𑁮. 𑀘𑀻𑀯𑀭𑀓𑁆𑀔𑀦𑁆𑀥𑀓𑀁

𑁨𑁦𑁨. 𑀚𑀻𑀯𑀓𑀯𑀢𑁆𑀣𑀼𑀓𑀣𑀸

𑁩𑁨𑁬. 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 𑀧𑀤𑀓𑁆𑀔𑀺𑀡𑀲𑀤𑁆𑀤𑀲𑁆𑀲 𑀅𑀧𑀲𑀩𑁆𑀬𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀙𑁂𑀓𑀸 𑀓𑀼𑀲𑀮𑀸’’𑀢𑀺. 𑀅𑀪𑀺𑀲𑀝𑀸𑀢𑀺 𑀏𑀢𑁆𑀣 𑀲𑀭𑀥𑀸𑀢𑀼𑀬𑀸 𑀕𑀢𑀺𑀘𑀺𑀦𑁆𑀢𑀸𑀲𑀼 𑀇𑀥 𑀕𑀢𑁆𑀬𑀢𑁆𑀣𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀪𑀺𑀕𑀢𑀸’’𑀢𑀺. 𑀅𑀪𑀺𑀕𑀢𑀸𑀢𑀺 𑀅𑀪𑀺𑀫𑀼𑀔𑀁 𑀕𑀦𑁆𑀢𑀩𑁆𑀩𑀸. 𑀦𑀦𑀼 𑀧𑀸𑀴𑀺𑀬𑀁 ‘‘𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀧𑀦 ‘‘𑀅𑀢𑁆𑀣𑀺𑀓𑁂𑀳𑀺 𑀅𑀢𑁆𑀣𑀺𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀭𑀡𑀢𑁆𑀣𑁂 𑀧𑀦𑀸’’𑀢𑀺𑀆𑀤𑀺. 𑀇𑀫𑀺𑀦𑀸 𑀙𑀝𑁆𑀞𑀻𑀓𑀢𑁆𑀢𑀸 𑀦𑀸𑀫 𑀢𑀢𑀺𑀬𑀸𑀓𑀢𑁆𑀢𑀼𑀦𑀸 𑀲𑀫𑀸𑀦𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀕𑀫𑁂 𑀯𑀲𑀢𑀻𑀢𑀺 𑀦𑁂𑀕𑀫𑁄𑀢𑀺 𑀯𑀼𑀢𑁆𑀢𑁂 𑀓𑀼𑀝𑀼𑀫𑁆𑀩𑀺𑀬𑀕𑀡𑁄 𑀦𑁂𑀕𑀫𑁄 𑀦𑀸𑀫𑀸𑀢𑀺 𑀆𑀳 ‘‘𑀓𑀼𑀝𑀼𑀫𑁆𑀩𑀺𑀬𑀕𑀡𑁄’’𑀢𑀺.

𑁩𑁨𑁭. 𑀦𑀕𑀭𑁂 𑀦𑀺𑀯𑀲𑀦𑁆𑀢𑀻𑀢𑀺 𑀦𑀸𑀕𑀭𑀸. 𑀤𑀢𑁆𑀯𑀸, 𑀯𑀼𑀝𑁆𑀞𑀸𑀧𑁂𑀲𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀭𑀸𑀫𑀼𑀬𑁆𑀬𑀸𑀦𑀯𑀸𑀳𑀦𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑀸𑀦𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀕𑀡𑀺𑀓𑀝𑁆𑀞𑀸𑀦𑁂𑀢𑀺 𑀕𑀡𑀺𑀓𑀸𑀬 𑀞𑀸𑀦𑁂. 𑀕𑀡𑀺𑀓𑀸𑀢𑀺 𑀘 𑀦𑀕𑀭𑀲𑁄𑀪𑀺𑀦𑀻. 𑀲𑀸 𑀳𑀺 𑀅𑀢𑁆𑀣𑀺𑀓𑁂𑀦 𑀚𑀦𑀕𑀡𑁂𑀦 𑀅𑀪𑀺𑀕𑀦𑁆𑀢𑀩𑁆𑀩𑀸𑀢𑀺 𑀕𑀡𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀲𑀢𑁂𑀦 𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄. 𑀭𑀢𑁆𑀢𑀺𑀁 𑀕𑀫𑀦𑀲𑁆𑀲 𑀧𑀝𑀺𑀦𑀺𑀥𑀺𑀲𑀗𑁆𑀔𑀸𑀢𑁂𑀦 𑀲𑀢𑁂𑀦 𑀏𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀕𑀺𑀮𑀸𑀦𑀦𑁆𑀢𑀺 𑀏𑀢𑁆𑀣 𑀪𑀸𑀯𑀧𑀘𑁆𑀘𑀬𑁂𑀦 𑀯𑀺𑀦𑀸𑀧𑀺 𑀪𑀸𑀯𑀢𑁆𑀣𑁄 𑀜𑀸𑀢𑀩𑁆𑀩𑁄𑀢𑀺 𑀆𑀳 ‘‘𑀕𑀺𑀮𑀸𑀦𑀪𑀸𑀯’’𑀦𑁆𑀢𑀺. ‘‘𑀚𑀸𑀦𑀸𑀧𑁂𑀬𑁆𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀝𑀺𑀯𑁂𑀤𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀯𑀺𑀤𑀥𑀸𑀢𑀼𑀬𑀸 𑀜𑀸𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀢𑁆𑀢𑀭𑀲𑀼𑀧𑁆𑀧𑁂𑀢𑀺 𑀏𑀢𑁆𑀣 𑀓𑀢𑁆𑀢𑀭𑀲𑀤𑁆𑀤𑁄 𑀚𑀺𑀡𑁆𑀡𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀚𑀺𑀡𑁆𑀡𑀲𑀼𑀧𑁆𑀧𑁂’’𑀢𑀺. 𑀲𑀼𑀧𑀦𑁆𑀢𑀺 𑀲𑀼𑀦𑀔𑀸𑀤𑀬𑁄 𑀏𑀢𑁆𑀣𑀸𑀢𑀺 𑀲𑀼𑀧𑁆𑀧𑀁, 𑀓𑀢𑁆𑀢𑀭𑀁 𑀲𑀼𑀧𑁆𑀧𑀁 𑀓𑀢𑁆𑀢𑀭𑀲𑀼𑀧𑁆𑀧𑀁.

𑁩𑁨𑁮. 𑀢𑀦𑁆𑀢𑀺 𑀚𑀻𑀯𑀓𑀁. 𑀅𑀜𑁆𑀜𑁂 𑀭𑀸𑀚𑀤𑀸𑀭𑀓𑀸 𑀯𑀤𑀦𑁆𑀢𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀢𑁆𑀣𑀺 𑀫𑀸𑀢𑀸 𑀏𑀢𑀲𑁆𑀲𑀸𑀢𑀺 𑀦𑀺𑀫𑁆𑀫𑀸𑀢𑀺𑀓𑁄. 𑀬𑀣𑀸 𑀘𑀸𑀢𑀺𑀆𑀤𑀻𑀲𑀼 𑀬𑀣𑀸 𑀧𑁂𑀲𑀦𑁆𑀢𑀺, 𑀢𑀣𑀸𑀢𑀺 𑀬𑁄𑀚𑀦𑀸. 𑀘𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀦 𑀓𑁂𑀯𑀮𑀁 𑀯𑀤𑀦𑁆𑀢𑀺𑀬𑁂𑀯, 𑀅𑀣 𑀔𑁄 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀧𑁂𑀲𑁂𑀢𑀻𑀢𑀺 𑀳𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀲𑀦𑁆𑀢𑀺 𑀚𑀻𑀯𑀓𑀢𑁄 𑀅𑀜𑁆𑀜𑁂𑀲𑀁. 𑀢𑀲𑁆𑀲𑀸𑀢𑀺 𑀚𑀻𑀯𑀓𑀲𑁆𑀲. 𑀇𑀢𑀻𑀢𑀺 𑀏𑀯𑀁. 𑀲𑁄𑀢𑀺 𑀚𑀻𑀯𑀓𑁄. 𑀢𑀁 𑀲𑀩𑁆𑀩𑀦𑁆𑀢𑀺 ‘‘𑀦𑀺𑀫𑁆𑀫𑀸𑀢𑀺𑀓𑁄 𑀦𑀺𑀧𑁆𑀧𑀺𑀢𑀺𑀓𑁄’’𑀢𑀺 𑀯𑀤𑀦𑀜𑁆𑀘 𑀧𑀡𑁆𑀡𑀸𑀓𑀸𑀭𑀲𑁆𑀲 𑀅𑀧𑁂𑀲𑀦𑀜𑁆𑀘𑀸𑀢𑀺 𑀢𑀁 𑀲𑀩𑁆𑀩𑀁.

𑀬𑀁𑀦𑀽𑀦𑀸𑀢𑀺 𑀲𑀸𑀥𑀼 𑀯𑀢. 𑀅𑀳𑀁 𑀯𑀚𑁆𑀚𑀲𑀺𑀧𑁆𑀧𑀁 𑀲𑀺𑀓𑁆𑀔𑁂𑀬𑁆𑀬𑀁 𑀲𑀸𑀥𑀼 𑀯𑀢𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀚𑀻𑀯𑀓𑀲𑁆𑀲. 𑀏𑀢𑀤𑀳𑁄𑀲𑀻𑀢𑀺 𑀏𑀢𑀁 𑀅𑀳𑁄𑀲𑀺, 𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑀽𑀢𑀺 𑀅𑀢𑁆𑀣𑁄. 𑀧𑀭𑀽𑀧𑀖𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀻𑀢𑀺 𑀧𑀭𑀁 𑀉𑀧𑀕𑀦𑁆𑀢𑁆𑀯𑀸, 𑀉𑀧 𑀪𑀼𑀲𑁂𑀦 𑀯𑀸 𑀳𑀦𑀦𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺. 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀦𑁆𑀢𑀺 𑀲𑀺𑀧𑁆𑀧𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀸 𑀫𑁂𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀁. 𑀇𑀢𑀺 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀧𑀼𑀭𑀺𑀫𑀘𑀺𑀦𑁆𑀢𑀸𑀬 𑀅𑀦𑁂𑀓𑀦𑁆𑀢𑀪𑀸𑀯𑀢𑁄 𑀏𑀓𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺 𑀘𑀸’’𑀢𑀺𑀆𑀤𑀺. 𑀅𑀧𑀺 𑀘𑀸𑀢𑀺 𑀏𑀓𑀦𑁆𑀢𑁂𑀦. 𑀅𑀬𑀦𑁆𑀢𑀺 𑀚𑀻𑀯𑀓𑁄. 𑀇𑀢𑁄𑀢𑀺 𑀪𑀤𑁆𑀤𑀓𑀧𑁆𑀧𑀢𑁄. 𑀅𑀬𑀦𑁆𑀢𑀺 𑀉𑀧𑀸𑀲𑀓𑁄. 𑀘𑀢𑀼𑀧𑀭𑀺𑀲𑀦𑁆𑀢𑀭𑁂𑀢𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂. 𑀧𑀢𑁆𑀣𑀢𑀕𑀼𑀡𑀦𑁆𑀢𑀺 𑀧𑀢𑁆𑀣𑀭𑀺𑀢𑀕𑀼𑀡𑀁. 𑀞𑀸𑀦𑀦𑁆𑀢𑀭𑀦𑁆𑀢𑀺 𑀞𑀸𑀦𑀪𑁂𑀤𑀁, 𑀅𑀳𑀫𑁆𑀧𑀻𑀢𑀺 𑀦 𑀅𑀬𑀁 𑀉𑀧𑀸𑀲𑀓𑁄𑀬𑁂𑀯, 𑀅𑀳𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀆𑀮𑀧𑀦𑀧𑀤𑀫𑁂𑀢𑀁. 𑀧𑀢𑁆𑀣𑀦𑀦𑁆𑀢𑀺 𑀇𑀘𑁆𑀙𑀺𑀢𑀯𑀭𑀁. 𑀘𑁄𑀤𑀺𑀬𑀫𑀸𑀦𑁄𑀧𑀻𑀢𑀺 𑀉𑀬𑁆𑀬𑁄𑀚𑀺𑀬𑀫𑀸𑀦𑁄𑀧𑀺. 𑀧𑀺𑀲𑀤𑁆𑀤𑁂𑀦 𑀧𑀼𑀭𑀺𑀫𑀘𑀺𑀦𑁆𑀢𑀦𑀫𑀧𑁂𑀓𑁆𑀔𑀢𑀺. 𑀏𑀲𑀸𑀢𑀺 𑀏𑀲𑁄 𑀚𑀻𑀯𑀓𑁄.

𑁩𑁨𑁯. 𑀤𑀺𑀲𑀸𑀧𑀸𑀫𑁄𑀓𑁆𑀔𑁄𑀢𑀺 𑀧𑀤𑀲𑁆𑀲 𑀤𑀺𑀲𑀸𑀲𑀼 𑀧𑀸𑀫𑁄𑀓𑁆𑀔𑁄 𑀤𑀺𑀲𑀸𑀧𑀸𑀫𑁄𑀓𑁆𑀔𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀤𑀺𑀲𑀸𑀲𑀽’’𑀢𑀺𑀆𑀤𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂𑀢𑀺 𑀚𑀻𑀯𑀓𑀲𑁆𑀲 𑀢𑀲𑁆𑀫𑀺𑀁 𑀘𑀺𑀦𑁆𑀢𑀦𑀲𑀫𑀬𑁂 𑀘, 𑀆𑀕𑀫𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀯𑀸𑀡𑀺𑀚𑁂, 𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀢𑁄𑀢𑀺 𑀦𑀕𑀭𑀢𑁄. 𑀢𑀓𑁆𑀓𑀲𑀻𑀮𑀢𑁄𑀢𑀺 𑀢𑀓𑁆𑀓𑀲𑀻𑀮𑀦𑀕𑀭𑀢𑁄. 𑀢𑀢𑁆𑀣𑀸𑀢𑀺 𑀢𑀓𑁆𑀓𑀲𑀻𑀮𑁂. 𑀆𑀫𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀆𑀫 𑀅𑀢𑁆𑀣𑀻𑀢𑀺 𑀳𑀺 𑀅𑀢𑁆𑀣𑁄. 𑀢𑁂𑀢𑀺 𑀯𑀸𑀡𑀺𑀚𑀸. 𑀢𑀣𑀸𑀢𑀺 𑀬𑀣𑀸 𑀚𑀻𑀯𑀓𑁄 𑀆𑀳, 𑀢𑀣𑀸 𑀅𑀓𑀁𑀲𑀽𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀚𑀻𑀯𑀓𑁄. 𑀧𑀺𑀢𑀭𑀦𑁆𑀢𑀺 𑀅𑀪𑀬𑀭𑀸𑀚𑀓𑀼𑀫𑀸𑀭𑀁. 𑀢𑁂𑀳𑀻𑀢𑀺 𑀯𑀸𑀡𑀺𑀚𑁂𑀳𑀺.

𑀢𑀦𑁆𑀢𑀺 𑀚𑀻𑀯𑀓𑀁, 𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀚𑀻𑀯𑀓𑁄. 𑀓𑀲𑁆𑀫𑀸 𑀢𑀸𑀢 𑀢𑁆𑀯𑀁 𑀇𑀥𑀸𑀕𑀢𑁄 𑀅𑀲𑀺 𑀧𑀦𑀸𑀢𑀺 𑀧𑀼𑀘𑁆𑀙𑀻𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀧𑀼𑀘𑁆𑀙𑀢𑁄. 𑀲𑁄𑀢𑀺 𑀚𑀻𑀯𑀓𑁄. 𑀲𑀺𑀓𑁆𑀔𑀺𑀢𑀼𑀁 𑀆𑀕𑀢𑁄 𑀅𑀫𑁆𑀳𑀻𑀢𑀺 𑀬𑁄𑀚𑀦𑀸. 𑀩𑀳𑀼𑀜𑁆𑀘 𑀕𑀡𑁆𑀳𑀸𑀢𑀻𑀢𑀺𑀆𑀤𑀻𑀲𑀼 𑀲𑁄 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀲𑀺𑀧𑁆𑀧𑀲𑁆𑀲𑁂𑀯 𑀲𑀺𑀓𑁆𑀔𑀺𑀢𑀢𑁆𑀢𑀸 𑀩𑀳𑀼𑀜𑁆𑀘 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸 𑀲𑀺𑀓𑁆𑀔𑀦𑁆𑀢𑀺𑀬𑁂𑀯, 𑀏𑀯𑀁 𑀢𑀣𑀸 𑀲𑁄 𑀦 𑀲𑀺𑀓𑁆𑀔𑀢𑀻𑀢𑀺 𑀬𑁄𑀚𑀦𑀸. 𑀲𑁄 𑀧𑀦𑀸𑀢𑀺 𑀚𑀻𑀯𑀓𑁄 𑀧𑀦, 𑀓𑀭𑁄𑀢𑀺 𑀲𑀺𑀓𑁆𑀔𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀁 𑀓𑀸𑀮𑀦𑁆𑀢𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑁄 𑀩𑀳𑀼𑀜𑁆𑀘 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺. 𑀫𑁂𑀥𑀸𑀯𑀺𑀢𑀸𑀬𑀸𑀢𑀺 𑀔𑀺𑀧𑁆𑀧𑀁 𑀕𑀳𑀡𑀥𑀸𑀭𑀡𑀧𑀜𑁆𑀜𑀢𑀸𑀬, 𑀩𑀳𑀼𑀜𑁆𑀘 𑀲𑀺𑀧𑁆𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲 𑀚𑀻𑀯𑀓𑀲𑁆𑀲 𑀕𑀳𑀺𑀢𑀜𑁆𑀘 𑀲𑀺𑀧𑁆𑀧𑀁 𑀦 𑀲𑀫𑁆𑀫𑀼𑀲𑁆𑀲𑀢𑀻𑀢𑀺 𑀬𑁄𑀚𑀦𑀸.

𑀬𑀢𑁆𑀢𑀓𑀁 𑀲𑀺𑀧𑁆𑀧𑀁 𑀆𑀘𑀭𑀺𑀬𑁄 𑀚𑀸𑀦𑀸𑀢𑀺, 𑀢𑀢𑁆𑀢𑀓𑀁 𑀅𑀬𑀁 𑀚𑀻𑀯𑀓𑁄 𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀬𑀦𑁆𑀢𑀺 𑀲𑀺𑀧𑁆𑀧𑀁. 𑀅𑀬𑀦𑁆𑀢𑀺 𑀚𑀻𑀯𑀓𑁄, 𑀪𑀯𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀚𑀻𑀯𑀓𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀓𑀫𑁆𑀫𑀯𑀺𑀧𑀸𑀓𑀦𑁆𑀢𑀺 𑀓𑀫𑁆𑀫𑀯𑀺𑀧𑀸𑀓𑀚𑀁 𑀭𑁄𑀕𑀁. ‘‘𑀦’’𑀦𑁆𑀢𑀺 𑀧𑀤𑀁 ‘‘𑀲𑀺𑀓𑁆𑀔𑀸𑀧𑁂𑀲𑀻’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁, ‘‘𑀪𑁂𑀲𑀚𑁆𑀚𑀬𑁄𑀚𑀦’’𑀦𑁆𑀢𑀺 𑀧𑀤𑀁 𑀥𑀸𑀢𑀼𑀓𑀫𑁆𑀫𑀁. 𑀪𑁂𑀲𑀚𑁆𑀚𑀬𑁄𑀚𑀦𑀦𑁆𑀢𑀺 𑀪𑁂𑀲𑀚𑁆𑀚𑁂𑀦 𑀭𑁄𑀕𑀲𑁆𑀲 𑀬𑁄𑀚𑀦𑀁. 𑀲𑁄 𑀧𑀦𑀸𑀢𑀺 𑀚𑀻𑀯𑀓𑁄 𑀧𑀦. 𑀇𑀫𑀺𑀦𑀸𑀢𑀺 𑀚𑀻𑀯𑀓𑁂𑀦 𑀦 𑀉𑀕𑁆𑀕𑀳𑀺𑀢𑀁, 𑀉𑀕𑁆𑀕𑀳𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁂𑀦 𑀤𑁆𑀯𑀸𑀭𑁂𑀦𑀸𑀢𑀺 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀏𑀓𑁂𑀦 𑀤𑁆𑀯𑀸𑀭𑁂𑀦. 𑀆𑀳𑀺𑀡𑁆𑀟𑀦𑁆𑀢𑁄𑀢𑀺 𑀯𑀺𑀘𑀭𑀦𑁆𑀢𑁄. 𑀧𑀭𑀺𑀢𑁆𑀢𑀁 𑀧𑀸𑀣𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀧𑀭𑀺𑀢𑁆𑀢𑀲𑀤𑁆𑀤𑀲𑁆𑀲 𑀆𑀭𑀓𑁆𑀔𑀦𑀢𑁆𑀣𑁂𑀧𑀺 𑀧𑀯𑀢𑁆𑀢𑀦𑀢𑁄 𑀇𑀥 𑀅𑀧𑁆𑀧𑀢𑁆𑀣𑁂 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀓’’𑀦𑁆𑀢𑀺. 𑀓𑀲𑁆𑀫𑀸 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀣𑁂𑀬𑁆𑀬𑀁 𑀅𑀤𑀸𑀲𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲. 𑀅𑀬𑀦𑁆𑀢𑀺 𑀚𑀻𑀯𑀓𑁄, 𑀮𑀪𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀮𑀪𑀦𑀢𑁄. 𑀔𑀻𑀡𑁂 𑀧𑀸𑀣𑁂𑀬𑁆𑀬𑁂𑀢𑀺 𑀧𑀸𑀣𑁂𑀬𑁆𑀬𑁂 𑀔𑀻𑀡𑁂 𑀲𑀢𑀻𑀢𑀺 𑀬𑁄𑀚𑀦𑀸.

𑁨𑁦𑁩. 𑀲𑁂𑀝𑁆𑀞𑀺𑀪𑀭𑀺𑀬𑀸𑀤𑀺𑀯𑀢𑁆𑀣𑀼𑀓𑀣𑀸

𑁩𑁩𑁦. 𑀬𑀸 𑀦𑀸𑀫𑀸𑀢𑀺 𑀬𑀸 𑀦𑀸𑀫 𑀖𑀭𑀡𑀻. 𑀓𑀺𑀫𑁆𑀧𑀺 𑀫𑀸𑀬𑀦𑁆𑀢𑀺 𑀏𑀢𑁆𑀣 𑀏𑀓𑀸𑀭𑀮𑁄𑀧𑀲𑀦𑁆𑀥𑀻𑀢𑀺 𑀆𑀳 ‘‘𑀓𑀺𑀫𑁆𑀧𑀺 𑀫𑁂 𑀅𑀬’’𑀦𑁆𑀢𑀺. 𑀇𑀫𑀺𑀦𑀸 𑀬𑀓𑀸𑀭𑀸𑀤𑁂𑀲𑀲𑀦𑁆𑀥𑀺𑀁 𑀦𑀺𑀯𑀢𑁆𑀢𑁂𑀢𑀺, ‘‘𑀫𑁆𑀬𑀸𑀬’’𑀦𑁆𑀢𑀺𑀧𑀺 𑀧𑀸𑀞𑁄, 𑀏𑀯𑀁 𑀲𑀢𑀺 𑀆𑀤𑁂𑀲𑀲𑀦𑁆𑀥𑀺𑀬𑁂𑀯, 𑀦 𑀮𑁄𑀧𑀲𑀦𑁆𑀥𑀺. 𑀅𑀬𑀁 𑀖𑀭𑀡𑀻 𑀫𑁂 𑀓𑀺𑀜𑁆𑀘𑀺 𑀤𑁂𑀬𑁆𑀬𑀥𑀫𑁆𑀫𑀁 𑀓𑀺𑀫𑁆𑀧𑀺 𑀤𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀘𑀸𑀢𑀺 𑀲𑀩𑁆𑀩𑀺𑀲𑁆𑀲 𑀘, 𑀓𑀢𑀲𑁆𑀲𑀸𑀢𑀺𑀧𑀺 𑀧𑀸𑀞𑁄. 𑀭𑁄𑀕𑀽𑀧𑀲𑀫𑀲𑁆𑀲 𑀘𑀸𑀢𑀺 𑀫𑀫 𑀭𑁄𑀕𑀲𑁆𑀲 𑀉𑀧𑀲𑀫𑀲𑁆𑀲 𑀘, 𑀇𑀫𑁂𑀳𑀺 𑀧𑀤𑁂𑀳𑀺 𑀲𑀁𑀬𑀫𑀲𑁆𑀲𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀉𑀧𑀓𑀸𑀭’’𑀦𑁆𑀢𑀺 𑀇𑀫𑀺𑀦𑀸 𑀉𑀧𑀚𑀸𑀦𑀸𑀫𑀻𑀢𑀺 𑀏𑀢𑁆𑀣 𑀉𑀧𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀖𑀭𑀡𑀺𑀬𑀸 𑀆𑀲𑀬𑁄.

𑁩𑁩𑁧. ‘‘𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀢𑀼𑀬𑁆𑀳𑀁 𑀳𑁄𑀢𑀽’’𑀢𑀺 𑀇𑀤𑀁 𑀯𑀘𑀦𑀁 𑀭𑀸𑀚𑀸 𑀲𑀪𑀸𑀯𑀢𑁄 𑀆𑀳, 𑀉𑀤𑀸𑀳𑀼 𑀓𑀺𑀜𑁆𑀘𑀺 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀆𑀳 ‘‘𑀭𑀸𑀚𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀫𑀦𑁆𑀢𑀺 𑀅𑀮𑀗𑁆𑀓𑀸𑀭𑀁. 𑀧𑀫𑀸𑀡𑀬𑀼𑀢𑁆𑀢𑁂𑀢𑀺 𑀓𑀸𑀭𑀡𑀸𑀦𑀼𑀭𑀽𑀧𑁂. 𑀦𑀦𑁆𑀢𑀺 𑀚𑀻𑀯𑀓𑀁. 𑀦𑀸𑀝𑀓𑀸𑀦𑀫𑁆𑀧𑀻𑀢𑀺 𑀧𑀜𑁆𑀘𑀲𑀢𑀺𑀓𑀸𑀦𑀁 𑀦𑀸𑀝𑀓𑀸𑀦𑀫𑁆𑀧𑀺. 𑀲𑁄𑀧𑀻𑀢𑀺 𑀚𑀻𑀯𑀓𑁄𑀧𑀺. 𑀢𑁂𑀲𑀦𑁆𑀢𑀺 𑀅𑀪𑀬𑀓𑀼𑀫𑀸𑀭𑀦𑀸𑀝𑀓𑀸𑀦𑀁. 𑀫𑁂𑀢𑀺 𑀫𑀬𑁆𑀳𑀁, 𑀦 𑀧𑀢𑀺𑀭𑀽𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑁆𑀬𑀺𑀓𑀸𑀦𑀦𑁆𑀢𑀺 𑀫𑀸𑀢𑀸𑀫𑀳𑀻𑀦𑀁. 𑀓𑀢𑀲𑁆𑀲 𑀫𑁂 𑀉𑀧𑀓𑀸𑀭𑀦𑁆𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀅𑀥𑀺𑀓𑀸𑀭𑁄 𑀘 𑀉𑀧𑀓𑀸𑀭𑁄 𑀘 𑀅𑀢𑁆𑀣𑀢𑁄 𑀲𑀤𑀺𑀲𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀭𑀸𑀚𑀸 𑀧𑀲𑀦𑁆𑀦𑁄 𑀤𑀢𑁆𑀯𑀸 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁦𑁫. 𑀭𑀸𑀚𑀕𑀳𑀲𑁂𑀝𑁆𑀞𑀺𑀯𑀢𑁆𑀣𑀼𑀓𑀣𑀸

𑁩𑁩𑁨. 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑁂𑀦𑀸𑀢𑀺 𑀇𑀭𑀺𑀬𑀸𑀧𑀣𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑀦𑁂𑀦. 𑀢𑀻𑀳𑀺 𑀲𑀢𑁆𑀢𑀸𑀳𑁂𑀳𑀺 𑀦𑀺𑀘𑁆𑀘𑀮𑀲𑁆𑀲 𑀦𑀺𑀧𑀦𑁆𑀦𑀲𑁆𑀲 𑀅𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀫𑀢𑁆𑀣𑀮𑀼𑀗𑁆𑀕𑀦𑁆𑀢𑀺 𑀬𑁄𑀚𑀦𑀸. 𑀅𑀧𑁆𑀧𑁂𑀯 𑀦𑀺𑀧𑀚𑁆𑀚𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀦𑀦𑁆𑀢𑀺 𑀲𑁂𑀝𑁆𑀞𑀺𑀁. 𑀢𑁂𑀦𑁂𑀯𑀸𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦. 𑀲𑀻𑀲𑀁 𑀙𑀸𑀤𑁂𑀢𑀻𑀢𑀺 𑀲𑀻𑀲𑀘𑁆𑀙𑀯𑀻𑀢𑀺 𑀯𑀼𑀢𑁆𑀢𑁂 𑀲𑀻𑀲𑀧𑀝𑀺𑀘𑁆𑀙𑀸𑀤𑀦𑀘𑀫𑁆𑀫𑀦𑁆𑀢𑀺 𑀆𑀳 ‘‘𑀲𑀻𑀲𑀘𑀫𑁆𑀫’’𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀲𑁂𑀝𑁆𑀞𑀺𑀲𑁆𑀲. 𑀢𑀻𑀳𑀺 𑀲𑀢𑁆𑀢𑀸𑀳𑁂𑀦𑀸𑀢𑀺 𑀏𑀢𑁆𑀣 𑀧𑀼𑀩𑁆𑀩𑀧𑀤𑁂𑀦 𑀧𑀘𑁆𑀙𑀺𑀫𑀧𑀤𑀁 𑀕𑀼𑀡𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀻𑀳𑀺 𑀧𑀲𑁆𑀲𑁂𑀳𑀺 𑀏𑀓𑁂𑀦𑁂𑀓𑁂𑀦 𑀲𑀢𑁆𑀢𑀸𑀳𑁂𑀦𑀸’’𑀢𑀺.

𑁩𑁩𑁩. 𑀚𑀦𑀁 𑀦𑀻𑀳𑀭𑀸𑀧𑁂𑀢𑁆𑀯𑀸𑀢𑀺 𑀚𑀦𑀁 𑀅𑀧𑀓𑁆𑀓𑀫𑀸𑀧𑁂𑀢𑁆𑀯𑀸.

𑁨𑁦𑁭. 𑀧𑀚𑁆𑀚𑁄𑀢𑀭𑀸𑀚𑀯𑀢𑁆𑀣𑀼𑀓𑀣𑀸

𑁩𑁩𑁪. 𑀯𑀺𑀘𑁆𑀙𑀺𑀓𑀲𑁆𑀲 𑀚𑀸𑀢𑁄𑀢𑀺 𑀯𑀺𑀘𑁆𑀙𑀺𑀓𑀲𑁆𑀲 𑀓𑀸𑀭𑀡𑀸 𑀚𑀸𑀢𑁄, 𑀯𑀺𑀘𑁆𑀙𑀺𑀓𑀁 𑀧𑀝𑀺𑀘𑁆𑀘 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀺 𑀘 𑀪𑁂𑀲𑀚𑁆𑀚𑀁 𑀯𑀺𑀘𑁆𑀙𑀺𑀓𑀸𑀦𑀁 𑀧𑀝𑀺𑀓𑀽𑀮𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑀸𑀢𑀺 𑀏𑀢𑁆𑀣 𑀡𑀺𑀓𑀧𑀘𑁆𑀘𑀬𑀲𑁆𑀲 𑀕𑀦𑁆𑀢𑀼𑀁 𑀲𑀫𑀢𑁆𑀣𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀦𑁆𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺. 𑀅𑀲𑁆𑀲 𑀭𑀜𑁆𑀜𑁄𑀢𑀺 𑀘𑀦𑁆𑀤𑀧𑀚𑁆𑀚𑁄𑀢𑀦𑀸𑀫𑀓𑀲𑁆𑀲 𑀅𑀲𑁆𑀲 𑀭𑀜𑁆𑀜𑁄. 𑀳𑀢𑁆𑀣𑀺𑀦𑀻𑀬𑁂𑀯𑀸𑀢𑀺 𑀪𑀤𑁆𑀤𑀯𑀢𑀺𑀓𑀸 𑀦𑀸𑀫 𑀳𑀢𑁆𑀣𑀺𑀦𑀻𑀬𑁂𑀯. 𑀯𑀻𑀲𑀬𑁄𑀚𑀦𑀲𑀢𑀦𑁆𑀢𑀺 𑀯𑀻𑀲𑀸𑀥𑀺𑀓𑀁 𑀬𑁄𑀚𑀦𑀲𑀢𑀁.

𑀪𑀼𑀜𑁆𑀚𑀺𑀢𑀼𑀁 𑀦𑀺𑀲𑀺𑀦𑁆𑀦𑀲𑁆𑀲 𑀏𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑁆𑀯𑀸𑀭𑁂𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀓𑀼𑀮𑀧𑀼𑀢𑁆𑀢𑀲𑁆𑀲, 𑀆𑀭𑁄𑀘𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀓𑀼𑀮𑀧𑀼𑀢𑁆𑀢𑁄, ‘‘𑀆𑀳𑀭𑀸’’𑀢𑀺 𑀆𑀡𑀸𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁄𑀢𑀺 𑀧𑀼𑀭𑀺𑀲𑁄. 𑀢𑀦𑁆𑀢𑀺 𑀧𑀢𑁆𑀢𑀁. 𑀬𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀪𑀯𑁂. 𑀢𑀢𑁆𑀣 𑀢𑀢𑁆𑀣 𑀯𑀸𑀳𑀦𑀲𑀫𑁆𑀧𑀦𑁆𑀦𑁄 𑀳𑁄𑀫𑀻𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀧𑀼𑀭𑀺𑀲𑁄. 𑀧𑀚𑁆𑀚𑁄𑀢𑁄 𑀦𑀸𑀫 𑀅𑀬𑀁 𑀭𑀸𑀚𑀸 𑀚𑀸𑀢𑁄𑀢𑀺 𑀬𑁄𑀚𑀦𑀸.

𑀲𑀩𑁆𑀩𑀺𑀁 𑀧𑀸𑀬𑁂𑀢𑁆𑀯𑀸𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀺𑀜𑁆𑀘 𑀧𑀸𑀬𑁂𑀢𑁆𑀯𑀸’’𑀢𑀺𑀆𑀤𑀺. 𑀲𑀩𑁆𑀩𑀺𑀜𑁆𑀘 𑀧𑀸𑀬𑁂𑀢𑁆𑀯𑀸, 𑀧𑀭𑀺𑀘𑀸𑀭𑀓𑀸𑀦𑀁 𑀆𑀳𑀸𑀭𑀸𑀘𑀸𑀭𑁂 𑀯𑀺𑀥𑀺𑀜𑁆𑀘 𑀆𑀘𑀺𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀑𑀮𑀼𑀫𑁆𑀧𑁂𑀢𑁆𑀯𑀸𑀢𑀺 𑀮𑀼𑀧𑀺𑀥𑀸𑀢𑀼 𑀑𑀤𑀳𑀦𑀢𑁆𑀣𑁄𑀢𑀺 𑀆𑀳 ‘‘𑀑𑀤𑀳𑀺𑀢𑁆𑀯𑀸’’𑀢𑀺. 𑀯𑀺𑀭𑁂𑀘𑁂𑀲𑀻𑀢𑀺 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀯𑀺𑀭𑁂𑀘𑁂𑀲𑀺.

𑁨𑁦𑁮. 𑀲𑀺𑀯𑁂𑀬𑁆𑀬𑀓𑀤𑀼𑀲𑁆𑀲𑀬𑀼𑀕𑀓𑀣𑀸

𑁩𑁩𑁫. 𑀲𑀺𑀯𑀣𑀺𑀓𑀦𑁆𑀢𑀺 𑀲𑀺𑀯𑀸 𑀚𑀫𑁆𑀩𑀼𑀓𑀸 𑀓𑀼𑀡𑀧𑀔𑀸𑀤𑀦𑀢𑁆𑀣𑀸𑀬 𑀆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀺𑀯𑀝𑁆𑀞𑀁, 𑀢𑀤𑁂𑀯 𑀲𑀺𑀯𑀣𑀺𑀓𑀁, 𑀇𑀫𑀺𑀦𑀸 𑀲𑀺𑀯𑀣𑀺𑀓𑀸𑀬𑀁 𑀉𑀧𑁆𑀧𑀦𑁆𑀦𑀁 𑀲𑀺𑀯𑁂𑀬𑁆𑀬𑀓𑀁 𑀣𑀺𑀓𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀉𑀢𑁆𑀢𑀭𑀓𑀼𑀭𑀽𑀲𑀼. 𑀢𑀦𑁆𑀢𑀺 𑀫𑀢𑀁. 𑀳𑀢𑁆𑀣𑀺𑀲𑁄𑀡𑁆𑀟𑀓𑀲𑀓𑀼𑀡𑀸𑀢𑀺 𑀳𑀢𑁆𑀣𑀺𑀮𑀺𑀗𑁆𑀕𑀯𑀺𑀳𑀗𑁆𑀕𑀫𑀸. 𑀢𑁂 𑀳𑀺 𑀳𑀢𑁆𑀣𑀺𑀦𑁄 𑀲𑁄𑀡𑁆𑀟𑁄 𑀯𑀺𑀬 𑀲𑁄𑀡𑁆𑀟𑁄 𑀏𑀢𑁂𑀲𑀼 𑀅𑀢𑁆𑀣𑀻𑀢𑀺 𑀳𑀢𑁆𑀣𑀻𑀲𑁄𑀡𑁆𑀟𑀓𑀸, 𑀢𑁂 𑀘 𑀢𑁂 𑀲𑀓𑀼𑀡𑀸 𑀘𑁂𑀢𑀺 𑀳𑀢𑁆𑀣𑀺𑀲𑁄𑀡𑁆𑀟𑀓𑀲𑀓𑀼𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀜𑁆𑀜𑁄 𑀆𑀳𑀭𑀦𑁆𑀢𑀻𑀢𑀺 𑀭𑀜𑁆𑀜𑁄 𑀅𑀢𑁆𑀣𑀸𑀬, 𑀲𑀦𑁆𑀢𑀺𑀓𑀁 𑀯𑀸 𑀆𑀳𑀭𑀦𑁆𑀢𑀺. 𑀇𑀤𑀦𑁆𑀢𑀺 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁. 𑀲𑀺𑀯𑀺𑀭𑀝𑁆𑀞𑁂 𑀯𑀸𑀬𑀺𑀢𑀁 𑀲𑀺𑀯𑁂𑀬𑁆𑀬𑀓𑀦𑁆𑀢𑀺 𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣𑀯𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀓𑀸𑀭𑀡𑁂𑀦. ‘‘𑀲𑀺𑀯𑁂𑀬𑁆𑀬𑀓𑀦𑁆𑀢𑀺…𑀧𑁂… 𑀯𑀤𑀦𑁆𑀢𑀻’’𑀢𑀺 𑀧𑁄𑀭𑀸𑀡𑀸 𑀆𑀳𑀽𑀢𑀺 𑀬𑁄𑀚𑀦𑀸.

𑁨𑁦𑁯. 𑀲𑀫𑀢𑁆𑀢𑀺𑀁𑀲𑀯𑀺𑀭𑁂𑀘𑀦𑀓𑀣𑀸

𑁩𑁩𑁬. 𑀓𑀺𑀁𑀧𑀦𑀸𑀢𑀺 𑀏𑀢𑁆𑀣 𑀓𑀺𑀁𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀮𑀽𑀔𑁄 𑀓𑀺𑀁, 𑀦 𑀮𑀽𑀔𑁄 𑀓𑀺𑀦𑁆𑀢𑀺 𑀳𑀺 𑀅𑀢𑁆𑀣𑁄. ‘‘𑀲𑀺𑀦𑁂𑀳𑀧𑀸𑀦𑀁 𑀧𑀦 𑀢𑁂𑀫𑁂𑀢𑀻’’𑀢𑀺 𑀘 ‘‘𑀓𑀭𑁄𑀢𑀻’’𑀢𑀺 𑀘 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀓𑀮𑀓𑀸𑀬𑁂. 𑀲𑀺𑀭𑀸𑀢𑀺 𑀓𑀡𑁆𑀟𑀭𑀸. 𑀅𑀬𑀦𑁆𑀢𑀺 𑀚𑀻𑀯𑀓𑁄. 𑀑𑀴𑀸𑀭𑀺𑀓𑀤𑁄𑀲𑀳𑀭𑀡𑀢𑁆𑀣𑀦𑁆𑀢𑀺 𑀑𑀴𑀸𑀭𑀺𑀓𑀲𑁆𑀲 𑀤𑁄𑀲𑀲𑁆𑀲 𑀅𑀧𑀦𑀬𑀦𑀢𑁆𑀣𑀁. 𑀧𑀓𑀢𑀢𑁆𑀢𑁂𑀢𑀺 𑀧𑀓𑀢𑀺𑀲𑀗𑁆𑀔𑀸𑀢𑁂 𑀲𑀪𑀸𑀯𑁂 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀸 𑀪𑀦𑁆𑀢𑁂𑀢𑀺 𑀬𑁄𑀚𑀦𑀸. 𑀓𑀼𑀢𑁄𑀢𑀺 𑀓𑀲𑁆𑀲 𑀲𑀦𑁆𑀢𑀺𑀓𑀸. 𑀯𑀝𑁆𑀝𑀢𑀺 𑀦𑀼 𑀔𑁄𑀢𑀺 𑀘𑀺𑀦𑁆𑀢𑁂𑀲𑀻𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀘𑀺𑀦𑁆𑀢𑀦𑀢𑁄. 𑀲𑁄𑀡𑁄𑀢𑀺 𑀓𑁄𑀴𑀺𑀯𑀻𑀲𑀲𑁄𑀡𑁄, 𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀲𑁄𑀡𑀲𑁆𑀲 𑀲𑀦𑁆𑀢𑀺𑀓𑀸. 𑀢𑀲𑁆𑀲𑀸𑀢𑀺 𑀲𑁄𑀡𑀲𑁆𑀲. 𑀲𑁄𑀢𑀺 𑀲𑁄𑀡𑁄. 𑀣𑁂𑀭𑀲𑁆𑀲𑀸𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲. 𑀇𑀤𑀁 ‘‘𑀧𑀢𑁆𑀢’’𑀦𑁆𑀢𑀺𑀧𑀤𑁂 𑀲𑀸𑀫𑀻, ‘‘𑀅𑀤𑀸𑀲𑀻’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀅𑀜𑁆𑀜𑀁 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀭𑀸𑀚𑀸𑀧𑀺 𑀔𑁄 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀜𑁆𑀘 𑀲𑀼𑀚𑀸𑀢𑀸 𑀅𑀤𑀸𑀲𑀺, 𑀬𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄, 𑀪𑀸𑀚𑀦𑀕𑀢𑁂𑀲𑀼 𑀤𑁆𑀯𑀻𑀲𑀼𑀬𑁂𑀯 𑀢𑁂𑀲𑀼 𑀧𑀺𑀡𑁆𑀟𑀧𑀸𑀢𑁂𑀲𑀼 𑀤𑁂𑀯𑀢𑀸 𑀑𑀚𑀁 𑀧𑀓𑁆𑀔𑀺𑀧𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀲𑀽𑀢𑀺 𑀤𑁆𑀯𑀻𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀅𑀜𑁆𑀜𑁂𑀲𑀼. 𑀇𑀘𑁆𑀙𑀦𑁆𑀢𑀺 𑀭𑀼𑀘𑀺𑀁. 𑀲𑁄𑀢𑀺 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸. 𑀢𑀯𑁂𑀯𑀸𑀢𑀺 𑀢𑀼𑀬𑁆𑀳𑀫𑁂𑀯. 𑀢𑀦𑁆𑀢𑀺 𑀪𑀕𑀯𑀢𑁄 𑀯𑀘𑀦𑀁. 𑀭𑀸𑀚𑀸 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀢𑀺 𑀅𑀲𑀻𑀢𑀺𑀓𑀼𑀮𑀧𑀼𑀢𑁆𑀢𑀲𑀳𑀲𑁆𑀲𑀸. 𑀏𑀢𑀤𑀢𑁆𑀣𑀫𑁂𑀯𑀸𑀢𑀺 𑀲𑁄𑀡𑀲𑁆𑀲 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀫𑁂𑀯, 𑀦 𑀭𑀜𑁆𑀜𑁄 𑀅𑀦𑀼𑀕𑁆𑀕𑀳𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁧𑁦. 𑀯𑀭𑀬𑀸𑀘𑀦𑀓𑀣𑀸

𑁩𑁩𑁭. 𑀓𑀢𑀁 𑀪𑀢𑁆𑀢𑀓𑀺𑀘𑁆𑀘𑀁 𑀬𑁂𑀦𑀸𑀢𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑁄, 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀭𑀸𑀳𑀼𑀮𑀯𑀢𑁆𑀣𑀼𑀫𑁆𑀳𑀺 (𑀫𑀳𑀸𑀯. 𑀅𑀝𑁆𑀞. 𑁧𑁦𑁫) 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀇𑀤𑀁 𑀯𑀢𑁆𑀣𑀦𑁆𑀢𑀺 𑀇𑀤𑀁 𑀲𑀺𑀯𑁂𑀬𑁆𑀬𑀓𑀁 𑀯𑀢𑁆𑀣𑀁, 𑀉𑀧𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀸𑀯𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀯𑀢𑁆𑀣𑀼𑀧𑁆𑀧𑀦𑁆𑀦𑀓𑀸𑀮𑀫𑀚𑁆𑀛𑁂. 𑀓𑁄𑀘𑀺 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑀳𑁂𑀢𑀼𑀦𑀸. 𑀅𑀬𑀦𑁆𑀢𑀺 𑀚𑀻𑀯𑀓𑁄. 𑀕𑀳𑀧𑀢𑀺𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀕𑀳𑀧𑀢𑀻𑀦𑀁 𑀘𑀻𑀯𑀭𑀦𑁆𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀕𑀳𑀧𑀢𑀻𑀳𑀺 𑀤𑀺𑀦𑁆𑀦𑀁 𑀘𑀻𑀯𑀭’’𑀦𑁆𑀢𑀺. 𑀯𑀢𑁆𑀣𑀤𑀸𑀦𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 ‘‘𑀯𑀢𑁆𑀣𑀤𑁄 𑀳𑁄𑀢𑀺 𑀯𑀡𑁆𑀡𑀤𑁄’’𑀢𑀺𑀆𑀤𑀺𑀓𑀸𑀬 (𑀲𑀁. 𑀦𑀺. 𑁧.𑁪𑁨) 𑀯𑀢𑁆𑀣𑀤𑀸𑀦𑀲𑁆𑀲 𑀆𑀦𑀺𑀲𑀁𑀲𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸𑀬. 𑀯𑀺𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑁄 ‘‘𑀇𑀢𑀭𑀻𑀢𑀭𑁂𑀦𑀸’’𑀢𑀺 𑀲𑀩𑁆𑀩𑀦𑀸𑀫𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄𑀢𑀺 𑀆𑀳 ‘‘𑀅𑀧𑁆𑀧𑀕𑁆𑀖𑁂𑀦𑀧𑀺 𑀫𑀳𑀕𑁆𑀖𑁂𑀦𑀧𑀺 𑀬𑁂𑀦 𑀓𑁂𑀦𑀘𑀻’’𑀢𑀺. 𑀧𑀸𑀯𑀸𑀭𑁄𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑁄. 𑀲𑁄 𑀳𑀺 𑀧𑀸𑀭𑀼𑀧𑀦𑀢𑁆𑀣𑀸𑀬 𑀯𑀭𑀺𑀬𑀢𑀺 𑀇𑀘𑁆𑀙𑀺𑀬𑀢𑀻𑀢𑀺 𑀧𑀸𑀯𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀓𑀧𑁆𑀧𑀸𑀲𑀸𑀤𑀺𑀪𑁂𑀤𑁄’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀓𑀢𑀺𑀓𑁄𑀚𑀯𑀫𑁂𑀯𑀸𑀢𑀺 𑀧𑀓𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀲𑀸𑀭𑀼𑀧𑁆𑀧𑀁 𑀓𑁄𑀚𑀯𑀫𑁂𑀯. 𑀲𑁄𑀴𑀲𑀦𑀸𑀝𑀓𑀺𑀢𑁆𑀣𑀻𑀦𑀁 𑀞𑀢𑁆𑀯𑀸 𑀦𑀘𑁆𑀘𑀬𑁄𑀕𑁆𑀬𑀢𑁆𑀢𑀸 𑀫𑀳𑀢𑀻 𑀧𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀫𑀳𑀸𑀧𑀺𑀝𑁆𑀞𑀺𑀬𑀁, 𑀢𑀫𑁂𑀯 𑀓𑁄𑀚𑀯𑀁 𑀫𑀳𑀸𑀧𑀺𑀝𑁆𑀞𑀺𑀬𑀓𑁄𑀚𑀯𑀁. 𑀢𑀲𑁆𑀲 𑀓𑀺𑀭 𑀮𑁄𑀫𑀸𑀦𑀺 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀺 𑀳𑁄𑀦𑁆𑀢𑀺.

𑁨𑁧𑁧. 𑀓𑀫𑁆𑀩𑀮𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸

𑁩𑁩𑁮. 𑀓𑀸𑀲𑀻𑀦𑀦𑁆𑀢𑀺 𑀓𑀸𑀲𑀻𑀦𑀁 𑀚𑀦𑀧𑀤𑀸𑀦𑀁, 𑀓𑀸𑀲𑀺𑀭𑀝𑁆𑀞𑁂 𑀦𑀺𑀯𑀸𑀲𑀻𑀦𑀁 𑀚𑀦𑀸𑀦𑀁 𑀯𑀸. 𑀧𑀲𑁂𑀦𑀤𑀺𑀲𑁆𑀲𑀸𑀢𑀺 𑀧𑀘𑁆𑀘𑀼𑀝𑁆𑀞𑀁, 𑀧𑀝𑀺𑀧𑀓𑁆𑀔𑀁 𑀯𑀸 𑀲𑁂𑀦𑀁 𑀚𑀺𑀦𑀸𑀢𑀻𑀢𑀺 𑀧𑀲𑁂𑀦𑀤𑀺 𑀚𑀓𑀸𑀭𑀲𑁆𑀲 𑀤𑀓𑀸𑀭𑀁 𑀓𑀢𑁆𑀯𑀸. 𑀏𑀲𑀸𑀢𑀺 𑀏𑀲𑁄 𑀓𑀸𑀲𑀺𑀭𑀸𑀚𑀸. ‘‘𑀲𑀳𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀲𑀺𑀲𑀤𑁆𑀤𑀲𑁆𑀲 𑀲𑀗𑁆𑀓𑁂𑀢𑀲𑀗𑁆𑀔𑁆𑀬𑀁 𑀤𑀲𑁆𑀲𑁂𑀢𑀺. 𑀢𑀁𑀅𑀕𑁆𑀖𑀦𑀓𑁄𑀢𑀺 𑀢𑁂𑀦 𑀓𑀸𑀲𑀺𑀦𑀸 𑀅𑀕𑁆𑀖𑀦𑀓𑁄. 𑀓𑀲𑁆𑀫𑀸 𑀅𑀟𑁆𑀠𑀓𑀸𑀲𑀻𑀢𑀺 (𑀣𑁂𑀭𑀻𑀕𑀸. 𑀅𑀝𑁆𑀞. 𑁨𑁫) 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺. 𑀅𑀬𑀦𑁆𑀢𑀺 𑀓𑀫𑁆𑀩𑀮𑁄. 𑀧𑀦𑀸𑀢𑀺 𑀓𑀸𑀭𑀡𑀢𑁆𑀣𑀚𑁄𑀢𑀓𑁄. 𑀬𑀲𑁆𑀫𑀸𑀢𑀺 𑀳𑀺 𑀅𑀢𑁆𑀣𑁄.

𑁩𑁩𑁯. 𑀪𑀜𑁆𑀚𑀺𑀢𑀩𑁆𑀩𑀁 𑀔𑁄𑀫𑀸𑀤𑀻𑀦𑀺 𑀧𑀜𑁆𑀘 𑀲𑀼𑀢𑁆𑀢𑀸𑀦𑀺 𑀫𑀺𑀲𑁆𑀲𑀺𑀢𑁆𑀯𑀸 𑀅𑀯𑀫𑀤𑁆𑀤𑀺𑀢𑀩𑁆𑀩𑀦𑁆𑀢𑀺 𑀪𑀗𑁆𑀕𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀗𑁆𑀕𑀁 𑀦𑀸𑀫𑀸’’𑀢𑀺𑀆𑀤𑀺. 𑀯𑀸𑀓𑀫𑀬𑀫𑁂𑀯𑀸𑀢𑀺 𑀪𑀗𑁆𑀕𑀦𑀸𑀫𑀓𑁂𑀦 𑀯𑀸𑀓𑁂𑀦 𑀦𑀺𑀩𑁆𑀩𑀢𑁆𑀢𑀫𑁂𑀯.

𑁩𑁪𑁦. 𑀢𑁂𑀢𑀺 𑀪𑀺𑀓𑁆𑀔𑀽, 𑀲𑀮𑁆𑀮𑀓𑁆𑀔𑀺𑀁𑀲𑀼 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀲𑁆𑀲𑀸𑀢𑀺 𑀧𑀤𑀲𑁆𑀲, 𑀅𑀢𑁆𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀅𑀘𑁆𑀙𑀺𑀁𑀲𑀽𑀢𑀺 𑀦 𑀆𑀲𑀺𑀁𑀲𑀼, 𑀦 𑀯𑀲𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀦𑀸𑀓𑀸𑀫𑀸𑀢𑀺 𑀏𑀢𑁆𑀣 𑀓𑀫𑀼𑀥𑀸𑀢𑀼 𑀇𑀘𑁆𑀙𑀢𑁆𑀣𑁄 𑀬𑀓𑀸𑀭𑀮𑁄𑀧𑁄𑀢𑀺 𑀆𑀳 ‘‘𑀦 𑀅𑀦𑀺𑀘𑁆𑀙𑀸𑀬𑀸’’𑀢𑀺. 𑀤𑀸𑀢𑀩𑁆𑀩𑁄𑀢𑀺 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀉𑀧𑀘𑀸𑀭𑁂𑀢𑀺 𑀲𑀼𑀲𑀸𑀦𑀲𑁆𑀲 𑀲𑀫𑀻𑀧𑁂. ‘‘𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺 𑀯𑀘𑀦𑀲𑁆𑀲 𑀅𑀦𑁂𑀓𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀬𑀤𑀺 𑀧𑀦𑀸’’𑀢𑀺𑀆𑀤𑀺. 𑀇𑀥𑀸𑀢𑀺 𑀇𑀫𑀁 𑀲𑀼𑀲𑀸𑀦𑀁. ‘‘𑀲𑀫𑁆𑀧𑀢𑁆𑀢𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀤𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀬𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀲𑀤𑀺𑀲𑀸 𑀑𑀓𑁆𑀓𑀫𑀺𑀁𑀲𑀽𑀢𑀺 𑀏𑀢𑁆𑀣 𑀲𑀤𑀺𑀲𑀲𑀤𑁆𑀤𑁄 𑀲𑀫𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀫𑀁 𑀑𑀓𑁆𑀓𑀫𑀺𑀁𑀲𑀽’’𑀢𑀺. 𑀲𑀫𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑁄. 𑀲𑀫𑀸𑀦𑀤𑀺𑀲𑀸𑀬𑀸𑀢𑀺 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀤𑀺𑀲𑀸𑀬 𑀯𑀸’’𑀢𑀺. 𑀏𑀢𑁆𑀣 𑀧𑀦 𑀬𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀩𑀳𑀺𑀫𑁂𑀯𑀸𑀢𑀺 𑀲𑀼𑀲𑀸𑀦𑀢𑁄 𑀩𑀳𑀺 𑀏𑀯. 𑀓𑀢𑀺𑀓𑀦𑁆𑀢𑀺 𑀓𑀢𑁂𑀦 𑀧𑀯𑀢𑁆𑀢𑀁 𑀲𑀗𑁆𑀕𑀭𑀁.

𑁨𑁧𑁩. 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑀫𑁆𑀫𑀼𑀢𑀺𑀓𑀣𑀸

𑁩𑁪𑁨. ‘‘𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀜𑀸𑀢𑀓𑀸𑀤𑀻𑀦𑀁 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀘𑁆𑀘𑀲𑁆𑀫𑀺𑀦𑁆𑀢𑀺 𑀚𑀦𑁂. 𑀯𑀸𑀲𑀤𑁆𑀤𑁄 𑀯𑀺𑀓𑀧𑁆𑀧𑀢𑁆𑀣𑁄. 𑀏𑀢𑁂𑀲𑀼 𑀢𑀻𑀲𑀼 𑀅𑀜𑁆𑀜𑀢𑀭𑁂𑀦 𑀓𑀸𑀭𑀡𑁂𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫𑀸𑀢𑀺 𑀳𑀺 𑀅𑀢𑁆𑀣𑁄. 𑀆𑀕𑀢𑀲𑁆𑀲𑀸𑀧𑀺 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄 𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀧𑀕𑁂𑀯 𑀧𑀘𑁆𑀙𑀸 𑀆𑀕𑀢𑀲𑁆𑀲𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀯𑀫𑀜𑁆𑀜𑀦𑁆𑀢𑀺 𑀉𑀜𑁆𑀜𑀸𑀢𑀁. 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁. 𑀦𑀢𑁆𑀣𑀺 𑀓𑀺𑀦𑁆𑀢𑀺 𑀬𑁄𑀚𑀦𑀸. 𑀫𑀼𑀝𑁆𑀞𑀸 𑀲𑀢𑀺 𑀏𑀢𑀲𑁆𑀲𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺. 𑀆𑀕𑀢𑀸𑀦𑀫𑁆𑀧𑀺 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄. 𑀧𑀕𑁂𑀯 𑀧𑀞𑀫𑀁 𑀆𑀕𑀢𑀸𑀦𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀏𑀢𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑀦𑁆𑀢𑀲𑀦𑁆𑀢𑁄 𑀯𑀸𑀢𑀺 𑀔𑁂𑀤𑀔𑁂𑀤𑁄 𑀯𑀸. 𑀇𑀤𑀜𑁆𑀘𑀺𑀤𑀜𑁆𑀘𑀸𑀢𑀺 𑀇𑀤𑀜𑁆𑀘 𑀇𑀤𑀜𑁆𑀘 𑀘𑀻𑀯𑀭𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘 𑀕𑀘𑁆𑀙𑀢𑀺, 𑀬𑀲𑁆𑀫𑀸 𑀘 𑀚𑀸𑀦𑀸𑀢𑀺, 𑀢𑀲𑁆𑀫𑀸. 𑀬𑁄𑀢𑀺 𑀪𑀺𑀓𑁆𑀔𑀼. 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀭𑀽𑀧𑁄 𑀪𑀺𑀓𑁆𑀔𑀼 𑀲𑀫𑁆𑀫𑀦𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀅𑀧𑀮𑁄𑀓𑀦𑁂𑀦𑀧𑀻𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀓𑀸𑀢𑀼𑀁 𑀲𑀗𑁆𑀖𑀁 𑀅𑀧𑀮𑁄𑀓𑁂𑀫𑀻’’𑀢𑀺 𑀅𑀧𑀮𑁄𑀓𑀦𑁂𑀦𑀧𑀺, 𑀲𑀫𑁆𑀫𑀦𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀧𑀦𑀸𑀢𑀺 𑀬𑀲𑁆𑀫𑀺𑀁 𑀧𑀦 𑀥𑀼𑀭𑀯𑀺𑀳𑀸𑀭𑁂.

‘‘𑀕𑀳𑀺𑀢𑀝𑁆𑀞𑀸𑀦𑁂𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀢𑁆𑀣𑁂𑀯𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. ‘‘𑀙𑀟𑁆𑀟𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀉𑀚𑁆𑀛𑀺𑀢𑁆𑀯𑀸𑀢𑀺 𑀏𑀢𑁆𑀣 𑀉𑀥𑀥𑀸𑀢𑀼𑀬𑀸 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀦𑁆𑀢𑀺 𑀧𑀤𑀲𑁆𑀲 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄’’𑀢𑀺𑀆𑀤𑀺. 𑀢𑀢𑁆𑀣 𑀬𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑁄 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀘𑀻𑀯𑀭𑀧𑀝𑀺𑀲𑀸𑀫𑀓’’𑀦𑁆𑀢𑀺 𑀇𑀫𑀺𑀦𑀸 𑀘𑀻𑀯𑀭𑀁 𑀕𑀳𑀺𑀢𑀝𑁆𑀞𑀸𑀦𑀢𑁄 𑀦𑀻𑀳𑀭𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑁂 𑀤𑀳𑀢𑀺 𑀞𑀧𑁂𑀢𑀻𑀢𑀺 𑀘𑀻𑀯𑀭𑀦𑀺𑀤𑀳𑀓𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑁄 𑀦 𑀙𑀦𑁆𑀤𑀸𑀢𑀺𑀁 𑀕𑀘𑁆𑀙𑀢𑀻𑀢𑀺𑀆𑀤𑀻𑀲𑀼 𑀏𑀢𑁆𑀣 𑀏𑀢𑁂𑀲𑀼 𑀘 𑀇𑀢𑁄 𑀧𑀭𑀜𑁆𑀘𑀸𑀢𑀺 𑀬𑁄𑀚𑀦𑀸.

𑁨𑁧𑁪. 𑀪𑀡𑁆𑀟𑀸𑀕𑀸𑀭𑀲𑀫𑁆𑀫𑀼𑀢𑀺𑀆𑀤𑀺𑀓𑀣𑀸

𑁩𑁪𑁩. 𑀬𑁄 𑀯𑀺𑀳𑀸𑀭𑁄 𑀯𑀸 𑀬𑁄 𑀅𑀟𑁆𑀠𑀬𑁄𑀕𑁄 𑀯𑀸 𑀳𑁄𑀢𑀺, 𑀲𑁄 𑀯𑀺𑀳𑀸𑀭𑀸𑀤𑀺𑀓𑁄 𑀲𑀫𑁆𑀫𑀦𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀆𑀭𑀸𑀫𑀺𑀓𑀲𑀸𑀫𑀡𑁂𑀭𑀸𑀤𑀻𑀳𑀻’’𑀢𑀺 𑀧𑀤𑀁 𑀯𑀺𑀯𑀺𑀢𑁆𑀢𑀢𑁆𑀣𑁂 𑀅𑀧𑀸𑀤𑀸𑀦𑀁, 𑀓𑀭𑀡𑀫𑁆𑀧𑀺 𑀬𑀼𑀚𑁆𑀚𑀢𑀺. 𑀧𑀘𑁆𑀘𑀦𑁆𑀢𑀲𑁂𑀦𑀸𑀲𑀦𑀁 𑀧𑀦 𑀦 𑀲𑀫𑁆𑀫𑀦𑀺𑀢𑀩𑁆𑀩𑀁 𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑀢𑁆𑀢𑀸. 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯𑀸𑀢𑀺 𑀪𑀡𑁆𑀟𑀸𑀕𑀸𑀭𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯.

𑀬𑀲𑁆𑀲𑀸𑀢𑀺 𑀪𑀡𑁆𑀟𑀸𑀕𑀸𑀭𑀲𑁆𑀲. 𑀇𑀤𑀁 𑀧𑀤𑀁 ‘‘𑀙𑀤𑀦𑀸𑀤𑀻𑀲𑀽’’𑀢𑀺 𑀧𑀤𑁂 𑀲𑀸𑀫𑀻, ‘‘𑀦𑀢𑁆𑀣𑀻’’𑀢𑀺 𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀬𑀲𑁆𑀲 𑀧𑀦𑀸𑀢𑀺 𑀪𑀡𑁆𑀟𑀸𑀕𑀸𑀭𑀲𑁆𑀲 𑀧𑀦. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀲𑁆𑀫𑀺𑀁 𑀓𑀲𑁆𑀫𑀺𑀁𑀘𑀺 𑀞𑀸𑀦𑁂. 𑀬𑁂𑀦𑀸𑀢𑀺 𑀧𑀢𑀺𑀢𑀳𑁂𑀢𑀼𑀦𑀸. 𑀫𑀽𑀲𑀺𑀢𑁆𑀯𑀸 𑀔𑀸𑀤𑀢𑀻𑀢𑀺 𑀫𑀽𑀲𑀺𑀓𑁄. 𑀆𑀤𑀺𑀲𑀤𑁆𑀤𑁂𑀦 𑀕𑁄𑀥𑀸𑀫𑀗𑁆𑀕𑀼𑀲𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀧 𑀪𑀼𑀲𑀁, 𑀉𑀧𑀕𑀼𑀳𑀺𑀢𑁆𑀯𑀸 𑀯𑀸 𑀘𑀺𑀦𑀦𑁆𑀢𑀻𑀢𑀺 𑀉𑀧𑀘𑀺𑀓𑀸. 𑀢𑀦𑁆𑀢𑀺 𑀑𑀯𑀲𑁆𑀲𑀦𑀸𑀤𑀺𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀘𑀻𑀯𑀭𑀦𑀺𑀤𑀳𑀓𑀪𑀡𑁆𑀟𑀸𑀕𑀸𑀭𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼. 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁂𑀦 𑀦 𑀕𑀡𑁆𑀳𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀯𑀸𑀢𑀺 𑀘𑀻𑀯𑀭𑀦𑀺𑀤𑀳𑀓𑀪𑀡𑁆𑀟𑀸𑀕𑀸𑀭𑀺𑀓𑀸𑀦𑀁, 𑀢𑁂𑀳𑀺 𑀯𑀸 𑀧𑀞𑀫𑀁. 𑀬𑀁 𑀬𑀦𑁆𑀢𑀺 𑀘𑀻𑀯𑀭𑀁. 𑀢𑀣𑁂𑀯𑀸𑀢𑀺 𑀬𑀣𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀡𑁆𑀳𑀢𑀺, 𑀢𑀣𑁂𑀯. 𑀘𑀻𑀯𑀭𑀦𑀺𑀤𑀳𑀓𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀧𑀝𑀺𑀕𑁆𑀕𑀸𑀳𑀓𑁂𑀦𑁂𑀯, 𑀅𑀣 𑀔𑁄 𑀦𑀺𑀤𑀳𑀓𑁂𑀦𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀦𑀺𑀤𑀳𑀓𑁄 𑀆𑀘𑀺𑀓𑁆𑀔𑀢𑀺, 𑀢𑀣𑁂𑀯. 𑀢𑀢𑁄𑀢𑀺 𑀢𑁂𑀳𑀺 𑀘𑀻𑀯𑀭𑁂𑀳𑀺, 𑀯𑀺𑀪𑀢𑁆𑀢𑀅𑀧𑀸𑀤𑀸𑀦𑀁, 𑀢𑁂𑀲𑀼 𑀘𑀻𑀯𑀭𑁂𑀲𑀼 𑀯𑀸 𑀦𑀺𑀤𑁆𑀥𑀸𑀭𑀡𑀁. 𑀢𑀤𑁂𑀯𑀸𑀢𑀺 𑀲𑀗𑁆𑀖𑁂𑀦 𑀯𑀼𑀢𑁆𑀢𑀘𑀻𑀯𑀭𑀫𑁂𑀯.

𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀡𑁆𑀟𑀸𑀕𑀸𑀭𑀦𑁆𑀢𑀺 𑀪𑀡𑁆𑀟𑀲𑁆𑀲 𑀞𑀧𑀦𑁄𑀓𑀸𑀲𑀁 𑀅𑀕𑀸𑀭𑀁. 𑀪𑀡𑁆𑀟𑀸𑀕𑀸𑀭𑀺𑀓𑁄𑀢𑀺 𑀪𑀡𑁆𑀟𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄. 𑀩𑀸𑀳𑀼𑀮𑁆𑀮𑀺𑀓𑀢𑀸𑀬𑀸𑀢𑀺 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑁂𑀦 𑀦𑀺𑀬𑀼𑀢𑁆𑀢𑀪𑀸𑀯𑀢𑁆𑀣𑀁. 𑀏𑀯𑀁 𑀲𑀦𑁆𑀢𑁂 𑀓𑀺𑀫𑀢𑁆𑀣𑀸𑀬 𑀅𑀦𑀼𑀜𑁆𑀜𑀸𑀢𑁄𑀢𑀺 𑀆𑀳 ‘‘𑀅𑀧𑀺 𑀘𑀸’’𑀢𑀺𑀆𑀤𑀺. 𑀅𑀦𑀼𑀕𑁆𑀕𑀳𑀸𑀬 𑀅𑀦𑀼𑀜𑁆𑀜𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀦𑁂𑀯 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀤𑁆𑀯𑁂 𑀤𑁆𑀯𑁂 𑀯𑀸 𑀘𑀻𑀯𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀕𑀳𑀁 𑀓𑀸𑀢𑀼𑀦𑁆𑀢𑀺 𑀲𑀗𑁆𑀖𑁂𑀦 𑀲𑀗𑁆𑀕𑀳𑀁 𑀓𑀸𑀢𑀼𑀁.

𑀦 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀅𑀜𑁆𑀜𑁂𑀧𑀺 𑀅𑀯𑀼𑀝𑁆𑀞𑀸𑀧𑀦𑀻𑀬𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑁂𑀧𑀻’’𑀢𑀺𑀆𑀤𑀺. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀢𑀢𑁆𑀣𑀸𑀢𑀺 𑀘𑀢𑀽𑀲𑀼. 𑀲𑀗𑁆𑀖𑁄 𑀧𑀦 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀓𑀸𑀭𑀢𑀸𑀬 𑀘𑀸𑀢𑀺 𑀲𑀗𑁆𑀖𑀲𑁆𑀲 𑀉𑀧𑀓𑀸𑀭𑀢𑀸𑀬 𑀘. 𑀏𑀢𑁆𑀣 𑀘 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀏𑀓𑁄𑀬𑁂𑀯 𑀳𑁂𑀢𑀼, 𑀧𑀘𑁆𑀙𑀺𑀫𑁂 𑀧𑀦 𑀤𑁆𑀯𑁂 𑀳𑁂𑀢𑀯𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀫𑁆𑀫𑀼𑀔𑀻𑀪𑀽𑀢𑁂𑀦𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀼𑀔𑁂 𑀲𑀁𑀯𑀺𑀚𑁆𑀚𑀫𑀸𑀦𑁄, 𑀲𑀦𑁆𑀦𑀺𑀧𑀢𑀺𑀢𑁄 𑀯𑀸 𑀲𑀫𑁆𑀫𑀼𑀔𑁄, 𑀲𑀫𑁆𑀫𑀼𑀔𑁄 𑀳𑀼𑀢𑁆𑀯𑀸 𑀪𑀽𑀢𑁄 𑀲𑀫𑁆𑀫𑀼𑀔𑀻𑀪𑀽𑀢𑁄. 𑀪𑀽𑀲𑀤𑁆𑀤𑀬𑁄𑀕𑀢𑁆𑀢𑀸 𑀅𑀓𑀸𑀭𑀲𑁆𑀲𑀻𑀓𑀸𑀭𑁄 𑀳𑁄𑀢𑀺, 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁄 𑀲𑀗𑁆𑀖𑁄. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀦𑀸’’𑀢𑀺. 𑀓𑁄𑀮𑀸𑀳𑀮𑀦𑁆𑀢𑀺 𑀩𑀳𑀼𑀚𑀦𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀢𑁄 𑀓𑀢𑀁 𑀅𑀩𑁆𑀬𑀢𑁆𑀢𑀲𑀤𑁆𑀤𑀁. 𑀢𑀤𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺. ‘‘𑀘𑀻𑀯𑀭𑀪𑀸𑀚𑀓𑁂𑀲𑀽’’𑀢𑀺𑀆𑀤𑀺𑀦𑀸 𑀅𑀕𑀢𑀺𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀢𑀼𑀮𑀸𑀪𑀽𑀢𑁄𑀢𑀺 𑀢𑀼𑀮𑀸𑀬 𑀲𑀤𑀺𑀲𑁄 𑀳𑀼𑀢𑁆𑀯𑀸 𑀪𑀽𑀢𑁄, 𑀢𑀼𑀮𑀸𑀬 𑀲𑀤𑀺𑀲𑀪𑀸𑀯𑀁 𑀧𑀢𑁆𑀢𑁄 𑀯𑀸. 𑀫𑀚𑁆𑀛𑀢𑁆𑀢𑁄𑀢𑀺 𑀫𑀚𑁆𑀛𑁂 𑀞𑀺𑀢𑁄 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀫𑀚𑁆𑀛𑀢𑁆𑀢𑁄.

𑀇𑀤𑀦𑁆𑀢𑀺 𑀘𑀻𑀯𑀭𑀁. 𑀖𑀦𑀦𑁆𑀢𑀺 𑀦𑀺𑀭𑀦𑁆𑀢𑀭𑀁. 𑀢𑀦𑀼𑀓𑀦𑁆𑀢𑀺 𑀯𑀺𑀭𑀴𑀁. 𑀏𑀢𑁆𑀣 ‘‘𑀉𑀘𑁆𑀘𑀺𑀦𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀢𑁆𑀣𑀲𑁆𑀲 𑀧𑀫𑀸𑀡𑁂𑀦 𑀉𑀘𑁆𑀘𑀺𑀦𑀦𑀁 𑀤𑀲𑁆𑀲𑁂𑀢𑀺. ‘‘𑀢𑀼𑀮𑀬𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀕𑁆𑀖𑁂𑀦 𑀢𑀼𑀮𑀦𑀁 𑀤𑀲𑁆𑀲𑁂𑀢𑀺. 𑀯𑀡𑁆𑀡𑀸𑀯𑀡𑁆𑀡𑀁 𑀓𑀢𑁆𑀯𑀸𑀢𑀺 𑀯𑀡𑁆𑀡𑀜𑁆𑀘 𑀅𑀯𑀡𑁆𑀡𑀜𑁆𑀘 𑀔𑀼𑀤𑁆𑀤𑀓𑀜𑁆𑀘 𑀧𑀫𑀸𑀡𑀁, 𑀫𑀳𑀦𑁆𑀢𑀜𑁆𑀘 𑀧𑀫𑀸𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑀸𑀦𑀺 𑀘𑀻𑀯𑀭𑀸𑀦𑀺 𑀅𑀧𑁆𑀧𑀕𑁆𑀖𑀸𑀦𑀺 𑀳𑁄𑀦𑁆𑀢𑀺, 𑀏𑀓𑀘𑁆𑀘𑀸𑀦𑀺 𑀫𑀳𑀕𑁆𑀖𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀲𑀤𑀲𑀅𑀕𑁆𑀖𑀦𑀓𑀦𑁆𑀢𑀺 𑀤𑀲𑀳𑀺 𑀤𑀲𑀳𑀺 𑀓𑀳𑀸𑀧𑀡𑁂𑀳𑀺 𑀅𑀕𑁆𑀖𑀦𑀓𑀁. 𑀬𑀦𑁆𑀢𑀺 𑀘𑀻𑀯𑀭𑀁, 𑀩𑀦𑁆𑀥𑀺𑀢𑁆𑀯𑀸𑀢𑀺 𑀦𑀯𑀕𑁆𑀖𑀦𑀓𑀁 𑀏𑀓𑀕𑁆𑀖𑀦𑀓𑁂𑀦, 𑀅𑀝𑁆𑀞𑀕𑁆𑀖𑀦𑀓𑀜𑁆𑀘 𑀤𑁆𑀯𑀺𑀅𑀕𑁆𑀖𑀦𑀓𑁂𑀦 𑀩𑀦𑁆𑀥𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑁂 𑀧𑀝𑀺𑀯𑀻𑀲𑁂𑀢𑀺 𑀲𑀫𑀧𑀫𑀸𑀡𑁂 𑀧𑀝𑀺𑀯𑀻𑀲𑁂 𑀞𑀧𑁂𑀢𑁆𑀯𑀸, 𑀇𑀫𑀺𑀦𑀸 ‘‘𑀯𑀡𑁆𑀡𑀸𑀯𑀡𑁆𑀡’’𑀦𑁆𑀢𑀺 𑀏𑀢𑁆𑀣 𑀯𑀡𑁆𑀡𑀲𑀤𑁆𑀤𑁄 𑀧𑀫𑀸𑀡𑀢𑁆𑀣𑁄𑀢𑀺 𑀤𑀻𑀧𑁂𑀢𑀺. 𑀤𑀲 𑀤𑀲 𑀪𑀺𑀓𑁆𑀔𑀽𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁 𑀅𑀜𑁆𑀜𑁂𑀦𑀸𑀓𑀸𑀭𑁂𑀦𑀸𑀧𑀺 𑀕𑀡𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀪𑀡𑁆𑀟𑀺𑀓𑀦𑁆𑀢𑀺 𑀘𑀻𑀯𑀭𑀪𑀡𑁆𑀟𑁂𑀦 𑀦𑀺𑀬𑀼𑀢𑁆𑀢𑀁 𑀧𑀼𑀝𑀁. 𑀓𑀼𑀲𑁄𑀢𑀺 𑀲𑀮𑀸𑀓𑀤𑀡𑁆𑀟𑁄.

𑀅𑀢𑁆𑀢𑀺𑀲𑁆𑀲𑀭𑀸𑀢𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀇𑀲𑁆𑀲𑀭𑀸. 𑀅𑀜𑁆𑀜𑁂𑀲𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀟𑁆𑀠𑀪𑀸𑀕𑁄𑀢𑀺 𑀪𑀺𑀓𑁆𑀔𑀽𑀦𑀁 𑀮𑀤𑁆𑀥𑀪𑀸𑀕𑀢𑁄 𑀉𑀧𑀟𑁆𑀠𑁄 𑀪𑀸𑀕𑁄. 𑀬𑁂 𑀧𑀦𑀸𑀢𑀺 𑀲𑀸𑀫𑀡𑁂𑀭𑀸 𑀧𑀦. 𑀲𑀫𑀪𑀸𑀕𑁄𑀢𑀺 𑀪𑀺𑀓𑁆𑀔𑀽𑀦𑀁 𑀪𑀸𑀕𑁂𑀦 𑀲𑀫𑁄 𑀪𑀸𑀕𑁄. 𑀇𑀤𑀜𑁆𑀘𑀸𑀢𑀺 ‘‘𑀉𑀧𑀟𑁆𑀠𑀧𑀝𑀺𑀯𑀻𑀲’’𑀦𑁆𑀢𑀺 𑀯𑀘𑀦𑀜𑁆𑀘, 𑀓𑀣𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀓𑀫𑁂𑀯𑀸𑀢𑀺 𑀪𑀺𑀓𑁆𑀔𑀼𑀲𑀸𑀫𑀡𑁂𑀭𑀸𑀦𑀁 𑀲𑀫𑀧𑀫𑀸𑀡𑀫𑁂𑀯. 𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁆𑀲𑀸𑀯𑀸𑀲𑀺𑀓𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀸𑀤𑁂𑀦 𑀫𑀽𑀮𑁂𑀦 𑀉𑀧𑁆𑀧𑀸𑀤𑀺𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀯𑀟𑁆𑀠𑀦𑀓𑀫𑁆𑀫𑀁 ‘‘𑀬𑀢𑁆𑀢𑀓𑁂𑀦 𑀯𑀺𑀦𑀬𑀸𑀕𑀢𑁂𑀦 𑀲𑀫𑁆𑀫𑀼𑀜𑁆𑀚𑀦𑀺𑀩𑀦𑁆𑀥𑀦𑀸𑀤𑀺𑀦𑀸 𑀳𑀢𑁆𑀣𑀓𑀫𑁆𑀫𑁂𑀦 𑀯𑀺𑀳𑀸𑀭𑀲𑁆𑀲 𑀊𑀦𑀢𑀸 𑀦 𑀳𑁄𑀢𑀺, 𑀢𑀢𑁆𑀢𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀨𑀸𑀢𑀺𑀓𑀫𑁆𑀫𑀁 𑀓𑀢𑁆𑀯𑀸 𑀕𑀳𑀡𑀁. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀣𑀸𑀢𑀺 𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁆𑀲𑀸𑀯𑀸𑀲𑀺𑀓𑀕𑀳𑀡𑁂. 𑀲𑀩𑁆𑀩𑁂𑀲𑀦𑁆𑀢𑀺 𑀅𑀔𑀺𑀮𑀸𑀦𑀁 𑀪𑀺𑀓𑁆𑀔𑀼𑀲𑀸𑀫𑀡𑁂𑀭𑀸𑀦𑀁. 𑀪𑀡𑁆𑀟𑀸𑀕𑀸𑀭𑀺𑀓𑀘𑀻𑀯𑀭𑁂𑀧𑀻𑀢𑀺 𑀪𑀡𑁆𑀟𑀸𑀕𑀸𑀭𑁂 𑀞𑀧𑀺𑀢𑁂 𑀅𑀓𑀸𑀮𑀘𑀻𑀯𑀭𑁂𑀧𑀺. 𑀧𑀺𑀲𑀤𑁆𑀤𑁂𑀦 𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁆𑀲𑀸𑀯𑀸𑀲𑀺𑀓𑀫𑀧𑁂𑀓𑁆𑀔𑀢𑀺. 𑀲𑀸𑀫𑀡𑁂𑀭𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀳𑀭𑀺𑀢𑀓𑀦𑁆𑀢𑀺 𑀳𑀭𑀺𑀢𑀯𑀺𑀭𑀳𑀺𑀢𑀁. 𑀭𑀗𑁆𑀕𑀙𑀮𑁆𑀮𑀺𑀦𑁆𑀢𑀺 𑀭𑀚𑀦𑀘𑁆𑀙𑀯𑀺𑀁. 𑀏𑀢𑀦𑁆𑀢𑀺 𑀉𑀓𑁆𑀓𑀼𑀝𑁆𑀞𑀺𑀓𑀭𑀡𑀢𑁄 𑀲𑀫𑀪𑀸𑀕𑀤𑀸𑀦𑀁, 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀘𑀸𑀢𑀺 𑀲𑀸𑀫𑀡𑁂𑀭𑀸 𑀘. 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀓𑀢𑁆𑀢𑀩𑁆𑀩𑀓𑀸𑀮𑁂𑀲𑀼 𑀅𑀓𑀢𑁆𑀯𑀸 𑀬𑀣𑀺𑀘𑁆𑀙𑀺𑀢𑀓𑁆𑀔𑀡𑁂 𑀓𑀭𑁄𑀦𑁆𑀢𑀺. 𑀢𑁂𑀢𑀺 𑀲𑀸𑀫𑀡𑁂𑀭𑁂. 𑀲𑀫𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄𑀢𑀺 ‘‘𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀝𑀺𑀜𑁆𑀜𑀸𑀢𑀫𑀢𑁆𑀢𑁂𑀦 𑀲𑀫𑁄 𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄.

‘‘𑀲𑀓𑀁 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀡𑁆𑀟𑀸𑀕𑀸𑀭𑀢𑁄…𑀧𑁂… 𑀲𑀦𑁆𑀥𑀸𑀬𑀸’’𑀢𑀺. 𑀧𑀳𑀢𑀸𑀬𑀸𑀢𑀺 𑀧𑀳𑀭𑀺𑀢𑀩𑁆𑀩𑀸𑀬, 𑀧𑀳𑀦𑀺𑀢𑀩𑁆𑀩𑀸𑀬 𑀯𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸. 𑀅𑀦𑀻𑀳𑀝𑁂𑀲𑀽𑀢𑀺 𑀪𑀡𑁆𑀟𑀸𑀕𑀸𑀭𑀢𑁄 𑀅𑀦𑀻𑀳𑀭𑀺𑀢𑁂𑀲𑀼. 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀉𑀢𑁆𑀢𑀭𑀺𑀢𑀼𑀓𑀸𑀫𑀲𑁆𑀲 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀢𑀼𑀮𑀸𑀬𑀸𑀢𑀺 𑀫𑀸𑀦𑁂𑀦.

𑀢𑁂𑀲𑀽𑀢𑀺 𑀲𑀸𑀝𑀓𑁂𑀲𑀼, 𑀏𑀓𑁄 𑀲𑀸𑀝𑀓𑁄𑀢𑀺 𑀬𑁄𑀚𑀦𑀸. 𑀲𑀩𑁆𑀩𑁂𑀲𑀼 𑀧𑀸𑀢𑀺𑀢𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀢𑀓𑁂𑀦𑀸𑀢𑀺 𑀤𑁆𑀯𑀸𑀤𑀲𑀕𑁆𑀖𑀦𑀓𑁂𑀦. 𑀢𑀁 𑀲𑀼𑀢𑁆𑀯𑀸𑀢𑀺 𑀪𑀺𑀓𑁆𑀔𑀽𑀦𑀁 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀲𑀗𑁆𑀖𑀕𑀡𑀲𑀦𑁆𑀢𑀓𑁂. 𑀅𑀦𑀼𑀧𑁆𑀧𑀤𑀸𑀦𑁂𑀦 𑀔𑀺𑀧𑀺𑀬𑀢𑀺 𑀧𑀓𑁆𑀔𑀺𑀧𑀺𑀬𑀢𑀻𑀢𑀺 𑀅𑀦𑀼𑀓𑁆𑀔𑁂𑀧𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼𑀓𑁆𑀔𑁂𑀧𑀁 𑀦𑀸𑀫𑀸’’𑀢𑀺𑀆𑀤𑀺. 𑀬𑀢𑁆𑀢𑀓𑀁 𑀅𑀕𑁆𑀖𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀢𑀓𑁂𑀦 𑀅𑀕𑁆𑀖𑁂𑀦 𑀅𑀕𑁆𑀖𑀦𑀓𑁂𑀢𑀺 𑀬𑁄𑀚𑀦𑀸. 𑀯𑀺𑀓𑀮𑁆𑀮𑀓𑀸𑀢𑀺 𑀯𑀺𑀓𑀮𑀲𑁆𑀲 𑀪𑀸𑀯𑁄 𑀯𑀺𑀓𑀮𑁆𑀮𑀁, 𑀘𑀻𑀯𑀭𑀧𑀼𑀕𑁆𑀕𑀮𑀸𑀦𑀁 𑀅𑀧𑀳𑁄𑀦𑀓𑀪𑀸𑀯𑁄, 𑀢𑀤𑁂𑀯 𑀯𑀺𑀓𑀮𑁆𑀮𑀓𑀸. ‘‘𑀢𑀢𑁆𑀣𑀸’’𑀢𑀺 𑀧𑀸𑀞𑀲𑁂𑀲𑁄, 𑀢𑁂𑀲𑀼 𑀤𑁆𑀯𑀻𑀲𑀼 𑀯𑀺𑀓𑀮𑁆𑀮𑀓𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀻𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀦𑀺𑀧𑀸𑀢𑁄𑀬𑀁. 𑀙𑀺𑀦𑁆𑀤𑀦𑁆𑀢𑁂𑀳𑀺 𑀘 𑀤𑀸𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀸𑀢𑀩𑁆𑀩𑀸𑀦𑀻𑀢𑀺 𑀘 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺. 𑀤𑀸𑀲𑀤𑁆𑀤𑁄 𑀳𑀺 𑀅𑀯𑀔𑀡𑁆𑀟𑀦𑀢𑁆𑀣𑁄. 𑀤𑀸𑀢𑀼𑀦𑁆𑀢𑀺 𑀅𑀯𑀔𑀡𑁆𑀟𑀺𑀢𑀼𑀁. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀯𑀺𑀓𑀮𑁆𑀮𑀓𑁂𑀲𑀼. 𑀢𑀦𑁆𑀢𑀺 𑀘𑀻𑀯𑀭𑀁. 𑀅𑀣𑀸𑀢𑀺 𑀢𑁄𑀲𑀺𑀢𑀢𑁄 𑀧𑀭𑀁. 𑀢𑀢𑁆𑀣𑀸𑀢𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀝𑁆𑀞𑀸𑀲𑁂. 𑀲𑀸𑀫𑀡𑀓𑀦𑁆𑀢𑀺 𑀲𑀫𑀡𑀲𑁆𑀲 𑀅𑀦𑀼𑀭𑀽𑀧𑀁. 𑀬𑁄𑀢𑀺 𑀪𑀺𑀓𑁆𑀔𑀼. 𑀢𑁂𑀦𑀸𑀢𑀺 𑀧𑀭𑀺𑀓𑁆𑀔𑀸𑀭𑁂𑀦. 𑀇𑀤𑀫𑁆𑀧𑀻𑀢𑀺 𑀅𑀜𑁆𑀜𑀁 𑀲𑀸𑀫𑀡𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀞𑀧𑀦𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀧𑀼𑀭𑀺𑀫𑀁 𑀯𑀢𑁆𑀣𑀙𑀺𑀦𑁆𑀤𑀦𑀫𑀧𑁂𑀓𑁆𑀔𑀢𑀺.

𑀯𑀕𑁆𑀕𑀦𑁆𑀢𑀺 𑀲𑀫𑀽𑀳𑀁. 𑀅𑀝𑁆𑀞 𑀯𑀸 𑀦𑀯 𑀯𑀸 𑀪𑀺𑀓𑁆𑀔𑀽 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀅𑀝𑁆𑀞𑀦𑁆𑀦𑀁 𑀯𑀸 𑀦𑀯𑀦𑁆𑀦𑀁 𑀯𑀸. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀅𑀬𑀁 𑀅𑀧𑀳𑁄𑀦𑀓𑀪𑀸𑀯𑁄𑀢𑀺 𑀬𑁄𑀚𑀦𑀸. 𑀧𑀼𑀦 𑀘𑀻𑀯𑀭𑀲𑁆𑀲𑁂𑀯 𑀯𑀺𑀓𑀮𑁆𑀮𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣𑀯𑀸’’𑀢𑀺𑀆𑀤𑀺. 𑀏𑀢𑁆𑀣 𑀧𑀼𑀭𑀺𑀫𑀦𑀬𑁂 𑀘𑀻𑀯𑀭𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀘 𑀯𑀺𑀓𑀮𑁆𑀮𑀓𑀁 𑀳𑁄𑀢𑀺, 𑀧𑀘𑁆𑀙𑀺𑀫𑁂 𑀘𑀻𑀯𑀭𑀲𑁆𑀲𑁂𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑁨𑁧𑁫. 𑀘𑀻𑀯𑀭𑀭𑀚𑀦𑀓𑀣𑀸

𑁩𑁪𑁪. 𑀕𑀺𑀳𑀺𑀧𑀭𑀺𑀪𑀼𑀢𑁆𑀢𑀁 𑀧𑀦𑀸𑀢𑀺 𑀕𑀺𑀳𑀺𑀦𑀸 𑀧𑀭𑀺𑀪𑀼𑀢𑁆𑀢𑀁 𑀯𑀢𑁆𑀣𑀁 𑀧𑀦, 𑀓𑀺𑀜𑁆𑀘𑀺 𑀨𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀻𑀢𑀼𑀤𑀓𑀸𑀢𑀺 𑀲𑀻𑀢𑀁 𑀉𑀤𑀓𑀁. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀳𑀺 𑀅𑀬𑀁. 𑀉𑀢𑁆𑀢𑀭𑀸𑀴𑀼𑀫𑁆𑀧𑀦𑁆𑀢𑀺 𑀏𑀢𑁆𑀣 𑀉𑀢𑁆𑀢𑀭 𑀉𑀴𑀼𑀫𑁆𑀧𑀦𑁆𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀓𑀸𑀭𑀢𑁄 𑀉𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸, 𑀧𑀼𑀩𑁆𑀩𑀲𑀭𑀲𑁆𑀲 𑀘 𑀤𑀻𑀖𑀁 𑀓𑀢𑁆𑀯𑀸 ‘‘𑀉𑀢𑁆𑀢𑀭𑀸𑀴𑀼𑀫𑁆𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀢𑁆𑀢𑀭𑀸𑀴𑀽𑀢𑀺 𑀉𑀢𑁆𑀢𑀭𑀉𑀤𑀓𑀁. 𑀉𑀴𑀼𑀲𑀤𑁆𑀤𑁄 𑀳𑀺 𑀉𑀤𑀓𑀯𑀸𑀘𑀓𑁄, 𑀢𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀉𑀢𑁆𑀢𑀭𑀸𑀴𑀼𑀫𑁆𑀧𑀁. 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀝𑁆𑀝𑀸𑀥𑀸𑀭𑀓’’𑀦𑁆𑀢𑀺. 𑀭𑀚𑀦𑀦𑁆𑀢𑀺 𑀭𑀚𑀦𑀙𑀮𑁆𑀮𑀺𑀁. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀭𑀚𑀦𑀦𑁆𑀢𑀺 𑀭𑀚𑀦𑀼𑀤𑀓𑀁. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀣𑁂𑀯𑁄𑀢𑀺 𑀭𑀚𑀦𑀩𑀺𑀦𑁆𑀤𑀼. 𑀦 𑀯𑀺𑀲𑀭𑀢𑀻𑀢𑀺 𑀦 𑀧𑀕𑁆𑀖𑀭𑀢𑀺. 𑀭𑀚𑀦𑀸𑀴𑀼𑀗𑁆𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀭𑀚𑀦𑀉𑀴𑀼𑀗𑁆𑀓𑀦𑁆𑀢𑀺 𑀭𑀚𑀦𑀲𑀗𑁆𑀔𑀸𑀢𑀲𑁆𑀲 𑀉𑀤𑀓𑀲𑁆𑀲 𑀕𑀳𑀡𑀢𑁆𑀣𑀸𑀬 𑀓𑀭𑀺𑀬𑀢𑀻𑀢𑀺 𑀭𑀚𑀦𑀉𑀴𑀼𑀗𑁆𑀓𑀁. 𑀤𑀡𑁆𑀟𑀓𑁂𑀦 𑀦𑀺𑀬𑀼𑀢𑁆𑀢𑀁 𑀣𑀸𑀮𑀓𑀁 𑀤𑀡𑁆𑀟𑀓𑀣𑀸𑀮𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀫𑁂𑀯 𑀲𑀤𑀡𑁆𑀟𑀓’’𑀦𑁆𑀢𑀺. 𑀭𑀚𑀦𑀓𑀼𑀡𑁆𑀟𑀦𑁆𑀢𑀺 𑀭𑀚𑀦𑀧𑀓𑁆𑀔𑀺𑀧𑀦𑀁 𑀫𑀳𑀸𑀖𑀝𑀁. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀁 𑀞𑀸𑀦𑀁. 𑀧𑀢𑁆𑀣𑀺𑀦𑁆𑀦𑀲𑀤𑁆𑀤𑁄 𑀣𑀤𑁆𑀥𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀣𑀤𑁆𑀥’’𑀦𑁆𑀢𑀺. 𑀤𑀦𑁆𑀢𑀓𑀸𑀲𑀸𑀯𑀸𑀦𑀻𑀢𑀺 𑀏𑀢𑁆𑀣 𑀤𑀦𑁆𑀢𑀲𑀤𑁆𑀤𑁂𑀦 𑀢𑀲𑁆𑀲 𑀯𑀡𑁆𑀡𑁄 𑀕𑀳𑁂𑀢𑀩𑁆𑀩𑁄, 𑀲𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀤𑀦𑁆𑀢𑀸𑀦𑀺, 𑀤𑀦𑁆𑀢𑀸𑀦𑀺 𑀘 𑀢𑀸𑀦𑀺 𑀓𑀸𑀲𑀸𑀯𑀸𑀦𑀺 𑀘𑁂𑀢𑀺 𑀤𑀦𑁆𑀢𑀓𑀸𑀲𑀸𑀯𑀸𑀦𑀺, 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀦𑁆𑀢𑀯𑀡𑁆𑀡𑀸𑀦𑀻’’𑀢𑀺. 𑀤𑀦𑁆𑀢𑀯𑀡𑁆𑀡𑀸𑀦𑀺 𑀓𑀸𑀲𑀸𑀯𑀸𑀦𑀺 𑀥𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁧𑁬. 𑀙𑀺𑀦𑁆𑀦𑀓𑀘𑀻𑀯𑀭𑀸𑀦𑀼𑀚𑀸𑀦𑀦𑀓𑀣𑀸

𑁩𑁪𑁫. 𑀤𑀻𑀖𑀫𑀭𑀺𑀬𑀸𑀤𑀩𑀤𑁆𑀥𑀦𑁆𑀢𑀺 𑀤𑀻𑀖𑁂𑀦 𑀫𑀭𑀺𑀬𑀸𑀤𑁂𑀦 𑀩𑀤𑁆𑀥𑀁. 𑀘𑀢𑀼𑀓𑁆𑀓𑀲𑀡𑁆𑀞𑀸𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀲𑀫𑁄𑀥𑀸𑀦𑀲𑀡𑁆𑀞𑀸𑀦𑀁. 𑀉𑀲𑁆𑀲𑀳𑀲𑀺 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀉𑀧𑀼𑀩𑁆𑀩𑁄 𑀲𑀳𑀥𑀸𑀢𑀼 𑀲𑀫𑀢𑁆𑀣𑀢𑁆𑀣𑁄𑀢𑀺 𑀆𑀳 ‘‘𑀲𑀓𑁆𑀓𑁄𑀲𑀺 𑀢𑁆𑀯’’𑀦𑁆𑀢𑀺. 𑀧𑀧𑀼𑀩𑁆𑀩𑁄 𑀧𑀦 𑀅𑀪𑀺𑀪𑀯𑀦𑀢𑁆𑀣𑁄 𑀳𑁄𑀢𑀺 ‘‘𑀧𑀲𑀳𑀢𑀻’’𑀢𑀺𑀆𑀤𑀻𑀲𑀼. 𑀬𑁄 𑀦𑀸𑀫𑀸𑀢𑀺 𑀬𑁄 𑀆𑀦𑀦𑁆𑀤𑁄 𑀆𑀚𑀸𑀦𑀺𑀲𑁆𑀲𑀢𑀺 𑀦𑀸𑀫, 𑀲𑁄 𑀆𑀦𑀦𑁆𑀤𑁄 𑀧𑀡𑁆𑀟𑀺𑀢𑁄𑀢𑀺 𑀬𑁄𑀚𑀦𑀸. ‘‘𑀓𑀼𑀲𑀻’’𑀢𑀺 𑀏𑀢𑀁 𑀦𑀸𑀫𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀅𑀦𑀼𑀯𑀸𑀢𑀸𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀧𑀭𑀺𑀪𑀡𑁆𑀟𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀟𑁆𑀠𑀓𑀼𑀲𑀻’’𑀢𑀺 𑀏𑀢𑀦𑁆𑀢𑀺 𑀬𑁄𑀚𑀦𑀸.

𑀕𑀻𑀯𑁂𑀬𑁆𑀬𑀓𑀦𑁆𑀢𑀺 𑀏𑀢𑁆𑀣 𑀕𑀻𑀯𑀸𑀬𑀁 𑀲𑀼𑀢𑁆𑀢𑀲𑀁𑀲𑀺𑀩𑁆𑀩𑀺𑀢𑀁 𑀕𑀻𑀯𑁂𑀬𑁆𑀬𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀻𑀯𑀸𑀯𑁂𑀞𑀦𑀝𑁆𑀞𑀸𑀦𑁂’’𑀢𑀺𑀆𑀤𑀺. ‘‘𑀆𑀕𑀦𑁆𑀢𑀼𑀓𑀧𑀝𑁆𑀝’’𑀦𑁆𑀢𑀺 𑀇𑀫𑀺𑀦𑀸 𑀏𑀬𑁆𑀬𑀓𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄 𑀚𑀗𑁆𑀖𑁂𑀬𑁆𑀬𑀓𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀏𑀢𑀁 𑀦𑀸𑀫𑀦𑁆𑀢𑀺 ‘‘𑀕𑀻𑀯𑁂𑀬𑁆𑀬𑀓𑀁, 𑀚𑀗𑁆𑀖𑁂𑀬𑁆𑀬𑀓’’𑀦𑁆𑀢𑀺 𑀏𑀢𑀁 𑀦𑀸𑀫𑀁. 𑀇𑀢𑀻𑀢𑀺 𑀏𑀯𑀁. 𑀏𑀢𑀦𑁆𑀢𑀺 ‘‘𑀅𑀦𑀼𑀯𑀺𑀯𑀝𑁆𑀝’’𑀦𑁆𑀢𑀺𑀆𑀤𑀺 𑀏𑀢𑀁. ‘‘𑀅𑀦𑀼𑀯𑀺𑀯𑀝𑁆𑀝’’𑀦𑁆𑀢𑀺 𑀏𑀢𑀁 𑀦𑀸𑀫𑀦𑁆𑀢𑀺 𑀬𑁄𑀚𑀦𑀸. 𑀯𑀺𑀯𑀝𑁆𑀝𑀲𑁆𑀲𑀸𑀢𑀺 𑀫𑀚𑁆𑀛𑀺𑀫𑀔𑀡𑁆𑀟𑀓𑀲𑁆𑀲. 𑀩𑀸𑀳𑀦𑁆𑀢𑀦𑁆𑀢𑀺 𑀏𑀢𑁆𑀣 𑀩𑀸𑀳𑀸𑀬 𑀉𑀧𑀭𑀺 𑀞𑀧𑀺𑀢𑀸 𑀅𑀦𑁆𑀢𑀸 𑀩𑀸𑀳𑀦𑁆𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀸𑀳𑀸𑀬𑀸’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀉𑀪𑀺𑀦𑁆𑀦𑀫𑀦𑁆𑀢𑀸𑀦𑀁. 𑀏𑀢𑀦𑁆𑀢𑀺 ‘‘𑀩𑀸𑀳𑀦𑁆𑀢’’𑀦𑁆𑀢𑀺 𑀏𑀢𑀁.

𑁨𑁧𑁭. 𑀢𑀺𑀘𑀻𑀯𑀭𑀸𑀦𑀼𑀚𑀸𑀦𑀦𑀓𑀣𑀸

𑁩𑁪𑁬. ‘‘𑀉𑀓𑁆𑀔𑀺𑀢𑁆𑀢𑀪𑀡𑁆𑀟𑀺𑀓𑀪𑀸𑀯𑀁 𑀆𑀧𑀸𑀤𑀺𑀢𑁂’’𑀢𑀺 𑀇𑀫𑀺𑀦𑀸 𑀉𑀩𑁆𑀪𑀡𑁆𑀟𑀺𑀢𑁂𑀢𑀺 𑀏𑀢𑁆𑀣 𑀉𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 𑀉𑀩𑁆𑀪𑀡𑁆𑀟𑀁, 𑀉𑀩𑁆𑀪𑀡𑁆𑀟𑀪𑀸𑀯𑀁 𑀇𑀢𑀸 𑀆𑀧𑀸𑀤𑀺𑀢𑀸𑀢𑀺 𑀉𑀩𑁆𑀪𑀡𑁆𑀟𑀺𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂 𑀉𑀩𑁆𑀪𑀡𑁆𑀟𑀺𑀢𑁂 𑀪𑀺𑀓𑁆𑀔𑀽 𑀅𑀤𑁆𑀤𑀲𑀸𑀢𑀺 𑀬𑁄𑀚𑀦𑀸. 𑀪𑀺𑀲𑀺𑀲𑀗𑁆𑀔𑁂𑀧𑁂𑀦𑀸𑀢𑀺 𑀪𑀺𑀲𑀺𑀬𑀁 𑀧𑀓𑁆𑀔𑁂𑀧𑁂𑀦, 𑀧𑀯𑁂𑀲𑁂𑀦𑀸𑀢𑀺 𑀅𑀢𑁆𑀣𑁄, 𑀪𑀺𑀲𑀺𑀆𑀓𑀸𑀭𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀤𑀓𑁆𑀔𑀺𑀡𑀸𑀕𑀺𑀭𑀺𑀁. 𑀕𑀘𑁆𑀙𑀦𑁆𑀢𑀸 𑀢𑁂 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸. ‘‘𑀅𑀝𑁆𑀞𑀧𑀫𑀸𑀡𑀸𑀲𑀽’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀭𑀝𑁆𑀞𑀓𑀸𑀲𑀽𑀢𑀺 𑀏𑀢𑁆𑀣 𑀓𑀧𑀘𑁆𑀘𑀬𑁄 𑀧𑀫𑀸𑀡𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀧𑀫𑀸𑀡𑀲𑀤𑁆𑀤𑁄 𑀦 𑀤𑀺𑀲𑁆𑀲𑀢𑀺, 𑀕𑀴𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀭𑀢𑁆𑀢𑀻𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀦𑁆𑀢𑀦𑁆𑀢𑀺 𑀏𑀢𑁆𑀣 𑀲𑀫𑁆𑀧𑀤𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀪𑀕𑀯𑀢𑁄’’𑀢𑀺. 𑀲𑀻𑀢𑀸𑀮𑀼𑀓𑀸𑀢𑀺 𑀏𑀢𑁆𑀣 𑀲𑀻𑀢𑀁 𑀧𑀓𑀢𑀺 𑀏𑀢𑁂𑀲𑀦𑁆𑀢𑀺 𑀲𑀻𑀢𑀸𑀮𑀼𑀦𑁄, 𑀢𑁂𑀬𑁂𑀯 𑀲𑀻𑀢𑀸𑀮𑀼𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀻𑀢𑀧𑀓𑀢𑀺𑀓𑀸’’𑀢𑀺. 𑀬𑁂 𑀓𑀼𑀮𑀧𑀼𑀢𑁆𑀢𑀸 𑀧𑀓𑀢𑀺𑀬𑀸𑀯 𑀲𑀻𑀢𑁂𑀦 𑀓𑀺𑀮𑀫𑀦𑁆𑀢𑀺, 𑀢𑁂 𑀲𑀻𑀢𑀸𑀮𑀼𑀓𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀓𑀘𑁆𑀘𑀺𑀬𑀦𑁆𑀢𑀺 𑀏𑀢𑁆𑀣 𑀏𑀓𑀘𑁆𑀘𑀲𑀤𑁆𑀤𑁄 𑀏𑀓𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀏𑀓𑀁 𑀧𑀝𑁆𑀝’’𑀦𑁆𑀢𑀺. 𑀇𑀫𑀺𑀦𑀸 𑀏𑀓𑁄𑀬𑁂𑀯 𑀏𑀓𑀘𑁆𑀘𑁄𑀢𑀺 𑀓𑀢𑁆𑀯𑀸 𑀲𑀓𑀢𑁆𑀣𑁂 𑀅𑀘𑁆𑀘𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀝𑁆𑀝’’𑀦𑁆𑀢𑀺 𑀇𑀫𑀺𑀦𑀸 𑀏𑀓𑀘𑁆𑀘𑁂𑀦 𑀦𑀺𑀬𑀼𑀢𑁆𑀢𑀁 𑀏𑀓𑀘𑁆𑀘𑀺𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀓𑀢𑁆𑀯𑀸 𑀦𑀺𑀬𑀼𑀢𑁆𑀢𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀇𑀬𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀇𑀢𑀻𑀢𑀺 𑀏𑀯𑀁. 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂𑀢𑀺 𑀲𑀗𑁆𑀖𑀸𑀝𑀺𑀢𑁄 𑀇𑀢𑀭𑁂 𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑁂.

𑁨𑁧𑁮. 𑀅𑀢𑀺𑀭𑁂𑀓𑀘𑀻𑀯𑀭𑀸𑀤𑀺𑀓𑀣𑀸

𑁩𑁪𑁮. 𑀅𑀘𑁆𑀙𑀼𑀧𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀅𑀘𑁆𑀙𑀺 𑀯𑀼𑀘𑁆𑀘𑀢𑀺 𑀦𑁂𑀢𑁆𑀢𑀫𑀡𑁆𑀟𑀮𑀁, 𑀢𑀁 𑀯𑀺𑀬𑀸𑀢𑀺 𑀅𑀘𑁆𑀙𑀺 𑀙𑀺𑀤𑁆𑀤𑁄, 𑀢𑀲𑁆𑀫𑀺𑀁 𑀉𑀧𑀕𑀦𑁆𑀢𑀩𑁆𑀩𑀁 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀅𑀘𑁆𑀙𑀼𑀧𑁂𑀬𑁆𑀬𑀁. ‘‘𑀮𑀕𑁆𑀕𑀸𑀧𑁂𑀬𑁆𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀧𑀁𑀲𑀼𑀓𑀽𑀮𑁂. 𑀲𑀩𑁆𑀩𑀫𑀺𑀤𑀦𑁆𑀢𑀺 ‘‘𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺𑀆𑀤𑀺𑀓𑀁 𑀲𑀩𑁆𑀩𑀁 𑀇𑀤𑀁 𑀯𑀘𑀦𑀁. 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀲𑀁𑀲𑀺𑀩𑁆𑀩𑀺𑀢𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀺𑀩𑁆𑀩𑀺𑀢𑀁.

𑁩𑁫𑁧. 𑀲𑁄𑀯𑀕𑁆𑀕𑀺𑀓𑀦𑁆𑀢𑀺 𑀏𑀢𑁆𑀣 𑀲𑀼𑀦𑁆𑀤𑀭𑀸𑀦𑀺 𑀅𑀕𑁆𑀕𑀸𑀦𑀺 𑀭𑀽𑀧𑀸𑀤𑀻𑀦𑀺 𑀏𑀢𑁆𑀣𑀸𑀢𑀺 𑀲𑀕𑁆𑀕𑁄, 𑀧𑀼𑀩𑁆𑀩𑀧𑀤𑁂 𑀉𑀓𑀸𑀭𑀲𑁆𑀲 𑀮𑁄𑀧𑁄, 𑀉𑀓𑀸𑀭𑀲𑁆𑀲 𑀉𑀯𑀸𑀤𑁂𑀲𑁂 ‘‘𑀲𑀼𑀯𑀕𑁆𑀕𑁄’’𑀢𑀺 𑀲𑀺𑀚𑁆𑀛𑀢𑀺. 𑀲𑀼𑀯𑀕𑁆𑀕𑀧𑁆𑀧𑀢𑁆𑀢𑀳𑁂𑀢𑀼𑀓𑀁 𑀲𑁄𑀯𑀕𑁆𑀕𑀺𑀓𑀁, 𑀤𑀸𑀦𑀁, 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀕𑁆𑀕𑀧𑁆𑀧𑀢𑁆𑀢𑀳𑁂𑀢𑀼𑀓’’𑀦𑁆𑀢𑀺. ‘‘𑀅𑀧𑀦𑁂𑀢𑀻’’𑀢𑀺 𑀇𑀫𑀺𑀦𑀸 𑀦𑀼𑀤𑀥𑀸𑀢𑀼𑀬𑀸 𑀅𑀧𑀦𑀬𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀦𑀸𑀫𑀬𑀸𑀢𑀺 𑀏𑀢𑁆𑀣 𑀆𑀫𑀬𑀲𑀤𑁆𑀤𑁄 𑀭𑁄𑀕𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀭𑁄𑀕𑀸’’𑀢𑀺. 𑀦𑀢𑁆𑀣𑀺 𑀆𑀫𑀬𑁄 𑀏𑀢𑀺𑀲𑁆𑀲𑀸𑀢𑀺 𑀅𑀦𑀸𑀫𑀬𑀸.

𑁩𑁫𑁩. 𑀛𑀸𑀦𑀮𑀸𑀪𑀺𑀦𑁄𑀢𑀺 𑀛𑀸𑀦𑀮𑀸𑀪𑀻𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀢𑁆𑀢𑀸 𑀯𑀼𑀢𑁆𑀢𑀁.

𑁩𑁫𑁬. 𑀲𑀫𑁄𑀥𑀸𑀦𑀯𑀲𑁂𑀦 𑀤𑀲𑁆𑀲𑀺𑀬𑀺𑀢𑁆𑀣𑀸𑀢𑀺 𑀲𑀦𑁆𑀤𑀺𑀝𑁆𑀞𑁄. 𑀲𑀫𑁄𑀥𑀸𑀦𑀯𑀲𑁂𑀦 𑀪𑀚𑀺𑀬𑀺𑀢𑁆𑀣𑀸𑀢𑀺 𑀲𑀫𑁆𑀪𑀢𑁆𑀢𑁄. 𑀅𑀪𑀺𑀫𑀼𑀔𑀁 𑀮𑀧𑀺𑀢𑁆𑀣𑀸𑀢𑀺 𑀆𑀮𑀧𑀺𑀢𑁄. 𑀇𑀫𑁂𑀳𑀻𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺.

𑁨𑁨𑁧. 𑀧𑀘𑁆𑀙𑀺𑀫𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀸𑀤𑀺𑀓𑀣𑀸

𑁩𑁫𑁯. 𑀓𑀢𑀧𑀁𑀲𑀼𑀓𑀽𑀮𑁄𑀢𑀺 𑀓𑀢𑁄 𑀧𑀁𑀲𑀼𑀓𑀽𑀮𑁄. 𑀇𑀫𑀺𑀦𑀸 ‘‘𑀧𑀁𑀲𑀼𑀓𑀽𑀮𑀢𑁄’’𑀢𑀺 𑀧𑀤𑀲𑁆𑀲 𑀯𑀺𑀲𑁂𑀲𑀦𑀧𑀭𑀧𑀤𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀅𑀕𑁆𑀕𑀴𑀸𑀭𑁄𑀧𑀦𑁂𑀦𑀸𑀢𑀺 𑀅𑀕𑁆𑀕𑀴𑀲𑁆𑀲 𑀆𑀭𑁄𑀧𑀦𑁂𑀦. ‘‘𑀲𑀼𑀢𑁆𑀢𑁂𑀦𑁂𑀯𑀸’’𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑁂𑀦 𑀧𑀺𑀮𑁄𑀢𑀺𑀓𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀜𑁆𑀙𑀺𑀢𑁆𑀯𑀸 𑀅𑀜𑁆𑀙𑀺𑀢𑁆𑀯𑀸𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸. 𑀅𑀪𑀺𑀥𑀸𑀢𑀼 𑀳𑀺 𑀆𑀓𑀟𑁆𑀠𑀦𑀢𑁆𑀣𑁄. ‘‘𑀲𑀗𑁆𑀖𑀸𑀝𑀺𑀓𑁄𑀡𑁄 𑀤𑀻𑀖𑁄’’𑀢𑀺 𑀇𑀫𑀺𑀦𑀸 𑀯𑀺𑀓𑀡𑁆𑀡𑁄𑀢𑀺 𑀏𑀢𑁆𑀣 𑀯𑀺𑀲𑀫𑁄 𑀓𑀡𑁆𑀡𑁄 𑀯𑀺𑀓𑀡𑁆𑀡𑁄𑀢𑀺 𑀓𑀢𑁆𑀯𑀸 𑀓𑀡𑁆𑀡𑀲𑀤𑁆𑀤𑀲𑁆𑀲 𑀓𑁄𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁄𑀢𑀺 𑀕𑀴𑀦𑀢𑁄. 𑀮𑀼𑀚𑁆𑀚𑀦𑁆𑀢𑀻𑀢𑀺 𑀯𑀮𑀺𑀁 𑀕𑀡𑁆𑀳𑀦𑁆𑀢𑀺. 𑀅𑀝𑁆𑀞𑀧𑀤𑀓𑀦𑁆𑀢𑀺 𑀧𑀤𑀲𑁆𑀲 𑀅𑀝𑁆𑀞𑀧𑀤𑁂𑀦 𑀲𑀺𑀩𑁆𑀩𑀺𑀢𑀁 𑀅𑀝𑁆𑀞𑀧𑀤𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀧𑀤𑀓𑀘𑁆𑀙𑀺𑀦𑁆𑀦𑁂𑀦 𑀧𑀢𑁆𑀢𑀫𑀼𑀔𑀁 𑀲𑀺𑀩𑁆𑀩𑀺𑀢𑀼’’𑀦𑁆𑀢𑀺. 𑀢𑀢𑁆𑀣 𑀅𑀝𑁆𑀞𑀧𑀤𑀓𑀘𑁆𑀙𑀺𑀦𑁆𑀦𑁂𑀦 𑀧𑀢𑁆𑀢𑀫𑀼𑀔𑀁 𑀲𑀺𑀩𑁆𑀩𑀺𑀢𑀼𑀦𑁆𑀢𑀺 𑀅𑀝𑁆𑀞𑀧𑀤𑀮𑀺𑀔𑀦𑁂𑀦 𑀢𑀢𑁆𑀣 𑀢𑀢𑁆𑀣 𑀕𑀩𑁆𑀪𑀁 𑀤𑀲𑁆𑀲𑁂𑀢𑁆𑀯𑀸 𑀧𑀢𑁆𑀢𑀫𑀼𑀔𑀁 𑀲𑀺𑀩𑁆𑀩𑀺𑀢𑀼𑀁. ‘‘𑀅𑀝𑁆𑀞𑀧𑀤𑀓𑀘𑁆𑀙𑀦𑁆𑀦𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀅𑀝𑁆𑀞𑀨𑀮𑀓𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄.

𑁩𑁬𑁦. ‘‘𑀆𑀕𑀦𑁆𑀢𑀼𑀓𑀧𑀢𑁆𑀢𑀫𑁆𑀧𑀺 𑀤𑀸𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀅𑀦𑁆𑀯𑀸𑀤𑀺𑀓𑀦𑁆𑀢𑀺 𑀧𑀤𑀲𑁆𑀲 𑀅𑀦𑀼𑀧𑀘𑁆𑀙𑀸 𑀆𑀕𑀦𑁆𑀢𑀼𑀓𑀪𑀸𑀯𑁂𑀦 𑀤𑀻𑀬𑀢𑀻𑀢𑀺 𑀅𑀦𑁆𑀯𑀸𑀤𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑀢𑀼𑀢𑁆𑀣𑀓𑁆𑀔𑀭𑁂𑀦𑀧𑀺 𑀧𑀸𑀞𑁄, 𑀅𑀦𑀼𑀧𑀘𑁆𑀙𑀸 𑀆𑀕𑀦𑁆𑀢𑀼𑀓𑀪𑀸𑀯𑁂𑀦 𑀥𑀻𑀬𑀢𑀺 𑀞𑀧𑀻𑀬𑀢𑀻𑀢𑀺 𑀅𑀦𑁆𑀯𑀸𑀥𑀺𑀓𑀦𑁆𑀢𑀺 𑀓𑀸𑀢𑀩𑁆𑀩𑁄. 𑀇𑀤𑀁 𑀧𑀦𑀸𑀢𑀺 𑀅𑀦𑁆𑀯𑀸𑀥𑀺𑀓𑀁 𑀧𑀦.

𑁩𑁬𑁧. 𑀲𑁂𑀲𑀜𑀸𑀢𑀻𑀦𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀲𑁂𑀲𑀜𑀸𑀢𑀻𑀦𑀁. 𑀯𑀺𑀦𑀺𑀧𑀸𑀢𑁂𑀢𑀺𑀬𑁂𑀯𑀸𑀢𑀺 𑀯𑀺𑀦𑀲𑁆𑀲𑀦𑁆𑀢𑁄 𑀦𑀺𑀧𑀸𑀢𑁂𑀢𑀺𑀬𑁂𑀯.

𑁩𑁬𑁨. ‘‘𑀯𑀲𑁆𑀲𑀺𑀓𑁄’’𑀢𑀺 𑀲𑀗𑁆𑀓𑁂𑀢𑀻𑀬𑀢𑀺 𑀕𑀡𑁆𑀳𑀻𑀬𑀢𑀻𑀢𑀺 𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀦𑁆𑀢𑀺 𑀯𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀫𑀸𑀲𑀸𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀫𑀸𑀲𑁂’’𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀆𑀭𑀜𑁆𑀜𑀓𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀆𑀭𑀜𑁆𑀜𑀓𑁂𑀦 𑀪𑀺𑀓𑁆𑀔𑀼𑀦𑀸.

𑁨𑁨𑁨. 𑀲𑀗𑁆𑀖𑀺𑀓𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸

𑁩𑁬𑁩. 𑀅𑀜𑁆𑀜𑀢𑁆𑀣𑀸𑀢𑀺 𑀤𑀺𑀦𑁆𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣. 𑀳𑀝𑀸𑀦𑀺𑀧𑀺 𑀘𑀻𑀯𑀭𑀸𑀦𑀺 𑀢𑀼𑀬𑁆𑀳𑁂𑀯 𑀲𑀦𑁆𑀢𑀓𑀸𑀦𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀘𑀻𑀯𑀭𑀸𑀦𑀁. 𑀅𑀜𑁆𑀜𑁄𑀢𑀺 𑀏𑀓𑀓𑀯𑀲𑁆𑀲𑀸𑀯𑀸𑀲𑀺𑀓𑀢𑁄 𑀅𑀜𑁆𑀜𑁄. 𑀧𑀜𑁆𑀘𑀫𑀸𑀲𑁂 𑀢𑀁 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀘𑀻𑀯𑀭𑀁, 𑀢𑀁 𑀲𑀩𑁆𑀩𑀁 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀫𑁆𑀧𑀻𑀢𑀺 𑀘𑀻𑀯𑀭𑀫𑁆𑀧𑀺. 𑀲𑁄𑀢𑀺 𑀪𑀺𑀓𑁆𑀔𑀼, 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬𑀸𑀢𑀺 𑀯𑀲𑁆𑀲𑀁 𑀆𑀯𑀸𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀣𑀸𑀬. 𑀞𑀧𑀺𑀢𑀉𑀧𑀦𑀺𑀓𑁆𑀔𑁂𑀧𑀢𑁄𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁂𑀳𑀺 𑀯𑀟𑁆𑀠𑀺𑀁 𑀧𑀬𑁄𑀚𑁂𑀢𑁆𑀯𑀸 𑀞𑀧𑀺𑀢𑀉𑀧𑀦𑀺𑀓𑁆𑀔𑁂𑀧𑀢𑁄. 𑀢𑀢𑁆𑀭𑀼𑀧𑁆𑀧𑀸𑀤𑀢𑁄𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀸𑀤𑀢𑁄 𑀦𑀸𑀴𑀺𑀓𑁂𑀭𑀆𑀭𑀸𑀫𑀸𑀤𑀺𑀢𑁄. 𑀇𑀤𑀦𑁆𑀢𑀺 𑀯𑀓𑁆𑀔𑀫𑀸𑀦𑀁. 𑀏𑀢𑁆𑀣𑀸𑀢𑀺 ‘‘𑀢𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬𑀸’’𑀢𑀺 𑀯𑀘𑀦𑁂. 𑀬𑀦𑁆𑀢𑀺 𑀘𑀻𑀯𑀭𑀁. 𑀧𑀦 𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄. 𑀇𑀤𑀦𑁆𑀢𑀺 𑀧𑀤𑀸𑀮𑀗𑁆𑀓𑀸𑀭𑀫𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀅𑀪𑀺𑀮𑀸𑀧𑀫𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀅𑀢𑁆𑀣𑀢𑀓𑀣𑀺𑀦𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀫𑀸𑀲𑁂𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀢𑀢𑁄𑀢𑀺 𑀧𑀜𑁆𑀘𑀫𑀸𑀲𑀢𑁄. 𑀅𑀢𑀻𑀢𑀯𑀲𑁆𑀲𑁂 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲 𑀇𑀤𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀢𑀺 𑀓𑀺𑀁? 𑀉𑀤𑀸𑀳𑀼 𑀅𑀦𑀸𑀕𑀢𑀯𑀲𑁆𑀲𑁂𑀢𑀺 𑀬𑁄𑀚𑀦𑀸. 𑀧𑀺𑀝𑁆𑀞𑀺𑀲𑀫𑀬𑁂𑀢𑀺 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀻, 𑀢𑀸𑀯 𑀧𑀺𑀝𑁆𑀞𑀺𑀲𑀫𑀬𑁂.

𑀯𑀲𑁆𑀲𑀸𑀦𑀢𑁄𑀢𑀺 𑀯𑀲𑁆𑀲𑀸𑀦𑀫𑀸𑀲𑀢𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀘𑀻𑀯𑀭𑁂𑀲𑀼. 𑀓𑁂𑀘𑀺 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑀢𑁆𑀣𑀦𑁆𑀢𑀺 𑀢𑀲𑁆𑀲 𑀲𑀗𑁆𑀖𑀺𑀓𑀘𑀻𑀯𑀭𑀲𑁆𑀲 𑀓𑀸𑀭𑀡𑀁. 𑀢𑀢𑁆𑀣𑁂𑀯𑀸𑀢𑀺 𑀕𑀢𑀝𑁆𑀞𑀸𑀦𑁂 𑀏𑀯. 𑀏𑀲𑀸𑀢𑀺 𑀲𑀗𑁆𑀖𑀺𑀓𑀘𑀻𑀯𑀭𑀳𑀸𑀭𑀓𑁄 𑀪𑀺𑀓𑁆𑀔𑀼. 𑀢𑀢𑁆𑀭𑀸𑀢𑀺 𑀯𑀺𑀳𑀸𑀭𑀸𑀤𑀻𑀲𑀼. 𑀦𑀦𑁆𑀢𑀺 𑀘𑀻𑀯𑀭𑀳𑀸𑀭𑀓𑀁 𑀪𑀺𑀓𑁆𑀔𑀼𑀁.

𑀯𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀦 𑀳𑀻’’𑀢𑀺𑀆𑀤𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀪𑀸𑀚𑁂𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑁂𑀯𑀸𑀢𑀺 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲𑁂𑀯.

𑀏𑀓𑁂𑀓𑀁 𑀪𑀸𑀕𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀞𑀸𑀦𑁂 𑀅𑀳𑀫𑁂𑀯 𑀅𑀲𑁆𑀫𑀻𑀢𑀺 𑀬𑁄𑀚𑀦𑀸. 𑀤𑀼𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀗𑁆𑀖𑀺𑀓𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀬𑁆𑀳𑀫𑁂𑀯𑀺𑀫𑀸𑀦𑀺 𑀘𑀻𑀯𑀭𑀸𑀦𑀻𑀢𑀺 𑀇𑀲𑁆𑀲𑀭𑀯𑀲𑁂𑀦 𑀕𑀳𑀡𑁂 𑀤𑀼𑀕𑁆𑀕𑀳𑀺𑀢𑀸𑀦𑀺. 𑀫𑀬𑁆𑀳𑁂𑀢𑀸𑀦𑀺 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀦𑀺𑀲𑁆𑀲𑀭𑀯𑀲𑁂𑀦 𑀕𑀳𑀡𑁂 𑀲𑀼𑀕𑁆𑀕𑀳𑀺𑀢𑀸𑀦𑀻𑀢𑀺 𑀯𑀺𑀲𑁂𑀲𑁄.

𑀧𑀸𑀢𑀺𑀢𑁂 𑀓𑀼𑀲𑁂𑀢𑀺 𑀏𑀢𑁆𑀣 𑀢𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀓𑁄𑀝𑁆𑀞𑀸𑀲𑁂’’𑀢𑀺𑀆𑀤𑀺. 𑀕𑀳𑀺𑀢𑀫𑁂𑀯𑀸𑀢𑀺 𑀏𑀓𑀓𑁄𑀝𑁆𑀞𑀸𑀲𑁂 𑀧𑀸𑀢𑀺𑀢𑀲𑁆𑀲 𑀓𑀼𑀲𑀤𑀡𑁆𑀟𑀲𑁆𑀲 𑀯𑀲𑁂𑀦 ‘‘𑀇𑀫𑀲𑁆𑀲𑀺𑀤’’𑀦𑁆𑀢𑀺 𑀏𑀓𑀓𑁄𑀝𑁆𑀞𑀸𑀲𑁂 𑀯𑀺𑀤𑀺𑀢𑁂 𑀲𑀩𑁆𑀩𑁂𑀲𑀁 𑀯𑀺𑀤𑀺𑀢𑀢𑁆𑀢𑀸 𑀕𑀳𑀺𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑁄𑀯𑀸𑀢𑀺 𑀲𑀘𑀻𑀯𑀭𑀪𑀢𑁆𑀢𑀢𑁄𑀯. 𑀯𑀺𑀲𑀼𑀁 𑀲𑀚𑁆𑀚𑀺𑀬𑀫𑀸𑀦𑁂𑀢𑀺 𑀘𑀻𑀯𑀭𑁂 𑀘 𑀪𑀢𑁆𑀢𑁂 𑀘 𑀯𑀺𑀲𑀼𑀁 𑀲𑀚𑁆𑀚𑀺𑀬𑀫𑀸𑀦𑁂.

𑀬𑀣𑀸 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀯𑀢𑁆𑀣𑀽𑀲𑀼 ‘‘𑀅𑀤𑀁𑀲𑀽’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀇𑀥 ‘‘𑀤𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀡𑀺𑀓𑀁 𑀲𑀡𑀺𑀓𑀁 𑀤𑁂𑀦𑁆𑀢𑀺𑀬𑁂𑀯𑀸’’𑀢𑀺. 𑀲𑀡𑀺𑀓𑀁 𑀲𑀡𑀺𑀓𑀁 𑀤𑁂𑀦𑁆𑀢𑁂 𑀤𑀸𑀦𑀓𑀺𑀭𑀺𑀬𑀸𑀬 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑁆𑀢𑀸 ‘‘𑀤𑁂𑀦𑁆𑀢𑀻’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀙𑀺𑀦𑁆𑀦𑀤𑀸𑀦𑀢𑁆𑀢𑀸𑀢𑀺 𑀧𑀘𑁆𑀙𑀺𑀦𑁆𑀦𑀤𑀸𑀦𑀓𑀺𑀭𑀺𑀬𑀪𑀸𑀯𑀢𑁄. 𑀇𑀤𑀁 𑀧𑀦 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑁂 𑀘 𑀣𑁂𑀭𑀸𑀢𑀺 𑀦𑀺𑀮𑀯𑀸𑀲𑀺𑀆𑀤𑀬𑁄 𑀯𑀺𑀦𑀬𑀥𑀭𑀧𑀸𑀫𑁄𑀓𑁆𑀔𑀸 𑀇𑀫𑁂 𑀘 𑀣𑁂𑀭𑀸.

𑁨𑁨𑁩. 𑀉𑀧𑀦𑀦𑁆𑀤𑀲𑀓𑁆𑀬𑀧𑀼𑀢𑁆𑀢𑀯𑀢𑁆𑀣𑀼𑀓𑀣𑀸

𑁩𑁬𑁪. 𑀏𑀢𑁆𑀣𑀸𑀢𑀺 𑀉𑀧𑀦𑀦𑁆𑀤𑀯𑀢𑁆𑀣𑀼𑀫𑁆𑀳𑀺. 𑀢𑀲𑁆𑀲𑀸𑀢𑀺 𑀉𑀧𑀦𑀦𑁆𑀤𑀲𑁆𑀲. 𑀕𑀸𑀫𑀓𑀸𑀯𑀸𑀲𑀺𑀦𑁄𑀢𑀺 𑀕𑀸𑀫𑀓𑁂 𑀆𑀯𑀸𑀲𑀺𑀦𑁄. 𑀅𑀬𑀦𑁆𑀢𑀺 𑀉𑀧𑀦𑀦𑁆𑀤𑁄. 𑀫𑀼𑀔𑀭𑁄𑀢𑀺 𑀫𑀼𑀔𑀁 𑀔𑀭𑀁 𑀏𑀢𑀲𑁆𑀲𑀸𑀢𑀺 𑀫𑀼𑀔𑀭𑁄 𑀔𑀓𑀸𑀭𑀮𑁄𑀧𑁄, 𑀅𑀣 𑀯𑀸 𑀫𑀼𑀔𑀁 𑀏𑀢𑀲𑁆𑀲𑀢𑁆𑀣𑀻𑀢𑀺 𑀫𑀼𑀔𑀭𑁄 𑀫𑀦𑁆𑀢𑀼𑀢𑁆𑀣𑁂 𑀧𑀯𑀢𑁆𑀢𑁄 𑀭𑀧𑀘𑁆𑀘𑀬𑁄 𑀦𑀺𑀦𑁆𑀤𑀢𑁆𑀣𑀯𑀸𑀘𑀓𑁄. 𑀮𑀳𑀼𑀓𑀸𑀧𑀢𑁆𑀢𑀻𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺. 𑀢𑀲𑁆𑀲𑁂𑀯𑀸𑀢𑀺 𑀕𑀳𑀺𑀢𑀪𑀺𑀓𑁆𑀔𑀼𑀲𑁆𑀲𑁂𑀯. 𑀥𑀼𑀭𑀦𑀺𑀓𑁆𑀔𑁂𑀧𑁂 𑀲𑀢𑀻𑀢𑀺 𑀬𑁄𑀚𑀦𑀸.

𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀢𑁆𑀣𑀸𑀬 𑀅𑀥𑀺𑀧𑁆𑀧𑀺𑀬𑀢𑁂 𑀇𑀘𑁆𑀙𑀺𑀬𑀢𑁂𑀢𑀺 𑀏𑀓𑀸𑀥𑀺𑀧𑁆𑀧𑀸𑀬𑁄, 𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄, 𑀢𑁂𑀦𑀸𑀳 ‘‘𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑀫𑁂𑀯𑀸’’𑀢𑀺. 𑀬𑀣𑀸 𑀬𑀣𑀸𑀢𑀺 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦. 𑀬𑁄𑀢𑀺 𑀧𑀝𑀺𑀯𑀻𑀲𑁄. ‘‘𑀢𑀣𑀸 𑀢𑀣𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀯𑀘𑀦𑁂. 𑀏𑀓𑁂𑀓𑀲𑁆𑀫𑀺𑀁 𑀆𑀯𑀸𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸𑀲𑀤𑁆𑀤𑁄 𑀅𑀜𑁆𑀜𑁂𑀧𑀺 𑀤𑁆𑀯𑀻𑀳𑀤𑁆𑀯𑀻𑀳𑀸𑀤𑀺𑀯𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀦𑁆𑀢𑀺 𑀧𑀝𑀺𑀯𑀻𑀲𑀁. 𑀏𑀓𑁄 𑀧𑀼𑀕𑁆𑀕𑀮𑁄𑀢𑀺 𑀏𑀓𑁄 𑀦𑀺𑀘𑁆𑀘𑀸𑀯𑀸𑀲𑁄 𑀧𑀼𑀕𑁆𑀕𑀮𑁄. 𑀏𑀯𑀦𑁆𑀢𑀺 𑀉𑀧𑀟𑁆𑀠𑁂 𑀤𑀺𑀬𑁆𑀬𑀫𑀸𑀦𑁂. 𑀬𑀢𑁆𑀣 𑀯𑀸 𑀧𑀦𑀸𑀢𑀺 𑀏𑀢𑁆𑀣 𑀬𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀧𑀼𑀭𑀺𑀫𑀲𑁆𑀫𑀺’’𑀦𑁆𑀢𑀺. 𑀧𑀼𑀭𑀺𑀫𑀲𑁆𑀫𑀺𑀁 𑀆𑀯𑀸𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀳𑀼𑀢𑀭𑀁 𑀯𑀲𑀺𑀢𑀯𑀺𑀳𑀸𑀭𑀢𑁄’’𑀢𑀺. 𑀇𑀤𑀜𑁆𑀘𑀸𑀢𑀺 ‘‘𑀅𑀫𑀼𑀢𑁆𑀭 𑀉𑀧𑀟𑁆𑀠𑁄 𑀘𑀻𑀯𑀭𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄’’𑀢𑀺 𑀯𑀘𑀦𑀜𑁆𑀘. 𑀏𑀓𑀲𑀻𑀫𑀯𑀺𑀳𑀸𑀭𑁂𑀳𑀻𑀢𑀺 𑀏𑀓𑀺𑀲𑁆𑀲𑀁 𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀳𑀺 𑀯𑀺𑀳𑀸𑀭𑁂𑀳𑀺. 𑀦𑀸𑀦𑀸𑀲𑀻𑀫𑀯𑀺𑀳𑀸𑀭𑁂𑀢𑀺 𑀦𑀸𑀦𑀸𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂 𑀯𑀺𑀳𑀸𑀭𑁂. 𑀲𑁂𑀦𑀸𑀲𑀦𑀕𑁆𑀕𑀸𑀳𑁄𑀢𑀺 𑀧𑀼𑀭𑀺𑀫𑀉𑀧𑀘𑀸𑀭𑀲𑀻𑀫𑀸𑀬𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑁄. 𑀢𑀢𑁆𑀣𑀸𑀢𑀺 𑀧𑀲𑁆𑀲𑀫𑁆𑀪𑀦𑀯𑀺𑀳𑀸𑀭𑁂. 𑀲𑁂𑀲𑀦𑁆𑀢𑀺 𑀘𑀻𑀯𑀭𑀢𑁄 𑀲𑁂𑀲𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀺𑀳𑀸𑀭𑁂𑀲𑀼. 𑀅𑀦𑁆𑀢𑁄𑀲𑀻𑀫𑀕𑀢𑀲𑁆𑀲𑀸𑀢𑀺 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀕𑀢𑀲𑁆𑀲, 𑀪𑀺𑀓𑁆𑀔𑀼𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀻𑀯𑀭𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺, 𑀲𑁂𑀲𑀁 𑀧𑀦 𑀆𑀫𑀺𑀲𑀪𑁂𑀲𑀚𑁆𑀚𑀸𑀤𑀺𑀲𑀩𑁆𑀩𑀁 𑀅𑀜𑁆𑀜𑀯𑀺𑀳𑀸𑀭𑀢𑁄 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀲𑀻𑀫𑀕𑀢𑀲𑁆𑀲 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁨𑁪. 𑀕𑀺𑀮𑀸𑀦𑀯𑀢𑁆𑀣𑀼𑀓𑀣𑀸

𑁩𑁬𑁫. 𑀫𑀜𑁆𑀘𑀓𑁂 𑀦𑀺𑀧𑀸𑀢𑁂𑀲𑀼𑀦𑁆𑀢𑀺 𑀏𑀢𑁆𑀣 𑀫𑀜𑁆𑀘𑀓𑁂 𑀦𑀺𑀧𑀸𑀢𑀦𑀁 𑀦𑀸𑀫 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀸𑀧𑀦𑀦𑁆𑀢𑀺 𑀆𑀳 ‘‘𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀸𑀧𑁂𑀲𑀼’’𑀦𑁆𑀢𑀺. 𑀫𑀼𑀢𑁆𑀢𑀓𑀭𑀻𑀲𑀓𑀺𑀮𑀺𑀝𑁆𑀞𑀦𑁆𑀢𑀺 𑀫𑀼𑀢𑁆𑀢𑀓𑀭𑀻𑀲𑁂𑀳𑀺 𑀓𑀺𑀮𑀺𑀝𑁆𑀞𑀁. 𑀬𑁄𑀢𑀺 𑀬𑁄 𑀓𑁄𑀘𑀺. 𑀫𑀦𑁆𑀢𑀺 𑀫𑀫. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀓𑀭𑀡𑁂𑀦𑀸’’𑀢𑀺. 𑀫𑀫 𑀑𑀯𑀸𑀤𑀲𑁆𑀲 𑀘 𑀅𑀦𑀼𑀲𑀸𑀲𑀦𑀺𑀬𑀸 𑀘 𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 ‘‘𑀬𑁄 𑀪𑀺𑀓𑁆𑀔𑀯𑁂 𑀫𑀁 𑀉𑀧𑀝𑁆𑀞𑀳𑁂𑀬𑁆𑀬𑀸’’𑀢𑀺𑀆𑀤𑀺𑀧𑀸𑀞𑁂. 𑀲𑀼𑀢𑁆𑀢𑀲𑁆𑀲 𑀦𑁂𑀬𑁆𑀬𑀢𑁆𑀣𑀢𑁆𑀢𑀸 𑀅𑀕𑀳𑁂𑀢𑀩𑁆𑀩𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄 𑀘𑀸’’𑀢𑀺𑀆𑀤𑀺. 𑀬𑀲𑁆𑀲𑀸𑀢𑀺 𑀕𑀺𑀮𑀸𑀦𑀲𑁆𑀲. 𑀉𑀧𑀚𑁆𑀛𑀸𑀬𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀆𑀘𑀭𑀺𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀲𑀫𑀸𑀦𑀸𑀘𑀭𑀺𑀬𑀓𑀲𑀗𑁆𑀔𑀸𑀢𑁂 𑀧𑀜𑁆𑀘 𑀚𑀦𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀓𑀘𑀸𑀭𑀺𑀓𑁄 𑀯𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀢𑁆𑀣𑁂𑀭𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀅𑀜𑁆𑀜𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁩𑁬𑁬. 𑀅𑀪𑀺𑀓𑁆𑀓𑀫𑀦𑁆𑀢𑀁 𑀯𑀸𑀢𑀺 𑀏𑀢𑁆𑀣 𑀅𑀪𑀺𑀫𑀼𑀔𑀁 𑀓𑀫𑀢𑀻𑀢𑀺 𑀅𑀪𑀺𑀓𑁆𑀓𑀫𑀦𑁆𑀢𑁄𑀢𑀺 𑀯𑀼𑀢𑁆𑀢𑁂 𑀯𑀟𑁆𑀠𑀦𑀢𑁆𑀣𑁄𑀢𑀺 𑀆𑀳 ‘‘𑀯𑀟𑁆𑀠𑀦𑁆𑀢𑀁 𑀯𑀸’’𑀢𑀺. 𑀆𑀩𑀸𑀥𑀁 𑀦𑀸𑀯𑀺𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀅𑀦𑁆𑀢𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀦𑀸𑀫 𑀪𑁄𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀁𑀯𑀺𑀥𑀸𑀢𑀼𑀦𑁆𑀢𑀺 𑀏𑀢𑁆𑀣 𑀲𑀁𑀯𑀺𑀧𑀼𑀩𑁆𑀩𑁄 𑀥𑀸𑀥𑀸𑀢𑀼 𑀓𑀭𑀥𑀸𑀢𑁆𑀯𑀢𑁆𑀣𑁄, 𑀓𑀭𑀥𑀸𑀢𑀼 𑀘 𑀲𑀩𑁆𑀩𑀥𑀸𑀢𑁆𑀯𑀢𑁆𑀣𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑁂𑀲𑀚𑁆𑀚𑀁 𑀬𑁄𑀚𑁂𑀢𑀼’’𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲. 𑀅𑀦𑁆𑀢𑀭𑀲𑀤𑁆𑀤𑀲𑁆𑀲 𑀫𑀚𑁆𑀛𑀢𑁆𑀣𑀸𑀤𑀬𑁄 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀓𑀸𑀭𑀡𑀁 𑀯𑀼𑀘𑁆𑀘𑀢𑀻’’𑀢𑀺.

𑁨𑁨𑁫. 𑀫𑀢𑀲𑀦𑁆𑀢𑀓𑀓𑀣𑀸

𑁩𑁬𑁭. 𑀓𑀸𑀮𑀗𑁆𑀓𑀢𑁂𑀢𑀺 𑀏𑀢𑁆𑀣 𑀓𑀭𑀡𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀮𑀓𑀺𑀭𑀺𑀬𑀸𑀬𑀸’’𑀢𑀺. 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁 𑀲𑀗𑁆𑀖𑀁 𑀅𑀧𑀮𑁄𑀓𑁂𑀫𑀻’’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸.

𑁩𑁬𑁯. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀮𑀸𑀪𑁂𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀮𑀪𑀺𑀢𑀩𑁆𑀩𑁂.

𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑀗𑁆𑀓𑀢𑁂. 𑀓𑀺𑀁 𑀯𑀤𑀦𑁆𑀢𑀺? ‘‘𑀲𑀩𑁆𑀩𑁂𑀧𑀺…𑀧𑁂… 𑀲𑀸𑀫𑀺𑀦𑁄’’𑀢𑀺 𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀤𑁆𑀯𑀻𑀲𑀼 𑀯𑀸𑀤𑁂𑀲𑀼 𑀧𑀘𑁆𑀙𑀺𑀫𑀯𑀸𑀤𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀭𑀼𑀘𑁆𑀘𑀢𑀻𑀢𑀺 𑀯𑀤𑀦𑁆𑀢𑀺. 𑀬𑀦𑁆𑀢𑀺 𑀬𑀁 𑀯𑀢𑁆𑀣𑀼. ‘‘𑀬𑀁 𑀅𑀢𑁆𑀣𑀺, 𑀢𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀲𑁆𑀫𑀺𑀁…𑀧𑁂… 𑀤𑀸𑀢𑀩𑁆𑀩’’𑀦𑁆𑀢𑀺. 𑀢𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀁.

𑀲𑀫𑀓𑁄𑀢𑀺 𑀲𑀫𑀁 𑀧𑀫𑀸𑀡𑀫𑁂𑀢𑀲𑁆𑀲 𑀪𑀸𑀕𑀲𑁆𑀲𑀸𑀢𑀺 𑀲𑀫𑀓𑁄. 𑀲𑀁𑀯𑀺𑀤𑀳𑀦𑀫𑀢𑁆𑀢𑀫𑁂𑀯𑀸𑀢𑀺 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀳𑀻𑀢𑀺 𑀲𑀚𑁆𑀚𑀦𑀫𑀢𑁆𑀢𑀫𑁂𑀯. 𑀚𑁂𑀝𑁆𑀞𑀓𑀪𑀸𑀕𑁄𑀢𑀺 𑀤𑀺𑀕𑀼𑀡𑀪𑀸𑀕𑁄.

𑀬𑁄 𑀧𑀦𑀸𑀢𑀺 𑀪𑀺𑀓𑁆𑀔𑀼 𑀧𑀦. 𑀏𑀢𑁆𑀣𑀸𑀢𑀺 𑀩𑀳𑀽𑀲𑀼 𑀪𑀺𑀓𑁆𑀔𑀽𑀲𑀼. 𑀬𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺, 𑀤𑀺𑀦𑁆𑀦𑀁 𑀧𑀝𑀺𑀬𑀸𑀤𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀤𑀺𑀯𑀲𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀤𑁆𑀯𑀻𑀳𑀸𑀤𑀺𑀓𑁂𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀩𑀳𑀼𑀤𑀺𑀯𑀲𑀁 𑀉𑀧𑀝𑁆𑀞𑀸𑀓𑁄𑀬𑁂𑀯, 𑀅𑀣 𑀔𑁄 𑀲𑁄𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀻𑀧𑀦𑁆𑀢𑀺 𑀕𑀺𑀮𑀸𑀦𑀲𑁆𑀲 𑀲𑀦𑁆𑀢𑀺𑀓𑀁. 𑀆𑀕𑀘𑁆𑀙𑀢𑀻𑀢𑀺 𑀲𑀫𑀻𑀧𑀫𑀸𑀕𑀘𑁆𑀙𑀢𑀺.

𑀧𑀘𑁆𑀘𑀸𑀲𑀻𑀲𑀸𑀬𑀸𑀢𑀺 𑀪𑀸𑀕𑀲𑁆𑀲 𑀧𑀘𑁆𑀘𑀸𑀲𑀻𑀲𑀸𑀬. ‘‘𑀧𑀼𑀦 𑀆𑀕𑀦𑁆𑀢𑁆𑀯𑀸 𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 ‘‘𑀧𑀼𑀦 𑀆𑀕𑀦𑁆𑀢𑁆𑀯𑀸 𑀦 𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀉𑀧𑀝𑁆𑀞𑀳𑀦𑁂 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸.

𑀫𑀸𑀢𑀼𑀕𑀸𑀫𑁄𑀧𑀺 𑀳𑁄𑀢𑀽𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀓𑀸𑀮𑀗𑁆𑀓𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀲𑀘𑁂𑀧𑀺 𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁𑀬𑁂𑀯 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀦𑁆𑀢𑀺 𑀧𑀢𑁆𑀢𑀘𑀻𑀯𑀭𑀢𑁄 𑀅𑀜𑁆𑀜𑀁. 𑀢𑁂𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸. 𑀅𑀯𑀲𑁂𑀲𑀦𑁆𑀢𑀺 𑀧𑀢𑁆𑀢𑀘𑀻𑀯𑀭𑀢𑁄 𑀅𑀯𑀲𑁂𑀲𑀁. 𑀢𑀢𑁄𑀢𑀺 𑀩𑀳𑀼𑀓𑀫𑀳𑀕𑁆𑀖𑀢𑁄. 𑀢𑀺𑀘𑀻𑀯𑀭𑀧𑀭𑀺𑀓𑁆𑀔𑀸𑀭𑁄𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀧𑀭𑀺𑀯𑀸𑀭𑁄. 𑀲𑀩𑁆𑀩𑀜𑁆𑀘𑁂𑀢𑀦𑁆𑀢𑀺 𑀲𑀩𑁆𑀩𑀫𑁂𑀯 𑀏𑀢𑀁 𑀧𑀭𑀺𑀓𑁆𑀔𑀸𑀭𑀁. 𑀮𑀪𑀢𑀻𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀮𑀪𑀢𑀺.

𑀲𑁄𑀢𑀺 𑀓𑀸𑀮𑀗𑁆𑀓𑀢𑁄. 𑀓𑀲𑁆𑀲𑀘𑀻𑀢𑀺 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸. 𑀢𑀲𑁆𑀲𑁂𑀯𑀸𑀢𑀺 𑀤𑀺𑀦𑁆𑀦𑀕𑀸𑀳𑀓𑀲𑁆𑀲𑁂𑀯. 𑀭𑀼𑀘𑀺𑀬𑀸 𑀏𑀯𑀸𑀢𑀺 𑀓𑀸𑀫𑀸 𑀏𑀯. 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀖𑀲𑁆𑀲𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀞𑀺𑀢𑀲𑁆𑀲 𑀲𑀗𑁆𑀖𑀲𑁆𑀲𑁂𑀯. 𑀇𑀤𑀁 𑀯𑀺𑀳𑀸𑀭𑁂 𑀞𑀧𑀺𑀢𑀧𑀭𑀺𑀓𑁆𑀔𑀸𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺, 𑀲𑀓𑀮𑁄𑀯 𑀲𑀗𑁆𑀖𑁄 𑀇𑀲𑁆𑀲𑀭𑁄. 𑀓𑀲𑁆𑀫𑀸? 𑀲𑀗𑁆𑀖𑀲𑁆𑀲𑁂𑀯 𑀤𑀸𑀬𑀚𑁆𑀚𑀪𑀸𑀯𑀢𑁄. 𑀩𑀳𑀽𑀦𑀫𑁆𑀧𑀻𑀢𑀺 𑀢𑀻𑀳𑀺 𑀧𑀝𑁆𑀞𑀸𑀬 𑀩𑀳𑀽𑀦𑀫𑁆𑀧𑀺. 𑀈𑀤𑀺𑀲𑀯𑀘𑀦𑀁 𑀉𑀧𑀦𑀺𑀥𑀸𑀬 𑀲𑀸𑀲𑀦𑁂𑀧𑀺 𑀏𑀓𑁄 𑀤𑁆𑀯𑁂 𑀩𑀳𑀽𑀢𑀺 𑀢𑀻𑀡𑀺 𑀯𑀘𑀦𑀸𑀦𑀺 𑀅𑀢𑁆𑀣𑁂 𑀤𑀺𑀲𑁆𑀲𑀦𑁆𑀢𑀺, 𑀲𑀤𑁆𑀤𑁂 𑀧𑀦 𑀤𑁆𑀯𑀺𑀯𑀘𑀦𑀩𑀳𑀼𑀯𑀘𑀦𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑀢𑁄 𑀤𑁆𑀯𑀺𑀯𑀘𑀦𑀁 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀤𑀺𑀦𑁆𑀦𑀫𑁂𑀯𑀸𑀢𑀺 𑀅𑀢𑁆𑀢𑀦𑁄𑀬𑁂𑀯 𑀅𑀲𑀦𑁆𑀢𑀓𑀢𑁆𑀢𑀸, 𑀅𑀜𑁆𑀜𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 𑀘 𑀅𑀤𑀺𑀦𑁆𑀦𑀫𑁂𑀯. 𑀲𑀘𑁂 𑀲𑀩𑁆𑀩𑁂 𑀫𑀢𑀸 𑀅𑀦𑀼𑀫𑀢𑀺𑀬𑀸 𑀤𑁂𑀦𑁆𑀢𑀺, 𑀲𑀼𑀤𑀺𑀦𑁆𑀦𑀫𑁂𑀯. 𑀢𑀦𑁆𑀢𑀺 𑀲𑀦𑁆𑀢𑀓𑀁. 𑀢𑁂𑀲𑀽𑀢𑀺 𑀢𑁂𑀲𑀼 𑀲𑀩𑁆𑀩𑁂𑀲𑀼.

𑁨𑁨𑁭. 𑀓𑀼𑀲𑀘𑀻𑀭𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁩𑁭𑁧. ‘‘𑀅𑀓𑁆𑀓𑀦𑀸𑀴𑀫𑀬’’𑀦𑁆𑀢𑀺 𑀇𑀫𑀺𑀦𑀸 𑀅𑀓𑁆𑀓𑀦𑀸𑀴𑁂𑀦 𑀦𑀺𑀩𑁆𑀩𑀢𑁆𑀢𑀁 𑀅𑀓𑁆𑀓𑀦𑀸𑀴𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀓𑀘𑀺𑀫𑀬𑁄𑀢𑀺 𑀏𑀢𑁆𑀣 𑀫𑀓𑀘𑀺𑀲𑀤𑁆𑀤𑁂𑀦 𑀧𑁄𑀢𑁆𑀣𑀓𑀲𑀤𑁆𑀤𑀲𑁆𑀲 𑀕𑀦𑁆𑀣𑀸𑀤𑀬𑁄 𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀫𑀬𑀲𑀤𑁆𑀤𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀢𑀤𑁆𑀥𑀺𑀢𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀸𑀦𑀻𑀢𑀺 𑀅𑀓𑁆𑀓𑀦𑀸𑀴𑀧𑁄𑀢𑁆𑀣𑀓𑁂𑀳𑀺 𑀲𑁂𑀲𑀸𑀦𑀺 𑀓𑀼𑀲𑀘𑀻𑀭𑀸𑀤𑀻𑀦𑀺. 𑀢𑁂𑀲𑀽𑀢𑀺 𑀓𑀼𑀲𑀘𑀻𑀭𑀸𑀤𑀻𑀲𑀼.

𑁩𑁭𑁨. 𑀢𑀺𑀧𑀝𑁆𑀝𑀘𑀻𑀯𑀭𑀲𑁆𑀲 𑀯𑀸𑀢𑀺 𑀇𑀤𑀁 𑀤𑁆𑀯𑀺𑀧𑀝𑁆𑀝𑀘𑀻𑀯𑀭𑀲𑁆𑀲 𑀫𑀚𑁆𑀛𑁂 𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀲𑀩𑁆𑀩𑀦𑀻𑀮𑀓𑀸𑀤𑀻𑀦𑀁. 𑀓𑀜𑁆𑀘𑀼𑀓𑀦𑁆𑀢𑀺 𑀯𑀸𑀭𑀡𑀁. 𑀢𑀜𑁆𑀳𑀺 𑀓𑀘𑀺𑀬𑀢𑀺 𑀓𑀸𑀬𑁂 𑀩𑀦𑁆𑀥𑀺𑀬𑀢𑀻𑀢𑀺 𑀓𑀜𑁆𑀘𑀼𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀞𑀦𑁂𑀧𑀻𑀢𑀺 𑀉𑀡𑁆𑀳𑀻𑀲𑁂𑀧𑀺. 𑀢𑀜𑁆𑀳𑀺 𑀬𑀲𑁆𑀫𑀸 𑀬𑁂𑀦 𑀲𑀻𑀲𑁂 𑀯𑁂𑀞𑀺𑀬𑀢𑀺, 𑀢𑀲𑁆𑀫𑀸 𑀯𑁂𑀞𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀭𑀼𑀓𑁆𑀔𑀙𑀮𑁆𑀮𑀺𑀫𑀬𑀦𑁆𑀢𑀺 𑀏𑀢𑁆𑀣 𑀭𑀼𑀓𑁆𑀔𑀙𑀮𑁆𑀮𑀺𑀲𑀤𑁆𑀤𑁂𑀦 𑀢𑀺𑀭𑀻𑀝𑀲𑀤𑁆𑀤𑀲𑁆𑀲 𑀯𑀓𑁆𑀓𑀮𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀓𑁆𑀓𑀮𑀜𑁆𑀳𑀺 𑀦𑀺𑀯𑀲𑀦𑀸𑀦𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀢𑀺𑀭𑁄𑀪𑀸𑀯𑀁 𑀧𑀝𑀺𑀘𑁆𑀙𑀦𑁆𑀦𑀪𑀸𑀯𑀁 𑀏𑀢𑀺 𑀕𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀭𑀼𑀓𑁆𑀔𑀁 𑀢𑀺𑀭𑁄𑀧𑀝𑀺𑀘𑁆𑀙𑀦𑁆𑀦𑀁 𑀳𑀼𑀢𑁆𑀯𑀸 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀢𑀺𑀭𑀻𑀝𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀥𑀸𑀦𑁂 (𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀁 𑁪𑁪𑁨 𑀕𑀸𑀣𑀸𑀬𑀁) 𑀧𑀦 𑀢𑀭𑀻𑀝𑀦𑁆𑀢𑀺 𑀢𑀓𑀸𑀭𑁂 𑀇𑀓𑀸𑀭𑀯𑀺𑀭𑀳𑀺𑀢𑁄 𑀧𑀸𑀞𑁄 𑀅𑀢𑁆𑀣𑀺. 𑀧𑀸𑀤𑀧𑀼𑀜𑁆𑀚𑀦𑀦𑁆𑀢𑀺 𑀧𑀸𑀤𑁄 𑀧𑀼𑀚𑀺𑀬𑀢𑀺 𑀲𑁄𑀥𑀺𑀬𑀢𑀺 𑀅𑀦𑁂𑀦𑀸𑀢𑀺 𑀧𑀸𑀤𑀧𑀼𑀜𑁆𑀚𑀦𑀁, 𑀢𑀸𑀮𑀼𑀚𑁄 𑀢𑀢𑀺𑀬𑀓𑁆𑀔𑀭𑁄.

𑁩𑁭𑁪. 𑀲𑀦𑁆𑀢𑁂 𑀧𑀢𑀺𑀭𑀽𑀧𑀓𑁂 𑀕𑀸𑀳𑀓𑁂𑀢𑀺 𑀏𑀢𑁆𑀣 𑀧𑀢𑀺𑀭𑀽𑀧𑀓𑁄 𑀦𑀸𑀫 𑀧𑀓𑁆𑀓𑀫𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑁄. 𑀇𑀫𑀺𑀦𑀸 𑀧𑀢𑀺𑀭𑀽𑀧𑀓𑁂 𑀕𑀸𑀳𑀓𑁂 𑀅𑀲𑀢𑀺 𑀅𑀤𑀢𑁆𑀯𑀸 𑀲𑀗𑁆𑀖𑁂𑀦 𑀪𑀸𑀚𑀺𑀢𑁂 𑀲𑀼𑀪𑀸𑀚𑀺𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀢𑁆𑀢 𑀚𑀦𑀸𑀢𑀺 𑀧𑀓𑁆𑀓𑀫𑀦𑁆𑀢𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀝𑁆𑀝𑀸 𑀘𑀢𑁆𑀢𑀸𑀭𑁄, 𑀉𑀓𑁆𑀔𑀺𑀢𑁆𑀢𑀓𑀸 𑀢𑀬𑁄𑀢𑀺 𑀲𑀢𑁆𑀢 𑀚𑀦𑀸.

𑁨𑁩𑁦. 𑀲𑀗𑁆𑀖𑁂 𑀪𑀺𑀦𑁆𑀦𑁂 𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸

𑁩𑁭𑁬. 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻𑀢𑀺 𑀏𑀢𑁆𑀣 𑀤𑁆𑀯𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀪𑀺𑀚𑁆𑀚𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀦 𑀅𑀜𑁆𑀜𑀦𑁆𑀢𑀺 𑀆𑀳 ‘‘𑀤𑁆𑀯𑁂 𑀓𑁄𑀝𑁆𑀞𑀸𑀲𑀸’’𑀢𑀺. 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀤𑁆𑀯𑀺𑀧𑀓𑁆𑀔𑀁 𑀲𑀦𑁆𑀥𑀸𑀬 ‘‘𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 𑀘𑀻𑀯𑀭𑀁. 𑀢𑀲𑁆𑀲𑁂𑀯 𑀘𑀻𑀯𑀭𑀦𑁆𑀢𑀺 𑀢𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲 𑀘𑀻𑀯𑀭𑀫𑁂𑀯. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀤𑁂𑀲𑁂. 𑀤𑀓𑁆𑀔𑀺𑀡𑁄𑀤𑀓𑀁 𑀧𑀫𑀸𑀡𑀦𑁆𑀢𑀺 𑀤𑀓𑁆𑀔𑀺𑀡𑁄𑀤𑀓𑀫𑁂𑀯 𑀧𑀫𑀸𑀡𑀁, 𑀦 𑀤𑁂𑀬𑁆𑀬𑀥𑀫𑁆𑀫𑁄. 𑀢𑀲𑁆𑀫𑀸 𑀤𑀓𑁆𑀔𑀺𑀡𑁄𑀤𑀓𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀸𑀫𑀺𑀦𑁄 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀪𑁄𑀳𑀺𑀧𑀺 𑀧𑀓𑁆𑀔𑁂𑀳𑀻𑀢𑀺 𑀬𑁄𑀚𑀦𑀸. 𑀧𑀭𑀲𑀫𑀼𑀤𑁆𑀤𑁂𑀢𑀺 𑀚𑀫𑁆𑀩𑀼𑀤𑀻𑀧𑁂. 𑀲𑁄 𑀳𑀺 𑀲𑀻𑀳𑀴𑀤𑀻𑀧𑀢𑁄 𑀲𑀫𑀼𑀤𑁆𑀤𑀲𑁆𑀲 𑀧𑀸𑀭𑀢𑁆𑀢𑀸 𑀧𑀭𑀲𑀫𑀼𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑁄 𑀧𑀓𑁆𑀔𑁄𑀢𑀺 𑀤𑀓𑁆𑀔𑀺𑀡𑁄𑀤𑀓𑀲𑁆𑀲 𑀘 𑀘𑀻𑀯𑀭𑀲𑁆𑀲 𑀘 𑀮𑀤𑁆𑀥𑀧𑀓𑁆𑀔𑀢𑁄 𑀇𑀢𑀭𑁄 𑀅𑀮𑀤𑁆𑀥𑁄 𑀧𑀓𑁆𑀔𑁄.

𑁨𑁩𑁨. 𑀅𑀝𑁆𑀞𑀘𑀻𑀯𑀭𑀫𑀸𑀢𑀺𑀓𑀸𑀓𑀣𑀸

𑁩𑁭𑁯. 𑀇𑀤𑀸𑀦𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀦𑀬𑁂𑀦𑀸𑀢𑀺 ‘‘𑀲𑀻𑀫𑀸𑀬 𑀤𑁂𑀢𑀻’’𑀢𑀺 𑀓𑀢𑁆𑀢𑀼𑀯𑀸𑀘𑀓𑁂𑀦 𑀓𑀺𑀭𑀺𑀬𑀸𑀧𑀤𑁂𑀦 𑀤𑀸𑀬𑀓𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑀓𑀢𑁆𑀢𑀼𑀦𑁄 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀦𑀬𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀸𑀲𑀼 𑀅𑀝𑁆𑀞𑀲𑀼 𑀫𑀸𑀢𑀺𑀓𑀸𑀲𑀼. 𑀅𑀝𑁆𑀞𑀫𑀸 𑀫𑀸𑀢𑀺𑀓𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀅𑀝𑁆𑀞𑀲𑀼 𑀫𑀸𑀢𑀺𑀓𑀸𑀲𑀼. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀓𑀢𑀺𑀓𑀸𑀬 𑀤𑁂𑀢𑀻’’𑀢𑀺𑀆𑀤𑀻𑀲𑀼.

𑀲𑀻𑀫𑀸𑀬…𑀧𑁂… 𑀪𑀸𑀚𑁂𑀢𑀩𑁆𑀩𑀦𑁆𑀢𑀺𑀆𑀤𑀺𑀫𑁆𑀳𑀺 𑀫𑀸𑀢𑀺𑀓𑀸𑀦𑀺𑀤𑁆𑀤𑁂𑀲𑁂 𑀧𑀦 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀻𑀫𑀸𑀬 𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦𑁆𑀦𑀭𑀲 𑀲𑀻𑀫𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 𑀧𑀦𑁆𑀦𑀭𑀲𑀲𑀼 𑀲𑀻𑀫𑀸𑀲𑀼. 𑀉𑀧𑀘𑀸𑀭𑀲𑀻𑀫𑀸 𑀧𑀭𑀺𑀘𑁆𑀙𑀺𑀦𑁆𑀦𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀢𑀓𑀁 𑀞𑀸𑀦𑀦𑁆𑀢𑀺 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀲𑁆𑀲 𑀏𑀓𑀦𑁆𑀢𑁂𑀦 𑀅𑀯𑀼𑀢𑁆𑀢𑀢𑁆𑀢𑀸 𑀏𑀓𑀦𑁆𑀢𑁂𑀦 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺. 𑀥𑀼𑀯𑀲𑀦𑁆𑀦𑀺𑀧𑀸𑀢𑀢𑁄 𑀯𑀸 𑀔𑀺𑀧𑀺𑀢𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀭𑀺𑀬𑀦𑁆𑀢𑁂’’𑀢𑀺 𑀧𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁. 𑀢𑀲𑁆𑀫𑀸 𑀢𑀻𑀲𑀼 𑀦𑀺𑀲𑁆𑀲𑀓𑁆𑀓𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀲𑀸 𑀧𑀦𑀸𑀢𑀺 𑀉𑀧𑀘𑀸𑀭𑀲𑀻𑀫𑀸 𑀧𑀦. 𑀪𑀺𑀓𑁆𑀔𑀽𑀲𑀼 𑀯𑀟𑁆𑀠𑀦𑁆𑀢𑁂𑀲𑀼 𑀆𑀯𑀸𑀲𑁄𑀧𑀺 𑀯𑀟𑁆𑀠𑀢𑀻𑀢𑀺 𑀫𑀦𑀲𑀺𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀽𑀲𑀼 𑀯𑀟𑁆𑀠𑀦𑁆𑀢𑁂𑀲𑀽’’𑀢𑀺. 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀫𑁂𑀯𑀸𑀢𑀺 𑀲𑀻𑀫𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮, 𑁧𑁪𑁪) 𑀯𑀼𑀢𑁆𑀢𑀫𑁂𑀯.

𑀅𑀧𑀺𑀘 𑀔𑁄𑀢𑀺 𑀏𑀢𑁆𑀣 𑀅𑀧𑀺𑀲𑀤𑁆𑀤𑁄 𑀧𑀼𑀘𑁆𑀙𑀢𑁆𑀣𑀯𑀸𑀘𑀓𑁄. 𑀓𑁂𑀳𑀺 𑀞𑀧𑀺𑀢𑀸𑀢𑀺 𑀳𑀺 𑀅𑀢𑁆𑀣𑁄. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀞𑀧𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀸𑀪𑀲𑀻𑀫𑀸𑀢𑀺 𑀮𑀸𑀪𑀲𑁆𑀲 𑀫𑀭𑀺𑀬𑀸𑀤𑁄. 𑀬𑀦𑁆𑀢𑀺 𑀬𑁄 𑀮𑀸𑀪𑁄. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀕𑀸𑀯𑀼𑀢𑀸𑀤𑀺𑀅𑀦𑁆𑀢𑀭𑁂. 𑀮𑀸𑀪𑀲𑀻𑀫𑀸 𑀦𑀸𑀫𑀸𑀢𑀺 𑀮𑀸𑀪𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀲𑀻𑀫𑀸 𑀦𑀸𑀫. 𑀢𑀢𑁆𑀣𑀸𑀢𑀺 𑀩𑀳𑀽𑀲𑀼 𑀚𑀦𑀧𑀤𑁂𑀲𑀼. 𑀅𑀦𑁆𑀢𑀭𑀤𑀻𑀧𑀸 𑀘𑀸𑀢𑀺 𑀫𑀳𑀸𑀤𑀻𑀧𑀢𑁄 𑀅𑀜𑁆𑀜𑀤𑀻𑀧𑀸 𑀘, 𑀔𑀼𑀤𑁆𑀤𑀓𑀤𑀻𑀧𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣𑁂𑀯 𑀲𑀻𑀫𑀸𑀬𑀸𑀢𑀺 𑀔𑀡𑁆𑀟𑀲𑀻𑀫𑀸𑀬 𑀏𑀯. 𑀢𑁂𑀲𑀁𑀬𑁂𑀯𑀸𑀢𑀺 𑀔𑀡𑁆𑀟𑀲𑀻𑀫𑀕𑀢𑀸𑀦𑀁𑀬𑁂𑀯. 𑀏𑀯𑀢𑁆𑀣𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑁂𑀲’’𑀦𑁆𑀢𑀺𑀆𑀤𑀺. 𑀭𑀼𑀓𑁆𑀔𑁂 𑀯𑀸 𑀧𑀩𑁆𑀩𑀢𑁂 𑀯𑀸 𑀞𑀺𑀢𑀲𑁆𑀲 𑀯𑀸 𑀳𑁂𑀝𑁆𑀞𑀸 𑀧𑀣𑀯𑀻𑀫𑀚𑁆𑀛𑀕𑀢𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀲𑁆𑀲𑀸 𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬𑀸𑀢𑀺 𑀫𑀳𑀸𑀲𑀻𑀫𑀸𑀬. 𑀔𑀡𑁆𑀟𑀲𑀻𑀫𑀲𑀻𑀫𑀦𑁆𑀢𑀭𑀺𑀓𑀸𑀲𑀽𑀢𑀺 𑀔𑀡𑁆𑀟𑀲𑀻𑀫𑀸𑀬𑀜𑁆𑀘 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀸𑀬𑀜𑁆𑀘. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀕𑀸𑀫𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀤𑀺𑀦𑁆𑀦𑀁 𑀕𑀸𑀫𑀝𑁆𑀞𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀚𑀫𑁆𑀩𑀼𑀬𑀸 𑀮𑀓𑁆𑀔𑀺𑀢𑁄 𑀤𑀻𑀧𑁄 𑀚𑀫𑁆𑀩𑀼𑀤𑀻𑀧𑁄. 𑀢𑀫𑁆𑀩𑁄 𑀮𑁄𑀳𑀺𑀢𑁄 𑀧𑀸𑀡𑀺 𑀳𑀢𑁆𑀣𑁄 𑀏𑀢𑁂𑀲𑀦𑁆𑀢𑀺 𑀢𑀫𑁆𑀩𑀧𑀸𑀡𑀺𑀦𑁄. 𑀯𑀺𑀚𑀬𑀓𑀼𑀫𑀸𑀭𑀸𑀤𑀬𑁄 𑀲𑀢𑁆𑀢𑀲𑀢𑀸 𑀚𑀦𑀸. 𑀢𑁂𑀲𑀁 𑀦𑀺𑀯𑀸𑀲𑁄 𑀢𑀫𑁆𑀩𑀧𑀡𑁆𑀡𑀺, 𑀲𑁄𑀬𑁂𑀯 𑀤𑀻𑀧𑁄𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁄, 𑀢𑀲𑁆𑀫𑀺𑀁. 𑀲𑀩𑁆𑀩𑁂𑀲𑀁 𑀪𑀸𑀕𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑁂𑀯𑀸𑀢𑀺 𑀚𑀫𑁆𑀩𑀼𑀤𑀻𑀧𑁂𑀬𑁂𑀯. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀬𑁄 𑀧𑀦 𑀪𑀡𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀓𑀣𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀫𑀳𑀸𑀲𑀺𑀯𑀢𑁆𑀣𑁂𑀭𑀁. 𑀢𑀺𑀬𑁄𑀚𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀢𑀢𑁄 𑀊𑀦𑀸𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀁𑀧𑁂𑀢𑀦𑁆𑀢𑀺 𑀲𑀩𑁆𑀩𑀁𑀧𑀺 𑀏𑀢𑀁 𑀮𑀸𑀪𑀕𑀡𑁆𑀳𑀦𑀸𑀤𑀺𑀁. 𑀇𑀢𑀺 𑀆𑀳𑀁𑀲𑀽𑀢𑀺 𑀬𑁄𑀚𑀦𑀸.

𑀓𑀢𑀺𑀓𑀸𑀦𑀁 𑀬𑀣𑀺𑀘𑁆𑀙𑀺𑀢𑀓𑀢𑁂𑀦 𑀧𑀯𑀢𑁆𑀢𑀢𑁆𑀢𑀸 𑀩𑀳𑀼 𑀳𑁄𑀢𑀺, 𑀢𑀲𑁆𑀫𑀸 𑀇𑀥 𑀇𑀘𑁆𑀙𑀺𑀢𑀓𑀢𑀺𑀓𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀫𑀸𑀦𑀮𑀸𑀪𑀓𑀢𑀺𑀓𑀸𑀬𑀸’’𑀢𑀺. 𑀢𑀢𑁆𑀭𑀸𑀢𑀺 ‘‘𑀓𑀢𑀺𑀓𑀸𑀬 𑀤𑁂𑀢𑀻’’𑀢𑀺 𑀧𑀸𑀞𑁂. 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀯𑀺𑀳𑀸𑀭𑀲𑁆𑀲. 𑀩𑀼𑀤𑁆𑀥𑀸𑀥𑀺𑀯𑀼𑀢𑁆𑀣𑁄𑀢𑀺 𑀩𑀼𑀤𑁆𑀥𑁂𑀦 𑀅𑀥𑀺 𑀇𑀲𑁆𑀲𑀭𑀯𑀲𑁂𑀦 𑀯𑀲𑀺𑀬𑀺𑀢𑁆𑀣𑀸𑀢𑀺 𑀩𑀼𑀤𑁆𑀥𑀸𑀥𑀺𑀯𑀼𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀲𑀸𑀯𑀦𑀫𑀢𑁆𑀢𑁂𑀦. 𑀦𑀺𑀲𑀺𑀦𑁆𑀦𑁄𑀯𑀸𑀢𑀺 𑀦𑀺𑀲𑀺𑀦𑁆𑀦𑁄 𑀏𑀯 𑀳𑁄𑀢𑀺, 𑀦𑀺𑀲𑀺𑀦𑁆𑀦𑁄 𑀇𑀯 𑀯𑀸. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀧𑀻𑀢𑀺 𑀢𑀲𑁆𑀫𑀺𑀁 𑀧𑁄𑀭𑀸𑀡𑀓𑀸𑀤𑀺𑀯𑀺𑀳𑀸𑀭𑁂𑀧𑀺. 𑀏𑀯𑀫𑁂𑀯𑀸𑀢𑀺 ‘‘𑀅𑀬𑀁 𑀧𑁄𑀭𑀸𑀡𑀓𑁄 𑀯𑀺𑀳𑀸𑀭𑁄 𑀢𑁂𑀦 𑀦𑀯𑀯𑀺𑀳𑀸𑀭𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑀮𑀸𑀪𑀁 𑀓𑀸𑀢𑀼𑀁 𑀲𑀗𑁆𑀖𑀲𑁆𑀲 𑀭𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀏𑀯𑀫𑁂𑀯. 𑀇𑀥𑀸𑀢𑀺 𑀧𑁄𑀭𑀸𑀡𑀓𑀯𑀺𑀳𑀸𑀭𑁂. 𑀢𑀲𑁆𑀫𑀺𑀦𑁆𑀢𑀺 𑀦𑀯𑀯𑀺𑀳𑀸𑀭𑁂. 𑀏𑀯𑀦𑁆𑀢𑀺 𑀬𑀣𑀸 𑀏𑀓𑁂𑀦 𑀯𑀺𑀳𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀯𑀺𑀳𑀸𑀭𑁄 𑀓𑀸𑀢𑀩𑁆𑀩𑁄, 𑀏𑀯𑀁 𑀢𑀣𑀸𑀢𑀺 𑀅𑀢𑁆𑀣𑁄.

𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀸 𑀧𑀜𑁆𑀜𑀧𑀺𑀬𑀢𑀺 𑀦𑀺𑀘𑁆𑀘𑀯𑀲𑁂𑀦 𑀞𑀧𑀺𑀬𑀢𑀺 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀧𑀭𑀺𑀘𑁆𑀘𑀸𑀕𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑁂’’𑀢𑀺. 𑀢𑀲𑁆𑀲𑀸𑀢𑀺 ‘‘𑀬𑀢𑁆𑀣 𑀲𑀗𑁆𑀖𑀲𑁆𑀲 𑀥𑀼𑀯𑀓𑀸𑀭𑀸 𑀓𑀭𑀺𑀬𑀦𑁆𑀢𑀻’’𑀢𑀺𑀧𑀸𑀞𑀲𑁆𑀲. 𑀅𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑀢𑁆𑀣 𑀯𑀸𑀢𑀺 𑀬𑀲𑁆𑀫𑀺𑀁 𑀯𑀸 𑀞𑀸𑀦𑁂. 𑀅𑀦𑁂𑀦𑀸𑀢𑀺 𑀘𑀻𑀯𑀭𑀤𑀸𑀬𑀓𑁂𑀦. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀦𑀺𑀩𑀤𑁆𑀥𑀸𑀦𑀺 𑀓𑀸𑀭𑀺𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦 𑀧𑀦𑀸𑀢𑀺 𑀘𑀻𑀯𑀭𑀤𑀸𑀬𑀓𑁂𑀦 𑀧𑀦. 𑀲𑀓𑀮𑁄𑀧𑀺 𑀯𑀺𑀳𑀸𑀭𑁄𑀢𑀺 𑀲𑀓𑀮𑁄𑀧𑀺 𑀲𑀆𑀭𑀸𑀫𑁄 𑀯𑀺𑀳𑀸𑀭𑁄. 𑀢𑀢𑁆𑀣𑀸𑀢𑀺 𑀘𑀻𑀯𑀭𑀤𑀸𑀬𑀓𑁂. 𑀇𑀫𑁂𑀢𑀺 𑀧𑀸𑀓𑀯𑀢𑁆𑀢𑀲𑁆𑀲 𑀯𑀢𑁆𑀢𑀦𑀝𑁆𑀞𑀸𑀦𑀸𑀤𑀬𑁄 𑀯𑀺𑀳𑀸𑀭𑀸. 𑀥𑀼𑀯𑁂𑀦 𑀓𑀭𑀺𑀬𑀦𑁆𑀢𑀻𑀢𑀺 𑀥𑀼𑀯𑀓𑀸𑀭𑀸 𑀯𑀺𑀳𑀸𑀭𑀸. 𑀲𑁄𑀢𑀺 𑀘𑀻𑀯𑀭𑀤𑀸𑀬𑀓𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀩𑀳𑀽𑀲𑀼 𑀯𑀺𑀳𑀸𑀭𑁂𑀲𑀼.

𑀢𑁂𑀳𑀻𑀢𑀺 𑀩𑀳𑀼𑀢𑀭𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀥𑀼𑀯𑀓𑀸𑀭𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀏𑀓𑀢𑁆𑀣𑀸𑀢𑀺 𑀏𑀓𑀲𑁆𑀫𑀺𑀁 𑀥𑀼𑀯𑀓𑀸𑀭𑁂. ‘‘𑀲𑀘𑁂 𑀪𑀺𑀓𑁆𑀔𑀼𑀕𑀡𑀦𑀸𑀬 𑀕𑀡𑁆𑀳𑀣𑀸𑀢𑀺 𑀯𑀤𑀢𑀻’’𑀢𑀺 𑀇𑀫𑀺𑀦𑀸 𑀲𑀘𑁂 𑀦 𑀯𑀤𑀢𑀺, 𑀪𑀺𑀓𑁆𑀔𑀼𑀕𑀡𑀦𑀸𑀬 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀯𑀺𑀳𑀸𑀭𑀕𑀡𑀦𑀸𑀬 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸𑀢𑀺 𑀬𑀣𑀸 ‘‘𑀪𑀺𑀓𑁆𑀔𑀼𑀕𑀡𑀦𑀸𑀬 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀣𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀪𑀸𑀚𑁂𑀢𑀩𑁆𑀩𑀯𑀢𑁆𑀣𑀽𑀲𑀼. 𑀢𑀦𑁆𑀢𑀺 𑀫𑀜𑁆𑀘𑀧𑀻𑀞𑀓𑀁, 𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀤𑀸𑀬𑀓𑀁 𑀧𑀼𑀘𑁆𑀙𑀺𑀢𑁆𑀯𑀸, 𑀯𑀤𑀢𑀻𑀢𑀺 𑀤𑀸𑀬𑀓𑁄 𑀯𑀤𑀢𑀺. 𑀲𑀗𑁆𑀖𑀲𑁆𑀲𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀤𑀸𑀬𑀓𑀲𑁆𑀲𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀻𑀫𑀝𑁆𑀞𑀲𑁆𑀲𑀸𑀢𑀺 𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲. 𑀅𑀲𑀫𑁆𑀧𑀢𑁆𑀢𑀲𑁆𑀲𑀸𑀧𑀻𑀢𑀺 𑀪𑀸𑀚𑀦𑀝𑁆𑀞𑀸𑀦𑀁 𑀅𑀲𑀫𑁆𑀧𑀢𑁆𑀢𑀲𑁆𑀲𑀸𑀧𑀺. 𑀅𑀮𑀲𑀚𑀸𑀢𑀺𑀓𑀸𑀢𑀺 𑀓𑁄𑀲𑀚𑁆𑀚𑀚𑀸𑀢𑀺𑀓𑀸. 𑀞𑀺𑀢𑀺𑀓𑀸𑀢𑀺 𑀧𑀩𑀦𑁆𑀥𑀯𑀲𑁂𑀦 𑀞𑀺𑀬𑀢𑁂 𑀞𑀺𑀢𑀺, 𑀲𑀸𑀬𑁂𑀯 𑀞𑀺𑀢𑀺𑀓𑀸. 𑀅𑀣 𑀯𑀸 ‘‘𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑀢𑁆𑀢𑀸 𑀢𑀺𑀝𑁆𑀞𑀢𑀺 𑀧𑀩𑀦𑁆𑀥𑀯𑀲𑁂𑀦 𑀏𑀢𑁆𑀣𑀸𑀢𑀺 𑀞𑀺𑀢𑀺, 𑀲𑀸𑀬𑁂𑀯 𑀞𑀺𑀢𑀺𑀓𑀸𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸𑀢𑀺 𑀯𑀻𑀲𑀢𑀺𑀯𑀲𑁆𑀲𑀲𑀗𑁆𑀔𑀸𑀢𑀁 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸. 𑀢𑁂𑀲𑀦𑁆𑀢𑀺 𑀣𑁂𑀭𑀸𑀦𑀁.

𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀦𑁆𑀢𑀺 𑀪𑀸𑀚𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁. 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀯𑀸 𑀅𑀢𑁆𑀢𑀦𑁄 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸𑀢𑀺 𑀬𑁄𑀚𑀦𑀸. 𑀲𑀻𑀫𑀸𑀢𑀺 𑀉𑀧𑀘𑀸𑀭𑀲𑀻𑀫𑀸. 𑀣𑁂𑀭𑀸𑀲𑀦𑀁 𑀆𑀭𑀽𑀴𑁆𑀳𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀯𑀲𑁆𑀲𑀕𑁆𑀕𑁂𑀦𑀸𑀢𑀺 𑀯𑀲𑁆𑀲𑀕𑀡𑀦𑀸𑀬.

𑀧𑀸𑀝𑁂𑀓𑁆𑀓𑀦𑁆𑀢𑀺 𑀧𑀘𑁆𑀘𑁂𑀓𑀁. 𑀲𑀩𑁆𑀩𑀸𑀦𑁂𑀯 𑀘𑀻𑀯𑀭𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀩𑁆𑀪𑀸𑀲𑀺𑀢𑀤𑀼𑀕𑁆𑀕𑀳𑀺𑀢𑀸𑀦𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀢𑀕𑀢𑀝𑁆𑀞𑀸𑀦𑁂 𑀲𑀗𑁆𑀖𑀺𑀓𑀸𑀦𑁂𑀯 𑀳𑁄𑀦𑁆𑀢𑀻’’𑀢𑀺. 𑀏𑀓𑀦𑁆𑀢𑀺 𑀤𑀲𑀲𑀼 𑀯𑀢𑁆𑀣𑁂𑀲𑀼 𑀏𑀓𑀁.

𑀯𑀢𑁆𑀣𑀲𑁆𑀲𑁂𑀯 𑀧𑀼𑀧𑁆𑀨𑀁 𑀯𑀸 𑀯𑀮𑀺 𑀯𑀸 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀢𑀺 𑀧𑀼𑀧𑁆𑀨𑀯𑀮𑀺𑀦𑀸. 𑀏𑀓𑀁 𑀢𑀦𑁆𑀢𑀦𑁆𑀢𑀺 𑀏𑀓𑀁 𑀲𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀞𑀺𑀢𑀺𑀓𑀸𑀬 𑀞𑀸𑀦𑀸𑀝𑁆𑀞𑀸𑀦𑁂𑀲𑀼. 𑀤𑁆𑀯𑀻𑀳𑀺𑀧𑀺 𑀕𑀳𑁂𑀢𑀩𑁆𑀩𑀁 𑀞𑀺𑀢𑀺𑀓𑀸𑀬 𑀅𑀪𑀸𑀯𑀢𑁄.

𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀬𑀁 𑀘𑀻𑀯𑀭𑀦𑁆𑀢𑀺 𑀬𑁄𑀚𑀦𑀸. 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 ‘‘𑀢𑀼𑀬𑁆𑀳𑀁 𑀤𑁂𑀫𑀸’’𑀢𑀺 𑀯𑀸 𑀅𑀯𑀢𑁆𑀯𑀸 ‘‘𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀣𑁂𑀭𑀸𑀦𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀣𑁂𑀭𑀸 𑀦𑀸𑀫 𑀳𑀺 𑀦 𑀅𑀢𑁆𑀢𑀦𑀸𑀬𑁂𑀯 𑀳𑁄𑀦𑁆𑀢𑀺, 𑀅𑀜𑁆𑀜𑁂𑀧𑀺 𑀩𑀳𑀽, 𑀢𑀲𑁆𑀫𑀸 𑀯𑀝𑁆𑀝𑀢𑀺. ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑀸 𑀏𑀓𑀦𑁆𑀢𑁂𑀦 𑀲𑀗𑁆𑀖𑁄𑀬𑁂𑀯, 𑀢𑀲𑁆𑀫𑀸 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀯𑀝𑁆𑀝𑀢𑀺, 𑀧𑀕𑁂𑀯 ‘‘𑀢𑀼𑀬𑁆𑀳’’𑀦𑁆𑀢𑀺 𑀯𑀼𑀢𑁆𑀢𑁂.

𑀢𑀢𑁄𑀢𑀺 𑀩𑀳𑀼𑀯𑀢𑁆𑀣𑀢𑁄. 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺.

𑀬𑀦𑁆𑀢𑀺 𑀯𑀢𑁆𑀣𑀁. 𑀢𑀢𑁆𑀣𑀸𑀢𑀺 𑀧𑀭𑀺𑀓𑁆𑀔𑀸𑀭𑁂𑀲𑀼. 𑀲𑀼𑀢𑁆𑀢𑀦𑁆𑀢𑀺 𑀢𑀦𑁆𑀢𑀁.

𑀏𑀯𑀁 𑀅𑀦𑁆𑀢𑁄𑀲𑀻𑀫𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀩𑀳𑀺𑀲𑀻𑀫𑀸𑀬 𑀤𑀺𑀦𑁆𑀦𑁂 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀏𑀓𑀩𑀤𑁆𑀥𑀸 𑀘𑀸𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀏𑀓𑀢𑁄𑀩𑀤𑁆𑀥𑀸 𑀘. 𑀬𑁂 𑀧𑀦𑀸𑀢𑀺 𑀪𑀺𑀓𑁆𑀔𑀽 𑀧𑀦.

𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣 𑀘𑀢𑀼𑀦𑁆𑀦𑀁 𑀯𑀸𑀓𑁆𑀬𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁂𑀧𑀺 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀺𑀬𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀫𑁆𑀫𑀻𑀢𑀺 𑀯𑀼𑀢𑁆𑀢𑁂𑀧𑀻’’𑀢𑀺𑀆𑀤𑀺. 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸𑀢𑀺 𑀧𑀼𑀕𑁆𑀕𑀮𑀲𑁆𑀲 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀏𑀓𑀯𑀻𑀲𑀢𑀺𑀧𑀝𑀺𑀯𑀻𑀲𑁂 𑀓𑀢𑁆𑀯𑀸 𑀏𑀓𑁄 𑀘𑁂𑀢𑀺𑀬𑀲𑁆𑀲 𑀤𑀸𑀢𑀩𑁆𑀩𑁄𑀢𑀺 𑀦𑀬𑀁 𑀅𑀢𑀺𑀤𑀺𑀲𑀢𑀺. 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑁄 𑀦𑀸𑀫 𑀦𑀢𑁆𑀣𑀺 𑀘𑁂𑀢𑀺𑀬𑀲𑁆𑀲 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀅𑀕𑀳𑀺𑀢𑀢𑁆𑀢𑀸.

𑀢𑀢𑁆𑀣𑀸𑀢𑀺 𑀉𑀪𑀢𑁄𑀲𑀗𑁆𑀖𑀧𑀼𑀕𑁆𑀕𑀮𑀘𑁂𑀢𑀺𑀬𑁂𑀲𑀼. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀼𑀩𑁆𑀩𑁂𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂. 𑀢𑀤𑀸𑀢𑀺 𑀬𑀤𑀸 𑀩𑀼𑀤𑁆𑀥𑁄 𑀪𑀕𑀯𑀸 𑀥𑀭𑀢𑀺, 𑀢𑀤𑀸. 𑀧𑀝𑀺𑀫𑀁 𑀯𑀸𑀢𑀺 𑀧𑀝𑀺𑀩𑀺𑀫𑁆𑀩𑀁 𑀯𑀸. 𑀢𑀜𑁆𑀳𑀺 𑀪𑀕𑀯𑀢𑀸 𑀧𑀝𑀺 𑀲𑀤𑀺𑀲𑀁 𑀫𑀸𑀦𑀻𑀬𑀢𑀻𑀢𑀺 𑀧𑀝𑀺𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀘𑁂𑀢𑀺𑀬𑀁 𑀯𑀸𑀢𑀺 𑀣𑀽𑀧𑀁 𑀯𑀸. 𑀲𑁄 𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀘𑀺𑀢𑀺𑀢𑀩𑁆𑀩𑀁, 𑀧𑀽𑀚𑁂𑀢𑀩𑁆𑀩𑀁, 𑀇𑀝𑁆𑀞𑀓𑀸𑀤𑀻𑀳𑀺 𑀯𑀸 𑀘𑀺𑀦𑀺𑀢𑀩𑁆𑀩𑀦𑁆𑀢𑀺 𑀘𑁂𑀢𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣𑀸𑀢𑀺 𑀤𑁂𑀬𑁆𑀬𑀥𑀫𑁆𑀫𑁂𑀲𑀼. 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁. 𑀬𑀁 𑀤𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑀸𑀦𑁂. 𑀅𑀦𑀺𑀬𑀫𑀯𑀸𑀘𑀓𑀲𑁆𑀲 ‘‘𑀬𑁄’’𑀢𑀺 𑀲𑀩𑁆𑀩𑀦𑀸𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀩𑁆𑀩𑀚𑀺𑀢𑁄 𑀯𑀸 𑀕𑀳𑀝𑁆𑀞𑁄 𑀯𑀸’’𑀢𑀺. 𑀯𑀢𑁆𑀢𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀦𑀁 𑀯𑀺𑀓𑀸𑀭𑀯𑀲𑁂𑀦 𑀅𑀦𑀺𑀬𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸𑀧𑀺 𑀯𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺.

‘‘𑀤𑀽𑀭𑀫𑁆𑀧𑀺 𑀳𑀭𑀺𑀢𑁆𑀯𑀸 𑀧𑀽𑀚𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀚𑀗𑁆𑀖𑀧𑁂𑀲𑀦𑀺𑀓𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀳𑀭𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀘𑁆𑀙𑀢𑁄𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀢𑀦𑁆𑀢𑀺 𑀲𑀗𑁆𑀖𑀲𑁆𑀲 𑀆𑀳𑀝𑀪𑀢𑁆𑀢𑀁.

𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑀲𑁆𑀲𑀸𑀢𑀺 𑀯𑀲𑁆𑀲𑀁 𑀯𑀲𑀺𑀢𑁆𑀣𑀸𑀢𑀺 𑀯𑀲𑁆𑀲𑀁𑀯𑀼𑀢𑁆𑀣𑁄. 𑀅𑀮𑀼𑀢𑁆𑀢𑀓𑀺𑀢𑀦𑁆𑀢𑀲𑀫𑀸𑀲𑁄𑀬𑀁, 𑀲𑁄𑀬𑁂𑀯 𑀲𑀗𑁆𑀖𑁄 𑀯𑀲𑁆𑀲𑀁𑀯𑀼𑀢𑁆𑀣𑀲𑀗𑁆𑀖𑁄, 𑀢𑀲𑁆𑀲. 𑀬𑀸𑀯𑀢𑀺𑀓𑀲𑀤𑁆𑀤𑁄 𑀬𑀢𑁆𑀢𑀓𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀬𑀢𑁆𑀢𑀓𑀸’’𑀢𑀺. 𑀤𑀺𑀲𑀸𑀧𑀓𑁆𑀓𑀦𑁆𑀢𑀲𑁆𑀲𑀸𑀧𑀻𑀢𑀺 𑀅𑀜𑁆𑀜𑀁 𑀤𑀺𑀲𑀁 𑀧𑀓𑁆𑀓𑀦𑁆𑀢𑀲𑁆𑀲𑀧𑀺, 𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀤𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀅𑀧𑀭𑁂 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀏𑀢𑀦𑁆𑀢𑀺 𑀯𑀘𑀦𑀁.

𑀲𑀫𑁆𑀧𑀢𑁆𑀢𑀸𑀦𑀦𑁆𑀢𑀺 𑀤𑀺𑀦𑁆𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑀸𑀦𑀁. 𑀲𑀩𑁆𑀩𑁂𑀲𑀦𑁆𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀼𑀢𑁆𑀣𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀁. 𑀢𑀢𑁆𑀭𑀸𑀢𑀺 𑀯𑀺𑀳𑀸𑀭𑁂. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀯𑀤𑀦𑁂 𑀲𑀢𑀺, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀯𑀸. 𑀯𑀲𑁆𑀲𑀁 𑀯𑀲𑀦𑁆𑀢𑀻𑀢𑀺 𑀯𑀲𑁆𑀲𑀁𑀯𑀲𑀦𑁆𑀢𑀸, 𑀢𑁂𑀲𑀁. 𑀘𑀻𑀯𑀭𑀫𑀸𑀲𑁂𑀢𑀺 𑀘𑀻𑀯𑀭𑁂𑀦 𑀮𑀓𑁆𑀔𑀺𑀢𑁂 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁂.

𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁄 𑀤𑀺𑀯𑀲𑁄𑀢𑀺 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀻𑀲𑀗𑁆𑀔𑀸𑀢𑁄 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁄 𑀤𑀺𑀯𑀲𑁄. 𑀯𑀲𑁆𑀲𑀸𑀯𑀸𑀲𑀺𑀓𑀦𑁆𑀢𑀺 𑀯𑀲𑁆𑀲𑀁 𑀆𑀯𑀲𑀦𑁆𑀢𑀸𑀦𑀁 𑀤𑀸𑀢𑀩𑁆𑀩𑀁 𑀘𑀻𑀯𑀭𑀁. 𑀆𑀭𑁄𑀧𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑀻𑀢𑀯𑀲𑁆𑀲𑀸𑀯𑀸𑀲𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑀻𑀢𑀯𑀲𑁆𑀲𑀸𑀯𑀸𑀲𑀲𑁆𑀲𑀸𑀢𑀺 𑀅𑀢𑀻𑀢𑀯𑀲𑁆𑀲𑀁, 𑀅𑀢𑀻𑀢𑀯𑀲𑁆𑀲𑁂 𑀯𑀸 𑀆𑀯𑀸𑀲𑀲𑁆𑀲 𑀲𑀗𑁆𑀖𑀲𑁆𑀲. 𑀢𑀦𑁆𑀢𑀺 𑀘𑀻𑀯𑀭𑀁.

𑀞𑀧𑁂𑀢𑁆𑀯𑀸𑀢𑀺 𑀯𑀺𑀳𑀸𑀭𑁂 𑀞𑀧𑁂𑀢𑁆𑀯𑀸. 𑀲𑀫𑁆𑀧𑀢𑁆𑀢𑀸𑀦𑀦𑁆𑀢𑀺 𑀇𑀫𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀸𑀦𑀁. 𑀇𑀢𑁄𑀢𑀺 𑀘𑀻𑀯𑀭𑀤𑀸𑀦𑀓𑀸𑀮𑀢𑁄. 𑀢𑁂𑀢𑀺 𑀅𑀦𑁆𑀢𑁄𑀯𑀲𑁆𑀲𑁂 𑀯𑀼𑀢𑁆𑀣𑀪𑀺𑀓𑁆𑀔𑀽.

𑀆𑀤𑀺𑀲𑁆𑀲𑀸𑀢𑀺 𑀧𑀤𑀲𑁆𑀲 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀤𑀺𑀲𑀺𑀢𑁆𑀯𑀸’’𑀢𑀺. 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 ‘‘𑀬𑀸𑀕𑀼𑀬𑀸 𑀯𑀸’’𑀢𑀺𑀆𑀤𑀺𑀧𑀸𑀞𑁂. 𑀅𑀚𑁆𑀚𑀢𑀦𑀸𑀬 𑀯𑀸𑀢𑀺 𑀅𑀚𑁆𑀚 𑀪𑀯𑀸𑀦𑀁 𑀧𑀼𑀜𑁆𑀜𑀸𑀦𑀁 𑀅𑀢𑁆𑀣𑀸𑀬 𑀯𑀸. 𑀢𑁂𑀲𑀦𑁆𑀢𑀺 𑀦𑀺𑀫𑀦𑁆𑀢𑀓𑀸𑀦𑀁, 𑀧𑀯𑀺𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑁂𑀳𑀻𑀢𑀺 𑀦𑀺𑀫𑀦𑁆𑀢𑀺𑀢𑁂𑀳𑀺 𑀬𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀬𑁂𑀲𑀁 𑀯𑀸 𑀧𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀓𑀲𑁆𑀫𑀸? 𑀅𑀦𑀺𑀫𑀦𑁆𑀢𑀺𑀢𑀢𑁆𑀢𑀸. 𑀢𑁂𑀲𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀓𑀲𑁆𑀫𑀸? 𑀦𑀺𑀫𑀦𑁆𑀢𑀺𑀢𑀕𑁂𑀳𑀁 𑀅𑀧𑀯𑀺𑀝𑁆𑀞𑀢𑁆𑀢𑀸. 𑀲𑁄𑀢𑀺 𑀤𑀸𑀬𑀓𑁄.

𑀧𑀼𑀩𑁆𑀩𑁂𑀧𑀻𑀢𑀺 𑀇𑀢𑁄 𑀧𑀼𑀩𑁆𑀩𑁂𑀧𑀺. 𑀅𑀲𑁆𑀲𑀸𑀢𑀺 𑀤𑀸𑀬𑀓𑀲𑁆𑀲. 𑀯𑀸𑀲𑁂𑀢𑁆𑀯𑀸𑀢𑀺 𑀯𑀸𑀲𑀸𑀧𑁂𑀢𑁆𑀯𑀸. 𑀲𑁄𑀢𑀺 𑀤𑀸𑀬𑀓𑁄. 𑀬𑁄𑀢𑀺 𑀪𑀺𑀓𑁆𑀔𑀼, 𑀯𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀦𑀻𑀢𑀺 𑀪𑁂𑀲𑀚𑁆𑀚𑀸𑀦𑀺. 𑀇𑀤𑀦𑁆𑀢𑀺 𑀘𑀻𑀯𑀭𑀁.

‘‘𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘𑀸’’𑀢𑀺 𑀧𑀤𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀧𑀺 𑀕𑀳𑁂𑀢𑀩𑁆𑀩𑀸 𑀉𑀤𑁆𑀤𑁂𑀲𑀸𑀤𑀺𑀯𑀲𑁂𑀦 𑀅𑀦𑁆𑀢𑁂 𑀯𑀲𑀦𑀲𑀻𑀮𑀢𑁆𑀢𑀸. 𑀉𑀤𑁆𑀤𑁂𑀲𑀁 𑀕𑀳𑁂𑀢𑀼𑀁 𑀆𑀕𑀢𑁄 𑀘 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘𑀸𑀢𑀺 𑀇𑀫𑁂 𑀅𑀦𑁆𑀢𑁂 𑀅𑀯𑀲𑀦𑀲𑀻𑀮𑀸𑀧𑀺 𑀭𑀽𑀴𑁆𑀳𑀻𑀯𑀲𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀸 𑀦𑀸𑀫. 𑀇𑀫𑀺𑀦𑀸 𑀦𑀺𑀲𑁆𑀲𑀬𑀁 𑀕𑀳𑁂𑀢𑀼𑀁 𑀆𑀕𑀢𑁄 𑀘 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀳𑀺𑀢𑀧𑀼𑀩𑁆𑀩𑁄 𑀘 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀢𑁆𑀢𑀁 𑀓𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀧𑀸𑀧𑀼𑀡𑀸𑀢𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑀉𑀧𑀲𑀫𑁆𑀧𑀤𑀦𑁆𑀢𑁂𑀯𑀸𑀲𑀺𑀓𑀧𑀩𑁆𑀩𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑀸𑀧𑀺 𑀕𑀳𑁂𑀢𑀩𑁆𑀩𑀸 𑀢𑁂𑀲𑀫𑁆𑀧𑀺 𑀦𑀺𑀩𑀤𑁆𑀥𑀘𑀸𑀭𑀺𑀓𑀪𑀺𑀓𑁆𑀔𑀼𑀪𑀸𑀯𑀢𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀘𑀻𑀯𑀭𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.