𑁯. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀁

𑁨𑁩𑁪. 𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼𑀓𑀣𑀸

𑁩𑁮𑁦. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸𑀢𑀺 𑀏𑀢𑁆𑀣 𑀕𑀕𑁆𑀕𑀭𑀲𑀤𑁆𑀤𑀲𑁆𑀲 𑀦𑀸𑀫𑀲𑀤𑁆𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀕𑁆𑀕𑀭𑀦𑀸𑀫𑀺𑀓𑀸𑀬 𑀇𑀢𑁆𑀣𑀺𑀬𑀸’’𑀢𑀺. 𑀇𑀫𑀺𑀦𑀸 𑀕𑀕𑁆𑀕𑀭𑀲𑀤𑁆𑀤𑁄 𑀕𑀕𑁆𑀕𑀭𑀇𑀢𑀺 𑀦𑀸𑀫𑀁 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀇𑀢𑁆𑀣𑀺𑀤𑀩𑁆𑀩𑀁 𑀯𑀤𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺𑀧𑀝𑀺𑀩𑀤𑁆𑀥𑁄𑀢𑀺 𑀢𑀦𑁆𑀢𑀺𑀬𑀸 𑀧𑀝𑀺𑀩𑀤𑁆𑀥𑁄. ‘‘𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺 𑀬𑀸𑀕𑀼𑀬𑀸’’𑀢𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀓𑀲𑁆𑀲𑀧𑀕𑁄𑀢𑁆𑀢𑀦𑀸𑀫𑀓𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀢𑀢𑁆𑀣𑁂𑀯𑀸𑀢𑀺 𑀯𑀸𑀲𑀪𑀕𑀸𑀫𑁂𑀬𑁂𑀯.

𑁩𑁮𑁨. 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺𑀆𑀤𑀻𑀦𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁩𑁬. 𑀜𑀢𑁆𑀢𑀺𑀯𑀺𑀧𑀦𑁆𑀦𑀓𑀫𑁆𑀫𑀸𑀤𑀺𑀓𑀣𑀸

𑁩𑁮𑁫. 𑀅𑀜𑁆𑀜𑀢𑁆𑀭𑀸𑀧𑀺 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀥𑀫𑁆𑀫𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁂𑀢𑀦𑁆𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀥𑀫𑁆𑀫’’𑀦𑁆𑀢𑀺. ‘‘𑀅𑀜𑁆𑀜𑀢𑁆𑀭𑀸’’𑀢𑀺 𑀦𑀺𑀧𑀸𑀢𑀧𑀬𑁄𑀕𑁂 𑀤𑀼𑀢𑀺𑀬𑀸𑀢𑀢𑀺𑀬𑀸𑀧𑀜𑁆𑀘𑀫𑀻𑀲𑀼 𑀅𑀜𑁆𑀜𑀢𑀭𑀲𑁆𑀲 𑀲𑀫𑁆𑀪𑀯𑀢𑁄 𑀉𑀧𑀬𑁄𑀕𑀯𑀘𑀦𑀫𑁆𑀧𑀺 𑀳𑁄𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀬𑀫𑁂𑀯 𑀯𑀸 𑀧𑀸𑀞𑁄’’𑀢𑀺. ‘‘𑀪𑀽𑀢𑁂𑀦 𑀯𑀢𑁆𑀣𑀼𑀦𑀸’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀲𑀤𑁆𑀤𑀲𑁆𑀲 𑀲𑀘𑁆𑀘𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀲𑀤𑁆𑀤𑀲𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀅𑀢𑀺𑀤𑀺𑀲𑀢𑀺, 𑀦 𑀅𑀢𑁆𑀣𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀲𑀢𑁆𑀣𑀼 𑀆𑀡𑀸. 𑀲𑀢𑁆𑀣𑀼𑀆𑀡𑀸 𑀦𑀸𑀫 𑀜𑀢𑁆𑀢𑀺𑀅𑀦𑀼𑀲𑀸𑀯𑀦𑀸𑀦𑀁 𑀲𑀫𑁆𑀧𑀤𑀸𑀢𑀺 𑀆𑀳 ‘‘𑀜𑀢𑁆𑀢𑀺𑀲𑀫𑁆𑀧𑀤𑀸 𑀅𑀦𑀼𑀲𑀸𑀯𑀦𑀲𑀫𑁆𑀧𑀤𑀸 𑀘𑀸’’𑀢𑀺. ‘‘𑀧𑀝𑀺𑀓𑀼𑀝𑁆𑀞𑀜𑁆𑀘𑁂𑀯 𑀓𑀢𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀓𑀼𑀝𑁆𑀞𑀓𑀢𑀦𑁆𑀢𑀺 𑀧𑀤𑀲𑁆𑀲 𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀓𑀼𑀲𑀺𑀢𑀩𑁆𑀩𑀦𑁆𑀢𑀺 𑀧𑀝𑀺𑀓𑀼𑀝𑁆𑀞𑀁, 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀢𑀁, 𑀓𑀫𑁆𑀫𑀁. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀅𑀜𑁆𑀜𑁂𑀲𑀽’’𑀢𑀺𑀆𑀤𑀺. 𑀢𑀢𑁆𑀣 𑀬𑀦𑁆𑀢𑀺 𑀓𑀫𑁆𑀫𑀁.

𑁩𑁮𑁭. 𑀧𑀸𑀴𑀺𑀬𑀸𑀢𑀺 𑀯𑀺𑀦𑀬𑀧𑀸𑀴𑀺𑀬𑀸. 𑀬𑀦𑁆𑀢𑀺 𑀓𑀫𑁆𑀫𑀁, 𑀦 𑀓𑀭𑀺𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀅𑀝𑁆𑀞𑀓𑀣𑀸𑀬𑀁. 𑀲𑁄 𑀘 𑀔𑁄𑀢𑀺 𑀲𑁄 𑀘 𑀯𑀺𑀢𑁆𑀣𑀸𑀭𑁄, 𑀆𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀸𑀦𑀫𑁂𑀯 𑀯𑀲𑁂𑀦 𑀆𑀕𑀢𑁄, 𑀦𑀦𑀼 𑀜𑀢𑁆𑀢𑀺𑀅𑀧𑀮𑁄𑀓𑀦𑀓𑀫𑁆𑀫𑀯𑀲𑁂𑀦𑀧𑀺 𑀆𑀕𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀲𑀼 𑀳𑀸𑀧𑀦𑀁 𑀯𑀸 𑀅𑀜𑁆𑀜𑀣𑀸 𑀓𑀭𑀡𑀁 𑀯𑀸 𑀅𑀢𑁆𑀣𑀺 𑀯𑀺𑀬 𑀜𑀢𑁆𑀢𑀺𑀓𑀫𑁆𑀫𑁂 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀜𑀢𑁆𑀢𑀺𑀓𑀫𑁆𑀫𑁂 𑀜𑀢𑁆𑀢𑀺𑀝𑁆𑀞𑀧𑀦𑀢𑁄 𑀅𑀜𑁆𑀜𑀓𑀺𑀘𑁆𑀘𑀲𑁆𑀲 𑀅𑀲𑀫𑁆𑀪𑀯𑀢𑁄 𑀳𑀸𑀧𑀦𑀁 𑀯𑀸 𑀅𑀜𑁆𑀜𑀣𑀸 𑀓𑀭𑀡𑀁 𑀯𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀦𑀻𑀢𑀺 𑀜𑀢𑁆𑀢𑀺𑀓𑀫𑁆𑀫𑀅𑀧𑀮𑁄𑀓𑀦𑀓𑀫𑁆𑀫𑀸𑀦𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀓𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 (𑀧𑀭𑀺. 𑀅𑀝𑁆𑀞. 𑁪𑁮𑁨).

𑁨𑁩𑁭. 𑀘𑀢𑀼𑀯𑀕𑁆𑀕𑀓𑀭𑀡𑀸𑀤𑀺𑀓𑀣𑀸

𑁩𑁮𑁮. 𑀬𑀤𑀺𑀤𑀁 𑀓𑀫𑁆𑀫𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀲𑀗𑁆𑀖𑀸𑀦𑀁. 𑀓𑀫𑁆𑀫𑀧𑁆𑀧𑀢𑁆𑀢𑁄𑀢𑀺 𑀏𑀢𑁆𑀣 𑀓𑀫𑁆𑀫𑁂𑀦, 𑀓𑀫𑁆𑀫𑀲𑁆𑀲 𑀯𑀸 𑀧𑀢𑁆𑀢𑁄𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀓𑀫𑁆𑀫𑀁 𑀧𑀢𑁆𑀢𑁄’’𑀢𑀺. ‘‘𑀲𑀩𑁆𑀩𑀓𑀫𑁆𑀫𑁂𑀲𑀼 𑀓𑀫𑁆𑀫𑀧𑀢𑁆𑀢𑁄’’𑀢𑀺 𑀧𑀸𑀴𑀺𑀦𑀬𑁂𑀦 ‘‘𑀓𑀫𑁆𑀫𑁂𑀲𑀼 𑀧𑀢𑁆𑀢𑁄’’𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑀺. 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 ‘‘𑀓𑀫𑁆𑀫𑁂𑀦 𑀓𑀫𑁆𑀫𑀲𑁆𑀲 𑀯𑀸 𑀧𑀢𑁆𑀢𑁄’’𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯.

𑁩𑁮𑁯. 𑀧𑀭𑀺𑀲𑀢𑁄𑀢𑀺 𑀧𑀭𑀺𑀲𑀓𑀸𑀭𑀡𑀸. 𑀢𑀢𑁆𑀣𑀸𑀢𑀺 ‘‘𑀘𑀢𑀼𑀯𑀕𑁆𑀕𑀓𑀭𑀡𑀜𑁆𑀘𑁂 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀞𑁂, 𑀘𑀢𑀼𑀯𑀻𑀲𑀢𑀺𑀧𑀼𑀕𑁆𑀕𑀮𑁂𑀲𑀼 𑀯𑀸. 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁄𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄. 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁄. ‘‘𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀪𑀺𑀓𑁆𑀔𑀼𑀦𑀻𑀘𑀢𑀼𑀢𑁆𑀣𑁄’’𑀢𑀺𑀆𑀤𑀻𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀼𑀦𑀻 𑀘𑀢𑀼𑀢𑁆𑀣𑀻 𑀏𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀻𑀘𑀢𑀼𑀢𑁆𑀣𑁄, 𑀘𑀢𑀼𑀯𑀕𑁆𑀕𑁄 𑀲𑀗𑁆𑀖𑁄𑀢𑀺𑀆𑀤𑀺𑀦𑀸 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄.

𑁩𑁯𑁩. 𑀧𑀭𑀺𑀯𑀸𑀲𑀸𑀤𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀫𑀽𑀮𑀸𑀬𑀓𑀲𑁆𑀲𑀦𑀫𑀸𑀦𑀢𑁆𑀢𑀅𑀩𑁆𑀪𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀲𑀦𑁆𑀢𑀺 𑀧𑀭𑀺𑀯𑀸𑀲𑀸𑀤𑀺𑀓𑀫𑁆𑀫𑀸𑀦𑀁. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁 𑀘𑀽𑀴𑀯𑀕𑁆𑀕𑁂 (𑀘𑀽𑀴𑀯. 𑀅𑀝𑁆𑀞. 𑁭𑁫 𑀆𑀤𑀬𑁄).

𑁩𑁯𑁪. 𑀧𑀝𑀺𑀓𑀼𑀝𑁆𑀞𑀓𑀢𑀓𑀫𑁆𑀫𑀲𑁆𑀲𑀸𑀢𑀺 𑀧𑀝𑀺𑀓𑀼𑀝𑁆𑀞𑀲𑁆𑀲 𑀳𑀼𑀢𑁆𑀯𑀸 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲. 𑀧𑀓𑀢𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀧𑀓𑀢𑀺𑀲𑀻𑀮𑀲𑀗𑁆𑀔𑀸𑀢𑁄 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀧𑀓𑀢𑀢𑁆𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀧𑀦𑁆𑀦𑀲𑀻𑀮𑀲𑁆𑀲𑀸’’𑀢𑀺. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀦𑀸𑀧𑀚𑁆𑀚𑀦𑁆𑀢𑀲𑁆𑀲𑀸𑀧𑀺 𑀅𑀯𑀺𑀧𑀦𑁆𑀦𑀲𑀻𑀮𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀸𑀭𑀸𑀚𑀺𑀓𑀁 𑀅𑀦𑀚𑁆𑀛𑀸𑀧𑀦𑁆𑀦𑀲𑁆𑀲𑀸’’𑀢𑀺. 𑀇𑀫𑀺𑀦𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀦𑁆𑀢𑁄𑀧𑀺 𑀧𑀓𑀢𑀢𑁆𑀢𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀧𑀺 𑀳𑀺 𑀇𑀥 𑀅𑀯𑀺𑀧𑀦𑁆𑀦𑀲𑀻𑀮𑁄 𑀦𑀸𑀫, 𑀅𑀜𑁆𑀜𑀢𑁆𑀣 𑀧𑀦 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀪𑀸𑀯𑀢𑁄 𑀢𑀁 𑀆𑀧𑀚𑁆𑀚𑀦𑁆𑀢𑁄𑀧𑀺 𑀯𑀺𑀧𑀦𑁆𑀦𑀲𑀻𑀮𑁄𑀬𑁂𑀯 𑀦𑀸𑀫. 𑀆𑀦𑀦𑁆𑀢𑀭𑀺𑀓𑀲𑁆𑀲𑀸𑀢𑀺 𑀏𑀢𑁆𑀣 𑀅𑀦𑀦𑁆𑀢𑀭𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀜𑁆𑀘 𑀡𑀺𑀓𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺. 𑀢𑀢𑁆𑀣 ‘‘𑀅𑀢𑁆𑀢𑀦𑁄’’𑀢𑀺 𑀇𑀫𑀺𑀦𑀸 𑀅𑀦𑀦𑁆𑀢𑀭𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀺. ‘‘𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀡𑀺𑀓𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁨𑁩𑁯. 𑀤𑁆𑀯𑁂𑀦𑀺𑀲𑁆𑀲𑀸𑀭𑀡𑀸𑀤𑀺𑀓𑀣𑀸

𑁩𑁯𑁫. 𑀯𑀢𑁆𑀣𑀼𑀢𑁄𑀢𑀺 𑀯𑀢𑁆𑀣𑀼𑀓𑀸𑀭𑀡𑀸. 𑀢𑀢𑁆𑀣𑀸𑀢𑀺 ‘‘𑀤𑁆𑀯𑁂𑀫𑀸 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀞𑁂. ‘‘𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 ‘‘𑀅𑀧𑁆𑀧𑀢𑁆𑀢𑁄’’𑀢𑀺𑀆𑀤𑀺𑀲𑀼𑀢𑁆𑀢𑀲𑁆𑀲 𑀦𑁂𑀬𑁆𑀬𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀦𑁆𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁. 𑀧𑀼𑀦 𑀢𑀦𑁆𑀢𑀺 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀫𑁂𑀯. 𑀏𑀲 𑀪𑀺𑀓𑁆𑀔𑀼 𑀅𑀧𑁆𑀧𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀅𑀧𑁆𑀧𑀢𑁆𑀢𑁄𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀆𑀯𑁂𑀡𑀺𑀓𑀮𑀓𑁆𑀔𑀡𑁂𑀦𑀸𑀢𑀺 𑀅𑀯𑀺𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑁂𑀦 𑀮𑀓𑁆𑀔𑀡𑁂𑀦. 𑀅𑀢𑁆𑀢𑀦𑀸 𑀅𑀯𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀲𑀼𑀁 𑀪𑀽𑀢𑁂𑀦 𑀮𑀓𑁆𑀔𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀅𑀧𑁆𑀧𑀢𑁆𑀢𑁄, 𑀓𑀲𑁆𑀫𑀸 𑀲𑀼𑀦𑀺𑀲𑁆𑀲𑀸𑀭𑀺𑀢𑁄𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀲𑁆𑀲𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲, 𑀓𑀭𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀘𑁂 𑀲𑀗𑁆𑀖𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀦𑀺𑀲𑁆𑀲𑀸𑀭𑁂𑀢𑀺, 𑀲𑀼𑀦𑀺𑀲𑁆𑀲𑀸𑀭𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀪𑀺𑀓𑁆𑀔𑀼. 𑀬𑀲𑁆𑀫𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀲𑁆𑀫𑀸 𑀲𑀼𑀦𑀺𑀲𑁆𑀲𑀸𑀭𑀺𑀢𑁄𑀢𑀺 𑀬𑁄𑀚𑀦𑀸. 𑀓𑀺𑀢𑁆𑀢𑀓𑁂𑀦 𑀅𑀗𑁆𑀕𑁂𑀦 𑀅𑀦𑀼𑀜𑁆𑀜𑀸𑀢𑀸𑀢𑀺 𑀆𑀳 ‘‘𑀏𑀓𑁂𑀦𑀧𑀺 𑀅𑀗𑁆𑀕𑁂𑀦𑀸’’𑀢𑀺.

𑁩𑁯𑁬. 𑀑𑀲𑀸𑀭𑀡𑀸𑀢𑀺 𑀏𑀢𑁆𑀣 𑀑𑀢𑁆𑀬𑀽𑀧𑀲𑀕𑁆𑀕𑀯𑀲𑁂𑀦 𑀲𑀭𑀥𑀸𑀢𑀼 𑀧𑀯𑁂𑀲𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀯𑁂𑀲𑀦𑀸’’𑀢𑀺. 𑀢𑀢𑁆𑀣𑀸𑀢𑀺 ‘‘𑀑𑀲𑀸𑀭𑀡𑀸’’𑀢𑀺𑀆𑀤𑀺𑀧𑀸𑀞𑁂. 𑀑𑀲𑀸𑀭𑁂𑀢𑀻𑀢𑀺 𑀏𑀢𑁆𑀣 𑀅𑀩𑁆𑀪𑀸𑀦𑀸𑀤𑀺𑀯𑀲𑁂𑀦 𑀧𑀯𑁂𑀲𑀦𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀲𑁂𑀦𑀸’’𑀢𑀺. 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀏𑀓𑀯𑀸𑀭𑀸𑀤𑀺𑀓𑁂 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀢𑀺𑀲𑀸𑀭𑀸𑀢𑀺 𑀲𑀤𑁄𑀲𑀸. 𑀢𑀣𑀸𑀢𑀺 𑀬𑀣𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀸𑀢𑀺𑀲𑀸𑀭𑀸, 𑀢𑀣𑀸. 𑀲𑁂𑀲𑁄 𑀓𑀸𑀭𑀓𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀬𑁄 𑀧𑀦 𑀤𑁆𑀯𑀢𑁆𑀢𑀺𑀁𑀲 𑀲𑀼𑀑𑀲𑀸𑀭𑀺𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀥𑀫𑀽𑀕𑀩𑀥𑀺𑀭𑀸𑀦𑀁 𑀅𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀉𑀧𑀲𑀫𑁆𑀧𑀤𑀸 𑀭𑀼𑀳𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀢𑀺 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲.

𑁩𑁯𑁭. 𑀅𑀪𑀽𑀢𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀅𑀲𑀘𑁆𑀘𑀯𑀢𑁆𑀣𑀼𑀯𑀲𑁂𑀦, 𑀅𑀲𑀁𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀯𑀲𑁂𑀦 𑀯𑀸. 𑀢𑀢𑁆𑀣𑀸𑀢𑀺 ‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀞𑁂. 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀸𑀢𑀺 𑀏𑀢𑁆𑀣 𑀢𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀸’’𑀢𑀺.

𑁨𑁪𑁧. 𑀉𑀧𑀸𑀮𑀺𑀧𑀼𑀘𑁆𑀙𑀸𑀓𑀣𑀸

𑁪𑁦𑁦. 𑀢𑀢𑁆𑀣𑀸𑀢𑀺 𑀉𑀧𑀸𑀮𑀺𑀧𑀜𑁆𑀳𑁂𑀲𑀼. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀏𑀓𑀸 𑀧𑀼𑀘𑁆𑀙𑀸 𑀓𑀢𑀸𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀯𑀸𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁂𑀦 ‘‘𑀦 𑀓𑁂𑀯𑀮𑀁 𑀉𑀧𑀸𑀮𑀺𑀧𑀜𑁆𑀳𑁂𑀲𑀼𑀬𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺, 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀯𑀸𑀭𑁂𑀧𑀻’’𑀢𑀺 𑀤𑀲𑁆𑀲𑁂𑀢𑀺.

𑁨𑁪𑁨. 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀣𑀸

𑁪𑁦𑁭. ‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀪𑀡𑁆𑀟𑀦𑀓𑀸𑀭𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀇𑀥 𑀧𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀞𑁂. 𑀅𑀦𑀧𑀤𑀸𑀦𑁄𑀢𑀺 𑀏𑀢𑁆𑀣 𑀅𑀧𑀧𑀼𑀩𑁆𑀩𑁄 𑀤𑀸𑀲𑀤𑁆𑀤𑁄 𑀅𑀯𑀔𑀡𑁆𑀟𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀧𑀤𑀸𑀦𑀁 𑀯𑀼𑀘𑁆𑀘𑀢𑀺 𑀧𑀭𑀺𑀘𑁆𑀙𑁂𑀤𑁄’’𑀢𑀺. 𑀦𑀢𑁆𑀣𑀺 𑀅𑀧𑀤𑀸𑀦𑀁 𑀅𑀯𑀔𑀡𑁆𑀟𑀦𑀁 𑀆𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁄 𑀏𑀢𑀲𑁆𑀲𑀸𑀢𑀺 𑀅𑀦𑀧𑀤𑀸𑀦𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀲𑀸𑀬𑁂𑀯 𑀧𑀸𑀴𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀧𑀸𑀴𑀺𑀬𑀁. 𑀓𑀺𑀜𑁆𑀘𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀁 𑀧𑀸𑀴𑀺𑀅𑀦𑀼𑀲𑀸𑀭𑁂𑀦 𑀯𑀺𑀤𑀺𑀢𑀼𑀁 𑀦 𑀲𑀓𑁆𑀓𑀸 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.