𑁪. 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑀁

𑁧𑁨𑁦. 𑀅𑀨𑀸𑀲𑀼𑀓𑀯𑀺𑀳𑀸𑀭𑀓𑀣𑀸

𑁨𑁦𑁯. 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁂 𑀅𑀮𑁆𑀮𑀸𑀧𑁄𑀢𑀺 𑀏𑀢𑁆𑀣 𑀆𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀆𑀤𑀺𑀓𑀫𑁆𑀫𑀢𑁆𑀣𑀁, 𑀮𑀧𑀥𑀸𑀢𑀼𑀬𑀸 𑀘 𑀓𑀣𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀞𑀫𑀯𑀘𑀦’’𑀦𑁆𑀢𑀺. 𑀆𑀤𑀺𑀢𑁄, 𑀆𑀤𑀺𑀫𑁆𑀳𑀺 𑀯𑀸 𑀮𑀧𑀦𑀁 𑀓𑀣𑀦𑀁, 𑀮𑀧𑀢𑀺 𑀅𑀦𑁂𑀦𑀸𑀢𑀺 𑀯𑀸 𑀅𑀮𑁆𑀮𑀸𑀧𑁄 𑀲𑀁𑀬𑁄𑀕𑁂 𑀧𑀭𑁂 𑀭𑀲𑁆𑀲𑁄. 𑀲𑀁 𑀧𑀼𑀦 𑀮𑀧𑀦𑀁, 𑀮𑀧𑀢𑀺 𑀯𑀸 𑀅𑀦𑁂𑀦𑀸𑀢𑀺 𑀲𑀮𑁆𑀮𑀸𑀧𑁄. 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦𑀸𑀢𑀺 𑀏𑀢𑁆𑀣 𑀯𑀺𑀧𑀼𑀩𑁆𑀩𑁄 𑀮𑀖𑀺𑀥𑀸𑀢𑀼 𑀉𑀓𑁆𑀔𑀺𑀧𑀦𑀢𑁆𑀣𑁄𑀢𑀺 𑀆𑀳 ‘‘𑀳𑀢𑁆𑀣𑀼𑀓𑁆𑀔𑁂𑀧𑀓𑁂𑀦𑀸’’𑀢𑀺. 𑀧𑀲𑀼𑀲𑀁𑀯𑀸𑀲𑀦𑁆𑀢𑀺 𑀏𑀢𑁆𑀣 𑀧𑀲𑀽𑀢𑀺 𑀲𑀩𑁆𑀩𑀘𑀢𑀼𑀧𑁆𑀧𑀤𑀸. 𑀢𑁂 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀧𑀲𑀦𑁆𑀢𑀺 𑀩𑀸𑀥𑀦𑁆𑀢𑀺, 𑀫𑀦𑀼𑀲𑁆𑀲𑀸𑀤𑀻𑀳𑀺 𑀯𑀸 𑀧𑀲𑀻𑀬𑀦𑁆𑀢𑀺 𑀩𑀸𑀥𑀻𑀬𑀦𑁆𑀢𑀻𑀢𑀺 𑀧𑀲𑀯𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀲𑀽𑀦𑀁 𑀯𑀺𑀬 𑀲𑀁𑀯𑀸𑀲𑀦𑁆𑀢𑀺 𑀧𑀲𑀽𑀦𑀁 𑀲𑀁𑀯𑀸𑀲𑁄 𑀯𑀺𑀬 𑀲𑀁𑀯𑀸𑀲𑁄𑀢𑀺 𑀧𑀲𑀼𑀲𑀁𑀯𑀸𑀲𑁄, 𑀢𑀁 𑀧𑀲𑀼𑀲𑀁𑀯𑀸𑀲𑀁. 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀧𑀲𑀯𑁄𑀧𑀺 𑀳𑀻’’𑀢𑀺𑀆𑀤𑀺. 𑀢𑀣𑀸𑀢𑀺 𑀬𑀣𑀸 𑀦 𑀓𑀭𑁄𑀦𑁆𑀢𑀺, 𑀢𑀣𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀧𑀻𑀢𑀺 𑀪𑀺𑀓𑁆𑀔𑀯𑁄𑀧𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀓𑀁𑀲𑀼, 𑀢𑀲𑁆𑀫𑀸. 𑀦𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀏𑀴𑀓𑀲𑀁𑀯𑀸𑀲𑀲𑀧𑀢𑁆𑀢𑀲𑀁𑀯𑀸𑀲𑁂𑀲𑀼. 𑀫𑀽𑀕𑀩𑁆𑀩𑀢𑀦𑁆𑀢𑀺 𑀫𑀽𑀕𑀲𑁆𑀲 𑀯𑀢𑀁 𑀯𑀺𑀬 𑀯𑀢𑀦𑁆𑀢𑀺 𑀫𑀽𑀕𑀩𑁆𑀩𑀢𑀁, 𑀲𑀼𑀜𑁆𑀜𑀯𑀘𑀦𑀯𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀢𑁆𑀣𑀺𑀬𑀲𑀫𑀸𑀤𑀸𑀦𑀦𑁆𑀢𑀺 𑀢𑀺𑀢𑁆𑀣𑀺𑀬𑁂𑀳𑀺 𑀲𑀫𑀸𑀤𑀸𑀢𑀩𑁆𑀩𑀁. 𑀯𑀢𑀲𑀫𑀸𑀤𑀸𑀦𑀦𑁆𑀢𑀺 𑀲𑀫𑀸𑀤𑀸𑀢𑀩𑁆𑀩𑀁 𑀯𑀢𑀁. 𑀅𑀜𑁆𑀜𑀫𑀜𑁆𑀜𑀸𑀦𑀼𑀮𑁄𑀫𑀢𑀸𑀢𑀺 𑀏𑀢𑁆𑀣 𑀢𑀸𑀲𑀤𑁆𑀤𑀲𑁆𑀲 𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀼𑀮𑁄𑀫𑀪𑀸𑀯𑁄’’𑀢𑀺. 𑀇𑀫𑀺𑀦𑀸 ‘‘𑀤𑁂𑀯𑀢𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧; 𑀔𑀼. 𑀧𑀸. 𑀅𑀝𑁆𑀞. 𑁫.𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸; 𑀲𑀼. 𑀦𑀺. 𑀅𑀝𑁆𑀞. 𑁨.𑀅𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸) 𑀯𑀺𑀬 𑀢𑀸𑀧𑀘𑁆𑀘𑀬𑀲𑁆𑀲 𑀲𑁆𑀯𑀢𑁆𑀣𑀁 ‘‘𑀚𑀦𑀢𑀸’’𑀢𑀺𑀆𑀤𑀻𑀲𑀼 (𑀧𑁂. 𑀯. 𑀅𑀝𑁆𑀞. 𑁪𑁬𑁦) 𑀯𑀺𑀬 𑀲𑀫𑀽𑀳𑀢𑁆𑀣𑀜𑁆𑀘 𑀦𑀺𑀯𑀢𑁆𑀢𑁂𑀢𑀺. ‘‘𑀅𑀜𑁆𑀜𑀫𑀜𑁆𑀜𑀁 𑀯𑀢𑁆𑀢𑀼’’𑀦𑁆𑀢𑀺 𑀯𑀘𑀦𑀲𑁆𑀲 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀤𑀦𑁆𑀢𑀼 𑀫’’𑀦𑁆𑀢𑀺𑀆𑀤𑀺. 𑀯𑀤𑀦𑁆𑀢𑀁 𑀪𑀺𑀓𑁆𑀔𑀼𑀁 𑀯𑀢𑁆𑀢𑀼𑀦𑁆𑀢𑀺 𑀬𑁄𑀚𑀦𑀸. ‘‘𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑀪𑀸𑀯𑁄’’𑀢𑀺 𑀇𑀫𑀺𑀦𑀸 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸𑀢𑀺 𑀧𑀤𑀲𑁆𑀲 𑀧𑀜𑁆𑀘𑀫𑀻𑀲𑀫𑀸𑀲𑀜𑁆𑀘 𑀢𑀸𑀧𑀘𑁆𑀘𑀬𑀲𑁆𑀲 𑀪𑀸𑀯𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑀺. ‘‘𑀯𑀺𑀦𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀓𑀭𑀡𑀁 𑀧𑀼𑀭𑁂𑀓𑁆𑀔𑀸𑀭𑁄, 𑀢𑀲𑁆𑀲 𑀪𑀸𑀯𑁄 𑀧𑀼𑀭𑁂𑀓𑁆𑀔𑀸𑀭𑀢𑀸, 𑀯𑀺𑀦𑀬𑀁 𑀧𑀼𑀭𑁂𑀓𑁆𑀔𑀸𑀭𑀢𑀸 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀧𑀼𑀭𑀲𑀤𑁆𑀤𑀲𑁆𑀲 𑀏𑀓𑀸𑀭𑀢𑁆𑀢𑀁 𑀲𑀤𑁆𑀤𑀲𑀢𑁆𑀣𑁂𑀲𑀼 (𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑁂 𑁫.𑁧𑁩𑁪 𑀲𑀼𑀢𑁆𑀢𑁂) 𑀯𑀤𑀦𑁆𑀢𑀺. 𑀢𑀲𑁆𑀲 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀤𑀦𑁆𑀢𑀼𑀫’’𑀦𑁆𑀢𑀺𑀆𑀤𑀺 (𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑁂 𑁫.𑁧𑁩𑁪 𑀲𑀼𑀢𑁆𑀢𑁂).

𑁨𑁧𑁦. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸𑀢𑀺 ‘‘𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑁂𑀲𑀁 𑀢𑁂𑀯𑀸𑀘𑀺𑀓𑀸𑀤𑀻𑀦𑀁 𑀲𑀗𑁆𑀕𑀸𑀳𑀓𑀸. 𑀜𑀢𑁆𑀢𑀻𑀢𑀺 𑀜𑀸𑀧𑁂𑀢𑀺 𑀲𑀗𑁆𑀖𑀁 𑀏𑀢𑀸𑀬 𑀯𑀘𑀦𑀸𑀬𑀸𑀢𑀺 𑀜𑀢𑁆𑀢𑀺. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀏𑀯𑀜𑁆𑀳𑀺 𑀯𑀼𑀢𑁆𑀢𑁂’’𑀢𑀺𑀆𑀤𑀺. 𑀢𑁂𑀯𑀸𑀘𑀺𑀓𑀦𑁆𑀢𑀺 𑀢𑀺𑀲𑁆𑀲𑁄 𑀯𑀸𑀘𑀸 𑀏𑀢𑀲𑁆𑀲𑀸𑀢𑀺 𑀢𑁂𑀯𑀸𑀘𑀺𑀓𑀁, 𑀢𑀻𑀳𑀺 𑀯𑀸𑀘𑀸𑀳𑀺 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀸 𑀢𑁂𑀯𑀸𑀘𑀺𑀓𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑀸𑀦𑀯𑀲𑁆𑀲𑀺𑀓𑀦𑁆𑀢𑀺 𑀲𑀫𑀸𑀦𑀁 𑀯𑀲𑁆𑀲𑀁 𑀏𑀢𑁂𑀲𑀦𑁆𑀢𑀺 𑀲𑀫𑀸𑀦𑀯𑀲𑁆𑀲𑀸, 𑀢𑁂𑀳𑀺 𑀓𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑀸𑀦𑀯𑀲𑁆𑀲𑀺𑀓𑀁. 𑀅𑀜𑁆𑀜𑀦𑁆𑀢𑀺 𑀤𑁆𑀯𑁂𑀯𑀸𑀘𑀺𑀓𑀏𑀓𑀯𑀸𑀘𑀺𑀓𑀁.

𑁨𑁧𑁧. 𑀅𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀆𑀲𑀥𑀸𑀢𑀼𑀬𑀸 𑀉𑀧𑀯𑁂𑀲𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀲𑀺𑀦𑁆𑀦𑀸𑀯 𑀳𑁄𑀦𑁆𑀢𑀻’’𑀢𑀺. ‘‘𑀦 𑀉𑀝𑁆𑀞𑀳𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀏𑀯𑀨𑀮𑀁 𑀤𑀲𑁆𑀲𑁂𑀢𑀺. 𑀢𑀤𑀫𑀦𑁆𑀢𑀭𑀸𑀢𑀺 𑀏𑀢𑁆𑀣 ‘‘𑀢𑀤𑀦𑁆𑀢𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀸𑀘𑀸𑀲𑀺𑀮𑀺𑀝𑁆𑀞𑀯𑀲𑁂𑀦 𑀫𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀤𑀦𑁆𑀢𑀭𑀸’’𑀢𑀺. 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀯𑀸𑀭𑀺𑀢𑀓𑀸𑀮𑀲𑁆𑀲 𑀅𑀦𑁆𑀢𑀭𑀸. ‘‘𑀬𑀸𑀯 𑀧𑀯𑀸𑀭𑁂𑀦𑁆𑀢𑀻’’𑀢𑀺 𑀧𑀤𑀲𑁆𑀲 𑀦𑀺𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑀸𑀯𑀢𑀓𑀁 𑀓𑀸𑀮’’𑀦𑁆𑀢𑀺. 𑀬𑀸𑀯𑀸𑀢𑀺 𑀦𑀺𑀧𑀸𑀢𑀲𑁆𑀲 𑀧𑀬𑁄𑀕𑀢𑁆𑀢𑀸 ‘‘𑀢𑀤𑀫𑀦𑁆𑀢𑀭𑀸’’𑀢𑀺 𑀏𑀢𑁆𑀣 𑀅𑀪𑀺𑀯𑀺𑀥𑀺𑀅𑀯𑀥𑁆𑀬𑀢𑁆𑀣𑁂 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁨𑁧. 𑀧𑀯𑀸𑀭𑀡𑀸𑀪𑁂𑀤𑀓𑀣𑀸

𑁨𑁧𑁨. 𑀘𑀸𑀢𑀼𑀤𑁆𑀤𑀲𑀺𑀓𑀸𑀬𑀸𑀢𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀉𑀧𑀤𑁆𑀤𑀼𑀢𑀢𑁆𑀢𑀸 𑀧𑀘𑁆𑀘𑀼𑀓𑁆𑀓𑀟𑁆𑀠𑀺𑀢𑀸𑀬 𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀺𑀓𑀸𑀬. ‘‘𑀅𑀚𑁆𑀚 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻’’𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀧𑀯𑀸𑀭𑀡𑀸𑀓𑀫𑁆𑀫𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕𑀁 𑀧𑀯𑀸𑀭𑀡𑀸𑀓𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀥𑀫𑁆𑀫𑁂𑀦 𑀯𑀕𑁆𑀕𑀦𑁆𑀢𑀺 𑀏𑀢𑁆𑀣 𑀅𑀥𑀫𑁆𑀫𑀁 𑀦𑀸𑀫 𑀲𑀗𑁆𑀖𑁄 𑀳𑀼𑀢𑁆𑀯𑀸𑀧𑀺 𑀲𑀗𑁆𑀖𑀧𑀯𑀸𑀭𑀡𑀫𑀓𑀢𑁆𑀯𑀸 𑀕𑀡𑀧𑀯𑀸𑀭𑀡𑀸𑀬 𑀓𑀭𑀡𑀁, 𑀕𑀡𑁄 𑀳𑀼𑀢𑁆𑀯𑀸𑀧𑀺 𑀕𑀡𑀧𑀯𑀸𑀭𑀡𑀫𑀓𑀢𑁆𑀯𑀸 𑀲𑀗𑁆𑀖𑀧𑀯𑀸𑀭𑀡𑀸𑀬 𑀓𑀭𑀡𑀜𑁆𑀘. 𑀯𑀕𑁆𑀕𑀁 𑀦𑀸𑀫 𑀏𑀓𑀲𑀻𑀫𑀸𑀬𑀁 𑀯𑀲𑀦𑁆𑀢𑀸𑀦𑀫𑁆𑀧𑀺 𑀲𑀩𑁆𑀩𑁂𑀲𑀁 𑀏𑀓𑀢𑁄 𑀅𑀲𑀦𑁆𑀦𑀺𑀧𑀢𑀦𑀁.

𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀦𑁆𑀢𑀺 𑀏𑀢𑁆𑀣 𑀅𑀥𑀫𑁆𑀫𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀫𑀕𑁆𑀕𑀁 𑀦𑀸𑀫 𑀲𑀩𑁆𑀩𑁂𑀲𑀁 𑀏𑀓𑀢𑁄 𑀲𑀦𑁆𑀦𑀺𑀧𑀢𑀦𑀁.

𑀥𑀫𑁆𑀫𑁂𑀦 𑀯𑀕𑁆𑀕𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀁 𑀦𑀸𑀫 𑀲𑀗𑁆𑀖𑁄 𑀳𑀼𑀢𑁆𑀯𑀸 𑀲𑀗𑁆𑀖𑀧𑀯𑀸𑀭𑀡𑀸𑀬 𑀓𑀭𑀡𑀁, 𑀕𑀡𑁄 𑀳𑀼𑀢𑁆𑀯𑀸 𑀕𑀡𑀧𑀯𑀸𑀭𑀡𑀸𑀬 𑀓𑀭𑀡𑀜𑁆𑀘. 𑀯𑀕𑁆𑀕𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀥𑀫𑁆𑀫𑁂𑀦 𑀲𑀫𑀕𑁆𑀕𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑁨𑁧𑁩. 𑀏𑀯𑀁 𑀤𑀺𑀦𑁆𑀦𑀸𑀬𑀸𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀺𑀦𑁆𑀦𑀸𑀬. 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀯𑀲𑁆𑀲𑀁𑀯𑀼𑀢𑁆𑀣𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀩𑁆𑀩𑀁. 𑀢𑀺𑀲𑁆𑀲𑁄𑀢𑀺 𑀢𑀺𑀲𑁆𑀲𑀦𑀸𑀫𑀓𑁄. 𑀤𑀺𑀝𑁆𑀞𑁂𑀦 𑀯𑀸 𑀯𑀤𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀢𑀺𑀲𑁆𑀲𑀦𑀸𑀫𑀓𑀁 𑀪𑀺𑀓𑁆𑀔𑀼𑀁. 𑀲𑀗𑁆𑀖𑁄 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀯𑀤𑀢𑀽𑀢𑀺 𑀬𑁄𑀚𑀦𑀸. 𑀯𑀼𑀟𑁆𑀠𑀢𑀭𑁄𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑁄 𑀢𑀁𑀳𑀸𑀭𑀓𑀢𑁄 𑀯𑀼𑀟𑁆𑀠𑀢𑀭𑁄. 𑀳𑀻𑀢𑀺 𑀮𑀤𑁆𑀥𑀕𑀼𑀡𑁄. 𑀢𑁂𑀦𑀸𑀢𑀺 𑀧𑀯𑀸𑀭𑀡𑀸𑀳𑀸𑀭𑀓𑁂𑀦. 𑀢𑀲𑁆𑀲𑀸𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑀲𑁆𑀲.

𑀇𑀥𑀸𑀧𑀺 𑀘𑀸𑀢𑀺 𑀇𑀫𑀲𑁆𑀫𑀺𑀁 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁂𑀧𑀺 𑀘. 𑀅𑀧𑀺𑀲𑀤𑁆𑀤𑁄 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀁 𑀅𑀧𑁂𑀓𑁆𑀔𑀢𑀺. 𑀅𑀯𑀲𑁂𑀲𑀓𑀫𑁆𑀫𑀢𑁆𑀣𑀸𑀬𑀸𑀢𑀺 𑀧𑀯𑀸𑀭𑀡𑀸𑀓𑀫𑁆𑀫𑀢𑁄 𑀅𑀯𑀲𑁂𑀲𑀸𑀦𑀁 𑀓𑀫𑁆𑀫𑀸𑀦𑀫𑀢𑁆𑀣𑀸𑀬 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀯𑀸𑀭𑀡𑀸𑀬 𑀆𑀳𑀝𑀸𑀬 𑀲𑀢𑀺𑀬𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀲 𑀘𑀸𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑀲𑁆𑀲 𑀘. 𑀲𑀩𑁆𑀩𑁂𑀲𑀦𑁆𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀘𑀸𑀢𑀺 𑀲𑀩𑁆𑀩𑁂𑀲𑀁. 𑀅𑀜𑁆𑀜𑀁 𑀧𑀦 𑀓𑀫𑁆𑀫𑀦𑁆𑀢𑀺 𑀧𑀯𑀸𑀭𑀡𑀸𑀓𑀫𑁆𑀫𑀢𑁄 𑀅𑀜𑁆𑀜𑀁 𑀓𑀫𑁆𑀫𑀁 𑀧𑀦. 𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸𑀢𑀺 𑀧𑀯𑀸𑀭𑀡𑀸𑀤𑀸𑀬𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀦. 𑀏𑀢𑁆𑀣 𑀘 𑀢𑀤𑀳𑀼𑀧𑀯𑀸𑀭𑀡𑀸𑀬 𑀅𑀢𑁆𑀢𑀦𑁄 𑀘 𑀲𑀗𑁆𑀖𑀲𑁆𑀲 𑀘 𑀲𑀘𑁂 𑀧𑀯𑀸𑀭𑀡𑀸𑀓𑀫𑁆𑀫𑀫𑁂𑀯 𑀳𑁄𑀢𑀺, 𑀧𑀯𑀸𑀭𑀡𑀸𑀬𑁂𑀯 𑀤𑀸𑀢𑀩𑁆𑀩𑀸. 𑀅𑀣 𑀅𑀜𑁆𑀜𑀫𑁂𑀯 𑀓𑀫𑁆𑀫𑀁 𑀳𑁄𑀢𑀺, 𑀙𑀦𑁆𑀤𑁄𑀬𑁂𑀯 𑀤𑀸𑀢𑀩𑁆𑀩𑁄. 𑀬𑀤𑀺 𑀧𑀯𑀸𑀭𑀡𑀸𑀓𑀫𑁆𑀫𑀜𑁆𑀘 𑀅𑀜𑁆𑀜𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀧𑀯𑀸𑀭𑀡𑀸 𑀘 𑀙𑀦𑁆𑀤𑁄 𑀘 𑀤𑀸𑀢𑀩𑁆𑀩𑁄. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀤𑀳𑀼 𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀁 𑀤𑁂𑀦𑁆𑀢𑁂𑀦 𑀙𑀦𑁆𑀤𑀫𑁆𑀧𑀺 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁧𑁩). 𑀢𑁂𑀦𑀸𑀢𑀺 𑀤𑀸𑀦𑀳𑁂𑀢𑀼𑀦𑀸.

𑁨𑁧𑁮. 𑀅𑀚𑁆𑀚 𑀫𑁂 𑀧𑀯𑀸𑀭𑀡𑀸𑀢𑀺 𑀏𑀢𑁆𑀣 𑀧𑀸𑀴𑀺𑀦𑀬𑀢𑁄 𑀅𑀜𑁆𑀜𑀁 𑀅𑀝𑁆𑀞𑀓𑀣𑀸𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂’’𑀢𑀺𑀆𑀤𑀺.

𑁨𑁧𑁯. 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑀅𑀝𑁆𑀞. 𑁧𑁬𑁯) 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁨𑁨. 𑀧𑀼𑀦 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀧𑀯𑀸𑀭𑀡𑀸𑀬𑁂𑀯 𑀧𑀼𑀦 𑀓𑀸𑀢𑀩𑁆𑀩𑀸, 𑀧𑀼𑀩𑁆𑀩𑀓𑀺𑀘𑁆𑀘𑀸𑀤𑀻𑀦𑀺𑀧𑀺 𑀧𑀼𑀦 𑀓𑀸𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀦 𑀧𑀼𑀩𑁆𑀩𑀓𑀺𑀘𑁆𑀘’’𑀦𑁆𑀢𑀺𑀆𑀤𑀺.

𑁨𑁨𑁮. 𑀏𑀲𑁂𑀯 𑀦𑀬𑁄𑀢𑀺 ‘‘𑀅𑀚𑁆𑀚 𑀧𑀯𑀸𑀭𑀡𑀸 𑀧𑀦𑁆𑀦𑀭𑀲𑀻’’𑀢𑀺 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀢𑀺𑀤𑀺𑀲𑀢𑀺. 𑀅𑀲𑁆𑀲𑀸𑀢𑀺 𑀯𑀘𑀦𑀲𑁆𑀲. 𑀜𑀢𑁆𑀢𑀺𑀦𑁆𑀢𑀺 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄 𑀅𑀚𑁆𑀚 𑀧𑀯𑀸𑀭𑀡𑀸’’𑀢𑀺 𑀜𑀢𑁆𑀢𑀺𑀁. 𑀧𑀘𑁆𑀙𑀺𑀫𑁂𑀳𑀻𑀢𑀺 𑀧𑀘𑁆𑀙𑀺𑀫𑀯𑀲𑁆𑀲𑀁 𑀉𑀧𑀕𑀢𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀉𑀧𑁄𑀲𑀣𑀕𑁆𑀕𑁂𑀢𑀺 𑀉𑀧𑁄𑀲𑀣𑀲𑁆𑀲 𑀕𑀡𑁆𑀳𑀦𑀝𑁆𑀞𑀸𑀦𑁂 𑀕𑁂𑀳𑁂. 𑀤𑁆𑀯𑁂 𑀜𑀢𑁆𑀢𑀺𑀬𑁄𑀢𑀺 𑀧𑀯𑀸𑀭𑀡𑀸𑀜𑀢𑁆𑀢𑀺 𑀘 𑀉𑀧𑁄𑀲𑀣𑀜𑀢𑁆𑀢𑀺 𑀘𑀸𑀢𑀺 𑀤𑁆𑀯𑁂 𑀜𑀢𑁆𑀢𑀺𑀬𑁄. 𑀇𑀤𑀜𑁆𑀘𑀸𑀢𑀺 𑀇𑀤𑀁 𑀯𑀓𑁆𑀔𑀫𑀸𑀦𑀁 𑀧𑀦. 𑀏𑀢𑁆𑀣𑀸𑀢𑀺 𑀧𑀼𑀭𑀺𑀫𑀺𑀓𑀧𑀘𑁆𑀙𑀺𑀫𑀺𑀓𑀪𑀺𑀓𑁆𑀔𑀽𑀦𑀁 𑀲𑀁𑀲𑀕𑁆𑀕𑀝𑁆𑀞𑀸𑀦𑁂. 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑁂𑀳𑀻𑀢𑀺 𑀯𑀺𑀪𑀢𑁆𑀢𑀅𑀧𑀸𑀤𑀸𑀦𑀁 𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑀅𑀧𑀸𑀤𑀸𑀦𑀁, 𑀣𑁄𑀓𑀢𑀭𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀳𑀸𑀤𑀺𑀬𑁄𑀕𑁄 𑀯𑀸, 𑀲𑀫𑀲𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀲𑀫𑀸𑀢𑀺 𑀲𑀫𑁂𑀦, 𑀲𑀫𑀢𑁄 𑀯𑀸 𑀲𑀫𑀸 𑀲𑀫𑀲𑀫𑀸, 𑀅𑀢𑀺𑀭𑁂𑀓𑀲𑀫𑀸𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀺 𑀊𑀦𑀁 𑀯𑀸 𑀅𑀥𑀺𑀓𑀁 𑀯𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀻𑀢𑀺 𑀇𑀤𑀁 𑀮𑀓𑁆𑀔𑀡𑀁.

𑀲𑁄𑀢𑀺 𑀧𑀘𑁆𑀙𑀺𑀫𑀺𑀓𑁄 𑀪𑀺𑀓𑁆𑀔𑀼. 𑀇𑀢𑀭𑁂𑀦𑀸𑀢𑀺 𑀧𑀘𑁆𑀙𑀺𑀫𑀺𑀓𑁂𑀦. 𑀢𑁂𑀲𑀦𑁆𑀢𑀺 𑀧𑀼𑀭𑀺𑀫𑀺𑀓𑀸𑀦𑀁. 𑀏𑀓𑁂𑀦𑀸𑀢𑀺 𑀧𑀼𑀭𑀺𑀫𑀺𑀓𑁂𑀦. 𑀏𑀓𑀲𑁆𑀲𑀸𑀢𑀺 𑀧𑀘𑁆𑀙𑀺𑀫𑀺𑀓𑀲𑁆𑀲. 𑀧𑀼𑀦 𑀏𑀓𑁂𑀦𑀸𑀢𑀺 𑀧𑀘𑁆𑀙𑀺𑀫𑀺𑀓𑁂𑀦. ‘‘𑀏𑀓𑀲𑁆𑀲𑀸’’𑀢𑀺 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑁄, 𑀧𑀼𑀭𑀺𑀫𑀺𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀯𑀲𑁆𑀲𑀽𑀧𑀕𑀢𑁂𑀳𑀺 𑀅𑀥𑀺𑀓𑀢𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁄𑀓𑀢𑀭𑁂𑀳𑀻𑀢𑀺 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀕𑀢𑁂𑀳𑀺 𑀣𑁄𑀓𑀢𑀭𑁂𑀳𑀺 𑀧𑀼𑀭𑀺𑀫𑀯𑀲𑁆𑀲𑀽𑀧𑀕𑀢𑁂𑀳𑀻𑀢𑀺 𑀬𑁄𑀚𑀦𑀸.

𑀓𑀢𑁆𑀢𑀺𑀓𑀸𑀬𑀸𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀸𑀬. 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑀡𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀧𑀽𑀭𑀡𑀺𑀬𑀸 𑀧𑀯𑀸𑀭𑀡𑀸𑀬. 𑀧𑀯𑀸𑀭𑀡𑀸𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸𑀢𑀺 𑀲𑀫𑀲𑀫𑀸 𑀳𑀼𑀢𑁆𑀯𑀸𑀧𑀺 𑀧𑀯𑀸𑀭𑀡𑀸𑀤𑀺𑀯𑀲𑀢𑁆𑀢𑀸 𑀧𑀯𑀸𑀭𑀡𑀸𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸. 𑀢𑁂𑀳𑀻𑀢𑀺 𑀧𑀘𑁆𑀙𑀺𑀫𑀺𑀓𑁂𑀳𑀺. 𑀇𑀢𑀭𑁂𑀳𑀻𑀢𑀺 𑀧𑀼𑀭𑀺𑀫𑀺𑀓𑁂𑀳𑀺. 𑀢𑁂𑀲𑀦𑁆𑀢𑀺 𑀧𑀘𑁆𑀙𑀺𑀫𑀺𑀓𑀸𑀦𑀁. 𑀣𑁄𑀓𑀢𑀭𑀸 𑀯𑀸𑀢𑀺 𑀏𑀓𑀸𑀤𑀺𑀦𑀸 𑀣𑁄𑀓𑀢𑀭𑀸 𑀯𑀸. 𑀢𑁂𑀲𑀦𑁆𑀢𑀺 𑀧𑀼𑀭𑀺𑀫𑀺𑀓𑀸𑀦𑀁. 𑀢𑁂𑀳𑀻𑀢𑀺 𑀧𑀘𑁆𑀙𑀺𑀫𑀺𑀓𑁂𑀳𑀺.

𑁨𑁩𑁩. 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸𑀢𑀺 𑀏𑀢𑁆𑀣 𑀓𑀻𑀤𑀺𑀲𑀻 𑀲𑀗𑁆𑀖𑀲𑀸𑀫𑀕𑁆𑀕𑀻 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀓𑁄𑀲𑀫𑁆𑀩𑀓𑀲𑀸𑀫𑀕𑁆𑀕𑀻𑀲𑀤𑀺𑀲𑀸𑀯 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀏𑀢𑁆𑀣𑀸𑀢𑀺 𑀲𑀸𑀫𑀕𑁆𑀕𑀻𑀧𑀯𑀸𑀭𑀡𑀸𑀬𑀁. 𑀅𑀧𑁆𑀧𑀫𑀢𑁆𑀢𑀓𑁂𑀢𑀺 𑀧𑀢𑁆𑀢𑀘𑀻𑀯𑀭𑀸𑀤𑀺𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁂 𑀅𑀧𑁆𑀧𑀫𑀢𑁆𑀢𑀓𑁂 𑀯𑀺𑀯𑀸𑀤𑁂. 𑀧𑀯𑀸𑀭𑀡𑀸𑀬𑀫𑁂𑀯𑀸𑀢𑀺 𑀧𑀯𑀸𑀭𑀡𑀸𑀤𑀺𑀯𑀲𑁂𑀬𑁂𑀯. 𑀓𑀲𑁆𑀫𑀺𑀁 𑀤𑀺𑀯𑀲𑁂 𑀲𑀸𑀫𑀕𑁆𑀕𑀻𑀧𑀯𑀸𑀭𑀡𑀸 𑀓𑀸𑀢𑀩𑁆𑀩𑀸𑀢𑀺 𑀆𑀳 ‘‘𑀲𑀸𑀫𑀕𑁆𑀕𑀻𑀧𑀯𑀸𑀭𑀡’’𑀦𑁆𑀢𑀺𑀆𑀤𑀺. 𑀧𑀞𑀫𑀧𑀯𑀸𑀭𑀡𑀦𑁆𑀢𑀺 𑀧𑀼𑀩𑁆𑀩𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀺𑀁. 𑀬𑀸𑀯 𑀓𑀢𑁆𑀢𑀺𑀓𑀘𑀸𑀢𑀼𑀫𑀸𑀲𑀺𑀦𑀻 𑀧𑀼𑀡𑁆𑀡𑀫𑀸𑀢𑀺 𑀅𑀬𑀁 𑀅𑀯𑀥𑀺 𑀅𑀦𑀪𑀺𑀯𑀺𑀥𑀺𑀅𑀯𑀥𑀺 𑀦𑀸𑀫. 𑀓𑀲𑁆𑀫𑀸? 𑀓𑀢𑁆𑀢𑀺𑀓𑀘𑀸𑀢𑀼𑀫𑀸𑀲𑀺𑀦𑀺𑀧𑀼𑀡𑁆𑀡𑀫𑀺𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀤𑁆𑀯𑀺𑀦𑁆𑀦𑀁 𑀧𑀼𑀡𑁆𑀡𑀫𑀺𑀦𑀫𑀦𑁆𑀢𑀭𑁂 𑀅𑀝𑁆𑀞𑀯𑀻𑀲𑀢𑀺𑀧𑀫𑀸𑀡𑁂 𑀤𑀺𑀯𑀲𑁂 𑀓𑀸𑀢𑀩𑁆𑀩𑀸. 𑀢𑀢𑁄𑀢𑀺 𑀏𑀢𑁆𑀣𑀦𑁆𑀢𑀭𑀲𑀗𑁆𑀔𑀸𑀢𑀸 𑀅𑀝𑁆𑀞𑀯𑀻𑀲𑀤𑀺𑀯𑀲𑀢𑁄.

𑁧𑁪𑁦. 𑀤𑁆𑀯𑁂𑀯𑀸𑀘𑀺𑀓𑀸𑀤𑀺𑀧𑀯𑀸𑀭𑀡𑀸𑀓𑀣𑀸

𑁨𑁩𑁪. 𑀜𑀢𑁆𑀢𑀺𑀁 𑀞𑀧𑁂𑀦𑁆𑀢𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀧𑀯𑀸𑀭𑁂𑀦𑁆𑀢𑁂𑀦 𑀏𑀯 𑀤𑁆𑀯𑁂𑀯𑀸𑀘𑀺𑀓𑀁 𑀧𑀯𑀸𑀭𑁂𑀢𑀩𑁆𑀩𑀁, 𑀅𑀣 𑀔𑁄 𑀜𑀢𑁆𑀢𑀺𑀁 𑀞𑀧𑁂𑀦𑁆𑀢𑁂𑀦𑀸𑀧𑀺 𑀤𑁆𑀯𑁂𑀯𑀸𑀘𑀺𑀓𑀜𑀢𑁆𑀢𑀺𑀬𑁂𑀯 𑀞𑀧𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘𑀸𑀢𑀺 ‘‘𑀲𑀫𑀸𑀦𑀯𑀲𑁆𑀲𑀺𑀓𑀁 𑀧𑀯𑀸𑀭𑁂𑀢𑀼’’𑀦𑁆𑀢𑀺 𑀧𑀸𑀞𑁂 𑀘. 𑀲𑀫𑀸𑀦𑀯𑀲𑁆𑀲𑀺𑀓𑀸𑀢𑀺 𑀕𑀡𑀦𑀯𑀲𑁂𑀦 𑀲𑀫𑀸𑀦𑀁 𑀯𑀲𑁆𑀲𑀁 𑀏𑀢𑁂𑀲𑀦𑁆𑀢𑀺 𑀲𑀫𑀸𑀦𑀯𑀲𑁆𑀲𑀺𑀓𑀸, 𑀲𑀫𑀸𑀦𑁂 𑀯𑀲𑁆𑀲𑁂 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀯𑀸 𑀲𑀫𑀸𑀦𑀯𑀲𑁆𑀲𑀺𑀓𑀸. 𑀏𑀓𑀢𑁄𑀢𑀺 𑀏𑀓𑀲𑁆𑀫𑀺𑀁 𑀔𑀡𑁂, 𑀏𑀓𑀧𑀳𑀸𑀭𑁂𑀦 𑀯𑀸.

𑁧𑁪𑁧. 𑀧𑀯𑀸𑀭𑀡𑀸𑀝𑁆𑀞𑀧𑀦𑀓𑀣𑀸

𑁨𑁩𑁬. 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁. 𑀧𑀼𑀕𑁆𑀕𑀮𑀲𑁆𑀲 𑀞𑀧𑀦𑀁 𑀧𑀼𑀕𑁆𑀕𑀮𑀺𑀓𑀁. 𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀧𑀯𑀸𑀭𑀡𑀸𑀝𑁆𑀞𑀧𑀦𑁂𑀲𑀼. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁂 𑀞𑀧𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀯 𑀭𑁂𑀓𑀸𑀭𑁄 𑀅𑀢𑁆𑀣𑀺, 𑀢𑀸𑀯𑀸𑀢𑀺 𑀬𑁄𑀚𑀦𑀸. 𑀪𑀸𑀲𑀺𑀬𑀺𑀢𑁆𑀣𑀸𑀢𑀺 𑀪𑀸𑀲𑀺𑀢𑀸. 𑀮𑀧𑀺𑀬𑀺𑀢𑁆𑀣𑀸𑀢𑀺 𑀮𑀧𑀺𑀢𑀸. 𑀦 𑀧𑀭𑀺𑀬𑁄𑀲𑀺𑀬𑀺𑀢𑁆𑀣𑀸𑀢𑀺 𑀅𑀧𑀭𑀺𑀬𑁄𑀲𑀺𑀢𑀸. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀲𑀼𑀓𑀸𑀭𑀭𑁂𑀓𑀸𑀭𑀸𑀦𑀁 𑀅𑀦𑁆𑀢𑀭𑁂. 𑀏𑀓𑀧𑀤𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀏𑀓𑀓𑁆𑀔𑀭𑁂𑀧𑀻𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀞𑀧𑀺𑀢𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀲𑀸𑀧𑀢𑁆𑀢𑀺𑀓𑁄, 𑀢𑀲𑁆𑀲 𑀧𑀯𑀸𑀭𑀡𑀁 𑀞𑀧𑁂𑀫𑀻’’𑀢𑀺 𑀜𑀢𑁆𑀢𑀺𑀬𑀸 𑀞𑀧𑀺𑀢𑀸. 𑀬𑁆𑀬𑀓𑀸𑀭𑁂𑀢𑀺 ‘‘𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀬𑁆𑀬𑀓𑀸𑀭𑁂. 𑀢𑀢𑁄𑀢𑀺 𑀬𑁆𑀬𑀓𑀸𑀭𑀢𑁄. 𑀧𑀼𑀕𑁆𑀕𑀮𑀺𑀓𑀝𑁆𑀞𑀧𑀦𑁂 𑀧𑀦 𑀅𑀝𑁆𑀞𑀧𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀁𑀓𑀸𑀭𑀢𑁄𑀢𑀺 ‘‘𑀲𑀗𑁆𑀖𑀁 𑀪𑀦𑁆𑀢𑁂’’𑀢𑀺 𑀏𑀢𑁆𑀣 𑀲𑀁𑀓𑀸𑀭𑀢𑁄. 𑀲𑀩𑁆𑀩𑀧𑀘𑁆𑀙𑀺𑀫𑁄𑀢𑀺 𑀢𑀻𑀲𑀼 𑀯𑀸𑀭𑁂𑀲𑀼 𑀢𑀢𑀺𑀬𑀯𑀸𑀭𑁂 𑀲𑀩𑁆𑀩𑁂𑀲𑀁 𑀅𑀓𑁆𑀔𑀭𑀸𑀦𑀁 𑀧𑀘𑁆𑀙𑀺𑀫𑁄 𑀝𑀺𑀓𑀸𑀭𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀏𑀢𑀲𑁆𑀫𑀺𑀁 𑀲𑀁𑀓𑀸𑀭𑀝𑀺𑀓𑀸𑀭𑀸𑀦𑀁 𑀅𑀦𑁆𑀢𑀭𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀭𑀺𑀬𑁄𑀲𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸. ‘‘𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀏𑀢𑀸𑀲𑀼𑀧𑀺 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑀸𑀲𑀼𑀧𑀻𑀢𑀺 𑀤𑁆𑀯𑁂𑀯𑀸𑀘𑀺𑀓𑀏𑀓𑀯𑀸𑀘𑀺𑀓𑀲𑀫𑀸𑀦𑀯𑀲𑁆𑀲𑀺𑀓𑀸𑀲𑀼𑀧𑀺. 𑀧𑀺𑀲𑀤𑁆𑀤𑁄 𑀢𑁂𑀯𑀸𑀘𑀺𑀓𑀫𑀧𑁂𑀓𑁆𑀔𑀢𑀺. 𑀞𑀧𑀦𑀔𑁂𑀢𑁆𑀢𑀦𑁆𑀢𑀺 𑀞𑀧𑀦𑀲𑁆𑀲 𑀪𑀽𑀫𑀺. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄.

𑁨𑁩𑁭. 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄𑀢𑀺 𑀏𑀢𑁆𑀣 𑀅𑀦𑀼𑀬𑀼𑀜𑁆𑀚𑀲𑀤𑁆𑀤𑁄 𑀧𑀼𑀘𑁆𑀙𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀼𑀘𑁆𑀙𑀺𑀬𑀫𑀸𑀦𑁄’’𑀢𑀺. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁𑀬𑁂𑀯 𑀔𑀦𑁆𑀥𑀓𑁂𑀢𑀺 (𑀫𑀳𑀸𑀯. 𑁨𑁩𑁭) 𑀅𑀢𑁆𑀣𑁄. 𑀅𑀮𑀁 𑀪𑀺𑀓𑁆𑀔𑀼 𑀫𑀸 𑀪𑀡𑁆𑀟𑀦𑀦𑁆𑀢𑀺𑀆𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀫𑀸 𑀓𑀮𑀳𑀁, 𑀫𑀸 𑀯𑀺𑀯𑀸𑀤’’𑀦𑁆𑀢𑀺𑀯𑀘𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺, 𑀯𑀘𑀦𑀸𑀦𑀺 𑀯𑀢𑁆𑀯𑀸 𑀑𑀫𑀤𑁆𑀤𑀺𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀘𑀦𑁄𑀫𑀤𑁆𑀤𑀦𑀸𑀢𑀺 𑀯𑀘𑀦𑁂𑀦𑁂𑀯 𑀑𑀫𑀤𑁆𑀤𑀦𑀸. 𑀳𑀻𑀢𑀺 𑀲𑀘𑁆𑀘𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀯𑀸𑀭𑀡𑀸𑀝𑁆𑀞𑀧𑀦𑀝𑁆𑀞𑀸𑀦𑁂. 𑀅𑀦𑀼𑀤𑁆𑀥𑀁𑀲𑀺𑀢𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀧𑀝𑀺𑀚𑀸𑀦𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑀺𑀢𑁄 𑀅𑀬𑀁 𑀫𑀬𑀸’’𑀢𑀺. ‘‘𑀮𑀺𑀗𑁆𑀕𑀦𑀸𑀲𑀦𑀸𑀬𑀸’’𑀢𑀺 𑀇𑀫𑀺𑀦𑀸 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀲𑀁𑀯𑀸𑀲𑀦𑀸𑀲𑀦𑀸𑀦𑀺 𑀦𑀺𑀯𑀢𑁆𑀢𑁂𑀢𑀺.

𑁨𑁩𑁮. 𑀏𑀢𑀦𑁆𑀢𑀺 ‘‘𑀅𑀲𑀼𑀓𑀸 𑀆𑀧𑀢𑁆𑀢𑀻’’𑀢𑀺 𑀯𑀘𑀦𑀁. 𑀓𑀮𑀳𑀲𑁆𑀲 𑀫𑀼𑀔𑀦𑁆𑀢𑀺 𑀓𑀮𑀳𑀲𑁆𑀲 𑀉𑀧𑀸𑀬𑁄.

𑁧𑁪𑁩. 𑀯𑀢𑁆𑀣𑀼𑀝𑁆𑀞𑀧𑀦𑀸𑀤𑀺𑀓𑀣𑀸

𑁨𑁩𑁯. 𑀘𑁄𑀭𑀸 𑀅𑀕𑀫𑀁𑀲𑀼 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑁄𑀓𑁆𑀔𑀭𑀡𑀺𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀪𑀺𑀓𑁆𑀔𑀼, 𑀏𑀯𑀫𑀸𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀣𑁂𑀦𑀸𑀢𑀺 𑀯𑀲𑀦𑁆𑀢𑁂𑀦, 𑀬𑁂𑀦 𑀓𑁂𑀦𑀘𑀺 𑀓𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀼𑀕𑁆𑀕𑀮𑀦𑁆𑀢𑀺 𑀯𑀢𑁆𑀣𑀼𑀓𑀢𑀁 𑀢𑀁 𑀧𑀼𑀕𑁆𑀕𑀮𑀁. 𑀏𑀢𑁆𑀣𑀸𑀢𑀺 ‘‘𑀯𑀢𑁆𑀣𑀼𑀁 𑀞𑀧𑁂𑀢𑁆𑀯𑀸 𑀲𑀗𑁆𑀖𑁄 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀧𑀸𑀞𑁂. 𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀅𑀧𑀤𑀺𑀲𑀸𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀧𑀼𑀕𑁆𑀕𑀮𑀁. 𑀅𑀦𑀼𑀯𑀺𑀚𑁆𑀚𑀺𑀢𑁆𑀯𑀸𑀢𑀺 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸, 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀏𑀓𑁄 𑀪𑀺𑀓𑁆𑀔𑀼 𑀧𑀽𑀚𑁂𑀲𑀺, 𑀧𑀺𑀯𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀢𑀤𑀦𑀼𑀭𑀽𑀧𑁄𑀢𑀺 𑀢𑁂𑀲𑀁 𑀧𑀽𑀚𑀦𑀧𑀺𑀯𑀦𑀸𑀦𑀁 𑀅𑀦𑀼𑀭𑀽𑀧𑁄. 𑀲𑁄𑀢𑀺 𑀘𑁄𑀤𑀓𑁄 𑀪𑀺𑀓𑁆𑀔𑀼. 𑀢𑀁 𑀕𑀦𑁆𑀥𑀦𑁆𑀢𑀺 𑀢𑀁 𑀲𑀭𑀻𑀭𑀕𑀦𑁆𑀥𑀁. 𑀬𑀁 𑀧𑀼𑀕𑁆𑀕𑀮𑀦𑁆𑀢𑀺 𑀬𑁄𑀚𑀦𑀸. 𑀞𑀧𑁂𑀲𑀻𑀢𑀺 𑀧𑀯𑀸𑀭𑀡𑀸𑀬 𑀞𑀧𑁂𑀲𑀺. 𑀅𑀬𑀫𑀲𑁆𑀲𑀸𑀢𑀺 𑀅𑀬𑀁 𑀤𑁄𑀲𑁄 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲.

𑀇𑀤𑀸𑀦𑁂𑀯 𑀦𑀦𑁆𑀢𑀺 𑀏𑀢𑁆𑀣 ‘‘𑀦’’𑀦𑁆𑀢𑀺 𑀧𑀤𑀁 ‘‘𑀧𑀼𑀕𑁆𑀕𑀮’’𑀦𑁆𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀦𑀁 𑀧𑀼𑀕𑁆𑀕𑀮𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀉𑀪𑀬𑀦𑁆𑀢𑀺 𑀯𑀢𑁆𑀣𑀼𑀜𑁆𑀘 𑀧𑀼𑀕𑁆𑀕𑀮𑀜𑁆𑀘𑀸𑀢𑀺 𑀉𑀪𑀬𑀁. 𑀓𑀮𑁆𑀮𑀁 𑀯𑀘𑀦𑀸𑀬𑀸𑀢𑀺 𑀬𑀼𑀢𑁆𑀢𑀁 𑀓𑀣𑁂𑀢𑀼𑀁. 𑀓𑀲𑁆𑀫𑀸 𑀓𑀮𑁆𑀮𑀁 𑀯𑀘𑀦𑀸𑀬𑀸𑀢𑀺 𑀬𑁄𑀚𑀦𑀸. 𑀧𑀯𑀸𑀭𑀡𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀺 𑀢𑀲𑁆𑀫𑀸 𑀓𑀮𑁆𑀮𑀁 𑀯𑀘𑀦𑀸𑀬𑀸𑀢𑀺 𑀬𑁄𑀚𑀦𑀸. 𑀇𑀤𑀜𑁆𑀳𑀺 𑀉𑀪𑀬𑀦𑁆𑀢𑀺 𑀯𑀢𑁆𑀣𑀼𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑀁 𑀇𑀤𑀫𑁂𑀯 𑀉𑀪𑀬𑀁. 𑀧𑀯𑀸𑀭𑀡𑀸𑀬 𑀧𑀼𑀩𑁆𑀩𑁂𑀢𑀺 𑀬𑁄𑀚𑀦𑀸. 𑀉𑀓𑁆𑀓𑁄𑀝𑁂𑀦𑁆𑀢𑀲𑁆𑀲𑀸𑀢𑀺 𑀘𑀸𑀮𑁂𑀦𑁆𑀢𑀲𑁆𑀲.

𑁧𑁪𑁪. 𑀪𑀡𑁆𑀟𑀦𑀓𑀸𑀭𑀓𑀯𑀢𑁆𑀣𑀼𑀓𑀣𑀸

𑁨𑁪𑁦. 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀢𑀺 𑀙𑀲𑀼 𑀧𑀓𑁆𑀔𑁂𑀲𑀼 𑀧𑁄𑀝𑁆𑀞𑀧𑀸𑀤𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀓𑀸𑀴𑀧𑀓𑁆𑀔𑀲𑀗𑁆𑀔𑀸𑀢𑀸 𑀘𑀢𑀼𑀢𑁆𑀣𑀧𑀜𑁆𑀘𑀫𑀸. 𑀢𑀢𑀺𑀬𑁄𑀢𑀺 𑀲𑀸𑀯𑀡𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁄 𑀢𑀢𑀺𑀬𑁄. 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀸 𑀯𑀸𑀢𑀺 𑀏𑀢𑁆𑀣 𑀢𑀢𑀺𑀬𑁄𑀢𑀺 𑀲𑀸𑀯𑀡𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁄. 𑀘𑀢𑀼𑀢𑁆𑀣𑁄𑀢𑀺 𑀧𑁄𑀝𑁆𑀞𑀧𑀸𑀤𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑁄. 𑀧𑀜𑁆𑀘𑀫𑁄𑀢𑀺 𑀢𑀲𑁆𑀲𑁂𑀯 𑀓𑀸𑀴𑀧𑀓𑁆𑀔𑁄. ‘‘𑀢𑀢𑀺𑀬…𑀧𑁂… 𑀧𑀜𑁆𑀘𑀫𑀸 𑀯𑀸’’𑀢𑀺 𑀧𑀤𑀸𑀦𑀺 ‘‘𑀤𑁆𑀯𑁂 𑀯𑀸 𑀢𑀬𑁄 𑀯𑀸’’𑀢𑀺 𑀧𑀤𑁂𑀳𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀘𑀢𑀼𑀢𑁆𑀣𑁂 𑀯𑀸 𑀓𑀢𑁂𑀢𑀺 𑀘𑀢𑀼𑀢𑁆𑀣𑀧𑀓𑁆𑀔𑁂 𑀯𑀸 𑀧𑀦𑁆𑀦𑀭𑀲𑀺𑀪𑀸𑀯𑁂𑀦 𑀓𑀢𑁂. 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸𑀢𑀺 𑀢𑀢𑀺𑀬𑀧𑀓𑁆𑀔𑁂 𑀘 𑀘𑀸𑀢𑀼𑀤𑁆𑀤𑀲𑀺𑀬𑀸 𑀲𑀤𑁆𑀥𑀺𑀁 𑀤𑁆𑀯𑁂 𑀘𑀸𑀢𑀼𑀤𑁆𑀤𑀲𑀺𑀓𑀸. 𑀇𑀫𑁂𑀢𑀺 𑀪𑀡𑁆𑀟𑀦𑀓𑀸𑀭𑀓𑀸. 𑀢𑁂𑀢𑀺 𑀪𑀡𑁆𑀟𑀦𑀓𑀸𑀭𑀓𑀸.

𑀅𑀲𑀁𑀯𑀺𑀳𑀺𑀢𑀸𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀯𑀺𑀭𑀳𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀁𑀯𑀺𑀤𑀳𑀦𑀯𑀺𑀭𑀳𑀺𑀢𑀸’’𑀢𑀺. 𑀢𑀢𑁆𑀣 𑀲𑀁𑀯𑀺𑀤𑀳𑀦𑀯𑀺𑀭𑀳𑀺𑀢𑀸𑀢𑀺 𑀲𑀁𑀯𑀺𑀤𑀳𑀦𑀭𑀓𑁆𑀔𑀯𑀺𑀭𑀳𑀺𑀢𑀸. 𑀆𑀕𑀫𑀦𑀚𑀸𑀦𑀦𑀢𑁆𑀣𑀸𑀬𑀸𑀢𑀺 𑀪𑀡𑁆𑀟𑀦𑀓𑀸𑀭𑀓𑀸𑀦𑀁 𑀆𑀕𑀫𑀦𑀲𑁆𑀲 𑀚𑀸𑀦𑀦𑀢𑁆𑀣𑀸𑀬. 𑀓𑀺𑀮𑀦𑁆𑀢𑀢𑁆𑀣𑀸𑀢𑀺 𑀢𑀼𑀫𑁆𑀳𑁂 𑀓𑀺𑀮𑀦𑁆𑀢𑀸 𑀪𑀯𑀣. ‘‘𑀲𑀫𑁆𑀫𑁄𑀳𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀯𑀺𑀓𑁆𑀔𑀺𑀢𑁆𑀯𑀸𑀢𑀺 𑀧𑀤𑀲𑁆𑀲 𑀯𑀺𑀓𑁆𑀔𑁂𑀧𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑁄 𑀘𑁂 𑀮𑀪𑁂𑀣𑀸𑀢𑀺 𑀏𑀢𑁆𑀣 𑀓𑀺𑀫𑀢𑁆𑀣𑀸𑀬 𑀦 𑀮𑀪𑁂𑀣𑀸𑀢𑀺 𑀆𑀳 ‘‘𑀩𑀳𑀺𑀲𑀻𑀫𑀁 𑀕𑀦𑁆𑀢𑀼’’𑀦𑁆𑀢𑀺. ‘‘𑀪𑀡𑁆𑀟𑀦𑀓𑀸𑀭𑀓𑀸𑀦𑀁…𑀧𑁂… 𑀳𑁄𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀅𑀮𑀪𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀆𑀕𑀫𑀁 𑀚𑀼𑀡𑁆𑀳𑀁. 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁. 𑀲𑀸 𑀳𑀺 𑀓𑀼𑀫𑀼𑀤𑀸𑀦𑀫𑀢𑁆𑀣𑀺𑀢𑀸𑀬 𑀓𑁄𑀫𑀼𑀤𑀻, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀸𑀦𑀁 𑀫𑀸𑀲𑀸𑀦𑀁 𑀧𑀽𑀭𑀡𑀢𑁆𑀢𑀸 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀸 𑀳𑀺 𑀓𑀼𑀫𑀼𑀤𑀸𑀦𑀺 𑀲𑀼𑀧𑀼𑀧𑁆𑀨𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀫𑀼𑀤𑀸𑀦𑀁 𑀲𑀫𑀽𑀳𑀸, 𑀓𑀼𑀫𑀼𑀤𑀸𑀦𑀺 𑀏𑀯 𑀯𑀸 𑀓𑁄𑀫𑀼𑀤𑀸, 𑀢𑁂 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀓𑁄𑀫𑀼𑀤𑀻𑀢𑀺 𑀯𑀼𑀘𑁆𑀘𑀢𑀺, 𑀓𑀼𑀫𑀼𑀤𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀯𑀲𑁆𑀲𑀁 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀥𑀼𑀯𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀦𑁆𑀢𑀺 𑀓𑁄𑀫𑀼𑀤𑀺𑀁 𑀘𑀸𑀢𑀼𑀫𑀸𑀲𑀺𑀦𑀺𑀁.

𑁧𑁪𑁫. 𑀧𑀯𑀸𑀭𑀡𑀸𑀲𑀗𑁆𑀕𑀳𑀓𑀣𑀸

𑁨𑁪𑁧. 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄𑀢𑀺 𑀏𑀢𑁆𑀣 𑀨𑀸𑀲𑀼𑀯𑀺𑀳𑀸𑀭𑁄 𑀦𑀸𑀫 𑀓𑁄𑀢𑀺 𑀆𑀳 ‘‘𑀢𑀭𑀼𑀡𑀲𑀫𑀣𑁄 𑀯𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀸 𑀯𑀸’’𑀢𑀺. 𑀇𑀫𑀺𑀦𑀸 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸 𑀨𑀸𑀲𑀼𑀁 𑀯𑀺𑀳𑀭𑀢𑀺 𑀅𑀦𑁂𑀦𑀸𑀢𑀺 𑀨𑀸𑀲𑀼𑀯𑀺𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀅𑀦𑀺𑀩𑀤𑁆𑀥𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀺𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀺𑀩𑀤𑁆𑀥𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀺𑀪𑀸𑀯𑁂𑀦𑀸𑀢𑀺 𑀅𑀦𑀺𑀩𑀤𑁆𑀥𑀤𑀺𑀯𑀸𑀝𑁆𑀞𑀸𑀦𑀸𑀤𑀺𑀪𑀸𑀯𑁂𑀦 𑀳𑁂𑀢𑀼𑀪𑀽𑀢𑁂𑀦, 𑀅𑀲𑀓𑁆𑀓𑁄𑀦𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀤𑀺𑀲𑀤𑁆𑀤𑁂𑀦 𑀅𑀦𑀺𑀩𑀤𑁆𑀥𑀘𑀗𑁆𑀓𑀫𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀙𑀦𑁆𑀤𑀤𑀸𑀦𑀁 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀇𑀫𑀺𑀦𑀸 ‘‘𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’’𑀦𑁆𑀢𑀺 𑀯𑀸𑀓𑁆𑀬𑀲𑁆𑀲 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀇𑀫𑁂𑀲𑀼 𑀢𑀻𑀲𑀼 𑀙𑀦𑁆𑀤𑀤𑀸𑀦𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀁 𑀧𑀯𑀸𑀭𑀡𑀸𑀲𑀗𑁆𑀕𑀳𑁄 𑀦𑀸𑀫 𑀦 𑀤𑀸𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀏𑀓𑀧𑀼𑀕𑁆𑀕𑀮𑁄 𑀯𑀸 𑀳𑁄𑀢𑀽𑀢𑀺 𑀬𑁄𑀚𑀦𑀸. ‘‘𑀏𑀓𑀲𑁆𑀲𑀧𑀺 𑀤𑀸𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀅𑀬𑀁 𑀧𑀯𑀸𑀭𑀡𑀸𑀲𑀗𑁆𑀕𑀳𑁄 𑀏𑀓𑀲𑁆𑀲 𑀤𑀺𑀦𑁆𑀦𑁄𑀧𑀺 𑀲𑀩𑁆𑀩𑁂𑀲𑀁 𑀤𑀺𑀦𑁆𑀦𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀯𑀸𑀭𑀡𑀸𑀲𑀗𑁆𑀕𑀳𑁂 𑀤𑀺𑀦𑁆𑀦𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀆𑀕𑀦𑁆𑀢𑀼𑀓𑀸𑀢𑀺 𑀲𑀝𑁆𑀞𑀺𑀯𑀲𑁆𑀲𑀸𑀧𑀺 𑀆𑀕𑀦𑁆𑀢𑀼𑀓𑀸. 𑀢𑁂𑀲𑀦𑁆𑀢𑀺 𑀤𑀺𑀦𑁆𑀦𑀧𑀯𑀸𑀭𑀡𑀸𑀲𑀗𑁆𑀕𑀳𑀸𑀦𑀁. 𑀅𑀦𑁆𑀢𑀭𑀸𑀧𑀻𑀢𑀺 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀅𑀦𑁆𑀢𑀭𑀸𑀧𑀺.

𑀇𑀢𑀺 𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.