𑀫𑀳𑀸𑀯𑀕𑁆𑀕𑀬𑁄𑀚𑀦𑀸

𑁧. 𑀫𑀳𑀸𑀔𑀦𑁆𑀥𑀓𑀁

𑁧. 𑀩𑁄𑀥𑀺𑀓𑀣𑀸

𑀏𑀯𑀽𑀪𑀢𑁄𑀯𑀺𑀪𑀗𑁆𑀕𑀲𑁆𑀲, 𑀓𑀢𑁆𑀯𑀸𑀦 𑀬𑁄𑀚𑀦𑀸𑀦𑀬𑀁;

𑀫𑀳𑀸𑀯𑀕𑁆𑀕𑀔𑀦𑁆𑀥𑀓𑀲𑁆𑀲, 𑀓𑀭𑀺𑀲𑁆𑀲𑀁 𑀬𑁄𑀚𑀦𑀸𑀦𑀬𑀁.

𑀉𑀪𑀺𑀦𑁆𑀦𑀦𑁆𑀢𑀺 𑀉𑀪𑀬𑁂𑀲𑀁. 𑀧𑀸𑀢𑀺𑀫𑁄𑀓𑁆𑀔𑀸𑀦𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀯𑀺𑀪𑀗𑁆𑀕𑀸𑀦𑀁. 𑀧𑀸𑀢𑀺𑀫𑁄𑀓𑁆𑀔𑀕𑀳𑀡𑁂𑀦 𑀳𑁂𑀢𑁆𑀣 𑀢𑁂𑀲𑀁 𑀯𑀺𑀪𑀗𑁆𑀕𑁄𑀧𑀺 𑀕𑀳𑀺𑀢𑁄 𑀅𑀪𑁂𑀤𑁂𑀦 𑀯𑀸 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀯𑀸. 𑀔𑀦𑁆𑀥𑀓𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀲𑀫𑀽𑀳𑀁. 𑀔𑀦𑁆𑀥𑀲𑀤𑁆𑀤𑁄 𑀳𑁂𑀢𑁆𑀣 𑀧𑀜𑁆𑀜𑀢𑁆𑀢𑀺𑀯𑀸𑀘𑀓𑁄. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺 ‘‘𑀔𑀦𑁆𑀥𑁄’’𑀢𑀺. 𑀢𑁂𑀲𑀁 𑀲𑀫𑀽𑀳𑁄 𑀔𑀦𑁆𑀥𑀓𑁄. 𑀅𑀣𑀯𑀸 𑀔𑀦𑁆𑀥𑁄𑀢𑀺 𑀭𑀸𑀲𑀺. 𑀔𑀦𑁆𑀥𑀲𑀤𑁆𑀤𑁄 𑀳𑀺 𑀭𑀸𑀲𑀢𑁆𑀣𑀯𑀸𑀘𑀓𑁄. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀭𑀸𑀲𑀺 𑀯𑀼𑀘𑁆𑀘𑀢𑀺 ‘‘𑀔𑀦𑁆𑀥𑁄’’𑀢𑀺. 𑀓𑀓𑀸𑀭𑁄 𑀧𑀓𑀸𑀲𑀓𑀯𑀸𑀘𑀓𑁄. 𑀔𑀦𑁆𑀥𑀸𑀦𑀁 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀭𑀸𑀲𑀻𑀦𑀁 𑀓𑁄 𑀧𑀓𑀸𑀲𑀓𑁄𑀢𑀺 𑀔𑀦𑁆𑀥𑀓𑁄, 𑀢𑀁 𑀔𑀦𑁆𑀥𑀓𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀉𑀪𑀺𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀸𑀦𑀁 𑀲𑀗𑁆𑀕𑀻𑀢𑀺𑀲𑀫𑀦𑀦𑁆𑀢𑀭𑀁 𑀔𑀦𑁆𑀥𑀓𑁄𑀯𑀺𑀤𑀸 𑀔𑀦𑁆𑀥𑀓𑁂𑀲𑀼 𑀓𑀼𑀲𑀮𑀸 𑀫𑀳𑀸𑀣𑁂𑀭𑀸 𑀬𑀁 𑀔𑀦𑁆𑀥𑀓𑀁 𑀲𑀗𑁆𑀕𑀸𑀬𑀺𑀁𑀲𑀼, 𑀢𑀲𑁆𑀲 𑀔𑀦𑁆𑀥𑀓𑀲𑁆𑀲 𑀤𑀸𑀦𑀺 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀬𑀲𑁆𑀫𑀸 𑀲𑀫𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀢𑀲𑁆𑀲 𑀔𑀦𑁆𑀥𑀓𑀲𑁆𑀲 𑀅𑀬𑀁 𑀅𑀦𑀼𑀢𑁆𑀢𑀸𑀦𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀻𑀢𑀺.

𑀬𑁂 𑀅𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀺𑀲𑀤𑁆𑀤𑁄 𑀧𑀤𑀸𑀮𑀗𑁆𑀓𑀸𑀭𑁄. 𑀬𑁂𑀲𑀦𑁆𑀢𑀺 𑀧𑀤𑀸𑀦𑀁. 𑀢𑁂𑀢𑀺 𑀢𑁂 𑀅𑀢𑁆𑀣𑁂. 𑀪𑀯𑁂𑀢𑀺 𑀪𑀯𑁂𑀬𑁆𑀬, 𑀪𑀯𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀅𑀢𑁆𑀣𑀸𑀦𑀁. 𑀓𑀺𑀦𑁆𑀢𑀺 𑀓𑀺𑀁 𑀧𑀬𑁄𑀚𑀦𑀁. 𑀢𑁂𑀢𑀺 𑀅𑀢𑁆𑀣𑁂, 𑀜𑀸𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣𑀯𑀸 𑀢𑁂𑀢𑀺 𑀅𑀢𑁆𑀣𑀸, 𑀅𑀯𑀡𑁆𑀡𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁𑀬𑁂𑀯𑀸𑀢𑀺 𑀅𑀢𑁆𑀣𑀸𑀦𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀧𑀤𑀪𑀸𑀚𑀦𑀻𑀬𑁂 𑀬𑁂𑀲𑀁 𑀧𑀤𑀸𑀦𑀁 𑀬𑁂 𑀅𑀢𑁆𑀣𑀸 𑀪𑀕𑀯𑀢𑀸 𑀧𑀓𑀸𑀲𑀺𑀢𑀸, 𑀢𑁂𑀲𑀁 𑀧𑀤𑀸𑀦𑀦𑁆𑀢𑀺 𑀧𑀸𑀞𑀲𑁂𑀲𑁄, 𑀢𑁂 𑀅𑀢𑁆𑀣𑁂 𑀧𑀼𑀦 𑀯𑀤𑁂𑀬𑁆𑀬𑀸𑀫 𑀘𑁂, 𑀓𑀤𑀸 𑀧𑀭𑀺𑀬𑁄𑀲𑀸𑀦𑀁 𑀲𑀁𑀯𑀡𑁆𑀡𑀦𑀸𑀬 𑀧𑀭𑀺𑀦𑀺𑀝𑁆𑀞𑀸𑀦𑀁 𑀪𑀯𑁂, 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀘𑁂𑀯 𑀅𑀢𑁆𑀣𑀸 𑀉𑀢𑁆𑀢𑀸𑀦𑀸, 𑀢𑁂𑀲𑀁 𑀲𑀁𑀯𑀡𑁆𑀡𑀦𑀸𑀬 𑀓𑀺𑀁 𑀧𑀬𑁄𑀚𑀦𑀁, 𑀦 𑀧𑀬𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀥𑀺𑀧𑁆𑀧𑀸𑀬𑀸𑀦𑀼𑀲𑀦𑁆𑀥𑀻𑀳𑀺 𑀘 𑀅𑀥𑀺𑀧𑁆𑀧𑀸𑀬𑁂𑀦 𑀘 𑀅𑀦𑀼𑀲𑀦𑁆𑀥𑀺𑀦𑀸 𑀘 𑀩𑁆𑀬𑀜𑁆𑀚𑀦𑁂𑀦 𑀘 𑀬𑁂 𑀧𑀦 𑀅𑀢𑁆𑀣𑀸 𑀅𑀦𑀼𑀢𑁆𑀢𑀸𑀦𑀸, 𑀢𑁂 𑀅𑀢𑁆𑀣𑁂, 𑀅𑀢𑁆𑀣𑀸 𑀯𑀸 𑀅𑀯𑀡𑁆𑀡𑀺𑀢𑀸 𑀬𑀲𑁆𑀫𑀸 𑀜𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀢𑁆𑀣𑀸𑀦𑀁 𑀅𑀬𑀁 𑀲𑀁𑀯𑀡𑁆𑀡𑀦𑀸𑀦𑀬𑁄 𑀳𑁄𑀢𑀻𑀢𑀺. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑁧. ‘‘𑀢𑁂𑀦…𑀧𑁂… 𑀯𑁂𑀭𑀜𑁆𑀚𑀸𑀬’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀓𑀭𑀡𑀯𑀘𑀦𑁂 𑀯𑀺𑀲𑁂𑀲𑀓𑀸𑀭𑀡𑀫𑀢𑁆𑀣𑀺 𑀯𑀺𑀬, ‘‘𑀢𑁂𑀦…𑀧𑁂… 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀲𑀤𑀺𑀲𑁄𑀧𑀫𑀸𑀬𑀁. 𑀓𑀺𑀜𑁆𑀘𑀸𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑀚𑁄𑀢𑀓𑁄, 𑀧𑀦-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑀚𑁄𑀢𑀓𑁄. ‘‘𑀓𑀭𑀡𑀯𑀘𑀦𑁂𑀦𑁂𑀯𑀸’’𑀢𑀺 𑀏𑀢𑁆𑀣 𑀏𑀯𑀓𑀸𑀭𑁂𑀦 𑀉𑀧𑀬𑁄𑀕𑀯𑀘𑀦𑀁 𑀯𑀸 𑀪𑀼𑀫𑁆𑀫𑀯𑀘𑀦𑀁 𑀯𑀸 𑀦𑀺𑀯𑀸𑀭𑁂𑀢𑀺. 𑀅𑀪𑀺𑀮𑀸𑀧𑁄𑀢𑀺 𑀅𑀪𑀺𑀫𑀼𑀔𑀁 𑀅𑀢𑁆𑀣𑀁 𑀮𑀧𑀢𑀻𑀢𑀺 𑀅𑀪𑀺𑀮𑀸𑀧𑁄, 𑀲𑀤𑁆𑀤𑁄. 𑀆𑀤𑀺𑀢𑁄𑀢𑀺 𑀯𑁂𑀭𑀜𑁆𑀚𑀓𑀡𑁆𑀟𑀢𑁄. 𑀏𑀢𑀦𑁆𑀢𑀺 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀆𑀤𑀺𑀯𑀘𑀦𑀁. ‘‘𑀅𑀜𑁆𑀜𑁂𑀲𑀼𑀧𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀇𑀢𑁄 𑀧𑀭𑁂𑀲𑀽’’𑀢𑀺.

𑀬𑀤𑀺 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺, 𑀓𑀺𑀁 𑀧𑀦𑁂𑀢𑀲𑁆𑀲 𑀯𑀘𑀦𑁂 𑀧𑀬𑁄𑀚𑀦𑀦𑁆𑀢𑀺 𑀘𑁄𑀤𑁂𑀦𑁆𑀢𑁄 𑀆𑀳 ‘‘𑀓𑀺𑀁 𑀧𑀦𑁂𑀢𑀲𑁆𑀲𑀸’’𑀢𑀺𑀆𑀤𑀺. 𑀏𑀢𑀲𑁆𑀲𑀸𑀢𑀺 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀆𑀤𑀺𑀯𑀘𑀦𑀲𑁆𑀲. 𑀦𑀺𑀤𑀸𑀦𑀤𑀲𑁆𑀲𑀦𑀁 𑀧𑀬𑁄𑀚𑀦𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀬𑀸 𑀳𑀻’’𑀢𑀺𑀆𑀤𑀺. 𑀬𑀸 𑀧𑀩𑁆𑀩𑀚𑁆𑀚𑀸 𑀘𑁂𑀯 𑀬𑀸 𑀉𑀧𑀲𑀫𑁆𑀧𑀤𑀸 𑀘 𑀪𑀕𑀯𑀢𑁄 𑀅𑀦𑀼𑀜𑁆𑀜𑀸𑀢𑀸𑀢𑀺 𑀬𑁄𑀚𑀦𑀸. 𑀬𑀸𑀦𑀺 𑀘 𑀅𑀦𑀼𑀜𑁆𑀜𑀸𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀦𑀻𑀢𑀺 𑀧𑀩𑁆𑀩𑀚𑁆𑀚𑀸𑀤𑀻𑀦𑀺. 𑀅𑀪𑀺𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀜𑁆𑀘. 𑀩𑁄𑀥𑀺𑀫𑀳𑀸𑀫𑀡𑁆𑀟𑁂𑀢𑀺 𑀫𑀳𑀦𑁆𑀢𑀸𑀦𑀁 𑀫𑀕𑁆𑀕𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀧𑀲𑀦𑁆𑀦𑀝𑁆𑀞𑀸𑀦𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀢𑀢𑁆𑀣𑀸𑀢𑀺 𑀬𑀁 ‘‘𑀢𑁂𑀦 𑀲𑀫𑀬𑁂𑀦 𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀢𑁆𑀣. 𑀉𑀭𑀼𑀯𑁂𑀮𑀸𑀬𑀦𑁆𑀢𑀺 𑀏𑀢𑁆𑀣 𑀉𑀭𑀼𑀲𑀤𑁆𑀤𑁄 𑀫𑀳𑀦𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀳𑀸𑀯𑁂𑀮𑀸𑀬’’𑀦𑁆𑀢𑀺. ‘‘𑀯𑀸𑀮𑀺𑀓𑀭𑀸𑀲𑀺𑀫𑁆𑀳𑀻’’𑀢𑀺 𑀇𑀫𑀺𑀦𑀸 𑀯𑁂𑀮𑀸𑀲𑀤𑁆𑀤𑀲𑁆𑀲 𑀭𑀸𑀲𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀓𑀸𑀮𑀲𑀻𑀫𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀬𑀤𑀺 𑀧𑀦 ‘‘𑀉𑀭𑀽’’𑀢𑀺 𑀯𑀸𑀮𑀺𑀓𑀸𑀬 𑀦𑀸𑀫𑀁, ‘‘𑀯𑁂𑀮𑀸’’𑀢𑀺 𑀫𑀭𑀺𑀬𑀸𑀤𑀸𑀬, 𑀏𑀯𑀜𑁆𑀳𑀺 𑀲𑀢𑀺 𑀦𑀦𑀼 𑀉𑀭𑀼𑀬𑀸 𑀯𑁂𑀮𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀯𑁂𑀮𑀸𑀢𑀺𑀓𑁆𑀓𑀫𑀦𑀳𑁂𑀢𑀼 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸’’𑀢𑀺. 𑀇𑀫𑀺𑀦𑀸 𑀯𑁂𑀮𑀸𑀬 𑀅𑀢𑀺𑀓𑁆𑀓𑀫𑁄 𑀯𑁂𑀮𑀸 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦, 𑀯𑁂𑀮𑀸𑀬 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸 𑀧𑀤𑀯𑀺𑀧𑀭𑀺𑀬𑀸𑀬𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 ‘‘𑀉𑀭𑀼𑀯𑁂𑀮𑀸𑀬’’𑀦𑁆𑀢𑀺𑀧𑀤𑁂. 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀅𑀢𑀻𑀢𑁂 𑀓𑀺𑀭𑀸’’𑀢𑀺𑀆𑀤𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀧𑀲𑀧𑀩𑁆𑀩𑀚𑁆𑀚𑀦𑁆𑀢𑀺 𑀇𑀲𑀺𑀧𑀩𑁆𑀩𑀚𑁆𑀚𑀁, 𑀦 𑀲𑀫𑀡𑀧𑀩𑁆𑀩𑀚𑁆𑀚𑀁. 𑀓𑀢𑀺𑀓𑀯𑀢𑁆𑀢𑀦𑁆𑀢𑀺 𑀓𑀭𑀡𑀁 𑀓𑀢𑀁, 𑀓𑀢𑁂𑀦 𑀧𑀯𑀢𑁆𑀢𑀁 𑀓𑀢𑀺𑀓𑀁, 𑀢𑀫𑁂𑀯 𑀯𑀢𑁆𑀢𑀁 𑀓𑀢𑀺𑀓𑀯𑀢𑁆𑀢𑀁. 𑀅𑀓𑀁𑀲𑀼 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄𑀢𑀺 𑀬𑁄 𑀓𑁄𑀘𑀺. 𑀅𑀜𑁆𑀜𑁄𑀢𑀺 𑀅𑀢𑁆𑀢𑀦𑀸 𑀅𑀧𑀭𑁄. 𑀲𑁄 𑀆𑀓𑀺𑀭𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑀧𑀼𑀝𑁂𑀦𑀸𑀢𑀺 𑀧𑀡𑁆𑀡𑁂𑀦 𑀓𑀢𑁂𑀦 𑀧𑀼𑀝𑁂𑀦. 𑀢𑀢𑁄𑀢𑀺 𑀓𑀢𑀺𑀓𑀯𑀢𑁆𑀢𑀓𑀭𑀡𑀢𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂. 𑀢𑀢𑁄𑀢𑀺 𑀫𑀳𑀸𑀯𑀸𑀮𑀺𑀓𑀭𑀸𑀲𑀺𑀚𑀦𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀢𑀁 𑀧𑀤𑁂𑀲𑀁. 𑀢𑀦𑁆𑀢𑀺 𑀫𑀳𑀸𑀯𑀸𑀮𑀺𑀓𑀭𑀸𑀲𑀺𑀁.

‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂’’𑀢𑀺 𑀏𑀢𑁆𑀣 𑀅𑀲𑁆𑀲𑀢𑁆𑀣𑀭𑀼𑀓𑁆𑀔𑀲𑁆𑀲 𑀉𑀧𑀘𑀸𑀭𑀯𑀲𑁂𑀦 𑀩𑁄𑀥𑀻𑀢𑀺 𑀦𑀸𑀫𑀮𑀪𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺𑀆𑀤𑀺. 𑀇𑀫𑀺𑀦𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀻𑀢𑀺 𑀯𑀘𑀦𑀢𑁆𑀣𑁂𑀦 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀩𑁄𑀥𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀩𑁄𑀥𑀺𑀫𑁆𑀳𑀺, 𑀩𑁄𑀥𑀺𑀬𑀁 𑀯𑀸. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀭𑀼𑀓𑁆𑀔𑁄𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀫𑀕𑁆𑀕𑀜𑀸𑀡𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀽𑀮𑁂𑀢𑀺 𑀆𑀲𑀦𑁆𑀦𑁂. 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀯𑀲𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀧𑀞𑀫𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺. ‘‘𑀳𑀼𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀧𑀞𑀫’’𑀦𑁆𑀢𑀺𑀧𑀤𑀲𑁆𑀲 𑀪𑀸𑀯𑀦𑀧𑀼𑀁𑀲𑀓𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀧𑀞𑀫𑀁𑀬𑁂𑀯𑀸𑀢𑀺 𑀲𑀩𑁆𑀩𑁂𑀲𑀁 𑀚𑀦𑀸𑀦𑀁 𑀧𑀞𑀫𑀫𑁂𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀏𑀯 𑀧𑀮𑁆𑀮𑀗𑁆𑀓𑁄 𑀏𑀓𑀧𑀮𑁆𑀮𑀗𑁆𑀓𑁄𑀢𑀺 𑀅𑀯𑀥𑀸𑀭𑀡𑀲𑀫𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑁂𑀦𑁂𑀯 𑀧𑀮𑁆𑀮𑀗𑁆𑀓𑁂𑀦𑀸’’𑀢𑀺. ‘‘𑀲𑀓𑀺𑀁…𑀧𑁂… 𑀆𑀪𑀼𑀚𑀺𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺. 𑀧𑀮𑁆𑀮𑀗𑁆𑀓𑁄𑀢𑀺 𑀘 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻𑀢𑀺 𑀏𑀢𑁆𑀣 𑀢𑀤𑀗𑁆𑀕𑀸𑀤𑀻𑀲𑀼 (𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁧𑁦𑁪) 𑀧𑀜𑁆𑀘𑀲𑀼 𑀯𑀺𑀫𑀼𑀢𑁆𑀢𑀻𑀲𑀼 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀲𑀗𑁆𑀔𑀸𑀢𑀸 𑀨𑀮𑀲𑀫𑀸𑀧𑀢𑁆𑀢𑀺 𑀏𑀯𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔’’𑀦𑁆𑀢𑀺. 𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺. 𑀲𑀸 𑀳𑀺 𑀯𑀺𑀭𑀼𑀤𑁆𑀥𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀺𑀢𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀅𑀣𑀯𑀸 𑀢𑀸𑀬 𑀚𑀸𑀢𑀁 𑀲𑀼𑀔𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁, 𑀲𑀓𑀮𑀓𑀺𑀮𑁂𑀲𑀤𑀼𑀓𑁆𑀔𑀽𑀧𑀲𑀫𑀲𑀼𑀔𑀁. ‘‘𑀧𑀝𑀺𑀲𑀁𑀯𑁂𑀤𑀬𑀫𑀸𑀦𑁄’’𑀢𑀺𑀇𑀫𑀺𑀦𑀸 ‘‘𑀧𑀝𑀺𑀲𑀁𑀯𑁂𑀤𑀻’’𑀢𑀺 𑀏𑀢𑁆𑀣 𑀡𑀻𑀧𑀘𑁆𑀘𑀬𑀲𑁆𑀲 𑀓𑀢𑁆𑀢𑀼𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀲𑀼𑀝𑁆𑀞𑀼 𑀯𑀤𑀢𑀺 𑀅𑀦𑀼𑀪𑀯𑀢𑀻𑀢𑀺 𑀧𑀝𑀺𑀲𑀁𑀯𑁂𑀤𑀻. 𑀧𑀝𑀺𑀲𑀁𑀯𑁂𑀤𑀻 𑀳𑀼𑀢𑁆𑀯𑀸 𑀦𑀺𑀲𑀻𑀤𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀘𑁆𑀘𑀬𑀸𑀓𑀸𑀭𑀦𑁆𑀢𑀺 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀸𑀤𑀸𑀓𑀸𑀭𑀁. 𑀓𑀲𑁆𑀫𑀸 𑀧𑀘𑁆𑀘𑀬𑀸𑀓𑀸𑀭𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀦𑀸𑀫𑀸𑀢𑀺 𑀆𑀳 ‘‘𑀧𑀘𑁆𑀘𑀬𑀸𑀓𑀸𑀭𑁄 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. ‘‘𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺𑀇𑀫𑀺𑀦𑀸 ‘‘𑀧𑀝𑀺𑀘𑁆𑀘𑀸’’𑀢𑀺𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺, ‘‘𑀲𑀳𑀺𑀢𑁂’’𑀢𑀺𑀇𑀫𑀺𑀦𑀸 𑀲𑀁𑀲𑀤𑁆𑀤𑀲𑁆𑀲𑀢𑁆𑀣𑀁. ‘‘𑀥𑀫𑁆𑀫𑁂’’𑀢𑀺𑀇𑀫𑀺𑀦𑀸 𑀢𑀲𑁆𑀲 𑀲𑀭𑀽𑀧𑀁. 𑀏𑀢𑁆𑀣𑀸𑀢𑀺 𑀇𑀫𑀺𑀲𑁆𑀲𑀁 𑀯𑀺𑀦𑀬𑀝𑁆𑀞𑀓𑀣𑀸𑀬𑀁. 𑀢𑀢𑁆𑀣𑀸𑀢𑀺 ‘‘𑀅𑀦𑀼𑀮𑁄𑀫𑀧𑀝𑀺𑀮𑁄𑀫’’𑀦𑁆𑀢𑀺𑀧𑀤𑁂, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀲𑀼 𑀯𑀸. 𑀲𑁆𑀯𑁂𑀯 𑀧𑀘𑁆𑀘𑀬𑀸𑀓𑀸𑀭𑁄 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀢𑁄’’𑀢𑀺𑀇𑀫𑀺𑀦𑀸 𑀅𑀦𑀼𑀮𑁄𑀫𑀲𑀤𑁆𑀤𑀲𑁆𑀲 𑀲𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑁆𑀯𑁂𑀯𑀸𑀢𑀺 𑀧𑀘𑁆𑀘𑀬𑀸𑀓𑀸𑀭𑁄 𑀏𑀯. 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀁 𑀢𑀁 𑀓𑀺𑀘𑁆𑀘𑀁. 𑀢𑀲𑁆𑀲 𑀅𑀓𑀭𑀡𑀢𑁄𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑀢𑁄. 𑀇𑀫𑀺𑀦𑀸 𑀧𑀝𑀺𑀮𑁄𑀫𑀲𑀤𑁆𑀤𑀲𑁆𑀲 𑀲𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀦𑀬𑁂𑀦𑁂𑀯. 𑀯𑀸𑀢𑀺 𑀅𑀣𑀯𑀸. 𑀧𑀯𑀢𑁆𑀢𑀺𑀬𑀸𑀢𑀺 𑀲𑀁𑀲𑀸𑀭𑀧𑀯𑀢𑁆𑀢𑀺𑀬𑀸. 𑀅𑀦𑀼𑀮𑁄𑀫𑁄𑀢𑀺 𑀅𑀦𑀼𑀓𑀽𑀮𑁄, 𑀅𑀦𑀼𑀭𑀽𑀧𑁄 𑀯𑀸. 𑀇𑀢𑀭𑁄𑀢𑀺 ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀧𑀘𑁆𑀘𑀬𑀸𑀓𑀸𑀭𑁄. 𑀢𑀲𑁆𑀲𑀸𑀢𑀺 𑀧𑀯𑀢𑁆𑀢𑀺𑀬𑀸. 𑀧𑀝𑀺𑀮𑁄𑀫𑁄𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀏𑀢𑁆𑀣𑀸𑀢𑀺 ‘‘𑀅𑀦𑀼𑀮𑁄𑀫𑀧𑀝𑀺𑀮𑁄𑀫’’𑀦𑁆𑀢𑀺𑀧𑀤𑁂. 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀏𑀯𑀸𑀢𑀺 𑀲𑀫𑁆𑀪𑀯𑀢𑁄 𑀢𑀲𑁆𑀲 𑀨𑀮𑀁 𑀯𑀸 ‘‘𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻’’𑀢𑀺 𑀯𑀘𑀦𑀢𑁄 (𑀉𑀤𑀸. 𑀅𑀝𑁆𑀞. 𑁧; 𑀤𑀻. 𑀦𑀺. 𑀝𑀻. 𑁧.𑁧; 𑀫. 𑀦𑀺. 𑀝𑀻. 𑁧.𑀫𑀼𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀲𑀁. 𑀦𑀺. 𑀝𑀻. 𑁧.𑁧.𑀑𑀖𑀢𑀭𑀬𑀲𑀼𑀢𑁆𑀢𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁧.𑁧.𑀭𑀼𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸) 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀁 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀤𑀺𑀢𑁄 𑀧𑀦𑀸’’𑀢𑀺𑀆𑀤𑀺. 𑀬𑀸𑀯𑀲𑀤𑁆𑀤𑁄 𑀅𑀯𑀥𑀺𑀯𑀘𑀦𑁄. 𑀬𑀸𑀯 𑀅𑀦𑁆𑀢𑀁 𑀧𑀸𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁄𑀢𑀺 𑀇𑀫𑁂𑀳𑀺 𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀅𑀢𑁆𑀣𑁂𑀳𑀺. ‘‘𑀫𑀦𑀲𑀸𑀓𑀸𑀲𑀻’’𑀢𑀺 𑀏𑀢𑁆𑀣 𑀇𑀓𑀸𑀭𑀮𑁄𑀧𑀯𑀲𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀫𑀦𑀲𑀺 𑀅𑀓𑀸𑀲𑀻’’𑀢𑀺. 𑀢𑀢𑁆𑀣𑀸𑀢𑀺 ‘‘𑀫𑀦𑀲𑀸𑀓𑀸𑀲𑀻’’𑀢𑀺𑀧𑀤𑁂. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀇𑀤𑀦𑁆𑀢𑀺 𑀇𑀫𑀁 𑀆𑀓𑀸𑀭𑀁. 𑀢𑀢𑁆𑀣𑀸𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀧𑀸𑀞𑁂 𑀅𑀯𑀬𑀯𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀫𑀸𑀲𑀫𑀚𑁆𑀛𑁂 𑀢𑀲𑀤𑁆𑀤𑁂𑀦 𑀧𑀼𑀩𑁆𑀩𑀧𑀤𑀲𑁆𑀲𑁂𑀯 𑀮𑀺𑀗𑁆𑀕𑀯𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸’’𑀢𑀺. 𑀯𑀸𑀓𑁆𑀬𑁂 𑀧𑀦 𑀢𑀲𑀤𑁆𑀤𑁂𑀦 𑀧𑀭𑀧𑀤𑀲𑁆𑀲𑁂𑀯 𑀮𑀺𑀗𑁆𑀕𑀯𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸’’𑀢𑀺𑀧𑀤𑀁 ‘‘𑀲𑀫𑁆𑀪𑀯𑀦𑁆𑀢𑀻’’𑀢𑀺𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼.

𑀬𑀣𑀸 𑀧𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀧𑀦. 𑀇𑀤𑀦𑁆𑀢𑀺 𑀇𑀫𑀁 𑀆𑀓𑀸𑀭𑀁. 𑀢𑀢𑁆𑀣𑀸𑀢𑀺 ‘‘𑀅𑀯𑀺𑀚𑁆𑀚𑀸𑀬…𑀧𑁂… 𑀦𑀺𑀭𑁄𑀥𑁄’’𑀢𑀺𑀆𑀤𑀺𑀯𑀸𑀓𑁆𑀬𑁂. 𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯𑀸𑀢𑀺 𑀏𑀢𑁆𑀣 ‘‘𑀪𑀤𑁆𑀤𑀺𑀬𑁄𑀢𑁆𑀯𑁂𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 ‘‘𑀪𑀤𑁆𑀤𑀺𑀬𑁄 𑀇𑀢𑀺 𑀏𑀯𑀸’’𑀢𑀺 𑀧𑀤𑀘𑁆𑀙𑁂𑀤𑁄 𑀓𑀢𑁆𑀢𑀩𑁆𑀩𑁄, 𑀦 𑀏𑀯𑀁 ‘‘𑀅𑀯𑀺𑀚𑁆𑀚𑀸𑀬 𑀇𑀢𑀺 𑀏𑀯𑀸’’𑀢𑀺, 𑀅𑀣 𑀔𑁄 ‘‘𑀅𑀯𑀺𑀚𑁆𑀚𑀸𑀬 𑀢𑀼 𑀏𑀯𑀸’’𑀢𑀺 𑀓𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀬 𑀢𑀼 𑀏𑀯𑀸’’𑀢𑀺. ‘‘𑀧 𑀅𑀢𑀺𑀫𑁄𑀓𑁆𑀔𑀁 𑀅𑀢𑀺𑀧𑀫𑁄𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀺𑀬 𑀉𑀧𑀲𑀕𑁆𑀕𑀩𑁆𑀬𑀢𑁆𑀢𑀬𑁂𑀦 𑀯𑀼𑀢𑁆𑀢𑀁, 𑀏𑀯𑀫𑀺𑀥 𑀦𑀺𑀧𑀸𑀢𑀩𑁆𑀬𑀢𑁆𑀢𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀏𑀯𑀲𑀤𑁆𑀤𑁂𑀦 𑀲𑀢𑁆𑀢𑀚𑀻𑀯𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀢𑀼𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑀢𑁆𑀣𑀚𑁄𑀢𑀓𑁄. 𑀅𑀦𑀼𑀮𑁄𑀫𑀧𑀓𑁆𑀔𑀢𑁄 𑀧𑀝𑀺𑀮𑁄𑀫𑀲𑀗𑁆𑀔𑀸𑀢𑀁 𑀧𑀓𑁆𑀔𑀦𑁆𑀢𑀭𑀁 𑀫𑀦𑀲𑀸𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀲𑀤𑁆𑀤𑁄 𑀅𑀬𑀼𑀢𑁆𑀢𑀲𑀫𑀸𑀲𑁄, 𑀉𑀢𑁆𑀢𑀭𑀧𑀤𑁂𑀦 𑀘 𑀢𑀢𑀺𑀬𑀸𑀲𑀫𑀸𑀲𑁄𑀢𑀺 𑀆𑀳 ‘‘𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀅𑀲𑁂𑀲𑀦𑀺𑀭𑁄𑀥𑀸’’𑀢𑀺. 𑀢𑀢𑁆𑀣 𑀅𑀲𑁂𑀲𑀲𑀤𑁆𑀤𑀁 𑀯𑀺𑀭𑀸𑀕𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀫𑀓𑀢𑁆𑀯𑀸 𑀦𑀺𑀭𑁄𑀥𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀅𑀢𑁆𑀣𑀲𑁆𑀲 𑀕𑀳𑀡𑀁 𑀅𑀬𑀼𑀢𑁆𑀢𑀲𑀫𑀸𑀲𑁄 𑀦𑀸𑀫. ‘‘𑀫𑀕𑁆𑀕𑁂𑀦𑀸’’𑀢𑀺𑀇𑀫𑀺𑀦𑀸 𑀯𑀺𑀭𑀸𑀕𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑁄 𑀳𑀺 𑀯𑀺𑀭𑀚𑁆𑀚𑀦𑀝𑁆𑀞𑁂𑀦 𑀯𑀺𑀭𑀸𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀏𑀢𑁆𑀣 𑀫𑀕𑁆𑀕𑁂𑀦 𑀦𑀺𑀭𑁄𑀥𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄𑀢𑀺 𑀘 𑀅𑀦𑀼𑀧𑁆𑀧𑀸𑀤𑁂𑀦 𑀦𑀺𑀭𑁄𑀥𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀦𑀺𑀭𑀼𑀤𑁆𑀥𑀢𑁆𑀢𑀸. 𑀏𑀯𑀦𑁆𑀢𑀺 𑀬𑀣𑀸 𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀏𑀯𑀁 𑀢𑀣𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 ‘‘𑀏𑀯𑀫𑁂𑀢𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑁂. 𑀓𑁂𑀯𑀮𑀲𑀤𑁆𑀤𑁄 𑀲𑀓𑀮𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀓𑀮𑀲𑁆𑀲𑀸’’𑀢𑀺, 𑀅𑀦𑀯𑀲𑁂𑀲𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀣𑀯𑀸 𑀲𑀢𑁆𑀢𑀚𑀻𑀯𑀸𑀤𑀻𑀳𑀺 𑀅𑀫𑀺𑀲𑁆𑀲𑀺𑀢𑀢𑁆𑀢𑀸 𑀅𑀫𑀺𑀲𑁆𑀲𑀢𑁆𑀣𑁄𑀢𑀺 𑀆𑀳 ‘‘𑀲𑀼𑀤𑁆𑀥𑀲𑁆𑀲 𑀯𑀸’’𑀢𑀺. ‘‘𑀲𑀢𑁆𑀢𑀯𑀺𑀭𑀳𑀺𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀼𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀔𑀦𑁆𑀥𑀲𑀤𑁆𑀤𑁄 𑀭𑀸𑀲𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀤𑀼𑀓𑁆𑀔𑀭𑀸𑀲𑀺𑀲𑁆𑀲𑀸’’𑀢𑀺.

𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑁆𑀣 𑀏𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀬𑁆𑀯𑀸𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀯𑀺𑀚𑁆𑀚𑀸𑀤𑀺𑀯𑀲𑁂𑀦…𑀧𑁂… 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺 𑀬𑁆𑀯𑀸𑀬𑀁 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀲𑀫𑀼𑀤𑀬𑁄 𑀘 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀤𑀺𑀢𑀯𑁂𑀮𑀸𑀬𑀦𑁆𑀢𑀺 𑀧𑀸𑀓𑀝𑀯𑁂𑀮𑀸𑀬𑀁 𑀧𑀲𑀺𑀤𑁆𑀥𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀇𑀫𑀁 𑀉𑀤𑀸𑀦𑀦𑁆𑀢𑀺 𑀏𑀢𑁆𑀣 𑀇𑀫𑀲𑀤𑁆𑀤𑁄 𑀯𑀼𑀘𑁆𑀘𑀫𑀸𑀦𑀸𑀧𑁂𑀓𑁆𑀔𑁄. 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀺𑀤𑀺𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀧𑀚𑀸𑀦𑀦𑀢𑀸𑀬𑀸𑀢𑀺 𑀧𑀓𑀸𑀭𑁂𑀦 𑀚𑀸𑀦𑀦𑀪𑀸𑀯𑀲𑁆𑀲. 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀜𑀸𑀡𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀲𑁄𑀫𑀦𑀲𑁆𑀲𑁂𑀦 𑀏𑀓𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀬𑀼𑀢𑁆𑀢𑁂𑀦 𑀜𑀸𑀡𑁂𑀦 𑀲𑀫𑀼𑀝𑁆𑀞𑀸𑀦𑀁, 𑀬𑀼𑀢𑁆𑀢𑀁 𑀯𑀸 𑀜𑀸𑀡𑀲𑀗𑁆𑀔𑀸𑀢𑀁 𑀲𑀫𑀼𑀝𑁆𑀞𑀸𑀦𑀁 𑀉𑀤𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀉𑀤𑀸𑀦𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀉𑀤𑀸𑀦𑀁? 𑀉𑀤𑀸𑀦𑀝𑁆𑀞𑁂𑀦, 𑀫𑁄𑀤𑀦𑀝𑁆𑀞𑁂𑀦, 𑀓𑀻𑀴𑀦𑀝𑁆𑀞𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀓𑀺𑀫𑀺𑀤𑀁 𑀉𑀤𑀸𑀦𑀁 𑀦𑀸𑀫? 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀉𑀤𑀸𑀳𑀸𑀭𑁄. 𑀬𑀣𑀸 (𑀉𑀤𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀳𑀺 𑀬𑀁 𑀢𑁂𑀮𑀸𑀤𑀺𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀯𑀺𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀅𑀯𑀲𑁂𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀑𑀖𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀯𑀁 𑀬𑀁 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀁 𑀳𑀤𑀬𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀅𑀥𑀺𑀓𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑁄 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀉𑀤𑀸𑀳𑀸𑀭𑀯𑀺𑀲𑁂𑀲𑁄 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀻’’𑀢𑀺 𑀇𑀫𑀺𑀦𑀸 𑀉𑀤𑀥𑀸𑀢𑀼𑀲𑁆𑀲 𑀉𑀤𑀸𑀳𑀸𑀭𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀢𑀲𑁆𑀲𑀸𑀢𑀺 𑀉𑀤𑀸𑀦𑀲𑁆𑀲 𑀅𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑀤𑀸𑀢𑀺 𑀏𑀢𑁆𑀣 𑀤𑀸𑀧𑀘𑁆𑀘𑀬𑀲𑁆𑀲 𑀅𑀢𑁆𑀣𑀯𑀸𑀓𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀳𑀯𑁂𑀢𑀺 ‘‘𑀩𑁆𑀬𑀢𑁆𑀢’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀩𑁆𑀬𑀢𑁆𑀢𑀁 𑀧𑀸𑀓𑀝𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀏𑀢𑁆𑀣 𑀧𑀸𑀢𑀼𑀦𑀺𑀧𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀳𑀯𑁂’’𑀢𑀺 𑀦𑀺𑀧𑀸𑀢𑁂𑀦 𑀯𑀼𑀢𑁆𑀢𑀢𑁆𑀢𑀸 𑀪𑀽𑀥𑀸𑀢𑀼𑀲𑁆𑀲𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺. 𑀅𑀦𑀼𑀮𑁄𑀫 𑀧𑀝𑀺𑀮𑁄𑀫 𑀧𑀘𑁆𑀘𑀬𑀸𑀓𑀸𑀭 𑀧𑀝𑀺𑀯𑁂𑀥𑀲𑀸𑀥𑀓𑀸𑀢𑀺 𑀅𑀦𑀼𑀮𑁄𑀫𑀢𑁄 𑀘 𑀧𑀝𑀺𑀮𑁄𑀫𑀢𑁄 𑀘 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀲𑁆𑀲 𑀲𑀸𑀥𑀓𑀸. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀢𑀺 𑀩𑁄𑀥𑀺𑀬𑀸 𑀫𑀕𑁆𑀕𑀜𑀸𑀡𑀲𑁆𑀲 𑀧𑀓𑁆𑀔𑁂 𑀪𑀯𑀸 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸. 𑀅𑀣𑀯𑀸 𑀧𑀸𑀢𑀼𑀦𑀺𑀧𑀸𑀢𑁂𑀦 𑀲𑀳 ‘‘𑀪𑀯𑀦𑁆𑀢𑀻’’𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀓𑀸𑀲𑀦𑁆𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀦𑀬𑁂 𑀳𑀯𑁂𑀲𑀤𑁆𑀤𑁄 𑀏𑀓𑀁𑀲𑀢𑁆𑀣𑀯𑀸𑀘𑀓𑁄. 𑀳𑀯𑁂 𑀏𑀓𑀁𑀲𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀪𑀺𑀲𑀫𑀬𑀯𑀲𑁂𑀦𑀸𑀢𑀺 𑀫𑀕𑁆𑀕𑀜𑀸𑀡𑀯𑀲𑁂𑀦. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀬𑀲𑁆𑀫𑀸 𑀅𑀪𑀺𑀫𑀼𑀔𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀫𑁂𑀘𑁆𑀘 𑀅𑀬𑀢𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀪𑀺𑀲𑀫𑀬𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀺𑀮𑁂𑀲𑀲𑀦𑁆𑀢𑀸𑀧𑀦𑀝𑁆𑀞𑁂𑀦𑀸’’𑀢𑀺 𑀇𑀫𑀺𑀦𑀸 𑀆𑀪𑀼𑀲𑁄 𑀓𑀺𑀮𑁂𑀲𑁂 𑀢𑀸𑀧𑁂𑀢𑀻𑀢𑀺 𑀆𑀢𑀸𑀧𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦 𑀯𑀻𑀭𑀺𑀬𑀲𑀸𑀫𑀜𑁆𑀜𑀁 𑀳𑁄𑀢𑀺, 𑀅𑀣 𑀔𑁄 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀫𑁂𑀯𑀸𑀢𑀺 𑀆𑀳 ‘‘𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀯𑀢𑁄’’𑀢𑀺. 𑀇𑀫𑀺𑀦𑀸 𑀆𑀢𑀸𑀧𑀻𑀢𑀺 𑀏𑀢𑁆𑀣 𑀈𑀧𑀘𑁆𑀘𑀬𑀲𑁆𑀲 𑀯𑀦𑁆𑀢𑀼𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦 𑀘𑀸𑀢𑀺 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀦𑀲𑀪𑀸𑀯𑁂𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀛𑀸𑀦𑁂𑀦 𑀘. 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀦 𑀘𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀦𑀲𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑁂𑀦 𑀛𑀸𑀦𑁂𑀦 𑀘. ‘‘𑀩𑀸𑀳𑀺𑀢𑀧𑀸𑀧𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀩𑀸𑀳𑀺𑀢𑁄 𑀅𑀡𑁄 𑀧𑀸𑀧𑁄 𑀅𑀦𑁂𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀡𑀲𑀤𑁆𑀤𑁄 𑀳𑀺 𑀧𑀸𑀧𑀧𑀭𑀺𑀬𑀸𑀬𑁄. ‘‘𑀔𑀻𑀡𑀸𑀲𑀯𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀅𑀣𑀲𑁆𑀲𑀸𑀢𑀺 𑀅𑀣 𑀅𑀲𑁆𑀲, 𑀢𑀲𑁆𑀫𑀺𑀁 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀸 𑀏𑀢𑀸 𑀓𑀗𑁆𑀔𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑁄 𑀦𑀼 𑀔𑁄…𑀧𑁂… 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁧𑁨) 𑀦𑀬𑁂𑀦 𑀘 𑀢𑀣𑀸 ‘‘𑀓𑀢𑀫𑀁 𑀦𑀼 𑀔𑁄…𑀧𑁂… 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁩𑁫) 𑀦𑀬𑁂𑀦 𑀘 𑀧𑀘𑁆𑀘𑀬𑀸𑀓𑀸𑀭𑁂 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀅𑀬𑀼𑀢𑁆𑀢𑁄 𑀧𑀜𑁆𑀳𑁄, 𑀤𑀼𑀧𑁆𑀧𑀜𑁆𑀳𑁄 𑀏𑀲𑁄𑀢𑀺 𑀅𑀢𑁆𑀣𑁄. 𑀢𑀣𑀸𑀢𑀺 𑀏𑀯𑀁, 𑀢𑀢𑁄 𑀅𑀜𑁆𑀜𑀣𑀸 𑀯𑀸. 𑀬𑀸 𑀘 𑀲𑁄𑀴𑀲 𑀓𑀗𑁆𑀔𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀓𑀗𑁆𑀔𑀸𑀢𑀺 𑀬𑁄𑀚𑀦𑀸. 𑀲𑁄𑀴𑀲 𑀓𑀗𑁆𑀔𑀸𑀢𑀺 𑀅𑀢𑀻𑀢𑀯𑀺𑀲𑀬𑀸 𑀧𑀜𑁆𑀘, 𑀅𑀦𑀸𑀕𑀢𑀯𑀺𑀲𑀬𑀸 𑀧𑀜𑁆𑀘, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀸 𑀙𑀸𑀢𑀺 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸. 𑀯𑀧𑀬𑀦𑁆𑀢𑀻𑀢𑀺 𑀯𑀺 𑀅𑀧𑀬𑀦𑁆𑀢𑀺, 𑀇𑀓𑀸𑀭𑀮𑁄𑀧𑁂𑀦𑀸𑀬𑀁 𑀲𑀦𑁆𑀥𑀺. 𑀯𑀺𑀢𑁆𑀬𑀽𑀧𑀲𑀕𑁆𑀕𑁄 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑁄, 𑀅𑀧𑀬𑀦𑁆𑀢𑀺 𑁋 𑀲𑀤𑁆𑀤𑁄 𑀅𑀧𑀕𑀫𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀧𑀕𑀘𑁆𑀙𑀦𑁆𑀢𑀻’’𑀢𑀺. ‘‘𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺𑀇𑀫𑀺𑀦𑀸 𑀅𑀧𑀕𑀫𑀦𑀢𑁆𑀣𑀫𑁂𑀯 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀤𑀻𑀧𑁂𑀢𑀺. ‘‘𑀓𑀲𑁆𑀫𑀸’’𑀢𑀺 𑀇𑀫𑀺𑀦𑀸 ‘‘𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺 𑀯𑀸𑀓𑁆𑀬𑀲𑁆𑀲 𑀧𑀼𑀩𑁆𑀩𑀯𑀸𑀓𑁆𑀬𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀳𑁂𑀢𑀼𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀲𑀳 𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀦𑀸𑀢𑀺 𑀲𑀳𑁂𑀢𑀼, 𑀲𑀗𑁆𑀔𑀸𑀭𑀸𑀤𑀺𑀓𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄. 𑀲𑀳𑁂𑀢𑀼 𑀘 𑀲𑁄 𑀥𑀫𑁆𑀫𑁄 𑀘𑀸𑀢𑀺 𑀲𑀳𑁂𑀢𑀼𑀥𑀫𑁆𑀫𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀚𑁆𑀚𑀸𑀤𑀺𑀓𑁂𑀦𑀸’’𑀢𑀺𑀆𑀤𑀺. ‘‘𑀧𑀝𑀺𑀯𑀺𑀚𑁆𑀛𑀢𑀻’’𑀢𑀺 𑀇𑀫𑀺𑀦𑀸 𑀧𑀚𑀸𑀦𑀸 𑀢𑀻𑀢𑀺 𑀏𑀢𑁆𑀣 𑀜𑀸𑀥𑀸𑀢𑀼𑀬𑀸 𑀅𑀯𑀩𑁄𑀥𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀫𑀸𑀭𑀡𑀢𑁄𑀲𑀦𑀸𑀤𑀺𑀓𑁂 𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀇𑀢𑀻𑀢𑀺 𑀢𑀲𑁆𑀫𑀸, 𑀯𑀧𑀬𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁨. 𑀧𑀘𑁆𑀘𑀬𑀓𑁆𑀔𑀬𑀲𑁆𑀲𑀸𑀢𑀺 𑀧𑀘𑁆𑀘𑀬𑀸𑀦𑀁 𑀔𑀬𑀝𑁆𑀞𑀸𑀦𑀲𑁆𑀲 𑀅𑀲𑀗𑁆𑀔𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀤𑀼𑀢𑀺𑀬𑀉𑀤𑀸𑀦𑁂. 𑀔𑀻𑀬𑀦𑁆𑀢𑀺 𑀧𑀘𑁆𑀘𑀬𑀸 𑀏𑀢𑁆𑀣𑀸𑀢𑀺 𑀔𑀬𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 ‘‘𑀧𑀘𑁆𑀘𑀬𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. ‘‘𑀅𑀜𑁆𑀜𑀸𑀲𑀻’’𑀢𑀺 𑀇𑀫𑀺𑀦𑀸 𑀅𑀯𑁂𑀤𑀻𑀢𑀺 𑀏𑀢𑁆𑀣 𑀯𑀺𑀤𑀥𑀸𑀢𑀼𑀬𑀸 𑀜𑀸𑀡𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀅𑀦𑀼𑀪𑀯𑀦𑀮𑀸𑀪𑀸𑀤𑀺𑀓𑁂 𑀦𑀺𑀯𑀢𑁆𑀢𑁂𑀢𑀺. 𑀢𑀲𑁆𑀫𑀸 𑀯𑀧𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀢𑀺 𑀧𑀞𑀫𑀉𑀤𑀸𑀦𑁂 𑀯𑀼𑀢𑁆𑀢𑀲𑀤𑀺𑀲𑀸. 𑀥𑀫𑁆𑀫𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸, 𑀘𑀢𑀼𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑀸 𑀯𑀸.

𑁩. 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦 𑀫𑀕𑁆𑀕𑁂𑀦 𑀯𑀺𑀤𑀺𑀢𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀢𑀢𑀺𑀬𑀉𑀤𑀸𑀦𑁂. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀳𑀺 𑀉𑀧𑁆𑀧𑀦𑁆𑀦𑁂𑀳𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀳𑀺 𑀯𑀸 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘𑀢𑀼𑀲𑀘𑁆𑀘𑀥𑀫𑁆𑀫𑀸 𑀧𑀸𑀢𑀼𑀪𑀽𑀢𑀸, 𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀯𑀸 𑀯𑀺𑀥𑀽𑀧𑀬𑀦𑁆𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀫𑀸𑀭𑀲𑁂𑀦𑀦𑁆𑀢𑀺 𑀓𑀸𑀫𑀸𑀤𑀺𑀓𑀁 𑀤𑀲𑀯𑀺𑀥𑀁 𑀫𑀸𑀭𑀲𑁂𑀦𑀁. ‘‘𑀯𑀺𑀥𑀫𑁂𑀦𑁆𑀢𑁄’’𑀢𑀺𑀇𑀫𑀺𑀦𑀸 𑀯𑀺𑀥𑀽𑀧𑀬𑀦𑁆𑀢𑀺 𑀏𑀢𑁆𑀣 𑀥𑀽𑀧𑀥𑀸𑀢𑀼𑀬𑀸 𑀯𑀺𑀥𑀫𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀮𑀺𑀫𑁆𑀧𑀦𑀢𑁆𑀣𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. ‘‘𑀯𑀺𑀤𑁆𑀥𑀁 𑀲𑁂𑀦𑁆𑀢𑁄’’𑀢𑀺𑀇𑀫𑀺𑀦𑀸 𑀯𑀺𑀥𑀫𑁂𑀦𑁆𑀢𑁄𑀢𑀺 𑀏𑀢𑁆𑀣 𑀥𑀫𑀼𑀥𑀸𑀢𑀼𑀬𑀸 𑀥𑀁𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀢𑁆𑀣𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. ‘‘𑀲𑀽𑀭𑀺𑀬𑁄𑀯 𑀑𑀪𑀸𑀲𑀬’’𑀦𑁆𑀢𑀺𑀧𑀤𑀲𑁆𑀲 ‘‘𑀲𑀽𑀭𑀺𑀬𑁄 𑀇𑀯𑀸’’𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀲𑀽𑀭𑀺𑀬𑁄𑀢𑀺 𑀆𑀤𑀺𑀘𑁆𑀘𑁄. 𑀲𑁄 𑀳𑀺 𑀬𑀲𑁆𑀫𑀸 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀲𑀽𑀭𑀁 𑀚𑀦𑁂𑀢𑀺, 𑀢𑀲𑁆𑀫𑀸 𑀲𑀽𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀅𑀪𑀺𑀫𑀼𑀔𑀁 𑀉𑀤𑁆𑀥𑀁 𑀆𑀓𑀸𑀲𑀁 𑀕𑀢𑁄, 𑀅𑀩𑁆𑀪𑀁 𑀯𑀸 𑀆𑀓𑀸𑀲𑀁 𑀉𑀕𑁆𑀕𑀢𑁄. 𑀅𑀩𑁆𑀪𑀲𑀤𑁆𑀤𑁄 𑀳𑀺 𑀆𑀓𑀸𑀲𑀧𑀭𑀺𑀬𑀸𑀬𑁄. 𑀆𑀓𑀸𑀲𑁄 𑀳𑀺 𑀬𑀲𑁆𑀫𑀸 𑀆𑀪𑀼𑀲𑁄 𑀪𑀸𑀢𑀺 𑀤𑀺𑀧𑁆𑀧𑀢𑀺, 𑀢𑀲𑁆𑀫𑀸 ‘‘𑀅𑀩𑁆𑀪’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀲𑀽𑀭𑀺𑀬𑁄 𑀑𑀪𑀸𑀲𑀬𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. 𑀬𑀣𑀸 𑀲𑀽𑀭𑀺𑀬𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀩𑁆𑀭𑀸𑀳𑁆𑀫𑀡𑁄 𑀫𑀸𑀭𑀲𑁂𑀦𑀫𑁆𑀧𑀺 𑀯𑀺𑀥𑀽𑀧𑀬𑀦𑁆𑀢𑁄𑀢𑀺.

𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀉𑀤𑀸𑀦𑁂𑀲𑀼. 𑀧𑀞𑀫𑀁 𑀉𑀤𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀲𑁆𑀲𑀸 𑀔𑀦𑁆𑀥𑀓𑀧𑀸𑀴𑀺𑀬𑀸 𑀉𑀤𑀸𑀦𑀧𑀸𑀴𑀺𑀁 𑀲𑀁𑀲𑀦𑁆𑀤𑀦𑁆𑀢𑁄 𑀆𑀳 ‘‘𑀉𑀤𑀸𑀦𑁂 𑀧𑀦𑀸’’𑀢𑀺𑀆𑀤𑀺. 𑀉𑀤𑀸𑀦𑁂 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀉𑀤𑀸𑀦𑁂 𑀯𑀼𑀢𑁆𑀢𑀯𑀘𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁆𑀘𑀬𑁂𑀦𑀸𑀢𑀺 𑀅𑀢𑀺𑀓𑁆𑀓𑀫𑁂𑀦, 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀢𑀤𑀸 𑀳𑀻’’𑀢𑀺𑀆𑀤𑀺. 𑀢𑀤𑀸𑀢𑀺 ‘‘𑀲𑁆𑀯𑁂 𑀆𑀲𑀦𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀁 𑀉𑀧𑁆𑀧𑀸𑀤𑀺𑀢𑀫𑀦𑀲𑀺𑀓𑀸𑀭𑀓𑀸𑀮𑁂. 𑀪𑀕𑀯𑀸 𑀫𑀦𑀲𑀸𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀸 𑀤𑁆𑀯𑁂 𑀉𑀤𑀸𑀦𑀕𑀸𑀣𑀸 𑀆𑀦𑀼𑀪𑀸𑀯𑀤𑀻𑀧𑀺𑀓𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀧𑀘𑁆𑀘𑀬𑀸𑀓𑀸𑀭𑀧𑀚𑀸𑀦𑀦𑀧𑀘𑁆𑀘𑀬𑀓𑁆𑀔𑀬𑀸𑀥𑀺𑀕𑀫𑀲𑁆𑀲. 𑀏𑀓𑁂𑀓𑀫𑁂𑀯𑀸𑀢𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑁂𑀲𑀼 𑀏𑀓𑁂𑀓𑀫𑁂𑀯. 𑀧𑀞𑀫𑀬𑀸𑀫𑀜𑁆𑀘𑀸𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁, 𑀦𑀺𑀭𑀦𑁆𑀢𑀭𑀁 𑀧𑀞𑀫𑀬𑀸𑀫𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑁂 𑀧𑀦. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀪𑀕𑀯𑀸 𑀉𑀤𑀸𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀸𑀢𑀺 𑀯𑀺𑀲𑀸𑀔𑀸𑀬 𑀬𑀼𑀢𑁆𑀢𑀸𑀬 𑀧𑀼𑀡𑁆𑀡𑀫𑀸𑀬. ‘‘𑀅𑀭𑀼𑀡𑁄 𑀉𑀕𑁆𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀲𑀫𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀜𑁆𑀜𑀼𑀢𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀪𑀸𑀯𑀁, 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑀢𑁄. 𑀢𑀁 𑀤𑀺𑀯𑀲𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀳𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸, 𑀢𑀁 𑀤𑀺𑀯𑀲𑀁 𑀓𑀸𑀮𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀬𑀣𑀸 𑀢𑀁 𑀤𑀺𑀯𑀲𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺, 𑀏𑀯𑀁 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀏𑀯𑀁. ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂…𑀧𑁂… 𑀦𑀺𑀲𑀻𑀤𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀢𑀁 𑀲𑀢𑁆𑀢𑀸𑀳𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂𑀬𑁂𑀯.

𑁨. 𑀅𑀚𑀧𑀸𑀮𑀓𑀣𑀸

𑁪. 𑀦 𑀪𑀕𑀯𑀸𑀢𑀺 𑀏𑀢𑁆𑀣 𑀦𑀓𑀸𑀭𑁄 ‘‘𑀉𑀧𑀲𑀗𑁆𑀓𑀫𑀻’’𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄, 𑀦 𑀉𑀧𑀲𑀗𑁆𑀔𑀫𑀻𑀢𑀺 𑀳𑀺 𑀅𑀢𑁆𑀣𑁄. 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸𑀢𑀺 𑀢𑀢𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀥𑀺𑀢𑁄. 𑀅𑀦𑀦𑁆𑀢𑀭𑀫𑁂𑀯 𑀅𑀦𑀼𑀧𑀲𑀗𑁆𑀓𑀫𑀦𑀁 𑀉𑀧𑀫𑀸𑀬 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺. 𑀇𑀘𑁆𑀘𑁂𑀯𑀁 𑀯𑀼𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀦𑁆𑀢𑀺 𑀇𑀤𑀁 𑀅𑀢𑁆𑀣𑀚𑀸𑀢𑀁. 𑀏𑀢𑁆𑀣𑀸𑀢𑀺 ‘‘𑀪𑀼𑀢𑁆𑀯𑀸 𑀲𑀬𑀢𑀻’’𑀢𑀺 𑀯𑀸𑀓𑁆𑀬𑁂. 𑀏𑀯𑀦𑁆𑀢𑀺 𑀉𑀧𑀫𑁂𑀬𑁆𑀬𑀚𑁄𑀢𑀓𑁄. 𑀇𑀥𑀸𑀧𑀻𑀢𑀺 𑀇𑀫𑀺𑀲𑁆𑀲𑀁 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺𑀧𑀸𑀴𑀺𑀬𑀫𑁆𑀧𑀺. 𑀇𑀤𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺𑀧𑀸𑀞𑁂.

𑀅𑀧𑀭𑀸𑀦𑀺𑀧𑀻𑀢𑀺 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀢𑁄 𑀅𑀜𑁆𑀜𑀸𑀦𑀺𑀧𑀺. 𑀢𑀢𑁆𑀭𑀸𑀢𑀺 ‘‘𑀅𑀧𑀭𑀸𑀦𑀺𑀧𑀻’’𑀢𑀺𑀆𑀤𑀺𑀯𑀘𑀦𑁂. 𑀪𑀕𑀯𑀢𑀺 𑀦𑀺𑀲𑀺𑀦𑁆𑀦𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀓𑀺𑀭𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀓𑀺𑀁 𑀦𑀼 𑀔𑁄𑀢𑀺 𑀧𑀭𑀺𑀯𑀺𑀢𑀓𑁆𑀓𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀏𑀓𑀘𑁆𑀘𑀸𑀦𑀦𑁆𑀢𑀺 𑀅𑀧𑁆𑀧𑁂𑀲𑀓𑁆𑀔𑀸𑀦𑀁 𑀏𑀓𑀘𑁆𑀘𑀸𑀦𑀁. 𑀢𑀸𑀲𑀦𑁆𑀢𑀺 𑀤𑁂𑀯𑀢𑀸𑀦𑀁. 𑀩𑀮𑀸𑀥𑀺𑀕𑀫𑀝𑁆𑀞𑀸𑀦𑀦𑁆𑀢𑀺 𑀩𑀮𑁂𑀦 𑀢𑁂𑀚𑀲𑀸 𑀅𑀥𑀺𑀕𑀫𑀝𑁆𑀞𑀸𑀦𑀁. 𑀅𑀦𑀺𑀫𑀺𑀲𑁂𑀳𑀻𑀢𑀺 𑀉𑀫𑁆𑀫𑀺𑀲𑁂𑀳𑀺. 𑀲𑀢𑁆𑀢𑀸𑀳𑀦𑁆𑀢𑀺 𑀓𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸. 𑀏𑀯𑀜𑁆𑀳𑀺 𑀲𑀢𑀺 ‘‘𑀓𑀸𑀮’’𑀦𑁆𑀢𑀺 𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀞𑀸𑀦𑀦𑁆𑀢𑀺 𑀅𑀦𑀺𑀫𑀺𑀲𑁂𑀳𑀺 𑀅𑀓𑁆𑀔𑀻𑀳𑀺 𑀑𑀮𑁄𑀓𑀺𑀬𑀫𑀸𑀦𑀝𑁆𑀞𑀸𑀦𑀁. 𑀅𑀣𑀸𑀢𑀺 𑀅𑀦𑀺𑀫𑀺𑀲𑀲𑀢𑁆𑀢𑀸𑀳𑀲𑁆𑀲 𑀅𑀦𑀦𑁆𑀢𑀭𑁂. 𑀭𑀢𑀦𑀘𑀗𑁆𑀓𑀫𑁂𑀢𑀺 𑀭𑀢𑀦𑀫𑀬𑁂 𑀘𑀗𑁆𑀓𑀫𑁂. 𑀢𑀁 𑀞𑀸𑀦𑀦𑁆𑀢𑀺 𑀘𑀗𑁆𑀓𑀫𑀝𑁆𑀞𑀸𑀦𑀁. 𑀢𑀢𑁄𑀢𑀺 𑀘𑀗𑁆𑀓𑀫𑀲𑀢𑁆𑀢𑀸𑀳𑀢𑁄. 𑀭𑀢𑀦𑀖𑀭𑀦𑁆𑀢𑀺 𑀭𑀢𑀦𑀫𑀬𑀁 𑀕𑁂𑀳𑀁. 𑀢𑀢𑁆𑀣𑀸𑀢𑀺 𑀭𑀢𑀦𑀖𑀭𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀘𑀺𑀦𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀭𑀢𑀦𑀖𑀭𑁂, 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀯𑀸, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀢𑀁 𑀞𑀸𑀦𑀦𑁆𑀢𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀯𑀺𑀘𑀺𑀦𑀦𑀝𑁆𑀞𑀸𑀦𑀁.

𑀏𑀯𑀦𑁆𑀢𑀺𑀆𑀤𑀺 𑀧𑀼𑀩𑁆𑀩𑀯𑀘𑀦𑀲𑁆𑀲 𑀦𑀺𑀕𑀫𑀯𑀲𑁂𑀦 𑀧𑀘𑁆𑀙𑀺𑀫𑀯𑀘𑀦𑀲𑁆𑀲 𑀅𑀦𑀼𑀲𑀦𑁆𑀥𑀺𑀦𑀺𑀤𑀲𑁆𑀲𑀦𑀁. 𑀢𑁂𑀦𑀸𑀢𑀺 𑀅𑀚𑀧𑀸𑀮𑀸𑀦𑀁 𑀦𑀺𑀲𑀻𑀤𑀦𑀓𑀸𑀭𑀡𑁂𑀦. 𑀅𑀲𑁆𑀲𑀸𑀢𑀺 𑀦𑀺𑀕𑁆𑀭𑁄𑀥𑀲𑁆𑀲. ‘‘𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄𑀢𑁆𑀯𑁂𑀯 𑀦𑀸𑀫’’𑀦𑁆𑀢𑀺 𑀇𑀫𑀺𑀦𑀸 𑀉𑀧𑀘𑀸𑀭𑀯𑀲𑁂𑀦 𑀦𑀸𑀫𑀮𑀪𑀦𑀁 𑀤𑀲𑁆𑀲𑁂𑀢𑀺. 𑀅𑀚𑀧𑀸 𑀩𑁆𑀭𑀸𑀳𑁆𑀫𑀡𑀸 𑀮𑀦𑁆𑀢𑀺 𑀦𑀺𑀯𑀸𑀲𑀁 𑀕𑀡𑁆𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀚𑀧𑀸𑀮𑁄, 𑀉𑀡𑁆𑀳𑀓𑀸𑀮𑁂 𑀯𑀸 𑀅𑀦𑁆𑀢𑁄𑀧𑀯𑀺𑀝𑁆𑀞𑁂 𑀅𑀚𑁂 𑀅𑀢𑁆𑀢𑀦𑁄 𑀙𑀸𑀬𑀸𑀬 𑀧𑀸𑀮𑁂𑀢𑀻𑀢𑀺 𑀅𑀚𑀧𑀸𑀮𑁄, 𑀅𑀚𑀧𑀸𑀮𑁄 𑀘 𑀲𑁄 𑀦𑀺𑀕𑁆𑀭𑁄𑀥𑁄 𑀘𑁂𑀢𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄𑀢𑀺 𑀯𑀘𑀦𑀢𑁆𑀣𑀸𑀦𑀺𑀧𑀺 𑀧𑀓𑀭𑀡𑀦𑁆𑀢𑀭𑁂𑀲𑀼 (𑀉𑀤𑀸. 𑀅𑀝𑁆𑀞. 𑁪) 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀭𑀸𑀧𑀻𑀢𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂𑀧𑀺. 𑀩𑁄𑀥𑀺𑀢𑁄𑀢𑀺 𑀩𑁄𑀥𑀺𑀭𑀼𑀓𑁆𑀔𑀢𑁄. 𑀏𑀢𑁆𑀣𑀸𑀢𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂. 𑀪𑀕𑀯𑀢𑀺 𑀦𑀺𑀲𑀺𑀦𑁆𑀦𑁂𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 ‘‘𑀅𑀣 𑀔𑁄 𑀅𑀜𑁆𑀜𑀢𑀭𑁄’’𑀢𑀺𑀆𑀤𑀺𑀯𑀘𑀦𑁂. 𑀲𑁄𑀢𑀺 𑀩𑁆𑀭𑀸𑀳𑁆𑀫𑀡𑁄. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀦𑀸𑀫𑀸𑀢𑀺 𑀤𑀺𑀝𑁆𑀞𑀲𑀼𑀢𑀫𑀼𑀢𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀫𑀗𑁆𑀕𑀮𑀺𑀓𑁂𑀲𑀼 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁄 𑀦𑀸𑀫 𑀓𑀺𑀭𑀸𑀢𑀺 𑀅𑀢𑁆𑀣𑁄. ‘‘𑀫𑀸𑀦𑀯𑀲𑁂𑀦…𑀧𑁂… 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 ‘‘𑀳𑀼𑀁𑀳𑀼’’𑀦𑁆𑀢𑀺 𑀓𑀭𑁄𑀢𑀻𑀢𑀺 𑀳𑀼𑀁𑀳𑀼𑀗𑁆𑀓𑁄, 𑀳𑀼𑀁𑀳𑀼𑀗𑁆𑀓𑁄 𑀚𑀸𑀢𑀺 𑀲𑀪𑀸𑀯𑁄 𑀇𑀫𑀲𑁆𑀲𑀸𑀢𑀺 𑀳𑀼𑀁𑀳𑀼𑀗𑁆𑀓𑀚𑀸𑀢𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀢𑁂𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑁂𑀦. 𑀲𑀺𑀔𑀸𑀧𑁆𑀧𑀢𑁆𑀢𑀦𑁆𑀢𑀺 𑀅𑀕𑁆𑀕𑀧𑁆𑀧𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀉𑀤𑀸𑀦𑀲𑁆𑀲. 𑀬𑁄𑀢𑀺 𑀧𑀼𑀕𑁆𑀕𑀮𑁄, 𑀧𑀝𑀺𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺. ‘‘𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀩𑀸𑀳𑀺𑀢𑁄 𑀧𑀸𑀧𑁄 𑀥𑀫𑁆𑀫𑁄 𑀅𑀦𑁂𑀦𑀸𑀢𑀺 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀳𑀼𑀁𑀳𑀼𑀗𑁆𑀓𑀸𑀭𑀧𑀳𑀸𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀦𑀢𑁆𑀣𑀺 𑀳𑀼𑀁𑀳𑀼𑀗𑁆𑀓𑀸𑀭𑁄 𑀇𑀫𑀲𑁆𑀲𑀸𑀢𑀺 𑀦𑀺𑀳𑀼𑀁𑀳𑀼𑀗𑁆𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀭𑀸𑀕𑀸𑀤𑀺𑀓𑀲𑀸𑀯𑀸𑀪𑀸𑀯𑁂𑀦𑀸𑀢𑀺 𑀇𑀫𑀺𑀦𑀸 𑀦𑀢𑁆𑀣𑀺 𑀭𑀸𑀕𑀸𑀤𑀺𑀓𑀲𑀸𑀯𑁄 𑀇𑀫𑀲𑁆𑀲𑀸𑀢𑀺 𑀦𑀺𑀓𑁆𑀓𑀲𑀸𑀯𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀪𑀸𑀯𑀦𑀸𑀦𑀼𑀬𑁄𑀕𑀬𑀼𑀢𑁆𑀢𑀘𑀺𑀢𑁆𑀢𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀬𑀢𑀁 𑀅𑀦𑀼𑀬𑀼𑀢𑁆𑀢𑀁 𑀅𑀢𑁆𑀢𑀁 𑀘𑀺𑀢𑁆𑀢𑀁 𑀇𑀫𑀲𑁆𑀲𑀸𑀢𑀺 𑀬𑀢𑀢𑁆𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀳𑀺 𑀬𑀢𑀲𑀤𑁆𑀤𑁄 𑀯𑀻𑀭𑀺𑀬𑀯𑀸𑀘𑀓𑁄, 𑀬𑀢𑀥𑀸𑀢𑀼𑀬𑀸 𑀦𑀺𑀧𑁆𑀨𑀦𑁆𑀦𑁄, 𑀅𑀢𑁆𑀢𑀲𑀤𑁆𑀤𑁄 𑀘𑀺𑀢𑁆𑀢𑀧𑀭𑀺𑀬𑀸𑀬𑁄. 𑀬𑀢𑀲𑀤𑁆𑀤𑀲𑁆𑀲 𑀬𑀫𑀼𑀥𑀸𑀢𑀼𑀬𑀸 𑀘 𑀦𑀺𑀧𑁆𑀨𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀻𑀮𑀲𑀁𑀯𑀭𑁂𑀦 𑀯𑀸’’𑀢𑀺𑀆𑀤𑀺. ‘‘𑀲𑀜𑁆𑀜𑀢𑀘𑀺𑀢𑁆𑀢𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀬𑀫𑀢𑀺 𑀲𑀁𑀬𑀫𑀢𑀻𑀢𑀺 𑀬𑀢𑀁, 𑀬𑀢𑀁 𑀅𑀢𑁆𑀢𑀁 𑀘𑀺𑀢𑁆𑀢𑀁 𑀇𑀫𑀲𑁆𑀲𑀸𑀢𑀺 𑀬𑀢𑀢𑁆𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀘𑁆𑀘𑀸𑀦𑀺 𑀯𑀺𑀤𑀦𑁆𑀢𑀺 𑀚𑀸𑀦𑀦𑁆𑀢𑀻𑀢𑀺 𑀯𑁂𑀤𑀸𑀦𑀻𑀢𑀺 𑀯𑀘𑀦𑀢𑁆𑀣𑁂𑀦 𑀫𑀕𑁆𑀕𑀜𑀸𑀡𑀸𑀦𑀺 𑀯𑁂𑀤𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀳𑀺 𑀯𑁂𑀤𑁂𑀳𑀻’’𑀢𑀺. ‘‘𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀸𑀦’’𑀦𑁆𑀢𑀺 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 ‘‘𑀯𑁂𑀤𑀸𑀦’’𑀦𑁆𑀢𑀺𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀅𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀬𑀲𑁆𑀫𑀸 𑀲𑀗𑁆𑀔𑀸𑀭𑀸𑀦𑀁 𑀅𑀯𑀲𑀸𑀦𑁂 𑀚𑀸𑀢𑀁, 𑀢𑀲𑁆𑀫𑀸 𑀅𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀦 𑀅𑀦𑁆𑀢𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀢𑀜𑁆𑀳𑀺 𑀬𑀲𑁆𑀫𑀸 𑀫𑀕𑁆𑀕𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀧𑀯𑀢𑁆𑀢𑀁, 𑀢𑀲𑁆𑀫𑀸 𑀅𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀼𑀲𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀯𑀼𑀲𑀺𑀢𑀁 𑀫𑀕𑁆𑀕𑀲𑀗𑁆𑀔𑀸𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀦𑁂𑀦𑀸𑀢𑀺 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀦 𑀩𑁆𑀭𑀳𑁆𑀫𑀯𑀸𑀤𑀁 𑀯𑀤𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑁆𑀭𑀸𑀳𑁆𑀫𑀡𑁄 𑀅𑀳𑀦𑁆𑀢𑀺 𑀏𑀢𑀁 𑀯𑀸𑀤𑀁 𑀥𑀫𑁆𑀫𑁂𑀦 𑀯𑀤𑁂𑀬𑁆𑀬𑀸’’𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀪𑀽𑀢𑁂𑀦 𑀲𑀪𑀸𑀯𑁂𑀦. 𑀮𑁄𑀓𑁂𑀢𑀺 𑀏𑀢𑁆𑀣 𑀲𑀢𑁆𑀢𑀮𑁄𑀓𑁄𑀯𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑀓𑀮𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂’’𑀢𑀺.

𑁩. 𑀫𑀼𑀘𑀮𑀺𑀦𑁆𑀤𑀓𑀣𑀸

𑁫. 𑀅𑀓𑀸𑀮𑀫𑁂𑀖𑁄𑀢𑀺 𑀏𑀢𑁆𑀣 𑀯𑀧𑁆𑀧𑀸𑀤𑀺𑀓𑀸𑀮𑀲𑁆𑀲 𑀅𑀪𑀸𑀯𑀸 𑀦 𑀅𑀓𑀸𑀮𑁄 𑀳𑁄𑀢𑀺, 𑀅𑀣 𑀔𑁄 𑀯𑀲𑁆𑀲𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑀢𑁆𑀢𑀸 𑀅𑀓𑀸𑀮𑁄𑀢𑀺 𑀆𑀳 ‘‘𑀅𑀲𑀫𑁆𑀧𑀢𑁆𑀢𑁂 𑀯𑀲𑁆𑀲𑀓𑀸𑀮𑁂’’𑀢𑀺. ‘‘𑀉𑀧𑁆𑀧𑀦𑁆𑀦𑀫𑁂𑀖𑁄’’𑀢𑀺 𑀇𑀫𑀺𑀦𑀸 𑀅𑀓𑀸𑀮𑁂 𑀉𑀧𑁆𑀧𑀦𑁆𑀦𑁄 𑀫𑁂𑀖𑁄 𑀅𑀓𑀸𑀮𑀫𑁂𑀖𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂𑀢𑀺 𑀚𑁂𑀝𑁆𑀞𑀫𑀽𑀮𑀫𑀸𑀲𑁂. 𑀢𑀲𑁆𑀫𑀺𑀦𑁆𑀢𑀺 𑀫𑁂𑀖𑁂. 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻𑀢𑀺 𑀏𑀢𑁆𑀣 𑀲𑀻𑀢𑁂𑀦 𑀯𑀸𑀢𑁂𑀦 𑀤𑀽𑀲𑀺𑀢𑀁 𑀤𑀺𑀦𑀁 𑀇𑀫𑀺𑀲𑁆𑀲𑀸 𑀯𑀝𑁆𑀝𑀮𑀺𑀓𑀸𑀬𑀸𑀢𑀺 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸 𑀘 𑀧𑀦𑀸’’𑀢𑀺𑀆𑀤𑀺. 𑀲𑀸 𑀘 𑀧𑀦 𑀲𑀢𑁆𑀢𑀸𑀳𑀯𑀝𑁆𑀝𑀮𑀺𑀓𑀸 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻 𑀦𑀸𑀫 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀫𑀻𑀧𑁂 𑀧𑁄𑀓𑁆𑀔𑀭𑀡𑀺𑀬𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀫𑀼𑀘𑀮𑀺𑀦𑁆𑀤𑀲𑁆𑀲 𑀲𑀫𑀻𑀧𑁂 𑀦𑀺𑀩𑁆𑀩𑀢𑁆𑀢𑁄 𑀫𑀼𑀘𑀮𑀺𑀦𑁆𑀤𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀼𑀘𑀮𑀺𑀦𑁆𑀤𑁄𑀢𑀺 𑀘 𑀦𑀺𑀘𑀼𑀮𑁄. 𑀲𑁄 𑀦𑀻𑀧𑁄𑀢𑀺 𑀘 𑀧𑀺𑀬𑀓𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀦𑀸𑀕𑀲𑁆𑀲 𑀪𑁄𑀕𑁄 𑀏𑀓𑁄𑀧𑀺 𑀲𑀢𑁆𑀢𑀸𑀪𑀼𑀚𑀢𑁆𑀢𑀸 ‘‘𑀪𑁄𑀕𑁂𑀳𑀻’’𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀦𑁆𑀢𑀺 𑀦𑀸𑀕𑀭𑀸𑀚𑁂 𑀞𑀺𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀦𑀸𑀕𑀭𑀸𑀚𑀲𑁆𑀲. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀪𑀡𑁆𑀟𑀸𑀕𑀸𑀭𑀕𑀩𑁆𑀪𑀧𑀫𑀸𑀡𑀁 𑀅𑀳𑁄𑀲𑀺, 𑀢𑀲𑁆𑀫𑀸. 𑀞𑀸𑀦𑀲𑁆𑀲 𑀓𑀸𑀭𑀡𑀁 𑀧𑀭𑀺𑀤𑀻𑀧𑁂𑀢𑀺 𑀅𑀦𑁂𑀦𑀸𑀢𑀺 𑀞𑀸𑀦𑀓𑀸𑀭𑀡𑀧𑀭𑀺𑀤𑀻𑀧𑀦𑀁 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁. 𑀲𑁄𑀢𑀺 𑀦𑀸𑀕𑀭𑀸𑀚𑀸. 𑀳𑀻𑀢𑀺 𑀲𑀘𑁆𑀘𑀁. 𑀧𑀸𑀴𑀺𑀬𑀁 ‘‘𑀩𑀸𑀥𑀬𑀺𑀢𑁆𑀣𑀸’’𑀢𑀺 𑀓𑀺𑀭𑀺𑀬𑀸𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀫𑀸 𑀲𑀻𑀢𑀁 𑀪𑀕𑀯𑀦𑁆𑀢𑀁 𑀩𑀸𑀥𑀬𑀺𑀢𑁆𑀣𑀸’’𑀢𑀺. 𑀢𑀢𑁆𑀣𑀸𑀢𑀺 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢’’𑀦𑁆𑀢𑀺𑀆𑀤𑀺𑀯𑀘𑀦𑁂. 𑀲𑀢𑁆𑀢𑀸𑀳𑀯𑀝𑁆𑀝𑀮𑀺𑀓𑀸𑀬 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁆𑀧𑀻𑀢𑀺 𑀉𑀡𑁆𑀳𑀫𑁆𑀧𑀺. 𑀦𑀦𑁆𑀢𑀺 𑀪𑀕𑀯𑀦𑁆𑀢𑀁. 𑀢𑀲𑁆𑀲𑀸𑀢𑀺 𑀦𑀸𑀕𑀭𑀸𑀚𑀲𑁆𑀲. 𑀉𑀩𑁆𑀩𑀺𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀙𑀺𑀤𑁆𑀤𑀁. 𑀯𑀺𑀤𑁆𑀥𑀙𑀺𑀤𑁆𑀤𑀲𑀤𑁆𑀤𑀸 𑀳𑀺 𑀧𑀭𑀺𑀬𑀸𑀬𑀸. 𑀆𑀓𑀸𑀲𑀁 𑀫𑁂𑀖𑀧𑀝𑀮𑀧𑀝𑀺𑀘𑁆𑀙𑀦𑁆𑀦𑀁 𑀆𑀲𑀦𑁆𑀦𑀁 𑀯𑀺𑀬 𑀳𑁄𑀢𑀺, 𑀫𑁂𑀖𑀧𑀝𑀮𑀯𑀺𑀕𑀫𑁂 𑀤𑀽𑀭𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀖𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢’’𑀦𑁆𑀢𑀺. 𑀯𑀺𑀕𑀢𑀯𑀮𑀸𑀳𑀓𑀦𑁆𑀢𑀺 𑀏𑀢𑁆𑀣 𑀯𑀺𑀕𑀢𑀲𑀤𑁆𑀤𑁄 𑀅𑀧𑀕𑀢𑀢𑁆𑀣𑀯𑀸𑀘𑀓𑁄, 𑀯𑀮𑀸𑀳𑀓𑀲𑀤𑁆𑀤𑁄 𑀫𑁂𑀖𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀧𑀕𑀢𑀫𑁂𑀖’’𑀦𑁆𑀢𑀺. 𑀇𑀦𑁆𑀤𑀦𑀻𑀮𑀫𑀡𑀺 𑀯𑀺𑀬 𑀤𑀺𑀩𑁆𑀩𑀢𑀻𑀢𑀺 𑀤𑁂𑀯𑁄𑀢𑀺 𑀯𑀘𑀦𑀢𑁆𑀣𑁂𑀦 𑀆𑀓𑀸𑀲𑁄 𑀤𑁂𑀯𑁄 𑀦𑀸𑀫𑀸𑀢𑀺 𑀆𑀳 ‘‘𑀤𑁂𑀯𑀦𑁆𑀢𑀺 𑀆𑀓𑀸𑀲’’𑀦𑁆𑀢𑀺. 𑀅𑀢𑁆𑀢𑀦𑁄 𑀭𑀽𑀧𑀦𑁆𑀢𑀺 𑀅𑀢𑁆𑀢𑀦𑁄 𑀦𑀸𑀕𑀲𑀡𑁆𑀞𑀸𑀦𑀁. 𑀇𑀫𑀺𑀦𑀸 𑀲𑀓𑀯𑀡𑁆𑀡𑀦𑁆𑀢𑀺 𑀏𑀢𑁆𑀣 𑀲𑀓𑀲𑀤𑁆𑀤𑁄 𑀅𑀢𑁆𑀢𑀯𑀸𑀘𑀓𑁄, 𑀯𑀡𑁆𑀡𑀲𑀤𑁆𑀤𑁄 𑀲𑀡𑁆𑀞𑀸𑀦𑀯𑁂𑀯𑀘𑀦𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀼𑀔𑁄 𑀯𑀺𑀯𑁂𑀓𑁄𑀢𑀺 𑀏𑀢𑁆𑀣 𑀢𑀤𑀗𑁆𑀕 𑀯𑀺𑀓𑁆𑀔𑀫𑁆𑀪𑀦 𑀲𑀫𑀼𑀘𑁆𑀙𑁂𑀤 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀲𑀗𑁆𑀔𑀸𑀢𑁂𑀲𑀼 𑀧𑀜𑁆𑀘𑀲𑀼 𑀯𑀺𑀯𑁂𑀓𑁂𑀲𑀼 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄 𑀘 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀯𑀺𑀯𑁂𑀓𑁂𑀲𑀼 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀉𑀧𑀥𑀺𑀯𑀺𑀯𑁂𑀓𑁄’’𑀢𑀺. ‘‘𑀘𑀢𑀼𑀫𑀕𑁆𑀕𑀜𑀸𑀡𑀲𑀦𑁆𑀢𑁄𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀼𑀝𑁆𑀞𑀲𑁆𑀲𑀸𑀢𑀺 𑀏𑀢𑁆𑀣 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀸𑀤𑀺𑀓𑁂 𑀦𑀺𑀯𑀢𑁆𑀢𑁂𑀢𑀺. 𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑁆𑀣 𑀲𑀼𑀢𑀲𑀤𑁆𑀤𑁄 𑀯𑀺𑀲𑁆𑀲𑀼𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀓𑀸𑀲𑀺𑀢𑀥𑀫𑁆𑀫𑀲𑁆𑀲𑀸’’𑀢𑀺, 𑀧𑀸𑀓𑀝𑀲𑀘𑁆𑀘𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀢𑁄𑀢𑀺 𑀏𑀢𑁆𑀣 𑀫𑀁𑀲𑀘𑀓𑁆𑀔𑀼𑀲𑁆𑀲 𑀓𑀭𑀡𑀪𑀸𑀯𑁂𑀦 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀜𑀸𑀡𑀘𑀓𑁆𑀔𑀼𑀦𑀸’’𑀢𑀺. ‘‘𑀅𑀓𑀼𑀧𑁆𑀧𑀦𑀪𑀸𑀯𑁄’’𑀢𑀺 𑀇𑀫𑀺𑀦𑀸 𑀅𑀩𑁆𑀬𑀸𑀧𑀚𑁆𑀚𑀦𑁆𑀢𑀺 𑀏𑀢𑁆𑀣 𑀩𑁆𑀬𑀸𑀧𑀸𑀤𑀲𑀤𑁆𑀤𑀲𑁆𑀲 𑀤𑁄𑀲𑀯𑀸𑀘𑀓𑀪𑀸𑀯𑁄 𑀘 𑀡𑁆𑀬𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑁄 𑀘 𑀤𑀲𑁆𑀲𑀺𑀢𑁄. 𑀏𑀢𑁂𑀦𑀸𑀢𑀺 ‘‘𑀅𑀩𑁆𑀬𑀸𑀧𑀚𑁆𑀚’’𑀦𑁆𑀢𑀺𑀧𑀤𑁂𑀦. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀅𑀩𑁆𑀬𑀸𑀧𑀚𑁆𑀚𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀫𑁂𑀢𑁆𑀢𑀸𑀬 𑀉𑀧𑁆𑀧𑀦𑁆𑀦𑀪𑀸𑀯𑁄. 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄𑀢𑀺 𑀏𑀢𑁆𑀣 𑀧𑀸𑀡𑀪𑀽𑀢𑀲𑀤𑁆𑀤𑀸 𑀯𑁂𑀯𑀘𑀦𑀪𑀸𑀯𑁂𑀦 𑀲𑀢𑁆𑀢𑁂𑀲𑀼 𑀏𑀯 𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀲𑀢𑁆𑀢𑁂𑀲𑀼 𑀘𑀸’’𑀢𑀺. 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀢𑀺 𑀲𑀁𑀬𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀓𑀭𑀼𑀡𑀸𑀬 𑀉𑀧𑁆𑀧𑀦𑁆𑀦𑀪𑀸𑀯𑁄. 𑀬𑀸𑀢𑀺 𑀬𑀸 𑀯𑀺𑀭𑀸𑀕𑀢𑀸. 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀓𑀸𑀫𑀭𑀸𑀕𑀲𑁆𑀲 𑀅𑀦𑀯𑀲𑁂𑀲𑀧𑀳𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀢𑁂𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀣𑀺𑀢𑁄’’𑀢𑀺. 𑀬𑀸𑀣𑀸𑀯𑀫𑀸𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀦𑀺𑀭𑀼𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀲𑁆𑀫𑀺…𑀧𑁂… 𑀓𑀣𑀺𑀢’’𑀦𑁆𑀢𑀺. 𑀇𑀢𑁄𑀢𑀺 𑀅𑀭𑀳𑀢𑁆𑀢𑀢𑁄.

𑁪. 𑀭𑀸𑀚𑀸𑀬𑀢𑀦𑀓𑀣𑀸

𑁬. 𑀧𑀸𑀘𑀻𑀦𑀓𑁄𑀡𑁂𑀢𑀺 𑀧𑀼𑀭𑀢𑁆𑀣𑀺𑀫𑀅𑀲𑁆𑀲𑁂, 𑀧𑀼𑀩𑁆𑀩𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂𑀢𑀺 𑀅𑀢𑁆𑀣𑁄. 𑀭𑀸𑀚𑀸𑀬𑀢𑀦𑀭𑀼𑀓𑁆𑀔𑀦𑁆𑀢𑀺 𑀔𑀻𑀭𑀺𑀓𑀸𑀭𑀼𑀓𑁆𑀔𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀢𑀭𑁂𑀦 𑀲𑀫𑀬𑁂𑀦𑀸’’𑀢𑀺. 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄𑀢𑀺 𑀬𑁄𑀚𑀦𑀸. 𑀤𑁂𑀯𑀭𑀸𑀚𑀲𑀤𑁆𑀤𑀲𑁆𑀲 𑀅𑀜𑁆𑀜𑁂 𑀧𑀚𑀸𑀧𑀢𑀺𑀆𑀤𑀬𑁄 𑀤𑁂𑀯𑀭𑀸𑀚𑀸𑀦𑁄 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀲𑀓𑁆𑀓𑁄’’𑀢𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀳𑀭𑀻𑀢𑀓𑀁. 𑀧𑀭𑀺𑀪𑀼𑀢𑁆𑀢𑀫𑀢𑁆𑀢𑀲𑁆𑀲𑁂𑀯 𑀪𑀕𑀯𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑀺𑀦𑁆𑀦𑁂 𑀪𑀕𑀯𑀢𑀺.

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺 𑀇𑀫𑀺𑀦𑀸 𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀦𑀺𑀲𑀻𑀤𑀺, 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀓𑁆𑀓𑀮𑀚𑀦𑀧𑀤𑀢𑁄𑀢𑀺 𑀉𑀓𑁆𑀓𑀮𑀦𑀸𑀫𑀓𑀸 𑀚𑀦𑀧𑀤𑀫𑁆𑀳𑀸. 𑀬𑀲𑁆𑀫𑀺𑀁 𑀤𑁂𑀲𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀢𑀁 𑀤𑁂𑀲𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 ‘‘𑀢𑀁 𑀤𑁂𑀲𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸’’𑀢𑀺𑀧𑀤𑁂. 𑀢𑁂𑀲𑀦𑁆𑀢𑀺 𑀯𑀸𑀡𑀺𑀚𑀸𑀦𑀁. 𑀜𑀸𑀢𑀺𑀲𑀸𑀮𑁄𑀳𑀺𑀢𑀲𑀤𑁆𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀢𑁆𑀢𑀸 ‘‘𑀜𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑀸𑀮𑁄𑀳𑀺𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀜𑀸𑀢𑀺𑀪𑀽𑀢𑀧𑀼𑀩𑁆𑀩𑀸 𑀤𑁂𑀯𑀢𑀸’’𑀢𑀺. 𑀲𑀸𑀢𑀺 𑀤𑁂𑀯𑀢𑀸. 𑀦𑁂𑀲𑀦𑁆𑀢𑀺 𑀯𑀸𑀡𑀺𑀚𑀸𑀦𑀁. 𑀢𑀢𑁄𑀢𑀺 𑀅𑀧𑀯𑀢𑁆𑀢𑀦𑀓𑀸𑀭𑀡𑀸. 𑀢𑁂𑀢𑀺 𑀯𑀸𑀡𑀺𑀚𑀸. 𑀇𑀤𑀦𑁆𑀢𑀺 𑀅𑀧𑀯𑀢𑁆𑀢𑀦𑀁. 𑀩𑀮𑀺𑀦𑁆𑀢𑀺 𑀉𑀧𑀳𑀸𑀭𑀁. 𑀢𑁂𑀲𑀦𑁆𑀢𑀺 𑀯𑀸𑀡𑀺𑀚𑀸𑀦𑀁. ‘‘𑀲𑀩𑁆𑀩𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸’’𑀢𑀺 𑀧𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁, 𑀢𑀲𑁆𑀫𑀸 𑀫𑀚𑁆𑀛𑁂 𑀯𑀼𑀢𑁆𑀢𑀁. 𑀧𑀢𑀺𑀫𑀸𑀦𑁂𑀣𑀸𑀢𑀺 𑀏𑀢𑁆𑀣 𑀫𑀸𑀦 𑀧𑀽𑀚𑀸𑀬𑀁 𑀧𑁂𑀫𑀦𑁂𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁮 𑀦𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀢𑁆𑀢𑀸 𑀧𑀽𑀚𑀦𑀧𑁂𑀫𑀦𑀁 𑀦𑀸𑀫 𑀅𑀢𑁆𑀣𑀢𑁄 𑀉𑀧𑀝𑁆𑀞𑀳𑀦𑀦𑁆𑀢𑀺 𑀆𑀳 ‘‘𑀉𑀧𑀝𑁆𑀞𑀳𑀣𑀸’’𑀢𑀺. 𑀢𑀁 𑀯𑁄𑀢𑀺 𑀏𑀢𑁆𑀣 𑀢𑀁𑀲𑀤𑁆𑀤𑁄 𑀧𑀢𑀺𑀫𑀸𑀦𑀦𑀯𑀺𑀲𑀬𑁄, 𑀯𑁄𑀲𑀤𑁆𑀤𑁄 𑀢𑀻𑀲𑀼 𑀯𑁄𑀲𑀤𑁆𑀤𑁂𑀲𑀼 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀓𑀸𑀭𑀺𑀬𑁄 𑀯𑁄𑀲𑀤𑁆𑀤𑁄, 𑀲𑁄 𑀘 𑀘𑀢𑀼𑀢𑁆𑀣𑁆𑀬𑀢𑁆𑀣𑁄𑀢𑀺 𑀆𑀳 ‘‘𑀢𑀁 𑀧𑀢𑀺𑀫𑀸𑀦𑀁 𑀢𑀼𑀫𑁆𑀳𑀸𑀓’’𑀦𑁆𑀢𑀺. 𑀯𑁄𑀓𑀸𑀭𑁄 𑀳𑀺 𑀢𑀺𑀯𑀺𑀥𑁄 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀓𑀸𑀭𑀺𑀬𑁄, 𑀬𑁄𑀯𑀘𑀦𑀲𑁆𑀲 𑀓𑀸𑀭𑀺𑀬𑁄, 𑀧𑀤𑀧𑀽𑀭𑀡𑁄𑀢𑀺. 𑀢𑀢𑁆𑀣 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀓𑀸𑀭𑀺𑀬𑁄 𑀧𑀜𑁆𑀘𑀯𑀺𑀥𑁄 𑀧𑀘𑁆𑀘𑀢𑁆𑀢𑀉𑀧𑀬𑁄𑀕𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀯𑀘𑀦𑀯𑀲𑁂𑀦𑀸𑀢𑀺. 𑀢𑀢𑁆𑀣 𑀢𑀼𑀫𑁆𑀳𑀲𑀤𑁆𑀤𑀓𑀸𑀭𑀺𑀬𑁄 𑀲𑀫𑁆𑀧𑀤𑀸𑀦𑀯𑀘𑀦𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀢𑀼𑀫𑁆𑀳𑀸𑀓’’𑀦𑁆𑀢𑀺. ‘‘𑀬’’𑀦𑁆𑀢𑀺𑀲𑀤𑁆𑀤𑀲𑁆𑀲 𑀯𑀺𑀲𑀬𑁄 𑀧𑀝𑀺𑀕𑁆𑀕𑀳𑀡𑀢𑁆𑀣𑁄𑀢𑀺 𑀆𑀳 ‘‘𑀬𑀁 𑀧𑀝𑀺𑀕𑁆𑀕𑀳𑀡’’𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀬𑁄 𑀧𑀢𑁆𑀢𑁄 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀲𑁄𑀢𑀺 𑀧𑀢𑁆𑀢𑁄. 𑀲𑀼𑀚𑀸𑀢𑀸𑀬 𑀆𑀕𑀘𑁆𑀙𑀦𑁆𑀢𑀺𑀬𑀸 𑀏𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑁂𑀦𑀸𑀢𑀺 𑀅𑀦𑁆𑀢𑀭𑀥𑀸𑀬𑀳𑁂𑀢𑀼𑀦𑀸. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀳𑀢𑁆𑀣𑁂𑀲𑀽𑀢𑀺 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀳𑀢𑁆𑀣𑁂𑀳𑀻𑀢𑀺 𑀳𑀺 𑀅𑀢𑁆𑀣𑁄. 𑀓𑀺𑀫𑁆𑀳𑀻𑀢𑀺 𑀓𑁂𑀦.

𑀇𑀢𑁄𑀢𑀺 𑀆𑀲𑀴𑁆𑀳𑀻𑀫𑀸𑀲𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀢𑁄. 𑀏𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀏𑀢𑀁 𑀧𑀫𑀸𑀡𑀁 𑀏𑀓𑀽𑀦𑀧𑀜𑁆𑀜𑀸𑀲𑀤𑀺𑀯𑀲𑀓𑀸𑀮𑀁. 𑀚𑀺𑀖𑀘𑁆𑀙𑀸𑀢𑀺 𑀖𑀲𑀺𑀢𑀼𑀫𑀺𑀘𑁆𑀙𑀸. 𑀧𑀺𑀧𑀸𑀲𑀸𑀢𑀺 𑀧𑀸𑀢𑀼𑀫𑀺𑀘𑁆𑀙𑀸. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀘𑁂𑀢𑀲𑀸-𑀘𑁂𑀢𑁄𑀲𑀤𑁆𑀤𑀸𑀦𑀁 𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑀢𑁆𑀢𑀸 𑀢𑁂𑀲𑀁 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄’’𑀢𑀺 𑀘 ‘‘𑀪𑀕𑀯𑀢𑁄’’𑀢𑀺 𑀘. 𑀇𑀫𑁂𑀳𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀸𑀦𑀫𑀲𑀤𑀺𑀲𑀢𑁆𑀢𑀸 𑀲𑀫𑁆𑀩𑀦𑁆𑀥𑁄𑀧𑀺 𑀅𑀲𑀤𑀺𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁. 𑀲𑀫𑀸𑀲𑁄𑀬𑁂𑀯 𑀅𑀯𑀬𑀯𑀻𑀧𑀥𑀸𑀦𑁄 𑀳𑁄𑀢𑀺, 𑀯𑀸𑀓𑁆𑀬𑀁 𑀧𑀦 𑀅𑀯𑀬𑀯𑀧𑀥𑀸𑀦𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀽𑀳𑀺 𑀤𑀺𑀲𑀸𑀳𑀻’’𑀢𑀺. 𑀧𑀸𑀴𑀺𑀬𑀁 ‘‘𑀆𑀕𑀦𑁆𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄. ‘‘𑀲𑀺𑀮𑀸𑀫𑀬𑁂’’𑀢𑀺 𑀇𑀫𑀺𑀦𑀸 𑀲𑀺𑀮𑀸𑀫𑀬𑀫𑁂𑀯 𑀲𑁂𑀮𑀸𑀫𑀬𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀤𑀦𑁆𑀢𑀺 ‘‘𑀲𑁂𑀮𑀸𑀫𑀬𑁂 𑀧𑀢𑁆𑀢𑁂’’𑀢𑀺 𑀯𑀘𑀦𑀁. 𑀬𑁂𑀢𑀺 𑀫𑀼𑀕𑁆𑀕𑀯𑀡𑁆𑀡𑀲𑀺𑀮𑀸𑀫𑀬𑁂 𑀧𑀢𑁆𑀢𑁂. 𑀢𑀢𑁄𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀧𑀢𑁆𑀢𑀉𑀧𑀦𑀸𑀫𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁. 𑀘𑀢𑁆𑀢𑀸𑀭𑁄𑀧𑀺 𑀅𑀥𑀺𑀝𑁆𑀞𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦, 𑀅𑀥𑀺𑀝𑁆𑀞𑀺𑀬𑀫𑀸𑀦𑁂𑀢𑀺 𑀬𑁄𑀚𑀦𑀸. 𑀏𑀓𑀲𑀤𑀺𑀲𑁄𑀢𑀺 𑀏𑀓𑀁𑀲𑁂𑀦 𑀲𑀤𑀺𑀲𑁄. 𑀅𑀥𑀺𑀝𑁆𑀞𑀺𑀢𑁂 𑀧𑀢𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑁂𑀢𑀺 𑀘 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀧𑀢𑁆𑀢𑁂𑀦 𑀧𑀝𑀺𑀕𑁆𑀕𑀳𑁂𑀲𑀻𑀢𑀺 𑀳𑀺 𑀅𑀢𑁆𑀣𑁄. 𑀧𑀘𑁆𑀘𑀕𑁆𑀖𑁂𑀢𑀺 𑀏𑀢𑁆𑀣 𑀏𑀓𑀸𑀭𑁄 𑀲𑁆𑀫𑀺𑀁𑀯𑀘𑀦𑀲𑁆𑀲 𑀓𑀸𑀭𑀺𑀬𑁄𑀢𑀺 𑀆𑀳 ‘‘𑀧𑀘𑁆𑀘𑀕𑁆𑀖𑀲𑁆𑀫𑀺’’𑀦𑁆𑀢𑀺. 𑀧𑀝𑀺 𑀅𑀕𑁆𑀖𑀦𑁆𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀧𑀝𑀺𑀲𑀤𑁆𑀤𑁄 𑀧𑀸𑀝𑁂𑀓𑁆𑀓𑀢𑁆𑀣𑁄, ‘‘𑀅𑀕𑁆𑀖’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀫𑀳𑀕𑁆𑀖𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀝𑁂𑀓𑁆𑀓𑀁 𑀫𑀳𑀕𑁆𑀖𑀲𑁆𑀫𑀺’’𑀦𑁆𑀢𑀺. 𑀇𑀫𑀺𑀦𑀸 𑀘𑀢𑁆𑀢𑀸𑀭𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀦 𑀫𑀳𑀕𑁆𑀖𑀸 𑀳𑁄𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀧𑀦 𑀫𑀳𑀕𑁆𑀖𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀲𑀉𑀧𑀲𑀕𑁆𑀕𑁄 𑀧𑀘𑁆𑀘𑀕𑁆𑀖𑀲𑀤𑁆𑀤𑁄 𑀅𑀪𑀺𑀦𑀯𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀪𑀺𑀦𑀯𑁂’’𑀢𑀺. 𑀅𑀪𑀺𑀦𑀯𑁄𑀢𑀺 𑀘 𑀅𑀘𑀺𑀭𑀢𑀦𑀯𑀢𑁆𑀣𑀼𑀲𑁆𑀲 𑀦𑀸𑀫𑀁. 𑀅𑀘𑀺𑀭𑀢𑀦𑀯𑀢𑁆𑀣𑀼 𑀅𑀘𑀺𑀭𑀢𑀦𑀢𑁆𑀢𑀸 𑀅𑀩𑁆𑀪𑀼𑀡𑁆𑀳𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀩𑁆𑀪𑀼𑀡𑁆𑀳𑁂’’𑀢𑀺. ‘‘𑀢𑀗𑁆𑀔𑀡𑁂 𑀦𑀺𑀩𑁆𑀩𑀢𑁆𑀢𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀤𑁆𑀯𑁂𑀯𑀸𑀘𑀺𑀓𑀸𑀢𑀺𑀧𑀤𑀲𑁆𑀲 𑀲𑀫𑀸𑀲𑀯𑀲𑁂𑀦 𑀘 𑀢𑀤𑁆𑀥𑀺𑀢𑀯𑀲𑁂𑀦 𑀘 𑀦𑀺𑀧𑁆𑀨𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑁆𑀯𑁂 𑀯𑀸𑀘𑀸’’𑀢𑀺𑀆𑀤𑀺. 𑀧𑀢𑁆𑀢𑀸𑀢𑀺 𑀏𑀢𑁆𑀣 𑀏𑀓𑁄 𑀇𑀢𑀺𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀇𑀢𑀺 𑀢𑀲𑁆𑀫𑀸 𑀤𑁆𑀯𑁂𑀯𑀸𑀘𑀺𑀓𑀸𑀇𑀢𑀺 𑀅𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀯𑀸𑀡𑀺𑀚𑀸. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀢𑁂𑀢𑀺 𑀓𑁂𑀲𑁂. 𑀢𑁂𑀲𑀦𑁆𑀢𑀺 𑀯𑀸𑀡𑀺𑀚𑀸𑀦𑀁. 𑀧𑀭𑀺𑀳𑀭𑀣𑀸𑀢𑀺 𑀅𑀢𑁆𑀢𑀦𑁄 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀝𑁆𑀞𑀸𑀦𑀦𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸, 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀳𑀭𑀣𑀸𑀢𑀺 𑀅𑀢𑁆𑀣𑁄. 𑀢𑁂𑀢𑀺 𑀯𑀸𑀡𑀺𑀚𑀸. 𑀅𑀫𑀢𑁂𑀦𑁂𑀯𑀸𑀢𑀺 𑀅𑀫𑀢𑁂𑀦 𑀇𑀯, 𑀅𑀪𑀺𑀲𑀺𑀢𑁆𑀢𑀸 𑀇𑀯𑀸𑀢𑀺 𑀬𑁄𑀚𑀦𑀸.

𑁫. 𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸

𑁭. 𑀪𑀕𑀯𑀸 𑀉𑀧𑀲𑀗𑁆𑀓𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀦𑁆𑀢𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂. 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄𑀢𑀺 𑀆𑀘𑀭𑀺𑀢𑁄 𑀲𑀫𑁆𑀫𑀸𑀘𑀭𑀺𑀢𑁄, 𑀦 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀆𑀘𑀺𑀡𑁆𑀡𑁄, 𑀅𑀣 𑀔𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄, 𑀅𑀢𑀺𑀆𑀘𑀺𑀡𑁆𑀡𑁄 𑀦𑀺𑀘𑁆𑀘𑀸𑀘𑀺𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀚𑀸𑀦𑀦𑁆𑀢𑀺 𑀳𑀻’’𑀢𑀺𑀆𑀤𑀺. 𑀥𑀫𑁆𑀫𑀤𑁂𑀲𑀦𑀦𑁆𑀢𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁, 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀯𑀸 𑀪𑀕𑀯𑀦𑁆𑀢𑀁, 𑀪𑀕𑀯𑀦𑁆𑀢𑀁 𑀯𑀸 𑀥𑀫𑁆𑀫𑀤𑁂𑀲𑀦𑀁. 𑀢𑀢𑁄𑀢𑀺 𑀬𑀸𑀘𑀦𑀓𑀸𑀭𑀡𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀩𑁆𑀭𑀳𑁆𑀫𑀕𑀭𑀼𑀓𑁄 𑀬𑀲𑁆𑀫𑀸, 𑀇𑀢𑀺 𑀢𑀲𑁆𑀫𑀸 𑀉𑀧𑁆𑀧𑀸𑀤𑁂𑀲𑁆𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀢𑀢𑁆𑀣𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀦𑀸𑀓𑀸𑀭𑀧𑀸𑀞𑁂. ‘‘𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀅𑀮𑁆𑀮𑀻𑀬’’𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀮𑁆𑀮𑀻𑀬𑀦𑁆𑀢𑀺 𑀅𑀪𑀺𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀮𑀕𑁆𑀕𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀮𑀬𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 𑀮𑀕𑁆𑀕𑀦𑁆𑀢𑀺. ‘‘𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀮𑁆𑀮𑀻𑀬𑀦𑁆𑀢𑀻’’𑀢𑀺𑀧𑀺 𑀧𑀸𑀞𑁄, 𑀏𑀯𑀁 𑀲𑀢𑀺 𑀅𑀮𑁆𑀮𑀻𑀬𑀦𑁆𑀢𑀺 𑀅𑀪𑀺𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀲𑁂𑀯𑀺𑀬𑀦𑁆𑀢𑀻𑀢𑀺 𑀆𑀮𑀬𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀅𑀮𑁆𑀮𑀻𑀬𑀦𑁆𑀢𑀻𑀢𑀺 𑀲𑁂𑀯𑀦𑁆𑀢𑀺. 𑀢𑁂𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸. ‘‘𑀬𑀤𑀺𑀤’’𑀦𑁆𑀢𑀺𑀧𑀤𑀲𑁆𑀲 𑀬𑀁 𑀇𑀤𑀦𑁆𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 ‘‘𑀬’’𑀦𑁆𑀢𑀺 𑀘 ‘‘𑀇𑀤’’𑀦𑁆𑀢𑀺 𑀘 𑀲𑀩𑁆𑀩𑀦𑀸𑀫𑀧𑀤𑀦𑁆𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄’’𑀢𑀺. 𑀇𑀫𑀺𑀦𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀤𑁆𑀯𑀻𑀲𑀼 𑀘 𑀯𑀘𑀦𑁂𑀲𑀼 𑀯𑀺𑀦𑀸𑀲𑀁, 𑀯𑀺𑀓𑀸𑀭𑀁 𑀯𑀸 𑀯𑀺𑀲𑀤𑀺𑀲𑀁 𑀯𑀸 𑀦𑀅𑀬𑀦𑀢𑁆𑀢𑀸 𑀦𑀕𑀫𑀦𑀢𑁆𑀢𑀸 𑀅𑀩𑁆𑀬𑀬𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺, 𑀅𑀢𑁆𑀣𑁄 𑀧𑀦 𑀲𑀩𑁆𑀩𑀦𑀸𑀫𑀢𑁆𑀣𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲𑀸𑀢𑀺 ‘‘𑀬𑀤𑀺𑀤’’𑀦𑁆𑀢𑀺𑀦𑀺𑀧𑀸𑀢𑀲𑁆𑀲, 𑀅𑀢𑁆𑀣𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀞𑀸𑀦𑀦𑁆𑀢𑀺 ‘‘𑀞𑀸𑀦𑀁’’𑀇𑀢𑀺𑀧𑀤𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑁆𑀢𑀺 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀇𑀢𑀺𑀧𑀤𑀁. 𑀅𑀢𑁆𑀣𑁄𑀧𑀺 𑀬𑀼𑀢𑁆𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑁂𑀲𑀦𑁆𑀢𑀺 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁. 𑀧𑀘𑁆𑀘𑀬𑀸𑀢𑀺 𑀅𑀯𑀺𑀚𑁆𑀚𑀸𑀤𑀺𑀓𑀸𑀭𑀡𑀸. ‘‘𑀇𑀤𑀧𑁆𑀧𑀘𑁆𑀘𑀬𑀸 𑀏𑀯𑀸’’𑀢𑀺 𑀇𑀫𑀺𑀦𑀸 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀏𑀢𑁆𑀣 𑀢𑀸𑀧𑀘𑁆𑀘𑀬𑀲𑁆𑀲 𑀲𑁆𑀯𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀤𑁂𑀯𑀢𑀸’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑀅𑀝𑁆𑀞. 𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸) 𑀯𑀺𑀬.

𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄𑀢𑀺 𑀏𑀢𑁆𑀣 𑀢𑀁𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸 𑀅𑀚𑀸𑀦𑀦𑁆𑀢𑀸𑀦𑀁 𑀤𑁂𑀲𑀦𑀸 𑀦𑀸𑀫𑀸’’𑀢𑀺, 𑀇𑀫𑀺𑀦𑀸 ‘‘𑀤𑁂𑀲𑁂𑀬𑁆𑀬𑀁, 𑀦 𑀆𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑁂𑀯 𑀓𑀺𑀭𑀺𑀬𑀸𑀧𑀤𑀸𑀦𑀁 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦 𑀏𑀓𑀲𑁆𑀲 𑀓𑀺𑀭𑀺𑀬𑀸𑀧𑀤𑀲𑁆𑀲. 𑀲𑁄𑀢𑀺 𑀤𑁂𑀲𑀦𑀸𑀲𑀗𑁆𑀔𑀸𑀢𑁄 𑀓𑀸𑀬𑀯𑀘𑀻𑀧𑀬𑁄𑀕𑁄, 𑀇𑀫𑀺𑀦𑀸 𑀯𑀸𑀓𑁆𑀬𑀯𑀺𑀲𑀬𑁂 𑀢𑀲𑀤𑁆𑀤𑁄 𑀉𑀢𑁆𑀢𑀭𑀧𑀤𑀲𑁆𑀲𑁂𑀯 𑀮𑀺𑀗𑁆𑀕𑀯𑀘𑀦𑀸𑀦𑀺 𑀕𑀡𑁆𑀳𑀸𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀲𑀫𑀸𑀲𑀫𑀚𑁆𑀛𑁂 𑀧𑀦 𑀢𑀲𑀤𑁆𑀤𑁄 𑀧𑀼𑀩𑁆𑀩𑀧𑀤𑀲𑁆𑀲𑁂𑀯 𑀮𑀺𑀗𑁆𑀕𑀯𑀘𑀦𑀸𑀦𑀺 𑀕𑀡𑁆𑀳𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸’’𑀢𑀺 (𑀉𑀤𑀸. 𑀅𑀝𑁆𑀞. 𑀧𑀞𑀫𑀩𑁄𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸) 𑀘 ‘‘𑀅𑀪𑀺𑀥𑀫𑁆𑀫𑁄 𑀘 𑀲𑁄 𑀧𑀺𑀝𑀓𑀜𑁆𑀘𑀸’’𑀢𑀺 𑀘 (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀆𑀤𑀺. 𑀓𑀺𑀮𑀫𑀣𑁄𑀢𑀺 𑀓𑀸𑀬𑀓𑀺𑀮𑀫𑀦𑀳𑁂𑀢𑀼. 𑀓𑀺𑀮𑀫𑀢𑀺 𑀅𑀦𑁂𑀦𑀸𑀢𑀺 𑀓𑀺𑀮𑀫𑀣𑁄. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀲𑀸𑀢𑀺 𑀓𑀸𑀬𑀯𑀘𑀻𑀧𑀬𑁄𑀕𑀲𑀗𑁆𑀔𑀸𑀢𑀸 𑀤𑁂𑀲𑀦𑀸. 𑀯𑀺𑀳𑁂𑀲𑀸𑀢𑀺 𑀓𑀸𑀬𑀯𑀺𑀳𑀺𑀁𑀲𑀸𑀳𑁂𑀢𑀼. 𑀯𑀺𑀳𑀺𑀁𑀲𑀢𑀺 𑀇𑀫𑀸𑀬𑀸𑀢𑀺 𑀯𑀺𑀳𑁂𑀲𑀸. 𑀘𑀺𑀢𑁆𑀢𑁂𑀦 𑀧𑀦 𑀩𑀼𑀤𑁆𑀥𑀸𑀦𑀁 𑀓𑀺𑀮𑀫𑀣𑁄 𑀯𑀸 𑀯𑀺𑀳𑁂𑀲𑀸 𑀯𑀸 𑀦𑀢𑁆𑀣𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. ‘‘𑀧𑀝𑀺𑀪𑀁𑀲𑀽’’𑀢𑀺 𑀏𑀢𑁆𑀣 𑀧𑀝𑀻𑀢𑀺 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀬𑁄𑀕𑀢𑁆𑀢𑀸 ‘‘𑀪𑀕𑀯𑀦𑁆𑀢’’𑀦𑁆𑀢𑀺 𑀏𑀢𑁆𑀣 𑀲𑀸𑀫𑁆𑀬𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀪𑀕𑀯𑀢𑁄’’𑀢𑀺. ‘‘𑀅𑀦𑀼 𑀅𑀘𑁆𑀙𑀭𑀺𑀬𑀸’’𑀢𑀺 𑀇𑀫𑀺𑀦𑀸 ‘‘𑀦 𑀅𑀘𑁆𑀙𑀭𑀺𑀬𑀸’’𑀢𑀺 𑀧𑀤𑀯𑀺𑀪𑀸𑀕𑀁 𑀦𑀺𑀯𑀢𑁆𑀢𑁂𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀅𑀘𑁆𑀙𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀪𑀁𑀲𑀽𑀢𑀺 𑀏𑀢𑁆𑀣 𑀧𑀝𑀺𑀲𑀤𑁆𑀤𑁄 𑀧𑀝𑀺𑀪𑀸𑀦𑀢𑁆𑀣𑁄, 𑀪𑀸𑀥𑀸𑀢𑀼 𑀔𑀸𑀬𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀕𑁄𑀘𑀭𑀸 𑀅𑀳𑁂𑀲𑀼’’𑀦𑁆𑀢𑀺. ‘‘𑀕𑁄𑀘𑀭𑀸 𑀅𑀳𑁂𑀲𑀼’’𑀦𑁆𑀢𑀺 𑀇𑀫𑀺𑀦𑀸 𑀔𑀸𑀬𑀦𑀁 𑀦𑀸𑀫 𑀅𑀢𑁆𑀣𑀢𑁄 𑀕𑁄𑀘𑀭𑀪𑀸𑀯𑁂𑀦 𑀪𑀯𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀫𑁂𑀢𑀺 𑀫𑀫, 𑀫𑀬𑀸 𑀯𑀸, 𑀅𑀥𑀺𑀕𑀢𑀁 𑀥𑀫𑁆𑀫𑀁 𑀧𑀓𑀸𑀲𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀭𑀺𑀬𑀫𑀕𑁆𑀕𑀲𑁄𑀢𑀲𑁆𑀲 𑀧𑀝𑀺 𑀧𑀝𑀺𑀲𑁄𑀢𑀦𑁆𑀢𑀺 𑀯𑀼𑀢𑁆𑀢𑁂 𑀦𑀺𑀩𑁆𑀩𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀝𑀺𑀲𑁄𑀢𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀬𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀕𑀫𑀬𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀕𑀸𑀫𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀫𑁄𑀔𑀦𑁆𑀥𑁂𑀦𑀸𑀢𑀺 𑀏𑀢𑁆𑀣 𑀢𑀫𑀲𑀤𑁆𑀤𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀬𑁄, 𑀔𑀦𑁆𑀥𑀲𑀤𑁆𑀤𑁄 𑀭𑀸𑀲𑀢𑁆𑀣𑁄𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀭𑀸𑀲𑀺𑀦𑀸’’𑀢𑀺. ‘‘𑀅𑀚𑁆𑀛𑁄𑀢𑁆𑀣𑀝𑀸’’𑀢𑀺 𑀇𑀫𑀺𑀦𑀸 𑀆𑀯𑀼𑀝𑀸𑀢𑀺 𑀏𑀢𑁆𑀣 𑀯𑀼𑀥𑀸𑀢𑀼 𑀆𑀯𑀭𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬𑀸𑀢𑀺 𑀏𑀢𑁆𑀣 𑀅𑀧𑀢𑁆𑀬𑀽𑀧𑀲𑀕𑁆𑀕𑁄 𑀅𑀪𑀸𑀯𑀢𑁆𑀣𑁄, 𑀢𑀸𑀧𑀘𑁆𑀘𑀬𑁄 𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀭𑀼𑀲𑁆𑀲𑀼𑀓𑁆𑀓𑀪𑀸𑀯𑁂𑀦𑀸’’𑀢𑀺.

𑁮. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. 𑀫𑀳𑀸𑀩𑁆𑀭𑀳𑁆𑀫𑁂𑀢𑀺 𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀏𑀢𑁆𑀣 𑀅𑀧𑁆𑀧𑀁 𑀭𑀚𑀁 𑀅𑀓𑁆𑀔𑀺𑀫𑁆𑀳𑀺 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸, 𑀅𑀧𑁆𑀧𑀭𑀚𑀓𑁆𑀔𑀸 𑀚𑀸𑀢𑀺 𑀲𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀜𑀸𑀫𑀬𑁂’’𑀢𑀺𑀆𑀤𑀺. ‘‘𑀧𑀜𑁆𑀜𑀸𑀫𑀬𑁂’’𑀢𑀺 𑀇𑀫𑀺𑀦𑀸 𑀫𑀁𑀲𑀫𑀬𑁂𑀢𑀺 𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀏𑀢𑁂𑀲𑀦𑁆𑀢𑀺 𑀲𑀢𑁆𑀢𑀸𑀦𑀁. 𑀥𑀫𑁆𑀫𑀲𑁆𑀲𑀸𑀢𑀺 𑀢𑀼𑀧𑀘𑁆𑀘𑀬𑀬𑁄𑀕𑁂 𑀙𑀝𑁆𑀞𑀻𑀓𑀫𑁆𑀫𑀁. 𑀆𑀧𑀼𑀩𑁆𑀩𑁄 𑀜𑀸𑀥𑀸𑀢𑀼 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀝𑀺𑀯𑀺𑀚𑁆𑀛𑀺𑀢𑀸𑀭𑁄’’𑀢𑀺.

𑀲𑀁𑀯𑀺𑀚𑁆𑀚𑀢𑀺 𑀫𑀮𑀁 𑀏𑀢𑁂𑀲𑀦𑁆𑀢𑀺 𑀲𑀫𑀮𑀸, 𑀧𑀽𑀭𑀡𑀓𑀲𑁆𑀲𑀧𑀸𑀤𑀺𑀓𑀸 𑀙 𑀲𑀢𑁆𑀣𑀸𑀭𑁄, 𑀢𑁂𑀳𑀺. ‘‘𑀭𑀸𑀕𑀸𑀤𑀻𑀳𑀻’’𑀢𑀺 𑀇𑀫𑀺𑀦𑀸 𑀫𑀮𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀅𑀯𑀸𑀧𑀼𑀭𑁂𑀢𑀦𑁆𑀢𑀺 𑀏𑀢𑁆𑀣 𑀅𑀯𑀧𑀼𑀩𑁆𑀩𑁄 𑀘 𑀆𑀧𑀼𑀩𑁆𑀩𑁄 𑀘 𑀧𑀼𑀭𑀥𑀸𑀢𑀼 𑀯𑀺𑀯𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀯𑀺𑀯𑀭 𑀏𑀢’’𑀦𑁆𑀢𑀺. 𑀯𑀓𑀸𑀭𑀲𑁆𑀲 𑀧𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀧𑀸𑀧𑀼𑀭𑁂𑀢’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀫𑀢𑀲𑀤𑁆𑀤𑀲𑁆𑀲 𑀲𑀮𑀺𑀮𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀲𑁆𑀲𑀸’’𑀢𑀺. 𑀇𑀫𑁂 𑀲𑀢𑁆𑀢𑀸 𑀲𑀼𑀡𑀦𑁆𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀫𑀮𑁂𑀦𑀸𑀢𑀺 𑀏𑀢𑁆𑀣 𑀯𑀺𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀸𑀯𑀢𑁄’’𑀢𑀺. 𑀇𑀫𑀺𑀦𑀸 𑀦𑀢𑁆𑀣𑀺 𑀫𑀮𑀁 𑀏𑀢𑀲𑁆𑀲𑀸𑀢𑀺 𑀯𑀺𑀫𑀮𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀧𑀤𑀢𑁆𑀣𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑁂𑀦 𑀩𑀼𑀚𑁆𑀛𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀩𑀼𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑁂 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀥𑀫𑁆𑀫’’𑀦𑁆𑀢𑀺.

‘‘𑀲𑁂𑀮𑀫𑀬𑁂’’𑀢𑀺 𑀇𑀫𑀺𑀦𑀸 𑀲𑀺𑀮𑀸𑀬 𑀦𑀺𑀩𑁆𑀩𑀢𑁆𑀢𑁄 𑀲𑁂𑀮𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀸’’𑀢𑀺 𑀇𑀫𑀺𑀦𑀸 𑀲𑀫𑀦𑁆𑀢𑀘𑀓𑁆𑀔𑀼𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀪𑀕𑀯𑀸 𑀢𑁆𑀯𑀫𑁆𑀧𑀻𑀢𑀺 𑀬𑁄𑀚𑀦𑀸. 𑀥𑀫𑁆𑀫𑀲𑀤𑁆𑀤𑁄 𑀧𑀜𑁆𑀜𑀸𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀥𑀫𑁆𑀫𑀫𑀬𑀁 𑀧𑀜𑁆𑀜𑀸𑀫𑀬’’𑀦𑁆𑀢𑀺. 𑀅𑀧𑁂𑀢𑁄 𑀲𑁄𑀓𑁄 𑀇𑀫𑀲𑁆𑀲𑀸𑀢𑀺 𑀅𑀧𑁂𑀢𑀲𑁄𑀓𑁄, 𑀪𑀕𑀯𑀸. 𑀲𑁄𑀓𑀁 𑀅𑀯𑀢𑀭𑀢𑀻𑀢𑀺 𑀲𑁄𑀓𑀸𑀯𑀢𑀺𑀡𑁆𑀡𑀸, 𑀚𑀦𑀢𑀸. 𑀲𑁄𑀓𑀸𑀯𑀢𑀺𑀡𑁆𑀡𑀜𑁆𑀘 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀜𑁆𑀘𑀸𑀢𑀺 𑀘𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀇𑀫𑀺𑀦𑀸 𑀘𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀺.

‘‘𑀪𑀕𑀯𑀸’’𑀢𑀺𑀧𑀤𑀁 ‘‘𑀯𑀻𑀭𑁄’’𑀢𑀺𑀆𑀤𑀻𑀲𑀼 𑀬𑁄𑀚𑁂𑀢𑀩𑁆𑀩𑀁. ‘‘𑀯𑀻𑀭𑀺𑀬𑀯𑀦𑁆𑀢𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀯𑀻𑀭𑀁 𑀬𑀲𑁆𑀲𑀢𑁆𑀣𑀻𑀢𑀺 𑀯𑀻𑀭𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀤𑁆𑀤𑀲𑀢𑁆𑀣𑁂𑀲𑀼 𑀆𑀮𑀧𑀦𑀧𑀤𑁂𑀲𑀼 𑀯𑀺𑀕𑁆𑀕𑀳𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀇𑀤𑀁 𑀆𑀮𑀧𑀦𑀸𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀥 𑀧𑀦 𑀢𑁂𑀲𑀫𑀢𑁆𑀣𑀤𑀲𑁆𑀲𑀦𑀢𑁆𑀣𑀸𑀬 𑀯𑀺𑀕𑁆𑀕𑀳𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀤𑁂𑀯𑀧𑀼𑀢𑁆𑀢…𑀧𑁂… 𑀯𑀺𑀚𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀯𑀺𑀚𑀺𑀢𑁄 𑀫𑀸𑀭𑁂𑀳𑀺 𑀲𑀁𑀕𑀸𑀫𑁄 𑀅𑀦𑁂𑀦𑀸𑀢𑀺 𑀯𑀺𑀚𑀺𑀢𑀲𑀗𑁆𑀕𑀸𑀫𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀔𑀦𑁆𑀥𑀫𑀸𑀭𑁄 𑀫𑀘𑁆𑀘𑀼𑀫𑀸𑀭𑁂𑀦 𑀲𑀗𑁆𑀕𑀳𑀺𑀢𑁄 𑀤𑁆𑀯𑀺𑀦𑁆𑀦𑀁 𑀫𑀸𑀭𑀸𑀦𑀁 𑀏𑀓𑀢𑁄 𑀯𑀺𑀚𑀺𑀢𑀢𑁆𑀢𑀸. ‘‘𑀲𑀢𑁆𑀢𑀯𑀸𑀳𑁄’’𑀢𑀺 𑀧𑀞𑀫𑀓𑁆𑀔𑀭𑁂𑀦 𑀘 ‘‘𑀲𑀢𑁆𑀣𑀯𑀸𑀳𑁄’’𑀢𑀺 𑀤𑀼𑀢𑀺𑀬𑀓𑁆𑀔𑀭𑁂𑀦 𑀘 𑀬𑀼𑀢𑁆𑀢𑁄. 𑀢𑀢𑁆𑀣 𑀲𑀢𑁆𑀣𑀯𑀸𑀳𑁄 𑀯𑀺𑀬𑀸𑀢𑀺 ‘‘𑀲𑀢𑁆𑀣𑀯𑀸𑀳𑁄’’𑀢𑀺 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑁂 𑀤𑀼𑀢𑀺𑀬𑀓𑁆𑀔𑀭𑁂𑀦 𑀬𑀼𑀢𑁆𑀢𑁄, 𑀲𑀢𑁆𑀢𑁂 𑀯𑀳𑀳𑀻𑀢𑀺 𑀲𑀢𑁆𑀢𑀯𑀸𑀳𑁄𑀢𑀺 𑀫𑀼𑀔𑁆𑀬𑀢𑁄 𑀯𑀼𑀢𑁆𑀢𑁂 𑀧𑀞𑀫𑀓𑁆𑀔𑀭𑁂𑀦 𑀬𑀼𑀢𑁆𑀢𑁄. 𑀇𑀥 𑀧𑀦 𑀧𑀞𑀫𑀓𑁆𑀔𑀭𑁂𑀦 𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀲𑀢𑁆𑀢𑁂 𑀯𑀳𑀢𑀻𑀢𑀺 𑀲𑀢𑁆𑀢𑀯𑀸𑀳𑁄’’𑀢𑀺. 𑀦𑀢𑁆𑀣𑀺 𑀇𑀡𑀁 𑀇𑀫𑀲𑁆𑀲𑀸𑀢𑀺 𑀅𑀡𑀡𑁄 𑀪𑀕𑀯𑀸.

𑁯. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀏𑀢𑁆𑀣 𑀘𑀓𑁆𑀔𑀼 𑀤𑀼𑀯𑀺𑀥𑀁 𑀫𑀁𑀲𑀘𑀓𑁆𑀔𑀼𑀜𑀸𑀡𑀘𑀓𑁆𑀔𑀼𑀯𑀲𑁂𑀦. 𑀢𑀢𑁆𑀣𑀸𑀧𑀺 𑀫𑀁𑀲𑀘𑀓𑁆𑀔𑀼 𑀤𑀼𑀯𑀺𑀥𑀁 𑀧𑀲𑀸𑀤𑀘𑀓𑁆𑀔𑀼𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀯𑀲𑁂𑀦. 𑀢𑀢𑁆𑀣 𑀧𑀲𑀸𑀤𑀭𑀽𑀧𑀁 𑀧𑀲𑀸𑀤𑀘𑀓𑁆𑀔𑀼 𑀦𑀸𑀫, 𑀪𑀫𑀼𑀓𑀝𑁆𑀞𑀺𑀧𑀭𑀺𑀘𑁆𑀙𑀺𑀦𑁆𑀦𑁄 𑀫𑀁𑀲𑀧𑀺𑀡𑁆𑀟𑁄 𑀲𑀲𑀫𑁆𑀪𑀸𑀭𑀘𑀓𑁆𑀔𑀼 𑀦𑀸𑀫. 𑀜𑀸𑀡𑀘𑀓𑁆𑀔𑀼 𑀧𑀦 𑀧𑀜𑁆𑀘𑀯𑀺𑀥𑀁 (𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁩) 𑀤𑀺𑀩𑁆𑀩𑀥𑀫𑁆𑀫𑀧𑀜𑁆𑀜𑀸𑀩𑀼𑀤𑁆𑀥𑀲𑀫𑀦𑁆𑀢𑀘𑀓𑁆𑀔𑀼𑀯𑀲𑁂𑀦. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀅𑀪𑀺𑀜𑁆𑀜𑀸𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫, 𑀳𑁂𑀝𑁆𑀞𑀺𑀫𑀫𑀕𑁆𑀕𑀢𑁆𑀢𑀬𑀁 𑀥𑀫𑁆𑀫𑀘𑀓𑁆𑀔𑀼 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀧𑀜𑁆𑀜𑀸𑀘𑀓𑁆𑀔𑀼 𑀦𑀸𑀫, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘 𑀆𑀲𑀬𑀸𑀦𑀼𑀲𑀬𑀜𑀸𑀡𑀜𑁆𑀘 𑀩𑀼𑀤𑁆𑀥𑀘𑀓𑁆𑀔𑀼 𑀦𑀸𑀫, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀫𑀦𑁆𑀢𑀘𑀓𑁆𑀔𑀼 𑀦𑀸𑀫. 𑀇𑀥 𑀧𑀦 ‘‘𑀩𑀼𑀤𑁆𑀥𑀘𑀓𑁆𑀔𑀼𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀤𑁆𑀯𑁂𑀜𑀸𑀡𑀸𑀦𑀺𑀬𑁂𑀯𑀸𑀢𑀺 𑀆𑀳 ‘‘𑀇𑀦𑁆𑀤𑁆𑀭𑀺𑀬…𑀧𑁂… 𑀜𑀸𑀡𑁂𑀦 𑀘𑀸’’𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀬𑁂𑀲𑀦𑁆𑀢𑀺 𑀲𑀢𑁆𑀢𑀸𑀦𑀁. 𑀲𑀤𑁆𑀥𑀸𑀤𑀻𑀦𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀺𑀓𑁆𑀔𑀸𑀦𑀻𑀢𑀺 𑀢𑀺𑀔𑀺𑀡𑀸𑀦𑀺. 𑀫𑀼𑀤𑀽𑀦𑀻𑀢𑀺 𑀲𑀼𑀔𑀼𑀫𑀢𑀭𑀸𑀦𑀺. 𑀆𑀓𑀸𑀭𑀸𑀢𑀺 𑀓𑀸𑀭𑀡𑀸. 𑀇𑀫𑀸𑀦𑀺 𑀢𑀻𑀡𑀺 𑀤𑀼𑀓𑀸𑀦𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀼𑀔𑁂𑀦 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀸𑀢𑀺 𑀲𑀼𑀯𑀺𑀜𑁆𑀜𑀸𑀧𑀬𑀸, 𑀢𑀣𑀸 𑀤𑀼𑀯𑀺𑀜𑁆𑀜𑀸𑀧𑀬𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂 𑀓𑀣𑀺𑀢𑀓𑀸𑀭𑀡’’𑀦𑁆𑀢𑀺𑀆𑀤𑀺. 𑀧𑀭𑀮𑁄𑀓𑁄 𑀘 𑀯𑀚𑁆𑀚𑀜𑁆𑀘 𑀧𑀭𑀮𑁄𑀓𑀯𑀚𑁆𑀚𑀸𑀦𑀺, 𑀢𑀸𑀦𑀺 𑀪𑀬𑀢𑁄 𑀧𑀲𑁆𑀲𑀦𑁆𑀢𑀻𑀢𑀺 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂’’𑀢𑀺𑀆𑀤𑀺. 𑀇𑀫𑀸𑀦𑀺 𑀤𑁆𑀯𑁂 𑀤𑀼𑀓𑀸𑀦𑀺 𑀓𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀇𑀥 𑀧𑀘𑁆𑀙𑀺𑀫𑀤𑀼𑀓𑁂 ‘‘𑀦 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄’’𑀢𑀺 𑀤𑀼𑀢𑀺𑀬𑀧𑀤𑀁 𑀦 𑀯𑀼𑀢𑁆𑀢𑀁, 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀬𑀁 (𑀧𑀝𑀺. 𑀫. 𑁧.𑁧𑁧𑁧) 𑀧𑀦 𑀬𑀼𑀕𑀴𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀧𑁆𑀧𑀮𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀉𑀧𑁆𑀧𑀮𑀺𑀦𑀻𑀢𑀺 𑀯𑀘𑀦𑀢𑁆𑀣𑁂𑀦 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀧𑁄𑀓𑁆𑀔𑀭𑀡𑀻 𑀯𑀸 𑀯𑀦𑀁 𑀯𑀸 ‘‘𑀉𑀧𑁆𑀧𑀮𑀺𑀦𑀻’’𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 ‘‘𑀯𑀦’’𑀦𑁆𑀢𑀺 𑀆𑀳 ‘‘𑀉𑀧𑁆𑀧𑀮𑀯𑀦𑁂’’𑀢𑀺. 𑀦𑀺𑀫𑀼𑀕𑁆𑀕𑀸𑀦𑁂𑀯 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑁄𑀲𑀬𑀦𑁆𑀢𑀻𑀢𑀺 𑀯𑀟𑁆𑀠𑀦𑁆𑀢𑀺, 𑀇𑀫𑀺𑀦𑀸 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀸𑀦𑁂𑀯 𑀳𑀼𑀢𑁆𑀯𑀸 𑀧𑁄𑀲𑀬𑀦𑁆𑀢𑀻𑀢𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀉𑀤𑀓𑁂𑀦 𑀲𑀫’’𑀦𑁆𑀢𑀺 𑀇𑀫𑀺𑀦𑀸 𑀉𑀤𑀓𑁂𑀦 𑀲𑀫𑀁 𑀲𑀫𑁄𑀤𑀓𑀁, 𑀲𑀫𑁄𑀤𑀓𑀁 𑀳𑀼𑀢𑁆𑀯𑀸 𑀞𑀺𑀢𑀸𑀦𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀘𑁆𑀘𑀼𑀕𑁆𑀕𑀫𑁆𑀫𑀸𑀢𑀺𑀧𑀤𑀲𑁆𑀲 𑀅𑀢𑀺𑀉𑀕𑁆𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀧𑀝𑀺𑀘𑁆𑀙𑀦𑁆𑀦𑁂𑀦 𑀆𑀭𑁄𑀧𑀺𑀢𑀸𑀢𑀺 𑀧𑀸𑀭𑀼𑀢𑀸, 𑀦 𑀧𑀸𑀭𑀼𑀢𑀸 𑀅𑀧𑀸𑀭𑀼𑀢𑀸. 𑀅𑀧𑀸𑀭𑀼𑀢𑀸 𑀦𑀸𑀫 𑀅𑀢𑁆𑀣𑀢𑁄 𑀯𑀺𑀯𑀭𑀡𑀸𑀢𑀺 𑀆𑀳 ‘‘𑀯𑀺𑀯𑀝𑀸’’𑀢𑀺 𑀲𑁄𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀳𑀻𑀢𑀺 𑀲𑀘𑁆𑀘𑀁. 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑁂𑀢𑀺 𑀕𑀸𑀣𑀸𑀬 𑀉𑀢𑁆𑀢𑀫𑀧𑀤𑀤𑁆𑀯𑀬𑁂. 𑀅𑀬𑀫𑁂𑀯𑀢𑁆𑀣𑁄𑀢𑀺 𑀅𑀬𑀁 𑀯𑀓𑁆𑀔𑀫𑀸𑀦𑁄 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀦 𑀪𑀸𑀲𑀺𑀦𑁆𑀢𑀺 𑀏𑀢𑁆𑀣 𑀉𑀢𑁆𑀢𑀫𑀧𑀼𑀭𑀺𑀲𑀢𑁆𑀢𑀸 ‘‘𑀅𑀳’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀤𑁂𑀯𑀫𑀦𑀼𑀚𑁂𑀲𑀼’’𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁂𑀲𑀯𑀲𑁂𑀦 ‘‘𑀫𑀦𑀼𑀚𑁂𑀲𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁂𑀯𑀫𑀦𑀼𑀲𑁆𑀲𑁂𑀲𑀽’’𑀢𑀺.

𑁬. 𑀧𑀜𑁆𑀘𑀯𑀕𑁆𑀕𑀺𑀬𑀓𑀣𑀸

𑁧𑁦. 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀓𑀸𑀭𑀡𑁂𑀦 𑀉𑀧𑁆𑀧𑀢𑁆𑀢𑀺𑀬𑀸. 𑀦𑀺𑀓𑁆𑀓𑀺𑀮𑁂𑀲𑁄 𑀚𑀸𑀢𑀺 𑀲𑀪𑀸𑀯𑁄 𑀇𑀫𑀲𑁆𑀲𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀚𑀸𑀢𑀺𑀓𑁄. ‘‘𑀜𑀸𑀡’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑁂𑀧𑀺 𑀅𑀢𑁆𑀣𑀢𑁄 𑀅𑀦𑀸𑀯𑀭𑀡𑀜𑀸𑀡𑀫𑁂𑀯𑀸𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺. 𑀇𑀢𑁄𑀢𑀺 ‘‘𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀯𑀺𑀢𑀓𑁆𑀓𑀤𑀺𑀯𑀲𑀢𑁄, 𑀳𑁂𑀝𑁆𑀞𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁂𑀯𑀢𑀸 𑀧𑀦 𑀆𑀴𑀸𑀭𑀲𑁆𑀲 𑀓𑀸𑀮𑀗𑁆𑀓𑀭𑀡𑀫𑁂𑀯 𑀚𑀸𑀦𑀸𑀢𑀺, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁. 𑀪𑀕𑀯𑀸 𑀧𑀦 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. ‘‘𑀧𑀭𑀺𑀳𑀻𑀦𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀫𑀳𑀸𑀚𑀸𑀦𑀺𑀬𑁄𑀢𑀺 𑀏𑀢𑁆𑀣 𑀳𑀸𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀆𑀴𑀸𑀭𑀲𑁆𑀲. 𑀫𑀳𑀢𑀻 𑀚𑀸𑀦𑀺𑀅𑀲𑁆𑀲𑀸𑀢𑀺 ‘‘𑀫𑀳𑀸𑀚𑀸𑀦𑀺𑀓𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀓𑀓𑀸𑀭𑀲𑁆𑀲 𑀬𑀓𑀸𑀭𑀁 𑀓𑀢𑁆𑀯𑀸 ‘‘𑀫𑀳𑀸𑀚𑀸𑀦𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀓𑁆𑀔𑀡𑁂𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬 𑀅𑀦𑁄𑀓𑀸𑀲𑁂, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂𑀢𑀺 𑀅𑀢𑁆𑀣𑁄. 𑀳𑀺𑀬𑁆𑀬𑁄𑀢𑀺 𑀅𑀦𑀦𑁆𑀢𑀭𑀸𑀢𑀻𑀢𑀸𑀳𑁂. 𑀲𑁄𑀧𑀻𑀢𑀺 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄𑀧𑀺. 𑀧𑀺𑀲𑀤𑁆𑀤𑁄 𑀆𑀴𑀸𑀭𑀸𑀧𑁂𑀓𑁆𑀔𑁄. 𑀢𑀢𑁆𑀣 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀬𑀸𑀯𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀛𑀸𑀦𑀮𑀸𑀪𑀻 𑀳𑁄𑀢𑀺, 𑀢𑀲𑁆𑀫𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑁄. 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀬𑀸𑀯𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀛𑀸𑀦𑀮𑀸𑀪𑀻 𑀳𑁄𑀢𑀺, 𑀢𑀲𑁆𑀫𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀩𑀳𑀼𑀓𑀸𑀭𑀸’’𑀢𑀺 𑀘 ‘‘𑀩𑀳𑀽𑀧𑀓𑀸𑀭𑀸’’𑀢𑀺 𑀘 𑀧𑀸𑀞𑀲𑁆𑀲 𑀤𑁆𑀯𑀺𑀥𑀸 𑀬𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀩𑀳𑀼𑀓𑀸𑀭𑀸𑀢𑀺 𑀩𑀳𑀽𑀧𑀓𑀸𑀭𑀸’’𑀢𑀺. 𑀧𑁂𑀲𑀺𑀢𑀢𑁆𑀢𑀪𑀸𑀯𑀁 𑀫𑀦𑁆𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀧𑀳𑀺𑀢𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀢𑁆𑀢𑀲𑀤𑁆𑀤𑁄 𑀓𑀸𑀬𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺.

𑁧𑁧. 𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀬𑀼𑀢𑁆𑀢𑀢𑁆𑀢𑀸 ‘‘𑀕𑀬𑀁, 𑀩𑁄𑀥𑀺’’𑀦𑁆𑀢𑀺 𑀏𑀢𑁆𑀣 𑀲𑀸𑀫𑁆𑀬𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀕𑀬𑀸𑀬 𑀘 𑀩𑁄𑀥𑀺𑀫𑀡𑁆𑀟𑀲𑁆𑀲 𑀘𑀸’’𑀢𑀺.

𑀕𑀸𑀣𑀸𑀬 𑀘𑀢𑀽𑀲𑀼 𑀲𑀩𑁆𑀩𑀲𑀤𑁆𑀤𑁂𑀲𑀼 𑀤𑀼𑀢𑀺𑀬𑁄 𑀲𑀩𑁆𑀩𑀲𑀤𑁆𑀤𑁄 𑀅𑀦𑀯𑀲𑁂𑀲𑀢𑁆𑀣𑁄, 𑀲𑁂𑀲𑀸 𑀲𑀸𑀯𑀲𑁂𑀲𑀢𑁆𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀁 𑀢𑁂𑀪𑀽𑀫𑀓𑀥𑀫𑁆𑀫’’𑀦𑁆𑀢𑀺𑀆𑀤𑀺. 𑀯𑀘𑀦𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀯. 𑀅𑀭𑀳𑀢𑁆𑀢𑀨𑀮𑀲𑁆𑀲𑀸𑀧𑀺 𑀢𑀡𑁆𑀳𑀸𑀓𑁆𑀔𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀓𑁆𑀔𑀬𑁂 𑀦𑀺𑀩𑁆𑀩𑀸𑀦𑁂’’𑀢𑀺. 𑀲𑀬𑀁𑀲𑀤𑁆𑀤𑁄 𑀅𑀢𑁆𑀢𑀧𑀭𑀺𑀬𑀸𑀬𑁄, 𑀅𑀪𑀺𑀜𑁆𑀜𑀸𑀬𑀲𑀤𑁆𑀤𑁄 𑀢𑀼 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑁄𑀢𑀺 𑀆𑀳 ‘‘𑀅𑀢𑁆𑀢𑀦𑀸𑀯 𑀚𑀸𑀦𑀺𑀢𑁆𑀯𑀸’’𑀢𑀺. ‘‘𑀲𑀩𑁆𑀩𑀁 𑀘𑀢𑀼𑀪𑀽𑀫𑀓𑀥𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸 𑀜𑀸𑀥𑀸𑀢𑀼𑀬𑀸 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. ‘‘𑀅𑀬𑀁 𑀫𑁂 𑀆𑀘𑀭𑀺𑀬𑁄’’𑀢𑀺 𑀉𑀤𑁆𑀤𑀺𑀲𑀦𑀸𑀓𑀸𑀭𑀤𑀲𑁆𑀲𑀦𑀁.

‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂’’𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀥𑀫𑁆𑀫𑁂 𑀧𑀦 𑀆𑀘𑀭𑀺𑀬𑁄 (𑀫𑀺. 𑀧. 𑁪.𑁫.𑁧𑁧) 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀏𑀢𑁆𑀣 𑀧𑀝𑀺𑀲𑀤𑁆𑀤𑁄 𑀧𑀝𑀺𑀪𑀸𑀕𑀢𑁆𑀣𑁄𑀢𑀺 𑀆𑀳 ‘‘𑀧𑀝𑀺𑀪𑀸𑀕𑀧𑀼𑀕𑁆𑀕𑀮𑁄’’𑀢𑀺. 𑀲𑀤𑀺𑀲𑀧𑀼𑀕𑁆𑀕𑀮𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀻𑀢𑀺𑀪𑀽𑀢𑁄𑀢𑀺 𑀲𑀻𑀢𑀺 𑀳𑀼𑀢𑁆𑀯𑀸 𑀪𑀽𑀢𑁄, 𑀲𑀻𑀢𑀺𑀪𑀸𑀯𑀁 𑀯𑀸 𑀧𑀢𑁆𑀢𑁄.

𑀓𑀸𑀲𑀻𑀦𑀦𑁆𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀚𑀦𑀧𑀤𑀸𑀦𑀁 𑀦𑀸𑀫𑀁. 𑀚𑀦𑀧𑀤𑀲𑀫𑀽𑀳𑀲𑁆𑀲 𑀭𑀝𑁆𑀞𑀦𑀸𑀫𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀸𑀲𑀺𑀭𑀝𑁆𑀞𑁂’’𑀢𑀺. ‘‘𑀦𑀕𑀭’’𑀦𑁆𑀢𑀺 𑀇𑀫𑀺𑀦𑀸 𑀧𑀼𑀭𑀲𑀤𑁆𑀤𑁄 𑀦𑀕𑀭𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀮𑀸𑀪𑀸𑀬𑀸𑀢𑀺 𑀧𑀝𑀺𑀮𑀸𑀪𑀸𑀧𑀦𑀢𑁆𑀣𑀸𑀬. ‘‘𑀪𑁂𑀭𑀺’’𑀦𑁆𑀢𑀺 𑀇𑀫𑀺𑀦𑀸 𑀤𑀼𑀦𑁆𑀤𑀼𑀪𑀺𑀲𑀤𑁆𑀤𑁄 𑀪𑁂𑀭𑀺𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀪𑁂𑀭𑀺 𑀳𑀺 ‘‘𑀤𑀼𑀁𑀤𑀼’’𑀦𑁆𑀢𑀺𑀲𑀤𑁆𑀤𑁂𑀦 𑀉𑀪𑀺 𑀧𑀽𑀭𑀡𑀫𑁂𑀢𑁆𑀣𑀸𑀢𑀺 𑀤𑀼𑀦𑁆𑀤𑀼𑀪𑀻𑀢𑀺 𑀯𑀼𑀘𑁆𑀘𑀢𑀺. 𑀤𑀓𑀸𑀭𑀭𑀓𑀸𑀭𑀸𑀦𑀁 𑀲𑀁𑀬𑁄𑀕𑀁 𑀓𑀢𑁆𑀯𑀸 𑀤𑀼𑀦𑁆𑀤𑁆𑀭𑀼𑀪𑀻𑀢𑀺𑀧𑀺 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀧𑀸𑀞𑁄𑀬𑁂𑀯. ‘‘𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀣 𑀧𑀳𑀸𑀭𑀲𑀤𑁆𑀤𑁂𑀦 𑀆𑀳𑀜𑁆𑀜𑀺𑀦𑁆𑀢𑀺 𑀏𑀢𑁆𑀣 𑀆𑀧𑀼𑀩𑁆𑀩𑀳𑀦𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀲𑁆𑀲𑀸𑀫𑀺𑀲𑀤𑁆𑀤𑁂𑀦 𑀅𑀚𑁆𑀚𑀢𑀦𑀺𑀇𑀁𑀯𑀺𑀪𑀢𑁆𑀢𑀺𑀬𑀸 𑀅𑀦𑀸𑀕𑀢𑀓𑀸𑀮𑁂 𑀧𑀯𑀢𑁆𑀢𑀪𑀸𑀯𑀁, 𑀇𑀢𑀺𑀲𑀤𑁆𑀤𑁂𑀦 𑀕𑀫𑀦𑀸𑀓𑀸𑀭𑀯𑀸𑀘𑀓𑀲𑁆𑀲 𑀇𑀢𑀺𑀲𑀤𑁆𑀤𑀲𑁆𑀲 𑀮𑁄𑀧𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀅𑀦𑀦𑁆𑀢𑀚𑀺𑀦𑁄𑀢𑀺 𑀅𑀦𑀦𑁆𑀢𑀲𑀗𑁆𑀔𑀸𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀭𑀻𑀦𑀁 𑀚𑀺𑀢𑀯𑀸, 𑀏𑀢𑁂𑀦 𑀨𑀮𑀽𑀧𑀘𑀸𑀭𑁂𑀦 𑀅𑀦𑀦𑁆𑀢𑀚𑀺𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀳𑀼𑀯𑁂𑀬𑁆𑀬 𑀧𑀸𑀯𑀼𑀲𑁄𑀢𑀺 𑀏𑀢𑁆𑀣 ‘‘𑀳𑀼𑀯𑁂𑀬𑁆𑀬 𑀅𑀧𑀺 𑀆𑀯𑀼𑀲𑁄’’𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀳𑀼𑀥𑀸𑀢𑀼 𑀲𑀢𑁆𑀢𑀢𑁆𑀣𑀯𑀸𑀘𑀓𑁄, 𑀅𑀧𑀺𑀲𑀤𑁆𑀤𑁄 𑀏𑀯𑀁𑀦𑀸𑀫𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀆𑀯𑀼𑀲𑁄 ‘‘𑀏𑀯𑀁 𑀦𑀸𑀫 𑀪𑀯𑁂𑀬𑁆𑀬𑀸’’𑀢𑀺. 𑀯𑀓𑀸𑀭𑀲𑁆𑀲 𑀧𑀓𑀸𑀭𑀁 𑀓𑀢𑁆𑀯𑀸 ‘‘𑀳𑀼𑀧𑁂𑀬𑁆𑀬𑀸’’𑀢𑀺 𑀧𑀸𑀞𑁄𑀧𑀺 𑀬𑀼𑀚𑁆𑀚𑀢𑀺𑀬𑁂𑀯.

𑁧𑁨. ‘‘𑀅𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀩𑀸𑀳𑀼𑀮𑁆𑀮𑀲𑁆𑀲 𑀅𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄 𑀩𑀸𑀳𑀼𑀮𑁆𑀮𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀥𑀸𑀦𑀢𑁄𑀢𑀺 𑀤𑀼𑀓𑁆𑀓𑀭𑀘𑀭𑀺𑀬𑀸𑀬 𑀧𑀤𑀳𑀦𑀢𑁄. ‘‘𑀪𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀯𑀺𑀩𑁆𑀪𑀦𑁆𑀢𑁄𑀢𑀺 𑀏𑀢𑁆𑀣 𑀯𑀺𑀧𑀼𑀩𑁆𑀩𑀪𑀫𑀼𑀥𑀸𑀢𑀼𑀬𑀸 𑀅𑀦𑀯𑀝𑁆𑀞𑀸𑀦𑀢𑁆𑀣𑁄 𑀦𑀸𑀫 𑀅𑀢𑁆𑀣𑀢𑁄 𑀪𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀢𑀦𑁆𑀢𑀺 𑀏𑀢𑁆𑀣 𑀲𑁄𑀢𑀲𑀤𑁆𑀤𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀸𑀘𑀓𑀢𑁆𑀢𑀸 ‘‘𑀲𑁄𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀭𑀺𑀬𑀸𑀬𑀸𑀢𑀺 𑀏𑀢𑁆𑀣 𑀇𑀭𑀺𑀬𑀦𑀁 𑀘𑀭𑀡𑀁 𑀇𑀭𑀺𑀬𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀓𑁆𑀓𑀭𑀘𑀭𑀺𑀬𑀸𑀬𑀸’’𑀢𑀺. 𑀅𑀪𑀺𑀚𑀸𑀦𑀸𑀣 𑀦𑁄𑀢𑀺 𑀏𑀢𑁆𑀣 𑀦𑁄𑀲𑀤𑁆𑀤𑁄 𑀦𑀼𑀲𑀤𑁆𑀤𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀚𑀸𑀦𑀸𑀣 𑀦𑀽’’𑀢𑀺. 𑀯𑀸𑀓𑁆𑀬𑀦𑁆𑀢𑀺 𑀯𑀸𑀘𑀓𑀁. 𑀲𑀜𑁆𑀜𑀸𑀧𑁂𑀢𑀼𑀦𑁆𑀢𑀺𑀧𑀤𑀲𑁆𑀲 𑀲𑀜𑁆𑀜𑀸𑀧𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀳𑀁 𑀩𑀼𑀤𑁆𑀥𑁄’’𑀢𑀺.

𑁧𑁩. 𑀇𑀢𑁄𑀢𑀺 ‘‘𑀘𑀓𑁆𑀔𑀼𑀓𑀭𑀡𑀻’’𑀢𑀺𑀆𑀤𑀺𑀢𑁄. 𑀧𑀤𑀢𑁆𑀣𑀢𑁄𑀢𑀺 𑀧𑀤𑀢𑁄 𑀘 𑀅𑀢𑁆𑀣𑀢𑁄 𑀘, 𑀧𑀤𑀸𑀦𑀁 𑀅𑀢𑁆𑀣𑀢𑁄 𑀯𑀸. 𑀇𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀢𑁄. 𑀳𑀻𑀢𑀺 𑀲𑀘𑁆𑀘𑀁. 𑀲𑀼𑀢𑁆𑀢𑀦𑁆𑀢𑀓𑀣𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀯𑀲𑁂𑀦 𑀯𑀼𑀢𑁆𑀢𑀯𑀘𑀦𑀁.

𑁧𑁮. 𑀤𑁂𑀯𑀢𑀸𑀓𑁄𑀝𑀻𑀳𑀻𑀢𑀺 𑀩𑁆𑀭𑀳𑁆𑀫𑀲𑀗𑁆𑀔𑀸𑀢𑀸𑀳𑀺 𑀤𑁂𑀯𑀢𑀸𑀓𑁄𑀝𑀻𑀳𑀺. 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑀲𑁆𑀲 𑀆𑀬𑀲𑁆𑀫𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀯 𑀏𑀳𑀺𑀪𑀺𑀓𑁆𑀔𑀼𑀉𑀧𑀲𑀫𑁆𑀧𑀤𑀸𑀢𑀺 𑀬𑁄𑀚𑀦𑀸.

𑁧𑁯. 𑀤𑀼𑀢𑀺𑀬𑀤𑀺𑀯𑀲𑁂 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑀼𑀢𑀺𑀬𑀤𑀺𑀯𑀲𑁂’’𑀢𑀺𑀆𑀤𑀺 𑀧𑀸𑀝𑀺𑀧𑀤𑀤𑀺𑀯𑀲𑀁 𑀉𑀧𑀦𑀺𑀥𑀸𑀬 𑀯𑀼𑀢𑁆𑀢𑀁. 𑀧𑀓𑁆𑀔𑀲𑁆𑀲𑀸𑀢𑀺 𑀆𑀲𑀴𑁆𑀳𑀻𑀫𑀸𑀲𑀓𑀸𑀴𑀧𑀓𑁆𑀔𑀲𑁆𑀲. 𑀲𑀩𑁆𑀩𑁂𑀯 𑀢𑁂 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸. 𑀅𑀦𑀢𑁆𑀢𑀲𑀼𑀢𑁆𑀢𑁂𑀦𑀸𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑁂𑀦 (𑀫𑀳𑀸𑀯. 𑁨𑁦; 𑀲𑀁. 𑀦𑀺. 𑁩.𑁫𑁯).

𑀧𑀜𑁆𑀘𑀫𑀺𑀬𑀸 𑀧𑀓𑁆𑀔𑀲𑁆𑀲𑀸𑀢𑀺 𑀧𑀓𑁆𑀔𑀲𑁆𑀲 𑀧𑀜𑁆𑀘𑀫𑀺𑀬𑀸. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂. ‘‘𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑁄𑀢𑀺 𑀇𑀫𑀺𑀦𑀸 𑀤𑁂𑀯𑀅𑀭𑀳𑀦𑁆𑀢𑁄 𑀩𑀳𑀽𑀢𑀺 𑀤𑀲𑁆𑀲𑁂𑀢𑀺.

𑁭. 𑀧𑀩𑁆𑀩𑀚𑁆𑀚𑀸𑀓𑀣𑀸

𑁩𑁧. 𑀧𑁄𑀭𑀸𑀡𑀸𑀦𑀼𑀧𑁄𑀭𑀸𑀡𑀸𑀦𑀦𑁆𑀢𑀺 𑀧𑀼𑀭𑀸𑀡𑁂 𑀘 𑀅𑀦𑀼𑀧𑀼𑀭𑀸𑀡𑁂 𑀘 𑀪𑀯𑀸𑀦𑀁. 𑀏𑀓𑀲𑀝𑁆𑀞𑀻𑀢𑀺 𑀏𑀓𑁄 𑀘 𑀲𑀝𑁆𑀞𑀺 𑀘, 𑀏𑀓𑁂𑀦 𑀯𑀸 𑀅𑀥𑀺𑀓𑀸 𑀲𑀝𑁆𑀞𑀺 𑀏𑀓𑀲𑀝𑁆𑀞𑀺.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀏𑀓𑀲𑀝𑁆𑀞𑀺𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑁂𑀲𑀼. 𑀧𑀼𑀩𑁆𑀩𑀬𑁄𑀕𑁄𑀢𑀺 𑀧𑀼𑀩𑁆𑀩𑁂 𑀓𑀢𑁄 𑀉𑀧𑀸𑀬𑁄, 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑁄𑀢𑀺 𑀅𑀢𑁆𑀣𑁄. 𑀯𑀕𑁆𑀕𑀩𑀦𑁆𑀥𑁂𑀦𑀸𑀢𑀺 𑀲𑀫𑀽𑀳𑀁 𑀓𑀢𑁆𑀯𑀸 𑀩𑀦𑁆𑀥𑁂𑀦. 𑀢𑁂𑀢𑀺 𑀧𑀜𑁆𑀘𑀧𑀜𑁆𑀜𑀸𑀲 𑀚𑀦𑀸. 𑀛𑀸𑀧𑁂𑀲𑁆𑀲𑀸𑀫𑀸𑀢𑀺 𑀟𑀬𑁆𑀳𑀺𑀲𑁆𑀲𑀸𑀫. 𑀦𑀻𑀳𑀭𑀺𑀁𑀲𑀽𑀢𑀺 𑀕𑀸𑀫𑀢𑁄 𑀦𑀻𑀳𑀭𑀺𑀁𑀲𑀼. 𑀢𑁂𑀲𑀽𑀢𑀺 𑀧𑀜𑁆𑀘𑀧𑀜𑁆𑀜𑀸𑀲𑀚𑀦𑁂𑀲𑀼. 𑀧𑀜𑁆𑀘 𑀚𑀦𑁂 𑀞𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀸𑀢𑀺 𑀧𑀜𑁆𑀘𑀳𑀺 𑀚𑀦𑁂𑀳𑀺 𑀅𑀯𑀲𑁂𑀲𑀸. 𑀲𑁄𑀢𑀺 𑀬𑀲𑁄 𑀤𑀸𑀭𑀓𑁄. 𑀢𑁂𑀧𑀻𑀢𑀺 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸. 𑀢𑀢𑁆𑀣𑀸𑀢𑀺 𑀲𑀭𑀻𑀭𑁂. 𑀢𑁂 𑀲𑀩𑁆𑀩𑁂𑀧𑀻𑀢𑀺 𑀬𑀲𑀲𑁆𑀲 𑀫𑀸𑀢𑀸𑀧𑀺𑀢𑀼𑀪𑀭𑀺𑀬𑀸𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑁂𑀧𑀺 𑀢𑁂 𑀲𑀳𑀸𑀬𑀓𑀸. 𑀢𑁂𑀦𑀸𑀢𑀺 𑀧𑀼𑀩𑁆𑀩𑀬𑁄𑀕𑁂𑀦.

𑀆𑀫𑀦𑁆𑀢𑁂𑀲𑀻𑀢𑀺 𑀓𑀣𑁂𑀲𑀺.

𑁩𑁨. 𑀤𑀺𑀩𑁆𑀩𑁂𑀲𑀼 𑀯𑀺𑀲𑀬𑁂𑀲𑀼 𑀪𑀯𑀸 𑀤𑀺𑀩𑁆𑀩𑀸 𑀮𑁄𑀪𑀧𑀸𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀺𑀩𑁆𑀩𑀸 𑀦𑀸𑀫𑀸’’𑀢𑀺𑀆𑀤𑀺. 𑀮𑁄𑀪𑀧𑀸𑀲𑀸𑀢𑀺 𑀮𑁄𑀪𑀲𑀗𑁆𑀔𑀸𑀢𑀸 𑀩𑀦𑁆𑀥𑀦𑀸. 𑀅𑀲𑀯𑀦𑀢𑀸𑀢𑀺 𑀏𑀢𑁆𑀣 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀲𑀯𑀦𑀢𑀸𑀬𑀸’’𑀢𑀺. 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀓𑁂𑀦 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀲𑁂𑀲𑀸𑀥𑀺𑀕𑀫𑀢𑁄’’𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀢𑁄𑀢𑀺 𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀫𑀢𑁄.

𑁩𑁩. 𑀅𑀦𑁆𑀢𑀁 𑀮𑀸𑀫𑀓𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑀸𑀫𑀓𑀸’’𑀢𑀺. ‘‘𑀳𑀻𑀦𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀆𑀫𑀦𑁆𑀢𑀦𑀧𑀤𑀫𑁂𑀢𑀁. 𑀢𑀦𑁆𑀢𑀺 𑀭𑀸𑀕𑀧𑀸𑀲𑀁. 𑀳𑀻𑀢𑀺 𑀲𑀘𑁆𑀘𑀁. 𑀲𑁄𑀢𑀺 𑀫𑀸𑀭𑁄 𑀧𑀸𑀧𑀺𑀫𑀸. 𑀅𑀦𑁆𑀢𑀮𑀺𑀓𑁆𑀔𑁂 𑀘𑀭𑀦𑁆𑀢𑀸𑀦𑀁 𑀧𑀜𑁆𑀘𑀸𑀪𑀺𑀜𑁆𑀜𑀸𑀦𑀫𑁆𑀧𑀺 𑀩𑀦𑁆𑀥𑀦𑀢𑁆𑀢𑀸 𑀅𑀦𑁆𑀢𑀮𑀺𑀓𑁆𑀔𑁂 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀦𑁆𑀢𑀮𑀺𑀓𑁆𑀔𑀘𑀭𑁄𑀢𑀺 𑀯𑀘𑀦𑀢𑁆𑀣𑁂𑀦 𑀭𑀸𑀕𑀧𑀸𑀲𑁄 ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄’’𑀢𑀺 𑀫𑀸𑀭𑁂𑀦 𑀧𑀸𑀧𑀺𑀫𑀢𑀸 𑀯𑀼𑀢𑁆𑀢𑁄.

𑁩𑁪. 𑀦𑀸𑀦𑀸𑀚𑀦𑀧𑀤𑀢𑁄𑀢𑀺 𑀏𑀓𑀺𑀲𑁆𑀲𑀸𑀧𑀺 𑀤𑀺𑀲𑀸𑀬 𑀦𑀸𑀦𑀸𑀚𑀦𑀧𑀤𑀢𑁄. ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀧𑀩𑁆𑀩𑀸𑀚𑁂𑀣𑀸’’𑀢𑀺𑀆𑀤𑀺𑀫𑁆𑀳𑀺 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀼𑀕𑁆𑀕𑀮𑀸𑀢𑀺 𑀬𑁄𑀚𑀦𑀸. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁. ‘‘𑀦 𑀪𑀺𑀓𑁆𑀔𑀯𑁂…𑀧𑁂… 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 𑀧𑀸𑀴𑀺𑀁 (𑀫𑀳𑀸𑀯. 𑁮𑁯) 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀧𑀼𑀕𑁆𑀕𑀮𑁂. 𑀲𑁄𑀧𑀺 𑀘𑀸𑀢𑀺 𑀲𑁄𑀧𑀺 𑀘 𑀧𑀼𑀕𑁆𑀕𑀮𑁄. 𑀅𑀦𑀼𑀜𑁆𑀜𑀸𑀢𑁄𑀬𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀘𑀸𑀢𑀺 𑀧𑀼𑀕𑁆𑀕𑀮𑀲𑁆𑀲 𑀘, 𑀅𑀣 𑀯𑀸 𑀢𑁂𑀲𑀜𑁆𑀘 𑀫𑀸𑀢𑀸𑀧𑀺𑀢𑀽𑀦𑀁. 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀳𑁂𑀲. 𑀅𑀦𑀼𑀚𑀸𑀦𑀦𑀮𑀓𑁆𑀔𑀡𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀘𑀲𑀤𑁆𑀤𑁄 𑀯𑀸𑀓𑁆𑀬𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀲𑀘𑁂 𑀅𑀘𑁆𑀙𑀺𑀦𑁆𑀦𑀓𑁂𑀲𑁄 𑀳𑁄𑀢𑀺 𑀘, 𑀲𑀘𑁂 𑀏𑀓𑀲𑀻𑀫𑀸𑀬 𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀅𑀢𑁆𑀣𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀧𑀻𑀢𑀺 𑀅𑀢𑁆𑀢𑀦𑀸 𑀅𑀧𑀭𑁂𑀧𑀺. 𑀪𑀡𑁆𑀟𑀽𑀢𑀺 𑀫𑀼𑀡𑁆𑀟𑁄, 𑀲𑁄𑀬𑁂𑀯 𑀓𑀫𑁆𑀫𑀁 𑀪𑀡𑁆𑀟𑀼𑀓𑀫𑁆𑀫𑀁. 𑀢𑀲𑁆𑀲𑀸𑀢𑀺 𑀪𑀡𑁆𑀟𑀼𑀓𑀫𑁆𑀫𑀲𑁆𑀲. 𑀑𑀓𑀸𑀲𑁄𑀢𑀺 𑀧𑀩𑁆𑀩𑀚𑁆𑀚𑀸𑀬 𑀔𑀡𑁄. ‘‘𑀑𑀓𑀸𑀲𑀁 𑀦 𑀮𑀪𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀘𑁂’’𑀢𑀺𑀆𑀤𑀺.

𑀅𑀯𑀼𑀢𑁆𑀢𑁄𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀯𑀼𑀢𑁆𑀢𑁄 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀸𑀚𑁂𑀢𑀻𑀢𑀺 𑀏𑀢𑁆𑀣 𑀧𑀩𑁆𑀩𑀚𑁆𑀚𑀸 𑀘𑀢𑀼𑀩𑁆𑀩𑀺𑀥𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸𑀢𑀺. 𑀢𑀢𑁆𑀣 𑀓𑁂𑀲𑀫𑀲𑁆𑀲𑀼𑀳𑀭𑀡𑀁 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀦𑀸𑀫 𑀯𑀓𑁆𑀓𑀮𑀸𑀤𑀺𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀇𑀲𑀺𑀧𑀩𑁆𑀩𑀚𑁆𑀚𑀸𑀢𑀺𑀧𑀺 𑀢𑀲𑁆𑀲𑀸𑀬𑁂𑀯 𑀦𑀸𑀫𑀁. 𑀓𑁂𑀲𑀫𑀲𑁆𑀲𑀼𑀳𑀭𑀡𑀫𑁂𑀯 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸 𑀦𑀸𑀫 𑀓𑀸𑀲𑀸𑀬𑀸𑀤𑀺𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀓𑁂𑀲𑀫𑀲𑁆𑀲𑀼𑀳𑀭𑀡𑀜𑁆𑀘 𑀓𑀸𑀲𑀸𑀬𑀘𑁆𑀙𑀸𑀤𑀦𑀜𑁆𑀘 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀦𑀸𑀫 𑀲𑀭𑀡𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀉𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀢𑀺𑀯𑀺𑀥𑀸 𑀏𑀳𑀺𑀪𑀺𑀓𑁆𑀔𑀼𑀉𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀲𑀭𑀡𑀕𑀳𑀡𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸𑀢𑀺. 𑀢𑀢𑁆𑀣 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸𑀬𑀁 𑀓𑁂𑀲𑀫𑀲𑁆𑀲𑀼𑀳𑀭𑀡𑀸𑀤𑀺 𑀲𑀩𑁆𑀩𑀁 𑀏𑀓𑀢𑁄𑀯 𑀲𑀫𑁆𑀧𑀚𑁆𑀚𑀢𑀺 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀢𑁄 𑀯𑀘𑀦𑁂𑀦 𑀅𑀪𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸. 𑀲𑀭𑀡𑀕𑀳𑀡𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀲𑀤𑀺𑀲𑀸𑀬𑁂𑀯. 𑀓𑁂𑀲𑀫𑀲𑁆𑀲𑀼𑀳𑀭𑀡𑀜𑁆𑀘 𑀓𑀸𑀲𑀸𑀬𑀘𑁆𑀙𑀸𑀤𑀦𑀜𑁆𑀘 𑀲𑀭𑀡𑀕𑀳𑀡𑀜𑁆𑀘 𑀜𑀢𑁆𑀢𑀺𑀘𑀢𑀼𑀢𑁆𑀣𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀦𑀸𑀫 𑀓𑀫𑁆𑀫𑀯𑀸𑀘𑀸𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀢𑀢𑁆𑀣 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀸𑀚𑁂𑀢𑀻’’𑀢𑀺. 𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀝𑁆𑀞𑀸𑀦𑀦𑀺𑀬𑀫𑀁 𑀓𑀢𑁆𑀯𑀸. 𑀧𑀩𑁆𑀩𑀚𑁆𑀚𑀸𑀓𑀫𑁆𑀫𑁂 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀫𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀳𑀭𑁂𑀦 𑀪𑀺𑀓𑁆𑀔𑀼𑀦𑀸 𑀓𑁂𑀲𑀘𑁆𑀙𑁂𑀤𑀦𑀁 𑀓𑀸𑀲𑀸𑀬𑀘𑁆𑀙𑀸𑀤𑀦𑀁 𑀲𑀭𑀡𑀤𑀸𑀦𑀦𑁆𑀢𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀓𑀸𑀢𑀩𑁆𑀩𑀸𑀦𑀺𑀬𑁂𑀯. 𑀓𑁂𑀘𑀺 ‘‘𑀲𑀭𑀡𑀸𑀦𑀺 𑀧𑀦 𑀲𑀬𑀁 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀧𑀸𑀞𑀁 𑀇𑀥𑀸𑀦𑁂𑀢𑁆𑀯𑀸 𑀤𑀳𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀭𑀡𑀸𑀦𑀺 𑀦 𑀤𑀸𑀢𑀩𑁆𑀩𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀤𑀳𑀭𑀲𑁆𑀲 𑀪𑀺𑀓𑁆𑀔𑀼𑀢𑁆𑀢𑀸, 𑀪𑀺𑀓𑁆𑀔𑀽𑀦𑀁 𑀧𑀩𑁆𑀩𑀸𑀚𑁂𑀢𑀼𑀁 𑀮𑀪𑀦𑀢𑁆𑀢𑀸 𑀘. 𑀉𑀧𑀚𑁆𑀛𑀸𑀬𑁄 𑀘𑁂 𑀓𑁂𑀲𑀘𑁆𑀙𑁂𑀤𑀦𑀜𑁆𑀘 𑀓𑀸𑀲𑀸𑀬𑀘𑁆𑀙𑀸𑀤𑀦𑀜𑁆𑀘 𑀅𑀓𑀢𑁆𑀯𑀸 𑀧𑀩𑁆𑀩𑀚𑁆𑀚𑀢𑁆𑀣𑀁 𑀲𑀭𑀡𑀸𑀦𑀺𑀬𑁂𑀯 𑀤𑁂𑀢𑀺, 𑀦 𑀭𑀼𑀳𑀢𑀺 𑀧𑀩𑁆𑀩𑀚𑁆𑀚𑀸 𑀧𑀩𑁆𑀩𑀚𑁆𑀚𑀸𑀬 𑀅𑀓𑀢𑁆𑀢𑀩𑁆𑀩𑀢𑁆𑀢𑀸. 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀭𑀼𑀳𑀢𑀺 𑀉𑀧𑀲𑀫𑁆𑀧𑀤𑀸 𑀅𑀧𑀢𑁆𑀢𑀘𑀻𑀯𑀭𑀸𑀦𑀁 𑀉𑀧𑀲𑀫𑁆𑀧𑀤𑀲𑀺𑀤𑁆𑀥𑀺𑀢𑁄, 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀘. 𑀔𑀡𑁆𑀟𑀲𑀻𑀫𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀝𑁆𑀞𑀁 𑀩𑀤𑁆𑀥𑀲𑀻𑀫𑀁. 𑀧𑀩𑁆𑀩𑀸𑀚𑁂𑀢𑁆𑀯𑀸𑀢𑀺 𑀓𑁂𑀲𑀘𑁆𑀙𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸’’𑀢𑀺 𑀓𑀸𑀲𑀸𑀬𑀘𑁆𑀙𑀸𑀤𑀦𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸. 𑀲𑀸𑀫𑀡𑁂𑀭𑀲𑁆𑀲 𑀲𑀭𑀡𑀤𑀸𑀦𑀲𑁆𑀲 𑀅𑀭𑀼𑀳𑀢𑁆𑀢𑀸 ‘‘𑀲𑀭𑀡𑀸𑀦𑀺 𑀧𑀦 𑀲𑀬𑀁 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀲𑀁 𑀧𑀩𑁆𑀩𑀸𑀚𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀆𑀡𑀢𑁆𑀢𑀺𑀬𑀸𑀢𑀺 𑀪𑀺𑀓𑁆𑀔𑀽𑀦𑀁 𑀆𑀡𑀢𑁆𑀢𑀺𑀬𑀸. 𑀬𑁂𑀦 𑀓𑁂𑀦𑀘𑀻𑀢𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺.

‘‘𑀪𑀩𑁆𑀩𑀭𑀽𑀧𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀳𑁂𑀢𑀼𑀓𑁄’’𑀢𑀺. 𑀲𑀳𑁂𑀢𑀼𑀓𑁄𑀢𑀺 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁂𑀳𑀺 𑀲𑀳 𑀧𑀯𑀢𑁆𑀢𑁄. 𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀬𑀲𑁂𑀦 𑀘 𑀓𑀺𑀢𑁆𑀢𑀺𑀬𑀲𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀑𑀓𑀸𑀲𑀁 𑀓𑀢𑁆𑀯𑀸𑀧𑀻𑀢𑀺 𑀑𑀓𑀸𑀲𑀁 𑀓𑀢𑁆𑀯𑀸 𑀏𑀯. 𑀲𑀬𑀫𑁂𑀯𑀸𑀢𑀺 𑀦 𑀅𑀜𑁆𑀜𑁄 𑀆𑀡𑀸𑀧𑁂𑀢𑀩𑁆𑀩𑁄. 𑀏𑀢𑁆𑀢𑁄𑀬𑁂𑀯𑀸𑀢𑀺 𑀤𑀲𑁆𑀲𑀦𑀝𑁆𑀞𑀸𑀦𑀢𑁄𑀬𑁂𑀯. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀔𑀚𑁆𑀚𑀼 𑀯𑀸𑀢𑀺 𑀓𑀡𑁆𑀟𑀼𑀯𑀦𑀁 𑀯𑀸. ‘‘𑀓𑀘𑁆𑀙𑀼 𑀯𑀸’’𑀢𑀺𑀧𑀺 𑀧𑀸𑀞𑁄, 𑀧𑀸𑀫𑀁 𑀯𑀸𑀢𑀺 𑀅𑀢𑁆𑀣𑁄. 𑀧𑀺𑀴𑀓𑀸 𑀯𑀸𑀢𑀺 𑀨𑁄𑀝𑀸 𑀯𑀸. 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑀧𑀫𑀸𑀡𑁂𑀦 𑀖𑀁𑀲𑀺𑀢𑁆𑀯𑀸 𑀦𑁆𑀳𑀸𑀧𑀦𑀫𑀢𑁆𑀢𑁂𑀦. 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀸𑀢𑀺 𑀕𑀺𑀳𑀺𑀪𑀸𑀯𑀁 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑀸. 𑀓𑀢𑀜𑁆𑀜𑀽𑀢𑀺 𑀓𑀢𑀲𑁆𑀲𑀽𑀧𑀓𑀸𑀭𑀲𑁆𑀲 𑀚𑀸𑀦𑀦𑀲𑀻𑀮𑀸. 𑀓𑀢𑀯𑁂𑀤𑀺𑀦𑁄𑀢𑀺 𑀓𑀢𑀜𑁆𑀜𑀽𑀧𑀓𑀸𑀭𑀲𑁆𑀲 𑀯𑁂𑀤𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄.

𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀸𑀢𑀺 𑀬𑀸𑀯𑀤𑀢𑁆𑀣𑀁 𑀲𑀼𑀧𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀻𑀢𑁆𑀯𑀸 𑀘𑀺𑀢𑁆𑀢𑀓𑁂𑀴𑀺𑀁 𑀓𑀭𑁄𑀦𑁆𑀢𑁄 𑀅𑀦𑀼𑀓𑁆𑀓𑀡𑁆𑀞𑀺𑀢𑁄 𑀯𑀺𑀳𑀭𑀸𑀳𑀻𑀢𑀺𑀆𑀤𑀺𑀓𑀸 𑀓𑀣𑀸. 𑀦𑀓𑀣𑁂𑀢𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣𑀔𑁆𑀯𑀲𑁆𑀲𑀸’’𑀢𑀺. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀆𑀘𑀺𑀓𑁆𑀔𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀘𑀺𑀓𑁆𑀔𑀦𑁆𑀢𑁂𑀦 𑀘𑀸’’𑀢𑀺𑀆𑀤𑀺. 𑀯𑀡𑁆𑀡…𑀧𑁂… 𑀯𑀲𑁂𑀦𑀸𑀢𑀺 𑀯𑀡𑁆𑀡𑁄 𑀘 𑀲𑀡𑁆𑀞𑀸𑀦𑀜𑁆𑀘 𑀕𑀦𑁆𑀥𑁄 𑀘 𑀆𑀲𑀬𑁄 𑀘 𑀑𑀓𑀸𑀲𑁄 𑀘, 𑀢𑁂𑀲𑀁 𑀯𑀲𑁂𑀦, 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀨𑀮𑀚𑁄𑀢𑀓𑁄, 𑀆𑀘𑀺𑀓𑁆𑀔𑀦𑀲𑁆𑀲 𑀨𑀮𑀁 𑀯𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄. 𑀧𑀼𑀩𑁆𑀩𑁂𑀢𑀺 𑀧𑀼𑀩𑁆𑀩𑀪𑀯𑁂, 𑀧𑀩𑁆𑀩𑀚𑀦𑀢𑁄 𑀧𑀼𑀩𑁆𑀩𑁂 𑀯𑀸. 𑀓𑀡𑁆𑀝𑀓𑀯𑁂𑀥𑀸𑀧𑁂𑀓𑁆𑀔𑁄 𑀧𑀭𑀺𑀧𑀓𑁆𑀓𑀕𑀡𑁆𑀟𑁄 𑀯𑀺𑀬 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀇𑀦𑁆𑀤𑀸𑀲𑀦𑀻𑀢𑀺 𑀲𑀓𑁆𑀓𑀲𑁆𑀲 𑀯𑀚𑀺𑀭𑀸𑀯𑀼𑀥𑁄. 𑀲𑁄 𑀳𑀺 𑀇𑀦𑁆𑀤𑁂𑀦 𑀅𑀲𑀻𑀬𑀢𑀺 𑀔𑀺𑀧𑀻𑀬𑀢𑀻𑀢𑀺 𑀇𑀦𑁆𑀤𑀸𑀲𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀦𑁆𑀤𑀸𑀲𑀦𑀺 𑀧𑀩𑁆𑀩𑀢𑁂 𑀘𑀼𑀡𑁆𑀡𑀬𑀫𑀸𑀦𑀸 𑀯𑀺𑀬 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀘𑀼𑀡𑁆𑀡𑀬𑀫𑀸𑀦𑀁𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀔𑀼𑀭𑀕𑁆𑀕𑁂𑀬𑁂𑀯𑀸𑀢𑀺 𑀔𑀼𑀭𑀲𑁆𑀲 𑀓𑁄𑀝𑀺𑀬𑀫𑁂𑀯. 𑀔𑀼𑀭𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀢𑁆𑀢𑀸, 𑀢𑀲𑁆𑀫𑀸. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲.

𑀕𑀺𑀳𑀺𑀕𑀦𑁆𑀥𑀦𑁆𑀢𑀺 𑀕𑁂𑀳𑁂 𑀞𑀺𑀢𑀲𑁆𑀲 𑀚𑀦𑀲𑁆𑀲 𑀕𑀦𑁆𑀥𑀁. 𑀅𑀣𑀸𑀧𑀻𑀢𑀺 𑀬𑀤𑀺𑀧𑀺 𑀅𑀘𑁆𑀙𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀆𑀘𑀭𑀺𑀬𑁄 𑀯𑀸𑀢𑀺 𑀲𑀭𑀡𑀤𑀸𑀦𑀸𑀘𑀭𑀺𑀬𑁄 𑀯𑀸 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀯𑀸 𑀑𑀯𑀸𑀤𑀸𑀘𑀭𑀺𑀬𑁄 𑀯𑀸. 𑀢𑀁𑀬𑁂𑀯 𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀫𑁂𑀯 𑀯𑀸. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀯𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀪𑀺𑀓𑁆𑀔𑀼𑀦𑀸 𑀏𑀯.

𑀅𑀦𑀸𑀡𑀢𑁆𑀢𑀺𑀬𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀦𑀸𑀡𑀢𑁆𑀢𑀺𑀬𑀸. 𑀇𑀫𑀺𑀦𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀦𑀸𑀡𑀢𑁆𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀦𑀺𑀯𑀸𑀲𑀦𑀸𑀤𑀻𑀦𑀺 𑀦 𑀓𑀸𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀼𑀦𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀪𑀺𑀓𑁆𑀔𑀼𑀦𑀸. 𑀢𑀲𑁆𑀲𑁂𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲𑁂𑀯. 𑀉𑀧𑀚𑁆𑀛𑀸𑀬𑀫𑀽𑀮𑀓𑁂𑀢𑀺 𑀉𑀧𑀚𑁆𑀛𑀸𑀬𑀫𑀽𑀮𑀓𑁂 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂. 𑀅𑀬𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀝𑁆𑀞𑀸𑀦𑁂. 𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀅𑀣𑀸𑀢𑀺 𑀯𑀦𑁆𑀤𑀸𑀧𑀦𑀢𑁄 𑀧𑀘𑁆𑀙𑀸, 𑀯𑀦𑁆𑀤𑀸𑀧𑀦𑀲𑁆𑀲 𑀅𑀦𑀦𑁆𑀢𑀭𑀸 𑀯𑀸. ‘‘𑀏𑀯𑀁 𑀯𑀤𑁂𑀳𑀻’’𑀢𑀺 𑀧𑀸𑀴𑀺𑀦𑀬𑀦𑀺𑀤𑀲𑁆𑀲𑀦𑀫𑀼𑀔𑁂𑀦 ‘‘𑀬𑀫𑀳𑀁 𑀯𑀤𑀸𑀫𑀺, 𑀢𑀁 𑀯𑀤𑁂𑀳𑀻’’𑀢𑀺 𑀅𑀝𑁆𑀞𑀓𑀣𑀸𑀦𑀬𑀁 𑀦𑀺𑀤𑀲𑁆𑀲𑁂𑀢𑀺. 𑀅𑀣𑀸𑀢𑀺 𑀢𑀤𑀦𑀦𑁆𑀢𑀭𑀁. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲, 𑀤𑀸𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀧𑀤𑀫𑁆𑀧𑀻𑀢𑀺 𑀢𑀻𑀲𑀼 𑀯𑀸𑀓𑁆𑀬𑀧𑀤𑁂𑀲𑀼 𑀏𑀓𑀁 𑀯𑀸𑀓𑁆𑀬𑀧𑀤𑀫𑁆𑀧𑀺, 𑀦𑀯𑀲𑀼 𑀯𑀸 𑀯𑀺𑀪𑀢𑁆𑀬𑀦𑁆𑀢𑀧𑀤𑁂𑀲𑀼 𑀏𑀓𑀧𑀤𑀫𑁆𑀧𑀺. 𑀏𑀓𑀓𑁆𑀔𑀭𑀫𑁆𑀧𑀻𑀢𑀺 𑀘𑀢𑀼𑀯𑀻𑀲𑀢𑀓𑁆𑀔𑀭𑁂𑀲𑀼 𑀏𑀓𑀓𑁆𑀔𑀭𑀫𑁆𑀧𑀺.

𑀏𑀓𑀢𑁄 𑀲𑀼𑀤𑁆𑀥𑀺𑀬𑀸𑀢𑀺 𑀏𑀓𑀲𑁆𑀲𑁂𑀯 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑀲𑁆𑀲 𑀞𑀸𑀦𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀚𑁆𑀛𑀦𑁂𑀦. 𑀉𑀪𑀢𑁄 𑀲𑀼𑀤𑁆𑀥𑀺𑀬𑀸𑀯𑀸𑀢𑀺 𑀉𑀪𑀬𑁂𑀲𑀁 𑀲𑀭𑀡𑀤𑀸𑀦𑀸𑀘𑀭𑀺𑀬𑀲𑀸𑀫𑀡𑁂𑀭𑀸𑀦𑀁 𑀲𑀼𑀚𑁆𑀛𑀦𑁂𑀦 𑀏𑀯. 𑀞𑀸𑀦𑀓𑀭𑀡𑀲𑀫𑁆𑀧𑀤𑀦𑁆𑀢𑀺 𑀉𑀭𑀆𑀤𑀺𑀝𑁆𑀞𑀸𑀦𑀸𑀦𑀜𑁆𑀘 𑀲𑀁𑀯𑀼𑀢𑀸𑀤𑀺𑀓𑀭𑀡𑀸𑀦𑀜𑁆𑀘 𑀲𑀫𑁆𑀧𑀤𑀁. 𑀯𑀢𑁆𑀢𑀼𑀦𑁆𑀢𑀺 𑀞𑀸𑀦𑀓𑀭𑀡𑀲𑀫𑁆𑀧𑀤𑀁 𑀯𑀢𑁆𑀢𑀼𑀁. 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀬𑁄𑀚𑀦𑀸.

𑀇𑀫𑀸𑀦𑀻𑀢𑀺 𑀲𑀭𑀡𑀸𑀦𑀺. 𑀘𑀲𑀤𑁆𑀤𑁄 𑀉𑀧𑀦𑁆𑀬𑀸𑀲𑁄, 𑀧𑀦𑀲𑀤𑁆𑀤𑁄 𑀧𑀤𑀸𑀮𑀗𑁆𑀓𑀸𑀭𑁄. 𑀏𑀓𑀲𑀫𑁆𑀩𑀦𑁆𑀥𑀸𑀦𑀻𑀢𑀺 𑀏𑀓𑀢𑁄 𑀲𑀫𑁆𑀩𑀦𑁆𑀥𑀸𑀦𑀺. 𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 ‘‘𑀩𑀼𑀤𑁆𑀥𑀁’’𑀇𑀢𑀺 ‘‘𑀲𑀭𑀡𑀁’’𑀇𑀢𑀺 𑀧𑀤𑀸𑀦𑀜𑁆𑀘 ‘‘𑀲𑀭𑀡𑀁’’𑀇𑀢𑀺 ‘‘𑀕𑀘𑁆𑀙𑀸𑀫𑀺’’𑀇𑀢𑀺 𑀧𑀤𑀸𑀦𑀜𑁆𑀘 𑀅𑀦𑁆𑀢𑀭𑀸 𑀯𑀺𑀘𑁆𑀙𑁂𑀤𑀫𑀓𑀢𑁆𑀯𑀸 𑀏𑀓𑀲𑀫𑁆𑀩𑀦𑁆𑀥𑀫𑁂𑀯 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀢𑀺𑀡𑁆𑀡𑀁 𑀧𑀤𑀸𑀦𑀫𑀦𑁆𑀢𑀭𑀸 𑀩𑁆𑀬𑀯𑀥𑀸𑀦𑀲𑁆𑀲 𑀓𑀲𑁆𑀲𑀘𑀺 𑀅𑀓𑁆𑀔𑀭𑀲𑁆𑀲 𑀅𑀪𑀸𑀯𑀢𑁄. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀫𑀓𑀸𑀭𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀢𑀺𑀡𑁆𑀡𑀁 𑀧𑀤𑀸𑀦𑀫𑀦𑁆𑀢𑀭𑀸 𑀏𑀓𑀲𑀫𑁆𑀩𑀦𑁆𑀥𑀫𑀓𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀯 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸? 𑀢𑀺𑀡𑁆𑀡𑀁 𑀧𑀤𑀸𑀦𑀫𑀦𑁆𑀢𑀭𑀸 𑀩𑁆𑀬𑀯𑀥𑀸𑀦𑀲𑁆𑀲 𑀦𑀺𑀲𑁆𑀲𑀭𑀲𑁆𑀲 𑀫𑀓𑀸𑀭𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀯𑀘𑀦𑀁, ‘‘𑀦𑀢𑁆𑀣𑀻’’𑀢𑀺𑀧𑀤𑁂 𑀓𑀢𑁆𑀢𑀸, ‘‘𑀦 𑀯𑀼𑀢𑁆𑀢’’𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀢𑀣𑀸𑀢𑀺 ‘‘𑀅𑀳𑀁 𑀪𑀦𑁆𑀢𑁂 𑀩𑀼𑀤𑁆𑀥𑀭𑀓𑁆𑀔𑀺𑀢𑁄’’𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦, 𑀅𑀯𑀤𑀦𑁆𑀢𑀲𑁆𑀲 𑀲𑀭𑀡𑀁 𑀦 𑀓𑀼𑀧𑁆𑀧𑀢𑀺, 𑀩𑀼𑀓𑀸𑀭𑀤𑀓𑀸𑀭𑀸𑀤𑀻𑀦𑀁 𑀩𑁆𑀬𑀜𑁆𑀚𑀦𑀸𑀦𑀁 𑀞𑀸𑀦𑀓𑀭𑀡𑀲𑀫𑁆𑀧𑀤𑀁 𑀳𑀸𑀧𑁂𑀦𑁆𑀢𑀲𑁆𑀲𑁂𑀯 𑀲𑀭𑀡𑀁 𑀓𑀼𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀺𑀓𑁆𑀔𑀢𑁆𑀢𑀼𑀢𑁄 𑀅𑀥𑀺𑀓𑀁 𑀧𑀦 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀲𑀼. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁. 𑀲𑀸𑀢𑀺 𑀉𑀧𑀲𑀫𑁆𑀧𑀤𑀸. 𑀧𑀩𑁆𑀩𑀚𑁆𑀚𑀸 𑀧𑀦 𑀅𑀦𑀼𑀜𑁆𑀜𑀸𑀢𑀸 𑀏𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀢𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀩𑁆𑀩𑀸𑀧𑁂𑀓𑁆𑀔𑁄. 𑀲𑀸𑀢𑀺 𑀧𑀩𑁆𑀩𑀚𑁆𑀚𑀸. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀓𑁂𑀲𑀘𑁆𑀙𑁂𑀤𑀦𑀓𑀸𑀲𑀸𑀬𑀘𑁆𑀙𑀸𑀤𑀦𑀲𑀭𑀡𑀤𑀸𑀦𑁂𑀦. 𑀳𑀻𑀢𑀺 𑀨𑀮𑀚𑁄𑀢𑀓𑁄.

𑀏𑀲𑀸𑀢𑀺 𑀏𑀲𑁄 𑀲𑀸𑀫𑀡𑁂𑀭𑁄𑀢𑀺 𑀅𑀢𑁆𑀣𑁄. ‘‘𑀕𑀢𑀺𑀫𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀡𑁆𑀟𑀺𑀢𑀚𑀸𑀢𑀺𑀓𑁄’’𑀢𑀺. 𑀅𑀣𑀸𑀢𑀺 𑀏𑀯𑀁 𑀲𑀢𑀺. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂𑀢𑀺 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀝𑁆𑀞𑀸𑀦𑁂𑀬𑁂𑀯. 𑀬𑀣𑀸 𑀪𑀕𑀯𑀢𑀸 𑀉𑀤𑁆𑀤𑀺𑀝𑁆𑀞𑀸𑀦𑀺, 𑀢𑀣𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀢𑀦𑁆𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀚𑀸𑀢𑀭𑀽𑀧 𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀯𑁂𑀭𑀫𑀡𑀻’’𑀢𑀺 𑀯𑀘𑀦𑀁.

𑀢𑀦𑁆𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑀁. 𑀬𑀣𑀸𑀧𑀸𑀴𑀺𑀬𑀸𑀯𑀸𑀢𑀺 𑀏𑀯𑀲𑀤𑁆𑀤𑁄 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄, 𑀢𑁂𑀦 𑀬𑀣𑀸𑀧𑀸𑀴𑀺𑀬𑀸𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀬𑀣𑀸𑀧𑀸𑀴𑀺𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀣𑀸 𑀏𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀻𑀢𑀺 𑀯𑀸𑀤𑀁 𑀦𑀺𑀯𑀸𑀭𑁂𑀢𑀺. 𑀬𑀣𑀸𑀧𑀸𑀴𑀺𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀣𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀉𑀤𑁆𑀤𑀺𑀲𑀦𑁆𑀢𑁄𑀧𑀺 𑀦𑀺𑀤𑁆𑀤𑁄𑀲𑁄𑀬𑁂𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀸𑀦𑀻𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀬𑀸𑀯𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁 𑀦 𑀚𑀸𑀦𑀸𑀢𑀺, 𑀦 𑀓𑀼𑀲𑀮𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀢𑀺𑀓𑀸𑀯𑀘𑀭𑁄𑀬𑁂𑀯𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀫𑀻𑀧𑁂 𑀅𑀯𑀘𑀸𑀭𑁄𑀯. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑁆𑀢𑀺 𑀤𑀲𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀫𑀼𑀢𑁆𑀢𑀁 𑀓𑀧𑁆𑀧𑀺𑀬𑀁 𑀧𑀭𑀸𑀫𑀸𑀲𑀸𑀤𑀺𑀜𑁆𑀘 𑀅𑀓𑀧𑁆𑀧𑀺𑀬𑀁 𑀅𑀧𑀭𑀸𑀫𑀸𑀲𑀸𑀤𑀺𑀜𑁆𑀘. 𑀢𑁂𑀦𑀸𑀧𑀻𑀢𑀺 𑀲𑀸𑀫𑀡𑁂𑀭𑁂𑀦𑀸𑀧𑀺. 𑀦𑀸𑀲𑀦𑀗𑁆𑀕𑀸𑀦𑀻𑀢𑀺 𑀮𑀺𑀗𑁆𑀕𑀦𑀸𑀲𑀦𑀅𑀗𑁆𑀕𑀸𑀦𑀺. 𑀲𑀸𑀥𑀼𑀓𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀲𑀸𑀥𑀼𑀓𑀁 𑀅𑀲𑀺𑀓𑁆𑀔𑀦𑁆𑀢𑀲𑁆𑀲 𑀮𑀺𑀗𑁆𑀕𑀦𑀸𑀲𑀦𑀜𑁆𑀘 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀜𑁆𑀘 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁦. 𑀤𑀼𑀢𑀺𑀬𑀫𑀸𑀭𑀓𑀣𑀸

𑁩𑁫. 𑀫𑀬𑁆𑀳𑀦𑁆𑀢𑀺𑀧𑀤𑀲𑁆𑀲 ‘‘𑀅𑀦𑀼𑀧𑁆𑀧𑀢𑁆𑀢𑀸 𑀲𑀘𑁆𑀙𑀺𑀓𑀢𑀸’’𑀢𑀺𑀧𑀤𑁂𑀲𑀼 𑀙𑀝𑁆𑀞𑀻𑀓𑀢𑁆𑀢𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀬𑀸 𑀔𑁄𑀢𑀺 𑀅𑀢𑁆𑀣𑁄’’𑀢𑀺. ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 ‘‘𑀫𑀬𑁆𑀳’’𑀦𑁆𑀢𑀺𑀧𑀤𑀲𑁆𑀲 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺𑀧𑀤𑁂𑀲𑀼 𑀲𑀫𑁆𑀩𑀦𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺 𑀏𑀢𑁆𑀣 𑀓𑀸𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀢𑁂𑀦 𑀳𑁂𑀢𑀼𑀦𑀸’’𑀢𑀺. ‘‘𑀧𑀼𑀦𑀸’’𑀢𑀺𑀆𑀤𑀺𑀦𑀸 ‘‘𑀫𑀬𑁆𑀳’’𑀦𑁆𑀢𑀺𑀧𑀤𑀁 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺𑀧𑀤𑁂𑀲𑀼 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀧𑀼𑀦 ‘‘𑀅𑀦𑀼𑀧𑁆𑀧𑀢𑁆𑀢𑀸, 𑀲𑀘𑁆𑀙𑀺𑀓𑀢𑀸’’𑀢𑀺 𑀧𑀤𑁂𑀲𑀼 𑀓𑀢𑁆𑀢𑀼𑀢𑁆𑀣𑁂 𑀲𑀸𑀫𑀺𑀪𑀸𑀯𑁂𑀦 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑁧𑁧. 𑀪𑀤𑁆𑀤𑀯𑀕𑁆𑀕𑀺𑀬𑀓𑀣𑀸

𑁩𑁬. 𑀪𑀤𑁆𑀤𑀁 𑀭𑀽𑀧𑀜𑁆𑀘 𑀘𑀺𑀢𑁆𑀢𑀜𑁆𑀘 𑀏𑀢𑁂𑀲𑀫𑀢𑁆𑀣𑀻𑀢𑀺 𑀪𑀤𑁆𑀤𑀓𑀸. 𑀯𑀕𑁆𑀕𑀩𑀦𑁆𑀥𑀦𑀁 𑀯𑀕𑁆𑀕𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀯𑀕𑁆𑀕𑁂𑀦 𑀘𑀭𑀦𑁆𑀢𑀻𑀢𑀺 𑀯𑀕𑁆𑀕𑀺𑀬𑀸. 𑀪𑀤𑁆𑀤𑀓𑀸 𑀘 𑀢𑁂 𑀯𑀕𑁆𑀕𑀺𑀬𑀸 𑀘𑀸𑀢𑀺 𑀪𑀤𑁆𑀤𑀯𑀕𑁆𑀕𑀺𑀬𑀸 𑀓𑀓𑀸𑀭𑀮𑁄𑀧𑁂𑀦𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀤𑁆𑀤𑀯𑀕𑁆𑀕𑀺𑀬𑀸’’𑀢𑀺𑀆𑀤𑀺. ‘‘𑀯𑁄𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀘 𑀬𑁄𑀯𑀘𑀦𑀲𑁆𑀲 𑀘 𑀓𑀸𑀭𑀺𑀬𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑁂𑀢𑀺 𑀪𑀤𑁆𑀤𑀯𑀕𑁆𑀕𑀺𑀬𑀸. 𑀇𑀤𑀦𑁆𑀢𑀺 𑀧𑀜𑁆𑀘𑀲𑀻𑀮𑀭𑀓𑁆𑀔𑀦𑀁. 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑁂 𑀉𑀧𑀘𑀺𑀢𑀁 𑀓𑀼𑀲𑀮𑀓𑀫𑁆𑀫𑀁.

𑁧𑁨. 𑀉𑀭𑀼𑀯𑁂𑀮𑀧𑀸𑀝𑀺𑀳𑀸𑀭𑀺𑀬𑀓𑀣𑀸

𑁩𑁮. 𑀧𑀭𑀺𑀬𑀸𑀤𑀺𑀬𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀤𑀸𑀥𑀸𑀢𑀼𑀲𑁆𑀲 𑀧𑀭𑀻𑀢𑀺 𑀘 𑀆𑀢𑀺 𑀘 𑀉𑀧𑀲𑀕𑁆𑀕𑀯𑀲𑁂𑀦 𑀅𑀪𑀺𑀪𑀯𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀪𑀯𑁂𑀬𑁆𑀬’’𑀦𑁆𑀢𑀺.

𑁩𑁯. 𑀧𑀘𑁆𑀙𑀸 𑀧𑀓𑁆𑀔𑀺𑀢𑁆𑀢𑀸𑀢𑀺 𑀲𑀗𑁆𑀕𑀻𑀢𑀺𑀢𑁄 𑀧𑀭𑀁 𑀧𑁄𑀢𑁆𑀣𑀓𑀸𑀭𑀽𑀴𑁆𑀳𑁂𑀳𑀺 𑀞𑀧𑀺𑀢𑀸𑀢𑀺 𑀅𑀢𑁆𑀣𑁄.

𑁪𑁪. ‘‘𑀏𑀯𑀁 𑀯𑀤𑀦𑁆𑀢𑁄 𑀯𑀺𑀬 𑀑𑀡𑀢𑁄’’𑀢𑀺 𑀇𑀫𑀺𑀦𑀸 ‘‘𑀆𑀳𑀭𑀳𑀢𑁆𑀣𑁄’’𑀢𑀺𑀧𑀤𑀲𑁆𑀲 𑀢𑀤𑁆𑀥𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀺𑀢𑁆𑀣𑀺𑀡𑁆𑀡𑀫𑀼𑀔𑀢𑁆𑀢𑀸 𑀫𑀦𑁆𑀤𑀁 𑀳𑀻𑀦𑀁 𑀅𑀢𑀺𑀫𑀼𑀔𑀫𑁂𑀢𑀸𑀲𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀅𑀕𑁆𑀕𑀺𑀓𑀧𑀸𑀮𑀸 𑀫𑀦𑁆𑀤𑀸𑀫𑀼𑀔𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀅𑀕𑁆𑀕𑀺𑀪𑀸𑀚𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺.

𑁫𑁧. 𑀬𑀲𑁆𑀫𑀸 𑀬𑁄 𑀦𑀸𑀕𑀤𑀫𑀦𑀓𑀸𑀮𑁄 𑀘𑀺𑀭𑀁 𑀧𑀢𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑁄 𑀘𑀺𑀭𑀧𑀢𑀺𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀘𑀺𑀭𑀧𑀢𑀺𑀓𑀸 𑀧𑀝𑁆𑀞𑀸𑀬 𑀅𑀪𑀺𑀧𑁆𑀧𑀲𑀦𑁆𑀦𑀸𑀢𑀺 𑀬𑁄𑀚𑀦𑀸. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬𑀸’’𑀢𑀺.

𑁫𑁨. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀚𑀝𑀸𑀫𑀺𑀲𑁆𑀲’’𑀦𑁆𑀢𑀺𑀆𑀤𑀺𑀧𑀤𑁂𑀲𑀼. 𑀔𑀸𑀭𑀺𑀓𑀸𑀚𑀦𑁆𑀢𑀺 𑀏𑀢𑁆𑀣 𑀓𑀫𑀡𑁆𑀟𑀮𑀼𑀆𑀤𑀺𑀓𑀸 𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑀸 𑀔𑀸𑀭𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀔𑀸𑀭𑀺𑀲𑀗𑁆𑀔𑀸𑀢𑁂𑀦 𑀪𑀸𑀭𑁂𑀦 𑀧𑀽𑀭𑀺𑀢𑁄 𑀓𑀸𑀚𑁄 𑀔𑀸𑀭𑀺𑀓𑀸𑀚𑁄𑀢𑀺 𑀅𑀢𑁆𑀣𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀸𑀭𑀺𑀪𑀸𑀭𑁄’’𑀢𑀺.

𑁧𑁩. 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀓𑀣𑀸

𑁫𑁫. 𑀮𑀝𑁆𑀞𑀺𑀲𑀤𑁆𑀤𑁄 𑀢𑀭𑀼𑀡𑀭𑀼𑀓𑁆𑀔𑀯𑀸𑀘𑀓𑁄 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨), 𑀇𑀥𑀸𑀧𑀺 𑀢𑀭𑀼𑀡𑀢𑀸𑀮𑀭𑀼𑀓𑁆𑀔𑁄 𑀮𑀝𑁆𑀞𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀸𑀮𑀼𑀬𑁆𑀬𑀸𑀦𑁂’’𑀢𑀺. 𑀯𑀝𑀭𑀼𑀓𑁆𑀔𑁂𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂. 𑀏𑀢𑁆𑀣 ‘‘𑀯𑀝’’𑀇𑀢𑀺 𑀇𑀫𑀺𑀦𑀸 𑀯𑀝𑀭𑀼𑀓𑁆𑀔𑁄 𑀩𑀳𑀼𑀫𑀽𑀮𑀢𑁆𑀢𑀸 𑀲𑀼𑀝𑁆𑀞𑀼𑀁 𑀧𑀢𑀺𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀭𑀼𑀓𑁆𑀔𑁂’’𑀇𑀢𑀺 𑀇𑀫𑀺𑀦𑀸 𑀘𑁂𑀢𑀺𑀬𑀲𑀤𑁆𑀤𑁄 𑀘𑁂𑀢𑀺𑀬𑀭𑀼𑀓𑁆𑀔𑁂 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀤𑁂𑀯𑀸𑀮𑀬𑀜𑁆𑀘 𑀣𑀽𑀧𑀜𑁆𑀘 𑀦𑀺𑀯𑀢𑁆𑀢𑁂𑀢𑀺. 𑀢𑀲𑁆𑀲𑀸𑀢𑀺 𑀯𑀝𑀭𑀼𑀓𑁆𑀔𑀲𑁆𑀲. 𑀏𑀢𑀦𑁆𑀢𑀺 ‘‘𑀲𑀼𑀧𑁆𑀧𑀢𑀺𑀝𑁆𑀞𑁂 𑀘𑁂𑀢𑀺𑀬𑁂’’𑀢𑀺 𑀏𑀢𑀁 𑀦𑀸𑀫𑀁. 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀤𑀲𑀲𑀳𑀲𑁆𑀲𑀲𑀗𑁆𑀔𑀸𑀢𑁂 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁂 𑀦𑀻𑀳𑀭𑀺𑀢𑁆𑀯𑀸 𑀬𑀼𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀦𑀺𑀬𑀼𑀢𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀤𑀲𑀲𑀳𑀲𑁆𑀲𑀁 𑀦𑀺𑀬𑀼𑀢𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀦𑀺𑀬𑀼𑀢𑀁 𑀤𑀲𑀲𑀳𑀲𑁆𑀲𑀸𑀦𑀻’’𑀢𑀺. ‘‘𑀦𑀳𑀼𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄 𑀦𑀳𑀼𑀢𑀲𑀗𑁆𑀔𑀸𑀢𑁂𑀦 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁂𑀦 𑀫𑀺𑀲𑁆𑀲𑀻𑀪𑀸𑀯𑁂𑀦 𑀧𑀲𑀗𑁆𑀕𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀤𑁆𑀯𑀸𑀤𑀲𑀦𑀺𑀬𑀼𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁.

‘‘𑀓𑀺𑀲𑀲𑀭𑀻𑀭𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀓𑀺𑀲𑁄 𑀓𑁄 𑀅𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀓𑀺𑀲𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀓𑀸𑀭𑁄 𑀳𑁂𑀢𑁆𑀣 𑀅𑀢𑁆𑀢𑀯𑀸𑀘𑀓𑁄. ‘‘𑀑𑀯𑀸𑀤𑀓𑁄’’𑀢𑀺 𑀇𑀫𑀺𑀦𑀸 𑀑𑀯𑀤𑀸𑀦𑁄𑀢𑀺 𑀏𑀢𑁆𑀣 𑀬𑀼𑀧𑀘𑁆𑀘𑀬𑁄 𑀓𑀢𑁆𑀢𑀼𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀸𑀣𑀸𑀩𑀦𑁆𑀥𑀢𑁆𑀢𑀸 𑀅𑀓𑀸𑀭𑀲𑁆𑀲 𑀤𑀻𑀖𑁄. ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀓𑀺𑀲𑀓𑁄 𑀳𑀼𑀢𑁆𑀯𑀸 𑀅𑀜𑁆𑀜𑁂 𑀑𑀯𑀤𑀸𑀦𑁄 𑀓𑀺𑀲𑀓𑁄𑀯𑀤𑀸𑀦𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀤𑀦𑁆𑀢𑀺 𑀇𑀤𑀁 𑀅𑀢𑁆𑀣𑀚𑀸𑀢𑀁, 𑀅𑀬𑀫𑀢𑁆𑀣𑁄 𑀯𑀸. 𑀢𑁆𑀯𑀁 𑀧𑀳𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀢𑀼𑀯𑀁. 𑀇𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀓𑀸𑀫𑀺𑀢𑁆𑀣𑀺𑀬𑁄𑀢𑀺 𑀏𑀓𑀸𑀭𑀮𑁄𑀧𑀯𑀲𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀓𑀸𑀫𑁂 𑀇𑀢𑁆𑀣𑀺𑀬𑁄 𑀘𑀸’’𑀢𑀺. 𑀉𑀧𑀘𑀻𑀲𑀽𑀢𑀺 𑀏𑀢𑁆𑀣 𑀓𑀸𑀫𑀔𑀦𑁆𑀥𑀓𑀺𑀮𑁂𑀲𑀅𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀉𑀧𑀥𑀻𑀲𑀼 𑀔𑀦𑁆𑀥𑀼𑀧𑀥𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀦𑁆𑀥𑀼𑀧𑀥𑀻𑀲𑀽’’𑀢𑀺.

𑀓𑁄𑀘𑀭𑀳𑀻𑀢𑀺 𑀏𑀢𑁆𑀣 𑀓𑁄𑀲𑀤𑁆𑀤𑁄 ‘‘𑀓𑁄 𑀢𑁂 𑀩𑀮𑀁 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧𑁮𑁮𑁦) 𑀯𑀺𑀬 𑀓𑁆𑀯𑀲𑀤𑁆𑀤𑀢𑁆𑀣𑁄𑀢𑀺 𑀆𑀳 ‘‘𑀓𑁆𑀯𑀘𑀭𑀳𑀻’’𑀢𑀺. 𑀦𑀺𑀧𑀸𑀢𑁄𑀬𑁂𑀯𑁂𑀲.

𑀧𑀤𑀲𑀤𑁆𑀤𑀲𑁆𑀲 𑀘𑀭𑀡𑀧𑀤𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀧𑀤’’𑀦𑁆𑀢𑀺. ‘‘𑀲𑀦𑁆𑀢𑀲𑀪𑀸𑀯𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀦𑁆𑀢𑁄 𑀲𑀪𑀸𑀯𑁄 𑀇𑀫𑀲𑁆𑀲 𑀧𑀤𑀲𑁆𑀲𑀸𑀢𑀺 𑀲𑀦𑁆𑀢𑀁. 𑀦𑀢𑁆𑀣𑀺 𑀉𑀧𑀥𑀬𑁄 𑀏𑀢𑁆𑀣𑀸𑀢𑀺 𑀅𑀦𑀼𑀧𑀥𑀺𑀓𑀁. 𑀦𑀢𑁆𑀣𑀺 𑀓𑀺𑀜𑁆𑀘𑀦𑀫𑁂𑀢𑁆𑀣𑀸𑀢𑀺 𑀅𑀓𑀺𑀜𑁆𑀘𑀦𑀁. 𑀢𑀻𑀲𑀼 𑀪𑀯𑁂𑀲𑀼 𑀦 𑀲𑀜𑁆𑀚𑀢𑀻𑀢𑀺 𑀅𑀲𑀢𑁆𑀢𑀁. 𑀅𑀜𑁆𑀜𑀣𑀸 𑀦 𑀪𑀯𑀢𑀻𑀢𑀺 𑀅𑀦𑀜𑁆𑀜𑀣𑀸𑀪𑀸𑀯𑀺. 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀦 𑀦𑁂𑀢𑀩𑁆𑀩𑀦𑁆𑀢𑀺 𑀅𑀦𑀜𑁆𑀜𑀦𑁂𑀬𑁆𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 ‘‘𑀲𑀦𑁆𑀢’’𑀦𑁆𑀢𑀺𑀆𑀤𑀺𑀧𑀤𑁂𑀦. 𑀫𑁂𑀢𑀺 𑀫𑀫, 𑀫𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂 𑀫𑁂 𑀫𑀦𑁄 𑀭𑀢𑁄 𑀦𑀸𑀫𑀸𑀢𑀺 𑀓𑀺𑀁 𑀯𑀓𑁆𑀔𑀸𑀫𑀺. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸.

𑁫𑁬. 𑀢𑀜𑁆𑀘𑀸𑀢𑀺 𑀲𑀸𑀯𑀓𑀪𑀸𑀯𑀜𑁆𑀘.

𑁫𑁭. 𑀅𑀲𑁆𑀲𑀸𑀲𑀓𑀸𑀢𑀺 𑀏𑀢𑁆𑀣 𑀆𑀧𑀼𑀩𑁆𑀩𑁄 𑀲𑀸𑀲𑀥𑀸𑀢𑀼 𑀆𑀧𑀼𑀩𑁆𑀩 𑀲𑀺𑀲𑀥𑀸𑀢𑀼𑀦𑀸 𑀲𑀤𑀺𑀲𑁄, ‘‘𑀫𑁂’’𑀢𑀺 𑀙𑀝𑁆𑀞𑀻𑀬𑁄𑀕𑀢𑁆𑀢𑀸 𑀡𑁆𑀯𑀼𑀧𑀘𑁆𑀘𑀬𑁄 𑀘 𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀆𑀲𑀺𑀲𑀦𑀸’’𑀢𑀺. ‘‘𑀧𑀢𑁆𑀣𑀦𑀸’’𑀢𑀺 𑀇𑀫𑀺𑀦𑀸 𑀆𑀧𑀼𑀩𑁆𑀩𑀲𑀺𑀲𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀢𑀢𑁆𑀣𑀸𑀢𑀺 𑀭𑀢𑀦𑀢𑁆𑀢𑀬𑁂. 𑀦𑀺𑀘𑁆𑀙𑀬𑀕𑀫𑀦𑀫𑁂𑀯𑀸𑀢𑀺 ‘‘𑀲𑀭𑀡’’𑀇𑀢𑀺𑀦𑀺𑀘𑁆𑀙𑀬𑁂𑀦 𑀚𑀸𑀦𑀦𑀫𑁂𑀯 𑀕𑀢𑁄. 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀭𑀢𑀦𑀢𑁆𑀢𑀬𑁂 𑀲𑀦𑁆𑀦𑀺𑀬𑁆𑀬𑀸𑀢𑀦𑀁. 𑀇𑀫𑀺𑀦𑀸 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦, 𑀧𑀡𑀺𑀧𑀸𑀢, 𑀢𑀧𑁆𑀧𑀭𑀸𑀬𑀦, 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀲𑀗𑁆𑀔𑀸𑀢𑁂𑀲𑀼 𑀘𑀢𑀽𑀲𑀼 𑀲𑀭𑀡𑀕𑀫𑀦𑁂𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁦; 𑀫. 𑀦𑀺. 𑀅𑀝𑁆𑀞. 𑁧.𑁫𑁬; 𑀔𑀼. 𑀧𑀸. 𑀅𑀝𑁆𑀞. 𑁧.𑀲𑀭𑀡𑀕𑀫𑀦𑀕𑀫𑀓𑀯𑀺𑀪𑀸𑀯𑀦𑀸) 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀲𑀭𑀡𑀕𑀫𑀦𑀁 𑀤𑀻𑀧𑁂𑀢𑀺. 𑀅𑀬𑀦𑁆𑀢𑀺 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸. 𑀢𑀦𑁆𑀢𑀺 𑀦𑀺𑀬𑀢𑀲𑀭𑀡𑀢𑀁. 𑀧𑀡𑀺𑀧𑀸𑀢𑀕𑀫𑀦𑀜𑁆𑀘𑀸𑀢𑀺 𑀏𑀢𑁆𑀣 𑀧𑀡𑀻𑀢𑀺 𑀓𑀭𑁄. 𑀬𑀣𑀸 𑀳𑀺 𑀧𑀸𑀤𑀧𑀤𑀲𑀤𑁆𑀤𑀸 𑀤𑀻𑀖𑀭𑀲𑁆𑀲𑀯𑀲𑁂𑀦 𑀳𑀼𑀢𑁆𑀯𑀸 𑀘𑀭𑀡𑀁 𑀯𑀤𑀦𑁆𑀢𑀺, 𑀏𑀯𑀁 𑀧𑀸𑀡𑀺𑀧𑀡𑀺𑀲𑀤𑁆𑀤𑀸 𑀓𑀭𑀁 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀡𑀻𑀢𑀺 𑀓𑀭𑁄’’𑀢𑀺. 𑀧𑀢𑀦𑀁 𑀧𑀸𑀢𑁄, 𑀧𑀡𑀺𑀦𑁄 𑀧𑀸𑀢𑁄 𑀧𑀡𑀺𑀧𑀸𑀢𑁄. 𑀅𑀢𑁆𑀣𑀢𑁄 𑀅𑀜𑁆𑀚𑀮𑀺𑀧𑀡𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀕𑀫𑀦𑀜𑁆𑀘 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀡𑀺𑀧𑀸𑀢𑀲𑀭𑀡𑀕𑀫𑀦𑀁 𑀤𑀻𑀧𑁂𑀢𑀺. 𑀘𑀲𑀤𑁆𑀤𑁄 ‘‘𑀧𑀸𑀓𑀝’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀧𑀸𑀓𑀝𑀜𑁆𑀘 𑀓𑀭𑁄𑀦𑁆𑀢𑁄𑀢𑀺 𑀳𑀺 𑀅𑀢𑁆𑀣𑁄.

𑁫𑁮. 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄𑀢𑀺 𑀏𑀢𑁆𑀣 𑀲𑀺𑀗𑁆𑀕𑀻𑀲𑀗𑁆𑀔𑀸𑀢𑁄 𑀦𑀺𑀓𑁆𑀔𑁄 𑀲𑀺𑀗𑁆𑀕𑀻𑀦𑀺𑀓𑁆𑀔𑁄, 𑀢𑁂𑀦 𑀲𑀫𑀸𑀦𑁄 𑀯𑀡𑁆𑀡𑁄 𑀏𑀢𑀲𑁆𑀲𑀸𑀢𑀺 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑀯𑀡𑁆𑀡𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀦𑀺𑀓𑁆𑀔𑁂𑀦 𑀲𑀫𑀸𑀦𑀯𑀡𑁆𑀡𑁄’’𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡’’𑀇𑀢𑀺𑀧𑀤𑁂𑀦 𑀦𑀺𑀓𑁆𑀔𑀲𑀤𑁆𑀤𑀲𑁆𑀲 𑀲𑀼𑀯𑀡𑁆𑀡𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀘𑀲𑀼𑀯𑀡𑁆𑀡𑀸𑀤𑀬𑁄 𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. ‘‘𑀲𑀫𑀸𑀦’’𑀇𑀢𑀺𑀧𑀤𑁂𑀦 𑀲𑀯𑀡𑁆𑀡𑁄𑀢𑀺 𑀏𑀢𑁆𑀣 𑀲𑀓𑀸𑀭𑁄 𑀲𑀫𑀸𑀦𑀲𑀤𑁆𑀤𑀲𑁆𑀲𑁂𑀯 𑀓𑀸𑀭𑀺𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑁂𑀲𑀽𑀢𑀺 𑀅𑀔𑀺𑀮𑁂𑀲𑀼 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑁂𑀲𑀼. 𑀤𑀦𑁆𑀢𑁄𑀢𑀺 𑀤𑀫𑀺𑀢𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺.

𑁫𑁯. 𑀑𑀡𑀻𑀢𑁄 𑀧𑀢𑁆𑀢𑀢𑁄 𑀧𑀸𑀡𑀺 𑀬𑁂𑀦𑀸𑀢𑀺 𑀑𑀡𑀻𑀢𑀧𑀢𑁆𑀢𑀧𑀸𑀡𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀢𑁆𑀢𑀢𑁄 𑀘𑀸’’𑀢𑀺𑀆𑀤𑀺. ‘‘𑀅𑀧𑀦𑀻𑀢𑀧𑀸𑀡𑀺’’𑀦𑁆𑀢𑀺 𑀇𑀫𑀺𑀦𑀸 𑀑𑀡𑀻𑀢𑀲𑀤𑁆𑀤𑁄 𑀅𑀧𑀦𑀻𑀢𑀢𑁆𑀣𑁄, 𑀧𑀸𑀡𑀺𑀲𑀤𑁆𑀤𑁂𑀦 𑀘 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 ‘‘𑀪𑀕𑀯𑀦𑁆𑀢’’𑀦𑁆𑀢𑀺 𑀇𑀫𑀁 𑀓𑀫𑁆𑀫𑀁 ‘‘𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀫𑀦𑁆𑀢𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀲𑀤𑁆𑀤𑁄 𑀲𑀫𑀻𑀧𑀤𑁂𑀲𑀢𑁆𑀣𑁄, 𑀓𑁄𑀝𑀺𑀤𑁂𑀲𑀢𑁆𑀣𑁄 𑀯𑀸 𑀳𑁄𑀢𑀺, 𑀉𑀧𑀬𑁄𑀕𑀯𑀘𑀦𑀜𑁆𑀘 𑀪𑀼𑀫𑁆𑀫𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀲𑁆𑀫𑀺𑀁 𑀧𑀤𑁂𑀲𑁂’’𑀢𑀺. 𑀅𑀢𑁆𑀣𑀺𑀓𑀧𑀬𑁄𑀕𑁂 𑀓𑀭𑀡𑀲𑁆𑀲 𑀲𑀫𑁆𑀪𑀯𑀢𑁄 𑀆𑀳 ‘‘𑀩𑀼𑀤𑁆𑀥𑀸𑀪𑀺𑀯𑀸𑀤𑀦𑀕𑀫𑀦𑁂𑀦 𑀯𑀸 𑀥𑀫𑁆𑀫𑀲𑁆𑀲𑀯𑀦𑀕𑀫𑀦𑁂𑀦 𑀯𑀸’’𑀢𑀺. 𑀅𑀧𑁆𑀧𑀸𑀓𑀺𑀡𑁆𑀡𑀦𑁆𑀢𑀺 𑀏𑀢𑁆𑀣 𑀅𑀧𑁆𑀧𑀲𑀤𑁆𑀤𑁄 𑀧𑀝𑀺𑀲𑁂𑀥𑀢𑁆𑀣𑁄𑀢𑀺 𑀆𑀳 ‘‘𑀅𑀦𑀸𑀓𑀺𑀡𑁆𑀡’’𑀦𑁆𑀢𑀺. ‘‘𑀅𑀩𑁆𑀩𑁄𑀓𑀺𑀡𑁆𑀡’’𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀏𑀢𑁆𑀣 ‘‘𑀅𑀧𑁆𑀧𑀲𑀤𑁆𑀤’’𑀦𑁆𑀢𑀺𑀧𑀤𑁂𑀦 𑀯𑀘𑀦𑀲𑀤𑁆𑀤𑀲𑁆𑀲 𑀕𑀳𑀺𑀢𑀢𑁆𑀢𑀸 𑀇𑀫𑀺𑀦𑀸 𑀧𑀸𑀭𑀺𑀲𑁂𑀲𑀦𑀬𑁂𑀦 𑀦𑀕𑀭𑀦𑀺𑀕𑁆𑀖𑁄𑀲𑀲𑀤𑁆𑀤𑁄𑀬𑁂𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀦𑀕𑀭𑀦𑀺𑀕𑁆𑀖𑁄𑀲𑀲𑀤𑁆𑀤𑁂𑀦 𑀅𑀧𑁆𑀧𑀦𑀺𑀕𑁆𑀖𑁄𑀲’’𑀦𑁆𑀢𑀺. 𑀢𑀻𑀲𑀼 𑀧𑀸𑀞𑁂𑀲𑀼 𑀧𑀞𑀫𑁂𑀦 𑀧𑀸𑀞𑁂𑀦 𑀚𑀦𑀲𑁆𑀲 𑀯𑀸𑀢𑁄 𑀚𑀦𑀯𑀸𑀢𑁄, 𑀢𑁂𑀦 𑀯𑀺𑀭𑀳𑀺𑀢𑀁 𑀯𑀺𑀚𑀦𑀯𑀸𑀢𑀦𑁆𑀢𑀺 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑁂𑀦 𑀚𑀦𑀲𑁆𑀲 𑀯𑀸𑀤𑁄 𑀚𑀦𑀯𑀸𑀤𑁄, 𑀢𑁂𑀦 𑀯𑀺𑀭𑀳𑀺𑀢𑀁 𑀯𑀺𑀚𑀦𑀯𑀸𑀤𑀦𑁆𑀢𑀺 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀺. 𑀢𑀢𑀺𑀬𑁂𑀦 𑀚𑀦𑀲𑁆𑀲 𑀧𑀸𑀢𑁄 𑀲𑀜𑁆𑀘𑀭𑀡𑀁 𑀚𑀦𑀧𑀸𑀢𑁄, 𑀢𑁂𑀦 𑀯𑀺𑀭𑀳𑀺𑀢𑀁 𑀯𑀺𑀚𑀦𑀧𑀸𑀢𑀦𑁆𑀢𑀺 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀺. 𑀭𑀳𑀲𑁆𑀲𑀁 𑀓𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀭𑀸𑀳𑀲𑁆𑀲𑁂𑀬𑁆𑀬𑀓𑀁. 𑀫𑀦𑀼𑀲𑁆𑀲𑀸𑀦𑀁 𑀭𑀸𑀳𑀲𑁆𑀲𑁂𑀬𑁆𑀬𑀓𑀁 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀺𑀦𑀸.

𑁧𑁪. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦 𑀧𑀩𑁆𑀩𑀚𑁆𑀚𑀸𑀓𑀣𑀸

𑁬𑁦. ‘‘𑀢𑁂𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸. 𑀅𑀕𑀫𑀁𑀲𑀼 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀕𑀺𑀭𑀕𑁆𑀕𑀲𑀫𑀚𑁆𑀚𑁂. 𑀅𑀣𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀦𑀸𑀦𑀦𑁆𑀢𑀭𑀁. 𑀢𑀲𑁆𑀲𑀸𑀢𑀺 𑀲𑀜𑁆𑀘𑀬𑀲𑁆𑀲. 𑀧𑀸𑀭𑀦𑁆𑀢𑀺 𑀧𑀭𑀢𑀻𑀭𑀁. 𑀏𑀢𑁆𑀣𑀸𑀢𑀺 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂. 𑀇𑀤𑀦𑁆𑀢𑀺 𑀅𑀬𑀁 𑀯𑀸𑀤𑁄 𑀏𑀢𑁆𑀢𑀓𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀬𑁄𑀢𑀺 𑀬𑁄 𑀓𑁄𑀘𑀺. 𑀢𑁆𑀯𑀜𑁆𑀘 𑀅𑀳𑀜𑁆𑀘 𑀅𑀫𑁆𑀳𑁂, 𑀢𑁂𑀲𑀼. 𑀦𑀸𑀫𑀢𑀼𑀫𑁆𑀳𑀲𑀗𑁆𑀔𑀸𑀢𑁂𑀲𑀼 𑀳𑀺 𑀢𑀻𑀲𑀼 𑀲𑀤𑁆𑀤𑁂𑀲𑀼 𑀏𑀓𑀲𑁂𑀲𑁂𑀦 𑀓𑀢𑁆𑀢𑀩𑁆𑀩𑁂𑀲𑀼 𑀧𑀘𑁆𑀙𑀺𑀫𑀲𑁆𑀲𑁂𑀯 𑀏𑀓𑀲𑁂𑀲𑁄 𑀓𑀸𑀢𑀩𑁆𑀩𑁄. 𑀢𑁂𑀦𑀸𑀢𑀺 𑀓𑀢𑀺𑀓𑀓𑀭𑀡𑀳𑁂𑀢𑀼𑀦𑀸.

𑀲𑀁𑀔𑁂𑀧𑁂𑀦 𑀯𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀳𑀻’’𑀢𑀺𑀆𑀤𑀺. 𑀅𑀢𑁆𑀣𑀻𑀓𑁂𑀳𑀻𑀢𑀺 𑀅𑀫𑀢𑁂𑀦 𑀅𑀢𑁆𑀣𑀺𑀓𑁂𑀳𑀺. 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕𑀦𑁆𑀢𑀺 𑀅𑀫𑀢𑀲𑁆𑀲 𑀫𑀕𑁆𑀕𑁄 𑀉𑀧𑀕𑀦𑁆𑀢𑁆𑀯𑀸 𑀜𑀸𑀢𑁄. 𑀜𑀸𑀢𑁄 𑀘𑁂𑀯 𑀉𑀧𑀕𑀢𑁄 𑀘𑀸𑀢𑀺 𑀲𑀳 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑁄 𑀉𑀧𑀲𑀕𑁆𑀕𑀢𑁆𑀣𑁄 𑀘 𑀥𑀸𑀢𑀼𑀢𑁆𑀣𑁄 𑀘 𑀯𑀺𑀲𑀼𑀁𑀬𑁂𑀯 𑀳𑁄𑀢𑀻𑀢𑀺 𑀜𑀸𑀧𑁂𑀢𑀺. 𑀅𑀢𑁆𑀣𑀺𑀓𑁂𑀳𑀺 𑀅𑀫𑁆𑀳𑁂𑀳𑀺 𑀉𑀧𑀜𑁆𑀜𑀸𑀢𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀁 𑀫𑀕𑁆𑀕𑀦𑁆𑀢𑁄 𑀅𑀦𑀼𑀩𑀦𑁆𑀥𑁂𑀬𑁆𑀬𑀦𑁆𑀢𑀺 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀉𑀧𑀕𑀦𑁆𑀢𑁆𑀯𑀸 𑀜𑀸𑀢𑀩𑁆𑀩𑀦𑁆𑀢𑀺 𑀉𑀧𑀜𑁆𑀜𑀸𑀢𑀁 𑀦𑀺𑀩𑁆𑀩𑀸𑀦𑀁. 𑀫𑀕𑁆𑀕𑀥𑀸𑀣𑀼𑀬𑀸 𑀅𑀦𑁆𑀯𑁂𑀲𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀬𑁂𑀲𑀦𑁆𑀢𑁄’’𑀢𑀺.

𑀲𑀸𑀭𑀺𑀧𑀼𑀢𑁆𑀢𑁄𑀧𑀺 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑀡𑁆𑀟𑀮𑀼𑀢𑁄𑀢𑀺 𑀓𑀼𑀡𑁆𑀟𑀺𑀓𑀢𑁄. 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀅𑀓𑀣𑀦𑁂𑀦 𑀅𑀦𑁆𑀢𑀭𑁂 𑀯𑀺𑀯𑀭𑀁 𑀧𑀝𑀺𑀲𑀦𑁆𑀤𑀳𑀢𑀻𑀢𑀺 𑀧𑀝𑀺𑀲𑀦𑁆𑀥𑀸𑀭𑁄, 𑀢𑀁. 𑀏𑀢𑁆𑀣𑀸𑀢𑀺 ‘‘𑀦 𑀢𑁆𑀬𑀸𑀳𑀁 𑀲𑀓𑁆𑀓𑁄𑀫𑀻’’𑀢𑀺𑀧𑀤𑁂. 𑀅𑀥𑀺𑀧𑁆𑀧𑀸𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀢𑀓𑀦𑁆𑀢𑀺 𑀏𑀢𑁆𑀢𑀓𑀁 𑀧𑀜𑁆𑀳𑀁. 𑀇𑀫𑀲𑁆𑀲𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀅𑀯𑀺𑀲𑀬𑀪𑀸𑀯𑀦𑁆𑀢𑀺 𑀅𑀢𑁆𑀢𑀦𑁄 𑀅𑀯𑀺𑀲𑀬𑀪𑀸𑀯𑀁.

𑀳𑁂𑀢𑀼𑀁 𑀧𑀝𑀺𑀘𑁆𑀘 𑀪𑀯𑀦𑁆𑀢𑀻𑀢𑀺 𑀳𑁂𑀢𑀼𑀧𑁆𑀧𑀪𑀯𑀸𑀢𑀺 𑀯𑀘𑀦𑀢𑁆𑀣𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁂𑀢𑀼𑀧𑁆𑀧𑀪𑀯𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑁂𑀢𑀼𑀧𑁆𑀧𑀪𑀯𑀸 𑀦𑀸𑀫 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺. 𑀢𑁂𑀦𑀸𑀢𑀺 ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺 𑀧𑀤𑁂𑀦. 𑀅𑀲𑁆𑀲𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀧𑀭𑀺𑀩𑁆𑀩𑀸𑀚𑀓𑀲𑁆𑀲. ‘‘𑀢𑁂𑀲𑀁 𑀳𑁂𑀢𑀼 𑀦𑀸𑀫 𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀳𑀺𑀦𑁄𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀳𑁂𑀢𑀽𑀢𑀺 𑀯𑀘𑀦𑀢𑁆𑀣𑁂𑀦 𑀲𑀫𑀼𑀤𑀬𑀲𑀘𑁆𑀘𑀁 𑀳𑁂𑀢𑀼 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀜𑁆𑀘𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀜𑁆𑀘. 𑀢𑁂𑀲𑀦𑁆𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀪𑀺𑀦𑁆𑀦𑀫𑁆𑀧𑀺 𑀲𑀘𑁆𑀘𑀸𑀦’’𑀦𑁆𑀢𑀺. 𑀅𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀦𑀺𑀭𑁄𑀥𑁄. 𑀢𑀜𑁆𑀘𑀸𑀢𑀺 𑀦𑀺𑀭𑁄𑀥𑀜𑁆𑀘. 𑀢𑁂𑀦𑀸𑀢𑀺 ‘‘𑀢𑁂𑀲𑀜𑁆𑀘 𑀬𑁄 𑀦𑀺𑀭𑁄𑀥𑁄’’𑀢𑀺𑀧𑀤𑁂𑀦. 𑀅𑀲𑁆𑀲𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀏𑀢𑁆𑀣𑀸𑀢𑀺 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁, 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀸. 𑀦𑀬𑀢𑁄𑀢𑀺 𑀦𑀸𑀦𑀦𑁆𑀢𑀭𑀺𑀓𑀦𑀬𑀢𑁄, 𑀅𑀯𑀺𑀦𑀸𑀪𑀸𑀯𑀦𑀬𑀢𑁄 𑀯𑀸, 𑀦𑁂𑀢𑁆𑀢𑀺𑀤𑁂𑀲𑀦𑀸𑀳𑀸𑀭𑀦𑀬𑀢𑁄 𑀯𑀸. 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀦𑀺𑀭𑁄𑀥𑁂 𑀳𑀻’’𑀢𑀺𑀆𑀤𑀺. 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 𑀯𑀸 𑀫𑀕𑁆𑀕𑀲𑀘𑁆𑀘𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀦𑀺𑀭𑁄𑀥𑁄 𑀘 𑀦𑀺𑀭𑁄𑀥𑀽𑀧𑀸𑀬𑁄 𑀘 𑀦𑀺𑀭𑁄𑀥𑁄𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀸𑀢𑀩𑁆𑀩𑁄. 𑀢𑁂𑀲𑀜𑁆𑀘𑀸𑀢𑀺 𑀏𑀢𑁆𑀣 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁂𑀦 𑀘𑀲𑀤𑁆𑀤𑁂𑀦 𑀫𑀕𑁆𑀕𑀲𑀘𑁆𑀘𑀁 𑀕𑀳𑁂𑀢𑀩𑁆𑀩𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀬𑀁 𑀦𑀬𑁄 𑀅𑀝𑁆𑀞𑀓𑀣𑀸𑀬𑀁 𑀦 𑀯𑀼𑀢𑁆𑀢𑁄. 𑀢𑀫𑁂𑀯𑀢𑁆𑀣𑀦𑁆𑀢𑀺 𑀘𑀢𑀼𑀲𑀘𑁆𑀘𑀲𑀗𑁆𑀔𑀸𑀢𑀁 𑀢𑀫𑁂𑀯𑀢𑁆𑀣𑀁. 𑀧𑀝𑀺𑀧𑀸𑀤𑁂𑀦𑁆𑀢𑁄𑀢𑀺 𑀦𑀺𑀕𑀫𑁂𑀦𑁆𑀢𑁄.

‘‘𑀲𑀘𑁂𑀧𑀻’’𑀢𑀺 𑀇𑀫𑀺𑀦𑀸 𑀬𑀤𑀻𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀡𑁆𑀡𑁂𑀢𑀺. ‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀸𑀯𑀤𑁂𑀯𑀸𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀡𑁆𑀡𑁂𑀢𑀺. ‘‘𑀇𑀢𑁄 𑀉𑀢𑁆𑀢𑀭𑀺 𑀦𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀏𑀯𑀓𑀸𑀭𑀲𑁆𑀲 𑀨𑀮𑀁 𑀤𑀲𑁆𑀲𑁂𑀢𑀺. 𑀇𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀢𑁄. ‘‘𑀇𑀤𑀁…𑀧𑁂… 𑀧𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 ‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀏𑀲𑁄 𑀏𑀯 𑀥𑀫𑁆𑀫𑁄’’𑀢𑀺 𑀇𑀫𑀺𑀦𑀸 ‘‘𑀏𑀲𑁂𑀯 𑀥𑀫𑁆𑀫𑁄’’𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀯𑀡𑁆𑀡𑁂𑀢𑀺. 𑀧𑀘𑁆𑀘𑀩𑁆𑀬𑀢𑁆𑀣𑀸𑀢𑀺 𑀧𑀢𑀺𑀅𑀯𑀧𑀼𑀩𑁆𑀩𑁄 𑀇𑀥𑀸𑀢𑀼 𑀧𑀝𑀺𑀯𑀺𑀤𑁆𑀥𑀢𑁆𑀣𑁄𑀢𑀺 𑀆𑀳 ‘‘𑀧𑀝𑀺𑀯𑀺𑀤𑁆𑀥𑀢𑁆𑀣𑀸’’𑀢𑀺. 𑀢𑀼𑀫𑁆𑀳𑁂𑀳𑀻𑀢𑀺 𑀅𑀲𑁆𑀲𑀚𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀇𑀫𑀺𑀦𑀸 ‘‘𑀧𑀘𑁆𑀘𑀩𑁆𑀬𑀢𑁆𑀣𑀸’’𑀢𑀺 𑀏𑀢𑁆𑀣 𑀳𑀺𑀬𑁆𑀬𑀢𑁆𑀢𑀦𑀻𑀧𑀭𑀲𑁆𑀲𑀧𑀤𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀢𑁆𑀣𑀯𑀺𑀪𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀓𑀧𑁆𑀧𑀦𑀳𑀼𑀢𑁂𑀳𑀻𑀢𑀺 𑀓𑀧𑁆𑀧𑀸𑀦𑀁 𑀦𑀳𑀼𑀢𑁂𑀳𑀺, 𑀓𑁄𑀝𑀺𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑁂𑀳𑀺 𑀦𑀳𑀼𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀢𑀻𑀢𑀦𑁆𑀢𑀺 𑀅𑀪𑀺𑀅𑀢𑀻𑀢𑀁. 𑀅𑀫𑁆𑀳𑁂𑀳𑀺 𑀅𑀤𑀺𑀝𑁆𑀞𑀫𑁂𑀯 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀫𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁨. 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀕𑀫𑁆𑀪𑀻𑀭𑀢𑁆𑀢𑀸 𑀆𑀭𑀫𑁆𑀫𑀡𑀺𑀓𑀪𑀽𑀢𑀁 𑀜𑀸𑀡𑀫𑁆𑀧𑀺 𑀕𑀫𑁆𑀪𑀻𑀭𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀲𑁆𑀲 𑀘 𑀜𑀸𑀡𑀲𑁆𑀲𑀸’’𑀢𑀺. 𑀬𑀣𑀸 𑀳𑀺 𑀲𑀡𑁆𑀳𑀯𑀢𑁆𑀣𑀲𑁆𑀲 𑀲𑀺𑀩𑁆𑀩𑀦𑀢𑁆𑀣𑀸𑀬 𑀲𑀡𑁆𑀳𑀲𑀽𑀘𑀺 𑀅𑀥𑀺𑀧𑁆𑀧𑁂𑀢𑀸𑀢𑀺. 𑀉𑀧𑀥𑀻𑀦𑀁 𑀲𑀫𑁆𑀫𑀸 𑀔𑀬𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀲𑀗𑁆𑀔𑀬𑀁 𑀦𑀸𑀫𑀸𑀢𑀺 𑀆𑀳 ‘‘𑀉𑀧𑀥𑀺𑀲𑀗𑁆𑀔𑀬𑁂𑀢𑀺 𑀦𑀺𑀩𑁆𑀩𑀸𑀦𑁂’’𑀢𑀺. 𑀢𑀤𑀸𑀭𑀫𑁆𑀫𑀡𑀸𑀬𑀸𑀢𑀺 𑀢𑀁𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀬. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀬𑀸. 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂𑀢𑀺 𑀅𑀕𑁆𑀕𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂. 𑀢𑁂𑀲𑀽𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼. 𑀅𑀟𑁆𑀠𑀫𑀸𑀲𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀢𑀻𑀢𑁂𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑁆𑀣𑀓𑁂. 𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀅𑀕𑁆𑀕𑀲𑀸𑀯𑀓𑀪𑀸𑀯𑀁 𑀧𑀢𑁆𑀣𑁂𑀲𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀫𑁂𑀢𑀺 𑀫𑀼𑀦𑀻𑀦𑀁 𑀞𑀸𑀦𑁂. 𑀢𑀜𑁆𑀳𑀺 𑀆 𑀓𑁄𑀥𑀁, 𑀆 𑀪𑀼𑀲𑁄 𑀯𑀸 𑀭𑀸𑀕𑀸𑀤𑀬𑁄 𑀲𑀫𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀲𑁆𑀲𑀫𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀧𑀢𑁆𑀣𑀬𑀺𑀢𑁆𑀯𑀸 𑀘 𑀧𑁂𑀲𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀦𑀻𑀮𑀼𑀧𑁆𑀧𑀮𑀫𑀡𑁆𑀟𑀧𑁂. 𑀢𑁂𑀲𑀽𑀢𑀺 𑀢𑀸𑀧𑀲𑀲𑁂𑀝𑁆𑀞𑀻𑀲𑀼.

𑁬𑁩. 𑀬𑁂𑀲𑀦𑁆𑀢𑀺 𑀓𑀼𑀮𑀸𑀦𑀁. ‘‘𑀯𑀺𑀥𑀯𑀪𑀸𑀯𑀸𑀬𑀸’’𑀢𑀺 𑀇𑀫𑀺𑀦𑀸 𑀯𑀺𑀥𑀯𑀸𑀬 𑀪𑀸𑀯𑁄 𑀯𑁂𑀥𑀩𑁆𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀥𑀯𑀸𑀢𑀺 𑀘 𑀧𑀢𑀺𑀲𑀼𑀜𑁆𑀜𑀸. 𑀲𑀸 𑀳𑀺 𑀥𑀯𑁂𑀦 𑀯𑀺𑀕𑀢𑀸𑀢𑀺 ‘‘𑀯𑀺𑀥𑀯𑀸’’𑀢𑀺 𑀘, 𑀯𑀺𑀕𑀢𑁄 𑀥𑀯𑁄 𑀇𑀫𑀺𑀲𑁆𑀲𑀸𑀢𑀺 ‘‘𑀯𑀺𑀥𑀯𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀉𑀪𑀬𑁂𑀦𑀸𑀧𑀻𑀢𑀺 𑀧𑀼𑀢𑁆𑀢𑀧𑀩𑁆𑀩𑀚𑁆𑀚𑀧𑀢𑀺𑀧𑀩𑁆𑀩𑀚𑁆𑀚𑀲𑀗𑁆𑀔𑀸𑀢𑁂𑀦 𑀤𑀼𑀯𑀺𑀥𑁂𑀦𑀧𑀺.

𑀲𑀜𑁆𑀘𑀬𑀸𑀦𑀻𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀽𑀧𑀘𑀸𑀭𑁂𑀦 𑀦𑀺𑀲𑁆𑀲𑀬𑁂 𑀦𑀺𑀲𑁆𑀲𑀺𑀢𑀽𑀧𑀘𑀸𑀭𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀜𑁆𑀘𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀻’’𑀢𑀺. 𑀅𑀣 𑀯𑀸 𑀡𑀧𑀘𑁆𑀘𑀬𑁄 𑀢𑀲𑁆𑀲𑁂𑀤𑀫𑀢𑁆𑀣𑁂 𑀳𑁄𑀢𑀻𑀢𑀺 𑀆𑀳 ‘‘𑀲𑀜𑁆𑀘𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀻’’𑀢𑀺. ‘‘𑀫𑀕𑀥𑀸𑀦’’𑀦𑁆𑀢𑀺 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀚𑀦𑀧𑀤𑀲𑁆𑀲 𑀦𑀸𑀫𑀦𑁆𑀢𑀺 𑀆𑀳 ‘‘𑀫𑀕𑀥𑀸𑀦𑀁 𑀚𑀦𑀧𑀤𑀲𑁆𑀲𑀸’’𑀢𑀺. 𑀕𑀺𑀭𑀺𑀩𑁆𑀩𑀚𑀦𑁆𑀢𑀺 𑀏𑀢𑁆𑀣 𑀯𑀚𑁄 𑀯𑀺𑀬𑀸𑀢𑀺 𑀯𑀚𑁄, 𑀕𑀺𑀭𑀺. 𑀯𑀚𑀲𑀤𑀺𑀲𑁄 𑀕𑀺𑀭𑀺 𑀏𑀢𑁆𑀣𑀸𑀢𑀺 𑀕𑀺𑀭𑀺𑀩𑁆𑀩𑀚𑀁 𑀧𑀤𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦, 𑀦𑀕𑀭𑀁. ‘‘𑀫𑀳𑀸𑀯𑀻𑀭𑀺𑀬𑀯𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀫𑀳𑀦𑁆𑀢𑁄 𑀯𑀻𑀭𑁄 𑀏𑀢𑁂𑀲𑀁 𑀢𑀣𑀸𑀕𑀢𑀸𑀦𑀦𑁆𑀢𑀺 𑀫𑀳𑀸𑀯𑀻𑀭𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀦 𑀦𑀬𑀫𑀸𑀦𑀸𑀦𑀁 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢𑀦𑁆𑀢𑀺 𑀏𑀢𑁆𑀣 𑀓𑀘𑁆𑀘𑀸𑀬𑀦𑀦𑀬𑁂𑀦 (𑀓𑀘𑁆𑀘𑀸𑀬𑀦𑁂 𑁨𑁭𑁭 𑀲𑀼𑀢𑁆𑀢𑁂) 𑀉𑀲𑀽𑀬𑀧𑀬𑁄𑀕𑁂 𑀲𑀫𑁆𑀧𑀤𑀸𑀦𑀁 𑀳𑁄𑀢𑀻𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀉𑀧𑀬𑁄𑀕𑀢𑁆𑀣𑁂 𑀯𑀸’’𑀢𑀺. 𑀯𑀺𑀚𑀸𑀦𑀦𑁆𑀢𑀸𑀦𑀦𑁆𑀢𑀺 𑀯𑀺𑀚𑀸𑀦𑀦𑁆𑀢𑁂𑀲𑀼 𑀢𑀣𑀸𑀕𑀢𑁂𑀲𑀼, 𑀯𑀺𑀚𑀸𑀦𑀦𑁆𑀢𑁂 𑀯𑀸.

𑁧𑁫. 𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸

𑁬𑁪. 𑀅𑀦𑀼𑀧𑀚𑁆𑀛𑀸𑀬𑀓𑀸𑀢𑀺 𑀏𑀢𑁆𑀣 𑀯𑀚𑁆𑀚𑀸𑀯𑀚𑁆𑀚𑀁 𑀉𑀧𑀕𑀦𑁆𑀢𑁆𑀯𑀸 𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸𑀬𑁄, 𑀲𑁄 𑀦𑀢𑁆𑀣𑀺 𑀏𑀢𑁂𑀲𑀦𑁆𑀢𑀺 𑀅𑀦𑀼𑀧𑀚𑁆𑀛𑀸𑀬𑀓𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀚𑁆𑀚𑀸𑀯𑀚𑁆𑀚’’𑀦𑁆𑀢𑀺𑀆𑀤𑀺. ‘‘𑀧𑀺𑀡𑁆𑀟𑀸𑀬 𑀘𑀭𑀡𑀓𑀧𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀺𑀡𑁆𑀟𑀸𑀬 𑀉𑀤𑁆𑀤𑀺𑀲𑁆𑀲, 𑀉𑀝𑁆𑀞𑀳𑀺𑀢𑁆𑀯𑀸 𑀯𑀸 𑀢𑀺𑀝𑁆𑀞𑀢𑀺 𑀅𑀦𑁂𑀦𑀸𑀢𑀺 𑀉𑀢𑁆𑀢𑀺𑀝𑁆𑀞𑁄, 𑀲𑁄𑀬𑁂𑀯 𑀧𑀢𑁆𑀢𑁄 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀉𑀢𑁆𑀢𑀺𑀝𑁆𑀞𑁂 𑀦 𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁬𑁮) 𑀧𑀦 𑀧𑀺𑀡𑁆𑀟𑀸𑀬 𑀘𑀭𑀡𑀁 ‘‘𑀉𑀢𑁆𑀢𑀺𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀉𑀤𑁆𑀤𑀺𑀲𑁆𑀲, 𑀉𑀝𑁆𑀞𑀳𑀺𑀢𑁆𑀯𑀸 𑀯𑀸 𑀢𑀺𑀝𑁆𑀞𑀦𑀁 𑀉𑀢𑁆𑀢𑀺𑀝𑁆𑀞𑀦𑁆𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. ‘‘𑀧𑀺𑀡𑁆𑀟𑀸𑀬 𑀘𑀭𑀡𑀧𑀢𑁆𑀢’’𑀦𑁆𑀢𑀺 𑀇𑀤𑀁 𑀯𑀘𑀦𑀁 ‘‘𑀢𑀲𑁆𑀫𑀺𑀜𑁆𑀳𑀺 𑀫𑀦𑀼𑀲𑁆𑀲𑀸 𑀉𑀘𑁆𑀙𑀺𑀝𑁆𑀞𑀲𑀜𑁆𑀜𑀺𑀦𑁄’’𑀢𑀺𑀧𑀤𑀁 𑀮𑀗𑁆𑀖𑀺𑀢𑁆𑀯𑀸 ‘‘𑀢𑀲𑁆𑀫𑀸 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀧𑀺𑀡𑁆𑀟𑀸𑀬 𑀘𑀭𑀡𑀓𑀧𑀢𑁆𑀢𑀢𑁆𑀢𑀸 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀫𑀦𑀼𑀲𑁆𑀲𑀸 𑀓𑀺𑀁𑀲𑀜𑁆𑀜𑀺𑀦𑁄𑀢𑀺 𑀆𑀳 ‘‘𑀢𑀲𑁆𑀫𑀺𑀜𑁆𑀳𑀺 𑀫𑀦𑀼𑀲𑁆𑀲𑀸 𑀉𑀘𑁆𑀙𑀺𑀝𑁆𑀞𑀲𑀜𑁆𑀜𑀺𑀦𑁄’’𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀢𑀲𑁆𑀫𑀺𑀁 𑀏𑀯 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑁂 𑀧𑀩𑁆𑀩𑀚𑀺𑀢𑀸𑀦𑀁 𑀧𑀭𑀺𑀪𑁄𑀕𑀪𑀸𑀯𑁂𑀦 𑀫𑀦𑀼𑀲𑁆𑀲𑁂𑀳𑀺 𑀅𑀯𑀲𑀚𑁆𑀚𑀺𑀢𑀩𑁆𑀩𑀢𑁆𑀢𑀸, 𑀅𑀯𑀙𑀟𑁆𑀟𑁂𑀢𑀩𑁆𑀩𑀢𑁆𑀢𑀸 𑀯𑀸 𑀫𑀦𑀼𑀲𑁆𑀲𑀸 𑀉𑀘𑁆𑀙𑀺𑀝𑁆𑀞𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀚𑀺𑀢𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀡𑀓𑀧𑀢𑁆𑀢𑀢𑁆𑀢𑀸 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀅𑀯𑀲𑀚𑁆𑀚𑀺𑀢𑀧𑀢𑁆𑀢𑀢𑁆𑀢𑀸 𑀉𑀘𑁆𑀙𑀺𑀝𑁆𑀞𑀧𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀢𑁆𑀢𑀺𑀝𑁆𑀞 𑀧𑀢𑁆𑀢𑀦𑁆𑀢𑀺𑀧𑀤𑀁 𑀯𑀸𑀓𑁆𑀬𑀫𑁂𑀯, 𑀦 𑀲𑀫𑀸𑀲𑁄𑀢𑀺𑀧𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. ‘‘𑀉𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀉𑀢𑁆𑀢𑀺𑀝𑁆𑀞𑀸𑀢𑀺 𑀏𑀢𑁆𑀣 𑀢𑁆𑀯𑀸𑀮𑁄𑀧𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀕𑀳𑁂𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀕𑁂𑀳𑀲𑀺𑀢𑀧𑁂𑀫𑀯𑀲𑁂𑀦𑀸𑀢𑀺 𑀕𑁂𑀳𑁂 𑀦𑀺𑀲𑁆𑀲𑀺𑀢𑀧𑁂𑀫𑀯𑀲𑁂𑀦, 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑀧𑁂𑀫𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀕𑀸𑀭𑀯𑀸 𑀳𑀼𑀢𑁆𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺. ‘‘𑀲𑀪𑀸𑀕𑀚𑀻𑀯𑀺𑀓𑀸’’𑀢𑀺 𑀇𑀫𑀺𑀦𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀺𑀲𑀤𑁆𑀤𑁄 𑀚𑀻𑀯𑀺𑀓𑀢𑁆𑀣𑁄𑀬𑁂𑀯, 𑀦 𑀯𑀺𑀯𑀭𑀡𑀸𑀤𑁆𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀚𑁆𑀛𑀸𑀬𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀢𑀺 𑀏𑀢𑁂𑀳𑀻𑀢𑀺 𑀉𑀧𑀚𑁆𑀛𑀸𑀬𑀪𑀸𑀯𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀺, 𑀢𑀸𑀦𑀺𑀬𑁂𑀯 𑀯𑁂𑀯𑀘𑀦𑀸𑀦𑀺 𑀉𑀧𑀚𑁆𑀛𑀸𑀬𑀪𑀸𑀯𑀲𑀫𑁆𑀧𑀝𑀺𑀘𑁆𑀙𑀦𑀯𑁂𑀯𑀘𑀦𑀸𑀦𑀺. 𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀓𑀺𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀤𑀲𑁆𑀲 𑀯𑀲𑁂𑀦 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀣𑀸𑀢𑀺 𑀉𑀧𑀚𑁆𑀛𑀸𑀬𑀕𑀳𑀡𑀝𑁆𑀞𑀸𑀦𑁂. 𑀬𑀤𑀺𑀤𑀁 𑀯𑀸𑀘𑀸𑀬 𑀯𑀸 𑀲𑀸𑀯𑀦𑀁, 𑀬𑀤𑀺𑀤𑀁 𑀓𑀸𑀬𑁂𑀦 𑀯𑀸 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀁 𑀅𑀢𑁆𑀣𑀺, 𑀇𑀤𑀫𑁂𑀯 𑀲𑀸𑀯𑀦𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀫𑁂𑀯 𑀉𑀧𑀚𑁆𑀛𑀸𑀬𑀕𑀳𑀡𑀦𑁆𑀢𑀺 𑀬𑁄𑀚𑀦𑀸. 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀦𑁆𑀢𑀺 𑀉𑀧𑀚𑁆𑀛𑀸𑀬𑁂𑀦 𑀧𑀜𑁆𑀘𑀲𑀼 𑀧𑀤𑁂𑀲𑀼 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀁𑀘𑀺 𑀯𑀼𑀢𑁆𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁. 𑀢𑀦𑁆𑀢𑀺 𑀓𑁂𑀲𑀜𑁆𑀘𑀺 𑀯𑀘𑀦𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑁆𑀣𑀸𑀢𑀺 𑀉𑀧𑀚𑁆𑀛𑀸𑀬𑀕𑀳𑀡𑁂. ‘‘𑀦 𑀲𑀫𑁆𑀧𑀝𑀺𑀘𑁆𑀙𑀦𑀁 𑀅𑀗𑁆𑀕’’𑀦𑁆𑀢𑀺 𑀇𑀫𑀺𑀦𑀸 𑀆𑀬𑀸𑀘𑀦𑀤𑀸𑀦𑀸𑀦𑀺𑀬𑁂𑀯 𑀅𑀗𑁆𑀕𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀧𑀺 𑀜𑀸𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀧𑀤𑁂𑀦𑀸𑀢𑀺 ‘‘𑀲𑀸𑀥𑀽’’𑀢𑀺 𑀇𑀫𑀺𑀦𑀸 𑀧𑀤𑁂𑀦.

𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀬𑀁 𑀯𑀼𑀢𑁆𑀢𑀁 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺. 𑀇𑀫𑀺𑀦𑀸 𑀓𑀺𑀭𑀺𑀬𑀸𑀯𑀺𑀲𑀬𑀪𑀸𑀯𑀫𑁂𑀯 𑀤𑀻𑀧𑁂𑀢𑀺, 𑀦 𑀤𑀩𑁆𑀩𑀯𑀺𑀲𑀬𑀪𑀸𑀯𑀁. 𑀅𑀬𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀸. 𑀅𑀲𑁆𑀲𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲. 𑀥𑁄𑀢𑀧𑀸𑀤𑀧𑀭𑀺𑀳𑀭𑀡𑀢𑁆𑀣𑀸𑀬𑀸𑀢𑀺 𑀥𑁄𑀢𑀲𑁆𑀲 𑀧𑀸𑀤𑀲𑁆𑀲 𑀧𑀁𑀲𑀼𑀫𑀓𑁆𑀔𑀦𑀸𑀤𑀻𑀦𑀁 𑀧𑀭𑀺𑀳𑀭𑀡𑀢𑁆𑀣𑀸𑀬. 𑀢𑀸𑀢𑀺 𑀉𑀧𑀸𑀳𑀦𑀸𑀬𑁄. 𑀓𑀸𑀮𑀲𑁆𑀲𑁂𑀯𑀸𑀢𑀺 𑀧𑀘𑁆𑀘𑀽𑀲𑀓𑀸𑀮𑀢𑁄𑀬𑁂𑀯, 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑀢𑁄𑀢𑀺 𑀢𑁂𑀳𑀺 𑀢𑀻𑀳𑀺 𑀤𑀦𑁆𑀢𑀓𑀝𑁆𑀞𑁂𑀳𑀺, 𑀯𑀺𑀪𑀢𑁆𑀢𑀅𑀧𑀸𑀤𑀸𑀦𑀫𑁂𑀢𑀁. 𑀢𑁂𑀲𑀼 𑀯𑀸 𑀢𑀻𑀲𑀼 𑀤𑀦𑁆𑀢𑀓𑀝𑁆𑀞𑁂𑀲𑀼. 𑀬𑀦𑁆𑀢𑀺 𑀬𑀁 𑀤𑀦𑁆𑀢𑀓𑀝𑁆𑀞𑀁. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀕𑀳𑀡𑁂.

𑀢𑀢𑁄𑀢𑀺 𑀲𑀻𑀢𑀼𑀡𑁆𑀳𑁄𑀤𑀓𑁂𑀳𑀺, 𑀲𑀻𑀢𑀼𑀡𑁆𑀳𑁄𑀤𑀓𑁂𑀲𑀼 𑀯𑀸. 𑀯𑀴𑀜𑁆𑀚𑁂𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀢𑀺. 𑀉𑀤𑀓𑀦𑁆𑀢𑀺 𑀫𑀼𑀔𑀥𑁄𑀯𑀦𑁄𑀤𑀓𑀁. ‘‘𑀯𑀘𑁆𑀘𑀓𑀼𑀝𑀺𑀢𑁄’’𑀢𑀺 𑀇𑀫𑀺𑀦𑀸 𑀧𑀲𑁆𑀲𑀸𑀯𑀓𑀼𑀝𑀻𑀧𑀺 𑀕𑀳𑁂𑀢𑀩𑁆𑀩𑀸. 𑀏𑀯𑀦𑁆𑀢𑀺 𑀲𑀫𑁆𑀫𑀚𑁆𑀚𑀺𑀬𑀫𑀸𑀦𑁂. 𑀅𑀲𑀼𑀜𑁆𑀜𑀦𑁆𑀢𑀺 𑀚𑀦𑀲𑀤𑁆𑀤𑀢𑁄 𑀅𑀢𑀼𑀘𑁆𑀙𑀁. 𑀆𑀲𑀦𑀦𑁆𑀢𑀺 𑀣𑁂𑀭𑀲𑁆𑀲 𑀆𑀲𑀦𑀁. 𑀢𑀲𑁆𑀫𑀺𑀦𑁆𑀢𑀺 𑀆𑀲𑀦𑁂. 𑀦𑀺𑀲𑀺𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀯𑀢𑁆𑀢𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀓𑁆𑀮𑀸𑀧𑁄 𑀅𑀲𑁆𑀫𑀺𑀁 𑀤𑁂𑀲𑁂 𑀅𑀢𑁆𑀣𑀻𑀢𑀺 𑀉𑀓𑁆𑀮𑀸𑀧𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁂𑀦𑀘𑀺 𑀓𑀘𑀯𑀭𑁂𑀦 𑀲𑀁𑀓𑀺𑀡𑁆𑀡𑁄’’𑀢𑀺. 𑀏𑀢𑁆𑀣 𑀘 𑀲𑀗𑁆𑀓𑀸𑀭𑁄 𑀉𑀘𑁆𑀙𑀺𑀝𑁆𑀞𑁄 𑀓𑀮𑀸𑀧𑁄 𑀲𑀫𑀽𑀳𑁄 𑀉𑀓𑁆𑀮𑀸𑀧𑁄𑀢𑀺 𑀯𑀘𑀦𑀢𑁆𑀣𑁂𑀦 𑀉𑀓𑁆𑀮𑀸𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀘𑀻𑀬𑀢𑀺 𑀩𑀦𑁆𑀥𑀻𑀬𑀢𑀺 𑀅𑀲𑁆𑀫𑀺𑀁 𑀤𑁂𑀲𑁂𑀢𑀺 𑀓𑀘𑁄, 𑀲𑁄 𑀯𑀭𑀻𑀬𑀢𑀺 𑀇𑀘𑁆𑀙𑀻𑀬𑀢𑀺 𑀅𑀦𑁂𑀦𑀸𑀢𑀺 𑀓𑀘𑀯𑀭𑁄𑀢𑀺 𑀯𑀘𑀦𑀢𑁆𑀣𑁂𑀦 𑀓𑀘𑀯𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀳𑀢𑁆𑀣𑁂𑀦𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀧𑀺𑀮𑁄𑀢𑀺𑀓𑁂𑀦𑀧𑀻𑀢𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀏𑀓𑀢𑁄 𑀓𑀢𑁆𑀯𑀸𑀢𑀺 𑀏𑀓𑀢𑁄 𑀲𑀫𑀸𑀦𑀧𑀝𑀮𑀁 𑀓𑀢𑁆𑀯𑀸. 𑀓𑀲𑁆𑀫𑀸 𑀲𑀗𑁆𑀖𑀸𑀝𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀳𑀻’’𑀢𑀺𑀆𑀤𑀺. ‘‘𑀲𑀗𑁆𑀖𑀝𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀁𑀳𑀭𑀺𑀢𑀩𑁆𑀩𑀸𑀢𑀺 𑀲𑀗𑁆𑀖𑀸𑀝𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀁 𑀉𑀧𑀚𑁆𑀛𑀸𑀬𑀁 𑀲𑀁𑀧𑀸𑀧𑀼𑀡𑀸𑀢𑀻𑀢𑀺 𑀬𑁄𑀚𑀦𑀸. 𑀏𑀓𑁂𑀦 𑀯𑀸 𑀧𑀤𑀯𑀻𑀢𑀺𑀳𑀸𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑁄𑀬𑁂𑀯 𑀉𑀡𑁆𑀳𑀪𑀸𑀭𑀺𑀓𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁄, 𑀧𑀢𑁆𑀢𑁂 𑀧𑀭𑀺𑀬𑀸𑀧𑀦𑁆𑀦𑁄 𑀬𑀸𑀕𑀼𑀆𑀤𑀺𑀓𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁄𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀪𑀺𑀓𑁆𑀔𑀸𑀘𑀸𑀭𑁂𑀢𑀺 𑀪𑀺𑀓𑁆𑀔𑀸𑀘𑀸𑀭𑀝𑁆𑀞𑀸𑀦𑁂. 𑀬𑀸𑀕𑀼𑀬𑀸 𑀯𑀸 𑀮𑀤𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀲𑁄 𑀧𑀢𑁆𑀢𑁄𑀢𑀺 𑀉𑀡𑁆𑀳𑀸𑀤𑀻𑀲𑀼 𑀧𑀭𑀺𑀬𑀸𑀧𑀦𑁆𑀦𑁄 𑀲𑁄 𑀧𑀢𑁆𑀢𑁄. 𑀅𑀜𑁆𑀜𑀢𑁆𑀭 𑀯𑀸𑀢𑀺 𑀆𑀭𑀸𑀫𑀸𑀤𑀻𑀲𑀼 𑀯𑀸. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀯𑀘𑀦𑁂 𑀅𑀦𑀺𑀝𑁆𑀞𑀺𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀓𑀸𑀭𑀢𑁄 𑀧𑀝𑁆𑀞𑀸𑀬. 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 ‘‘𑀦𑀸𑀢𑀺𑀤𑀽𑀭𑁂 𑀕𑀦𑁆𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 𑀦𑀓𑀸𑀭𑀧𑀝𑀺𑀲𑀺𑀤𑁆𑀥𑁂𑀲𑀼 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 ‘‘𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 𑀬𑁂𑀲𑀼 𑀓𑁂𑀲𑀼𑀘𑀺. 𑀅𑀬𑀦𑁆𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀬𑀸 𑀲𑀸𑀫𑀦𑁆𑀢𑀸 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦’’𑀦𑁆𑀢𑀺. ‘‘𑀆𑀲𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑀸𑀫𑀦𑁆𑀢𑀸𑀲𑀤𑁆𑀤𑀲𑁆𑀲 𑀆𑀲𑀦𑁆𑀦𑀯𑁂𑀯𑀘𑀦𑀢𑀜𑁆𑀘 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀈𑀤𑀺𑀲𑀁 𑀯𑀘𑀦𑀁 𑀪𑀦𑁆𑀢𑁂 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑀕𑀸𑀫𑀢𑁄 𑀧𑀞𑀫𑀢𑀭𑀦𑁆𑀢𑀺 𑀕𑀸𑀫𑀢𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀞𑀫𑀢𑀭𑀁. 𑀢𑁂𑀦𑁂𑀯𑀸𑀢𑀺 𑀉𑀧𑀚𑁆𑀛𑀸𑀬𑁂𑀦𑁂𑀯. 𑀦𑀺𑀯𑀢𑁆𑀢𑀦𑁆𑀢𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀺𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑁂𑀤𑀕𑁆𑀕𑀳𑀺𑀢’’𑀦𑁆𑀢𑀺. 𑀇𑀫𑀺𑀦𑀸 𑀲𑁂𑀤𑁂𑀦 𑀲𑀻𑀤𑀢𑀻𑀢𑀺 𑀲𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀢𑀺𑀭𑁂𑀓𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀉𑀲𑁆𑀲𑀸𑀭𑁂𑀢𑁆𑀯𑀸𑀢𑀺𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀉𑀤𑁆𑀥𑀁 𑀉𑀤𑁆𑀥𑀁 𑀲𑀸𑀭𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀙𑀺𑀫𑀯𑀸𑀓𑁆𑀬𑀲𑁆𑀲 𑀧𑀼𑀩𑁆𑀩𑀯𑀸𑀓𑁆𑀬𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀓𑀺𑀁 𑀓𑀸𑀭𑀡𑀸’’𑀢𑀺. 𑀫𑀚𑁆𑀛𑁂 𑀪𑀗𑁆𑀕𑀲𑁆𑀲 𑀤𑁄𑀲𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀲𑀫𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁄𑀢𑀺 𑀲𑀫𑀁 𑀓𑀢𑁆𑀯𑀸 𑀲𑀁𑀳𑀭𑀡𑀢𑁄, 𑀦𑀺𑀘𑁆𑀘𑀁 𑀪𑀺𑀚𑁆𑀚𑀫𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀚𑁆𑀛𑁂 𑀪𑀗𑁆𑀕𑀢𑁄 𑀯𑀸, 𑀤𑀼𑀩𑁆𑀩𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 ‘‘𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸’’𑀢𑀺 𑀏𑀢𑀁 𑀯𑀘𑀦𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀲𑀁𑀳𑀭𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀻𑀯𑀭𑀪𑁄𑀕𑀲𑁆𑀲 𑀑𑀭𑁄 𑀅𑀦𑁆𑀢𑁄 𑀑𑀪𑁄𑀕𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀬𑀩𑀦𑁆𑀥𑀦’’𑀦𑁆𑀢𑀺𑀆𑀤𑀺.

𑀬𑁄𑀢𑀺 𑀉𑀧𑀚𑁆𑀛𑀸𑀬𑁄. ‘‘𑀕𑀸𑀫𑁂𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑁆𑀢𑀭𑀖𑀭𑁂 𑀯𑀸 𑀧𑀝𑀺𑀓𑁆𑀓𑀫𑀦𑁂 𑀯𑀸’’𑀢𑀺. 𑀧𑀝𑀺𑀓𑁆𑀓𑀫𑀦𑁂 𑀯𑀸𑀢𑀺 𑀪𑁄𑀚𑀦𑀲𑀸𑀮𑀸𑀬𑀁 𑀯𑀸. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀮𑀤𑁆𑀥𑀸 𑀪𑀺𑀓𑁆𑀔𑀸 𑀬𑁂𑀦𑀸𑀢𑀺 𑀮𑀤𑁆𑀥𑀪𑀺𑀓𑁆𑀔𑁄, 𑀢𑀲𑁆𑀲 𑀯𑀸. 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀧𑀺𑀡𑁆𑀟𑀧𑀸𑀢𑁄 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑀸 𑀮𑀤𑁆𑀥𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀉𑀧𑀚𑁆𑀛𑀸𑀬𑁂𑀦 𑀮𑀤𑁆𑀥𑁄𑀧𑀻𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀆𑀳𑀭𑀺𑀬𑀢𑀽𑀢𑀺 𑀏𑀢𑁆𑀣 𑀢𑀼𑀯𑀺𑀪𑀢𑁆𑀢𑀺 𑀧𑀼𑀘𑁆𑀙𑀸𑀬𑀁 𑀳𑁄𑀢𑀺, 𑀆𑀳𑀭𑀺𑀬𑀢𑀼 𑀓𑀺𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀮𑁄𑀢𑀺 𑀪𑁄𑀚𑀦𑀓𑀸𑀮𑁄. 𑀪𑀼𑀜𑁆𑀚𑀺𑀢𑁆𑀣𑀸𑀢𑀺 𑀪𑀼𑀢𑁆𑀢𑁄, 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀓𑀝𑁆𑀞𑁄𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑁆𑀲 𑀆𑀲𑀦𑁆𑀦𑁄.

𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀏𑀢𑁆𑀣 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀅𑀦𑁆𑀢𑀭𑀳𑀺𑀢𑁄, 𑀢𑀝𑁆𑀝𑀺𑀓𑀘𑀫𑁆𑀫𑀔𑀡𑁆𑀟𑀸𑀤𑀺, 𑀦𑀢𑁆𑀣𑀺 𑀅𑀦𑁆𑀢𑀭𑀳𑀺𑀢𑁄 𑀏𑀢𑀲𑁆𑀫𑀺𑀁 𑀧𑀢𑁆𑀢𑀪𑀽𑀫𑀻𑀦𑀫𑀦𑁆𑀢𑀭𑁂𑀢𑀺 𑀅𑀦𑀦𑁆𑀢𑀭𑀳𑀺𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀢𑁆𑀣𑀢𑀸𑀬𑀸’’𑀢𑀺. 𑀓𑀸𑀴𑀯𑀡𑁆𑀡𑀓𑀢𑀸 𑀯𑀸 𑀲𑀼𑀥𑀸𑀩𑀤𑁆𑀥𑀸 𑀯𑀸 𑀦𑀺𑀭𑀚𑀫𑀢𑁆𑀢𑀺𑀓𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀧𑀢𑁆𑀢𑀁. 𑀥𑁄𑀢𑀯𑀸𑀮𑀺𑀓𑀸𑀬𑀧𑀻𑀢𑀺 𑀲𑀼𑀤𑁆𑀥𑀯𑀸𑀮𑀺𑀓𑀸𑀬𑀧𑀺. 𑀢𑀢𑁆𑀣𑀸𑀢𑀺 𑀧𑀁𑀲𑀼𑀭𑀚𑀲𑀓𑁆𑀔𑀭𑀸𑀤𑀻𑀲𑀼. 𑀧𑀼𑀦 𑀢𑀢𑁆𑀣𑀸𑀢𑀺 𑀧𑀡𑁆𑀡𑀸𑀥𑀸𑀭𑀓𑁂𑀲𑀼. 𑀇𑀤𑀁 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀺𑀫𑀼𑀔𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑁂𑀦. 𑀲𑀡𑀺𑀓𑀦𑁆𑀢𑀺 𑀲𑀺𑀦𑁆𑀦𑀁. 𑀅𑀦𑁆𑀢𑁂 𑀧𑀦𑀸𑀢𑀺 𑀘𑀻𑀯𑀭𑀲𑁆𑀲 𑀓𑁄𑀝𑀺𑀬𑀁 𑀧𑀦. 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀻𑀯𑀭𑀲𑁆𑀲 𑀪𑁄𑀕𑁄𑀢𑀺 𑀬𑁄𑀚𑀦𑀸.

𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀘𑀼𑀡𑁆𑀡𑀲𑀫𑁄𑀥𑀸𑀦𑁂𑀦 𑀦𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀺𑀡𑁆𑀟𑀺 𑀓𑀸𑀢𑀩𑁆𑀩𑀸’’𑀢𑀺. ‘‘𑀏𑀓𑀲𑁆𑀫𑀺𑀁 𑀦𑀺𑀤𑁆𑀥𑀽𑀫𑁂 𑀞𑀸𑀦𑁂’’𑀢𑀺 𑀇𑀫𑀺𑀦𑀸 𑀏𑀓𑀫𑀦𑁆𑀢𑀦𑁆𑀢𑀺 𑀏𑀢𑁆𑀣 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀞𑀸𑀦𑁂𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀚𑀦𑁆𑀢𑀸𑀖𑀭𑁂𑀢𑀺 𑀅𑀕𑁆𑀕𑀺𑀲𑀸𑀮𑀸𑀬𑀁. 𑀲𑀸 𑀳𑀺 𑀚𑀮𑀢𑀺 𑀤𑀺𑀩𑁆𑀩𑀢𑀺 𑀅𑀕𑁆𑀕𑀺 𑀏𑀢𑁆𑀣𑀸𑀢𑀺 𑀚𑀦𑁆𑀢𑀸, 𑀚𑀦𑁂𑀢𑀺 𑀲𑀭𑀻𑀭𑀲𑁂𑀤𑀫𑁂𑀢𑁆𑀣𑀸𑀢𑀺 𑀯𑀸 𑀚𑀦𑁆𑀢𑀸, 𑀲𑀸 𑀏𑀯 𑀖𑀭𑀁 𑀚𑀦𑁆𑀢𑀸𑀖𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀧𑀭𑀺𑀧𑀽𑀚𑀸𑀯𑀲𑁂𑀦 𑀓𑀭𑀻𑀬𑀢𑀻𑀢𑀺 𑀧𑀭𑀺𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁂𑀦 𑀅𑀗𑁆𑀕𑀸𑀭𑀤𑀸𑀦𑀸𑀤𑀺𑀓𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀓𑀫𑁆𑀫𑀁 𑀦𑀸𑀫𑀸’’𑀢𑀺𑀆𑀤𑀺.

‘‘𑀦 𑀓𑁂𑀦𑀘𑀺 𑀕𑁂𑀮𑀜𑁆𑀜𑁂𑀦𑀸’’𑀢𑀺𑀆𑀤𑀺𑀦𑀸 𑀉𑀲𑁆𑀲𑀳𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀅𑀕𑀺𑀮𑀸𑀦𑁂𑀦 𑀲𑀝𑁆𑀞𑀺𑀯𑀲𑁆𑀲𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀧𑀺 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀅𑀦𑀸𑀤𑀭𑁂𑀦𑀸𑀢𑀺 𑀯𑀢𑁆𑀢𑀓𑀭𑀡𑀲𑁆𑀲 𑀅𑀦𑀸𑀤𑀭𑁂𑀦. 𑀦𑀓𑀸𑀭𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀽𑀢𑀺 𑀧𑀝𑀺𑀲𑁂𑀥𑀯𑀸𑀘𑀓𑁂𑀦 𑀦𑀓𑀸𑀭𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼. 𑀧𑀤𑁂𑀲𑀽𑀢𑀺 ‘‘𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀯𑀸𑀓𑁆𑀬𑁂𑀲𑀼. 𑀪𑀽𑀫𑀺𑀬𑀦𑁆𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁 𑀪𑀺𑀢𑁆𑀢𑀺𑀬𑀫𑁆𑀧𑀺 𑀅𑀧𑀝𑀺𑀖𑀁𑀲𑀺𑀢𑀩𑁆𑀩𑀢𑁆𑀢𑀸. ‘‘𑀧𑀺𑀞𑀲𑀗𑁆𑀖𑀸𑀝𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀓𑀯𑀸𑀝𑀧𑀻𑀴𑀦𑁆𑀢𑀺 𑀏𑀢𑁆𑀣 𑀧𑀻𑀞𑀲𑀤𑁆𑀤𑁂𑀦 𑀧𑀺𑀞𑀲𑀗𑁆𑀖𑀸𑀝𑀁 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀯𑀸 𑀏𑀓𑀤𑁂𑀲𑀯𑁄𑀳𑀸𑀭𑀯𑀲𑁂𑀦 𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀘𑁆𑀙𑀼𑀧𑀦𑁆𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀖𑀁𑀲𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸 𑀢𑀸𑀬𑀢𑀺 𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀅𑀦𑁂𑀦𑀸𑀢𑀺 𑀲𑀦𑁆𑀢𑀸𑀦𑀁, 𑀢𑀫𑁂𑀯 𑀲𑀦𑁆𑀢𑀸𑀦𑀓𑀦𑁆𑀢𑀺 𑀅𑀢𑁆𑀣𑁂𑀦 𑀓𑀻𑀝𑀓𑀼𑀮𑀸𑀯𑀓𑀫𑀓𑁆𑀓𑀝𑀓𑀲𑀼𑀢𑁆𑀢𑀸𑀤𑀺 𑀲𑀦𑁆𑀢𑀸𑀦𑀓𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀦𑁆𑀢𑀸𑀦𑀓’’𑀦𑁆𑀢𑀺𑀆𑀤𑀺. 𑀉𑀮𑁆𑀮𑁄𑀓𑀢𑁄𑀢𑀺 𑀯𑀺𑀢𑀸𑀦𑀢𑁄. 𑀢𑀜𑁆𑀳𑀺 𑀉𑀤𑁆𑀥𑀁 𑀮𑀼𑀘𑀻𑀬𑀢𑁂 𑀩𑀦𑁆𑀥𑀻𑀬𑀢𑁂𑀢𑀺 𑀉𑀮𑁆𑀮𑁄𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀘𑀓𑀸𑀭𑀲𑁆𑀲 𑀓𑀓𑀸𑀭𑀫𑀓𑀢𑁆𑀯𑀸 ‘‘𑀉𑀮𑁆𑀮𑁄𑀘’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁄𑀲𑀤𑁆𑀤𑁂𑀦 𑀆𑀓𑀸𑀭𑀲𑁆𑀲 𑀲𑁆𑀫𑀸𑀯𑀘𑀦𑀲𑁆𑀲 𑀓𑀸𑀭𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀧𑀳𑀭𑀺𑀢𑀩𑁆𑀩𑀦𑁆𑀢𑀺 𑀅𑀧𑀦𑁂𑀢𑀩𑁆𑀩𑀁. ‘‘𑀅𑀯𑀳𑀭𑀺𑀢𑀩𑁆𑀩’’𑀦𑁆𑀢𑀺𑀧𑀺 𑀧𑀸𑀞𑁄, 𑀳𑁂𑀝𑁆𑀞𑀸 𑀳𑀭𑀺𑀢𑀩𑁆𑀩𑀁 𑀧𑀸𑀢𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀆𑀮𑁄𑀓𑀲𑀦𑁆𑀥𑀺𑀪𑀸𑀕𑀸𑀢𑀺 𑀏𑀢𑁆𑀣 𑀪𑀸𑀕𑀲𑀤𑁆𑀤𑀲𑁆𑀲 𑀤𑁆𑀯𑀦𑁆𑀤𑀢𑁄 𑀧𑀭𑀢𑁆𑀢𑀸 𑀧𑀼𑀩𑁆𑀩𑀧𑀤𑁂𑀲𑀼𑀧𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀆𑀮𑁄𑀓𑀲𑀦𑁆𑀥𑀺𑀪𑀸𑀕𑀸 𑀘 𑀓𑀡𑁆𑀡𑀪𑀸𑀕𑀸 𑀘𑀸’’𑀢𑀺. 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑀭𑀩𑀸𑀳𑀺𑀭𑀸’’𑀢𑀺𑀆𑀤𑀺. ‘‘𑀯𑀸𑀢𑀧𑀸𑀦𑀓𑀯𑀸𑀝𑀓𑀸𑀦𑀻’’𑀢𑀺 𑀇𑀫𑀺𑀦𑀸 𑀆𑀮𑁄𑀓𑀲𑀦𑁆𑀥𑀺𑀲𑀤𑁆𑀤𑀲𑁆𑀲 𑀯𑀸𑀢𑀧𑀸𑀦𑀓𑀯𑀸𑀝𑀓𑀧𑀭𑀺𑀬𑀸𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀓𑁄𑀡𑀸’’𑀢𑀺 𑀇𑀫𑀺𑀦𑀸 𑀓𑀡𑁆𑀡𑀲𑀤𑁆𑀤𑀲𑁆𑀲 𑀓𑁄𑀡𑀯𑁂𑀯𑀘𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

‘‘𑀬𑀣𑀸 𑀧𑀞𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀧𑀜𑁆𑀜𑀢𑁆𑀢𑀫𑁂𑀯 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀧𑀢𑀺𑀭𑀽𑀧𑀁 𑀧𑀞𑀫𑀧𑀜𑁆𑀜𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀞𑀫𑀧𑀜𑁆𑀜𑀢𑁆𑀢𑁂 𑀅𑀧𑀢𑀺𑀭𑀽𑀧𑁂 𑀅𑀜𑁆𑀜𑀣𑀸𑀧𑀺 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀏𑀢𑀤𑀢𑁆𑀣𑀫𑁂𑀯𑀸𑀢𑀺 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀸𑀬 𑀏𑀯. 𑀲𑀘𑁂 𑀧𑀜𑁆𑀜𑀢𑁆𑀢𑀁 𑀅𑀳𑁄𑀲𑀺, 𑀏𑀯𑀁 𑀲𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀦𑁆𑀢𑀺 𑀪𑀺𑀢𑁆𑀢𑀺𑀁 𑀫𑁄𑀘𑁂𑀢𑁆𑀯𑀸 𑀧𑀜𑁆𑀜𑀸𑀧𑀦𑀁. 𑀓𑀝𑁂𑀲𑀼 𑀓𑀺𑀴𑀜𑁆𑀚𑁂𑀲𑀼 𑀲𑀸𑀭𑀢𑁆𑀢𑀸 𑀉𑀢𑁆𑀢𑀫𑀢𑁆𑀢𑀸 𑀓𑀝𑀲𑀸𑀭𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀲𑀁𑀳𑀭𑀺𑀢𑁆𑀯𑀸. 𑀧𑀼𑀭𑀢𑁆𑀣𑀺𑀫𑀸𑀢𑀺 𑀏𑀢𑁆𑀣 𑀬𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀼𑀭𑀢𑁆𑀣𑀺𑀫𑀸𑀬𑀸’’𑀢𑀺.

𑀯𑀽𑀧𑀓𑀸𑀲𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀓𑀲𑀥𑀸𑀢𑀼 𑀕𑀢𑁆𑀬𑀢𑁆𑀣𑁄𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀣 𑀦𑁂𑀢𑀩𑁆𑀩𑁄’’𑀢𑀺. 𑀉𑀧𑀚𑁆𑀛𑀸𑀬𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀣𑀸𑀢𑀺 𑀅𑀜𑁆𑀜𑀁 𑀞𑀸𑀦𑀁. 𑀯𑀺𑀯𑁂𑀘𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀕𑀢𑀢𑁄 𑀉𑀧𑀚𑁆𑀛𑀸𑀬𑀁 𑀯𑀺𑀯𑁂𑀘𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀩𑁆𑀩’’𑀦𑁆𑀢𑀺. ‘‘𑀅𑀜𑁆𑀜𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀆𑀓𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀣𑁂𑀭’’𑀦𑁆𑀢𑀺𑀆𑀤𑀺𑀦𑀸. 𑀲𑁄 𑀲𑁄 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀦 𑀤𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑀸𑀲𑁄 𑀤𑀸𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺 𑀦𑀼 𑀔𑁄𑀢𑀺 𑀓𑁂𑀦 𑀏𑀯 𑀉𑀧𑀸𑀬𑁂𑀦 𑀤𑀤𑁂𑀬𑁆𑀬 𑀦𑀼𑀔𑁄𑀢𑀺 𑀅𑀢𑁆𑀣𑁄. 𑀇𑀢𑀺𑀲𑀤𑁆𑀤𑁄 𑀳𑀺 𑀅𑀯𑀥𑀸𑀭𑀡𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀧𑀺 𑀇𑀫𑀫𑁂𑀯 𑀦𑀬𑀁 𑀤𑀲𑁆𑀲𑁂𑀢𑀺 ‘‘𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦𑀸’’𑀢𑀺 𑀇𑀫𑀺𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀧𑀝𑀺𑀓𑀲𑁆𑀲𑁂𑀬𑁆𑀬𑀸’’𑀢𑀺𑀆𑀤𑀺𑀯𑀸𑀓𑁆𑀬𑁂𑀲𑀼. 𑀲𑀢𑁆𑀢𑀲𑀼 𑀓𑀫𑁆𑀫𑁂𑀲𑀼 𑀢𑀺𑀯𑀺𑀥𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀲𑁆𑀲 𑀕𑀭𑀼𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀉𑀓𑁆𑀔𑁂𑀧𑀦𑀻𑀬𑀁 𑀅𑀓𑀢𑁆𑀯𑀸’’𑀢𑀺. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑁂𑀦 𑀳𑀻’’𑀢𑀺𑀆𑀤𑀺.

𑀢𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀬𑀸𑀘𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀘𑁂 𑀓𑀭𑁄𑀦𑁆𑀢𑀺𑀬𑁂𑀯𑀸𑀢𑀺 𑀪𑀺𑀓𑁆𑀔𑀽 𑀲𑀘𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀧𑀼𑀦 𑀲𑀘𑁂 𑀓𑀭𑁄𑀦𑁆𑀢𑀺𑀬𑁂𑀯𑀸𑀢𑀺 𑀪𑀺𑀓𑁆𑀔𑀽 𑀲𑀘𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀓𑀢𑁂. 𑀇𑀢𑀻𑀢𑀺 𑀏𑀯𑀁 𑀬𑀸𑀘𑀦𑁂𑀦. 𑀦𑀦𑁆𑀢𑀺 𑀢𑀁 𑀉𑀧𑀚𑁆𑀛𑀸𑀬𑀁.

𑀲𑀫𑁆𑀧𑀭𑀺𑀯𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 ‘‘𑀧𑀺𑀡𑁆𑀟𑀼𑀓𑁆𑀔𑁂𑀧𑀓’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁨𑁦) 𑀯𑀺𑀬 𑀲𑀫𑁆𑀧𑀭𑀺𑀯𑀢𑁆𑀢𑀓𑀦𑁆𑀢𑀺𑀧𑀤𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁, 𑀓𑀧𑀘𑁆𑀘𑀬𑁄 𑀘 𑀯𑀺𑀘𑁆𑀙𑀢𑁆𑀣𑁄𑀢𑀺 𑀆𑀳 ‘‘𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸’’𑀢𑀺. 𑀬𑀤𑀻𑀢𑀺 𑀬𑀸𑀯. 𑀬𑀤𑀺𑀲𑀤𑁆𑀤𑁄 𑀳𑀺 𑀬𑀸𑀯𑀧𑀭𑀺𑀬𑀸𑀬𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀢𑀸𑀯 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺. 𑀬𑀸𑀯 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀭𑀚𑀦𑀁 𑀕𑀮𑀢𑀺, 𑀦 𑀢𑀸𑀯 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁂𑀦𑀸𑀢𑀺 𑀯𑀺𑀲𑀪𑀸𑀕𑁂𑀦 𑀧𑀼𑀕𑁆𑀕𑀮𑁂𑀦 𑀓𑀭𑀡𑀪𑀽𑀢𑁂𑀦. 𑀦 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄𑀢𑀺 𑀏𑀢𑁆𑀣 𑀦 𑀅𑀜𑁆𑀜𑁂𑀦𑁂𑀯 𑀓𑀭𑀡𑀻𑀬𑁂𑀦 𑀧𑀯𑀺𑀲𑀺𑀢𑀩𑁆𑀩𑁄. 𑀧𑀺𑀡𑁆𑀟𑀸𑀬 𑀧𑀦 𑀧𑀯𑀺𑀲𑀺𑀢𑀩𑁆𑀩𑁄𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀧𑀺𑀡𑁆𑀟𑀸𑀬 𑀯𑀸’’𑀢𑀺𑀆𑀤𑀺. ‘‘𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑀸𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 𑀆𑀓𑀸𑀭𑁄 𑀢𑁆𑀯𑀸𑀧𑀘𑁆𑀘𑀬𑀲𑁆𑀲 𑀓𑀸𑀭𑀺𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀸𑀘𑀸𑀭𑀦𑁆𑀢𑀺 𑀪𑀺𑀓𑁆𑀔𑀸𑀬 𑀘𑀭𑀡𑀝𑁆𑀞𑀸𑀦𑀁, 𑀉𑀧𑀚𑁆𑀛𑀸𑀬𑁂𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀺𑀯𑁂𑀡𑀦𑁆𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑁂𑀡𑀁. 𑀧𑀲𑁆𑀲𑀢𑀻𑀢𑀺 𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀢𑀺.

𑀤𑀲𑁆𑀲𑀦𑀢𑁆𑀣𑀸𑀬 𑀯𑀸𑀢𑀺 𑀅𑀲𑀼𑀪𑀤𑀲𑁆𑀲𑀦𑀢𑁆𑀣𑀸𑀬 𑀯𑀸. 𑀇𑀫𑀺𑀦𑀸𑀧𑀺 𑀯𑀸𑀲𑀢𑁆𑀣𑀸𑀬 𑀏𑀯 𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀺. 𑀓𑀫𑁆𑀫𑀦𑁆𑀢𑀺 𑀧𑀓𑁆𑀓𑀫𑀦𑀲𑁆𑀲 𑀓𑀸𑀭𑀡𑀁 𑀓𑀫𑁆𑀫𑀁. 𑀅𑀦𑀦𑀼𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀸𑀯𑀢𑀢𑀺𑀬’’𑀦𑁆𑀢𑀺. 𑀢𑀦𑁆𑀢𑀺 𑀉𑀧𑀚𑁆𑀛𑀸𑀬𑀁. 𑀅𑀲𑁆𑀲𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲. ‘‘𑀦 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀲𑀘𑁂 𑀲𑀫𑁆𑀧𑀚𑁆𑀚𑀢𑀺, 𑀦 𑀧𑀓𑁆𑀓𑀫𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀯𑀮𑀦𑁆𑀢𑀺 𑀯𑀺𑀦𑀸 𑀉𑀤𑁆𑀤𑁂𑀲𑀸𑀤𑀺𑀲𑀫𑁆𑀧𑀚𑁆𑀚𑀦𑁂𑀳𑀺. 𑀏𑀯𑀭𑀽𑀧𑁂 𑀉𑀧𑀚𑁆𑀛𑀸𑀬𑁂 𑀦𑀺𑀯𑀸𑀭𑁂𑀦𑁆𑀢𑁂𑀧𑀻𑀢𑀺 𑀬𑁄𑀚𑀦𑀸. ‘‘𑀕𑁂𑀮𑀜𑁆𑀜𑀢𑁄’’𑀢𑀺 𑀇𑀫𑀺𑀦𑀸 𑀯𑀼𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀯𑀥𑀺𑀅𑀧𑁂𑀓𑁆𑀔𑀢𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀅𑀜𑁆𑀜𑁄𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑁄. 𑀢𑀲𑁆𑀲𑀸𑀢𑀺 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲.

𑁧𑁬. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑀓𑀣𑀸

𑁬𑁭. 𑀲𑀫𑁆𑀫𑀸𑀯𑀢𑁆𑀢𑀦𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀤𑁆𑀤𑁂𑀲𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀧𑀭𑀺𑀧𑀼𑀘𑁆𑀙𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀗𑁆𑀕𑀳𑀲𑀤𑁆𑀤𑀲𑁆𑀲 𑀲𑀗𑁆𑀔𑁂𑀧𑀕𑀳𑀡𑁂𑀲𑀼𑀧𑀺 𑀯𑀼𑀢𑁆𑀢𑀺𑀢𑁄 ‘‘𑀅𑀦𑀼𑀕𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀲𑀫𑁆𑀫𑀼𑀔𑀸 𑀲𑀗𑁆𑀕𑀳𑁄 𑀘 𑀧𑀭𑀫𑁆𑀫𑀼𑀔𑀸 𑀅𑀦𑀼𑀕𑁆𑀕𑀳𑁄 𑀘 𑀓𑀸𑀢𑀩𑁆𑀩𑁄. 𑀆𑀫𑀺𑀲𑁂𑀦 𑀯𑀸 𑀲𑀗𑁆𑀕𑀳𑁄, 𑀥𑀫𑁆𑀫𑁂𑀦 𑀯𑀸 𑀅𑀦𑀼𑀕𑁆𑀕𑀳𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀸𑀬 𑀯𑀸 𑀲𑀗𑁆𑀕𑀳𑁄, 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀸𑀬 𑀯𑀸 𑀅𑀦𑀼𑀕𑁆𑀕𑀳𑁄. 𑀮𑁄𑀓𑀺𑀬𑀢𑁆𑀣𑀸𑀬 𑀯𑀸 𑀲𑀗𑁆𑀕𑀳𑁄, 𑀮𑁄𑀓𑀼𑀢𑁆𑀢𑀭𑀢𑁆𑀣𑀸𑀬 𑀯𑀸 𑀅𑀦𑀼𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀑𑀯𑀸𑀤𑁂𑀦 𑀅𑀦𑀼𑀲𑀸𑀲𑀦𑀻𑀬𑀸’’𑀢𑀺. 𑀢𑀢𑁆𑀣 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑁄𑀢𑀺 𑀯𑀘𑀦𑀢𑁆𑀣𑁂𑀦 𑀧𑀸𑀴𑀺𑀯𑀸𑀘𑀦𑀸 𑀉𑀤𑁆𑀤𑁂𑀲𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁆𑀤𑁂𑀲𑁄𑀢𑀺 𑀧𑀸𑀴𑀺𑀯𑀸𑀘𑀦𑀸’’𑀢𑀺. ‘‘𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀸’’𑀢𑀺 𑀇𑀫𑀺𑀦𑀸 𑀧𑀼𑀦𑀧𑁆𑀧𑀼𑀦𑀁, 𑀲𑀫𑀦𑁆𑀢𑀢𑁄 𑀯𑀸 𑀧𑀸𑀴𑀺𑀬𑀸 𑀅𑀢𑁆𑀣𑀲𑁆𑀲 𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀢𑁆𑀣𑀼𑀲𑁆𑀫𑀺𑀁. 𑀇𑀤𑀦𑁆𑀢𑀺 𑀘𑀸𑀭𑀺𑀢𑁆𑀢𑀁. 𑀧𑀼𑀦 𑀇𑀤𑀦𑁆𑀢𑀺 𑀯𑀸𑀭𑀺𑀢𑁆𑀢𑀁. ‘‘𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀑𑀯𑀤𑀦𑀁 𑀑𑀯𑀸𑀤𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀇𑀤𑀁 𑀓𑀭𑁄𑀳𑀺, 𑀇𑀤𑀁 𑀫𑀸 𑀓𑀭𑀺𑀢𑁆𑀣𑀸’’𑀢𑀺 𑀯𑀘𑀦𑀁 𑀅𑀦𑀼𑀲𑀸𑀲𑀦𑀻 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀧𑀼𑀦𑀧𑁆𑀧𑀼𑀦𑀁 𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑀼𑀲𑀸𑀲𑀦𑀻𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑀲𑁆𑀲 𑀦𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑁄 𑀳𑁄𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀦 𑀧𑀓𑀢𑀺𑀧𑀢𑁆𑀢𑁄 𑀳𑁄𑀢𑀺, 𑀅𑀣 𑀔𑁄 𑀅𑀢𑀺𑀭𑀺𑀢𑁆𑀢𑀧𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑀺𑀭𑁂𑀓𑀧𑀢𑁆𑀢𑁄’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼. 𑀅𑀜𑁆𑀜𑁄𑀧𑀻𑀢𑀺 𑀧𑀢𑁆𑀢𑀘𑀻𑀯𑀭𑁂𑀳𑀺 𑀅𑀜𑁆𑀜𑁄𑀧𑀺. 𑀲𑀫𑀡𑀧𑀭𑀺𑀓𑁆𑀔𑀸𑀭𑁄𑀢𑀺 𑀙𑀢𑁆𑀢𑀼𑀧𑀸𑀳𑀦𑀸𑀤𑀺 𑀲𑀫𑀡𑀧𑀭𑀺𑀓𑁆𑀔𑀸𑀭𑁄. 𑀇𑀥𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀢𑁂. 𑀦𑀬𑁂𑀦𑀸𑀢𑀺 𑀜𑀸𑀬𑁂𑀦. 𑀉𑀧𑁆𑀧𑀚𑁆𑀚𑀫𑀸𑀦𑀉𑀧𑀸𑀬𑀧𑀭𑀺𑀬𑁂𑀲𑀦𑀦𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲, 𑀉𑀧𑁆𑀧𑀚𑁆𑀚𑀫𑀸𑀦𑀢𑁆𑀣𑀸𑀬 𑀯𑀸 𑀉𑀧𑀸𑀬𑀲𑁆𑀲 𑀧𑀭𑀺𑀬𑁂𑀲𑀦𑀁. 𑀇𑀢𑁄𑀢𑀺 ‘‘𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸’’𑀢𑀺 𑀧𑀸𑀴𑀺𑀢𑁄. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀭𑀚𑀦𑁆𑀢𑁂𑀦 𑀉𑀧𑀚𑁆𑀛𑀸𑀬𑁂𑀦𑀸𑀢𑀺 𑀅𑀢𑁆𑀣𑁄 𑀦 𑀤𑀝𑁆𑀞𑀩𑁆𑀩𑁄, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦𑀸𑀢𑀺 𑀅𑀢𑁆𑀣𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀚𑁆𑀛𑀸𑀬𑀢𑁄 𑀉𑀧𑀸𑀬𑀁 𑀲𑀼𑀢𑁆𑀯𑀸 𑀭𑀚𑀦𑁆𑀢𑁂𑀦𑀸’’𑀢𑀺. 𑀉𑀧𑀚𑁆𑀛𑀸𑀬𑀢𑁄 𑀉𑀧𑀸𑀬𑀦𑁆𑀢𑀺 𑀉𑀧𑀚𑁆𑀛𑀸𑀬𑀢𑁄 𑀮𑀤𑁆𑀥𑀁 𑀉𑀧𑀸𑀬𑀁.

𑀦𑀲𑀫𑁆𑀫𑀸𑀯𑀢𑁆𑀢𑀦𑀸𑀤𑀺𑀓𑀣𑀸

𑁬𑁮. 𑀉𑀧𑀚𑁆𑀛𑀸𑀬𑀯𑀢𑁆𑀢𑀦𑁆𑀢𑀺 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀢𑁆𑀢𑀺𑀢𑀩𑁆𑀩𑀁 𑀯𑀢𑁆𑀢𑀁. 𑀲𑁄𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀅𑀲𑁆𑀲, 𑀲𑁄 𑀯𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸. 𑀧𑀡𑀸𑀫𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀧𑀧𑀼𑀩𑁆𑀩 𑀦𑀫𑀼𑀥𑀸𑀢𑀼 𑀅𑀢𑁆𑀣𑀧𑀓𑀭𑀡𑀸𑀤𑀺𑀯𑀲𑁂𑀦 𑀇𑀥 𑀅𑀧𑀲𑀸𑀤𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀧𑀲𑀸𑀤𑁂𑀢𑀩𑁆𑀩𑁄’’𑀢𑀺. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑀁. 𑀕𑁂𑀳𑀲𑀺𑀢𑀧𑁂𑀫𑀦𑁆𑀢𑀺 𑀫𑁂𑀢𑁆𑀢𑀸𑀲𑀺𑀦𑁂𑀳𑀁. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑀸𑀢𑀺 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑁂𑀦 𑀧𑀝𑀺𑀧𑀓𑁆𑀔𑁂𑀦 𑀦𑀬𑁂𑀦. 𑀅𑀮𑀁 𑀧𑀡𑀸𑀫𑁂𑀢𑀼𑀦𑁆𑀢𑀺 𑀏𑀢𑁆𑀣 𑀅𑀮𑀁𑀲𑀤𑁆𑀤𑀲𑁆𑀲 𑀅𑀭𑀳𑀢𑁆𑀣𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀅𑀭𑀳𑀢𑁆𑀣𑁄𑀢𑀺 𑀆𑀳 ‘‘𑀬𑀼𑀢𑁆𑀢𑁄 𑀧𑀡𑀸𑀫𑁂𑀢𑀼’’𑀦𑁆𑀢𑀺.

𑀲𑀸𑀢𑀺𑀲𑀸𑀭𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀓𑀢𑀺𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀭𑀡𑀁 𑀧𑀯𑀢𑁆𑀢𑀦𑀁 𑀅𑀢𑀺𑀲𑀸𑀭𑁄, 𑀤𑁄𑀲𑁄. 𑀲𑀁𑀯𑀺𑀚𑁆𑀚𑀢𑀺 𑀲𑁄 𑀏𑀢𑀲𑁆𑀲𑀸𑀢𑀺 𑀲𑀸𑀢𑀺𑀲𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀤𑁄𑀲𑁄 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺. 𑀆𑀧𑀢𑁆𑀢𑀺𑀦𑁆𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁. 𑀢𑀦𑁆𑀢𑀺 𑀯𑀢𑁆𑀢𑀁.

𑀢𑁂𑀲𑀦𑁆𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁. 𑀯𑀢𑁆𑀢𑀦𑁆𑀢𑀺 𑀩𑀳𑀼𑀓𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀯𑀢𑁆𑀢𑀁. 𑀲𑀸𑀤𑀺𑀬𑀦𑀁 𑀯𑀸…𑀧𑁂… 𑀩𑀸𑀮𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀩𑀸𑀮𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀸𑀤𑀺𑀬𑀦𑀁 𑀯𑀸 𑀅𑀲𑀸𑀤𑀺𑀬𑀦𑀁 𑀯𑀸 𑀦 𑀚𑀸𑀦𑀸𑀢𑀻’’𑀢𑀺. 𑀲𑀸𑀤𑀺𑀬𑀦𑀲𑁆𑀲 𑀯𑀸 𑀅𑀲𑀸𑀤𑀺𑀬𑀦𑀲𑁆𑀲 𑀯𑀸 𑀅𑀚𑀸𑀦𑀦𑀢𑁆𑀢𑀸 𑀩𑀸𑀮𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑀸𑀦𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀩𑀸𑀮𑁄 𑀳𑁄𑀢𑀻’’𑀢𑀺. 𑀩𑀸𑀮𑀢𑁆𑀢𑀸 𑀲𑀸𑀤𑀺𑀬𑀦𑀁 𑀯𑀸 𑀅𑀲𑀸𑀤𑀺𑀬𑀦𑀁 𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀲𑀽𑀢𑀺 𑀩𑀳𑀼𑀓𑁂𑀲𑀼 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀲𑀼. 𑀢𑀲𑁆𑀲𑀸𑀢𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀲𑁆𑀲. 𑀢𑁂𑀲𑀦𑁆𑀢𑀺 𑀇𑀢𑀭𑁂𑀲𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁.

𑀭𑀸𑀥𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀓𑀣𑀸

𑁬𑁯. 𑀓𑀺𑀜𑁆𑀘𑀸𑀧𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 ‘‘𑀓𑀺𑀁 𑀦𑀼 𑀔𑁄 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀻’’𑀢𑀺 𑀆𑀲𑀗𑁆𑀓𑀁 𑀦𑀺𑀯𑀸𑀭𑁂𑀢𑀺. 𑀪𑀕𑀯𑀸 𑀅𑀦𑀼𑀜𑁆𑀜𑀸𑀢𑀼𑀓𑀸𑀫𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀦𑀲𑀤𑁆𑀤𑁄 𑀕𑀭𑀳𑀢𑁆𑀣𑁄, 𑀢𑀣𑀸 𑀚𑀸𑀦𑀦𑁆𑀢𑁄𑀧𑀻𑀢𑀺 𑀅𑀢𑁆𑀣𑁄. 𑀮𑀳𑀼𑀓𑀦𑁆𑀢𑀺 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀁. 𑀮𑀳𑀼𑀓𑀢𑁆𑀢𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄, 𑀅𑀚𑁆𑀛𑀸𑀲𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸’’𑀢𑀺𑀯𑀘𑀦𑀲𑁆𑀲 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁. 𑀅𑀬𑀜𑁆𑀘𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀘. 𑀅𑀕𑁆𑀕𑁄𑀢𑀺 𑀓𑁄𑀝𑀺𑀉𑀓𑁆𑀓𑀁𑀲𑁄. 𑀲𑁂𑀝𑁆𑀞𑁄𑀢𑀺 𑀧𑀯𑀭𑁄 𑀉𑀢𑁆𑀢𑀫𑁄.

‘‘𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦𑀸’’𑀢𑀺 𑀏𑀢𑁆𑀣 𑀩𑁆𑀬𑀢𑁆𑀢𑀧𑀝𑀺𑀩𑀮𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀩𑁆𑀬𑀢𑁆𑀢𑁄 𑀦𑀸𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀲 𑀲𑀸𑀝𑁆𑀞𑀓𑀣𑀁 𑀯𑀺𑀦𑀬𑀧𑀺𑀝𑀓𑀯𑀸𑀘𑀼𑀕𑁆𑀕𑀢𑀁 𑀧𑀯𑀢𑁆𑀢𑀢𑀺, 𑀅𑀬𑀁 𑀩𑁆𑀬𑀢𑁆𑀢𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀫𑀺𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀁 𑀯𑀸𑀘𑀼𑀕𑁆𑀕𑀢𑀪𑀺𑀓𑁆𑀔𑀼𑀫𑁆𑀳𑀺. 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀲𑀼𑀕𑁆𑀕𑀳𑀺𑀢𑀦𑁆𑀢𑀺 𑀲𑀸𑀝𑁆𑀞𑀓𑀣𑀸𑀬 𑀲𑀼𑀝𑁆𑀞𑀼 𑀕𑀳𑀺𑀢𑀁. 𑀅𑀬𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀭𑀺𑀫𑀪𑀺𑀓𑁆𑀔𑀼𑀁 𑀅𑀧𑁂𑀓𑁆𑀔𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺, 𑀇𑀫𑀲𑁆𑀫𑀺𑀁 𑀯𑀺𑀲𑀬𑁂𑀢𑀺 𑀅𑀢𑁆𑀣𑁄. 𑀩𑁆𑀬𑀢𑀺𑀭𑁂𑀓𑀸𑀦𑁆𑀯𑀬𑀯𑀲𑁂𑀦 𑀧𑀝𑀺𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀬𑁄 𑀧𑀦 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸𑀢𑀺 𑀆𑀳 ‘‘𑀓𑀸𑀲𑀲𑁄𑀲𑀲𑁂𑀫𑁆𑀳𑀸𑀤𑀺𑀦𑀸 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀲𑁄 𑀘 𑀲𑁄𑀲𑁄 𑀘 𑀲𑁂𑀫𑁆𑀳𑁄 𑀘, 𑀢𑁂 𑀆𑀤𑀬𑁄 𑀬𑀲𑁆𑀲 𑀕𑁂𑀮𑀜𑁆𑀜𑀲𑁆𑀲𑀸𑀢𑀺 𑀓𑀸𑀲𑀲𑁄𑀲𑀲𑁂𑀫𑁆𑀳𑀸𑀤𑀺, 𑀆𑀤𑀺𑀲𑀤𑁆𑀤𑁂𑀦 𑀏𑀴𑀫𑀽𑀕𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀑𑀝𑁆𑀞𑁄 𑀘 𑀤𑀦𑁆𑀢𑁄 𑀘 𑀚𑀺𑀯𑁆𑀳𑀸 𑀘, 𑀢𑀸 𑀆𑀤𑀬𑁄 𑀬𑁂𑀲𑀁 𑀢𑀸𑀮𑀼𑀆𑀤𑀻𑀦𑀦𑁆𑀢𑀺 𑀑𑀝𑁆𑀞𑀤𑀦𑁆𑀢𑀚𑀺𑀯𑁆𑀳𑀸𑀤𑀬𑁄, 𑀢𑁂𑀲𑀁. 𑀧𑀤𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀧𑀤𑀅𑀓𑁆𑀔𑀭𑁂𑀳𑀺. 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀳𑁂𑀢𑁆𑀣 𑀅𑀓𑁆𑀔𑀭𑀯𑀸𑀘𑀓𑁄. 𑀳𑀸𑀧𑁂𑀢𑀻𑀢𑀺 𑀕𑀮𑀢𑁆𑀢𑀸 𑀳𑀸𑀧𑁂𑀢𑀺. 𑀅𑀜𑁆𑀜𑀣𑀸 𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑁂𑀦 𑀲𑀺𑀣𑀺𑀮𑀸𑀤𑀺𑀦𑀸 𑀆𑀓𑀸𑀭𑁂𑀦 𑀯𑀸 𑀯𑀢𑁆𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀯𑀤𑀢𑀻𑀢𑀺 𑀅𑀜𑁆𑀜𑁂𑀦 𑀥𑀦𑀺𑀢𑀸𑀤𑀺𑀆𑀓𑀸𑀭𑁂𑀦 𑀯𑀤𑀢𑀺. 𑀢𑀩𑁆𑀩𑀺𑀧𑀭𑀻𑀢𑁄𑀢𑀺 𑀢𑀲𑁆𑀲 𑀅𑀧𑀝𑀺𑀩𑀮𑀲𑁆𑀲 𑀯𑀺𑀧𑀭𑀻𑀢𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀚𑀸𑀦𑀸𑀧𑁂𑀢𑀩𑁆𑀩𑀢𑁄. 𑀬𑀦𑁆𑀢𑀺 𑀬𑀁 𑀆𑀓𑀸𑀭𑀁 𑀥𑀸𑀢𑀼𑀓𑀫𑁆𑀫𑀫𑁂𑀢𑀁, 𑀲𑀗𑁆𑀖𑁄𑀢𑀺 𑀓𑀸𑀭𑀺𑀢𑀓𑀫𑁆𑀫𑀫𑁂𑀢𑀁. 𑀇𑀥 𑀓𑀸𑀭𑀺𑀢𑀓𑀫𑁆𑀫𑀁 𑀓𑀺𑀢𑁄 𑀯𑀤𑀢𑀺.

𑁭𑁧. 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀸𑀢𑀺 𑀏𑀢𑁆𑀣 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑀦𑀦𑁆𑀢𑀭𑀸𑀢𑀺 𑀅𑀢𑁆𑀣𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸𑀯 𑀲𑀫𑀦𑀦𑁆𑀢𑀭𑀸’’𑀢𑀺. 𑀏𑀯𑀲𑀤𑁆𑀤𑁂𑀦 𑀘𑀺𑀭𑀓𑀸𑀮𑀁 𑀦𑀺𑀯𑀢𑁆𑀢𑁂𑀢𑀺. 𑀉𑀮𑁆𑀮𑀼𑀫𑁆𑀧𑀢𑀽𑀢𑀺 𑀏𑀢𑁆𑀣 𑀉𑀧𑀼𑀩𑁆𑀩𑀮𑀼𑀧𑀥𑀸𑀢𑀼𑀬𑀸 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀅𑀢𑁆𑀣𑀸𑀢𑀺𑀲𑀬𑀯𑀲𑁂𑀦 𑀯𑀸 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑁆𑀢𑀸 𑀇𑀥 𑀉𑀧𑀼𑀩𑁆𑀩𑀥𑀭𑀥𑀸𑀢𑀼𑀬𑀸 𑀅𑀢𑁆𑀣𑁂 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁆𑀥𑀭𑀢𑀽’’𑀢𑀺. 𑀉𑀝𑁆𑀞𑀸𑀧𑁂𑀢𑁆𑀯𑀸, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀥𑀭𑀢𑀽𑀢𑀺 𑀅𑀢𑁆𑀣𑁄. 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀓𑀼𑀲𑀮𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀳𑀸𑀯𑀥𑀺𑀦𑀸 𑀉𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀽’’𑀢𑀺 𑀇𑀫𑀺𑀦𑀸 𑀲𑀳𑀸𑀥𑀸𑀭𑁂𑀦 𑀥𑀭𑀥𑀸𑀢𑀼𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀉𑀓𑁆𑀔𑀺𑀧𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀫𑀡𑁂𑀭𑀪𑀸𑀯𑀸 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺. ‘‘𑀧𑀝𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀲𑀫𑀻𑀧𑁂 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀤𑁆𑀤𑀢𑁆𑀣𑀫𑀕𑀳𑁂𑀢𑁆𑀯𑀸 𑀲𑀗𑁆𑀓𑁂𑀢𑀢𑁆𑀣𑀯𑀲𑁂𑀦 𑀧𑀸𑀓𑀝𑀢𑁆𑀢𑀸 𑀢𑀲𑁆𑀲 𑀲𑀗𑁆𑀓𑁂𑀢𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄.

𑁭𑁩. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀅𑀥𑀺 𑀦𑀺𑀘𑁆𑀘𑀯𑀲𑁂𑀦 𑀞𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀝𑁆𑀞𑀺𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀺𑀦𑀻’’𑀢𑀺. 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀦𑀺𑀲𑁆𑀲𑀬𑀸𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺𑀦𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀦𑀺𑀲𑁆𑀲𑀸𑀬 𑀅𑀢𑁆𑀢𑀪𑀸𑀯𑁄 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀦𑀺𑀲𑁆𑀲𑀸𑀬𑀸𑀢𑀺 𑀅𑀯𑀼𑀢𑁆𑀢𑀓𑀫𑁆𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁧𑁮. 𑀆𑀘𑀭𑀺𑀬𑀯𑀢𑁆𑀢𑀓𑀣𑀸

𑁭𑁫. 𑀓𑀺𑀦𑁆𑀢𑀸𑀬𑀦𑁆𑀢𑀺 𑀏𑀢𑁆𑀣 𑀏𑀓𑀸𑀭𑀮𑁄𑀧𑀯𑀲𑁂𑀦 𑀲𑀦𑁆𑀥𑀺 𑀳𑁄𑀢𑀻𑀢𑀺 𑀆𑀳 ‘‘𑀓𑀺𑀁𑀢𑁂 𑀅𑀬’’𑀦𑁆𑀢𑀺. ‘‘𑀑𑀯𑀤𑀺𑀢𑀩𑁆𑀩𑁄𑀢𑀺’’𑀇𑀫𑀺𑀦𑀸 𑀑𑀯𑀤𑀺𑀬𑁄𑀢𑀺 𑀏𑀢𑁆𑀣 𑀡𑁆𑀬𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀢𑀤𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 ‘‘𑀬𑀤𑀺𑀤𑀁 𑀕𑀡𑀩𑀦𑁆𑀥𑀺𑀓’’𑀦𑁆𑀢𑀺 𑀉𑀢𑁆𑀢𑀭𑀯𑀸𑀓𑁆𑀬𑁂 𑀬𑀁𑀲𑀤𑁆𑀤𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀯𑀸𑀓𑁆𑀬𑁂 𑀢𑀁𑀲𑀤𑁆𑀤𑀁 𑀜𑀸𑀧𑁂𑀢𑀺, 𑀢𑀲𑁆𑀲 𑀩𑀸𑀳𑀼𑀮𑁆𑀮𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑁭𑁬. 𑀲𑁄𑀢𑀺 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄. 𑀢𑁂𑀦𑀸𑀢𑀺 𑀉𑀤𑀸𑀬𑀺𑀢𑁆𑀣𑁂𑀭𑁂𑀦. 𑀲𑀳𑀥𑀫𑁆𑀫𑀺𑀓𑀦𑁆𑀢𑀺 𑀲𑀳 𑀥𑀫𑁆𑀫𑁂𑀦 𑀓𑀸𑀭𑀡𑁂𑀦. 𑀩𑁆𑀬𑀢𑁆𑀢𑁄 𑀢𑀸𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀮𑀓𑁆𑀔𑀡𑁄 𑀳𑁄𑀢𑀼, 𑀧𑀝𑀺𑀩𑀮𑁄 𑀧𑀦 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀬𑁄 𑀧𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀸𑀢𑀺 𑀲𑀘𑁆𑀘𑀁. 𑀏𑀢𑀦𑁆𑀢𑀺 𑀧𑀝𑀺𑀩𑀮𑀢𑁆𑀢𑀁, ‘‘𑀧𑀜𑁆𑀘𑀳𑀺…𑀧𑁂… 𑀯𑀺𑀦𑁂𑀢𑀼’’𑀦𑁆𑀢𑀺𑀯𑀘𑀦𑀁 𑀯𑀸.

𑁭𑁭. 𑀢𑀺𑀢𑁆𑀣𑀺𑀬𑀧𑀓𑁆𑀔𑀲𑀗𑁆𑀓𑀦𑁆𑀢𑁂𑀲𑀽𑀢𑀺 𑀢𑀺𑀢𑁆𑀣𑀺𑀬𑀲𑀗𑁆𑀔𑀸𑀢𑀁 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀁 𑀲𑀗𑁆𑀓𑀫𑀦𑁆𑀢𑁂𑀲𑀼. 𑀆𑀘𑀸𑀭𑀲𑀫𑀸𑀘𑀸𑀭𑀲𑀺𑀓𑁆𑀔𑀸𑀧𑀦𑀓𑀦𑁆𑀢𑀺 𑀅𑀢𑀺𑀯𑀺𑀬 𑀘𑀭𑀺𑀢𑀩𑁆𑀩𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀲𑀻𑀮𑀁 𑀲𑀺𑀓𑁆𑀔𑀸𑀧𑀦𑀓𑀁. 𑀇𑀫𑀺𑀦𑀸 𑀆𑀘𑀸𑀭𑀁 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀆𑀘𑀭𑀺𑀬𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀸𑀫𑀫𑀢𑁆𑀢𑀫𑁂𑀯𑀸𑀢𑀺 ‘‘𑀆𑀘𑀭𑀺𑀬𑁄’’𑀢𑀺 𑀯𑀸 ‘‘𑀅𑀦𑁆𑀢𑁂𑀯𑀸𑀲𑀺𑀓𑁄’’𑀢𑀺 𑀯𑀸 𑀦𑀸𑀫𑀫𑀢𑁆𑀢𑀫𑁂𑀯. 𑀦𑀸𑀦𑀦𑁆𑀢𑀺 𑀉𑀧𑀚𑁆𑀛𑀸𑀬𑀢𑁄 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀢𑁄 𑀯𑀸 𑀦𑀸𑀦𑀁.

𑁨𑁦. 𑀧𑀡𑀸𑀫𑀦𑀸𑀔𑀫𑀸𑀧𑀦𑀸𑀓𑀣𑀸

𑁮𑁦. 𑀬𑀁 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑁂𑀦 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁂𑀳𑀻𑀢𑀺 𑀧𑀩𑁆𑀩𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑁂𑀦 𑀘 𑀉𑀧𑀲𑀫𑁆𑀧𑀤𑀦𑁆𑀢𑁂𑀯𑀸𑀲𑀺𑀓𑁂𑀦 𑀘 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑁂𑀦 𑀘. 𑀏𑀢𑁂𑀲𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑀸𑀦𑀁. 𑀏𑀢𑁂𑀲𑀽𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼. 𑀆𑀘𑀭𑀺𑀬𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑁄 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑀲𑁆𑀲, 𑀉𑀧𑀲𑀫𑁆𑀧𑀤𑀦𑁆𑀢𑁂𑀯𑀸𑀲𑀺𑀓𑁄 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀫𑀻𑀧𑁂𑀢𑀺 𑀦𑀺𑀲𑁆𑀲𑀬𑀸𑀘𑀭𑀺𑀬𑀲𑁆𑀲 𑀘 𑀥𑀫𑁆𑀫𑀸𑀘𑀭𑀺𑀬𑀲𑁆𑀲 𑀘 𑀆𑀲𑀦𑁆𑀦𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀆𑀘𑀭𑀺𑀬𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁, 𑀢𑀲𑁆𑀫𑀸. 𑀆𑀘𑀭𑀺𑀬𑁂𑀦𑀸𑀧𑀻𑀢𑀺 𑀦𑀺𑀲𑁆𑀲𑀬𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀥𑀫𑁆𑀫𑀸𑀘𑀭𑀺𑀬𑁂𑀦𑀸𑀧𑀺. 𑀑𑀯𑀸𑀤𑀸𑀘𑀭𑀺𑀬𑁄 𑀢𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑁂𑀲𑀽𑀢𑀺 𑀘𑀢𑀽𑀲𑀼 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼.

𑁨𑁨. 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀣𑀸

𑀆𑀡𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄

𑁮𑁩. ‘‘𑀦𑀺𑀲𑁆𑀲𑀬𑀧𑀝𑀺𑀧𑀲𑁆𑀲𑀤𑁆𑀥𑀻𑀲𑀽’’𑀢𑀺 𑀲𑀫𑀽𑀳𑀸𑀥𑀸𑀭𑁄. ‘‘𑀉𑀧𑀚𑁆𑀛𑀸𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸𑀢𑀺𑀆𑀤𑀻𑀲𑀽’’𑀢𑀺 𑀅𑀯𑀬𑀯𑀸𑀥𑀸𑀭𑁄. ‘‘𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁄’’𑀢𑀺 𑀇𑀫𑀺𑀦𑀸 𑀦𑀺𑀭𑀸𑀮𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀕𑀢𑁂𑀢𑀺 𑀏𑀯𑀁 𑀉𑀧𑀚𑁆𑀛𑀸𑀬𑁂 𑀕𑀢𑁂𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀤𑀸𑀧𑀻𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀓𑀸𑀮𑁂. 𑀉𑀧𑀚𑁆𑀛𑀸𑀬𑁂𑀦 𑀧𑀯𑀸𑀲𑀺𑀢𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑁄𑀢𑀺 𑀅𑀢𑁆𑀢𑀦𑀸 𑀯𑀸 𑀉𑀧𑀚𑁆𑀛𑀸𑀬𑁂𑀦 𑀯𑀸 𑀏𑀓𑁄 𑀧𑀘𑁆𑀘𑀬𑀲𑀫𑁆𑀪𑁄𑀕𑁄 𑀘 𑀥𑀫𑁆𑀫𑀧𑀭𑀺𑀪𑁄𑀕𑁄 𑀘. 𑀏𑀓𑀤𑀺𑀯𑀲𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄, 𑀤𑁆𑀯𑀺𑀳𑀸𑀤𑀺𑀓𑀁 𑀧𑀦 𑀧𑀕𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀆𑀧𑀢𑁆𑀢𑀺𑀧𑀭𑀺𑀳𑀸𑀭𑁄 𑀦𑀢𑁆𑀣𑀺, 𑀆𑀧𑀢𑁆𑀢𑀺𑀬𑀸 𑀧𑀭𑀺𑀳𑀭𑀡𑀁 𑀅𑀧𑀦𑀬𑀦𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑀚𑁆𑀚𑀻 𑀧𑁂𑀲𑀮𑁄𑀢𑀺 𑀮𑀚𑁆𑀚𑀻 𑀳𑀼𑀢𑁆𑀯𑀸 𑀧𑀺𑀬𑀲𑀻𑀮𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁 𑀉𑀧𑀚𑁆𑀛𑀸𑀬𑀲𑁆𑀲 𑀧𑀓𑁆𑀓𑀦𑁆𑀢𑀅𑀳𑀦𑀺 𑀏𑀯. 𑀢𑀣𑀸𑀢𑀺 𑀬𑀣𑀸 ‘‘𑀉𑀧𑀚𑁆𑀛𑀸𑀬𑁄 𑀮𑀳𑀼𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀢𑀺, 𑀢𑀣𑀸 ‘‘𑀅𑀳𑀁 𑀮𑀳𑀼𑀁 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀘𑁂 𑀯𑀤𑀢𑀻𑀢𑀺 𑀲𑀘𑁂 𑀆𑀘𑀭𑀺𑀬𑁄 𑀯𑀤𑀢𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀲𑀪𑀸𑀕𑀢𑀦𑁆𑀢𑀺 𑀮𑀚𑁆𑀚𑀺𑀧𑁂𑀲𑀮𑀪𑀸𑀯𑀁.

𑀬𑀸𑀯 𑀆𑀕𑀫𑀦𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀬𑀸𑀯 𑀆𑀕𑀫𑀦𑀸. 𑀦𑀦𑁆𑀢𑀺 𑀉𑀧𑀚𑁆𑀛𑀸𑀬𑀁. ‘‘𑀯𑀸𑀲𑁂𑀦𑁆𑀢𑀺𑀬𑁂𑀯𑀸’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀢𑀢𑁆𑀣𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀕𑀢𑀝𑁆𑀞𑀸𑀦𑁂. 𑀢𑁂𑀦𑀸𑀢𑀺 𑀉𑀧𑀚𑁆𑀛𑀸𑀬𑁂𑀦. 𑀧𑀯𑀢𑁆𑀢𑀻𑀢𑀺 𑀧𑀯𑀢𑁆𑀢𑀦𑀁. 𑀦𑀤𑀻𑀧𑀽𑀭𑁂𑀦 𑀯𑀸 𑀉𑀧𑀤𑁆𑀤𑀼𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀤𑀻𑀧𑀽𑀭𑀢𑁆𑀢𑀸 𑀉𑀤𑀓𑁄𑀲𑀓𑁆𑀓𑀦𑀁 𑀆𑀕𑀫𑁂𑀢𑀺, 𑀘𑁄𑀭𑀸𑀤𑀻𑀦𑀁 𑀉𑀧𑀤𑁆𑀤𑀼𑀢𑀢𑁆𑀢𑀸 𑀲𑀳𑀸𑀬𑁂 𑀧𑀭𑀺𑀬𑁂𑀲𑀢𑀺. 𑀲𑁄𑀢𑀺 𑀉𑀧𑀚𑁆𑀛𑀸𑀬𑁄.

‘‘𑀦𑀺𑀲𑁆𑀲𑀬𑀧𑀡𑀸𑀫𑀦𑀸’’𑀢𑀺 𑀇𑀫𑀺𑀦𑀸 𑀆𑀡𑀸𑀧𑀦𑀁 𑀆𑀡𑀢𑁆𑀢𑀻𑀢𑀺 𑀯𑀘𑀦𑀢𑁆𑀣𑁂𑀦 𑀦𑀺𑀲𑁆𑀲𑀬𑀧𑀡𑀸𑀫𑀦𑀸 𑀆𑀡𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀲𑁆𑀲𑀬𑀧𑀡𑀸𑀫𑀦𑀸𑀢𑀺 𑀦𑀺𑀲𑁆𑀲𑀬𑀲𑁆𑀲 𑀉𑀧𑀚𑁆𑀛𑀸𑀘𑀭𑀺𑀬𑀲𑁆𑀲 𑀧𑀡𑀸𑀫𑀦𑀸. 𑀢𑀲𑁆𑀫𑀸 𑀧𑀡𑀸𑀫𑀺𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀆𑀧𑀼𑀘𑁆𑀙𑀻𑀢𑀺𑀆𑀤𑀺𑀦𑀸’’𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀫𑀸 𑀫𑀁 𑀲𑀼𑀲𑀸𑀦𑀕𑀫𑀦𑀁 𑀆𑀧𑀼𑀘𑁆𑀙𑀻’’𑀢𑀺𑀆𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦. 𑀔𑀫𑀸𑀧𑁂𑀢𑀩𑁆𑀩𑁄𑀢𑀺 𑀢𑀺𑀢𑀺𑀓𑁆𑀔𑀸𑀧𑁂𑀢𑀩𑁆𑀩𑁄.

𑀢𑀸𑀯𑀸𑀢𑀺 𑀫𑀳𑀸𑀣𑁂𑀭𑁂𑀳𑀺, 𑀫𑀳𑀸𑀣𑁂𑀭𑀸𑀦𑀁 𑀯𑀸 𑀧𑀞𑀫𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀯𑀺𑀳𑀸𑀭𑀢𑁄 𑀅𑀜𑁆𑀜𑀁 𑀯𑀺𑀳𑀸𑀭𑀁. 𑀅𑀧𑁆𑀧𑁂𑀯𑀸𑀢𑀺 𑀅𑀧𑀺 𑀏𑀯 𑀦𑀸𑀫 𑀔𑀫𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀭𑁂𑀯𑀸𑀢𑀺 𑀅𑀜𑁆𑀜𑀢𑁆𑀣𑁂𑀯. 𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀤𑁄𑀲𑁂𑀦𑀸𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀜𑀸𑀢𑀺𑀯𑀺𑀬𑁄𑀕𑀸𑀤𑀺𑀤𑁄𑀲𑁄 𑀕𑀳𑁂𑀢𑀩𑁆𑀩𑁄. 𑀢𑀁𑀬𑁂𑀯𑀸𑀢𑀺 𑀅𑀢𑁆𑀢𑀦𑀸 𑀯𑀲𑀺𑀢𑀁 𑀢𑀫𑁂𑀯 𑀞𑀸𑀦𑀁. 𑀅𑀜𑁆𑀜𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀢𑁄 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀉𑀧𑀚𑁆𑀛𑀸𑀬𑁂𑀦 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀉𑀧𑀚𑁆𑀛𑀸𑀬𑀲𑀫𑁄𑀥𑀸𑀦𑁂 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺.

𑀲𑀫𑁄𑀥𑀸𑀦𑀯𑀺𑀦𑀺𑀘𑁆𑀙𑀬𑁄

𑀆𑀧𑀼𑀘𑁆𑀙𑀺𑀢𑁆𑀯𑀸𑀢𑀺 =𑁦𑁦 𑀅𑀦𑁆𑀢𑁂𑀯𑀸𑀲𑀺𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀢𑀢𑁆𑀭𑀸𑀧𑀻𑀢𑀺 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑁂𑀲𑀼𑀧𑀺. 𑀓𑀤𑀸𑀢𑀺 𑀓𑀲𑁆𑀫𑀺𑀁 𑀓𑀸𑀮𑁂. 𑀲𑀸𑀬𑀦𑁆𑀳𑁂 𑀯𑀸 𑀭𑀢𑁆𑀢𑀺𑀁𑀯𑀸𑀢𑀺 𑀅𑀚𑁆𑀚 𑀲𑀸𑀬𑀦𑁆𑀳𑁂 𑀯𑀸 𑀭𑀢𑁆𑀢𑀺𑀁 𑀯𑀸. 𑀢𑀁𑀔𑀡𑁂𑀬𑁂𑀯𑀸𑀢𑀺 𑀢𑀲𑁆𑀫𑀺𑀁 𑀲𑀫𑁆𑀧𑀝𑀺𑀘𑁆𑀙𑀦𑀓𑁆𑀔𑀡𑁂𑀬𑁂𑀯.

𑀲𑁄 𑀘𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄 𑀘. 𑀢𑀢𑁄𑀢𑀺 𑀕𑀸𑀫𑀢𑁄. 𑀲𑀼𑀕𑀢𑁄𑀢𑀺 𑀲𑀼𑀝𑁆𑀞𑀼 𑀕𑀢𑁄, 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣𑀸𑀧𑀻𑀢𑀺 𑀧𑀼𑀦 𑀘 𑀧𑀭𑀁. 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀦𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀫𑀦𑁂 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀸’’𑀢𑀺𑀆𑀤𑀺. 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂𑀢𑀺 𑀉𑀧𑀘𑀸𑀭𑀲𑀻𑀫𑀸𑀬 𑀅𑀢𑀺𑀓𑁆𑀓𑀫𑁂 𑀲𑀢𑀺, 𑀅𑀢𑀺𑀓𑁆𑀓𑀫𑀦𑀳𑁂𑀢𑀼 𑀯𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀉𑀧𑀘𑀸𑀭𑀲𑀻𑀫𑀸 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀬𑁂𑀯, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁.

𑀲𑀸𑀬𑀦𑁆𑀳𑁂 𑀯𑀸 𑀭𑀢𑁆𑀢𑀺𑀪𑀸𑀕𑁂 𑀯𑀸𑀢𑀺 𑀅𑀚𑁆𑀚 𑀲𑀸𑀬𑀦𑁆𑀳𑁂 𑀯𑀸 𑀭𑀢𑁆𑀢𑀺𑀪𑀸𑀕𑁂 𑀯𑀸. 𑀲𑁆𑀯𑁂𑀢𑀺 𑀲𑀼𑀯𑁂.

𑀩𑀳𑀺𑀲𑀻𑀫𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺. 𑀢𑀢𑁄𑀢𑀺 𑀩𑀳𑀺𑀲𑀻𑀫𑀢𑁄. 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀦𑁆𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀢𑁄 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁. 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀘𑀸𑀭𑀲𑀻𑀫𑀢𑁄 𑀩𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀢𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸.

𑀫𑀼𑀘𑁆𑀘𑀺𑀢𑀼𑀓𑀸𑀫𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀏𑀯. 𑀧𑀡𑀸𑀫𑁂𑀢𑀻𑀢𑀺 𑀓𑀸𑀬𑀯𑀸𑀘𑀸𑀳𑀺 𑀧𑀡𑀸𑀫𑁂𑀢𑀺. 𑀲𑀸𑀮𑀬𑁄𑀢𑀺 𑀆𑀘𑀭𑀺𑀬𑁂 𑀲𑀸𑀧𑁂𑀓𑁆𑀔𑁄. ‘‘𑀦𑀺𑀭𑀸𑀮𑀬𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦 𑀤𑀸𑀦𑀻’’𑀢𑀺𑀆𑀤𑀺. 𑀏𑀯𑀫𑁆𑀧𑀻𑀢𑀺 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑁂𑀧𑀺. 𑀉𑀪𑀺𑀦𑁆𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂 𑀲𑀢𑀺, 𑀥𑀼𑀭𑀦𑀺𑀓𑁆𑀔𑁂𑀧𑀳𑁂𑀢𑀼 𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀬𑁄𑀚𑀦𑀸. 𑀧𑀡𑀸𑀫𑀺𑀢𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀆𑀘𑀭𑀺𑀬𑀦𑁆𑀢𑀺 𑀦𑀺𑀲𑁆𑀲𑀬𑀸𑀘𑀭𑀺𑀬𑀁. 𑀘𑁂𑀢𑀺𑀬𑀁 𑀯𑀸 𑀯𑀦𑁆𑀤𑀦𑁆𑀢𑀁 𑀉𑀧𑀚𑁆𑀛𑀸𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁 𑀯𑀸 𑀉𑀧𑀚𑁆𑀛𑀸𑀬𑀦𑁆𑀢𑀺 𑀬𑁄𑀚𑀦𑀸. 𑀤𑀽𑀭𑀢𑁆𑀢𑀸𑀢𑀺 𑀤𑀽𑀭𑀪𑀸𑀯𑀢𑁄. 𑀉𑀧𑀭𑀺𑀧𑀸𑀲𑀸𑀤𑁂𑀢𑀺 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺. 𑀢𑀦𑁆𑀢𑀺 𑀉𑀧𑀚𑁆𑀛𑀸𑀬𑀁. 𑀦𑀺𑀲𑀺𑀦𑁆𑀦𑀁 𑀉𑀧𑀚𑁆𑀛𑀸𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀯𑀦𑀯𑀲𑁂𑀦 𑀲𑀫𑁄𑀥𑀸𑀦𑁂 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀧𑀚𑁆𑀛𑀸𑀬𑀲𑁆𑀲 𑀲𑀤𑁆𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.