𑁩. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀁

𑁧𑁦𑁭. 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀦𑀼𑀚𑀸𑀦𑀦𑀓𑀣𑀸

𑁧𑁮𑁪. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 ‘‘𑀅𑀦𑀦𑀼𑀜𑁆𑀜𑀸𑀢𑁄’’𑀢𑀺 𑀇𑀫𑀺𑀦𑀸 𑀅𑀧𑀜𑁆𑀜𑀢𑁆𑀢𑁄𑀢𑀺 𑀏𑀢𑁆𑀣 𑀜𑀸𑀥𑀸𑀢𑀼𑀬𑀸 𑀅𑀦𑀼𑀚𑀸𑀦𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀅𑀲𑀁𑀯𑀺𑀳𑀺𑀢𑁄’’𑀢𑀺 𑀇𑀫𑀺𑀦𑀸 𑀜𑀸𑀥𑀸𑀢𑀼𑀬𑀸 𑀞𑀧𑀦𑀢𑁆𑀣𑀁. 𑀢𑁂𑀥𑀸𑀢𑀺 𑀢𑁂 𑀇𑀥. 𑀇𑀥𑀲𑀤𑁆𑀤𑁄 𑀲𑀸𑀲𑀦𑀜𑁆𑀘 𑀮𑁄𑀓𑀜𑁆𑀘 𑀤𑁂𑀲𑀜𑁆𑀘 𑀧𑀤𑀧𑀽𑀭𑀡𑀜𑁆𑀘 𑀉𑀧𑀸𑀤𑀸𑀬 𑀯𑀢𑁆𑀢𑀢𑀺, 𑀇𑀥 𑀧𑀦 𑀧𑀤𑀧𑀽𑀭𑀡𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀥𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑁄’’𑀢𑀺. 𑀲𑀁𑀳𑀦𑀦𑀁 𑀲𑀗𑁆𑀖𑀸𑀢𑁄, 𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀦𑀸𑀲’’𑀦𑁆𑀢𑀺 𑀇𑀫𑀺𑀦𑀸. 𑀲𑀓𑀼𑀦𑁆𑀢𑀓𑀲𑀤𑁆𑀤𑁄 𑀲𑀓𑀼𑀡𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀓𑀼𑀡𑀸’’𑀢𑀺. 𑀲𑀓𑀼𑀡𑀸𑀢𑀺 𑀘 𑀯𑀺𑀳𑀗𑁆𑀕𑀫𑀸. 𑀢𑁂 𑀳𑀺 𑀆𑀓𑀸𑀲𑁂 𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀓𑀼𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀁𑀓𑀲𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀲𑀁 𑀓𑀲𑁂 𑀅𑀘𑁆𑀙𑀦𑁂’’𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀲𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀢𑁆𑀢𑀸 𑀲𑀁𑀧𑀼𑀩𑁆𑀩𑁄 𑀓𑀲𑁂𑀥𑀸𑀢𑀼 𑀅𑀘𑁆𑀙𑀦𑀢𑁆𑀣𑁄𑀢𑀺 𑀆𑀳 ‘‘𑀯𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀏𑀓𑀸𑀭𑀦𑁆𑀢𑁄𑀬𑀁 𑀥𑀸𑀢𑀼. 𑀦𑀺𑀩𑀤𑁆𑀥𑀯𑀸𑀲𑀦𑁆𑀢𑀺 𑀦𑀺𑀘𑁆𑀘𑀯𑀸𑀲𑀁. 𑀯𑀲𑁆𑀲𑀸𑀦𑀦𑀸𑀫𑀓𑁂𑀢𑀺 𑀯𑀲𑁆𑀲𑀸𑀦𑀉𑀢𑀼𑀦𑀸𑀫𑀓𑁂. 𑀯𑀲𑁆𑀲𑀸𑀦𑀲𑁆𑀲 𑀘𑀢𑀼𑀫𑀸𑀲𑀢𑁆𑀢𑀸 ‘‘𑀢𑁂𑀫𑀸𑀲𑁂’’𑀢𑀺 𑀯𑀼𑀢𑁆𑀢𑀁. 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀏𑀢𑁆𑀣 𑀦𑀻𑀥𑀸𑀢𑀼 𑀕𑀫𑀦𑀢𑁆𑀣𑁄𑀢𑀺 𑀆𑀳 ‘‘𑀯𑀲𑁆𑀲𑀽𑀧𑀕𑀫𑀦𑀸𑀦𑀻’’𑀢𑀺. 𑀅𑀧𑀭𑀚𑁆𑀚𑀽𑀢𑀺 𑀧𑀼𑀡𑁆𑀡𑀫𑀺𑀢𑁄 𑀅𑀧𑀭𑀁 𑀅𑀳𑀦𑁆𑀢𑀺 𑀅𑀧𑀭𑀚𑁆𑀚𑀼, 𑀅𑀳𑀢𑁆𑀣𑁂 𑀚𑁆𑀚𑀼𑀧𑀘𑁆𑀘𑀬𑁄, 𑀅𑀢𑁆𑀣𑀢𑁄 𑀧𑀸𑀝𑀺𑀧𑀤𑀤𑀺𑀯𑀲𑁄. 𑀅𑀬𑀁 𑀅𑀧𑀭𑀚𑁆𑀚𑀼𑀲𑀤𑁆𑀤𑁄 𑀧𑀞𑀫𑀦𑁆𑀢𑀦𑀺𑀧𑀸𑀢𑁄. 𑀅𑀲𑁆𑀲𑀸𑀢𑀺 𑀆𑀲𑀴𑁆𑀳𑀻𑀧𑀼𑀡𑁆𑀡𑀫𑀺𑀬𑀸. 𑀅𑀲𑀫𑀸𑀦𑀸𑀥𑀺𑀓𑀭𑀡𑀯𑀺𑀲𑀬𑁄 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀬𑀁, 𑀅𑀢𑀺𑀓𑁆𑀓𑀦𑁆𑀢𑀸𑀬 𑀲𑀢𑀺𑀬𑀸𑀢𑀺 𑀬𑁄𑀚𑀦𑀸. 𑀅𑀧𑀭𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀧𑀸𑀝𑀺𑀧𑀤𑀤𑀺𑀯𑀲𑁂. 𑀅𑀲𑁆𑀲𑀸𑀢𑀺 𑀲𑀸𑀯𑀡𑀫𑀸𑀲𑀧𑀼𑀡𑁆𑀡𑀫𑀺𑀬𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘 𑀅𑀧𑀭𑀚𑁆𑀚𑀼𑀕𑀢𑀸, 𑀬𑀲𑁆𑀫𑀸 𑀘 𑀫𑀸𑀲𑀕𑀢𑀸, 𑀢𑀲𑁆𑀫𑀸. ‘‘𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂’’𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀴𑁆𑀳𑀺𑀬𑀸 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀼𑀭𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀆𑀲𑀴𑁆𑀳𑀺𑀬𑀸𑀢𑀺 𑀆𑀲𑀴𑁆𑀳𑀻𑀧𑀼𑀡𑁆𑀡𑀫𑀺𑀬𑀸. 𑀧𑀘𑁆𑀙𑀺𑀫𑀦𑀬𑁂𑀧𑀺 𑀫𑀸𑀲𑀕𑀢𑀸𑀬 𑀆𑀲𑀴𑁆𑀳𑀺𑀬𑀸 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀘𑁆𑀙𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀲𑀴𑁆𑀳𑀺𑀬𑀸𑀢𑀺 𑀆𑀲𑀴𑁆𑀳𑀻𑀧𑀼𑀡𑁆𑀡𑀫𑀺𑀬𑀸 𑀲𑀫𑀻𑀧𑁂 𑀧𑀯𑀢𑁆𑀢𑀢𑁆𑀢𑀸 𑀆𑀲𑀴𑁆𑀳𑀻𑀲𑀗𑁆𑀔𑀸𑀢𑀸𑀬 𑀲𑀸𑀯𑀡𑀧𑀼𑀡𑁆𑀡𑀫𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀸𑀝𑀺𑀧𑀤𑀤𑀺𑀯𑀲𑁂𑀬𑁂𑀯 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀓𑀺𑀁 𑀯𑀸𑀢𑀺𑀆𑀤𑀻𑀲𑀼 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄. 𑀦𑀺𑀘𑁆𑀙𑀸𑀭𑁂𑀢𑁆𑀯𑀸𑀢𑀺 𑀦𑀺𑀘𑁆𑀘𑀸𑀭𑁂𑀢𑁆𑀯𑀸, 𑀉𑀘𑁆𑀘𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀨𑀼𑀝𑁆𑀞𑀓𑁆𑀔𑀭𑀲𑀜𑁆𑀜𑁄𑀕𑁂𑀳𑀺 𑀧𑀭𑁄 𑀓𑁆𑀯𑀘𑀺 𑀨𑀼𑀝𑁆𑀞𑀢𑁆𑀢𑀫𑀸𑀧𑀚𑁆𑀚𑀢𑀺 ‘‘𑀦𑀺𑀓𑁆𑀔𑀫𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀲𑁆𑀫𑀸 𑀧𑀭𑀲𑁆𑀲 𑀘𑀓𑀸𑀭𑀲𑁆𑀲 𑀙𑀓𑀸𑀭𑀁 𑀓𑀢𑁆𑀯𑀸 ‘‘𑀦𑀺𑀘𑁆𑀙𑀸𑀭𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑁧𑁦𑁮. 𑀯𑀲𑁆𑀲𑀸𑀦𑁂𑀘𑀸𑀭𑀺𑀓𑀸𑀧𑀝𑀺𑀓𑁆𑀔𑁂𑀧𑀸𑀤𑀺𑀓𑀣𑀸

𑁧𑁮𑁫. 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀦𑀧𑁂𑀓𑁆𑀔𑀕𑀫𑀦𑁂𑀦 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑁂 𑀲𑀸𑀧𑁂𑀓𑁆𑀔𑀕𑀫𑀦𑁂𑀦 𑀅𑀜𑁆𑀜𑀢𑁆𑀣 𑀅𑀭𑀼𑀡𑀼𑀝𑁆𑀞𑀸𑀧𑀦𑁂 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀳𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦 𑀯𑀺𑀳𑀸𑀭𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀯𑀺𑀳𑀸𑀭𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀢𑀁 𑀤𑀺𑀯𑀲𑀦𑁆𑀢𑀺 𑀢𑀲𑁆𑀫𑀺𑀁 𑀯𑀲𑁆𑀲𑀽𑀧𑀕𑀫𑀦𑀤𑀺𑀯𑀲𑁂. 𑀲𑀢𑀁 𑀆𑀧𑀢𑁆𑀢𑀺𑀬𑁄𑀢𑀺 𑀏𑀢𑁆𑀣 𑀲𑀢𑀦𑁆𑀢𑀺 𑀲𑀗𑁆𑀔𑁆𑀬𑀸𑀧𑀥𑀸𑀦𑀢𑁆𑀢𑀸 𑀏𑀓𑀯𑀘𑀦𑀦𑁆𑀢𑀺 𑀲𑀤𑁆𑀤𑀲𑀢𑁆𑀣𑁂𑀲𑀼 𑀯𑀼𑀢𑁆𑀢𑀁. 𑀏𑀓𑀸 𑀏𑀯 𑀆𑀧𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀺𑀳𑀸𑀭𑀲𑁆𑀲 𑀅𑀢𑀺𑀓𑁆𑀓𑀫𑀦𑁂𑀬𑁂𑀯 𑀏𑀓𑀸 𑀏𑀯 𑀆𑀧𑀢𑁆𑀢𑀺. 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀅𑀦𑀼𑀧𑀕𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀲𑁆𑀲𑀦𑀸𑀫𑁄 𑀇𑀫𑀲𑁆𑀲𑀢𑁆𑀣𑀻𑀢𑀺 𑀯𑀲𑁆𑀲𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀲𑁆𑀲𑀦𑀸𑀫𑀓’’𑀦𑁆𑀢𑀺. ‘‘𑀧𑀞𑀫𑀁 𑀫𑀸𑀲’’𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑀧𑀤𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀧𑀞𑀫𑀁 𑀫𑀸𑀲𑀦𑁆𑀢𑀺 𑀘𑀢𑀽𑀲𑀼 𑀯𑀲𑁆𑀲𑀫𑀸𑀲𑁂𑀲𑀼 𑀧𑀞𑀫𑀁 𑀫𑀸𑀲𑀁. 𑀉𑀓𑁆𑀓𑀟𑁆𑀠𑀺𑀢𑀼𑀓𑀸𑀫𑁄𑀢𑀺 𑀉𑀧𑀭𑀺 𑀓𑀟𑁆𑀠𑀺𑀢𑀼𑀓𑀸𑀫𑁄. 𑀆𑀲𑀴𑁆𑀳𑀻𑀫𑀸𑀲𑀫𑁂𑀯, 𑀦 𑀲𑀸𑀯𑀡𑀫𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀚𑀼𑀡𑁆𑀳𑀲𑀤𑁆𑀤𑁄 𑀘𑀦𑁆𑀤𑀧𑀪𑀸𑀬𑀼𑀢𑁆𑀢𑁄 𑀫𑀸𑀲𑁄𑀢𑀺 𑀆𑀳 ‘‘𑀫𑀸𑀲𑁂’’𑀢𑀺. 𑀘𑀦𑁆𑀤𑀧𑀪𑀸𑀬𑀼𑀢𑁆𑀢𑁄 𑀫𑀸𑀲𑁄𑀢𑀺 𑀆𑀳 ‘‘𑀫𑀸𑀲𑁂’’𑀢𑀺. 𑀘𑀦𑁆𑀤𑀧𑀪𑀸𑀬𑀼𑀢𑁆𑀢𑁄 𑀳𑀺 𑀫𑀸𑀲𑁄 𑀚𑁄𑀢𑀢𑀺 𑀤𑀺𑀧𑁆𑀧𑀢𑀻𑀢𑀺 𑀚𑀼𑀡𑁆𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 ‘‘𑀫𑀸𑀲𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀧𑀼𑀡𑁆𑀡𑀫𑀺𑀬𑀼𑀢𑁆𑀢𑁄 𑀫𑀸𑀲𑁄𑀯 𑀕𑀳𑁂𑀢𑀩𑁆𑀩𑁄. 𑀓𑀸𑀘𑀺 𑀧𑀭𑀺𑀳𑀸𑀦𑀺 𑀦𑀸𑀫𑀸𑀢𑀺 𑀓𑀺𑀜𑁆𑀘𑀺 𑀲𑀻𑀮𑀸𑀤𑀻𑀦𑀁 𑀳𑀸𑀬𑀦𑀁 𑀦𑀸𑀫. 𑀅𑀜𑁆𑀜𑀲𑁆𑀫𑀺𑀫𑁆𑀧𑀻𑀢𑀺 𑀯𑀲𑁆𑀲𑀽𑀧𑀕𑀫𑀦𑀢𑁄 𑀅𑀜𑁆𑀜𑀲𑁆𑀫𑀺𑀫𑁆𑀧𑀺. 𑀥𑀫𑁆𑀫𑀺𑀓𑁂𑀢𑀺 𑀥𑀫𑁆𑀫𑁂𑀦 𑀬𑀼𑀢𑁆𑀢𑁂.

𑁧𑁦𑁯. 𑀲𑀢𑁆𑀢𑀸𑀳𑀓𑀭𑀡𑀻𑀬𑀸𑀦𑀼𑀚𑀸𑀦𑀦𑀓𑀣𑀸

𑁧𑁮𑁭. 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦𑀸’’𑀢𑀺 𑀧𑀤𑀲𑁆𑀲 𑀲𑀢𑁆𑀢𑀫𑀻𑀲𑀫𑀸𑀲𑀜𑁆𑀘 𑀅𑀦𑀻𑀬𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀬𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣 ‘‘𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂’’𑀢𑀺 𑀇𑀫𑀺𑀦𑀸 𑀲𑀢𑁆𑀢𑀫𑀻𑀲𑀫𑀸𑀲𑀁 𑀤𑀲𑁆𑀲𑁂𑀢𑀺, ‘‘𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀓𑀫𑁆𑀫𑀢𑁆𑀣𑀁. ‘‘𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂’’𑀢𑀺 𑀇𑀫𑀺𑀦𑀸 𑀲𑀢𑁆𑀢𑀸𑀳𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀲𑀢𑁆𑀢𑀸𑀳𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑀁 𑀤𑀲𑁆𑀲𑁂𑀢𑀺. 𑀧𑀳𑀺𑀢𑁂 𑀕𑀦𑁆𑀢𑀼𑀦𑁆𑀢𑀺 𑀏𑀢𑁆𑀣 𑀧𑀳𑀺𑀢𑁂𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀆𑀤𑀻𑀳𑀺 𑀤𑀽𑀢𑁂’’𑀢𑀺. 𑀢𑀢𑁆𑀣 ‘‘𑀪𑀺𑀓𑁆𑀔𑀼𑀆𑀤𑀻𑀳𑀻’’𑀢𑀺 𑀇𑀫𑀺𑀦𑀸 𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀢𑀺, ‘‘𑀤𑀽𑀢𑁂’’𑀢𑀺 𑀇𑀫𑀺𑀦𑀸 𑀓𑀫𑁆𑀫𑀁. 𑀲𑀢𑁆𑀢𑀸𑀳𑀦𑁆𑀢𑀺 𑀏𑀢𑁆𑀣 𑀉𑀢𑁆𑀢𑀭𑀧𑀤𑀮𑁄𑀧𑀜𑁆𑀘 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑁄𑀲𑀢𑁆𑀢𑀸𑀳𑁂𑀬𑁂𑀯𑀸’’𑀢𑀺. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁 𑀧𑀳𑀺𑀢𑀝𑁆𑀞𑀸𑀦𑁂𑀬𑁂𑀯. ‘‘𑀦 𑀉𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 ‘‘𑀲𑀢𑁆𑀢𑀸𑀳𑁂𑀬𑁂𑀯𑀸’’𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑀲𑁆𑀲 𑀨𑀮𑀁 𑀤𑀲𑁆𑀲𑁂𑀢𑀺.

𑁧𑁮𑁯. 𑀭𑀲𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀭𑀲𑀯𑀢𑀻𑀢𑀺 𑀯𑀼𑀢𑁆𑀢𑁂 𑀪𑀢𑁆𑀢𑀕𑁂𑀳𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀪𑀢𑁆𑀢𑀕𑁂𑀳𑀁 𑀯𑀼𑀘𑁆𑀘𑀢𑀻’’𑀢𑀺. 𑀪𑀢𑁆𑀢𑀕𑁂𑀳𑀦𑁆𑀢𑀺 𑀪𑀢𑁆𑀢𑀧𑀘𑀦𑀕𑁂𑀳𑀁. 𑀧𑀼𑀭𑀸𑀬𑀁 𑀲𑀼𑀢𑁆𑀢𑀦𑁆𑀢𑁄𑀢𑀺 𑀏𑀢𑁆𑀣 𑀧𑀼𑀭𑀸 𑀅𑀬𑀦𑁆𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀧𑀼𑀭𑀸𑀲𑀤𑁆𑀤𑁄 𑀬𑀸𑀯𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀬𑀸𑀯 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄’’𑀢𑀺. 𑀦 𑀧𑀮𑀼𑀚𑁆𑀚𑀢𑀻𑀢𑀺 𑀏𑀢𑁆𑀣 𑀮𑀼𑀚𑀥𑀸𑀢𑀼 𑀯𑀺𑀦𑀸𑀲𑀢𑁆𑀣𑁄𑀢𑀺 𑀆𑀳 ‘‘𑀦 𑀯𑀺𑀦𑀲𑁆𑀲𑀢𑀻’’𑀢𑀺. 𑀧𑀭𑀺𑀲𑀗𑁆𑀔𑀢𑀦𑁆𑀢𑀺 𑀧𑀭𑀺𑀲𑀗𑁆𑀔𑀭𑀺𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀳𑀺𑀢𑁂𑀲𑀼. 𑀇𑀫𑀺𑀦𑀸𑀯 𑀓𑀧𑁆𑀧𑀺𑀬𑀯𑀘𑀦𑁂𑀦𑀸𑀢𑀺 𑀇𑀫𑀺𑀦𑀸 𑀏𑀯 𑀓𑀧𑁆𑀧𑀺𑀬𑁂𑀦 𑀢𑀺𑀯𑀸𑀓𑁆𑀬𑀲𑀗𑁆𑀔𑀸𑀢𑁂𑀦 𑀯𑀘𑀦𑁂𑀦. 𑀏𑀢𑁂𑀲𑀦𑁆𑀢𑀺 𑀏𑀢𑁂𑀲𑀁 𑀢𑀺𑀡𑁆𑀡𑀁 𑀯𑀸𑀓𑁆𑀬𑀸𑀦𑀁. 𑀯𑁂𑀯𑀘𑀦𑁂𑀦𑀸𑀢𑀺 ‘‘𑀬𑀜𑁆𑀜𑀜𑁆𑀘 𑀬𑀚𑀺𑀢𑀼𑀁, 𑀲𑀼𑀢𑁆𑀢𑀜𑁆𑀘 𑀉𑀕𑁆𑀕𑀡𑁆𑀳𑀺𑀢𑀼𑀁, 𑀲𑀫𑀡𑁂 𑀘 𑀤𑀲𑁆𑀲𑀺𑀢𑀼’’𑀦𑁆𑀢𑀺 𑀧𑀭𑀺𑀬𑀸𑀬𑁂𑀦. 𑀲𑀢𑁆𑀢𑀲𑀽𑀢𑀺 𑀉𑀧𑀸𑀲𑀓 𑀉𑀧𑀸𑀲𑀺𑀓 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦 𑀲𑀸𑀫𑀡𑁂𑀭 𑀲𑀸𑀫𑀡𑁂𑀭𑀻 𑀲𑀗𑁆𑀔𑀸𑀢𑀸𑀲𑀼 𑀲𑀢𑁆𑀢𑀲𑀼.

𑁧𑁧𑁦. 𑀧𑀜𑁆𑀘𑀦𑁆𑀦𑀁 𑀅𑀧𑁆𑀧𑀳𑀺𑀢𑁂𑀧𑀺 𑀅𑀦𑀼𑀚𑀸𑀦𑀦𑀓𑀣𑀸

𑁧𑁯𑁩. 𑀧𑀕𑁂𑀯 𑀧𑀳𑀺𑀢𑁂𑀢𑀺 𑀇𑀫𑀺𑀦𑀸 ‘‘𑀅𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀲𑀫𑁆𑀪𑀸𑀯𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑀩𑁆𑀩𑀪𑀸𑀯𑀲𑁆𑀲 𑀓𑀸𑀭𑀡𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀻’’𑀢𑀺𑀆𑀤𑀺. 𑀤𑀲𑀳𑀻𑀢𑀺 ‘‘𑀲𑀗𑁆𑀖𑁄 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀢𑀁 𑀯𑀸 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀳𑁄𑀢𑀻’’𑀢𑀺 𑀇𑀤𑀁 𑀅𑀗𑁆𑀕𑀁 𑀏𑀓𑀁 𑀓𑀢𑁆𑀯𑀸 𑀤𑀲𑀳𑀺. 𑀦𑀯𑀳𑀻𑀢𑀺 𑀧𑀭𑀺𑀯𑀸𑀲𑀸𑀭𑀳𑀁 𑀅𑀧𑀦𑁂𑀢𑁆𑀯𑀸 𑀦𑀯𑀳𑀺. 𑀘𑀢𑀽𑀳𑀻𑀢𑀺 𑀕𑀺𑀮𑀸𑀦𑀅𑀦𑀪𑀺𑀭𑀢𑀺𑀓𑀼𑀓𑁆𑀓𑀼𑀘𑁆𑀘𑀤𑀺𑀝𑁆𑀞𑀺𑀕𑀢𑀉𑀧𑁆𑀧𑀦𑁆𑀦𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺. 𑀇𑀢𑀺 𑀇𑀫𑁂𑀳𑀺 𑀙𑀳𑀻𑀢𑀺 𑀬𑁄𑀚𑀦𑀸. 𑀲𑀸𑀫𑀡𑁂𑀭𑀲𑁆𑀲𑀧𑀺 𑀙𑀳𑀻𑀢𑀺 𑀏𑀢𑁆𑀣 𑀙𑀦𑁆𑀦𑀁 𑀲𑀭𑀽𑀧𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀤𑀺𑀢𑁄’’𑀢𑀺𑀆𑀤𑀺. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀲𑀸𑀫𑀡𑁂𑀭𑀺𑀬𑀸 𑀲𑀦𑁆𑀢𑀺𑀓𑀁 𑀧𑀜𑁆𑀘𑀳𑀺 𑀕𑀦𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀸, 𑀧𑀭𑀲𑁆𑀫𑀺𑀁 𑀯𑀸. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀜𑀸𑀢𑀓𑀸 𑀯𑀸 𑀬𑁂 𑀅𑀜𑁆𑀜𑀸𑀢𑀓𑀸 𑀯𑀸 𑀅𑀢𑁆𑀣𑀺, 𑀢𑁂𑀲𑀫𑁆𑀧𑀻𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀯𑀘𑀦𑀁.

𑁧𑁧𑁨. 𑀧𑀳𑀺𑀢𑁂𑀬𑁂𑀯𑀅𑀦𑀼𑀚𑀸𑀦𑀦𑀓𑀣𑀸

𑁧𑁯𑁯. 𑀪𑀺𑀓𑁆𑀔𑀼𑀕𑀢𑀺𑀓𑁄𑀢𑀺 𑀪𑀺𑀓𑁆𑀔𑀼 𑀏𑀯 𑀕𑀢𑀺 𑀧𑀢𑀺𑀝𑁆𑀞𑀸 𑀏𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀕𑀢𑀺𑀓𑁄𑀢𑀺 𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀦𑀺𑀲𑁆𑀲𑀺𑀢𑀓𑁄 𑀧𑀼𑀭𑀺𑀲𑁄𑀢𑀺 𑀆𑀳 ‘‘𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀦𑀓𑀧𑀼𑀭𑀺𑀲𑁄’’𑀢𑀺. 𑀧𑀮𑀼𑀚𑁆𑀚𑀢𑀻𑀢𑀺 𑀯𑀺𑀦𑀲𑁆𑀲𑀢𑀺. 𑀪𑀡𑁆𑀟𑀁 𑀙𑁂𑀤𑀸𑀧𑀺𑀢𑀦𑁆𑀢𑀺 𑀏𑀢𑁆𑀣 𑀪𑀡𑁆𑀟𑀲𑀤𑁆𑀤𑁄 𑀧𑀭𑀺𑀓𑁆𑀔𑀸𑀭𑀢𑁆𑀣𑁄 𑀏𑀯, 𑀦 𑀫𑀽𑀮𑀥𑀦𑀢𑁆𑀣𑁄𑀢𑀺 𑀆𑀳 ‘‘𑀤𑀩𑁆𑀩𑀲𑀫𑁆𑀪𑀸𑀭𑀪𑀡𑁆𑀟’’𑀦𑁆𑀢𑀺. 𑀙𑁂𑀤𑀸𑀧𑀺𑀢𑀦𑁆𑀢𑀺 𑀘𑀼𑀭𑀸𑀤𑀺𑀕𑀡𑀺𑀓𑀥𑀸𑀢𑀼𑀁 ‘‘𑀙𑀺𑀦𑁆𑀤𑀸𑀧𑀺𑀢’’𑀦𑁆𑀢𑀺 𑀭𑀼𑀥𑀸𑀤𑀺𑀕𑀡𑀺𑀓𑀥𑀸𑀢𑀼𑀬𑀸 𑀯𑀡𑁆𑀡𑁂𑀢𑀺. 𑀤𑀚𑁆𑀚𑀸𑀳𑀦𑁆𑀢𑀺 𑀏𑀓𑀸𑀭𑀮𑁄𑀧𑀲𑀦𑁆𑀥𑀻𑀢𑀺 𑀆𑀳 ‘‘𑀤𑀚𑁆𑀚𑁂 𑀅𑀳’’𑀦𑁆𑀢𑀺. ‘‘𑀤𑀚𑁆𑀚𑁂𑀳’’𑀦𑁆𑀢𑀺𑀧𑀺 𑀧𑀸𑀞𑁄. 𑀏𑀯𑀜𑁆𑀳𑀺 𑀲𑀢𑀺 𑀅𑀓𑀸𑀭𑀮𑁄𑀧𑀲𑀦𑁆𑀥𑀺. 𑀤𑀚𑁆𑀚𑁂𑀢𑀺 𑀤𑀤𑁂𑀬𑁆𑀬𑀁, 𑀤𑀤𑀸𑀫𑀺 𑀯𑀸. 𑀲𑀗𑁆𑀖𑀓𑀭𑀡𑀻𑀬𑁂𑀦𑀸𑀢𑀺 𑀲𑀗𑁆𑀖𑀲𑁆𑀲 𑀓𑀸𑀢𑀩𑁆𑀩𑁂𑀦 𑀓𑀺𑀘𑁆𑀘𑁂𑀦. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁𑀓𑀺𑀜𑁆𑀘𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀘𑁂𑀢𑀺𑀬𑀙𑀢𑁆𑀢𑀯𑁂𑀤𑀺𑀓𑀸𑀤𑀻𑀲𑀽𑀢𑀺 𑀘𑁂𑀢𑀺𑀬𑀲𑁆𑀲 𑀙𑀢𑁆𑀢𑁂 𑀘 𑀯𑁂𑀤𑀺𑀓𑀸𑀬 𑀘. 𑀆𑀤𑀺𑀲𑀤𑁆𑀤𑁂𑀦 𑀲𑀼𑀥𑀸𑀮𑀺𑀫𑁆𑀧𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲𑀸𑀢𑀺 𑀲𑀗𑁆𑀖𑀓𑀭𑀡𑀻𑀬𑀲𑁆𑀲. 𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁆𑀣𑀸𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂. ‘‘𑀅𑀦𑀺𑀫𑀦𑁆𑀢𑀺𑀢𑁂𑀦𑀸’’𑀢𑀺 𑀧𑀤𑀁 ‘‘𑀕𑀦𑁆𑀢𑀼’’𑀦𑁆𑀢𑀺 𑀧𑀤𑁂 𑀪𑀸𑀯𑀓𑀢𑁆𑀢𑀸. 𑀕𑀦𑁆𑀢𑀼𑀦𑁆𑀢𑀺 𑀕𑀫𑀺𑀢𑀼𑀁, 𑀕𑀫𑀦𑀁 𑀯𑀸 ‘‘𑀦 𑀯𑀝𑁆𑀝𑀢𑀻’’𑀢𑀺 𑀧𑀤𑁂 𑀓𑀢𑁆𑀢𑀸. 𑀧𑀞𑀫𑀁𑀬𑁂𑀯𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀢𑁄 𑀧𑀞𑀫𑀫𑁂𑀯. 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁 𑀇𑀢𑀺 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀪𑀡𑁆𑀟𑀓𑀦𑁆𑀢𑀺 𑀘𑀻𑀯𑀭𑀸𑀤𑀺𑀪𑀡𑁆𑀟𑀓𑀁. 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀬𑀫𑁂𑀯 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑀁 𑀯𑀺𑀳𑀸𑀭𑀁. ‘‘𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀯𑀲𑁆𑀲𑀘𑁆𑀙𑁂𑀤𑁄 𑀘 𑀆𑀧𑀢𑁆𑀢𑀺 𑀘 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀸𑀬𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 ‘‘𑀪𑀡𑁆𑀟𑀓𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀣𑀁 𑀅𑀧𑁂𑀓𑁆𑀔𑀢𑀺. 𑀦𑀦𑁆𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀁. 𑀯𑀝𑁆𑀝𑀢𑀻𑀢𑀺 𑀆𑀘𑀭𑀺𑀬𑀲𑁆𑀲 𑀆𑀡𑀸𑀬 𑀲𑀢𑁆𑀢𑀸𑀳𑁂 𑀅𑀦𑀢𑀺𑀓𑁆𑀓𑀦𑁆𑀢𑁂 𑀯𑀝𑁆𑀝𑀢𑀺, 𑀯𑀲𑁆𑀲𑀘𑁆𑀙𑁂𑀤𑁄 𑀘 𑀆𑀧𑀢𑁆𑀢𑀺 𑀘 𑀦 𑀳𑁄𑀢𑀺. 𑀲𑀢𑁆𑀢𑀸𑀳𑁂 𑀅𑀢𑀺𑀓𑁆𑀓𑀦𑁆𑀢𑁂 𑀯𑀲𑁆𑀲𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀦 𑀆𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁩. 𑀅𑀦𑁆𑀢𑀭𑀸𑀬𑁂 𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀓𑀣𑀸

𑁨𑁦𑁧. 𑀅𑀯𑀺𑀤𑀽𑀭𑁂𑀢𑀺 𑀆𑀲𑀦𑁆𑀦𑁂. 𑀢𑀢𑁆𑀣𑀸𑀢𑀺 𑀕𑀸𑀫𑁂. 𑀲𑀢𑁆𑀢𑀸𑀳𑀯𑀸𑀭𑁂𑀦𑀸𑀢𑀺 𑀲𑀢𑁆𑀢𑀸𑀳𑁂 𑀏𑀓𑀯𑀸𑀭𑁂𑀦. 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀯𑀺𑀳𑀸𑀭𑁂 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄. 𑀢𑀢𑁆𑀭𑁂𑀯𑀸𑀢𑀺 𑀕𑀸𑀫𑁂𑀬𑁂𑀯. 𑀫𑀬𑀦𑁆𑀢𑀺 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀼𑀦 𑀫𑀬𑀦𑁆𑀢𑀺 𑀫𑀦𑀼𑀲𑁆𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀲𑀁𑀬𑁂𑀯𑀸𑀢𑀺 𑀯𑀲𑁆𑀲𑀘𑁆𑀙𑁂𑀤𑀪𑀺𑀓𑁆𑀔𑀽𑀦𑀁 𑀏𑀯. 𑀢𑀦𑁆𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀺𑀁. 𑀯𑀲𑁆𑀲𑀕𑁆𑀕𑁂𑀦𑀸𑀢𑀺 𑀯𑀲𑁆𑀲𑀕𑀡𑀦𑀸𑀬.

𑀯𑀲𑁆𑀲𑀸𑀯𑀸𑀲𑀺𑀓𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀸𑀦𑀁 𑀤𑀸𑀢𑀩𑁆𑀩𑀁 𑀘𑀻𑀯𑀭𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂. 𑀬𑁂𑀲𑀁 𑀧𑀸𑀧𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀳𑀸𑀭𑁂𑀢𑀺 𑀯𑀼𑀝𑁆𑀞𑀺𑀢𑀕𑀸𑀫𑀯𑀺𑀳𑀸𑀭𑁂. 𑀉𑀧𑀦𑀺𑀓𑁆𑀔𑀺𑀢𑁆𑀢𑀓𑀁 𑀪𑀡𑁆𑀟𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀢𑀺 𑀪𑀺𑀓𑁆𑀔𑀼𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂. 𑀬𑀁 𑀘𑀻𑀯𑀭𑀸𑀤𑀺𑀯𑁂𑀪𑀗𑁆𑀕𑀺𑀬𑀪𑀡𑁆𑀟𑀁 𑀅𑀢𑁆𑀣𑀺, 𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑁂𑀯𑀸𑀢𑀺 𑀯𑀼𑀝𑁆𑀞𑀺𑀢𑀕𑀸𑀫𑀯𑀺𑀳𑀸𑀭𑁂 𑀏𑀯. 𑀇𑀢𑁄𑀢𑀺 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀢𑁄. 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀳𑀢𑁆𑀣𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀭𑀼𑀧𑁆𑀧𑀸𑀤𑁂𑀧𑀻𑀢𑀺 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀤𑀺𑀦𑁆𑀦𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀢𑁄 𑀉𑀧𑁆𑀧𑀸𑀤𑁂 𑀧𑀘𑁆𑀘𑀬𑁂𑀧𑀺. ‘‘𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀅𑀧𑀮𑁄𑀓𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀲𑁆𑀲 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀖𑀺𑀓𑀜𑁆𑀳𑀻’’𑀢𑀺𑀆𑀤𑀺. 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀸𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀯𑀸. 𑀉𑀪𑀬𑀢𑁆𑀣𑀸𑀢𑀺 𑀅𑀦𑁆𑀢𑁄𑀲𑀻𑀫𑀩𑀳𑀺𑀲𑀻𑀫 𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀞𑀺𑀢𑀁 𑀯𑁂𑀪𑀗𑁆𑀕𑀺𑀬𑀪𑀡𑁆𑀟𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁪. 𑀲𑀗𑁆𑀖𑀪𑁂𑀤𑁂 𑀅𑀦𑀸𑀧𑀢𑁆𑀢𑀺𑀯𑀲𑁆𑀲𑀘𑁆𑀙𑁂𑀤𑀓𑀣𑀸

𑁨𑁦𑁨. 𑀪𑀺𑀦𑁆𑀦𑁄𑀢𑀺 𑀏𑀢𑁆𑀣 𑀢𑀧𑀘𑁆𑀘𑀬𑀲𑁆𑀲 𑀅𑀢𑀻𑀢𑀢𑁆𑀣𑁂 𑀅𑀬𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀦𑁆𑀦𑁂 𑀲𑀗𑁆𑀖𑁂 𑀓𑀭𑀡𑀻𑀬𑀁 𑀦𑀢𑁆𑀣𑀻’’𑀢𑀺. 𑀬𑁄 𑀧𑀦𑀸𑀢𑀺 𑀲𑀗𑁆𑀖𑁄 𑀧𑀦. 𑀇𑀤𑀁 ‘‘𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺𑀧𑀤𑁂 𑀓𑀢𑁆𑀢𑀸, ‘‘𑀆𑀲𑀗𑁆𑀓𑀺𑀢𑁄’’𑀢𑀺𑀧𑀤𑁂 𑀓𑀫𑁆𑀫𑀁. ‘‘𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀪𑀺𑀦𑁆𑀦𑁄𑀢𑀺 𑀏𑀢𑁆𑀣 𑀢𑀧𑀘𑁆𑀘𑀬𑀲𑁆𑀲 𑀅𑀦𑀸𑀕𑀢𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄𑀢𑀺 𑀏𑀢𑁆𑀣 𑀓𑀺𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄𑀢𑀺 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀦 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄𑀢𑀺 𑀤𑀝𑁆𑀞𑀩𑁆𑀩𑁄’’𑀢𑀺. 𑀏𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀪𑀺𑀦𑁆𑀦𑀪𑀸𑀯𑀁. 𑀏𑀢𑀸 𑀧𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀧𑀦. 𑀢𑀦𑁆𑀢𑀺 𑀲𑀗𑁆𑀖𑀁. 𑀏𑀢𑀦𑁆𑀢𑀺 ‘‘𑀲𑀫𑁆𑀩𑀳𑀼𑀮𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀖𑁄 𑀪𑀺𑀦𑁆𑀦𑁄’’𑀢𑀺 𑀯𑀘𑀦𑀁.

𑁧𑁧𑁫. 𑀯𑀚𑀸𑀤𑀻𑀲𑀼 𑀯𑀲𑁆𑀲𑀽𑀧𑀕𑀫𑀦𑀓𑀣𑀸

𑁨𑁦𑁩. ‘‘𑀕𑁄𑀧𑀸𑀮𑀓𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀕𑁄𑀧𑀸𑀮𑀓𑀸 𑀕𑀸𑀯𑁄 𑀯𑀺𑀬 𑀯𑀚𑁂 𑀦𑀺𑀯𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀉𑀧𑀓𑀝𑁆𑀞𑀲𑀤𑁆𑀤𑁄 𑀆𑀲𑀦𑁆𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀆𑀲𑀦𑁆𑀦𑀸𑀬𑀸’’𑀢𑀺. 𑀢𑀢𑁆𑀣𑀸𑀢𑀺 𑀓𑀼𑀝𑀺𑀓𑀸𑀬𑀁. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀓𑀼𑀝𑀺𑀓𑀸𑀬𑀁. 𑀅𑀯𑀺𑀳𑀸𑀭𑀢𑁆𑀢𑀸 ‘‘𑀇𑀥𑀸𑀢𑀺’’𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀳𑀺 ‘‘𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁮𑁪) 𑀯𑀼𑀢𑁆𑀢𑀢𑁆𑀢𑀸 𑀲𑀓𑀺𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀫𑁆𑀧𑀻𑀢𑀺 𑀲𑀸𑀮𑀸𑀲𑀗𑁆𑀔𑁂𑀧𑁂𑀦 𑀞𑀺𑀢𑀲𑀓𑀝𑀫𑁆𑀧𑀺. ‘‘𑀆𑀮𑀬𑁄’’𑀢𑀺 𑀇𑀫𑀺𑀦𑀸 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀯𑀘𑀻𑀪𑁂𑀤𑁄 𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀆𑀮𑀬𑁄𑀢𑀺 𑀘 𑀲𑀢𑁆𑀣𑁂 ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀲𑁆𑀲 𑀅𑀮𑁆𑀮𑀻𑀬𑀦𑀁. 𑀫𑀕𑁆𑀕𑀧𑀝𑀺𑀧𑀦𑁆𑀦𑁂𑀬𑁂𑀯 𑀲𑀢𑁆𑀣𑁂𑀢𑀺 𑀅𑀦𑀸𑀤𑀭𑁂 𑀪𑀼𑀫𑁆𑀫𑀯𑀘𑀦𑀁. 𑀢𑀢𑁆𑀣𑁂𑀯𑀸𑀢𑀺 𑀲𑀢𑁆𑀣𑁂𑀬𑁂𑀯. 𑀲𑀢𑁆𑀣𑁄 𑀅𑀢𑀺𑀓𑁆𑀓𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀧𑀢𑁆𑀣𑀺𑀢𑀝𑁆𑀞𑀸𑀦𑁂. 𑀯𑀺𑀧𑁆𑀧𑀓𑀺𑀭𑀢𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀘𑁆𑀙𑀢𑀺. 𑀲𑀘𑁂 𑀅𑀕𑀸𑀫𑀓𑁂 𑀞𑀸𑀦𑁂 𑀯𑀺𑀧𑁆𑀧𑀓𑀺𑀭𑀢𑀺, 𑀧𑀼𑀭𑀺𑀫𑀁 𑀕𑀸𑀫𑀁 𑀲𑀦𑁆𑀦𑀺𑀯𑀢𑁆𑀢𑀺𑀢𑀩𑁆𑀩𑀁. 𑀦 𑀅𑀜𑁆𑀜𑀕𑀸𑀫𑀁 𑀕𑀦𑁆𑀢𑀩𑁆𑀩𑀁. 𑀢𑀢𑁄𑀢𑀺 𑀕𑀸𑀫𑀢𑁄.

𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀉𑀧𑀕𑀦𑁆𑀢𑀩𑁆𑀩𑀁. 𑀢𑀢𑁆𑀣𑁂𑀯𑀸𑀢𑀺 𑀲𑀫𑀼𑀤𑁆𑀤𑁂𑀬𑁂𑀯. 𑀓𑀽𑀮𑀦𑁆𑀢𑀺 𑀢𑀻𑀭𑀁. 𑀢𑀜𑁆𑀳𑀺 𑀓𑀼𑀮𑀢𑀺 𑀉𑀤𑀓𑀁 𑀆𑀯𑀭𑀢𑀻𑀢𑀺 𑀓𑀽𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀜𑁆𑀘𑀸𑀢𑀺 𑀦𑀸𑀯𑀸𑀬𑀁 𑀯𑀲𑁆𑀲𑀽𑀧𑀕𑀫𑀦𑀪𑀺𑀓𑁆𑀔𑀼. 𑀅𑀦𑀼𑀢𑀻𑀭𑀫𑁂𑀯𑀸𑀢𑀺 𑀅𑀦𑀼𑀓𑁆𑀓𑀫𑁂𑀦, 𑀅𑀦𑀼𑀲𑀸𑀭𑁂𑀦 𑀯𑀸 𑀢𑀻𑀭𑀫𑁂𑀯. 𑀅𑀜𑁆𑀜𑀢𑁆𑀣𑀸𑀢𑀺 𑀧𑀞𑀫𑀮𑀤𑁆𑀥𑀕𑀸𑀫𑀢𑁄 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂. 𑀢𑀢𑁆𑀣𑁂𑀯𑀸𑀢𑀺 𑀧𑀞𑀫𑀮𑀤𑁆𑀥𑀕𑀸𑀫𑁂𑀬𑁂𑀯.

𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀧𑀯𑀸𑀭𑁂𑀢𑀼𑀜𑁆𑀘 𑀮𑀪𑀢𑀻𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀯𑀸𑀓𑁆𑀬𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀧𑀼𑀭𑀺𑀫𑁂𑀲𑀼 𑀘 𑀧𑀦𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄, 𑀧𑀦𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄. 𑀅𑀦𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀳𑁄𑀢𑀺.

𑁧𑁧𑁬. 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀓𑀣𑀸

𑁨𑁦𑁪. 𑀭𑀼𑀓𑁆𑀔𑀲𑀼𑀲𑀻𑀭𑁂𑀬𑁂𑀯𑀸𑀢𑀺 𑀭𑀼𑀓𑁆𑀔𑀲𑁆𑀲 𑀯𑀺𑀯𑀭𑁂 𑀏𑀯. 𑀯𑀺𑀯𑀭𑀜𑁆𑀳𑀺 𑀲𑀼 𑀲𑀁 𑀇𑀭𑀢𑀺 𑀕𑀘𑁆𑀙𑀢𑀻𑀢𑀺 𑀲𑀼𑀲𑀻𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀤𑀭𑀘𑁆𑀙𑀤𑀦𑀦𑁆𑀢𑀺 𑀨𑀮𑀓𑁂𑀳𑀺 𑀙𑀸𑀤𑀺𑀢𑀁. 𑀧𑀯𑀺𑀲𑀦𑀤𑁆𑀯𑀸𑀭𑀦𑁆𑀢𑀺 𑀧𑀯𑀺𑀲𑀦𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀁. 𑀧𑀯𑀺𑀲𑀦𑀜𑁆𑀘 𑀦𑀺𑀓𑁆𑀔𑀫𑀦𑀜𑁆𑀘 𑀧𑀯𑀺𑀲𑀦𑀦𑁆𑀢𑀺 𑀯𑀺𑀭𑀽𑀧𑁂𑀓𑀲𑁂𑀲𑁂𑀦 𑀓𑀸𑀢𑀩𑁆𑀩𑀁. 𑀔𑀸𑀡𑀼𑀫𑀢𑁆𑀣𑀓𑁂𑀢𑀺 𑀔𑀸𑀡𑀼𑀦𑁄 𑀉𑀧𑀭𑀺. 𑀯𑀺𑀝𑀪𑀻𑀢𑀺 𑀯𑀺𑀝𑀁 𑀅𑀜𑁆𑀜𑀫𑀜𑁆𑀜𑀯𑁂𑀥𑀦𑀁 𑀅𑀧𑀢𑀺 𑀕𑀘𑁆𑀙𑀢𑀻𑀢𑀺 𑀯𑀺𑀝𑀧𑁄, 𑀧𑀓𑀸𑀭𑀲𑁆𑀲 𑀪𑀓𑀸𑀭𑀁, 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓𑀈𑀧𑀘𑁆𑀘𑀬𑀜𑁆𑀘 𑀓𑀢𑁆𑀯𑀸 𑀯𑀺𑀝𑀪𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣𑀸𑀢𑀺 𑀅𑀝𑁆𑀝𑀓𑁂. 𑀬𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄, 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀇𑀝𑁆𑀞𑀓𑀸𑀲𑀺𑀮𑀸𑀲𑀼𑀥𑀸𑀲𑀗𑁆𑀔𑀸𑀢𑀸𑀦𑀁 (𑀘𑀽𑀴𑀯. 𑁩𑁦𑁩) 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁. 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀧𑀤𑀭𑀘𑁆𑀙𑀤𑀦𑀸𑀤𑀻𑀦𑀫𑁆𑀧𑀺 𑀕𑀳𑀺𑀢𑀢𑁆𑀢𑀸. 𑀤𑁆𑀯𑀸𑀭𑀩𑀦𑁆𑀥𑀦𑀦𑁆𑀢𑀺 𑀤𑁆𑀯𑀸𑀭𑁂𑀦 𑀩𑀦𑁆𑀥𑀺𑀢𑀩𑁆𑀩𑀁. 𑀙𑀯𑀓𑀼𑀝𑀺𑀓𑀸𑀢𑀺 𑀙𑀯𑀸𑀦𑀁 𑀲𑀬𑀦𑀝𑁆𑀞𑀸𑀦𑁂 𑀲𑀼𑀲𑀸𑀦𑁂 𑀓𑀢𑀸 𑀓𑀼𑀝𑀺𑀓𑀸 𑀙𑀯𑀓𑀼𑀝𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀝𑀗𑁆𑀓𑀺𑀢𑀫𑀜𑁆𑀘𑀸𑀤𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀝𑀗𑁆𑀓𑀺𑀢𑀧𑀻𑀞𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣𑀸𑀢𑀺 𑀙𑀯𑀓𑀼𑀝𑀺𑀬𑀁. 𑀅𑀜𑁆𑀜𑀁 𑀓𑀼𑀝𑀺𑀓𑀦𑁆𑀢𑀺 𑀙𑀯𑀓𑀼𑀝𑀺𑀢𑁄 𑀅𑀜𑁆𑀜𑀁 𑀓𑀼𑀝𑀺𑀓𑀁. 𑀆𑀯𑀭𑀡𑀦𑁆𑀢𑀺 𑀪𑀺𑀢𑁆𑀢𑀺𑀁. 𑀤𑁆𑀯𑀸𑀭𑀦𑁆𑀢𑀺 𑀧𑀯𑀺𑀲𑀦𑀦𑀺𑀓𑁆𑀔𑀫𑀦𑀤𑁆𑀯𑀸𑀭𑀁. 𑀙𑀢𑁆𑀢𑀓𑀼𑀝𑀺𑀓𑀸 𑀦𑀸𑀫𑁂𑀲𑀸𑀢𑀺 𑀏𑀲𑀸 𑀙𑀢𑁆𑀢𑁂𑀦 𑀓𑀢𑀸 𑀓𑀼𑀝𑀺𑀓𑀸 𑀦𑀸𑀫. 𑀫𑀳𑀦𑁆𑀢𑁂𑀦 𑀓𑀧𑀮𑁆𑀮𑁂𑀦 𑀓𑀼𑀝𑀺𑀓𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁭. 𑀅𑀥𑀫𑁆𑀫𑀺𑀓𑀓𑀢𑀺𑀓𑀸𑀓𑀣𑀸

𑁨𑁦𑁫. 𑀅𑀜𑁆𑀜𑀸𑀧𑀻𑀢𑀺 ‘‘𑀅𑀦𑁆𑀢𑀭𑀸𑀯𑀲𑁆𑀲𑀁 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩’’𑀦𑁆𑀢𑀺 𑀓𑀢𑀺𑀓𑀸𑀬 𑀅𑀜𑁆𑀜𑀸𑀧𑀺. 𑀓𑀢𑀺𑀓𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀅𑀥𑀫𑁆𑀫𑀺𑀓𑀓𑀢𑀺𑀓𑀸𑀬. 𑀯𑀼𑀢𑁆𑀢𑀦𑁆𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁨𑁬) 𑀯𑀼𑀢𑁆𑀢𑀁.

𑁧𑁧𑁮. 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑀣𑀸

𑁨𑁦𑁭. 𑀧𑀝𑀺𑀲𑁆𑀲𑀯𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀢𑁆𑀣 𑀓𑀺𑀁 𑀯𑀲𑁆𑀲𑀸𑀯𑀸𑀲𑀧𑀝𑀺𑀲𑁆𑀲𑀼𑀢𑁂𑀬𑁂𑀯 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀏𑀢𑀲𑁆𑀲𑁂𑀯𑀸𑀢𑀺 𑀯𑀲𑁆𑀲𑀸𑀯𑀸𑀲𑀲𑁆𑀲𑁂𑀯. 𑀏𑀯𑀫𑀸𑀤𑀺𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 ‘‘𑀧𑀝𑀺𑀲𑁆𑀲𑀯𑁂’’𑀢𑀺 𑀏𑀢𑁆𑀣 𑀬𑁄𑀚𑁂𑀢𑀩𑁆𑀩𑁄. ‘‘𑀧𑀝𑀺𑀲𑁆𑀲𑀯𑁂𑀧𑀻’’𑀢𑀺 𑀳𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀓𑀫𑁆𑀫𑀲𑁆𑀲. 𑀢𑀜𑁆𑀘 𑀔𑁄𑀢𑀺 𑀢𑀜𑁆𑀘 𑀤𑀼𑀓𑁆𑀓𑀝𑀁 𑀯𑀺𑀲𑀁𑀯𑀸𑀤𑀦𑀧𑀘𑁆𑀘𑀬𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀞𑀫𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 ‘‘𑀧𑀘𑁆𑀙𑀸𑀧𑀻’’𑀢𑀺 𑀧𑀤𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀧𑀞𑀫𑀫𑁆𑀧𑀺 𑀳𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀧𑀘𑁆𑀙𑀸𑀧𑀺 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄.

𑀲𑁄 𑀢𑀤𑀳𑁂𑀯 𑀅𑀓𑀭𑀡𑀻𑀬𑁄𑀢𑀺𑀆𑀤𑀻𑀲𑀼 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑁆𑀣 𑀧𑀼𑀭𑁂 𑀪𑀯𑀸 𑀧𑀼𑀭𑀺𑀫𑀸, 𑀲𑀸 𑀏𑀯 𑀧𑀼𑀭𑀺𑀫𑀺𑀓𑀸, 𑀧𑀸𑀝𑀺𑀧𑀤𑀢𑀺𑀣𑀻. 𑀦𑀸𑀦𑀸𑀲𑀻𑀫𑀸𑀬 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀢𑀺𑀬𑁂 ‘‘𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀸𑀯𑀸𑀲𑀲𑁆𑀲 𑀉𑀧𑀘𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀧𑀞𑀫𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲 𑀧𑀲𑁆𑀲𑀫𑁆𑀪𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀻’’𑀢𑀺. 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀯𑀲𑁆𑀲𑀁 𑀉𑀧𑀕𑀫𑀦𑀯𑀺𑀳𑀸𑀭𑁂 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁 𑀯𑀲𑁆𑀲𑀽𑀧𑀕𑀫𑀦𑀅𑀳𑀦𑀺 𑀏𑀯, 𑀧𑀓𑁆𑀓𑀦𑁆𑀢𑀲𑁆𑀲𑀸𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀺𑀲𑀤𑁆𑀤𑀲𑁆𑀲 𑀕𑀭𑀳𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑁄 𑀧𑀦 𑀯𑀸𑀤𑁄’’𑀢𑀺𑀆𑀤𑀺. 𑀆𑀮𑀬𑁄𑀢𑀺 𑀘𑀺𑀢𑁆𑀢𑀲𑁆𑀲 𑀅𑀮𑁆𑀮𑀻𑀬𑀦𑀁. 𑀅𑀲𑀢𑀺𑀬𑀸𑀢𑀺 𑀲𑀢𑀺𑀧𑀫𑀼𑀝𑁆𑀞𑁂𑀦. 𑀯𑀲𑁆𑀲𑀁 𑀦 𑀉𑀧𑁂𑀢𑀻𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁧𑁮𑁪) 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀲𑁆𑀲𑀁 𑀦 𑀉𑀧𑁂𑀢𑀺.

𑀲𑀢𑁆𑀢𑀸𑀳𑀦𑁆𑀢𑀺 𑀲𑀢𑁆𑀢𑀸𑀳𑁂𑀦, 𑀅𑀦𑀸𑀕𑀢𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀯𑀫𑀺𑀢𑁄𑀢𑀺 𑀧𑀼𑀩𑁆𑀩𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀦𑀯𑀫𑀺𑀢𑁄, 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀦𑀯𑀫𑀺𑀢𑁄 𑀯𑀸. 𑀫𑀸 𑀯𑀸 𑀆𑀕𑀘𑁆𑀙𑀢𑀼, 𑀅𑀦𑀸𑀧𑀢𑁆𑀢𑀻𑀢𑀺 𑀯𑀲𑁆𑀲𑀁𑀯𑀼𑀢𑁆𑀣𑀢𑁆𑀢𑀸 𑀫𑀸 𑀯𑀸 𑀆𑀕𑀘𑁆𑀙𑀢𑀼, 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.