𑁪. 𑀲𑀫𑀣𑀓𑁆𑀔𑀦𑁆𑀥𑀓𑀁

𑁧. 𑀲𑀫𑁆𑀫𑀼𑀔𑀸𑀯𑀺𑀦𑀬𑀓𑀣𑀸

𑁧𑁮𑁬-𑁭. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀙 𑀫𑀸𑀢𑀺𑀓𑀸𑀧𑀤𑀸𑀦𑀻𑀢𑀺 𑀯𑀸𑀓𑁆𑀬𑀫𑁆𑀧𑀺 𑀲𑀫𑀸𑀲𑁄𑀧𑀺 𑀬𑀼𑀢𑁆𑀢𑁄𑀬𑁂𑀯. 𑀢𑀢𑁆𑀣 𑀲𑀫𑀸𑀲𑁄 𑀧𑀦 𑀅𑀲𑀫𑀸𑀳𑀸𑀭𑀤𑀺𑀕𑀼𑀬𑁂𑀯. ‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀧𑀤𑀁 ‘‘𑀯𑀼𑀢𑁆𑀢𑁄’’𑀢𑀺 𑀧𑀤𑁂 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀢𑀼𑀮𑁆𑀬𑀢𑁆𑀣𑁄 𑀯𑀸. 𑀯𑀺𑀢𑁆𑀣𑀸𑀭𑁄𑀢𑀺 𑀯𑀺𑀪𑀗𑁆𑀕𑁄. 𑀢𑀢𑁆𑀣𑀸𑀢𑀺 𑀯𑀺𑀪𑀗𑁆𑀕𑁂. 𑀲𑀜𑁆𑀜𑀸𑀧𑁂𑀢𑀻𑀢𑀺 𑀏𑀢𑁆𑀣 𑀲𑀜𑁆𑀜𑀁 𑀓𑀢𑁆𑀯𑀸 𑀚𑀸𑀦𑀸𑀧𑁂𑀢𑀻𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀧𑀭𑀺𑀢𑁄𑀲𑁂𑀢𑁆𑀯𑀸 𑀚𑀸𑀦𑀸𑀧𑁂𑀢𑀻’’𑀢𑀺. 𑀇𑀫𑀺𑀦𑀸 𑀲𑀁𑀧𑀼𑀩𑁆𑀩𑁄 𑀜𑀸𑀥𑀸𑀢𑀼 𑀧𑀭𑀺𑀢𑁄𑀲𑀦𑀢𑁆𑀣𑀁 𑀅𑀦𑁆𑀢𑁄𑀓𑀢𑁆𑀯𑀸 𑀅𑀯𑀩𑁄𑀥𑀦𑀢𑁆𑀣𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀭𑀡𑀧𑀢𑀺𑀭𑀽𑀧𑀓𑀸𑀦𑀻𑀢𑀺 𑀓𑀸𑀭𑀡𑀲𑁆𑀲 𑀧𑀝𑀺𑀪𑀸𑀕𑀸𑀦𑀺. 𑀦𑀺𑀚𑁆𑀛𑀸𑀧𑁂𑀢𑀻𑀢𑀺 𑀏𑀢𑁆𑀣 𑀛𑁂𑀥𑀸𑀢𑀼 𑀑𑀮𑁄𑀓𑀦𑀢𑁆𑀣𑁄𑀢𑀺 𑀆𑀳 ‘‘𑀑𑀮𑁄𑀓𑁂𑀢𑀻’’𑀢𑀺. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦, 𑀓𑀭𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀥𑀫𑁆𑀫𑀯𑀸𑀤𑀻. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀧𑁂𑀓𑁆𑀔𑀢𑀻𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀦 𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀧𑁂𑀓𑁆𑀔𑀢𑀺 𑀅𑀦𑀼𑀧𑁂𑀓𑁆𑀔𑀢𑀻𑀢𑀺 𑀏𑀢𑁆𑀣 𑀇𑀓𑁆𑀔𑀥𑀸𑀢𑀼 ‘‘𑀤𑀲𑁆𑀲𑁂𑀢𑀺 𑀅𑀦𑀼𑀤𑀲𑁆𑀲𑁂𑀢𑀻’’𑀢𑀺 𑀏𑀢𑁆𑀣 𑀤𑀺𑀲𑀥𑀸𑀢𑀼𑀬𑀸 𑀲𑀤𑀺𑀲𑀢𑁆𑀣𑁄𑀢𑀺 𑀆𑀳 ‘‘𑀤𑀲𑁆𑀲𑁂𑀢𑀺…𑀧𑁂… 𑀧𑀭𑀺𑀬𑀸𑀬𑀯𑀘𑀦𑀸𑀦𑀻’’𑀢𑀺. 𑀢𑁂𑀲𑀜𑁆𑀜𑁂𑀯𑀸𑀢𑀺 ‘‘𑀧𑁂𑀓𑁆𑀔𑀢𑀺 𑀅𑀦𑀼𑀧𑁂𑀓𑁆𑀔𑀢𑀻’’𑀢𑀺 𑀧𑀤𑀸𑀦𑀜𑁆𑀜𑁂𑀯. 𑀧𑀭𑀺𑀬𑀸𑀬𑀯𑀘𑀦𑀸𑀦𑀻𑀢𑀺 𑀯𑁂𑀯𑀘𑀦𑀲𑀤𑁆𑀤𑀸 𑀅𑀢𑁆𑀣𑁂 𑀧𑀭𑀺𑀩𑁆𑀬𑀢𑁆𑀢𑀺𑀁 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀇𑀫𑁂𑀳𑀻𑀢𑀺 𑀧𑀭𑀺𑀬𑀸𑀬𑀸𑀦𑀺, 𑀢𑀸𑀦𑀺𑀬𑁂𑀯 𑀯𑀘𑀦𑀸𑀦𑀺 𑀧𑀭𑀺𑀬𑀸𑀬𑀯𑀘𑀦𑀸𑀦𑀺. 𑀲𑁄𑀢𑀺 𑀅𑀥𑀫𑁆𑀫𑀯𑀸𑀤𑀻. 𑀫𑁄𑀳𑁂𑀢𑁆𑀯𑀸𑀢𑀺 𑀥𑀫𑁆𑀫𑀯𑀸𑀤𑀻𑀧𑀼𑀕𑁆𑀕𑀮𑀸𑀤𑀺𑀁 𑀫𑁄𑀳𑀸𑀧𑁂𑀢𑁆𑀯𑀸.

𑁧𑁮𑁮. 𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑁄𑀳𑁂𑀢𑁆𑀯𑀸𑀢𑀺 𑀅𑀥𑀫𑁆𑀫𑀯𑀸𑀤𑀻𑀧𑀼𑀕𑁆𑀕𑀮𑀸𑀤𑀺𑀁 𑀅𑀫𑁄𑀳𑀸𑀧𑁂𑀢𑁆𑀯𑀸, 𑀅𑀯𑀺𑀧𑀭𑀻𑀢𑀁 𑀚𑀸𑀦𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨. 𑀲𑀢𑀺𑀯𑀺𑀦𑀬𑀓𑀣𑀸

𑁧𑁯𑁫. 𑀧𑀭𑀫𑁆𑀫𑀼𑀔𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀦𑀬𑁄, 𑀧𑀭𑀫𑁆𑀫𑀼𑀔𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄, 𑀯𑀺𑀦𑀬𑀓𑀫𑁆𑀫𑀁. 𑀲𑀗𑁆𑀖𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀸𑀦𑀁 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄. 𑀧𑀜𑁆𑀘𑀺𑀫𑀸𑀦𑀻𑀢𑀺 𑀏𑀢𑁆𑀣 𑀧𑀜𑁆𑀘𑀦𑁆𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀤𑁆𑀥𑀲𑁆𑀲𑀸’’𑀢𑀺𑀆𑀤𑀺. 𑀅𑀦𑀼𑀯𑀤𑀺𑀢𑀲𑁆𑀲 𑀤𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀸𑀦𑀻𑀢𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺. ‘‘𑀏𑀓𑁂𑀓𑀅𑀗𑁆𑀕𑀯𑀲𑁂𑀦 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀼𑀤𑀸𑀬𑀯𑀸𑀓𑁆𑀬𑀦𑀺𑀩𑁆𑀩𑀢𑁆𑀢𑀺𑀪𑀸𑀯𑀢𑁄 𑀧𑀜𑁆𑀘𑀗𑁆𑀕𑀯𑀲𑁂𑀦𑁂𑀯 𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀦𑁆𑀢𑀺 ‘‘𑀧𑀜𑁆𑀘𑀺𑀫𑀸𑀦𑀻’’𑀢𑀺 𑀏𑀢𑀁 𑀯𑀘𑀦𑀁 𑀤𑁂𑀲𑀦𑀸𑀫𑀢𑁆𑀢𑀫𑁂𑀯, 𑀦 𑀅𑀯𑀬𑀯𑀯𑀸𑀓𑁆𑀬𑀦𑀺𑀩𑁆𑀩𑀢𑁆𑀢𑀺𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀦𑁆𑀢𑀺 𑀪𑀽𑀢𑀁. 𑀏𑀢𑁆𑀣𑀸𑀢𑀺 ‘‘𑀧𑀜𑁆𑀘𑀺𑀫𑀸𑀦𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑁂. 𑀢𑀢𑁆𑀣 𑀘𑀸𑀢𑀺 ‘‘𑀧𑀜𑁆𑀘𑀺𑀫𑀸𑀦𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑁂 𑀘. 𑀅𑀦𑀼𑀯𑀤𑀦𑁆𑀢𑀻𑀢𑀺 𑀏𑀢𑁆𑀣 𑀅𑀦𑀼𑀤𑁆𑀥𑀁𑀲𑀦𑁂𑀦 𑀯𑀤𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑁄𑀤𑁂𑀦𑁆𑀢𑀻’’𑀢𑀺. 𑀅𑀬𑀁 𑀧𑀦 𑀲𑀢𑀺𑀯𑀺𑀦𑀬𑁄 𑀤𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀕𑀸𑀫𑀺𑀦𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀲𑀓𑀤𑀸𑀕𑀸𑀫𑀺𑀆𑀤𑀺𑀓𑁂 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀘 𑀔𑁄𑀢𑀺 𑀲𑀢𑀺𑀯𑀺𑀦𑀬𑁄 𑀘. 𑀘𑁄𑀤𑀺𑀬𑀫𑀸𑀦𑁂𑀬𑁂𑀯𑀸𑀢𑀺 𑀘𑁄𑀤𑀺𑀬𑀫𑀸𑀦𑀲𑁆𑀲𑁂𑀯, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀲𑁆𑀫𑀺𑀦𑁆𑀢𑀺 𑀲𑀢𑀺𑀯𑀺𑀦𑀬𑀲𑁆𑀫𑀺𑀁 𑀤𑀺𑀦𑁆𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁄𑀤𑀺𑀢𑀢𑁆𑀢𑀸 𑀓𑀣𑀸 𑀦 𑀭𑀽𑀳𑀢𑀻𑀢𑀺 𑀆𑀳 ‘‘𑀘𑁄𑀤𑁂𑀦𑁆𑀢𑁄𑀧𑀻’’𑀢𑀺𑀆𑀤𑀺. 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀓𑁄 𑀆𑀧𑀚𑁆𑀚𑀢𑀺. 𑀘𑁄𑀤𑀦𑀸𑀤𑀺𑀅𑀲𑀸𑀭𑀼𑀧𑁆𑀧𑁂 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄, 𑀯𑀺𑀦𑀬𑀓𑀫𑁆𑀫𑀁. 𑀲𑀢𑀺𑀯𑁂𑀧𑀼𑀮𑁆𑀮𑀧𑀢𑁆𑀢𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀲𑀢𑀺𑀯𑀺𑀦𑀬𑁄.

𑁩. 𑀅𑀫𑀽𑀴𑁆𑀳𑀯𑀺𑀦𑀬𑀓𑀣𑀸

𑁧𑁯𑁬. 𑀪𑀸𑀲𑀺𑀢𑀧𑀭𑀺𑀓𑀦𑁆𑀢𑀦𑁆𑀢𑀺 𑀏𑀢𑁆𑀣 𑀪𑀸𑀲𑀺𑀢𑀧𑀭𑀺𑀓𑀦𑁆𑀢𑀲𑀤𑁆𑀤𑀸𑀦𑀁 𑀓𑀭𑀡𑀸𑀧𑁂𑀓𑁆𑀔𑀢𑁆𑀢𑀸 𑀯𑀺𑀲𑀼𑀁 𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀸𑀘𑀸𑀬 𑀪𑀸𑀲𑀺𑀢𑀁, 𑀓𑀸𑀬𑁂𑀦 𑀧𑀭𑀺𑀓𑀦𑁆𑀢’’𑀦𑁆𑀢𑀺. ‘‘𑀧𑀭𑀺𑀓𑁆𑀓𑀫𑁂𑀢𑁆𑀯𑀸 𑀓𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀓𑀫𑀢𑀻𑀢𑀺 𑀧𑀭𑀺𑀓𑀦𑁆𑀢𑀁, 𑀧𑀭𑀺𑀓𑀦𑁆𑀢𑀁 𑀳𑀼𑀢𑁆𑀯𑀸 𑀓𑀢𑀁 𑀧𑀭𑀺𑀓𑀦𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀓𑁆𑀓𑀫𑁂𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀭𑀢𑀸𑀬𑀲𑁆𑀫𑀸𑀢𑀺 𑀏𑀢𑁆𑀣 𑀉𑀓𑀸𑀭𑀮𑁄𑀧𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀭𑀢𑀼 𑀆𑀬𑀲𑁆𑀫𑀸’’𑀢𑀺. ‘‘𑀏𑀯𑀭𑀽𑀧𑀺𑀬𑀸 𑀆𑀧𑀢𑁆𑀢𑀺𑀬𑀸’’𑀢𑀺 𑀇𑀫𑀺𑀦𑀸 𑀆𑀧𑀚𑁆𑀚𑀺𑀢𑀸𑀢𑀺 𑀏𑀢𑁆𑀣 𑀢𑀼𑀧𑀘𑁆𑀘𑀬𑀬𑁄𑀕𑀪𑀸𑀯𑀢𑁄 𑀓𑀫𑁆𑀫𑀢𑁆𑀣𑀙𑀝𑁆𑀞𑀺𑀬𑀸𑀧𑀺 𑀲𑀫𑁆𑀪𑀯𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀼𑀧𑀘𑁆𑀘𑀬𑀬𑁄𑀕𑁂 𑀓𑀫𑁆𑀫𑀢𑁆𑀣𑀙𑀝𑁆𑀞𑀻 𑀅𑀦𑀺𑀘𑁆𑀘𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀏𑀯𑀭𑀽𑀧𑀺𑀬𑀸 𑀆𑀧𑀢𑁆𑀢𑀺𑀬𑀸’’𑀢𑀺 𑀓𑀫𑁆𑀫𑀢𑁆𑀣𑀙𑀝𑁆𑀞𑀻𑀪𑀸𑀯𑁂𑀦 𑀅𑀯𑀢𑁆𑀯𑀸 ‘‘𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀓𑀫𑁆𑀫𑀢𑁆𑀣𑀤𑀼𑀢𑀺𑀬𑀸𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲𑀸𑀢𑀺 ‘‘𑀆𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀧𑀸𑀞𑀲𑁆𑀲. ‘‘𑀧𑀞𑀫𑀁 𑀧𑀘𑁆𑀙𑀸’’𑀢𑀺 𑀧𑀤𑁂𑀳𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑁄𑀤𑀓𑀲𑁆𑀲 𑀓𑀣𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀦𑀬𑁄, 𑀘𑁄𑀤𑀓𑀲𑁆𑀲 𑀓𑀣𑀁 𑀯𑀺𑀦𑁂𑀢𑀺 𑀯𑀺𑀦𑀸𑀲𑁂𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄. 𑀧𑀞𑀫𑀁 𑀫𑀽𑀴𑁆𑀳𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀧𑀘𑁆𑀙𑀸 𑀅𑀫𑀽𑀴𑁆𑀳𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄.

𑁪. 𑀧𑀝𑀺𑀜𑁆𑀜𑀸𑀢𑀓𑀭𑀡𑀓𑀣𑀸

𑁨𑁦𑁦. 𑀧𑀝𑀺𑀚𑀸𑀦𑀺𑀬𑀢𑁂, 𑀧𑀝𑀺𑀚𑀸𑀦𑀦𑀁 𑀯𑀸 𑀧𑀝𑀺𑀜𑁆𑀜𑀸, 𑀢𑀸𑀬 𑀓𑀸𑀭𑁂𑀢𑀩𑁆𑀩𑀁.

𑁫. 𑀬𑁂𑀪𑀼𑀬𑁆𑀬𑀲𑀺𑀓𑀸𑀓𑀣𑀸

𑁨𑁦𑁨. 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀏𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀯𑀢𑁆𑀢𑀸 𑀬𑁂𑀪𑀼𑀬𑁆𑀬𑀲𑀺𑀓𑀸, 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀲𑀫𑁆𑀧𑀸𑀤𑀺𑀓𑀸 𑀓𑀺𑀭𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲𑀸 𑀓𑀺𑀭𑀺𑀬𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲𑀸 𑀓𑀺𑀭𑀺𑀬𑀸𑀬𑀸𑀢𑀺 𑀬𑀲𑁆𑀲𑀸 𑀬𑁂𑀪𑀼𑀬𑁆𑀬𑀢𑀸𑀲𑀫𑁆𑀧𑀸𑀤𑀺𑀓𑀸𑀬 𑀓𑀺𑀭𑀺𑀬𑀸𑀬. 𑀏𑀲𑀸𑀢𑀺 𑀬𑁂𑀪𑀼𑀬𑁆𑀬𑀢𑀸𑀲𑀫𑁆𑀧𑀸𑀤𑀺𑀓𑀸 𑀓𑀺𑀭𑀺𑀬𑀸.

𑁨𑁦𑁪. 𑀑𑀭𑀫𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 𑀑𑀭𑀲𑀤𑁆𑀤𑁄 𑀘 𑀫𑀢𑁆𑀢𑀲𑀤𑁆𑀤𑁄 𑀘 𑀲𑀫𑀽𑀳𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀯𑀸𑀘𑀓𑁄 𑀅𑀧𑁆𑀧𑀫𑀢𑁆𑀢𑀯𑀸𑀘𑀓𑁄𑀢𑀺 𑀆𑀳 ‘‘𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑀓’’𑀦𑁆𑀢𑀺. ‘‘𑀪𑀡𑁆𑀟𑀦𑀫𑀢𑁆𑀢𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀦 𑀫𑀳𑀦𑁆𑀢𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀕𑀢𑀺𑀕𑀢𑀦𑁆𑀢𑀺 𑀏𑀢𑁆𑀣 𑀘𑀺𑀭𑀓𑀸𑀮𑀪𑀸𑀯𑀁 𑀦 𑀘 𑀕𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁆𑀯𑁂 𑀢𑀬𑁄…𑀧𑁂… 𑀅𑀯𑀺𑀦𑀺𑀘𑁆𑀙𑀺𑀢’’𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀚𑀸𑀢𑀆𑀯𑀸𑀲𑁂 𑀏𑀯, 𑀦 𑀘 𑀲𑀭𑀺𑀢𑀲𑀸𑀭𑀺𑀢𑀧𑀤𑀸𑀦𑀁 𑀲𑀼𑀤𑁆𑀥𑀓𑀸𑀭𑀺𑀢𑀓𑀺𑀭𑀺𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀬𑀁 𑀲𑀭𑀺𑀢𑀁 𑀯𑀸 𑀅𑀜𑁆𑀜𑁂𑀳𑀺 𑀲𑀸𑀭𑀺𑀢𑀁 𑀯𑀸 𑀦 𑀳𑁄𑀢𑀻’’𑀢𑀺. 𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀯𑀺𑀯𑀸𑀤𑀓𑀸𑀭𑀓𑁂𑀳𑀺 𑀪𑀺𑀓𑁆𑀔𑀽𑀳𑀺. ‘‘𑀲𑀮𑀸𑀓𑀁 𑀕𑀸𑀳𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸 ‘‘𑀚𑀸𑀦𑀸𑀢𑀻’’𑀢𑀺 𑀧𑀤𑀲𑁆𑀲 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀅𑀧𑀺 𑀦𑀸𑀫𑀸𑀢𑀺 𑀇𑀫𑀺𑀦𑀸 𑀅𑀧𑁆𑀧𑁂𑀯𑀦𑀸𑀫𑀲𑀤𑁆𑀤𑁄 𑀅𑀧𑀺𑀦𑀸𑀫𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀽𑀢𑀺 𑀪𑀯𑁂𑀬𑁆𑀬𑀼𑀁. 𑀇𑀫𑀺𑀦𑀸 ‘‘𑀧𑀸𑀴𑀺𑀬𑀁 𑀅𑀥𑀫𑁆𑀫𑀯𑀸𑀤𑀻 𑀩𑀳𑀼𑀢𑀭𑀸 𑀪𑀯𑁂𑀬𑁆𑀬𑀼𑀁, 𑀅𑀧𑁆𑀧𑁂𑀯 𑀦𑀸𑀫 𑀲𑀸𑀥𑀽’’𑀢𑀺 𑀬𑁄𑀚𑀦𑀸𑀦𑀬𑀁 𑀤𑀲𑁆𑀲𑁂𑀢𑀺. ‘‘𑀅𑀬𑀫𑀲𑁆𑀲 𑀅𑀚𑁆𑀛𑀸𑀲𑀬𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀲𑀮𑀸𑀓𑀕𑀸𑀳𑀲𑁆𑀲. 𑀤𑁆𑀯𑀻𑀲𑀼𑀧𑀻𑀢𑀺 ‘‘𑀚𑀸𑀦𑀸𑀢𑀺 𑀲𑀗𑁆𑀖𑁄 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀗𑁆𑀖𑁄 𑀪𑀺𑀚𑁆𑀚𑁂𑀬𑁆𑀬𑀸’’𑀢𑀺 𑀘 𑀤𑁆𑀯𑀻𑀲𑀼𑀧𑀺 𑀧𑀤𑁂𑀲𑀼.

‘‘𑀅𑀥𑀫𑁆𑀫𑁂𑀦 𑀕𑀡𑁆𑀳𑀦𑁆𑀢𑀻’’𑀢𑀺 𑀏𑀢𑁆𑀣 ‘‘𑀕𑀡𑁆𑀳𑀦𑁆𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀲𑁆𑀲 𑀅𑀥𑀫𑁆𑀫𑀯𑀸𑀤𑀺𑀦𑁄 𑀏𑀯 𑀓𑀢𑁆𑀢𑀸 𑀦𑀸𑀫𑀸𑀢𑀺 𑀆𑀳 ‘‘𑀅𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺. ‘‘𑀤𑁆𑀯𑁂 𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺 𑀇𑀫𑀺𑀦𑀸 ‘‘𑀯𑀕𑁆𑀕𑀸 𑀕𑀡𑁆𑀳𑀦𑁆𑀢𑀻’’𑀢𑀺 𑀏𑀢𑁆𑀣 ‘‘𑀕𑀡𑁆𑀳𑀦𑁆𑀢𑀻’’𑀢𑀺 𑀓𑀺𑀭𑀺𑀬𑀸𑀧𑀤𑀲𑁆𑀲 𑀥𑀫𑁆𑀫𑀯𑀸𑀤𑀺𑀦𑁄 𑀏𑀯 𑀓𑀢𑁆𑀢𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀬𑀣𑀸𑀤𑀺𑀝𑁆𑀞𑀺𑀬𑀸 𑀕𑀡𑁆𑀳𑀦𑁆𑀢𑀻𑀢𑀺 𑀏𑀢𑁆𑀣 𑀥𑀫𑁆𑀫𑀯𑀸𑀤𑀺𑀦𑁄 𑀳𑀼𑀢𑁆𑀯𑀸 𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀲𑁆𑀲 𑀕𑀳𑀡𑀁 𑀦 𑀘 𑀬𑀣𑀸𑀤𑀺𑀝𑁆𑀞𑀺𑀬𑀸 𑀕𑀡𑁆𑀳𑀦𑁆𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀥𑀫𑁆𑀫𑀯𑀸𑀤𑀺𑀦𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀧𑀝𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀇𑀫𑀫𑁂𑀯𑀢𑁆𑀣𑀁 𑀧𑀝𑀺𑀲𑁂𑀥𑁂𑀢𑁆𑀯𑀸. ‘‘𑀧𑀭𑀺𑀯𑀢𑁆𑀢𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀥𑀫𑁆𑀫𑀯𑀸𑀤𑀺𑀦𑁄. 𑀏𑀢𑁆𑀣𑀸𑀢𑀺 𑀲𑀫𑀣𑀓𑁆𑀔𑀦𑁆𑀥𑀓𑁂.

𑁬. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀣𑀸

𑁨𑁦𑁭. 𑀅𑀲𑀼𑀘𑀻𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀲𑀼𑀘𑀻𑀦𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀏𑀢𑀲𑁆𑀲𑀸𑀢𑀺 𑀅𑀲𑀼𑀘𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀼𑀘𑀻𑀳𑀺 𑀓𑀸𑀬𑀯𑀘𑀻𑀓𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀏𑀲𑁂𑀯 𑀦𑀬𑁄 𑀅𑀮𑀚𑁆𑀚𑀻𑀢𑀺 𑀏𑀢𑁆𑀣𑀸𑀧𑀺. 𑀲𑀸𑀦𑀼𑀯𑀸𑀤𑁄𑀢𑀺 𑀏𑀢𑁆𑀣 𑀅𑀦𑀼𑀯𑀸𑀤𑀉𑀧𑀯𑀸𑀤𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀉𑀧𑀯𑀸𑀤𑁄’’𑀢𑀺. 𑀇𑀢𑀺 𑀧𑀜𑁆𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀏𑀢𑁆𑀣𑀸𑀢𑀺 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑁂. 𑀇𑀤𑀦𑁆𑀢𑀺 𑀓𑀫𑁆𑀫𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀬𑁄 𑀧𑀼𑀕𑁆𑀕𑀮𑁄 𑀧𑀸𑀧𑀺𑀬𑁄𑀢𑀺 𑀬𑁄𑀚𑀦𑀸. 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬𑀸𑀢𑀺 𑀮𑀸𑀫𑀓𑀼𑀲𑁆𑀲𑀦𑁆𑀦𑀢𑀸𑀬. 𑀇𑀫𑀺𑀦𑀸 𑀅𑀬𑀜𑁆𑀘 𑀧𑀸𑀧𑁄 𑀅𑀬𑀜𑁆𑀘 𑀧𑀸𑀧𑁄, 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀧𑀸𑀧𑁄𑀢𑀺 𑀧𑀸𑀧𑀺𑀬𑁄𑀢𑀺 𑀘 𑀧𑀸𑀧𑀸𑀦𑀁 𑀅𑀢𑀺𑀲𑀬𑁂𑀦 𑀧𑀸𑀧𑁄𑀢𑀺 𑀧𑀸𑀧𑀺𑀬𑁄𑀢𑀺 𑀘 𑀯𑀘𑀦𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀢𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀲𑁆𑀲. 𑀇𑀫𑀺𑀦𑀸 𑀢𑀲𑁆𑀲 𑀧𑀸𑀧𑀺𑀬𑀲𑁆𑀲 𑀓𑀢𑁆𑀢𑀩𑁆𑀩𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀁, 𑀢𑀫𑁂𑀯 𑀓𑀫𑁆𑀫𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀬𑀓𑀸𑀭𑁂 𑀤𑁆𑀯𑁂𑀪𑀸𑀯𑁄 𑀅𑀢𑁆𑀣𑀺, 𑀲𑁄 𑀅𑀬𑀼𑀢𑁆𑀢𑁄𑀬𑁂𑀯. ‘‘𑀬𑁂𑀪𑀼𑀬𑁆𑀬𑀲𑀺𑀓𑀸’’𑀢𑀺 𑀏𑀢𑁆𑀣 𑀬𑀓𑀸𑀭𑁂 𑀤𑁆𑀯𑁂𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄 𑀏𑀢𑁆𑀣𑀸𑀧𑀺 𑀤𑁆𑀯𑁂𑀪𑀸𑀯𑁄 𑀬𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀢𑀺 𑀮𑀺𑀔𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁭. 𑀢𑀺𑀡𑀯𑀢𑁆𑀣𑀸𑀭𑀓𑀸𑀤𑀺𑀓𑀣𑀸

𑁨𑁧𑁨. 𑀓𑀓𑁆𑀔𑀴𑀢𑀸𑀬 𑀯𑀸𑀴𑀢𑀸𑀬𑀸𑀢𑀺 𑀏𑀢𑁆𑀣 𑀓𑀓𑁆𑀔𑀴𑀲𑁆𑀲 𑀪𑀸𑀯𑁄 𑀓𑀓𑁆𑀔𑀴𑀢𑀸, 𑀯𑀸𑀴𑀲𑁆𑀲 𑀪𑀸𑀯𑁄 𑀯𑀸𑀴𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀓𑁆𑀔𑀴𑀪𑀸𑀯𑀸𑀬 𑀘𑁂𑀯 𑀯𑀸𑀴𑀪𑀸𑀯𑀸𑀬 𑀘𑀸’’𑀢𑀺. 𑀇𑀫𑀺𑀦𑀸 𑀢𑀸𑀧𑀘𑁆𑀘𑀬𑀲𑁆𑀲 𑀲𑀫𑀽𑀳𑀢𑁆𑀣𑀜𑁆𑀘 𑀲𑁆𑀯𑀢𑁆𑀣𑀜𑁆𑀘 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀓𑀓𑁆𑀔𑀴𑀢𑀸𑀬 𑀯𑀸𑀴𑀢𑀸𑀬𑀸’’𑀢𑀺 𑀩𑁆𑀬𑀜𑁆𑀚𑀦𑀢𑁄𑀬𑁂𑀯 𑀦𑀸𑀦𑀁, 𑀦 𑀅𑀢𑁆𑀣𑀢𑁄. 𑀪𑁂𑀤𑀸𑀬𑀸𑀢𑀺 𑀏𑀢𑁆𑀣 𑀅𑀜𑁆𑀜𑀲𑁆𑀲 𑀪𑁂𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀪𑁂𑀤𑀸𑀬𑀸’’𑀢𑀺. 𑀕𑀺𑀮𑀸𑀦𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀜𑁆𑀜𑁂 𑀧𑀦 𑀓𑀸 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀅𑀥𑀺𑀓𑀭𑀡𑀯𑀽𑀧𑀲𑀫𑀝𑁆𑀞𑀸𑀦𑁂𑀬𑁂𑀯. ‘‘𑀏𑀓𑀢𑁄’’𑀢𑀺 𑀇𑀫𑀺𑀦𑀸 𑀏𑀓𑀚𑁆𑀛𑀦𑁆𑀢𑀺 𑀧𑀤𑀲𑁆𑀲 ‘‘𑀏𑀓𑀢𑁄’’𑀢𑀺 𑀧𑀤𑁂𑀦 𑀲𑀫𑀸𑀦𑀢𑀁 𑀤𑀲𑁆𑀲𑁂𑀢𑀺, 𑀏𑀓𑀲𑀤𑁆𑀤𑀢𑁄 𑀚𑁆𑀛𑀧𑀘𑁆𑀘𑀬𑁄 𑀘 𑀢𑁄𑀧𑀘𑁆𑀘𑀬𑁄 𑀘 𑀯𑀺𑀲𑁂𑀲𑁄, ‘‘𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀤𑀺𑀲𑀽𑀧𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀺𑀡𑁂𑀳𑀺 𑀅𑀯𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀢𑀺𑀡𑀯𑀢𑁆𑀣𑀸𑀭𑀁, 𑀕𑀽𑀣𑀫𑀼𑀢𑁆𑀢𑀁, 𑀢𑀺𑀡𑀯𑀢𑁆𑀣𑀸𑀭𑀫𑀺𑀯 𑀢𑀺𑀡𑀯𑀢𑁆𑀣𑀸𑀭𑀓𑀁. 𑀏𑀢𑁆𑀣 𑀅𑀥𑀺𑀓𑀭𑀡𑀫𑁂𑀯 𑀫𑀼𑀔𑁆𑀬𑀢𑁄 𑀮𑀩𑁆𑀪𑀢𑀺, 𑀲𑀫𑀣𑁄 𑀧𑀦 𑀨𑀮𑀽𑀧𑀘𑀸𑀭𑀢𑁄, 𑀲𑀤𑀺𑀲𑀢𑁆𑀣𑁂 𑀓𑀧𑀘𑁆𑀘𑀬𑁄. 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀖𑀝𑁆𑀝𑀺𑀬𑀫𑀸𑀦𑀁 𑀕𑀽𑀣𑀁 𑀯𑀸 𑀫𑀼𑀢𑁆𑀢𑀁 𑀯𑀸𑀢𑀺 𑀬𑁄𑀚𑀦𑀸. ‘‘𑀖𑀝𑁆𑀝𑀺𑀬𑀫𑀸𑀦’’𑀦𑁆𑀢𑀺 𑀧𑀤𑀁 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀁, ‘‘𑀩𑀸𑀥𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑀲𑁆𑀲 𑀧𑀦 𑀅𑀲𑁆𑀲 𑀕𑀽𑀣𑀫𑀼𑀢𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. ‘‘𑀲𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑀲𑁆𑀲𑀸’’𑀢𑀺 𑀧𑀤𑀫𑁆𑀧𑀺 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀫𑁂𑀯, ‘‘𑀦 𑀩𑀸𑀥𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀁 𑀅𑀥𑀺𑀓𑀭𑀡𑀁 𑀲𑀁𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀽𑀮𑀸𑀦𑀼𑀫𑀽𑀮𑀦𑁆𑀢𑀺 𑀫𑀽𑀮𑀜𑁆𑀘 𑀅𑀦𑀼𑀫𑀽𑀮𑀜𑁆𑀘 𑀫𑀽𑀮𑀸𑀦𑀼𑀫𑀽𑀮𑀁. 𑀢𑀦𑁆𑀢𑀺 𑀅𑀥𑀺𑀓𑀭𑀡𑀁. 𑀇𑀫𑀺𑀦𑀸 𑀓𑀫𑁆𑀫𑁂𑀦𑀸𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑁂𑀦. 𑀕𑀽𑀣𑀁 𑀢𑀺𑀡𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁 𑀲𑀼𑀯𑀽𑀧𑀲𑀦𑁆𑀢𑀁 𑀳𑁄𑀢𑀺 𑀯𑀺𑀬 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀲𑀼𑀯𑀽𑀧𑀲𑀦𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀇𑀢𑀻𑀢𑀺 𑀢𑀲𑁆𑀫𑀸.

𑁨𑁧𑁩. 𑀣𑀼𑀮𑁆𑀮𑀯𑀚𑁆𑀚𑀦𑁆𑀢𑀺 𑀏𑀢𑁆𑀣 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀧𑀺 𑀣𑀼𑀮𑁆𑀮𑀯𑀚𑁆𑀚𑀢𑁆𑀢𑀸 𑀇𑀥 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑀸𑀭𑀸𑀚𑀺𑀓𑀜𑁆𑀘𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘𑀸’’𑀢𑀺. 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀕𑀺𑀳𑀻𑀦𑀁 𑀧𑀝𑀺𑀲𑀁𑀬𑀼𑀢𑁆𑀢𑀁 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀺𑀳𑀻𑀦’’𑀦𑁆𑀢𑀺𑀆𑀤𑀺. ‘‘𑀳𑀻𑀦𑁂𑀦𑀸’’𑀢𑀺 𑀧𑀤𑀁 ‘‘𑀔𑀼𑀁𑀲𑀦𑀯𑀫𑁆𑀪𑀦’’ 𑀇𑀢𑀺 𑀧𑀤𑁂𑀦𑁂𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑁂𑀲𑀽𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁.

𑁨𑁧𑁪. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀯𑀼𑀝𑁆𑀞𑀺𑀢𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀯𑀽𑀧𑀲𑀫𑀝𑁆𑀞𑀸𑀦𑁂. 𑀅𑀜𑁆𑀜𑀸𑀯𑀺𑀳𑀺𑀢𑀸𑀧𑀻𑀢𑀺 𑀅𑀥𑀺𑀓𑀭𑀡𑀯𑀺𑀦𑀺𑀘𑁆𑀙𑀬𑀢𑁄 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀘𑀺𑀢𑁆𑀢𑀁 𑀆𑀯𑀺𑀳𑀺𑀢𑀸𑀧𑀺 𑀞𑀧𑀺𑀢𑀸𑀧𑀺. 𑀉𑀧𑀲𑀫𑁆𑀧𑀤𑀫𑀡𑁆𑀟𑀮𑀢𑁄𑀢𑀺 𑀉𑀧𑀲𑀫𑁆𑀧𑀤𑀲𑀻𑀫𑀩𑀺𑀫𑁆𑀩𑀢𑁄, 𑀬𑁂 𑀧𑀦𑀸𑀢𑀺 𑀪𑀺𑀓𑁆𑀔𑀽 𑀧𑀦, 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 𑀯𑀸 𑀅𑀦𑀸𑀕𑀢𑀸𑀢𑀺 𑀯𑀸 𑀦𑀺𑀲𑀺𑀦𑁆𑀦𑀸𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀢𑁂𑀳𑀺 𑀯𑀸𑀢𑀺 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀸. 𑀢𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀯𑀺𑀦𑀺𑀘𑁆𑀙𑀺𑀢𑀝𑁆𑀞𑀸𑀦𑀁. 𑀙𑀦𑁆𑀤𑀁 𑀤𑀢𑁆𑀯𑀸𑀢𑀺 𑀙𑀦𑁆𑀤𑀁 𑀲𑀗𑁆𑀖𑀲𑁆𑀲 𑀤𑀢𑁆𑀯𑀸. 𑀧𑀭𑀺𑀯𑁂𑀡𑀸𑀤𑀻𑀲𑀽𑀢𑀺𑀆𑀤𑀺𑀲𑀤𑁆𑀤𑁂𑀦 𑀆𑀯𑀸𑀲𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀢𑀺 𑀪𑀺𑀓𑁆𑀔𑀽.

𑁮. 𑀅𑀥𑀺𑀓𑀭𑀡𑀓𑀣𑀸

𑁨𑁧𑁫. 𑀯𑀺𑀧𑀘𑁆𑀘𑀢𑀸𑀬𑀸𑀢𑀺 𑀏𑀢𑁆𑀣 𑀯𑀺𑀓𑀸𑀭𑀪𑀸𑀯𑁂𑀦 𑀧𑀢𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀺𑀧𑀘𑁆𑀘𑀁, 𑀘𑀺𑀢𑁆𑀢𑀤𑀼𑀓𑁆𑀔𑀁, 𑀢𑀤𑁂𑀯 𑀯𑀺𑀧𑀘𑁆𑀘𑀢𑀸, 𑀢𑀤𑀢𑁆𑀣𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀺𑀢𑁆𑀢𑀤𑀼𑀓𑁆𑀔𑀢𑁆𑀣’’𑀦𑁆𑀢𑀺. ‘‘𑀨𑀭𑀼𑀲𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑁄𑀳𑀸𑀭 𑀲𑀤𑁆𑀤𑁄 𑀯𑀘𑀦𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀬𑁄 𑀢𑀢𑁆𑀣𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀲𑀼 𑀅𑀦𑀼𑀯𑀤𑀦𑁆𑀢𑁂𑀲𑀽’’𑀢𑀺. 𑀬𑁄 𑀉𑀧𑀯𑀸𑀤𑁄𑀢𑀺 𑀬𑁄𑀚𑀦𑀸. ‘‘𑀅𑀦𑀼𑀯𑀤𑀦𑀸’’𑀢𑀺 𑀏𑀢𑀁 𑀧𑀤𑀦𑁆𑀢𑀺 𑀬𑁄𑀚𑀦𑀸. 𑀆𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀅𑀦𑀼𑀯𑀤𑀦𑀲𑁆𑀲 𑀆𑀓𑀸𑀭𑀤𑀲𑁆𑀲𑀦𑀁, 𑀤𑀲𑁆𑀲𑀦𑀳𑁂𑀢𑀼 𑀯𑀸. ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑀲𑁆𑀲 𑀦 𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀅𑀦𑀼𑀯𑀤𑀦𑁂 𑀏𑀯. 𑀲𑀫𑁆𑀧𑀯𑀗𑁆𑀓𑀢𑀸𑀢𑀺 𑀲𑀫𑁆𑀫𑀸 𑀧𑀓𑀸𑀭𑁂𑀦 𑀦𑀺𑀦𑁆𑀦𑀧𑁄𑀦𑀧𑀩𑁆𑀪𑀸𑀭𑀢𑀸. 𑀅𑀩𑁆𑀪𑀼𑀲𑁆𑀲𑀳𑀦𑀢𑀸𑀢𑀺 𑀏𑀢𑁆𑀣 𑀅𑀢𑀺𑀭𑁂𑀓𑀁 𑀉𑀲𑁆𑀲𑀸𑀳𑀦𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀅𑀦𑀼𑀩𑀮𑀧𑁆𑀧𑀤𑀸𑀦𑀦𑁆𑀢𑀺 𑀏𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀩𑀮𑀲𑁆𑀲 𑀧𑀤𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑀺𑀫𑀯𑀘𑀦𑀲𑁆𑀲𑀸’’𑀢𑀺𑀆𑀤𑀺.

𑀓𑀺𑀘𑁆𑀘𑀬𑀢𑀸𑀢𑀺 𑀏𑀢𑁆𑀣 ‘‘𑀫𑀸 𑀧𑀡𑁆𑀟𑀺𑀘𑁆𑀘𑀬’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧) 𑀯𑀺𑀬 𑀩𑁆𑀬𑀜𑁆𑀚𑀦𑀯𑀟𑁆𑀠𑀦𑀯𑀲𑁂𑀦 𑀬𑀓𑀸𑀭𑀸𑀕𑀫𑁄𑀢𑀺 𑀆𑀳 ‘‘𑀓𑀺𑀘𑁆𑀘𑀫𑁂𑀯 𑀓𑀺𑀘𑁆𑀘𑀬’’𑀦𑁆𑀢𑀺. ‘‘𑀉𑀪𑀬𑀁𑀧𑁂𑀢𑀁 𑀲𑀗𑁆𑀖𑀲𑁆𑀲𑁂𑀯 𑀅𑀥𑀺𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀓𑀺𑀘𑁆𑀘𑀓𑀭𑀡𑀻𑀬𑀲𑀤𑁆𑀤𑁄 𑀓𑀢𑁆𑀢𑀼𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺, 𑀲𑀗𑁆𑀖𑁄 𑀳𑀺 𑀓𑀭𑁄𑀢𑀻𑀢𑀺 𑀯𑀘𑀦𑀢𑁆𑀣𑁂𑀦 𑀓𑀺𑀘𑁆𑀘𑁄𑀢𑀺 𑀘 𑀓𑀭𑀡𑀻𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀪𑀸𑀯𑁄, 𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀢𑀸𑀢𑀺 𑀯𑀼𑀢𑁆𑀢𑁂 𑀲𑀗𑁆𑀖𑀓𑀫𑁆𑀫𑀁𑀬𑁂𑀯 𑀮𑀩𑁆𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀪𑀬𑀁𑀧𑁂𑀢𑀁 𑀲𑀗𑁆𑀖𑀓𑀫𑁆𑀫𑀲𑁆𑀲𑁂𑀯 𑀅𑀥𑀺𑀯𑀘𑀦’’𑀦𑁆𑀢𑀺. 𑀬𑀤𑀺 𑀓𑀫𑁆𑀫𑀯𑀸𑀘𑀓𑁄 𑀪𑀯𑁂𑀬𑁆𑀬, ‘‘𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀺𑀘𑁆𑀘𑀁, 𑀓𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀬𑁂𑀯 𑀲𑀗𑁆𑀖𑀓𑀫𑁆𑀫𑀲𑁆𑀲 𑀮𑀪𑀦𑀢𑁄 𑀢𑀸𑀧𑀘𑁆𑀘𑀬𑁄 𑀲𑁆𑀯𑀢𑁆𑀣𑁄 𑀪𑀯𑁂𑀬𑁆𑀬. 𑀏𑀯𑀜𑁆𑀳𑀺 𑀲𑀢𑀺 𑀓𑀺𑀘𑁆𑀘𑀬𑀲𑁆𑀲 𑀪𑀸𑀯𑁄 𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀲𑁆𑀲 𑀪𑀸𑀯𑁄 𑀓𑀭𑀡𑀻𑀬𑀢𑀸𑀢𑀺 𑀯𑀘𑀦𑀢𑁆𑀣𑁄 𑀦 𑀓𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀓𑀢𑁄 𑀘, 𑀢𑀲𑁆𑀫𑀸 𑀦 𑀓𑀫𑁆𑀫𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲𑁂𑀯𑀸𑀢𑀺 𑀲𑀗𑁆𑀖𑀓𑀫𑁆𑀫𑀲𑁆𑀲𑁂𑀯. 𑀢𑀢𑁆𑀣𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼. 𑀲𑀻𑀫𑀝𑁆𑀞𑀓𑀲𑀗𑁆𑀖𑀦𑁆𑀢𑀺 ‘‘𑀉𑀧𑀘𑀸𑀭𑀲𑀻𑀫𑀸𑀤𑀻𑀲𑀼 𑀞𑀺𑀢𑀁 𑀲𑀗𑁆𑀖𑀁. 𑀲𑁄𑀥𑁂𑀢𑁆𑀯𑀸𑀢𑀺 𑀏𑀢𑁆𑀣 𑀲𑁄𑀥𑀦𑀁 𑀦𑀸𑀫 𑀲𑀻𑀫𑀝𑁆𑀞𑀓𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑀦𑀬𑀦𑀁, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀲𑁆𑀲 𑀆𑀳𑀭𑀡𑀁, 𑀲𑀻𑀫𑀢𑁄 𑀩𑀳𑀺𑀓𑀭𑀡𑀁. 𑀢𑀫𑁂𑀯𑀢𑁆𑀣𑀁 𑀏𑀓𑀤𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸’’𑀢𑀺. 𑀅𑀧𑀮𑁄𑀓𑁂𑀢𑀺 𑀆𑀧𑀼𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀅𑀧𑀮𑁄𑀓𑀦𑀁, 𑀢𑀁𑀬𑁂𑀯 𑀓𑀫𑁆𑀫𑀁 𑀅𑀧𑀮𑁄𑀓𑀦𑀓𑀫𑁆𑀫𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. ‘‘𑀲𑀼𑀡𑀸𑀢𑀼 𑀫𑁂’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂 𑀜𑀸𑀧𑁂𑀢𑀺 𑀏𑀢𑀸𑀬𑀸𑀢𑀺 𑀜𑀢𑁆𑀢𑀺, 𑀲𑀸𑀬𑁂𑀯 𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀬𑁂𑀯 𑀤𑀼𑀢𑀺𑀬𑀁 𑀜𑀢𑁆𑀢𑀺𑀤𑀼𑀢𑀺𑀬𑀁, 𑀢𑀫𑁂𑀯 𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀜𑀢𑁆𑀢𑀺 𑀧𑀞𑀫𑀁 𑀞𑀧𑀺𑀢𑀸, 𑀓𑀫𑁆𑀫𑀯𑀸𑀘𑀸𑀬𑁂𑀯 𑀤𑀼𑀢𑀺𑀬𑀸 𑀳𑁄𑀢𑀺, ‘‘𑀨𑀲𑁆𑀲𑀧𑀜𑁆𑀘𑀫𑀸’’𑀢𑀺𑀆𑀤𑀻𑀲𑀼 (𑀥𑀸𑀢𑀼. 𑁩𑁧𑁬) 𑀯𑀺𑀬 𑀧𑀦 𑀧𑀝𑀺𑀮𑁄𑀫𑀯𑀲𑁂𑀦 𑀯𑁄𑀳𑀸𑀭𑀁 𑀓𑀢𑁆𑀯𑀸 ‘‘𑀜𑀢𑁆𑀢𑀺𑀤𑀼𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀨𑀲𑁆𑀲𑀧𑀜𑁆𑀘𑀫𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 (𑀥. 𑀲. 𑁧 𑀆𑀤𑀬𑁄) ‘‘𑀨𑀲𑁆𑀲𑁄 𑀳𑁄𑀢𑀺, 𑀯𑁂𑀤𑀦𑀸 𑀳𑁄𑀢𑀺, 𑀲𑀜𑁆𑀜𑀸 𑀳𑁄𑀢𑀺, 𑀘𑁂𑀢𑀦𑀸 𑀳𑁄𑀢𑀺, 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺 𑀨𑀲𑁆𑀲𑀁 𑀧𑀞𑀫𑀁 𑀯𑀼𑀢𑁆𑀢𑀁, 𑀧𑀝𑀺𑀮𑁄𑀫𑀯𑀲𑁂𑀦 𑀧𑀦 𑀯𑁄𑀳𑀸𑀭𑀁 𑀓𑀢𑁆𑀯𑀸 ‘‘𑀨𑀲𑁆𑀲𑀧𑀜𑁆𑀘𑀫𑀸’’𑀢𑀺 𑀥𑀸𑀢𑀼𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲𑁂𑀯 𑀦𑀬𑁄 𑀜𑀢𑁆𑀢𑀺 𑀘𑀢𑀼𑀢𑁆𑀣𑀓𑀫𑁆𑀫𑁂𑀧𑀺. 𑀏𑀓𑀸𑀬 𑀘 𑀅𑀦𑀼𑀲𑀸𑀯𑀦𑀸𑀬𑀸𑀢𑀺 𑀜𑀢𑁆𑀢𑀺𑀢𑁄 𑀅𑀦𑀼𑀧𑀘𑁆𑀙𑀸 𑀲𑀸𑀯𑁂𑀢𑀩𑁆𑀩𑀸𑀢𑀺 𑀅𑀦𑀼𑀲𑀸𑀯𑀦𑀸, 𑀢𑀸𑀬, 𑀢𑀻𑀳𑀺 𑀘 𑀅𑀦𑀼𑀲𑀸𑀯𑀦𑀸𑀳𑀻𑀢𑀺 𑀜𑀢𑁆𑀢𑀺𑀢𑁄𑀅𑀦𑀼 𑀧𑀘𑁆𑀙𑀸, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑀩𑁆𑀩𑀸𑀢𑀺 𑀅𑀦𑀼𑀲𑀸𑀯𑀦𑀸, 𑀢𑀸𑀳𑀺. 𑀢𑀢𑁆𑀣𑀸𑀢𑀺 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼.

𑀅𑀧𑀮𑁄𑀓𑁂𑀢𑁆𑀯𑀸𑀯𑀸𑀢𑀺 𑀏𑀢𑁆𑀣 𑀏𑀯𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀜𑀢𑁆𑀢𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩’’𑀦𑁆𑀢𑀺. 𑀜𑀢𑁆𑀢𑀺𑀓𑀫𑁆𑀫𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀅𑀧𑀮𑁄𑀓𑀦𑀓𑀫𑁆𑀫𑀫𑁂𑀯, 𑀅𑀣 𑀔𑁄 𑀜𑀢𑁆𑀢𑀺𑀓𑀫𑁆𑀫𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀧𑀦𑀸𑀢𑀺 𑀏𑀢𑁆𑀣 𑀧𑀦𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄, 𑀧𑀓𑁆𑀔𑀦𑁆𑀢𑀭𑀚𑁄𑀢𑀓𑁄 𑀯𑀸. 𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀓𑀫𑁆𑀫𑁂𑀲𑀼. 𑀕𑀭𑀼𑀓𑀸𑀦𑀻𑀢𑀺 𑀅𑀮𑀳𑀼𑀓𑀸𑀦𑀺. 𑀅𑀯𑀲𑁂𑀲𑀸𑀦𑀻𑀢𑀺 𑀙𑀳𑀺 𑀓𑀫𑁆𑀫𑁂𑀳𑀺 𑀅𑀯𑀲𑁂𑀲𑀸𑀦𑀺, 𑀏𑀯𑀭𑀽𑀧𑀸𑀦𑀺 𑀮𑀳𑀼𑀓𑀓𑀫𑁆𑀫𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀯𑀲𑁂𑀲𑀸’’𑀢𑀺𑀧𑀺 𑀧𑀸𑀞𑁄, 𑀲𑀫𑁆𑀫𑀼𑀢𑀺𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀮𑁄𑀓𑁂𑀢𑁆𑀯𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀜𑀢𑁆𑀢𑀺𑀓𑀫𑁆𑀫𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀲𑁂𑀦 𑀧𑀦 𑀦 𑀓𑀸𑀢𑀩𑁆𑀩𑀫𑁂𑀯𑀸’’𑀢𑀺. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀲𑀫𑀣𑀓𑁆𑀔𑀦𑁆𑀥𑀓𑁂.

𑀯𑀺𑀢𑁆𑀣𑀸𑀭𑀢𑁄 𑀧𑀦 𑀆𑀕𑀢𑁄𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁. 𑀬𑀁 𑀧𑀦 𑀅𑀢𑁆𑀣𑀚𑀸𑀢𑀁 𑀅𑀦𑀼𑀢𑁆𑀢𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼. 𑀢𑀦𑁆𑀢𑀺 𑀅𑀢𑁆𑀣𑀚𑀸𑀢𑀁. 𑀏𑀯𑀦𑁆𑀢𑀺 𑀏𑀯𑀁 𑀓𑀫𑁆𑀫𑀯𑀕𑁆𑀕𑁂𑀬𑁂𑀯 𑀯𑀡𑁆𑀡𑀬𑀫𑀸𑀦𑁂. 𑀳𑀻𑀢𑀺 𑀮𑀤𑁆𑀥𑀕𑀼𑀡𑀚𑁄𑀢𑀓𑁄. 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀲𑀼𑀔𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀸.

𑁨𑁧𑁬. 𑀧𑀸𑀴𑀺𑀯𑀲𑁂𑀦𑁂𑀯𑀸𑀢𑀺 𑀦 𑀅𑀝𑁆𑀞𑀓𑀣𑀸𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁨𑁦. 𑀬𑁂𑀦𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦. 𑀇𑀫𑀺𑀦𑀸 𑀯𑀺𑀯𑀤𑀦𑁆𑀢𑀺 𑀅𑀦𑁂𑀦𑀸𑀢𑀺 𑀯𑀺𑀯𑀸𑀤𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀫𑀣𑁂𑀳𑀺 𑀘𑀸𑀢𑀺 𑀘𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦 𑀓𑁂𑀯𑀮𑀁 𑀯𑀺𑀯𑀸𑀤𑁄𑀬𑁂𑀯, 𑀅𑀣 𑀔𑁄 𑀅𑀥𑀺𑀓𑀭𑀡𑀜𑁆𑀘𑀸𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀅𑀣 𑀯𑀸 𑀲𑀫𑀣𑁂𑀳𑀺 𑀘𑀸𑀢𑀺 𑀲𑀫𑀣𑁂𑀳𑀺 𑀏𑀯. 𑀇𑀫𑀺𑀦𑀸 𑀲𑀫𑀣𑁂𑀳𑀺 𑀅𑀥𑀺𑀓𑀭𑀻𑀬𑀢𑀺 𑀯𑀽𑀧𑀲𑀫𑀻𑀬𑀢𑀻𑀢𑀺 𑀅𑀥𑀺𑀓𑀭𑀡𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀯𑀸𑀤𑁄𑀬𑁂𑀯 𑀅𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑀸𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀦𑀼𑀤𑁆𑀥𑀁𑀲𑀦𑁂𑀦 𑀯𑀤𑀦𑁆𑀢𑀺 𑀅𑀦𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑀸𑀢𑀺 𑀅𑀦𑀼𑀯𑀸𑀤𑁄𑀢𑀺𑀆𑀤𑀬𑁄 𑀯𑀘𑀦𑀢𑁆𑀣𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁨𑁨. 𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦𑀸𑀢𑀺 𑀮𑁄𑀓𑀯𑀚𑁆𑀚𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀲𑁆𑀲 𑀯𑀘𑀦𑀲𑁆𑀲 𑀯𑀲𑁂𑀦. 𑀲𑀦𑁆𑀥𑀸𑀬𑀪𑀸𑀲𑀺𑀢𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀣𑀯𑀺𑀔𑀡𑀦𑀸𑀤𑀺𑀓𑁂 𑀬𑀲𑁆𑀫𑀺𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑁂𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀗𑁆𑀕𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸. 𑀇𑀤𑀦𑁆𑀢𑀺 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀯𑀘𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀥𑀸𑀬 𑀅𑀯𑀼𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀇𑀤𑀁 𑀧𑀦𑀸𑀢𑀺 𑀓𑀸𑀭𑀡𑀁 𑀧𑀦 𑀲𑀦𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀦𑁆𑀢𑀺 𑀬𑁄𑀚𑀦𑀸. ‘‘𑀮𑁄𑀓𑀯𑀚𑁆𑀚’’𑀦𑁆𑀢𑀺 𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑀁. 𑀮𑁄𑀓𑀲𑁆𑀫𑀺𑀁, 𑀮𑁄𑀓𑁂𑀳𑀺 𑀯𑀸 𑀯𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀮𑁄𑀓𑀯𑀚𑁆𑀚𑀁. 𑀢𑀦𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀢𑀢𑁆𑀣𑀸𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑁂. 𑀯𑀺𑀓𑀧𑁆𑀧𑁄𑀢𑀺 𑀯𑀺𑀯𑀺𑀥𑀸 𑀓𑀧𑁆𑀧𑀦𑀁, 𑀯𑀺𑀯𑀺𑀥𑀢𑀓𑁆𑀓𑁄 𑀯𑀸. 𑀬𑀁 𑀧𑀦𑀸𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀧𑀦. ‘‘𑀧𑀡𑁆𑀡𑀢𑁆𑀢𑀺𑀯𑀚𑁆𑀚’’𑀦𑁆𑀢𑀺 𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑀁. 𑀪𑀕𑀯𑀢𑁄 𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀸𑀬 𑀯𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀢𑀦𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀅𑀓𑀼𑀲𑀮𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑀁, 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀆𑀧𑀚𑁆𑀚𑀦𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀩𑁆𑀬𑀸𑀓𑀢𑀁 𑀳𑁄𑀢𑀺, 𑀢𑀲𑁆𑀫𑀸. 𑀢𑀢𑁆𑀣𑀸𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀪𑀽𑀢𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑁂. ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁…𑀧𑁂… 𑀓𑀼𑀲𑀮’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀬𑀤𑀺 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀣 𑀦𑀦𑀼 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀮𑀮𑀦𑁆𑀢𑀺 𑀯𑀢𑁆𑀢𑀩𑁆𑀩𑁄 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀬𑀦𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. ‘‘𑀇𑀤𑀁 𑀯𑀼𑀘𑁆𑀘𑀢𑀺…𑀧𑁂… 𑀓𑀼𑀲𑀮’’𑀦𑁆𑀢𑀺 𑀯𑀤𑁂𑀬𑁆𑀬 𑀲𑀘𑁂𑀢𑀺 𑀬𑁄𑀚𑀦𑀸. 𑀏𑀴𑀓𑀮𑁄𑀫𑀜𑁆𑀘 𑀧𑀤𑀲𑁄𑀥𑀫𑁆𑀫𑀜𑁆𑀘 𑀏𑀴𑀓𑀮𑁄𑀫𑀧𑀤𑀲𑁄𑀥𑀫𑁆𑀫𑀸𑀦𑀺, 𑀢𑀸𑀦𑀺 𑀆𑀤𑀻𑀦𑀺 𑀬𑁂𑀲𑀁 𑀢𑀸𑀦𑀻𑀢𑀺 𑀏𑀴𑀓𑀮𑁄𑀫𑀧𑀤𑀲𑁄𑀥𑀫𑁆𑀫𑀸𑀤𑀻𑀦𑀺, 𑀢𑀸𑀦𑀺 𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀸𑀲𑀦𑁆𑀢𑀺 𑀏𑀴𑀓𑀮𑁄𑀫𑀧𑀤𑀲𑁄𑀥𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸, 𑀢𑀸𑀲𑀁 𑀆𑀧𑀢𑁆𑀢𑀻𑀦𑀫𑁆𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀏𑀴𑀓𑀮𑁄𑀫𑀧𑀤𑀲𑁄𑀥𑀫𑁆𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀲𑀼 𑀆𑀧𑀢𑁆𑀢𑀻𑀲𑀼. 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀦𑁆𑀢𑀺 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁. 𑀏𑀯𑀁 𑀆𑀧𑀢𑁆𑀢𑀺𑀬𑀸 𑀅𑀦𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀅𑀗𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀘𑀮𑀺𑀢𑀧𑁆𑀧𑀯𑀢𑁆𑀢𑀸𑀦𑀦𑁆𑀢𑀺 𑀘𑀮𑀺𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀧𑀯𑀢𑁆𑀢𑀸𑀦𑀁. 𑀅𑀣 𑀯𑀸 𑀘𑀮𑀺𑀢𑁄 𑀘 𑀓𑀸𑀬𑁄, 𑀧𑀯𑀢𑁆𑀢𑀸 𑀘 𑀯𑀸𑀘𑀸𑀢𑀺 𑀘𑀮𑀺𑀢𑀧𑁆𑀧𑀯𑀢𑁆𑀢𑀸, 𑀢𑀸𑀲𑀁 𑀘𑀮𑀺𑀢𑀧𑁆𑀧𑀯𑀢𑁆𑀢𑀸𑀦𑀁 𑀓𑀸𑀬𑀯𑀸𑀘𑀸𑀦𑀁. 𑀢𑀜𑁆𑀘𑀸𑀢𑀺 𑀓𑀸𑀬𑀯𑀸𑀘𑀸𑀦𑀁 𑀅𑀜𑁆𑀜𑀢𑀭𑀜𑁆𑀘. 𑀅𑀩𑁆𑀬𑀸𑀓𑀢𑀦𑁆𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑀅𑀬𑀫𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀢𑀺 𑀘𑀺𑀢𑁆𑀢𑁂𑀦. ‘‘𑀇𑀤𑀁…𑀧𑁂… 𑀲𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀜𑁆𑀚𑀸𑀦𑀦𑁆𑀢𑁄𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑀲𑁆𑀲 𑀲𑀼𑀦𑁆𑀤𑀭𑀢𑁆𑀣𑀁 𑀲𑀳 𑀆𑀓𑀸𑀭𑁂𑀦 𑀤𑀲𑁆𑀲𑁂𑀢𑀺. ‘‘𑀯𑀻𑀢𑀺𑀓𑁆𑀓𑀫…𑀧𑁂… 𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘𑁂𑀘𑁆𑀘𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀲𑀳 𑀯𑀺𑀲𑁂𑀲𑀦𑁂𑀦 𑀤𑀲𑁆𑀲𑁂𑀢𑀺. ‘‘𑀉𑀧𑀓𑁆𑀓𑀫𑀯𑀲𑁂𑀦…𑀧𑁂… 𑀧𑁂𑀲𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀪𑀺𑀯𑀺𑀢𑀭𑀺𑀢𑁆𑀯𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀸𑀴𑀺𑀬𑀁 𑀬𑀁𑀲𑀤𑁆𑀤𑁄𑀯𑀻𑀢𑀺𑀓𑁆𑀓𑀫𑀯𑀺𑀲𑀬𑁄𑀢𑀺 𑀆𑀳 ‘‘𑀬𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀯𑀻𑀢𑀺𑀓𑁆𑀓𑀫’’𑀦𑁆𑀢𑀺. ‘‘𑀆𑀧𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀯𑀻𑀢𑀺𑀓𑁆𑀓𑀫𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀬𑁄𑀚𑀦𑀸.

𑀅𑀩𑁆𑀬𑀸𑀓𑀢𑀯𑀸𑀭𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀓𑀼𑀲𑀮𑀯𑀸𑀭𑀁 𑀅𑀧𑁂𑀓𑁆𑀔𑀢𑀺. 𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑁆𑀲. 𑀅𑀚𑀸𑀦𑀦𑁆𑀢𑁄𑀢𑀺𑀆𑀤𑀻𑀦𑀁 𑀧𑀤𑀸𑀦𑀫𑀢𑁆𑀣𑁄 𑀅𑀓𑀼𑀲𑀮𑀯𑀸𑀭𑁂 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀫𑀢𑁆𑀣𑁄 𑀅𑀓𑀼𑀲𑀮𑀯𑀸𑀭𑁂𑀦 𑀲𑀤𑀺𑀲𑁄𑀬𑁂𑀯.

𑁨𑁨𑁪. 𑀅𑀬𑀁 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀦𑁆𑀢𑀺𑀆𑀤𑀻𑀲𑀼 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁯. 𑀅𑀥𑀺𑀓𑀭𑀡𑀯𑀽𑀧𑀲𑀫𑀦𑀲𑀫𑀣𑀓𑀣𑀸

𑁨𑁨𑁮. 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂𑀢𑀺 𑀲𑀻𑀫𑀲𑀫𑁆𑀫𑀼𑀢𑀺𑀆𑀤𑀺𑀓𑀫𑁆𑀫𑁂. 𑀧𑀜𑁆𑀘𑀯𑀕𑁆𑀕𑀓𑀭𑀡𑁂𑀢𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑁂. 𑀤𑀲𑀯𑀕𑁆𑀕𑀓𑀭𑀡𑁂𑀢𑀺 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀉𑀧𑀲𑀫𑁆𑀧𑀤𑀓𑀫𑁆𑀫𑁂. 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂𑀢𑀺 𑀅𑀩𑁆𑀪𑀸𑀦𑀓𑀫𑁆𑀫𑁂. 𑀓𑀫𑁆𑀫𑀧𑁆𑀧𑀢𑁆𑀢𑀸𑀢𑀺 𑀓𑀫𑁆𑀫𑀲𑁆𑀲 𑀧𑀢𑁆𑀢𑀸 𑀬𑀼𑀢𑁆𑀢𑀸 𑀅𑀦𑀼𑀭𑀽𑀧𑀸.

𑁨𑁩𑁦. 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀧𑀝𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀁. 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘 𑀧𑀦 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀡𑁆𑀟𑀓𑀦𑁆𑀢𑀺 𑀘𑀻𑀯𑀭𑀸𑀤𑀺𑀪𑀡𑁆𑀟𑀓𑀁. 𑀫𑀸𑀦𑀦𑀺𑀕𑁆𑀕𑀳𑀢𑁆𑀣𑀸𑀬𑀸𑀢𑀺 𑀪𑀡𑁆𑀟𑀦𑀚𑀸𑀢𑀸𑀦𑀁 𑀫𑀸𑀦𑀲𑁆𑀲 𑀦𑀺𑀕𑁆𑀕𑀳𑀢𑁆𑀣𑀸𑀬. 𑀓𑀢𑀺𑀧𑀸𑀳𑀦𑁆𑀢𑀺 𑀓𑀢𑀺𑀧𑀬𑀸𑀳𑀁, 𑀤𑁆𑀯𑀻𑀳𑀢𑀻𑀳𑀦𑁆𑀢𑀺 𑀅𑀢𑁆𑀣𑁄.

𑁨𑁩𑁧. 𑀅𑀦𑀦𑁆𑀢𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀻𑀢𑀺 𑀏𑀢𑁆𑀣 𑀅𑀦𑀦𑁆𑀢𑀲𑀤𑁆𑀤𑁄 𑀅𑀧𑀭𑀺𑀫𑀸𑀡𑀲𑀤𑁆𑀤𑁂𑀦 𑀅𑀢𑁆𑀣𑀢𑁄 𑀏𑀓𑁄𑀢𑀺 𑀆𑀳 ‘‘𑀅𑀧𑀭𑀺𑀫𑀸𑀡𑀸𑀦𑀻’’𑀢𑀺. ‘‘𑀯𑀘𑀦𑀸𑀦𑀻’’𑀢𑀺 𑀇𑀫𑀺𑀦𑀸 𑀪𑀲𑁆𑀲𑀲𑀤𑁆𑀤𑁄 𑀯𑀘𑀦𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀦𑀺𑀢𑀩𑁆𑀩𑁄𑀢𑀺 𑀓𑁂𑀦 𑀲𑀫𑁆𑀫𑀦𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀧𑀮𑁄𑀓𑁂𑀢𑁆𑀯𑀸 𑀯𑀸’’𑀢𑀺𑀆𑀤𑀺. 𑀇𑀫𑀺𑀦𑀸 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀯𑀸 𑀲𑀫𑁆𑀫𑀦𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀦𑁆𑀢𑀸𑀦𑀺 𑀪𑀲𑁆𑀲𑀸𑀦𑀺 𑀥𑀫𑁆𑀫𑀓𑀣𑀺𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀩𑀸𑀳𑀢𑀺 𑀧𑀝𑀺𑀲𑁂𑀥𑁂𑀢𑀺 𑀇𑀫𑀸𑀬 𑀲𑀫𑁆𑀫𑀼𑀢𑀺𑀬𑀸𑀢𑀺 𑀉𑀩𑁆𑀩𑀸𑀳𑀺𑀓𑀸, 𑀢𑀸𑀬. 𑀏𑀯𑀁 𑀲𑀫𑁆𑀫𑀢𑁂𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀼𑀁 𑀦𑀺𑀲𑀻𑀤𑀺𑀢𑁆𑀯𑀸 𑀢𑀲𑁆𑀲𑀸𑀬𑁂𑀯 𑀧𑀭𑀺𑀲𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀳𑀻𑀢𑀺 𑀲𑀫𑁆𑀫𑀢𑀪𑀺𑀓𑁆𑀔𑀽𑀳𑀺 𑀅𑀜𑁆𑀜𑁂𑀳𑀺.

𑁨𑁩𑁩. 𑀢𑀢𑁆𑀭𑀲𑁆𑀲𑀸𑀢𑀺 𑀏𑀢𑁆𑀣 𑀢𑀢𑁆𑀭 𑀅𑀲𑁆𑀲𑀸𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀢𑀲𑀤𑁆𑀤𑁄 𑀧𑀭𑀺𑀲𑀯𑀺𑀲𑀬𑁄 𑀧𑀲𑀺𑀤𑁆𑀥𑀯𑀺𑀲𑀬𑁄, 𑀅𑀲𑁆𑀲𑀲𑀤𑁆𑀤𑁄 𑀆𑀔𑁆𑀬𑀸𑀢𑀺𑀓𑁄𑀢𑀺 𑀆𑀳 ‘‘𑀢𑀲𑁆𑀲𑀁 𑀧𑀭𑀺𑀲𑀢𑀺 𑀪𑀯𑁂𑀬𑁆𑀬𑀸’’𑀢𑀺. ‘‘𑀦𑁂𑀯 𑀲𑀼𑀢𑁆𑀢𑀁 𑀆𑀕𑀢’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 ‘‘𑀦𑁄 𑀲𑀼𑀢𑁆𑀢𑀯𑀺𑀪𑀗𑁆𑀕𑁄’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀫𑀸𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦 𑀫𑀸𑀢𑀺𑀓𑀸 𑀆𑀕𑀢𑀸’’𑀢𑀺. 𑀯𑀺𑀦𑀬𑁄𑀧𑀻𑀢𑀺 𑀔𑀦𑁆𑀥𑀓𑀯𑀺𑀦𑀬𑁄𑀧𑀺. 𑀧𑀺𑀲𑀤𑁆𑀤𑁂𑀦 𑀲𑀼𑀢𑁆𑀢𑀯𑀺𑀪𑀗𑁆𑀕𑀁 𑀅𑀧𑁂𑀓𑁆𑀔𑀢𑀺. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬𑀸𑀢𑀺 𑀏𑀢𑁆𑀣 𑀙𑀸𑀬𑀸𑀲𑀤𑁆𑀤𑁄 𑀧𑀝𑀺𑀩𑀺𑀫𑁆𑀩𑁂 𑀘 𑀧𑀪𑀸𑀬 𑀘 𑀳𑁄𑀢𑀻𑀢𑀺 𑀆𑀳 ‘‘𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯𑀸’’𑀢𑀺, 𑀩𑁆𑀬𑀜𑁆𑀚𑀦𑀧𑀝𑀺𑀩𑀺𑀫𑁆𑀩𑀺𑀓𑀩𑁆𑀬𑀜𑁆𑀚𑀦𑀧𑀪𑀸𑀯𑀦𑁆𑀢𑀪𑀽𑀢𑀁 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀩𑁆𑀬𑀜𑁆𑀚𑀦𑀧𑀝𑀺𑀩𑀺𑀫𑁆𑀩𑀩𑁆𑀬𑀜𑁆𑀚𑀦𑀧𑀪𑀸𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀝𑀺𑀲𑁂𑀥𑁂𑀢𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀩𑀸𑀳𑀲𑀤𑁆𑀤𑁄 𑀧𑀝𑀺𑀲𑁂𑀥𑀢𑁆𑀣𑁄𑀬𑁂𑀯, 𑀦 𑀫𑀤𑁆𑀤𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀩𑀸𑀳𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀸𑀢𑀭𑀽𑀧𑀭𑀚𑀢𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀽’’𑀢𑀺𑀆𑀤𑀺. 𑀓𑀺𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦, 𑀓𑀲𑁆𑀫𑀸 𑀓𑀸𑀭𑀡𑀸 𑀯𑀸. 𑀇𑀫𑁂𑀢𑀺 𑀚𑀸𑀢𑀭𑀽𑀧𑀸𑀤𑀺𑀧𑀝𑀺𑀕𑁆𑀕𑀸𑀳𑀓𑁂 𑀪𑀺𑀓𑁆𑀔𑀽. 𑀓𑀸𑀭𑁂𑀣𑀸𑀢𑀺 𑀢𑀼𑀫𑁆𑀳𑁂 𑀓𑀸𑀭𑁂𑀬𑁆𑀬𑀸𑀣. 𑀏𑀬𑁆𑀬𑀸𑀣𑀲𑁆𑀲 𑀳𑀺 𑀏𑀣𑀸𑀤𑁂𑀲𑁄. 𑀧𑀼𑀘𑁆𑀙𑀸𑀬𑀁 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀲𑀼𑀢𑁆𑀢𑁂𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂. 𑀅𑀧𑀭𑁄 𑀥𑀫𑁆𑀫𑀓𑀣𑀺𑀓𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂𑀲𑀦𑁆𑀢𑀺 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀸𑀦𑀁. 𑀏𑀢𑁆𑀣𑀸𑀢𑀺 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀸𑀲𑀦𑁂.

𑁨𑁩𑁪. 𑀩𑀳𑀼𑀢𑀭𑀸 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀸𑀤𑀺𑀦𑀸 𑀅𑀥𑀺𑀓𑀸 𑀏𑀯 𑀩𑀳𑀼𑀢𑀭𑀸 𑀦𑀸𑀫𑀸𑀢𑀺 𑀆𑀳 ‘‘𑀏𑀓𑁂𑀦𑀧𑀺 𑀅𑀥𑀺𑀓𑀸 𑀩𑀳𑀼𑀢𑀭𑀸𑀯𑀸’’𑀢𑀺. ‘‘𑀓𑁄 𑀧𑀦 𑀯𑀸𑀤𑁄’’𑀢𑀺𑀆𑀤𑀺𑀦𑀸 ‘‘𑀏𑀓𑁂𑀦𑀧𑀻’’𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀕𑀭𑀳𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀢𑀺𑀯𑀺𑀥𑀲𑀮𑀸𑀓𑀕𑁆𑀕𑀸𑀳𑀓𑀣𑀸

𑁨𑁩𑁫. 𑀲𑀜𑁆𑀜𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀲𑀜𑁆𑀜𑀸𑀧𑀦𑀁 𑀲𑀜𑁆𑀜𑀢𑁆𑀢𑀺, 𑀢𑀤𑀢𑁆𑀣𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀜𑁆𑀜𑀸𑀧𑀦𑀢𑁆𑀣𑀸𑀬𑀸’’𑀢𑀺. 𑀕𑀽𑀳𑀺𑀢𑀩𑁆𑀩𑁄𑀢𑀺 𑀕𑀽𑀴𑁆𑀳𑁄, 𑀲𑁄𑀬𑁂𑀯 𑀕𑀽𑀴𑁆𑀳𑀓𑁄, 𑀲𑀮𑀸𑀓𑀕𑁆𑀕𑀸𑀳𑁄 𑀓𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀯𑀭𑀺𑀢𑀩𑁆𑀩𑁄𑀢𑀺 𑀯𑀺𑀯𑀝𑁄, 𑀲𑁄𑀬𑁂𑀯 𑀯𑀺𑀯𑀝𑀓𑁄. 𑀲𑀲𑁆𑀲 𑀅𑀢𑁆𑀢𑀦𑁄 𑀓𑀡𑁆𑀡𑀲𑀫𑀻𑀧𑁂 𑀚𑀧𑁆𑀧𑀻𑀬𑀢𑀺 𑀓𑀣𑀻𑀬𑀢𑀻𑀢𑀺 𑀲𑀓𑀡𑁆𑀡𑀚𑀧𑁆𑀧𑁄, 𑀲𑁄𑀬𑁂𑀯 𑀲𑀓𑀡𑁆𑀡𑀚𑀧𑁆𑀧𑀓𑁄. ‘‘𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀡𑁆𑀡𑀸𑀯𑀡𑁆𑀡𑀸𑀬𑁄 𑀓𑀢𑁆𑀯𑀸𑀢𑀺 𑀏𑀢𑁆𑀣 𑀯𑀡𑁆𑀡𑀲𑀤𑁆𑀤𑁄 𑀲𑀡𑁆𑀞𑀸𑀦𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀲𑀡𑁆𑀞𑀸𑀦𑀤𑀼𑀲𑀡𑁆𑀞𑀸𑀦𑀸 𑀲𑀮𑀸𑀓𑀸𑀬𑁄 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀯𑀺𑀲𑀪𑀸𑀕𑀓𑀭𑀡𑀢𑁄 𑀧𑀭𑀁 𑀕𑀳𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀸𑀧𑀺 𑀢𑀸 𑀲𑀮𑀸𑀓𑀸𑀬𑁄𑀢𑀺 𑀬𑁄𑀚𑀦𑀸. 𑀓𑀢𑁆𑀯𑀸𑀢𑀺 𑀧𑀓𑁆𑀔𑀺𑀧𑀦𑀁 𑀓𑀢𑁆𑀯𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. ‘‘𑀬𑀸𑀯𑀢𑀢𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀉𑀤𑁆𑀥𑀁 𑀓𑀟𑁆𑀠𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀢𑀺𑀭𑁂𑀓𑀚𑀸𑀢𑁂𑀢𑀺 𑀅𑀥𑀫𑁆𑀫𑀯𑀸𑀤𑀻𑀳𑀺 𑀅𑀢𑀺𑀭𑁂𑀓𑀢𑁄 𑀚𑀸𑀢𑁂 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀯𑀢𑀢𑀺𑀬𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀢𑀢𑁄 𑀊𑀦𑁂 𑀏𑀓𑀤𑁆𑀯𑁂𑀯𑀸𑀭𑁂 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀓𑀡𑁆𑀡𑀚𑀧𑁆𑀧𑀓𑁂 𑀧𑀦 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀘𑁂 𑀲𑀗𑁆𑀖𑀢𑁆𑀣𑁂𑀭𑁄 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀲𑀗𑁆𑀖𑀢𑁆𑀣𑁂𑀭𑁄. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀏𑀢𑀦𑁆𑀢𑀺 𑀅𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀁. 𑀅𑀲𑁆𑀲𑀸𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲. 𑀇𑀢𑀭𑀸 𑀲𑀮𑀸𑀓𑀸𑀢𑀺 𑀅𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀸𑀳𑀺 𑀅𑀜𑁆𑀜𑀸 𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀸. 𑀲𑁄𑀢𑀺 𑀲𑀗𑁆𑀖𑀢𑁆𑀣𑁂𑀭𑁄. 𑀢𑀦𑁆𑀢𑀺 𑀥𑀫𑁆𑀫𑀯𑀸𑀤𑀺𑀲𑀮𑀸𑀓𑀁. 𑀢𑀢𑁄𑀢𑀺 𑀦𑁂𑀯 𑀅𑀯𑀩𑀼𑀚𑁆𑀛𑀦𑀓𑀸𑀭𑀡𑀸. 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀕𑀽𑀴𑁆𑀳𑀓𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀺𑀯𑀝𑁄 𑀅𑀢𑁆𑀣𑁄 𑀇𑀫𑀲𑁆𑀲𑀸𑀢𑀺 𑀯𑀺𑀯𑀝𑀢𑁆𑀣𑁄.

𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀯𑀺𑀦𑀬𑀓𑀣𑀸

𑁨𑁩𑁮. 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀦𑀸𑀫𑀸𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑀆𑀲𑀦𑁆𑀦𑀁 𑀦𑀸𑀫. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 𑀫𑀦𑀼𑀲𑁆𑀲𑀯𑀺𑀕𑁆𑀕𑀳 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀩𑁆𑀩𑁂𑀞𑀬𑀫𑀸𑀦𑀦𑁆𑀢𑀺 𑀯𑁂𑀞𑀦𑀭𑀳𑀺𑀢𑀁, 𑀢𑀫𑁂𑀦𑀁 𑀪𑀺𑀓𑁆𑀔𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀦𑀺𑀩𑁆𑀩𑁂𑀞𑁂𑀦𑁆𑀢𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀲𑀤𑁆𑀤𑁄 𑀫𑀸𑀦𑀲𑀤𑁆𑀤𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀢𑀺𑀯𑁂𑀞𑁂𑀢𑀻𑀢𑀺 𑀏𑀢𑁆𑀣 𑀓𑁂𑀳𑀺 𑀅𑀢𑀺𑀯𑁂𑀞𑁂𑀢𑀻𑀢𑀺 𑀆𑀳 ‘‘𑀇𑀗𑁆𑀖𑀸𑀬𑀲𑁆𑀫𑀸𑀢𑀺𑀆𑀤𑀺𑀯𑀘𑀦𑁂𑀳𑀻’’𑀢𑀺. 𑀢𑁂𑀦𑀸𑀢𑀺 𑀘𑁄𑀤𑀓𑁂𑀦. 𑀫𑀦𑁆𑀢𑀺 𑀫𑀫𑀁. 𑀆𑀳𑀸𑀢𑀺 𑀘𑀼𑀤𑀺𑀢𑀓𑁄 𑀆𑀳. 𑀏𑀢𑀲𑁆𑀲𑀸𑀢𑀺 𑀅𑀯𑀚𑀸𑀦𑀦𑀧𑀝𑀺𑀚𑀸𑀦𑀦𑀸𑀤𑀺𑀓𑀸𑀭𑀓𑀲𑁆𑀲 𑀧𑀸𑀧𑀺𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀧𑀸𑀧𑀺𑀬𑁄 𑀧𑀼𑀕𑁆𑀕𑀮𑁄 𑀲𑀘𑁂 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀺. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑁆𑀢𑀺 𑀧𑀸𑀧𑀺𑀬𑀪𑀸𑀯𑀢𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁. 𑀦𑁄 𑀘𑁂𑀢𑀺 𑀲𑀻𑀮𑀯𑀸 𑀦𑁄 𑀪𑀯𑀺𑀲𑁆𑀲𑀢𑀺 𑀘𑁂. 𑀢𑀣𑀸 𑀦𑀸𑀲𑀺𑀢𑁄𑀢𑀺 𑀢𑁂𑀦 𑀢𑀲𑁆𑀲 𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀓𑀭𑀡𑁂𑀦 𑀦𑀸𑀲𑀁 𑀕𑀢𑁄 𑀪𑀯𑀺𑀲𑁆𑀲𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀫𑀣𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀲𑀫𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.