𑁧𑁮𑁭. 𑀓𑀣𑀺𑀦𑀸𑀦𑀼𑀚𑀸𑀦𑀦𑀓𑀣𑀸

𑁩𑁦𑁬. 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 𑀧𑀸𑀯𑁂𑀬𑁆𑀬𑀓𑀸𑀢𑀺 𑀏𑀢𑁆𑀣 𑀧𑀸𑀯𑀸𑀭𑀝𑁆𑀞𑁂 𑀦𑀺𑀯𑀲𑀦𑁆𑀢𑀻𑀢𑀺 𑀧𑀸𑀯𑁂𑀬𑁆𑀬𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀯𑀸𑀭𑀝𑁆𑀞𑀯𑀸𑀲𑀺𑀦𑁄’’𑀢𑀺. 𑀢𑀢𑁆𑀣𑀸𑀢𑀺 𑀧𑀸𑀯𑀸𑀦𑀸𑀫𑀓𑁂 𑀭𑀝𑁆𑀞𑁂. 𑀏𑀓𑁄 𑀧𑀺𑀢𑀸 𑀏𑀢𑁂𑀲𑀦𑁆𑀢𑀺 𑀏𑀓𑀧𑀺𑀢𑀼𑀓𑀸. 𑀢𑁂 𑀘 𑀢𑁂 𑀪𑀸𑀢𑀭𑁄 𑀘𑁂𑀢𑀺 𑀏𑀓𑀧𑀺𑀢𑀼𑀓𑀪𑀸𑀢𑀭𑁄, 𑀢𑁂𑀲𑀁. 𑀏𑀢𑀦𑁆𑀢𑀺 ‘‘𑀧𑀸𑀯𑁂𑀬𑁆𑀬𑀓𑀸’’𑀢𑀺 𑀏𑀢𑀁 𑀦𑀸𑀫𑀁. 𑀢𑁂𑀲𑀽𑀢𑀺 𑀧𑀸𑀯𑁂𑀬𑁆𑀬𑀓𑁂𑀲𑀼. ‘‘𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦𑀸’’𑀢𑀺 𑀯𑀺𑀲𑁂𑀲𑀦𑀲𑁆𑀲 𑀩𑁆𑀬𑀯𑀘𑁆𑀙𑁂𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦 𑀅𑀭𑀜𑁆𑀜𑀯𑀸𑀲𑀫𑀢𑁆𑀢𑁂𑀦𑀸’’𑀢𑀺. 𑀯𑀺𑀲𑁂𑀲𑀦𑀜𑁆𑀳𑀺 𑀤𑀼𑀯𑀺𑀥𑀁 𑀩𑁆𑀬𑀯𑀘𑁆𑀙𑁂𑀤𑀁, 𑀢𑀧𑁆𑀧𑀸𑀓𑀝𑀺𑀓𑀭𑀡𑀜𑁆𑀘𑀸𑀢𑀺. 𑀢𑁂𑀲𑀦𑁆𑀢𑀺 𑀧𑀸𑀯𑁂𑀬𑁆𑀬𑀓𑀸𑀦𑀁. 𑀧𑀺𑀡𑁆𑀟𑀧𑀸𑀢𑀺𑀓𑀸𑀤𑀺𑀪𑀸𑀯𑁂𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁄 𑀆𑀭𑀜𑁆𑀜𑀓𑀁 𑀅𑀧𑁂𑀓𑁆𑀔𑀢𑀺. 𑀏𑀢𑀦𑁆𑀢𑀺 ‘‘𑀲𑀩𑁆𑀩𑁂 𑀆𑀭𑀜𑁆𑀜𑀓𑀸’’𑀢𑀺𑀆𑀤𑀺 𑀏𑀢𑀁 𑀯𑀘𑀦𑀁. 𑀇𑀫𑁂 𑀧𑀦𑀸𑀢𑀺 𑀧𑀸𑀯𑁂𑀬𑁆𑀬𑀓𑀸 𑀧𑀦. 𑀉𑀤𑀓𑀲𑀁𑀕𑀳𑁂𑀢𑀺 𑀏𑀢𑁆𑀣 𑀉𑀤𑀓𑁂𑀦 𑀲𑀁𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑀓𑁂𑀦 𑀲𑀁𑀕𑀳𑀺𑀢𑁂’’𑀢𑀺. ‘‘𑀣𑀮𑁂 𑀘 𑀦𑀺𑀦𑁆𑀦𑁂 𑀘𑀸’’𑀢𑀺 𑀇𑀫𑀺𑀦𑀸 ‘‘𑀉𑀤𑀓𑀲𑀁𑀕𑀳𑁂’’𑀢𑀺 𑀧𑀤𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

𑀉𑀤𑀓𑀘𑀺𑀓𑁆𑀔𑀮𑁆𑀮𑁄𑀢𑀺 𑀉𑀤𑀓𑁂𑀦 𑀮𑁄𑀴𑀺𑀢𑁄 𑀘𑀺𑀓𑁆𑀔𑀮𑁆𑀮𑁄 𑀉𑀤𑀓𑀘𑀺𑀓𑁆𑀔𑀮𑁆𑀮𑁄. 𑀑𑀓𑀧𑀼𑀡𑁆𑀡𑁂𑀳𑀻𑀢𑀺 𑀏𑀢𑁆𑀣 𑀑𑀓𑀲𑀤𑁆𑀤𑁄 𑀉𑀤𑀓𑀯𑁂𑀯𑀘𑀦𑁄𑀢𑀺 𑀆𑀳 ‘‘𑀉𑀤𑀓𑀧𑀼𑀡𑁆𑀡𑁂𑀳𑀻’’𑀢𑀺. 𑀉𑀤𑀓𑀜𑁆𑀳𑀺 𑀉𑀘𑀬𑀢𑀺 𑀲𑀫𑀯𑀸𑀬𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀑𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀦𑁆𑀢𑀺 𑀧𑀸𑀯𑁂𑀬𑁆𑀬𑀓𑀸𑀦𑀁. 𑀖𑀦𑀸𑀦𑀻𑀢𑀺 𑀦𑀺𑀭𑀦𑁆𑀢𑀭𑀸𑀦𑀺. 𑀢𑁂𑀲𑀽𑀢𑀺 𑀘𑀻𑀯𑀭𑁂𑀲𑀼. 𑀢𑁂𑀦𑀸𑀢𑀺 𑀘𑀻𑀯𑀭𑀸𑀦𑀁 𑀖𑀦𑀢𑁆𑀢𑀸, 𑀉𑀤𑀓𑀲𑁆𑀲 𑀘 𑀦 𑀧𑀕𑁆𑀖𑀭𑀡𑀢𑁆𑀢𑀸. 𑀪𑀕𑀯𑀢𑀸 ‘‘𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀬𑀣𑀸𑀧𑀼𑀘𑁆𑀙𑀺𑀢𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀨𑀸𑀲𑀼𑀓𑀧𑀤𑀁 𑀅𑀧𑀦𑁂𑀢𑁆𑀯𑀸 ‘‘𑀅𑀯𑀺𑀯𑀤𑀫𑀸𑀦𑀸 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸’’𑀢𑀺 𑀅𑀯𑁄𑀘𑀼𑀦𑁆𑀢𑀺 𑀆𑀳 ‘‘𑀅𑀯𑀺𑀯𑀤𑀫𑀸𑀦𑀸 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺. 𑀉𑀓𑁆𑀓𑀡𑁆𑀞𑀺𑀢𑀢𑀸𑀬 𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 ‘‘𑀨𑀸𑀲𑀼𑀢𑀸𑀬 𑀅𑀪𑀸𑀯𑁂𑀦𑀸’’𑀢𑀺 𑀏𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀲𑁂𑀦𑀸𑀲𑀦𑀨𑀸𑀲𑀼𑀢𑀸𑀬 𑀅𑀪𑀸𑀯𑁂𑀦 𑀘 𑀪𑀕𑀯𑀢𑁄 𑀤𑀲𑁆𑀲𑀦𑀸𑀮𑀸𑀪𑁂𑀦 𑀉𑀓𑁆𑀓𑀡𑁆𑀞𑀺𑀢𑀢𑀸𑀬 𑀘𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀦𑀫𑀢𑀕𑁆𑀕𑀺𑀬𑀓𑀣𑀦𑁆𑀢𑀺 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀅𑀦𑀫𑀢𑀕𑁆𑀕𑀺𑀬𑀲𑀼𑀢𑁆𑀢𑀦𑁆𑀢𑀓𑀣𑀁 (𑀲𑀁. 𑀦𑀺. 𑁨.𑁧𑁩𑁫). 𑀲𑀩𑁆𑀩𑁂𑀯 𑀢𑁂 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀅𑀦𑀫𑀢𑀕𑁆𑀕𑀺𑀬𑀓𑀣𑀁. 𑀢𑀢𑁄𑀢𑀺 𑀥𑀫𑁆𑀫𑀓𑀣𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀸 𑀆𑀫𑀦𑁆𑀢𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀁 𑀘𑀻𑀯𑀭𑀦𑁆𑀢𑀺 𑀲𑀗𑁆𑀖𑀸𑀝𑀺𑀁. 𑀲𑀦𑁆𑀢𑀭𑀼𑀢𑁆𑀢𑀭𑁂𑀦𑀸𑀢𑀺 𑀲𑀳 𑀅𑀦𑁆𑀢𑀭𑁂𑀦𑀸𑀢𑀺 𑀲𑀦𑁆𑀢𑀭𑀁, 𑀲𑀦𑁆𑀢𑀭𑀜𑁆𑀘 𑀢𑀁 𑀉𑀢𑁆𑀢𑀭𑀜𑁆𑀘𑁂𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀁, 𑀢𑁂𑀦. 𑀅𑀲𑁆𑀲𑀼𑀢𑀺 𑀪𑀯𑁂𑀬𑁆𑀬𑀼𑀁. 𑀅𑀪𑀯𑀺𑀲𑁆𑀲𑀁𑀲𑀽𑀢𑀺 𑀳𑀺 𑀅𑀢𑁆𑀣𑁄. 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀻𑀦𑀁 𑀲𑀫𑀸𑀦𑀢𑁆𑀣𑀪𑀸𑀯𑁄 𑀲𑀤𑁆𑀤𑀲𑀢𑁆𑀣𑁂𑀲𑀼 𑀯𑀼𑀢𑁆𑀢𑁄𑀬𑁂𑀯. 𑀘𑀲𑀤𑁆𑀤𑁄 𑀉𑀧𑀦𑁆𑀬𑀸𑀲𑀢𑁆𑀣𑁄. 𑀏𑀲 𑀓𑀣𑀺𑀦𑀢𑁆𑀣𑀸𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀦𑀼𑀚𑀸𑀦𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀞𑁂. 𑀯𑁄𑀓𑀸𑀭𑀲𑁆𑀲 𑀦𑀺𑀧𑀸𑀢𑀫𑀢𑁆𑀢𑁂 𑀲𑀢𑀺 𑀓𑀣𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀅𑀢𑁆𑀣𑀢𑀓𑀣𑀺𑀦𑀸𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺. 𑀳𑀺𑀲𑀤𑁆𑀤𑁄 𑀮𑀤𑁆𑀥𑀕𑀼𑀡𑀚𑁄𑀢𑀓𑁄. 𑀧𑀭𑀢𑁄𑀢𑀺 𑀧𑀭𑀫𑁆𑀳𑀺. ‘‘𑀲𑁄 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀯𑀸 ‘‘𑀲𑁄 𑀯𑁄’’𑀢𑀺 𑀯𑀸 𑀅𑀯𑀢𑁆𑀯𑀸 ‘‘𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑁄-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑁄𑀢𑀺 𑀲𑀸𑀫𑀺𑀯𑀘𑀦𑀫𑁂𑀯𑁂𑀢’’𑀦𑁆𑀢𑀺 𑀇𑀫𑀺𑀦𑀸 𑀯𑁄 𑀢𑀼𑀫𑁆𑀳𑀸𑀓𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀢𑀺 ‘‘𑀧𑀭𑀢𑁄 𑀲𑁄 𑀦𑁂𑀲’’𑀦𑁆𑀢𑀺 𑀏𑀢𑁆𑀣 𑀓𑀣𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀲𑁄 𑀦𑁂𑀲𑀦𑁆𑀢𑀺 𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀬𑁂 𑀢𑀼𑀫𑁆𑀳𑁂 𑀅𑀢𑁆𑀣𑀢𑀓𑀣𑀺𑀦𑀸, 𑀢𑁂𑀲𑀁 𑀢𑀼𑀫𑁆𑀳𑀸𑀓𑀦𑁆𑀢𑀺 𑀬𑁄𑀚𑀦𑀸. 𑀓𑀣𑀺𑀦𑀲𑀤𑁆𑀤𑁄 𑀣𑀺𑀭𑀢𑁆𑀣𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄. 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀺𑀓𑀸𑀦𑀁 𑀧𑀜𑁆𑀘𑀸𑀦𑀺𑀲𑀁𑀲𑀸𑀦𑀁 𑀅𑀦𑁆𑀢𑁄𑀓𑀭𑀡𑀲𑀫𑀢𑁆𑀣𑀪𑀸𑀯𑁂 𑀣𑀺𑀭𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀻𑀲𑀼 𑀧𑀜𑁆𑀘𑀸𑀦𑀺𑀲𑀁𑀲𑁂𑀲𑀼. 𑀅𑀦𑀸𑀫𑀦𑁆𑀢𑀘𑀸𑀭𑁄𑀢𑀺 𑀏𑀢𑁆𑀣 𑀘𑀭𑀡𑀁 𑀘𑀸𑀭𑁄, 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀘𑀸𑀭𑁄 𑀅𑀦𑀸𑀫𑀦𑁆𑀢𑀘𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀘𑀭𑀡’’𑀦𑁆𑀢𑀺. ‘‘𑀅𑀲𑀫𑀸𑀤𑀸𑀬 𑀘𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀅𑀲𑀫𑀸𑀤𑀸𑀦𑀘𑀸𑀭𑁄𑀢𑀺 𑀏𑀢𑁆𑀣 𑀧𑀼𑀩𑁆𑀩𑀧𑀤𑁂 𑀢𑁆𑀯𑀸𑀧𑀘𑁆𑀘𑀬𑀲𑁆𑀲 𑀅𑀦𑀸𑀤𑁂𑀲𑀁 𑀓𑀢𑁆𑀯𑀸 𑀅𑀲𑀫𑀸𑀤𑀸𑀦𑀘𑀸𑀭𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀸𑀯𑀢𑀢𑁆𑀣𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀆𑀓𑀸𑀭𑀮𑁄𑀧𑁂𑀦 𑀲𑀦𑁆𑀥𑀻𑀢𑀺 𑀆𑀳 ‘‘𑀬𑀸𑀯𑀢𑀸 𑀘𑀻𑀯𑀭𑁂𑀦 𑀅𑀢𑁆𑀣𑁄’’𑀢𑀺. ‘‘𑀬𑀸𑀯𑀤𑀢𑁆𑀣𑀘𑀻𑀯𑀭’’𑀦𑁆𑀢𑀺𑀧𑀺 𑀧𑀸𑀞𑁄, 𑀏𑀯𑀁 𑀲𑀢𑀺 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀫𑀢𑁆𑀢𑁄. 𑀬𑀸𑀯𑀲𑀤𑁆𑀤𑁄 𑀧𑀭𑀺𑀘𑁆𑀙𑁂𑀤𑀢𑁆𑀣𑀯𑀸𑀘𑀓𑁄, 𑀦 𑀅𑀪𑀺𑀯𑀺𑀛𑀢𑁆𑀣𑀯𑀸𑀘𑀓𑁄. 𑀅𑀢𑁆𑀣𑀲𑀤𑁆𑀤𑁂𑀦 𑀲𑀫𑀸𑀲𑁄 𑀳𑁄𑀢𑀺. 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄𑀢𑀺 𑀏𑀢𑁆𑀣 𑀢𑀢𑁆𑀣𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀣𑀺𑀦𑀢𑁆𑀣𑀸𑀭𑀲𑀻𑀫𑀸𑀬’’𑀦𑁆𑀢𑀺. 𑀢𑀢𑁆𑀭𑀼𑀧𑁆𑀧𑀸𑀤𑁂𑀦𑀸𑀢𑀺 𑀢𑀢𑁆𑀭 𑀓𑀣𑀺𑀦𑀢𑁆𑀣𑀸𑀭𑀲𑀻𑀫𑀸𑀬𑀁 𑀉𑀧𑁆𑀧𑀸𑀤𑁂𑀦 𑀫𑀽𑀮𑁂𑀦. ‘‘𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 𑀘𑀻𑀯𑀭𑀼𑀧𑁆𑀧𑀸𑀤𑁄𑀢𑀺 𑀏𑀢𑁆𑀣 𑀘𑀻𑀯𑀭𑀫𑁂𑀯 𑀉𑀧𑁆𑀧𑀸𑀤𑁄 𑀘𑀻𑀯𑀭𑀼𑀧𑁆𑀧𑀸𑀤𑁄𑀢𑀺 𑀯𑀺𑀲𑁂𑀲𑀦𑀧𑀭𑀧𑀤𑀢𑁆𑀢𑀁 𑀤𑀲𑁆𑀲𑁂𑀢𑀺.

𑀓𑁂𑀢𑀺 𑀓𑀺𑀢𑁆𑀢𑀓𑀸. 𑀇𑀤𑀁 ‘‘𑀕𑀡𑀯𑀲𑁂𑀦𑀸’’𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀣 𑀯𑀸 𑀓𑁂𑀢𑀺 𑀓𑀺𑀦𑁆𑀦𑀸𑀫 𑀯𑀼𑀢𑁆𑀣𑀯𑀲𑁆𑀲𑀸. 𑀇𑀤𑀁 ‘‘𑀯𑀼𑀢𑁆𑀣𑀯𑀲𑁆𑀲𑀯𑀲𑁂𑀦𑀸’’𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑀲𑀳𑀲𑁆𑀲𑀫𑁆𑀧𑀺 𑀚𑀦𑀸 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀺𑀲𑀤𑁆𑀤𑁂𑀦 𑀢𑀢𑁄 𑀅𑀥𑀺𑀓𑀫𑁆𑀧𑀺 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀙𑀺𑀦𑁆𑀦𑀯𑀲𑁆𑀲𑀸 𑀯𑀸𑀢𑀺 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀙𑀺𑀦𑁆𑀦𑀯𑀲𑁆𑀲𑀸 𑀯𑀸. 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑀺 𑀓𑀣𑀺𑀦𑀢𑁆𑀣𑀸𑀭𑀯𑀺𑀳𑀸𑀭𑀢𑁄 𑀅𑀧𑀭𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀲𑀩𑁆𑀩𑁂 𑀙𑀺𑀦𑁆𑀦𑀯𑀲𑁆𑀲𑀸𑀤𑀺𑀓𑀸 𑀪𑀺𑀓𑁆𑀔𑀽 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀢𑀭𑁂𑀲𑀁𑀬𑁂𑀯𑀸𑀢𑀺 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀞𑀫𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸𑀦𑀫𑁂𑀯. 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄𑀢𑀺 𑀧𑀭𑀺𑀧𑀼𑀡𑁆𑀡𑁄 𑀯𑀻𑀲𑀢𑀺𑀯𑀲𑁆𑀲𑁄, 𑀅𑀘𑁆𑀙𑀺𑀦𑁆𑀦𑀯𑀲𑁆𑀲𑁄 𑀯𑀸. 𑀲𑁄𑀢𑀺 𑀲𑀸𑀫𑀡𑁂𑀭𑁄. 𑀇𑀢𑀺 𑀏𑀢𑁆𑀣𑀸𑀧𑀻𑀢𑀺 𑀏𑀯𑀁 𑀏𑀢𑁂𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼𑀧𑀺.

𑀓𑁂𑀦 𑀤𑀺𑀦𑁆𑀦𑀁 𑀓𑀣𑀺𑀦𑀘𑀻𑀯𑀭𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀬𑁂𑀦 𑀓𑁂𑀦𑀘𑀺 𑀤𑀺𑀦𑁆𑀦𑀁 𑀘𑀻𑀯𑀭𑀁 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀯𑀢𑁆𑀢𑀁. 𑀅𑀚𑀸𑀦𑀦𑁆𑀢𑁄𑀢𑀺 𑀅𑀚𑀸𑀦𑀦𑀳𑁂𑀢𑀼. 𑀳𑁂𑀢𑁆𑀯𑀢𑁆𑀣𑁂 𑀳𑀺 𑀅𑀦𑁆𑀢𑀧𑀘𑁆𑀘𑀬𑁄. 𑀢𑀲𑁆𑀲𑀸𑀢𑀺 𑀓𑀣𑀺𑀦𑀤𑀸𑀬𑀓𑀲𑁆𑀲. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦. 𑀅𑀜𑁆𑀜𑀢𑀭𑀧𑀳𑁄𑀦𑀓𑀁 𑀯𑀢𑁆𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀓𑀣𑀺𑀦𑀘𑀻𑀯𑀭𑀲𑁆𑀲. 𑀏𑀢𑁆𑀢𑀓𑀸 𑀦𑀸𑀫 𑀲𑀽𑀘𑀺𑀬𑁄 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀓𑀣𑀺𑀦𑀢𑁆𑀣𑀸𑀭𑀓𑁂𑀦𑀸𑀧𑀺 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑁄 𑀓𑀣𑀺𑀦𑀤𑀸𑀬𑀓𑀁 𑀅𑀧𑁂𑀓𑁆𑀔𑀢𑀺. 𑀯𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀦𑁆𑀢𑀯𑀸𑀬𑀕𑁂𑀳𑀢𑁄 𑀳𑀻’’𑀢𑀺𑀆𑀤𑀺. 𑀆𑀪𑀢𑀲𑀦𑁆𑀢𑀸𑀦𑁂𑀦𑁂𑀯𑀸𑀢𑀺 𑀆𑀪𑀢𑀲𑀦𑁆𑀢𑀢𑀺𑀬𑀸 𑀏𑀯. 𑀔𑀮𑀺𑀫𑀓𑁆𑀔𑀺𑀢𑀲𑀸𑀝𑀓𑁄𑀢𑀺 𑀅𑀳𑀢𑀲𑀸𑀝𑀓𑁄. 𑀲𑁄 𑀳𑀺 𑀔𑀮𑁂𑀦 𑀢𑀓𑁆𑀓𑁂𑀦 𑀓𑀜𑁆𑀚𑀺𑀓𑁂𑀦 𑀫𑀓𑁆𑀔𑀺𑀢𑀲𑀸𑀝𑀓𑀢𑁆𑀢𑀸 ‘‘𑀔𑀮𑀺𑀫𑀓𑁆𑀔𑀺𑀢𑀲𑀸𑀝𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀺𑀦𑀢𑁆𑀣𑀸𑀭𑀲𑀸𑀝𑀓𑀦𑁆𑀢𑀺 𑀓𑀣𑀺𑀦𑀢𑁆𑀣𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀁 𑀲𑀸𑀝𑀓𑀁. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁 𑀤𑀺𑀦𑁆𑀦𑀅𑀳𑀦𑀺 𑀏𑀯. 𑀢𑀲𑁆𑀫𑀺𑀦𑁆𑀢𑀺 𑀧𑀞𑀫𑀁 𑀤𑀺𑀦𑁆𑀦𑁂 𑀓𑀣𑀺𑀦𑀢𑁆𑀣𑀸𑀭𑀲𑀸𑀝𑀓𑁂. 𑀅𑀜𑁆𑀜𑀸𑀦𑀺 𑀘𑀸𑀢𑀺 𑀓𑀣𑀺𑀦𑀲𑀸𑀝𑀓𑀢𑁄 𑀅𑀜𑁆𑀜𑀸𑀦𑀺 𑀘. 𑀘𑀲𑀤𑁆𑀤𑁂𑀦 𑀦 𑀓𑀣𑀺𑀦𑀲𑀸𑀝𑀓𑀫𑁂𑀯 𑀆𑀳𑀭𑀢𑀺, 𑀅𑀜𑁆𑀜𑀸𑀦𑀺 𑀘𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁄𑀢𑀺 𑀓𑀣𑀺𑀦𑀤𑀸𑀬𑀓𑁄. 𑀇𑀢𑀭𑁄𑀢𑀺 𑀧𑀞𑀫𑀁 𑀓𑀣𑀺𑀦𑀤𑀸𑀬𑀓𑁄. 𑀬𑀣𑀸 𑀢𑀣𑀸 𑀑𑀯𑀤𑀺𑀢𑁆𑀯𑀸𑀢𑀺 𑀢𑀯 𑀲𑀦𑁆𑀢𑀓𑀢𑁄 𑀏𑀢𑀲𑁆𑀲 𑀲𑀦𑁆𑀢𑀓𑀁 𑀲𑀗𑁆𑀖𑀲𑁆𑀲 𑀩𑀳𑀼𑀧𑀓𑀸𑀭𑀁, 𑀲𑀗𑁆𑀖𑀲𑁆𑀲 𑀩𑀳𑀼𑀧𑀓𑀸𑀭𑀢𑁆𑀢𑀁 𑀢𑀬𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀁, 𑀏𑀯𑀫𑀺𑀘𑁆𑀙𑀦𑁆𑀢𑀲𑁆𑀲 𑀩𑀳𑀼𑀧𑀼𑀜𑁆𑀜𑀦𑁆𑀢𑀺 𑀬𑁂𑀦 𑀢𑁂𑀦𑀸𑀓𑀸𑀭𑁂𑀦 𑀑𑀯𑀤𑀺𑀢𑁆𑀯𑀸.

𑀓𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲 𑀲𑀗𑁆𑀖𑁄 𑀓𑀣𑀺𑀦𑀘𑀻𑀯𑀭𑀁 𑀤𑁂𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀚𑀺𑀡𑁆𑀡𑀘𑀻𑀯𑀭𑁄 𑀳𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀫𑀳𑀢𑀻 𑀧𑀭𑀺𑀲𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀧𑀭𑀺𑀲𑁄 𑀣𑁂𑀭𑁄. ‘‘𑀦𑀯𑀓𑀢𑀭𑁄 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀲𑁆𑀲 𑀅𑀦𑁂𑀓𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀺 𑀘𑀸’’𑀢𑀺𑀆𑀤𑀺. 𑀅𑀧𑀺 𑀘𑀸𑀢𑀺 𑀏𑀓𑀦𑁆𑀢𑁂𑀦. 𑀢𑀤𑀢𑁆𑀣𑀸𑀬𑀸𑀢𑀺 𑀢𑀲𑁆𑀲 𑀚𑀺𑀡𑁆𑀡𑀘𑀻𑀯𑀭𑀲𑁆𑀲 𑀅𑀢𑁆𑀣𑀸𑀬. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀧𑁂𑀮𑀯𑁄𑀢𑀺 𑀯𑀺𑀭𑀴𑁄. 𑀢𑁂𑀦𑀸𑀧𑀻𑀢𑀺 𑀓𑀣𑀺𑀦𑀢𑁆𑀣𑀸𑀭𑀓𑁂𑀦𑀸𑀧𑀺. 𑀢𑀦𑁆𑀢𑀺 𑀯𑀺𑀥𑀺𑀁. 𑀤𑀸𑀦𑀓𑀫𑁆𑀫𑀯𑀸𑀘𑀸𑀢𑀺 𑀤𑀸𑀦𑀓𑀸𑀭𑀡𑀓𑀫𑁆𑀫𑀯𑀸𑀘𑀸.

𑀏𑀯𑀁 𑀤𑀺𑀦𑁆𑀦𑁂 𑀧𑀦 𑀓𑀣𑀺𑀦𑁂 𑀦𑀺𑀝𑁆𑀞𑀸𑀧𑁂𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀓𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀧𑀕𑁂𑀯 𑀩𑀳𑀽𑀳𑀺 𑀧𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀧𑁆𑀧𑀲𑀢𑁆𑀣𑀦𑁆𑀢𑀺 𑀩𑀼𑀤𑁆𑀥𑁂𑀳𑀺 𑀧𑀲𑀢𑁆𑀣𑀁. 𑀅𑀢𑀻𑀢𑁂 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀧𑀤𑀼𑀫𑀼𑀢𑁆𑀢𑀭𑀲𑁆𑀲. 𑀓𑀣𑀺𑀦𑀁 𑀕𑀡𑁆𑀳𑀺 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀓𑀣𑀺𑀦𑀁, 𑀲𑀢𑁆𑀣𑀸 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀢𑀧𑀭𑀺𑀬𑁄𑀲𑀺𑀢𑀁 𑀓𑀣𑀺𑀦𑀁 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀓𑀢𑀧𑀭𑀺𑀬𑁄𑀲𑀺𑀢𑀁 𑀧𑀦𑀸’’𑀢𑀺𑀆𑀤𑀺. 𑀓𑀣𑀺𑀦𑀁 𑀕𑀳𑁂𑀢𑁆𑀯𑀸 𑀅𑀢𑁆𑀣𑀭𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀦 𑀓𑀣𑀺𑀦𑀢𑁆𑀣𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺 𑀧𑀤𑀁 ‘‘𑀯𑀘𑀦𑀻𑀬𑁄’’𑀢𑀺 𑀧𑀤𑁂 𑀲𑀼𑀤𑁆𑀥𑀓𑀢𑁆𑀢𑀸, ‘‘𑀅𑀦𑀼𑀫𑁄𑀤𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀧𑀤𑁂 𑀓𑀸𑀭𑀺𑀢𑀓𑀢𑁆𑀢𑀸. 𑀓𑀺𑀁 𑀯𑀘𑀦𑀻𑀬𑁄𑀢𑀺 𑀆𑀳 ‘‘𑀅𑀢𑁆𑀣𑀢𑀁…𑀧𑁂… 𑀅𑀦𑀼𑀫𑁄𑀤𑀣𑀸’’𑀢𑀺. ‘‘𑀢𑁂𑀳𑀺 𑀅𑀦𑀼𑀫𑁄𑀤𑀓𑁂𑀳𑀺 𑀪𑀺𑀓𑁆𑀔𑀼𑀳𑀻’’𑀢𑀺 𑀧𑀤𑀁 ‘‘𑀯𑀘𑀦𑀻𑀬𑁄’’𑀢𑀺 𑀧𑀤𑁂 𑀅𑀯𑀼𑀢𑁆𑀢𑀓𑀢𑁆𑀢𑀸, ‘‘𑀅𑀦𑀼𑀫𑁄𑀤𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁 𑀅𑀯𑀼𑀢𑁆𑀢𑀓𑀫𑁆𑀫𑀁, 𑀯𑀸. ‘‘𑀓𑀣𑀺𑀦’’𑀦𑁆𑀢𑀺 𑀥𑀸𑀢𑀼𑀓𑀫𑁆𑀫𑀁 𑀯𑀸 𑀯𑀼𑀢𑁆𑀢𑀓𑀫𑁆𑀫𑀁 𑀯𑀸 𑀉𑀧𑀦𑁂𑀢𑀩𑁆𑀩𑀁. 𑀓𑀺𑀁 𑀯𑀘𑀦𑀻𑀬𑁄𑀢𑀺 𑀆𑀳 ‘‘𑀅𑀢𑁆𑀣𑀢𑀁…𑀧𑁂… 𑀅𑀦𑀼𑀫𑁄𑀤𑀸𑀫𑀸’’𑀢𑀺. 𑀇𑀢𑀭𑁂𑀳𑀺 𑀘𑀸𑀢𑀺 𑀅𑀦𑀼𑀫𑁄𑀤𑀓𑁂𑀳𑀺 𑀘. 𑀲𑀩𑁆𑀩𑁂𑀲𑀦𑁆𑀢𑀺 𑀅𑀢𑁆𑀣𑀸𑀭𑀓𑀅𑀦𑀼𑀫𑁄𑀤𑀓𑀸𑀦𑀁. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀢𑁆𑀣𑀢𑀪𑀸𑀯𑀁, ‘‘𑀤𑁆𑀯𑀺𑀦𑁆𑀦𑀁…𑀧𑁂… 𑀅𑀦𑀼𑀫𑁄𑀤𑀓𑀲𑁆𑀲 𑀘𑀸’’𑀢𑀺 𑀯𑀘𑀦𑀁 𑀯𑀸.

𑀏𑀯𑀁 𑀓𑀣𑀺𑀦𑁂 𑀅𑀢𑁆𑀣𑀢𑁂 𑀲𑀢𑀺 𑀧𑀦𑀸𑀢𑀺 𑀬𑁄𑀚𑀦𑀸. 𑀬𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀸. 𑀅𑀯𑀺𑀘𑀸𑀭𑁂𑀢𑁆𑀯𑀸𑀯𑀸𑀢𑀺 ‘‘𑀓𑀣𑀺𑀦𑀢𑁆𑀣𑀸𑀭𑀓𑀲𑁆𑀲 𑀤𑁂𑀫𑀸’’𑀢𑀺 𑀯𑀸 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 𑀅𑀯𑀺𑀘𑀸𑀭𑁂𑀢𑁆𑀯𑀸 𑀏𑀯. 𑀲𑁂𑀲𑀘𑀻𑀯𑀭𑀸𑀦𑀺𑀧𑀻𑀢𑀺 𑀓𑀣𑀺𑀦𑀢𑁆𑀣𑀸𑀭𑀘𑀻𑀯𑀭𑀢𑁄 𑀲𑁂𑀲𑀘𑀻𑀯𑀭𑀸𑀦𑀺𑀧𑀺. 𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀧𑀮𑁄𑀓𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀫𑁆𑀫𑀯𑀸𑀘𑀸𑀬 𑀓𑀺𑀘𑁆𑀘𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀲𑁆𑀲𑀸𑀯𑀸𑀲𑀺𑀓𑀝𑁆𑀞𑀺𑀢𑀺𑀓𑀸𑀬𑀸𑀢𑀺 𑀯𑀲𑁆𑀲𑀸𑀯𑀸𑀲𑀓𑀸𑀮𑁂 𑀧𑀯𑀢𑁆𑀢𑀸𑀬 𑀞𑀺𑀢𑀺𑀓𑀸𑀬. 𑀕𑀭𑀼𑀪𑀡𑁆𑀟𑀦𑁆𑀢𑀺 𑀫𑀜𑁆𑀘𑀩𑀺𑀩𑁆𑀩𑁄𑀳𑀦𑀸𑀤𑀺𑀕𑀭𑀼𑀪𑀡𑁆𑀟𑀁. 𑀏𑀓𑀲𑀻𑀫𑀸𑀬𑀸𑀢𑀺 𑀏𑀓𑀸𑀬 𑀉𑀧𑀘𑀸𑀭𑀲𑀻𑀫𑀸𑀬.

𑁩𑁦𑁮. 𑀬𑀣𑀸 𑀘𑀸𑀢𑀺 𑀏𑀢𑁆𑀣 𑀬𑀣𑀸𑀲𑀤𑁆𑀤𑁄 𑀬𑀁𑀲𑀤𑁆𑀤𑀢𑁆𑀣𑁄. 𑀬𑁂𑀦 𑀯𑀺𑀥𑀺𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀫𑀳𑀸𑀪𑀽𑀫𑀺𑀓𑀦𑁆𑀢𑀺 𑀫𑀳𑀸𑀯𑀺𑀲𑀬𑀁. 𑀘𑀢𑀼𑀯𑀻𑀲𑀢𑀺𑀆𑀓𑀸𑀭𑀯𑀦𑁆𑀢𑀢𑀸𑀬 𑀫𑀳𑀸𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄𑀢𑀺 𑀅𑀦𑀢𑁆𑀣𑀢𑀮𑀓𑁆𑀔𑀡𑀢𑁄. 𑀧𑀭𑀺𑀯𑀸𑀭𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀇𑀥 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣𑀸𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀲𑀼. 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀧𑀫𑀸𑀡𑀲𑁆𑀲 𑀉𑀕𑁆𑀕𑀳𑀡𑀢𑁆𑀣𑀁 𑀦𑀔𑀸𑀤𑀻𑀳𑀺 𑀮𑀺𑀔𑀦𑀁 𑀉𑀮𑁆𑀮𑀺𑀔𑀺𑀢𑀁, 𑀉𑀮𑁆𑀮𑀺𑀔𑀺𑀢𑀁 𑀫𑀢𑁆𑀢𑀁 𑀧𑀫𑀸𑀡𑀁 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀻𑀖𑀢𑁄 𑀘 𑀧𑀼𑀣𑀼𑀮𑀢𑁄 𑀘 𑀧𑀫𑀸𑀡𑀕𑀳𑀡𑀫𑀢𑁆𑀢𑁂𑀦𑀸’’𑀢𑀺. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀧𑀫𑀸𑀡𑀁 𑀳𑀻’’𑀢𑀺𑀆𑀤𑀺. 𑀤𑀲𑁆𑀲𑁂𑀦𑁆𑀢𑁄 𑀳𑀼𑀢𑁆𑀯𑀸 𑀉𑀮𑁆𑀮𑀺𑀔𑀢𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀓𑀦𑁆𑀢𑀺 𑀧𑀜𑁆𑀘𑀧𑀫𑀸𑀡𑀁, 𑀧𑀜𑁆𑀘𑀲𑀫𑀽𑀳𑀁 𑀯𑀸 𑀔𑀡𑁆𑀟𑀁. 𑀯𑀸𑀲𑀤𑁆𑀤𑁂𑀦 𑀅𑀜𑁆𑀜𑀸𑀦𑀺𑀧𑀺 𑀢𑁂𑀭𑀲𑀓𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀫𑁄𑀖𑀲𑀼𑀢𑁆𑀢𑀓𑀸𑀭𑁄𑀧𑀦𑀫𑀢𑁆𑀢𑁂𑀦𑀸𑀢𑀺 𑀫𑁄𑀖𑀲𑀼𑀢𑁆𑀢𑀲𑁆𑀲 𑀘𑀻𑀯𑀭𑀲𑁆𑀲𑀽𑀧𑀭𑀺 𑀆𑀭𑁄𑀧𑀦𑀫𑀢𑁆𑀢𑁂𑀦. 𑀤𑀻𑀖𑀲𑀺𑀩𑁆𑀩𑀺𑀢𑀫𑀢𑁆𑀢𑁂𑀦𑀸𑀢𑀺 𑀤𑀻𑀖𑀢𑁄 𑀲𑀺𑀩𑁆𑀩𑀺𑀢𑀫𑀢𑁆𑀢𑁂𑀦. 𑀫𑀼𑀤𑁆𑀤𑀺𑀬𑀧𑀝𑁆𑀝𑀩𑀦𑁆𑀥𑀦𑀫𑀢𑁆𑀢𑁂𑀦𑀸𑀢𑀺 𑀫𑀼𑀤𑁆𑀤𑀺𑀬𑀧𑀝𑁆𑀝𑀲𑁆𑀲 𑀩𑀦𑁆𑀥𑀦𑀫𑀢𑁆𑀢𑁂𑀦. 𑀤𑁆𑀯𑁂 𑀘𑀺𑀫𑀺𑀮𑀺𑀓𑀸𑀬𑁄𑀢𑀺 𑀤𑁆𑀯𑁂 𑀧𑀺𑀮𑁄𑀢𑀺𑀓𑀸𑀬𑁄. 𑀧𑀞𑀫𑀘𑀺𑀫𑀺𑀮𑀺𑀓𑀸𑀢𑀺 𑀓𑀣𑀺𑀦𑀘𑀺𑀫𑀺𑀮𑀺𑀓𑀢𑁄 𑀅𑀜𑁆𑀜𑀸 𑀅𑀢𑁆𑀢𑀦𑁄 𑀧𑀓𑀢𑀺𑀘𑀺𑀫𑀺𑀮𑀺𑀓𑀸 𑀖𑀝𑁂𑀢𑁆𑀯𑀸 𑀞𑀧𑀺𑀢𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀁 𑀧𑀞𑀫𑀘𑀺𑀫𑀺𑀮𑀺𑀓’’𑀦𑁆𑀢𑀺 𑀧𑀸𑀞𑀲𑁂𑀲𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀓𑀣𑀺𑀦𑀲𑀸𑀝𑀓𑀲𑁆𑀲 𑀓𑀼𑀘𑁆𑀙𑀺𑀘𑀺𑀫𑀺𑀮𑀺𑀓𑀁 𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀧𑀓𑀢𑀺𑀘𑀻𑀯𑀭𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀘𑀻𑀯𑀭𑀲𑁆𑀲. 𑀧𑀓𑀢𑀺𑀧𑀝𑁆𑀝𑀩𑀦𑁆𑀥𑀘𑀻𑀯𑀭𑀦𑁆𑀢𑀺 𑀧𑀓𑀢𑀺𑀧𑀝𑁆𑀝𑁂𑀦 𑀩𑀦𑁆𑀥𑀘𑀻𑀯𑀭𑀁. 𑀧𑀺𑀝𑁆𑀞𑀺𑀅𑀦𑀼𑀯𑀸𑀢𑀸𑀭𑁄𑀧𑀦𑀫𑀢𑁆𑀢𑁂𑀦𑀸𑀢𑀺 𑀤𑀻𑀖𑀢𑁄 𑀅𑀦𑀼𑀯𑀸𑀢𑀲𑁆𑀲 𑀘𑀻𑀯𑀭𑀲𑁆𑀲𑀽𑀧𑀭𑀺 𑀆𑀭𑁄𑀧𑀦𑀫𑀢𑁆𑀢𑁂𑀦. 𑀤𑀻𑀖𑀸𑀦𑀼𑀯𑀸𑀢𑀜𑁆𑀳𑀺 𑀧𑀸𑀭𑀼𑀧𑀦𑀓𑀸𑀮𑁂 𑀧𑀺𑀝𑁆𑀞𑀺𑀬𑀁 𑀞𑀺𑀢𑀢𑁆𑀢𑀸 𑀧𑀺𑀝𑁆𑀞𑀺𑀅𑀦𑀼𑀯𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀼𑀘𑁆𑀙𑀺𑀅𑀦𑀼𑀯𑀸𑀢𑀸𑀭𑁄𑀧𑀦𑀫𑀢𑁆𑀢𑁂𑀦𑀸𑀢𑀺 𑀧𑀼𑀣𑀼𑀮𑀢𑁄 𑀅𑀦𑀼𑀯𑀸𑀢𑀲𑁆𑀲 𑀘𑀻𑀯𑀭𑀲𑁆𑀲𑀽𑀧𑀭𑀺 𑀆𑀭𑁄𑀧𑀦𑀫𑀢𑁆𑀢𑁂𑀦. 𑀧𑀼𑀣𑀼𑀮𑀸𑀦𑀼𑀯𑀸𑀢𑀜𑁆𑀳𑀺 𑀧𑀸𑀭𑀼𑀧𑀦𑀓𑀸𑀮𑁂 𑀓𑀼𑀘𑁆𑀙𑀺𑀬𑀁 𑀞𑀺𑀢𑀢𑁆𑀢𑀸 𑀓𑀼𑀘𑁆𑀙𑀺𑀅𑀦𑀼𑀯𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀕𑀦𑁆𑀢𑀼𑀓𑀧𑀝𑁆𑀝𑀸𑀭𑁄𑀧𑀦𑀫𑀢𑁆𑀢𑁂𑀦𑀸𑀢𑀺 𑀆𑀕𑀦𑁆𑀢𑀼𑀓𑀧𑀝𑁆𑀝𑀲𑁆𑀲 𑀘𑀻𑀯𑀭𑀲𑁆𑀲𑀽𑀧𑀭𑀺 𑀆𑀭𑁄𑀧𑀦𑀫𑀢𑁆𑀢𑁂𑀦. 𑀯𑀸𑀢𑀺 𑀅𑀣𑀯𑀸.

𑀲𑀸𑀭𑀼𑀧𑁆𑀧𑀦𑁆𑀢𑀺 𑀲𑀫𑀡𑀸𑀦𑀼𑀘𑁆𑀙𑀯𑀺𑀓𑀁. 𑀧𑀭𑀺𑀓𑀣𑀸𑀬𑀸𑀢𑀺 𑀧𑀭𑀺𑀬𑀸𑀬𑁂𑀦 𑀉𑀧𑁆𑀧𑀸𑀤𑀺𑀢𑀸𑀬 𑀓𑀣𑀸𑀬. 𑀅𑀢𑀺𑀉𑀓𑁆𑀓𑀝𑁆𑀞𑀁 𑀯𑀝𑁆𑀝𑀢𑀻𑀢𑀺 𑀅𑀢𑀺𑀉𑀓𑁆𑀓𑀝𑁆𑀞𑀁 𑀏𑀯 𑀯𑀝𑁆𑀝𑀢𑀺. 𑀑𑀢𑀺𑀡𑁆𑀡𑀲𑀤𑀺𑀲𑀫𑁂𑀯𑀸𑀢𑀺 𑀑𑀢𑀺𑀡𑁆𑀡𑁂𑀦 𑀯𑀢𑁆𑀣𑁂𑀦 𑀲𑀤𑀺𑀲𑀫𑁂𑀯 𑀓𑀣𑀺𑀦𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀤𑀼𑀯𑀺𑀥𑁂𑀲𑀼 𑀲𑀦𑁆𑀦𑀺𑀥𑀻𑀲𑀼. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁 𑀤𑀺𑀦𑁆𑀦𑀅𑀳𑀦𑀺 𑀏𑀯.

𑀭𑀢𑁆𑀢𑀺𑀦𑀺𑀲𑁆𑀲𑀕𑁆𑀕𑀺𑀬𑁂𑀦𑀸𑀢𑀺 𑀭𑀢𑁆𑀢𑀺𑀅𑀢𑀺𑀓𑁆𑀓𑀦𑁆𑀢𑀁 𑀳𑀼𑀢𑁆𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦. 𑀅𑀜𑁆𑀜𑁂𑀦𑀸𑀢𑀺 𑀢𑀺𑀘𑀻𑀯𑀭𑀢𑁄 𑀅𑀜𑁆𑀜𑁂𑀦. 𑀲𑀫𑀡𑁆𑀟𑀮𑀺𑀓𑀢𑀦𑁆𑀢𑀺 𑀲𑀳 𑀫𑀳𑀸𑀫𑀡𑁆𑀟𑀮𑀅𑀟𑁆𑀠𑀫𑀡𑁆𑀟𑀮𑁂𑀦 𑀓𑀢𑀁.

𑁩𑁦𑁯. 𑀏𑀯𑀁 𑀘𑀢𑀼𑀯𑀻𑀲𑀢𑀺𑀆𑀓𑀸𑀭𑀁 𑀅𑀦𑀢𑁆𑀣𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀢𑁆𑀢𑀭𑀲𑀸𑀓𑀸𑀭𑀁 𑀅𑀢𑁆𑀣𑀢𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀢𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀭𑀺𑀪𑁄𑀕𑀁 𑀦 𑀳𑀦𑀺𑀢𑁆𑀣 𑀦 𑀕𑀘𑁆𑀙𑀺𑀢𑁆𑀣𑀸𑀢𑀺 𑀅𑀳𑀢𑀁, 𑀧𑀭𑀺𑀪𑁄𑀕𑁂𑀦 𑀦 𑀳𑀦𑀺𑀢𑀩𑁆𑀩𑀁 𑀦 𑀳𑀺𑀁𑀲𑀺𑀢𑀩𑁆𑀩𑀦𑁆𑀢𑀺 𑀯𑀸 𑀅𑀳𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀭𑀺𑀪𑀼𑀢𑁆𑀢𑁂𑀦𑀸’’𑀢𑀺. ‘‘𑀅𑀳𑀢𑀲𑀤𑀺𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀳𑀢𑀓𑀧𑁆𑀧𑁂𑀦𑀸𑀢𑀺 𑀏𑀢𑁆𑀣 𑀓𑀧𑁆𑀧𑀲𑀤𑁆𑀤𑁄 𑀲𑀤𑀺𑀲𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀸𑀧𑀡𑀺𑀓𑁂𑀦𑀸𑀢𑀺 𑀏𑀢𑁆𑀣 𑀧𑀲𑀸𑀭𑀺𑀢𑁄 𑀆𑀧𑀡𑁄 𑀧𑀸𑀧𑀡𑁄, 𑀢𑀲𑁆𑀫𑀺𑀁 𑀧𑀢𑀺𑀢𑀁 𑀧𑀸𑀧𑀡𑀺𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀧𑀡𑀤𑁆𑀯𑀸𑀭𑁂 𑀧𑀢𑀺𑀢’’𑀦𑁆𑀢𑀺. ‘‘𑀧𑀺𑀮𑁄𑀢𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀡𑀺𑀓𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑁂𑀳𑀺 ‘‘𑀦𑀺𑀫𑀺𑀢𑁆𑀢𑀓𑀢𑁂𑀦𑀸’’𑀢𑀺𑀆𑀤𑀻𑀳𑀺 𑀯𑀺𑀧𑀮𑁆𑀮𑀸𑀲𑁂𑀦 𑀏𑀯. 𑀢𑀢𑁆𑀣𑀸𑀢𑀺 𑀧𑀭𑀺𑀯𑀸𑀭𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀇𑀥𑀸𑀢𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂. 𑀅𑀯𑀼𑀘𑁆𑀘𑀫𑀸𑀦𑁂𑀦 𑀢𑁂𑀦 𑀯𑀘𑀦𑁂𑀦 𑀧𑀭𑀺𑀳𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁧𑁦. 𑀢𑀢𑁆𑀣𑀸𑀢𑀺 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀯𑁂 𑀉𑀩𑁆𑀪𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺𑀆𑀤𑀺𑀧𑀸𑀞𑁂. 𑀚𑀦𑁂𑀢𑁆𑀢𑀺𑀬𑁄 𑀫𑀸𑀢𑀭𑁄𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀧𑀼𑀢𑁆𑀢𑁂 𑀫𑀸𑀦𑁂𑀢𑀻𑀢𑀺 𑀫𑀸𑀢𑀸, 𑀥𑀫𑁆𑀫𑁂𑀦 𑀧𑀼𑀢𑁆𑀢𑁂𑀳𑀺 𑀫𑀸𑀦𑀺𑀬𑀢𑀻𑀢𑀺 𑀯𑀸 𑀫𑀸𑀢𑀸, 𑀲𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀫𑀸𑀢𑀺𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀺𑀦𑀼𑀩𑁆𑀪𑀸𑀭𑀦𑁆𑀢𑀺 𑀘 𑀓𑀣𑀺𑀦𑀼𑀤𑁆𑀥𑀸𑀭𑀦𑁆𑀢𑀺 𑀘 𑀅𑀢𑁆𑀣𑀢𑁄 𑀲𑀤𑀺𑀲𑀁. 𑀏𑀢𑀸𑀢𑀺 𑀏𑀢𑀸 𑀧𑀤𑀚𑀸𑀢𑀺𑀬𑁄. 𑀢𑀸𑀲𑀽𑀢𑀺 𑀅𑀝𑁆𑀞𑀲𑀼 𑀫𑀸𑀢𑀺𑀓𑀸𑀲𑀼. 𑀅𑀲𑁆𑀲𑀸𑀢𑀺 𑀓𑀣𑀺𑀦𑀼𑀩𑁆𑀪𑀸𑀭𑀲𑁆𑀲.