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀬𑁂𑀦 𑀦𑀬𑁂𑀦 𑀆𑀭𑀸𑀫𑁄 𑀆𑀭𑀸𑀫𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑁄, 𑀏𑀢𑁂𑀦𑁂𑀯 𑀦𑀬𑁂𑀦. 𑀫𑀳𑀦𑁆𑀢𑁂𑀦 𑀯𑀸 𑀔𑀼𑀤𑁆𑀤𑀓𑁂𑀦 𑀯𑀸 𑀆𑀭𑀸𑀫𑀯𑀢𑁆𑀣𑀼𑀦𑀸 𑀘𑀸𑀢𑀺 𑀬𑁄𑀚𑀦𑀸. 𑀆𑀭𑀸𑀫 𑀆𑀭𑀸𑀫𑀯𑀢𑁆𑀣𑀼𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀽𑀦𑀺 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀉𑀪𑁄𑀧𑀻𑀢𑀺 𑀕𑁂𑀳𑀧𑀸𑀲𑀸𑀤𑀯𑀲𑁂𑀦 𑀉𑀪𑁄𑀧𑀺. 𑀢𑀢𑁆𑀣𑀸𑀢𑀺 𑀕𑁂𑀳𑁂. 𑀇𑀤𑀁 𑀧𑀦𑀸𑀢𑀺 𑀧𑀸𑀲𑀸𑀤𑀲𑀗𑁆𑀔𑀸𑀢𑀁 𑀕𑁂𑀳𑀁, 𑀫𑀦𑀼𑀲𑁆𑀲𑀸𑀦𑀁 𑀕𑁂𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀕𑁆𑀖𑁂𑀦 𑀯𑀸 𑀅𑀧𑁆𑀧𑀕𑁆𑀖𑁂𑀦 𑀯𑀸 𑀯𑀺𑀳𑀸𑀭𑀯𑀢𑁆𑀣𑀼𑀦𑀸 𑀘𑀸𑀢𑀺 𑀬𑁄𑀚𑀦𑀸. 𑀯𑀺𑀳𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀽𑀦𑀺 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀕𑀭𑀼𑀪𑀡𑁆𑀟𑁂𑀦 𑀕𑀭𑀼𑀪𑀡𑁆𑀟𑀧𑀭𑀺𑀯𑀢𑁆𑀢𑀦𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀁𑀲𑁆𑀯𑀸𑀕𑀸𑀭𑀓𑁂𑀲𑀽𑀢𑀺 𑀧𑀁𑀲𑀼𑀓𑀻𑀴𑀦𑀢𑁆𑀣𑀸𑀬 𑀓𑀢𑁂𑀲𑀼 𑀅𑀕𑀸𑀭𑀓𑁂𑀲𑀼. 𑀓𑀧𑁆𑀧𑀺𑀬𑀫𑀜𑁆𑀘𑀸𑀢𑀺 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀓𑀧𑁆𑀧𑀺𑀬𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀻𑀳𑀺 𑀅𑀓𑀢𑀸 𑀫𑀜𑁆𑀘𑀸. 𑀯𑀺𑀳𑀸𑀭𑀲𑁆𑀲 𑀧𑀦 𑀲𑀼𑀯𑀡𑁆𑀡𑀭𑀚𑀢𑀫𑀬𑀸𑀤𑀺𑀓𑀸𑀧𑀺 𑀓𑀧𑁆𑀧𑀺𑀬𑀸 𑀫𑀜𑁆𑀘𑀸 𑀤𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀳𑀺𑀲𑀻𑀫𑀸𑀬𑀸𑀢𑀺 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺. 𑀢𑀢𑁆𑀣𑀸𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂. 𑀢𑀢𑁆𑀣𑀸𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀲𑀦𑀝𑁆𑀞𑀸𑀦𑁂. ‘‘𑀫𑀳𑀕𑁆𑀖𑁂𑀦𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀦𑀺𑀬𑀫𑁂𑀦𑁆𑀢𑁄 𑀆𑀳 ‘‘𑀲𑀢𑀕𑁆𑀖𑀦𑀓𑁂𑀦 𑀯𑀸 𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀯𑀸’’𑀢𑀺. 𑀫𑀜𑁆𑀘𑀲𑀢𑀦𑁆𑀢𑀺 𑀫𑀜𑁆𑀘𑀩𑀳𑀼𑀁. 𑀏𑀢𑁂𑀲𑀼𑀧𑀻𑀢𑀺 𑀧𑀻𑀞𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑁂𑀲𑀼𑀧𑀺. 𑀢𑀢𑁆𑀣𑀸𑀢𑀺 𑀧𑀻𑀞𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑁂𑀲𑀼. 𑀓𑀧𑁆𑀧𑀺𑀬𑀁 𑀧𑀻𑀞𑀸𑀤𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀧𑁆𑀧𑀺𑀬𑀁 𑀯𑀸 𑀫𑀳𑀕𑁆𑀖𑀁 𑀓𑀧𑁆𑀧𑀺𑀬𑀁 𑀯𑀸𑀢𑀺 𑀓𑀧𑁆𑀧𑀺𑀬𑁂𑀦 𑀯𑀸 𑀫𑀳𑀕𑁆𑀖𑀓𑀧𑁆𑀧𑀺𑀬𑁂𑀦 𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀼𑀢𑁆𑀢𑀯𑀢𑁆𑀣𑀽𑀦𑀻’’𑀢𑀺 𑀧𑀤𑀁 ‘‘𑀧𑀭𑀺𑀯𑀢𑁆𑀢𑁂𑀢𑁆𑀯𑀸’’𑀢𑀺 𑀧𑀤𑁂 𑀅𑀯𑀼𑀢𑁆𑀢𑀓𑀫𑁆𑀫𑀁, ‘‘𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺 𑀧𑀤𑁂 𑀯𑀼𑀢𑁆𑀢𑀓𑀫𑁆𑀫𑀁, 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀧𑀤𑀁.

𑀧𑀲𑀢𑀫𑀢𑁆𑀢𑀉𑀤𑀓𑀕𑀡𑁆𑀳𑀓𑀸𑀦𑀺𑀧𑀻𑀢𑀺 𑀏𑀢𑁆𑀣 𑀧𑀲𑀢𑁄 𑀦𑀸𑀫 𑀓𑀼𑀜𑁆𑀘𑀺𑀢𑀧𑀸𑀡𑀺. 𑀲𑀻𑀳𑀴𑀤𑀻𑀧𑁂𑀢𑀺 𑀲𑀻𑀳𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀻𑀳𑀴𑁄 𑀮𑀓𑀸𑀭𑀲𑁆𑀲 𑀴𑀓𑀸𑀭𑀁 𑀓𑀢𑁆𑀯𑀸, 𑀲𑀻𑀳𑀩𑀸𑀳𑀼𑀦𑀸𑀫𑀓𑁄 𑀭𑀸𑀚𑀸, 𑀢𑀲𑁆𑀲 𑀧𑀼𑀢𑁆𑀢𑀢𑁆𑀢𑀸 𑀯𑀺𑀚𑀬𑀓𑀼𑀫𑀸𑀭𑁄𑀧𑀺 𑀲𑀻𑀳𑀴𑁄 𑀦𑀸𑀫, 𑀢𑁂𑀦 𑀆𑀤𑀺𑀫𑁆𑀳𑀺 𑀦𑀺𑀯𑀸𑀲𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀤𑀻𑀧𑁄 𑀲𑀻𑀳𑀴𑀤𑀻𑀧𑁄 𑀦𑀸𑀫, 𑀢𑀲𑁆𑀫𑀺𑀁. 𑀧𑀸𑀤𑀁 𑀕𑀡𑁆𑀳𑀸𑀢𑀻𑀢𑀺 𑀧𑀸𑀤𑀕𑀡𑁆𑀳𑀦𑁄, 𑀲𑁄𑀬𑁂𑀯 𑀧𑀸𑀤𑀕𑀡𑁆𑀳𑀦𑀓𑁄. 𑀧𑀸𑀤𑁄 𑀦𑀸𑀫𑀸𑀢𑀺 ‘‘𑀧𑀸𑀤𑀕𑀡𑁆𑀳𑀦𑀓𑁄’’𑀢𑀺 𑀏𑀢𑁆𑀣 𑀧𑀸𑀤𑁄 𑀦𑀸𑀫. 𑀬𑁄 𑀮𑁄𑀳𑀯𑀸𑀭𑀓𑁄 𑀫𑀕𑀥𑀦𑀸𑀴𑀺𑀬𑀸 𑀧𑀜𑁆𑀘𑀦𑀸𑀴𑀺𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀲𑁄 𑀮𑁄𑀳𑀯𑀸𑀭𑀓𑁄 𑀧𑀸𑀤𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀧𑀫𑀸𑀡𑀲𑁆𑀲 𑀦𑀸𑀫𑀁 𑀧𑀫𑀸𑀡𑀯𑀦𑁆𑀢𑁂 𑀉𑀧𑀘𑀸𑀭𑀢𑁄 𑀯𑁄𑀳𑀸𑀭𑀦𑀬𑀁 𑀤𑀲𑁆𑀲𑁂𑀢𑀺. 𑀢𑀢𑁄𑀢𑀺 𑀧𑀜𑁆𑀘𑀦𑀸𑀴𑀺𑀫𑀢𑁆𑀢𑀕𑀡𑁆𑀳𑀦𑀓𑀯𑀸𑀭𑀓𑀢𑁄. 𑀇𑀫𑀸𑀦𑀻𑀢𑀺 𑀮𑁄𑀳𑀓𑀼𑀫𑁆𑀪𑀻𑀆𑀤𑀻𑀦𑀺.

𑀪𑀺𑀗𑁆𑀕𑀸𑀭 …𑀧𑁂… 𑀓𑀝𑀘𑁆𑀙𑀼𑀆𑀤𑀻𑀦𑀻𑀢𑀺 𑀪𑀺𑀗𑁆𑀕𑀸𑀭𑁄 𑀘 𑀧𑀝𑀺𑀕𑁆𑀕𑀳𑁄 𑀘 𑀉𑀴𑀼𑀗𑁆𑀓𑁄 𑀘 𑀤𑀩𑁆𑀩𑀺 𑀘 𑀓𑀝𑀘𑁆𑀙𑀼 𑀘 𑀧𑀸𑀢𑀺 𑀘 𑀢𑀝𑁆𑀝𑀓𑁄 𑀘 𑀲𑀭𑀓𑁄 𑀘 𑀲𑀫𑀼𑀕𑁆𑀕𑁄 𑀘 𑀅𑀗𑁆𑀕𑀸𑀭𑀓𑀧𑀮𑁆𑀮𑁄 𑀘 𑀥𑀽𑀫𑀓𑀝𑀘𑁆𑀙𑀼 𑀘 𑀪𑀺𑀗𑁆𑀕𑀸𑀭…𑀧𑁂… 𑀥𑀽𑀫𑀓𑀝𑀘𑁆𑀙𑀼𑀬𑁄, 𑀢𑀸 𑀆𑀤𑀺 𑀬𑁂𑀲𑀁 𑀢𑀸𑀦𑀻𑀢𑀺 𑀪𑀺𑀗𑁆𑀕𑀸𑀭…𑀧𑁂… 𑀓𑀝𑀘𑁆𑀙𑀼𑀆𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑀸𑀦𑀺 𑀉𑀧𑀓𑀭𑀡𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀪𑀸𑀚𑀦𑀻𑀬𑀸𑀦𑀻𑀢𑀺 𑀪𑀸𑀚𑁂𑀢𑀩𑁆𑀩𑀸𑀦𑀺. 𑀓𑀁𑀲𑀮𑁄𑀳𑀸𑀤𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀯𑀝𑁆𑀝𑀮𑁄𑀳𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀝𑁆𑀝𑀮𑁄𑀳𑀁 𑀦𑀸𑀫 𑀧𑀻𑀢𑀮𑁄𑀳𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀧𑀸𑀭𑀺𑀳𑀸𑀭𑀺𑀬𑀦𑁆𑀢𑀺 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑀁 𑀧𑀭𑀺𑀳𑀭𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑀁, ‘‘𑀅𑀢𑁆𑀢𑀲𑀦𑁆𑀢𑀓’’𑀦𑁆𑀢𑀺 𑀯𑀸 𑀧𑀭𑀺𑀕𑁆𑀕𑀳𑁂𑀦 𑀳𑀭𑀺𑀢𑁆𑀯𑀸 𑀪𑀼𑀜𑁆𑀚𑀦𑀁 𑀦 𑀯𑀝𑁆𑀝𑀢𑀺. 𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑁂𑀦𑁂𑀯𑀸𑀢𑀺 ‘‘𑀕𑀺𑀳𑀺𑀯𑀺𑀓𑀝’’𑀦𑁆𑀢𑀺 𑀅𑀪𑀺𑀦𑀻𑀳𑀸𑀭𑁂𑀦𑁂𑀯.

𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀓𑀧𑁆𑀧𑀺𑀬𑀮𑁄𑀳𑀪𑀡𑁆𑀟𑁂 𑀧𑀭𑀺𑀬𑀸𑀧𑀦𑁆𑀦𑀸 𑀅𑀜𑁆𑀚𑀦𑀻𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀓𑀧𑁆𑀧𑀺𑀬𑀮𑁄𑀳𑀪𑀡𑁆𑀟𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, ‘‘𑀅𑀜𑁆𑀚𑀦𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀽𑀘𑀻𑀢𑀺 𑀘𑀻𑀯𑀭𑀸𑀤𑀺𑀲𑀺𑀩𑁆𑀩𑀦𑀓𑀸 𑀲𑀽𑀘𑀺. 𑀧𑀡𑁆𑀡𑀲𑀽𑀘𑀻𑀢𑀺 𑀧𑀡𑁆𑀡𑁂 𑀮𑀺𑀔𑀦𑀸 𑀲𑀽𑀘𑀺. 𑀅𑀜𑁆𑀜𑀫𑁆𑀧𑀻𑀢𑀺 𑀅𑀜𑁆𑀚𑀦𑀺𑀆𑀤𑀺𑀢𑁄 𑀅𑀜𑁆𑀜𑀫𑁆𑀧𑀺. 𑀥𑀽𑀫𑀦𑁂𑀢𑁆𑀢𑀜𑁆𑀘 𑀨𑀸𑀮𑀜𑁆𑀘 𑀤𑀻𑀧𑀭𑀼𑀓𑁆𑀔𑁄 𑀘 𑀤𑀻𑀧𑀓𑀧𑀮𑁆𑀮𑀓𑁄 𑀘 𑀑𑀮𑀫𑁆𑀩𑀓𑀤𑀻𑀧𑁄 𑀘 𑀥𑀽𑀫𑀦𑁂𑀢𑁆𑀢…𑀧𑁂… 𑀑𑀮𑀫𑁆𑀩𑀓𑀤𑀻𑀧𑀸. 𑀇𑀢𑁆𑀣𑀺𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀲𑀗𑁆𑀔𑀸𑀢𑀸𑀦𑀺 𑀭𑀽𑀧𑀸𑀦𑀺 𑀏𑀢𑁂𑀲𑀼 𑀅𑀢𑁆𑀣𑀻𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀭𑀽𑀧𑀓𑀸𑀦𑀺. 𑀥𑀽𑀫𑀦𑁂𑀢𑁆𑀢…𑀧𑁂… 𑀑𑀮𑀫𑁆𑀩𑀓𑀤𑀻𑀧𑀸 𑀘 𑀢𑁂 𑀇𑀢𑁆𑀣𑀺𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀭𑀽𑀧𑀓𑀸𑀦𑀺 𑀘𑁂𑀢𑀺 𑀥𑀽𑀫𑀦𑁂𑀢𑁆𑀢…𑀧𑁂… 𑀭𑀽𑀧𑀓𑀸𑀦𑀺, 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑁄. 𑀢𑀸𑀦𑀺 𑀯𑀸 𑀅𑀜𑁆𑀜𑀸𑀦𑀺 𑀯𑀸 𑀪𑀺𑀢𑁆𑀢𑀺𑀘𑁆𑀙𑀤𑀦𑀓𑀯𑀸𑀝𑀸𑀤𑀻𑀲𑀼 𑀉𑀧𑀦𑁂𑀢𑀩𑁆𑀩𑀸𑀦𑀺 𑀮𑁄𑀳𑀪𑀡𑁆𑀟𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑁄𑀳𑀔𑀺𑀮𑀓𑀦𑁆𑀢𑀺 𑀮𑁄𑀳𑀫𑀬𑀁 𑀆𑀡𑀺𑀁. 𑀧𑀭𑀺𑀳𑀭𑀺𑀢𑁆𑀯𑀸𑀢𑀺 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓’’𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀦 𑀳𑀭𑀺𑀢𑁆𑀯𑀸, 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑀕𑀺𑀳𑀺𑀯𑀺𑀓𑀝𑀸𑀦𑀺 𑀯𑀸 𑀅𑀧𑀦𑁂𑀢𑁆𑀯𑀸. 𑀔𑀻𑀭𑀧𑀸𑀲𑀸𑀡𑀫𑀬𑀸𑀦𑀻𑀢𑀺 𑀔𑀻𑀭𑀯𑀡𑁆𑀡𑁂𑀦 𑀧𑀸𑀲𑀸𑀡𑁂𑀦 𑀓𑀢𑀸𑀦𑀺.

𑀲𑀼𑀯𑀡𑁆𑀡𑀜𑁆𑀘 𑀭𑀚𑀢𑀜𑁆𑀘 𑀳𑀸𑀭𑀓𑀽𑀝𑀜𑁆𑀘 𑀚𑀸𑀢𑀺𑀨𑀮𑀺𑀓𑀜𑁆𑀘 𑀲𑀼𑀯𑀡𑁆𑀡…𑀧𑁂… 𑀚𑀸𑀢𑀺𑀨𑀮𑀺𑀓𑀸𑀦𑀺, 𑀢𑁂𑀳𑀺 𑀓𑀢𑀸𑀦𑀺 𑀪𑀸𑀚𑀦𑀸𑀦𑀺 𑀲𑀼𑀯𑀡𑁆𑀡…𑀧𑁂… 𑀪𑀸𑀚𑀦𑀸𑀦𑀺. 𑀲𑀩𑁆𑀩𑀦𑁆𑀢𑀺 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀲𑀩𑁆𑀩𑀁. 𑀯𑀝𑁆𑀝𑀢𑀻𑀢𑀺 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀯𑀝𑁆𑀝𑀢𑀺.

𑀯𑀸𑀲𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸, 𑀦𑀺𑀤𑁆𑀥𑀸𑀭𑀡𑁂 𑀯𑀸 𑀪𑀼𑀫𑁆𑀫𑀁. 𑀬𑀸𑀬 𑀯𑀸𑀲𑀺𑀬𑀸 𑀦 𑀲𑀓𑁆𑀓𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀯𑀸𑀲𑀺𑀢𑁄. 𑀫𑀳𑀢𑁆𑀢𑀭𑀻𑀲𑀤𑁆𑀤𑁄 𑀫𑀳𑀦𑁆𑀢𑀧𑀭𑀺𑀬𑀸𑀬𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀫𑀳𑀢𑁆𑀢𑀭𑀻 𑀯𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁂𑀚𑁆𑀚𑀸𑀦𑀦𑁆𑀢𑀺 𑀪𑀺𑀲𑀓𑁆𑀓𑀸𑀦𑀁. 𑀲𑀺𑀭𑀸𑀯𑁂𑀥𑀦𑀨𑀭𑀲𑀼𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀢𑀢𑁄 𑀫𑀳𑀦𑁆𑀢𑀁 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀸 𑀧𑀦 𑀓𑀼𑀞𑀸𑀭𑀻 𑀆𑀯𑀼𑀥𑀲𑀗𑁆𑀔𑁂𑀧𑁂𑀦 𑀓𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀆𑀯𑀼𑀥𑀲𑀗𑁆𑀔𑁂𑀧𑁂𑀦 𑀓𑀢𑀸 𑀬𑀸 𑀧𑀦 𑀓𑀼𑀞𑀸𑀭𑀻 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀦𑀸𑀫𑀸𑀲𑀸𑀢𑀺 𑀅𑀦𑀸𑀫𑀲𑀺𑀢𑀩𑁆𑀩𑀸, 𑀅𑀦𑀸𑀫𑀸𑀲𑀸𑀭𑀳𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀢𑀢𑁄 𑀅𑀥𑀺𑀓𑁄 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀔𑀡𑀺𑀢𑁆𑀯𑀸 𑀔𑀸𑀤𑀢𑀻𑀢𑀺 𑀦𑀺𑀔𑀸𑀤𑀦𑀁. 𑀘𑀢𑀼𑀭𑀲𑁆𑀲𑀁 𑀫𑀼𑀔𑀫𑁂𑀢𑀲𑁆𑀲𑀸𑀢𑀺 𑀘𑀢𑀼𑀭𑀲𑁆𑀲𑀫𑀼𑀔𑀁. 𑀤𑁄𑀡𑀺𑀲𑀤𑀺𑀲𑀁 𑀫𑀼𑀔𑀫𑁂𑀢𑀲𑁆𑀲𑀸𑀢𑀺 𑀤𑁄𑀡𑀺𑀫𑀼𑀔𑀁. 𑀲𑀫𑁆𑀫𑀼𑀜𑁆𑀘𑀦𑀺𑀤𑀡𑁆𑀟𑀯𑁂𑀥𑀦𑀫𑁆𑀧𑀺 𑀦𑀺𑀔𑀸𑀤𑀦𑀁 𑀤𑀡𑁆𑀟𑀩𑀤𑁆𑀥𑀁 𑀳𑁄𑀢𑀺 𑀘𑁂𑀢𑀺 𑀬𑁄𑀚𑀦𑀸. 𑀤𑀡𑁆𑀟𑁂𑀦 𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀤𑀡𑁆𑀟𑀩𑀤𑁆𑀥𑀁, 𑀤𑀡𑁆𑀟𑀁 𑀩𑀤𑁆𑀥𑀫𑁂𑀢𑀲𑁆𑀲𑀸𑀢𑀺 𑀯𑀸 𑀤𑀡𑁆𑀟𑀩𑀤𑁆𑀥𑀁. ‘‘𑀅𑀤𑀡𑁆𑀟𑀓’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀨𑀮𑀫𑀢𑁆𑀢𑀫𑁂𑀯𑀸’’𑀢𑀺. 𑀦𑀢𑁆𑀣𑀺 𑀤𑀡𑁆𑀟𑀫𑁂𑀢𑀲𑁆𑀲𑀸𑀢𑀺 𑀅𑀤𑀡𑁆𑀟𑀓𑀁. 𑀬𑀦𑁆𑀢𑀺 𑀦𑀺𑀔𑀸𑀤𑀦𑀁. 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀳𑀭𑀺𑀢𑀼𑀁, 𑀲𑀗𑁆𑀖𑀺𑀓𑀪𑀸𑀯𑀁 𑀅𑀧𑀦𑁂𑀢𑀼𑀁 𑀯𑀸. 𑀲𑀺𑀔𑀭𑀫𑁆𑀧𑀺 𑀦𑀺𑀔𑀸𑀤𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀲𑀫𑀸𑀦𑀓𑀺𑀘𑁆𑀘𑀪𑀸𑀯𑀢𑁄. 𑀲𑀺𑀔𑀭𑀦𑁆𑀢𑀺 𑀬𑁂𑀦 𑀧𑀭𑀺𑀩𑁆𑀪𑀫𑀺𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀺, 𑀬𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀤𑀺𑀦𑁆𑀦𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀫𑀦𑀼𑀲𑁆𑀲𑀸, 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀧𑀸𑀓𑀢𑀺𑀓𑁂𑀢𑀺 𑀧𑀓𑀢𑀺𑀬𑀸 𑀞𑀺𑀢𑁂, 𑀬𑀣𑀸 𑀧𑀞𑀫𑀁 𑀞𑀺𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀲𑀘𑁂 𑀆𑀳𑀭𑀦𑁆𑀢𑀻𑀢𑀺 𑀲𑀘𑁂 𑀆𑀬𑀸𑀘𑀦𑀁 𑀅𑀓𑀢𑁆𑀯𑀸 𑀳𑀭𑀦𑁆𑀢𑀺. 𑀅𑀦𑀸𑀳𑀭𑀦𑁆𑀢𑀸𑀧𑀻𑀢𑀺 𑀧𑀼𑀦 𑀅𑀦𑀸𑀳𑀭𑀦𑁆𑀢𑀸𑀧𑀺.

𑀓𑀫𑁆𑀫𑀸𑀭𑁄 𑀘 𑀢𑀝𑁆𑀝𑀓𑀸𑀭𑁄 𑀘 𑀘𑀼𑀦𑁆𑀤𑀓𑀸𑀭𑁄 𑀘 𑀦𑀴𑀓𑀸𑀭𑁄 𑀘 𑀫𑀡𑀺𑀓𑀸𑀭𑁄 𑀘 𑀧𑀢𑁆𑀢𑀩𑀦𑁆𑀥𑀓𑁄 𑀘 𑀓𑀫𑁆𑀫𑀸𑀭…𑀧𑁂… 𑀧𑀢𑁆𑀢𑀩𑀦𑁆𑀥𑀓𑀸, 𑀢𑁂𑀲𑀁. 𑀅𑀥𑀺𑀓𑀭𑀡𑀻 𑀘 𑀫𑀼𑀝𑁆𑀞𑀺𑀓𑁄 𑀘 𑀲𑀡𑁆𑀟𑀸𑀲𑁄 𑀘 𑀢𑀼𑀮𑀸 𑀘 𑀅𑀥𑀺𑀓𑀭𑀡𑀺…𑀧𑁂… 𑀢𑀼𑀮𑀸. 𑀲𑀗𑁆𑀖𑁂 𑀤𑀺𑀦𑁆𑀦𑀓𑀸𑀮𑀢𑁄𑀢𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄. 𑀢𑀺𑀧𑀼𑀁 𑀙𑀺𑀦𑁆𑀤𑀢𑀺 𑀅𑀦𑁂𑀦𑀸𑀢𑀺 𑀢𑀺𑀧𑀼𑀘𑁆𑀙𑁂𑀤𑀦𑀁, 𑀢𑀫𑁂𑀯 𑀲𑀢𑁆𑀣𑀓𑀁 𑀢𑀺𑀧𑀼𑀘𑁆𑀙𑁂𑀤𑀦𑀲𑀢𑁆𑀣𑀓𑀁. 𑀫𑀳𑀸𑀓𑀢𑁆𑀢𑀭𑀺𑀜𑁆𑀘 𑀫𑀳𑀸𑀲𑀡𑁆𑀟𑀸𑀲𑀜𑁆𑀘 𑀫𑀳𑀸𑀧𑀺𑀧𑁆𑀨𑀺𑀮𑀺𑀓𑀜𑁆𑀘 𑀞𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀞𑀧𑀺𑀢𑀸𑀦𑀻𑀢𑀺 𑀆𑀳 ‘‘𑀫𑀳𑀸𑀓𑀢𑁆𑀢𑀭𑀺𑀆𑀤𑀻𑀦𑀺 𑀕𑀭𑀼𑀪𑀡𑁆𑀟𑀸𑀦𑀻’’𑀢𑀺. 𑀢𑀢𑁆𑀣 𑀬𑀲𑁆𑀫𑀸 𑀫𑀳𑀸𑀓𑀢𑁆𑀢𑀭𑀺𑀆𑀤𑀻𑀦𑀺 𑀕𑀭𑀼𑀪𑀡𑁆𑀟𑀸𑀦𑀺, 𑀢𑀲𑁆𑀫𑀸 ‘‘𑀞𑀧𑁂𑀢𑁆𑀯𑀸 𑀫𑀳𑀸𑀓𑀢𑁆𑀢𑀭𑀺’’𑀦𑁆𑀢𑀺 𑀆𑀤𑀺 𑀫𑀬𑀸 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀯𑀮𑁆𑀮𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀯𑁂𑀢𑁆𑀢𑀯𑀮𑁆𑀮𑀺𑀆𑀤𑀺𑀓𑀸𑀢𑀺 𑀯𑁂𑀢𑁆𑀢𑀲𑀗𑁆𑀔𑀸𑀢𑀯𑀮𑁆𑀮𑀺𑀆𑀤𑀺𑀓𑀸. 𑀅𑀟𑁆𑀠𑀩𑀳𑀼𑀧𑁆𑀧𑀫𑀸𑀡𑀸𑀢𑀺 𑀏𑀢𑁆𑀣 𑁋

‘‘𑀩𑁆𑀬𑀸𑀫𑁄 𑀲𑀳𑀓𑀭𑀸 𑀩𑀸𑀳𑀼, 𑀤𑁆𑀯𑁂𑀧𑀲𑁆𑀲𑀤𑁆𑀯𑀬𑀯𑀺𑀢𑁆𑀣𑀢𑀸’’𑀢𑀺. 𑁋

𑀅𑀪𑀺𑀥𑀸𑀦𑁂 (𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁨𑁬𑁯 𑀕𑀸𑀣𑀸𑀬𑀁) 𑀯𑀼𑀢𑁆𑀢𑀢𑁆𑀢𑀸 𑀩𑀸𑀳𑀼 𑀦𑀸𑀫 𑀇𑀥 𑀩𑁆𑀬𑀸𑀫𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀯𑀺𑀢𑁆𑀣𑀢𑀸𑀦𑀁 𑀩𑁆𑀬𑀸𑀫𑀲𑀗𑁆𑀔𑀸𑀢𑀸𑀦𑀁 𑀲𑀳𑀓𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀩𑀸𑀳𑀽𑀦𑀁 𑀅𑀟𑁆𑀠𑁄𑀢𑀺 𑀅𑀟𑁆𑀠𑀩𑀸𑀳𑀼, 𑀢𑀲𑁆𑀲 𑀧𑀫𑀸𑀡𑀫𑁂𑀢𑀲𑁆𑀲𑀸𑀢𑀺 𑀅𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄, 𑀤𑀻𑀖𑀢𑁄 𑀤𑁆𑀯𑀺𑀳𑀢𑁆𑀣𑀸 𑀯𑀮𑁆𑀮𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀚𑀸𑀢𑀓𑀸𑀢𑀺 𑀢𑀺𑀲𑁆𑀲𑀁 𑀲𑀗𑁆𑀖𑀲𑁆𑀲 𑀪𑀽𑀫𑀺𑀬𑀁 𑀚𑀸𑀢𑀓𑀸. 𑀭𑀓𑁆𑀔𑀺𑀢𑀕𑁄𑀧𑀺𑀢𑀸𑀢𑀺 𑀲𑀗𑁆𑀖𑁂𑀦 𑀲𑀬𑀁 𑀭𑀓𑁆𑀔𑀺𑀢𑀸, 𑀧𑀭𑁂𑀳𑀺 𑀕𑁄𑀧𑀺𑀢𑀸. 𑀇𑀫𑀺𑀦𑀸 𑀅𑀭𑀓𑁆𑀔𑀺𑀢𑀅𑀕𑁄𑀧𑀺𑀢𑀸 𑀕𑀭𑀼𑀪𑀡𑁆𑀟𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀢𑀺 𑀯𑀮𑁆𑀮𑀺. 𑀅𑀢𑀺𑀭𑁂𑀓𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀦𑁂𑀢𑀼𑀦𑁆𑀢𑀺 𑀢𑀁 𑀯𑀮𑁆𑀮𑀺𑀁 𑀉𑀧𑀦𑁂𑀢𑀼𑀁. 𑀲𑀼𑀢𑁆𑀢𑀜𑁆𑀘 𑀫𑀓𑀘𑀺𑀯𑀸𑀓𑀜𑁆𑀘 𑀦𑀸𑀴𑀺𑀓𑁂𑀭𑀳𑀻𑀭𑀜𑁆𑀘 𑀘𑀫𑁆𑀫𑀜𑁆𑀘 𑀲𑀼𑀢𑁆𑀢…𑀧𑁂… 𑀘𑀫𑁆𑀫𑀸𑀦𑀺, 𑀢𑁂𑀳𑀺 𑀓𑀢𑀸 𑀲𑀼𑀢𑁆𑀢…𑀧𑁂… 𑀘𑀫𑁆𑀫𑀫𑀬𑀸. 𑀭𑀚𑁆𑀚𑀼𑀓𑀸 𑀯𑀸 𑀬𑁄𑀢𑁆𑀢𑀸𑀦𑀺 𑀯𑀸 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀯𑀝𑁆𑀝𑀸 𑀯𑀸 𑀤𑁆𑀯𑀺𑀯𑀝𑁆𑀝𑀸 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁂𑀦 𑀢𑀺𑀯𑀝𑁆𑀝𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀯𑀝𑁆𑀝𑁂𑀢𑁆𑀯𑀸 𑀤𑀺𑀦𑁆𑀦𑀁 𑀲𑀼𑀢𑁆𑀢𑀜𑁆𑀘 𑀅𑀯𑀝𑁆𑀝𑁂𑀢𑁆𑀯𑀸 𑀤𑀺𑀦𑁆𑀦𑀸 𑀫𑀓𑀘𑀺𑀯𑀸𑀓𑀦𑀸𑀴𑀺𑀓𑁂𑀭𑀳𑀻𑀭𑀸 𑀘𑀸𑀢𑀺 𑀬𑁄𑀚𑀦𑀸.

𑀬𑁄 𑀓𑁄𑀘𑀺 𑀯𑁂𑀴𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀧𑀻𑀢𑀺 𑀯𑁂𑀴𑀼𑀧𑀺 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁂𑀦 𑀯𑀮𑁆𑀮𑀺𑀁 𑀅𑀧𑁂𑀓𑁆𑀔𑀢𑀺. 𑀇𑀤𑀫𑁂𑀢𑁆𑀣𑀸𑀢𑀺 𑀇𑀤𑀁 𑀲𑀩𑁆𑀩𑀁 𑀏𑀢𑁆𑀣 𑀯𑁂𑀴𑀼𑀫𑁆𑀳𑀺, 𑀯𑁂𑀴𑀽𑀲𑀼 𑀯𑀸 𑀇𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀓𑀁 𑀯𑀸𑀢𑀺 𑀕𑀳𑀺𑀢𑀯𑁂𑀴𑀼𑀦𑀸 𑀲𑀫𑀧𑁆𑀧𑀫𑀸𑀡𑀁 𑀯𑀸. 𑀅𑀢𑀺𑀭𑁂𑀓𑀁 𑀯𑀸𑀢𑀺 𑀢𑀢𑁄 𑀅𑀢𑀺𑀭𑁂𑀓𑀁 𑀯𑀸. 𑀢𑀁𑀅𑀕𑁆𑀖𑀦𑀓𑀦𑁆𑀢𑀺 𑀢𑀲𑁆𑀲 𑀯𑁂𑀴𑀼𑀦𑁄 𑀅𑀕𑁆𑀖𑀦𑀸𑀭𑀳𑀁. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀯𑀟𑁆𑀠𑀺𑀓𑀫𑁆𑀫𑀁. 𑀢𑀢𑁆𑀣𑁂𑀯𑀸𑀢𑀺 𑀕𑀡𑁆𑀳𑀦𑀝𑁆𑀞𑀸𑀦𑁂𑀯. 𑀕𑀫𑀦𑀓𑀸𑀮𑁂𑀢𑀺 𑀕𑀡𑁆𑀳𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀕𑀫𑀦𑀓𑀸𑀮𑁂. ‘‘𑀧𑀳𑀺𑀡𑀺𑀢𑁆𑀯𑀸 𑀤𑀸𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀬𑀁 𑀯𑀸 𑀆𑀕𑀦𑁆𑀢𑁆𑀯𑀸 𑀤𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄𑀧𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀕𑀳𑁂𑀢𑀩𑁆𑀩𑁄 𑀲𑀫𑀸𑀦𑀓𑀺𑀘𑁆𑀘𑀢𑁆𑀢𑀸.

𑀫𑀼𑀜𑁆𑀚𑀧𑀩𑁆𑀩𑀚𑀲𑀤𑁆𑀤𑁂𑀦 𑀫𑀼𑀜𑁆𑀚𑀧𑀩𑁆𑀩𑀚𑀢𑀺𑀡𑀸𑀦𑀁 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀢𑀺𑀡𑀲𑀤𑁆𑀤𑁂𑀦 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀅𑀯𑀲𑁂𑀲𑀢𑀺𑀡𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀼𑀜𑁆𑀚𑀁 𑀧𑀩𑁆𑀩𑀚𑀜𑁆𑀘 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀲𑀫𑀸𑀦𑀨𑀮𑀢𑁆𑀢𑀸 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀧𑀡𑁆𑀡𑀫𑁆𑀧𑀺 𑀢𑀺𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂, 𑀇𑀢𑀻𑀢𑀺 𑀏𑀯𑀁. 𑀢𑀺𑀡𑀜𑁆𑀘 𑀕𑀭𑀼𑀪𑀡𑁆𑀟𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀚𑀸𑀢𑀓𑀁 𑀯𑀸𑀢𑀺 𑀢𑀲𑁆𑀫𑀺𑀁 𑀲𑀗𑁆𑀖𑀸𑀭𑀸𑀫𑁂 𑀚𑀸𑀢𑀓𑀁 𑀯𑀸. 𑀩𑀳𑀸𑀭𑀸𑀫𑁂𑀢𑀺 𑀲𑀗𑁆𑀖𑀸𑀭𑀸𑀫𑀢𑁄 𑀩𑀳𑀺. 𑀢𑀫𑁆𑀧𑀻𑀢𑀺 𑀢𑀺𑀡𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀯𑀮𑁆𑀮𑀺𑀯𑁂𑀴𑀽 𑀅𑀧𑁂𑀓𑁆𑀔𑀢𑀺. 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑁄𑀧𑀻𑀢𑀺 𑀤𑀻𑀖𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑀫𑀸𑀡𑁄𑀧𑀺. 𑀭𑀺𑀢𑁆𑀢𑀧𑁄𑀢𑁆𑀣𑀓𑁄𑀢𑀺 𑀅𑀮𑀺𑀔𑀺𑀢𑀢𑁆𑀢𑀸 𑀢𑀼𑀘𑁆𑀙𑁄 𑀫𑀓𑀘𑀺𑀯𑀢𑁆𑀣𑀸𑀤𑀺𑀓𑁄𑀧𑀺 𑀧𑀡𑁆𑀡𑀫𑀬𑁄𑀧𑀺 𑀧𑁄𑀢𑁆𑀣𑀓𑁄. 𑀇𑀤𑀜𑁆𑀘 𑀧𑀡𑁆𑀡𑀧𑀲𑀗𑁆𑀕𑁂𑀦 𑀯𑀼𑀢𑁆𑀢𑀁.

𑀧𑀜𑁆𑀘𑀯𑀡𑁆𑀡𑀸 𑀯𑀸𑀢𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀯𑀲𑁂𑀦 𑀧𑀜𑁆𑀘𑀯𑀡𑁆𑀡𑀦𑀸 𑀯𑀸. 𑀢𑀫𑁆𑀧𑀻𑀢𑀺 𑀫𑀢𑁆𑀢𑀺𑀓𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀯𑀮𑁆𑀮𑀺𑀯𑁂𑀴𑀼𑀢𑀺𑀡𑀸𑀦𑀺 𑀅𑀧𑁂𑀓𑁆𑀔𑀢𑀺.

𑀤𑀸𑀭𑀼𑀪𑀡𑁆𑀟𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀭𑀓𑁆𑀔𑀺𑀢𑀕𑁄𑀧𑀺𑀢𑁄 𑀬𑁄 𑀓𑁄𑀘𑀺 𑀤𑀸𑀭𑀼𑀪𑀡𑁆𑀟𑀓𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀭𑀸𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁, ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺 𑀧𑀸𑀴𑀺𑀬𑀁 𑀯𑀸. 𑀇𑀫𑁂𑀲𑀽𑀢𑀺 𑀆𑀲𑀦𑁆𑀤𑀺𑀓𑀸𑀤𑀻𑀲𑀼. 𑀏𑀢𑁆𑀣𑀸𑀢𑀺 𑀧𑀻𑀞𑁂𑀲𑀼, 𑀧𑀮𑀸𑀮𑀧𑀻𑀞𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀩𑁆𑀬𑀕𑁆𑀖𑀘𑀫𑁆𑀫𑀑𑀦𑀤𑁆𑀥𑀦𑁆𑀢𑀺 𑀩𑁆𑀬𑀕𑁆𑀖𑀘𑀫𑁆𑀫𑁂𑀦 𑀅𑀯𑀦𑀤𑁆𑀥𑀁. 𑀯𑀸𑀴𑀭𑀽𑀧𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑀸𑀴𑀭𑀽𑀧𑁂𑀳𑀺 𑀧𑀭𑀺𑀯𑀸𑀭𑀺𑀢𑀁. 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀦𑁆𑀢𑀺 𑀭𑀢𑀦𑀲𑀼𑀢𑁆𑀢𑁂𑀦 𑀲𑀫𑀦𑁆𑀢𑀢𑁄 𑀲𑀺𑀩𑁆𑀩𑀺𑀢𑀁.

𑀏𑀢𑁂𑀲𑀼𑀧𑀻𑀢𑀺 𑀯𑀗𑁆𑀓𑀨𑀮𑀓𑀸𑀤𑀻𑀲𑀼𑀧𑀺. ‘‘𑀲𑀗𑁆𑀔𑀣𑀸𑀮𑀓𑀁 𑀧𑀦 𑀪𑀸𑀚𑀦𑀻𑀬’’𑀦𑁆𑀢𑀺 𑀧𑀸𑀞𑀲𑁆𑀲𑀸𑀦𑀦𑁆𑀢𑀭𑀁 ‘‘𑀢𑀣𑀸’’𑀢𑀺 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀏𑀢𑁆𑀣 𑀦 𑀬𑀼𑀚𑁆𑀚𑀢𑀺, 𑀧𑀭𑀢𑁄 𑀧𑀦 ‘‘𑀬𑁂𑀦 𑀓𑁂𑀦𑀘𑀺 𑀓𑀢𑀁 𑀕𑀭𑀼𑀪𑀡𑁆𑀟𑀫𑁂𑀯𑀸’’𑀢𑀺 𑀧𑀸𑀞𑀲𑁆𑀲𑀸𑀦𑀦𑁆𑀢𑀭𑀁 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀳𑀺 𑀬𑀣𑀸 𑀬𑁂𑀦 𑀓𑁂𑀦𑀘𑀺 𑀓𑀢𑀁 𑀕𑀭𑀼𑀪𑀡𑁆𑀟𑀫𑁂𑀯 𑀳𑁄𑀢𑀺, 𑀢𑀣𑀸 𑀣𑀫𑁆𑀪𑀢𑀼𑀮𑀸𑀲𑁄𑀧𑀸𑀦𑀨𑀮𑀓𑀸𑀤𑀻𑀲𑀼 𑀤𑀸𑀭𑀼𑀫𑀬𑀁 𑀯𑀸 𑀧𑀸𑀲𑀸𑀡𑀫𑀬𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀕𑁂𑀳𑀲𑀫𑁆𑀪𑀸𑀭𑀭𑀽𑀧𑀁 𑀕𑀭𑀼𑀪𑀡𑁆𑀟𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀦𑁆𑀢𑀺 𑀲𑀓𑀮𑀁 𑀉𑀤𑀓𑀢𑀼𑀫𑁆𑀩𑀧𑀸𑀤𑀓𑀣𑀮𑀺𑀓𑀫𑀡𑁆𑀟𑀮𑀁. 𑀏𑀢𑁂𑀲𑀼𑀧𑀻𑀢𑀺 𑀆𑀥𑀸𑀭𑀓𑀸𑀤𑀻𑀲𑀼𑀧𑀺. 𑀢𑀣𑀸 𑀣𑀫𑁆𑀪𑀢𑀮𑀸𑀢𑀺 𑀏𑀢𑁆𑀣 𑀢𑀣𑀸𑀲𑀤𑁆𑀤𑁂𑀦 ‘𑀕𑀭𑀼𑀪𑀡𑁆𑀟𑀫𑁂𑀯𑀸’’𑀢𑀺 𑀧𑀤𑀁 𑀅𑀢𑀺𑀤𑀺𑀲𑀢𑀺. 𑀲𑀗𑁆𑀖𑁂 𑀤𑀺𑀦𑁆𑀦𑀦𑁆𑀢𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁. 𑀪𑀽𑀫𑀢𑁆𑀣𑀭𑀡𑀦𑁆𑀢𑀺 𑀪𑀽𑀫𑀺𑀬𑀁 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀢𑀫𑁆𑀧𑀻𑀢𑀺 𑀏𑀴𑀓𑀘𑀫𑁆𑀫𑀫𑁆𑀧𑀺.

𑀉𑀤𑀼𑀓𑁆𑀔𑀮𑀁 𑀕𑀭𑀼𑀪𑀡𑁆𑀟𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲𑁂𑀯 𑀦𑀬𑁄 𑀫𑀼𑀲𑀮𑀦𑁆𑀢𑀺𑀆𑀤𑀻𑀲𑀼𑀧𑀺. 𑀏𑀢𑁂𑀲𑀽𑀢𑀺 𑀫𑀜𑁆𑀘𑀧𑀸𑀤𑀸𑀤𑀻𑀲𑀼. 𑀅𑀦𑀼𑀜𑁆𑀜𑀸𑀢𑀯𑀸𑀲𑀺𑀬𑀸𑀢𑀺 𑀪𑀸𑀚𑀦𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑀯𑀸𑀲𑀺𑀬𑀸. 𑀥𑀫𑀓𑀭𑀡𑁄𑀢𑀺 𑀏𑀢𑁆𑀣 ‘‘𑀲𑀗𑁆𑀔𑀁 𑀥𑀫𑀢𑀺, 𑀲𑀗𑁆𑀔𑀥𑀫𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀲𑁆𑀲𑀁𑀬𑁄𑀕𑀧𑀸𑀞𑁄𑀬𑁂𑀯 𑀬𑀼𑀚𑁆𑀚𑀢𑀺. 𑀢𑀲𑁆𑀫𑀸 𑀥𑀫𑀢𑀺 𑀯𑀸𑀢𑁂𑀦 𑀧𑀯𑀢𑁆𑀢𑀢𑀻𑀢𑀺 𑀥𑀫𑁄, 𑀯𑀸𑀢𑀳𑁂𑀢𑀼𑀓𑁄 𑀲𑀤𑁆𑀤𑁄, 𑀥𑀫𑀁 𑀓𑀭𑁄𑀢𑀻𑀢𑀺 𑀥𑀫𑀓𑀭𑀡𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀲𑀩𑁆𑀩𑀫𑁂𑀢𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀯𑀸𑀲𑀺𑀤𑀡𑁆𑀟𑀸𑀤𑀺𑀓𑀁 𑀏𑀢𑀁 𑀲𑀩𑁆𑀩𑀁. 𑀢𑀢𑁄𑀢𑀺 𑀅𑀦𑀼𑀜𑁆𑀜𑀸𑀢𑀯𑀸𑀲𑀺𑀤𑀡𑁆𑀟𑀸𑀤𑀺𑀓𑀢𑁄, 𑀫𑀳𑀦𑁆𑀢𑀢𑀭𑀁 𑀯𑀸𑀲𑀺𑀤𑀡𑁆𑀟𑀸𑀤𑀺𑀓𑀁 𑀕𑀭𑀼𑀪𑀡𑁆𑀟𑀦𑁆𑀢𑀺 𑀬𑁄𑀚𑀦𑀸.

𑀬𑀣𑀸𑀚𑀸𑀢𑀫𑁂𑀯𑀸𑀢𑀺 𑀬𑀣𑀸𑀧𑀯𑀢𑁆𑀢𑀫𑁂𑀯. 𑀢𑁂𑀳𑀻𑀢𑀺 𑀳𑀢𑁆𑀣𑀺𑀤𑀦𑁆𑀢𑀸𑀤𑀻𑀳𑀺, ‘‘𑀓𑀢’’𑀇𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀘𑁆𑀙𑀺𑀢𑀦𑀺𑀝𑁆𑀞𑀺𑀢𑁄𑀧𑀻𑀢𑀺 𑀢𑀘𑁆𑀙𑀺𑀢𑀓𑀫𑁆𑀫𑁂𑀦 𑀦𑀺𑀝𑁆𑀞𑀺𑀢𑁄𑀧𑀺.

𑀫𑀢𑁆𑀢𑀺𑀓𑀸𑀪𑀡𑁆𑀟𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸, 𑀉𑀧𑀪𑁄𑀕𑁄 𑀘 𑀧𑀭𑀺𑀪𑁄𑀕𑁄 𑀘 𑀉𑀧𑀪𑁄𑀕𑀧𑀭𑀺𑀪𑁄𑀕𑀁, 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄. 𑀇𑀤𑀁 𑀧𑀤𑀁 ‘‘𑀖𑀝𑀧𑀺𑀥𑀸𑀦𑀸𑀤𑀺𑀓𑀼𑀮𑀸𑀮𑀪𑀸𑀚𑀦’’𑀦𑁆𑀢𑀺 𑀧𑀤𑁂𑀦𑁂𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀣𑀼𑀧𑀺𑀓𑀸𑀢𑀻𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀇𑀫𑀲𑀤𑁆𑀤𑀢𑁆𑀣𑁄. 𑀇𑀤𑀁 𑀲𑀩𑁆𑀩𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀭𑀼𑀪𑀡𑁆𑀟𑀦𑁆𑀢𑀺 𑀬𑁄𑀚𑀦𑀸. ‘‘𑀅𑀦𑀢𑀺𑀭𑀺𑀢𑁆𑀢𑀧𑀫𑀸𑀡𑁄’’𑀢𑀺 𑀯𑀺𑀲𑁂𑀲𑀦𑀧𑀤𑀁 ‘‘𑀖𑀝𑀓𑁄’’𑀢𑀺 𑀯𑀺𑀲𑁂𑀲𑁆𑀬𑀧𑀤𑁂𑀦𑁂𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀫𑀢𑁆𑀢𑀺𑀓𑀸𑀪𑀡𑁆𑀟𑁂, 𑀆𑀥𑀸𑀭𑁂 𑀯𑀸 𑀦𑀺𑀤𑁆𑀥𑀸𑀭𑀡𑁂 𑀯𑀸 𑀢𑁆𑀣 𑀧𑀘𑁆𑀘𑀬𑁄. 𑀫𑀢𑁆𑀢𑀺𑀓𑀸𑀪𑀡𑁆𑀟𑁂 𑀓𑀼𑀡𑁆𑀟𑀺𑀓𑀸 𑀪𑀸𑀚𑀦𑀻𑀬𑀓𑁄𑀝𑁆𑀞𑀸𑀲𑀁 𑀪𑀚𑀢𑀺, 𑀏𑀯𑀁 𑀮𑁄𑀳𑀪𑀡𑁆𑀟𑁂𑀧𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀕𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑁂.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸

𑁩𑁨𑁩. 𑀪𑀡𑁆𑀟𑀺𑀓𑀸𑀝𑁆𑀞𑀧𑀦𑀫𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀪𑀡𑁆𑀟𑀺𑀓𑀸𑀝𑁆𑀞𑀧𑀦𑀁 𑀦𑀸𑀫 𑀪𑀡𑁆𑀟𑀺𑀓𑀬𑁄𑀚𑀦𑀦𑁆𑀢𑀺 𑀆𑀳 ‘‘𑀓𑀧𑁄𑀢𑀪𑀡𑁆𑀟𑀺𑀓𑀬𑁄𑀚𑀦𑀫𑀢𑁆𑀢𑁂𑀦𑀸’’𑀢𑀺. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀘𑀺𑀢𑀓𑀥𑀽𑀫𑁄𑀢𑀺 𑀘𑀺𑀢𑀓𑁂 𑀉𑀝𑁆𑀞𑀺𑀢𑁄 𑀥𑀽𑀫𑁄. 𑀏𑀢𑀲𑁆𑀲𑁂𑀯𑀸𑀢𑀺 𑀪𑀺𑀓𑁆𑀔𑀼𑀲𑁆𑀲 𑀏𑀯 𑀯𑀺𑀳𑀸𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀽𑀫𑀓𑀸𑀮𑁂𑀢𑀺 𑀥𑀽𑀫𑀲𑁆𑀲 𑀉𑀝𑁆𑀞𑀺𑀢𑀓𑀸𑀮𑁂. ‘‘𑀅𑀧𑀮𑁄𑀓𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀥𑀽𑀫𑀓𑀸𑀮𑁂 𑀅𑀧𑀮𑁄𑀓𑀺𑀢𑀁 𑀥𑀽𑀫𑀓𑀸𑀮𑀺𑀓𑀁. 𑀥𑀽𑀫𑀓𑀸𑀮𑀺𑀓𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑀬𑁄𑀚𑀦𑀁 𑀓𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀧𑀭𑀺𑀬𑁄𑀲𑀺𑀢𑀯𑀺𑀳𑀸𑀭’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀢𑀧𑀭𑀺𑀬𑁄𑀲𑀺𑀢𑀯𑀺𑀳𑀸𑀭𑀦𑁆𑀢𑀺 𑀓𑀢𑀧𑀭𑀺𑀬𑁄𑀲𑀺𑀢𑁄 𑀯𑀺𑀳𑀸𑀭𑁄 𑀇𑀫𑀲𑁆𑀲 𑀦𑀯𑀓𑀫𑁆𑀫𑀲𑁆𑀲𑀸𑀢𑀺 𑀓𑀢𑀧𑀭𑀺𑀬𑁄𑀲𑀺𑀢𑀯𑀺𑀳𑀸𑀭𑀁. 𑀇𑀤𑀁 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀯 𑀕𑁄𑀧𑀸𑀦𑀲𑀺𑀬𑁄 𑀦 𑀆𑀭𑁄𑀳𑀦𑁆𑀢𑀺, 𑀢𑀸𑀯 𑀯𑀺𑀧𑁆𑀧𑀓𑀢𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀕𑁄𑀧𑀸𑀦𑀲𑀺𑀆𑀭𑁄𑀳𑀦𑀢𑁄. 𑀓𑀜𑁆𑀘𑀺𑀤𑁂𑀯 𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀭𑁂𑀲𑁆𑀲𑀢𑀻𑀢𑀺 𑀯𑀺𑀳𑀸𑀭𑀲𑀸𑀫𑀺𑀓𑁄𑀬𑁂𑀯 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀭𑁂𑀲𑁆𑀲𑀢𑀺. 𑀧𑀜𑁆𑀘𑀳𑀢𑁆𑀣𑁂 𑀯𑀺𑀳𑀸𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀅𑀟𑁆𑀠𑀬𑁄𑀕𑁂. 𑀲𑁄𑀢𑀺 𑀅𑀟𑁆𑀠𑀬𑁄𑀕𑁄. 𑀫𑀳𑀮𑁆𑀮𑀓𑀁 𑀦𑀺𑀬𑀸𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀲𑀳𑀢𑁆𑀣𑁂 𑀏𑀓𑀸𑀤𑀲𑀳𑀢𑁆𑀣𑁂’’𑀢𑀺. 𑀤𑀲𑀯𑀲𑁆𑀲𑀺𑀓𑀁 𑀯𑀸 𑀏𑀓𑀸𑀤𑀲𑀯𑀲𑁆𑀲𑀺𑀓𑀁 𑀯𑀸 𑀦𑀯𑀓𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀢𑁄. 𑀮𑁄𑀳𑀧𑀸𑀲𑀸𑀤𑀲𑀤𑀺𑀲𑁂𑀧𑀺 𑀧𑀸𑀲𑀸𑀤𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀦𑀯𑀓𑀫𑁆𑀫𑀢𑁄.

𑀦𑀯𑀓𑀫𑁆𑀫𑀺𑀓𑁄𑀢𑀺 𑀦𑀯𑀓𑀫𑁆𑀫𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑁄. 𑀉𑀢𑀼𑀓𑀸𑀮𑁂𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑀓𑀸𑀮𑁂. 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀅𑀜𑁆𑀜𑁂𑀲𑀁 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁂𑀥𑁂𑀢𑀼𑀁. 𑀆𑀯𑀸𑀲𑀲𑀸𑀫𑀺𑀓𑀲𑁆𑀲𑀸𑀢𑀺 𑀆𑀯𑀸𑀲𑀤𑀸𑀬𑀓𑀲𑁆𑀲. 𑀢𑀲𑁆𑀲𑀸𑀢𑀺 𑀆𑀯𑀸𑀲𑀲𑀸𑀫𑀺𑀓𑀲𑁆𑀲. 𑀯𑀁𑀲𑁂𑀢𑀺 𑀅𑀦𑁆𑀯𑀬𑁂. 𑀢𑁂𑀢𑀺 𑀢𑀯. 𑀲𑁄𑀢𑀺 𑀆𑀯𑀸𑀲𑀲𑀸𑀫𑀺𑀆𑀤𑀺𑀓𑁄. 𑀪𑀺𑀓𑁆𑀔𑀽𑀳𑀺 𑀚𑀕𑁆𑀕𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀧𑀻𑀢𑀺 𑀜𑀸𑀢𑀺𑀉𑀧𑀝𑁆𑀞𑀸𑀓𑀸𑀧𑀺. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀲𑀗𑁆𑀖𑀺𑀓𑀧𑀘𑁆𑀘𑀬𑁂𑀧𑀺. 𑀩𑀳𑀽 𑀆𑀯𑀸𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀁 𑀆𑀯𑀸𑀲𑀦𑁆𑀢𑀺 𑀬𑁄𑀚𑀦𑀸.

𑀏𑀓𑀁 𑀯𑀸 𑀆𑀯𑀸𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀯𑀺𑀲𑀚𑁆𑀚𑀺𑀢𑀸𑀯𑀸𑀲𑁂𑀳𑀺, 𑀉𑀧𑁆𑀧𑀦𑁆𑀦𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀁, 𑀓𑀺𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀢𑀺 𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦 𑀕𑀳𑁂𑀢𑁆𑀯𑀸. 𑀢𑀺𑀪𑀸𑀕𑀦𑁆𑀢𑀺 𑀢𑀢𑀺𑀬𑀪𑀸𑀕𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀏𑀢𑁆𑀣𑀸𑀢𑀺 𑀦𑀝𑁆𑀞𑀯𑀺𑀳𑀸𑀭𑁂. 𑀧𑀼𑀕𑁆𑀕𑀮𑀺𑀓𑀫𑁂𑀯𑀸𑀢𑀺 𑀧𑀼𑀕𑁆𑀕𑀮𑀺𑀓𑀁 𑀏𑀯, 𑀧𑀼𑀕𑁆𑀕𑀮𑀺𑀓𑀁 𑀇𑀯 𑀯𑀸. 𑀚𑀕𑁆𑀕𑀸𑀢𑀺 𑀚𑀕𑁆𑀕𑀸𑀳𑀺. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀏𑀯𑀁 𑀚𑀕𑁆𑀕𑀺𑀢𑁄 𑀧𑀦𑀸𑀢𑀺 𑀏𑀯𑀁 𑀚𑀕𑁆𑀕𑀺𑀢𑁄 𑀯𑀺𑀳𑀸𑀭𑁄 𑀧𑀦. 𑀢𑀲𑁆𑀫𑀺𑀦𑁆𑀢𑀺 𑀚𑀕𑁆𑀕𑀦𑁆𑀢𑁂. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀝𑁆𑀞𑀧𑀦𑀁 𑀯𑀸 𑀦𑀯𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀅𑀤𑀢𑁆𑀯𑀸 𑀅𑀢𑁆𑀢𑀦𑁄𑀬𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑀸𑀢𑀼𑀁 𑀮𑀩𑁆𑀪𑀢𑀻𑀢𑀺 𑀲𑀩𑁆𑀩𑀯𑀺𑀳𑀸𑀭𑀁 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑀤𑁂𑀲𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑀸𑀢𑀼𑀁 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑁄. 𑀚𑀕𑁆𑀕𑀸𑀧𑁂𑀢𑀩𑁆𑀩𑁄 𑀇𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 ‘‘𑀯𑀼𑀢𑁆𑀢’’𑀦𑁆𑀢𑀺 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀧𑀸𑀞𑁄𑀬𑁂𑀯 ‘‘𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢’’𑀦𑁆𑀢𑀺 𑀧𑀤𑀲𑁆𑀲 𑀆𑀓𑀸𑀭𑀢𑁆𑀢𑀸.

𑀅𑀜𑁆𑀜𑀁 𑀇𑀤𑀫𑁆𑀧𑀺 𑀘 𑀯𑀓𑁆𑀔𑀫𑀸𑀦𑀯𑀘𑀦𑀁 𑀢𑀢𑁆𑀣𑁂𑀯 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀓𑀺𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁆𑀯𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀤𑁆𑀯𑁂 𑀪𑀺𑀓𑁆𑀔𑀽 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀲𑁄𑀬𑁂𑀯 𑀲𑀸𑀫𑀻𑀢𑀺 𑀬𑁂𑀦 𑀲𑀸 𑀪𑀽𑀫𑀺 𑀧𑀞𑀫𑀁 𑀕𑀳𑀺𑀢𑀸, 𑀲𑁄𑀬𑁂𑀯 𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀢𑀺𑀭𑀽𑀧𑁂 𑀞𑀸𑀦𑁂𑀢𑀺 𑀧𑀢𑀺𑀭𑀽𑀧𑁂 𑀲𑁂𑀦𑀸𑀲𑀦𑀝𑁆𑀞𑀸𑀦𑁂. 𑀢𑀦𑁆𑀢𑀺 𑀧𑀼𑀕𑁆𑀕𑀮𑀺𑀓𑀓𑀭𑀡𑀁. 𑀬𑀁 𑀧𑀦 𑀯𑀬𑀓𑀫𑁆𑀫𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀯𑀬𑀓𑀫𑁆𑀫𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀫𑀽𑀮𑀁. 𑀯𑀺𑀳𑀸𑀭𑀲𑁆𑀲 𑀫𑀽𑀮𑀁 𑀤𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀲𑀗𑁆𑀖𑀺𑀓𑀁 𑀓𑀭𑁄𑀦𑁆𑀢𑀲𑁆𑀲. 𑀢𑀢𑁆𑀣𑁂𑀯𑀸𑀢𑀺 𑀓𑀢𑀯𑀺𑀳𑀸𑀭𑁂 𑀏𑀯. 𑀓𑀢𑀸𑀯𑀸𑀲𑁂𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀓𑀢𑀸𑀯𑀸𑀲𑀲𑀫𑀻𑀧𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑀸𑀬𑀽𑀧𑀕𑀨𑀮𑀽𑀧𑀕𑀸𑀢𑀺 𑀙𑀸𑀬𑀁 𑀉𑀧𑀕𑀘𑁆𑀙𑀦𑁆𑀢𑀸 𑀘 𑀨𑀮𑀁 𑀉𑀧𑀕𑀘𑁆𑀙𑀦𑁆𑀢𑀸 𑀘, 𑀙𑀸𑀬𑀸𑀨𑀮𑀸𑀦𑀺 𑀉𑀧𑀳𑀭𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑁆𑀯𑀸. 𑀲𑀸𑀫𑀺𑀓𑀸𑀢𑀺 𑀭𑀼𑀓𑁆𑀔𑀲𑀸𑀫𑀺𑀓𑀸. 𑀳𑀸𑀭𑁂𑀢𑀩𑁆𑀩𑀸𑀢𑀺 𑀅𑀧𑀦𑁂𑀢𑀩𑁆𑀩𑀸.

‘‘𑀲𑀗𑁆𑀖𑀺𑀓𑀯𑀮𑁆𑀮𑀺𑀫𑀢𑁆𑀢𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀺𑀓𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀺𑀓𑀸𑀬 𑀪𑀽𑀫𑀺𑀬𑀸 𑀲𑀘𑁂 𑀯𑀺𑀳𑀸𑀭𑀁 𑀓𑀭𑁄𑀢𑀺, 𑀲𑀗𑁆𑀖𑀺𑀓𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀤𑁆𑀯𑀺𑀪𑀽𑀫𑀓𑀢𑀺𑀪𑀽𑀫𑀓𑀸𑀤𑀻𑀲𑀼 𑀧𑀸𑀲𑀸𑀤𑁂𑀲𑀼 𑀉𑀧𑀟𑁆𑀠𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀲𑀸𑀤𑁄 𑀘𑁂𑀯 𑀳𑁄𑀢𑀻’’𑀢𑀺𑀆𑀤𑀺. 𑀉𑀧𑀭𑀺 𑀧𑀸𑀲𑀸𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀯𑀺𑀳𑀸𑀭𑀓𑀸𑀭𑀓𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀳𑁂𑀝𑁆𑀞𑀸𑀧𑀸𑀲𑀸𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀳𑀸𑀭𑁂𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑁂, 𑀯𑀺𑀳𑀸𑀭𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀅𑀓𑀢𑀝𑁆𑀞𑀸𑀦𑁂𑀢𑀺 𑀘𑀬𑀧𑀫𑀼𑀔𑀸𑀦𑀁 𑀅𑀓𑀢𑀧𑀼𑀩𑁆𑀩𑀝𑁆𑀞𑀸𑀦𑁂. 𑀘𑀬𑀁 𑀯𑀸 𑀧𑀫𑀼𑀔𑀁 𑀯𑀸𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲 𑀘𑀬𑀁 𑀯𑀸 𑀧𑀫𑀼𑀔𑀁 𑀯𑀸. 𑀩𑀳𑀺𑀓𑀼𑀝𑁆𑀝𑁂𑀢𑀺 𑀓𑀼𑀝𑁆𑀝𑀲𑁆𑀲, 𑀓𑀼𑀝𑁆𑀝𑀢𑁄 𑀯𑀸 𑀩𑀳𑀺. 𑀢𑀲𑁆𑀲𑀸𑀢𑀺 𑀘𑀬𑀧𑀫𑀼𑀔𑀓𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀫𑀁 𑀧𑀩𑁆𑀩𑀢𑀓𑀦𑁆𑀤𑀭𑀸𑀤𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀤𑁂𑀢𑀺 𑀲𑀼𑀓𑀭𑀲𑁆𑀲 𑀅𑀓𑀸𑀭𑀡𑁂. 𑀓𑀢𑀁 𑀳𑁄𑀢𑀻𑀢𑀺 𑀘𑀬𑀁 𑀯𑀸 𑀧𑀫𑀼𑀔𑀁 𑀯𑀸 𑀓𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀘𑀬𑀧𑀫𑀼𑀔𑁂𑀲𑀼, 𑀲𑀗𑁆𑀖𑁄 𑀅𑀦𑀺𑀲𑁆𑀲𑀭𑁄 𑀇𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀯𑀭𑀲𑁂𑀬𑁆𑀬𑀁 𑀕𑀳𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀦 𑀆𑀕𑀦𑁆𑀢𑁆𑀯𑀸𑀢𑀺 𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀦𑀯𑀓𑀫𑁆𑀫𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲. 𑀏𑀢𑀦𑁆𑀢𑀺 𑀲𑁂𑀦𑀸𑀲𑀦𑀁.

𑀅𑀜𑁆𑀜𑀢𑁆𑀭𑀧𑀭𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸

𑁩𑁨𑁪. 𑀦𑀸𑀢𑀺𑀳𑀭𑀦𑁆𑀢𑀻𑀢𑀺 𑀏𑀢𑁆𑀣 𑀅𑀢𑀺𑀲𑀤𑁆𑀤𑁄 𑀳𑀭𑀡𑀢𑁆𑀣𑁄, 𑀳𑀭𑀲𑀤𑁆𑀤𑁄 𑀧𑀭𑀺𑀪𑀼𑀜𑁆𑀚𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀳𑀭𑀺𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺. 𑀬𑀁 𑀫𑀜𑁆𑀘𑀧𑀻𑀞𑀸𑀤𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀉𑀦𑁆𑀤𑁆𑀭𑀺𑀬𑀫𑀳𑀸𑀯𑀺𑀳𑀸𑀭𑁂. 𑀢𑀦𑁆𑀢𑀺 𑀫𑀜𑁆𑀘𑀧𑀻𑀞𑀸𑀤𑀺𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀦𑀼𑀚𑀸𑀦𑀸𑀢𑀺, 𑀢𑀲𑁆𑀫𑀸. 𑀢𑀦𑁆𑀢𑀺 𑀫𑀜𑁆𑀘𑀧𑀻𑀞𑀸𑀤𑀺𑀁. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀁 𑀯𑀺𑀳𑀸𑀭𑀁. 𑀅𑀭𑁄𑀕𑀦𑁆𑀢𑀺 𑀅𑀦𑀝𑁆𑀞𑀸𑀚𑀺𑀡𑁆𑀡𑀢𑁆𑀢𑀸 𑀅𑀭𑁄𑀕𑀁. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀉𑀦𑁆𑀤𑁆𑀭𑀺𑀬𑀯𑀺𑀳𑀸𑀭𑁂. 𑀢𑀲𑁆𑀫𑀺𑀦𑁆𑀢𑀺 𑀉𑀦𑁆𑀤𑁆𑀭𑀺𑀬𑀯𑀺𑀳𑀸𑀭𑁂. 𑀢𑀢𑁄𑀢𑀺 𑀉𑀦𑁆𑀤𑁆𑀭𑀺𑀬𑀯𑀺𑀳𑀸𑀭𑀢𑁄. 𑀲𑀼𑀬𑁄𑀚𑀺𑀢𑀸𑀦𑀻𑀢𑀺 𑀲𑀼𑀝𑁆𑀞𑀼 𑀬𑁄𑀚𑀺𑀢𑀸𑀦𑀺. 𑀫𑀽𑀮𑀤𑀸𑀦𑀁 𑀯𑀸 𑀧𑀝𑀺𑀧𑀸𑀓𑀢𑀺𑀓𑀁 𑀯𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄𑀢𑀺 𑀪𑀺𑀓𑁆𑀔𑀽𑀳𑀺 𑀅𑀦𑀧𑁂𑀓𑁆𑀔𑁂𑀦 𑀙𑀟𑁆𑀟𑀺𑀢𑀲𑀗𑁆𑀖𑀺𑀓𑀯𑀺𑀳𑀸𑀭𑀢𑁄 𑀘 𑀧𑀼𑀕𑁆𑀕𑀮𑁂𑀦 𑀲𑀸𑀧𑁂𑀓𑁆𑀔𑁂𑀦 𑀙𑀟𑁆𑀟𑀺𑀢𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀢𑁄 𑀘. 𑀆𑀯𑀸𑀲𑀺𑀓𑀓𑀸𑀮𑁂𑀢𑀺 𑀆𑀯𑀸𑀲𑀺𑀓𑀸𑀦𑀁 𑀞𑀺𑀢𑀓𑀸𑀮𑁂. 𑀢𑀢𑁄𑀢𑀺 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄.

𑀨𑀸𑀢𑀺𑀓𑀫𑁆𑀫𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 𑀨𑀸𑀢𑀺𑀲𑀤𑁆𑀤𑁄 𑀯𑀟𑁆𑀠𑀦𑀢𑁆𑀣𑁄𑀢𑀺 𑀆𑀳 ‘‘𑀯𑀟𑁆𑀠𑀺𑀓𑀫𑁆𑀫𑀢𑁆𑀣𑀸𑀬𑀸’’𑀢𑀺. 𑀏𑀢𑁆𑀣𑀸𑀢𑀺 ‘‘𑀨𑀸𑀢𑀺𑀓𑀫𑁆𑀫𑀢𑁆𑀣𑀸𑀬𑀸’’𑀢𑀺 𑀧𑀸𑀞𑁂.

𑀘𑀓𑁆𑀓𑀮𑀺𑀓𑀦𑁆𑀢𑀺 𑀘𑀓𑁆𑀓𑀸𑀓𑀸𑀭𑁂𑀦 𑀮𑀸𑀢𑀺 𑀧𑀯𑀢𑁆𑀢𑀢𑀺, 𑀘𑀓𑁆𑀓𑀸𑀓𑀸𑀭𑀁 𑀯𑀸 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀘𑀓𑁆𑀓𑀮𑀁, 𑀢𑀤𑁂𑀯 𑀘𑀓𑁆𑀓𑀮𑀺𑀓𑀁, 𑀧𑀸𑀤𑀧𑀼𑀜𑁆𑀚𑀦𑀁, ‘‘𑀓𑀫𑁆𑀩𑀮𑀸𑀤𑀻𑀳𑀺 𑀯𑁂𑀞𑁂𑀢𑁆𑀯𑀸 𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀓𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀬𑁂𑀳𑀻𑀢𑀺 𑀧𑀸𑀤𑁂𑀳𑀺. 𑀉𑀤𑀓𑀦𑁆𑀢𑀺 𑀲𑁂𑀦𑀸𑀲𑀦𑀲𑁆𑀲 𑀢𑀺𑀦𑁆𑀢𑀓𑀁 𑀉𑀤𑀓𑀁. 𑀉𑀤𑀓𑀁 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀬𑁄𑀚𑀦𑀸. 𑀲𑀉𑀧𑀸𑀳𑀦𑁂𑀦 𑀅𑀓𑁆𑀓𑀫𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀲𑀼𑀥𑀸𑀪𑀽𑀫𑀺𑀬𑀦𑁆𑀢𑀺 𑀲𑀼𑀥𑀸𑀬 𑀮𑀺𑀢𑁆𑀢𑀸𑀬𑀁 𑀪𑀽𑀫𑀺𑀬𑀁. 𑀧𑀭𑀺𑀪𑀡𑁆𑀟𑀪𑀽𑀫𑀺𑀬𑀦𑁆𑀢𑀺 𑀕𑁄𑀫𑀬𑀓𑀲𑀸𑀯𑀧𑀭𑀺𑀪𑀡𑁆𑀟𑀪𑀽𑀫𑀺𑀬𑀁. 𑀧𑀸𑀤𑀸𑀢𑀺 𑀫𑀜𑁆𑀘𑀧𑀸𑀤𑀸. 𑀢𑀲𑁆𑀫𑀺𑀦𑁆𑀢𑀺 𑀘𑁄𑀴𑀓𑁂. 𑀞𑀧𑁂𑀦𑁆𑀢𑀲𑁆𑀲𑀸𑀢𑀺 𑀫𑀜𑁆𑀘𑀧𑀸𑀤𑁂 𑀞𑀧𑁂𑀦𑁆𑀢𑀲𑁆𑀲. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼. 𑀦𑁂𑀯𑀸𑀲𑀺𑀓𑀸𑀢𑀺 𑀦𑀺𑀩𑀤𑁆𑀥𑀁 𑀯𑀲𑀦𑁆𑀢𑀻𑀢𑀺 𑀦𑁂𑀯𑀸𑀲𑀺𑀓𑀸. 𑀞𑀧𑁂𑀦𑁆𑀢𑀻𑀢𑀺 𑀫𑀜𑁆𑀘𑀧𑀸𑀤𑁂 𑀞𑀧𑁂𑀦𑁆𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀦𑁂𑀯𑀸𑀲𑀺𑀓𑀸 𑀯𑀴𑀜𑁆𑀚𑀦𑁆𑀢𑀺, 𑀢𑀣𑁂𑀯 𑀆𑀕𑀦𑁆𑀢𑀼𑀓𑁂𑀳𑀺 𑀯𑀴𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄.

𑀲𑁂𑀢𑀪𑀺𑀢𑁆𑀢𑀺 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁂𑀦 𑀦𑀻𑀮𑀪𑀺𑀢𑁆𑀢𑀺𑀆𑀤𑀬𑁄 𑀲𑀫𑁆𑀧𑀺𑀡𑁆𑀟𑁂𑀢𑀺. ‘‘𑀤𑁆𑀯𑀸𑀭𑀫𑁆𑀧𑀺 𑀯𑀸𑀢𑀧𑀸𑀦𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀬𑁄 𑀅𑀧𑀭𑀺𑀓𑀫𑁆𑀫𑀓𑀢𑀸𑀧𑀺 𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑀸. 𑀓𑁂𑀦𑀘𑀺 𑀯𑀸 𑀯𑀢𑁆𑀣𑀸𑀤𑀺𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀥𑁄𑀢𑀧𑀸𑀤𑀓𑀸’’𑀢𑀺 𑀧𑀤𑀲𑁆𑀲 ‘‘𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀧𑀤𑁂 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺, ‘‘𑀪𑀺𑀓𑁆𑀔𑀽’’𑀢𑀺 𑀧𑀤𑁂 𑀓𑀸𑀭𑀓𑀯𑀺𑀲𑁂𑀲𑀦𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀺. 𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀧𑀚𑁆𑀚𑀺𑀢𑀼𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀻𑀢𑀺 𑀆𑀳 ‘‘𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑁂’’𑀢𑀺. ‘‘𑀅𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 ‘‘𑀥𑁄𑀢𑀧𑀸𑀤𑀓𑁂’’𑀢𑀺 𑀧𑀸𑀞𑀲𑁆𑀲 𑀥𑁄𑀢𑁄 𑀧𑀸𑀤𑁄 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀞𑀸𑀦𑁂𑀢𑀺 𑀥𑁄𑀢𑀧𑀸𑀤𑀓𑀁, 𑀢𑀲𑁆𑀫𑀺𑀁 𑀥𑁄𑀢𑀧𑀸𑀤𑀓𑁂𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑀦𑁆𑀢𑀺 ‘‘𑀥𑁄𑀢𑀧𑀸𑀤𑀓𑁂’’𑀢𑀺 𑀦𑀸𑀫𑀁. ‘‘𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀓𑁂𑀦 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸𑀢𑀺 𑀆𑀳 ‘‘𑀧𑀘𑁆𑀘𑀢𑁆𑀣𑀭𑀡𑁂𑀦𑀸’’𑀢𑀺. ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀖𑀺𑀓𑁂𑀦 𑀧𑀘𑁆𑀘𑀢𑁆𑀣𑀭𑀡𑁂𑀦 𑀧𑀘𑁆𑀘𑀢𑁆𑀣𑀭𑀡𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦𑀺𑀤𑁆𑀤𑀸𑀬𑀢𑁄𑀧𑀻𑀢𑀺 𑀦𑀺𑀤𑁆𑀤𑀸𑀬𑀓𑀸𑀭𑀡𑀸𑀧𑀺, 𑀲𑀁𑀓𑀼𑀝𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀦𑀺𑀤𑁆𑀤𑀸𑀬𑀢𑁄𑀧𑀻𑀢𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀺. ‘‘𑀲𑀭𑀻𑀭𑀸𑀯𑀬𑀯𑁄’’𑀢𑀺 𑀧𑀤𑁂 𑀲𑀸𑀫𑁆𑀬𑀢𑁆𑀣𑀙𑀝𑁆𑀞𑀻, ‘‘𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀮𑁄𑀫𑁂𑀲𑀼 𑀨𑀼𑀲𑀦𑁆𑀢𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀭𑀺𑀪𑁄𑀕𑀲𑀻𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀪𑁄𑀕𑀁 𑀅𑀓𑀢𑁆𑀯𑀸 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀲𑀭𑀻𑀭𑀸𑀯𑀬𑀯𑁂𑀦 𑀨𑀼𑀲𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀳𑀢𑁆𑀣𑀢𑀮𑁂𑀦 𑀨𑀼𑀲𑀺𑀢𑀼𑀁 𑀧𑀸𑀤𑀢𑀮𑁂𑀦 𑀨𑀼𑀲𑀺𑀢𑀼𑀁 𑀯𑀸 𑀅𑀓𑁆𑀓𑀫𑀺𑀢𑀼𑀁 𑀯𑀸𑀢𑀺 𑀬𑀣𑀸𑀮𑀸𑀪𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. ‘‘𑀧𑀭𑀺𑀪𑁄𑀕𑀲𑀻𑀲𑁂𑀦𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀜𑁆𑀘𑀧𑀻𑀞𑀁 𑀦𑀻𑀳𑀭𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸

𑁩𑁨𑁫. ‘‘𑀲𑀗𑁆𑀖𑀲𑁆𑀲 𑀪𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀖𑀪𑀢𑁆𑀢𑀦𑁆𑀢𑀺 𑀧𑀤𑀲𑁆𑀲 𑀙𑀝𑁆𑀞𑀻𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀆𑀪𑀢𑀁 𑀪𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀉𑀤𑁆𑀤𑁂𑀲𑀪𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀉𑀤𑁆𑀤𑁂𑀲𑁂𑀦 𑀮𑀤𑁆𑀥𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀉𑀤𑁆𑀤𑁂𑀲𑁂𑀦 𑀮𑀤𑁆𑀥𑀪𑀺𑀓𑁆𑀔𑀽𑀦𑀁 𑀓𑀸𑀢𑀩𑁆𑀩𑀁 𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀮𑀤𑁆𑀥𑀪𑀺𑀓𑁆𑀔𑀽, 𑀢𑀣𑁂𑀯. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀏𑀓𑀁 𑀯𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀢𑁂𑀲𑀦𑁆𑀢𑀺 𑀮𑀤𑁆𑀥𑀪𑀺𑀓𑁆𑀔𑀽𑀦𑀁. 𑀇𑀫𑀺𑀦𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀮𑀤𑁆𑀥𑀪𑀺𑀓𑁆𑀔𑀽𑀦𑀁 𑀓𑀸𑀢𑀩𑁆𑀩𑀁 𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀪𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀮𑀸𑀓𑀸𑀬𑁄 𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀮𑀸𑀓𑀸𑀬𑁄 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀢𑀩𑁆𑀩𑀁 𑀪𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀓𑁆𑀔𑀺𑀓𑀦𑁆𑀢𑀺 𑀉𑀧𑁄𑀲𑀣𑀺𑀓𑀦𑁆𑀢𑀺 𑀧𑀸𑀝𑀺𑀧𑀤𑀺𑀓𑀦𑁆𑀢𑀺 𑀏𑀯𑀁 𑀦𑀺𑀬𑀸𑀫𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀫𑀻𑀆𑀤𑀻𑀲𑀼 𑀧𑀓𑁆𑀔𑁂𑀲𑀼 𑀓𑀸𑀢𑀩𑁆𑀩𑀁 𑀧𑀓𑁆𑀔𑀺𑀓𑀁. 𑀉𑀧𑁄𑀲𑀣𑁂 𑀓𑀸𑀢𑀩𑁆𑀩𑀁 𑀉𑀧𑁄𑀲𑀣𑀺𑀓𑀁. 𑀧𑀸𑀝𑀺𑀧𑀤𑁂 𑀓𑀸𑀢𑀩𑁆𑀩𑀁 𑀧𑀸𑀝𑀺𑀧𑀤𑀺𑀓𑀁, 𑀢𑀫𑁂𑀯 𑀪𑀢𑁆𑀢𑀁 𑀧𑀸𑀝𑀺𑀧𑀤𑀺𑀓𑀪𑀢𑁆𑀢𑀁. 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀦𑁆𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄, 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀦𑁆𑀢𑀺𑀆𑀤𑀺𑀁 𑀇𑀫𑀁 𑀯𑁄𑀳𑀸𑀭𑀁 𑀧𑀢𑁆𑀢𑀸𑀦𑀻𑀢𑀺 𑀳𑀺 𑀅𑀢𑁆𑀣𑁄. 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺𑀬𑁂𑀯 𑀅𑀦𑀼𑀚𑀸𑀦𑀦𑀫𑀓𑀢𑁆𑀯𑀸 𑀓𑀲𑁆𑀫𑀸 𑀲𑀗𑁆𑀖𑀪𑀢𑁆𑀢𑀫𑁆𑀧𑀺 𑀅𑀦𑀼𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀫𑀦𑀼𑀲𑁆𑀲𑀸. 𑀢𑀫𑁆𑀧𑀻𑀢𑀺 𑀲𑀗𑁆𑀖𑀪𑀢𑁆𑀢𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺 𑀅𑀧𑁂𑀓𑁆𑀔𑀢𑀺.

𑀲𑀗𑁆𑀖𑀪𑀢𑁆𑀢𑀸𑀤𑀻𑀦𑀁 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢’’𑀦𑁆𑀢𑀺𑀆𑀤𑀺𑀧𑀸𑀞𑁂, 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸, 𑀲𑀗𑁆𑀖𑀪𑀢𑁆𑀢𑀸𑀤𑀻𑀲𑀼 𑀯𑀸 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, 𑀪𑀼𑀜𑁆𑀚𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀅𑀚𑁆𑀚 𑀤𑀲 𑀤𑁆𑀯𑀸𑀤𑀲 𑀤𑀺𑀯𑀲𑀸 𑀅𑀳𑁂𑀲𑀼𑀦𑁆𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀢𑁄𑀢𑀺 𑀅𑀜𑁆𑀜𑀲𑁆𑀫𑀸 𑀞𑀸𑀦𑀸. 𑀢𑀢𑁆𑀣𑀸𑀢𑀺 𑀲𑀗𑁆𑀖𑀪𑀢𑁆𑀢𑁂. 𑀯𑀢𑁆𑀢𑀩𑁆𑀩𑀸𑀢𑀺 𑀫𑀦𑀼𑀲𑁆𑀲𑀸 𑀯𑀢𑁆𑀢𑀩𑁆𑀩𑀸. 𑀢𑀦𑁆𑀢𑀺 𑀲𑀗𑁆𑀖𑀪𑀢𑁆𑀢𑀁, 𑀥𑀸𑀢𑀼𑀓𑀫𑁆𑀫𑀁, ‘‘𑀅𑀫𑁆𑀳𑀸𑀓’’𑀦𑁆𑀢𑀺 𑀓𑀸𑀭𑀺𑀢𑀓𑀫𑁆𑀫𑀁. 𑀢𑀦𑁆𑀢𑀺 𑀲𑀗𑁆𑀖𑀪𑀢𑁆𑀢𑀁.

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸

𑀅𑀬𑀁 𑀦𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀭𑀜𑁆𑀜𑀸 𑀯𑀸 𑀧𑀳𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀘𑁂 𑀅𑀢𑁆𑀣𑀻𑀢𑀺 𑀲𑀘𑁂 𑀞𑀺𑀢𑀺𑀓𑀸 𑀅𑀢𑁆𑀣𑀺. 𑀉𑀤𑁆𑀤𑁂𑀲𑀓𑁂𑀦𑀸𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦. 𑀦 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀦𑁆𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀁. 𑀢𑁂 𑀧𑀦𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀸 𑀧𑀦. 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸𑀢𑀺 𑀞𑀺𑀢𑀺𑀓𑀁 𑀞𑀺𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀫𑀳𑀸𑀣𑁂𑀭𑀸𑀦𑀁. 𑀬𑁄𑀚𑀦𑀦𑁆𑀢𑀭𑀺𑀓𑀯𑀺𑀳𑀸𑀭𑀢𑁄𑀧𑀻𑀢𑀺 𑀬𑁄𑀚𑀦𑁂𑀦 𑀩𑁆𑀬𑀯𑀥𑀸𑀦𑁂 𑀞𑀺𑀢𑀯𑀺𑀳𑀸𑀭𑀢𑁄𑀧𑀺. 𑀞𑀺𑀢𑀝𑁆𑀞𑀸𑀦𑀢𑁄𑀢𑀺 𑀞𑀺𑀢𑀺𑀓𑀸𑀬 𑀞𑀺𑀢𑀝𑁆𑀞𑀸𑀦𑀢𑁄. 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀻𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀁 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺. 𑀯𑀟𑁆𑀠𑀺𑀢𑀸 𑀦𑀸𑀫 𑀲𑀻𑀫𑀸𑀢𑀺 𑀉𑀧𑀘𑀸𑀭𑀲𑀻𑀫𑀸 𑀯𑀟𑁆𑀠𑀺𑀢𑀸 𑀦𑀸𑀫. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀻𑀢𑀺 𑀬𑀸𑀯 𑀤𑀼𑀢𑀺𑀬𑀪𑀸𑀕𑁄 𑀦 𑀤𑀸𑀢𑀩𑁆𑀩𑁄, 𑀢𑀸𑀯 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀺. 𑀯𑀲𑁆𑀲𑀕𑁆𑀕𑁂𑀦𑀸𑀢𑀺 𑀕𑀡𑀺𑀬𑀢𑀻𑀢𑀺 𑀕𑀁, 𑀯𑀲𑁆𑀲𑀫𑁂𑀯 𑀕𑀁 𑀯𑀲𑁆𑀲𑀕𑁆𑀕𑀁, 𑀢𑁂𑀦 𑀯𑀲𑁆𑀲𑀕𑁆𑀕𑁂𑀦, 𑀯𑀲𑁆𑀲𑀕𑀡𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 ‘‘𑀯𑀲𑁆𑀲𑀕𑁆𑀖𑁂𑀦𑀸’’𑀢𑀺 𑀘𑀢𑀼𑀢𑁆𑀣𑀓𑁆𑀔𑀭𑁂𑀦 𑀧𑀸𑀞𑁄 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀺 𑀯𑀲𑁆𑀲𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀅𑀬𑀫𑁂𑀯 𑀬𑀼𑀢𑁆𑀢𑀢𑀭𑁄.

𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀏𑀓𑀺𑀲𑁆𑀲𑀁 𑀯𑀺𑀳𑀸𑀭𑀲𑀻𑀫𑀸𑀬𑀁. 𑀢𑀲𑁆𑀫𑀺𑀁𑀬𑁂𑀯 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑁂𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑁂𑀦 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀕𑀸𑀳𑀡𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀓𑁄𑀢𑀺 𑀏𑀓𑁄 𑀤𑀸𑀬𑀓𑁄. 𑀢𑁂𑀦𑀸𑀢𑀺 𑀧𑀳𑀺𑀢𑀪𑀺𑀓𑁆𑀔𑀼𑀦𑀸. 𑀲𑁄 𑀅𑀢𑁆𑀣𑁄𑀢𑀺 𑀲𑁄 𑀳𑁂𑀢𑀼. 𑀢𑀁𑀤𑀺𑀯𑀲𑀦𑁆𑀢𑀺 𑀢𑀲𑁆𑀫𑀺𑀁 𑀧𑀳𑀺𑀢𑀤𑀺𑀯𑀲𑁂. 𑀧𑀫𑀼𑀲𑁆𑀲𑀢𑀻𑀢𑀺 𑀲𑀢𑀺𑀧𑀯𑀸𑀲𑁂𑀦 𑀫𑀼𑀲𑁆𑀲𑀢𑀺. 𑀪𑁄𑀚𑀦𑀲𑀸𑀮𑀸𑀬𑀸𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀲𑀗𑁆𑀔𑀸𑀢𑀸𑀬 𑀪𑁄𑀚𑀦𑀲𑀸𑀮𑀸𑀬. 𑀬𑀸 𑀧𑀓𑀢𑀺𑀝𑁆𑀞𑀺𑀢𑀺𑀓𑀸𑀢𑀺 𑀬𑁄𑀚𑀦𑀸. ‘‘𑀏𑀓𑀸𑀩𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀤𑁆𑀯𑀸𑀤𑀲𑀳𑀢𑁆𑀣𑀦𑁆𑀢𑀭𑀁 𑀅𑀯𑀺𑀚𑀳𑀺𑀢𑁆𑀯𑀸’’𑀢𑀺. 𑀦𑀯𑀁 𑀞𑀺𑀢𑀺𑀓𑀦𑁆𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑁂 𑀞𑀧𑀺𑀢𑀧𑀓𑀢𑀺𑀝𑁆𑀞𑀺𑀢𑀺𑀓𑀢𑁄 𑀅𑀜𑁆𑀜𑀁 𑀦𑀯𑀁 𑀞𑀺𑀢𑀺𑀓𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑀦𑁆𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀁. ‘‘𑀲𑁆𑀯𑁂’’𑀢𑀺 𑀦𑀺𑀬𑀸𑀫𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀤𑀼𑀢𑀺𑀬𑀤𑀺𑀯𑀲𑁂 𑀦 𑀮𑀩𑁆𑀪𑀢𑀺.

𑀓𑁄𑀘𑀻𑀢𑀺 𑀤𑀸𑀬𑀓𑁄. 𑀲𑀓𑀯𑀺𑀳𑀸𑀭𑁂 𑀞𑀻𑀢𑀺𑀓𑀸𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀬𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀅𑀧𑀯𑀺𑀝𑁆𑀞𑀢𑁆𑀢𑀸 𑀲𑀓𑀯𑀺𑀳𑀸𑀭𑁂 𑀞𑀺𑀢𑀺𑀓𑀸𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀤𑀺𑀦𑁆𑀦𑀁 𑀧𑀦 𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀧𑀢𑁆𑀢𑀸𑀦𑀦𑁆𑀢𑀺 𑀤𑀺𑀦𑁆𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀸𑀦𑀁. 𑀢𑀢𑁆𑀣𑀸𑀢𑀺 𑀤𑀺𑀦𑁆𑀦𑀝𑁆𑀞𑀸𑀦𑀁, 𑀲𑀫𑁆𑀧𑀢𑁆𑀢𑀸𑀦𑀁𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲𑀸𑀢𑀺 𑀧𑀯𑀺𑀝𑁆𑀞𑀯𑀺𑀳𑀸𑀭𑀲𑁆𑀲. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀕𑀸𑀫𑀤𑁆𑀯𑀸𑀭𑀯𑀻𑀣𑀺𑀘𑀢𑀼𑀓𑁆𑀓𑀲𑀗𑁆𑀔𑀸𑀢𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀅𑀦𑁆𑀢𑁄𑀉𑀧𑀘𑀸𑀭𑀕𑀢𑀸𑀦𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑁄𑀉𑀧𑀘𑀸𑀭𑁄 𑀦𑀸𑀫 𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑀁.

𑀕𑀸𑀫𑀤𑁆𑀯𑀸𑀭𑀽𑀧𑀘𑀸𑀭 𑀯𑀻𑀣𑀺𑀘𑀢𑀼𑀓𑁆𑀓𑀽𑀧𑀘𑀸𑀭 𑀖𑀭𑀽𑀧𑀘𑀸𑀭𑁂𑀲𑀼 𑀢𑀻𑀲𑀼 𑀖𑀭𑀽𑀧𑀘𑀸𑀭𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀖𑀭𑀽𑀧𑀘𑀸𑀭𑁄 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀢𑀻𑀲𑀼 𑀉𑀧𑀘𑀸𑀭𑁂𑀲𑀼. 𑀖𑀭𑀽𑀧𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀉𑀧𑀘𑀸𑀭𑁄 𑀏𑀢𑁆𑀣𑀸𑀢𑀺 𑀏𑀓𑀽𑀧𑀘𑀸𑀭𑀁 𑀖𑀭𑀁. 𑀇𑀫𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀖𑀭𑀸𑀦𑀁. 𑀢𑀢𑁆𑀣𑀸𑀢𑀺 𑀘𑀢𑀽𑀲𑀼 𑀖𑀭𑁂𑀲𑀼. 𑀏𑀓𑀓𑀼𑀮𑀲𑁆𑀲 𑀬𑀁 𑀖𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀯𑀴𑀜𑁆𑀚𑀦𑁆𑀢𑀺 𑀏𑀓𑀤𑁆𑀯𑀸𑀭𑁂𑀦 𑀲𑀫𑀸𑀦𑀧𑀭𑀺𑀪𑁄𑀕𑀁. 𑀢𑀢𑁆𑀣𑀸𑀢𑀺 𑀏𑀓𑀽𑀧𑀘𑀸𑀭𑁂.

𑀬𑀁 𑀧𑀦 𑀏𑀓𑀁 𑀖𑀭𑀁 𑀓𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬𑀸𑀢𑀺 𑀓𑀮𑀳𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀪𑀺𑀢𑁆𑀢𑀺𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂.

𑀬𑀲𑁆𑀫𑀺𑀁 𑀧𑀦 𑀖𑀭𑁂 𑀦𑀺𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀫𑁆𑀧𑀺 𑀦𑀺𑀯𑁂𑀲𑀦𑀦𑁆𑀢𑀺 𑀬𑁄𑀚𑀦𑀸.

𑀬𑁄 𑀧𑀦 𑀉𑀤𑁆𑀤𑁂𑀲𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀧𑀸𑀧𑀼𑀡𑀸𑀢𑀻𑀢𑀺 𑀬𑁄𑀚𑀦𑀸. 𑀓𑀺𑀜𑁆𑀘𑀸𑀧𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸𑀧𑀻𑀢𑀺 𑀬𑁄𑀚𑀦𑀸.

𑀬𑁄 𑀧𑀦𑀸𑀢𑀺 𑀪𑀺𑀓𑁆𑀔𑀼 𑀧𑀦, 𑀮𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑀲𑁆𑀫𑀺𑀁. 𑀢𑁂𑀦𑀸𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀪𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸.

𑀓𑀸𑀮𑀁 𑀧𑀝𑀺𑀫𑀸𑀦𑁂𑀦𑁆𑀢𑁂𑀲𑀽𑀢𑀺 𑀪𑁄𑀚𑀦𑀓𑀸𑀮𑀁 𑀧𑀝𑀺𑀫𑀸𑀦𑁂𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼, 𑀦𑀺𑀲𑀺𑀦𑁆𑀦𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣 𑀇𑀢𑀺 𑀯𑀸𑀢𑀺 𑀬𑁄𑀚𑀦𑀸. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀧𑀢𑁆𑀢𑀲𑁆𑀲 𑀞𑀸𑀦𑁂 𑀪𑀺𑀓𑁆𑀔𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑁂 𑀅𑀢𑀺𑀤𑀺𑀲𑀢𑀺.

𑀏𑀢𑁆𑀣𑀸𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑁂, 𑀏𑀯𑀁𑀯𑀘𑀦𑁂 𑀯𑀸. 𑀧𑁂𑀲𑀮𑁄𑀢𑀺 𑀧𑀺𑀬𑀲𑀻𑀮𑁄. 𑀢𑁂𑀦𑀸𑀢𑀺 𑀉𑀤𑁆𑀤𑁂𑀲𑀓𑁂𑀦. 𑀓𑀺𑀦𑁆𑀢𑀺 𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀤𑀲𑀯𑀲𑁆𑀲𑁂𑀦 𑀮𑀤𑁆𑀥’’𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀉𑀤𑁆𑀤𑁂𑀲𑀓𑀲𑁆𑀲, 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑁆𑀧𑀲𑀤𑁆𑀤𑀸𑀢𑀺 𑀲𑀡𑀺𑀓𑀲𑀤𑁆𑀤𑀸. ‘‘𑀅𑀧𑀲𑀤𑁆𑀤𑀸’’𑀢𑀺𑀧𑀺 𑀧𑀸𑀞𑁄, 𑀦𑀺𑀲𑁆𑀲𑀤𑁆𑀤𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀦𑀯𑀓𑀲𑁆𑀲𑀸𑀢𑀺 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀦𑀯𑀓𑀲𑁆𑀲. 𑀙𑀸𑀬𑀸𑀬𑀧𑀺 𑀧𑀼𑀘𑁆𑀙𑀺𑀬𑀫𑀸𑀦𑀸𑀬𑀸𑀢𑀺 𑀅𑀦𑀸𑀤𑀭𑁂 𑀪𑀼𑀫𑁆𑀫𑀯𑀘𑀦𑀁, 𑀲𑀸𑀫𑀺𑀯𑀘𑀦𑀁 𑀯𑀸. 𑀦 𑀮𑀪𑀢𑀻𑀢𑀺 𑀧𑀸𑀧𑀼𑀡𑀸𑀧𑀺𑀢𑀢𑁆𑀢𑀸 𑀦 𑀮𑀪𑀢𑀺. 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀸𑀧𑀻𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁, 𑀪𑀺𑀓𑁆𑀔𑀼𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀸𑀧𑀻𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑀁 𑀪𑀸𑀚𑀦𑀻𑀬𑀪𑀡𑁆𑀟𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 ‘‘𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀘𑀦𑁂. 𑀉𑀧𑀘𑀸𑀭𑁂𑀦𑀸𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀽𑀧𑀘𑀸𑀭𑁂𑀦. 𑀢𑀲𑁆𑀫𑀺𑀦𑁆𑀢𑀺 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑁂.

𑀓𑁄𑀘𑀺 𑀉𑀧𑀸𑀲𑀓𑁄 𑀧𑀳𑀺𑀡𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀡𑀻𑀢𑀪𑁄𑀚𑀦𑀸𑀦𑀦𑁆𑀢𑀺 𑀧𑀡𑀻𑀢𑀪𑁄𑀚𑀦𑁂𑀳𑀺. 𑀉𑀤𑀓𑀲𑁆𑀲𑀸𑀢𑀺 𑀉𑀤𑀓𑁂𑀦, 𑀧𑀽𑀭𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀢𑀸 𑀫𑀦𑀼𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀬𑀦𑁆𑀢𑀺 𑀯𑀢𑁆𑀣𑀼. 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑀦𑁆𑀢𑀺 𑀢𑀺𑀘𑀻𑀯𑀭𑁂𑀦 𑀧𑀭𑀺𑀯𑀸𑀭𑀺𑀢𑀁, 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑀯𑀦𑁆𑀢𑀁 𑀯𑀸 𑀉𑀤𑁆𑀤𑁂𑀲𑀪𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀳𑀺 𑀲𑀘𑁆𑀘𑀁 𑀅𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀧𑀼𑀜𑁆𑀜𑀯𑀺𑀲𑁂𑀲𑁄 𑀈𑀤𑀺𑀲𑁄𑀢𑀺 𑀬𑁄𑀚𑀦𑀸. 𑀦𑀦𑀼 𑀉𑀤𑀓𑀁𑀧𑀺𑀲𑁆𑀲 𑀧𑀼𑀜𑁆𑀜𑀯𑀺𑀲𑁂𑀲𑀁, 𑀓𑀲𑁆𑀫𑀸 𑀅𑀜𑁆𑀜𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀪𑀢𑀻𑀢𑀺 𑀆𑀳 ‘‘𑀉𑀤𑀓𑀁 𑀧𑀦𑀸’’𑀢𑀺𑀆𑀤𑀺.

𑀕𑀳𑁂𑀢𑁆𑀯𑀸 𑀆𑀕𑀢𑀸 𑀢𑁂 𑀫𑀦𑀼𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀫𑀳𑀸𑀣𑁂𑀭𑀸𑀤𑀻𑀦𑀁. 𑀤𑀳𑀭𑀲𑀸𑀫𑀡𑁂𑀭𑁂𑀳𑀻𑀢𑀺 𑀤𑀳𑀭𑁂𑀳𑀺 𑀲𑀸𑀫𑀡𑁂𑀭𑁂𑀳𑀺, 𑀮𑀤𑁆𑀥𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑁂. 𑀧𑀼𑀭𑀢𑁄𑀢𑀺 𑀫𑀳𑀸𑀣𑁂𑀭𑀸𑀦𑀁 𑀧𑀼𑀭𑀢𑁄. 𑀧𑀢𑁆𑀢𑁂𑀢𑀺 𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑁂, 𑀅𑀕𑀸𑀳𑀺𑀢𑁂𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀳𑀝𑀫𑁆𑀧𑀺 𑀉𑀤𑁆𑀤𑁂𑀲𑀪𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀓𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀫𑀦𑀼𑀲𑁆𑀲𑁄, 𑀪𑀡𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀢𑁂 𑀭𑀼𑀘𑁆𑀘𑀢𑀺, 𑀢𑀣𑀸 𑀯𑀢𑁆𑀯𑀸 𑀆𑀳𑀭𑀸𑀢𑀺 𑀬𑁄𑀚𑀦𑀸. 𑀯𑀺𑀲𑁆𑀲𑀝𑁆𑀞𑀤𑀽𑀢𑁄 𑀦𑀸𑀫𑀸𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀁 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀭𑀼𑀘𑀺𑀬𑀸 𑀯𑀺𑀲𑁆𑀲𑀝𑁆𑀞𑁄 𑀤𑀽𑀢𑁄 𑀦𑀸𑀫. 𑀧𑀝𑀺𑀧𑀸𑀝𑀺𑀧𑀢𑁆𑀢𑀁 𑀯𑀸𑀢𑀺 𑀲𑀗𑁆𑀖𑀢𑁄 𑀧𑀝𑀺𑀧𑀸𑀝𑀺𑀬𑀸 𑀮𑀤𑁆𑀥𑀁 𑀧𑀢𑁆𑀢𑀁 𑀯𑀸, 𑀇𑀤𑀁 𑀦𑀺𑀫𑀦𑁆𑀢𑀦𑀪𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀇𑀘𑁆𑀙𑀢𑀻𑀢𑀺 𑀯𑀺𑀲𑁆𑀲𑀝𑁆𑀞𑀤𑀽𑀢𑁄 𑀬𑀁 𑀇𑀘𑁆𑀙𑀢𑀺. 𑀲𑁄𑀢𑀺 𑀩𑀸𑀮𑁄, 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀯𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀯𑀤𑀦𑀓𑀸𑀭𑀡𑀸.

𑀓𑀽𑀝𑀝𑁆𑀞𑀺𑀢𑀺𑀓𑀸 𑀦𑀸𑀫𑀸𑀢𑀺 𑀅𑀜𑁆𑀜𑁂𑀳𑀺 𑀉𑀤𑁆𑀤𑁂𑀲𑀪𑀢𑁆𑀢𑁂𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀉𑀚𑀼𑀓𑀝𑁆𑀞𑀺𑀢𑀺𑀓𑀸𑀬 𑀧𑀯𑀢𑁆𑀢𑀺𑀢𑁆𑀯𑀸 𑀓𑀽𑀝𑁂𑀦 𑀧𑀯𑀢𑁆𑀢𑀸 𑀞𑀺𑀢𑀺𑀓𑀸 𑀦𑀸𑀫 𑀳𑁄𑀢𑀺. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀭𑀜𑁆𑀜𑁄 𑀯𑀸 𑀳𑀻’’𑀢𑀺𑀆𑀤𑀺. 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀻𑀢𑀺 𑀧𑀢𑀺 𑀏𑀓𑀁 𑀓𑀢𑁆𑀯𑀸 𑀘𑀭𑀺𑀢𑀩𑁆𑀩𑀸𑀦𑀺 𑀪𑀓𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀏𑀓𑀘𑀸𑀭𑀺𑀓𑀸𑀦𑀺, 𑀅𑀜𑁆𑀜𑁂𑀳𑀺 𑀉𑀤𑁆𑀤𑁂𑀲𑀪𑀢𑁆𑀢𑁂𑀳𑀺 𑀅𑀫𑀺𑀲𑁆𑀲𑁂𑀢𑁆𑀯𑀸 𑀧𑀢𑀺 𑀏𑀓𑀁 𑀓𑀢𑁆𑀯𑀸 𑀪𑀓𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀸𑀦𑀺𑀬𑁂𑀯 𑀪𑀢𑁆𑀢𑀸𑀦𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀽𑀢𑀺 𑀏𑀓𑀘𑁆𑀘𑁂𑀲𑀼 𑀪𑀺𑀓𑁆𑀔𑀽𑀲𑀼. 𑀢𑀗𑁆𑀔𑀡𑀁𑀬𑁂𑀯𑀸𑀢𑀺 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑀓𑁆𑀔𑀡𑁂𑀬𑁂𑀯. 𑀧𑀼𑀦 𑀢𑀗𑁆𑀔𑀡𑀁𑀬𑁂𑀯𑀸𑀢𑀺 𑀢𑀲𑁆𑀫𑀺𑀁 𑀕𑀸𑀳𑀡𑀓𑁆𑀔𑀡𑁂𑀬𑁂𑀯. ‘‘𑀧𑀡𑀻𑀢𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀢𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀤𑀦𑁆𑀢𑀺, ‘‘𑀏𑀢𑁆𑀢𑀓𑀯𑀲𑁆𑀲𑀢𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀕𑀸𑀳𑀺𑀢𑁂𑀢𑀺 𑀞𑀺𑀢𑀺𑀓𑀁 𑀅𑀚𑀸𑀦𑀦𑁆𑀢𑁂𑀳𑀺 𑀆𑀕𑀦𑁆𑀢𑀼𑀓𑁂𑀳𑀺 𑀧𑀢𑁆𑀢𑁂 𑀕𑀸𑀳𑀺𑀢𑁂. 𑀆𑀕𑀢𑁂𑀳𑀺𑀧𑀺 𑀞𑀺𑀢𑀺𑀓𑀁 𑀚𑀸𑀦𑀦𑀓𑀪𑀺𑀓𑁆𑀔𑀽𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲𑁂𑀯 𑀦𑀬𑁄 𑀧𑀭𑀢𑁄𑀧𑀺. 𑀪𑀺𑀓𑁆𑀔𑀽𑀬𑁂𑀯 𑀆𑀕𑀘𑁆𑀙𑀦𑁆𑀢𑀽𑀢𑀺 𑀧𑀢𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽𑀬𑁂𑀯 𑀆𑀕𑀘𑁆𑀙𑀦𑁆𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑁂𑀢𑀺 𑀞𑀺𑀢𑀺𑀓𑀁 𑀅𑀚𑀸𑀦𑀦𑁆𑀢𑁂 𑀆𑀕𑀦𑁆𑀢𑀼𑀓𑁂. 𑀭𑀸𑀚𑀸 𑀪𑁄𑀚𑁂𑀢𑁆𑀯𑀸𑀢𑀺 𑀭𑀸𑀚𑀸 𑀅𑀢𑁆𑀢𑀦𑁄 𑀕𑁂𑀳𑁂 𑀪𑁄𑀚𑁂𑀢𑁆𑀯𑀸. 𑀦𑁂𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁, 𑀧𑀢𑁆𑀢𑁂𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀆𑀳𑀝𑀦𑁆𑀢𑀺 𑀬𑀁 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀆𑀳𑀝𑀁. 𑀢𑀁 𑀦 𑀕𑀸𑀳𑁂𑀢𑀩𑁆𑀩𑀦𑁆𑀢𑀺 𑀢𑀁 𑀪𑀢𑁆𑀢𑀁 𑀞𑀺𑀢𑀺𑀓𑀸𑀬 𑀦 𑀕𑀸𑀳𑁂𑀢𑀩𑁆𑀩𑀁 𑀣𑁄𑀓𑀢𑁆𑀢𑀸. 𑀦𑁂𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁. 𑀕𑀻𑀯𑀸 𑀳𑁄𑀢𑀻𑀢𑀺 𑀇𑀡𑀁 𑀳𑁄𑀢𑀺. 𑀇𑀡𑀁 𑀦𑀸𑀫 𑀧𑀝𑀺𑀤𑀸𑀢𑀩𑁆𑀩𑀲𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀝𑀺𑀤𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 𑀞𑀺𑀢𑀺𑀓𑀁 𑀅𑀚𑀸𑀦𑀺𑀢𑁆𑀯𑀸 𑀪𑀼𑀢𑁆𑀢𑀝𑁆𑀞𑀸𑀦𑁂. 𑀢𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀢𑀸𑀯 𑀆𑀕𑀫𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀧𑀢𑁆𑀢𑀝𑁆𑀞𑀸𑀦𑁂𑀦 𑀕𑀸𑀳𑀡𑀫𑁆𑀧𑀺 𑀕𑀻𑀯𑀸𑀲𑀤𑀺𑀲𑁄𑀢𑀺 𑀧𑀼𑀭𑀺𑀫𑀣𑁂𑀭𑀲𑁆𑀲 𑀫𑀢𑀺 𑀪𑀯𑁂𑀬𑁆𑀬. 𑀏𑀯𑀜𑁆𑀳𑀺 𑀲𑀢𑀺 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀯𑀸𑀤𑁄 𑀲𑀤𑀺𑀲𑁄𑀬𑁂𑀯.

𑀏𑀓𑁄 𑀧𑀺𑀡𑁆𑀟𑀧𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸𑀭𑀽𑀧𑁄𑀢𑀺 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑁄 𑀲𑀢𑀕𑁆𑀖𑀦𑀓𑁄. 𑀅𑀬𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑁄. 𑀇𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼.

𑀏𑀓𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀸𑀪𑀝𑁆𑀞𑀓𑁄𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀪𑀲𑁆𑀲𑀢𑀺 𑀕𑀮𑀢𑀻𑀢𑀺 𑀅𑀦𑁆𑀢𑀭𑀸𑀪𑀝𑁆𑀞𑀓𑁄. 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀬𑁄 𑀧𑀦 𑀲𑀸𑀫𑀡𑁂𑀭𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀉𑀧𑀲𑀫𑁆𑀧𑀚𑁆𑀚𑀺𑀢𑀲𑀸𑀫𑀡𑁂𑀭𑀲𑁆𑀲 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀧𑀢𑁆𑀢𑁄 𑀪𑀺𑀓𑁆𑀔𑀼. 𑀲𑀫𑀻𑀧𑁂𑀢𑀺 𑀅𑀢𑁆𑀢𑀦𑁄 𑀲𑀫𑀻𑀧𑁂. 𑀢𑀜𑁆𑀘𑁂 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀻𑀢𑀺 𑀢𑀁 𑀧𑀢𑁆𑀢𑀁 𑀧𑀢𑁆𑀢𑀳𑀸𑀭𑀓𑀸 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀺 𑀘𑁂. 𑀕𑀻𑀯𑀸 𑀳𑁄𑀢𑀻𑀢𑀺 𑀧𑀢𑁆𑀢𑀤𑀸𑀧𑀓𑀲𑁆𑀲 𑀕𑀻𑀯𑀸 𑀳𑁄𑀢𑀺. 𑀲𑁄 𑀪𑀺𑀓𑁆𑀔𑀽𑀢𑀺 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁄 𑀲𑁄 𑀪𑀺𑀓𑁆𑀔𑀼. 𑀅𑀲𑁆𑀲𑀸𑀢𑀺 𑀧𑀢𑁆𑀢𑀤𑀸𑀧𑀓𑀲𑁆𑀲. ‘‘𑀅𑀬’’𑀦𑁆𑀢𑀺 𑀧𑁄𑀢𑁆𑀣𑀓𑁂𑀲𑀼 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀦 𑀲𑀼𑀦𑁆𑀤𑀭𑁄. 𑀢𑀢𑁄𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀖𑀭𑀢𑁄. ‘‘𑀲𑀼𑀳𑀝𑁄’’𑀢𑀺 𑀯𑀘𑀦𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀢𑁆𑀢𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀕𑀻𑀯𑀸 𑀦 𑀳𑁄𑀢𑀻’’𑀢𑀺.

𑀲𑀸𑀤𑀺𑀬𑀦𑀓𑁄𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀲𑀸𑀤𑀺𑀬𑀦𑀓𑁄, 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀲𑀳𑀺𑀧𑀺 𑀧𑀢𑁆𑀢𑁂𑀳𑀺 𑀪𑀢𑁆𑀢𑀁 𑀆𑀳𑀭𑀸𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑀁 𑀦𑀸𑀫𑀸𑀢𑀺 𑀪𑀺𑀓𑁆𑀔𑀼𑀦𑀸 𑀤𑀢𑁆𑀢𑀺𑀬𑀁 𑀦𑀸𑀫. 𑀲𑁄 𑀪𑀺𑀓𑁆𑀔𑀽𑀢𑀺 𑀲𑀸𑀤𑀺𑀬𑀦𑀓𑁄 𑀲𑁄 𑀪𑀺𑀓𑁆𑀔𑀼. 𑀢𑁂 𑀪𑀺𑀓𑁆𑀔𑀽𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁂 𑀢𑁂 𑀪𑀺𑀓𑁆𑀔𑀽. 𑀏𑀣 𑀪𑀦𑁆𑀢𑁂 𑀫𑀬𑁆𑀳𑀁 𑀲𑀳𑀸𑀬𑀸 𑀳𑁄𑀣 𑀇𑀢𑀺 𑀯𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀢𑀢𑁆𑀣𑀸𑀢𑀺 𑀉𑀧𑀸𑀲𑀓𑀲𑁆𑀲 𑀖𑀭𑁂. 𑀢𑀲𑁆𑀲𑁂𑀯𑀸𑀢𑀺 𑀲𑀸𑀤𑀺𑀬𑀦𑀓𑀲𑁆𑀲𑁂𑀯. 𑀇𑀢𑀭𑁂𑀢𑀺 𑀦𑀯𑀧𑀺𑀡𑁆𑀟𑀧𑀸𑀢𑀺𑀓𑀸. 𑀦𑁂𑀲𑀦𑁆𑀢𑀺 𑀤𑀲𑀦𑁆𑀦𑀁 𑀪𑀺𑀓𑁆𑀔𑀽𑀦𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀸𑀤𑀺𑀬𑀦𑀓𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀪𑀼𑀢𑁆𑀢𑀸𑀯𑀻𑀦𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀸𑀦𑀁.

𑀢𑁂𑀢𑀺 𑀦𑀯𑀧𑀺𑀡𑁆𑀟𑀧𑀸𑀢𑀺𑀓𑀸, 𑀯𑀼𑀢𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀉𑀧𑀸𑀲𑀓𑀲𑁆𑀲 𑀖𑀭𑁂. 𑀢𑀢𑁆𑀭𑀸𑀢𑀺 𑀤𑀲𑀲𑀼 𑀪𑀺𑀓𑁆𑀔𑀽𑀲𑀼. 𑀫𑀥𑀼𑀭𑁂𑀦 𑀲𑀭𑁂𑀦 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀲𑁆𑀲 𑀏𑀓𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀅𑀓𑀢𑀪𑀸𑀕𑁄 𑀦𑀸𑀫𑀸𑀢𑀺 𑀧𑀼𑀩𑁆𑀩𑁂 𑀦 𑀓𑀭𑀺𑀬𑀺𑀢𑁆𑀣𑀸𑀢𑀺 𑀅𑀓𑀢𑁄, 𑀲𑁄𑀬𑁂𑀯 𑀪𑀸𑀕𑁄 𑀓𑁄𑀝𑁆𑀞𑀸𑀲𑁄𑀢𑀺 𑀅𑀓𑀢𑀪𑀸𑀕𑁄, 𑀆𑀕𑀦𑁆𑀢𑀼𑀓𑀪𑀸𑀕𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀏𑀓𑁄 𑀉𑀧𑀸𑀲𑀓𑁄 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀞𑀧𑁂𑀢𑁆𑀯𑀸𑀢𑀺 𑀧𑀓𑀢𑀺𑀬𑀸 𑀞𑀧𑁂𑀢𑁆𑀯𑀸. ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀪𑀼𑀜𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀘 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀘 𑀕𑀢𑁂𑀧𑀺 𑀧𑀞𑀫𑀫𑁂𑀯 ‘‘𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀧𑀸𑀢𑀺𑀬𑀸 𑀆𑀳𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁂𑀓𑀁 𑀆𑀮𑁄𑀧𑀦𑁆𑀢𑀺 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀏𑀓𑁂𑀓𑀁 𑀆𑀮𑁄𑀧𑀁. 𑀅𑀘𑁆𑀙𑀢𑀻𑀢𑀺 𑀯𑀲𑀢𑀺. 𑀓𑀲𑁆𑀲 𑀢𑁂𑀢𑀺 𑀓𑀲𑁆𑀲 𑀅𑀢𑁆𑀣𑀸𑀬 𑀢𑀬𑀸, 𑀆𑀦𑀻𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀏𑀓𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺 𑀧𑀤𑀁 ‘‘𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁, ‘‘𑀪𑀢𑁆𑀢’’𑀦𑁆𑀢𑀺 𑀥𑀸𑀢𑀼𑀓𑀫𑁆𑀫𑀁 𑀢𑀩𑁆𑀩𑀧𑀘𑁆𑀘𑀬𑁄 𑀯𑀤𑀢𑀺.

𑀓𑀺𑀁 𑀆𑀳𑀭𑀻𑀬𑀢𑀻𑀢𑀺 𑀅𑀯𑀢𑁆𑀯𑀸𑀢𑀺 𑀓𑀺𑀁 𑀯𑀢𑁆𑀣𑀼 𑀢𑀬𑀸 𑀆𑀳𑀭𑀻𑀢𑀻𑀢𑀺 𑀉𑀧𑀸𑀲𑀓𑀁 𑀅𑀧𑀼𑀘𑁆𑀙𑀺𑀢𑁆𑀯𑀸. ‘‘𑀓𑀺𑀁 𑀆𑀳𑀭𑀺𑀲𑁆𑀲𑀲𑀻’’𑀢𑀺𑀧𑀺 𑀧𑀸𑀞𑁄, 𑀓𑀺𑀁 𑀯𑀢𑁆𑀣𑀼𑀁 𑀢𑁆𑀯𑀁 𑀆𑀳𑀭𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀲𑀧𑀭𑀺𑀯𑀸𑀭𑀸𑀬 𑀬𑀸𑀕𑀼𑀬𑀸 𑀘 𑀫𑀳𑀕𑁆𑀖𑀸𑀦𑀁 𑀨𑀮𑀸𑀦𑀜𑁆𑀘 𑀧𑀡𑀻𑀢𑀸𑀦𑀁 𑀔𑀚𑁆𑀚𑀓𑀸𑀦𑀜𑁆𑀘 𑀢𑀣𑀸 𑀆𑀯𑁂𑀡𑀺𑀓𑀸 𑀞𑀺𑀢𑀺𑀓𑀸 𑀓𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀏𑀓𑀸 𑀏𑀯 𑀞𑀺𑀢𑀺𑀓𑀸𑀢𑀺 𑀲𑀫𑀸𑀦𑀸 𑀏𑀯 𑀞𑀺𑀢𑀺𑀓𑀸. 𑀢𑀣𑀸 𑀨𑀸𑀡𑀺𑀢𑀲𑁆𑀲𑀸𑀢𑀺 𑀏𑀢𑁆𑀣 𑀢𑀣𑀸𑀲𑀤𑁆𑀤𑁂𑀦 ‘‘𑀏𑀓𑀸 𑀏𑀯 𑀞𑀺𑀢𑀺𑀓𑀸 𑀯𑀝𑁆𑀝𑀢𑀻’’𑀢𑀺 𑀧𑀤𑀁 𑀅𑀢𑀺𑀤𑀺𑀲𑀢𑀺.

𑀇𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸

𑀦𑀺𑀫𑀦𑁆𑀢𑀦𑀁 𑀧𑀼𑀕𑁆𑀕𑀮𑀺𑀓𑀁 𑀲𑀗𑁆𑀖𑀺𑀓𑀜𑁆𑀘𑀸𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀼𑀕𑁆𑀕𑀮𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀕𑁆𑀕𑀮𑀺𑀓𑀁 𑀘𑁂 𑀲𑀬𑀫𑁂𑀯 𑀇𑀲𑁆𑀲𑀭𑁄’’𑀢𑀺. ‘‘𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀣𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 ‘‘𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀺𑀦𑁆𑀦𑀁 𑀲𑀗𑁆𑀖𑀺𑀓𑀁 𑀦𑀺𑀫𑀦𑁆𑀢𑀦𑀁 𑀦𑀸𑀫. 𑀏𑀢𑁆𑀣𑀸𑀢𑀺 𑀦𑀺𑀫𑀦𑁆𑀢𑀦𑁂. 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 ‘‘𑀪𑀺𑀓𑁆𑀔’’𑀦𑁆𑀢𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀲𑀗𑁆𑀖𑀢𑁄 𑀮𑀤𑁆𑀥𑀧𑀝𑀺𑀧𑀸𑀝𑀺𑀬𑀸. 𑀆𑀕𑀢𑀫𑀦𑀼𑀲𑁆𑀲𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣𑀸’’𑀢𑀺 𑀯𑀘𑀦𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸.

𑀦𑀺𑀫𑀦𑁆𑀢𑀦𑀪𑀢𑁆𑀢𑀖𑀭𑀢𑁄𑀢𑀺 𑀦𑀺𑀫𑀦𑁆𑀢𑀦𑀪𑀢𑁆𑀢𑀲𑁆𑀲 𑀤𑀺𑀦𑁆𑀦𑀖𑀭𑀢𑁄. 𑀏𑀓𑁄 𑀆𑀳𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀽𑀭𑁂𑀢𑁆𑀯𑀸𑀢𑀺 𑀪𑀢𑁆𑀢𑀲𑁆𑀲 𑀧𑀽𑀭𑁂𑀢𑁆𑀯𑀸. 𑀢𑀦𑁆𑀢𑀺 𑀪𑀢𑁆𑀢𑀁. 𑀇𑀥𑀸𑀧𑀻𑀢𑀺 𑀦𑀺𑀫𑀦𑁆𑀢𑀦𑁂𑀧𑀺.

𑀢𑀢𑁄𑀢𑀺 𑀯𑀤𑀦𑀓𑀸𑀭𑀡𑀸. ‘‘𑀲𑁄 𑀪𑀺𑀓𑁆𑀔𑀽’’𑀢𑀺 𑀧𑀤𑀁 ‘‘𑀅𑀲𑁆𑀲𑀸’’𑀢𑀺 𑀧𑀤𑁂 𑀧𑀓𑀢𑀺𑀓𑀢𑁆𑀢𑀸, ‘‘𑀚𑀺𑀕𑀼𑀘𑁆𑀙𑀦𑀻𑀬𑁄’’𑀢𑀺 𑀧𑀤𑀁 𑀢𑀢𑁆𑀣𑁂𑀯 𑀯𑀺𑀓𑀢𑀺𑀓𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬, 𑀳𑁄𑀢𑀺 𑀯𑀸. ‘‘𑀧𑀢𑁆𑀢𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀢𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀪𑀢𑁆𑀢𑀸𑀳𑀭𑀡𑀓𑀧𑀢𑁆𑀢𑀦𑁆𑀢𑀺 𑀪𑀢𑁆𑀢𑀁 𑀆𑀳𑀭𑀢𑀺 𑀅𑀦𑁂𑀦𑀸𑀢𑀺 𑀪𑀢𑁆𑀢𑀸𑀳𑀭𑀡𑀓𑁄, 𑀲𑁄𑀬𑁂𑀯 𑀧𑀢𑁆𑀢𑁄 𑀪𑀢𑁆𑀢𑀸𑀳𑀭𑀡𑀓𑀧𑀢𑁆𑀢𑁄, 𑀢𑀁. 𑀧𑀝𑀺𑀧𑀸𑀝𑀺𑀪𑀢𑁆𑀢𑀦𑁆𑀢𑀺 𑀧𑀝𑀺𑀧𑀸𑀝𑀺𑀬𑀸 𑀮𑀤𑁆𑀥𑀁 𑀪𑀢𑁆𑀢𑀁.

𑀆𑀮𑁄𑀧𑀪𑀢𑁆𑀢𑀝𑁆𑀞𑀺𑀢𑀺𑀓𑀢𑁄𑀢𑀺 𑀏𑀓𑁂𑀓𑀆𑀮𑁄𑀧𑁂𑀦 𑀮𑀤𑁆𑀥𑀲𑁆𑀲 𑀪𑀢𑁆𑀢𑀲𑁆𑀲 𑀞𑀺𑀢𑀺𑀓𑀢𑁄. 𑀆𑀮𑁄𑀧𑀲𑀗𑁆𑀔𑁂𑀧𑁂𑀦𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀆𑀮𑁄𑀧𑁂 𑀢𑀁𑀲𑀁𑀔𑀺𑀧𑀦𑁂𑀦. 𑀅𑀬𑀁 𑀦𑀬𑁄 𑀉𑀤𑁆𑀤𑁂𑀲𑀪𑀢𑁆𑀢𑀢𑁄 𑀯𑀺𑀲𑁂𑀲𑁄. 𑀓𑀲𑁆𑀲 𑀢𑁂 𑀆𑀪𑀢𑀦𑁆𑀢𑀺 𑀓𑀲𑁆𑀲 𑀅𑀢𑁆𑀣𑀸𑀬 𑀢𑀬𑀸 𑀆𑀪𑀢𑀦𑁆𑀢𑀺 𑀬𑁄𑀚𑀦𑀸. 𑀲𑀗𑁆𑀖𑀲𑁆𑀲 𑀫𑁂 𑀪𑀢𑁆𑀢𑀦𑁆𑀢𑀺 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀫𑀬𑀸 𑀪𑀢𑁆𑀢𑀁 𑀆𑀪𑀢𑀁. 𑀣𑁂𑀭𑀸𑀦𑀁 𑀫𑁂 𑀪𑀢𑁆𑀢𑀦𑁆𑀢𑀺 𑀣𑁂𑀭𑀸𑀦𑀁 𑀫𑀬𑀸 𑀪𑀢𑁆𑀢𑀁 𑀆𑀪𑀢𑀁.

𑀉𑀧𑀸𑀲𑀓𑁄 𑀧𑀳𑀺𑀡𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂 𑀢𑀬𑁄 𑀚𑀦𑀸𑀢𑀺 𑀲𑀗𑁆𑀖𑀢𑁆𑀣𑁂𑀭𑁄 𑀘 𑀕𑀦𑁆𑀣𑀥𑀼𑀢𑀗𑁆𑀕𑀯𑀲𑁂𑀦 𑀅𑀪𑀺𑀜𑁆𑀜𑀸𑀢𑁄 𑀘 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀘𑀸𑀢𑀺 𑀇𑀫𑁂 𑀢𑀬𑁄 𑀚𑀦𑀸. 𑀧𑀼𑀘𑁆𑀙𑀺𑀢𑀼𑀦𑁆𑀢𑀺 ‘‘𑀓𑀺𑀁 𑀲𑀗𑁆𑀖𑀢𑁄 𑀕𑀡𑁆𑀳𑀸𑀫𑀺, 𑀉𑀤𑀸𑀳𑀼 𑀬𑁂 𑀚𑀸𑀦𑀸𑀫𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀸𑀫𑀻’’𑀢𑀺 𑀧𑀼𑀘𑁆𑀙𑀺𑀢𑀼𑀁. 𑀆𑀭𑀼𑀳𑀺𑀬𑀺𑀢𑁆𑀣𑀸𑀢𑀺 𑀆𑀭𑀽𑀴𑁆𑀳𑀸. 𑀅𑀢𑁆𑀢𑀦𑀯𑀫𑁂𑀳𑀻𑀢𑀺 𑀅𑀢𑁆𑀢𑀸 𑀦𑀯𑀫𑁄 𑀏𑀢𑁂𑀲𑀦𑁆𑀢𑀺 𑀅𑀢𑁆𑀢𑀦𑀯𑀫𑀸, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀬𑀲𑁆𑀫𑀸. 𑀏𑀢𑁂 𑀪𑀺𑀓𑁆𑀔𑀽𑀢𑀺 𑀲𑀗𑁆𑀖𑀢𑁆𑀣𑁂𑀭𑀸𑀤𑀬𑁄 𑀢𑀬𑁄 𑀏𑀢𑁂 𑀪𑀺𑀓𑁆𑀔𑀽. 𑀢𑁂𑀦𑀸𑀢𑀺 𑀕𑀦𑁆𑀣𑀥𑀼𑀢𑀗𑁆𑀕𑀸𑀤𑀻𑀳𑀺 𑀅𑀦𑀪𑀺𑀜𑁆𑀜𑀸𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑁆𑀲𑀺𑀢𑀓𑁂 𑀯𑀸, 𑀬𑁂 𑀪𑀺𑀓𑁆𑀔𑀽 𑀚𑀸𑀦𑀸𑀣, 𑀢𑁂 𑀪𑀺𑀓𑁆𑀔𑀽 𑀯𑀸 𑀕𑀳𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀦𑀸 𑀅𑀜𑁆𑀜𑁄 𑀕𑀸𑀫𑁄 𑀕𑀦𑁆𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀬𑁂𑀯 𑀕𑀸𑀫𑁄𑀢𑀺 𑀦𑀺𑀫𑀦𑁆𑀢𑀦𑀕𑀸𑀫𑁄𑀬𑁂𑀯.

𑀢𑀢𑁆𑀭𑀸𑀢𑀺 𑀅𑀲𑀦𑀲𑀸𑀮𑀸𑀬𑀁. 𑀉𑀲𑁆𑀲𑀯𑀸𑀤𑀻𑀲𑀽𑀢𑀺 𑀙𑀡𑀸𑀤𑀻𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀫𑀦𑀼𑀲𑁆𑀲𑀸𑀦𑀁 𑀩𑀳𑀼𑀲𑀦𑁆𑀦𑀺𑀧𑀸𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀦𑀺𑀫𑀦𑁆𑀢𑀦𑀓𑀸𑀮𑁂. 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄𑀢𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄. 𑀬𑀣𑀸𑀲𑀢𑁆𑀢𑀻𑀢𑀺 𑀲𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀁, 𑀲𑀢𑁆𑀢𑀺𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀢𑁆𑀢𑀺𑀲𑀤𑁆𑀤𑀲𑁆𑀲 𑀓𑀼𑀦𑁆𑀢𑀲𑀗𑁆𑀔𑀸𑀢𑀲𑁆𑀲 𑀲𑀢𑁆𑀣𑀲𑁆𑀲𑀧𑀺 𑀯𑀸𑀘𑀓𑀢𑁆𑀢𑀸 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀬𑀣𑀸𑀩𑀮’’𑀦𑁆𑀢𑀺.

𑀲𑀗𑁆𑀖𑀢𑁆𑀣𑁂𑀭𑁄 𑀯𑀸 𑀆𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀳𑀼𑀓𑀢𑁆𑀢𑀸𑀭𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀓𑀯𑀸𑀭𑀦𑁆𑀢𑀺 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂, 𑀆𑀕𑀫𑀦𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀤𑁆𑀥𑀓𑀸𑀮𑀢𑁄𑀢𑀺 𑀢𑀢𑁆𑀣𑁂𑀯 𑀲𑀓𑀝𑁆𑀞𑀸𑀦𑁂 𑀯𑀸𑀲𑀲𑁆𑀲 𑀦𑀺𑀩𑀤𑁆𑀥𑀓𑀸𑀮𑀢𑁄. 𑀤𑀼𑀢𑀺𑀬𑀯𑀸𑀭𑁂𑀢𑀺 𑀤𑀼𑀢𑀺𑀬𑀤𑀺𑀯𑀲𑁂. 𑀅𑀪𑀺𑀦𑀯𑀆𑀕𑀦𑁆𑀢𑀼𑀓𑀸𑀯𑀸𑀢𑀺 𑀅𑀦𑀸𑀕𑀫𑀦𑀧𑀼𑀩𑁆𑀩𑀸 𑀅𑀪𑀺𑀦𑀯𑀸 𑀆𑀕𑀦𑁆𑀢𑀼𑀓𑀸𑀯. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀢𑁆𑀢𑀝𑁆𑀞𑀸𑀦𑁂. 𑀢𑁂𑀲𑀦𑁆𑀢𑀺 𑀅𑀪𑀺𑀦𑀯𑀆𑀕𑀦𑁆𑀢𑀼𑀓𑀸𑀦𑀁. 𑀏𑀢𑁆𑀣𑀸𑀢𑀺 𑀅𑀦𑀸𑀕𑀢𑀧𑀼𑀩𑁆𑀩𑀝𑁆𑀞𑀸𑀦𑁂.

𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑀓𑀝𑁆𑀞𑀸𑀦𑀆𑀕𑀦𑁆𑀢𑀼𑀓𑀝𑁆𑀞𑀸𑀦𑁂𑀲𑀼. 𑀢𑁂𑀦𑀸𑀢𑀺 𑀅𑀢𑀺𑀮𑀸𑀪𑀺𑀦𑀸 𑀪𑀺𑀓𑁆𑀔𑀼𑀦𑀸. 𑀅𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀯𑀺𑀲𑁂𑀲𑀫𑀓𑀢𑁆𑀯𑀸.

𑀲𑀮𑀸𑀓𑀪𑀢𑁆𑀢𑀓𑀣𑀸

𑀲𑀮𑀸𑀓𑀪𑀢𑁆𑀢𑀁 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀯𑀘𑀦𑀢𑁄’’𑀢𑀺 𑀧𑀤𑀁 ‘‘𑀤𑀸𑀢𑀩𑁆𑀩𑀸’’𑀢𑀺 𑀧𑀤𑁂 𑀜𑀸𑀧𑀓𑀳𑁂𑀢𑀼. 𑀲𑀮𑀸𑀓𑀸𑀬 𑀯𑀸𑀢𑀺 𑀓𑀼𑀲𑀤𑀡𑁆𑀟𑁂 𑀯𑀸. 𑀅𑀲𑀼𑀓𑀲𑁆𑀲 𑀦𑀸𑀫𑀸𑀢𑀺 𑀅𑀲𑀼𑀓𑀲𑁆𑀲 𑀦𑀸𑀫 𑀉𑀧𑀸𑀲𑀓𑀲𑁆𑀲. 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀮𑀺𑀔𑀺𑀢𑁆𑀯𑀸, 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀑𑀧𑀼𑀜𑁆𑀚𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀆𑀮𑁄𑀴𑁂𑀢𑁆𑀯𑀸’’𑀢𑀺. 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀤𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄.