𑁬. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀣𑀸

𑁨𑁦𑁭. 𑀅𑀲𑀼𑀘𑀻𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀲𑀼𑀘𑀻𑀦𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀏𑀢𑀲𑁆𑀲𑀸𑀢𑀺 𑀅𑀲𑀼𑀘𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀼𑀘𑀻𑀳𑀺 𑀓𑀸𑀬𑀯𑀘𑀻𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀏𑀲𑁂𑀯 𑀦𑀬𑁄 𑀅𑀮𑀚𑁆𑀚𑀻𑀢𑀺 𑀏𑀢𑁆𑀣𑀸𑀧𑀺. 𑀲𑀸𑀦𑀼𑀯𑀸𑀤𑁄𑀢𑀺 𑀏𑀢𑁆𑀣 𑀅𑀦𑀼𑀯𑀸𑀤𑀉𑀧𑀯𑀸𑀤𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀉𑀧𑀯𑀸𑀤𑁄’’𑀢𑀺. 𑀇𑀢𑀺 𑀧𑀜𑁆𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀏𑀢𑁆𑀣𑀸𑀢𑀺 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑁂. 𑀇𑀤𑀦𑁆𑀢𑀺 𑀓𑀫𑁆𑀫𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀬𑁄 𑀧𑀼𑀕𑁆𑀕𑀮𑁄 𑀧𑀸𑀧𑀺𑀬𑁄𑀢𑀺 𑀬𑁄𑀚𑀦𑀸. 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬𑀸𑀢𑀺 𑀮𑀸𑀫𑀓𑀼𑀲𑁆𑀲𑀦𑁆𑀦𑀢𑀸𑀬. 𑀇𑀫𑀺𑀦𑀸 𑀅𑀬𑀜𑁆𑀘 𑀧𑀸𑀧𑁄 𑀅𑀬𑀜𑁆𑀘 𑀧𑀸𑀧𑁄, 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀧𑀸𑀧𑁄𑀢𑀺 𑀧𑀸𑀧𑀺𑀬𑁄𑀢𑀺 𑀘 𑀧𑀸𑀧𑀸𑀦𑀁 𑀅𑀢𑀺𑀲𑀬𑁂𑀦 𑀧𑀸𑀧𑁄𑀢𑀺 𑀧𑀸𑀧𑀺𑀬𑁄𑀢𑀺 𑀘 𑀯𑀘𑀦𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀲𑁆𑀲. 𑀇𑀫𑀺𑀦𑀸 𑀢𑀲𑁆𑀲 𑀧𑀸𑀧𑀺𑀬𑀲𑁆𑀲 𑀓𑀢𑁆𑀢𑀩𑁆𑀩𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀁, 𑀢𑀫𑁂𑀯 𑀓𑀫𑁆𑀫𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀬𑀓𑀸𑀭𑁂 𑀤𑁆𑀯𑁂𑀪𑀸𑀯𑁄 𑀅𑀢𑁆𑀣𑀺, 𑀲𑁄 𑀅𑀬𑀼𑀢𑁆𑀢𑁄𑀬𑁂𑀯. ‘‘𑀬𑁂𑀪𑀼𑀬𑁆𑀬𑀲𑀺𑀓𑀸’’𑀢𑀺 𑀏𑀢𑁆𑀣 𑀬𑀓𑀸𑀭𑁂 𑀤𑁆𑀯𑁂𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄 𑀏𑀢𑁆𑀣𑀸𑀧𑀺 𑀤𑁆𑀯𑁂𑀪𑀸𑀯𑁄 𑀬𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀢𑀺 𑀮𑀺𑀔𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.