𑁧𑁦. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑀁

𑁨𑁭𑁧. 𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸

𑁪𑁫𑁧. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀯𑀺𑀦𑀬𑀁 𑀧𑀸𑀴𑀺𑀢𑁄 𑀘, 𑀢𑀤𑀢𑁆𑀣𑀢𑁄 𑀘 𑀥𑀸𑀭𑁂𑀢𑀻𑀢𑀺 𑀯𑀺𑀦𑀬𑀥𑀭𑁄, 𑀢𑀣𑀸 𑀲𑀼𑀢𑁆𑀢𑀦𑁆𑀢𑀁 𑀥𑀸𑀭𑁂𑀢𑀻𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑁄. 𑀢𑁂𑀲𑀽𑀢𑀺 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀼. 𑀲𑀼𑀢𑁆𑀢𑀦𑁆𑀢𑀺𑀓𑁄 𑀪𑀺𑀓𑁆𑀔𑀼 𑀦𑀺𑀓𑁆𑀔𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀘𑀫𑀦𑀉𑀤𑀓𑀸𑀯𑀲𑁂𑀲𑀦𑁆𑀢𑀺 𑀆𑀘𑀫𑁂𑀢𑀺 𑀥𑁄𑀯𑀢𑀺 𑀅𑀦𑁂𑀦𑀸𑀢𑀺 𑀆𑀘𑀫𑀦𑀁, 𑀢𑀫𑁂𑀯 𑀉𑀤𑀓𑀁 𑀆𑀘𑀫𑀦𑀉𑀤𑀓𑀁, 𑀢𑀫𑁂𑀯 𑀅𑀯𑀲𑁂𑀲𑀁 𑀆𑀘𑀫𑀦𑀉𑀤𑀓𑀸𑀯𑀲𑁂𑀲𑀁, 𑀅𑀯𑀲𑁂𑀲𑀆𑀘𑀫𑀦𑀉𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀪𑀺𑀓𑁆𑀔𑀼𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀁 𑀪𑀺𑀓𑁆𑀔𑀼𑀁. 𑀏𑀢𑁆𑀣𑀸𑀢𑀺 𑀆𑀘𑀫𑀦𑀉𑀤𑀓𑀸𑀯𑀲𑁂𑀲𑀝𑁆𑀞𑀧𑀦𑁂. ‘‘𑀲𑀘𑁂 𑀳𑁄𑀢𑀺, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀼𑀩𑁆𑀩𑀘𑀪𑀸𑀯𑀜𑁆𑀘 𑀲𑀺𑀓𑁆𑀔𑀸𑀓𑀸𑀫𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑁂𑀢𑀺 𑀢𑀬𑀸, 𑀓𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀢𑁂𑀢𑀺 𑀢𑀼𑀬𑁆𑀳𑀁, 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀓𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀧𑀓𑁆𑀔𑁄𑀧𑀺 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀻’’𑀢𑀺. 𑀏𑀢𑁆𑀣 𑀧𑀦 𑀆𑀧𑀢𑁆𑀢𑀺𑀬𑁂𑀯. 𑀲𑁄𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑁄.

𑀯𑀺𑀦𑀬𑀥𑀭𑁄𑀧𑀻𑀢𑀺 𑀯𑀺𑀦𑀬𑀥𑀭𑁄 𑀧𑀦, 𑀆𑀭𑁄𑀘𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀚𑁆𑀚𑀫𑀸𑀦𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀢𑁂𑀢𑀺 𑀯𑀺𑀦𑀬𑀥𑀭𑀲𑁆𑀲 𑀦𑀺𑀲𑁆𑀲𑀺𑀢𑀓𑀸, 𑀆𑀳𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀲𑁆𑀲. 𑀢𑁂𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀲𑁆𑀲 𑀦𑀺𑀲𑁆𑀲𑀺𑀢𑀓𑀸, 𑀆𑀭𑁄𑀘𑁂𑀲𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑁄. 𑀫𑀼𑀲𑀸𑀯𑀸𑀤𑀻𑀢𑀺 𑀅𑀪𑀽𑀢𑀢𑁄, 𑀅𑀪𑀽𑀢𑀁 𑀯𑀸 𑀯𑀘𑀦𑀁 𑀯𑀤𑀦𑀲𑀻𑀮𑁄. 𑀏𑀲𑁄𑀢𑀺 𑀯𑀺𑀦𑀬𑀥𑀭𑁄. 𑀢𑁂𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀲𑁆𑀲 𑀦𑀺𑀲𑁆𑀲𑀺𑀢𑀓𑀸, 𑀆𑀳𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀓𑀮𑀳𑀯𑀟𑁆𑀠𑀦𑀓𑀸𑀭𑀡𑀸. 𑀯𑀺𑀦𑀬𑀥𑀭𑁄 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁫𑁩. ‘‘𑀦 𑀢𑀸𑀯 𑀪𑀺𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀪𑀺𑀦𑁆𑀦𑁄𑀢𑀺 𑀏𑀢𑁆𑀣 𑀢𑀧𑀘𑁆𑀘𑀬𑀲𑁆𑀲 𑀅𑀯𑀲𑁆𑀲𑀫𑁆𑀪𑀸𑀯𑀺𑀬𑀢𑁆𑀣𑁂 𑀅𑀦𑀸𑀕𑀢𑀓𑀸𑀮𑀺𑀓𑀢𑀁 𑀤𑀲𑁆𑀲𑁂𑀢𑀺. 𑀢𑀫𑁂𑀯𑀢𑁆𑀣𑀁 𑀲𑀳 𑀉𑀧𑀫𑀸𑀬 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀢𑀦𑁆𑀢𑀺 𑀲𑀲𑁆𑀲𑀁. ‘‘𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀪𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀪𑀺𑀦𑁆𑀦𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑁄 𑀘 𑀔𑁄𑀢𑀺 𑀲𑀗𑁆𑀖𑁄. 𑀓𑀮𑀳𑀯𑀲𑁂𑀦 𑀪𑀺𑀚𑁆𑀚𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀪𑀫𑀅𑀢𑁆𑀣𑀯𑀲𑁂𑀦𑀸𑀢𑀺 𑀲𑀁𑀯𑁂𑀕𑀅𑀢𑁆𑀣𑀯𑀲𑁂𑀦. 𑀲𑀫𑁆𑀪𑀫𑀲𑀤𑁆𑀤𑁄 𑀳𑀺 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺 𑀕𑀸𑀭𑀯𑁂, 𑀪𑀻𑀢𑀺𑀬𑀁, 𑀲𑀁𑀯𑁂𑀕𑁂 𑀘𑀸𑀢𑀺. 𑀇𑀥 𑀧𑀦 𑀲𑀁𑀯𑁂𑀕𑁂 𑀯𑀢𑁆𑀢𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀺𑀦𑁆𑀦𑁂 𑀲𑀁𑀯𑁂𑀕𑀅𑀢𑁆𑀣𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀳𑁂𑀝𑁆𑀞𑀸 𑀓𑀣𑀺𑀢𑀸𑀬 ‘‘𑀪𑀬𑁂 𑀓𑁄𑀥𑁂 𑀧𑀲𑀁𑀲𑀸𑀬’’𑀦𑁆𑀢𑀺 𑀕𑀸𑀣𑀸𑀬 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁫) 𑀘𑀲𑀤𑁆𑀤𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀁 𑀲𑀫𑁆𑀪𑀫𑀅𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀸𑀢𑀺 ‘‘𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀧𑀸𑀞𑁂. 𑀆𑀫𑁂𑀟𑀺𑀢𑀦𑁆𑀢𑀺 𑀆 𑀧𑀼𑀦𑀧𑁆𑀧𑀼𑀦𑀁 𑀪𑀬𑀸𑀤𑀺𑀧𑀻𑀴𑀺𑀢𑀢𑁆𑀢𑀸 𑀫𑁂𑀟𑁂𑀦 𑀉𑀫𑁆𑀫𑀸𑀤𑁂𑀦 𑀇𑀢𑀁 𑀓𑀣𑀺𑀢𑀁 𑀆𑀫𑁂𑀟𑀺𑀢𑀁.

𑁪𑁫𑁪. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀪𑀕𑀯𑀸 𑀯𑀤𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀓𑁆𑀔𑀺𑀧𑀦𑁆𑀢𑀺 𑀅𑀧𑀦𑁂𑀦𑁆𑀢𑀻𑀢𑀺 𑀉𑀓𑁆𑀔𑁂𑀧𑀓𑀸. 𑀉𑀓𑁆𑀔𑀺𑀢𑁆𑀢𑀫𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸. 𑀏𑀢𑁂𑀲𑀦𑁆𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸𑀦𑀁. 𑀧𑀼𑀦 𑀏𑀢𑁂𑀲𑀦𑁆𑀢𑀺 𑀉𑀓𑁆𑀔𑁂𑀧𑀓𑀸𑀦𑀁. 𑀧𑀓𑁆𑀔𑁄𑀢𑀺 𑀲𑀔𑀸. 𑀢𑀦𑁆𑀢𑀺𑀫𑁂𑀯𑀸𑀢𑀺 𑀧𑀸𑀴𑀺𑀫𑁂𑀯, 𑀩𑁆𑀬𑀸𑀧𑀸𑀭𑀫𑁂𑀯 𑀯𑀸.

𑁪𑁫𑁫. 𑀬𑁄𑀢𑀺 𑀪𑀺𑀓𑁆𑀔𑀼. 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀼𑀫𑁆𑀳𑁂𑀢𑀺 𑀥𑀫𑁆𑀫𑀯𑀸𑀤𑀺𑀦𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀁 𑀪𑀡𑀣𑀸𑀢𑀺 𑀓𑀺𑀁 𑀯𑀘𑀦𑀁 𑀪𑀡𑀣. 𑀇𑀢𑀺 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀜𑁆𑀘𑀸𑀢𑀺 𑀥𑀫𑁆𑀫𑀯𑀸𑀤𑀻𑀦𑀜𑁆𑀘. 𑀇𑀢𑀭𑁂𑀲𑀜𑁆𑀘𑀸𑀢𑀺 𑀅𑀥𑀫𑁆𑀫𑀯𑀸𑀤𑀻𑀦𑀜𑁆𑀘. 𑀇𑀫𑁂𑀢𑀺 𑀅𑀢𑁆𑀢𑀦𑁄 𑀧𑀓𑁆𑀔𑁂 𑀇𑀫𑁂 𑀪𑀺𑀓𑁆𑀔𑀽. 𑀢𑁂𑀲𑀦𑁆𑀢𑀺 𑀅𑀥𑀫𑁆𑀫𑀯𑀸𑀤𑀻𑀦𑀁. ‘‘𑀓𑀫𑁆𑀫𑀁 𑀓𑁄𑀧𑁂𑀢𑀻’’𑀢𑀺 ‘‘𑀦𑀸𑀦𑀸𑀲𑀁𑀯𑀸𑀲𑀓𑀘𑀢𑀼𑀢𑁆𑀣𑁄 𑀘𑁂 𑀪𑀺𑀓𑁆𑀔𑀯𑁂 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀅𑀓𑀫𑁆𑀫𑀁, 𑀦 𑀘 𑀓𑀭𑀡𑀻𑀬’’𑀦𑁆𑀢𑀺 𑀯𑀘𑀦𑀢𑁄 (𑀫𑀳𑀸𑀯. 𑁩𑁮𑁯) 𑀓𑀫𑁆𑀫𑀁 𑀓𑁄𑀧𑁂𑀢𑀺. 𑀇𑀢𑀭𑁂𑀲𑀫𑁆𑀧𑀻𑀢𑀺 𑀥𑀫𑁆𑀫𑀯𑀸𑀤𑀻𑀦𑀫𑁆𑀧𑀺. 𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀥𑀫𑁆𑀫𑀯𑀸𑀤𑀻𑀦𑀁 𑀮𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺 𑀥𑀫𑁆𑀫𑀯𑀸𑀤𑀻𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑁄 𑀳𑁄𑀢𑀺𑀬𑁂𑀯, 𑀅𑀬𑀁 𑀦𑀬𑁄 𑀯𑀼𑀢𑁆𑀢𑀦𑀬𑀲𑁆𑀲 𑀅𑀢𑁆𑀣𑀢𑁄 𑀲𑀺𑀤𑁆𑀥𑁄𑀢𑀺 𑀓𑀢𑁆𑀯𑀸 𑀇𑀥 𑀦 𑀯𑀼𑀢𑁆𑀢𑁄. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀬𑁄𑀢𑀺 𑀪𑀺𑀓𑁆𑀔𑀼, 𑀧𑀯𑀺𑀲𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑀺𑀦𑁆𑀦𑁄 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀇𑀫𑁂𑀢𑀺 𑀅𑀢𑁆𑀢𑀦𑁄 𑀧𑀓𑁆𑀔𑁂 𑀇𑀫𑁂 𑀪𑀺𑀓𑁆𑀔𑀽. 𑀇𑀢𑀭𑁂𑀢𑀺 𑀧𑀭𑀧𑀓𑁆𑀔𑁂 𑀇𑀢𑀭𑁂 𑀪𑀺𑀓𑁆𑀔𑀽. 𑀢𑁂𑀲𑀦𑁆𑀢𑀺 𑀥𑀫𑁆𑀫𑀯𑀸𑀤𑀻𑀦𑀁. 𑀬𑀢𑁆𑀣 𑀢𑀢𑁆𑀣 𑀯𑀸 𑀧𑀦 𑀧𑀓𑁆𑀔𑁂𑀢𑀺 𑀬𑀲𑁆𑀫𑀺𑀁 𑀓𑀲𑁆𑀫𑀺𑀁𑀘𑀺 𑀯𑀸 𑀥𑀫𑁆𑀫𑀯𑀸𑀤𑀻𑀦𑀁 𑀧𑀓𑁆𑀔𑁂. 𑀇𑀫𑁂 𑀥𑀫𑁆𑀫𑀯𑀸𑀤𑀺𑀦𑁄𑀢𑀺 𑀕𑀡𑁆𑀳𑀸𑀢𑀻𑀢𑀺 𑀢𑀁𑀢𑀁𑀧𑀓𑁆𑀔𑀕𑀢𑁂 𑀪𑀺𑀓𑁆𑀔𑀽 𑀬𑀸𑀣𑀸𑀯𑀢𑁄 𑀯𑀸 𑀅𑀬𑀸𑀣𑀸𑀯𑀢𑁄 𑀯𑀸 ‘‘𑀇𑀫𑁂 𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺 𑀕𑀡𑁆𑀳𑀸𑀢𑀺.

𑁪𑁫𑁬. 𑀓𑀸𑀬𑁂𑀦 𑀓𑀢𑀁 𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀺𑀬𑀸 𑀓𑀢𑀁 𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁. 𑀢𑀢𑁆𑀣 𑀓𑀸𑀬𑀓𑀫𑁆𑀫𑀁 𑀉𑀧𑀤𑀁𑀲𑁂𑀦𑁆𑀢𑀸 𑀪𑀺𑀓𑁆𑀔𑀽 𑀧𑀳𑀭𑀦𑁆𑀢𑀸 𑀉𑀧𑀤𑀁𑀲𑁂𑀦𑁆𑀢𑀺. 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀦𑁆𑀢𑀸 𑀪𑀺𑀓𑁆𑀔𑀽 𑀨𑀭𑀼𑀲𑀁 𑀯𑀤𑀦𑁆𑀢𑀸 𑀉𑀧𑀤𑀁𑀲𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀬𑁂𑀦 𑀧𑀳𑀭𑀦𑁆𑀢𑀸’’𑀢𑀺𑀆𑀤𑀺. 𑀉𑀧𑀤𑀁𑀲𑁂𑀦𑁆𑀢𑀻𑀢𑀺 𑀧𑀯𑀢𑁆𑀢𑁂𑀦𑁆𑀢𑀺. ‘‘𑀓𑁄𑀥𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑁂𑀫𑀯𑀲𑁂𑀦𑀸𑀢𑀺 𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀥𑀫𑁆𑀫𑀺𑀬𑀸𑀦𑀻𑀢𑀺 𑀅𑀥𑀫𑁆𑀫𑁂𑀦 𑀓𑀢𑁆𑀢𑀩𑁆𑀩𑀸𑀦𑀺. ‘‘𑀓𑀺𑀘𑁆𑀘𑀸𑀦𑀻’’𑀢𑀺 𑀇𑀫𑀺𑀦𑀸 𑀇𑀬𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀅𑀲𑀫𑁆𑀫𑁄𑀤𑀺𑀓𑀸𑀢𑀺 𑀏𑀢𑁆𑀣 𑀬𑀓𑀸𑀭𑀮𑁄𑀧𑁄𑀢𑀺 𑀆𑀳 ‘‘𑀅𑀲𑀫𑁆𑀫𑁄𑀤𑀺𑀓𑀸𑀬𑀸’’𑀢𑀺. ‘‘𑀓𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀲𑀫𑁆𑀫𑁄𑀤𑀁 𑀚𑀦𑁂𑀢𑀻𑀢𑀺 𑀅𑀲𑀫𑁆𑀫𑁄𑀤𑀺𑀓𑀸𑀢𑀺 𑀓𑀢𑁆𑀯𑀸 𑀡𑀺𑀓𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀏𑀢𑁆𑀣 𑀉𑀧𑀘𑀸𑀭𑁄 𑀦𑀸𑀫 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀦𑁆𑀢𑀸𑀦𑀁 𑀳𑀢𑁆𑀣𑀲𑁆𑀲 𑀧𑀸𑀧𑀼𑀡𑀦𑀝𑁆𑀞𑀸𑀦𑀁, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀦𑀦𑁆𑀢𑀭𑀺𑀓𑀸𑀬𑀸𑀢𑀺 𑀏𑀢𑁆𑀣 𑀏𑀓𑀁 𑀆𑀲𑀦𑀁 𑀅𑀦𑁆𑀢𑀭𑀁 𑀩𑁆𑀬𑀯𑀳𑀺𑀢𑀁 𑀇𑀫𑀺𑀲𑁆𑀲𑀸 𑀦𑀺𑀲𑀺𑀦𑁆𑀦𑀓𑀺𑀭𑀺𑀬𑀸𑀬𑀸𑀢𑀺 𑀆𑀲𑀦𑀦𑁆𑀢𑀭𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑁂𑀓𑀁 𑀆𑀲𑀦𑀁 𑀅𑀦𑁆𑀢𑀭’’𑀦𑁆𑀢𑀺. ‘‘𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁪𑁫𑁭-𑁮. 𑀅𑀬𑀁 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀥𑀺𑀧𑁆𑀧𑀸𑀬𑁄 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀏𑀢𑁂𑀢𑀺 𑀓𑁄𑀥𑀸𑀪𑀺𑀪𑀽𑀢𑁂 𑀪𑀺𑀓𑁆𑀔𑀽. 𑀪𑀕𑀯𑀸 𑀧𑀦 𑀓𑀣𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑀢𑁆𑀣𑁄 𑀅𑀢𑁄’’𑀢𑀺 𑀇𑀫𑀺𑀦𑀸 𑀅𑀦𑀢𑁆𑀣𑀢𑁄𑀢𑀺 𑀧𑀤𑀲𑁆𑀲 𑀑𑀓𑀸𑀭𑀮𑁄𑀧𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀧𑀤𑀸𑀦𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀢𑀲𑁆𑀫𑀸’’𑀢𑀺𑀆𑀤𑀺. ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 ‘‘𑀅𑀦𑀢𑁆𑀣𑀤𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀅𑀦𑀢𑁆𑀣𑀢𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀢𑁆𑀣𑀤𑁄𑀢𑀺 𑀅𑀦𑀢𑁆𑀣𑀁 𑀤𑀤𑀸𑀢𑀻𑀢𑀺 𑀅𑀦𑀢𑁆𑀣𑀤𑁄.

𑁪𑁬𑁪. 𑀧𑀼𑀣𑀼𑀲𑀤𑁆𑀤𑁄𑀢𑀺 𑀏𑀢𑁆𑀣 𑀧𑀼𑀣𑀼𑀲𑀤𑁆𑀤𑁄 𑀫𑀳𑀦𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀳𑀸’’𑀢𑀺. 𑀅𑀲𑁆𑀲𑀸𑀢𑀺 𑀪𑀡𑁆𑀟𑀦𑀓𑀸𑀭𑀓𑀲𑁆𑀲 𑀚𑀦𑀲𑁆𑀲. 𑀲𑀫𑀚𑀦𑁄𑀢𑀺 𑀏𑀢𑁆𑀣 𑀲𑀫𑀲𑀤𑁆𑀤𑁄 𑀲𑀤𑀺𑀲𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀏𑀓𑀲𑀤𑀺𑀲𑁄’’𑀢𑀺, 𑀢𑀼𑀮𑁆𑀬𑀸𑀥𑀺𑀓𑀭𑀡𑀲𑀫𑀸𑀲𑁄𑀬𑀁. 𑀪𑀡𑁆𑀟𑀦𑀓𑀸𑀭𑀓𑁄 𑀅𑀬𑀁 𑀚𑀦𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀪𑀡𑁆𑀟𑀦𑀓𑀸𑀭𑀓𑁂𑀲𑀼 𑀚𑀦𑁂𑀲𑀼. 𑀅𑀜𑁆𑀜𑀫𑁆𑀧𑀺 𑀏𑀓𑀁 𑀇𑀤𑀁 𑀓𑀸𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀫𑀜𑁆𑀜𑀺𑀢𑁆𑀣𑀸𑀢𑀺 𑀓𑁄𑀘𑀺 𑀏𑀓𑁄𑀧𑀺 𑀦 𑀫𑀜𑁆𑀜𑀺𑀢𑁆𑀣𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀅𑀫𑀜𑁆𑀜𑀭𑀼𑀦𑁆𑀢𑀺 𑀏𑀢𑁆𑀣 𑀆𑀯𑀺𑀪𑀢𑁆𑀢𑀺𑀬𑀸 ‘‘𑀭𑀼’’𑀦𑁆𑀢𑀺 𑀆𑀤𑁂𑀲𑁄 𑀤𑀲𑁆𑀲𑀺𑀢𑁄.

𑀧𑀭𑀺𑀫𑀼𑀝𑁆𑀞𑀸𑀢𑀺 𑀧𑀭𑀺𑀫𑀼𑀝𑁆𑀞𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀧𑀭𑀺𑀫𑀼𑀝𑁆𑀞𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀫𑀼𑀝𑁆𑀞𑀲𑀢𑀺𑀦𑁄’’𑀢𑀺. 𑀅𑀝𑁆𑀞𑀓𑁆𑀔𑀭𑀕𑀸𑀣𑀸𑀬𑀁 ‘‘𑀧𑀜𑁆𑀘𑀫𑀁 𑀮𑀖𑀼 𑀲𑀩𑁆𑀩𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀫𑀲𑁆𑀲 𑀭𑀸𑀓𑀸𑀭𑀲𑁆𑀲 𑀭𑀲𑁆𑀲𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀸𑀓𑀸𑀭𑀲𑁆𑀲 𑀭𑀲𑁆𑀲𑀸𑀤𑁂𑀲𑁄 𑀓𑀢𑁄’’𑀢𑀺. 𑀓𑀣𑀁 𑀪𑀸𑀡𑀺𑀦𑁄𑀢𑀺 𑀯𑀸𑀘𑀁 𑀪𑀸𑀡𑀺𑀦𑁄. 𑀫𑀼𑀔𑀸𑀬𑀸𑀫𑀦𑁆𑀢𑀺 𑀏𑀢𑁆𑀣 𑀆𑀬𑀸𑀫𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀧𑀭𑀺𑀬𑀸𑀬𑁄, 𑀯𑀺𑀢𑁆𑀣𑀸𑀭𑁄 𑀘 𑀦𑀸𑀫 𑀧𑀲𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀲𑀸𑀭𑁂𑀢𑀼’’𑀦𑁆𑀢𑀺. 𑀲𑀫𑁆𑀧𑀤𑀸𑀦𑀢𑁆𑀣𑀚𑁄𑀢𑀓𑁂𑀦 𑀢𑀼𑀁𑀧𑀘𑁆𑀘𑀬𑁂𑀦 𑀲𑀫𑁆𑀧𑀤𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀻𑀢𑀸𑀢𑀺 𑀓𑀫𑁆𑀫𑀯𑀸𑀘𑀓𑀲𑁆𑀲 𑀓𑀺𑀢𑀲𑁆𑀲 𑀅𑀧𑁆𑀧𑀥𑀸𑀦𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀫𑀁 𑀦𑀺𑀮𑁆𑀮𑀚𑁆𑀚𑀪𑀸𑀯’’𑀦𑁆𑀢𑀺. 𑀤𑁆𑀯𑀺𑀓𑀫𑁆𑀫𑀓𑀥𑀸𑀢𑀼𑀪𑀸𑀯𑀢𑁄 ‘‘𑀅𑀢𑁆𑀢𑀦𑁄’’𑀢𑀺 𑀧𑀥𑀸𑀦𑀓𑀫𑁆𑀫𑀫𑁆𑀧𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀢𑀦𑁆𑀢𑀺 𑀓𑀮𑀳𑀁. ‘‘𑀚𑀸𑀦’’𑀦𑁆𑀢𑀺 𑀧𑀤𑁂𑀦 ‘‘𑀯𑀺𑀤𑀽’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀜𑁆𑀘 𑀯𑀸𑀓𑁆𑀬𑀜𑁆𑀘 𑀤𑀲𑁆𑀲𑁂𑀢𑀺. 𑀯𑀺𑀤𑀦𑁆𑀢𑀺 𑀚𑀸𑀦𑀦𑁆𑀢𑀻𑀢𑀺 𑀯𑀺𑀤𑀽𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀤𑀻𑀦𑀯𑁄𑀢𑀺𑀆𑀤𑀻𑀦𑀯𑁂𑀦 𑀤𑁄𑀲𑁂𑀦 𑀲𑀳 𑀧𑀯𑀢𑁆𑀢𑁄. 𑀅𑀬𑀦𑁆𑀢𑀺 𑀓𑀮𑀳𑁄.

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀻𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀆𑀖𑀸𑀢’’𑀦𑁆𑀢𑀺. 𑀬𑁂𑀢𑀺 𑀚𑀦𑀸. 𑀉𑀧𑀦𑀬𑁆𑀳𑀦𑁆𑀢𑀺 𑀉𑀧𑀦𑀳𑀦𑁆𑀢𑀺 𑀩𑀦𑁆𑀥𑀦𑁆𑀢𑀺. 𑀲𑀦𑀦𑁆𑀢𑀦𑁄𑀢𑀺 𑀏𑀢𑁆𑀣 𑀲𑀦𑀦𑁆𑀢𑀦𑀲𑀤𑁆𑀤𑁄 𑀧𑀼𑀭𑀸𑀡𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑁄𑀭𑀸𑀡𑁄’’𑀢𑀺.

‘‘𑀅𑀜𑁆𑀜𑁂’’𑀢𑀺 𑀇𑀫𑀺𑀦𑀸 𑀧𑀭𑁂𑀢𑀺 𑀏𑀢𑁆𑀣 𑀧𑀭𑀲𑀤𑁆𑀤𑀲𑁆𑀲 𑀧𑀘𑁆𑀙𑀸𑀪𑀸𑀕𑀢𑁆𑀣𑀸𑀤𑀬𑁄 𑀦𑀺𑀯𑀸𑀭𑁂𑀢𑀺. 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂𑀢𑀺 𑀏𑀢𑁆𑀣 𑀏𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀫𑀚𑁆𑀛𑁂’’𑀢𑀺. 𑀬𑀫𑀼𑀥𑀸𑀢𑀼 𑀉𑀧𑀬𑀫𑀦𑀢𑁆𑀣𑁄 𑀲𑁂𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄𑀢𑀺 𑀆𑀳 ‘‘𑀉𑀧𑀬𑀫𑀸𑀫𑀸’’𑀢𑀺. ‘‘𑀲𑀢𑀢𑀁 𑀲𑀫𑀺𑀢𑀁 𑀫𑀘𑁆𑀘𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀇𑀫𑀺𑀦𑀸 ‘‘𑀦 𑀚𑀸𑀦𑀦𑁆𑀢𑀻’’𑀢𑀺 𑀧𑀤𑀲𑁆𑀲 𑀆𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀫𑀳𑀸𑀚𑀦𑀓𑀸𑀬𑁂 𑀬𑁂 𑀧𑀡𑁆𑀟𑀺𑀢𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀳𑀻𑀢𑀺 𑀏𑀯𑀫𑁂𑀯. 𑀚𑀸𑀦𑀦𑁆𑀢𑀸 𑀢𑁂 𑀧𑀡𑁆𑀟𑀺𑀢𑀸 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀫𑁂𑀥𑀦𑁆𑀢𑀸 𑀳𑀺𑀁𑀲𑀦𑁆𑀢𑀸 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀫𑁂𑀥𑀕𑀸 𑀓𑀮𑀳𑀸. 𑀓𑁂𑀘𑀺 𑀫𑁂𑀥𑀥𑀸𑀢𑀼𑀢𑁄 𑀡𑁆𑀯𑀼𑀧𑀘𑁆𑀘𑀬𑀁 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀫𑁂𑀥𑀓𑀸𑀢𑀺 𑀧𑀞𑀫𑀓𑁆𑀔𑀭𑁂𑀦 𑀧𑀸𑀞𑁄 𑀪𑀯𑁂𑀬𑁆𑀬.

𑀢𑁂𑀲𑀫𑁆𑀧𑀻𑀢𑀺 𑀩𑁆𑀭𑀳𑁆𑀫𑀤𑀢𑁆𑀢𑀤𑀻𑀖𑀸𑀯𑀼𑀓𑀼𑀫𑀸𑀭𑀸𑀦𑀫𑁆𑀧𑀺. 𑀲𑀗𑁆𑀕𑀢𑀻𑀢𑀺 𑀲𑀫𑀸𑀕𑀫𑁄. 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁. 𑀬𑁂𑀲𑀁 𑀢𑀼𑀫𑁆𑀳𑀸𑀓𑀁 𑀦𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀅𑀝𑁆𑀞𑀻𑀦𑀺 𑀙𑀺𑀦𑁆𑀦𑀸𑀦𑀺, 𑀦 𑀧𑀸𑀡𑀸 𑀳𑀢𑀸, 𑀦 𑀕𑀯𑀲𑁆𑀲𑀥𑀦𑀸𑀦𑀺 𑀳𑀝𑀸𑀦𑀺. 𑀢𑁂𑀲𑀁 𑀢𑀼𑀫𑁆𑀳𑀸𑀓𑀁 𑀓𑀲𑁆𑀫𑀸 𑀲𑀗𑁆𑀕𑀢𑀺 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀻𑀢𑀺 𑀏𑀢𑁆𑀣 𑀲𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀓𑀸𑀭𑀡𑀜𑁆𑀘 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀓𑀝𑀧𑀭𑀺𑀲𑁆𑀲𑀬𑁂 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂 𑀘𑀸’’𑀢𑀺. ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀪𑀺𑀪𑀼𑀬𑁆𑀬𑀸𑀢𑀺 𑀧𑀤𑀲𑁆𑀲 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀦𑀺𑀧𑀓𑁂𑀦 𑀲𑀳𑀸𑀬𑁂𑀦.

𑀭𑀸𑀚𑀸𑀯𑀸𑀢𑀺 𑀏𑀢𑁆𑀣 𑀭𑀸𑀚𑀸 𑀇𑀯𑀸𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀭𑀸𑀚𑀲𑀤𑁆𑀤𑀲𑁆𑀲 𑀉𑀧𑀮𑀓𑁆𑀔𑀡𑀯𑀲𑁂𑀦 𑀫𑀳𑀸𑀚𑀦𑀓, 𑀅𑀭𑀺𑀦𑁆𑀤𑀫𑀭𑀸𑀚𑀸𑀦𑁄 𑀘 𑀇𑀯𑀲𑀤𑁆𑀤𑀲𑁆𑀲 𑀑𑀧𑀫𑁆𑀫𑀢𑁆𑀣𑀚𑁄𑀢𑀓𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀭𑀝𑁆𑀞𑀯𑀺𑀚𑀺𑀢𑀲𑀤𑁆𑀤𑀸 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀸𑀬𑀸. 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀸𑀦𑀁 𑀓𑀸𑀫𑀸𑀘𑀸𑀭𑀢𑁄 𑀕𑀫𑁆𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀺𑀚𑀺𑀢𑀁 𑀭𑀝𑁆𑀞’’𑀦𑁆𑀢𑀺. ‘‘𑀫𑀸𑀢𑀗𑁆𑀕𑁄 𑀅𑀭𑀜𑁆𑀜𑁂 𑀦𑀸𑀕𑁄 𑀇𑀯𑀸’’𑀢𑀺 𑀇𑀫𑀺𑀦𑀸 𑀧𑀤𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀢𑀗𑁆𑀕𑁄𑀢𑀺 𑀳𑀢𑁆𑀣𑀻 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. ‘‘𑀳𑀢𑁆𑀣𑀻 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀫𑀳𑀦𑁆𑀢𑁄 𑀅𑀗𑁆𑀕𑁄 𑀲𑀭𑀻𑀭𑀫𑁂𑀢𑀲𑁆𑀲𑀸𑀢𑀺 𑀫𑀸𑀢𑀗𑁆𑀕𑁄𑀢𑀺 𑀯𑀘𑀦𑀢𑁆𑀣𑁂𑀦 𑀳𑀢𑁆𑀣𑀻 𑀫𑀸𑀢𑀗𑁆𑀕𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀦𑁆𑀢𑀲𑀤𑁆𑀤𑀲𑁆𑀲 𑀫𑀸𑀢𑀸𑀤𑁂𑀲𑁄. 𑀦𑀸𑀕𑀲𑀤𑁆𑀤𑁄 𑀉𑀭𑀕𑁂 𑀘 𑀳𑀢𑁆𑀣𑀺𑀫𑁆𑀳𑀺 𑀘 𑀦𑀸𑀕𑀭𑀼𑀓𑁆𑀔𑁂 𑀘 𑀉𑀢𑁆𑀢𑀫𑁂 𑀘 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀜𑁆𑀘𑀸𑀢𑀺 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺, 𑀇𑀥 𑀉𑀢𑁆𑀢𑀫𑀢𑁆𑀣𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀸𑀕𑁄𑀢𑀺 𑀫𑀳𑀦𑁆𑀢𑀸𑀥𑀺𑀯𑀘𑀦𑀫𑁂𑀢’’𑀦𑁆𑀢𑀺. 𑀫𑀸𑀢𑀗𑁆𑀕𑀭𑀜𑁆𑀜𑁂𑀯𑀸𑀢𑀺 𑀏𑀢𑁆𑀣 𑀇𑀯𑀲𑀤𑁆𑀤𑀲𑁆𑀲 𑀑𑀧𑀫𑁆𑀫𑀢𑁆𑀣𑀚𑁄𑀢𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. ‘‘𑀬𑀣𑀸 𑀘 𑀧𑀸𑀮𑀺𑀮𑁂𑀬𑁆𑀬𑀓𑁄’’𑀢𑀺 𑀇𑀫𑀺𑀦𑀸 𑀫𑀸𑀢𑀗𑁆𑀕𑀦𑀸𑀕𑀲𑁆𑀲 𑀲𑀭𑀽𑀧𑀁 𑀉𑀧𑀮𑀓𑁆𑀔𑀡𑁂𑀦 𑀤𑀲𑁆𑀲𑁂𑀢𑀺.

𑁨𑁭𑁫. 𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸

𑁪𑁬𑁭. 𑀧𑀸𑀮𑀺𑀮𑁂𑀬𑁆𑀬𑀓𑀦𑁆𑀢𑀺 𑀧𑀮𑀺𑀮𑀯𑀦𑀲𑀡𑁆𑀟𑁂 𑀯𑀲𑀦𑁆𑀢𑀳𑀢𑁆𑀣𑀺𑀦𑀸𑀕𑀁. ‘‘𑀳𑀢𑁆𑀣𑀻’’𑀢𑀺 𑀘 ‘‘𑀦𑀸𑀕𑁄’’𑀢𑀺 𑀘 𑀤𑁆𑀯𑀺𑀦𑁆𑀦𑀁 𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀥𑀺𑀓𑀢𑁆𑀣𑁄𑀢𑀺 𑀆𑀳 ‘‘𑀫𑀳𑀸𑀳𑀢𑁆𑀣𑀻’’𑀢𑀺. 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁂𑀳𑀺 𑀢𑁂𑀳𑀺 𑀳𑀢𑁆𑀣𑀺𑀆𑀤𑀻𑀳𑀺 𑀙𑀺𑀦𑁆𑀦𑀕𑁆𑀕𑀸𑀦𑀻𑀢𑀺 𑀬𑁄𑀚𑀦𑀸. 𑀑𑀪𑀕𑁆𑀕𑁄𑀪𑀕𑁆𑀕𑀦𑁆𑀢𑀺 𑀪𑀜𑁆𑀚𑀺𑀢𑁆𑀯𑀸 𑀅𑀥𑁄𑀧𑀸𑀢𑀺𑀢𑀁 𑀑𑀪𑀕𑁆𑀕𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀜𑁆𑀚𑀺𑀢𑁆𑀯𑀸 𑀪𑀜𑁆𑀚𑀺𑀢𑁆𑀯𑀸 𑀧𑀸𑀢𑀺𑀢’’𑀦𑁆𑀢𑀺. ‘‘𑀉𑀘𑁆𑀘𑀝𑁆𑀞𑀸𑀦𑀢𑁄’’𑀢𑀺 𑀇𑀫𑀺𑀦𑀸 𑀅𑀯𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀅𑀥𑁄𑀢𑁆𑀣𑀁 𑀦𑀬𑁂𑀦 𑀤𑀲𑁆𑀲𑁂𑀢𑀺. 𑀏𑀢𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀸𑀕𑀲𑁆𑀲. 𑀢𑁂𑀢𑀺 𑀳𑀢𑁆𑀣𑀺𑀆𑀤𑀬𑁄. 𑀢𑁂𑀳𑀻𑀢𑀺 𑀳𑀢𑁆𑀣𑀺𑀆𑀤𑀻𑀳𑀺. 𑀧𑀺𑀯𑀦𑁆𑀢𑁂𑀳𑀺 𑀢𑁂𑀳𑀻𑀢𑀺 𑀬𑁄𑀚𑀦𑀸. 𑀓𑀤𑁆𑀤𑀫𑁄𑀤𑀓𑀸𑀦𑀻𑀢𑀺 𑀓𑀤𑁆𑀤𑀫𑁂𑀦 𑀲𑀁𑀲𑀝𑁆𑀞𑀸𑀦𑀺 𑀉𑀤𑀓𑀸𑀦𑀺.

𑀈𑀲𑀸𑀤𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀈𑀲𑀸𑀬 𑀲𑀤𑀺𑀲𑁄 𑀤𑀦𑁆𑀢𑁄 𑀇𑀫𑀲𑁆𑀲𑀸𑀢𑀺 𑀈𑀲𑀸𑀤𑀦𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀣𑀈𑀲𑀸𑀲𑀤𑀺𑀲𑀤𑀦𑁆𑀢𑀲𑁆𑀲𑀸’’𑀢𑀺. ‘‘𑀭𑀣𑀈𑀲𑀸’’𑀢𑀺 𑀇𑀫𑀺𑀦𑀸 𑀦𑀗𑁆𑀕𑀮𑀈𑀲𑀁 𑀦𑀺𑀯𑀢𑁆𑀢𑁂𑀢𑀺. 𑀬𑀤𑁂𑀓𑁄𑀢𑀺 𑀬𑀁 𑀏𑀓𑁄. 𑀬𑀁𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺. 𑀅𑀲𑁆𑀲 𑀦𑀸𑀕𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀸𑀕𑀲𑁆𑀲. 𑀦𑀸𑀕𑁂𑀦𑀸𑀢𑀺 𑀩𑀼𑀤𑁆𑀥𑀦𑀸𑀕𑁂𑀦.

𑀬𑀣𑀸𑀪𑀺𑀭𑀦𑁆𑀢𑀦𑁆𑀢𑀺 𑀏𑀢𑁆𑀣 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀭𑀫𑀢𑀻𑀢𑀺 𑀆𑀳 ‘‘𑀢𑁂𑀫𑀸𑀲’’𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀢𑁂𑀫𑀸𑀲𑀯𑀺𑀳𑀭𑀡𑁂𑀦. 𑀧𑀢𑁆𑀣𑀝𑀸 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑀢𑀮𑁂.

‘‘𑀓𑁄𑀲𑀫𑁆𑀩𑀺𑀦𑀺𑀯𑀸𑀲𑀺𑀦𑁄’’𑀢𑀺 𑀇𑀫𑀺𑀦𑀸 𑀓𑁄𑀲𑀫𑁆𑀩𑀺𑀬𑀁 𑀦𑀺𑀯𑀲𑀦𑁆𑀢𑀻𑀢𑀺 𑀓𑁄𑀲𑀫𑁆𑀩𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁨𑁭𑁬. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸

𑁪𑁭𑁧. ‘‘𑀮𑀤𑁆𑀥𑀺𑀕𑁆𑀕𑀳𑀡’’𑀦𑁆𑀢𑀺 𑀇𑀫𑀺𑀦𑀸 𑀆𑀤𑀻𑀬𑀢𑁂 𑀆𑀤𑀸𑀬𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁪𑁭𑁫. 𑀢𑀁 𑀤𑀺𑀯𑀲𑀫𑁂𑀯𑀸𑀢𑀺 𑀢𑀲𑁆𑀫𑀺𑀁 𑀲𑀗𑁆𑀖𑀲𑀸𑀫𑀕𑁆𑀕𑀺𑀓𑀭𑀡𑀤𑀺𑀯𑀲𑁂𑀬𑁂𑀯.

𑁪𑁭𑁬. 𑀦 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸𑀢𑀺 𑀫𑀽𑀮𑀢𑁄 𑀫𑀽𑀮𑀁 𑀦 𑀕𑀦𑁆𑀢𑁆𑀯𑀸𑀯. ‘‘𑀅𑀢𑁆𑀣𑀢𑁄 𑀅𑀧𑀕𑀢𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑀢𑁄 𑀅𑀧𑁂𑀢𑀸 𑀅𑀢𑁆𑀣𑀸𑀧𑁂𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀩𑁆𑀬𑀜𑁆𑀚𑀦𑀫𑀢𑁆𑀢𑀁 𑀉𑀧𑁂𑀢𑀸’’𑀢𑀺 𑀇𑀫𑀺𑀦𑀸 𑀩𑁆𑀬𑀜𑁆𑀚𑀦𑀫𑀢𑁆𑀢𑀁 𑀉𑀧𑁂𑀢𑀸 𑀉𑀧𑀕𑀢𑀸 𑀩𑁆𑀬𑀜𑁆𑀚𑀦𑀽𑀧𑁂𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁪𑁭𑁭. 𑀅𑀢𑁆𑀣𑁂𑀲𑀼 𑀚𑀸𑀢𑁂𑀲𑀽𑀢𑀺 𑀏𑀢𑁆𑀣 𑀚𑀸𑀢𑀲𑀤𑁆𑀤𑁄 𑀉𑀧𑁆𑀧𑀦𑁆𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀯𑀺𑀦𑀬𑀅𑀢𑁆𑀣𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀽’’𑀢𑀺. 𑀢𑀜𑁆𑀘 𑀧𑀤𑀁 ‘‘𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑁂𑀲𑀽’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀫𑀳𑀢𑁆𑀣𑀺𑀓𑁄𑀢𑀺 𑀫𑀳𑀦𑁆𑀢𑁄 𑀉𑀧𑀓𑀸𑀭𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀇𑀫𑀲𑁆𑀲𑀸𑀢𑀺 𑀫𑀳𑀢𑁆𑀣𑀺𑀓𑁄𑀢𑀺 𑀤𑀲𑁆𑀲𑀦𑁆𑀢𑁄 𑀆𑀳 ‘‘𑀫𑀳𑀸𑀉𑀧𑀓𑀸𑀭𑁄’’𑀢𑀺.

𑀅𑀦𑀸𑀦𑀼𑀯𑀚𑁆𑀚𑁄 𑀧𑀞𑀫𑁂𑀦𑀸𑀢𑀺 𑀏𑀢𑁆𑀣 𑀧𑀞𑀫𑀲𑀤𑁆𑀤𑁄 𑀢𑀸𑀯𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀸𑀯𑀸’’𑀢𑀺. 𑀲𑀻𑀮𑀢𑁄𑀢𑀺 𑀲𑀻𑀮𑁂𑀦. 𑀉𑀧𑁂𑀓𑁆𑀔𑀺𑀢𑀸𑀘𑀸𑀭𑁄𑀢𑀺 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀺𑀢𑀸𑀘𑀸𑀭𑁄. ‘‘𑀅𑀧𑁂𑀓𑁆𑀔𑀺𑀢𑀸𑀘𑀸𑀭𑁄’’𑀢𑀺𑀧𑀺 𑀧𑀸𑀞𑁄. 𑀉𑀧𑀧𑀭𑀺𑀓𑁆𑀔𑀺𑀢𑀸𑀘𑀸𑀭𑁄𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁄 𑀆𑀘𑀸𑀭𑁄 𑀏𑀢𑀲𑁆𑀲𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀸𑀘𑀸𑀭𑁄.

𑀯𑀺𑀲𑀬𑁆𑀳𑀸𑀢𑀺 𑀏𑀢𑁆𑀣 𑀯𑀺𑀧𑀼𑀩𑁆𑀩𑁄 𑀲𑀳𑀥𑀸𑀢𑀼 𑀅𑀪𑀺𑀪𑀯𑀦𑀢𑁆𑀣𑁄, 𑀢𑁆𑀯𑀸𑀧𑀘𑁆𑀘𑀬𑁄 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺. 𑀅𑀦𑀧𑀕𑀢𑀦𑁆𑀢𑀺 𑀓𑀸𑀭𑀡𑀢𑁄 𑀅𑀦𑀧𑁂𑀢𑀁. 𑀪𑀡𑀦𑁆𑀢𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀳𑀻’’𑀢𑀺𑀆𑀤𑀺. 𑀲𑁄𑀢𑀺 𑀪𑀺𑀓𑁆𑀔𑀼, 𑀦 𑀳𑀸𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀉𑀲𑀽𑀬𑀸𑀬𑀸’’𑀢𑀺 𑀇𑀫𑀺𑀦𑀸 𑀤𑁄𑀲𑀸𑀕𑀢𑀺𑀕𑀫𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀅𑀕𑀢𑀺𑀕𑀫𑀦𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑀸𑀭𑀺𑀲𑁂𑀲𑀦𑀬𑁂𑀦 𑀅𑀯𑀲𑁂𑀲𑀅𑀕𑀢𑀺𑀕𑀫𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀁. 𑀲𑁄𑀢𑀺 𑀪𑀺𑀓𑁆𑀔𑀼. 𑀙𑀫𑁆𑀪𑀢𑀺 𑀘𑁂𑀯𑀸𑀢𑀺 𑀣𑀫𑁆𑀪𑀢𑀺 𑀘𑁂𑀯, 𑀣𑀤𑁆𑀥𑀁 𑀓𑀭𑁄𑀢𑀺 𑀘𑁂𑀯𑀸𑀢𑀺 𑀅𑀢𑁆𑀣𑁄. 𑀯𑁂𑀥𑀢𑀺 𑀘𑀸𑀢𑀺 𑀓𑀫𑁆𑀧𑀢𑀺 𑀘. 𑀬𑁄 𑀘𑀸𑀢𑀺 𑀪𑀺𑀓𑁆𑀔𑀼 𑀧𑀦. 𑀈𑀤𑀺𑀲𑁄𑀢𑀺 𑀉𑀲𑀽𑀬𑀸𑀬 𑀯𑀸 𑀅𑀕𑀢𑀺𑀕𑀫𑀦𑁂𑀦 𑀯𑀸 𑀪𑀡𑀦𑀲𑀗𑁆𑀔𑀸𑀢𑁄 𑀏𑀤𑀺𑀲𑁄 𑀦 𑀳𑁄𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄, 𑀢𑀢𑁄 𑀯𑀼𑀢𑁆𑀢𑀢𑁄 𑀅𑀢𑀺𑀭𑁂𑀓𑀁 𑀓𑀣𑁂𑀢𑀩𑁆𑀩𑀁 𑀓𑀺𑀁 𑀧𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑁄𑀢𑀺 𑀪𑀺𑀓𑁆𑀔𑀼. 𑀳𑀻𑀢𑀺 𑀲𑀘𑁆𑀘𑀁. 𑀓𑀸𑀮𑀸𑀕𑀢𑀦𑁆𑀢𑀺 𑀏𑀢𑁆𑀣 𑀕𑀳𑁂𑀢𑀩𑁆𑀩𑀓𑀸𑀮𑀜𑁆𑀘 𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀣𑁂𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑁂 𑀆𑀕𑀢’’𑀦𑁆𑀢𑀺. 𑀯𑀘𑁄𑀢𑀺 𑀧𑀤𑀁 𑀦 𑀯𑀘𑀦𑀧𑀥𑀸𑀦𑀁, 𑀯𑀘𑀦𑀯𑀦𑁆𑀢𑀧𑀼𑀕𑁆𑀕𑀮𑁄𑀬𑁂𑀯 𑀧𑀥𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀤𑀦𑁆𑀢𑁄’’𑀢𑀺.

𑀆𑀘𑁂𑀭𑀓𑀫𑁆𑀳𑀺 𑀘 𑀲𑀓𑁂𑀢𑀺 𑀏𑀢𑁆𑀣 𑀆𑀘𑀭𑀺𑀬𑀲𑁆𑀲 𑀏𑀲𑁄 𑀆𑀘𑁂𑀭𑀓𑁄, 𑀲𑀲𑁆𑀲 𑀅𑀢𑁆𑀢𑀦𑁄 𑀏𑀲𑁄 𑀲𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑁂’’𑀢𑀺. 𑀕𑀸𑀣𑀸𑀪𑀸𑀯𑀢𑁄 𑀆𑀘𑀭𑀺𑀬𑀲𑀤𑁆𑀤𑀲𑁆𑀲 𑀆𑀘𑁂𑀭𑀸𑀤𑁂𑀲𑁄 𑀓𑀸𑀢𑀩𑁆𑀩𑁄. ‘‘𑀯𑀸𑀤𑁂’’𑀢𑀺 𑀇𑀫𑀺𑀦𑀸 𑀇𑀤𑀫𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀡𑀺𑀓𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀅𑀮𑀁 𑀧𑀫𑁂𑀢𑀼𑀦𑁆𑀢𑀺 𑀏𑀢𑁆𑀣 𑀅𑀮𑀁𑀲𑀤𑁆𑀤𑁄 𑀲𑀫𑀢𑁆𑀣𑀢𑁆𑀣𑁄, 𑀧𑀫𑀲𑀤𑁆𑀤𑁄𑀢𑀼𑀮𑀦𑀢𑁆𑀣𑁄𑀢𑀺 𑀆𑀳 ‘‘𑀢𑀼𑀮𑀬𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺. 𑀓𑀣𑁂𑀢𑀯𑁂𑀢𑀺 𑀏𑀢𑁆𑀣 𑀢𑀯𑁂𑀲𑀤𑁆𑀤𑁄 𑀅𑀜𑁆𑀜𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀪𑀸𑀯𑀯𑀸𑀘𑀓𑁄, 𑀇𑀥 𑀧𑀦 𑀓𑀫𑁆𑀫𑀯𑀸𑀘𑀓𑁄𑀢𑀺 𑀆𑀳 ‘‘𑀓𑀣𑁂𑀢𑀩𑁆𑀩𑁂’’𑀢𑀺. 𑀯𑀺𑀭𑀤𑁆𑀥𑀝𑁆𑀞𑀸𑀦𑀓𑀼𑀲𑀮𑁄𑀢𑀺 𑀯𑀺𑀭𑀤𑁆𑀥𑀝𑁆𑀞𑀸𑀦𑁂 𑀓𑀼𑀲𑀮𑁄.

𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀓𑀣𑁂𑀢𑀩𑁆𑀩𑀁. 𑀅𑀬𑀁 𑀳𑁂𑀢𑁆𑀣𑀢𑁆𑀣𑁄𑀢𑀺 𑀅𑀬𑀁 𑀏𑀯 𑀏𑀢𑁆𑀣 𑀕𑀸𑀣𑀸𑀬𑀁 𑀅𑀢𑁆𑀣𑁄𑀢𑀺 𑀬𑁄𑀚𑀦𑀸. ‘‘𑀕𑀘𑁆𑀙𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀚𑀦𑁆𑀢𑀻𑀢𑀺 𑀏𑀢𑁆𑀣 𑀯𑀚𑀥𑀸𑀢𑀼𑀬𑀸 𑀕𑀢𑁆𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤’’𑀦𑁆𑀢𑀺 𑀇𑀫𑀺𑀦𑀸 ‘‘𑀲𑀓𑀁 𑀆𑀤𑀸𑀬’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀆𑀘𑀭𑀺𑀬𑀯𑀸𑀤𑁄 𑀳𑀺 𑀆𑀤𑀸𑀢𑀩𑁆𑀩𑀢𑁄 𑀕𑀳𑁂𑀢𑀩𑁆𑀩𑀢𑁄 𑀆𑀤𑀸𑀬𑀦𑁆𑀢𑀺 𑀯𑀼𑀢𑁆𑀢𑁄. 𑀢𑀤𑀦𑀼𑀭𑀽𑀧𑀦𑁆𑀢𑀺 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀅𑀦𑀼𑀭𑀽𑀧𑀁. 𑀩𑁆𑀬𑀸𑀓𑀭𑀫𑀸𑀦𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀝𑁆𑀞𑀳𑀺 𑀤𑀽𑀢𑀗𑁆𑀕𑁂𑀳𑀻𑀢𑀺 ‘‘𑀲𑁄𑀢𑀸 𑀘 𑀳𑁄𑀢𑀺, 𑀲𑀸𑀯𑁂𑀢𑀸 𑀘, 𑀉𑀕𑁆𑀕𑀳𑁂𑀢𑀸 𑀘, 𑀥𑀸𑀭𑁂𑀢𑀸 𑀘, 𑀯𑀺𑀜𑁆𑀜𑀸𑀢𑀸 𑀘, 𑀯𑀺𑀜𑁆𑀜𑀸𑀧𑁂𑀢𑀸, 𑀘 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀲𑁆𑀲, 𑀦𑁄 𑀘 𑀓𑀮𑀳𑀓𑀸𑀭𑀓𑁄’’𑀢𑀺 (𑀘𑀽𑀴𑀯. 𑁩𑁪𑁭; 𑀅. 𑀦𑀺. 𑁮.𑁧𑁬) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀤𑀽𑀢𑀲𑁆𑀲 𑀅𑀗𑁆𑀕𑁂𑀳𑀺. 𑀓𑀲𑁆𑀲 𑀤𑀽𑀢𑁂𑀬𑁆𑀬𑀓𑀫𑁆𑀫𑀦𑁆𑀢𑀺 𑀆𑀳 ‘‘𑀲𑀗𑁆𑀖𑀲𑁆𑀲𑀸’’𑀢𑀺. 𑀤𑀽𑀢𑀲𑁆𑀲 𑀏𑀢𑀸𑀦𑀺 𑀤𑀽𑀢𑁂𑀬𑁆𑀬𑀸𑀦𑀺, 𑀢𑀸𑀦𑀺𑀬𑁂𑀯 𑀓𑀫𑁆𑀫𑀸𑀦𑀺 𑀤𑀽𑀢𑁂𑀬𑁆𑀬𑀓𑀫𑁆𑀫𑀸𑀦𑀺, 𑀢𑁂𑀲𑀼. 𑀇𑀤𑀦𑁆𑀢𑀺 𑀅𑀢𑁆𑀣𑀚𑀸𑀓𑀁, 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀇𑀤𑀦𑁆𑀢𑀺 𑀅𑀬𑀫𑀢𑁆𑀣𑁄. 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀘𑁆𑀙𑀺𑀫𑀦𑀬𑁂 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀦𑁂𑀢𑁆𑀯𑀸 𑀳𑀯𑀦𑁆𑀢𑀺 𑀧𑀽𑀚𑁂𑀦𑁆𑀢𑀻𑀢𑀺 𑀆𑀳𑀯𑁄 𑀤𑀸𑀬𑀓𑀸, 𑀢𑁂𑀲𑀁 𑀆𑀳𑀽𑀦𑀁. 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀁 𑀧𑀽𑀚𑁂𑀢𑀩𑁆𑀩𑀦𑁆𑀢𑀺 𑀆𑀳𑀼𑀢𑀺, 𑀢𑀁 𑀆𑀳𑀼𑀢𑀺𑀁. 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀲 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲𑀸’’𑀢𑀺. 𑀓𑀭𑀯𑀘𑁄𑀢𑀺 𑀏𑀢𑁆𑀣 ‘‘𑀯𑀘𑁄𑀓𑀭𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀪𑀸𑀯𑀢𑁄 𑀧𑀤𑀯𑀺𑀧𑀭𑀺𑀬𑀸𑀬𑀯𑀲𑁂𑀦 ‘‘𑀓𑀭𑀯𑀘𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀯𑀘𑀦𑀁 𑀓𑀭𑁄𑀦𑁆𑀢𑁄’’𑀢𑀺. ‘‘𑀯𑀘𑀦𑀓𑀭𑀡𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀦 𑀢𑁂𑀦 𑀫𑀜𑁆𑀜𑀢𑀻’’𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺.

𑀆𑀧𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸 𑀘𑀸𑀢𑀺 𑀏𑀢𑁆𑀣 𑀲𑁆𑀫𑀸𑀯𑀘𑀦𑀲𑁆𑀲 𑀲𑁆𑀲𑀸𑀤𑁂𑀲𑁄 𑀓𑀸𑀢𑀩𑁆𑀩𑁄. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦, 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂𑀲𑀽𑀢𑀺 𑀬𑀢𑁆𑀢𑀓𑁂𑀲𑀼 𑀯𑀢𑁆𑀣𑀽𑀲𑀼. 𑀉𑀪𑀬𑁂 𑀏𑀢𑁂 𑀯𑀺𑀪𑀗𑁆𑀕𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀧𑀤𑀲𑁆𑀲𑀸𑀢𑀺 𑀧𑀤𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄, 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑁄 𑀘 𑀳𑁄𑀢𑀻𑀢𑀺 𑀆𑀳 ‘‘𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀸𑀭𑀡𑁂’’𑀢𑀺. ‘‘𑀓𑀼𑀲𑀮𑁄’’𑀢𑀺 𑀇𑀫𑀺𑀦𑀸 𑀙𑁂𑀓𑁄 𑀧𑀡𑁆𑀟𑀺𑀢𑁄, 𑀓𑀼𑀘𑁆𑀙𑀺𑀢𑀁 𑀧𑀸𑀧𑀁 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺 𑀓𑁄𑀯𑀺𑀤𑁄𑀢𑀺 𑀯𑀘𑀦𑀢𑁆𑀣𑁂𑀦 𑀓𑁄𑀯𑀺𑀤𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑀆𑀘𑀭𑀦𑁆𑀢𑁄 𑀪𑀺𑀓𑁆𑀔𑀼 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀑𑀲𑀸𑀭𑀡𑀁 𑀢𑀦𑁆𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. ‘‘𑀬𑀸’’𑀢𑀺 𑀇𑀫𑀺𑀦𑀸 𑀏𑀢𑀫𑁆𑀧𑀻𑀢𑀺 𑀏𑀢𑁆𑀣 𑀏𑀢𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀚𑀸𑀤𑀺𑀮𑀜𑁆𑀙𑀺𑀢𑀦𑀸𑀫𑁂𑀦, 𑀦𑁂𑀓𑀸𑀦𑀁 𑀯𑀸𑀘𑀺𑀢𑁄 𑀫𑀬𑀸;

𑀫𑀳𑀸𑀯𑀕𑁆𑀕𑀔𑀦𑁆𑀥𑀓𑀲𑁆𑀲, 𑀲𑀫𑀢𑁆𑀢𑁄 𑀬𑁄𑀚𑀦𑀸𑀦𑀬𑁄𑀢𑀺.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀧𑀸𑀘𑀺𑀢𑁆𑀬𑀸𑀤𑀺𑀬𑁄𑀚𑀦𑀸