𑁫. 𑀘𑀫𑁆𑀫𑀓𑁆𑀔𑀦𑁆𑀥𑀓𑀁

𑁧𑁪𑁭. 𑀲𑁄𑀡𑀓𑁄𑀴𑀺𑀯𑀺𑀲𑀯𑀢𑁆𑀣𑀼𑀓𑀣𑀸

𑁨𑁪𑁨. 𑀘𑀫𑁆𑀫𑀓𑁆𑀔𑀦𑁆𑀥𑀓𑁂 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀦𑁆𑀢𑀺 𑀏𑀢𑁆𑀣 𑀇𑀲𑁆𑀲𑀭𑀲𑁆𑀲 𑀪𑀸𑀯𑁄 𑀇𑀲𑁆𑀲𑀭𑀺𑀬𑀁, 𑀅𑀥𑀺𑀧𑀢𑀺𑀦𑁄 𑀪𑀸𑀯𑁄 𑀆𑀥𑀺𑀧𑀘𑁆𑀘𑀁, 𑀇𑀲𑁆𑀲𑀭𑀺𑀬𑀜𑁆𑀘 𑀆𑀥𑀺𑀧𑀘𑁆𑀘𑀜𑁆𑀘, 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀲𑁆𑀲𑀭𑀪𑀸𑀯𑁂𑀦 𑀘 𑀅𑀥𑀺𑀧𑀢𑀺𑀪𑀸𑀯𑁂𑀦 𑀘 𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺. ‘‘𑀭𑀸𑀚𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸 𑀭𑀚𑁆𑀚𑀦𑁆𑀢𑀺 𑀏𑀢𑁆𑀣 𑀭𑀜𑁆𑀜𑁄 𑀪𑀸𑀯𑁄 𑀭𑀚𑁆𑀚𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀭𑀜𑁆𑀜𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺 𑀇𑀫𑀺𑀦𑀸 𑀭𑀜𑁆𑀜𑁄 𑀇𑀤𑀁 𑀭𑀚𑁆𑀚𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀓𑁄𑀴𑀺𑀯𑀻𑀲𑁄𑀢𑀺 𑀕𑁄𑀢𑁆𑀢’’𑀦𑁆𑀢𑀺 𑀇𑀤𑀁 𑀅𑀝𑁆𑀞𑀓𑀣𑀸𑀯𑀸𑀤𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀧𑀤𑀸𑀦𑁂 𑀧𑀦 𑀢𑀲𑁆𑀲 𑀚𑀸𑀢𑀓𑁆𑀔𑀡𑁂 𑀧𑀺𑀢𑀭𑀸 𑀓𑁄𑀝𑀺𑀯𑀻𑀲𑀥𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 ‘‘𑀓𑁄𑀴𑀺𑀯𑀻𑀲𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣

‘‘𑀚𑀸𑀢𑀧𑀼𑀢𑁆𑀢𑀲𑁆𑀲 𑀫𑁂 𑀲𑀼𑀢𑁆𑀯𑀸, 𑀧𑀺𑀢𑀼 𑀙𑀦𑁆𑀤𑁄 𑀅𑀬𑀁 𑀅𑀳𑀼;

𑀤𑀤𑀸𑀫𑀳𑀁 𑀓𑀼𑀫𑀸𑀭𑀲𑁆𑀲, 𑀯𑀻𑀲𑀓𑁄𑀝𑀻 𑀅𑀦𑀽𑀦𑀓𑀸’’𑀢𑀺.

𑀇𑀫𑀺𑀦𑀸 𑀧𑀸𑀴𑀺𑀦𑀬𑁂𑀦 ‘‘𑀓𑁄𑀝𑀺𑀯𑀻𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀘𑀓𑁆𑀓𑀯𑀸𑀴’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀝𑀓𑀸𑀭𑀲𑁆𑀲 𑀴𑀓𑀸𑀭𑀁 𑀓𑀢𑁆𑀯𑀸 𑀓𑁄𑀴𑀺𑀯𑀻𑀲𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀚𑀦𑀯𑀡𑁆𑀡𑀸𑀦𑀻𑀢𑀺 𑀅𑀜𑁆𑀚𑀦𑀲𑁆𑀲 𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀏𑀢𑁂𑀲𑀦𑁆𑀢𑀺 𑀅𑀜𑁆𑀚𑀦𑀯𑀡𑁆𑀡𑀸𑀦𑀺. 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀲𑁄𑀡𑁄. 𑀞𑀧𑁂𑀲𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀳𑀻𑀢𑀺 𑀅𑀲𑀻𑀢𑀺𑀲𑀳𑀲𑁆𑀲𑀧𑀼𑀭𑀺𑀲𑁂𑀳𑀺. 𑀧𑀡𑁆𑀡𑀲𑀸𑀮𑀦𑁆𑀢𑀺 𑀧𑀡𑁆𑀡𑁂𑀦 𑀙𑀸𑀤𑀺𑀢𑀁, 𑀢𑁂𑀦 𑀘 𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀸𑀮𑀁. 𑀉𑀡𑁆𑀡𑀧𑀸𑀯𑀸𑀭𑀡𑀦𑁆𑀢𑀺 𑀉𑀡𑁆𑀡𑀫𑀬𑀁 𑀉𑀢𑁆𑀢𑀭𑀸𑀲𑀗𑁆𑀕𑀁. 𑀧𑀸𑀤𑀧𑀼𑀜𑁆𑀙𑀦𑀺𑀓𑀦𑁆𑀢𑀺 𑀧𑀸𑀤𑀁 𑀧𑀼𑀜𑁆𑀙𑀢𑀺 𑀲𑁄𑀥𑁂𑀢𑀺 𑀅𑀦𑁂𑀦𑀸𑀢𑀺 𑀧𑀸𑀤𑀧𑀼𑀜𑁆𑀙𑀦𑀺𑀬𑀁, 𑀢𑀤𑁂𑀯 𑀧𑀸𑀤𑀧𑀼𑀜𑁆𑀙𑀦𑀺𑀓𑀁. 𑀲𑀩𑁆𑀩𑁂𑀯𑀸𑀢𑀺 𑀲𑁄𑀡𑁂𑀦 𑀲𑀳 𑀅𑀲𑀻𑀢𑀺𑀲𑀳𑀲𑁆𑀲𑀧𑀼𑀭𑀺𑀲𑀸 𑀏𑀯. 𑀢𑀲𑁆𑀲 𑀘𑀸𑀢𑀺 𑀲𑁄𑀡𑀲𑁆𑀲 𑀘. 𑀧𑀼𑀩𑁆𑀩𑀬𑁄𑀕𑁄𑀢𑀺 𑀧𑀼𑀩𑁆𑀩𑀽𑀧𑀸𑀬𑁄.

𑀅𑀲𑀻𑀢𑀺𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀻𑀢𑀺 𑀏𑀢𑁆𑀣 𑀕𑀸𑀫𑁂𑀲𑀼 𑀯𑀲𑀦𑁆𑀢𑀻𑀢𑀺 𑀕𑀸𑀫𑀺𑀓𑀸, 𑀢𑁂𑀲𑀁 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀅𑀲𑀻𑀢𑀺𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀲𑀽’’𑀢𑀺𑀆𑀤𑀺. 𑀢𑀢𑁆𑀣 ‘‘𑀓𑀼𑀮𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑀲𑀦𑁆𑀢𑁆𑀬𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀡𑀺𑀓𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀤𑁆𑀤𑀦𑁆𑀢𑀭𑁄𑀧𑀺 𑀅𑀲𑀻𑀢𑀺𑀲𑀳𑀲𑁆𑀲𑀲𑀤𑁆𑀤𑀸𑀦𑀁 𑀲𑀫𑀸𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑁂𑀦𑀘𑀺𑀤𑁂𑀯𑀸𑀢𑀺 𑀏𑀢𑁆𑀣 ‘‘𑀓𑁂𑀦𑀘𑀺 𑀇𑀯𑀸’’𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀫𑀢𑁆𑀢𑁄, 𑀇𑀯𑀲𑀤𑁆𑀤𑁄 𑀉𑀧𑀫𑀢𑁆𑀣𑁄𑀢𑀺 𑀆𑀳 ‘‘𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀯𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀦 𑀧𑀦𑀸’’𑀢𑀺𑀆𑀤𑀺𑀦𑀸 𑀏𑀯𑀨𑀮𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀓𑁂𑀦𑀘𑀺 𑀏𑀯𑀸’’𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀏𑀯𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀲𑁆𑀲𑀸𑀢𑀺 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀢𑀲𑁆𑀲𑀸𑀢𑀺 𑀲𑁄𑀡𑀲𑁆𑀲. 𑀤𑀲𑁆𑀲𑀦𑀸𑀬 𑀅𑀜𑁆𑀜𑀢𑁆𑀭 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀭𑀸𑀚𑀸𑀢𑀺 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸, 𑀲𑀦𑁆𑀦𑀺𑀧𑀸𑀢𑀸𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑁂 𑀅𑀢𑁆𑀣𑁂𑀢𑀺 𑀏𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀲𑀤𑁆𑀤𑁄 𑀇𑀥𑀮𑁄𑀓𑀢𑁆𑀣𑁄, 𑀇𑀓𑀲𑀤𑁆𑀤𑁄 𑀳𑀺𑀢𑀢𑁆𑀣𑁂 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀇𑀥𑀮𑁄𑀓𑀳𑀺𑀢𑁂’’𑀢𑀺. ‘‘𑀅𑀫𑁆𑀳𑀸𑀓’’𑀦𑁆𑀢𑀺 𑀇𑀫𑀺𑀦𑀸 ‘‘𑀲𑁄 𑀦𑁄 𑀪𑀕𑀯𑀸’’𑀢𑀺 𑀏𑀢𑁆𑀣 𑀦𑁄𑀲𑀤𑁆𑀤𑁄 𑀅𑀫𑁆𑀳𑀲𑀤𑁆𑀤𑀓𑀸𑀭𑀺𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀫𑁆𑀳𑀸𑀓𑀁 𑀲𑁄 𑀪𑀕𑀯𑀸𑀢𑀺 𑀬𑁄𑀚𑀦𑀸. 𑀲𑀫𑁆𑀧𑀭𑀸𑀬𑀺𑀓𑁂𑀢𑀺 𑀧𑀭𑀮𑁄𑀓𑀳𑀺𑀢𑁂.

‘‘𑀚𑀸𑀦𑀸𑀧𑁂𑀫𑀻’’𑀢𑀺 𑀇𑀫𑀺𑀦𑀸 ‘‘𑀧𑀝𑀺𑀯𑁂𑀤𑁂𑀫𑀻’’𑀢𑀺 𑀏𑀢𑁆𑀣 𑀯𑀺𑀤𑀥𑀸𑀢𑀼𑀬𑀸 𑀜𑀸𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀓𑀸𑀬 𑀦𑀺𑀫𑀼𑀚𑁆𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀝𑀺𑀓𑀸𑀲𑀤𑁆𑀤𑁄 𑀅𑀟𑁆𑀠𑁂𑀦𑁆𑀤𑀼𑀧𑀸𑀲𑀸𑀡𑀯𑀸𑀘𑀓𑁄𑀢𑀺 𑀆𑀳 ‘‘𑀅𑀟𑁆𑀠𑀘𑀦𑁆𑀤𑀧𑀸𑀲𑀸𑀡𑁂’’𑀢𑀺. 𑀲𑁄 𑀳𑀺 𑀧𑀝𑀢𑀺 𑀅𑀟𑁆𑀠𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀝𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀓𑀸𑀲𑀤𑁆𑀤𑁄𑀬𑀁 𑀅𑀢𑁆𑀣𑀭𑀡𑀯𑀺𑀲𑁂𑀲𑁂𑀧𑀺 𑀯𑀢𑁆𑀢𑀢𑀺. 𑀬𑀲𑁆𑀲 𑀤𑀸𑀦𑀻𑀢𑀺 𑀏𑀢𑁆𑀣 𑀬𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀲𑀁 𑀳𑀺𑀢𑀓𑀭𑀡𑀻𑀬𑀢𑁆𑀣𑀲𑁆𑀲𑀸’’𑀢𑀺. 𑀇𑀫𑀺𑀦𑀸 𑀅𑀬𑀁 𑀬𑀁𑀲𑀤𑁆𑀤𑁄 𑀦 𑀢𑀁𑀲𑀤𑁆𑀤𑀸𑀧𑁂𑀓𑁆𑀔𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀬𑀲𑁆𑀲𑀸𑀢𑀺 𑀬𑁄 𑀅𑀲𑁆𑀲. 𑀅𑀲𑁆𑀲 𑀢𑁂𑀲𑀁 𑀳𑀺𑀢𑀓𑀭𑀡𑀻𑀬𑀢𑁆𑀣𑀲𑁆𑀲 𑀬𑁄 𑀓𑀸𑀮𑁄 𑀅𑀢𑁆𑀣𑀺, 𑀢𑀁 𑀓𑀸𑀮𑀁 𑀪𑀕𑀯𑀸 𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀅𑀲𑀻𑀢𑀺𑀕𑀸𑀫𑀺𑀓𑀲𑀳𑀲𑁆𑀲𑀸𑀦𑀁. 𑀧𑀘𑁆𑀙𑀸𑀬𑀸𑀬𑀦𑁆𑀢𑀺 𑀏𑀢𑁆𑀣 𑀧𑀓𑀸𑀭𑁄 𑀧𑀘𑁆𑀘𑀦𑁆𑀢𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀙𑀸𑀬𑀸𑀬’’𑀦𑁆𑀢𑀺. 𑀲𑀫𑁆𑀫𑀦𑀸𑀳𑀭𑀦𑁆𑀢𑀻𑀢𑀺 𑀲𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀸𑀕𑀢𑀁 𑀅𑀪𑀺𑀫𑀼𑀔𑀁 𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀻’’𑀢𑀺. ‘‘𑀧𑀲𑀸𑀤𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀓𑁄𑀥𑀯𑀲𑁂𑀦𑀸’’𑀢𑀺𑀆𑀤𑀻𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀧𑀼𑀦 𑀯𑀺𑀲𑀺𑀝𑁆𑀞𑀢𑀭’’𑀦𑁆𑀢𑀺 𑀇𑀫𑀺𑀦𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬𑀸𑀢𑀺 𑀦𑀺𑀧𑀸𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀲𑁄𑀡𑀲𑁆𑀲 𑀧𑀩𑁆𑀩𑀚𑁆𑀚𑀸𑀓𑀣𑀸

𑁨𑁪𑁩. ‘‘𑀫𑀓𑁆𑀔𑀺𑀢𑁄’’𑀢𑀺 𑀇𑀫𑀺𑀦𑀸 𑀨𑀼𑀭𑀢𑀺 𑀯𑀺𑀧𑁆𑀨𑀸𑀭𑀢𑀺 𑀩𑁆𑀬𑀸𑀧𑁂𑀢𑀻𑀢𑀺 𑀨𑀼𑀝𑁄𑀢𑀺 𑀯𑀼𑀢𑁆𑀢𑁂 𑀨𑀼𑀭𑀥𑀸𑀢𑀼𑀬𑀸 𑀯𑀺𑀧𑁆𑀨𑀸𑀭𑀡𑀁 𑀦𑀸𑀫 𑀫𑀓𑁆𑀔𑀺𑀢𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀇𑀫𑀺𑀦𑀸 𑀕𑀸𑀯𑁄 𑀆𑀳𑀦𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑀯𑀸𑀖𑀸𑀢𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀪𑀺. 𑀢𑀦𑁆𑀢𑀺𑀲𑁆𑀲𑀭𑁂𑀢𑀺 𑀢𑀦𑁆𑀢𑀺𑀬𑀸 𑀕𑀼𑀡𑀲𑁆𑀲 𑀲𑀭𑁂. 𑀯𑀸𑀤𑀦𑀓𑀼𑀲𑀮𑁄𑀢𑀺 𑀯𑀸𑀤𑀦𑁂 𑀓𑀼𑀲𑀮𑁄. 𑀔𑀭𑀫𑀼𑀘𑁆𑀙𑀺𑀢𑀸𑀢𑀺 𑀔𑀭𑁂𑀦 𑀫𑀼𑀘𑁆𑀙𑀺𑀢𑀸. ‘‘𑀲𑀭𑀲𑀫𑁆𑀧𑀦𑁆𑀦𑀸’’𑀢𑀺 𑀇𑀫𑀺𑀦𑀸 𑀲𑀭𑁄 𑀏𑀢𑀺𑀲𑁆𑀲𑀫𑀢𑁆𑀣𑀻𑀢𑀺 𑀲𑀭𑀯𑀢𑀻, 𑀯𑀻𑀡𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀜𑁆𑀜𑀸𑀢𑀺 𑀏𑀢𑁆𑀣 𑀓𑀫𑁆𑀫𑀲𑀤𑁆𑀤𑀢𑁄 𑀔𑀫𑀢𑁆𑀣𑁂 𑀜𑁆𑀜𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀓𑀫𑁆𑀫𑀓𑁆𑀔𑀫𑀸’’𑀢𑀺. 𑀫𑀦𑁆𑀤𑀫𑀼𑀘𑁆𑀙𑀦𑀸𑀢𑀺 𑀫𑀦𑁆𑀤𑁂𑀦 𑀫𑀼𑀘𑁆𑀙𑀦𑀸. 𑀲𑀫𑁂 𑀕𑀼𑀡𑁂𑀢𑀺 𑀏𑀢𑁆𑀣 𑀲𑀫𑁄 𑀦𑀸𑀫 𑀫𑀚𑁆𑀛𑀺𑀫𑁄, 𑀕𑀼𑀡𑁄 𑀦𑀸𑀫 𑀫𑀼𑀔𑁆𑀬𑀢𑁄 𑀯𑀻𑀡𑀸𑀬 𑀚𑀺𑀬𑀸, 𑀉𑀧𑀘𑀸𑀭𑀢𑁄 𑀲𑀭𑁄𑀢𑀺 𑀆𑀳 ‘‘𑀫𑀚𑁆𑀛𑀺𑀫𑁂 𑀲𑀭𑁂’’𑀢𑀺. 𑀯𑀻𑀭𑀺𑀬𑀲𑀫𑀣𑀦𑁆𑀢𑀺 𑀏𑀢𑁆𑀣 𑀯𑀻𑀭𑀺𑀬𑀜𑁆𑀘 𑀲𑀫𑀣𑁄 𑀘𑀸𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀯𑀻𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀫𑀣’’𑀦𑁆𑀢𑀺. 𑀇𑀫𑀺𑀦𑀸 𑀯𑀻𑀭𑀺𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀫𑀣𑀁 𑀯𑀻𑀭𑀺𑀬𑀲𑀫𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀻𑀭𑀺𑀬𑀁 𑀲𑀫𑀣𑁂𑀦 𑀬𑁄𑀚𑁂𑀳𑀻’’𑀢𑀺 𑀇𑀫𑀺𑀦𑀸 𑀯𑀻𑀭𑀺𑀬𑁂𑀦 𑀲𑀫𑀣𑀁 𑀬𑁄𑀚𑁂𑀳𑀻𑀢𑀺 𑀅𑀢𑁆𑀣𑁄𑀧𑀺 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑁂𑀯 𑀕𑀳𑁂𑀢𑀩𑁆𑀩𑀸𑀦𑀺, 𑀦 𑀅𑀜𑁆𑀜𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦’’𑀦𑁆𑀢𑀺. ‘‘𑀲𑀫𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸 𑀢𑀸𑀧𑀘𑁆𑀘𑀬𑁄 𑀪𑀸𑀯𑀢𑁆𑀣𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀢’’𑀦𑁆𑀢𑀺𑀧𑀸𑀞𑁂, 𑀲𑀤𑁆𑀥𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀯𑀸. 𑀢𑀢𑁆𑀣 𑀘 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀳𑀻𑀢𑀺 𑀏𑀢𑁆𑀣 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀣𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀲𑀫𑀣𑁂 𑀲𑀢𑀻’’𑀢𑀺. 𑀆𑀤𑀸𑀲𑁂 𑀲𑀢𑀺 𑀫𑀼𑀔𑀩𑀺𑀫𑁆𑀩𑁂𑀦 𑀓𑀢𑁆𑀢𑀼𑀪𑀽𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀇𑀯, 𑀢𑀲𑁆𑀫𑀺𑀁 𑀲𑀫𑀣𑁂 𑀲𑀢𑀺 𑀬𑁂𑀦 𑀦𑀺𑀫𑀺𑀢𑁆𑀢𑁂𑀦 𑀓𑀢𑁆𑀢𑀼𑀪𑀽𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀫𑀣𑀲𑁆𑀲 𑀦𑀺𑀫𑀺𑀢𑁆𑀢𑀁 𑀲𑀫𑀣𑀦𑀺𑀫𑀺𑀢𑁆𑀢𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑀣𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀏𑀓𑀲𑁂𑀲𑁂𑀦 𑀯𑀸 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀯𑀸 ‘‘𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁨𑁪𑁪. 𑀅𑀜𑁆𑀜𑀁 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀅𑀢𑁆𑀢𑀸𑀦𑀁 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀚𑀸𑀦𑀸𑀧𑁂𑀢𑀻𑀢𑀺 𑀆𑀳 ‘‘𑀅𑀭𑀳𑀸 𑀅𑀳’’𑀦𑁆𑀢𑀺 𑀚𑀸𑀦𑀸𑀧𑁂𑀬𑁆𑀬’’𑀦𑁆𑀢𑀺. 𑀙 𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 𑀞𑀸𑀦𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀙 𑀓𑀸𑀭𑀡𑀸𑀦𑀻’’𑀢𑀺. ‘‘𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀅𑀥𑀺𑀫𑀼𑀢𑁆𑀢𑁄𑀢𑀺 𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀤𑁆𑀤𑀢𑁆𑀣𑁄 𑀧𑀦 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀅𑀥𑀺𑀫𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀭𑀳𑀢𑁆𑀢𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀅𑀲𑀫𑁆𑀫𑁄𑀳𑁄𑀢𑀻𑀢𑀺 𑀏𑀢𑁆𑀣 𑀆𑀓𑀸𑀭𑀢𑁆𑀣𑀯𑀸𑀘𑀓𑁄 𑀇𑀢𑀺𑀲𑀤𑁆𑀤𑁄 𑀧𑀼𑀩𑁆𑀩𑀧𑀤𑁂𑀲𑀼𑀧𑀺 𑀬𑁄𑀚𑁂𑀢𑁆𑀯𑀸 ‘‘𑀦𑁂𑀓𑁆𑀔𑀫𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀧𑀝𑀺𑀯𑁂𑀥𑀭𑀳𑀺𑀢’’𑀦𑁆𑀢𑀺 𑀇𑀫𑀺𑀦𑀸 𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑀲𑁆𑀲 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. ‘‘𑀅𑀲𑀫𑁆𑀫𑀺𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀓𑁂𑀯𑀮𑀲𑀤𑁆𑀤𑀲𑁆𑀲 𑀅𑀲𑀫𑁆𑀫𑀺𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀘𑀬𑀦𑁆𑀢𑀺 𑀏𑀢𑁆𑀣 𑀧𑀝𑀺𑀲𑀤𑁆𑀤𑁄 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑁆𑀣𑁄, 𑀘𑀺𑀥𑀸𑀢𑀼 𑀯𑀟𑁆𑀠𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑁂𑀦 𑀯𑀟𑁆𑀠𑀺’’𑀦𑁆𑀢𑀺, 𑀫𑀕𑁆𑀕𑀧𑀝𑀺𑀯𑁂𑀥𑁂𑀦 𑀯𑀻𑀢𑀭𑀸𑀕𑀢𑁆𑀢𑀸𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀦𑀺𑀦𑁆𑀦𑀫𑀸𑀦𑀲𑁄𑀬𑁂𑀯𑀸𑀢𑀺 𑀢𑀲𑁆𑀫𑀺𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂 𑀦𑀺𑀦𑁆𑀦𑀫𑀸𑀦𑀲𑁄 𑀏𑀯.

𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑁆𑀢𑀺 𑀏𑀢𑁆𑀣 𑀮𑀪𑀦𑀁 𑀮𑀸𑀪𑁄, 𑀲𑀼𑀝𑁆𑀞𑀼 𑀓𑀭𑀡𑀁 𑀲𑀓𑁆𑀓𑀸𑀭𑁄, 𑀲𑀺𑀮𑁄𑀓𑀦𑀁 𑀯𑀡𑁆𑀡𑀪𑀡𑀦𑀁 𑀲𑀺𑀮𑁄𑀓𑁄, 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄 𑀘 𑀲𑀺𑀮𑁄𑀓𑁄 𑀘 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀧𑀘𑁆𑀘𑀬𑀮𑀸𑀪𑀜𑁆𑀘𑀸’’𑀢𑀺𑀆𑀤𑀺. 𑀢𑁂𑀲𑀁𑀬𑁂𑀯𑀸𑀢𑀺 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁂𑀯. ‘‘𑀲𑀻𑀮𑀜𑁆𑀘 𑀯𑀢𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀲𑀻𑀮𑀩𑁆𑀩𑀢𑀦𑁆𑀢𑀺𑀧𑀤𑀲𑁆𑀲 𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺.

𑀪𑀼𑀲𑀲𑀤𑁆𑀤𑀲𑁆𑀲 𑀓𑀮𑀺𑀗𑁆𑀕𑀭𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀩𑀮𑀯𑀦𑁆𑀢𑁄’’𑀢𑀺 ‘‘𑀔𑀻𑀡𑀸𑀲𑀯𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀦𑁂𑀯𑀲𑁆𑀲𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. ‘‘𑀕𑀳𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀤𑀺𑀬𑀦𑁆𑀢𑀻𑀢𑀺 𑀏𑀢𑁆𑀣 𑀧𑀭𑀺𑀧𑀼𑀩𑁆𑀩𑀆𑀧𑀼𑀩𑁆𑀩𑀤𑀸𑀥𑀸𑀢𑀼𑀬𑀸 𑀕𑀳𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀓𑀺𑀮𑁂𑀲𑀸 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀓𑀺𑀮𑁂𑀲𑀸𑀦𑀁. 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀇𑀜𑁆𑀚𑀦𑀁 𑀓𑀫𑁆𑀧𑀦𑀁 𑀇𑀜𑁆𑀚𑀁, 𑀦 𑀇𑀜𑁆𑀚𑀁 𑀅𑀦𑁂𑀜𑁆𑀚𑀁, 𑀢𑀫𑁂𑀯 𑀆𑀦𑁂𑀜𑁆𑀚𑀁, 𑀢𑀁 𑀧𑀢𑁆𑀢𑀦𑁆𑀢𑀺 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀘𑀮𑀦𑀧𑁆𑀧𑀢𑁆𑀢’’𑀦𑁆𑀢𑀺. 𑀯𑀬𑀜𑁆𑀘𑀸𑀢𑀺 𑀘𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄𑀢𑀺 𑀆𑀳 ‘‘𑀯𑀬𑀫𑁆𑀧𑀺 𑀉𑀧𑁆𑀧𑀸𑀤𑀫𑁆𑀧𑀻’’𑀢𑀺.

𑀉𑀧𑀸𑀤𑀸𑀦𑀓𑁆𑀔𑀬𑀲𑁆𑀲𑀸𑀢𑀺 𑀏𑀢𑁆𑀣 𑀉𑀧𑀸𑀤𑀸𑀦𑀓𑁆𑀔𑀬𑀁 𑀅𑀥𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦’’𑀦𑁆𑀢𑀺. ‘‘𑀉𑀧𑁆𑀧𑀸𑀤𑀜𑁆𑀘 𑀯𑀬𑀜𑁆𑀘𑀸’’𑀢𑀺 𑀇𑀫𑀺𑀦𑀸 𑀆𑀬𑀢𑀦𑀼𑀧𑁆𑀧𑀸𑀤𑀦𑁆𑀢𑀺 𑀏𑀢𑁆𑀣 𑀉𑀧𑁆𑀧𑀸𑀤𑀲𑀤𑁆𑀤𑁂𑀦 𑀯𑀬𑁄𑀧𑀺 𑀅𑀯𑀺𑀦𑀸𑀪𑀸𑀯𑀢𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸𑀢𑀺 𑀦𑀺𑀧𑀸𑀢𑁄 𑀜𑀸𑀬𑀢𑁆𑀣𑁄𑀢𑀺 𑀆𑀳 ‘‘𑀳𑁂𑀢𑀼𑀦𑀸 𑀦𑀬𑁂𑀦𑀸’’𑀢𑀺. 𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀲𑀦𑁆𑀢𑀲𑀤𑁆𑀤𑀲𑁆𑀲 𑀔𑁂𑀤𑀸𑀤𑀻𑀲𑀼𑀧𑀺 𑀧𑀯𑀢𑁆𑀢𑀢𑁆𑀢𑀸 𑀇𑀥 𑀦𑀺𑀩𑁆𑀩𑀼𑀢𑀢𑁆𑀣𑁂 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺. 𑀅𑀦𑀼𑀦𑀬𑀧𑀝𑀺𑀖𑁂𑀳𑀻𑀢𑀺 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀦𑁂𑀢𑀻𑀢𑀺 𑀅𑀦𑀼𑀦𑀬𑁄, 𑀭𑀸𑀕𑁄, 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀖𑁄, 𑀤𑁄𑀲𑁄, 𑀅𑀦𑀼𑀦𑀬𑁄 𑀘 𑀧𑀝𑀺𑀖𑁄 𑀘 𑀅𑀦𑀼𑀦𑀬𑀧𑀝𑀺𑀖𑀸, 𑀢𑁂𑀳𑀺. 𑀇𑀝𑁆𑀞𑁂 𑀅𑀦𑀼𑀦𑀬𑁄, 𑀅𑀦𑀺𑀝𑁆𑀞𑁂 𑀧𑀝𑀺𑀖𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄.

𑁧𑁪𑁮. 𑀤𑀺𑀕𑀼𑀡𑀸𑀤𑀺𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁪𑁫. 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀏𑀢𑁆𑀣 𑀅𑀜𑁆𑀜𑀲𑀤𑁆𑀤𑁄 𑀲𑀩𑁆𑀩𑀦𑀸𑀫𑀲𑀼𑀤𑁆𑀥𑀦𑀸𑀫𑀯𑀲𑁂𑀦 𑀤𑀼𑀯𑀺𑀥𑁄. 𑀢𑁂𑀲𑀼 𑀇𑀥 𑀲𑀼𑀤𑁆𑀥𑀦𑀸𑀫𑀁, 𑀢𑀁 𑀧𑀦 𑀩𑀸𑀮𑁂 𑀘 𑀤𑀸𑀭𑀓𑁂 𑀘 𑀅𑀭𑀳𑀢𑁆𑀢𑁂 𑀘 𑀧𑀯𑀢𑁆𑀢𑀢𑀺, 𑀇𑀥 𑀧𑀦 𑀅𑀭𑀳𑀢𑁆𑀢𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀦𑁆𑀢𑀻’’𑀢𑀺. 𑀬𑁂𑀦𑀸𑀢𑀺 𑀲𑀪𑀸𑀯𑁂𑀦. 𑀅𑀭𑀳𑀸𑀢𑀺 𑀜𑀸𑀬𑀢𑀻𑀢𑀺 𑀅𑀭𑀳𑀸𑀇𑀢𑀺 𑀅𑀢𑁆𑀣𑁄 𑀜𑀸𑀬𑀢𑀺. 𑀲𑁄𑀢𑀺 𑀲𑀪𑀸𑀯𑁄. 𑀲𑀼𑀢𑁆𑀢𑀯𑀡𑁆𑀡𑀦𑀸𑀢𑁄𑀬𑁂𑀯𑀸𑀢𑀺 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀢𑁄 𑀏𑀯. 𑀦 𑀉𑀧𑀦𑀻𑀢𑁄𑀢𑀺 𑀦 𑀉𑀧𑀭𑀺 𑀦𑀻𑀢𑁄. 𑀏𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸𑀢𑀺 𑀏𑀓𑀘𑁆𑀘𑁂𑀲𑀤𑁆𑀤𑁄 𑀅𑀜𑁆𑀜𑁂𑀧𑀭𑀺𑀬𑀸𑀬𑁄, 𑀫𑁄𑀖𑀲𑀤𑁆𑀤𑁄 𑀢𑀼𑀘𑁆𑀙𑀯𑁂𑀯𑀘𑀦𑁄𑀢𑀺 𑀆𑀳 ‘‘𑀅𑀜𑁆𑀜𑁂 𑀧𑀦 𑀢𑀼𑀘𑁆𑀙𑀧𑀼𑀭𑀺𑀲𑀸’’𑀢𑀺. ‘‘𑀳𑀲𑀫𑀸𑀦𑀸 𑀯𑀺𑀬𑀸’’𑀢𑀺 𑀇𑀫𑀺𑀦𑀸 𑀳𑀲𑀫𑀸𑀦𑀓𑀁 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀫𑀜𑁆𑀜𑁂𑀲𑀤𑁆𑀤𑁄 𑀯𑀺𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀲𑀦𑁆𑀢𑀫𑁂𑀯𑀸𑀢𑀺 𑀅𑀯𑀺𑀚𑁆𑀚𑀫𑀸𑀦𑀁𑀬𑁂𑀯. 𑀏𑀓𑀧𑀮𑀸𑀲𑀺𑀓𑀦𑁆𑀢𑀺 𑀏𑀢𑁆𑀣 𑀧𑀮𑀸𑀲𑀲𑀤𑁆𑀤𑁄 𑀧𑀡𑁆𑀡𑀯𑀸𑀘𑀓𑁄. 𑀧𑀝𑀮𑀁 𑀦𑀸𑀫 𑀧𑀡𑁆𑀡𑀁 𑀯𑀺𑀬 𑀳𑁄𑀢𑀺, 𑀢𑀲𑁆𑀫𑀸 ‘‘𑀏𑀓𑀧𑀝𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀲𑀻𑀢𑀺𑀲𑀓𑀝𑀯𑀸𑀳𑁂𑀢𑀺 𑀏𑀢𑁆𑀣 𑀅𑀲𑀻𑀢𑀺 𑀧𑀤𑀁 𑀲𑀓𑀝𑀧𑀤𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀅𑀲𑀻𑀢𑀺𑀲𑀓𑀝𑁂𑀳𑀺 𑀯𑀳𑀺𑀢𑀩𑁆𑀩𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀤𑁆𑀯𑁂 𑀲𑀓𑀝𑀪𑀸𑀭𑀸 𑀏𑀓𑁄 𑀯𑀸𑀳𑁄’’𑀢𑀺 𑀇𑀫𑀺𑀦𑀸 𑀯𑀸𑀳𑀸𑀦𑀁 𑀘𑀢𑁆𑀢𑀸𑀮𑀻𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀳𑀢𑁆𑀣𑀺𑀓𑀜𑁆𑀘 𑀅𑀦𑀻𑀓𑀦𑁆𑀢𑀺 𑀏𑀢𑁆𑀣 𑀅𑀦𑀻𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀙 𑀳𑀢𑁆𑀣𑀺𑀦𑀺𑀬𑁄 𑀘𑀸’’𑀢𑀺𑀆𑀤𑀺. 𑀲𑀢𑁆𑀢𑀦𑁆𑀦𑀁 𑀳𑀢𑁆𑀣𑀻𑀦𑀁 𑀲𑀫𑀽𑀳𑁄 𑀲𑀢𑁆𑀢𑀳𑀢𑁆𑀣𑀺𑀓𑀁. 𑀲𑀢𑁆𑀢𑀅𑀦𑀻𑀓𑀢𑁆𑀢𑀸 𑀏𑀓𑀽𑀦𑀧𑀜𑁆𑀜𑀸𑀲𑀳𑀢𑁆𑀣𑀺𑀦𑁄 𑀳𑁄𑀦𑁆𑀢𑀺. 𑀢𑁂𑀲𑀼 𑀲𑀢𑁆𑀢 𑀳𑀢𑁆𑀣𑀺𑀦𑁄, 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀳𑀢𑁆𑀣𑀺𑀦𑀺𑀬𑁄 𑀳𑁄𑀦𑁆𑀢𑀺. 𑀤𑁆𑀯𑀺𑀕𑀼𑀡𑀸𑀢𑀺 𑀏𑀢𑁆𑀣 𑀕𑀼𑀡𑀲𑀤𑁆𑀤𑁄 𑀧𑀝𑀮𑀢𑁆𑀣𑁄𑀢𑀺 𑀆𑀳 ‘‘𑀤𑁆𑀯𑀺𑀧𑀝𑀮𑀸’’𑀢𑀺. 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀢𑀺 𑀏𑀢𑁆𑀣 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 𑀕𑀼𑀡𑀗𑁆𑀕𑀼𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀧𑀝𑀮𑀢𑁄 𑀧𑀝𑁆𑀞𑀸𑀬 𑀯𑀼𑀘𑁆𑀘𑀢𑀻’’𑀢𑀺. 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀸𑀢𑀺 𑀧𑀝𑀮𑀧𑀝𑀮𑀸 𑀉𑀧𑀸𑀳𑀦𑀸, 𑀩𑀳𑀼𑀧𑀝𑀮𑀸 𑀉𑀧𑀸𑀳𑀦𑀸𑀢𑀺 𑀅𑀢𑁆𑀣𑁄. 𑀉𑀓𑀸𑀭𑁂𑀦 𑀲𑀳 𑀬𑁄𑀚𑁂𑀢𑁆𑀯𑀸 𑀕𑀓𑀸𑀭𑁄 𑀲𑀚𑁆𑀛𑀸𑀬𑀺𑀢𑀩𑁆𑀩𑁄 𑀘 𑀮𑀺𑀔𑀺𑀢𑀩𑁆𑀩𑁄 𑀘. 𑀇𑀤𑀸𑀦𑀺 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀉𑀓𑀸𑀭𑁄 𑀦 𑀤𑀺𑀲𑁆𑀲𑀢𑀺.

𑁧𑁪𑁯. 𑀲𑀩𑁆𑀩𑀦𑀻𑀮𑀺𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁪𑁬. 𑀲𑀩𑁆𑀩𑀸𑀯 𑀦𑀻𑀮𑀺𑀓𑀸𑀢𑀺 𑀲𑀩𑁆𑀩𑀸𑀯 𑀉𑀧𑀸𑀳𑀦𑀸𑀬𑁄 𑀦𑀻𑀮𑀺𑀓𑀸, 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀦𑀻𑀮𑀫𑁂𑀢𑀸𑀲𑀦𑁆𑀢𑀺 𑀲𑀩𑁆𑀩𑀦𑀻𑀮𑀺𑀓𑀸𑀢𑀺𑀧𑀺 𑀓𑀸𑀢𑀩𑁆𑀩𑁄. 𑀢𑀢𑁆𑀣 𑀘𑀸𑀢𑀺 𑀢𑁂𑀲𑀼 𑀦𑀻𑀮𑀺𑀓𑀸𑀤𑀻𑀲𑀼 𑀘. 𑀉𑀫𑁆𑀫𑀸𑀭𑀧𑀼𑀧𑁆𑀨𑀲𑁆𑀲 𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀏𑀢𑀺𑀲𑁆𑀲𑀸𑀢𑀺 𑀉𑀫𑁆𑀫𑀸𑀭𑀧𑀼𑀧𑁆𑀨𑀯𑀡𑁆𑀡𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸𑀢𑀺 𑀏𑀢𑁆𑀣 𑀅𑀤𑁆𑀤𑁄𑀢𑀺 𑀅𑀮𑁆𑀮𑁄. 𑀅𑀭𑀺𑀝𑁆𑀞𑁄𑀢𑀺 𑀨𑁂𑀡𑀺𑀮𑀭𑀼𑀓𑁆𑀔𑁄 𑀯𑀸 𑀓𑀸𑀓𑁄 𑀯𑀸, 𑀢𑀲𑁆𑀫𑀸 𑀅𑀤𑁆𑀤𑁄 𑀅𑀮𑁆𑀮𑁄 𑀅𑀭𑀺𑀝𑁆𑀞𑁄 𑀨𑁂𑀡𑀺𑀮𑀭𑀼𑀓𑁆𑀔𑁄, 𑀓𑀸𑀓𑁄 𑀯𑀸𑀢𑀺 𑀅𑀤𑁆𑀤𑀸𑀭𑀺𑀝𑁆𑀞𑁄, 𑀢𑀤𑁂𑀯 𑀅𑀤𑁆𑀤𑀸𑀭𑀺𑀝𑁆𑀞𑀓𑁄, 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑁆𑀲 𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀏𑀢𑀺𑀲𑁆𑀲𑀸𑀢𑀺 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀸. 𑀏𑀢𑀸𑀲𑀽𑀢𑀺 𑀲𑀩𑁆𑀩𑀦𑀻𑀮𑀺𑀓𑀸𑀤𑀻𑀲𑀼. 𑀧𑀼𑀜𑁆𑀙𑀺𑀢𑁆𑀯𑀸𑀢𑀺 𑀧𑀭𑀺𑀫𑀚𑁆𑀚𑀺𑀢𑁆𑀯𑀸. 𑀅𑀧𑁆𑀧𑀫𑀢𑁆𑀢𑀓𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀲𑀩𑁆𑀩𑀦𑀻𑀮𑀸𑀤𑀺𑀓𑁂 𑀪𑀺𑀦𑁆𑀦𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀅𑀢𑁆𑀣𑁄.

‘‘𑀬𑀸𑀲𑀁 𑀯𑀤𑁆𑀥𑀸𑀬𑁂𑀯 𑀦𑀻𑀮𑀸’’𑀢𑀺 𑀇𑀫𑀺𑀦𑀸 𑀦𑀻𑀮𑀓𑀸 𑀯𑀤𑁆𑀥𑀺𑀓𑀸 𑀏𑀢𑀸𑀲𑀦𑁆𑀢𑀺 𑀦𑀻𑀮𑀓𑀯𑀤𑁆𑀥𑀺𑀓𑀸𑀢𑀺 𑀙𑀝𑁆𑀞𑀻𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀯𑀤𑁆𑀥𑀺𑀓𑀸𑀢𑀺 𑀘 𑀦𑀤𑁆𑀥𑀺. 𑀲𑀸 𑀳𑀺 𑀉𑀧𑀸𑀳𑀦𑀢𑀮𑀢𑁄 𑀯𑀤𑁆𑀥𑀬𑀢𑀻𑀢𑀺 𑀯𑀤𑁆𑀥𑀺𑀓𑀸𑀢𑀺 𑀘 𑀉𑀧𑀸𑀳𑀦𑀢𑀮𑀁 𑀩𑀦𑁆𑀥𑀢𑀺 𑀇𑀫𑀸𑀬𑀸𑀢𑀺 𑀯𑀤𑁆𑀥𑀺𑀓𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀻𑀢𑀓𑀯𑀤𑁆𑀥𑀺𑀓𑀸𑀤𑀻𑀲𑀼. 𑀏𑀢𑀸𑀬𑁄𑀧𑀻𑀢𑀺 𑀦𑀻𑀮𑀓𑀯𑀤𑁆𑀥𑀺𑀓𑀸𑀤𑀺𑀓𑀸 𑀉𑀧𑀸𑀳𑀦𑀸𑀬𑁄𑀧𑀺. 𑀢𑀮𑁂𑀢𑀺 𑀉𑀧𑀸𑀳𑀦𑀸𑀬 𑀢𑀮𑁂. ‘‘𑀔𑀮𑁆𑀮𑀓𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀔𑀮𑁆𑀮𑀓𑁂𑀦 𑀩𑀦𑁆𑀥𑀺𑀢𑀩𑁆𑀩𑀸𑀢𑀺 𑀔𑀮𑁆𑀮𑀓𑀩𑀤𑁆𑀥𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑁄𑀦𑀓𑀉𑀧𑀸𑀳𑀦𑀸𑀢𑀺 𑀬𑁄𑀦𑀓𑀚𑀸𑀢𑀻𑀦𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀸𑀳𑀦𑀸. 𑀧𑀮𑀺𑀕𑀼𑀡𑁆𑀞𑁂𑀢𑁆𑀯𑀸𑀢𑀺 𑀧𑀭𑀺𑀲𑀫𑀦𑁆𑀢𑀢𑁄 𑀯𑁂𑀞𑁂𑀢𑁆𑀯𑀸. ‘‘𑀉𑀧𑀭𑀺…𑀧𑁂… 𑀚𑀗𑁆𑀖’’𑀦𑁆𑀢𑀺 𑀇𑀫𑀺𑀦𑀸 𑀧𑀼𑀝𑀩𑀤𑁆𑀥𑀢𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀢𑀽𑀮𑀧𑀺𑀘𑀼𑀦𑀸𑀢𑀺 𑀢𑀽𑀮𑀲𑀗𑁆𑀔𑀸𑀢𑁂𑀦 𑀧𑀺𑀘𑀼𑀦𑀸. ‘‘𑀢𑀺𑀢𑁆𑀢𑀺𑀭𑀧𑀢𑁆𑀢𑀲𑀤𑀺𑀲𑀸’’𑀢𑀺 𑀇𑀫𑀺𑀦𑀸 𑀢𑀺𑀢𑁆𑀢𑀺𑀭𑀲𑁆𑀲 𑀧𑀢𑁆𑀢𑀁 𑀯𑀺𑀬 𑀢𑀺𑀢𑁆𑀢𑀺𑀭𑀧𑀢𑁆𑀢𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀺𑀢𑁆𑀢𑀺𑀭𑁄𑀢𑀺 𑀘 𑀏𑀓𑁄 𑀲𑀓𑀼𑀡𑀯𑀺𑀲𑁂𑀲𑁄. 𑀓𑀡𑁆𑀡𑀺𑀓𑀝𑁆𑀞𑀸𑀦𑁂𑀢𑀺 𑀤𑁆𑀯𑀺𑀦𑁆𑀦𑀁 𑀯𑀤𑁆𑀥𑀺𑀓𑀸𑀦𑀁 𑀏𑀓𑀢𑁄 𑀲𑀫𑀸𑀕𑀫𑀝𑁆𑀞𑀸𑀦𑁂. ‘‘𑀫𑁂𑀡𑁆𑀟…𑀧𑁂… 𑀓𑀢𑀸’’𑀢𑀺 𑀇𑀫𑀺𑀦𑀸 𑀫𑁂𑀡𑁆𑀟𑀲𑁆𑀲 𑀯𑀺𑀲𑀸𑀡𑁂𑀦 𑀲𑀤𑀺𑀲𑀸 𑀯𑀤𑁆𑀥𑀺𑀓𑀸 𑀏𑀢𑀸𑀲𑀦𑁆𑀢𑀺 𑀫𑁂𑀡𑁆𑀟𑀯𑀺𑀲𑀸𑀡𑀯𑀤𑁆𑀥𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀫𑁂𑀡𑁆𑀟𑀅𑀚𑀲𑀺𑀗𑁆𑀕𑀲𑀡𑁆𑀞𑀸𑀦𑁂 𑀯𑀤𑁆𑀥𑁂 𑀬𑁄𑀚𑁂𑀢𑁆𑀯𑀸 𑀓𑀢𑀸, 𑀢𑀣𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀘𑁆𑀙𑀺𑀓𑀸…𑀧𑁂… 𑀓𑀢𑀸’’𑀢𑀺 𑀇𑀫𑀺𑀦𑀸 𑀯𑀺𑀘𑁆𑀙𑀺𑀓𑀸𑀬 𑀅𑀴𑁄 𑀯𑀺𑀘𑁆𑀙𑀺𑀓𑀸𑀴𑁄, 𑀲𑁄 𑀯𑀺𑀬 𑀯𑀤𑁆𑀥𑀺𑀓𑀸 𑀏𑀢𑀸𑀲𑀦𑁆𑀢𑀺 𑀯𑀺𑀘𑁆𑀙𑀺𑀓𑀸𑀴𑀺𑀓𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀴𑀲𑀤𑁆𑀤𑁄 ‘‘𑀅𑀴𑀘𑁆𑀙𑀺𑀦𑁆𑀦𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁧𑁯) 𑀅𑀗𑁆𑀕𑀼𑀝𑁆𑀞𑀯𑀸𑀘𑀓𑁄, 𑀇𑀥 𑀧𑀦 𑀦𑀗𑁆𑀕𑀼𑀝𑁆𑀞𑀯𑀸𑀘𑀓𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀗𑁆𑀕𑀼𑀝𑁆𑀞𑀲𑀡𑁆𑀞𑀸𑀦𑁂’’𑀢𑀺. 𑀢𑀮𑁂𑀲𑀽𑀢𑀺 𑀉𑀧𑀸𑀳𑀦𑀸𑀬 𑀢𑀮𑁂𑀲𑀼. ‘‘𑀫𑁄𑀭…𑀧𑁂… 𑀲𑀺𑀩𑁆𑀩𑀺𑀓𑀸’’𑀢𑀺 𑀇𑀫𑀺𑀦𑀸 𑀫𑁄𑀭𑀧𑀺𑀜𑁆𑀙𑁂𑀳𑀺 𑀧𑀭𑀺𑀲𑀫𑀦𑁆𑀢𑀢𑁄, 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀲𑀺𑀩𑁆𑀩𑀺𑀢𑀸 𑀫𑁄𑀭𑀧𑀺𑀜𑁆𑀙𑀧𑀭𑀺𑀲𑀺𑀩𑁆𑀩𑀺𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀭𑀸 𑀉𑀧𑀸𑀳𑀦𑀸𑀬𑁄𑀢𑀺 𑀏𑀢𑁆𑀣 𑀘𑀺𑀢𑁆𑀭𑀲𑀤𑁆𑀤𑁄 𑀯𑀺𑀘𑀺𑀢𑁆𑀭𑀢𑁆𑀣𑁄𑀢𑀺 𑀆𑀳 ‘‘𑀯𑀺𑀘𑀺𑀢𑁆𑀭𑀸’’𑀢𑀺. 𑀏𑀢𑀸𑀲𑀽𑀢𑀺 𑀔𑀮𑁆𑀮𑀓𑀩𑀤𑁆𑀥𑀸𑀤𑀻𑀲𑀼. 𑀯𑀴𑀜𑁆𑀚𑁂𑀢𑀩𑁆𑀩𑀸𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸. 𑀯𑀴𑀚𑀺 𑀧𑀭𑀺𑀪𑁄𑀕𑁂𑀢𑀺 𑀥𑀸𑀢𑀼𑀧𑀸𑀞𑁄 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁫 𑀚𑀓𑀸𑀭𑀦𑁆𑀢𑀥𑀸𑀢𑀼). 𑀢𑀸𑀮𑀼𑀚𑁄 𑀢𑀢𑀺𑀬𑁄. 𑀢𑁂𑀲𑀼 𑀧𑀦𑀸𑀢𑀺 𑀔𑀮𑁆𑀮𑀓𑀸𑀤𑀻𑀲𑀼 𑀧𑀦. 𑀲𑀢𑀺 𑀲𑀦𑁆𑀢𑁂𑀲𑀽𑀢𑀺 𑀬𑁄𑀚𑀦𑀸. 𑀲𑀻𑀳𑀘𑀫𑁆𑀫𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺 𑀲𑀻𑀳𑀘𑀫𑁆𑀫𑀧𑀭𑀺𑀓𑁆𑀔𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀬𑀦𑁆𑀢𑁂𑀲𑀽’’𑀢𑀺𑀆𑀤𑀺. 𑀧𑀓𑁆𑀔𑀺𑀩𑀺𑀴𑀸𑀮𑁄𑀢𑀺 𑀢𑀼𑀮𑀺𑀬𑁄. 𑀲𑁄 𑀳𑀺 𑀧𑀓𑁆𑀔𑀬𑀼𑀢𑁆𑀢𑀢𑁆𑀢𑀸 𑀘 𑀩𑀺𑀴𑀸𑀮𑀫𑀼𑀔𑀲𑀤𑀺𑀲𑀫𑀼𑀔𑀢𑁆𑀢𑀸 𑀘 𑀧𑀓𑁆𑀔𑀺𑀩𑀺𑀴𑀸𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀮𑀼𑀯𑀓𑀘𑀫𑁆𑀫𑀧𑀭𑀺𑀓𑁆𑀔𑀢𑀸𑀢𑀺 𑀏𑀢𑁆𑀣 𑀮𑀼𑀯𑀓𑀲𑀤𑁆𑀤𑁄 𑀧𑀓𑁆𑀔𑀺𑀩𑀺𑀴𑀸𑀮𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀉𑀮𑀽𑀓𑀘𑀫𑁆𑀫𑀧𑀭𑀺𑀓𑁆𑀔𑀢𑀸’’𑀢𑀺𑀧𑀺 𑀧𑀸𑀞𑁄. 𑀏𑀢𑀸𑀲𑀼𑀧𑀻𑀢𑀺 𑀲𑀻𑀳𑀘𑀫𑁆𑀫𑀧𑀭𑀺𑀓𑁆𑀔𑀢𑀸𑀤𑀻𑀲𑀼𑀧𑀺. 𑀬𑀸 𑀓𑀸𑀘𑀺 𑀉𑀧𑀸𑀳𑀦𑀸𑀬𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁪𑁭. 𑀑𑀫𑀼𑀓𑁆𑀓𑀦𑁆𑀢𑀺 𑀏𑀢𑁆𑀣 𑀅𑀯𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀯𑀺𑀬𑁄𑀕𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀅𑀧𑀦𑀻𑀢’’𑀦𑁆𑀢𑀺. 𑀧𑀼𑀭𑀸𑀡𑀁 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁫𑁧. 𑀅𑀚𑁆𑀛𑀸𑀭𑀸𑀫𑁂 𑀉𑀧𑀸𑀳𑀦𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁪𑁮. ‘‘𑀬𑁂𑀦 𑀲𑀺𑀧𑁆𑀧𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀪𑀺 𑀅𑀥𑀺𑀓𑀁 𑀚𑀻𑀯𑀦𑁆𑀢𑀺 𑀅𑀦𑁂𑀦𑀸𑀢𑀺 𑀅𑀪𑀺𑀚𑀻𑀯𑀦𑀁, 𑀓𑀺𑀁𑀢𑀁? 𑀲𑀺𑀧𑁆𑀧𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 𑀲𑀺𑀧𑁆𑀧𑀲𑁆𑀲. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀬𑀁𑀲𑀤𑁆𑀤𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑁄𑀢𑀺 𑀆𑀳 ‘‘𑀬𑁂 𑀢𑀼𑀫𑁆𑀳𑁂’’𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀬𑀁𑀦𑀺𑀧𑀸𑀢𑁄𑀢𑀺 𑀬𑀁𑀇𑀢𑀺 𑀦𑀺𑀧𑀸𑀢𑁄 𑀬𑀤𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀧𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸. 𑀆𑀘𑀭𑀺𑀬𑀸 𑀏𑀯𑀸𑀢𑀺 𑀏𑀯𑀲𑀤𑁆𑀤𑁂𑀦 𑀆𑀘𑀭𑀺𑀬𑀫𑀢𑁆𑀢𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀲𑁄𑀢𑀺 𑀅𑀯𑀲𑁆𑀲𑀺𑀓𑁄. 𑀢𑀦𑁆𑀢𑀺 𑀙𑀩𑁆𑀩𑀲𑁆𑀲𑀁. 𑀦𑀺𑀲𑁆𑀲𑀸𑀬 𑀯𑀘𑁆𑀙𑀢𑀻𑀢𑀺 𑀅𑀯𑀲𑁆𑀲𑀺𑀓𑀲𑁆𑀲 𑀘𑀢𑀼𑀯𑀲𑁆𑀲𑀓𑀸𑀮𑁂 𑀙𑀩𑁆𑀩𑀲𑁆𑀲𑀲𑁆𑀲 𑀤𑀲𑀯𑀲𑁆𑀲𑀺𑀓𑀢𑁆𑀢𑀸 𑀢𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀉𑀧𑀚𑁆𑀛𑀸𑀬𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀚𑁆𑀛𑀸𑀬𑀲𑁆𑀲𑀸’’𑀢𑀺𑀆𑀤𑀺. 𑀫𑀳𑀦𑁆𑀢𑀢𑀭𑀸𑀢𑀺 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀭𑀸. 𑀉𑀧𑀚𑁆𑀛𑀸𑀬𑀲𑁆𑀲 𑀫𑀢𑁆𑀢𑀁 𑀧𑀫𑀸𑀡𑀫𑁂𑀢𑁂𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀫𑀢𑁆𑀢𑀸.

𑁨𑁪𑁯. 𑀧𑀸𑀤𑀢𑁄 𑀦𑀺𑀓𑁆𑀔𑀦𑁆𑀢𑁂𑀦 𑀔𑀻𑀮𑀲𑀤𑀺𑀲𑁂𑀦 𑀫𑀁𑀲𑁂𑀦 𑀧𑀯𑀢𑁆𑀢𑁄 𑀆𑀩𑀸𑀥𑁄 𑀧𑀸𑀤𑀔𑀻𑀮𑀸𑀩𑀸𑀥𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀸𑀤𑀢𑁄’’𑀢𑀺𑀆𑀤𑀺. 𑀧𑀸𑀤𑀢𑁄 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁫𑁧. 𑀢𑀺𑀡𑀧𑀸𑀤𑀼𑀓𑀸𑀢𑀺𑀆𑀤𑀻𑀲𑀼 𑀢𑀺𑀡𑁂𑀦 𑀓𑀢𑀸 𑀧𑀸𑀤𑀼𑀓𑀸 𑀢𑀺𑀡𑀧𑀸𑀤𑀼𑀓𑀸𑀢𑀺 𑀯𑀘𑀦𑀢𑁆𑀣𑀸𑀤𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦 𑀓𑁂𑀦𑀘𑀺 𑀢𑀺𑀡𑁂𑀦𑀸’’𑀢𑀺𑀆𑀤𑀺. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. ‘‘𑀪𑀽𑀫𑀺𑀬𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀢𑀺’’𑀆𑀤𑀺𑀦𑀸 𑀦 𑀲𑀗𑁆𑀓𑀫𑀺𑀢𑀩𑁆𑀩𑀸𑀢𑀺 𑀅𑀲𑀗𑁆𑀓𑀫𑀦𑀻𑀬𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁨𑁫𑁨. 𑀅𑀗𑁆𑀕𑀚𑀸𑀢𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑁂𑀦 𑀏𑀯. 𑀅𑀗𑁆𑀕𑀚𑀸𑀢𑀦𑁆𑀢𑀺 𑀕𑀸𑀯𑀻𑀦𑀁 𑀅𑀗𑁆𑀕𑀚𑀸𑀢𑀁. 𑀑𑀕𑀸𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀑𑀢𑁆𑀬𑀽𑀧𑀲𑀕𑁆𑀕𑁄 𑀤𑀴𑁆𑀳𑀢𑁆𑀣𑁄𑀢𑀺 𑀆𑀳 ‘‘𑀤𑀴𑁆𑀳𑀁 𑀕𑀳𑁂𑀢𑁆𑀯𑀸’’𑀢𑀺.

𑁧𑁫𑁩. 𑀬𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁫𑁩. 𑀇𑀢𑁆𑀣𑀺𑀬𑀼𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀭𑀽𑀴𑀻𑀯𑀲𑁂𑀦 𑀥𑁂𑀦𑀼𑀧𑀺 𑀇𑀢𑁆𑀣𑀻 𑀦𑀸𑀫𑀸𑀢𑀺 𑀆𑀳 ‘‘𑀥𑁂𑀦𑀼𑀬𑀼𑀢𑁆𑀢𑁂𑀦𑀸’’𑀢𑀺. 𑀧𑀼𑀭𑀺𑀲𑀦𑁆𑀢𑀭𑁂𑀦𑀸𑀢𑀺 𑀏𑀢𑁆𑀣 𑀧𑀼𑀭𑀺𑀲𑁄 𑀏𑀯 𑀅𑀦𑁆𑀢𑀭𑁄 𑀅𑀜𑁆𑀜𑁄 𑀏𑀢𑁆𑀣𑀸𑀢𑀺 𑀧𑀼𑀭𑀺𑀲𑀦𑁆𑀢𑀭𑀁 𑀬𑀸𑀦𑀁. 𑀧𑀼𑀭𑀺𑀲𑀦𑁆𑀢𑀭𑁄 𑀦𑀸𑀫 𑀅𑀢𑁆𑀣𑀢𑁄 𑀲𑀸𑀭𑀣𑀻𑀢𑀺 𑀆𑀳 ‘‘𑀧𑀼𑀭𑀺𑀲𑀲𑀸𑀭𑀣𑀺𑀦𑀸’’𑀢𑀺, 𑀬𑀸𑀦𑁂𑀦𑀸𑀢𑀺 𑀬𑁄𑀚𑀦𑀸. 𑀕𑀗𑁆𑀕𑀸𑀫𑀳𑀺𑀬𑀸𑀬𑀸𑀢𑀺 𑀏𑀢𑁆𑀣 𑀕𑀗𑁆𑀕𑀸 𑀘 𑀫𑀳𑀻 𑀘 𑀕𑀗𑁆𑀕𑀸𑀫𑀳𑀻, 𑀢𑀢𑁆𑀣 𑀓𑀻𑀴𑀺𑀓𑀸 𑀕𑀗𑁆𑀕𑀸𑀫𑀳𑀺𑀬𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀗𑁆𑀕𑀸𑀫𑀳𑀻𑀓𑀻𑀴𑀺𑀓𑀸𑀬𑀸’’𑀢𑀺. 𑀢𑀢𑁆𑀣 𑀳𑀺 𑀇𑀢𑁆𑀣𑀺𑀧𑀼𑀭𑀺𑀲𑀸 𑀬𑀸𑀦𑁂𑀳𑀺 𑀉𑀤𑀓𑀓𑀻𑀴𑀁 𑀓𑀻𑀴𑀦𑁆𑀢𑀺. 𑀧𑀼𑀭𑀺𑀲𑀬𑀼𑀢𑁆𑀢𑀁 𑀳𑀢𑁆𑀣𑀯𑀝𑁆𑀝𑀓𑀦𑁆𑀢𑀺 𑀏𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑀬𑀼𑀢𑁆𑀢𑀜𑁆𑀘 𑀳𑀢𑁆𑀣𑀯𑀝𑁆𑀝𑀓𑀜𑁆𑀘𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀭𑀺𑀲𑀬𑀼𑀢𑁆𑀢𑀦𑁆𑀢𑀺 𑀧𑀼𑀭𑀺𑀲𑁂𑀦 𑀬𑀼𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀧𑀼𑀭𑀺𑀲𑀬𑀼𑀢𑁆𑀢𑀁 𑀬𑀸𑀦𑀁. 𑀳𑀢𑁆𑀣𑀯𑀝𑁆𑀝𑀓𑀦𑁆𑀢𑀺 𑀳𑀢𑁆𑀣𑁂𑀦 𑀯𑀝𑁆𑀝𑁂𑀢𑀩𑁆𑀩𑀦𑁆𑀢𑀺 𑀳𑀢𑁆𑀣𑀯𑀝𑁆𑀝𑀓𑀁 𑀬𑀸𑀦𑀁. 𑀬𑀸𑀦𑀼𑀕𑁆𑀖𑀸𑀢𑁂𑀦𑀸𑀢𑀺 𑀬𑀸𑀦𑀲𑁆𑀲 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀕𑀫𑀦𑁂𑀦. 𑀳𑀦𑀥𑀸𑀢𑀼 𑀳𑀺 𑀕𑀢𑁆𑀬𑀢𑁆𑀣𑁄. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸𑀦𑀁 𑀅𑀪𑀺𑀭𑀼𑀳𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺. ‘‘𑀢𑀧𑁆𑀧𑀘𑁆𑀘𑀬𑀸’’𑀢𑀺 𑀇𑀫𑀺𑀦𑀸 𑀬𑀸𑀦𑀼𑀕𑁆𑀖𑀸𑀢𑁂𑀦𑀸𑀢𑀺 𑀏𑀢𑁆𑀣 𑀳𑁂𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀻𑀞𑀓𑀲𑀺𑀯𑀺𑀓𑀦𑁆𑀢𑀺 𑀧𑀻𑀞𑁂𑀦 𑀲𑀳 𑀓𑀢𑀁 𑀲𑀺𑀯𑀺𑀓𑀁. 𑀧𑀝𑀧𑁄𑀝𑀮𑀺𑀓𑀦𑁆𑀢𑀺 𑀧𑀝𑀫𑀬𑀁 𑀧𑁄𑀝𑀮𑀺𑀓𑀁.

𑁧𑁫𑁪. 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁫𑁪. 𑀉𑀘𑁆𑀘𑀁 𑀆𑀲𑀬𑀦𑀁 𑀉𑀘𑁆𑀘𑀸𑀲𑀬𑀦𑀁. 𑀫𑀳𑀦𑁆𑀢𑀁 𑀆𑀲𑀬𑀦𑀁 𑀫𑀳𑀸𑀲𑀬𑀦𑀁. 𑀆𑀲𑀦𑁆𑀤𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀲𑀦𑀦𑁆𑀢𑀺 𑀤𑀻𑀖𑀸𑀲𑀦𑀁. 𑀢𑀜𑁆𑀳𑀺 𑀆𑀕𑀫𑁆𑀫 𑀲𑀤𑀢𑀺 𑀦𑀺𑀲𑀻𑀤𑀢𑀻𑀢𑀺 𑀏𑀢𑁆𑀣, 𑀆𑀬𑀢𑀁 𑀯𑀸 𑀲𑀼𑀝𑁆𑀞𑀼𑀁 𑀤𑀤𑀸𑀢𑀻𑀢𑀺 𑀆𑀲𑀦𑁆𑀤𑀻𑀢𑀺 𑀯𑀼𑀘𑁆𑀘𑀢𑀺. 𑀯𑀸𑀴𑀭𑀽𑀧𑀸𑀦𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀭𑀽𑀧𑀸𑀦𑀺. 𑀧𑀸𑀤𑁂𑀲𑀼 𑀯𑀸𑀴𑀭𑀽𑀧𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀗𑁆𑀓𑀻𑀬𑀢𑀺 𑀮𑀓𑁆𑀔𑀻𑀬𑀢𑀻𑀢𑀺 𑀧𑀮𑁆𑀮𑀗𑁆𑀓𑁄. 𑀕𑁄𑀦𑀓𑁄𑀢𑀺 𑀕𑀯𑀢𑀺 𑀤𑀻𑀖𑀮𑁄𑀫𑁂𑀳𑀺 𑀉𑀕𑁆𑀕𑀘𑁆𑀙𑀢𑀺 𑀏𑀢𑁆𑀣𑀸𑀢𑀺 𑀕𑁄𑀦𑀓𑁄. 𑀓𑁄𑀚𑀯𑁄𑀢𑀺 𑀓𑀼𑀬𑀁 𑀪𑀽𑀫𑀺𑀬𑀁 𑀚𑀯𑀢𑀺 𑀕𑀘𑁆𑀙𑀢𑀻𑀢𑀺 𑀓𑁄𑀚𑀯𑁄. 𑀢𑀲𑁆𑀲𑀸𑀢𑀺 𑀕𑁄𑀦𑀓𑀲𑁆𑀲. 𑀮𑁄𑀫𑀸𑀦𑀺 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀺 𑀳𑁄𑀦𑁆𑀢𑀺 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀯𑀸𑀦𑀘𑀺𑀢𑁆𑀭𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑁄𑀢𑀺 𑀯𑀸𑀦𑁂𑀦 𑀲𑀺𑀩𑁆𑀩𑀦𑁂𑀦 𑀲𑀜𑁆𑀚𑀸𑀢𑀁 𑀘𑀺𑀢𑁆𑀭𑀭𑀽𑀧𑀫𑁂𑀢𑁆𑀣𑀸𑀢𑀺 𑀯𑀸𑀦𑀘𑀺𑀢𑁆𑀭𑀁, 𑀉𑀡𑁆𑀡𑀸𑀬 𑀦𑀺𑀩𑁆𑀩𑀢𑁆𑀢𑁄 𑀉𑀡𑁆𑀡𑀸𑀫𑀬𑁄, 𑀲𑁄𑀬𑁂𑀯 𑀅𑀢𑁆𑀣𑀭𑀡𑁄 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑁄, 𑀯𑀸𑀦𑀘𑀺𑀢𑁆𑀭𑀜𑁆𑀘 𑀢𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑁄 𑀘𑁂𑀢𑀺 𑀯𑀸𑀦𑀘𑀺𑀢𑁆𑀭𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑁄. 𑀲𑁂𑀢𑀢𑁆𑀣𑀭𑀡𑁄𑀢𑀺 𑀲𑁂𑀢𑀢𑁆𑀣𑀺𑀓𑁂𑀳𑀺 𑀲𑁂𑀯𑀻𑀬𑀢𑀻𑀢𑀺 𑀲𑁄𑀢𑁄, 𑀲𑁄𑀬𑁂𑀯 𑀅𑀢𑁆𑀣𑀭𑀡𑁄 𑀲𑁂𑀢𑀢𑁆𑀣𑀭𑀡𑁄. 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀧𑀝𑀢𑀺 𑀲𑁂𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀝𑀺𑀓𑀸𑀢𑀺 𑀓𑀸𑀢𑀩𑁆𑀩𑀁. 𑀧𑀝𑀺𑀓𑀸𑀲𑀤𑁆𑀤𑁄𑀬𑀁 𑀅𑀟𑁆𑀠𑁂𑀦𑁆𑀤𑀼𑀧𑀸𑀲𑀸𑀡𑁂𑀧𑀺 𑀧𑀯𑀢𑁆𑀢𑀢𑀺. 𑀖𑀦𑀧𑀼𑀧𑁆𑀨𑀓𑁄𑀢𑀺 𑀖𑀦𑀁 𑀓𑀣𑀺𑀦𑀁 𑀧𑀼𑀧𑁆𑀨𑀫𑁂𑀢𑁆𑀣𑀸𑀢𑀺 𑀖𑀦𑀧𑀼𑀧𑁆𑀨𑀓𑁄. 𑀇𑀫𑀺𑀦𑀸 𑀖𑀦𑀧𑀼𑀧𑁆𑀨𑀲𑀗𑁆𑀔𑀸𑀢𑀁 𑀧𑀝𑀮𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀧𑀝𑀮𑀺𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀅𑀢𑁆𑀣𑀭𑀡𑁄. 𑀆𑀫𑀮𑀓𑀧𑀝𑁄𑀢𑀺 𑀆𑀫𑀮𑀓𑀧𑀼𑀧𑁆𑀨𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄 𑀧𑀝𑁄. 𑀢𑀽𑀮𑀺𑀓𑀸𑀢𑀺 𑀢𑀽𑀮𑀁 𑀧𑀽𑀭𑁂𑀢𑁆𑀯𑀸 𑀓𑀢𑀸 𑀢𑀽𑀮𑀺𑀓𑀸. 𑀯𑀺𑀓𑀢𑀺𑀓𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀭𑀽𑀧𑁂𑀳𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁫) 𑀯𑀺𑀘𑀺𑀢𑁆𑀢𑀸𑀓𑀸𑀭𑁂𑀦 𑀓𑀭𑀻𑀬𑀢𑀻𑀢𑀺 𑀯𑀺𑀓𑀢𑀺𑀓𑀸. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 ‘‘𑀉𑀤𑁆𑀤𑀮𑁄𑀫𑀻𑀢𑀺 𑀉𑀪𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. 𑀏𑀓𑀦𑁆𑀢𑀮𑁄𑀫𑀻𑀢𑀺 𑀏𑀓𑀢𑁄𑀤𑀲𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 ‘‘𑀉𑀤𑁆𑀤𑀮𑁄𑀫𑀻𑀢𑀺 𑀏𑀓𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁, 𑀏𑀓𑀦𑁆𑀢𑀮𑁄𑀫𑀻𑀢𑀺 𑀉𑀪𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀤𑁆𑀯𑁂 𑀅𑀝𑁆𑀞𑀓𑀣𑀸𑀬𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀦𑀬𑁂𑀦 𑀯𑀘𑀦𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀺. 𑀉𑀝𑁆𑀞𑀺𑀢𑀁 𑀤𑁆𑀯𑀻𑀳𑀺 𑀧𑀓𑁆𑀔𑁂𑀳𑀺, 𑀤𑁆𑀯𑀻𑀲𑀼 𑀯𑀸 𑀤𑀲𑀸𑀲𑀗𑁆𑀔𑀸𑀢𑀁 𑀮𑁄𑀫𑀫𑁂𑀢𑁆𑀣𑀸𑀢𑀺 𑀉𑀤𑁆𑀤𑀮𑁄𑀫𑀻. 𑀦𑀺𑀕𑁆𑀕𑀳𑀺𑀢𑀸𑀕𑀫𑀁 𑀓𑀢𑁆𑀯𑀸 ‘‘𑀉𑀦𑁆𑀤𑀮𑁄𑀫𑀻’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀤𑀲𑀸𑀲𑀗𑁆𑀔𑀸𑀢𑀁 𑀮𑁄𑀫𑀫𑁂𑀢𑁆𑀣𑀸𑀢𑀺 𑀏𑀓𑀦𑁆𑀢𑀮𑁄𑀫𑀻𑀢𑀺. 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀦𑁆𑀢𑀺 𑀏𑀢𑁆𑀣 𑀓𑁄𑀲𑁂𑀬𑁆𑀬𑀦𑁆𑀢𑀺 𑀓𑁄𑀲𑀺𑀬𑀲𑀼𑀢𑁆𑀢𑀁. 𑀓𑀝𑁆𑀝𑀺𑀲𑁆𑀲𑀦𑁆𑀢𑀺 𑀓𑀝𑁆𑀝𑀺𑀲𑁆𑀲𑀦𑀸𑀫𑀓𑀁 𑀯𑀸𑀓𑀁. 𑀇𑀫𑀺𑀦𑀸 𑀓𑁄𑀲𑁂𑀬𑁆𑀬𑀜𑁆𑀘 𑀓𑀝𑁆𑀝𑀺𑀲𑁆𑀲𑀜𑁆𑀘 𑀓𑀝𑁆𑀝𑀺𑀲𑁆𑀲𑀸𑀦𑀻𑀢𑀺 𑀯𑀺𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 𑀓𑀝𑁆𑀝𑀺𑀲𑁆𑀲𑁂𑀳𑀺 𑀧𑀓𑀢𑀁 𑀅𑀢𑁆𑀣𑀭𑀡𑀁 𑀓𑀝𑁆𑀝𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀅𑀧𑀭𑀺𑀲𑀺𑀩𑁆𑀩𑀺𑀢𑀁 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀁. 𑀇𑀫𑀺𑀦𑀸 𑀲𑀼𑀤𑁆𑀥𑀓𑀝𑁆𑀝𑀺𑀲𑁆𑀲𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀲𑁄𑀴𑀲 𑀦𑀸𑀝𑀓𑀺𑀢𑁆𑀣𑀺𑀬𑁄 𑀞𑀢𑁆𑀯𑀸 𑀦𑀘𑁆𑀘𑀁 𑀓𑀭𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀼𑀢𑁆𑀢𑀓𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄𑀴𑀲𑀦𑁆𑀦’’𑀦𑁆𑀢𑀺𑀆𑀤𑀺. 𑀅𑀚𑀺𑀦𑀘𑀫𑁆𑀫𑁂𑀳𑀻𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑁂𑀳𑀺, 𑀓𑀢𑀇𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀯𑁂𑀡𑀻𑀢𑀺 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀤𑀻𑀳𑀺 𑀧𑀭𑀁𑀧𑀭𑀯𑀲𑁂𑀦 𑀓𑀢𑀢𑁆𑀢𑀸 ‘‘𑀧𑀯𑁂𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀚𑀺𑀦𑀘𑀫𑁆𑀫𑀸𑀦𑀺 𑀳𑀺 𑀲𑀼𑀔𑀼𑀫𑀢𑀭𑀸𑀦𑀺, 𑀢𑀲𑁆𑀫𑀸 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀤𑀻𑀦𑀺 𑀓𑀢𑁆𑀯𑀸 𑀧𑀯𑁂𑀡𑀺𑀯𑀲𑁂𑀦 𑀓𑀢𑀸𑀦𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀚𑀺𑀦𑀧𑀯𑁂𑀡𑀻’’𑀢𑀺. ‘‘𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀘𑀫𑁆𑀫𑀁 𑀓𑀤𑀮𑀺𑀫𑀺𑀕𑀇𑀢𑀺 𑀕𑀳𑁂𑀢𑀩𑁆𑀩𑀁 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀯𑀭𑀲𑀤𑁆𑀤𑁄 𑀉𑀢𑁆𑀢𑀫𑀢𑁆𑀣𑁄𑀢𑀺 𑀆𑀳 ‘‘𑀉𑀢𑁆𑀢𑀫𑀧𑀘𑁆𑀘𑀢𑁆𑀣𑀭𑀡’’𑀦𑁆𑀢𑀺. 𑀢𑀦𑁆𑀢𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁. 𑀲𑀉𑀢𑁆𑀢𑀭𑀘𑁆𑀙𑀤𑀦𑁆𑀢𑀺 𑀏𑀢𑁆𑀣 𑀲𑀓𑀸𑀭𑁄 𑀲𑀳𑀲𑀤𑁆𑀤𑀓𑀸𑀭𑀺𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀳 𑀉𑀢𑁆𑀢𑀭𑀘𑁆𑀙𑀤𑁂𑀦𑀸’’𑀢𑀺. ‘‘𑀉𑀧𑀭𑀻’’𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀲𑀤𑁆𑀤𑀲𑁆𑀲 𑀲𑁂𑀝𑁆𑀞𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. ‘‘𑀲𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀳𑀲𑀤𑁆𑀤𑀲𑁆𑀲 𑀢𑀼𑀮𑁆𑀬𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀲𑁂𑀢…𑀧𑁂… 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀭𑀢𑁆𑀢𑀯𑀺𑀢𑀸𑀦𑀁 𑀳𑁂𑀝𑁆𑀞𑀸 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑁂 𑀲𑀢𑀺𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸? 𑀭𑀢𑁆𑀢𑀯𑀺𑀢𑀸𑀦𑀲𑁆𑀲 𑀅𑀓𑀧𑁆𑀧𑀺𑀬𑀢𑁆𑀢𑀸. 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀦𑁆𑀢𑀺 𑀏𑀢𑁆𑀣 𑀉𑀪𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸’’𑀢𑀺. 𑀲𑀻𑀲𑁄 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀉𑀧𑀥𑀸𑀦𑀁, 𑀉𑀧 𑀪𑀼𑀲𑀁 𑀯𑀸 𑀲𑀼𑀔𑀁 𑀥𑀸𑀭𑁂𑀢𑀻𑀢𑀺 𑀉𑀧𑀥𑀸𑀦𑀁, 𑀩𑀺𑀩𑁆𑀩𑁄𑀳𑀦𑀁. 𑀲𑀘𑁂 𑀧𑀫𑀸𑀡𑀬𑀼𑀢𑁆𑀢𑀁, 𑀢𑀁 𑀉𑀧𑀥𑀸𑀦𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁧𑁫𑁫. 𑀲𑀩𑁆𑀩𑀘𑀫𑁆𑀫𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸

𑁨𑁫𑁫. 𑀤𑀻𑀧𑀺𑀧𑁄𑀢𑀓𑁄𑀢𑀺 𑀤𑀻𑀧𑀺𑀧𑁄𑀢𑁄 𑀯𑀺𑀬𑀸𑀢𑀺 𑀤𑀻𑀧𑀺𑀧𑁄𑀢𑀓𑁄 𑀯𑀘𑁆𑀙𑁄. 𑀪𑀺𑀢𑁆𑀢𑀺𑀤𑀡𑁆𑀟𑀓𑀸𑀤𑀻𑀲𑀽𑀢𑀺 𑀪𑀺𑀢𑁆𑀢𑀺𑀲𑀫𑁆𑀩𑀦𑁆𑀥𑁂𑀲𑀼 𑀤𑀡𑁆𑀟𑀓𑀸𑀤𑀻𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀪𑀺𑀢𑁆𑀢𑀺𑀣𑀫𑁆𑀪𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁫𑁬. 𑀬𑁄 𑀦 𑀲𑀓𑁆𑀓𑁄𑀢𑀺 𑀅𑀦𑀼𑀧𑀸𑀳𑀦𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁, 𑀲𑁄 𑀕𑀺𑀮𑀸𑀦𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁧𑁫𑁭. 𑀲𑁄𑀡𑀓𑀼𑀝𑀺𑀓𑀡𑁆𑀡𑀯𑀢𑁆𑀣𑀼𑀓𑀣𑀸

𑁨𑁫𑁭. 𑀏𑀢𑁂𑀦𑀸𑀢𑀺 ‘‘𑀓𑀼𑀭𑀭𑀖𑀭𑁂’’𑀢𑀺 𑀧𑀸𑀞𑁂𑀦. 𑀅𑀲𑁆𑀲𑀸𑀢𑀺 𑀫𑀳𑀸𑀓𑀘𑁆𑀘𑀸𑀦𑀲𑁆𑀲. 𑀧𑀧𑀸𑀢𑀦𑀸𑀫𑀓𑁂𑀢𑀺 𑀬𑀲𑁆𑀫𑀸 𑀫𑀳𑀸𑀢𑀝𑁄 𑀏𑀢𑁆𑀣 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀧𑀸𑀢𑀦𑀸𑀫𑀓𑁄 𑀳𑁄𑀢𑀺. 𑀏𑀢𑁂𑀦𑀸𑀢𑀺 ‘‘𑀧𑀧𑀸𑀢𑀓𑁂 𑀧𑀩𑁆𑀩𑀢𑁂’’𑀢𑀺 𑀧𑀸𑀞𑁂𑀦. 𑀅𑀲𑁆𑀲𑀸𑀢𑀺 𑀫𑀳𑀸𑀓𑀘𑁆𑀘𑀸𑀦𑀲𑁆𑀲. 𑀓𑁄𑀝𑀺𑀅𑀕𑁆𑀖𑀦𑀓𑀁 𑀧𑀺𑀴𑀦𑁆𑀥𑀦𑀁 𑀓𑀡𑁆𑀡𑁂 𑀏𑀢𑀲𑁆𑀲𑀢𑁆𑀣𑀻𑀢𑀺 𑀓𑀼𑀝𑀺𑀓𑀡𑁆𑀡𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁄𑀝𑀺𑀅𑀕𑁆𑀖𑀦𑀓𑀁 𑀧𑀦𑀸’’𑀢𑀺𑀆𑀤𑀺. 𑀧𑀺𑀴𑀦𑁆𑀥𑀢𑀺 𑀅𑀦𑁂𑀦𑀸𑀢𑀺 𑀧𑀺𑀴𑀦𑁆𑀥𑀦𑀁, 𑀅𑀮𑀗𑁆𑀓𑀸𑀭𑁄. 𑀤𑀦𑁆𑀢𑀚𑁄 𑀘𑀢𑀼𑀢𑁆𑀣𑀓𑁆𑀔𑀭𑁄. ‘‘𑀧𑀲𑀸𑀤𑀚𑀦𑀓’’𑀦𑁆𑀢𑀺 𑀇𑀫𑀺𑀦𑀸 𑀧𑀲𑀸𑀤𑀁 𑀚𑀦𑁂𑀢𑀻𑀢𑀺 𑀧𑀸𑀲𑀸𑀤𑀺𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀲𑀸𑀤𑀦𑀻𑀬𑀦𑁆𑀢𑀺 𑀧𑀲𑀸𑀤𑀺𑀢𑀩𑁆𑀩𑀁, 𑀧𑀲𑀸𑀤𑀺𑀢𑀼𑀁 𑀅𑀭𑀳𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀯𑀘𑀦𑀦𑁆𑀢𑀺 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺 𑀅𑀦𑁂𑀦𑀸𑀢𑀺 𑀅𑀢𑁆𑀣𑀯𑀘𑀦𑀁. 𑀧𑀸𑀴𑀺𑀬𑀁 𑀇𑀤𑀸𑀦𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀧𑀲𑀸𑀤𑀦𑀻𑀬’’𑀦𑁆𑀢𑀺 𑀧𑀸𑀞𑁄 𑀦𑀢𑁆𑀣𑀺. ‘‘𑀧𑀸𑀲𑀸𑀤𑀺𑀓’’𑀦𑁆𑀢𑀺𑀧𑀤𑀲𑁆𑀲 𑀧𑀼𑀩𑁆𑀩𑁂 ‘‘𑀤𑀲𑁆𑀲𑀦𑀻𑀬’’𑀦𑁆𑀢𑀺 𑀧𑀸𑀞𑁄𑀬𑁂𑀯 𑀅𑀢𑁆𑀣𑀺. 𑀉𑀢𑁆𑀢𑀫𑀤𑀫𑀣𑀲𑀫𑀣𑀦𑁆𑀢𑀺𑀏𑀢𑁆𑀣 𑀤𑀫𑀣𑀲𑀤𑁆𑀤𑀲𑁆𑀲 𑀜𑀸𑀡𑀢𑁆𑀣𑀜𑁆𑀘 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀢𑁆𑀣𑀜𑁆𑀘 𑀲𑀫𑀣𑀲𑀤𑁆𑀤𑀲𑁆𑀲 𑀲𑀫𑀸𑀥𑀢𑁆𑀣𑀜𑁆𑀘 𑀘𑀺𑀢𑁆𑀢𑀽𑀧𑀲𑀫𑀢𑁆𑀣𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀢𑁆𑀢𑀫𑀁 𑀤𑀫𑀣𑀜𑁆𑀘𑀸’’𑀢𑀺𑀆𑀤𑀺. 𑀘𑀲𑀤𑁆𑀤𑁂𑀦 𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀽𑀓𑀸𑀬𑀺𑀓𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀦𑁆𑀢𑀺 𑀯𑀺𑀲𑀽𑀓𑀸𑀬 𑀧𑀝𑀺𑀧𑀓𑁆𑀔𑀸𑀬 𑀧𑀯𑀢𑁆𑀢𑀸𑀦𑀁 𑀤𑀺𑀝𑁆𑀞𑀺𑀘𑀺𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀯𑀺𑀯𑀺𑀥𑀘𑀮𑀦𑀸𑀦𑀁. ‘‘𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀬𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀢𑁆𑀣 𑀬𑀢𑀲𑀤𑁆𑀤𑁄 𑀯𑀻𑀭𑀺𑀬𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀕𑀦𑁆𑀢𑀺 𑀏𑀢𑁆𑀣 𑀦𑀢𑁆𑀣𑀺 𑀆𑀕𑀼 𑀧𑀸𑀧𑀫𑁂𑀢𑀲𑁆𑀲𑀸𑀢𑀺 𑀦𑀸𑀕𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀕𑀼𑀯𑀺𑀭𑀳𑀺𑀢’’𑀦𑁆𑀢𑀺 𑀓𑀺𑀁 𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀆𑀳 ‘‘𑀫𑀫 𑀧𑀩𑁆𑀩𑀚𑁆𑀚𑀸𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀓𑀡𑁆𑀳𑀸 𑀫𑀢𑁆𑀢𑀺𑀓𑀸 𑀉𑀢𑁆𑀢𑀭𑀺 𑀏𑀢𑁆𑀣𑀸𑀢𑀺 𑀓𑀡𑁆𑀳𑀼𑀢𑁆𑀢𑀭𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀡𑁆𑀳𑀫𑀢𑁆𑀢𑀺𑀓𑀼𑀢𑁆𑀢𑀭𑀸’’𑀢𑀺. ‘‘𑀉𑀧𑀭𑀻’’𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀕𑀼𑀦𑁆𑀦𑀁 𑀔𑀼𑀭𑁂𑀳𑀻’’𑀢𑀺 𑀇𑀫𑀺𑀦𑀸 𑀕𑀼𑀦𑁆𑀦𑀁 𑀔𑀼𑀭𑀓𑀡𑁆𑀝𑀓𑀲𑀤𑀺𑀲𑀢𑁆𑀢𑀸 𑀕𑁄𑀓𑀡𑁆𑀝𑀓𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂 𑀕𑁄𑀓𑀡𑁆𑀝𑀓𑁂 𑀭𑀓𑁆𑀔𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀔𑀭𑀸 𑀪𑀽𑀫𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁂𑀳𑀻𑀢𑀺 𑀏𑀭𑀕𑀽𑀆𑀤𑀻𑀳𑀺 𑀘𑀢𑀽𑀳𑀺 𑀢𑀺𑀡𑁂𑀳𑀺. 𑀢𑀦𑁆𑀢𑀺 𑀏𑀭𑀕𑀽𑀢𑀺𑀡𑀁. 𑀢𑁂𑀦𑀸𑀢𑀺 𑀫𑁄𑀭𑀕𑀽𑀢𑀺𑀡𑁂𑀦. 𑀚𑀦𑁆𑀢𑀼𑀲𑁆𑀲 𑀯𑀡𑁆𑀡𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀲𑀻𑀢𑀺 𑀏𑀢𑁆𑀣 𑀓𑀺𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀲𑀻𑀢𑀺 𑀆𑀳 ‘‘𑀪𑀺𑀲𑀺𑀁 𑀯𑀸 𑀓𑀝𑀲𑀸𑀭𑀓𑀁 𑀯𑀸 𑀧𑀜𑁆𑀜𑀧𑁂𑀲𑀻’’𑀢𑀺. 𑀧𑀜𑁆𑀜𑀧𑁂𑀢𑁆𑀯𑀸 𑀘 𑀧𑀦 𑀲𑁄𑀡𑀲𑁆𑀲 𑀆𑀭𑁄𑀘𑁂𑀲𑀺. 𑀓𑀺𑀁 𑀆𑀭𑁄𑀘𑁂𑀲𑀻𑀢𑀺 𑀆𑀳 ‘‘𑀆𑀯𑀼𑀲𑁄’’𑀢𑀺𑀆𑀤𑀺. 𑀲𑀢𑁆𑀣𑀸 𑀯𑀲𑀺𑀢𑀼𑀓𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁫𑁮. ‘‘𑀢𑀲𑁆𑀲 𑀲𑁄𑀡𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀪𑀸𑀢𑀼 𑀢𑀦𑁆𑀢𑀺 𑀏𑀢𑁆𑀣 ‘‘𑀢’’𑀦𑁆𑀢𑀺𑀧𑀤𑀁 𑀲𑀸𑀫𑁆𑀬𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀢𑀯. 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀻𑀢𑀺 𑀅𑀝𑁆𑀞𑀧𑀫𑀸𑀡𑁄, 𑀅𑀝𑁆𑀞𑀲𑀫𑀽𑀳𑁄 𑀯𑀸 𑀯𑀕𑁆𑀕𑁄 𑀏𑀢𑁂𑀲𑀦𑁆𑀢𑀺 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺. 𑀓𑀸𑀫𑀲𑀼𑀢𑁆𑀢𑀸𑀤𑀻𑀦𑀺 (𑀲𑀼. 𑀦𑀺. 𑁭𑁭𑁨 𑀆𑀤𑀬𑁄) 𑀲𑁄𑀴𑀲 𑀲𑀼𑀢𑁆𑀢𑀸𑀦𑀺. 𑀬𑁄𑀢𑀺 𑀧𑀼𑀕𑁆𑀕𑀮𑁄, 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀭𑀺𑀬𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀲𑀼𑀘𑀺𑀲𑀫𑀦𑁆𑀦𑀸𑀕𑀢𑁄𑀬𑁂𑀯 𑀧𑀸𑀧𑁂 𑀦 𑀭𑀫𑀢𑀺, 𑀅𑀣 𑀔𑁄 𑀅𑀭𑀺𑀬𑁄𑀧𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀝𑀺𑀪𑀸𑀢𑀼 𑀢’’𑀦𑁆𑀢𑀺 𑀧𑀸𑀞𑀢𑁄 𑀬𑀸𑀯 ‘‘𑀲𑀼𑀘𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀧𑀸𑀞𑀸 𑀓𑁂𑀲𑀼𑀘𑀺𑀬𑁂𑀯 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 𑀅𑀢𑁆𑀣𑀺. 𑀅𑀬𑀁 𑀔𑁆𑀯𑀲𑁆𑀲𑀸𑀢𑀺 𑀏𑀢𑁆𑀣 𑀅𑀲𑁆𑀲𑀲𑀤𑁆𑀤𑁄 𑀆𑀔𑁆𑀬𑀸𑀢𑁄𑀢𑀺 𑀆𑀳 ‘‘𑀪𑀯𑁂𑀬𑁆𑀬𑀸’’𑀢𑀺. 𑀧𑀭𑀺𑀤𑀲𑁆𑀲𑁂𑀲𑀻𑀢𑀺 𑀧𑀜𑁆𑀘 𑀯𑀭𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀬𑀁 𑀯𑀘𑀦𑀁 𑀫𑁂 𑀉𑀧𑀚𑁆𑀛𑀸𑀬𑁄 𑀚𑀸𑀦𑀸𑀧𑁂𑀢𑀺, 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀬𑀁 𑀓𑀸𑀮𑁄 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁨𑁫𑁯. 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦𑀸𑀢𑀺 𑀏𑀢𑁆𑀣 𑀉𑀧𑀚𑁆𑀛𑀸𑀬𑀧𑀜𑁆𑀘𑀫𑁂𑀦𑀸𑀢𑀺 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀅𑀦𑀼𑀲𑁆𑀲𑀸𑀯𑀦𑀸𑀘𑀭𑀺𑀬𑀧𑀜𑁆𑀘𑀫𑁂𑀦𑀸’’𑀢𑀺. 𑀉𑀧𑀸𑀳𑀦𑀓𑁄𑀲𑀓𑁄𑀢𑀺 𑀉𑀧𑀸𑀳𑀦𑀸𑀬 𑀧𑀓𑁆𑀔𑀺𑀧𑀦𑁄𑀓𑀸𑀲𑁄 𑀓𑁄𑀲𑀓𑁄. 𑀏𑀴𑀓𑀘𑀫𑁆𑀫𑀅𑀚𑀘𑀫𑁆𑀫𑁂𑀲𑀼 𑀅𑀓𑀧𑁆𑀧𑀺𑀬𑀁 𑀦𑀸𑀫 𑀦𑀢𑁆𑀣𑀺. 𑀫𑀺𑀕𑀘𑀫𑁆𑀫𑁂 𑀧𑀦 𑀓𑀺𑀜𑁆𑀘𑀺 𑀯𑀝𑁆𑀝𑀢𑀺, 𑀦 𑀓𑀺𑀜𑁆𑀘𑀺 𑀯𑀝𑁆𑀝𑀢𑀺. 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀺𑀕𑀘𑀫𑁆𑀫𑁂’’𑀢𑀺𑀆𑀤𑀺. 𑀏𑀢𑁂𑀲𑀁𑀬𑁂𑀯𑀸𑀢𑀺 𑀏𑀡𑀺𑀫𑀺𑀕𑀸𑀤𑀻𑀦𑀁 𑀙𑀦𑁆𑀦𑀫𑁂𑀯. 𑀅𑀜𑁆𑀜𑁂𑀲𑀁 𑀧𑀦𑀸𑀢𑀺 𑀙𑀳𑀺 𑀫𑀺𑀕𑁂𑀳𑀺 𑀅𑀯𑀲𑁂𑀲𑀸𑀦𑀁 𑀧𑀦. 𑀢𑁂𑀲𑀁 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀕𑀸𑀣𑀸𑀬𑀁 𑀫𑀓𑁆𑀓𑀝𑁄 𑀘 𑀓𑀸𑀴𑀲𑀻𑀳𑁄 𑀘 𑀲𑀭𑀪𑁄 𑀘 𑀓𑀤𑀮𑀺𑀫𑀺𑀕𑁄 𑀘 𑀓𑁂𑀘𑀺 𑀬𑁂 𑀯𑀸𑀴𑀫𑀺𑀕𑀸 𑀅𑀢𑁆𑀣𑀺, 𑀢𑁂 𑀘𑀸𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀫𑀓𑁆𑀓𑀝𑀸𑀤𑀻𑀦𑀁.

𑀢𑀢𑁆𑀣𑀸𑀢𑀺 𑀕𑀸𑀣𑀸𑀬, 𑀫𑀓𑁆𑀓𑀝𑀸𑀤𑀻𑀲𑀼 𑀯𑀸. ‘‘𑀲𑀻𑀳𑀩𑁆𑀬𑀕𑁆𑀖𑀅𑀘𑁆𑀙𑀢𑀭𑀘𑁆𑀙𑀸’’𑀢𑀺 𑀇𑀫𑀺𑀦𑀸 𑀯𑀸𑀴𑀫𑀺𑀕𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀢𑀓𑀸𑀬𑁂𑀯 𑀯𑀸𑀴𑀫𑀺𑀕𑀸𑀢𑀺 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀏𑀢𑁂𑀲𑀁𑀬𑁂𑀯𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀅𑀘𑁆𑀙𑀢𑀭𑀘𑁆𑀙𑀸𑀦𑀫𑁂𑀯. 𑀦 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀲𑀦𑁆𑀢𑀺 𑀙𑀦𑁆𑀦𑀁 𑀏𑀡𑀺𑀫𑀺𑀕𑀸𑀤𑀻𑀦𑀁. 𑀢𑁂𑀢𑀺 𑀙 𑀏𑀡𑀺𑀫𑀺𑀕𑀸𑀤𑀺𑀓𑁂. 𑀳𑀺 𑀲𑀘𑁆𑀘𑀁 𑀲𑀩𑁆𑀩𑁂𑀲𑀁 𑀏𑀢𑁂𑀲𑀁 𑀯𑀸𑀴𑀫𑀺𑀕𑀸𑀦𑀁 𑀘𑀫𑁆𑀫𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀆𑀳𑀭𑀺𑀢𑁆𑀯𑀸 𑀯𑀸 𑀦 𑀤𑀺𑀦𑁆𑀦𑀦𑁆𑀢𑀺 𑀆𑀳𑀭𑀺𑀢𑁆𑀯𑀸 𑀯𑀸 𑀳𑀢𑁆𑀣𑁂 𑀯𑀸 𑀧𑀸𑀤𑀫𑀽𑀮𑁂 𑀯𑀸 𑀞𑀧𑁂𑀢𑁆𑀯𑀸 𑀦 𑀤𑀺𑀦𑁆𑀦𑀁. ‘‘𑀕𑀡𑀦𑀁 𑀦 𑀉𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀕𑀡𑀦𑀁 𑀉𑀧𑀕𑀘𑁆𑀙𑀢𑀻𑀢𑀺 𑀕𑀡𑀦𑀽𑀧𑀕𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀥𑀺𑀝𑁆𑀞𑀺𑀢𑀜𑁆𑀘𑀸𑀢𑀺 𑀅𑀥𑀺𑀝𑁆𑀞𑀺𑀢𑀁 𑀧𑀦. 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀢𑀢𑁄𑀢𑀺 𑀓𑀸𑀮𑀢𑁄.

𑀇𑀢𑀺 𑀘𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.