𑁨𑁩𑁦. 𑀲𑀗𑁆𑀖𑁂 𑀪𑀺𑀦𑁆𑀦𑁂 𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸

𑁩𑁭𑁬. 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻𑀢𑀺 𑀏𑀢𑁆𑀣 𑀤𑁆𑀯𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀪𑀺𑀚𑁆𑀚𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀦 𑀅𑀜𑁆𑀜𑀦𑁆𑀢𑀺 𑀆𑀳 ‘‘𑀤𑁆𑀯𑁂 𑀓𑁄𑀝𑁆𑀞𑀸𑀲𑀸’’𑀢𑀺. 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀤𑁆𑀯𑀺𑀧𑀓𑁆𑀔𑀁 𑀲𑀦𑁆𑀥𑀸𑀬 ‘‘𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 𑀘𑀻𑀯𑀭𑀁. 𑀢𑀲𑁆𑀲𑁂𑀯 𑀘𑀻𑀯𑀭𑀦𑁆𑀢𑀺 𑀢𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲 𑀘𑀻𑀯𑀭𑀫𑁂𑀯. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀤𑁂𑀲𑁂. 𑀤𑀓𑁆𑀔𑀺𑀡𑁄𑀤𑀓𑀁 𑀧𑀫𑀸𑀡𑀦𑁆𑀢𑀺 𑀤𑀓𑁆𑀔𑀺𑀡𑁄𑀤𑀓𑀫𑁂𑀯 𑀧𑀫𑀸𑀡𑀁, 𑀦 𑀤𑁂𑀬𑁆𑀬𑀥𑀫𑁆𑀫𑁄. 𑀢𑀲𑁆𑀫𑀸 𑀤𑀓𑁆𑀔𑀺𑀡𑁄𑀤𑀓𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀸𑀫𑀺𑀦𑁄 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀪𑁄𑀳𑀺𑀧𑀺 𑀧𑀓𑁆𑀔𑁂𑀳𑀻𑀢𑀺 𑀬𑁄𑀚𑀦𑀸. 𑀧𑀭𑀲𑀫𑀼𑀤𑁆𑀤𑁂𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀲𑁄 𑀳𑀺 𑀲𑀻𑀳𑀴𑀤𑀻𑀧𑀢𑁄 𑀲𑀫𑀼𑀤𑁆𑀤𑀲𑁆𑀲 𑀧𑀸𑀭𑀢𑁆𑀢𑀸 𑀧𑀭𑀲𑀫𑀼𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑁄 𑀧𑀓𑁆𑀔𑁄𑀢𑀺 𑀤𑀓𑁆𑀔𑀺𑀡𑁄𑀤𑀓𑀲𑁆𑀲 𑀘 𑀘𑀻𑀯𑀭𑀲𑁆𑀲 𑀘 𑀮𑀤𑁆𑀥𑀧𑀓𑁆𑀔𑀢𑁄 𑀇𑀢𑀭𑁄 𑀅𑀮𑀤𑁆𑀥𑁄 𑀧𑀓𑁆𑀔𑁄.