𑁯𑁫. 𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀸𑀤𑀺𑀓𑀣𑀸

𑁧𑁭𑁨. 𑀢𑁂 𑀦 𑀚𑀸𑀦𑀺𑀁𑀲𑀽𑀢𑀺 𑀏𑀢𑁆𑀣 𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀲𑀻𑀫𑀁 𑀑𑀓𑁆𑀓𑀦𑁆𑀢𑀸𑀢𑀺 𑀯𑀸 𑀑𑀓𑁆𑀓𑀫𑀦𑁆𑀢𑀻𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁. 𑀑𑀓𑁆𑀓𑀦𑁆𑀢𑀸𑀢𑀺 𑀯𑀸𑀢𑀺 𑀧𑀯𑀺𑀲𑀺𑀢𑁆𑀣 𑀇𑀢𑀺 𑀯𑀸. 𑀢𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀯𑀸 𑀅𑀢𑀺𑀭𑁂𑀓𑀸𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁. 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀯𑀕𑁆𑀕𑀸, 𑀓𑀲𑁆𑀫𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄𑀢𑀺 𑀆𑀳 ‘‘𑀢𑁂𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀢𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁. 𑀲𑀻𑀫𑀁 𑀑𑀓𑁆𑀓𑀦𑁆𑀢𑀢𑁆𑀢𑀸𑀢𑀺 𑀲𑀻𑀫𑀁 𑀧𑀯𑀺𑀲𑀺𑀢𑀢𑁆𑀢𑀸, 𑀯𑀕𑁆𑀕𑀸 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀕𑁆𑀕𑁄 𑀇𑀢𑀺 𑀲𑀜𑁆𑀜𑀸 𑀲𑀫𑀕𑁆𑀕𑀲𑀜𑁆𑀜𑀸, 𑀲𑀸 𑀏𑀢𑁂𑀲𑀫𑀢𑁆𑀣𑀻𑀢𑀺 𑀲𑀫𑀕𑁆𑀕𑀲𑀜𑁆𑀜𑀺𑀦𑁄.

𑁧𑁭𑁫. 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀢𑀺 𑀧𑀤𑀲𑁆𑀲 ‘‘𑀇𑀘𑁆𑀙𑀸𑀧𑀓𑀢𑁄’’𑀢𑀺 𑀧𑀤𑁂𑀦 𑀲𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀬𑀣𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀉𑀧𑁄𑀲𑀣𑀓𑀫𑁆𑀫𑀢𑁄 𑀧𑀼𑀩𑁆𑀩𑀪𑀸𑀕𑁂. 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸𑀧𑀻𑀢𑀺 𑀓𑀧𑁆𑀧𑀢𑁂𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸𑀧𑀺. ‘‘𑀅𑀪𑀺𑀪𑀽𑀢𑀸’’𑀢𑀺 𑀇𑀫𑀺𑀦𑀸 𑀧𑀓𑀢𑀸𑀢𑀺 𑀏𑀢𑁆𑀣 𑀧𑀧𑀼𑀩𑁆𑀩𑀓𑀭𑀥𑀸𑀢𑀼𑀬𑀸 𑀉𑀧𑀲𑀕𑁆𑀕𑀯𑀲𑁂𑀦 𑀅𑀪𑀺𑀪𑀯𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁧𑁭𑁬. 𑀬𑀣𑀸 𑀳𑁂𑀝𑁆𑀞𑀸 𑀯𑀕𑁆𑀕𑀸𑀯𑀕𑁆𑀕𑀲𑀜𑁆𑀜𑀻𑀧𑀦𑁆𑀦𑀭𑀲𑀓𑀸𑀤𑀻𑀲𑀼 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀏𑀯𑀫𑀓𑀢𑁆𑀯𑀸 𑀓𑀲𑁆𑀫𑀸 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀆𑀳 ‘‘𑀅𑀓𑀼𑀲𑀮𑀩𑀮𑀯𑀢𑀸𑀬𑀸’’𑀢𑀺.