𑁧𑁮𑁮. 𑀆𑀤𑀸𑀬𑀲𑀢𑁆𑀢𑀓𑀓𑀣𑀸

𑁩𑁧𑁧. 𑀦 𑀧𑀘𑁆𑀘𑁂𑀲𑁆𑀲𑀦𑁆𑀢𑀺 𑀏𑀢𑁆𑀣 𑀧𑀢𑀻𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀧𑀼𑀦𑀢𑁆𑀣𑀁, 𑀇𑀥𑀸𑀢𑀼𑀬𑀸 𑀘 𑀕𑀢𑁆𑀬𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀧𑀼𑀦 𑀆𑀕𑀫𑀺𑀲𑁆𑀲’’𑀦𑁆𑀢𑀺. 𑀏𑀯𑀁 𑀧𑀓𑁆𑀓𑀫𑀢𑁄 𑀙𑀺𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑀜𑁆𑀘𑀸𑀢𑀺 𑀧𑀓𑁆𑀓𑀫𑀦𑀦𑁆𑀢𑀺𑀓𑀁, 𑀓𑀣𑀺𑀦𑀼𑀤𑁆𑀥𑀸𑀭𑀜𑁆𑀘. 𑀢𑀸𑀳𑀦𑁆𑀢𑀺 𑀢𑁂 𑀅𑀳𑀁. 𑀢𑁂𑀢𑀺 𑀢𑀼𑀬𑁆𑀳𑀁.

𑀅𑀜𑁆𑀜𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀳𑀸𑀭𑀢𑁄 𑀅𑀜𑁆𑀜𑀁. 𑀏𑀯𑀁 𑀳𑁄𑀢𑀻𑀢𑀺 𑀏𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀳𑁄𑀢𑀺. 𑀲𑁄𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑁄. 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑀤𑁆𑀯𑁂 𑀧𑀮𑀺𑀩𑁄𑀥𑀸 𑀏𑀓𑀢𑁄 𑀙𑀺𑀚𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀓𑀧𑀳𑀸𑀭𑁂𑀦𑁂𑀯. 𑀲𑁄 𑀧𑀮𑀺𑀩𑁄𑀥𑀽𑀧𑀘𑁆𑀙𑁂𑀤𑁄 𑀓𑀲𑁆𑀫𑀸 𑀯𑀺𑀢𑁆𑀣𑀸𑀭𑀢𑁄 𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀲𑁄 𑀧𑀦𑀸’’𑀢𑀺𑀆𑀤𑀺. 𑀲𑁄 𑀧𑀦𑀸𑀢𑀺 𑀧𑀮𑀺𑀩𑁄𑀥𑀽𑀧𑀘𑁆𑀙𑁂𑀤𑁄 𑀧𑀦. 𑀦 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀓𑀣𑀺𑀦𑀼𑀩𑁆𑀪𑀸𑀭𑁂. 𑀓𑀲𑁆𑀫𑀸 𑀅𑀬𑀁 𑀓𑀣𑀺𑀦𑀼𑀤𑁆𑀥𑀸𑀭𑁄 ‘‘𑀦𑀸𑀲𑀦𑀦𑁆𑀢𑀺𑀓𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄.

𑀆𑀲𑀸𑀯𑀘𑁆𑀙𑁂𑀤𑀺𑀓𑁂 𑀙𑀺𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑀸𑀢𑀺 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀧𑀦. 𑀅𑀦𑁂𑀓𑀧𑀪𑁂𑀤𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀯𑀼𑀢𑁆𑀢𑁄𑀢𑀺 𑀅𑀬𑀁 𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂. 𑀢𑀢𑁆𑀣𑀸𑀢𑀺 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁂.

𑁩𑁧𑁨-𑁩𑁨𑁫. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀲𑀢𑁆𑀢𑀓𑁂𑀢𑀺 𑀅𑀝𑁆𑀞𑀲𑀼 𑀫𑀸𑀢𑀺𑀓𑀸𑀲𑀼 𑀆𑀲𑀸𑀯𑀘𑁆𑀙𑁂𑀤𑀢𑁄 𑀲𑁂𑀲𑁂 𑀲𑀢𑁆𑀢𑀧𑀫𑀸𑀡𑁂, 𑀲𑀢𑁆𑀢𑀲𑀫𑀽𑀳𑁂 𑀯𑀸. 𑀢𑁂𑀬𑁂𑀯𑀸𑀢𑀺 𑀲𑀢𑁆𑀢𑀓𑁂 𑀏𑀯. 𑀢𑀢𑁄𑀢𑀺 𑀯𑀸𑀭𑀢𑁄. 𑀬𑁂 𑀬𑁂𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀸. 𑀇𑀢𑀭𑁂𑀳𑀻𑀢𑀺 𑀆𑀲𑀸𑀯𑀘𑁆𑀙𑁂𑀤𑀢𑁄 𑀅𑀜𑁆𑀜𑁂𑀳𑀺. 𑀬𑁂 𑀧𑀮𑀺𑀩𑁄𑀥𑀸 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀯𑀸𑀲𑁄 𑀘𑀚𑀻𑀬𑀢𑀺 𑀅𑀦𑁂𑀦𑀸𑀢𑀺 𑀘𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀢𑀦𑁆𑀢𑀺 𑀘𑀺𑀢𑁆𑀢𑀁. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀆𑀯𑀸𑀲𑁄 𑀯𑀫𑀻𑀬𑀢𑀺 𑀅𑀦𑁂𑀦𑀸𑀢𑀺 𑀯𑀦𑁆𑀢𑀁. 𑀆𑀯𑀸𑀲𑀢𑁄 𑀫𑀼𑀘𑁆𑀘𑀢𑀺 𑀅𑀦𑁂𑀦𑀸𑀢𑀺 𑀫𑀼𑀢𑁆𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.