𑁬. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀁

𑁧𑁬𑁦. 𑀧𑀜𑁆𑀘𑀪𑁂𑀲𑀚𑁆𑀚𑀸𑀤𑀺𑀓𑀣𑀸

𑁨𑁬𑁦. 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀲𑀭𑀤𑀓𑀸𑀮𑁂 𑀉𑀧𑁆𑀧𑀦𑁆𑀦𑁄 𑀲𑀸𑀭𑀤𑀺𑀓𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀭𑀤𑀓𑀸𑀮𑁂 𑀉𑀧𑁆𑀧𑀦𑁆𑀦𑁂𑀦𑀸’’𑀢𑀺. ‘‘𑀧𑀺𑀢𑁆𑀢𑀸𑀩𑀸𑀥𑁂𑀦𑀸’’𑀢𑀺 𑀇𑀫𑀺𑀦𑀸 𑀆𑀩𑀸𑀥𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀺𑀢𑁆𑀢𑀸𑀩𑀸𑀥𑀲𑁆𑀲 𑀓𑀸𑀭𑀡𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀳𑁂𑀢𑀼𑀦𑀸. 𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀓𑁄𑀝𑁆𑀞𑀩𑁆𑀪𑀦𑁆𑀢𑀭𑀕𑀢𑀦𑁆𑀢𑀺 𑀓𑁄𑀝𑁆𑀞𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀕𑀢𑀁. 𑀅𑀦𑁆𑀢𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀦𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀳𑀸𑀭𑀢𑁆𑀣𑀦𑁆𑀢𑀺 𑀆𑀳𑀸𑀭𑀲𑁆𑀲 𑀓𑀺𑀘𑁆𑀘𑀁, 𑀆𑀳𑀸𑀭𑁂𑀦 𑀯𑀸 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁.

𑁨𑁬𑁧. 𑀦𑀘𑁆𑀙𑀸𑀤𑁂𑀦𑁆𑀢𑀻𑀢𑀺 𑀢𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀪𑁄𑀚𑀦𑀸𑀦𑀺 𑀦𑀘𑁆𑀙𑀸𑀤𑁂𑀦𑁆𑀢𑀺. 𑀓𑀲𑁆𑀫𑀸? 𑀪𑁄𑀚𑀦𑀸𑀦𑀁 𑀅𑀚𑀻𑀭𑀡𑀢𑁆𑀢𑀸. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀚𑀻𑀭𑀦𑁆𑀢𑀻’’𑀢𑀺. 𑀦𑀘𑁆𑀙𑀸𑀤𑀢𑁆𑀢𑀸 𑀦 𑀯𑀸𑀢𑀭𑁄𑀕𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀏𑀢𑁆𑀣 𑀘 ‘‘𑀦 𑀚𑀻𑀭𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀦𑀘𑁆𑀙𑀸𑀤𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. ‘‘𑀦 𑀯𑀸𑀢…𑀧𑁂… 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑁂𑀯 𑀨𑀮𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀺𑀦𑀺𑀤𑁆𑀥𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀺𑀦𑀺𑀳𑀦𑁆𑀢𑀻𑀢𑀺 𑀲𑁂𑀦𑁂𑀳𑀺𑀓𑀸𑀦𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀪𑀢𑁆𑀢𑀘𑁆𑀙𑀦𑁆𑀦𑀓𑁂𑀦𑀸𑀢𑀺 𑀏𑀢𑁆𑀣 𑀪𑀢𑁆𑀢𑀲𑁆𑀲 𑀅𑀘𑁆𑀙𑀦𑁆𑀦𑀓𑀁 𑀦𑀸𑀫 𑀪𑀢𑁆𑀢𑀲𑁆𑀲 𑀅𑀭𑁄𑀘𑀺𑀓𑀁 𑀪𑀢𑁆𑀢𑀲𑁆𑀲 𑀭𑀼𑀘𑀺𑀬𑀸 𑀅𑀦𑀼𑀧𑁆𑀧𑀸𑀤𑀓𑀦𑁆𑀢𑀺 𑀆𑀳 ‘‘𑀪𑀢𑁆𑀢𑀸𑀭𑁄𑀘𑀓𑁂𑀦𑀸’’𑀢𑀺.

𑁨𑁬𑁨. 𑀅𑀘𑁆𑀙𑀯𑀲𑀦𑁆𑀢𑀺𑀆𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀬𑀁 ‘‘𑀧𑀝𑀺𑀕𑁆𑀕𑀳𑀺𑀢𑀁 𑀦𑀺𑀧𑁆𑀧𑀓𑁆𑀓𑀁 𑀲𑀁𑀲𑀝𑁆𑀞’’𑀦𑁆𑀢𑀺 𑀧𑀤𑀸𑀦𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀓𑀢𑁆𑀯𑀸 ‘‘𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀆𑀤𑀻𑀲𑀽’’𑀢𑀺𑀆𑀤𑀺. 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀏𑀢𑁆𑀣 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀢𑁆𑀢𑀸𑀳𑀓𑀸𑀮’’𑀦𑁆𑀢𑀺.

𑁧𑁬𑁧. 𑀫𑀽𑀮𑀸𑀤𑀺𑀪𑁂𑀲𑀚𑁆𑀚𑀓𑀣𑀸

𑁨𑁬𑁩. 𑀫𑀽𑀮𑀪𑁂𑀲𑀚𑁆𑀚𑀸𑀤𑀺𑀯𑀺𑀦𑀺𑀘𑁆𑀙𑀬𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀘𑁆𑀙𑀯𑀲𑀦𑁆𑀢𑀺𑀆𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑀁 𑀅𑀧𑁂𑀓𑁆𑀔𑀢𑀺. 𑀇𑀥𑀸𑀢𑀺 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂. 𑀬𑀁 𑀬𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑀁. 𑀧𑀺𑀲𑀦𑀲𑀺𑀮𑀸𑀢𑀺 𑀧𑀺𑀲𑀢𑀺 𑀏𑀢𑁆𑀣𑀸𑀢𑀺 𑀧𑀺𑀲𑀦𑀸, 𑀲𑀸𑀬𑁂𑀯 𑀲𑀺𑀮𑀸𑀢𑀺 𑀧𑀺𑀲𑀦𑀲𑀺𑀮𑀸. 𑀇𑀫𑀺𑀦𑀸 𑀅𑀘𑀮𑀁 𑀳𑀼𑀢𑁆𑀯𑀸 𑀦𑀺𑀲𑀻𑀤𑀢𑀻𑀢𑀺 𑀦𑀺𑀲𑀤𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀺𑀲𑀦𑀧𑁄𑀢𑀓𑁄𑀢𑀺 𑀧𑀺𑀲𑀢𑀺 𑀅𑀦𑁂𑀦𑀸𑀢𑀺 𑀧𑀺𑀲𑀦𑁄, 𑀲𑁄𑀬𑁂𑀯 𑀧𑁄𑀢𑀓𑁄𑀢𑀺 𑀧𑀺𑀲𑀦𑀧𑁄𑀢𑀓𑁄, 𑀇𑀫𑀺𑀦𑀸 𑀦𑀺𑀲𑀤𑀢𑁄 𑀧𑁄𑀢𑀓𑁄𑀢𑀺 𑀦𑀺𑀲𑀤𑀧𑁄𑀢𑀓𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀳𑀺𑀗𑁆𑀕𑀼𑀚𑀸𑀢𑀺𑀬𑁄𑀢𑀺 𑀳𑀺𑀗𑁆𑀕𑀼𑀓𑀼𑀮𑀸𑀦𑀺.

𑀲𑀸𑀫𑀼𑀤𑁆𑀤𑀦𑁆𑀢𑀺 𑀏𑀢𑁆𑀣 𑀲𑀫𑀼𑀤𑁆𑀤𑁂 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀲𑀸𑀫𑀼𑀤𑁆𑀤𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀼𑀤𑁆𑀤𑀢𑀻𑀭𑁂’’𑀢𑀺𑀆𑀤𑀺. ‘‘𑀢𑀻𑀭𑁂’’𑀢𑀺 𑀇𑀫𑀺𑀦𑀸 𑀲𑀫𑀼𑀤𑁆𑀤𑁂𑀢𑀺 𑀏𑀢𑁆𑀣 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀸 𑀲𑀫𑀻𑀧𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀓𑀢𑀺𑀮𑁄𑀡𑀦𑁆𑀢𑀺 𑀲𑀪𑀸𑀯𑀮𑁄𑀡𑀁, 𑀦 𑀤𑀩𑁆𑀩𑀲𑀫𑁆𑀪𑀸𑀭𑁂𑀳𑀺 𑀲𑀤𑁆𑀥𑀺𑀁 𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀩𑁆𑀩𑀢𑁂 𑀉𑀝𑁆𑀞𑀳𑀢𑀻’’𑀢𑀺 𑀇𑀫𑀺𑀦𑀸 𑀲𑀺𑀦𑁆𑀥𑀼𑀦𑀸𑀫𑀓𑁂 𑀧𑀩𑁆𑀩𑀢𑁂 𑀉𑀝𑁆𑀞𑀳𑀢𑀻𑀢𑀺 𑀲𑀺𑀦𑁆𑀥𑀯𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀉𑀩𑁆𑀩𑀺𑀢𑁄 𑀪𑀽𑀫𑀺𑀢𑁄 𑀈𑀭𑀢𑀺 𑀉𑀕𑁆𑀕𑀘𑁆𑀙𑀢𑀻𑀢𑀺 𑀉𑀩𑁆𑀩𑀺𑀭𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀽𑀫𑀺𑀢𑁄 𑀅𑀗𑁆𑀓𑀼𑀭𑀁 𑀉𑀝𑁆𑀞𑀳𑀢𑀻’’𑀢𑀺. 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀦𑀬𑁂𑀦 𑀑𑀝𑁆𑀞𑀚𑁄 𑀢𑀢𑀺𑀬𑀓𑁆𑀔𑀭𑁄𑀬𑁂𑀯 𑀬𑀼𑀚𑁆𑀚𑀢𑀺, 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀘𑀢𑀼𑀢𑁆𑀣𑀓𑁆𑀔𑀭𑁄𑀬𑁂𑀯 𑀤𑀺𑀲𑁆𑀲𑀢𑀺. ‘‘𑀉𑀩𑁆𑀪𑀺𑀤’’𑀦𑁆𑀢𑀺𑀧𑀺 𑀧𑀸𑀞𑁄. 𑀩𑀺𑀮𑀦𑁆𑀢𑀺 𑀓𑁄𑀝𑁆𑀞𑀸𑀲𑁄. 𑀢𑀲𑁆𑀫𑀸 𑀤𑀩𑁆𑀩𑀲𑀫𑁆𑀪𑀸𑀭𑁂𑀳𑀺 𑀩𑀺𑀮𑁂𑀳𑀺 𑀲𑀤𑁆𑀥𑀺𑀁 𑀧𑀘𑀺𑀢𑀁 𑀩𑀺𑀮𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀩𑁆𑀩𑀲𑀫𑁆𑀪𑀸𑀭𑁂𑀳𑀺 𑀲𑀤𑁆𑀥𑀺𑀁 𑀧𑀘𑀺𑀢’’𑀦𑁆𑀢𑀺. 𑀅𑀪𑀺𑀥𑀸𑀦𑁂 𑀧𑀦 (𑀅𑀪𑀺𑀥𑀸𑀦𑁂 𑁪𑁬𑁧 𑀕𑀸𑀣𑀸𑀬𑀁) ‘‘𑀩𑀺𑀮𑀸𑀮’’𑀦𑁆𑀢𑀺 𑀧𑀸𑀞𑁄 𑀅𑀢𑁆𑀣𑀺. 𑀢𑀦𑁆𑀢𑀺 𑀩𑀺𑀮𑀁.

𑁨𑁬𑁪. 𑀅𑀲𑁆𑀲𑀸𑀤𑀻𑀦𑀁 𑀓𑀸𑀬𑀕𑀦𑁆𑀥𑁄 𑀯𑀺𑀬 𑀓𑀲𑁆𑀲𑀘𑀺 𑀓𑀸𑀬𑀕𑀦𑁆𑀥𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀧𑀻𑀢𑀺 𑀪𑀺𑀓𑁆𑀔𑀼𑀦𑁄𑀧𑀺. 𑀧𑀺𑀲𑀤𑁆𑀤𑁂𑀦 𑀓𑀡𑁆𑀟𑀼𑀯𑀸𑀩𑀸𑀥𑀪𑀺𑀓𑁆𑀔𑀼𑀆𑀤𑀬𑁄𑀧𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀙𑀓𑀡𑀲𑀤𑁆𑀤𑀲𑁆𑀲 𑀅𑀲𑁆𑀲𑀸𑀤𑀻𑀦𑀁 𑀫𑀮𑁂𑀧𑀺 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁 ‘‘𑀕𑁄𑀫𑀬’’𑀦𑁆𑀢𑀺. 𑀧𑀸𑀓𑀢𑀺𑀓𑀘𑀼𑀡𑁆𑀡𑀫𑁆𑀧𑀻𑀢𑀺 𑀅𑀧𑀓𑁆𑀓𑀭𑀚𑀦𑀘𑀼𑀡𑁆𑀡𑀫𑁆𑀧𑀺. 𑀏𑀢𑀫𑁆𑀧𑀻𑀢𑀺 𑀧𑀸𑀓𑀢𑀺𑀓𑀘𑀼𑀡𑁆𑀡𑀫𑁆𑀧𑀺.

𑀢𑀦𑁆𑀢𑀺 𑀆𑀫𑀓𑀫𑀁𑀲𑀁, 𑀦 𑀔𑀸𑀤𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀆𑀫𑀓𑀮𑁄𑀳𑀺𑀢𑀁 𑀯𑀸, 𑀦 𑀧𑀺𑀯𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑀦𑀼𑀲𑁆𑀲𑁄𑀢𑀺 𑀫𑀦𑀼𑀲𑁆𑀲𑀲𑀤𑀺𑀲𑁄 𑀪𑀽𑀢𑁄. 𑀢𑀦𑁆𑀢𑀺 𑀆𑀫𑀓𑀫𑀁𑀲𑀮𑁄𑀳𑀺𑀢𑀁.

𑁨𑁬𑁫. ‘‘𑀅𑀜𑁆𑀚𑀦’’𑀦𑁆𑀢𑀺 𑀦𑀸𑀫𑀁 𑀲𑀸𑀫𑀜𑁆𑀜𑀦𑁆𑀢𑀺 𑀆𑀳 ‘‘𑀅𑀜𑁆𑀚𑀦𑀦𑁆𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀘𑀦𑀫𑁂𑀢’’𑀦𑁆𑀢𑀺. 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀘𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀜𑁆𑀚𑀦𑀸𑀦𑀁 𑀲𑀗𑁆𑀕𑀸𑀳𑀓𑀯𑀘𑀦𑀁. 𑀏𑀢𑀦𑁆𑀢𑀺 ‘‘𑀅𑀜𑁆𑀚𑀦’’𑀦𑁆𑀢𑀺 𑀏𑀢𑀁 𑀯𑀘𑀦𑀁. 𑀅𑀜𑁆𑀚𑀢𑀺 𑀘𑀓𑁆𑀔𑀼𑀁 𑀫𑀓𑁆𑀔𑁂𑀢𑀺 𑀅𑀦𑁂𑀦𑀸𑀢𑀺 𑀅𑀜𑁆𑀚𑀦𑀁, 𑀅𑀜𑁆𑀚𑀢𑀺 𑀘𑀓𑁆𑀔𑀼𑀁 𑀩𑁆𑀬𑀢𑁆𑀢𑀁 𑀓𑀭𑁄𑀢𑀻𑀢𑀺 𑀯𑀸 𑀅𑀜𑁆𑀚𑀦𑀁, 𑀢𑀸𑀮𑀼𑀚𑁄 𑀢𑀢𑀺𑀬𑀓𑁆𑀔𑀭𑁄. 𑀓𑀧𑀮𑁆𑀮𑀦𑁆𑀢𑀺 𑀓𑀧𑀮𑁆𑀮𑁂 𑀧𑀯𑀢𑁆𑀢𑀁. 𑀓𑀧𑀸𑀮𑀜𑁆𑀳𑀺 𑀤𑀻𑀧𑀲𑀺𑀔𑀸𑀬 𑀉𑀧𑀭𑀺 𑀦𑀺𑀓𑀼𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀧𑀯𑀢𑁆𑀢𑀁 𑀫𑀲𑀺 ‘‘𑀓𑀧𑀮𑁆𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀻𑀧𑀲𑀺𑀔𑀢𑁄 𑀕𑀳𑀺𑀢𑀫𑀲𑀻’’𑀢𑀺. 𑀅𑀜𑁆𑀚𑀦𑀽𑀧𑀧𑀺𑀲𑀦𑁂𑀳𑀻𑀢𑀺 𑀏𑀢𑁆𑀣 𑀅𑀜𑁆𑀚𑀦𑁂𑀳𑀺 𑀲𑀤𑁆𑀥𑀺𑀁 𑀉𑀧𑀦𑁂𑀢𑀼𑀁 𑀧𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀜𑁆𑀚𑀦𑀽𑀧𑀧𑀺𑀲𑀦𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀚𑀦𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀧𑀺𑀲𑀺𑀢𑁂𑀳𑀻’’𑀢𑀺. ‘‘𑀏𑀓𑀢𑁄’’𑀢𑀺 𑀇𑀫𑀺𑀦𑀸 ‘‘𑀲𑀤𑁆𑀥𑀺’’𑀦𑁆𑀢𑀺 𑀧𑀤𑀲𑁆𑀲𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀬𑀁𑀓𑀺𑀜𑁆𑀘𑀺 𑀅𑀜𑁆𑀚𑀦𑀽𑀧𑀧𑀺𑀲𑀦𑀁 𑀘𑀼𑀡𑁆𑀡𑀁 𑀦 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀦 𑀯𑀝𑁆𑀝𑀢𑀺 𑀦 𑀳𑁄𑀢𑀺, 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀇𑀫𑀲𑁆𑀫𑀺𑀁 𑀦𑀬𑁂 ‘‘𑀦 𑀯𑀝𑁆𑀝𑀢𑀻’’𑀢𑀺 𑀆𑀔𑁆𑀬𑀸𑀢𑀧𑀤𑀁 𑀓𑀺𑀭𑀺𑀬𑀸𑀦𑁆𑀢𑀭𑀸𑀧𑁂𑀓𑁆𑀔𑀢𑁆𑀢𑀸 𑀓𑀢𑁆𑀢𑀸 𑀳𑁄𑀢𑀺. 𑀆𑀔𑁆𑀬𑀸𑀢𑁂𑀲𑀼𑀧𑀺 𑀳𑀺 𑀓𑀢𑁆𑀢𑀼𑀢𑁆𑀢𑀜𑁆𑀘 𑀓𑀫𑁆𑀫𑀢𑁆𑀢𑀜𑁆𑀘 𑀮𑀩𑁆𑀪𑀢𑀺. 𑀘𑀦𑁆𑀤𑀦𑀦𑁆𑀢𑀺𑀆𑀤𑀻𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯.

𑀅𑀝𑁆𑀞𑀺𑀫𑀬𑀦𑁆𑀢𑀺 𑀧𑀤𑀲𑁆𑀲 𑀅𑀢𑀺𑀩𑁆𑀬𑀸𑀧𑀺𑀢𑀤𑁄𑀲𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀫𑀦𑀼𑀲𑁆𑀲𑀝𑁆𑀞𑀺𑀁 𑀞𑀧𑁂𑀢𑁆𑀯𑀸’’𑀢𑀺. 𑀲𑀮𑀸𑀓𑀝𑁆𑀞𑀸𑀦𑀺𑀬𑀦𑁆𑀢𑀺 𑀏𑀢𑁆𑀣 𑀲𑀮𑀸𑀓𑀸 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀮𑀸𑀓𑀝𑁆𑀞𑀸𑀦𑀺𑀬𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀲𑀼𑀲𑀺𑀭𑀤𑀡𑁆𑀟𑀓𑀸𑀤𑀺𑀓𑁂. 𑀲𑀮𑀸𑀓𑀦𑁆𑀢𑀺 𑀅𑀜𑁆𑀚𑀦𑀺𑀲𑀮𑀸𑀓𑀁. 𑀑𑀤𑀳𑀦𑁆𑀢𑀻𑀢𑀺 𑀞𑀧𑁂𑀦𑁆𑀢𑀺. 𑀅𑀁𑀲𑀩𑀤𑁆𑀥𑀓𑁄𑀢𑀺 𑀅𑀁𑀲𑁂 𑀩𑀤𑁆𑀥𑀢𑀺 𑀅𑀦𑁂𑀦𑀸𑀢𑀺 𑀅𑀁𑀲𑀩𑀤𑁆𑀥𑀓𑁄. 𑀬𑀫𑀓𑀦𑀢𑁆𑀣𑀼𑀓𑀭𑀡𑀺𑀦𑁆𑀢𑀺 𑀦𑀢𑁆𑀣𑀼 𑀓𑀭𑀻𑀬𑀢𑀺 𑀇𑀫𑀸𑀬𑀸𑀢𑀺 𑀦𑀢𑁆𑀣𑀼𑀓𑀭𑀡𑀻, 𑀬𑀫𑀓𑀸 𑀦𑀢𑁆𑀣𑀼𑀓𑀭𑀡𑀻 𑀬𑀫𑀓𑀦𑀢𑁆𑀣𑀼𑀓𑀭𑀡𑀻.

𑁨𑁬𑁭. 𑀢𑀁 𑀲𑀩𑁆𑀩𑀁 𑀢𑁂𑀮𑀧𑀸𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀢𑀺 𑀯𑀺𑀬 𑀔𑀺𑀢𑁆𑀢𑀫𑀚𑁆𑀚𑀸𑀦𑀻’’𑀢𑀺 𑀇𑀫𑀺𑀦𑀸 𑀅𑀢𑀺 𑀯𑀺𑀬 𑀔𑀺𑀧𑀻𑀬𑀦𑁆𑀢𑀺 𑀧𑀓𑁆𑀔𑀺𑀧𑀻𑀬𑀦𑁆𑀢𑀻𑀢𑀺 𑀅𑀢𑀺𑀔𑀺𑀢𑁆𑀢𑀸𑀦𑀺, 𑀢𑀸𑀦𑀺𑀬𑁂𑀯 𑀫𑀚𑁆𑀚𑀸𑀦𑀺 𑀅𑀢𑀺𑀔𑀺𑀢𑁆𑀢𑀫𑀚𑁆𑀚𑀸𑀦𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀧𑀡𑁆𑀡𑀲𑁂𑀤𑀦𑁆𑀢𑀺 𑀧𑀡𑁆𑀡𑁂𑀳𑀺 𑀲𑁂𑀤𑀁. 𑀅𑀗𑁆𑀕𑀸𑀭𑀸𑀦𑀦𑁆𑀢𑀺 𑀅𑀗𑁆𑀕𑀸𑀭𑁂𑀳𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀁𑀲𑀼𑀯𑀸𑀮𑀺𑀓𑀸𑀤𑀻𑀲𑀼. 𑀯𑀸𑀢𑀳𑀭𑀡𑀧𑀡𑁆𑀡𑀸𑀦𑀻𑀢𑀺 𑀯𑀸𑀢𑀲𑁆𑀲 𑀅𑀧𑀦𑀬𑀦𑀸𑀦𑀺 𑀉𑀤𑁆𑀤𑀸𑀮𑀸𑀤𑀻𑀦𑀺 𑀧𑀡𑁆𑀡𑀸𑀦𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀡𑁆𑀡𑁂𑀲𑀼. 𑀦𑀸𑀦𑀸𑀧𑀡𑁆𑀡𑀪𑀗𑁆𑀕𑀓𑀼𑀣𑀺𑀢𑀦𑁆𑀢𑀺 𑀦𑀸𑀦𑀸𑀧𑀡𑁆𑀡𑀸𑀦𑀺𑀬𑁂𑀯 𑀪𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 𑀦𑀸𑀦𑀸𑀧𑀡𑁆𑀡𑀪𑀗𑁆𑀕𑀁, 𑀢𑁂𑀦 𑀓𑀼𑀣𑀺𑀢𑀁 𑀦𑀸𑀦𑀸𑀧𑀡𑁆𑀡𑀪𑀗𑁆𑀕𑀓𑀼𑀣𑀺𑀢𑀁. 𑀉𑀡𑁆𑀳𑁄𑀤𑀓𑀲𑁆𑀲𑀸𑀢𑀺 𑀉𑀡𑁆𑀳𑁄𑀤𑀓𑁂𑀦. 𑀢𑀢𑁆𑀣𑀸𑀢𑀺 𑀉𑀤𑀓𑀓𑁄𑀝𑁆𑀞𑀓𑁂.

𑀧𑀩𑁆𑀩𑁂 𑀧𑀩𑁆𑀩𑁂𑀢𑀺 𑀨𑀴𑀼𑀫𑁆𑀳𑀺 𑀨𑀴𑀼𑀫𑁆𑀳𑀺. 𑀬𑁂𑀦𑀸𑀢𑀺 𑀧𑀚𑁆𑀚𑁂𑀦. 𑀢𑀁 𑀧𑀚𑁆𑀚𑀁 𑀅𑀪𑀺𑀲𑀗𑁆𑀔𑀭𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. ‘‘𑀧𑀸𑀤𑀸𑀦𑀁 𑀲𑀧𑁆𑀧𑀸𑀬𑀪𑁂𑀲𑀚𑁆𑀚’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀤𑀲𑁆𑀲 𑀳𑀺𑀢𑀁 𑀧𑀚𑁆𑀚𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀺𑀮𑀓𑀓𑁆𑀓𑁂𑀦𑀸𑀢𑀺 𑀏𑀢𑁆𑀣 𑀓𑀓𑁆𑀓𑀲𑀤𑁆𑀤𑀲𑁆𑀲 𑀘𑀼𑀡𑁆𑀡𑀯𑀸𑀘𑀓𑀢𑁆𑀢𑀸 ‘‘𑀧𑀺𑀝𑁆𑀞𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀓𑀩𑀴𑁂𑀦 𑀧𑀓𑁆𑀔𑀺𑀧𑀦𑀁 𑀓𑀩𑀴𑀺𑀓𑀁. 𑀲𑀢𑁆𑀢𑀼𑀧𑀺𑀡𑁆𑀟𑀲𑁆𑀲 𑀪𑀢𑁆𑀢𑀓𑀩𑀴𑀲𑀤𑀺𑀲𑀢𑁆𑀢𑀸 𑀲𑀢𑁆𑀢𑀼𑀧𑀺𑀡𑁆𑀟𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀡𑀺 𑀯𑀺𑀬𑀸𑀢𑀺 𑀔𑀻𑀮𑀸 𑀯𑀺𑀬. 𑀔𑀸𑀭𑁂𑀦𑀸𑀢𑀺 𑀮𑁄𑀡𑀲𑀓𑁆𑀔𑀭𑀺𑀓𑀫𑀬𑁂𑀦 𑀔𑀸𑀭𑁂𑀦. 𑀯𑀺𑀓𑀸𑀲𑀁 𑀭𑀼𑀦𑁆𑀥𑀢𑀻𑀢𑀺 𑀯𑀺𑀓𑀸𑀲𑀺𑀓𑀁, 𑀢𑁂𑀮𑀭𑀼𑀦𑁆𑀥𑀦𑀧𑀺𑀮𑁄𑀢𑀺𑀓𑀁. 𑀯𑀡𑀓𑀫𑁆𑀫𑀦𑁆𑀢𑀺 𑀯𑀡𑀲𑁆𑀲, 𑀯𑀡𑁂 𑀯𑀸 𑀓𑀫𑁆𑀫𑀁.

𑁨𑁬𑁮. 𑀲𑀧𑁆𑀧𑀤𑀝𑁆𑀞𑀓𑀸𑀮𑁂𑀬𑁂𑀯 𑀓𑀺𑀁 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀇𑀤𑀦𑁆𑀢𑀺 𑀫𑀳𑀸𑀯𑀺𑀓𑀝𑀁, 𑀧𑀭𑀺𑀪𑀼𑀜𑁆𑀚𑀻𑀓𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀲𑀼 𑀧𑀦𑀸𑀢𑀺 𑀲𑀧𑁆𑀧𑀤𑀝𑁆𑀞𑀢𑁄 𑀅𑀜𑁆𑀜𑁂𑀲𑀼 𑀧𑀦. 𑀲𑀘𑁂 𑀪𑀽𑀫𑀺𑀧𑀢𑁆𑀢𑁄 𑀕𑀽𑀣𑁄 𑀳𑁄𑀢𑀺, 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁨𑁬𑁯. 𑀯𑀲𑀻𑀓𑀭𑀡𑀧𑀸𑀦𑀓𑀲𑀫𑀼𑀝𑁆𑀞𑀺𑀢𑀭𑁄𑀕𑁄𑀢𑀺 𑀓𑀦𑁆𑀢𑀺𑀪𑀸𑀯𑀲𑀗𑁆𑀔𑀸𑀢𑀁 𑀯𑀲𑀁 𑀓𑀭𑁄𑀢𑀺 𑀅𑀦𑁂𑀦𑀸𑀢𑀺 𑀯𑀲𑀻𑀓𑀭𑀡𑀁, 𑀪𑁂𑀲𑀚𑁆𑀚𑀁, 𑀧𑀺𑀯𑀢𑁂 𑀧𑀸𑀦𑀁, 𑀢𑀁𑀬𑁂𑀯 𑀧𑀸𑀦𑀓𑀁, 𑀯𑀲𑀻𑀓𑀭𑀡𑀲𑁆𑀲 𑀧𑀸𑀦𑀓𑀁 𑀯𑀲𑀻𑀓𑀭𑀡𑀧𑀸𑀦𑀓𑀁, 𑀢𑁂𑀦 𑀲𑀫𑀼𑀝𑁆𑀞𑀺𑀢𑁄 𑀭𑁄𑀕𑁄 𑀯𑀲𑀻𑀓𑀭𑀡𑀧𑀸𑀦𑀓𑀲𑀫𑀼𑀝𑁆𑀞𑀺𑀢𑀭𑁄𑀕𑁄. 𑀇𑀫𑀺𑀦𑀸 𑀖𑀭𑀤𑀺𑀦𑁆𑀦𑀓𑀸𑀩𑀸𑀥𑁄𑀢𑀺 𑀏𑀢𑁆𑀣 𑀖𑀭𑀡𑀺𑀬𑀸 𑀤𑀺𑀦𑁆𑀦𑁂𑀦 𑀯𑀲𑀻𑀓𑀭𑀡𑀧𑀸𑀦𑀓𑁂𑀦 𑀲𑀫𑀼𑀝𑁆𑀞𑀺𑀢𑁄 𑀆𑀩𑀸𑀥𑁄 𑀖𑀭𑀤𑀺𑀦𑁆𑀦𑀓𑀸𑀩𑀸𑀥𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀻𑀢𑀸𑀬 𑀆𑀮𑁄𑀴𑁂𑀢𑀩𑁆𑀩𑀦𑁆𑀢𑀺 𑀲𑀻𑀢𑀸𑀮𑁄𑀴𑀁, 𑀉𑀤𑀓𑀁. 𑀲𑀻𑀢𑀸𑀲𑀤𑁆𑀤𑁄 𑀦𑀗𑁆𑀕𑀮𑀮𑁂𑀔𑀸𑀲𑀗𑁆𑀔𑀸𑀢𑀁 𑀨𑀸𑀮𑀧𑀤𑁆𑀥𑀢𑀺𑀁 𑀫𑀼𑀔𑁆𑀬𑀢𑁄 𑀯𑀤𑀢𑀺, 𑀨𑀸𑀮𑀧𑀤𑁆𑀥𑀢𑀺𑀓𑀭𑁂 𑀨𑀸𑀮𑁂 𑀮𑀕𑁆𑀕𑀫𑀢𑁆𑀢𑀺𑀓𑀁 𑀉𑀧𑀘𑀸𑀭𑀢𑁄 𑀯𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀻𑀢𑀸𑀬 𑀆𑀮𑁄𑀴𑁂𑀢𑀩𑁆𑀩’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀗𑁆𑀕𑀮𑁂𑀦𑀸’’𑀢𑀺𑀆𑀤𑀺.

𑀯𑀺𑀧𑀓𑁆𑀓𑀕𑀳𑀡𑀺𑀓𑁄𑀢𑀺 𑀯𑀺𑀲𑁂𑀲𑁂𑀦 𑀧𑀸𑀘𑀸𑀧𑀦𑀕𑀳𑀡𑀺𑀓𑁄. 𑀫𑀼𑀢𑁆𑀢𑀳𑀭𑀻𑀢𑀓𑀦𑁆𑀢𑀺 𑀏𑀢𑁆𑀣 ‘‘𑀫𑀼𑀢𑁆𑀢’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀕𑁄𑀫𑀼𑀢𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑁄𑀫𑀼𑀢𑁆𑀢𑀧𑀭𑀺𑀪𑀸𑀯𑀺𑀢𑀁 𑀳𑀭𑀻𑀢𑀓’’𑀦𑁆𑀢𑀺. 𑀇𑀫𑀺𑀦𑀸 𑀫𑀼𑀢𑁆𑀢𑁂𑀦 𑀧𑀭𑀺𑀪𑀸𑀯𑀺𑀢𑀁 𑀳𑀭𑀻𑀢𑀓𑀁 𑀫𑀼𑀢𑁆𑀢𑀳𑀭𑀻𑀢𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀡𑁆𑀟𑀼𑀮𑀓𑀲𑀝𑁄𑀢𑀺 𑀢𑀡𑁆𑀟𑀼𑀮𑀥𑁄𑀯𑀦𑁄𑀤𑀓𑀓𑀲𑀝𑁄 𑀥𑁄𑀢𑀲𑀺𑀦𑀺𑀤𑁆𑀥𑁄, 𑀲𑁄𑀯 𑀫𑀼𑀕𑁆𑀕𑀧𑀘𑀺𑀢𑀧𑀸𑀦𑀻𑀬𑁄𑀢𑀺 𑀬𑁄𑀚𑀦𑀸. ‘‘𑀫𑀁𑀲𑀭𑀲𑁂𑀦𑀸’’𑀢𑀺 𑀇𑀫𑀺𑀦𑀸 𑀫𑀁𑀲𑀭𑀲𑁄 𑀫𑀁𑀲𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀦𑀻𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁬𑁩. 𑀕𑀼𑀴𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸

𑁨𑁭𑁨. 𑀳𑀻𑀢𑀺 𑀲𑀘𑁆𑀘𑀁. 𑀧𑀓𑁆𑀓𑀢𑁆𑀢𑀸𑀢𑀺 𑀫𑀼𑀕𑁆𑀕𑀸𑀦𑀁 𑀧𑀓𑁆𑀓𑀪𑀸𑀯𑀢𑁄. 𑀢𑁂𑀢𑀺 𑀫𑀼𑀕𑁆𑀕𑀸.

𑁨𑁭𑁪. 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀦𑁆𑀢𑀺 𑀅𑀓𑀧𑁆𑀧𑀺𑀬𑀓𑀼𑀝𑀺𑀬𑀸 𑀅𑀦𑁆𑀢𑁄. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀫𑁆𑀧𑀻𑀢𑀺 𑀉𑀡𑁆𑀳𑀬𑀸𑀕𑀼𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀧𑀕𑁂𑀯 𑀆𑀫𑀺𑀲𑀁 𑀧𑀘𑀺𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀉𑀢𑁆𑀢𑀡𑁆𑀟𑀼𑀮𑀪𑀢𑁆𑀢𑀦𑁆𑀢𑀺 𑀧𑀓𑁆𑀓𑀢𑀡𑁆𑀟𑀼𑀮𑀢𑁄 𑀯𑀺𑀬𑁄𑀕𑁄𑀢𑀺 𑀉𑀢𑁆𑀢𑀡𑁆𑀟𑀼𑀮𑁄, 𑀉𑀓𑀸𑀭𑁄 𑀳𑀺 𑀯𑀺𑀬𑁄𑀕𑀢𑁆𑀣𑀯𑀸𑀘𑀓𑁄, 𑀅𑀧𑀓𑁆𑀓𑀢𑀡𑁆𑀟𑀼𑀮𑁄𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀡𑁆𑀟𑀼𑀮𑀫𑀬𑀁 𑀪𑀢𑁆𑀢𑀦𑁆𑀢𑀺 𑀉𑀢𑁆𑀢𑀡𑁆𑀟𑀼𑀮𑀪𑀢𑁆𑀢𑀁. 𑀲𑀓𑀺𑀁 𑀓𑀼𑀣𑀺𑀢𑁂𑀲𑀼 𑀔𑀻𑀭𑀢𑀓𑁆𑀓𑀸𑀤𑀻𑀲𑀼 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀩𑀺𑀴𑀸𑀮𑀸𑀤𑀻𑀦𑀁 𑀲𑀢𑁆𑀢𑀸𑀦𑀁 𑀲𑀫𑀽𑀳𑁄 𑀭𑀽𑀴𑁆𑀳𑀻𑀯𑀲𑁂𑀦 𑀉𑀓𑁆𑀓𑀧𑀺𑀡𑁆𑀟𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀩𑀺𑀴𑀸𑀮𑀫𑀽𑀲𑀺𑀓𑀕𑁄𑀥𑀸𑀫𑀗𑁆𑀕𑀼𑀲𑀸’’𑀢𑀺. 𑀯𑀺𑀖𑀸𑀲𑀸𑀤𑀪𑀸𑀯𑁂𑀦 𑀦𑀺𑀳𑀢𑀫𑀸𑀦𑀢𑁆𑀢𑀸 𑀓𑀸𑀬𑀯𑀸𑀘𑀁 𑀤𑀫𑁂𑀢𑀻𑀢𑀺 𑀤𑀫𑀓𑁄 𑀯𑀺𑀖𑀸𑀲𑀸𑀤𑁄𑀢𑀺 𑀆𑀳 ‘‘𑀯𑀺𑀖𑀸𑀲𑀸𑀤𑀸’’𑀢𑀺.

𑁨𑁭𑁬. 𑀢𑀢𑁄 𑀦𑀻𑀳𑀝𑀦𑁆𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀣𑀸’’𑀢𑀺𑀆𑀤𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀦𑀻𑀳𑀝𑀦𑁆𑀢𑀺 𑀦𑀻𑀳𑀭𑀺𑀢𑁆𑀯𑀸 𑀳𑀭𑀺𑀢𑀁.

𑁨𑁭𑁮. 𑀯𑀦𑀝𑁆𑀞𑀁 𑀧𑁄𑀓𑁆𑀔𑀭𑀝𑁆𑀞𑀦𑁆𑀢𑀺 𑀏𑀢𑁆𑀣 𑀯𑀦𑁂 𑀢𑀺𑀝𑁆𑀞𑀢𑀻𑀢𑀺 𑀯𑀦𑀝𑁆𑀞𑁄, 𑀧𑁄𑀓𑁆𑀔𑀭𑁂 𑀢𑀺𑀝𑁆𑀞𑀢𑀻𑀢𑀺 𑀧𑁄𑀓𑁆𑀔𑀭𑀝𑁆𑀞𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀦𑁂 𑀘𑁂𑀯𑀸’’𑀢𑀺𑀆𑀤𑀺. ‘‘𑀧𑀤𑀼𑀫𑀺𑀦𑀺𑀕𑀘𑁆𑀙𑁂’’𑀢𑀺 𑀇𑀫𑀺𑀦𑀸 𑀧𑁄𑀓𑁆𑀔𑀭𑀲𑀤𑁆𑀤𑁄 𑀧𑀤𑀼𑀫𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀩𑀻𑀚𑀁 𑀅𑀗𑁆𑀓𑀼𑀭𑀁 𑀦 𑀚𑀦𑁂𑀢𑀺, 𑀢𑀁 𑀨𑀮𑀁 𑀅𑀩𑀻𑀚𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸.

𑁧𑁬𑁭. 𑀲𑀢𑁆𑀣𑀓𑀫𑁆𑀫𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁭𑁯. 𑀤𑀼𑀓𑁆𑀔𑁂𑀦 𑀭𑀼𑀧𑀢𑀻𑀢𑀺 𑀤𑀼𑀭𑁄𑀧𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀓𑁆𑀔𑁂𑀦 𑀭𑀼𑀳𑀢𑀻’’𑀢𑀺. 𑀲𑀢𑁆𑀣𑀓𑀫𑁆𑀫𑀁 𑀯𑀸 𑀯𑀢𑁆𑀣𑀺𑀓𑀫𑁆𑀫𑀁 𑀯𑀸𑀢𑀺 𑀏𑀢𑁆𑀣 𑀲𑀢𑁆𑀣𑁂𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀲𑀢𑁆𑀣𑀓𑀫𑁆𑀫𑀁, 𑀯𑀢𑁆𑀣𑀺𑀧𑀻𑀴𑀦𑀁 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁 𑀯𑀢𑁆𑀣𑀺𑀓𑀫𑁆𑀫𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑁂’’𑀢𑀺𑀆𑀤𑀺. ‘‘𑀲𑀽𑀘𑀺𑀬𑀸 𑀯𑀸’’𑀢𑀺𑀆𑀤𑀺𑀦𑀸 𑀲𑀢𑁆𑀣𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 ‘‘𑀲𑀢𑁆𑀣’’𑀦𑁆𑀢𑀺 𑀧𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀢𑁆𑀣𑁂𑀦 𑀯𑀸’’𑀢𑀺 𑀧𑀤𑀁 ‘‘𑀙𑀺𑀦𑁆𑀤𑀦𑀁 𑀯𑀸 𑀨𑀸𑀮𑀦𑀁 𑀯𑀸’’𑀢𑀺𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀲𑀽𑀘𑀺𑀬𑀸 𑀯𑀸 𑀓𑀡𑁆𑀝𑀓𑁂𑀦 𑀯𑀸 𑀲𑀢𑁆𑀢𑀺𑀓𑀸𑀬 𑀯𑀸’’𑀢𑀺𑀧𑀤𑀸𑀦𑀺 ‘‘𑀯𑀺𑀚𑁆𑀛𑀦𑀁 𑀯𑀸’’𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. ‘‘𑀧𑀸𑀲𑀸𑀡𑀲𑀓𑁆𑀔𑀮𑀺𑀓𑀸𑀬 𑀯𑀸 𑀦𑀔𑁂𑀦 𑀯𑀸’’𑀢𑀺 𑀧𑀤𑀸𑀦𑀺 ‘‘𑀮𑁂𑀔𑀦𑀁 𑀯𑀸’’𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀢𑀦𑁆𑀢𑀺 𑀲𑀢𑁆𑀣𑁂𑀦 𑀙𑀺𑀦𑁆𑀤𑀦𑀸𑀤𑀺𑀓𑀫𑁆𑀫𑀁. 𑀏𑀢𑁆𑀣 𑀘𑀸𑀢𑀺 𑀲𑀢𑁆𑀣𑀓𑀫𑁆𑀫𑀯𑀢𑁆𑀣𑀺𑀓𑀫𑁆𑀫𑁂𑀲𑀼. 𑀢𑀢𑁆𑀣 𑀧𑀦𑀸𑀢𑀺 𑀲𑀫𑁆𑀩𑀸𑀥𑁂 𑀧𑀦. 𑀢𑁂𑀦𑀸𑀢𑀺 𑀔𑀸𑀭𑀸𑀤𑀺𑀦𑀸. 𑀯𑀘𑁆𑀘𑀫𑀕𑁆𑀕𑁂 𑀬𑀸𑀬 𑀪𑁂𑀲𑀚𑁆𑀚𑀫𑀓𑁆𑀔𑀺𑀢𑀸𑀤𑀸𑀦𑀯𑀝𑁆𑀝𑀺𑀬𑀸 𑀔𑀸𑀭𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀺, 𑀬𑀸𑀬 𑀯𑁂𑀴𑀼𑀦𑀸𑀴𑀺𑀓𑀸𑀬 𑀢𑁂𑀮𑀁 𑀯𑀸 𑀧𑀯𑁂𑀲𑁂𑀦𑁆𑀢𑀺, 𑀲𑀸 𑀪𑁂𑀲𑀚𑁆𑀚𑀫𑀓𑁆𑀔𑀺𑀢𑀸𑀤𑀸𑀦𑀯𑀝𑁆𑀝𑀺 𑀯𑀸 𑀲𑀸 𑀯𑁂𑀴𑀼𑀦𑀸𑀴𑀺𑀓𑀸 𑀯𑀸 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸.

𑁨𑁮𑁦. 𑀢𑀁 𑀤𑀺𑀯𑀲𑀦𑁆𑀢𑀺 𑀢𑀲𑁆𑀫𑀺𑀁 𑀤𑀺𑀯𑀲𑁂. 𑀓𑀺𑀜𑁆𑀘𑀺 𑀲𑀢𑁆𑀣𑀦𑁆𑀢𑀺 𑀬𑁄𑀚𑀦𑀸. 𑀇𑀫𑀸𑀬𑀸𑀢𑀺 𑀲𑀼𑀧𑁆𑀧𑀺𑀬𑀸𑀬 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀤𑁂𑀬𑁆𑀬𑀁 𑀓𑀺𑀫𑁆𑀧𑀺 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀬𑀢𑁆𑀭 𑀦𑀸𑀫𑀸𑀢𑀺 𑀏𑀢𑁆𑀣 𑀢𑁆𑀭𑀧𑀘𑁆𑀘𑀬𑁄 𑀓𑀸𑀭𑀡𑀢𑁆𑀣𑁂 𑀳𑁄𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀸 𑀦𑀸𑀫𑀸’’𑀢𑀺. ‘‘𑀯𑀻𑀫𑀁𑀲𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀯𑁂𑀓𑁆𑀔𑀻𑀢𑀺 𑀏𑀢𑁆𑀣 𑀧𑀝𑀺𑀅𑀯𑀧𑀼𑀩𑁆𑀩𑁄 𑀇𑀓𑁆𑀔𑀥𑀸𑀢𑀼 𑀯𑀻𑀫𑀁𑀲𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀲𑀼𑀓𑀫𑀁𑀲𑀦𑁆𑀢𑀺 𑀅𑀲𑀼𑀓𑀁 𑀫𑀁𑀲𑀁, 𑀅𑀲𑀼𑀓𑀲𑁆𑀲 𑀯𑀸 𑀲𑀢𑁆𑀢𑀲𑁆𑀲 𑀫𑀁𑀲𑀁.

𑁧𑁬𑁯. 𑀳𑀢𑁆𑀣𑀺𑀫𑀁𑀲𑀸𑀤𑀺𑀧𑀝𑀺𑀓𑁆𑀔𑁂𑀧𑀓𑀣𑀸

𑁨𑁮𑁧. 𑀅𑀭𑀜𑁆𑀜𑀓𑁄𑀓𑀸 𑀦𑀸𑀫𑀸𑀢𑀺 𑀲𑀲𑀩𑀺𑀴𑀸𑀮𑀸𑀤𑀬𑁄 𑀲𑀢𑁆𑀢𑁂 𑀔𑀸𑀤𑀦𑀢𑁆𑀣𑀸𑀬 𑀓𑀼𑀓𑀢𑀺 𑀆𑀤𑀤𑀸𑀢𑀻𑀢𑀺 𑀓𑁄𑀓𑁄 𑀅𑀭𑀜𑁆𑀜𑁂 𑀚𑀸𑀢𑁄 𑀓𑁄𑀓𑁄 𑀅𑀭𑀜𑁆𑀜𑀓𑁄𑀓𑁄, 𑀲𑀼𑀦𑀔𑀲𑀤𑀺𑀲𑀸𑀢𑀺 𑀕𑀸𑀫𑀲𑀼𑀦𑀔𑁂𑀦 𑀲𑀤𑀺𑀲𑀸. 𑀢𑁂𑀲𑀦𑁆𑀢𑀺 𑀅𑀭𑀜𑁆𑀜𑀓𑁄𑀓𑀸𑀦𑀁. 𑀬𑁄 𑀧𑀦𑀸𑀢𑀺 𑀲𑀼𑀦𑀔𑁄 𑀧𑀦, 𑀉𑀧𑁆𑀧𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀸𑀫𑀲𑀼𑀦𑀔𑀺𑀬𑀸𑀢𑀺 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀓𑁄𑀓𑁂𑀦𑀸𑀢𑀺 𑀲𑀳𑀸𑀤𑀺𑀬𑁄𑀕𑁂 𑀓𑀭𑀡𑀯𑀘𑀦𑀁. 𑀢𑀸𑀦𑀺 𑀧𑀤𑀸𑀦𑀺 ‘‘𑀲𑀁𑀬𑁄𑀕𑁂𑀦𑀸’’𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀲𑁆𑀲𑀸𑀢𑀺 𑀲𑀼𑀦𑀔𑀲𑁆𑀲.

𑀏𑀢𑁆𑀣𑀸𑀢𑀺 𑀫𑀦𑀼𑀲𑁆𑀲𑀫𑀁𑀲𑀸𑀤𑀻𑀲𑀼. 𑀲𑀚𑀸𑀢𑀺𑀓𑀢𑀸𑀬𑀸𑀢𑀺 𑀲𑀫𑀸𑀦𑀚𑀸𑀢𑀺𑀓𑀪𑀸𑀯𑀢𑁄. 𑀅𑀦𑀼𑀧𑀤𑁆𑀤𑀯𑀢𑁆𑀣𑀸𑀬𑀸𑀢𑀺 𑀅𑀦𑀼𑀧𑀤𑁆𑀤𑀯𑀢𑁆𑀣𑀁, 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀢𑁆𑀢𑀻𑀢𑀺 𑀫𑀦𑀼𑀲𑁆𑀲𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑁂𑀦, 𑀲𑁂𑀲𑁂 𑀤𑀼𑀓𑁆𑀓𑀝𑁂𑀦 𑀆𑀧𑀢𑁆𑀢𑀺. 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀧𑀦𑀸𑀢𑀺 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀓𑀢𑀫𑀁𑀲𑀁 𑀧𑀦.

𑁧𑁭𑁦. 𑀬𑀸𑀕𑀼𑀫𑀥𑀼𑀕𑁄𑀴𑀓𑀸𑀤𑀺𑀓𑀣𑀸

𑁨𑁮𑁨. 𑀏𑀓𑀓𑁄𑀢𑀺 𑀏𑀢𑁆𑀣 𑀏𑀓𑀢𑁄 𑀅𑀲𑀳𑀸𑀬𑀢𑁆𑀣𑁂 𑀓𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀦𑀢𑁆𑀣𑀺 𑀫𑁂 𑀤𑀼𑀢𑀺𑀬𑁄’’𑀢𑀺. 𑀲𑁄𑀢𑀺 𑀩𑁆𑀭𑀸𑀳𑁆𑀫𑀡𑁄. 𑀯𑀬𑀁 𑀓𑀢𑁆𑀯𑀸𑀢𑀺 𑀧𑀭𑀺𑀩𑁆𑀩𑀬𑀁 𑀓𑀢𑁆𑀯𑀸, 𑀧𑀝𑀺𑀬𑀸𑀤𑀸𑀧𑁂𑀲𑀺 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀅𑀦𑀼𑀫𑁄𑀤𑀦𑀕𑀸𑀣𑀸𑀬𑀸𑀢𑀺 𑀅𑀦𑀼𑀫𑁄𑀤𑀦𑀧𑀓𑀸𑀲𑀓𑀸𑀬 𑀕𑀸𑀣𑀸𑀬. ‘‘𑀧𑀢𑁆𑀣𑀬𑀢𑀁 𑀇𑀘𑁆𑀙𑀢’’𑀦𑁆𑀢𑀺 𑀧𑀤𑀸𑀦𑀁 𑀅𑀮𑀫𑀢𑁆𑀣𑀧𑀬𑁄𑀕𑁂 𑀲𑀫𑁆𑀧𑀤𑀸𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀮𑀫𑁂𑀯 𑀤𑀸𑀢𑀼𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄’’𑀢𑀺. 𑀲𑁄𑀬𑁂𑀯 𑀕𑀳𑁂𑀢𑀩𑁆𑀩𑁄𑀢𑀺 ‘‘𑀤𑀸𑀢𑀼’’𑀦𑁆𑀢𑀺𑀪𑀸𑀯𑀲𑁆𑀲 𑀓𑀢𑁆𑀢𑀼𑀪𑀸𑀯𑁂𑀦 𑀲𑁄 𑀏𑀯 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑁨𑁮𑁩. 𑀬𑀸 𑀬𑀸𑀕𑀼 𑀧𑀯𑀸𑀭𑀡𑀁 𑀚𑀦𑁂𑀢𑀺, 𑀲𑀸 𑀬𑀸𑀕𑀼 𑀪𑁄𑀚𑁆𑀚𑀬𑀸𑀕𑀼 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀦𑁆𑀢𑀺 𑀓𑀸𑀮𑀁. ‘‘𑀆𑀤𑀺𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀬𑀤𑀕𑁆𑀕𑁂𑀦𑀸𑀢𑀺 𑀏𑀢𑁆𑀣 𑀅𑀕𑁆𑀕𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀕𑁆𑀕𑀦𑀺𑀩𑁆𑀩𑀢𑁆𑀢𑀓𑀧𑀼𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀲𑀕𑁆𑀕𑀸𑀢𑀺 𑀏𑀢𑁆𑀣 𑀨𑀮𑀽𑀧𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀕𑀼𑀴𑁄.

𑁨𑁮𑁪. 𑀢𑀣𑀸𑀭𑀽𑀧𑁂𑀦𑀸𑀢𑀺 𑀢𑀣𑀸𑀲𑀪𑀸𑀯𑁂𑀦. 𑀕𑀼𑀴𑀲𑁆𑀲 𑀅𑀦𑀼𑀭𑀽𑀧𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑁧𑁭𑁩. 𑀧𑀸𑀝𑀮𑀺𑀕𑀸𑀫𑀯𑀢𑁆𑀣𑀼𑀓𑀣𑀸

𑁨𑁮𑁫. 𑀬𑀣𑀸 𑀲𑀩𑁆𑀩𑀁 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯𑀁 𑀢𑀣𑀸 𑀲𑀩𑁆𑀩𑀲𑀦𑁆𑀣𑀭𑀺𑀲𑀦𑁆𑀣𑀢𑀦𑁆𑀢𑀺 𑀬𑁄𑀚𑀦𑀸.

𑁨𑁮𑁬. 𑀲𑀼𑀦𑀺𑀥𑁄 𑀘 𑀯𑀲𑁆𑀲𑀓𑀸𑀭𑁄 𑀘𑀸𑀢𑀺 𑀏𑀢𑁆𑀣 𑀘𑀓𑀸𑀭𑁂𑀳𑀺 𑀤𑁆𑀯𑀦𑁆𑀤𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺. 𑀆𑀬𑀫𑀼𑀔𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀦𑁆𑀢𑀺 𑀲𑀼𑀗𑁆𑀓𑀫𑀼𑀔𑀲𑁆𑀲 𑀧𑀘𑁆𑀙𑁂𑀤𑀦𑀢𑁆𑀣𑀁. ‘‘𑀖𑀭𑀯𑀢𑁆𑀣𑀽𑀦𑀻’’𑀢𑀺 𑀇𑀫𑀺𑀦𑀸 𑀯𑀢𑁆𑀣𑀼𑀲𑀤𑁆𑀤𑀲𑁆𑀲 𑀓𑀸𑀭𑀡𑀤𑀩𑁆𑀩𑀢𑁆𑀣𑁂 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀽𑀪𑁂𑀤𑀢𑁆𑀣𑀁 𑀤𑀻𑀧𑁂𑀢𑀺. 𑀢𑀸 𑀤𑁂𑀯𑀢𑀸 𑀦𑀸𑀫𑁂𑀦𑁆𑀢𑀺 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀬𑀁 𑀬𑀁 𑀪𑁄𑀕𑀩𑀮𑀸𑀦𑀼𑀭𑀽𑀧𑀁. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. 𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀖𑁄𑀲𑁄. 𑀢𑁂𑀦𑁂𑀯𑀸𑀢𑀺 𑀢𑁂𑀦 𑀲𑀤𑁆𑀤𑀲𑁆𑀲 𑀅𑀩𑁆𑀪𑀼𑀕𑁆𑀕𑀢𑀳𑁂𑀢𑀼𑀦𑀸 𑀏𑀯. ‘‘𑀑𑀲𑀭𑀡𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀅𑀭𑀺𑀬𑀁 𑀆𑀬𑀢𑀦𑀦𑁆𑀢𑀺 𑀏𑀢𑁆𑀣 𑀆𑀬𑀢𑀦𑀲𑀤𑁆𑀤𑁄 𑀲𑀫𑁄𑀲𑀭𑀡𑀝𑁆𑀞𑀸𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀢𑁆𑀢𑀓𑀁 𑀓𑀬𑀯𑀺𑀓𑁆𑀓𑀬𑀝𑁆𑀞𑀸𑀦𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀸𑀡𑀺𑀚𑀸𑀦𑀁…𑀧𑁂… 𑀓𑀬𑀯𑀺𑀓𑁆𑀓𑀬𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀯𑀡𑀺𑀚𑀸 𑀧𑀢𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀡𑀺𑀧𑁆𑀧𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀯𑀡𑀺𑀚𑀧𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀚𑀓𑀸𑀭𑀮𑁄𑀧𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀸𑀴𑀺𑀬𑀁 ‘‘𑀢𑁂𑀲’’𑀦𑁆𑀢𑀺 𑀧𑀸𑀞𑀲𑁂𑀲𑀲𑁆𑀲 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀅𑀭𑀺𑀬𑀸𑀬𑀢𑀦𑀯𑀸𑀡𑀺𑀚𑀧𑀢𑀸𑀦’’𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀘 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀯𑀸 𑀯𑀺𑀪𑀢𑁆𑀢𑀅𑀧𑀸𑀤𑀸𑀦𑀢𑁆𑀣𑁂 𑀯𑀸. 𑀇𑀤𑀦𑁆𑀢𑀺 𑀧𑀼𑀭𑀁. 𑀧𑀼𑀝𑀪𑁂𑀤𑀦𑀦𑁆𑀢𑀺 𑀏𑀢𑁆𑀣 𑀧𑀼𑀝𑀁 𑀪𑀺𑀦𑁆𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀼𑀝𑀪𑁂𑀤𑀦𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀡𑁆𑀟𑀺𑀓𑀪𑁂𑀤𑀦𑀝𑁆𑀞𑀸𑀦’’𑀦𑁆𑀢𑀺. ‘‘𑀲𑀫𑀼𑀘𑁆𑀘𑀬𑀢𑁆𑀣𑁄 𑀯𑀸𑀲𑀤𑁆𑀤𑁄’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀭 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑁂, 𑀢𑀻𑀲𑀼 𑀯𑀸 𑀅𑀕𑁆𑀕𑀺𑀉𑀤𑀓𑀫𑀺𑀣𑀼𑀪𑁂𑀤𑁂𑀲𑀼. ‘‘𑀅𑀜𑁆𑀜𑀫𑀜𑁆𑀜𑀪𑁂𑀤𑀸’’𑀢𑀺 𑀇𑀫𑀺𑀦𑀸 𑀫𑀺𑀣𑀼𑀪𑁂𑀤𑀸𑀢𑀺 𑀏𑀢𑁆𑀣 𑀫𑀺𑀣𑀼𑀲𑀤𑁆𑀤𑀲𑁆𑀲 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀉𑀴𑀼𑀫𑁆𑀧𑀓𑀼𑀮𑁆𑀮𑀲𑀤𑁆𑀤𑀸𑀦𑀁 𑀅𑀢𑁆𑀣𑁂 𑀲𑀫𑀸𑀦𑁂𑀧𑀺 𑀓𑀭𑀡𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀴𑀼𑀫𑁆𑀧’’𑀦𑁆𑀢𑀺𑀆𑀤𑀺. 𑀉𑀴𑀼 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑀢𑁄 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀉𑀴𑀼𑀫𑁆𑀧𑁄. 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑀲𑁆𑀫𑀺𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀓𑀼𑀮𑁆𑀮𑁄.

𑀅𑀡𑁆𑀡𑀯𑀦𑁆𑀢𑀺 𑀏𑀢𑁆𑀣 𑀅𑀡𑁆𑀡𑀯𑁄 𑀦𑀸𑀫 𑀓𑀺𑀁 𑀲𑀫𑀼𑀤𑁆𑀤𑀲𑁆𑀲 𑀦𑀸𑀫𑀦𑁆𑀢𑀺 𑀆𑀳 ‘‘𑀅𑀡𑁆𑀡𑀯’’𑀦𑁆𑀢𑀺𑀆𑀤𑀺. ‘‘𑀅𑀡𑁆𑀡𑀯’’𑀦𑁆𑀢𑀺 𑀏𑀢𑀁 𑀦𑀸𑀫𑀁 𑀉𑀤𑀓𑀝𑁆𑀞𑀸𑀦𑀲𑁆𑀲 𑀅𑀥𑀺𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀅𑀡𑁆𑀡𑁄 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑀁 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀅𑀡𑁆𑀡𑀯𑁄. 𑀲𑀭𑀲𑀤𑁆𑀤𑀲𑁆𑀲 𑀅𑀓𑀸𑀭𑀸𑀤𑀺𑀫𑁆𑀳𑀺 𑀘 𑀓𑀡𑁆𑀟𑁂 𑀘 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁 ‘‘𑀲𑀭𑀦𑁆𑀢𑀺 𑀇𑀥 𑀦𑀤𑀻 𑀅𑀥𑀺𑀧𑁆𑀧𑁂𑀢𑀸’’𑀢𑀺. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁. 𑀇𑀤𑀦𑁆𑀢𑀺 𑀅𑀢𑁆𑀣𑀚𑀸𑀢𑀁.

𑀬𑁂𑀢𑀺 𑀅𑀭𑀺𑀬𑀸. 𑀢𑁂𑀢𑀺 𑀅𑀭𑀺𑀬𑀸, 𑀢𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀚𑁆𑀚𑀧𑀮𑁆𑀮𑀮𑀸𑀦𑀻𑀢𑀺 𑀏𑀢𑁆𑀣 𑀯𑀺𑀲𑀚𑁆𑀚𑀲𑀤𑁆𑀤𑁄 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑁄, 𑀧𑀮𑁆𑀮𑀮𑀲𑀤𑁆𑀤𑁄 𑀦𑀺𑀦𑁆𑀦𑀝𑁆𑀞𑀸𑀦𑀯𑀸𑀘𑀓𑁄𑀢𑀺 𑀆𑀳 ‘‘𑀯𑀺𑀲𑀚𑁆𑀚…𑀧𑁂… 𑀦𑀺𑀦𑁆𑀦𑀝𑁆𑀞𑀸𑀦𑀸𑀦𑀻’’𑀢𑀺. 𑀅𑀬𑀁 𑀧𑀦 𑀚𑀦𑁄 𑀓𑀼𑀮𑁆𑀮𑀁 𑀩𑀦𑁆𑀥𑀢𑀻𑀢𑀺 𑀬𑁄𑀚𑀦𑀸. 𑀢𑀺𑀡𑁆𑀡𑀸 𑀫𑁂𑀥𑀸𑀯𑀺𑀦𑁄 𑀚𑀦𑀸 𑀇𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁨𑁮𑁭. 𑀅𑀦𑀦𑀼𑀩𑁄𑀥𑀸𑀢𑀺 𑀏𑀢𑁆𑀣 𑀓𑀸𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀩𑀼𑀚𑁆𑀛𑀦𑁂𑀦𑀸’’𑀢𑀺. 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀦𑁆𑀢𑀺 𑀏𑀢𑁆𑀣 𑀢𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀬𑀸 𑀘 𑀢𑀼𑀫𑁆𑀳𑁂𑀳𑀺 𑀘𑀸’’𑀢𑀺. 𑀇𑀫𑀺𑀦𑀸 𑀓𑀢𑁆𑀢𑀼𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀢𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀺𑀢𑀦𑁆𑀢𑀺 𑀏𑀢𑁆𑀣 𑀲𑀭𑀥𑀸𑀢𑀼𑀬𑀸 𑀭𑀓𑀸𑀭𑁄 𑀮𑁄𑀧𑁄𑀢𑀺 𑀆𑀳 ‘‘𑀲𑀁𑀲𑀭𑀺𑀢’’𑀦𑁆𑀢𑀺. ‘‘𑀢𑀡𑁆𑀳𑀸𑀭𑀚𑁆𑀚𑀽’’𑀢𑀺 𑀇𑀫𑀺𑀦𑀸 𑀪𑀯𑀢𑁄 𑀪𑀯𑀁 𑀦𑁂𑀢𑀻𑀢𑀺 𑀪𑀯𑀦𑁂𑀢𑁆𑀢𑀻𑀢𑀺 𑀯𑀘𑀦𑀢𑁆𑀣𑁂𑀦 𑀢𑀡𑁆𑀳𑀸𑀭𑀚𑁆𑀚𑀼 𑀪𑀯𑀦𑁂𑀢𑁆𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑁨𑁮𑁯. 𑀯𑀡𑁆𑀡𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀦𑀺 𑀲𑀸𑀫𑀜𑁆𑀜𑀯𑀲𑁂𑀦 ‘‘𑀦𑀻𑀮𑀸’’𑀢𑀺 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀦𑀻𑀮𑀸𑀢𑀺 𑀇𑀤𑀁 𑀲𑀩𑁆𑀩𑀲𑀗𑁆𑀕𑀸𑀳𑀓’’𑀦𑁆𑀢𑀺. 𑀢𑀢𑁆𑀣𑀸𑀢𑀺 ‘‘𑀦𑀻𑀮𑀸’’𑀢𑀺𑀆𑀤𑀺𑀧𑀸𑀞𑁂. 𑀢𑁂𑀲𑀦𑁆𑀢𑀺 𑀮𑀺𑀘𑁆𑀙𑀯𑀻𑀦𑀁. 𑀧𑀓𑀢𑀺𑀯𑀡𑁆𑀡𑀸 𑀦𑀻𑀮𑀸 𑀦 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑀦𑁆𑀢𑀺 ‘‘𑀦𑀻𑀮𑀸’’𑀢𑀺𑀆𑀤𑀺𑀯𑀘𑀦𑀁. 𑀧𑀝𑀺𑀯𑀢𑁆𑀢𑁂𑀲𑀻𑀢𑀺 𑀏𑀢𑁆𑀣 𑀯𑀢𑀼𑀥𑀸𑀢𑀼 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀅𑀢𑁆𑀣𑀸𑀢𑀺𑀲𑀬𑀯𑀲𑁂𑀦 𑀯𑀸 𑀧𑀳𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀧𑀳𑀸𑀭𑁂𑀲𑀻’’𑀢𑀺. ‘‘𑀲𑀚𑀦𑀧𑀤’’𑀦𑁆𑀢𑀺 𑀇𑀫𑀺𑀦𑀸 𑀲𑀸𑀳𑀸𑀭𑀦𑁆𑀢𑀺 𑀏𑀢𑁆𑀣 𑀆𑀳𑀸𑀭𑀲𑀤𑁆𑀤𑁄 𑀚𑀦𑀧𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀚𑀦𑀧𑀤𑁄 𑀳𑀺 𑀬𑀲𑁆𑀫𑀸 𑀦𑀕𑀭𑀲𑁆𑀲 𑀧𑀭𑀺𑀯𑀸𑀭𑀪𑀸𑀯𑁂𑀦 𑀆𑀳𑀭𑀺𑀢𑀩𑁆𑀩𑁄, 𑀇𑀫𑀲𑁆𑀫𑀸 𑀘 𑀭𑀸𑀚𑀧𑀼𑀭𑀺𑀲𑀸 𑀩𑀮𑀺𑀁 𑀆𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀲𑀚𑀦𑀧𑀤𑀁 𑀯𑁂𑀲𑀸𑀮𑀺𑀁 𑀤𑀚𑁆𑀚𑁂𑀬𑁆𑀬𑀸𑀣𑀸𑀢𑀺 𑀬𑁄𑀚𑀦𑀸. 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀦𑁆𑀢𑀺 𑀏𑀢𑁆𑀣 𑀨𑀼𑀝𑀥𑀸𑀢𑀼 𑀲𑀜𑁆𑀘𑀮𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀗𑁆𑀕𑀼𑀮𑀺𑀁 𑀘𑀸𑀮𑁂𑀲𑀼’’𑀦𑁆𑀢𑀺. 𑀇𑀢𑁆𑀣𑀺𑀓𑀸𑀬𑀸𑀢𑀺 𑀇𑀢𑁆𑀣𑀻𑀬𑁂𑀯 𑀧𑀼𑀭𑀺𑀲𑀢𑁄 𑀔𑀼𑀤𑁆𑀤𑀓𑀝𑁆𑀞𑁂𑀦 𑀇𑀢𑁆𑀣𑀺𑀓𑀸, 𑀢𑀸𑀬.

𑁧𑁭𑁮. 𑀲𑀻𑀳𑀲𑁂𑀦𑀸𑀧𑀢𑀺𑀯𑀢𑁆𑀣𑀼𑀓𑀣𑀸

𑁨𑁯𑁦. 𑀥𑀫𑁆𑀫𑀲𑁆𑀲 𑀘 𑀅𑀦𑀼𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡’’𑀦𑁆𑀢𑀺. ‘‘𑀧𑀭𑁂𑀳𑀻’’𑀢𑀺 𑀧𑀤𑀁 ‘‘𑀯𑀼𑀢𑁆𑀢’’𑀇𑀢𑀺 𑀧𑀤𑁂 𑀓𑀢𑁆𑀢𑀸. ‘‘𑀯𑀼𑀢𑁆𑀢𑀓𑀸𑀭𑀡𑁂𑀦𑀸’’𑀢𑀺𑀧𑀤𑀁 ‘‘𑀲𑀓𑀸𑀭𑀡𑁄’’𑀢𑀺𑀧𑀤𑁂 𑀓𑀭𑀡𑀁. 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄𑀢𑀺 𑀬𑁄𑀚𑀦𑀸. ‘‘𑀯𑀺𑀜𑁆𑀜𑀽𑀳𑀻’’𑀢𑀺 𑀧𑀤𑀁 ‘‘𑀕𑀭𑀳𑀺𑀢𑀩𑁆𑀩’’𑀇𑀢𑀺 𑀧𑀤𑁂 𑀓𑀢𑁆𑀢𑀸. ‘‘𑀕𑀭𑀳𑀺𑀢𑀩𑁆𑀩𑀓𑀸𑀭𑀡’’𑀦𑁆𑀢𑀺 𑀧𑀤𑀁 ‘‘𑀦 𑀆𑀕𑀘𑁆𑀙𑀢𑀻’’𑀢𑀺 𑀧𑀤𑁂 𑀓𑀫𑁆𑀫𑀁. 𑀅𑀦𑀩𑁆𑀪𑀓𑁆𑀔𑀸𑀢𑀼𑀓𑀸𑀫𑀸𑀢𑀺 𑀏𑀢𑁆𑀣 𑀅𑀪𑀺𑀢𑁆𑀬𑀽𑀧𑀲𑀕𑁆𑀕𑁄 𑀅𑀪𑀺𑀪𑀯𑀦𑀢𑁆𑀣𑁄 𑀆𑀧𑀼𑀩𑁆𑀩𑁄 𑀔𑀸𑀥𑀸𑀢𑀼 𑀧𑀓𑀣𑀦𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀪𑀯𑀺𑀢𑁆𑀯𑀸 𑀦 𑀆𑀘𑀺𑀓𑁆𑀔𑀺𑀢𑀼𑀓𑀸𑀫𑀸’’𑀢𑀺.

𑁨𑁯𑁩. 𑀅𑀦𑀼𑀯𑀺𑀘𑁆𑀘𑀓𑀸𑀭𑀦𑁆𑀢𑀺 𑀏𑀢𑁆𑀣 𑀅𑀦𑀼𑀯𑀺𑀘𑁆𑀘𑀲𑀤𑁆𑀤𑁄 𑀯𑀺𑀘𑀥𑀸𑀢𑀼 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑁄𑀢𑀺 𑀆𑀳 ‘‘𑀅𑀦𑀼𑀯𑀺𑀘𑀺𑀢𑁆𑀯𑀸’’𑀢𑀺. ‘‘𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀺𑀘𑀥𑀸𑀢𑀼𑀬𑀸 𑀜𑀸𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀢𑀩𑁆𑀩𑀦𑁆𑀢𑀺 𑀓𑀸𑀭𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀝𑀸𑀓𑀦𑁆𑀢𑀺 𑀥𑀚𑀧𑀝𑀸𑀓𑀁. ‘‘𑀆𑀳𑀺𑀡𑁆𑀟𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀬𑁆𑀬𑀼𑀦𑁆𑀢𑀺 𑀏𑀢𑁆𑀣 𑀧𑀭𑀺𑀧𑀼𑀩𑁆𑀩𑀆𑀧𑀼𑀩𑁆𑀩 𑀬𑀸𑀥𑀸𑀢𑀼𑀬𑀸 𑀕𑀢𑁆𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀸𑀴𑀺𑀬𑀁 ‘‘𑀧𑀭𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺𑀧𑀺 𑀧𑀸𑀞𑁄. 𑀆𑀳𑀺𑀡𑁆𑀟𑁂𑀬𑁆𑀬𑀼𑀦𑁆𑀢𑀺 𑀆𑀳𑀺𑀡𑁆𑀟𑀦𑁆𑀢𑀺. 𑀫𑀼𑀤𑁆𑀥𑀚𑁄 𑀢𑀢𑀺𑀬𑀓𑁆𑀔𑀭𑁄. 𑀑𑀧𑀸𑀦𑀪𑀽𑀢𑀦𑁆𑀢𑀺 𑀏𑀢𑁆𑀣 𑀑𑀧𑀸𑀦𑁄 𑀯𑀺𑀬 𑀪𑀽𑀢𑁄 𑀑𑀧𑀸𑀦𑀪𑀽𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀬𑀢𑁆𑀢𑀉𑀤𑀧𑀸𑀦𑁄 𑀯𑀺𑀬 𑀞𑀺𑀢’’𑀦𑁆𑀢𑀺. ‘‘𑀉𑀤𑀧𑀸𑀦𑁄’’𑀢𑀺 𑀇𑀫𑀺𑀦𑀸 𑀑𑀧𑀸𑀦𑀲𑀤𑁆𑀤𑁄 𑀉𑀤𑀧𑀸𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀤𑀧𑀸𑀦𑁄 𑀳𑀺 𑀲𑀩𑁆𑀩𑁂 𑀚𑀦𑀸 𑀑𑀲𑀭𑀺𑀢𑁆𑀯𑀸 𑀧𑀺𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀑𑀧𑀸𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑁂𑀲𑀦𑁆𑀢𑀺 𑀦𑀺𑀕𑀡𑁆𑀞𑀸𑀦𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑀫𑁆𑀧𑀢𑁆𑀢𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀫𑁂𑀯, 𑀢𑀲𑁆𑀫𑀸 𑀫𑀸 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀣𑀸𑀢𑀺 𑀬𑁄𑀚𑀦𑀸. 𑀉𑀤𑁆𑀤𑀺𑀲𑁆𑀲𑀸𑀢𑀺 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀲𑀤𑁆𑀤𑁄 ‘‘𑀓𑀢’’𑀦𑁆𑀢𑀺 𑀉𑀢𑁆𑀢𑀭𑀧𑀤𑁂𑀦 𑀲𑀫𑀸𑀲𑁄𑀢𑀺 𑀆𑀳 ‘‘𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀢’’𑀦𑁆𑀢𑀺. 𑀏𑀲𑁂𑀯 𑀦𑀬𑁄 ‘‘𑀧𑀝𑀺𑀘𑁆𑀘𑀓𑀫𑁆𑀫’’𑀦𑁆𑀢𑀺 𑀏𑀢𑁆𑀣𑀸𑀧𑀺.

𑁨𑁯𑁪. 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀏𑀢𑀁 𑀦𑀸𑀫𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲 𑀅𑀥𑀺𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀬𑁄𑀢𑀺 𑀬𑁄 𑀓𑁄𑀘𑀺 𑀚𑀦𑁄. 𑀯𑀥𑀓𑀲𑁆𑀲 𑀧𑀸𑀡𑀖𑀸𑀢𑀓𑀫𑁆𑀫𑀁 𑀳𑁄𑀢𑀺 𑀯𑀺𑀬, 𑀢𑀲𑁆𑀲𑀸𑀧𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀦 𑀚𑀻𑀭𑀦𑁆𑀢𑀻𑀢𑀺 𑀏𑀢𑁆𑀣 𑀚𑀭𑀥𑀸𑀢𑀼 𑀕𑀢𑁆𑀬𑀢𑁆𑀣𑁄𑀢𑀺 𑀆𑀳 ‘‘𑀦 𑀕𑀘𑁆𑀙𑀦𑁆𑀢𑀻’’𑀢𑀺.

𑁧𑁭𑁯. 𑀓𑀧𑁆𑀧𑀺𑀬𑀪𑀽𑀫𑀺𑀅𑀦𑀼𑀚𑀸𑀦𑀦𑀓𑀣𑀸

𑁨𑁯𑁫. 𑀩𑀳𑀸𑀭𑀸𑀫𑀓𑁄𑀝𑁆𑀞𑀓𑁂𑀢𑀺 𑀏𑀢𑁆𑀣 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀩𑀳𑀸𑀭𑀸𑀫𑀓𑁄𑀝𑁆𑀞𑀓𑀲𑀫𑀻𑀧𑁂𑀢𑀺 𑀆𑀭𑀸𑀫𑀓𑁄𑀝𑁆𑀞𑀓𑀲𑁆𑀲 𑀩𑀳𑀺 𑀲𑀫𑀻𑀧𑁂𑀢𑀺 𑀅𑀢𑁆𑀣𑁄’’𑀢𑀺. 𑀅𑀘𑁆𑀙𑀦𑁆𑀢𑀻𑀢𑀺 𑀯𑀲𑀦𑁆𑀢𑀺. 𑀏𑀢𑀦𑁆𑀢𑀺 ‘‘𑀧𑀘𑁆𑀘𑀦𑁆𑀢𑀺𑀫’’𑀦𑁆𑀢𑀺 𑀏𑀢𑀁 𑀯𑀘𑀦𑀁. 𑀥𑀼𑀭𑀯𑀺𑀳𑀸𑀭𑁄𑀧𑀻𑀢𑀺 𑀧𑀥𑀸𑀦𑀯𑀺𑀳𑀸𑀭𑁄𑀧𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀅𑀦𑀼𑀧𑀕𑁂𑀬𑁂𑀯𑀸𑀢𑀺 𑀧𑀸𑀢𑁄𑀬𑁂𑀯. 𑀑𑀭𑀯𑀲𑀤𑁆𑀤𑀦𑁆𑀢𑀺 𑀉𑀘𑁆𑀘𑀭𑀯𑀲𑀗𑁆𑀔𑀸𑀢𑀁 𑀲𑀤𑁆𑀤𑀁. 𑀓𑀧𑀺𑀮𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 (𑀲𑀼. 𑀦𑀺. 𑀅𑀝𑁆𑀞. 𑁨.𑀓𑀧𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸) 𑀲𑀗𑁆𑀕𑀳𑀺𑀢𑀲𑁆𑀲 𑀓𑀧𑀺𑀮𑀲𑀼𑀢𑁆𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂. 𑀧𑀜𑁆𑀘𑀲𑀢𑀸𑀦𑀁 𑀓𑁂𑀯𑀝𑁆𑀝𑀧𑀼𑀭𑀺𑀲𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑁄 𑀯𑀺𑀳𑀸𑀭𑁄 𑀓𑀭𑀺𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀽𑀫𑀺𑀬𑀸 𑀕𑀢𑀺 𑀯𑀺𑀬 𑀕𑀢𑀺 𑀏𑀢𑁂𑀲𑀦𑁆𑀢𑀺 𑀪𑀽𑀫𑀺𑀕𑀢𑀺𑀓𑀸. 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀳𑀺 𑀩𑀳𑀽𑀳𑀺 𑀪𑀺𑀓𑁆𑀔𑀽𑀳𑀺 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀘𑁆𑀙𑀸𑀭𑁂𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀬𑁄𑀚𑀦𑀸. 𑀲𑀬𑀦𑁆𑀢𑀺 𑀪𑀺𑀓𑁆𑀔𑀼. 𑀢𑀁 𑀧𑀦𑀸𑀢𑀺 ‘‘𑀲𑀗𑁆𑀖𑀲𑁆𑀲 𑀓𑀧𑁆𑀧𑀺𑀬𑀓𑀼𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀘𑀦𑀁 𑀧𑀦. 𑀅𑀯𑀢𑁆𑀯𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀢𑀣𑀸 ‘‘𑀯𑀢𑁆𑀯𑀸𑀧𑀻’’𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀝𑁆𑀞𑀓𑀣𑀸𑀲𑀽𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀤𑀻𑀲𑀼 𑀢𑀻𑀲𑀼 𑀅𑀝𑁆𑀞𑀓𑀣𑀸𑀲𑀼. 𑀏𑀢𑁆𑀣𑀸𑀢𑀺 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀓𑀼𑀝𑀺𑀬𑀁. ‘‘𑀲𑀫𑀓𑀸𑀮𑀁 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀁 𑀤𑀴𑁆𑀳𑀻𑀓𑀭𑁄𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀯𑀘𑀦𑁂𑀢𑀺 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀘𑀦𑁂. 𑀢𑀲𑁆𑀫𑀺𑀦𑁆𑀢𑀺 𑀣𑀫𑁆𑀪𑁂. 𑀢𑁂𑀦𑁂𑀯𑀸𑀢𑀺 𑀅𑀓𑀢𑀪𑀸𑀯𑁂𑀦𑁂𑀯. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀣𑀸𑀢𑀺 𑀩𑀳𑀽𑀲𑀼.

𑀬𑀢𑁄𑀢𑀺 𑀇𑀝𑁆𑀞𑀓𑀲𑀺𑀮𑀸𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀢𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀩𑀳𑀽𑀳𑀺 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀇𑀝𑁆𑀞𑀓𑀸𑀤𑀬𑁄𑀢𑀺 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀇𑀝𑁆𑀞𑀓𑀸𑀤𑀬𑁄. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸𑀢𑀺 𑀬𑀣𑀸 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀣𑀸. 𑀣𑀫𑁆𑀪𑀸𑀤𑀻𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑀦𑀜𑁆𑀘 ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀓𑀭𑁄𑀫𑀸’’𑀢𑀺 𑀲𑀸𑀯𑀦𑀜𑁆𑀘 𑀅𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀫𑁂𑀢𑀺𑀲𑁆𑀲𑀸𑀢𑀺 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸.

𑀢𑀸𑀲𑀽𑀢𑀺 𑀤𑁆𑀯𑀻𑀲𑀼 𑀕𑁄𑀦𑀺𑀲𑀸𑀤𑀺𑀓𑀸𑀲𑀼. 𑀬𑀢𑁆𑀣𑀸𑀢𑀺 𑀓𑀼𑀝𑀺𑀬𑀁. 𑀦𑁂𑀯 𑀆𑀭𑀸𑀫𑁄 𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀦 𑀬𑀢𑁆𑀣𑀸𑀢𑀺 𑀓𑀼𑀝𑀺𑀬𑀁. 𑀅𑀬𑀦𑁆𑀢𑀺 𑀓𑀼𑀝𑀺. 𑀉𑀪𑀬𑀢𑁆𑀣𑀸𑀧𑀻𑀢𑀺 𑀆𑀭𑀸𑀫𑀯𑀺𑀳𑀸𑀭𑀕𑁄𑀦𑀺𑀲𑀸𑀤𑀺𑀓𑀸𑀲𑀼 𑀤𑁆𑀯𑀻𑀲𑀼𑀧𑀺. 𑀩𑀳𑀼𑀢𑀭𑀁 𑀧𑀭𑀺𑀓𑁆𑀔𑀺𑀢𑁆𑀢𑁄𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄𑀬𑁂𑀯 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀉𑀧𑀟𑁆𑀠𑀧𑀭𑀺𑀓𑁆𑀔𑀺𑀢𑁆𑀢𑀩𑀳𑀼𑀢𑀭𑀧𑀭𑀺𑀓𑁆𑀔𑀺𑀢𑁆𑀢𑀆𑀭𑀸𑀫𑁂. 𑀕𑀸𑀯𑁄 𑀧𑀯𑀺𑀲𑀺𑀢𑁆𑀯𑀸 𑀬𑀣𑀸𑀲𑀼𑀔𑀁 𑀦𑀺𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀦𑀺𑀲𑀸𑀤𑀸 𑀕𑁄𑀲𑀸𑀮𑀸. 𑀕𑁄𑀦𑀺𑀲𑀸𑀤𑀸 𑀯𑀺𑀬𑀸𑀢𑀺 𑀕𑁄𑀦𑀺𑀲𑀸𑀤𑀺𑀓𑀸 𑀓𑀼𑀝𑀺.

𑀫𑀦𑀼𑀲𑁆𑀲𑀸 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲𑀸𑀢𑀺 𑀓𑀼𑀝𑀺. 𑀯𑀼𑀢𑁆𑀢𑁂𑀧𑀻𑀢𑀺 𑀧𑀺𑀲𑀤𑁆𑀤𑁂, ‘‘𑀓𑀧𑁆𑀧𑀺𑀬𑀓𑀼𑀝𑀺𑀁 𑀤𑁂𑀫𑀸’’𑀢𑀺 𑀯𑀸𑀓𑁆𑀬𑀁 𑀅𑀧𑁂𑀓𑁆𑀔𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀯𑀝𑁆𑀝𑀢𑀺, 𑀢𑀲𑁆𑀫𑀸𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀲𑁂𑀲𑀲𑀳𑀥𑀫𑁆𑀫𑀺𑀓𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀢𑁂𑀳𑀻𑀢𑀺 𑀲𑁂𑀲𑀲𑀳𑀥𑀫𑁆𑀫𑀺𑀓𑀤𑁂𑀯𑀫𑀦𑀼𑀲𑁆𑀲𑁂𑀳𑀺. 𑀧𑀼𑀦𑀧𑀺 𑀯𑀼𑀢𑁆𑀢𑀁, 𑀓𑀺𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀲𑁆𑀲…𑀧𑁂… 𑀳𑁄𑀢𑀻’’𑀢𑀺. 𑀅𑀧𑀻𑀢𑀺 𑀢𑀤𑀜𑁆𑀜𑁂𑀲𑀁. 𑀢𑀦𑁆𑀢𑀺 𑀯𑀘𑀦𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀫𑁂𑀯 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀓𑀫𑁂𑀯 𑀯𑀸𑀢𑀺 𑀬𑁄𑀚𑀦𑀸. 𑀇𑀢𑀺 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀳𑀧𑀢𑀻𑀦𑀁 𑀲𑀦𑁆𑀢𑀓𑀁 𑀕𑀳𑀧𑀢𑀺 𑀓𑀼𑀝𑀺. ‘‘𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀓𑀫𑁆𑀫𑀯𑀸𑀘𑀫𑀯𑀢𑁆𑀯𑀸 𑀅𑀧𑀮𑁄𑀓𑀦𑁂𑀦𑀧𑀺 𑀓𑀧𑁆𑀧𑀺𑀬𑀢𑁆𑀢𑀸. 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀲𑀫𑁆𑀫𑀦𑀺𑀢𑀩𑁆𑀩𑀸𑀢𑀺 𑀲𑀫𑁆𑀫𑀼𑀢𑀺 𑀓𑀼𑀝𑀺. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑀬𑀁 𑀆𑀫𑀺𑀲𑀁 𑀯𑀼𑀢𑁆𑀣𑀁, 𑀲𑀩𑁆𑀩𑀁 𑀢𑀁 𑀆𑀫𑀺𑀲𑀦𑁆𑀢𑀺𑀬𑁄𑀚𑀦𑀸. 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀧𑀳𑁄𑀦𑀓𑁂 𑀕𑁂𑀳𑁂 𑀯𑀼𑀢𑁆𑀣𑀁 𑀞𑀧𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀧𑀦 𑀲𑀗𑁆𑀖𑀺𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀁𑀬𑁂𑀯𑀸𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀫𑁂𑀯. 𑀏𑀓𑀭𑀢𑁆𑀢𑀫𑁆𑀧𑀺 𑀞𑀧𑀺𑀢𑀁 𑀬𑀁 𑀲𑀦𑁆𑀢𑀓𑀁 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀲𑀗𑁆𑀖𑀺𑀓𑀸𑀤𑀺. 𑀢𑀢𑁆𑀣𑀸𑀢𑀺 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀲𑀳𑀲𑁂𑀬𑁆𑀬𑀧𑀳𑁄𑀦𑀓𑀕𑁂𑀳𑁂. 𑀏𑀢𑀦𑁆𑀢𑀺 𑀅𑀦𑁆𑀢𑁄𑀯𑀼𑀢𑁆𑀣𑀅𑀦𑁆𑀢𑁄𑀧𑀓𑁆𑀓𑀲𑀗𑁆𑀔𑀸𑀢𑀁 𑀬𑀸𑀯𑀬𑀸𑀫𑀓𑀸𑀮𑀺𑀓𑀁, ‘‘𑀦 𑀓𑀧𑁆𑀧𑀢𑀻’’𑀢𑀺 𑀩𑁆𑀬𑀢𑀺𑀭𑁂𑀓𑀲𑁆𑀲 𑀅𑀦𑁆𑀯𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀦𑀸’’𑀢𑀺𑀆𑀤𑀺.

𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. 𑀢𑀢𑁆𑀭 𑀯𑀘𑀦𑁂𑀢𑀺 𑀳𑀺 𑀅𑀢𑁆𑀣𑁄. 𑀲𑀸𑀫𑀡𑁂𑀭𑁄 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁𑀓𑀺𑀜𑁆𑀘𑀺 𑀢𑀡𑁆𑀟𑀼𑀮𑀸𑀤𑀺𑀓𑀁 𑀆𑀫𑀺𑀲𑀦𑁆𑀢𑀺 𑀬𑁄𑀚𑀦𑀸. 𑀫𑀼𑀔𑀲𑀦𑁆𑀦𑀺𑀥𑀺 𑀦𑀸𑀫𑀸𑀢𑀺 𑀆𑀧𑀢𑁆𑀢𑀺𑀬𑀸 𑀫𑀼𑀔𑁄 𑀉𑀧𑀸𑀬𑁄 𑀲𑀦𑁆𑀦𑀺𑀥𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁, 𑀫𑀼𑀔𑀲𑀦𑁆𑀦𑀺𑀥𑀺𑀅𑀦𑁆𑀢𑁄𑀯𑀼𑀢𑁆𑀣𑁂𑀲𑀼 𑀯𑀸. 𑀪𑀺𑀓𑁆𑀔𑀼 𑀧𑀘𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀫𑀺𑀲𑀲𑀁𑀲𑀝𑁆𑀞𑀦𑁆𑀢𑀺 𑀆𑀫𑀺𑀲𑁂𑀦 𑀲𑀁𑀲𑀕𑁆𑀕𑀁.

𑀚𑀳𑀺𑀢𑀯𑀢𑁆𑀣𑀼𑀓𑀸𑀢𑀺 𑀚𑀳𑀺𑀢𑀁 𑀯𑀢𑁆𑀣𑀼 𑀏𑀢𑀸𑀲𑀦𑁆𑀢𑀺 𑀚𑀳𑀺𑀢𑀯𑀢𑁆𑀣𑀼𑀓𑀸. 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸 𑀓𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀢𑀺 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸. 𑀬𑁄 𑀬𑁄𑀢𑀺 𑀣𑀫𑁆𑀪𑁄 𑀯𑀸 𑀪𑀺𑀢𑁆𑀢𑀺𑀧𑀸𑀤𑁄 𑀯𑀸. 𑀇𑀝𑁆𑀞𑀓𑀸𑀤𑀻𑀳𑀺 𑀓𑀢𑀸 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀸𑀢𑀺 𑀬𑁄𑀚𑀦𑀸. 𑀘𑀬𑀲𑁆𑀲𑀸𑀢𑀺 𑀅𑀥𑀺𑀝𑁆𑀞𑀸𑀦𑀲𑁆𑀲. 𑀬𑁂𑀳𑀺 𑀧𑀦 𑀇𑀝𑁆𑀞𑀓𑀸𑀤𑀻𑀳𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀣𑀫𑁆𑀪𑀲𑀺𑀮𑀸𑀫𑀢𑁆𑀢𑀺𑀓𑀸𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀤𑀜𑁆𑀜𑁂𑀲𑀽𑀢𑀺 𑀢𑁂𑀳𑀺 𑀅𑀥𑀺𑀝𑁆𑀞𑀺𑀢𑀇𑀝𑁆𑀞𑀓𑀸𑀤𑀻𑀳𑀺 𑀅𑀜𑁆𑀜𑁂𑀲𑀼.

𑀧𑀸𑀓𑀸𑀭𑀸𑀤𑀺𑀧𑀭𑀺𑀓𑁆𑀔𑁂𑀧𑁂𑀢𑀺 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀆𑀭𑀸𑀫𑀲𑁆𑀲 𑀧𑀸𑀓𑀸𑀭𑀸𑀤𑀺𑀦𑀸 𑀧𑀭𑀺𑀓𑁆𑀔𑁂𑀧𑁂 𑀓𑀢𑁂. 𑀧𑀸𑀓𑀸𑀭𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀯𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀧𑁆𑀧𑀺𑀬𑀓𑀼𑀝𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀕𑁄𑀦𑀺𑀲𑀸𑀤𑀺𑀓𑀸𑀬 𑀅𑀪𑀸𑀯𑁂𑀦 𑀲𑁂𑀲𑀸𑀲𑀼 𑀢𑀻𑀲𑀼 𑀓𑀧𑁆𑀧𑀺𑀬𑀓𑀼𑀝𑀻𑀲𑀼 𑀬𑀁𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀓𑀼𑀝𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀇𑀢𑀭𑀸 𑀧𑀦𑀸𑀢𑀺 𑀉𑀲𑁆𑀲𑀸𑀯𑀦𑀦𑁆𑀢𑀺𑀓𑀕𑁄𑀦𑀺𑀲𑀸𑀤𑀺𑀓𑀸𑀳𑀺 𑀅𑀜𑁆𑀜𑀸. 𑀤𑁆𑀯𑁂𑀢𑀺 𑀉𑀪𑁄 𑀕𑀳𑀧𑀢𑀺𑀲𑀫𑁆𑀫𑀼𑀢𑀺𑀬𑁄, 𑀚𑀳𑀺𑀢𑀯𑀢𑁆𑀣𑀼𑀓𑀸𑀯 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀓𑁆𑀔𑀧𑀸𑀲𑀓𑀫𑀡𑁆𑀟𑀮𑀦𑁆𑀢𑀺 𑀤𑁆𑀯𑁂 𑀧𑀓𑁆𑀔𑁂 𑀅𑀧𑀢𑀦𑀢𑁆𑀣𑀸𑀬 𑀧𑀲𑀢𑀺 𑀩𑀦𑁆𑀥𑀢𑀻𑀢𑀺 𑀧𑀓𑁆𑀔𑀧𑀸𑀲𑀓𑁄, 𑀫𑀡𑁆𑀟𑀮𑀦𑁆𑀢𑀺 𑀙𑀤𑀦𑀓𑁄𑀝𑀺𑀕𑁄𑀧𑀸𑀦𑀲𑀻𑀦𑀁 𑀉𑀧𑀭𑀺 𑀞𑀧𑀺𑀢𑀓𑀝𑁆𑀞𑀯𑀺𑀲𑁂𑀲𑁄, 𑀧𑀓𑁆𑀔𑀧𑀸𑀲𑀓𑁄 𑀘 𑀫𑀡𑁆𑀟𑀮𑀜𑁆𑀘 𑀧𑀓𑁆𑀔𑀧𑀸𑀲𑀓𑀫𑀡𑁆𑀟𑀮𑀁.

𑀬𑀢𑁆𑀭𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸𑀢𑀺 𑀅𑀦𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀢𑁆𑀯𑀸. 𑀘𑀻𑀯𑀭𑀯𑀺𑀓𑀧𑁆𑀧𑀦𑀁 𑀯𑀺𑀬 𑀲𑀸𑀧𑁂𑀓𑁆𑀔𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. 𑀲𑁄𑀢𑀺 𑀓𑀭𑀯𑀻𑀓𑀢𑀺𑀲𑁆𑀲𑀢𑁆𑀣𑁂𑀭𑁄, 𑀧𑀲𑁆𑀲𑀺𑀢𑁆𑀯𑀸 𑀧𑀼𑀘𑁆𑀙𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀭𑁄𑀢𑀺 𑀫𑀳𑀸𑀲𑀺𑀯𑀢𑁆𑀣𑁂𑀭𑁄. 𑀮𑀽𑀔𑀤𑀺𑀯𑀲𑁂𑀢𑀺 𑀅𑀲𑀺𑀦𑀺𑀤𑁆𑀥𑀤𑀺𑀯𑀲𑁂. 𑀢𑀢𑁄𑀢𑀺 𑀩𑁆𑀭𑀯𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀫𑀳𑀸𑀲𑀺𑀯𑀢𑁆𑀣𑁂𑀭𑀁. 𑀧𑀫𑀼𑀔𑁂𑀢𑀺 𑀕𑀩𑁆𑀪𑀲𑁆𑀲 𑀧𑀫𑀼𑀔𑁂. 𑀢𑀦𑁆𑀢𑀺 𑀲𑀩𑁆𑀩𑀺𑀓𑀼𑀫𑁆𑀪𑀺𑀁. 𑀩𑀳𑀻𑀢𑀺 𑀯𑀺𑀳𑀸𑀭𑀲𑁆𑀲 𑀩𑀳𑀺. 𑀲𑁄𑀢𑀺 𑀫𑀳𑀸𑀲𑀺𑀯𑀢𑁆𑀣𑁂𑀭𑁄.

𑁧𑁮𑁦. 𑀫𑁂𑀡𑁆𑀟𑀓𑀕𑀳𑀧𑀢𑀺𑀯𑀢𑁆𑀣𑀼𑀓𑀣𑀸

𑁨𑁯𑁬. ‘‘𑀩𑀳𑀺𑀤𑁆𑀯𑀸𑀭𑁂’’𑀢𑀺 𑀏𑀢𑁆𑀣 𑀓𑀲𑁆𑀲 𑀩𑀳𑀺𑀤𑁆𑀯𑀸𑀭𑁂𑀢𑀺 𑀆𑀳 ‘‘𑀥𑀜𑁆𑀜𑀸𑀕𑀸𑀭𑀲𑁆𑀲 𑀩𑀳𑀺𑀤𑁆𑀯𑀸𑀭𑁂’’𑀢𑀺. 𑀆𑀴𑀓𑀣𑀸𑀮𑀺𑀓𑀦𑁆𑀢𑀺 𑀏𑀢𑁆𑀣 𑀆𑀴𑀓𑀢𑀡𑁆𑀟𑀼𑀮𑀧𑀘𑀦𑀓𑀁 𑀕𑀡𑁆𑀳𑀓𑀣𑀸𑀮𑀺 𑀆𑀴𑀓𑀣𑀸𑀮𑀺, 𑀢𑀸𑀬 𑀧𑀘𑀺𑀢𑀁 𑀪𑀢𑁆𑀢𑀁 𑀆𑀴𑀓𑀣𑀸𑀮𑀺𑀓𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀴𑀓𑀢𑀡𑁆𑀟𑀼𑀮𑀧𑀘𑀦𑀓𑀣𑀸𑀮𑀺𑀓’’𑀦𑁆𑀢𑀺. 𑀩𑁆𑀬𑀜𑁆𑀚𑀦𑀪𑀡𑁆𑀟𑀺𑀓𑀦𑁆𑀢𑀺 𑀩𑁆𑀬𑀜𑁆𑀚𑀦𑀧𑀭𑀺𑀓𑁆𑀔𑀸𑀭𑀺𑀓𑀁, 𑀩𑁆𑀬𑀜𑁆𑀚𑀦𑀧𑀭𑀺𑀯𑀸𑀭𑀓𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀽𑀧𑀪𑀺𑀜𑁆𑀚𑀦𑀓𑀦𑁆𑀢𑀺 𑀏𑀢𑁆𑀣 𑀲𑀽𑀧𑀲𑀤𑁆𑀤𑁄 𑀩𑁆𑀬𑀜𑁆𑀚𑀦𑀯𑀸𑀘𑀓𑁄, 𑀪𑀺𑀜𑁆𑀚𑀦𑀓𑀲𑀤𑁆𑀤𑁄 𑀪𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀦𑁆𑀢𑀺 𑀏𑀢𑁆𑀣 𑀤𑀸𑀲𑀧𑁄𑀭𑀺𑀲𑀸 𑀘 𑀓𑀫𑁆𑀫𑀓𑀭𑀧𑁄𑀭𑀺𑀲𑀸 𑀘 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀁, 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄 𑀧𑀼𑀩𑁆𑀩𑀧𑀤𑁂 𑀉𑀢𑁆𑀢𑀭𑀮𑁄𑀧𑁄, 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀸𑀲𑀧𑀼𑀭𑀺𑀲𑁂 𑀘 𑀓𑀫𑁆𑀫𑀓𑀭𑀧𑀼𑀭𑀺𑀲𑁂 𑀘𑀸’’𑀢𑀺. 𑀧𑁄𑀭𑀺𑀲𑀲𑀤𑁆𑀤𑁄𑀧𑀺 𑀧𑀼𑀭𑀺𑀲𑀲𑀤𑁆𑀤𑁂𑀦 𑀲𑀫𑀸𑀦𑁄 ‘‘𑀧𑀼𑀭𑀺𑀲𑁄 𑀏𑀯 𑀧𑁄𑀭𑀺𑀲𑁄’’𑀢𑀺 𑀅𑀢𑁆𑀣𑁂𑀦. 𑀥𑀼𑀯𑀪𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀥𑀼𑀯𑀲𑀤𑁆𑀤𑁄 𑀦𑀺𑀘𑁆𑀘𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀦𑀺𑀘𑁆𑀘𑀓𑀸𑀮’’𑀦𑁆𑀢𑀺. 𑀤𑀼𑀬𑁆𑀳𑁂𑀦 𑀔𑀻𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀫𑁂𑀡𑁆𑀟𑀓𑀯𑀢𑁆𑀣𑀼𑀲𑁆𑀫𑀺𑀁 𑀧𑀦𑀸’’𑀢𑀺 𑀧𑀸𑀞𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀔𑀡𑀜𑁆𑀜𑁂𑀯 𑀤𑀼𑀬𑁆𑀳𑁂𑀦𑀸’’𑀢𑀺 𑀧𑀸𑀞𑀸 𑀓𑁂𑀲𑀼𑀘𑀺𑀬𑁂𑀯 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 𑀅𑀢𑁆𑀣𑀺. 𑀏𑀢𑁆𑀣𑀸𑀢𑀺 𑀫𑁂𑀡𑁆𑀟𑀓𑀯𑀢𑁆𑀣𑀼𑀫𑁆𑀳𑀺. 𑀕𑁄𑀭𑀲𑁂𑀢𑀺 𑀕𑀯𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑁂 𑀔𑀻𑀭𑀤𑀥𑀺𑀢𑀓𑁆𑀓𑀦𑀯𑀦𑀻𑀢𑀲𑀩𑁆𑀩𑀺𑀲𑀗𑁆𑀔𑀸𑀢𑁂 𑀭𑀲𑁂. 𑀧𑀸𑀣𑁂𑀬𑁆𑀬𑀦𑁆𑀢𑀺 𑀧𑀣𑀲𑁆𑀲 𑀳𑀺𑀢𑀁 𑀧𑀸𑀣𑁂𑀬𑁆𑀬𑀁. 𑀜𑀢𑁆𑀯𑀸𑀢𑀺 𑀧𑀸𑀣𑁂𑀬𑁆𑀬𑀫𑀺𑀘𑁆𑀙𑀢𑀻𑀢𑀺 𑀜𑀢𑁆𑀯𑀸. 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀯𑀸𑀢𑀺 𑀅𑀜𑁆𑀜𑀸𑀢𑀓𑀅𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀯𑀸. 𑀬𑀸𑀘𑀺𑀢𑁆𑀯𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀢𑁆𑀢𑀓𑁂𑀦 𑀧𑀸𑀣𑁂𑀬𑁆𑀬𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁮𑁨. 𑀓𑁂𑀡𑀺𑀬𑀚𑀝𑀺𑀮𑀯𑀢𑁆𑀣𑀼𑀓𑀣𑀸

𑁩𑁦𑁦. 𑀓𑀸𑀚𑁂𑀳𑀻𑀢𑀺 𑀏𑀢𑁆𑀣 𑀓𑀸𑀚𑀲𑁆𑀲 𑀕𑀡𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀘𑀳𑀺 𑀓𑀸𑀚𑀲𑀢𑁂𑀳𑀻’’𑀢𑀺. 𑀏𑀓𑁂𑀦 𑀓𑀸𑀚𑁂𑀦 𑀤𑁆𑀯𑀺𑀦𑁆𑀦𑀁 𑀓𑀼𑀝𑀸𑀦𑀁 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀼𑀝𑀲𑀳𑀲𑁆𑀲’’𑀦𑁆𑀢𑀺. 𑀯𑁄𑀢𑀺 𑀢𑀼𑀫𑁆𑀳𑁂. 𑀲𑀼𑀝𑁆𑀞𑀼 𑀧𑀲𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 ‘‘𑀅𑀝𑁆𑀞 𑀧𑀸𑀦𑀸𑀦𑀻’’𑀢𑀺 𑀧𑀸𑀞𑁂, 𑀅𑀝𑁆𑀞𑀲𑀼 𑀧𑀸𑀦𑁂𑀲𑀼 𑀯𑀸. ‘‘𑀅𑀫𑁆𑀩𑁂𑀳𑀺 𑀓𑀢𑀧𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀫𑀚𑁆𑀛𑁂𑀮𑁄𑀧𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀆𑀫𑀧𑀓𑁆𑀓𑁂𑀲𑀼. 𑀓𑀭𑁄𑀦𑁆𑀢𑁂𑀦 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀤𑀺𑀘𑁆𑀘𑀧𑀸𑀓𑁂𑀦𑀸𑀢𑀺 𑀆𑀤𑀺𑀘𑁆𑀘𑀳𑁂𑀢𑀼𑀦𑀸 𑀧𑀘𑀦𑁂𑀦. 𑀧𑀼𑀭𑁂𑀪𑀢𑁆𑀢𑀫𑁂𑀯 𑀓𑀧𑁆𑀧𑀢𑀻𑀢𑀺 𑀪𑀺𑀓𑁆𑀔𑀼𑀦𑀸 𑀲𑀬𑀁 𑀓𑀢𑀢𑁆𑀢𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀓𑀧𑁆𑀧𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀻’’𑀢𑀺𑀆𑀤𑀺. 𑀓𑀢𑀁 𑀅𑀫𑁆𑀩𑀧𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀧𑀸𑀦𑁂𑀲𑀽𑀢𑀺 𑀚𑀫𑁆𑀩𑀼𑀧𑀸𑀦𑀸𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀸𑀦𑁂𑀲𑀼.

𑀢𑁂𑀲𑀽𑀢𑀺 𑀚𑀫𑁆𑀩𑀼𑀧𑀸𑀦𑀸𑀤𑀻𑀲𑀼 𑀲𑀢𑁆𑀢𑀲𑀼 𑀧𑀸𑀦𑁂𑀲𑀼. 𑀧𑀦𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄. 𑀚𑀫𑁆𑀩𑀼𑀨𑀮𑁂𑀳𑀻𑀢𑀺 𑀆𑀫𑁂𑀳𑀺 𑀯𑀸 𑀧𑀓𑁆𑀓𑁂𑀳𑀺 𑀯𑀸 𑀚𑀫𑁆𑀩𑀼𑀨𑀮𑁂𑀳𑀺. 𑀅𑀝𑁆𑀞𑀺𑀓𑁂𑀳𑀻𑀢𑀺 𑀅𑀝𑁆𑀞𑀺 𑀅𑀲𑁆𑀫𑀺𑀫𑀢𑁆𑀣𑀻𑀢𑀺 𑀅𑀝𑁆𑀞𑀺𑀓𑀁 𑀨𑀮𑀁. 𑀚𑀸𑀢𑀺𑀭𑀲𑁂𑀦𑀸𑀢𑀺 𑀬𑀣𑀸𑀚𑀸𑀢𑁂𑀦 𑀭𑀲𑁂𑀦. 𑀇𑀫𑀺𑀦𑀸 𑀫𑀥𑀼𑀲𑀓𑁆𑀔𑀭𑀓𑀧𑁆𑀧𑀼𑀭𑀸𑀤𑀻𑀳𑀺 𑀦 𑀬𑁄𑀚𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀧𑀦𑀸𑀢𑀺 𑀫𑀥𑀼𑀓𑀧𑀸𑀦𑀁 𑀧𑀦. 𑀫𑀼𑀤𑁆𑀤𑀺𑀓𑀸𑀢𑀺 𑀫𑀼𑀤𑁆𑀤𑀺𑀓𑀨𑀮𑀸𑀦𑀺. 𑀲𑀸𑀮𑀼𑀓𑁂𑀢𑀺 𑀓𑀦𑁆𑀤𑁂. 𑀲𑀢𑁆𑀢𑀦𑁆𑀦𑀁 𑀥𑀜𑁆𑀜𑀸𑀦𑀁 𑀨𑀮𑀭𑀲𑀦𑁆𑀢𑀺 𑀢𑀡𑁆𑀟𑀼𑀮𑀥𑁄𑀯𑀦𑁄𑀤𑀓𑀁. ‘‘𑀧𑀓𑁆𑀓𑀟𑀸𑀓𑀭𑀲’’𑀦𑁆𑀢𑀺 𑀇𑀫𑀺𑀦𑀸 𑀅𑀧𑀓𑁆𑀓𑀟𑀸𑀓𑀭𑀲𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀯𑀺𑀢𑁆𑀣𑀸𑀭𑁄 𑀯𑀸. 𑀭𑀲𑁄𑀢𑀺 𑀧𑀓𑁆𑀓𑀭𑀲𑁄. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑀲𑀩𑁆𑀩𑀺𑀆𑀤𑀻𑀳𑀺 𑀧𑀓𑁆𑀓𑀸𑀦𑀁 𑀬𑀸𑀯𑀚𑀻𑀯𑀺𑀓𑀸𑀦𑀁 𑀧𑀢𑁆𑀢𑀸𑀦𑀁 𑀭𑀲𑁄𑀢𑀺 𑀬𑁄𑀚𑀦𑀸. 𑀧𑀓𑁆𑀓𑀁 𑀬𑀸𑀯𑀚𑀻𑀯𑀺𑀓𑀧𑀢𑁆𑀢𑀭𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀯𑀓𑀸𑀮𑀺𑀓𑀧𑀢𑁆𑀢𑀸𑀦𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀕𑁂𑀯 𑀬𑀸𑀯𑀚𑀻𑀯𑀺𑀓𑀧𑀢𑁆𑀢𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀸𑀦𑀦𑁆𑀢𑀺 𑀬𑀁 𑀫𑀥𑀼𑀓𑀧𑀼𑀧𑁆𑀨𑀭𑀲𑀧𑀸𑀦𑀁. 𑀲𑁄𑀢𑀺 𑀫𑀥𑀼𑀓𑀧𑀼𑀧𑁆𑀨𑀭𑀲𑁄. 𑀢𑁂𑀦𑀸𑀢𑀺 𑀫𑀥𑀼𑀓𑀧𑀼𑀧𑁆𑀨𑁂𑀦. 𑀬𑀢𑁄 𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀚𑁆𑀚𑀁 𑀦 𑀓𑀭𑁄𑀦𑁆𑀢𑀺, 𑀢𑀢𑁄𑀢𑀺 𑀬𑁄𑀚𑀦𑀸. 𑀉𑀘𑁆𑀙𑀼𑀭𑀲𑁄 𑀦𑀺𑀓𑀲𑀝𑁄 𑀧𑀘𑁆𑀙𑀸𑀪𑀢𑁆𑀢𑀁 𑀯𑀝𑁆𑀝𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀢𑁆𑀢𑀸. 𑀇𑀫𑁂 𑀘𑀢𑁆𑀢𑀸𑀭𑁄 𑀭𑀲𑀸𑀢𑀺 𑀨𑀮𑀧𑀢𑁆𑀢𑀧𑀼𑀧𑁆𑀨𑀉𑀘𑁆𑀙𑀼𑀭𑀲𑀲𑀗𑁆𑀔𑀸𑀢𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀭𑀲𑀸. 𑀅𑀕𑁆𑀕𑀺𑀳𑀼𑀢𑁆𑀢𑀫𑀼𑀔𑀸𑀢𑀺 𑀬𑀜𑁆𑀜𑀸 𑀅𑀕𑁆𑀕𑀺𑀳𑀼𑀢𑀫𑀼𑀔𑀸, 𑀅𑀕𑁆𑀕𑀺𑀳𑀼𑀢𑀲𑁂𑀝𑁆𑀞𑀸𑀢𑀺 𑀅𑀢𑁆𑀣𑁄.

𑁧𑁮𑁩. 𑀭𑁄𑀚𑀫𑀮𑁆𑀮𑀸𑀤𑀺𑀯𑀢𑁆𑀣𑀼𑀓𑀣𑀸

𑁩𑁦𑁧. 𑀲𑀗𑁆𑀓𑀭𑀫𑀓𑀁𑀲𑀽𑀢𑀺 𑀏𑀢𑁆𑀣 𑀲𑀗𑁆𑀓𑀭𑀲𑀤𑁆𑀤𑀲𑁆𑀲 𑀬𑀼𑀤𑁆𑀥𑀢𑁆𑀣𑀸𑀤𑀻𑀲𑀼 𑀧𑀯𑀢𑁆𑀢𑀦𑀢𑁄 𑀇𑀥 𑀧𑀝𑀺𑀜𑁆𑀜𑀸𑀢𑀢𑁆𑀣𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀢𑀺𑀓𑀫𑀓𑀁𑀲𑀽’’𑀢𑀺. 𑀓𑀢𑀺𑀓𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀲𑀗𑁆𑀔𑀸𑀢𑀁 𑀓𑀢𑀺𑀓𑀁. 𑀉𑀴𑀸𑀭𑀁 𑀔𑁄𑀢𑀺 𑀏𑀢𑁆𑀣 𑀉𑀴𑀸𑀭𑀲𑀤𑁆𑀤𑁄 𑀲𑁂𑀝𑁆𑀞𑀯𑀸𑀘𑀓𑁄. 𑀲𑁂𑀝𑁆𑀞𑀦𑁆𑀢𑀺 𑀘 𑀲𑀼𑀦𑁆𑀤𑀭𑀫𑁂𑀯𑀸𑀢𑀺 𑀆𑀳 ‘‘𑀲𑀼𑀦𑁆𑀤𑀭𑀁 𑀔𑁄 𑀢𑁂 𑀇𑀤’’𑀦𑁆𑀢𑀺. 𑀢𑁂𑀢𑀺 𑀢𑀼𑀬𑁆𑀳𑀁. ‘‘𑀩𑀳𑀼𑀓𑀢𑁄’’𑀢𑀺 𑀧𑀤𑀲𑁆𑀲 𑀓𑀢𑀩𑀳𑀼𑀫𑀸𑀦𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀲𑀸𑀤𑀩𑀳𑀼𑀫𑀸𑀦𑁂𑀦𑀸’’𑀢𑀺. ‘‘𑀧𑀺𑀝𑁆𑀞𑀫𑀬𑀁𑀔𑀸𑀤𑀦𑀻𑀬’’𑀦𑁆𑀢𑀺 𑀇𑀫𑀺𑀦𑀸 𑀧𑀺𑀝𑁆𑀞𑀔𑀸𑀤𑀦𑀻𑀬𑀦𑁆𑀢𑀺 𑀏𑀢𑁆𑀣 𑀫𑀬𑀲𑀤𑁆𑀤𑀮𑁄𑀧𑀁 𑀤𑀲𑁆𑀲𑁂𑀢𑀺.

𑁩𑁦𑁩. 𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀢𑀺 𑀏𑀢𑁆𑀣 𑀧𑀝𑀺𑀪𑀸𑀦𑁂 𑀦𑀺𑀬𑀼𑀢𑁆𑀢𑀸 𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀪𑀸𑀦𑀲𑀫𑁆𑀧𑀦𑁆𑀦𑀸’’𑀢𑀺. ‘‘𑀦𑀺𑀤𑁆𑀤𑁄𑀲𑀲𑀺𑀧𑁆𑀧𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑀸𑀢𑀺 𑀏𑀢𑁆𑀣 𑀧𑀭𑀺𑀲𑀫𑀦𑁆𑀢𑀢𑁄 𑀑𑀤𑀸𑀢𑀁 𑀲𑀺𑀧𑁆𑀧𑀁 𑀏𑀢𑁂𑀲𑀦𑁆𑀢𑀺 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀺𑀧𑁆𑀧𑀢𑁆𑀣𑀺𑀓𑁂𑀳𑀺 𑀲𑀺𑀬𑀢𑀺 𑀲𑁂𑀯𑀺𑀬𑀢𑀻𑀢𑀺 𑀲𑀺𑀧𑁆𑀧𑀁, 𑀲𑀺𑀧𑁆𑀧𑀺𑀓𑀸𑀦𑀁 𑀳𑀺𑀢𑀸𑀬 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀲𑀺𑀧𑁆𑀧𑀁, 𑀑𑀝𑁆𑀞𑀚𑁄 𑀧𑀞𑀫𑀓𑁆𑀔𑀭𑁄. 𑀦𑀸𑀴𑀺𑀬𑀸𑀯𑀸𑀧𑀓𑁂𑀦𑀸𑀢𑀺 𑀧𑀤𑀲𑁆𑀲 𑀤𑁆𑀯𑀦𑁆𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀸𑀴𑀺𑀬𑀸 𑀘𑁂𑀯 𑀆𑀯𑀸𑀧𑀓𑁂𑀦 𑀘𑀸’’𑀢𑀺. 𑀇𑀫𑀺𑀦𑀸 𑀬𑀓𑀸𑀭𑁄 𑀧𑀤𑀲𑀦𑁆𑀥𑀺𑀫𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀦𑀸𑀴𑀺𑀬𑀸 𑀯𑀸 𑀧𑀲𑀺𑀩𑁆𑀩𑀓𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀲𑁄 𑀅𑀧𑀸𑀞𑁄𑀬𑁂𑀯. 𑀓𑁄 𑀆𑀯𑀸𑀧𑀓𑁄 𑀦𑀸𑀫𑀸𑀢𑀺 𑀆𑀳 ‘‘𑀆𑀯𑀸𑀧𑀓𑁄 𑀦𑀸𑀫 𑀬𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀣𑀯𑀺𑀓𑁂. 𑀇𑀫𑀺𑀦𑀸 𑀆𑀳𑀭𑀺𑀢𑁆𑀯𑀸 𑀬𑀣𑀸𑀮𑀤𑁆𑀥𑀁 𑀯𑀧𑀦𑁆𑀢𑀺 𑀧𑀓𑁆𑀔𑀺𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀯𑀸𑀧𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀧 𑀩𑀻𑀚𑀦𑀺𑀓𑁆𑀔𑁂𑀧𑁂𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁫 𑀧𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀁. 𑀇𑀥 𑀧𑀦 𑀧𑀓𑁆𑀔𑀺𑀧𑀦𑁂𑀢𑀺 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀓𑁆𑀔𑀺𑀧𑀦𑁆𑀢𑀻’’𑀢𑀺. 𑀧𑀭𑀺𑀳𑀭𑀺𑀢𑀼𑀫𑁂𑀯𑀸𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀳𑀭𑀺𑀢𑀼𑀫𑁂𑀯. 𑀯𑁂𑀢𑀦𑀦𑁆𑀢𑀺 𑀪𑀢𑀺𑀁. 𑀬𑁄𑀢𑀺 𑀪𑀺𑀓𑁆𑀔𑀼. 𑀢𑀁 𑀯𑀸𑀢𑀺 𑀧𑀭𑀺𑀳𑀭𑀺𑀢𑀔𑀼𑀭𑀪𑀡𑁆𑀟𑀁 𑀯𑀸. 𑀅𑀜𑁆𑀜𑀁 𑀯𑀸𑀢𑀺 𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀯𑀸.

𑁩𑁦𑁪. 𑀇𑀤𑀦𑁆𑀢𑀺 𑀤𑀲𑀫𑀪𑀸𑀕𑀤𑀸𑀦𑀁. 𑀤𑀲 𑀓𑁄𑀝𑁆𑀞𑀸𑀲𑁂𑀢𑀺 𑀤𑀲 𑀧𑀝𑀺𑀯𑀻𑀲𑁂.

𑁧𑁮𑁫. 𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸

𑁩𑁦𑁫. 𑀇𑀤𑀁 𑀦 𑀓𑀧𑁆𑀧𑀢𑀻𑀢𑀺𑀆𑀤𑀻𑀢𑀺 ‘‘𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺𑀆𑀤𑀬𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂𑀢𑀺 𑀬𑁄𑀚𑀦𑀸. 𑀅𑀧𑀲𑁆𑀲𑀬𑀁 𑀓𑀢𑁆𑀯𑀸 𑀤𑀺𑀲𑀺𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀧𑀤𑁂𑀲𑀸 𑀑𑀓𑀸𑀲𑀸, 𑀅𑀧𑀲𑁆𑀲𑀬𑀁 𑀓𑀢𑁆𑀯𑀸 𑀤𑀺𑀲𑀺𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀸 𑀅𑀧𑀤𑁂𑀲𑀸 𑀓𑀸𑀭𑀡𑀸, ‘‘𑀫𑀳𑀦𑁆𑀢𑀸 𑀅𑀧𑀤𑁂𑀲𑀸 𑀫𑀳𑀸𑀧𑀤𑁂𑀲𑀸. 𑀢𑀜𑁆𑀘𑀸𑀢𑀺 𑀫𑀳𑀸𑀧𑀤𑁂𑀲𑀲𑀗𑁆𑀔𑀸𑀢𑀁 𑀢𑀜𑁆𑀘 𑀲𑀼𑀢𑁆𑀢𑀁, 𑀕𑀳𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀧𑀭𑀺𑀫𑀤𑁆𑀤𑀦𑁆𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀤𑁆𑀤𑀦𑁆𑀢𑀸, 𑀉𑀧𑀧𑀭𑀺𑀓𑁆𑀔𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀓𑀸𑀭𑀡𑀁. 𑀢𑀦𑁆𑀢𑀺 𑀦𑀯𑀫𑀳𑀸𑀨𑀮𑀅𑀧𑀭𑀡𑁆𑀡𑀁. 𑀢𑀸𑀦𑀻𑀢𑀺 𑀔𑀼𑀤𑁆𑀤𑀓𑀨𑀮𑀧𑀸𑀦𑀸𑀦𑀺. 𑀳𑀻𑀢𑀺 𑀲𑀘𑁆𑀘𑀁.

𑀢𑁂𑀲𑀦𑁆𑀢𑀺 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁. 𑀢𑀢𑁆𑀣𑀸𑀢𑀺 𑀙𑀲𑀼 𑀅𑀦𑀼𑀮𑁄𑀫𑀘𑀻𑀯𑀭𑁂𑀲𑀼. ‘‘𑀧𑀸𑀡𑀓𑁂𑀳𑀺 𑀲𑀜𑁆𑀚𑀸𑀢𑀯𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀓𑁄𑀲𑁂𑀬𑁆𑀬𑀯𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑁆𑀯𑁂 𑀧𑀝𑀸𑀢𑀺 𑀘𑀻𑀦𑀧𑀝𑀲𑁄𑀫𑀸𑀭𑀧𑀝𑀸. 𑀤𑀼𑀓𑀽𑀮𑀁 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀦𑁆𑀢𑀺 𑀬𑁄𑀚𑀦𑀸.

𑀢𑁂𑀲𑀁𑀬𑁂𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀧𑀢𑁆𑀢𑀸𑀦𑀫𑁂𑀯. 𑀢𑁂𑀲𑀁𑀬𑁂𑀯𑀸𑀢𑀺 𑀢𑀺𑀡𑁆𑀡𑀁 𑀢𑀼𑀫𑁆𑀩𑀸𑀦𑀫𑁂𑀯. 𑀢𑁂𑀲𑀁𑀬𑁂𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀓𑀸𑀬𑀩𑀦𑁆𑀥𑀦𑀸𑀦𑀫𑁂𑀯. 𑀲𑁂𑀢𑀘𑁆𑀙𑀢𑁆𑀢𑀦𑁆𑀢𑀺 𑀲𑁂𑀢𑁂𑀳𑀺 𑀯𑀢𑁆𑀣𑁂𑀳𑀺 𑀓𑀢𑀁 𑀙𑀢𑁆𑀢𑀁. 𑀢𑁂𑀲𑀁𑀬𑁂𑀯𑀸𑀢𑀺 𑀢𑀺𑀡𑁆𑀡𑀁 𑀙𑀢𑁆𑀢𑀸𑀦𑀫𑁂𑀯.

𑀲𑀫𑁆𑀪𑀺𑀦𑁆𑀦𑀭𑀲𑀦𑁆𑀢𑀺 𑀲𑀁𑀲𑀕𑁆𑀕𑀭𑀲𑀁. 𑀏𑀢𑁆𑀣 𑀪𑀺𑀚𑁆𑀚𑀺𑀢𑁆𑀣𑀸𑀢𑀺 𑀪𑀺𑀦𑁆𑀦𑁄𑀢𑀺 𑀯𑀘𑀦𑀢𑁆𑀣𑁂𑀦 𑀪𑀺𑀤𑀺𑀥𑀸𑀢𑀼 𑀤𑁆𑀯𑀺𑀥𑀸𑀓𑀭𑀡𑀲𑀗𑁆𑀔𑀸𑀢𑁄 𑀪𑁂𑀤𑀢𑁆𑀣𑁄 𑀳𑁄𑀢𑀺, 𑀥𑀸𑀢𑁆𑀯𑀢𑁆𑀣𑀩𑀸𑀥𑀓𑁂𑀦 𑀲𑀁𑀢𑁆𑀬𑀽𑀧𑀲𑀕𑁆𑀕𑁂𑀦 𑀪𑀺𑀤𑀺𑀥𑀸𑀢𑀼𑀬𑀸 𑀪𑁂𑀤𑀢𑁆𑀣𑀁 𑀩𑀸𑀥𑁂𑀢𑁆𑀯𑀸 𑀲𑀁𑀲𑀕𑁆𑀕𑀢𑁆𑀣𑀯𑀸𑀘𑀓𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀙𑀮𑁆𑀮𑀺𑀫𑁆𑀧𑀻𑀢𑀺 𑀢𑀘𑀫𑁆𑀧𑀺. 𑀲𑀓𑀮𑁂𑀦𑁂𑀯𑀸𑀢𑀺 𑀙𑀮𑁆𑀮𑀺𑀬𑀸 𑀏𑀯. 𑀧𑀸𑀬𑀸𑀲𑁂𑀦 𑀅𑀲𑀁𑀲𑀝𑁆𑀞𑀁 𑀬𑀁 𑀲𑀩𑁆𑀩𑀻𑀢𑀺 𑀬𑁄𑀚𑀦𑀸. 𑀢𑀸𑀦𑀻𑀢𑀺 𑀢𑀓𑁆𑀓𑁄𑀮𑀚𑀸𑀢𑀺𑀨𑀮𑀸𑀤𑀻𑀦𑀺. 𑀬𑀝𑁆𑀞𑀺𑀫𑀥𑀼𑀓𑀸𑀤𑀻𑀲𑀼𑀧𑀻𑀢𑀺 𑀫𑀥𑀼𑀮𑀝𑁆𑀞𑀺𑀓𑀸𑀤𑀻𑀲𑀼𑀧𑀺. ‘‘𑀮𑀝𑁆𑀞𑀺𑀫𑀥𑀼𑀓𑀸𑀤𑀻𑀲𑀼𑀧𑀻’’𑀢𑀺 𑀯𑀸 𑀧𑀸𑀞𑁄, 𑀲𑁄 𑀅𑀧𑀸𑀞𑁄𑀬𑁂𑀯. 𑀬𑀁 𑀬𑀦𑁆𑀢𑀺 𑀯𑀢𑁆𑀣𑀼. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦, 𑀥𑁄𑀯𑀺𑀬𑀫𑀸𑀦𑁂 𑀢𑀘𑁆𑀙𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀫𑁆𑀪𑀺𑀦𑁆𑀦𑀭𑀲𑀦𑁆𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀁𑀲𑀝𑁆𑀞’’𑀦𑁆𑀢𑀺. 𑀲𑀪𑀸𑀯𑀦𑁆𑀢𑀺 𑀬𑀸𑀯𑀓𑀸𑀮𑀁 𑀓𑀧𑁆𑀧𑀺𑀬𑀲𑀪𑀸𑀯𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀧𑀦𑁂𑀢𑀺, 𑀢𑀲𑁆𑀫𑀸. 𑀢𑁂𑀦𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦. 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀤𑀳𑁂𑀯 𑀧𑀝𑀺𑀕𑁆𑀕𑀳𑀺𑀢𑀁. 𑀤𑁆𑀯𑀻𑀳𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁆𑀣𑀸𑀢𑀺 𑀓𑀸𑀮𑀺𑀓𑀲𑀁𑀲𑀕𑁆𑀕𑁂. 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑀣𑀸𑀓𑁆𑀓𑀫𑀁 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂.

𑀇𑀢𑀺 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.