𑁫. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀁

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀣𑀸

𑁨𑁪𑁩. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂 𑀫𑀼𑀝𑁆𑀞𑀺𑀓𑀫𑀮𑁆𑀮𑀸𑀢𑀺 𑀫𑀼𑀝𑁆𑀞𑀺𑀓𑁂𑀦 𑀫𑀣𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀳𑀺𑀁𑀲𑀦𑁆𑀢𑀻𑀢𑀺 𑀫𑀼𑀝𑁆𑀞𑀺𑀓𑀫𑀮𑁆𑀮𑀸. 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀧𑀤𑀲𑁆𑀲 𑀳𑁂𑀝𑁆𑀞𑀼𑀧𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀕𑀸𑀫𑀫𑀼𑀤𑀯𑀸𑀢𑀺 𑀏𑀢𑁆𑀣 𑀙𑀯𑀺𑀭𑀸𑀕𑀫𑀡𑁆𑀟𑀦𑀸𑀦𑀼𑀬𑀼𑀢𑁆𑀢𑁂𑀦 𑀫𑀼𑀤𑁄 𑀫𑁄𑀤𑀦𑀁 𑀏𑀢𑁂𑀲𑀫𑀢𑁆𑀣𑀻𑀢𑀺 𑀫𑀼𑀤𑀯𑀸, 𑀕𑀸𑀫𑁂 𑀯𑀲𑀦𑁆𑀢𑀸 𑀫𑀼𑀤𑀯𑀸 𑀕𑀸𑀫𑀫𑀼𑀤𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙𑀯𑀺𑀭𑀸𑀕𑀫𑀡𑁆𑀟𑀦𑀸𑀦𑀼𑀬𑀼𑀢𑁆𑀢𑀸 𑀦𑀸𑀕𑀭𑀺𑀓𑀫𑀦𑀼𑀲𑁆𑀲𑀸’’𑀢𑀺. ‘‘𑀯𑀡𑁆𑀡𑀯𑀸 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁯𑁩; 𑀧𑀸𑀘𑀺. 𑁬𑁭) 𑀯𑀺𑀬 𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀣𑀫𑁆𑀪𑁂𑀢𑀺 𑀏𑀢𑁆𑀣 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀣𑀫𑁆𑀪𑁄 𑀳𑁄𑀢𑀺, 𑀅𑀣 𑀔𑁄 𑀦𑁆𑀳𑀸𑀦𑀢𑀺𑀢𑁆𑀣𑁂 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀣𑀫𑁆𑀪𑁄𑀬𑁂𑀯𑀸𑀢𑀺 𑀆𑀳 ‘‘𑀦𑁆𑀳𑀸𑀦𑀢𑀺𑀢𑁆𑀣𑁂 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀢𑁆𑀣𑀫𑁆𑀪𑁂’’𑀢𑀺.

𑀇𑀝𑁆𑀞𑀓𑀸𑀲𑀺𑀮𑀸𑀤𑀸𑀭𑀼𑀓𑀼𑀝𑁆𑀝𑀸𑀦𑀦𑁆𑀢𑀺 𑀇𑀝𑁆𑀞𑀓𑀸𑀓𑀼𑀝𑁆𑀝𑀲𑀺𑀮𑀸𑀓𑀼𑀝𑁆𑀝𑀤𑀸𑀭𑀼𑀓𑀼𑀝𑁆𑀝𑀸𑀦𑀁. 𑀅𑀝𑁆𑀞𑀧𑀤𑀸𑀓𑀸𑀭𑁂𑀦𑀸𑀢𑀺 𑀅𑀝𑁆𑀞𑀧𑀤𑀨𑀮𑀓𑀸𑀓𑀸𑀭𑁂𑀦. 𑀭𑀸𑀚𑀺𑀬𑁄𑀢𑀺 𑀮𑁂𑀔𑀸𑀬𑁄. 𑀢𑀢𑁆𑀣𑀸𑀢𑀺 𑀅𑀝𑁆𑀝𑀸𑀦𑁂, 𑀆𑀓𑀺𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀦𑁆𑀥𑀩𑁆𑀩𑀳𑀢𑁆𑀣𑀓𑁄𑀢𑀺 𑀕𑀦𑁆𑀥𑀩𑁆𑀩𑀸𑀦𑀁 𑀯𑀻𑀡𑀸𑀳𑀢𑁆𑀣𑁄 𑀯𑀺𑀬𑀸𑀢𑀺 𑀕𑀦𑁆𑀥𑀩𑁆𑀩𑀳𑀢𑁆𑀣𑀓𑁄. 𑀤𑀸𑀭𑀽𑀳𑀺 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀤𑀸𑀭𑀼𑀫𑀬𑀳𑀢𑁆𑀣𑁂𑀦𑀸’’𑀢𑀺. 𑀢𑁂𑀦𑀸𑀢𑀺 𑀕𑀦𑁆𑀥𑀩𑁆𑀩𑀳𑀢𑁆𑀣𑁂𑀦, 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀭𑀼𑀯𑀺𑀦𑁆𑀤𑀓𑀧𑀸𑀲𑀸𑀡𑀘𑀼𑀡𑁆𑀡𑀸𑀦𑀻𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀧𑀸𑀲𑀸𑀡𑀲𑁆𑀲 𑀘𑀼𑀡𑁆𑀡𑀸𑀦𑀺. 𑀢𑀦𑁆𑀢𑀺 𑀓𑀢𑀕𑀼𑀴𑀺𑀓𑀓𑀮𑀸𑀧𑀓𑀁, 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀕𑁆𑀕𑀬𑁆𑀳𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀭𑀻𑀭𑁂 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀲𑀭𑀻𑀭𑁂𑀦 𑀲𑀭𑀻𑀭’’𑀦𑁆𑀢𑀺. 𑀫𑀓𑀭𑀤𑀦𑁆𑀢𑀓𑁂𑀢𑀺 𑀫𑀓𑀭𑀦𑀸𑀫𑀓𑀲𑁆𑀲 𑀫𑀘𑁆𑀙𑀲𑁆𑀲 𑀤𑀦𑁆𑀢𑀲𑀤𑀺𑀲𑁂 𑀤𑀦𑁆𑀢𑁂. 𑀫𑀮𑁆𑀮𑀓𑀫𑀽𑀮𑀲𑀡𑁆𑀞𑀸𑀦𑁂𑀦𑀸𑀢𑀺 𑀔𑁂𑀴𑀧𑀝𑀺𑀕𑁆𑀕𑀳𑀧𑀸𑀤𑀲𑀡𑁆𑀞𑀸𑀦𑁂𑀦. 𑀕𑀺𑀮𑀸𑀦𑀲𑁆𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀕𑀺𑀮𑀸𑀦𑀲𑁆𑀲 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁨𑁪𑁪. 𑀤𑀦𑁆𑀢𑁂𑀢𑀺 𑀫𑀓𑀭𑀤𑀦𑁆𑀢𑁂. 𑀅𑀓𑀢𑀁 𑀫𑀮𑁆𑀮𑀓𑀁 𑀅𑀓𑀢𑀫𑀮𑁆𑀮𑀓𑀁. 𑀓𑀧𑀸𑀮𑀔𑀡𑁆𑀟𑀁 𑀯𑀸𑀢𑀺 𑀯𑀸𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀓𑀸𑀲𑀨𑀼𑀮𑁆𑀮𑀯𑀺𑀭𑀳𑀺𑀢𑀢𑁆𑀢𑀸 𑀯𑀢𑁆𑀣𑀯𑀝𑁆𑀝𑀺 𑀉𑀓𑁆𑀓𑀸𑀲𑀺𑀓𑀸 𑀦𑀸𑀫. 𑀦𑀢𑁆𑀣𑀺 𑀓𑀸𑀲𑀁 𑀨𑀼𑀮𑁆𑀮𑀫𑁂𑀢𑀺𑀲𑁆𑀲𑀸𑀢𑀺 𑀉𑀓𑁆𑀓𑀸𑀲𑀸, 𑀲𑀸 𑀏𑀯 𑀉𑀓𑁆𑀓𑀸𑀲𑀺𑀓𑀸. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀕𑀺𑀮𑀸𑀦𑀸𑀕𑀺𑀮𑀸𑀦𑀲𑁆𑀲 𑀯𑀸 𑀚𑀭𑀸𑀤𑀼𑀩𑁆𑀩𑀮𑀢𑀭𑀼𑀡𑀩𑀮𑀯𑀲𑁆𑀲 𑀯𑀸. 𑀧𑀺𑀝𑁆𑀞𑀺𑀦𑁆𑀢𑀺 𑀧𑀺𑀝𑁆𑀞𑀺𑀬𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀧𑀸𑀡𑀺𑀢𑀮𑀲𑁆𑀲 𑀧𑀼𑀣𑀼𑀝𑁆𑀞𑀸𑀦𑀁 𑀧𑀼𑀣𑀼𑀧𑀸𑀡𑀺, 𑀢𑁂𑀦 𑀓𑀢𑀁 𑀧𑀼𑀣𑀼𑀧𑀸𑀡𑀺𑀓𑀁, 𑀳𑀢𑁆𑀣𑀧𑀭𑀺𑀓𑀫𑁆𑀫𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑀢𑁆𑀣𑀧𑀭𑀺𑀓𑀫𑁆𑀫𑀁 𑀯𑀼𑀘𑁆𑀘𑀢𑀻’’𑀢𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀦𑁆𑀳𑀸𑀬𑀦𑁆𑀢𑀸𑀦𑀁 𑀯𑀸 𑀅𑀦𑁆𑀳𑀸𑀬𑀦𑁆𑀢𑀸𑀦𑀁 𑀯𑀸 𑀲𑀩𑁆𑀩𑁂𑀲𑀁.

𑁨𑁪𑁫. 𑀓𑀡𑁆𑀡𑀢𑁄𑀢𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀢𑁄. 𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀺𑀯𑀮𑁆𑀮𑀺𑀲𑀤𑀺𑀲𑀢𑁆𑀢𑀸 𑀯𑀮𑁆𑀮𑀺𑀓𑀸 𑀦𑀸𑀫. 𑀧𑀮𑀫𑁆𑀩𑀓𑀲𑀼𑀢𑁆𑀢𑀦𑁆𑀢𑀺 𑀧𑀭𑀺𑀫𑀼𑀜𑁆𑀘𑀺𑀢𑁆𑀯𑀸 𑀮𑀫𑁆𑀩𑀺𑀬𑀢𑀺 𑀅𑀦𑁂𑀦𑀸𑀢𑀺 𑀧𑀮𑀫𑁆𑀩𑀓𑀁, 𑀢𑀫𑁂𑀯 𑀲𑀼𑀢𑁆𑀢𑀁 𑀧𑀮𑀫𑁆𑀩𑀓𑀲𑀼𑀢𑁆𑀢𑀁. 𑀯𑀮𑀬𑀦𑁆𑀢𑀺 𑀦𑀺𑀬𑀼𑀭𑀁.

𑁨𑁪𑁬. 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀦𑀺𑀬𑀼𑀢𑁆𑀢𑀁 𑀤𑀼𑀫𑀸𑀲𑀺𑀓𑀁. 𑀤𑁆𑀯𑁂 𑀅𑀗𑁆𑀕𑀼𑀮𑀸𑀦𑀺 𑀏𑀢𑀲𑁆𑀲𑀸𑀢𑀺 𑀤𑀼𑀯𑀗𑁆𑀕𑀼𑀮𑀁, 𑀓𑁂𑀲𑁄. 𑀉𑀪𑀬𑁂𑀦𑀧𑀻𑀢𑀺 𑀤𑀼𑀫𑀸𑀲𑀺𑀓𑀤𑀼𑀯𑀗𑁆𑀕𑀼𑀮𑀲𑀗𑁆𑀔𑀸𑀢𑁂𑀦 𑀉𑀪𑀬𑁂𑀦𑀧𑀺. 𑀅𑀬𑀫𑁆𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀯 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀤𑀼𑀫𑀸𑀲𑀺𑀓𑀤𑀼𑀯𑀗𑁆𑀕𑀼𑀮𑀢𑁄.

𑀑𑀲𑀡𑁆𑀞𑁂𑀦𑁆𑀢𑀻𑀢𑀺 𑀏𑀢𑁆𑀣 𑀑𑀮𑀺𑀔𑀺𑀢𑁆𑀯𑀸 𑀲𑀫𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀑𑀮𑀺𑀔𑀺𑀢𑁆𑀯𑀸 𑀲𑀦𑁆𑀦𑀺𑀲𑀻𑀤𑀸𑀧𑁂𑀦𑁆𑀢𑀻’’𑀢𑀺. 𑀤𑀦𑁆𑀢𑀫𑀬𑀸𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀝𑁆𑀞𑀺𑀫𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀳𑀢𑁆𑀣𑀨𑀡𑁂𑀦𑀸𑀢𑀺 𑀳𑀢𑁆𑀣𑀲𑀗𑁆𑀔𑀸𑀢𑁂𑀦 𑀨𑀡𑁂𑀦. 𑀘𑀺𑀓𑁆𑀔𑀮𑁆𑀮𑁂𑀦𑀸𑀢𑀺 𑀘𑀺𑀓𑁆𑀔𑀮𑁆𑀮𑀲𑀤𑀺𑀲𑁂𑀦 𑀦𑀺𑀬𑁆𑀬𑀸𑀲𑁂𑀦. 𑀉𑀤𑀓𑀢𑁂𑀮𑁂𑀦𑀸𑀢𑀺 𑀏𑀢𑁆𑀣 𑀉𑀤𑀓𑀜𑁆𑀘 𑀢𑁂𑀮𑀜𑁆𑀘𑀸𑀢𑀺 𑀘 𑀉𑀤𑀓𑀲𑀗𑁆𑀔𑀸𑀢𑁂𑀦 𑀢𑁂𑀮𑁂𑀦𑀸𑀢𑀺 𑀘 𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 𑀆𑀳 ‘‘𑀉𑀤𑀓𑀫𑀺𑀲𑁆𑀲𑀓𑁂𑀦 𑀢𑁂𑀮𑁂𑀦𑀸’’𑀢𑀺. 𑀇𑀫𑀺𑀦𑀸 𑀉𑀤𑀓𑁂𑀦 𑀫𑀺𑀲𑁆𑀲𑀓𑀁 𑀢𑁂𑀮𑀁 𑀉𑀤𑀓𑀢𑁂𑀮𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀝𑁆𑀞𑀮𑁄𑀫𑁂𑀢𑀺 𑀉𑀝𑁆𑀞𑀺𑀢𑀮𑁄𑀫𑁂. 𑀳𑀢𑁆𑀣𑀁 𑀢𑁂𑀫𑁂𑀢𑁆𑀯𑀸𑀢𑀺 𑀳𑀢𑁆𑀣𑀁 𑀉𑀤𑀓𑀢𑁂𑀮𑁂𑀦 𑀢𑁂𑀫𑁂𑀢𑁆𑀯𑀸. 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑁄𑀓𑀺𑀡𑁆𑀡𑀲𑀺𑀭𑀸𑀦𑀫𑁆𑀧𑀻𑀢𑀺 𑀉𑀡𑁆𑀳𑁂𑀦 𑀅𑀪𑀺𑀢𑀢𑁆𑀢𑁄 𑀘 𑀭𑀚𑁂𑀳𑀺 𑀑𑀓𑀺𑀡𑁆𑀡𑀲𑀺𑀭𑁄 𑀘 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑁄𑀓𑀺𑀡𑁆𑀡𑀲𑀺𑀭𑀸, 𑀅𑀣 𑀯𑀸 𑀉𑀡𑁆𑀳𑁂𑀦 𑀅𑀪𑀺𑀢𑀢𑁆𑀢𑁄 𑀲𑀺𑀭𑁄 𑀏𑀢𑁂𑀲𑀦𑁆𑀢𑀺 𑀉𑀡𑁆𑀳𑀸𑀪𑀺𑀢𑀢𑁆𑀢𑀲𑀺𑀭𑀸, 𑀭𑀚𑁂𑀳𑀺 𑀑𑀓𑀺𑀡𑁆𑀡𑁄 𑀲𑀺𑀭𑁄 𑀏𑀢𑁂𑀲𑀦𑁆𑀢𑀺 𑀭𑀚𑁄𑀓𑀺𑀡𑁆𑀡𑀲𑀺𑀭𑀸, 𑀉𑀡𑁆𑀳𑀸𑀪𑀺𑀢𑀢𑁆𑀢𑀲𑀺𑀭𑀸 𑀘 𑀭𑀚𑁄𑀓𑀺𑀡𑁆𑀡𑀲𑀺𑀭𑀸 𑀘 𑀉𑀡𑁆𑀳𑀸𑀪𑀺𑀢𑀢𑁆𑀢𑀭𑀚𑁄𑀓𑀺𑀡𑁆𑀡𑀲𑀺𑀭𑀸, 𑀧𑀼𑀩𑁆𑀩𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁄, 𑀢𑁂𑀲𑀫𑁆𑀧𑀺. 𑀅𑀮𑁆𑀮𑀳𑀢𑁆𑀣𑁂𑀦𑀸𑀢𑀺 𑀅𑀤𑁆𑀤𑀳𑀢𑁆𑀣𑁂𑀦, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑁨𑁪𑁭. 𑀬𑁂𑀲𑀼 𑀓𑀁𑀲𑀧𑀢𑁆𑀢𑀸𑀤𑀻𑀲𑀼 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀓𑀁𑀲𑀧𑀢𑁆𑀢𑀸𑀤𑀻𑀦𑀺𑀧𑀻𑀢𑀺 𑀬𑁄𑀚𑀦𑀸. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀲𑁆𑀫𑀺𑀁 𑀓𑀲𑁆𑀫𑀺𑀁𑀘𑀺 𑀆𑀤𑀸𑀲𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀜𑁆𑀙𑀯𑀺 𑀦𑀼 𑀔𑁄𑀢𑀺 𑀲𑀜𑁆𑀚𑀸𑀢𑀸 𑀙𑀯𑀺 𑀦𑀼 𑀔𑁄, 𑀅𑀳𑀁 𑀚𑀺𑀡𑁆𑀡𑁄 𑀅𑀫𑁆𑀳𑀺 𑀦𑀼 𑀔𑁄, 𑀦𑁄𑀢𑀺 𑀬𑁄𑀚𑀦𑀸.

𑀫𑀼𑀔𑀁 𑀆𑀮𑀺𑀫𑁆𑀧𑀦𑁆𑀢𑀻𑀢𑀺 𑀏𑀢𑁆𑀣 𑀓𑁂𑀳𑀺 𑀆𑀮𑀺𑀫𑁆𑀧𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀭𑀸𑀕𑀓𑀭𑁂𑀳𑀺 𑀫𑀼𑀔𑀮𑁂𑀧𑀦𑁂𑀳𑀻’’𑀢𑀺. ‘‘𑀫𑀦𑁄𑀲𑀺𑀮𑀸𑀬𑀸’’𑀢𑀺 𑀇𑀫𑀺𑀦𑀸 𑀫𑀦𑁄𑀲𑀺𑀮𑀸 𑀏𑀯 𑀫𑀦𑁄𑀲𑀺𑀮𑀺𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀸𑀦𑀻𑀢𑀺 𑀮𑀜𑁆𑀙𑀦𑀸𑀦𑀺. 𑀳𑀭𑀺𑀢𑀸𑀮𑀸𑀤𑀻𑀳𑀺𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀫𑀦𑁄𑀲𑀺𑀮𑀺𑀓𑀸𑀬 𑀏𑀯, 𑀅𑀣 𑀔𑁄 𑀳𑀭𑀺𑀢𑀸𑀮𑀸𑀤𑀻𑀳𑀺𑀧𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁪𑁮. 𑀦 𑀪𑀺𑀓𑁆𑀔𑀯𑁂 𑀦𑀘𑁆𑀘𑀁 𑀯𑀸𑀢𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀦𑀺𑀘𑁆𑀘𑀸𑀧𑁂𑀦𑁆𑀢𑀲𑁆𑀲 𑀯𑀸𑀢𑀺 𑀧𑀭𑁂𑀳𑀺 𑀦𑀘𑁆𑀘𑀸𑀧𑁂𑀦𑁆𑀢𑀲𑁆𑀲 𑀯𑀸. 𑀲𑀸𑀥𑀼𑀕𑀻𑀢𑀦𑁆𑀢𑀺 𑀲𑀼𑀦𑁆𑀤𑀭𑀁 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀕𑀻𑀢𑀁, 𑀲𑀚𑁆𑀚𑀦𑀸𑀦𑀁 𑀯𑀸. 𑀤𑀦𑁆𑀢𑀕𑀻𑀢𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀕𑀻𑀢𑀁. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀕𑀸𑀬𑀦𑀢𑁄 𑀧𑀼𑀩𑁆𑀩𑀪𑀸𑀕𑁂. 𑀕𑀸𑀬𑀸𑀧𑁂𑀦𑁆𑀢𑀲𑁆𑀲𑀸𑀧𑀻𑀢𑀺 𑀧𑀭𑁂𑀳𑀺 𑀯𑀸 𑀕𑀸𑀬𑀸𑀧𑁂𑀦𑁆𑀢𑀲𑁆𑀲𑀸𑀧𑀺. 𑀬𑀁 𑀧𑀦𑀸𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀬𑀁 𑀧𑀳𑀭𑀢𑀺, 𑀢𑀢𑁆𑀣 𑀧𑀳𑀭𑀡𑁂 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀦𑁆𑀢𑀺 𑀅𑀔𑀺𑀮𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀁. 𑀧𑀲𑁆𑀲𑀢𑁄𑀢𑀺 𑀧𑀲𑁆𑀲𑀦𑁆𑀢𑀲𑁆𑀲 𑀘 𑀲𑀼𑀡𑀦𑁆𑀢𑀲𑁆𑀲 𑀘. 𑀲𑀯𑀦𑀫𑁆𑀧𑀺 𑀳𑀺 𑀏𑀓𑀲𑁂𑀲𑁂𑀦 𑀯𑀸 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀯𑀸 𑀧𑀲𑁆𑀲𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀯𑀺𑀳𑀸𑀭𑀢𑁄𑀢𑀺 𑀅𑀦𑀘𑁆𑀘𑀅𑀕𑀻𑀢𑀅𑀯𑀸𑀤𑀺𑀢𑀝𑁆𑀞𑀸𑀦𑀯𑀺𑀳𑀸𑀭𑀢𑁄. 𑀯𑀺𑀳𑀸𑀭𑀦𑁆𑀢𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀝𑁆𑀞𑀸𑀦𑀯𑀺𑀳𑀸𑀭𑀁. 𑀅𑀲𑀦𑀲𑀸𑀮𑀸𑀬𑀸𑀢𑀺 𑀕𑀸𑀫𑁂 𑀞𑀺𑀢𑀸𑀬 𑀅𑀲𑀦𑀲𑀸𑀮𑀸𑀬.

𑁨𑁪𑁯. 𑀲𑀭𑀓𑀺𑀭𑀺𑀬𑀦𑁆𑀢𑀺 𑀲𑀭𑀲𑁆𑀲 𑀓𑀺𑀭𑀺𑀬𑀁. 𑀇𑀫𑀺𑀦𑀸 𑀲𑀭𑀓𑀼𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀲𑀭𑀲𑁆𑀲 𑀓𑀭𑀡𑀁 𑀲𑀭𑀓𑀼𑀢𑁆𑀢𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀮𑀤𑁆𑀥𑀁 𑀲𑀫𑀸𑀥𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀙𑀺𑀫𑀸 𑀚𑀦𑀢𑀸𑀢𑀺 𑀏𑀢𑁆𑀣 𑀲𑀫𑀽𑀳𑀺𑀁 𑀅𑀯𑀬𑀯𑀁 𑀯𑀺𑀦𑀸 𑀲𑀫𑀽𑀳𑀲𑁆𑀲 𑀅𑀯𑀬𑀯𑀺𑀦𑁄 𑀅𑀪𑀸𑀯𑀸 𑀢𑀸𑀧𑀘𑁆𑀘𑀬𑁄 𑀲𑁆𑀯𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀧𑀘𑁆𑀙𑀺𑀫𑁄 𑀚𑀦𑁄’’𑀢𑀺. 𑀢𑀁 𑀢𑀁 𑀯𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀯𑀢𑁆𑀢𑀸𑀤𑀺𑀁 𑀢𑀁 𑀢𑀁 𑀯𑀢𑁆𑀢𑀁. 𑀅𑀓𑁆𑀔𑀭𑀸𑀦𑀺 𑀯𑀺𑀦𑀸𑀲𑁂𑀢𑁆𑀯𑀸𑀢𑀺 𑀅𑀜𑁆𑀜𑀣𑀸 𑀯𑀢𑁆𑀢𑀩𑁆𑀩𑀸𑀦𑀺 𑀅𑀓𑁆𑀔𑀭𑀸𑀦𑀺 𑀅𑀜𑁆𑀜𑀣𑀸 𑀯𑀤𑀦𑁂𑀦 𑀘 𑀤𑀻𑀖𑀸𑀤𑀻𑀦𑀺 𑀭𑀲𑁆𑀲𑀸𑀤𑀺𑀯𑀤𑀦𑁂𑀦 𑀘 𑀯𑀺𑀦𑀸𑀲𑁂𑀢𑁆𑀯𑀸. 𑀥𑀫𑁆𑀫𑁂 𑀧𑀦𑀸𑀢𑀺 𑀏𑀢𑁆𑀣 𑀲𑀤𑁆𑀤𑁄 𑀧𑀦 𑀯𑀺𑀲𑁂𑀲𑀚𑁄𑀢𑀓𑁄. 𑀕𑀻𑀢𑀢𑁄 𑀯𑀺𑀲𑁂𑀲𑁄𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀳𑀺 𑀅𑀢𑁆𑀣𑁄. 𑀲𑀼𑀢𑁆𑀢𑀦𑁆𑀢𑀯𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀲𑁆𑀲 𑀉𑀘𑁆𑀘𑀸𑀭𑀡𑀁 𑀯𑀢𑁆𑀢𑀁. 𑀏𑀲𑁂𑀯 𑀦𑀬𑁄 ‘‘𑀚𑀸𑀢𑀓𑀯𑀢𑁆𑀢𑀁 𑀕𑀸𑀣𑀸𑀯𑀢𑁆𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀢𑀦𑁆𑀢𑀺 𑀯𑀢𑁆𑀢𑀁. 𑀬𑀤𑀺 𑀧𑀦 𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀅𑀢𑀺𑀤𑀻𑀖𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀯𑀁 𑀲𑀢𑀺 𑀬𑀣𑀸 𑀲𑀼𑀢𑁆𑀢𑀦𑁆𑀢𑀯𑀢𑁆𑀢𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀓𑀣𑀁 𑀤𑀲𑁆𑀲𑁂𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀘𑀢𑀼𑀭𑀲𑁆𑀲𑁂𑀦 𑀯𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀘𑀢𑀼𑀭𑀲𑁆𑀲𑁂𑀦 𑀯𑀢𑁆𑀢𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑁂𑀦 𑀉𑀘𑁆𑀘𑀸𑀭𑀡𑀯𑀢𑁆𑀢𑁂𑀦. 𑀧𑀭𑀺𑀫𑀡𑁆𑀟𑀮𑀸𑀦𑀻𑀢𑀺 𑀲𑀫𑀦𑁆𑀢𑀢𑁄 𑀫𑀡𑁆𑀟𑀮𑀸𑀦𑀺 𑀩𑀺𑀫𑁆𑀩𑀸𑀦𑀺 𑀧𑀼𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀲𑀭𑁂𑀦 𑀪𑀡𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀭𑀪𑀜𑁆𑀜𑀦𑁆𑀢𑀺 𑀏𑀢𑁆𑀣 𑀲𑀭𑁂𑀦 𑀪𑀡𑀺𑀢𑀩𑁆𑀩𑀦𑁆𑀢𑀺 𑀲𑀭𑀪𑀜𑁆𑀜𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀭𑀪𑀜𑁆𑀜𑁂 𑀓𑀺𑀭 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀭𑀗𑁆𑀕𑀯𑀢𑁆𑀣𑀸𑀤𑀻𑀦𑀁 𑀉𑀘𑁆𑀘𑀸𑀭𑀡𑀯𑀺𑀥𑀸𑀦𑀸𑀦𑀺 (𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕 𑁨𑁪𑁯; 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁪𑁯; 𑀯𑀺. 𑀯𑀺. 𑀝𑀻. 𑀘𑀽𑀴𑀯𑀕𑁆𑀕 𑁨.𑁨𑁪𑁮-𑁯) 𑀏𑀢𑀭𑀳𑀺 𑀦𑀢𑁆𑀣𑀺. 𑀤𑁆𑀯𑀢𑁆𑀢𑀺𑀁𑀲𑀯𑀢𑁆𑀢𑀸𑀦𑀻𑀢𑀺 𑀘 𑀲𑀗𑁆𑀔𑁆𑀬𑀸𑀫𑀢𑁆𑀢𑀫𑁂𑀯 𑀅𑀢𑁆𑀣𑀺, 𑀦 𑀲𑀗𑁆𑀔𑁆𑀬𑁂𑀬𑁆𑀬𑀁. 𑀢𑀲𑁆𑀫𑀸 𑀝𑀻𑀓𑀸𑀲𑀼 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁪𑁯; 𑀯𑀚𑀺𑀭. 𑀝𑀻. 𑀘𑀽𑀴𑀯𑀕𑁆𑀕. 𑁨𑁪𑁯) ‘‘𑀢𑀭𑀗𑁆𑀕𑀯𑀢𑁆𑀢𑀸𑀤𑀻𑀦𑀁 𑀉𑀘𑁆𑀘𑀸𑀭𑀡𑀯𑀺𑀥𑀸𑀦𑀸𑀦𑀺 𑀦𑀝𑁆𑀞𑀧𑀬𑁄𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀅𑀬𑀜𑁆𑀳𑀺 𑀅𑀢𑁆𑀣𑀺𑀲𑀤𑁆𑀤𑁄 𑀦𑀺𑀧𑀸𑀢𑁄. 𑀢𑁂𑀲𑀽𑀢𑀺 𑀤𑁆𑀯𑀢𑁆𑀢𑀺𑀁𑀲𑀯𑀢𑁆𑀢𑁂𑀲𑀼. 𑀬𑀦𑁆𑀢𑀺 𑀯𑀢𑁆𑀢𑀁. 𑀉𑀘𑁆𑀘𑀸𑀭𑀡𑀯𑀺𑀥𑀸𑀦𑀸𑀦𑀺 𑀦𑀝𑁆𑀞𑀧𑀬𑁄𑀕𑀸𑀦𑀺𑀧𑀺 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑁂𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑁂𑀲𑀦𑁆𑀢𑀺 𑀤𑁆𑀯𑀢𑁆𑀢𑀺𑀁𑀲𑀯𑀢𑁆𑀢𑀸𑀦𑀁, 𑀮𑀓𑁆𑀔𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀯𑀺𑀦𑀸𑀲𑁂𑀢𑁆𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀯𑀺𑀓𑀸𑀭𑀁 𑀅𑀓𑀢𑁆𑀯𑀸’’𑀢𑀺. 𑀢𑀢𑁆𑀣 𑀯𑀺𑀓𑀸𑀭𑀓𑀭𑀡𑀁 𑀦𑀸𑀫 𑀬𑀢𑁆𑀢𑀓𑀸𑀳𑀺 𑀫𑀢𑁆𑀢𑀸𑀳𑀺 𑀅𑀓𑁆𑀔𑀭𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀢𑁄 𑀅𑀥𑀺𑀓𑀫𑀢𑁆𑀢𑀸𑀬𑀼𑀢𑁆𑀢𑀁 𑀓𑀢𑁆𑀯𑀸 𑀓𑀣𑀦𑀁, 𑀢𑀣𑀸 𑀅𑀓𑀢𑁆𑀯𑀸 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀘𑀢𑀼𑀭𑀲𑁆𑀲𑁂𑀦 𑀦𑀬𑁂𑀦 𑀧𑀯𑀢𑁆𑀢𑀦𑀁𑀬𑁂𑀯 𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄.

𑀩𑀸𑀳𑀺𑀭𑀮𑁄𑀫𑀺𑀁 𑀉𑀡𑁆𑀡𑀺𑀦𑁆𑀢𑀺 𑀏𑀢𑁆𑀣 ‘‘𑀩𑀸𑀳𑀺𑀭𑀮𑁄𑀫𑀺’’𑀦𑁆𑀢𑀺 𑀧𑀤𑀁 𑀪𑀸𑀯𑀦𑀧𑀼𑀁𑀲𑀓𑀦𑁆𑀢𑀺 𑀆𑀳 ‘‘𑀉𑀡𑁆𑀡𑀮𑁄𑀫𑀸𑀦𑀺 𑀩𑀳𑀺 𑀓𑀢𑁆𑀯𑀸’’𑀢𑀺. ‘‘𑀉𑀡𑁆𑀡𑀧𑀸𑀯𑀸𑀭’’𑀦𑁆𑀢𑀺 𑀇𑀫𑀺𑀦𑀸 𑀉𑀡𑁆𑀡𑀻𑀢𑀺 𑀏𑀢𑁆𑀣 𑀉𑀢𑁆𑀢𑀭𑀧𑀤𑀮𑁄𑀧𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀧𑀸𑀯𑀸𑀭𑀧𑀤𑁂𑀦 𑀉𑀡𑁆𑀡𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀡𑁆𑀡𑀻𑀢𑀺 𑀓𑀢𑁆𑀯𑀸 𑀢𑀤𑁆𑀥𑀺𑀢𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀢𑀣𑀸 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀘𑀦𑀲𑁆𑀲 𑀅𑀢𑁆𑀣𑀸𑀧𑀢𑁆𑀢𑀺𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑁄𑀫𑀸𑀦𑀺 𑀅𑀦𑁆𑀢𑁄 𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑁨𑁫𑁧. 𑀅𑀗𑁆𑀕𑀚𑀸𑀢𑀁 𑀙𑀺𑀦𑁆𑀤𑀦𑁆𑀢𑀲𑁆𑀲𑁂𑀯𑀸𑀢𑀺 𑀅𑀗𑁆𑀕𑀚𑀸𑀢𑀫𑁂𑀯 𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀅𑀗𑁆𑀕𑀚𑀸𑀢𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀫𑁂𑀯𑀸𑀢𑀺 𑀬𑁄𑀚𑀦𑀸. 𑀅𑀳𑀺𑀓𑀻𑀝𑀤𑀝𑁆𑀞𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼 𑀙𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸.

𑁨𑁫𑁨. 𑀉𑀧𑁆𑀧𑀦𑁆𑀦𑀸 𑀳𑁄𑀢𑀻𑀢𑀺 𑀧𑀝𑀺𑀮𑀸𑀪𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀉𑀧𑁆𑀧𑀦𑁆𑀦𑀪𑀸𑀯𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀲𑁄’’𑀢𑀺𑀆𑀤𑀺. 𑀢𑀢𑁆𑀣 𑀲𑁄𑀢𑀺 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀺, 𑀓𑀻𑀴𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀲𑁂𑀝𑁆𑀞𑀺𑀲𑁆𑀲. 𑀇𑀤𑀁 𑀧𑀤𑀁 ‘‘𑀚𑀸𑀮𑁂’’𑀢𑀺 𑀧𑀤𑁂 𑀲𑀸𑀫𑁆𑀬𑀢𑁆𑀣𑀙𑀝𑁆𑀞𑀻, ‘‘𑀉𑀧𑁆𑀧𑀦𑁆𑀦𑀸 𑀳𑁄𑀢𑀻’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀢𑀦𑁆𑀢𑀺 𑀘𑀦𑁆𑀤𑀦𑀕𑀡𑁆𑀞𑀺𑀁. 𑀅𑀲𑁆𑀲𑀸𑀢𑀺 𑀲𑁂𑀝𑁆𑀞𑀺𑀲𑁆𑀲. 𑀇𑀤𑀁 𑀧𑀤𑀁 ‘‘𑀧𑀼𑀭𑀺𑀲𑀸’’𑀢𑀺 𑀧𑀤𑁂 𑀲𑀸𑀫𑁆𑀬𑀢𑁆𑀣𑀙𑀝𑁆𑀞𑀻, ‘‘𑀅𑀤𑀁𑀲𑀽’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀻𑀢𑀺 𑀯𑀺𑀯𑀺𑀥𑀁, 𑀯𑀺𑀓𑀸𑀭𑀁 𑀯𑀸 𑀓𑀼𑀩𑁆𑀩𑀦𑀯𑀲𑁂𑀦 𑀧𑀯𑀢𑁆𑀢𑀸 𑀇𑀤𑁆𑀥𑀺 (𑀧𑀝𑀺. 𑀫. 𑁩.𑁧𑁨-𑁧𑁬; 𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁯-𑁩𑁭𑁩). 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀻𑀢𑀺 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀯𑀢𑁆𑀢𑀸 𑀇𑀤𑁆𑀥𑀺 (𑀧𑀝𑀺. 𑀫. 𑁩.𑁧𑁨-𑁧𑁬; 𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁯-𑁩𑁭𑁩).

𑀕𑀺𑀳𑀻 𑀉𑀧𑀦𑀸𑀫𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸𑀢𑀺 𑀩𑁆𑀬𑀜𑁆𑀚𑀦𑀁 𑀧𑀓𑁆𑀔𑀺𑀧𑀦𑀁 𑀓𑀢𑁆𑀯𑀸. 𑀢𑀦𑁆𑀢𑀺 𑀲𑀼𑀯𑀡𑁆𑀡𑀢𑀝𑁆𑀝𑀺𑀓𑀸𑀤𑀺𑀁. 𑀆𑀫𑀲𑀺𑀢𑀼𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀯𑀸𑀢𑀺 𑀯𑀸𑀲𑀤𑁆𑀤𑁄 𑀧𑀦𑀲𑀤𑁆𑀤𑀢𑁆𑀣𑁄. 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀕𑀺𑀳𑀺𑀯𑀺𑀓𑀝𑀸𑀦𑀺 𑀯𑀸𑀢𑀺 𑀯𑀸𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀕𑀺𑀳𑀺𑀯𑀺𑀓𑀝𑀸𑀦𑀺 𑀪𑀸𑀚𑀦𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀻𑀢𑀺 𑀳𑀺 𑀅𑀢𑁆𑀣𑁄. 𑀓𑀁𑀲𑀮𑁄𑀳𑀯𑀝𑁆𑀝𑀮𑁄𑀳𑀸𑀦𑀁 𑀲𑀪𑀸𑀕𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀁𑀲…𑀧𑁂… 𑀲𑀗𑁆𑀕𑀳𑀺𑀢𑁄’’𑀢𑀺.

𑁨𑁫𑁩. ‘‘𑀮𑀺𑀔𑀺𑀢𑀼’’𑀦𑁆𑀢𑀺 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀧𑀓𑀢𑀺𑀫𑀡𑁆𑀟𑀮𑀦𑁆𑀢𑀺 𑀏𑀢𑁆𑀣 𑀓𑀺𑀁 𑀫𑀓𑀭𑀤𑀦𑁆𑀢𑀫𑀢𑁆𑀢𑀫𑁆𑀧𑀺 𑀅𑀘𑁆𑀙𑀺𑀦𑁆𑀦𑀫𑀡𑁆𑀟𑀮𑀦𑁆𑀢𑀺 𑀆𑀳 ‘‘𑀫𑀓𑀭𑀤𑀦𑁆𑀢𑀘𑁆𑀙𑀺𑀦𑁆𑀦𑀓𑀫𑀡𑁆𑀟𑀮𑀫𑁂𑀯𑀸’’𑀢𑀺.

𑁨𑁫𑁪. 𑀧𑀳𑀭𑀺𑀢𑁆𑀯𑀸𑀢𑀺 𑀆𑀯𑀝𑁆𑀝𑀦𑀢𑁄 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸. 𑀢𑀬𑁄 𑀧𑀢𑁆𑀢𑁂 𑀉𑀧𑀭𑀼𑀧𑀭𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀽𑀫𑀺𑀆𑀥𑀸𑀭𑀓𑁄 𑀦𑀸𑀫 𑀪𑀽𑀫𑀺𑀬𑀸 𑀆𑀲𑀦𑁆𑀦𑁄 𑀤𑀦𑁆𑀢𑀸𑀤𑀻𑀳𑀺 𑀓𑀢𑁄 𑀯𑀮𑀬𑀸𑀥𑀸𑀭𑀓𑁄. 𑀤𑀸𑀭𑀼𑀆𑀥𑀸𑀭𑀓𑁄 𑀦𑀸𑀫 𑀏𑀓𑀤𑀸𑀭𑀼𑀦𑀸 𑀓𑀢𑁄 𑀆𑀥𑀸𑀭𑀓𑁄. 𑀤𑀡𑁆𑀟𑀸𑀥𑀸𑀭𑀓𑁄 𑀦𑀸𑀫 𑀘𑀢𑀼𑀤𑀡𑁆𑀟𑀢𑁄 𑀧𑀝𑁆𑀞𑀸𑀬 𑀩𑀳𑀽𑀳𑀺 𑀤𑀡𑁆𑀟𑁂𑀳𑀺 𑀓𑀢𑁄 𑀆𑀥𑀸𑀭𑀓𑁄. 𑀢𑀢𑁆𑀣𑀸𑀢𑀺 𑀪𑀫𑀓𑁄𑀝𑀺𑀲𑀤𑀺𑀲𑀤𑀸𑀭𑀼 𑀆𑀥𑀸𑀭𑀓𑀢𑀺𑀤𑀡𑁆𑀟𑀓𑀸𑀥𑀸𑀭𑁂𑀲𑀼. 𑀕𑀳𑁂𑀢𑁆𑀯𑀸 𑀏𑀯𑀸𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀯, 𑀏𑀓𑀫𑁂𑀯 𑀞𑀧𑁂𑀢𑀩𑁆𑀩𑀁 𑀇𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀢𑀢𑁆𑀣𑁂𑀯𑀸𑀢𑀺 𑀫𑀺𑀟𑁆𑀠𑀦𑁆𑀢𑁂𑀬𑁂𑀯. 𑀯𑀺𑀢𑁆𑀣𑀺𑀡𑁆𑀡𑀸𑀬𑀸𑀢𑀺 𑀯𑀺𑀢𑁆𑀣𑀸𑀭𑀸𑀬. 𑀩𑀸𑀳𑀺𑀭𑀧𑀲𑁆𑀲𑁂𑀢𑀺 𑀓𑀼𑀝𑁆𑀝𑀲𑁆𑀲 𑀩𑀸𑀳𑀺𑀭𑀧𑀲𑁆𑀲𑁂. 𑀓𑀢𑀸𑀬𑀸𑀢𑀺 𑀓𑀼𑀝𑁆𑀝𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀁 𑀓𑀢𑀸𑀬. 𑀏𑀢𑁆𑀣𑀸𑀢𑀺 𑀧𑀭𑀺𑀪𑀡𑁆𑀟𑀦𑁆𑀢𑁂.

𑀬𑀁 𑀯𑀢𑁆𑀣𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀢𑁆𑀢𑁄 𑀞𑀧𑀺𑀬𑀢𑀻𑀢𑀺 𑀯𑀢𑁆𑀣𑀁 𑀘𑁄𑀴𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀁 𑀧𑀦𑀸𑀢𑀺 𑀘𑁄𑀴𑀓𑁂 𑀧𑀦. 𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀯𑀸𑀮𑀺𑀓𑀸𑀬𑀁. 𑀦 𑀤𑀼𑀲𑁆𑀲𑀢𑀻𑀢𑀺 𑀧𑀢𑁆𑀢𑁄 𑀦 𑀤𑀼𑀲𑁆𑀲𑀢𑀺. 𑀧𑀢𑁆𑀢𑀫𑀸𑀴𑀓𑀦𑁆𑀢𑀺 𑀧𑀢𑁆𑀢𑀲𑁆𑀲 𑀞𑀧𑀦𑀢𑁆𑀣𑀸𑀬 𑀓𑀢𑀁 𑀅𑀝𑁆𑀝𑀁. 𑀪𑀡𑁆𑀟𑀓𑀼𑀓𑁆𑀔𑀴𑀺𑀓𑀸𑀢𑀺 𑀧𑀢𑁆𑀢𑀸𑀤𑀺𑀪𑀡𑁆𑀟𑀓𑀸𑀦𑀁 𑀧𑀓𑁆𑀔𑀺𑀧𑀦𑀸 𑀉𑀓𑁆𑀔𑀴𑀺𑀓𑀸. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀪𑀺𑀢𑁆𑀢𑀺𑀔𑀻𑀮𑀸𑀤𑀺𑀓𑁂 𑀬𑀲𑁆𑀫𑀺𑀁 𑀓𑀲𑁆𑀫𑀺𑀁𑀘𑀺. 𑀮𑀕𑁆𑀕𑁂𑀦𑁆𑀢𑀲𑁆𑀲𑀸𑀢𑀺 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀮𑀕𑁆𑀕𑁂𑀦𑁆𑀢𑀲𑁆𑀲. 𑀦𑀺𑀲𑀻𑀤𑀦𑀲𑀬𑀦𑀢𑁆𑀣𑀁 𑀯𑀸 𑀓𑀢𑀁 𑀳𑁄𑀢𑀽𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀦𑀸𑀢𑀺 𑀧𑀢𑁆𑀢𑀢𑁄 𑀅𑀜𑁆𑀜𑁂𑀦. 𑀅𑀝𑁆𑀝𑀓𑀙𑀦𑁆𑀦𑁂𑀦𑀸𑀢𑀺 𑀅𑀝𑁆𑀝𑀧𑀢𑀺𑀭𑀽𑀧𑁂𑀦, 𑀅𑀝𑁆𑀝𑀓𑀲𑀤𑀺𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀅𑀝𑁆𑀝𑀓𑀙𑀦𑁆𑀦𑁂𑀦 𑀞𑀧𑀺𑀢𑁂 𑀫𑀜𑁆𑀘𑀧𑀻𑀞𑁂. 𑀅𑀁𑀲𑁂 𑀩𑀤𑁆𑀥𑀺𑀬𑀢𑀺 𑀅𑀦𑁂𑀦𑀸𑀢𑀺 𑀅𑀁𑀲𑀩𑀤𑁆𑀥𑁄, 𑀲𑁄𑀬𑁂𑀯 𑀅𑀁𑀲𑀩𑀤𑁆𑀥𑀓𑁄, 𑀢𑁂𑀦 𑀮𑀕𑁆𑀕𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀢𑁆𑀢𑁂 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀢𑁆𑀢𑁂𑀦 𑀧𑀽𑀭𑁄 𑀪𑀢𑁆𑀢𑀧𑀽𑀭𑁄, 𑀧𑀢𑁆𑀢𑁄. 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂 𑀙𑀢𑁆𑀢𑁂 𑀯𑀸 𑀅𑀝𑁆𑀝𑀓𑀁 𑀓𑀢𑁆𑀯𑀸 𑀞𑀧𑀺𑀢𑁂 𑀙𑀢𑁆𑀢𑁂 𑀯𑀸𑀢𑀺 𑀬𑁄𑀚𑀦𑀸. 𑀬𑁄 𑀓𑁄𑀘𑀺 𑀪𑀢𑁆𑀢𑀧𑀽𑀭𑁄𑀧𑀺 𑀢𑀼𑀘𑁆𑀙𑀧𑀢𑁆𑀢𑁄𑀧𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁫𑁫. 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀳𑀢𑁆𑀣𑁂 𑀧𑀢𑁆𑀢𑁄 𑀅𑀢𑁆𑀣𑀺, 𑀲𑁄 𑀏𑀯 𑀪𑀺𑀓𑁆𑀔𑀼 𑀧𑀢𑁆𑀢𑀳𑀢𑁆𑀣𑁄 𑀦 𑀳𑁄𑀢𑀺, 𑀅𑀧𑀺𑀘 𑀔𑁄 𑀧𑀦 𑀳𑀢𑁆𑀣𑁂 𑀯𑀸 𑀧𑀺𑀝𑁆𑀞𑀺𑀧𑀸𑀤𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀻𑀭𑀸𑀯𑀬𑀯𑁂 𑀧𑀢𑁆𑀢𑀲𑁆𑀫𑀺𑀁 𑀲𑀢𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀅𑀦𑀦𑁆𑀢𑀭𑀯𑀸𑀓𑁆𑀬𑁂𑀧𑀺. 𑀇𑀫𑁂𑀳𑀺 𑀯𑀸𑀓𑁆𑀬𑁂𑀳𑀺 ‘‘𑀧𑀢𑁆𑀢𑀳𑀢𑁆𑀣𑁄’’𑀢𑀺 𑀘 ‘‘𑀓𑀯𑀸𑀝𑀁 𑀧𑀡𑀸𑀫𑁂𑀢𑀼’’𑀦𑁆𑀢𑀺 𑀘 𑀉𑀧𑀮𑀓𑁆𑀔𑀡𑀫𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀽𑀘𑀺𑀁 𑀯𑀸 𑀅𑀯𑀸𑀧𑀼𑀭𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀜𑁆𑀘𑀺𑀓𑀸𑀬 𑀯𑀸𑀢𑀺 𑀯𑀸𑀲𑀤𑁆𑀤𑁄 ‘‘𑀲𑀭𑀻𑀭𑀸𑀯𑀬𑀯𑁂𑀦𑀸’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀢𑀺.

𑀮𑀸𑀩𑀼𑀓𑀝𑀸𑀳𑀦𑁆𑀢𑀺 𑀮𑀫𑁆𑀩𑀢𑀻𑀢𑀺 𑀮𑀸𑀩𑀼, 𑀮𑀸𑀩𑀼𑀬𑀸 𑀓𑀝𑀸𑀳𑀁 𑀮𑀸𑀩𑀼𑀓𑀝𑀸𑀳𑀁. ‘‘𑀢𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀏𑀓𑀯𑀸𑀭𑀫𑁂𑀯 𑀢𑁂𑀦 𑀆𑀫𑀺𑀲𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀙𑀟𑁆𑀟𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀖𑀝𑀺𑀓𑀧𑀸𑀮𑀦𑁆𑀢𑀺 𑀪𑀸𑀚𑀦𑀓𑀧𑀸𑀮𑀁. 𑀅𑀪𑀼𑀁 𑀫𑁂𑀢𑀺 𑀅𑀯𑀟𑁆𑀠𑀺 𑀫𑀬𑁆𑀳𑀁, 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. ‘‘𑀅𑀪𑀼 𑀫𑁂’’𑀢𑀺 (𑀫. 𑀦𑀺. 𑀅𑀝𑁆𑀞. 𑁨.𑁧𑁪𑁯; 𑀫. 𑀦𑀺. 𑀝𑀻. 𑁨.𑁧𑁪𑁯) 𑀯𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀺𑀢𑀸𑀕𑀫𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀉𑀢𑁆𑀭𑀸𑀲𑀯𑀘𑀦𑀦𑁆𑀢𑀺 𑀉𑀢𑁆𑀭𑀸𑀲𑁂𑀦 𑀯𑀘𑀦𑀓𑀸𑀭𑀡𑀁 𑀧𑀤𑀁. 𑀤𑀺𑀦𑁆𑀦𑀓𑀫𑁂𑀯𑀸𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑀓𑀫𑁂𑀯 𑀆𑀫𑀺𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀘𑀫𑁆𑀩𑁂𑀢𑁆𑀯𑀸𑀢𑀺 𑀫𑀼𑀔𑁂𑀦 𑀘𑀫𑁆𑀩𑁂𑀢𑁆𑀯𑀸. 𑀅𑀧𑀯𑀺𑀤𑁆𑀥𑀸𑀫𑀺𑀲𑀸𑀦𑀻𑀢𑀺 𑀙𑀟𑁆𑀟𑀺𑀢𑀸𑀦𑀺 𑀆𑀫𑀺𑀲𑀸𑀦𑀺. 𑀏𑀢𑁂𑀲𑀽𑀢𑀺 𑀘𑀮𑀓𑀸𑀤𑀻𑀲𑀼. 𑀅𑀦𑀼𑀘𑁆𑀙𑀺𑀝𑁆𑀞𑀁 𑀲𑀼𑀤𑁆𑀥𑀧𑀢𑁆𑀢𑀦𑁆𑀢𑀺 𑀦𑀢𑁆𑀣𑀺 𑀉𑀘𑁆𑀙𑀺𑀝𑁆𑀞𑁄 𑀏𑀢𑁆𑀣𑀸𑀢𑀺 𑀅𑀦𑀼𑀘𑁆𑀙𑀺𑀝𑁆𑀞𑁄, 𑀲𑀼𑀤𑁆𑀥𑀧𑀢𑁆𑀢𑁄, 𑀢𑀁. 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁂𑀦𑀸𑀢𑀺 𑀉𑀘𑁆𑀙𑀺𑀝𑁆𑀞𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀉𑀘𑁆𑀙𑀺𑀝𑁆𑀞𑁄, 𑀲𑁄𑀬𑁂𑀯 𑀳𑀢𑁆𑀣𑁄 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁄, 𑀢𑁂𑀦. 𑀯𑀸𑀫𑀳𑀢𑁆𑀣𑁂𑀦 𑀆𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀲𑀼𑀤𑁆𑀥𑀧𑀢𑁆𑀢𑁂. 𑀏𑀢𑁆𑀢𑀸𑀯𑀢𑀸𑀧𑀻𑀢𑀺 𑀏𑀢𑁆𑀢𑀓𑁂𑀦 𑀏𑀓𑀉𑀤𑀓𑀕𑁂𑀡𑁆𑀟𑀼𑀲𑀕𑀳𑀡𑀫𑀢𑁆𑀢𑁂𑀦𑀸𑀧𑀺. 𑀲𑁄𑀢𑀺 𑀲𑀼𑀤𑁆𑀥𑀧𑀢𑁆𑀢𑁄. 𑀳𑀢𑁆𑀣𑀁 𑀧𑀦𑀸𑀢𑀺 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑀫𑁆𑀧𑀺. 𑀧𑀦𑀲𑀤𑁆𑀤𑁄 𑀳𑁂𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀬𑀁 𑀅𑀝𑁆𑀞𑀺𑀁 𑀯𑀸 𑀬𑀁 𑀘𑀮𑀓𑀁 𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀫𑀘𑁆𑀙𑀫𑀁𑀲𑀨𑀮𑀸𑀤𑀻𑀲𑀼. 𑀢𑀦𑁆𑀢𑀺 𑀅𑀝𑁆𑀞𑀺𑀘𑀮𑀓𑀁. 𑀬𑀁 𑀧𑀦𑀸𑀢𑀺 𑀅𑀝𑁆𑀞𑀺𑀘𑀮𑀓𑀸𑀤𑀺𑀁 𑀧𑀦, 𑀧𑀝𑀺𑀔𑀸𑀤𑀺𑀢𑀼𑀓𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀧𑀼𑀦 𑀔𑀸𑀤𑀺𑀢𑀼𑀓𑀸𑀫𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑁂𑀯𑀸𑀢𑀺 𑀧𑀢𑁆𑀢𑁂 𑀏𑀯. 𑀓𑀢𑁆𑀯𑀸𑀢𑀺 𑀞𑀧𑀦𑀁 𑀓𑀢𑁆𑀯𑀸. 𑀬𑀁 𑀓𑀺𑀜𑁆𑀘𑀺 𑀅𑀝𑁆𑀞𑀺𑀓𑀡𑁆𑀝𑀓𑀸𑀤𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁫𑁬. 𑀲𑀢𑁆𑀣𑀓𑀯𑁂𑀞𑀦𑀓𑀦𑁆𑀢𑀺 𑀲𑀢𑁆𑀣𑀓𑀲𑁆𑀲 𑀯𑁂𑀞𑀦𑀓𑀭𑀡𑀁. 𑀧𑀺𑀧𑁆𑀨𑀮𑀺𑀓𑀁 𑀯𑀸 𑀤𑀡𑁆𑀟𑀲𑀢𑁆𑀣𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀧𑀺𑀧𑁆𑀨𑀸𑀮𑁂𑀢𑀺 𑀏𑀢𑀸𑀬𑀸𑀢𑀺 𑀧𑀺𑀧𑁆𑀨𑀮𑀺, 𑀲𑀸𑀬𑁂𑀯 𑀧𑀺𑀧𑁆𑀨𑀮𑀺𑀓𑀁. 𑀅𑀜𑁆𑀜𑀫𑁆𑀧𑀻𑀢𑀺 𑀧𑀺𑀧𑁆𑀨𑀮𑀺𑀓𑀢𑁄 𑀅𑀜𑁆𑀜𑀫𑁆𑀧𑀺. 𑀬𑀁𑀓𑀺𑀜𑁆𑀘𑀺 𑀤𑀡𑁆𑀟𑀁 𑀬𑁄𑀚𑁂𑀢𑁆𑀯𑀸 𑀓𑀢𑀲𑀢𑁆𑀣𑀓𑀁 𑀯𑀸 𑀤𑀡𑁆𑀟𑀲𑀢𑁆𑀣𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀤𑀡𑁆𑀟𑁂𑀦 𑀬𑁄𑀚𑀺𑀢𑀁 𑀲𑀢𑁆𑀣𑀓𑀁 𑀤𑀡𑁆𑀟𑀲𑀢𑁆𑀣𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀫𑀮𑀕𑁆𑀕𑀳𑀺𑀢𑀸𑀢𑀺 𑀅𑀬𑀫𑀮𑀕𑁆𑀕𑀳𑀺𑀢𑀸. 𑀓𑀺𑀡𑁆𑀡𑁂𑀦𑀸𑀢𑀺 𑀫𑀤𑀺𑀭𑀸𑀤𑀺𑀩𑀻𑀚𑁂𑀦 𑀓𑀺𑀡𑁆𑀡𑁂𑀦. 𑀢𑁂𑀦𑀸𑀢𑀺 𑀧𑀸𑀲𑀸𑀡𑀘𑀼𑀡𑁆𑀡𑀲𑀗𑁆𑀔𑀸𑀢𑁂𑀦 𑀲𑀭𑀺𑀢𑀓𑁂𑀦. 𑀫𑀓𑁆𑀔𑁂𑀢𑀼𑀦𑁆𑀢𑀺 𑀲𑀽𑀘𑀺𑀁 𑀫𑀓𑁆𑀔𑁂𑀢𑀼𑀁. 𑀫𑀓𑁆𑀔𑀺𑀢𑀫𑀥𑀼𑀲𑀺𑀢𑁆𑀣𑀓𑀁 𑀢𑀁 𑀲𑀭𑀺𑀢𑀓𑀁 𑀧𑀭𑀺𑀪𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀫𑀥𑀼𑀲𑀺𑀢𑁆𑀣𑀓𑀧𑀺𑀮𑁄𑀢𑀺𑀓𑀦𑁆𑀢𑀺 𑀫𑀥𑀼𑀲𑀺𑀢𑁆𑀣𑀓𑁂𑀦 𑀫𑀓𑁆𑀔𑀺𑀢𑀁 𑀧𑀺𑀮𑁄𑀢𑀺𑀓𑀁. 𑀢𑀢𑁆𑀣𑀸𑀢𑀺 𑀦𑀺𑀲𑁆𑀲𑁂𑀡𑀺𑀬𑀁. 𑀬𑀸𑀬 𑀭𑀚𑁆𑀚𑀼𑀬𑀸 𑀓𑀣𑀺𑀦𑁂 𑀩𑀦𑁆𑀥𑀦𑁆𑀢𑀺, 𑀲𑀸 𑀭𑀚𑁆𑀚𑀼 𑀓𑀣𑀺𑀦𑀭𑀚𑁆𑀚𑀼 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀤𑀻𑀖𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀫𑀸𑀡𑁂𑀦 𑀓𑀢𑁂 𑀓𑀣𑀺𑀦𑁂. 𑀤𑀡𑁆𑀟𑀓𑁂𑀢𑀺 𑀓𑀣𑀺𑀦𑀤𑀡𑁆𑀟𑀓𑀫𑁆𑀳𑀺. 𑀢𑀲𑁆𑀲𑀸𑀢𑀺 𑀤𑀻𑀖𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀫𑀸𑀡𑁂𑀦 𑀓𑀢𑀲𑁆𑀲 𑀓𑀣𑀺𑀦𑀲𑁆𑀲. 𑀇𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀤𑀻𑀖𑀪𑀺𑀓𑁆𑀔𑀼𑀢𑁄 𑀇𑀢𑀭𑀲𑁆𑀲 𑀭𑀲𑁆𑀲𑀪𑀺𑀓𑁆𑀔𑀼𑀦𑁄.

𑀤𑀡𑁆𑀟𑀓𑀣𑀺𑀦𑀧𑀫𑀸𑀡𑁂𑀦 𑀓𑀢𑀲𑁆𑀲 𑀓𑀝𑀲𑀸𑀭𑀓𑀲𑁆𑀲𑀸𑀢𑀺 𑀬𑁄𑀚𑀦𑀸. ‘‘𑀤𑀼𑀕𑀼𑀡𑀓𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀺𑀤𑀮𑀓𑀦𑁆𑀢𑀺 𑀤𑀼𑀕𑀼𑀡𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀦𑀸𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀦𑀦𑁆𑀥𑀦𑀭𑀚𑁆𑀚𑀼𑀦𑁆𑀢𑀺 𑀯𑀺𑀲𑁂𑀲𑁂𑀦 𑀦𑀳𑀺𑀬𑀢𑀺 𑀩𑀦𑁆𑀥𑀺𑀬𑀢𑀺 𑀏𑀢𑀸𑀬𑀸𑀢𑀺 𑀯𑀺𑀦𑀦𑁆𑀥𑀦𑀸, 𑀲𑀸𑀬𑁂𑀯 𑀭𑀚𑁆𑀚𑀼 𑀯𑀺𑀦𑀦𑁆𑀥𑀦𑀭𑀚𑁆𑀚𑀼, 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀯𑀺𑀦𑀦𑁆𑀥𑀺𑀢𑀼𑀁 𑀭𑀚𑁆𑀚𑀼’’𑀦𑁆𑀢𑀺. 𑀯𑀺𑀦𑀦𑁆𑀥𑀦𑀲𑀼𑀢𑁆𑀢𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦 𑀲𑀼𑀢𑁆𑀢𑀓𑁂𑀦𑀸𑀢𑀺 𑀯𑀺𑀦𑀦𑁆𑀥𑀦𑀲𑀼𑀢𑁆𑀢𑀓𑁂𑀦. 𑀢𑀢𑁆𑀣𑀸𑀢𑀺 𑀔𑀼𑀤𑁆𑀤𑀓𑀦𑀺𑀲𑁆𑀲𑁂𑀡𑀺𑀬𑀁 𑀓𑀸𑀘𑀺 𑀲𑀼𑀢𑁆𑀢𑀦𑁆𑀢𑀭𑀺𑀓𑀸𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀫𑀸𑀡𑀲𑀜𑁆𑀜𑀸𑀓𑀭𑀡𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀭𑀺𑀓𑀧𑀫𑀸𑀡𑀲𑁆𑀲 𑀲𑀜𑁆𑀜𑀸𑀓𑀭𑀡𑀁. 𑀓𑀸𑀴𑀲𑀼𑀢𑁆𑀢𑁂𑀦 𑀲𑀜𑁆𑀜𑀸𑀓𑀭𑀡𑀁 𑀯𑀺𑀬 𑀳𑀮𑀺𑀤𑁆𑀤𑀺𑀲𑀼𑀢𑁆𑀢𑁂𑀦 𑀲𑀜𑁆𑀜𑀸𑀓𑀭𑀡𑀦𑁆𑀢𑀺 𑀬𑁄𑀚𑀦𑀸. 𑀅𑀗𑁆𑀕𑀼𑀮𑀺𑀬𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀧𑀤𑀲𑁆𑀲 ‘‘𑀅𑀗𑁆𑀕𑀼𑀮𑀺𑀬𑀸’’𑀢𑀺 𑀓𑀭𑀡𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀢𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀽𑀘𑀺𑀫𑀼𑀔’’𑀦𑁆𑀢𑀺. 𑀅𑀗𑁆𑀕𑀼𑀮𑀺𑀓𑁄𑀲𑀓𑀦𑁆𑀢𑀺 𑀅𑀗𑁆𑀕𑀼𑀮𑀺𑀓𑀜𑁆𑀘𑀼𑀓𑀁.

𑁨𑁫𑁭. 𑀧𑀸𑀢𑀺𑀘𑀗𑁆𑀓𑁄𑀝𑀓𑀸𑀤𑀺𑀦𑁆𑀢𑀺 𑀏𑀢𑁆𑀣 𑀧𑀸𑀢𑀺 𑀦𑀸𑀫 𑀧𑀝𑀺𑀕𑁆𑀕𑀳𑀲𑀡𑁆𑀞𑀸𑀦𑁂𑀦 𑀓𑀢𑁄 𑀲𑀽𑀘𑀺𑀆𑀤𑀺𑀪𑀡𑁆𑀟𑀝𑁆𑀞𑀧𑀦𑁄 𑀪𑀸𑀚𑀦𑀯𑀺𑀲𑁂𑀲𑁄. 𑀆𑀓𑀺𑀭𑀺𑀢𑁆𑀯𑀸𑀢𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀑𑀥𑀼𑀦𑀺𑀢𑁆𑀯𑀸𑀢𑀺 𑀧𑀧𑁆𑀨𑁄𑀝𑁂𑀢𑁆𑀯𑀸. 𑀖𑀦𑀤𑀡𑁆𑀟𑀓𑀦𑁆𑀢𑀺 𑀦𑀺𑀭𑀦𑁆𑀢𑀭𑀤𑀡𑁆𑀟𑀓𑀁. 𑀅𑀦𑁆𑀢𑁄𑀓𑀢𑁆𑀯𑀸𑀢𑀺 𑀓𑀣𑀺𑀦𑀲𑁆𑀲 𑀅𑀦𑁆𑀢𑁄𑀓𑀢𑁆𑀯𑀸.

𑁨𑁫𑁮. 𑀯𑀺𑀦𑀦𑁆𑀥𑀺𑀢𑁆𑀯𑀸𑀢𑀺 𑀘𑁄𑀴𑀓𑁂𑀦 𑀯𑀺𑀦𑀦𑁆𑀥𑀺𑀢𑁆𑀯𑀸.

𑁨𑁫𑁯. 𑀅𑀧𑀭𑀺𑀲𑁆𑀲𑀸𑀯𑀦𑀓𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄𑀢𑀺 𑀬𑁄𑀚𑀦𑀸. 𑀬𑁄 𑀧𑀦 𑀬𑀸𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀚𑁆𑀛𑁂𑀤𑀡𑁆𑀟𑀓𑁂𑀢𑀺 𑀤𑀡𑁆𑀟𑀓𑀲𑁆𑀲 𑀫𑀚𑁆𑀛𑁂. 𑀉𑀤𑀓𑀦𑁆𑀢𑀺 𑀅𑀓𑀧𑁆𑀧𑀺𑀬𑀉𑀤𑀓𑀁. 𑀢𑀦𑁆𑀢𑀺 𑀉𑀤𑀓𑀁. 𑀬𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀦𑀁. 𑀉𑀤𑀓𑀁 𑀧𑀭𑀺𑀲𑀼𑀤𑁆𑀥𑀁 𑀳𑀼𑀢𑁆𑀯𑀸 𑀲𑀯𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀅𑀦𑁂𑀦𑀸𑀢𑀺 𑀧𑀭𑀺𑀲𑁆𑀲𑀸𑀯𑀦𑀁. 𑀬𑀁 𑀉𑀤𑀓𑁂 𑀑𑀢𑁆𑀣𑀭𑀺𑀢𑁆𑀯𑀸 𑀖𑀝𑁂𑀦 𑀉𑀤𑀓𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀑𑀢𑁆𑀣𑀭𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀁 𑀳𑀻’’𑀢𑀺𑀆𑀤𑀺. 𑀢𑀦𑁆𑀢𑀺 𑀧𑀭𑀺𑀲𑁆𑀲𑀸𑀯𑀦𑀁, 𑀩𑀦𑁆𑀥𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀽𑀢𑀺 𑀘𑀢𑀽𑀲𑀼 𑀔𑀸𑀡𑀼𑀓𑁂𑀲𑀼. 𑀲𑀩𑁆𑀩𑀧𑀭𑀺𑀬𑀦𑁆𑀢𑁂𑀢𑀺 𑀲𑀩𑁆𑀩𑀧𑀭𑀺𑀲𑁆𑀲𑀸𑀯𑀦𑀲𑁆𑀲 𑀧𑀭𑀺𑀬𑀦𑁆𑀢𑁂 𑀫𑁄𑀘𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀢𑁆𑀣𑀭𑀺𑀢𑁆𑀯𑀸𑀢𑀺 𑀑𑀕𑀸𑀳𑁂𑀢𑁆𑀯𑀸. 𑀘𑀻𑀯𑀭𑀓𑀼𑀝𑀺𑀓𑀸𑀢𑀺 𑀘𑀻𑀯𑀭𑁂𑀦 𑀓𑀢𑀸 𑀓𑀼𑀝𑀺𑀓𑀸, 𑀲𑀸 𑀫𑀓𑀲𑀸𑀦𑀁 𑀧𑀭𑀺𑀢𑁆𑀢𑀸𑀡𑀢𑁆𑀣𑀁 𑀓𑀢𑀢𑁆𑀢𑀸 𑀫𑀓𑀲𑀓𑀼𑀝𑀺𑀓𑀸𑀢𑀺 𑀯𑀼𑀘𑁆𑀘𑀢𑀺.

𑁨𑁬𑁦. 𑀲𑁂𑀫𑁆𑀳𑀸𑀤𑀺𑀤𑁄𑀲𑀼𑀲𑁆𑀲𑀦𑁆𑀦𑀓𑀸𑀬𑀸𑀢𑀺 𑀲𑁂𑀫𑁆𑀳𑀸𑀤𑀺𑀤𑁄𑀲𑁂𑀳𑀺 𑀉𑀲𑁆𑀲𑀦𑁆𑀦𑀓𑀸𑀬𑀸. 𑀅𑀕𑁆𑀕𑀴𑀢𑁆𑀣𑀫𑁆𑀪𑁄𑀢𑀺 𑀓𑀯𑀸𑀝𑀢𑁆𑀣𑀫𑁆𑀪𑁄. 𑀬𑀢𑁆𑀣𑀸𑀢𑀺 𑀅𑀕𑁆𑀕𑀴𑀢𑁆𑀣𑀫𑁆𑀪𑁂. 𑀢𑀢𑁆𑀣𑀸𑀢𑀺 𑀤𑁆𑀯𑀸𑀭𑀩𑀸𑀳𑀸𑀬. 𑀢𑀢𑁆𑀣𑀸𑀢𑀺 𑀅𑀕𑁆𑀕𑀴𑀧𑀸𑀲𑀓𑁂. 𑀥𑀽𑀫𑁄 𑀦𑀺𑀓𑁆𑀔𑀫𑀢𑀺 𑀏𑀢𑁂𑀦𑀸𑀢𑀺 𑀥𑀽𑀫𑀦𑁂𑀢𑁆𑀢𑁄, 𑀙𑀺𑀤𑁆𑀤𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀽𑀫𑀦𑀺𑀓𑁆𑀔𑀫𑀦𑀙𑀺𑀤𑁆𑀤’’𑀦𑁆𑀢𑀺. ‘‘𑀕𑀦𑁆𑀥𑁂𑀳𑀻’’𑀢𑀺 𑀇𑀫𑀺𑀦𑀸 ‘‘𑀯𑀸𑀲𑁂𑀢𑀼’’𑀦𑁆𑀢𑀺 𑀧𑀤𑀲𑁆𑀲 𑀓𑀭𑀡𑀁 𑀤𑀲𑁆𑀲𑁂𑀢𑀺. ‘‘𑀉𑀤𑀓𑀝𑁆𑀞𑀧𑀦𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀉𑀤𑀓𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀉𑀤𑀓𑀲𑁆𑀲 𑀞𑀧𑀦𑀁 𑀞𑀸𑀦𑀁 𑀉𑀤𑀓𑀝𑁆𑀞𑀸𑀦𑀦𑁆𑀢𑀺 𑀫𑀚𑁆𑀛𑁂𑀧𑀤𑀮𑁄𑀧𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀉𑀤𑀓𑀝𑁆𑀞𑀸𑀦𑁂. 𑀓𑁄𑀝𑁆𑀞𑀓𑁄𑀢𑀺 𑀏𑀢𑁆𑀣 𑀦 𑀬𑀢𑁆𑀣 𑀓𑀢𑁆𑀣𑀘𑀺, 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀸 𑀓𑁄𑀝𑁆𑀞𑀓𑁄 𑀳𑁄𑀢𑀺, 𑀅𑀧𑀺 𑀘 𑀔𑁄 𑀧𑀦 𑀤𑁆𑀯𑀸𑀭𑁂 𑀏𑀯, 𑀤𑁆𑀯𑀸𑀭𑀲𑁆𑀲𑁂𑀯 𑀯𑀸 𑀓𑁄𑀝𑁆𑀞𑀓𑁄𑀢𑀺 𑀆𑀳 ‘‘𑀤𑁆𑀯𑀸𑀭𑀓𑁄𑀝𑁆𑀞𑀓𑁄’’𑀢𑀺.

𑁨𑁬𑁧. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀧𑀺𑀝𑁆𑀞𑀺𑀆𑀤𑀺𑀧𑀭𑀺𑀓𑀫𑁆𑀫𑀁. 𑀧𑀝𑀺𑀘𑁆𑀙𑀸𑀤𑀺𑀬𑀢𑀺 𑀇𑀫𑀸𑀬𑀸𑀢𑀺 𑀧𑀝𑀺𑀘𑁆𑀙𑀸𑀤𑀺, 𑀯𑀢𑁆𑀣𑀫𑁂𑀯 𑀧𑀝𑀺𑀘𑁆𑀙𑀸𑀤𑀺 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺. 𑀉𑀤𑀓𑀁 𑀦 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀸𑀦𑁄𑀤𑀓𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 𑀆𑀳 ‘‘𑀦𑁆𑀳𑀸𑀦𑁄𑀤𑀓𑀁 𑀦 𑀳𑁄𑀢𑀻’’𑀢𑀺.

𑁨𑁬𑁨. 𑀧𑀡𑁆𑀡𑀺𑀓𑀸𑀦𑀁 𑀢𑀼𑀮𑀁 𑀯𑀺𑀬 𑀉𑀤𑀓𑀉𑀩𑁆𑀩𑀸𑀳𑀦𑀓𑀢𑀼𑀮𑀦𑁆𑀢𑀺 𑀬𑁄𑀚𑀦𑀸. 𑀤𑀻𑀖𑀯𑀭𑀢𑁆𑀢𑀸𑀤𑀻𑀳𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀭𑀚𑁆𑀚𑀼 𑀆𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀭𑀳𑀢𑁆𑀣𑀖𑀝𑀺𑀬𑀦𑁆𑀢𑀁 𑀦𑀸𑀫 𑀘𑀓𑁆𑀓𑀲𑀡𑁆𑀞𑀸𑀦𑀁 𑀅𑀦𑁂𑀓𑀸𑀭𑀁 𑀅𑀭𑁂 𑀅𑀭𑁂 𑀖𑀝𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀧𑀭𑀺𑀩𑁆𑀪𑀫𑀺𑀬𑀫𑀸𑀦𑀁 𑀬𑀦𑁆𑀢𑀁. 𑀅𑀭𑀲𑀗𑁆𑀔𑀸𑀢𑁂𑀲𑀼 𑀳𑀢𑁆𑀣𑁂𑀲𑀼 𑀖𑀝𑀸 𑀩𑀦𑁆𑀥𑀺𑀢𑀩𑁆𑀩𑀸 𑀏𑀢𑁆𑀣𑀸𑀢𑀺 𑀅𑀭𑀳𑀢𑁆𑀣𑀖𑀝𑀺, 𑀢𑀫𑁂𑀯 𑀬𑀦𑁆𑀢𑀁 𑀅𑀭𑀳𑀢𑁆𑀣𑀖𑀝𑀺𑀬𑀦𑁆𑀢𑀁. 𑀘𑀫𑁆𑀫𑀪𑀸𑀚𑀦𑀦𑁆𑀢𑀺 𑀘𑀫𑁆𑀫𑀫𑀬𑀁 𑀪𑀸𑀚𑀦𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀻𑀢𑀺 𑀘𑀦𑁆𑀤𑀦𑀺𑀓𑀸 𑀅𑀧𑀸𑀓𑀸𑀭𑀸 𑀳𑁄𑀢𑀺. 𑀉𑀤𑀓𑀧𑀼𑀜𑁆𑀚𑀦𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀦𑁆𑀢𑀺 𑀉𑀤𑀓𑀧𑀼𑀜𑁆𑀚𑀦𑁂. ‘‘𑀉𑀤𑀓𑀧𑀼𑀜𑁆𑀚𑀦𑀻’’𑀢𑀺𑀧𑀺 𑀧𑀸𑀞𑁄. 𑀏𑀯𑀁 𑀲𑀢𑀺 𑀢𑀸𑀬 𑀉𑀤𑀓𑀧𑀼𑀜𑁆𑀚𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀼𑀤𑁆𑀥𑀭𑀺𑀢𑀼𑀦𑁆𑀢𑀺 𑀅𑀧𑀦𑁂𑀢𑀼𑀁.

𑁨𑁬𑁩. 𑀆 𑀲𑀫𑀦𑁆𑀢𑀢𑁄 𑀯𑀺𑀤𑁆𑀥𑀁 𑀧𑀓𑁆𑀔𑀧𑀸𑀲𑀓𑀫𑁂𑀢𑁆𑀣𑀸𑀢𑀺 𑀆𑀯𑀺𑀤𑁆𑀥𑀧𑀓𑁆𑀔𑀧𑀸𑀲𑀓𑀁. 𑀫𑀡𑁆𑀟𑀮𑁂𑀢𑀺 𑀓𑀡𑁆𑀡𑀺𑀓𑀫𑀡𑁆𑀟𑀮𑀫𑁆𑀳𑀺. 𑀓𑀢𑀁 𑀓𑀽𑀝𑀜𑁆𑀘 𑀙𑀤𑀦𑀜𑁆𑀘 𑀏𑀢𑁆𑀣𑀸𑀢𑀺 𑀓𑀢𑀓𑀽𑀝𑀘𑁆𑀙𑀤𑀦𑀁, 𑀚𑀦𑁆𑀢𑀸𑀖𑀭𑀁, 𑀢𑀲𑁆𑀲. 𑀏𑀢𑀦𑁆𑀢𑀺 ‘‘𑀦𑀺𑀮𑁆𑀮𑁂𑀔𑀚𑀦𑁆𑀢𑀸𑀖𑀭’’𑀦𑁆𑀢𑀺 𑀏𑀢𑀁 𑀦𑀸𑀫𑀁. ‘‘𑀘𑀢𑁆𑀢𑀸𑀭𑁄 𑀫𑀸𑀲𑁂’’𑀢𑀺 𑀇𑀫𑀺𑀦𑀸 ‘‘𑀘𑀢𑀼𑀫𑀸𑀲’’𑀦𑁆𑀢𑀺 𑀤𑀺𑀕𑀼𑀲𑀫𑀸𑀲𑀲𑁆𑀲 𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺.

𑁨𑁬𑁪. 𑀦𑀫𑀢𑀓𑀦𑁆𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀫𑀢𑀓𑀢𑁄 (𑀘𑀽𑀴𑀯. 𑀅𑀝𑁆𑀞. 𑁨𑁫𑁬) 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀴𑀓𑀮𑁄𑀫𑁂𑀳𑀻’’𑀢𑀺𑀆𑀤𑀺. 𑀅𑀯𑀸𑀬𑀺𑀫𑀦𑁆𑀢𑀺 𑀯𑀸𑀬𑀺𑀢𑁆𑀯𑀸 𑀦 𑀓𑀢𑀁. 𑀘𑀫𑁆𑀫𑀔𑀡𑁆𑀟𑀧𑀭𑀺𑀳𑀸𑀭𑁂𑀦𑀸𑀢𑀺 𑀘𑀫𑁆𑀫𑀔𑀡𑁆𑀟𑀁 𑀯𑀺𑀬 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀅𑀧𑀦𑀬𑀦𑁂𑀦, 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑁂𑀴𑀸𑀬𑀸𑀢𑀺 𑀅𑀝𑁆𑀞𑀁𑀲𑀸𑀤𑀺𑀆𑀓𑀸𑀭𑁂𑀦 𑀓𑀢𑀸𑀬 𑀫𑀜𑁆𑀚𑀽𑀲𑀸𑀬. 𑀏𑀢𑀦𑁆𑀢𑀺 ‘‘𑀆𑀲𑀺𑀢𑁆𑀢𑀓𑀽𑀧𑀥𑀸𑀦’’𑀦𑁆𑀢𑀺 𑀏𑀢𑀁 𑀦𑀸𑀫𑀁. 𑀤𑀸𑀭𑀼𑀫𑀬𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀢𑀫𑁆𑀩𑀮𑁄𑀳𑀭𑀚𑀢𑀫𑀬𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑁂𑀯𑀸𑀢𑀺 𑀫𑀴𑁄𑀭𑀺𑀓𑀸𑀬𑀫𑁂𑀯. 𑀆𑀥𑀸𑀭𑀓𑀲𑀗𑁆𑀔𑁂𑀧𑀕𑀫𑀦𑀢𑁄𑀢𑀺 𑀆𑀥𑀸𑀭𑀓𑁂 𑀲𑀗𑁆𑀔𑁂𑀧𑀁 𑀕𑀫𑀦𑀢𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀧𑀼𑀩𑁆𑀩𑁂 𑀧𑀢𑁆𑀢𑀭𑀓𑁆𑀔𑀦𑀢𑁆𑀣𑀁 𑀆𑀥𑀸𑀭𑀓𑁄 𑀅𑀦𑀼𑀜𑁆𑀜𑀸𑀢𑁄, 𑀇𑀤𑀸𑀦𑀺 𑀪𑀼𑀜𑁆𑀚𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑁄 𑀪𑀺𑀓𑁆𑀔𑀼 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀨𑀮𑀧𑀽𑀯𑁂𑀳𑀺 𑀲𑁂𑀲𑀓𑀁. 𑀢𑀲𑁆𑀫𑀺𑀁 𑀔𑀡𑁂𑀢𑀺 𑀢𑀲𑁆𑀫𑀺𑀁 𑀪𑀼𑀜𑁆𑀚𑀦𑀓𑁆𑀔𑀡𑁂.

𑁨𑁬𑁫. 𑀏𑀓𑁂𑀓𑁂𑀦𑀧𑀺 𑀅𑀗𑁆𑀕𑁂𑀦𑀸𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄, 𑀢𑀢𑁄 𑀧𑀦 𑀅𑀥𑀺𑀓𑁂𑀳𑀺 𑀅𑀗𑁆𑀕𑁂𑀳𑀺 𑀧𑀕𑁂𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀲𑀫𑀦𑁆𑀦𑀸𑀕𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀲𑀗𑁆𑀖𑁂𑀦 𑀦 𑀕𑀳𑁂𑀢𑀩𑁆𑀩𑁄. 𑀅𑀲𑀼𑀓𑀲𑁆𑀲 𑀉𑀧𑀸𑀲𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀓𑁆𑀓𑀼𑀚𑁆𑀚𑀦𑀓𑀸𑀮𑁂𑀢𑀺 𑀧𑀢𑁆𑀢𑀲𑁆𑀲 𑀉𑀓𑁆𑀓𑀼𑀚𑁆𑀚𑀦𑀓𑀸𑀮𑁂. 𑀬𑀸𑀘𑀸𑀧𑁂𑀢𑁆𑀯𑀸𑀢𑀺 𑀧𑀢𑁆𑀢𑀦𑀺𑀓𑀼𑀚𑁆𑀚𑀺𑀢𑁂𑀦 𑀉𑀧𑀸𑀲𑀓𑁂𑀦 𑀬𑀸𑀘𑀸𑀧𑁂𑀢𑁆𑀯𑀸. 𑀳𑀢𑁆𑀣𑀧𑀸𑀲𑀦𑁆𑀢𑀺 𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑀁.

𑁨𑁬𑁮. 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀏𑀢𑁆𑀣 𑀧𑀼𑀭𑀲𑀤𑁆𑀤𑀲𑁆𑀲 𑀅𑀕𑁆𑀕𑀢𑁆𑀣𑀪𑀸𑀯𑀜𑁆𑀘 𑀓𑀭𑀲𑀤𑁆𑀤𑀲𑁆𑀲 𑀔𑀸𑀤𑁂𑀲𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀕𑁆𑀕𑀢𑁄 𑀓𑀢𑁆𑀯𑀸’’𑀢𑀺. 𑀲𑁄𑀢𑀺 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄, 𑀲𑀦𑁆𑀣𑀭𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀘𑁆𑀙𑀸𑀫𑀻𑀢𑀺 𑀮𑀪𑀺𑀲𑁆𑀲𑀸𑀫𑀺, 𑀏𑀲 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄 𑀧𑀼𑀢𑁆𑀢𑀮𑀸𑀪𑀸𑀬 𑀅𑀪𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀓𑁆𑀓𑀫𑀦𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀤𑀻’’𑀢𑀺𑀆𑀤𑀺. 𑀧𑀘𑁆𑀙𑀸𑀢𑀺 𑀅𑀓𑁆𑀓𑀫𑀦𑀢𑁄 𑀧𑀘𑁆𑀙𑀸. 𑀅𑀬𑀦𑁆𑀢𑀺 𑀪𑀕𑀯𑀸. 𑀇𑀤𑀦𑁆𑀢𑀺 𑀓𑀸𑀭𑀡𑀁. 𑀢𑀸𑀯𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀢𑁄, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀯𑀸 𑀧𑀞𑀫𑀁. 𑀧𑀭𑀺𑀪𑀯𑀢𑁄𑀢𑀺 𑀕𑀺𑀳𑀻𑀦𑀁 𑀧𑀭𑀺𑀪𑀯𑀢𑁄.

𑀫𑀗𑁆𑀕𑀮𑀢𑁆𑀣𑀸𑀬𑀸𑀢𑀺 𑀅𑀭𑁄𑀕𑀸𑀤𑀺𑀓𑀲𑁆𑀲 𑀫𑀗𑁆𑀕𑀮𑀲𑁆𑀲 𑀅𑀢𑁆𑀣𑀸𑀬. 𑀥𑁄𑀢𑀧𑀸𑀤𑀓𑀦𑁆𑀢𑀺 𑀏𑀢𑁆𑀣 𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑀝𑁆𑀞𑀸𑀦𑁂 𑀅𑀢𑁆𑀣𑀭𑀺𑀢𑀁 𑀥𑁄𑀢𑀧𑀸𑀤𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀥𑁄𑀢𑀧𑀸𑀤𑀓𑀁 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀧𑀘𑁆𑀘𑀢𑁆𑀣𑀭𑀡𑀁 𑀅𑀢𑁆𑀣𑀢’’𑀦𑁆𑀢𑀺 𑀇𑀫𑀺𑀦𑀸 ‘‘𑀥𑁄𑀢𑀧𑀸𑀤𑀓’’𑀦𑁆𑀢𑀺 𑀏𑀢𑁆𑀣 𑀡𑀺𑀓𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀭𑀺𑀢𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁨𑁬𑁯. 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭𑀦𑁆𑀢𑀺 𑀧𑀤𑀼𑀫𑀓𑀡𑁆𑀡𑀺𑀓𑀲𑀡𑁆𑀞𑀸𑀦𑀁. 𑀓𑀢𑀁 𑀧𑀸𑀤𑀖𑀁𑀲𑀦𑀁 𑀓𑀢𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀓𑀢𑀓𑀁, 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑁄𑀢𑁆𑀣𑀓𑁂𑀲𑀼 𑀢𑀁𑀲𑀤𑁆𑀤𑁄 𑀕𑀮𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀩𑀸𑀳𑀼𑀮𑁆𑀮𑀺𑀓𑀸𑀦𑀼𑀬𑁄𑀕𑀢𑁆𑀢𑀸𑀢𑀺 𑀧𑀘𑁆𑀘𑀬𑀩𑀳𑀼𑀮𑀪𑀸𑀯𑀸𑀬 𑀅𑀦𑀼𑀬𑁄𑀕𑀢𑁆𑀢𑀸. 𑀧𑀸𑀲𑀸𑀡𑀨𑁂𑀡𑀓𑁄𑀧𑀻𑀢𑀺 𑀧𑀸𑀲𑀸𑀡𑀅𑀩𑁆𑀩𑀼𑀤𑀫𑁆𑀧𑀺. 𑀩𑀻𑀚𑀦𑀻𑀢𑀺 𑀘𑀢𑀼𑀭𑀲𑁆𑀲𑀩𑀻𑀚𑀦𑀻. 𑀢𑀦𑁆𑀢𑀺 𑀯𑀺𑀥𑀽𑀧𑀦𑀁, 𑀓𑀢𑀁 𑀳𑁄𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀧𑀺 𑀢𑀁𑀲𑀤𑁆𑀤𑁄 𑀕𑀮𑀺𑀢𑁄. 𑀯𑁂𑀴𑀼𑀤𑀦𑁆𑀢𑀯𑀺𑀮𑀻𑀯𑁂𑀳𑀺 𑀯𑀸 𑀫𑁄𑀭𑀧𑀺𑀜𑁆𑀙𑁂𑀳𑀺 𑀯𑀸 𑀘𑀫𑁆𑀫𑀯𑀺𑀓𑀢𑀻𑀳𑀺 𑀯𑀸 𑀓𑀢𑀁 𑀳𑁄𑀢𑀽𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀁 𑀯𑀺𑀥𑀽𑀧𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀴𑀺𑀬𑀁 𑀢𑀸𑀮𑀯𑀡𑁆𑀝𑀦𑁆𑀢𑀺 𑀲𑀳 𑀯𑀡𑁆𑀝𑁂𑀦 𑀓𑀢𑀁 𑀢𑀸𑀮𑀁 𑀢𑀸𑀮𑀯𑀡𑁆𑀝𑀁, 𑀢𑀸𑀮𑀲𑀤𑁆𑀤𑁂𑀦 𑀢𑀁𑀫𑀬𑀸 𑀫𑀡𑁆𑀟𑀮𑀩𑀻𑀚𑀦𑀻 𑀕𑀳𑁂𑀢𑀩𑁆𑀩𑀸 𑀯𑀺𑀓𑀸𑀭𑀻𑀯𑀺𑀓𑀸𑀭𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸. 𑀫𑀓𑀲𑀩𑀻𑀚𑀦𑀻𑀢𑀺 𑀫𑀓𑀲𑀸𑀦𑀁 𑀧𑀮𑀸𑀬𑀦𑀓𑀩𑀻𑀚𑀦𑀻, 𑀤𑀦𑁆𑀢𑀫𑀬𑀯𑀺𑀲𑀸𑀡𑀫𑀬𑀤𑀡𑁆𑀟𑀓𑀸𑀧𑀺 𑀫𑀓𑀲𑀩𑀻𑀚𑀦𑀻 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀸𑀓𑀫𑀬𑀩𑀻𑀚𑀦𑀺𑀬𑀸’’𑀢𑀺 𑀧𑀤𑀁 ‘‘𑀲𑀗𑁆𑀕𑀳𑀺𑀢𑀸’’𑀢𑀺 𑀧𑀤𑁂 𑀆𑀥𑀸𑀭𑁄, 𑀓𑀭𑀡𑀁 𑀯𑀸.

𑁨𑁭𑁦. 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲 𑀘𑀓𑁆𑀔𑀼𑀁 𑀯𑀸 𑀤𑀼𑀩𑁆𑀩𑀮𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁄𑀢𑀺 𑀓𑀸𑀬𑀟𑀸𑀳𑀸𑀤𑀻𑀳𑀺 𑀆𑀩𑀸𑀥𑁂𑀳𑀺 𑀅𑀜𑁆𑀜𑁄, 𑀓𑁄𑀘𑀺 𑀆𑀩𑀸𑀥𑁄 𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀲𑁆𑀲𑁂 𑀧𑀦𑀸’’𑀢𑀺 𑀧𑀤𑀁 ‘‘𑀘𑀻𑀯𑀭𑀕𑀼𑀢𑁆𑀢𑀢𑁆𑀣’’𑀦𑁆𑀢𑀺 𑀧𑀤𑁂 𑀏𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀦𑁆𑀢𑀺 𑀘𑀻𑀯𑀭𑀲𑁆𑀲 𑀯𑀲𑁆𑀲𑀢𑁂𑀫𑀦𑀢𑁄 𑀕𑀼𑀢𑁆𑀢𑀢𑁆𑀣𑀁, 𑀯𑀸𑀴𑀫𑀺𑀕𑀘𑁄𑀭𑀪𑀬𑁂𑀲𑀼 𑀲𑀦𑁆𑀢𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀮𑀧𑀡𑁆𑀡𑀸𑀤𑀺𑀦𑀸 𑀏𑀓𑁂𑀦 𑀧𑀡𑁆𑀡𑁂𑀦 𑀓𑀢𑀁 𑀙𑀢𑁆𑀢𑀁 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀁. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑁂𑀲𑀼 𑀏𑀯 𑀕𑀸𑀫𑀸𑀭𑀜𑁆𑀜𑁂𑀲𑀼.

‘‘𑀅𑀲𑀺 𑀅𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀅𑀲𑀺𑀲𑁆𑀲𑀸𑀢𑀺 𑀧𑀤𑀲𑁆𑀲 𑀅𑀦𑀯𑀓𑀸𑀲𑀯𑀺𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀲𑀻𑀢𑀺 𑀔𑀕𑁆𑀕𑁄. 𑀅𑀲𑁆𑀲𑀸𑀢𑀺 𑀘𑁄𑀭𑀲𑁆𑀲, 𑀅𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀚𑁆𑀚𑁄𑀢𑀮𑀢𑀻𑀢𑀺 𑀏𑀢𑁆𑀣 𑀅𑀮𑀧𑀘𑁆𑀘𑀬𑁄 𑀭𑀽𑀧𑀲𑀺𑀤𑁆𑀥𑀺𑀫𑀢𑁆𑀢𑁄𑀯𑀸𑀢𑀺 𑀆𑀳 ‘‘𑀯𑀺𑀚𑁆𑀚𑁄𑀢𑀢𑀻’’𑀢𑀺. ‘‘𑀘𑀢𑀼𑀳𑀢𑁆𑀣𑁄𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀧𑀫𑀸𑀡𑀬𑀼𑀢𑁆𑀢𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁄𑀢𑀺 𑀘𑀢𑀼𑀳𑀢𑁆𑀣𑀢𑁄. 𑀲𑀩𑁆𑀩𑁂𑀲𑀦𑁆𑀢𑀺 𑀕𑀺𑀮𑀸𑀦𑀸𑀕𑀺𑀮𑀸𑀦𑀸𑀦𑀁. ‘‘𑀲𑀓𑁆𑀓𑀸 𑀧𑀦𑀸’’𑀢𑀺 𑀧𑀤𑀁 ‘‘𑀦 𑀯𑀝𑁆𑀝𑀢𑀻’’𑀢𑀺 𑀧𑀤𑁂 𑀓𑀢𑁆𑀢𑀸, ‘‘𑀤𑀸𑀢𑀩𑁆𑀩𑀸’’𑀢𑀺 𑀧𑀤𑁂 𑀓𑀫𑁆𑀫𑀁. 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀸, 𑀦 𑀯𑀺𑀦𑀸 𑀲𑀫𑁆𑀫𑀼𑀢𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁭𑁩. 𑀆𑀕𑀢𑀦𑁆𑀢𑀺 𑀉𑀤𑀭𑀺𑀬𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀢𑀁. 𑀉𑀕𑁆𑀕𑀸𑀭𑀦𑁆𑀢𑀺 𑀕𑀮𑀢𑁄 𑀉𑀕𑁆𑀕𑀸𑀭𑀁 𑀪𑁄𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀥𑀸𑀭𑁂𑀢𑁆𑀯𑀸𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀅𑀲𑀦𑁆𑀥𑀸𑀭𑀺𑀢𑀫𑁂𑀯 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁, 𑀧𑀢𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁, 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀦𑁆𑀢𑀺 𑀯𑀘𑀦𑀁.

𑁨𑁭𑁪. 𑀓𑀼𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀓𑀭𑀺𑀬𑀢𑀺 𑀉𑀘𑁆𑀘𑀸𑀭𑀺𑀬𑀢𑀻𑀢𑀺 𑀓𑀼𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂 𑀲𑀤𑁆𑀤𑁄𑀢𑀺 𑀆𑀳 ‘‘𑀲𑀤𑁆𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀤𑁆𑀤𑀦𑁆𑀢𑀺 ‘‘𑀅𑀬𑀁 𑀫𑀁 𑀪𑀺𑀓𑁆𑀔𑀼 𑀯𑀺𑀧𑁆𑀧𑀓𑀭𑁄𑀢𑀻’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁. 𑀦𑀔𑀸𑀤𑀻𑀳𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀫𑀼𑀔𑀓𑀼𑀝𑁆𑀝𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀼𑀭𑀓𑁆𑀔𑀦𑀢𑁆𑀣𑀦𑁆𑀢𑀺 𑀅𑀦𑀼𑀤𑀬𑁂𑀦 𑀧𑀸𑀮𑀦𑀢𑁆𑀣𑀁. 𑀦𑀔𑀘𑁆𑀙𑁂𑀤𑀦𑀦𑁆𑀢𑀺 𑀦𑀔𑀁 𑀙𑀺𑀦𑁆𑀤𑀢𑀺 𑀅𑀦𑁂𑀦𑀸𑀢𑀺 𑀦𑀔𑀘𑁆𑀙𑁂𑀤𑀦𑀁, 𑀲𑀢𑁆𑀣𑀓𑀸𑀤𑀺. 𑀯𑀻𑀲𑀢𑀺𑀫𑀝𑁆𑀞𑀦𑁆𑀢𑀺 𑀏𑀢𑁆𑀣 𑀯𑀻𑀲𑀢𑀺𑀬𑀸 𑀦𑀔𑀸𑀦𑀁 𑀫𑀝𑁆𑀞𑀁 𑀯𑀻𑀲𑀢𑀺𑀫𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀻𑀲𑀢𑀺𑀧𑀺 𑀦𑀔𑁂’’𑀢𑀺𑀆𑀤𑀺. 𑀮𑀺𑀔𑀺𑀢𑀫𑀝𑁆𑀞𑁂𑀢𑀺 𑀮𑀺𑀔𑀺𑀢𑁂 𑀳𑀼𑀢𑁆𑀯𑀸 𑀫𑀝𑁆𑀞𑁂. 𑀓𑀸𑀭𑀸𑀧𑁂𑀦𑁆𑀢𑀻𑀢𑀺 𑀦𑀳𑀸𑀧𑀺𑀢𑁂 𑀓𑀸𑀭𑀸𑀧𑁂𑀦𑁆𑀢𑀺. 𑀦𑀔𑀢𑁄𑀢𑀺 𑀦𑀔𑀢𑁄 𑀯𑀸 𑀦𑀔𑀦𑁆𑀢𑀭𑀢𑁄 𑀯𑀸. 𑀅𑀧𑀓𑀟𑁆𑀠𑀺𑀢𑀼𑀦𑁆𑀢𑀺 𑀓𑀟𑁆𑀠𑀺𑀢𑁆𑀯𑀸 𑀅𑀧𑀦𑁂𑀢𑀼𑀁.

𑁨𑁭𑁫. 𑀔𑀼𑀭𑀓𑁄𑀲𑀓𑀦𑁆𑀢𑀺 𑀔𑀼𑀭𑀲𑁆𑀲 𑀞𑀧𑀦𑀓𑀁. 𑀓𑀢𑁆𑀢𑀭𑀺𑀬𑀸𑀢𑀺 𑀓𑀦𑁆𑀢𑀺𑀬𑀢𑀺 𑀙𑀺𑀦𑁆𑀤𑀺𑀬𑀢𑀺 𑀇𑀫𑀸𑀬𑀸𑀢𑀺 𑀓𑀢𑁆𑀢𑀭𑀺, 𑀅𑀬𑁄𑀫𑀬𑁄 𑀏𑀓𑁄 𑀉𑀧𑀓𑀭𑀡𑀯𑀺𑀲𑁂𑀲𑁄, 𑀢𑀸𑀬. ‘‘𑀙𑁂𑀤𑀸𑀧𑁂𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀓𑀧𑁆𑀧𑀸𑀧𑁂𑀦𑁆𑀢𑀻𑀢𑀺 𑀏𑀢𑁆𑀣 𑀓𑀧𑁆𑀧𑀲𑀤𑁆𑀤𑀲𑁆𑀲 𑀯𑀺𑀥𑁆𑀬𑀢𑁆𑀣𑀁 𑀅𑀥𑀺𑀧𑁆𑀧𑀸𑀬𑁂𑀦 𑀤𑀲𑁆𑀲𑁂𑀢𑀺. 𑀫𑀲𑁆𑀲𑀼𑀁 𑀯𑀟𑁆𑀠𑀸𑀧𑁂𑀦𑁆𑀢𑀻𑀢𑀺 𑀏𑀢𑁆𑀣 𑀫𑀲𑁆𑀲𑀼𑀁 𑀯𑀟𑁆𑀠𑁂𑀢𑁆𑀯𑀸 𑀭𑀼𑀳𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀫𑀲𑁆𑀲𑀼𑀁 𑀤𑀻𑀖𑀁 𑀓𑀸𑀭𑀸𑀧𑁂𑀦𑁆𑀢𑀻’’𑀢𑀺. 𑀏𑀴𑀓𑀫𑀲𑁆𑀲𑀽𑀢𑀺 𑀏𑀴𑀓𑀲𑁆𑀲 𑀯𑀺𑀬 𑀫𑀲𑁆𑀲𑀽𑀢𑀺 𑀏𑀴𑀓𑀫𑀲𑁆𑀲𑀼. ‘‘𑀕𑁄𑀮𑁄𑀫𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀘𑀢𑀼𑀓𑁄𑀡’’𑀦𑁆𑀢𑀺 𑀇𑀫𑀺𑀦𑀸 𑀘𑀢𑀼𑀭𑀲𑁆𑀲𑀦𑁆𑀢𑀺 𑀏𑀢𑁆𑀣 𑀅𑀁𑀲𑀲𑀤𑁆𑀤𑁄 𑀓𑁄𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀼𑀭𑀲𑁆𑀲𑀦𑁆𑀢𑀺 𑀏𑀢𑁆𑀣 𑀳𑀺 ‘‘𑀘𑀢𑀼𑀭𑀁𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀕𑁆𑀕𑀳𑀺𑀢𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀧𑀭𑀲𑁆𑀲 𑀲𑀓𑀸𑀭𑀲𑁆𑀲 𑀤𑁆𑀯𑁂𑀪𑀸𑀯𑀁 𑀓𑀢𑁆𑀯𑀸 ‘‘𑀘𑀢𑀼𑀭𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀮𑁄𑀫𑀲𑀁𑀳𑀭𑀡𑀦𑁆𑀢𑀺 𑀮𑁄𑀫𑀸𑀦𑀁 𑀅𑀧𑀦𑀬𑀦𑀁. 𑀮𑁄𑀫𑀭𑀸𑀚𑀺𑀝𑁆𑀞𑀧𑀦𑀦𑁆𑀢𑀺 𑀮𑁄𑀫𑀮𑁂𑀔𑀸𑀞𑀧𑀦𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼, 𑀫𑀲𑁆𑀲𑀼𑀓𑀧𑁆𑀧𑀦𑀸𑀤𑀻𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀡𑁆𑀟𑀯𑀡𑀭𑀼𑀥𑀺𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀕𑀡𑁆𑀟𑁄 𑀘 𑀯𑀡𑁄 𑀘 𑀭𑀼𑀥𑀺 𑀘 𑀕𑀡𑁆𑀟𑀯𑀡𑀭𑀼𑀥𑀬𑁄, 𑀢𑁂𑀬𑁂𑀯 𑀆𑀩𑀸𑀥𑀸 𑀕𑀡𑁆𑀟𑀯𑀡𑀭𑀼𑀥𑀺𑀆𑀩𑀸𑀥𑀸, 𑀢𑁂𑀲𑀁 𑀧𑀘𑁆𑀘𑀬𑀸. 𑀯𑀡𑁄𑀢𑀺 𑀫𑀳𑀦𑁆𑀢𑁄 𑀯𑀡𑁄. 𑀭𑀼𑀥𑀻𑀢𑀺 𑀔𑀼𑀤𑁆𑀤𑀓𑁄 𑀯𑀡𑁄. 𑀲𑀓𑁆𑀔𑀭𑀸𑀤𑀻𑀳𑀻𑀢𑀺 𑀲𑀓𑁆𑀔𑀭𑀫𑀥𑀼𑀲𑀺𑀢𑁆𑀣𑀓𑁂𑀳𑀺. 𑀲𑀡𑁆𑀟𑀸𑀲𑁄𑀢𑀺 𑀲𑀼𑀝𑁆𑀞𑀼 𑀮𑁄𑀫𑀁 𑀟𑀁𑀲𑀢𑀻𑀢𑀺 𑀲𑀡𑁆𑀟𑀸𑀲𑁄. 𑀬𑀦𑁆𑀢𑀺 𑀮𑁄𑀫𑀁, 𑀞𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑁆𑀣 𑀞𑀺𑀢𑀦𑁆𑀢𑀺 𑀆𑀳 ‘‘𑀪𑀫𑀼𑀓𑀸𑀬 𑀯𑀸’’𑀢𑀺𑀆𑀤𑀺. 𑀓𑀺𑀁 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀆𑀳 𑁋 ‘‘𑀉𑀕𑁆𑀕𑀦𑁆𑀢𑁆𑀯𑀸 𑀯𑀺𑀪𑀘𑁆𑀙𑀁 𑀞𑀺𑀢’’𑀦𑁆𑀢𑀺, 𑀯𑀺𑀪𑀘𑁆𑀙𑀁 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀲𑁂𑀲𑁂𑀦 𑀲𑁄𑀪𑀡𑀁 𑀪𑀓𑁆𑀔𑀢𑀻𑀢𑀺 𑀯𑀺𑀪𑀘𑁆𑀙𑁄, 𑀅𑀲𑁄𑀪𑀡𑁄. ‘‘𑀯𑀺𑀕𑀘𑁆𑀙’’𑀦𑁆𑀢𑀺𑀧𑀺 𑀧𑀸𑀞𑁄, 𑀯𑀺𑀭𑀽𑀧𑀁 𑀕𑀘𑁆𑀙𑀢𑀺, 𑀕𑀫𑀬𑀢𑀻𑀢𑀺 𑀯𑀸 𑀯𑀺𑀕𑀘𑁆𑀙𑁄. 𑀢𑀢𑁆𑀣 𑀧𑀼𑀭𑀺𑀫𑀧𑀸𑀞𑁄𑀬𑁂𑀯 𑀫𑀽𑀮𑀧𑀸𑀞𑁄𑀢𑀺 𑀤𑀝𑁆𑀞𑀩𑁆𑀩𑁄𑀢𑀺. 𑀧𑀮𑀺𑀢𑀁 𑀯𑀸 𑀅𑀧𑀮𑀺𑀢𑀁 𑀯𑀸 𑀢𑀸𑀤𑀺𑀲𑀁 𑀮𑁄𑀫𑀦𑁆𑀢𑀺 𑀬𑁄𑀚𑀦𑀸.

𑁨𑁭𑁭. 𑀓𑀁𑀲𑀧𑀢𑁆𑀣𑀭𑀺𑀓𑀸𑀢𑀺 𑀏𑀢𑁆𑀣 𑀓𑀁𑀲𑀆𑀧𑀡𑁂 𑀧𑀢𑁆𑀣𑀭𑀦𑁆𑀢𑀺 𑀧𑀲𑀸𑀭𑁂𑀦𑁆𑀢𑀻𑀢𑀺 𑀓𑀁𑀲𑀧𑀢𑁆𑀣𑀭𑀺𑀓𑀸𑀢𑀺 𑀯𑀼𑀢𑁆𑀢𑁂 𑀓𑀁𑀲𑀪𑀡𑁆𑀟𑀯𑀸𑀡𑀺𑀚𑀸 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀓𑀁𑀲𑀪𑀡𑁆𑀟𑀯𑀸𑀡𑀺𑀚𑀸’’𑀢𑀺. 𑀯𑀸𑀲𑀺𑀤𑀡𑁆𑀟𑀸𑀤𑀻𑀦𑀁 𑀅𑀧𑀸𑀢𑀦𑀢𑁆𑀣𑀁 𑀩𑀦𑁆𑀥𑀢𑀺 𑀅𑀦𑁂𑀦 𑀮𑁄𑀳𑁂𑀦𑀸𑀢𑀺 𑀩𑀦𑁆𑀥𑀦𑀁, 𑀢𑀫𑁂𑀯 𑀫𑀢𑁆𑀢𑀁 𑀅𑀧𑁆𑀧𑀦𑁆𑀢𑀺 𑀩𑀦𑁆𑀥𑀦𑀫𑀢𑁆𑀢𑀁.

𑁨𑁭𑁮. 𑀦𑀺𑀓𑁆𑀔𑀫𑀦𑁆𑀢𑁂𑀦𑀸𑀢𑀺 𑀆𑀭𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑁂𑀦. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. ‘‘𑀲𑀭𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀲𑀭𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀩𑀳𑀼𑀭𑀚𑁆𑀚𑀼𑀓𑀦𑁆𑀢𑀺 𑀩𑀳𑀽 𑀭𑀚𑁆𑀚𑀼𑀬𑁄 𑀏𑀢𑀲𑁆𑀲𑀸𑀢𑀺 𑀩𑀳𑀼𑀭𑀚𑁆𑀚𑀼𑀓𑀁. 𑀇𑀫𑀺𑀦𑀸 𑀓𑀮𑀸𑀧𑁂𑀦 𑀩𑀳𑀼𑀭𑀚𑁆𑀚𑀽𑀦𑀁 𑀲𑀫𑀽𑀳𑁂𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀮𑀸𑀧𑀼𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀇𑀓𑀸𑀭𑀲𑁆𑀲𑀼𑀓𑀸𑀭𑁄. 𑀤𑁂𑀟𑁆𑀟𑀼𑀪𑀓𑀦𑁆𑀢𑀺 𑀏𑀢𑁆𑀣 𑀤𑁂𑀟𑁆𑀟𑀼𑀪𑀲𑀤𑁆𑀤𑁂𑀦 𑀢𑀲𑁆𑀲 𑀲𑀻𑀲𑀁 𑀕𑀳𑁂𑀢𑀩𑁆𑀩𑀁 𑀏𑀓𑀤𑁂𑀲𑀽𑀧𑀘𑀸𑀭𑁂𑀦, 𑀤𑁂𑀟𑁆𑀟𑀼𑀪𑀁 𑀯𑀺𑀬𑀸𑀢𑀺 𑀤𑁂𑀟𑁆𑀟𑀼𑀪𑀓𑀁, 𑀲𑀤𑀺𑀲𑀢𑁆𑀣𑁂 𑀓𑀧𑀘𑁆𑀘𑀬𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀤𑀓𑀲𑀧𑁆𑀧𑀲𑀻𑀲𑀲𑀤𑀺𑀲’’𑀦𑁆𑀢𑀺. ‘‘𑀫𑀼𑀭𑀚𑀯𑀝𑁆𑀝𑀺𑀲𑀡𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀫𑀼𑀭𑀚𑀲𑀤𑁆𑀤𑁂𑀦 𑀫𑀼𑀭𑀚𑀯𑀝𑁆𑀝𑀺 𑀕𑀳𑁂𑀢𑀩𑁆𑀩𑀸 𑀢𑀲𑁆𑀲 𑀯𑀺𑀓𑀸𑀭𑀢𑁆𑀢𑀸, 𑀢𑁂𑀦 𑀲𑀤𑀺𑀲𑀁 𑀫𑀼𑀭𑀚𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑁂𑀞𑁂𑀢𑁆𑀯𑀸𑀢𑀺 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀯𑁂𑀞𑁂𑀢𑁆𑀯𑀸. 𑀫𑀤𑁆𑀤𑀯𑀻𑀡𑀲𑀤𑁆𑀤𑁄 𑀧𑀸𑀫𑀗𑁆𑀕𑀧𑀭𑀺𑀬𑀸𑀬𑁄. 𑀫𑀤𑁆𑀤𑀯𑀻𑀡𑀁 𑀯𑀺𑀬𑀸𑀢𑀺 𑀫𑀤𑁆𑀤𑀯𑀻𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀸𑀫𑀗𑁆𑀕𑀲𑀡𑁆𑀞𑀸𑀦’’𑀦𑁆𑀢𑀺. ‘‘𑀧𑀕𑁂𑀯 𑀩𑀳𑀽𑀦𑀻’’𑀢𑀺 𑀇𑀫𑀺𑀦𑀸 ‘‘𑀏𑀓𑀫𑁆𑀧𑀻’’𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀲𑀫𑁆𑀪𑀸𑀯𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀘𑁆𑀙𑀓𑀡𑁆𑀝𑀓𑀯𑀸𑀬𑀺𑀫𑀸𑀢𑀺 𑀫𑀘𑁆𑀙𑀓𑀡𑁆𑀝𑀓𑀁 𑀯𑀺𑀬 𑀤𑀲𑁆𑀲𑁂𑀢𑁆𑀯𑀸 𑀯𑀸𑀬𑀺𑀫𑀸. 𑀓𑀼𑀜𑁆𑀚𑀭𑀘𑁆𑀙𑀺𑀓𑀸𑀤𑀺𑀪𑁂𑀤𑀸𑀢𑀺 𑀯𑀸𑀭𑀡𑀅𑀘𑁆𑀙𑀺𑀓𑀸𑀤𑀺𑀪𑁂𑀤𑀸. 𑀯𑀸𑀭𑀡𑁄 𑀳𑀺 𑀓𑀼𑀁 𑀪𑀽𑀫𑀺𑀁 𑀚𑀭𑀸𑀧𑁂𑀢𑀻𑀢𑀺 𑀓𑀼𑀜𑁆𑀚𑀭𑁄𑀢𑀺 (𑀯𑀺. 𑀯. 𑀅𑀝𑁆𑀞. 𑁩𑁧; 𑀅. 𑀦𑀺. 𑀝𑀻. 𑁧.𑁧.𑁨) 𑀘 𑀓𑀼𑀜𑁆𑀚𑁂 𑀦𑀺𑀓𑀼𑀜𑁆𑀚𑁂 𑀭𑀫𑀢𑀻𑀢𑀺 𑀓𑀼𑀜𑁆𑀚𑀭𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀅𑀘𑁆𑀙𑀺 𑀯𑀺𑀬𑀸𑀢𑀺 𑀓𑀼𑀜𑁆𑀚𑀭𑀘𑁆𑀙𑀺𑀓𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑀸𑀦𑀻𑀢𑀺 𑀓𑀼𑀜𑁆𑀚𑀭𑀘𑁆𑀙𑀺𑀓𑀸𑀤𑀻𑀦𑀺, 𑀢𑁂𑀲𑀁 𑀪𑁂𑀤𑀸𑀢𑀺 𑀓𑀼𑀜𑁆𑀚𑀭𑀘𑁆𑀙𑀺𑀓𑀸𑀤𑀺𑀪𑁂𑀤𑀸. 𑀆𑀤𑀺𑀲𑀤𑁆𑀤𑁂𑀦 𑀕𑁄𑀡𑀘𑁆𑀙𑀺𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀓𑀼𑀜𑁆𑀘𑀺𑀓𑀸𑀓𑁄𑀲𑀓𑀲𑀡𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀽𑀓𑀭𑀲𑁆𑀲 𑀅𑀦𑁆𑀢𑀁 𑀯𑀺𑀬 𑀲𑀽𑀓𑀭𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀽𑀓𑀭𑀲𑁆𑀲 𑀳𑀺 𑀅𑀦𑁆𑀢𑀁 𑀓𑀼𑀜𑁆𑀘𑀺𑀓𑀸𑀓𑁄𑀲𑀓𑀁 𑀯𑀺𑀬 𑀫𑀚𑁆𑀛𑁂 𑀲𑀼𑀲𑀺𑀭𑁄 𑀳𑁄𑀢𑀺. 𑀲𑀽𑀓𑀭𑀦𑁆𑀢𑀓𑀁 𑀅𑀦𑀼𑀮𑁄𑀫𑁂𑀢𑀻𑀢𑀺 𑀲𑀽𑀓𑀭𑀦𑁆𑀢𑀓𑁂𑀦 𑀅𑀦𑀼𑀮𑁄𑀫𑁂𑀢𑀺. 𑀤𑀲𑀸𑀲𑀼𑀬𑁂𑀯𑀸𑀢𑀺 𑀓𑀸𑀬𑀩𑀦𑁆𑀥𑀦𑀲𑁆𑀲 𑀅𑀦𑁆𑀢𑁂𑀲𑀼𑀬𑁂𑀯. 𑀏𑀢𑁆𑀣𑀸𑀢𑀺 𑀤𑀲𑀸𑀲𑀼. ‘‘𑀘𑀢𑀼𑀦𑁆𑀦𑀁 𑀉𑀧𑀭𑀺 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀫𑀼𑀭𑀚𑀤𑀲𑀸 𑀢𑀢𑁄 𑀉𑀧𑀭𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑁂𑀞𑁂𑀢𑁆𑀯𑀸𑀢𑀺 𑀭𑀚𑁆𑀚𑀼𑀁 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸. 𑀫𑀼𑀤𑁆𑀤𑀺𑀓𑀲𑀡𑁆𑀞𑀸𑀦𑁂𑀦𑀸𑀢𑀺 𑀯𑀭𑀓𑀲𑀻𑀲𑀲𑀡𑁆𑀞𑀸𑀦𑁂𑀦. 𑀏𑀯𑀁 𑀲𑀺𑀩𑁆𑀩𑀺𑀢𑀸𑀢𑀺 𑀏𑀯𑀁 𑀲𑀺𑀩𑁆𑀩𑀺𑀬𑀫𑀸𑀦𑀸. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀧𑀸𑀲𑀦𑁆𑀢𑁄𑀢𑀺 𑀧𑀸𑀲𑀓𑁄𑀝𑀺.

𑁨𑁮𑁦. 𑀑𑀮𑀫𑁆𑀩𑀓𑀁 𑀓𑀢𑁆𑀯𑀸 𑀦𑀺𑀯𑀢𑁆𑀣𑀁 𑀳𑀢𑁆𑀣𑀺𑀲𑁄𑀡𑁆𑀟𑀓𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀘𑁄𑀴𑀺𑀓𑀇𑀢𑁆𑀣𑀻𑀦𑀦𑁆𑀢𑀺 𑀘𑁄𑀴𑀭𑀝𑁆𑀞𑁂 𑀦𑀺𑀯𑀸𑀲𑀻𑀦𑀁 𑀇𑀢𑁆𑀣𑀻𑀦𑀁. 𑀳𑀢𑁆𑀣𑀺𑀬𑀸 𑀲𑁄𑀡𑁆𑀟𑁄 𑀯𑀺𑀬 𑀳𑀢𑁆𑀣𑀺𑀲𑁄𑀡𑁆𑀟𑀓𑀁 𑀦𑀺𑀯𑀢𑁆𑀣𑀁. 𑀫𑀘𑁆𑀙𑀯𑀸𑀮𑀁 𑀯𑀺𑀬𑀸𑀢𑀺 𑀫𑀘𑁆𑀙𑀯𑀸𑀮𑀓𑀁. 𑀘𑀢𑁆𑀢𑀸𑀭𑁄 𑀓𑀡𑁆𑀡𑀸 𑀏𑀢𑀲𑁆𑀲 𑀦𑀺𑀯𑀢𑁆𑀣𑀲𑁆𑀲𑀸𑀢𑀺 𑀘𑀢𑀼𑀓𑀡𑁆𑀡𑀓𑀁. 𑀢𑀸𑀮𑀯𑀡𑁆𑀝𑀁 𑀯𑀺𑀬𑀸𑀢𑀺 𑀢𑀸𑀮𑀯𑀡𑁆𑀝𑀓𑀁. 𑀲𑀢𑀁 𑀯𑀮𑀺𑀦𑁄 𑀏𑀢𑀲𑁆𑀲 𑀦𑀺𑀯𑀢𑁆𑀣𑀲𑁆𑀲𑀸𑀢𑀺 𑀲𑀢𑀯𑀮𑀺𑀓𑀁. ‘‘𑀅𑀦𑁂𑀓𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀇𑀫𑀺𑀦𑀸 ‘‘𑀲𑀢𑀯𑀮𑀺𑀓’’𑀦𑁆𑀢𑀺 𑀏𑀢𑁆𑀣 𑀲𑀢𑀲𑀤𑁆𑀤𑀲𑁆𑀲 𑀅𑀦𑁂𑀓𑀢𑁆𑀣𑀯𑀸𑀘𑀓𑀢𑀁 𑀤𑀲𑁆𑀲𑁂𑀢𑀺. ‘‘𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑁂𑀲𑀼 𑀯𑀸’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑀦𑀺𑀯𑀢𑁆𑀣𑀁 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀦𑀺𑀯𑀢𑁆𑀣𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀁𑀯𑀮𑁆𑀮𑀺𑀢𑁆𑀯𑀸 𑀦𑀺𑀯𑀢𑁆𑀣𑀁 𑀲𑀁𑀯𑀮𑁆𑀮𑀺𑀬𑀁. 𑀫𑀮𑁆𑀮𑁄 𑀘 𑀓𑀫𑁆𑀫𑀓𑀸𑀭𑁄 𑀘 𑀫𑀮𑁆𑀮𑀓𑀫𑁆𑀫𑀓𑀸𑀭𑀸, 𑀢𑁂 𑀆𑀤𑀬𑁄 𑀬𑁂𑀲𑀁 𑀢𑁂𑀢𑀺 𑀫𑀮𑁆𑀮𑀓𑀫𑁆𑀫𑀓𑀸𑀭𑀸𑀤𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀥𑀼𑀢𑁆𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀫𑁆𑀧𑀺 𑀦𑀺𑀯𑀢𑁆𑀣𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀲𑀩𑁆𑀩𑀁 𑀢𑀁 𑀦𑀺𑀯𑀢𑁆𑀣𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀓𑀁 𑀯𑀸 𑀓𑁄𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁄𑀡𑁂𑀢𑀺 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀓𑁄𑀡𑁂. ‘‘𑀢𑀣𑀸’’𑀢𑀺 𑀇𑀫𑀺𑀦𑀸 ‘‘𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀓𑁄𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀉𑀧𑀭𑀺 𑀮𑀕𑁆𑀕𑁂𑀦𑁆𑀢𑀻’’𑀢𑀺 𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀅𑀦𑁆𑀢𑁄𑀓𑀸𑀲𑀸𑀯𑀲𑁆𑀲 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑁂 𑀦𑀺𑀯𑀸𑀲𑁂𑀦𑁆𑀢𑁂𑀦 𑀅𑀕𑀺𑀮𑀸𑀦𑁂𑀦𑀸𑀢𑀺 𑀬𑁄𑀚𑀦𑀸. 𑀲𑀕𑀼𑀡𑀦𑁆𑀢𑀺 𑀅𑀦𑁆𑀢𑁄𑀓𑀸𑀲𑀸𑀯𑁂𑀦 𑀩𑀳𑀺𑀓𑀸𑀲𑀸𑀯𑀁 𑀲𑀫𑀸𑀦𑀕𑀼𑀡𑀁 𑀓𑀢𑁆𑀯𑀸. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑀜𑁆𑀘𑀸𑀢𑀺 𑀬𑀁 𑀦𑀺𑀯𑀢𑁆𑀣𑀜𑁆𑀘. 𑀇𑀥𑀸𑀢𑀺 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂. 𑀬𑀜𑁆𑀘 𑀲𑁂𑀔𑀺𑀬𑀯𑀡𑁆𑀡𑀦𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁫𑁭𑁬 𑀆𑀤𑀬𑁄) 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀁 𑀢𑀁 𑀦𑀺𑀯𑀢𑁆𑀣𑀦𑁆𑀢𑀺 𑀬𑁄𑀚𑀦𑀸. 𑀦𑀺𑀩𑁆𑀩𑀺𑀓𑀸𑀭𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀪𑁄 𑀓𑀡𑁆𑀡𑁂𑀢𑀺 𑀳𑁂𑀝𑁆𑀞𑀸 𑀞𑀺𑀢𑁂 𑀉𑀪𑁄 𑀓𑀡𑁆𑀡𑁂 𑀉𑀧𑀭𑀺 𑀘 𑀞𑀺𑀢𑁂 𑀉𑀪𑁄 𑀓𑀡𑁆𑀡𑁂. 𑀢𑀦𑁆𑀢𑀺 𑀧𑀭𑀺𑀫𑀡𑁆𑀟𑀮𑀧𑀸𑀭𑀼𑀧𑀦𑀁.

𑀢𑀢𑁆𑀣𑀸𑀢𑀺 ‘‘𑀕𑀺𑀳𑀺𑀧𑀸𑀭𑀼𑀢’’𑀦𑁆𑀢𑀺 𑀯𑀘𑀦𑁂 𑀬𑀁𑀓𑀺𑀜𑁆𑀘𑀺 𑀅𑀜𑁆𑀜𑀣𑀸𑀧𑀸𑀭𑀼𑀢𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀺𑀳𑀺𑀧𑀸𑀭𑀼𑀢𑀁 𑀦𑀸𑀫, 𑀢𑀲𑁆𑀫𑀸, 𑀧𑀭𑀺𑀫𑀡𑁆𑀟𑀮𑀁 𑀧𑀸𑀭𑀼𑀧𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀣𑀸 𑀧𑀸𑀭𑀼𑀧𑀦𑁆𑀢𑀺, 𑀬𑀣𑀸 𑀘 𑀞𑀧𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀲𑁆𑀲𑁂𑀯𑀸𑀢𑀺 𑀤𑀻𑀖𑀲𑀸𑀝𑀓𑀲𑁆𑀲𑁂𑀯. 𑀢𑀲𑁆𑀲𑁂𑀯𑀸𑀢𑀺 𑀲𑀸𑀝𑀓𑀲𑁆𑀲𑁂𑀯. 𑀧𑀸𑀴𑀺𑀓𑀸𑀭𑀓𑁄𑀢𑀺 𑀧𑀸𑀴𑀺𑀁 𑀕𑀡𑁆𑀳𑀦𑁆𑀢𑀁 𑀯𑀸 𑀯𑀸𑀘𑁂𑀦𑁆𑀢𑀁 𑀯𑀸 𑀓𑀸𑀭𑀓𑁄. 𑀢𑀣𑀸𑀢𑀺 𑀬𑀣𑀸 𑀧𑀸𑀭𑀼𑀧𑀦𑁆𑀢𑀺, 𑀢𑀣𑀸.

𑁨𑁮𑁧. 𑀓𑀼𑀳𑀺𑀜𑁆𑀘𑀺 𑀞𑀸𑀦𑀁 𑀕𑀘𑁆𑀙𑀢𑁄 𑀭𑀜𑁆𑀜𑁄𑀢𑀺 𑀬𑁄𑀚𑀦𑀸. ‘‘𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀯𑀳𑀦𑀫𑀦𑀼𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀢𑁂 𑀫𑀦𑀼𑀲𑁆𑀲𑀸 𑀫𑀼𑀡𑁆𑀟𑀁 𑀲𑀻𑀲𑀁 𑀘𑁄𑀴𑀓𑁂𑀦 𑀯𑁂𑀞𑁂𑀦𑁆𑀢𑀻𑀢𑀺 𑀫𑀼𑀡𑁆𑀟𑀯𑁂𑀞𑀺𑀦𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀫𑀥𑀺𑀧𑁆𑀧𑀸𑀬𑁄. 𑀅𑀦𑁆𑀢𑀭𑀸𑀓𑀸𑀚𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸𑀲𑀤𑁆𑀤𑁄 𑀫𑀚𑁆𑀛𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀫𑀚𑁆𑀛𑁂’’𑀢𑀺. ‘‘𑀮𑀕𑁆𑀕𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀓𑀸𑀚𑀲𑁆𑀲 𑀅𑀦𑁆𑀢𑀭𑁂 𑀮𑀕𑁆𑀕𑁂𑀢𑁆𑀯𑀸 𑀯𑀳𑀺𑀢𑀩𑁆𑀩𑀁 𑀅𑀦𑁆𑀢𑀭𑀸𑀓𑀸𑀚𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁨𑁮𑁨. ‘‘𑀘𑀓𑁆𑀔𑀽𑀦𑀁 𑀳𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀅𑀘𑀓𑁆𑀔𑀼𑀲𑁆𑀲𑀦𑁆𑀢𑀺 𑀏𑀢𑁆𑀣 𑀲𑁆𑀲𑀧𑀘𑁆𑀘𑀬𑁄 𑀘𑀓𑁆𑀔𑀼𑀲𑀤𑁆𑀤𑀢𑁄 𑀳𑀺𑀢𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀫𑀸𑀡𑀗𑁆𑀕𑀼𑀮𑁂𑀦𑀸𑀢𑀺 𑀯𑀟𑁆𑀠𑀓𑀻𑀦𑀁 𑀧𑀫𑀸𑀡𑀬𑀼𑀢𑁆𑀢𑁂𑀦 𑀅𑀗𑁆𑀕𑀼𑀮𑁂𑀦.

𑁨𑁮𑁩. ‘‘𑀢𑀺𑀡𑀯𑀦𑀸𑀤𑀻𑀲𑀽’’𑀢𑀺 𑀇𑀫𑀺𑀦𑀸 𑀤𑀸𑀬𑀁 𑀆𑀮𑀺𑀫𑁆𑀧𑁂𑀦𑁆𑀢𑀻𑀢𑀺 𑀏𑀢𑁆𑀣 𑀤𑀸𑀬𑀲𑀤𑁆𑀤𑁄 𑀯𑀦𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀕𑁆𑀕𑀺𑀁 𑀤𑁂𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀆𑀧𑀼𑀩𑁆𑀩𑁄 𑀮𑀺𑀧𑀺𑀥𑀸𑀢𑀼 𑀉𑀧𑀲𑀕𑁆𑀕𑀯𑀲𑁂𑀦 𑀅𑀕𑁆𑀕𑀺𑀤𑀸𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀲𑀫𑀦𑁆𑀢𑀢𑁄 𑀢𑀸𑀬𑀢𑀺 𑀅𑀦𑁂𑀦𑀸𑀢𑀺 𑀧𑀭𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑁆𑀧𑀳𑀭𑀺𑀢𑀓𑀭𑀡𑁂𑀦 𑀯𑀸 𑀧𑀭𑀺𑀔𑀸𑀔𑀡𑁂𑀦 𑀯𑀸 𑀧𑀭𑀺𑀢𑁆𑀢𑀸𑀡’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀧𑀭𑀺𑀢𑁆𑀢𑀓𑀭𑀡𑁂. 𑀤𑀸𑀢𑀼𑀁 𑀮𑀩𑁆𑀪𑀢𑀻𑀢𑀺 𑀲𑀬𑀁 𑀤𑀸𑀢𑀼𑀁 𑀮𑀩𑁆𑀪𑀢𑀺. 𑀳𑀭𑀺𑀢𑀼𑀦𑁆𑀢𑀺 𑀅𑀧𑀦𑁂𑀢𑀼𑀁. 𑀧𑀢𑁆𑀢𑀁 𑀯𑀸 𑀅𑀧𑀢𑁆𑀢𑀁 𑀯𑀸 𑀅𑀕𑁆𑀕𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸𑀢𑀺 𑀅𑀕𑁆𑀕𑀺𑀤𑀸𑀦𑀸𑀤𑀺𑀦𑀸 𑀆𑀓𑀸𑀭𑁂𑀦. 𑀉𑀤𑀓𑁂𑀦 𑀦𑀺𑀩𑁆𑀩𑀸𑀧𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁮𑁪. 𑀲𑀢𑀺 𑀓𑀭𑀡𑀻𑀬𑁂𑀢𑀺 𑀏𑀢𑁆𑀣 𑀓𑀭𑀡𑀻𑀬𑀲𑀤𑁆𑀤𑁄 𑀓𑀺𑀘𑁆𑀘𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀼𑀓𑁆𑀔𑀓𑀝𑁆𑀞𑀸𑀤𑀺𑀕𑁆𑀕𑀳𑀡𑀓𑀺𑀘𑁆𑀘𑁂’’𑀢𑀺. ‘‘𑀲𑀼𑀓𑁆𑀔𑀓𑀝𑁆𑀞𑀸𑀤𑀺𑀕𑁆𑀕𑀳𑀡’’ 𑀇𑀢𑀺 𑀧𑀤𑁂𑀦 𑀓𑀺𑀘𑁆𑀘𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀧𑀼𑀭𑀺𑀲𑀧𑁆𑀧𑀫𑀸𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑁄𑀭𑀺𑀲𑀺𑀬𑀦𑁆𑀢𑀺 𑀏𑀢𑁆𑀣 𑀡𑀺𑀬𑀧𑀘𑁆𑀘𑀬𑁄 𑀧𑀫𑀸𑀡𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀲𑀧𑁆𑀧𑀫𑀸𑀡𑀁 𑀦𑀸𑀫 𑀉𑀧𑀭𑀺 𑀩𑀸𑀳𑀼𑀤𑁆𑀯𑀬𑀢𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀫𑀸𑀡𑀁. 𑀤𑀺𑀲𑁆𑀯𑀸 𑀯𑀸 𑀳𑀼𑀢𑁆𑀯𑀸 𑀯𑀸 𑀤𑀺𑀲𑁆𑀯𑀸𑀢𑀺 𑀬𑁄𑀚𑀦𑀸. 𑀅𑀢𑀺𑀉𑀘𑁆𑀘𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄. 𑀦𑀻𑀘𑀁 𑀧𑀦 𑀭𑀼𑀓𑁆𑀔𑀁 𑀧𑀕𑁂𑀯𑀸𑀢𑀺 𑀳𑀺 𑀅𑀢𑁆𑀣𑁄.

𑁨𑁮𑁫. 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀸𑀢𑀺 𑀏𑀢𑁆𑀣 𑀓𑀭𑀺𑀬𑀢𑀺 𑀉𑀘𑁆𑀘𑀸𑀭𑀺𑀬𑀢𑀻𑀢𑀺 𑀓𑀭𑀡𑁄, 𑀲𑀤𑁆𑀤𑁄, 𑀯𑀸𑀘𑀸𑀬𑁂𑀯 𑀓𑀭𑀡𑁄 𑀯𑀸𑀓𑁆𑀓𑀭𑀡𑁄, 𑀓𑀮𑁆𑀬𑀸𑀡𑁄 𑀯𑀸𑀓𑁆𑀓𑀭𑀡𑁄 𑀏𑀢𑁂𑀲𑀦𑁆𑀢𑀺 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀥𑀼𑀭𑀲𑀤𑁆𑀤𑀸’’𑀢𑀺. 𑀯𑁂𑀤𑀁 𑀯𑀺𑀬𑀸𑀢𑀺 𑀲𑀼𑀢𑀺𑀁 𑀯𑀺𑀬. 𑀯𑀸𑀘𑀦𑀸𑀫𑀕𑁆𑀕𑀦𑁆𑀢𑀺 𑀯𑀸𑀘𑀦𑀸𑀬 𑀉𑀧𑀸𑀬𑀁. 𑀲𑀓𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀗𑁆𑀔𑀸𑀢𑀲𑁆𑀲 𑀲𑀲𑁆𑀲 𑀅𑀢𑁆𑀢𑀦𑁄 𑀏𑀲𑀸 𑀲𑀓𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀫𑀸𑀕𑀥𑀦𑀺𑀭𑀼𑀢𑁆𑀢𑀺𑀬𑀸 𑀏𑀯 𑀥𑀫𑁆𑀫𑁄 𑀪𑀸𑀲𑀺𑀢𑁄, 𑀢𑀲𑁆𑀫𑀸 𑀲𑀸 𑀫𑀸𑀕𑀥𑀦𑀺𑀭𑀼𑀢𑁆𑀢𑀺 𑀲𑀓𑀸 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀭𑀼𑀢𑁆𑀢𑀻𑀢𑀺 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀯𑀼𑀘𑁆𑀘𑀢𑁂 𑀇𑀫𑀸𑀬 𑀲𑀤𑁆𑀤𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀦𑀺𑀭𑀼𑀢𑁆𑀢𑀺, 𑀯𑀘𑀥𑀸𑀢𑀼𑀲𑁆𑀲 𑀯𑀓𑀸𑀭𑀲𑁆𑀲 𑀉𑀓𑀸𑀭𑁄, 𑀲𑀩𑁆𑀩𑀯𑁄𑀳𑀸𑀭𑁄 𑀮𑀩𑁆𑀪𑀢𑀺. 𑀇𑀥 𑀧𑀦 ‘‘𑀲𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀸𑀕𑀥𑀯𑁄𑀳𑀸𑀭𑁄 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀕𑀥𑀯𑁄𑀳𑀸𑀭𑁄’’𑀢𑀺. ‘‘𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺𑀧𑀺 𑀧𑀸𑀞𑁄. 𑀏𑀯𑀜𑁆𑀳𑀺 𑀲𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀪𑀸𑀯𑁂𑀦 𑀧𑀯𑀢𑁆𑀢𑀸 𑀫𑀽𑀮𑀪𑀸𑀲𑀸𑀪𑀽𑀢𑀸 𑀫𑀸𑀕𑀥𑀦𑀺𑀭𑀼𑀢𑁆𑀢𑀺𑀬𑁂𑀯.

𑁨𑁮𑁬. 𑀮𑁄𑀓𑀸𑀬𑀢𑀁 𑀦𑀸𑀫 𑀢𑀺𑀢𑁆𑀣𑀺𑀬𑀲𑀢𑁆𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦𑀸𑀢𑀺 ‘‘𑀲𑁂𑀢𑁄 𑀓𑀸𑀓𑁄, 𑀓𑀲𑁆𑀫𑀸? 𑀅𑀝𑁆𑀞𑀻𑀦𑀁 𑀲𑁂𑀢𑀢𑁆𑀢𑀸. 𑀭𑀢𑁆𑀢𑁄 𑀩𑀓𑁄, 𑀓𑀲𑁆𑀫𑀸? 𑀮𑁄𑀳𑀺𑀢𑀲𑁆𑀲 𑀭𑀢𑁆𑀢𑀢𑁆𑀢𑀸’’ 𑀇𑀢𑀺 (𑀫. 𑀦𑀺. 𑀅𑀝𑁆𑀞. 𑁨.𑁨𑁨𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁦𑁮𑁦; 𑀅. 𑀦𑀺. 𑁧𑁦.𑁬𑁯-𑁭𑁦) 𑀇𑀫𑀺𑀦𑀸 𑀏𑀯 𑀓𑀸𑀭𑀡𑁂𑀦.

𑁨𑁮𑁮. 𑀅𑀦𑁆𑀢𑀭𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀅𑀦𑁆𑀢𑀭𑀲𑀤𑁆𑀤𑁄 𑀩𑁆𑀬𑀯𑀥𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀦𑁆𑀢𑀭𑀺𑀢𑀸 𑀅𑀳𑁄𑀲𑀺 𑀧𑀝𑀺𑀘𑁆𑀙𑀦𑁆𑀦𑀸’’𑀢𑀺. 𑀢𑁂𑀦 𑀲𑀤𑁆𑀤𑁂𑀦 𑀥𑀫𑁆𑀫𑀓𑀣𑀸 𑀩𑁆𑀬𑀯𑀥𑀸𑀦𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄.

𑁨𑁮𑁯. 𑀆𑀩𑀸𑀥𑀧𑁆𑀧𑀘𑁆𑀘𑀬𑀸𑀢𑀺 𑀏𑀢𑁆𑀣 𑀆𑀩𑀸𑀥𑀲𑁆𑀲 𑀪𑁂𑀲𑀚𑁆𑀚𑀲𑀗𑁆𑀔𑀸𑀢𑁄 𑀧𑀘𑁆𑀘𑀬𑁄 𑀆𑀩𑀸𑀥𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. 𑀇𑀫𑀺𑀦𑀸 𑀆𑀩𑀸𑀥𑁄𑀬𑁂𑀯 𑀧𑀘𑁆𑀘𑀬𑁄 𑀆𑀩𑀸𑀥𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀢𑀺.

𑁨𑁯𑁩. 𑀤𑀼𑀓𑁆𑀓𑀝𑀯𑀢𑁆𑀣𑀼 𑀦𑀸𑀫 𑀅𑀓𑀧𑁆𑀧𑀺𑀬𑀯𑁄𑀳𑀸𑀭𑀸𑀤𑀺𑀦𑀸 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀺, 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀦𑀸𑀫 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀺𑀅𑀢𑁆𑀣𑀸𑀬 𑀧𑀣𑀯𑀻𑀔𑀡𑀦𑀸𑀤𑀺. 𑀧𑀳𑀭𑀡𑀻𑀢𑀺 𑀧𑀳𑀭𑀢𑀺 𑀇𑀫𑀸𑀬𑀸𑀢𑀺 𑀧𑀳𑀭𑀡𑀻. 𑀏𑀢𑀦𑁆𑀢𑀺 ‘‘𑀧𑀳𑀭𑀡𑀻’’𑀢𑀺 𑀏𑀢𑀁 𑀦𑀸𑀫𑀁. 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀯𑀼𑀥𑀲𑀗𑁆𑀔𑀸𑀢𑀲𑁆𑀲 𑀮𑁄𑀳𑀪𑀡𑁆𑀟𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀆𑀯𑀼𑀥𑀲𑀗𑁆𑀔𑀸𑀢𑀁 𑀮𑁄𑀳𑀪𑀡𑁆𑀟𑀁. 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀓𑀢𑀓𑀁 𑀦𑀸𑀫 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑀅𑀝𑁆𑀞. 𑁨𑁬𑁯) 𑀯𑀼𑀢𑁆𑀢𑀫𑁂𑀯. 𑀥𑀦𑀺𑀬𑀲𑁆𑀲𑁂𑀯𑀸𑀢𑀺 𑀥𑀦𑀺𑀬𑀲𑁆𑀲 𑀏𑀯. 𑀅𑀜𑁆𑀜𑁂𑀲𑀜𑁆𑀳𑀺 𑀓𑀢𑀸𑀬 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀓𑀼𑀝𑀺𑀬𑀸 𑀅𑀧𑀸𑀓𑀝𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀥𑀦𑀺𑀬𑀲𑁆𑀲𑁂𑀯𑀸’’𑀢𑀺. 𑀅𑀣 𑀯𑀸 𑀥𑀦𑀺𑀬𑀲𑁆𑀲 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀓𑀼𑀝𑀺 𑀇𑀯𑀸𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.