𑁨. 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀁

𑁬𑁮. 𑀲𑀦𑁆𑀦𑀺𑀧𑀸𑀢𑀸𑀦𑀼𑀚𑀸𑀦𑀦𑀸𑀤𑀺𑀓𑀣𑀸

𑁧𑁩𑁨. 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀢𑀭𑀦𑁆𑀢𑀺 𑀑𑀢𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀺𑀢𑁆𑀣𑀁, 𑀉𑀤𑀓𑀢𑀺𑀢𑁆𑀣𑀁, 𑀢𑀺𑀢𑁆𑀣𑀁 𑀯𑀺𑀬𑀸𑀢𑀺 𑀢𑀺𑀢𑁆𑀣𑀁, 𑀮𑀤𑁆𑀥𑀻𑀢𑀺 𑀆𑀳 ‘‘𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀮𑀤𑁆𑀥𑀻’’𑀢𑀺. 𑀮𑀤𑁆𑀥𑀺 𑀳𑀺 𑀩𑀳𑀽𑀦𑀁 𑀮𑀤𑁆𑀥𑀺𑀓𑀸𑀦𑀁 𑀑𑀢𑀭𑀡𑀝𑁆𑀞𑀸𑀦𑀢𑁆𑀢𑀸 𑀢𑀺𑀢𑁆𑀣𑀁 𑀦𑀸𑀫. 𑀅𑀜𑁆𑀜𑀦𑁆𑀢𑀺 𑀲𑀸𑀲𑀦𑀺𑀓𑀮𑀤𑁆𑀥𑀺𑀢𑁄 𑀅𑀜𑁆𑀜𑀁. 𑀏𑀢𑁂𑀲𑀦𑁆𑀢𑀺 𑀧𑀭𑀺𑀩𑁆𑀩𑀸𑀚𑀓𑀸𑀦𑀁. 𑀇𑀢𑁄𑀢𑀺 𑀇𑀫𑀲𑁆𑀫𑀸 𑀲𑀸𑀲𑀦𑀺𑀓𑀮𑀤𑁆𑀥𑀺𑀢𑁄. 𑀬𑀦𑁆𑀢𑀺 𑀬𑀁 𑀥𑀫𑁆𑀫𑀚𑀸𑀢𑀁. 𑀢𑁂𑀲𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁. 𑀢𑁂 𑀮𑀪𑀦𑁆𑀢𑀻𑀢𑀺 𑀏𑀢𑁆𑀣 𑀢𑀲𑀤𑁆𑀤𑁄 𑀫𑀦𑀼𑀲𑁆𑀲𑀯𑀺𑀲𑀬𑁄𑀢𑀺 𑀆𑀳 ‘‘𑀢𑁂 𑀫𑀦𑀼𑀲𑁆𑀲𑀸’’𑀢𑀺. 𑀫𑀽𑀕𑀲𑀽𑀓𑀭𑀸𑀢𑀺 𑀏𑀢𑁆𑀣 𑀣𑀽𑀮𑀲𑀭𑀻𑀭𑀲𑁆𑀲 𑀲𑀽𑀓𑀭𑀲𑁆𑀲 𑀲𑀤𑁆𑀤𑀫𑀢𑁆𑀢𑀲𑁆𑀲𑀸𑀧𑀺 𑀅𑀪𑀸𑀯𑀢𑁄 𑀫𑀽𑀕𑀲𑀽𑀓𑀭𑁄 𑀦𑀸𑀫𑀸𑀢𑀺 𑀆𑀳 ‘‘𑀣𑀽𑀮𑀲𑀭𑀻𑀭𑀲𑀽𑀓𑀭𑀸’’𑀢𑀺.

𑁧𑁩𑁫. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀲𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄. 𑀓𑀺𑀦𑁆𑀢𑀺 𑀓𑀺𑀁 𑀆𑀧𑀢𑁆𑀢𑀺. 𑀤𑀼𑀓𑁆𑀓𑀝𑀦𑁆𑀢𑀺 𑀧𑀤𑀲𑁆𑀲 𑀤𑀼𑀓𑁆𑀓𑀝𑀁 𑀓𑀫𑁆𑀫𑀦𑁆𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀤𑀼𑀓𑁆𑀓𑀝𑀸𑀧𑀢𑁆𑀢𑀻’’𑀢𑀺. 𑀲𑀸 𑀘 𑀔𑁄 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀫𑀼𑀲𑀸𑀯𑀸𑀤𑀮𑀓𑁆𑀔𑀡𑁂𑀦 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀓𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀪𑀕𑀯𑀢𑁄 𑀧𑀦 𑀯𑀘𑀦𑁂𑀦𑀸’’𑀢𑀺. 𑀯𑀘𑀦𑁂𑀦𑀸𑀢𑀺 𑀘 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀓𑀺𑀁 𑀳𑁄𑀢𑀺? 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧𑁩𑁫) 𑀯𑀘𑀦𑁂𑀦. 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸𑀢𑀺 𑀆𑀯𑀺 𑀓𑀢𑁆𑀢𑀩𑁆𑀩𑀸𑀬 𑀆𑀧𑀢𑁆𑀢𑀺𑀬𑀸 𑀅𑀓𑀭𑀡𑁂𑀦 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸.

𑀫𑀦𑀼𑀚𑁂𑀦𑀸𑀢𑀺 𑀫𑀦𑀼𑀲𑁆𑀲𑁂𑀦. 𑀯𑀸𑀘𑀸𑀢𑀺 𑀯𑀸𑀘𑀸𑀬. 𑀬𑀓𑀸𑀭𑀲𑁆𑀲 𑀳𑀺 𑀮𑁄𑀧𑁄. 𑀕𑀺𑀭𑀦𑁆𑀢𑀺 𑀲𑀤𑁆𑀤𑀁. 𑀧𑀭𑁂𑀢𑀺 𑀅𑀜𑁆𑀜𑁂 𑀧𑀼𑀕𑁆𑀕𑀮𑁂. 𑀯𑀸𑀘𑀲𑀺𑀓𑀦𑁆𑀢𑀺 𑀯𑀸𑀘𑀸𑀢𑁄 𑀲𑀫𑀼𑀝𑁆𑀞𑀺𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀪𑀺𑀓𑁆𑀔𑀼 𑀓𑁂𑀦𑀘𑀺 𑀆𑀲𑀦𑁆𑀦𑁂 𑀞𑀺𑀢𑁂𑀦 𑀫𑀦𑀼𑀚𑁂𑀦 𑀯𑀸𑀘𑀸𑀬 𑀅𑀦𑀸𑀮𑀧𑀦𑁆𑀢𑁄 𑀳𑁄𑀢𑀺, 𑀧𑀭𑁂 𑀤𑀽𑀭𑁂 𑀞𑀺𑀢𑁂 𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀕𑀺𑀭𑀁 𑀫𑀳𑀸𑀲𑀤𑁆𑀤𑀁 𑀦𑁄 𑀘 𑀪𑀡𑁂𑀬𑁆𑀬, 𑀏𑀯𑀫𑁆𑀧𑀺 𑀯𑀸𑀘𑀲𑀺𑀓𑀫𑁂𑀯 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

𑀅𑀦𑁆𑀢𑀭𑀸𑀬𑀺𑀓𑁄𑀢𑀺 𑀏𑀢𑁆𑀣 𑀓𑀭𑁄𑀢𑁆𑀬𑀢𑁆𑀣𑁂 𑀡𑀺𑀓𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀅𑀦𑁆𑀢𑀭𑀸𑀬𑀓𑀭𑁄’’𑀢𑀺. ‘‘𑀓𑀺𑀫𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀓𑀺𑀲𑁆𑀲𑀸𑀢𑀺 𑀏𑀢𑁆𑀣 𑀢𑀤𑀢𑁆𑀣𑁂 𑀘𑀢𑀼𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺, 𑀳𑁂𑀢𑁆𑀯𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺𑀆𑀤𑀻𑀲𑀼. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀉𑀤𑁆𑀤𑁂𑀲𑀢𑁄 𑀘𑀸𑀢𑀺 ‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄’’𑀢𑀺𑀆𑀤𑀺𑀉𑀤𑁆𑀤𑁂𑀲𑀢𑁄 𑀘. 𑀦𑀺𑀤𑁆𑀤𑁂𑀲𑀢𑁄 𑀘𑀸𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀆𑀤𑀺𑀫𑁂𑀢’’𑀦𑁆𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀢𑁄 𑀘.

𑁧𑁩𑁬. 𑀤𑁂𑀯𑀲𑀺𑀓𑀦𑁆𑀢𑀺 𑀏𑀢𑁆𑀣 𑀡𑀺𑀓𑀧𑀘𑁆𑀘𑀬𑁄 𑀯𑀺𑀘𑁆𑀙𑀢𑁆𑀣𑁂 𑀳𑁄𑀢𑀻𑀢𑀺 𑀆𑀳 ‘‘𑀤𑀺𑀯𑀲𑁂 𑀤𑀺𑀯𑀲𑁂’’𑀢𑀺. 𑀢𑀢𑀺𑀬𑁂 𑀘 𑀲𑀢𑁆𑀢𑀫𑁂 𑀘 𑀧𑀓𑁆𑀔𑁂𑀢𑀺 𑀏𑀓𑀲𑁆𑀲 𑀉𑀢𑀼𑀦𑁄 𑀅𑀝𑁆𑀞𑀲𑀼 𑀧𑀓𑁆𑀔𑁂𑀲𑀼 𑀢𑀢𑀺𑀬𑁂 𑀘 𑀲𑀢𑁆𑀢𑀫𑁂 𑀘 𑀧𑀓𑁆𑀔𑁂. ‘‘𑀯𑀘𑀦𑀢𑁄’’𑀢𑀺 𑀧𑀤𑀁 ‘‘𑀯𑀝𑁆𑀝𑀢𑀻’’𑀢𑀺 𑀧𑀤𑁂 𑀜𑀸𑀧𑀓𑀳𑁂𑀢𑀼. 𑀢𑀣𑀸𑀭𑀽𑀧𑁂 𑀧𑀘𑁆𑀘𑀬𑁂𑀢𑀺 𑀢𑀣𑀸𑀭𑀽𑀧𑁂 𑀯𑀺𑀓𑀢𑀺𑀘𑀸𑀭𑀺𑀢𑁆𑀢𑀲𑀗𑁆𑀔𑀸𑀢𑁂 𑀧𑀘𑁆𑀘𑀬𑁂. 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀫𑀢𑀺𑀁 𑀯𑀢𑁆𑀢𑀺𑀢𑀩𑁆𑀩𑀁. 𑀯𑀘𑀦𑀢𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀩𑁆𑀩𑁂 𑀜𑀸𑀧𑀓𑀳𑁂𑀢𑀼𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀏𑀢𑀦𑁆𑀢𑀺 ‘‘𑀬𑀲𑁆𑀫𑀺𑀁 𑀢𑀲𑁆𑀫𑀺𑀁 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀉𑀤𑁆𑀤𑀺𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀁.

𑁭𑁧. 𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸

𑁧𑁩𑁮. 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑁂𑀢𑀩𑁆𑀩𑀸𑀢𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺. 𑀦𑀺𑀓𑀸𑀭𑀲𑁆𑀲 𑀳𑀺 𑀆𑀓𑀸𑀭𑁄. 𑀦𑀺𑀫𑀺𑀢𑁆𑀢𑀁 𑀓𑀢𑁄𑀢𑀺 𑀏𑀲𑁄 𑀧𑀩𑁆𑀩𑀢𑁄 𑀦𑀺𑀫𑀺𑀢𑁆𑀢𑀁 𑀓𑀢𑁄𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀧𑀭𑀢𑁄𑀧𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀺𑀁 𑀦𑀺𑀫𑀺𑀢𑁆𑀢𑀁? 𑀧𑀸𑀲𑀸𑀡𑁄 𑀪𑀦𑁆𑀢𑁂, 𑀏𑀲𑁄 𑀧𑀸𑀲𑀸𑀡𑁄 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀓𑁂𑀯𑀮𑀁 𑀧𑀦 𑀯𑀦𑀉𑀤𑀓𑁂𑀲𑀼 ‘‘𑀏𑀢𑀁 𑀯𑀦𑀁, 𑀏𑀢𑀁 𑀉𑀤𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀤𑀺𑀬𑀁 ‘‘𑀏𑀲𑀸 𑀦𑀤𑀻’’𑀢𑀺 𑀯𑀢𑁆𑀢𑀩𑁆𑀩𑀸. 𑀏𑀢𑁆𑀣 𑀧𑀦𑀸𑀢𑀺 𑀏𑀢𑀺𑀲𑁆𑀲𑀁 𑀉𑀢𑁆𑀢𑀭𑀸𑀬𑀁 𑀅𑀦𑀼𑀤𑀺𑀲𑀸𑀬𑀁 𑀧𑀦. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀢𑀢𑁆𑀣𑀸𑀢𑀺 ‘‘𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑁂𑀢𑀩𑁆𑀩𑀸’’𑀢𑀺 𑀯𑀘𑀦𑁂. 𑀲𑀻𑀫𑀫𑀡𑁆𑀟𑀮𑀦𑁆𑀢𑀺 𑀲𑀻𑀫𑀩𑀺𑀫𑁆𑀩𑀁. 𑀲𑀫𑁆𑀩𑀦𑁆𑀥𑀦𑁆𑀢𑁂𑀦𑀸𑀢𑀺 𑀧𑀼𑀭𑀺𑀫𑀦𑀺𑀫𑀺𑀢𑁆𑀢𑁂𑀦 𑀧𑀘𑁆𑀙𑀺𑀫𑀦𑀺𑀫𑀺𑀢𑁆𑀢𑀁 𑀲𑀫𑁆𑀩𑀦𑁆𑀥𑀦𑁆𑀢𑁂𑀦. 𑀇𑀫𑀺𑀦𑀸 𑀏𑀓𑀦𑁆𑀢𑀭𑀺𑀓𑀸𑀤𑀺𑀯𑀲𑁂𑀦 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀁 𑀦 𑀯𑀝𑁆𑀝𑀢𑀺 𑀦𑀺𑀫𑀺𑀢𑁆𑀢𑁂𑀦𑀧𑀺 𑀦𑀺𑀫𑀺𑀢𑁆𑀢𑀸𑀦𑀁 𑀲𑀫𑁆𑀩𑀦𑁆𑀥𑀸𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀺𑀫𑀺𑀢𑁆𑀢𑁂𑀦 𑀧𑀘𑁆𑀙𑀺𑀫𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀩𑀦𑁆𑀥𑁂 𑀲𑀢𑀺 𑀅𑀚𑁆𑀚 𑀏𑀓𑀁 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀲𑁆𑀯𑁂 𑀏𑀓𑀁 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀏𑀯𑀁 𑀓𑀸𑀮𑀦𑁆𑀢𑀭𑁂𑀧𑀺 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀫𑀦𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑀧𑀩𑁆𑀩𑀢𑁄𑀢𑀺 𑀏𑀢𑁆𑀣 𑀧𑀩𑁆𑀩𑀁 𑀯𑀼𑀘𑁆𑀘𑀢𑀺 𑀨𑀴𑀼, 𑀢𑀁 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀧𑀩𑁆𑀩𑀢𑁄. 𑀯𑀸𑀮𑀺𑀓𑀭𑀸𑀲𑀺𑀲𑁆𑀲 𑀲𑀼𑀤𑁆𑀥𑀧𑀁𑀲𑀼𑀧𑀩𑁆𑀩𑀢𑀧𑀲𑀗𑁆𑀕𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀸𑀮𑀺𑀓𑀭𑀸𑀲𑀺 𑀧𑀦 𑀦 𑀯𑀝𑁆𑀝𑀢𑀻’’𑀢𑀺. 𑀇𑀢𑀭𑁄𑀧𑀻𑀢𑀺 𑀯𑀸𑀮𑀺𑀓𑀭𑀸𑀲𑀺𑀢𑁄 𑀅𑀜𑁆𑀜𑁄𑀧𑀺 𑀢𑀺𑀯𑀺𑀥𑁄 𑀧𑀩𑁆𑀩𑀢𑁄. 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄𑀢𑀺 𑀅𑀟𑁆𑀠𑀝𑁆𑀞𑀫𑀭𑀢𑀦𑀳𑀢𑁆𑀣𑀺𑀧𑀫𑀸𑀡𑀢𑁄. 𑀘𑀢𑀽𑀲𑀼 𑀤𑀺𑀲𑀸𑀲𑀽𑀢𑀺 𑀯𑀺𑀳𑀸𑀭𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼. 𑀘𑀢𑀽𑀳𑀺 𑀯𑀸 𑀢𑀻𑀳𑀺 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁂𑀦 𑀢𑀢𑁄 𑀅𑀥𑀺𑀓𑀸𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀏𑀓𑁂𑀦 𑀯𑀸 𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀬𑁄𑀚𑀦𑀸. 𑀇𑀢𑁄𑀢𑀺 𑀧𑀩𑁆𑀩𑀢𑀦𑀺𑀫𑀺𑀢𑁆𑀢𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑁂𑀦 𑀦𑀺𑀫𑀺𑀢𑁆𑀢𑁂𑀦 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸. 𑀢𑀦𑁆𑀢𑀺 𑀧𑀩𑁆𑀩𑀢𑀁. 𑀢𑀲𑁆𑀫𑀸𑀢𑀺 𑀏𑀓𑀲𑁆𑀲𑁂𑀯 𑀦𑀺𑀫𑀺𑀢𑁆𑀢𑀲𑁆𑀲 𑀓𑀺𑀢𑁆𑀢𑀺𑀢𑀢𑁆𑀢𑀸. 𑀬𑁄 𑀧𑀩𑁆𑀩𑀢𑁄 𑀅𑀢𑁆𑀣𑀺, 𑀢𑀁 𑀧𑀩𑁆𑀩𑀢𑀦𑁆𑀢𑀺 𑀬𑁄𑀚𑀦𑀸. 𑀅𑀦𑁆𑀢𑁄𑀢𑀺 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑁄.

𑀢𑀢𑀺𑀬𑀪𑀸𑀕𑀁 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁂𑀦 𑀧𑀞𑀫𑀪𑀸𑀕𑁄𑀧𑀺 𑀏𑀓𑀤𑁂𑀲𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀲𑀸𑀢𑀺 𑀢𑀢𑁆𑀢𑀓𑀲𑁆𑀲 𑀧𑀤𑁂𑀲𑀲𑁆𑀲. 𑀢𑀢𑀺𑀬𑀪𑀸𑀕𑀸𑀤𑀺𑀢𑁄 𑀅𑀧𑀭𑀁 𑀲𑀩𑁆𑀩𑀧𑀩𑁆𑀩𑀢𑀁 𑀅𑀦𑁆𑀢𑁄𑀓𑀢𑁆𑀯𑀸 𑀲𑀫𑁆𑀫𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂’’𑀢𑀺𑀆𑀤𑀺.

𑀧𑀸𑀲𑀸𑀡𑀦𑀺𑀫𑀺𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀲𑀢𑀺 𑀖𑀦𑀪𑀸𑀯𑁂𑀦 𑀩𑀦𑁆𑀥𑀢𑀻𑀢𑀺 𑀧𑀸𑀲𑀸𑀡𑁄. 𑀅𑀬𑀕𑀼𑀴𑁄𑀧𑀺 𑀧𑀸𑀲𑀸𑀡𑀲𑀗𑁆𑀔𑀫𑁂𑀯 𑀕𑀘𑁆𑀙𑀢𑀺 𑀢𑁂𑀦 𑀢𑀲𑁆𑀲 𑀲𑀤𑀺𑀲𑀢𑁆𑀢𑀸. 𑀅𑀬𑀕𑀼𑀴𑁄𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀢𑀫𑁆𑀩𑀓𑀁𑀲𑀯𑀝𑁆𑀝𑀮𑁄𑀳𑀲𑀼𑀯𑀡𑁆𑀡𑀭𑀚𑀢𑀸𑀤𑀬𑁄𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀬𑁄 𑀓𑁄𑀘𑀻𑀢𑀺 𑀲𑀺𑀮𑀸𑀧𑀯𑀸𑀴𑀫𑀡𑀺𑀆𑀤𑀻𑀲𑀼 𑀬𑁄 𑀓𑁄𑀘𑀺. 𑀤𑁆𑀯𑀢𑁆𑀢𑀺𑀁𑀲𑀧𑀮𑀕𑀼𑀴𑀧𑀺𑀡𑁆𑀟𑀧𑀭𑀺𑀫𑀸𑀡𑀢𑀸 𑀲𑀡𑁆𑀞𑀸𑀦𑀢𑁄 𑀕𑀳𑁂𑀢𑀩𑁆𑀩𑀸, 𑀦 𑀢𑀼𑀮𑀺𑀢𑁆𑀯𑀸 𑀕𑀡𑀦𑀯𑀲𑁂𑀦. 𑀔𑀼𑀤𑁆𑀤𑀓𑀢𑀭𑁄 𑀧𑀸𑀲𑀸𑀡𑁄𑀢𑀺 𑀬𑁄𑀚𑀦𑀸. 𑀬𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀯𑀸 𑀬𑁄 𑀉𑀝𑁆𑀞𑀺𑀢𑀧𑀸𑀲𑀸𑀡𑁄 𑀯𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑁋 𑀉𑀢𑁆𑀢𑀭𑀯𑀸𑀓𑁆𑀬𑁂 𑀢𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀢𑁆𑀢𑀸 ‘‘𑀧𑀸𑀲𑀸𑀡𑀲𑀗𑁆𑀔𑀁𑀬𑁂𑀯𑀸’’𑀢𑀺 𑀏𑀢𑁆𑀣 𑀏𑀯𑀓𑀸𑀭𑁂𑀦 ‘‘𑀦 𑀧𑀩𑁆𑀩𑀢𑀲𑀗𑁆𑀔’’𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀳𑀢𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲𑀸𑀢𑀺 𑀆𑀬𑀸𑀫𑀯𑀺𑀢𑁆𑀣𑀸𑀭𑀼𑀩𑁆𑀩𑁂𑀥𑀢𑁄 𑀫𑀳𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲 𑀯𑀺𑀬. 𑀢𑀦𑁆𑀢𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑀁. 𑀦 𑀯𑀝𑁆𑀝𑀢𑀻𑀢𑀺 𑀓𑀺𑀢𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀳𑀻𑀢𑀺 𑀮𑀤𑁆𑀥𑀤𑁄𑀲𑀚𑁄𑀢𑀓𑁄. 𑀢𑀦𑁆𑀢𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑀁. 𑀲𑀻𑀫𑀸𑀬𑀸𑀢𑀺 𑀲𑀻𑀫𑀢𑁄. 𑀯𑀺𑀳𑀸𑀭𑁄𑀧𑀻𑀢𑀺 𑀦 𑀓𑁂𑀯𑀮𑀁 𑀦𑀺𑀫𑀺𑀢𑁆𑀢𑀫𑁂𑀯, 𑀯𑀺𑀳𑀸𑀭𑁄𑀧𑀺. 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀦 𑀓𑀺𑀢𑁆𑀢𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀧𑀺𑀝𑁆𑀞𑀺𑀧𑀸𑀲𑀸𑀡’’𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀯𑀦𑀦𑀺𑀫𑀺𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀯𑀦𑀺𑀬𑀢𑀺 𑀫𑀬𑀽𑀭𑀓𑁄𑀓𑀺𑀮𑀸𑀤𑀻𑀳𑀺 𑀲𑀢𑁆𑀢𑁂𑀳𑀺 𑀲𑀫𑁆𑀪𑀚𑀺𑀬𑀢𑀻𑀢𑀺 𑀯𑀦𑀁, 𑀯𑀦𑀦𑁆𑀢𑀺 𑀲𑀫𑁆𑀪𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀯𑀦𑀁. 𑀢𑀘𑁄 𑀏𑀯 𑀲𑀸𑀭𑁄 𑀏𑀢𑁂𑀲𑀦𑁆𑀢𑀺 𑀢𑀘𑀲𑀸𑀭𑁄, 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀯𑁂𑀡𑀼𑀆𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁆𑀢𑁄 𑀲𑀸𑀭𑁄 𑀏𑀢𑁂𑀲𑀦𑁆𑀢𑀺 𑀅𑀦𑁆𑀢𑁄𑀲𑀸𑀭𑀸, 𑀲𑀸𑀓𑀲𑀸𑀮𑀸𑀤𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀔𑀤𑀺𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁆𑀢𑁄𑀲𑀸𑀭𑀫𑀺𑀲𑁆𑀲𑀓𑀸𑀦𑀦𑁆𑀢𑀺 𑀅𑀦𑁆𑀢𑁄𑀲𑀸𑀭𑁂𑀳𑀺 𑀭𑀼𑀓𑁆𑀔𑁂𑀳𑀺 𑀫𑀺𑀲𑁆𑀲𑀓𑀸𑀦𑀁. 𑀭𑀼𑀓𑁆𑀔𑀸𑀦𑀁 𑀯𑀦𑀦𑁆𑀢𑀺 𑀏𑀢𑁆𑀣 𑀅𑀯𑀬𑀯𑀅𑀯𑀬𑀯𑀺𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀢𑀺𑀡𑀯𑀦𑀁 𑀭𑀼𑀓𑁆𑀔𑀯𑀦𑀦𑁆𑀢𑀺 𑀏𑀢𑁆𑀣 ‘‘𑀢𑀺𑀡𑀸𑀦𑀁 𑀯𑀦’’𑀦𑁆𑀢𑀺 𑀯𑀸 ‘‘𑀭𑀼𑀓𑁆𑀔𑀸𑀦𑀁 𑀯𑀦’’𑀦𑁆𑀢𑀺 𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀺𑀡𑀫𑁂𑀯 𑀯𑀦𑀁, 𑀭𑀼𑀓𑁆𑀔𑁄𑀬𑁂𑀯 𑀯𑀦𑀦𑁆𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀭𑀼𑀓𑁆𑀔𑀸𑀢𑀺 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀸, 𑀢𑁂 𑀫𑀢𑁆𑀢𑀁 𑀧𑀫𑀸𑀡𑀫𑁂𑀢𑁆𑀣𑀸𑀢𑀺 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀁 𑀯𑀦𑀁, 𑀢𑀢𑁄𑀢𑀺 𑀘𑀢𑀼𑀧𑀜𑁆𑀘𑀭𑀼𑀓𑁆𑀔𑀫𑀢𑁆𑀢𑀢𑁄. 𑀏𑀓𑀤𑁂𑀲𑀦𑁆𑀢𑀺 𑀯𑀦𑀲𑁆𑀲 𑀏𑀓𑀤𑁂𑀲𑀁. 𑀯𑀦𑀫𑀚𑁆𑀛𑁂𑀢𑀺 𑀯𑀦𑀲𑁆𑀲 𑀯𑁂𑀫𑀚𑁆𑀛𑁂, 𑀯𑀦𑀲𑁆𑀲𑀽𑀧𑀭𑀻𑀢𑀺 𑀅𑀢𑁆𑀣𑁄. 𑀭𑀼𑀓𑁆𑀔𑀦𑁆𑀢𑀭𑁂𑀲𑀼 𑀏𑀯 𑀳𑀺 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺. 𑀏𑀓𑀤𑁂𑀲𑀦𑁆𑀢𑀺 𑀯𑀦𑀲𑁆𑀲 𑀏𑀓𑀤𑁂𑀲𑀁. 𑀢𑀢𑁆𑀣𑀸𑀢𑀺 𑀯𑀦𑁂. ‘‘𑀞𑀺𑀢𑀯𑀦’’𑀦𑁆𑀢𑀺 𑀧𑀤𑀁 ‘‘𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺 𑀧𑀤𑁂 𑀅𑀯𑀼𑀢𑁆𑀢𑀓𑀫𑁆𑀫𑀁, ‘‘𑀦 𑀓𑀺𑀢𑁆𑀢𑁂𑀢𑀩𑁆𑀩’’𑀦𑁆𑀢𑀺 𑀧𑀤𑁂 𑀯𑀼𑀢𑁆𑀢𑀓𑀫𑁆𑀫𑀁.

𑀭𑀼𑀓𑁆𑀔𑀦𑀺𑀫𑀺𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀭𑀼𑀓𑁆𑀔𑀺𑀬𑀢𑀺 𑀨𑀮𑀸𑀤𑀺𑀓𑀸𑀫𑁂𑀳𑀺 𑀲𑀁𑀯𑀭𑀺𑀬𑀢𑀺 𑀭𑀓𑁆𑀔𑀺𑀬𑀢𑀻𑀢𑀺 𑀭𑀼𑀓𑁆𑀔𑁄, 𑀫𑀳𑀺𑀬𑀁 𑀭𑀼𑀳𑀢𑀻𑀢𑀺 𑀯𑀸 𑀭𑀼𑀓𑁆𑀔𑁄. 𑀚𑀻𑀯𑀫𑀸𑀦𑀓𑁄𑀢𑀺 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀫𑀽𑀮𑀗𑁆𑀓𑀼𑀭𑀸𑀤𑀺𑀳𑀭𑀺𑀢𑀲𑀗𑁆𑀔𑀸𑀢𑀚𑀻𑀯𑀫𑀸𑀦𑀓𑁄. 𑀧𑀭𑀺𑀡𑀸𑀳𑀢𑁄𑀢𑀺 𑀯𑀺𑀲𑀸𑀮𑀪𑀸𑀯𑀢𑁄. 𑀲𑀽𑀘𑀺𑀤𑀡𑁆𑀟𑀓𑀧𑀫𑀸𑀡𑁄𑀢𑀺 𑀲𑀽𑀘𑀺𑀬𑀸 𑀮𑁂𑀔𑀦𑀺𑀬𑀸 𑀤𑀡𑁆𑀟𑀪𑀽𑀢𑀯𑁂𑀴𑀼𑀧𑀫𑀸𑀡𑁄. 𑀲𑁄 𑀯𑁂𑀴𑀼 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀧𑀫𑀸𑀡𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀢𑁄𑀢𑀺 𑀅𑀝𑁆𑀞𑀗𑁆𑀕𑀼𑀮𑀼𑀩𑁆𑀩𑁂𑀥𑀲𑀽𑀘𑀺𑀤𑀡𑁆𑀟𑀓𑀧𑀫𑀸𑀡𑀧𑀭𑀺𑀡𑀸𑀳𑀭𑀼𑀓𑁆𑀔𑀢𑁄. 𑀯𑀁𑀲𑀦𑀴𑀓𑀲𑀭𑀸𑀯𑀸𑀤𑀻𑀲𑀽𑀢𑀺 𑀯𑀁𑀲𑁄 𑀘 𑀦𑀴𑀓𑁄 𑀘 𑀲𑀭𑀸𑀯𑁄 𑀘 𑀯𑀁𑀲𑀦𑀴𑀓𑀲𑀭𑀸𑀯𑀸, 𑀢𑁂 𑀆𑀤𑀬𑁄 𑀬𑁂𑀲𑀁 𑀓𑀧𑀸𑀮𑀸𑀤𑀻𑀦𑀦𑁆𑀢𑀺 𑀯𑀁𑀲𑀦𑀴𑀓𑀲𑀭𑀸𑀯𑀸𑀤𑀬𑁄, 𑀢𑁂𑀲𑀼. 𑀢𑀢𑁄𑀢𑀺 𑀯𑀁𑀲𑀸𑀤𑀺𑀢𑁄. 𑀢𑀁𑀔𑀡𑀫𑁆𑀧𑀻𑀢𑀺 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀓𑁆𑀔𑀡𑁂𑀧𑀺. 𑀅𑀓𑀸𑀭𑀡𑀦𑁆𑀢𑀺 𑀅𑀧𑀫𑀸𑀡𑀁. 𑀏𑀢𑀦𑁆𑀢𑀺 𑀦𑀯𑀫𑀽𑀮𑀲𑀸𑀔𑀸𑀦𑀺𑀕𑁆𑀕𑀫𑀦𑀁. 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀸𑀫𑀜𑁆𑀜𑀦𑀸𑀫𑁂𑀦𑀧𑀺 𑀯𑀺𑀲𑁂𑀲𑀦𑀸𑀫𑁂𑀦𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀇𑀫𑀺𑀦𑀸 𑀧𑀩𑁆𑀩𑀢𑀸𑀤𑀻𑀲𑀼𑀧𑀺 ‘‘𑀧𑀩𑁆𑀩𑀢𑁄’’𑀢𑀺 𑀲𑀸𑀫𑀜𑁆𑀜𑀦𑀸𑀫𑁂𑀦𑀧𑀺 ‘‘𑀯𑀗𑁆𑀓𑀧𑀩𑁆𑀩𑀢𑁄 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑁄’’𑀢𑀺 𑀯𑀺𑀲𑁂𑀲𑀦𑀸𑀫𑁂𑀦𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀫𑀕𑁆𑀕𑀦𑀺𑀫𑀺𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀫𑀕𑁆𑀕𑀺𑀬𑀢𑀺 𑀧𑀣𑀺𑀓𑁂𑀳𑀺, 𑀫𑀕𑁆𑀕𑀫𑀽𑀴𑁆𑀳𑁂𑀳𑀺 𑀯𑀸 𑀅𑀦𑁆𑀯𑁂𑀲𑀺𑀬𑀢𑀻𑀢𑀺 𑀫𑀕𑁆𑀕𑁄. 𑀬𑁄 𑀬𑀸𑀤𑀺𑀲𑁄 𑀚𑀗𑁆𑀖𑀫𑀕𑁆𑀕𑁄 𑀯𑀸 𑀲𑀓𑀝𑀫𑀕𑁆𑀕𑁄 𑀯𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀤𑁆𑀯𑁂 𑀢𑀻𑀡𑀺 𑀕𑀸𑀫𑀦𑁆𑀢𑀭𑀸𑀦𑀺 𑀕𑀘𑁆𑀙𑀢𑀺, 𑀲𑁄 𑀢𑀸𑀤𑀺𑀲𑁄 𑀚𑀗𑁆𑀖𑀫𑀕𑁆𑀕𑁄 𑀯𑀸 𑀲𑀓𑀝𑀫𑀕𑁆𑀕𑁄 𑀯𑀸 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀉𑀓𑁆𑀓𑀫𑀺𑀢𑁆𑀯𑀸𑀢𑀺 𑀧𑀓𑁆𑀓𑀫𑀺𑀢𑁆𑀯𑀸. 𑀬𑁄 𑀚𑀗𑁆𑀖𑀫𑀕𑁆𑀕𑁄 𑀑𑀢𑀭𑀢𑀺, 𑀲𑁄 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀅𑀯𑀴𑀜𑁆𑀚𑀸𑀢𑀺 𑀅𑀧𑀭𑀺𑀪𑁄𑀕𑀸. 𑀕𑀫𑀦𑀁 𑀚𑀦𑁂𑀢𑀻𑀢𑀺 𑀚𑀗𑁆𑀖𑁄. 𑀚𑀡𑁆𑀡𑀼𑀕𑁄𑀧𑁆𑀨𑀓𑀸𑀦𑀁 𑀫𑀚𑁆𑀛𑀧𑀤𑁂𑀲𑁄. 𑀲𑀳 𑀅𑀢𑁆𑀣𑁂𑀦 𑀧𑀡𑀺𑀬𑀥𑀦𑁂𑀦𑀸𑀢𑀺 𑀲𑀢𑁆𑀣𑁄, 𑀚𑀗𑁆𑀖𑁂𑀦 𑀯𑀺𑀘𑀭𑀦𑁆𑀢𑁄 𑀲𑀢𑁆𑀣𑁄 𑀚𑀗𑁆𑀖𑀲𑀢𑁆𑀣𑁄. 𑀲𑀓𑀢𑀺 𑀲𑀫𑀢𑁆𑀣𑁂𑀢𑀺 𑀪𑀸𑀭𑀁 𑀯𑀳𑀺𑀢𑀼𑀦𑁆𑀢𑀺 𑀲𑀓𑀝𑁄, 𑀢𑁂𑀦 𑀯𑀺𑀘𑀭𑀦𑁆𑀢𑁄 𑀲𑀢𑁆𑀣𑁄 𑀲𑀓𑀝𑀲𑀢𑁆𑀣𑁄. 𑀚𑀗𑁆𑀖𑀲𑀢𑁆𑀣𑁄 𑀘 𑀲𑀓𑀝𑀲𑀢𑁆𑀣𑁄 𑀘 𑀚𑀗𑁆𑀖𑀲𑀓𑀝𑀲𑀢𑁆𑀣𑀸, 𑀢𑁂𑀳𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀏𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀁.

𑀓𑁄𑀡𑀦𑁆𑀢𑀺 𑀯𑀺𑀳𑀸𑀭𑀓𑁄𑀡𑀁. 𑀕𑀢𑀁 𑀧𑀦 𑀫𑀕𑁆𑀕𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀪𑀸𑀕𑁂𑀢𑀺 𑀯𑀺𑀳𑀸𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀳𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀪𑀸𑀕𑁂. 𑀤𑀲𑀲𑀼 𑀦𑀸𑀫𑁂𑀲𑀽𑀢𑀺 𑀲𑀢𑀺𑀧𑀝𑁆𑀞𑀸𑀦𑀝𑁆𑀞𑀓𑀣𑀸𑀤𑀻𑀲𑀼 𑀆𑀕𑀢𑁂𑀲𑀼 ‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄’’𑀢𑀺𑀆𑀤𑀻𑀲𑀼, 𑀅𑀪𑀺𑀥𑀸𑀦𑀸𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬) 𑀘 𑀆𑀕𑀢𑁂𑀲𑀼 ‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀅𑀤𑁆𑀥𑀸’’𑀢𑀺𑀆𑀤𑀻𑀲𑀼 𑀤𑀲𑀲𑀼 𑀫𑀕𑁆𑀕𑀦𑀸𑀫𑁂𑀲𑀼. 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦𑀸𑀢𑀺 𑀇𑀫𑀺𑀦𑀸 𑀧𑀩𑁆𑀩𑀢𑀸𑀤𑀻𑀲𑀼𑀧𑀺 ‘‘𑀧𑀩𑁆𑀩𑀢𑁄 𑀕𑀺𑀭𑀺 𑀲𑁂𑀮𑁄 𑀅𑀤𑁆𑀤𑀺 𑀦𑀕𑁄 𑀅𑀘𑀮𑁄 𑀲𑀺𑀮𑀼𑀘𑁆𑀘𑀬𑁄 𑀲𑀺𑀔𑀭𑀻 𑀪𑀽𑀥𑀭𑁄’’𑀢𑀺𑀆𑀤𑀻𑀲𑀼 𑀅𑀦𑁂𑀓𑁂𑀲𑀼 𑀦𑀸𑀫𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 𑀓𑀺𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀯𑀫𑁆𑀫𑀺𑀓𑀦𑀺𑀫𑀺𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀧𑀘𑀺𑀓𑀸𑀳𑀺 𑀯𑀫𑀺𑀬𑀢𑀺, 𑀲𑀭𑀩𑀽𑀖𑀭𑀕𑁄𑀮𑀺𑀓𑀸𑀤𑀬𑁄 𑀲𑀢𑁆𑀢𑁂 𑀯𑀫𑀢𑀻𑀢𑀺 𑀯𑀸 𑀯𑀫𑁆𑀫𑀺𑀓𑁄. 𑀢𑀁𑀤𑀺𑀯𑀲𑀚𑀸𑀢𑁄𑀢𑀺 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀺𑀢𑀤𑀺𑀯𑀲𑁂 𑀚𑀸𑀢𑁄. 𑀢𑀢𑁄𑀢𑀺 𑀅𑀝𑁆𑀞𑀗𑁆𑀕𑀼𑀮𑀼𑀩𑁆𑀩𑁂𑀥𑀕𑁄𑀯𑀺𑀲𑀸𑀡𑀧𑀫𑀸𑀡𑀯𑀫𑁆𑀫𑀻𑀓𑀢𑁄.

𑀦𑀤𑀻𑀦𑀺𑀫𑀺𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀦𑀤𑀢𑀺 𑀲𑀦𑁆𑀤𑀢𑀻𑀢𑀺 𑀦𑀤𑀻, 𑀦𑀤𑀦𑁆𑀢𑁄 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀦𑀤𑀻. 𑀬𑀲𑁆𑀲𑀸𑀢𑀺 𑀦𑀤𑀺𑀬𑀸, 𑀲𑁄𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑁆𑀯𑀤𑁆𑀥𑀫𑀸𑀲’’𑀦𑁆𑀢𑀺𑀆𑀤𑀺𑀦𑀸 𑀏𑀓𑀧𑀓𑁆𑀔𑁂 𑀢𑀺𑀓𑁆𑀔𑀢𑁆𑀢𑀼𑀁 𑀏𑀓𑀫𑀸𑀲𑁂 𑀙𑀓𑁆𑀔𑀢𑁆𑀢𑀼𑀁 𑀯𑀲𑁆𑀲𑀦𑁆𑀢𑀪𑀸𑀯𑀁 𑀤𑀻𑀧𑁂𑀢𑀺. 𑀯𑀺𑀕𑀢𑀫𑀢𑁆𑀢𑁂 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀈𑀤𑀺𑀲𑁂’’𑀢𑀺 𑀇𑀫𑀺𑀦𑀸 ‘‘𑀅𑀦𑁆𑀯𑀤𑁆𑀥𑀫𑀸𑀲’’𑀦𑁆𑀢𑀺𑀆𑀤𑀺𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀢𑀺𑀫𑀡𑁆𑀟𑀮𑀦𑁆𑀢𑀺 𑀳𑁂𑀝𑁆𑀞𑀸 𑀚𑀸𑀡𑀼𑀫𑀡𑁆𑀟𑀮𑀁, 𑀉𑀧𑀭𑀺 𑀦𑀸𑀪𑀺𑀫𑀡𑁆𑀟𑀮𑀦𑁆𑀢𑀺 𑀢𑀺𑀫𑀡𑁆𑀟𑀮𑀁. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀢𑀺𑀢𑁆𑀣𑁂 𑀯𑀸 𑀅𑀢𑀺𑀢𑁆𑀣𑁂 𑀯𑀸. 𑀉𑀤𑀓𑁂𑀦 𑀢𑁂𑀫𑀺𑀬𑀢𑀻𑀢𑀺 𑀬𑁄𑀚𑀦𑀸, 𑀢𑀺𑀦𑁆𑀢𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀁 𑀦𑀺𑀫𑀺𑀢𑁆𑀢𑁂𑀬𑁂𑀯 𑀅𑀬𑀁 𑀦𑀤𑀻 𑀳𑁄𑀢𑀺, 𑀅𑀣 𑀔𑁄 𑀦𑀤𑀻𑀧𑀸𑀭𑀕𑀫𑀦𑀸𑀤𑀺𑀓𑁂𑀧𑀻𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺𑀆𑀤𑀺. 𑀇𑀤𑀁 ‘‘𑀦𑀤𑀻𑀧𑀸𑀭𑀕𑀫𑀦𑁂𑀧𑀻’’𑀢𑀺 𑀧𑀤𑁂𑀦𑁂𑀯 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀬𑀸 𑀧𑀦𑀸𑀢𑀺 𑀦𑀤𑀻 𑀧𑀦, 𑀕𑀢𑀸𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀦𑀤𑀺𑀁. 𑀯𑀢𑀺𑀦𑁆𑀢𑀺 𑀧𑀸𑀴𑀺𑀁. 𑀭𑀼𑀓𑁆𑀔𑀧𑀸𑀤𑁂𑀢𑀺 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂. 𑀉𑀤𑀓𑀜𑁆𑀘 𑀆𑀯𑀭𑀡𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀅𑀧𑀯𑀢𑁆𑀢𑀫𑀸𑀦𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂𑀢𑀺 𑀕𑀺𑀫𑁆𑀳𑀲𑀤𑀺𑀲𑁂 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂. ‘‘𑀦𑀺𑀭𑀼𑀤𑀓𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀆𑀯𑀭𑀡𑀪𑀸𑀯𑁂𑀦𑀸’’𑀢𑀺 𑀯𑀺𑀲𑁂𑀲𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀸𑀢𑀺 𑀉𑀤𑀓𑀫𑀸𑀢𑀺𑀓𑀸. 𑀲𑀫𑁆𑀧𑀸𑀤𑁂𑀦𑁆𑀢𑀻 𑀳𑀼𑀢𑁆𑀯𑀸 𑀦𑀺𑀘𑁆𑀘𑀁 𑀧𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀫𑀦𑀼𑀲𑁆𑀲𑁂𑀳𑀺 𑀦𑀻𑀳𑀝𑀢𑁆𑀢𑀸, 𑀲𑀬𑀜𑁆𑀘 𑀅𑀕𑀫𑀦𑀢𑁆𑀢𑀸 𑀦 𑀯𑀝𑁆𑀝𑀢𑀺. 𑀬𑀸 𑀧𑀦𑀸𑀢𑀺 𑀉𑀤𑀓𑀫𑀸𑀢𑀺𑀓𑀸 𑀧𑀦. 𑀫𑀽𑀮𑁂𑀢𑀺 𑀧𑀞𑀫𑀓𑀸𑀮𑁂. 𑀓𑀸𑀮𑀦𑁆𑀢𑀭𑁂𑀦 𑀦𑀤𑀻 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀉𑀤𑀓𑀫𑀸𑀢𑀺𑀓𑀁.

𑀉𑀤𑀓𑀦𑀺𑀫𑀺𑀢𑁆𑀢𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀤𑀢𑀺 𑀧𑀲𑀯𑀢𑀻𑀢𑀺 𑀉𑀤𑀓𑀁. 𑀪𑀽𑀫𑀺𑀕𑀢𑀫𑁂𑀯 𑀉𑀤𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀜𑁆𑀘𑀸𑀢𑀺 𑀪𑀽𑀫𑀺𑀕𑀢𑀉𑀤𑀓𑀜𑁆𑀘. 𑀆𑀯𑀸𑀝…𑀧𑁂… 𑀲𑀫𑀼𑀤𑁆𑀤𑀸𑀤𑀻𑀲𑀼 𑀞𑀺𑀢𑀁 𑀅𑀧𑀯𑀢𑁆𑀢𑀦𑀓𑀉𑀤𑀓𑀦𑁆𑀢𑀺 𑀬𑁄𑀚𑀦𑀸. 𑀉𑀓𑁆𑀔𑁂𑀧𑀺𑀫𑀦𑁆𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑀺𑀢𑀁. 𑀢𑀦𑁆𑀢𑀺 𑀯𑀘𑀦𑀁. 𑀲𑀽𑀓𑀭𑀔𑀢𑀸𑀬𑀧𑀻𑀢𑀺 𑀲𑀽𑀓𑀭𑁂𑀳𑀺 𑀔𑀢𑀸𑀬 𑀯𑀸𑀧𑀺𑀬𑀸𑀧𑀺. 𑀢𑀁𑀔𑀡𑀜𑁆𑀜𑁂𑀯𑀸𑀢𑀺 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀓𑀺𑀢𑁆𑀢𑀦𑀓𑁆𑀔𑀡𑁂𑀬𑁂𑀯. 𑀆𑀯𑀸𑀝𑁄𑀬𑁂𑀯 𑀔𑀼𑀤𑁆𑀤𑀓𑀝𑁆𑀞𑁂𑀦 𑀆𑀯𑀸𑀝𑀓𑀁. 𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑀜𑁆𑀜𑀸𑀓𑀭𑀡𑀁. 𑀓𑀸𑀢𑀼𑀜𑁆𑀘𑀸𑀢𑀺 𑀲𑀬𑀁 𑀓𑀸𑀢𑀼𑀜𑁆𑀘. 𑀓𑀸𑀭𑀸𑀧𑁂𑀢𑀼𑀜𑁆𑀘𑀸𑀢𑀺 𑀧𑀭𑁂𑀳𑀺 𑀓𑀸𑀭𑀸𑀧𑁂𑀢𑀼𑀜𑁆𑀘. 𑀓𑀲𑁆𑀫𑀸 𑀮𑀸𑀪𑀲𑀻𑀫𑀸𑀬𑀁 𑀦 𑀯𑀝𑁆𑀝𑀢𑀺? 𑀮𑀸𑀪𑀲𑀻𑀫𑀸 𑀳𑀺 𑀅𑀜𑁆𑀜𑁂𑀲𑀁 𑀧𑀻𑀴𑀦𑀁 𑀓𑀭𑁄𑀢𑀻𑀢𑀺. 𑀇𑀢𑀺 𑀇𑀫𑀫𑀢𑁆𑀣𑀁 𑀦𑀬𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀁.

𑀅𑀝𑁆𑀞𑀤𑀺𑀲𑀁 𑀲𑀦𑁆𑀥𑀸𑀬 𑀅𑀝𑁆𑀞 𑀦𑀺𑀫𑀺𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀢𑀺 𑀲𑀻𑀫𑀸. 𑀏𑀓𑁂𑀦 𑀯𑀸 𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀬𑁄𑀚𑀦𑀸. 𑀢𑀺𑀡𑁆𑀡𑀁 𑀦𑀺𑀫𑀺𑀢𑁆𑀢𑀸𑀦𑀁 𑀓𑀺𑀢𑁆𑀢𑀦𑁂 𑀦𑀺𑀫𑀺𑀢𑁆𑀢𑀸𑀦𑀁 𑀞𑀺𑀢𑀤𑀺𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬𑀸’’𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑁂𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑀸𑀦𑀁 𑀲𑀢𑀓𑀺𑀢𑁆𑀢𑀦𑁂 𑀲𑀻𑀫𑀸𑀬 𑀅𑀝𑁆𑀞𑀤𑀺𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀓𑀺𑀲𑁆𑀲𑀸𑀬𑀧𑀺 𑀤𑀺𑀲𑀸𑀬 𑀩𑀳𑀼𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀺. 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀢𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀲𑀫𑀸𑀕𑀫𑀝𑁆𑀞𑀸𑀦𑁂 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸, 𑀢𑀺𑀓𑁄𑀡𑀸 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀢𑀼𑀭𑀲𑁆𑀲𑀸𑀢𑀺 𑀲𑀫𑀘𑀢𑀼𑀭𑀲𑁆𑀲𑀸. 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀲𑀫𑁄𑀥𑀸𑀦𑀝𑁆𑀞𑀸𑀦𑁂 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸. 𑀅𑀟𑁆𑀠𑀘𑀦𑁆𑀤𑀫𑀼𑀤𑀺𑀗𑁆𑀕𑀸𑀤𑀺𑀲𑀡𑁆𑀞𑀸𑀦𑀸 𑀧𑀦 𑀦𑀺𑀫𑀺𑀢𑁆𑀢𑀸𑀦𑀁 𑀞𑀺𑀢𑀲𑀡𑁆𑀞𑀸𑀦𑁂𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀦𑁆𑀢𑀺 𑀲𑀻𑀫𑀁. 𑀩𑀦𑁆𑀥𑀺𑀢𑀼𑀓𑀸𑀫𑁂𑀳𑀺 𑀦𑀺𑀲𑁆𑀲𑀜𑁆𑀘𑀸𑀭𑀲𑀫𑀬𑁂 𑀩𑀦𑁆𑀥𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸𑀦𑀦𑁆𑀢𑀺 𑀩𑀤𑁆𑀥𑀸 𑀲𑀻𑀫𑀸 𑀏𑀢𑁂𑀲𑀽𑀢𑀺 𑀩𑀤𑁆𑀥𑀲𑀻𑀫𑀸, 𑀢𑁂 𑀏𑀯 𑀯𑀺𑀳𑀸𑀭𑀸𑀢𑀺 𑀩𑀤𑁆𑀥𑀲𑀻𑀫𑀯𑀺𑀳𑀸𑀭𑀸, 𑀢𑁂𑀲𑀁. 𑀤𑀺𑀲𑀸𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀦𑁆𑀢𑀺 𑀤𑀺𑀲𑀸𑀲𑀼 𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀏𑀓𑀕𑀸𑀫𑀔𑁂𑀢𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀧𑁂𑀲𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀚𑁆𑀛𑀦𑁆𑀢𑀺 𑀏𑀓𑀢𑁄. 𑀅𑀜𑁆𑀜𑀸𑀦𑀺𑀧𑀻𑀢𑀺 𑀲𑀻𑀫𑀩𑀦𑁆𑀥𑀕𑀸𑀫𑀔𑁂𑀢𑁆𑀢𑀢𑁄 𑀅𑀜𑁆𑀜𑀸𑀦𑀺𑀧𑀺. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦 𑀆𑀳𑀸𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀢𑁂𑀳𑀺 𑀦𑀸𑀦𑀸𑀕𑀸𑀫𑀔𑁂𑀢𑁆𑀢𑁂𑀳𑀺. 𑀆𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀸𑀫𑀻𑀘𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀆𑀕𑀫𑀦𑀫𑁆𑀧𑀺 𑀅𑀦𑀸𑀕𑀫𑀦𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺. 𑀏𑀓𑀲𑀻𑀫𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀅𑀦𑁆𑀢𑁄𑀦𑀺𑀫𑀺𑀢𑁆𑀢𑀕𑀢𑁂𑀳𑀺 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀲𑀦𑁆𑀢𑁂𑀲𑀼 𑀲𑀻𑀫𑀸 𑀩𑀦𑁆𑀥𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸𑀢𑀺 𑀳𑁂𑀝𑁆𑀞𑀺𑀫𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸.

𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀪𑀡𑁆𑀟𑀼𑀓𑀫𑁆𑀫𑀸𑀧𑀼𑀘𑁆𑀙𑀦𑀁 (𑀫𑀳𑀸𑀯. 𑀅𑀝𑁆𑀞. 𑁯𑁮; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁧𑁪𑁪) 𑀲𑀦𑁆𑀥𑀸𑀬 𑀧𑀩𑁆𑀩𑀚𑁆𑀚𑀸𑀕𑀳𑀡𑀁 𑀯𑀼𑀢𑁆𑀢𑀁. 𑀔𑀡𑁆𑀟𑀲𑀻𑀫𑀸𑀢𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑀁 𑀔𑀡𑁆𑀟𑀺𑀢𑀁 𑀯𑀺𑀬 𑀙𑀺𑀦𑁆𑀤𑀺𑀢𑀁 𑀯𑀺𑀬 𑀧𑀯𑀢𑁆𑀢𑀸 𑀲𑀻𑀫𑀸 𑀔𑀡𑁆𑀟𑀲𑀻𑀫𑀸. 𑀢𑀦𑁆𑀢𑀺 𑀔𑀡𑁆𑀟𑀲𑀻𑀫𑀁. 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀯𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀲𑀻𑀫𑀦𑁆𑀢𑀺 𑀔𑀡𑁆𑀟𑀲𑀻𑀫𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀩𑀦𑁆𑀥𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸’’𑀢𑀺𑀆𑀤𑀺. 𑀲𑀸𑀢𑀺 𑀔𑀡𑁆𑀟𑀲𑀻𑀫𑀸. 𑀅𑀩𑁆𑀪𑀸𑀦𑀓𑀫𑁆𑀫𑁂 𑀲𑀤𑁆𑀥𑀺𑀁 𑀓𑀫𑁆𑀫𑀸𑀭𑀳𑁂𑀦 𑀯𑀻𑀲𑀢𑀺 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀏𑀓𑀯𑀻𑀲𑀢𑀺 𑀪𑀺𑀓𑁆𑀔𑀽’’𑀢𑀺. 𑀢𑀢𑁄𑀢𑀺 𑀏𑀓𑀯𑀻𑀲𑀢𑀺𑀪𑀺𑀓𑁆𑀔𑀼𑀢𑁄. 𑀕𑀡𑁆𑀳𑀦𑁆𑀢𑀻𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀲𑀳𑀲𑁆𑀲𑀢𑁄 𑀑𑀭𑀁 𑀧𑀦 𑀧𑀕𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀳𑀲𑁆𑀲𑀢𑁄 𑀅𑀥𑀺𑀓𑀁 𑀕𑀡𑁆𑀳𑀦𑁆𑀢𑀻𑀧𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀔𑀡𑁆𑀟𑀺𑀢𑁂 𑀔𑀡𑁆𑀟𑀲𑀻𑀫𑀸𑀬𑁂𑀯 𑀦𑀸𑀫. 𑀢𑀦𑁆𑀢𑀺 𑀔𑀡𑁆𑀟𑀲𑀻𑀫𑀁.

𑀢𑀢𑁆𑀭𑀸𑀢𑀺 𑀔𑀡𑁆𑀟𑀲𑀻𑀫𑀫𑀳𑀸𑀲𑀻𑀫𑀸𑀲𑀼 𑀆𑀥𑀸𑀭𑁂 𑀪𑀼𑀫𑁆𑀫𑀁. 𑀅𑀣𑀸𑀢𑀺 𑀅𑀦𑀦𑁆𑀢𑀭𑀁. 𑀏𑀯𑀦𑁆𑀢𑀺 𑀇𑀫𑀸𑀬 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑀺𑀬𑀫𑀸𑀦𑁂. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀲𑀻𑀫𑀦𑁆𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀁. 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀧𑀞𑀫𑀁 𑀅𑀯𑀺𑀧𑁆𑀧𑀯𑀸𑀲𑀁 𑀅𑀲𑀫𑀽𑀳𑀦𑀺𑀢𑁆𑀯𑀸 𑀲𑀻𑀫𑀁 𑀲𑀫𑀽𑀳𑀦𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑀸𑀢𑀺 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀞𑀧𑀺𑀢𑀸 𑀧𑀸𑀲𑀸𑀡𑀸. 𑀘𑀢𑀼𑀭𑀗𑁆𑀕𑀼𑀮𑀧𑀫𑀸𑀡𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀏𑀓𑀗𑁆𑀕𑀼𑀮𑀺𑀧𑀫𑀸𑀡𑀸𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀲𑀫𑀦𑁆𑀢𑀸𑀢𑀺 𑀔𑀡𑁆𑀟𑀲𑀻𑀫𑀸𑀬 𑀲𑀫𑀦𑁆𑀢𑀸. 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀳𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀔𑀡𑁆𑀟𑀲𑀻𑀫𑀧𑀭𑀺𑀬𑀸𑀬𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀢𑁂𑀳𑀺 𑀲𑀻𑀫𑀦𑁆𑀢𑀭𑀺𑀓𑀧𑀸𑀲𑀸𑀡𑁂𑀳𑀺, 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀺 𑀧𑀞𑀫𑀁 𑀓𑀺𑀢𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀢𑀸𑀲𑀼 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀩𑀦𑁆𑀥𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀬𑀣𑀺𑀘𑁆𑀙𑀺𑀢𑀁 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀦𑁆𑀢𑁄𑀧𑀺 𑀧𑁄𑀭𑀸𑀡𑀸𑀘𑀺𑀡𑁆𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺. 𑀉𑀪𑀺𑀦𑁆𑀦𑀫𑁆𑀧𑀻𑀢𑀺 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼 𑀞𑀺𑀢𑀸𑀦𑀁 𑀉𑀪𑀺𑀦𑁆𑀦𑀫𑁆𑀧𑀺 𑀓𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑀘𑀲𑀤𑁆𑀤𑁄 𑀯𑀸𑀓𑁆𑀬𑀸𑀭𑀫𑁆𑀪𑀚𑁄𑀢𑀓𑁄. 𑀏𑀲𑀸 𑀲𑀻𑀫𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼. 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀸 𑀬𑀣𑀸𑀞𑀸𑀦𑁂 𑀦 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲𑀼𑀧𑀭𑀺 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀁 𑀞𑀧𑀺𑀢𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀧𑀦 𑀯𑀺𑀚𑁆𑀛𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀧𑀸𑀲𑀸𑀡𑀁 𑀢𑀢𑁆𑀣 𑀦𑀺𑀔𑀡𑀺𑀢𑁆𑀯𑀸 𑀬𑀣𑀸 𑀞𑀸𑀦𑀸 𑀦 𑀘𑀸𑀯𑁂𑀦𑁆𑀢𑀺, 𑀢𑀣𑀸 𑀞𑀧𑁂𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀬𑀣𑀸𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀲𑀻𑀫𑀸𑀢𑀺 𑀲𑀻𑀫𑀸𑀬 𑀧𑀣𑀯𑀺𑀲𑀦𑁆𑀥𑀸𑀭𑀓𑀁 𑀉𑀤𑀓𑀁 𑀧𑀭𑀺𑀬𑀦𑁆𑀢𑀁𑀓𑀢𑁆𑀯𑀸 𑀕𑀢𑀢𑁆𑀢𑀸 𑀲𑀻𑀫𑀸 𑀦 𑀛𑀸𑀬𑀢𑀺.

𑀓𑀼𑀝𑀺𑀕𑁂𑀳𑁂𑀧𑀻𑀢𑀺 𑀏𑀢𑁆𑀣 𑀓𑀼𑀝𑀻𑀢𑀺 𑀘 𑀕𑁂𑀳𑀦𑁆𑀢𑀺 𑀘 𑀅𑀕𑀸𑀭𑀲𑁆𑀲𑁂𑀯 𑀦𑀸𑀫𑀁. 𑀅𑀕𑀸𑀭𑀜𑁆𑀳𑀺 𑀲𑀻𑀢𑀸𑀤𑀺𑀤𑀼𑀓𑁆𑀔𑀲𑁆𑀲 𑀓𑀼𑀝𑀦𑀝𑁆𑀞𑁂𑀦 𑀙𑀺𑀦𑁆𑀤𑀦𑀝𑁆𑀞𑁂𑀦 𑀘 𑀦𑀸𑀦𑀸𑀤𑀩𑁆𑀩𑀲𑀫𑁆𑀪𑀸𑀭𑀲𑁆𑀲 𑀕𑀳𑀡𑀝𑁆𑀞𑁂𑀦 𑀘 𑀓𑀼𑀝𑀺𑀕𑁂𑀳𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀼𑀝𑀺 𑀏𑀯 𑀕𑁂𑀳𑀁 𑀓𑀼𑀝𑀺𑀕𑁂𑀳𑀁, 𑀢𑀲𑁆𑀫𑀺𑀫𑁆𑀧𑀺. 𑀪𑀺𑀢𑁆𑀢𑀺𑀁 𑀅𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀇𑀤𑀁 𑀇𑀝𑁆𑀞𑀓𑀤𑀸𑀭𑀼𑀫𑀬𑀁 𑀪𑀺𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀲𑀺𑀮𑀸𑀫𑀬𑀸 𑀪𑀺𑀢𑁆𑀢𑀺 𑀦𑀺𑀫𑀺𑀢𑁆𑀢𑀽𑀧𑀕𑀸 𑀪𑀯𑁂𑀬𑁆𑀬, 𑀪𑀺𑀢𑁆𑀢𑀺𑀧𑀺 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸𑀢𑀺 𑀓𑀼𑀝𑀺𑀕𑁂𑀳𑀲𑁆𑀲 𑀪𑀺𑀢𑁆𑀢𑀺𑀬𑀸 𑀯𑀸 𑀅𑀦𑁆𑀢𑁄 𑀓𑀢𑁆𑀯𑀸. 𑀧𑀫𑀼𑀔𑁂𑀢𑀺 𑀓𑀼𑀝𑀺𑀕𑁂𑀳𑀲𑁆𑀲 𑀆𑀮𑀺𑀦𑁆𑀤𑁂. 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂𑀢𑀺 𑀦𑀺𑀕𑁆𑀕𑀮𑀺𑀢𑁆𑀯𑀸 𑀉𑀤𑀓𑀲𑁆𑀲 𑀧𑀢𑀦𑀝𑁆𑀞𑀸𑀦𑁂. 𑀏𑀯𑀁 𑀲𑀫𑁆𑀫𑀢𑀸𑀬 𑀲𑀻𑀫𑀸𑀬𑀸𑀢𑀺 𑀬𑁄𑀚𑀦𑀸.

‘‘𑀓𑀼𑀝𑁆𑀝𑀁 𑀅𑀓𑀺𑀢𑁆𑀢𑁂𑀢𑁆𑀯𑀸’’𑀢𑀺 𑀇𑀤𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀦𑁆𑀢𑁄𑀢𑀺 𑀮𑁂𑀡𑀲𑁆𑀲, 𑀓𑀼𑀝𑁆𑀝𑀲𑁆𑀲 𑀯𑀸 𑀅𑀦𑁆𑀢𑁄. 𑀑𑀓𑀸𑀲𑁂𑀢𑀺 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑁂. 𑀏𑀯𑀦𑁆𑀢𑀺 𑀇𑀫𑀺𑀦𑀸𑀓𑀸𑀭𑁂𑀦 𑀲𑀫𑁆𑀫𑀦𑀺𑀬𑀫𑀸𑀦𑁂. 𑀅𑀦𑁆𑀢𑁄𑀢𑀺 𑀪𑀺𑀢𑁆𑀢𑀺𑀬𑀸 𑀅𑀦𑁆𑀢𑁄.

𑀳𑁂𑀝𑁆𑀞𑀸 𑀦 𑀑𑀢𑀭𑀢𑀻𑀢𑀺 𑀳𑁂𑀝𑁆𑀞𑀸 𑀆𑀓𑀸𑀲𑀢𑀮𑀢𑁆𑀢𑀸 𑀦 𑀑𑀢𑀭𑀢𑀺. 𑀦𑀦𑀼 𑀣𑀫𑁆𑀪𑁂 𑀅𑀦𑀼𑀲𑀸𑀭𑀺𑀢𑁆𑀯𑀸 𑀑𑀢𑀭𑀡𑁄 𑀪𑀯𑁂𑀬𑁆𑀬, 𑀓𑀲𑁆𑀫𑀸 𑀦 𑀑𑀢𑀭𑀢𑀻𑀢𑀺? 𑀣𑀫𑁆𑀪𑀸𑀦𑀫𑀼𑀧𑀭𑀺 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑀸𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁂𑀝𑁆𑀞𑀸 𑀑𑀢𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀢𑀼𑀮𑀸𑀦𑀦𑁆𑀢𑀺 𑀣𑀫𑁆𑀪𑀸𑀦𑀫𑀼𑀧𑀭𑀺 𑀢𑀺𑀭𑀺𑀬𑀯𑀲𑁂𑀦 𑀞𑀺𑀢𑀸𑀦𑀁 𑀭𑀼𑀓𑁆𑀔𑀯𑀺𑀲𑁂𑀲𑀸𑀦𑀁. 𑀉𑀝𑁆𑀞𑀳𑀺𑀢𑁆𑀯𑀸𑀢𑀺 𑀪𑀽𑀫𑀺𑀢𑁄 𑀉𑀝𑁆𑀞𑀳𑀺𑀢𑁆𑀯𑀸. 𑀢𑀼𑀮𑀸𑀭𑀼𑀓𑁆𑀔𑁂𑀳𑀻𑀢𑀺 𑀢𑀼𑀮𑀸𑀲𑀗𑁆𑀔𑀸𑀢𑁂𑀳𑀺 𑀭𑀼𑀓𑁆𑀔𑁂𑀳𑀺. ‘‘𑀏𑀓𑀲𑀫𑁆𑀩𑀦𑁆𑀥𑁄’’𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀢𑀼𑀮𑀸𑀭𑀼𑀓𑁆𑀔𑁂𑀳𑁂𑀯 𑀏𑀓𑀲𑀫𑁆𑀩𑀦𑁆𑀥𑁄, 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀼𑀦𑁆𑀦𑀁 𑀪𑀺𑀢𑁆𑀢𑀻𑀦𑀁 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀲𑀫𑁆𑀩𑀦𑁆𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀝𑁆𑀞𑀸𑀧𑀺 𑀑𑀢𑀭𑀢𑀻𑀢𑀺 𑀪𑀺𑀢𑁆𑀢𑀻𑀦𑀫𑀼𑀧𑀭𑀺 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑀧𑀳𑁄𑀦𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀘𑁂 𑀣𑀫𑁆𑀪𑀫𑀢𑁆𑀣𑀓𑁂…𑀧𑁂… 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀩𑀳𑀽𑀳𑀺 𑀣𑀫𑁆𑀪𑁂𑀳𑀺 𑀓𑀢𑀧𑀸𑀲𑀸𑀤𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀣𑀫𑁆𑀪𑀫𑀢𑁆𑀣𑀓𑁂 𑀏𑀓𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀦𑀁 𑀑𑀓𑀸𑀲𑁂 𑀲𑀢𑀺 𑀳𑁂𑀝𑁆𑀞𑀸 𑀑𑀢𑀭𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀬𑁆𑀬𑀽𑀳𑀓𑀸𑀤𑀻𑀲𑀽𑀢𑀺 𑀦𑀸𑀕𑀤𑀦𑁆𑀢𑀓𑀸𑀤𑀻𑀲𑀼. 𑀆𑀤𑀺𑀲𑀤𑁆𑀤𑁂𑀦 𑀪𑀺𑀢𑁆𑀢𑀺𑀔𑀺𑀮𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀺𑀢𑁆𑀢𑀺 𑀘𑀸𑀢𑀺 𑀇𑀝𑁆𑀞𑀓𑀤𑀸𑀭𑀼𑀫𑀬𑀸 𑀪𑀺𑀢𑁆𑀢𑀺 𑀘. 𑀲𑀘𑁂 𑀲𑀺𑀮𑀸𑀫𑀬𑀸 𑀪𑀺𑀢𑁆𑀢𑀺 𑀘 𑀣𑀫𑁆𑀪𑀸 𑀘 𑀳𑁄𑀦𑁆𑀢𑀺, 𑀓𑀺𑀢𑁆𑀢𑁂𑀢𑀩𑁆𑀩𑀸. 𑀪𑀺𑀢𑁆𑀢𑀺𑀮𑀕𑁆𑀕𑁂𑀢𑀺 𑀪𑀺𑀢𑁆𑀢𑀻𑀲𑀼 𑀮𑀕𑁆𑀕𑁂, 𑀪𑀺𑀢𑁆𑀢𑀻𑀦𑀁 𑀯𑀸 𑀮𑀕𑁆𑀕𑀝𑁆𑀞𑀸𑀦𑁂. 𑀳𑁂𑀝𑁆𑀞𑀸𑀧𑀸𑀲𑀸𑀤𑀲𑁆𑀲𑀸𑀢𑀺 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 ‘‘𑀞𑀺𑀢’’𑀇𑀢𑀺 𑀧𑀤𑁂 𑀲𑀫𑁆𑀩𑀦𑁆𑀥𑁄. 𑀳𑁂𑀝𑁆𑀞𑀸𑀧𑀸𑀲𑀸𑀤𑀲𑁆𑀲 𑀯𑀸 𑀣𑀫𑁆𑀪𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀳𑁂𑀝𑁆𑀞𑀸 𑀲𑀫𑁆𑀫𑀢𑀸𑀬 𑀲𑀻𑀫𑀸𑀬 𑀉𑀧𑀭𑀺 𑀆𑀭𑁄𑀳𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀦𑀺𑀩𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑁂𑀢𑀺 𑀙𑀤𑀦𑀓𑁄𑀝𑀺𑀬𑀁.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀮𑁂. 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑀺 𑀯𑀺𑀬 𑀩𑀦𑁆𑀥𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀢𑁂𑀦𑁂𑀯 𑀢𑀮𑀧𑀭𑀺𑀘𑁆𑀙𑁂𑀤𑁂𑀦. 𑀢𑀸𑀮𑀫𑀽𑀮𑀧𑀩𑁆𑀩𑀢𑁂𑀧𑀻𑀢𑀺 𑀏𑀢𑁆𑀣 𑀢𑀸𑀮𑀫𑀽𑀮𑀁 𑀦𑀸𑀫 𑀳𑁂𑀝𑁆𑀞𑀸 𑀫𑀳𑀦𑁆𑀢𑀁 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀦𑀼𑀓𑀁 𑀳𑁄𑀢𑀺, 𑀢𑁂𑀦 𑀲𑀤𑀺𑀲𑁂 𑀧𑀩𑁆𑀩𑀢𑁂𑀧𑀺. 𑀯𑀺𑀢𑀸𑀦𑀲𑀡𑁆𑀞𑀸𑀦𑁄𑀢𑀺 𑀉𑀮𑁆𑀮𑁄𑀘𑀲𑁆𑀲 𑀲𑀡𑁆𑀞𑀸𑀦𑁄. 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀦𑀺𑀕𑁆𑀕𑀢𑀲𑀸𑀔𑀭𑀼𑀓𑁆𑀔𑀲𑀡𑁆𑀞𑀸𑀦𑁄 𑀯𑀸 𑀔𑀼𑀚𑁆𑀚𑀭𑀼𑀓𑁆𑀔𑀲𑀡𑁆𑀞𑀸𑀦𑁄 𑀯𑀸 𑀳𑁄𑀢𑀺. 𑀬𑀣𑀸 𑀧𑀩𑁆𑀩𑀢𑁄 𑀯𑀺𑀢𑀸𑀦𑀲𑀡𑁆𑀞𑀸𑀦𑁄 𑀳𑁄𑀢𑀺, 𑀏𑀯𑀁 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁄 𑀯𑀸 𑀳𑁄𑀢𑀺 𑀧𑀡𑀯𑀲𑀡𑁆𑀞𑀸𑀦𑁄 𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀫𑀼𑀤𑀺𑀗𑁆𑀕𑁄 𑀫𑀚𑁆𑀛𑁂 𑀣𑀽𑀮𑁄 𑀳𑁄𑀢𑀺, 𑀫𑀽𑀮𑁂 𑀘 𑀅𑀦𑁆𑀢𑁂 𑀘 𑀢𑀦𑀼𑀓𑁄. 𑀧𑀡𑀯𑁄 𑀫𑀚𑁆𑀛𑁂 𑀢𑀦𑀼𑀓𑁄 𑀳𑁄𑀢𑀺, 𑀫𑀽𑀮𑁂 𑀘 𑀅𑀕𑁆𑀕𑁂 𑀘 𑀣𑀽𑀮𑁄. 𑀢𑁂𑀲𑀁 𑀲𑀡𑁆𑀞𑀸𑀦𑁄 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁄 𑀯𑀸 𑀧𑀡𑀯𑀲𑀡𑁆𑀞𑀸𑀦𑁄 𑀯𑀸. 𑀳𑁂𑀝𑁆𑀞𑀸 𑀯𑀸𑀢𑀺 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀲𑁆𑀲 𑀧𑀩𑁆𑀩𑀢𑀲𑁆𑀲 𑀳𑁂𑀝𑁆𑀞𑀸 𑀯𑀸. 𑀫𑀚𑁆𑀛𑁂 𑀯𑀸𑀢𑀺 𑀧𑀡𑀯𑀲𑀡𑁆𑀞𑀸𑀦𑀲𑁆𑀲 𑀫𑀚𑁆𑀛𑁂 𑀯𑀸. 𑀤𑁆𑀯𑁂 𑀓𑀽𑀝𑀸𑀦𑀻𑀢𑀺 𑀤𑁆𑀯𑁂 𑀲𑀺𑀔𑀭𑀸𑀦𑀺. 𑀓𑀽𑀝𑀦𑁆𑀢𑀭𑀦𑁆𑀢𑀺 𑀓𑀽𑀝𑀸𑀦𑀁 𑀫𑀚𑁆𑀛𑀁. 𑀘𑀺𑀦𑀺𑀢𑁆𑀯𑀸 𑀯𑀸𑀢𑀺 𑀇𑀝𑁆𑀞𑀓𑀲𑀺𑀮𑀸𑀳𑀺 𑀘𑀺𑀦𑀺𑀢𑁆𑀯𑀸 𑀯𑀸. 𑀧𑀽𑀭𑁂𑀢𑁆𑀯𑀸 𑀯𑀸𑀢𑀺 𑀧𑀁𑀲𑀼𑀯𑀸𑀮𑀺𑀓𑀸𑀳𑀺 𑀧𑀽𑀭𑁂𑀢𑁆𑀯𑀸 𑀯𑀸.

𑀲𑀧𑁆𑀧𑀨𑀡𑀲𑀤𑀺𑀲𑁄𑀢𑀺 𑀲𑀧𑁆𑀧𑀲𑁆𑀲 𑀨𑀡𑁂𑀦 𑀲𑀤𑀺𑀲𑁄, 𑀔𑀼𑀚𑁆𑀚𑁄 𑀧𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀆𑀓𑀸𑀲𑀧𑀩𑁆𑀪𑀸𑀭𑀦𑁆𑀢𑀺 𑀪𑀺𑀢𑁆𑀢𑀺𑀬𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀁 𑀆𑀓𑀸𑀲𑀲𑀗𑁆𑀔𑀸𑀢𑀁 𑀧𑀩𑁆𑀪𑀸𑀭𑀁. 𑀲𑀻𑀫𑀧𑁆𑀧𑀫𑀸𑀡𑁄𑀢𑀺 𑀲𑀤𑁆𑀥𑀺𑀁 𑀅𑀦𑁆𑀢𑁄𑀲𑀼𑀲𑀺𑀭𑁂𑀦 𑀲𑀻𑀫𑀧𑁆𑀧𑀫𑀸𑀡𑁄. 𑀅𑀕𑁆𑀕𑀓𑁄𑀝𑀺𑀦𑁆𑀢𑀺 𑀅𑀕𑁆𑀕𑀲𑀗𑁆𑀔𑀸𑀢𑀁 𑀓𑁄𑀝𑀺𑀁. 𑀲𑀘𑁂 𑀧𑀦 𑀧𑀩𑁆𑀩𑀢𑀲𑁆𑀲 𑀳𑁂𑀝𑁆𑀞𑀸 𑀅𑀦𑁆𑀢𑁄𑀮𑁂𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀭𑀺𑀫𑀲𑁆𑀲𑀸𑀢𑀺 𑀅𑀦𑁆𑀢𑁄𑀮𑁂𑀡𑀲𑁆𑀲 𑀉𑀧𑀭𑀺 𑀞𑀺𑀢𑀲𑁆𑀲. 𑀧𑀸𑀭𑀢𑁄𑀢𑀺 𑀩𑀸𑀳𑀺𑀭𑀢𑁄. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀢𑀲𑁆𑀲 𑀩𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀭𑀢𑁄𑀢𑀺 𑀅𑀦𑁆𑀢𑀢𑁄. 𑀮𑁂𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀢𑁆𑀢𑀓𑀁 𑀫𑀳𑀦𑁆𑀢𑀦𑁆𑀢𑀺 𑀆𑀳 ‘‘𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢’’𑀦𑁆𑀢𑀺. 𑀓𑀺𑀢𑁆𑀢𑀓𑀁 𑀔𑀼𑀤𑁆𑀤𑀓𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀧𑀘𑁆𑀙𑀺𑀫𑀲𑀻𑀫𑀸𑀧𑀭𑀺𑀫𑀸𑀡’’𑀦𑁆𑀢𑀺. 𑀢𑀦𑁆𑀢𑀺 𑀔𑀼𑀤𑁆𑀤𑀓𑀁 𑀮𑁂𑀡𑀁. 𑀅𑀢𑀺𑀔𑀼𑀤𑁆𑀤𑀓𑀦𑁆𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑀻𑀫𑀸𑀧𑀭𑀺𑀫𑀸𑀡𑀸𑀪𑀸𑀯𑀢𑁄 𑀅𑀢𑀺𑀔𑀼𑀤𑁆𑀤𑀓𑀁. 𑀢𑀢𑁄𑀢𑀺 𑀉𑀧𑀭𑀺𑀲𑀻𑀫𑀢𑁄. 𑀩𑀳𑀻𑀢𑀺 𑀲𑀻𑀫𑀢𑁄 𑀩𑀳𑀺. ‘‘𑀬𑀤𑀺 𑀲𑀻𑀫𑀧𑁆𑀧𑀫𑀸𑀡𑀁, 𑀲𑀻𑀫𑀸 𑀳𑁄𑀢𑀺𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀬𑀤𑀺 𑀦 𑀲𑀻𑀫𑀧𑁆𑀧𑀫𑀸𑀡𑀁, 𑀦 𑀲𑀻𑀫𑀸 𑀳𑁄𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀦𑁆𑀢𑀺 𑀔𑀡𑁆𑀟𑀲𑀻𑀫𑀁. 𑀧𑀽𑀭𑁂𑀢𑁆𑀯𑀸𑀢𑀺 𑀇𑀝𑁆𑀞𑀓𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸. 𑀅𑀝𑁆𑀝𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀅𑀝𑁆𑀝𑀸𑀮𑀓𑀁 𑀩𑀦𑁆𑀥𑀺𑀢𑁆𑀯𑀸. 𑀉𑀫𑀗𑁆𑀕𑀦𑀤𑀻𑀢𑀺 𑀏𑀢𑁆𑀣 𑀉𑀓𑀸𑀭𑁄 𑀑𑀓𑀸𑀭𑀯𑀺𑀧𑀭𑀻𑀢𑁄, 𑀢𑀲𑁆𑀫𑀸 𑀧𑀣𑀯𑀺𑀬𑀁 𑀑𑀢𑀭𑀺𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀫𑀗𑁆𑀕𑀢𑀺 𑀕𑀘𑁆𑀙𑀢𑀻𑀢𑀺 𑀉𑀫𑀗𑁆𑀕𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀫𑀗𑁆𑀕𑀸𑀘 𑀲𑀸 𑀦𑀤𑀻 𑀘𑁂𑀢𑀺 𑀉𑀫𑀗𑁆𑀕𑀦𑀤𑀻. 𑀢𑀢𑁆𑀣𑀸𑀢𑀺 𑀉𑀫𑀗𑁆𑀕𑀦𑀤𑀺𑀬𑀁. 𑀳𑁂𑀝𑁆𑀞𑀸𑀧𑀣𑀯𑀺𑀢𑀮𑁂 𑀞𑀺𑀢𑁄𑀢𑀺 𑀲𑀻𑀫𑀸𑀬 𑀳𑁂𑀝𑁆𑀞𑀸𑀧𑀣𑀯𑀺𑀢𑀮𑁂 𑀇𑀤𑁆𑀥𑀺𑀬𑀸 𑀞𑀺𑀢𑁄.

𑀲𑀻𑀫𑀸𑀫𑀸𑀴𑀓𑁂𑀢𑀺 𑀔𑀡𑁆𑀟𑀲𑀻𑀫𑀸𑀬 𑀫𑀸𑀴𑀓𑁂. 𑀯𑀝𑀭𑀼𑀓𑁆𑀔𑁄𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄. 𑀢𑀢𑁄𑀢𑀺 𑀯𑀝𑀭𑀼𑀓𑁆𑀔𑀢𑁄. 𑀦𑀺𑀕𑁆𑀕𑀢𑀧𑀸𑀭𑁄𑀳𑁄𑀢𑀺 𑀧𑀯𑀤𑁆𑀥𑀁𑀯 𑀳𑀼𑀢𑁆𑀯𑀸 𑀭𑀼𑀓𑁆𑀔𑁄 𑀆𑀭𑁄𑀳𑀢𑀺 𑀅𑀦𑁂𑀦𑀸𑀢𑀺 𑀧𑀸𑀭𑁄𑀳𑁄, 𑀏𑀓𑁄 𑀫𑀽𑀮𑀯𑀺𑀲𑁂𑀲𑁄. 𑀦𑀺𑀕𑁆𑀕𑀢𑁄 𑀧𑀸𑀭𑁄𑀳𑁄 𑀦𑀺𑀕𑁆𑀕𑀢𑀧𑀸𑀭𑁄𑀳𑁄. 𑀫𑀳𑀸𑀲𑀻𑀫𑀁 𑀲𑁄𑀥𑁂𑀢𑁆𑀯𑀸𑀢𑀺 𑀏𑀢𑁆𑀣 𑀲𑁄𑀥𑀦𑀁 𑀦𑀸𑀫 𑀫𑀳𑀸𑀲𑀻𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀁, 𑀲𑀻𑀫𑀢𑁄 𑀯𑀸 𑀩𑀳𑀺𑀓𑀭𑀡𑀁. 𑀩𑀳𑀺𑀤𑁆𑀥𑀸𑀢𑀺 𑀤𑁆𑀯𑀻𑀳𑀺 𑀲𑀻𑀫𑀸𑀳𑀺 𑀩𑀳𑀺𑀤𑁆𑀥𑀸. ‘‘𑀩𑀳𑀺𑀝𑁆𑀞𑀸’’𑀢𑀺𑀧𑀺 𑀧𑀸𑀞𑁄. 𑀩𑀳𑀺 𑀞𑀺𑀢𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀳𑀘𑁆𑀘𑀸𑀢𑀺 𑀫𑀳𑀸𑀲𑀻𑀫𑀸𑀬 𑀧𑀣𑀯𑀻𑀢𑀮𑀁 𑀯𑀸 𑀢𑀢𑁆𑀣𑀚𑀸𑀢𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀦 𑀆𑀳𑀦𑀺𑀢𑁆𑀯𑀸. 𑀏𑀯𑀦𑁆𑀢𑀺 𑀬𑀣𑀸 𑀔𑀡𑁆𑀟𑀲𑀻𑀫𑀸𑀬, 𑀏𑀯𑀁 𑀢𑀣𑀸𑀢𑀺 𑀅𑀢𑁆𑀣𑁄. 𑀲𑀻𑀫𑀸𑀫𑀸𑀴𑀓𑁂𑀢𑀺 𑀔𑀡𑁆𑀟𑀲𑀻𑀫𑀸𑀫𑀸𑀴𑀓𑁂.

𑀲𑀻𑀫𑀸𑀫𑀸𑀴𑀓𑁂𑀢𑀺 𑀤𑁆𑀯𑀺𑀦𑁆𑀦𑀁 𑀲𑀻𑀫𑀸𑀦𑀁 𑀅𑀗𑁆𑀕𑀡𑁂. 𑀲𑀻𑀫𑀸𑀫𑀸𑀴𑀓𑀲𑁆𑀲𑀸𑀢𑀺 𑀓𑀫𑁆𑀫𑀲𑁆𑀲 𑀓𑀢𑀝𑁆𑀞𑀸𑀦𑀲𑁆𑀲 𑀲𑀻𑀫𑀸𑀫𑀸𑀴𑀓𑀲𑁆𑀲. 𑀯𑁂𑀳𑀸𑀲𑀝𑁆𑀞𑀺𑀢𑀲𑀸𑀔𑀸𑀬𑀸𑀢𑀺 𑀓𑀫𑁆𑀫𑀲𑁆𑀲 𑀅𑀓𑀢𑀝𑁆𑀞𑀸𑀦𑁂 𑀲𑀻𑀫𑀸𑀫𑀸𑀴𑀓𑁂 𑀉𑀝𑁆𑀞𑀺𑀢𑀸𑀬 𑀯𑁂𑀳𑀸𑀲𑁂 𑀞𑀺𑀢𑀸𑀬 𑀲𑀸𑀔𑀸𑀬. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄 𑀧𑀸𑀤𑀸 𑀯𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀦𑀬𑁂𑀧𑀻𑀢𑀺 ‘‘𑀲𑀻𑀫𑀸𑀫𑀸𑀴𑀓𑁂 𑀯𑀝𑀭𑀼𑀓𑁆𑀔𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀧𑀼𑀭𑀺𑀫𑀦𑀬𑁂𑀧𑀺. 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀦𑀬𑁂. 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑁆𑀯𑀻𑀳𑀺 𑀲𑀻𑀫𑀸𑀳𑀺 𑀉𑀝𑁆𑀞𑀺𑀢𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀯𑀸 𑀢𑀢𑁄 𑀦𑀺𑀕𑁆𑀕𑀢𑀧𑀸𑀭𑁄𑀳𑁄 𑀯𑀸 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼 𑀧𑀣𑀯𑀻𑀢𑀮𑀁 𑀯𑀸 𑀢𑀢𑁆𑀣 𑀚𑀸𑀢𑀭𑀼𑀓𑁆𑀔𑀸𑀤𑀻𑀦𑀺 𑀯𑀸 𑀆𑀳𑀘𑁆𑀘 𑀞𑀺𑀢𑀢𑁆𑀢𑀸 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀆𑀦𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀤𑁆𑀯𑀺𑀓𑀫𑁆𑀫𑀺𑀓𑀸𑀬 𑀦𑀻𑀥𑀸𑀢𑀼𑀬𑀸 𑀅𑀧𑀥𑀸𑀦𑀓𑀫𑁆𑀫𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀺𑀓𑁆𑀔𑀽’’𑀢𑀺 𑀧𑀥𑀸𑀦𑀓𑀫𑁆𑀫𑀁 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻𑀢𑀺 𑀅𑀩𑁆𑀪𑀁 𑀆𑀓𑀸𑀲𑀁 𑀉𑀕𑁆𑀕𑀘𑁆𑀙𑀢𑀺. 𑀢𑀢𑁆𑀭𑀸𑀢𑀺 𑀧𑀩𑁆𑀩𑀢𑁂. 𑀓𑀲𑁆𑀫𑀸 𑀆𑀦𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀩𑀚𑁆𑀛𑀫𑀸𑀦𑀸𑀬𑁂𑀯 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀩𑀚𑁆𑀛𑀫𑀸𑀦𑀸𑀬𑁂𑀯𑀸𑀢𑀺 𑀓𑀫𑁆𑀫𑀯𑀸𑀘𑀸𑀬 𑀩𑀚𑁆𑀛𑀫𑀸𑀦𑀸𑀬𑁂𑀯. 𑀇𑀫𑀺𑀦𑀸 𑀅𑀩𑀤𑁆𑀥𑀲𑀻𑀫𑀸 𑀧𑀫𑀸𑀡𑀭𑀳𑀺𑀢𑀁 𑀤𑁂𑀲𑀁 𑀑𑀢𑀭𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀁𑀓𑀺𑀜𑁆𑀘𑀻𑀢𑀺 𑀬𑀁𑀓𑀺𑀜𑁆𑀘𑀺 𑀧𑀩𑁆𑀩𑀢𑀸𑀤𑀺. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀲𑁆𑀫𑀺𑀁 𑀓𑀲𑁆𑀫𑀺𑀁𑀘𑀺 𑀞𑀸𑀦𑁂. 𑀏𑀓𑀲𑀫𑁆𑀩𑀦𑁆𑀥𑁂𑀦𑀸𑀢𑀺 𑀩𑀤𑁆𑀥𑀲𑀻𑀫𑀸𑀬 𑀏𑀓𑀲𑀫𑁆𑀩𑀦𑁆𑀥𑁂𑀦. 𑀇𑀢𑀻𑀢𑀺 𑀢𑀲𑁆𑀫𑀸 𑀆𑀦𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑁧𑁪𑁦. 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀢𑀺𑀬𑁄𑀚𑀦𑀁. ‘‘𑀧𑀫𑀸𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀫𑀲𑀤𑁆𑀤𑀲𑁆𑀲 𑀅𑀢𑀺𑀭𑁂𑀓𑀉𑀢𑁆𑀢𑀫𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀏𑀢𑀺𑀲𑁆𑀲𑀸𑀢𑀺 𑀲𑀻𑀫𑀸𑀬. 𑀲𑀫𑁆𑀫𑀦𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁄𑀡𑀢𑁄 𑀫𑀺𑀦𑀺𑀢𑀁 𑀓𑁄𑀡𑀦𑁆𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀆𑀧𑀢𑁆𑀢𑀺𑀜𑁆𑀘𑀸𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀜𑁆𑀘.

𑀧𑀸𑀭𑀬𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. ‘‘𑀓𑀺𑀢𑀓𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸’’𑀢𑀺 (𑀓𑀘𑁆𑀘𑀸𑀬𑀦𑀲𑀸𑀭𑁂 𑁪𑁫 𑀕𑀸𑀣𑀸𑀬𑀁) 𑀯𑀘𑀦𑀢𑁄 𑀅𑀪𑀺𑀥𑁂𑀬𑁆𑀬𑀪𑀽𑀢𑀁 𑀲𑀻𑀫𑀁 𑀲𑀦𑁆𑀥𑀸𑀬 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀸𑀭𑀸𑀢𑀺 𑀯𑀼𑀢𑁆𑀢𑀁. 𑀦𑀤𑀺𑀬𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀦𑀤𑀺𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀦𑀤𑀺𑀁 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀁 𑀲𑀻𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀦𑀤𑀺𑀧𑀸𑀭𑀲𑀻𑀫𑀸𑀬𑀁. 𑀬𑀢𑁆𑀣𑀲𑁆𑀲𑀸𑀢𑀺 𑀏𑀢𑁆𑀣 𑀬𑀢𑁆𑀣 𑀅𑀲𑁆𑀲𑀸𑀢𑀺 𑀧𑀤𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀣 𑀦𑀤𑀺𑀬𑀸’’𑀢𑀺𑀆𑀤𑀺. ‘‘𑀦𑀤𑀺𑀬𑀸’’𑀢𑀺 𑀇𑀫𑀺𑀦𑀸 𑀬𑀁𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀥𑀼𑀯𑀦𑀸𑀯𑀸𑀢𑀺 𑀏𑀢𑁆𑀣 𑀥𑀼𑀯𑀲𑀤𑁆𑀤𑁄 𑀦𑀺𑀘𑁆𑀘𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀘𑁆𑀘𑀲𑀜𑁆𑀘𑀭𑀡𑀦𑀸𑀯𑀸’’𑀢𑀺. 𑀇𑀫𑀺𑀦𑀸 𑀥𑀼𑀯𑁂𑀦 𑀦𑀺𑀘𑁆𑀘𑁂𑀦 𑀲𑀜𑁆𑀘𑀭𑀡𑀦𑀸𑀯𑀸 𑀥𑀼𑀯𑀦𑀸𑀯𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀳𑁄𑀢𑀺, 𑀪𑀯𑁂𑀬𑁆𑀬 𑀯𑀸. 𑀦𑀸𑀯𑀸𑀬 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀸𑀢𑀺 𑀦𑀸𑀯𑀸. 𑀧𑀸𑀚𑀦𑀧𑀼𑀭𑀺𑀲𑁂𑀦𑀸𑀢𑀺 𑀏𑀢𑁆𑀣 𑀧𑀸𑀚𑀦𑀁 𑀦𑀸𑀫 𑀏𑀓𑁄 𑀦𑀸𑀯𑀸𑀬 𑀕𑀫𑀦𑀽𑀧𑀓𑀭𑀡𑀯𑀺𑀲𑁂𑀲𑁄. 𑀲𑁄 𑀳𑀺 𑀧𑀚𑀢𑀺 𑀦𑀸𑀯𑀸 𑀕𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀧𑀸𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀚𑀓𑀸𑀭𑀲𑁆𑀲 𑀘𑀓𑀸𑀭𑀁 𑀓𑀢𑁆𑀯𑀸 𑀧𑀸𑀘𑀦𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑁂𑀯. 𑀢𑀲𑁆𑀲 𑀕𑀸𑀳𑀓𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀸 𑀦𑀸𑀯𑀸 𑀦𑀻𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸𑀢𑀺 𑀦𑀤𑀺𑀬𑀸 𑀧𑀝𑀺𑀲𑁄𑀢𑀁 𑀯𑀸 𑀳𑁂𑀝𑁆𑀞𑀸𑀲𑁄𑀢𑀁 𑀯𑀸. 𑀣𑁂𑀦𑁂𑀳𑀺 𑀯𑀸𑀢𑀺 𑀘𑁄𑀭𑁂𑀳𑀺 𑀯𑀸. 𑀓𑀺𑀜𑁆𑀘𑀸𑀧𑀺 𑀳𑀝𑀸, 𑀧𑀦 𑀢𑀣𑀸𑀧𑀺 𑀅𑀯𑀲𑁆𑀲𑀁 𑀮𑀩𑁆𑀪𑀦𑁂𑀬𑁆𑀬𑀸, 𑀥𑀼𑀯𑀦𑀸𑀯𑀸𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀯𑀸𑀢𑁂𑀦 𑀯𑀸𑀢𑀺 𑀫𑀸𑀮𑀼𑀢𑁂𑀦 𑀯𑀸 ‘‘𑀙𑀺𑀦𑁆𑀦’’𑀇𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀻𑀘𑀻𑀳𑀻𑀢𑀺 𑀢𑀭𑀗𑁆𑀕𑁂𑀳𑀺. 𑀢𑀭𑀗𑁆𑀕𑁄 𑀳𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑁂𑀦 𑀘𑀺𑀦𑁄𑀢𑀺 𑀯𑀟𑁆𑀠𑀢𑀻𑀢𑀺 𑀯𑀻𑀘𑀻𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀧𑀺 𑀦𑀤𑀻𑀫𑀚𑁆𑀛𑀁 𑀦𑀻𑀢𑀸, 𑀧𑀦 𑀢𑀣𑀸𑀧𑀺 𑀅𑀯𑀲𑁆𑀲𑀁 𑀆𑀳𑀭𑀺𑀢𑀩𑁆𑀩𑀸, 𑀥𑀼𑀯𑀦𑀸𑀯𑀸𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀑𑀕𑀢𑁂𑀢𑀺 𑀑𑀢𑀭𑀺𑀢𑁆𑀯𑀸 𑀕𑀢𑁂. 𑀣𑀮𑀁 𑀉𑀲𑁆𑀲𑀸𑀭𑀺𑀢𑀸𑀢𑀺 𑀣𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀸𑀭𑀺𑀢𑀸 𑀧𑀸𑀧𑀺𑀢𑀸 𑀦𑀸𑀯𑀸𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀗𑁆𑀔𑀢𑀧𑀤𑀭𑀸𑀢𑀺 𑀲𑀗𑁆𑀔𑀢𑀯𑀺𑀭𑀳𑀺𑀢𑀨𑀮𑀓𑀸 𑀯𑀸. 𑀥𑀼𑀯𑀦𑀸𑀯𑀸𑀯 𑀳𑁄𑀢𑀻𑀢𑀺 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀓𑀸𑀮𑁂 𑀦𑀺𑀘𑁆𑀘𑀲𑀜𑁆𑀘𑀭𑀡𑀦𑀸𑀯𑀢𑁆𑀢𑀸 𑀥𑀼𑀯𑀦𑀸𑀯𑀸𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀭𑀸𑀢𑀺 ‘‘𑀥𑀼𑀯𑀦𑀸𑀯𑀸’’𑀢𑀺𑀯𑀘𑀦𑁂. 𑀦𑀺𑀫𑀺𑀢𑁆𑀢𑀁 𑀯𑀸 𑀲𑀻𑀫𑀸 𑀯𑀸 𑀓𑀫𑁆𑀫𑀯𑀸𑀘𑀸𑀬 𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀯𑀸𑀘𑀸𑀬 𑀕𑀘𑁆𑀙𑀢𑀺, 𑀲𑀻𑀫𑀸𑀬 𑀧𑀦 𑀅𑀯𑀺𑀦𑀸𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀯𑀸𑀘𑀸𑀬 𑀕𑀘𑁆𑀙𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸𑀯 𑀦𑀸𑀯𑀸𑀬 𑀆𑀕𑀘𑁆𑀙𑀦𑁆𑀢𑀸𑀧𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀲𑁆𑀫𑀸.

𑀬𑀢𑁆𑀣𑀸𑀢𑀺 𑀦𑀤𑀺𑀧𑀸𑀭𑀲𑀻𑀫𑀲𑀫𑁆𑀫𑀦𑀦𑀝𑁆𑀞𑀸𑀦𑁂. 𑀭𑀼𑀓𑁆𑀔𑀲𑀗𑁆𑀖𑀸𑀝𑀫𑀬𑁄𑀢𑀺 𑀭𑀼𑀓𑁆𑀔𑀲𑀫𑀽𑀳𑁂𑀦 𑀓𑀢𑁄. 𑀧𑀤𑀭𑀩𑀤𑁆𑀥𑁄𑀢𑀺 𑀨𑀮𑀓𑁂𑀳𑀺 𑀩𑀤𑁆𑀥𑁄. 𑀲𑀜𑁆𑀘𑀭𑀡𑀬𑁄𑀕𑁆𑀕𑁄𑀢𑀺 𑀲𑀜𑁆𑀘𑀭𑀡𑀓𑁆𑀔𑀫𑁄. 𑀧𑀸𑀴𑀺𑀬𑀁 ‘‘𑀅𑀲𑁆𑀲𑀸’’𑀢𑀺 𑀞𑀸𑀦𑁂 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀲𑁆𑀲𑀸’’𑀢𑀺𑀧𑀤𑀲𑁆𑀲 𑀳𑁄𑀢𑀻𑀢𑀺 𑀅𑀢𑁆𑀣𑁄𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀢𑀁𑀔𑀡𑀜𑁆𑀜𑁂𑀯𑀸𑀢𑀺 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀓𑁆𑀔𑀡𑁂𑀬𑁂𑀯. 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀧𑀤𑀺𑀓𑀲𑁂𑀢𑀽𑀢𑀺 𑀏𑀓𑁂𑀦 𑀧𑀤𑁂𑀦 𑀕𑀫𑀦𑀬𑁄𑀕𑁆𑀕𑁄 𑀏𑀓𑀧𑀤𑀺𑀓𑁄, 𑀲𑁄𑀬𑁂𑀯 𑀲𑁂𑀢𑀽𑀢𑀺 𑀏𑀓𑀧𑀤𑀺𑀓𑀲𑁂𑀢𑀼. 𑀅𑀓𑀧𑁆𑀧𑀺𑀬𑀲𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀲𑁂𑀢𑀼𑀦𑀸. 𑀲𑀜𑁆𑀘𑀭𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀦𑀤𑀺𑀧𑀸𑀭𑀲𑀻𑀫𑀲𑀫𑁆𑀫𑀦𑀦𑀝𑁆𑀞𑀸𑀦𑁂. 𑀅𑀪𑀺𑀫𑀼𑀔𑀢𑀺𑀢𑁆𑀣𑁂𑀬𑁂𑀯𑀸𑀢𑀺 𑀲𑀻𑀫𑀸𑀬 𑀅𑀪𑀺𑀫𑀼𑀔𑀢𑀺𑀢𑁆𑀣𑁂 𑀏𑀯. 𑀥𑀼𑀯𑀦𑀸𑀯𑀸 𑀯𑀸 𑀥𑀼𑀯𑀲𑁂𑀢𑀼 𑀯𑀸 𑀅𑀪𑀺𑀫𑀼𑀔𑀢𑀺𑀢𑁆𑀣𑀢𑁄 𑀈𑀲𑀓𑀁 𑀉𑀤𑁆𑀥𑀁 𑀆𑀭𑁄𑀳𑀦𑁆𑀢𑁄𑀧𑀺 𑀅𑀥𑁄 𑀑𑀭𑁄𑀳𑀦𑁆𑀢𑁄𑀧𑀺 𑀓𑀧𑁆𑀧𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂’’𑀢𑀺𑀆𑀤𑀺. 𑀈𑀲𑀓𑀦𑁆𑀢𑀺 𑀏𑀓𑀉𑀲𑀪 𑀤𑁆𑀯𑀺𑀉𑀲𑀪𑀸𑀤𑀺𑀯𑀲𑁂𑀦 𑀫𑀦𑀁 𑀅𑀧𑁆𑀧𑀫𑀢𑁆𑀢𑀁. 𑀉𑀤𑁆𑀥𑀁 𑀯𑀸𑀢𑀺 𑀅𑀪𑀺𑀫𑀼𑀔𑀢𑀺𑀢𑁆𑀣𑀢𑁄 𑀉𑀧𑀭𑀺 𑀯𑀸. 𑀅𑀥𑁄 𑀯𑀸𑀢𑀺 𑀢𑀢𑁄 𑀳𑁂𑀝𑁆𑀞𑀸 𑀯𑀸. 𑀕𑀸𑀯𑀼𑀢𑀫𑀢𑁆𑀢𑀩𑁆𑀪𑀦𑁆𑀢𑀭𑁂𑀢𑀺 𑀕𑀸𑀯𑀼𑀢𑀧𑀫𑀸𑀡𑀲𑁆𑀲 𑀞𑀸𑀦𑀲𑁆𑀲 𑀅𑀩𑁆𑀪𑀦𑁆𑀢𑀭𑁂.

𑀲𑀳𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀯𑀺𑀥𑀺𑀦𑀸 𑀲𑀫𑁆𑀫𑀦𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀫𑀜𑁆𑀘 𑀧𑀦𑀸’’𑀢𑀺𑀆𑀤𑀺. 𑀤𑁆𑀯𑀻𑀲𑀼 𑀢𑀻𑀭𑁂𑀲𑀼 𑀞𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀓𑀲𑁆𑀫𑀺𑀁 𑀢𑀻𑀭𑁂 𑀞𑀢𑁆𑀯𑀸’’𑀢𑀺. 𑀢𑀢𑁄𑀢𑀺 𑀦𑀺𑀫𑀺𑀢𑁆𑀢𑀢𑁄. 𑀅𑀢𑁆𑀢𑀸𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀁 𑀯𑀺𑀦𑀬𑀥𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀓𑁆𑀔𑀺𑀧𑀦𑁆𑀢𑁂𑀦𑀸𑀢𑀺 𑀧𑀭𑀺𑀬𑀸𑀬𑀦𑁆𑀢𑁂𑀦. 𑀢𑀲𑁆𑀲𑀸𑀢𑀺 𑀢𑀢𑁆𑀢𑀓𑀲𑁆𑀲 𑀧𑀭𑀺𑀘𑁆𑀙𑁂𑀤𑀲𑁆𑀲. 𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀢𑀺 𑀅𑀥𑁄𑀲𑁄𑀢𑁂 𑀦𑀤𑀺𑀢𑀻𑀭𑁂 𑀞𑀺𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂. 𑀢𑀢𑁄𑀢𑀺 𑀦𑀺𑀫𑀺𑀢𑁆𑀢𑀢𑁄. 𑀢𑀲𑁆𑀲𑀸𑀢𑀺 𑀢𑀢𑁆𑀢𑀓𑀲𑁆𑀲 𑀧𑀭𑀺𑀘𑁆𑀙𑁂𑀤𑀲𑁆𑀲. 𑀲𑀫𑁆𑀫𑀼𑀔𑀸 𑀦𑀤𑀺𑀢𑀻𑀭𑁂 𑀦𑀺𑀫𑀺𑀢𑁆𑀢𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀖𑀝𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀣𑀸𑀢𑀺 𑀦𑀺𑀫𑀺𑀢𑁆𑀢𑀓𑀺𑀢𑁆𑀢𑀦𑀢𑁄 𑀧𑀘𑁆𑀙𑀸. ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀦𑁆𑀢𑁄 𑀞𑀺𑀢𑁂 𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑀕𑀢𑁂 𑀓𑀢𑁆𑀯𑀸’’𑀢𑀺 𑀇𑀤𑀁 𑀲𑀩𑁆𑀩𑀁 𑀏𑀓𑀁 𑀕𑀸𑀫𑀔𑁂𑀢𑁆𑀢𑀁 𑀩𑁆𑀬𑀸𑀧𑁂𑀢𑁆𑀯𑀸 𑀲𑀫𑁆𑀫𑀦𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀲𑀓𑀮𑀁 𑀕𑀸𑀫𑀔𑁂𑀢𑁆𑀢𑀁 𑀅𑀩𑁆𑀬𑀸𑀧𑁂𑀢𑁆𑀯𑀸 𑀏𑀓𑀤𑁂𑀲𑁂 𑀲𑀫𑁆𑀫𑀦𑀺𑀢𑀁 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀢𑁄 𑀩𑀳𑀺 𑀞𑀺𑀢𑁂 𑀪𑀺𑀓𑁆𑀔𑀽𑀧𑀺 𑀳𑀢𑁆𑀣𑀧𑀸𑀲𑀕𑀢𑁂 𑀓𑀢𑁆𑀯𑀸 𑀲𑀫𑁆𑀫𑀦𑀺𑀢𑀩𑁆𑀩𑀸. 𑀓𑀫𑁆𑀫𑀦𑁆𑀢𑀺 𑀲𑀻𑀫𑀲𑀫𑁆𑀫𑀼𑀢𑀺𑀓𑀫𑁆𑀫𑀁. ‘‘𑀞𑀧𑁂𑀢𑁆𑀯𑀸 𑀦𑀤𑀺’’𑀦𑁆𑀢𑀺𑀯𑀘𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀤𑀻 𑀧𑀦 𑀩𑀤𑁆𑀥𑀲𑀻𑀫𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺.

𑀤𑀻𑀧𑀓𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀤𑀻𑀧𑁄𑀢𑀺 𑀅𑀦𑁆𑀢𑀭𑀤𑀻𑀧𑁄. 𑀲𑁄 𑀳𑀺 𑀬𑀲𑁆𑀫𑀸 𑀚𑀮𑀫𑀚𑁆𑀛𑁂 𑀤𑀺𑀧𑁆𑀧𑀢𑀺, 𑀬𑀲𑁆𑀫𑀸 𑀘 𑀤𑁆𑀯𑀺𑀥𑀸 𑀆𑀧𑁄 𑀏𑀢𑁆𑀣 𑀲𑀦𑁆𑀤𑀢𑀺, 𑀢𑀲𑁆𑀫𑀸 𑀤𑀻𑀧𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄𑀬𑁂𑀯 𑀔𑀼𑀤𑁆𑀤𑀓𑀝𑁆𑀞𑁂𑀦 𑀤𑀻𑀧𑀓𑁄. 𑀓𑀓𑀸𑀭𑁄 𑀳𑀺 𑀔𑀼𑀤𑁆𑀤𑀓𑀢𑁆𑀣𑀯𑀸𑀘𑀓𑁄. 𑀢𑀦𑁆𑀢𑀺 𑀤𑀻𑀧𑀓𑀁. 𑀅𑀢𑁆𑀢𑀦𑀸𑀢𑀺 𑀯𑀺𑀦𑀬𑀥𑀭𑁂𑀦. 𑀑𑀭𑀺𑀫𑀦𑁆𑀢𑁂 𑀘 𑀧𑀸𑀭𑀺𑀫𑀦𑁆𑀢𑁂 𑀘𑀸𑀢𑀺 𑀅𑀥𑁄𑀲𑁄𑀢𑁂 𑀦𑀤𑀺𑀢𑀻𑀭𑁂 𑀞𑀺𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑁂 𑀑𑀭𑀺𑀫𑀦𑁆𑀢𑁂 𑀘 𑀧𑀸𑀭𑀺𑀫𑀦𑁆𑀢𑁂 𑀘. 𑀧𑀭𑀢𑀻𑀭𑁂 𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑁂 𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀝𑁆𑀞𑀸𑀦𑁂’’𑀢𑀺. 𑀢𑀢𑁄𑀢𑀺 𑀦𑀺𑀫𑀺𑀢𑁆𑀢𑀢𑁄. 𑀲𑀫𑁆𑀫𑀼𑀔𑀸 𑀦𑀺𑀫𑀺𑀢𑁆𑀢𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀭𑀺𑀫𑀦𑁆𑀢𑁂 𑀘 𑀑𑀭𑀺𑀫𑀦𑁆𑀢𑁂 𑀘𑀸𑀢𑀺 𑀧𑀭𑀢𑀻𑀭𑁂 𑀉𑀧𑀭𑀺𑀲𑁄𑀢𑁂 𑀞𑀺𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀭𑀺𑀫𑀦𑁆𑀢𑁂 𑀘 𑀑𑀭𑀺𑀫𑀦𑁆𑀢𑁂 𑀘. 𑀧𑀞𑀫𑀓𑀺𑀢𑁆𑀢𑀺𑀢𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀑𑀭𑀺𑀫𑀢𑀻𑀭𑁂 𑀉𑀧𑀭𑀺𑀲𑁄𑀢𑁂 𑀧𑀞𑀫𑀁 𑀓𑀺𑀢𑁆𑀢𑀺𑀢𑁂𑀦 𑀦𑀺𑀫𑀺𑀢𑁆𑀢𑁂𑀦. 𑀏𑀓𑀸 𑀲𑀻𑀫𑀸 𑀇𑀫𑀲𑁆𑀲𑀸𑀢𑀺 𑀏𑀓𑀲𑀻𑀫𑁄, 𑀤𑀻𑀧𑀓𑁄. ‘‘𑀢𑀻𑀭𑀤𑁆𑀯𑀬𑀜𑁆𑀘𑀸’’𑀢𑀺 𑀧𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀏𑀓𑀲𑀻𑀫’’𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀯𑀘𑁆𑀘𑀫𑀦𑀧𑁂𑀓𑁆𑀔𑀺𑀢𑁆𑀯𑀸 ‘‘𑀏𑀓𑀲𑀻𑀫𑀸’’𑀢𑀺𑀧𑀺 𑀦𑀺𑀘𑁆𑀘𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀸𑀞𑁄 𑀅𑀢𑁆𑀣𑀺.

𑀉𑀤𑁆𑀥𑀁 𑀯𑀸 𑀅𑀥𑁄 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀅𑀥𑀺𑀓𑀢𑀭𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀯𑀺𑀳𑀸𑀭𑀲𑀻𑀫𑀧𑀭𑀺𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀲𑁆𑀲 𑀉𑀚𑀼𑀓𑀫𑁂𑀯𑀸𑀢𑀺 𑀲𑀘𑁂 𑀤𑀻𑀧𑀓𑁄 𑀅𑀥𑁄 𑀅𑀥𑀺𑀓𑀢𑀭𑁄 𑀳𑁄𑀢𑀺, 𑀑𑀭𑀺𑀫𑀢𑀻𑀭𑁂 𑀅𑀥𑁄𑀲𑁄𑀢𑁂 𑀞𑀺𑀢𑀲𑁆𑀲 𑀯𑀺𑀳𑀸𑀭𑀲𑀻𑀫𑀧𑀭𑀺𑀘𑁆𑀙𑁂𑀤𑀦𑀺𑀫𑀺𑀢𑁆𑀢𑀲𑁆𑀲 𑀉𑀚𑀼𑀓𑀫𑁂𑀯. 𑀲𑀺𑀔𑀭𑀦𑁆𑀢𑀺 𑀲𑀺𑀗𑁆𑀕𑀁. 𑀢𑀜𑁆𑀳𑀺 𑀲𑀺𑀔𑀁 𑀫𑀢𑁆𑀣𑀓𑀁 𑀭𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀺𑀔𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄𑀢𑀺 𑀤𑀻𑀧𑀓𑀲𑁆𑀲 𑀧𑀸𑀭𑀺𑀫𑀦𑁆𑀢𑀦𑀺𑀫𑀺𑀢𑁆𑀢𑀢𑁄. 𑀧𑀭𑀢𑀻𑀭𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀤𑀻𑀧𑀓𑀲𑁆𑀲 𑀯𑀺𑀳𑀸𑀭𑀲𑀻𑀫𑀧𑀭𑀺𑀘𑁆𑀙𑁂𑀤𑀢𑁄 𑀅𑀥𑁄 𑀅𑀥𑀺𑀓𑀢𑀭𑁂 𑀯𑀺𑀦𑀺𑀘𑁆𑀙𑀬𑁄. 𑀉𑀤𑁆𑀥𑀁 𑀅𑀥𑀺𑀓𑀢𑀭𑁂𑀧𑀺 𑀇𑀫𑀺𑀦𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑁄 𑀦 𑀤𑀲𑁆𑀲𑀺𑀢𑁄. 𑀧𑀩𑁆𑀩𑀢𑀲𑀡𑁆𑀞𑀸𑀦𑀸𑀢𑀺 𑀧𑀩𑁆𑀩𑀢𑁂𑀦 𑀲𑀫𑀁 𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀧𑀩𑁆𑀩𑀢𑀲𑀡𑁆𑀞𑀸𑀦𑀸.

𑀉𑀤𑁆𑀥𑀫𑁆𑀧𑀺 𑀅𑀥𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀉𑀪𑁄𑀧𑀺 𑀲𑀺𑀔𑀭𑀸𑀦𑀻𑀢𑀺 𑀉𑀤𑁆𑀥𑀁 𑀲𑀺𑀔𑀭𑀁, 𑀅𑀥𑁄 𑀲𑀺𑀔𑀭𑀦𑁆𑀢𑀺 𑀉𑀪𑁄𑀧𑀺 𑀲𑀺𑀔𑀭𑀸𑀦𑀺. 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑀸𑀢𑀺 𑀫𑀽𑀮𑁂 𑀘 𑀅𑀕𑁆𑀕𑁂 𑀘 𑀢𑀦𑀼𑀓𑀲𑁆𑀲 𑀫𑀚𑁆𑀛𑁂 𑀣𑀽𑀮𑀲𑁆𑀲 𑀫𑀼𑀤𑀺𑀗𑁆𑀕𑀲𑁆𑀲 𑀲𑀡𑁆𑀞𑀸𑀦𑀸.

𑀲𑀩𑁆𑀩𑀧𑀞𑀫𑁂𑀦 𑀦𑀬𑁂𑀦𑀸𑀢𑀺 𑀉𑀤𑁆𑀥𑀁 𑀅𑀥𑀺𑀓𑀦𑀬𑀲𑁆𑀲, 𑀅𑀥𑁄 𑀅𑀥𑀺𑀓𑀦𑀬𑀲𑁆𑀲, 𑀉𑀤𑁆𑀥𑀁𑀅𑀥𑁄𑀅𑀥𑀺𑀓𑀦𑀬𑀲𑁆𑀲 𑀘𑀸𑀢𑀺 𑀲𑀩𑁆𑀩𑁂𑀲𑀁 𑀦𑀬𑀸𑀦𑀁 𑀧𑀞𑀫𑁂𑀦 𑀯𑀺𑀳𑀸𑀭𑀲𑀻𑀫𑀤𑀻𑀧𑀓𑀸𑀦𑀁 𑀲𑀫𑁂𑀦 𑀦𑀬𑁂𑀦. 𑀧𑀡𑀯𑀲𑀡𑁆𑀞𑀸𑀦𑀸𑀢𑀺 𑀫𑀽𑀮𑁂 𑀘 𑀅𑀕𑁆𑀕𑁂 𑀘 𑀣𑀽𑀮𑀲𑁆𑀲 𑀫𑀚𑁆𑀛𑁂𑀢𑀦𑀼𑀓𑀲𑁆𑀲 𑀧𑀡𑀯𑀲𑁆𑀲 𑀲𑀡𑁆𑀞𑀸𑀦𑀸.

𑁭𑁨. 𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀣𑀸

𑁧𑁪𑁧. 𑀅𑀦𑀼𑀧𑀭𑀺𑀯𑁂𑀡𑀺𑀬𑀦𑁆𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑀲𑁆𑀲 𑀯𑀺𑀘𑁆𑀙𑀢𑁆𑀣𑀁, 𑀧𑀭𑀺𑀯𑁂𑀡𑀲𑀤𑁆𑀤𑀲𑁆𑀲 𑀘 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀭𑀺𑀯𑁂𑀡𑁂’’𑀢𑀺. 𑀧𑀭𑀺𑀯𑁂𑀡𑀲𑀤𑁆𑀤𑁄 𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀇𑀥 𑀧𑀦 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀲𑀗𑁆𑀓𑁂𑀢𑀁 𑀅𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀲𑀗𑁆𑀓𑁂𑀢𑁂𑀦𑀸𑀢𑀺 𑀧𑀤𑀲𑁆𑀲 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀢𑁆𑀢𑀁 𑀤𑀻𑀧𑁂𑀢𑀺. ‘‘𑀓𑀫𑁆𑀫𑀯𑀸𑀘𑀸𑀬𑀸’’𑀢𑀺 𑀇𑀫𑀺𑀦𑀸 𑀲𑀫𑀽𑀳𑀦𑀺𑀢𑁆𑀯𑀸𑀢𑀺 𑀧𑀤𑀲𑁆𑀲 𑀓𑀭𑀡𑀁 𑀤𑀲𑁆𑀲𑁂𑀢𑀺.

𑁧𑁪𑁨. 𑀬𑀢𑁄𑀢𑀺 𑀏𑀢𑁆𑀣 𑀢𑁄𑀧𑀘𑁆𑀘𑀬𑀲𑁆𑀲 𑀓𑀸𑀭𑀡𑀢𑁆𑀣𑁂 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸’’𑀢𑀺. ‘‘𑀳𑀢𑁆𑀣𑀧𑀸𑀲𑁂’’𑀢𑀺 𑀇𑀫𑀺𑀦𑀸 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀦𑀺𑀲𑀺𑀦𑁆𑀦𑁂 𑀅𑀓𑀢𑁄𑀯𑀲𑁆𑀲 𑀉𑀧𑁄𑀲𑀣𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦. 𑀉𑀧𑁄𑀲𑀣𑀲𑁆𑀲 𑀧𑀫𑀼𑀔𑀲𑁆𑀲 𑀅𑀩𑁆𑀪𑁄𑀓𑀸𑀲𑁂 𑀯𑀸 𑀫𑀸𑀴𑀓𑀸𑀤𑀻𑀲𑀼 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀫𑀺𑀢𑁆𑀢𑀼𑀧𑀕𑀸 𑀯𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑀸 𑀯𑀸𑀢𑀺 𑀳𑁂𑀝𑁆𑀞𑀸 𑀅𑀝𑁆𑀞𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀯𑀼𑀢𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀕𑀸 𑀯𑀸 𑀅𑀦𑀺𑀫𑀺𑀢𑁆𑀢𑀼𑀧𑀕𑀸 𑀯𑀸 𑀧𑀩𑁆𑀩𑀢𑀸𑀤𑀬𑁄 𑀯𑀸 𑀅𑀜𑁆𑀜𑁂 𑀯𑀸 𑀓𑀺𑀢𑁆𑀢𑁂𑀢𑀩𑁆𑀩𑀸.

𑀧𑀞𑀫𑀢𑀭𑀁 𑀦 𑀆𑀕𑀘𑁆𑀙𑀢𑀺, 𑀤𑀼𑀓𑁆𑀓𑀝𑀦𑁆𑀢𑀺 𑀉𑀧𑁄𑀲𑀣𑁂 𑀖𑁄𑀲𑀺𑀬𑀫𑀸𑀦𑁂 𑀧𑀞𑀫𑀢𑀭𑀁 𑀦 𑀆𑀕𑀘𑁆𑀙𑀢𑀺, 𑀤𑀼𑀓𑁆𑀓𑀝𑀁. 𑀯𑀺𑀳𑀸𑀭𑀲𑁆𑀲 𑀫𑀚𑁆𑀛𑁂 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀧𑁄𑀭𑀸𑀡𑀓𑁂 𑀆𑀯𑀸𑀲𑁂. 𑀢𑀢𑁆𑀣𑀸𑀢𑀺 𑀧𑁄𑀭𑀸𑀡𑀓𑁂 𑀆𑀯𑀸𑀲𑁂. 𑀅𑀲𑀫𑁆𑀩𑀸𑀥𑁄𑀢𑀺 𑀲𑀗𑁆𑀖𑀲𑁆𑀲 𑀦𑀺𑀲𑀚𑁆𑀚𑀝𑁆𑀞𑀸𑀦𑀧𑀳𑁄𑀦𑀓𑁄. 𑀢𑀢𑁆𑀣𑀸𑀢𑀺 𑀧𑀘𑁆𑀙𑀸 𑀉𑀝𑁆𑀞𑀺𑀢𑁂 𑀆𑀯𑀸𑀲𑁂.

𑀲𑀩𑁆𑀩𑁂𑀲𑀁 𑀦𑀺𑀲𑀚𑁆𑀚𑀝𑁆𑀞𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀣𑁂𑀭𑀲𑁆𑀲 𑀯𑀺𑀳𑀸𑀭𑁂. 𑀲𑁄𑀢𑀺 𑀣𑁂𑀭𑀲𑁆𑀲 𑀯𑀺𑀳𑀸𑀭𑁄. 𑀏𑀢𑁆𑀣𑀸𑀢𑀺 𑀢𑀼𑀫𑁆𑀳𑀸𑀓𑀁 𑀯𑀺𑀳𑀸𑀭𑁂. 𑀲𑀩𑁆𑀩𑁂𑀲𑀁 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀢𑀁 𑀅𑀲𑀼𑀓𑀁 𑀦𑀸𑀫 𑀆𑀯𑀸𑀲𑀁. ‘‘𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀣𑁂𑀭𑀲𑁆𑀲.

𑁭𑁪. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀼𑀚𑀸𑀦𑀦𑀓𑀣𑀸

𑁧𑁪𑁩. 𑀅𑀦𑁆𑀥𑀓𑀯𑀺𑀦𑁆𑀤𑀁 𑀦𑀸𑀫𑀸𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀢𑀦𑁆𑀢𑀺 𑀅𑀦𑁆𑀥𑀓𑀯𑀺𑀦𑁆𑀤𑀁. 𑀣𑁂𑀭𑁄𑀢𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄. 𑀢𑀢𑁄𑀢𑀺 𑀅𑀦𑁆𑀥𑀓𑀯𑀺𑀦𑁆𑀤𑀢𑁄. 𑀇𑀫𑀺𑀦𑀸 ‘‘𑀅𑀦𑁆𑀥𑀓𑀯𑀺𑀦𑁆𑀤𑀸’’𑀢𑀺 𑀏𑀢𑁆𑀣 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀉𑀧𑁄𑀲𑀣𑀦𑁆𑀢𑀺 𑀢𑀤𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀉𑀧𑁄𑀲𑀣𑀢𑁆𑀣𑀸𑀬𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀦𑁆𑀥𑀓𑀯𑀺𑀦𑁆𑀤𑀸 𑀭𑀸𑀚𑀕𑀳𑀁 𑀆𑀕𑀫𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀸𑀚𑀕𑀳𑀁 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀻𑀢𑀺 𑀬𑀲𑁆𑀫𑀸. 𑀅𑀦𑁆𑀥𑀓𑀯𑀺𑀦𑁆𑀤𑀸 𑀯𑀺𑀳𑀸𑀭𑀁 𑀅𑀦𑁆𑀢𑁄 𑀓𑀢𑁆𑀯𑀸 ‘‘𑀅𑀝𑁆𑀞𑀸𑀭𑀲 𑀫𑀳𑀸𑀯𑀺𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀦𑁂𑀲𑀦𑁆𑀢𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀳𑀸𑀯𑀺𑀳𑀸𑀭𑀸𑀦𑀁. 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀤𑀸𑀦𑀢𑁆𑀣𑀦𑁆𑀢𑀺 𑀏𑀢𑁆𑀣 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀤𑀸𑀦𑀁 𑀅𑀢𑁆𑀢𑀦𑁄 𑀉𑀧𑁄𑀲𑀣𑀓𑀺𑀘𑁆𑀘𑀁 𑀲𑀺𑀤𑁆𑀥𑀁. 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀲𑀺𑀧𑁆𑀧𑀺𑀦𑀺𑀬𑀁 𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀦𑀤𑀺𑀁 𑀢𑀭𑀦𑁆𑀢𑁄𑀢𑀺 𑀏𑀢𑁆𑀣 𑀦𑀤𑀺𑀬𑀸 𑀦𑀸𑀫𑀁 𑀤𑀲𑁆𑀲𑁂𑀢𑀺. 𑀫𑀦𑀁 𑀯𑀽𑀴𑁆𑀳𑁄𑀢𑀺 𑀏𑀢𑁆𑀣 𑀫𑀦𑀦𑁆𑀢𑀺 𑀦𑀺𑀧𑀸𑀢𑁄 𑀈𑀲𑀓𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀈𑀲𑀓’’𑀦𑁆𑀢𑀺. ‘‘𑀅𑀧𑁆𑀧𑀫𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 ‘‘𑀈𑀲𑀓’’𑀦𑁆𑀢𑀺𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀯𑀽𑀴𑁆𑀳𑀪𑀸𑀯𑁄’’𑀢𑀺 𑀇𑀫𑀺𑀦𑀸 𑀪𑀸𑀯𑀧𑀘𑁆𑀘𑀬𑁂𑀦 𑀯𑀺𑀦𑀸 𑀪𑀸𑀯𑀢𑁆𑀣𑁄 𑀜𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀘𑀡𑁆𑀟𑁂𑀦𑀸𑀢𑀺 𑀔𑀭𑁂𑀦. 𑀢𑀢𑁆𑀣𑀸𑀢𑀺 𑀦𑀤𑀺𑀬𑀁. 𑀅𑀫𑀦𑀲𑀺𑀓𑀭𑁄𑀦𑁆𑀢𑁄𑀢𑀺 ‘‘𑀘𑀡𑁆𑀟𑀲𑁄𑀢’’𑀦𑁆𑀢𑀺 𑀆𑀪𑁄𑀕𑀁 𑀅𑀓𑀭𑁄𑀦𑁆𑀢𑁄. 𑀦 𑀧𑀦 𑀯𑀽𑀴𑁆𑀳𑁄𑀢𑀺 𑀦 𑀧𑀦 𑀫𑀳𑀸𑀯𑀽𑀴𑁆𑀳𑁄. 𑀉𑀤𑀓𑀩𑁆𑀪𑀸𑀳𑀢𑀸𑀦𑀻𑀢𑀺 𑀉𑀤𑀓𑁂𑀦 𑀅𑀪𑀺𑀆𑀳𑀢𑀸𑀦𑀺. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀅𑀮𑁆𑀮𑀸𑀦𑀻𑀢𑀺 𑀢𑀺𑀦𑁆𑀢𑀸𑀦𑀺.

𑁧𑁪𑁪. 𑀧𑀼𑀭𑀺𑀫𑀓𑀫𑁆𑀫𑀯𑀸𑀘𑀸𑀢𑀺 ‘‘𑀲𑀫𑁆𑀫𑀢𑀸 𑀲𑀸 𑀲𑀻𑀫𑀸 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀸’’𑀢𑀺 𑀧𑀼𑀭𑁂 𑀯𑀼𑀢𑁆𑀢𑀸 𑀓𑀫𑁆𑀫𑀯𑀸𑀘𑀸. 𑀅𑀬𑀫𑁂𑀯𑀸𑀢𑀺 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺𑀧𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀼𑀧𑀜𑁆𑀜𑀢𑁆𑀢𑀸 𑀅𑀬𑀫𑁂𑀯 𑀓𑀫𑁆𑀫𑀯𑀸𑀘𑀸. 𑀅𑀬𑀦𑁆𑀢𑀺 𑀧𑀘𑁆𑀙𑀺𑀫𑀓𑀫𑁆𑀫𑀯𑀸𑀘𑀸. 𑀳𑀺 𑀬𑀲𑁆𑀫𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀦𑁆𑀢𑁄𑀕𑀸𑀫𑁂 𑀯𑀲𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀸𑀬𑁂𑀯 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀬𑀁 𑀧𑀘𑁆𑀙𑀺𑀫𑀓𑀫𑁆𑀫𑀯𑀸𑀘𑀸 𑀯𑀝𑁆𑀝𑀦𑀁 𑀲𑀺𑀬𑀸 𑀪𑀯𑁂𑀬𑁆𑀬, 𑀏𑀯𑀁 𑀲𑀢𑀻𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄. 𑀏𑀢𑀸𑀬 𑀓𑀫𑁆𑀫𑀯𑀸𑀘𑀸𑀬𑀸𑀢𑀺 𑀧𑀘𑁆𑀙𑀺𑀫𑀓𑀫𑁆𑀫𑀯𑀸𑀘𑀸𑀬. 𑀦 𑀮𑀪𑁂𑀬𑁆𑀬𑀸𑀢𑀺 𑀅𑀦𑁆𑀢𑁄𑀕𑀸𑀫𑁂 𑀯𑀲𑀦𑀢𑁆𑀢𑀸 𑀢𑀺𑀘𑀻𑀯𑀭𑀧𑀭𑀺𑀳𑀸𑀭𑀁 𑀦 𑀮𑀪𑁂𑀬𑁆𑀬. 𑀓𑀺𑀁 𑀦 𑀮𑀪𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀅𑀢𑁆𑀣𑀺 𑀘𑀲𑁆𑀲 𑀧𑀭𑀺𑀳𑀸𑀭𑁄’’𑀢𑀺. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲. 𑀤𑁆𑀯𑁂𑀧𑀺 𑀲𑀻𑀫𑀸𑀬𑁄𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸 𑀘 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀘𑀸𑀢𑀺 𑀤𑁆𑀯𑁂𑀧𑀺 𑀲𑀻𑀫𑀸𑀬𑁄. 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀲𑀼. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀽𑀦𑀁 𑀲𑀻𑀫𑀸𑀬. 𑀏𑀲𑁂𑀯 𑀦𑀬𑁄𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸𑀧𑀺 𑀅𑀦𑁆𑀢𑁄𑀧𑀯𑀺𑀲𑀺𑀢𑁆𑀯𑀸𑀧𑀺 𑀪𑀺𑀓𑁆𑀔𑀽𑀦𑀁 𑀲𑀻𑀫𑀸𑀬 𑀲𑀫𑁆𑀫𑀦𑁂 𑀏𑀲𑁂𑀯 𑀦𑀬𑁄. 𑀏𑀢𑁂𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄. 𑀲𑀸𑀫𑀜𑁆𑀜𑀢𑁆𑀢𑀸 𑀳𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀘𑀸𑀢𑀺 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺𑀧𑀤𑁂 𑀘. 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀲𑁆𑀫𑀸? 𑀕𑀸𑀫𑁂𑀦 𑀦𑀺𑀕𑀫𑀦𑀕𑀭𑀸𑀦𑀁 𑀏𑀓𑀮𑀓𑁆𑀔𑀡𑀢𑁆𑀢𑀸.

𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑁄𑀢𑀺 𑀧𑀭𑀺𑀓𑁆𑀔𑁂𑀧𑀸𑀭𑀳𑁄𑀓𑀸𑀲𑁄. 𑀢𑁂𑀲𑀽𑀢𑀺 𑀕𑀸𑀫𑀕𑀸𑀫𑀽𑀧𑀘𑀸𑀭𑁂𑀲𑀼. 𑀧𑀭𑀺𑀳𑀸𑀭𑀦𑁆𑀢𑀺 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀆𑀧𑀢𑁆𑀢𑀺𑀅𑀧𑀦𑀬𑀦𑀁. ‘‘𑀇𑀢𑀻’’𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀏𑀢𑁆𑀣𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀲𑀼. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀲𑁆𑀲𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬. 𑀯𑀺𑀲𑀼𑀦𑁆𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀢𑁄 𑀧𑀸𑀝𑁂𑀓𑁆𑀓𑀁. 𑀢𑀢𑁆𑀣𑀸𑀢𑀺 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼. 𑀅𑀯𑀺𑀧𑁆𑀧𑀯𑀸𑀲𑀸𑀬𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬. 𑀢𑀦𑁆𑀢𑀺 𑀕𑀸𑀫𑀁. 𑀲𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸. 𑀲𑀫𑁆𑀫𑀢𑀸𑀬 𑀲𑀻𑀫𑀸𑀬𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀲𑀫𑁆𑀫𑀢𑀸𑀬 𑀲𑀢𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀫𑀢𑀢𑁄 𑀧𑀘𑁆𑀙𑀸𑀢𑀺 𑀯𑀸 𑀬𑁄𑀚𑀦𑀸. 𑀦𑀺𑀯𑀺𑀲𑀢𑀻𑀢𑀺 𑀦𑀺𑀯𑀸𑀲𑀢𑁆𑀣𑀸𑀬 𑀯𑀺𑀲𑀢𑀺 𑀧𑀯𑀺𑀲𑀢𑀺. 𑀲𑁄𑀧𑀻𑀢𑀺 𑀕𑀸𑀫𑁄𑀧𑀺. 𑀲𑀻𑀫𑀲𑀗𑁆𑀔𑁆𑀬𑀁𑀬𑁂𑀯𑀸𑀢𑀺 𑀅𑀯𑀺𑀧𑁆𑀧𑀸𑀲𑀲𑀻𑀫𑀯𑁄𑀳𑀸𑀭𑀫𑁂𑀯. 𑀅𑀥𑀺𑀝𑁆𑀞𑀺𑀢𑀢𑁂𑀘𑀻𑀯𑀭𑀺𑀓𑀸 𑀪𑀺𑀓𑁆𑀔𑀽 𑀧𑀭𑀺𑀳𑀸𑀭𑀁 𑀮𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀧𑀘𑁆𑀙𑀸 𑀦𑀺𑀯𑀺𑀝𑁆𑀞𑁄 𑀕𑀸𑀫𑁄 𑀲𑀻𑀫𑀲𑀗𑁆𑀔𑁆𑀬𑀁𑀬𑁂𑀯 𑀕𑀘𑁆𑀙𑀢𑀺, 𑀏𑀯𑀦𑁆𑀢𑀺 𑀬𑁄𑀚𑀦𑀸. ‘‘𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀕𑁂𑀳𑀸𑀦𑀺 𑀓𑀢𑀸𑀦𑀺, ‘‘𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀮𑀬𑁄𑀧𑀺 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀆𑀮𑀬𑁄𑀧𑀻𑀢𑀺 𑀅𑀧𑁂𑀓𑁆𑀔𑁄𑀧𑀺. 𑀅𑀧𑀯𑀺𑀝𑁆𑀞𑀸𑀢𑀺 𑀕𑁂𑀳𑀸𑀦𑀺 𑀅𑀧𑀯𑀺𑀝𑁆𑀞𑀸. 𑀕𑁂𑀳𑀫𑁂𑀯 𑀙𑀟𑁆𑀟𑁂𑀢𑁆𑀯𑀸𑀢𑀺 𑀕𑁂𑀳𑀁 𑀙𑀟𑁆𑀟𑁂𑀢𑁆𑀯𑀸 𑀏𑀯. 𑀇𑀫𑀺𑀦𑀸 𑀕𑁂𑀳𑁂 𑀙𑀟𑁆𑀟𑀺𑀢𑁂 𑀲𑀩𑁆𑀩𑀁 𑀙𑀟𑁆𑀟𑀺𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀯𑀺𑀝𑁆𑀞𑀁 𑀯𑀸 𑀅𑀕𑀢𑀁 𑀯𑀸 𑀏𑀓𑀫𑁆𑀧𑀺 𑀓𑀼𑀮𑀁 𑀅𑀢𑁆𑀣𑀺 𑀲𑀘𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀏𑀓𑀫𑁆𑀧𑀺 𑀓𑀼𑀮𑀁 𑀧𑀯𑀺𑀝𑁆𑀞𑀁 𑀯𑀸’’𑀢𑀺 𑀇𑀤𑀁 𑀦𑀯𑀕𑀸𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀏𑀓𑀫𑁆𑀧𑀺 𑀓𑀼𑀮𑀁 𑀅𑀕𑀢𑀁 𑀯𑀸’’𑀢𑀺 𑀇𑀤𑀁 𑀧𑁄𑀭𑀸𑀡𑀓𑀕𑀸𑀫𑀁 𑀲𑀦𑁆𑀥𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀭𑀸𑀢𑀺 ‘‘𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺𑀯𑀘𑀦𑁂. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬𑀦𑁆𑀢𑀺 𑀫𑀳𑀸𑀲𑀻𑀫𑀸𑀬. 𑀲𑀸 𑀏𑀯 𑀳𑀺 𑀬𑀲𑁆𑀫𑀸 𑀅𑀯𑀺𑀧𑁆𑀧𑀯𑀸𑀲𑀓𑀫𑁆𑀫𑀯𑀸𑀘𑀸𑀬 𑀩𑀳𑀼𑀮𑀧𑀬𑁄𑀚𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑀸𑀬𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀤𑁆𑀯𑀻𑀲𑀼 𑀲𑀻𑀫𑀸𑀲𑀼. 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂𑀲𑀼 𑀞𑀢𑁆𑀯𑀸𑀢𑀺 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀦𑀁 𑀔𑀡𑁆𑀟𑀲𑀻𑀫𑀸𑀬 𑀅𑀦𑁄𑀓𑀸𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀔𑀡𑁆𑀟𑀲𑀻𑀫𑀜𑁆𑀳𑀺 𑀲𑀫𑁆𑀫𑀦𑀦𑁆𑀢𑀸 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀝𑁆𑀞𑀸𑀦𑀁 𑀧𑀳𑀸𑀬 𑀅𑀜𑁆𑀜𑀲𑁆𑀫𑀺𑀁 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑀁 𑀔𑀡𑁆𑀟𑀺𑀢𑁆𑀯𑀸 𑀲𑀫𑁆𑀫𑀦𑀦𑁆𑀢𑀺. 𑀲𑀫𑀽𑀳𑀦𑀺𑀢𑀼𑀦𑁆𑀢𑀺 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀁 𑀲𑀫𑀽𑀳𑀦𑀺𑀢𑀼𑀁. 𑀧𑀝𑀺𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯𑀸𑀢𑀺 𑀅𑀯𑀺𑀧𑁆𑀧𑀯𑀸𑀲𑀁𑀬𑁂𑀯 𑀚𑀸𑀦𑀺𑀢𑁆𑀯𑀸 𑀔𑀡𑁆𑀟𑀲𑀻𑀫𑀸𑀬 𑀅𑀜𑁆𑀜𑀸𑀢𑀢𑁆𑀢𑀸 𑀧𑀝𑀺𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑁂𑀯. 𑀲𑀻𑀫𑀲𑀫𑁆𑀪𑁂𑀤𑀦𑁆𑀢𑀺 𑀔𑀡𑁆𑀟𑀲𑀻𑀫𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀁 𑀲𑀫𑁆𑀪𑁂𑀤𑀁. 𑀲𑀸𑀲𑀦𑀦𑁆𑀢𑀭𑀥𑀸𑀦𑁂𑀦 𑀯𑀸𑀢𑀺 𑀲𑀢𑁆𑀣𑀼 𑀆𑀡𑀸𑀬 𑀅𑀦𑁆𑀢𑀭𑀥𑀸𑀦𑁂𑀦 𑀯𑀸. 𑀲𑀸𑀥𑀼𑀓𑀁 𑀧𑀦𑀸𑀢𑀺 𑀦𑀺𑀓𑁆𑀓𑀗𑁆𑀔𑀁 𑀧𑀦.

𑁭𑁬. 𑀕𑀸𑀫𑀲𑀻𑀫𑀸𑀤𑀺𑀓𑀣𑀸

𑁧𑁪𑁭. 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀲𑁂𑀲𑀓𑀫𑁆𑀫𑀯𑀲𑁂𑀦 𑀲𑀫𑀸𑀦𑀲𑀁𑀯𑀸𑀲𑀓𑀢𑀸 𑀕𑀳𑁂𑀢𑀩𑁆𑀩𑀸 𑀕𑁄𑀩𑀮𑀺𑀩𑀤𑁆𑀤𑀦𑀬𑁂𑀦 𑀯𑀸 𑀧𑀸𑀭𑀺𑀲𑁂𑀲𑀦𑀬𑁂𑀦 𑀯𑀸. 𑀢𑀦𑁆𑀢𑀺 𑀲𑀫𑀸𑀦𑀲𑀁𑀯𑀸𑀲𑀏𑀓𑀽𑀧𑁄𑀲𑀣𑀪𑀸𑀯𑀁. ‘‘𑀅𑀧𑀭𑀺𑀘𑁆𑀙𑀺𑀦𑁆𑀦𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀝𑁆𑀞𑀧𑀺𑀢𑀸𑀬𑀸𑀢𑀺 𑀏𑀢𑁆𑀣 𑀞𑀧𑀥𑀸𑀢𑀼𑀬𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸𑀢𑀺 𑀏𑀢𑁆𑀣 𑀦𑀕𑀭𑀁 𑀓𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀕𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 ‘‘𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸’’𑀢𑀺 𑀧𑀸𑀞𑁂, 𑀕𑀸𑀫𑀕𑁆𑀕𑀳𑀡𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀏𑀢𑁆𑀣𑀸𑀢𑀺 𑀕𑀸𑀫𑀦𑀺𑀕𑀫𑀦𑀕𑀭𑁂𑀲𑀼, 𑀦𑀕𑀭𑀫𑁆𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀸𑀫𑀸𑀤𑀻𑀦𑀁 𑀧𑀭𑀺𑀘𑁆𑀙𑁂𑀤𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀕𑀸𑀫𑀦𑀺𑀕𑀫𑀦𑀕𑀭𑁂𑀲𑀼. 𑀕𑀸𑀫𑀪𑁄𑀚𑀓𑀸𑀢𑀺 𑀕𑀸𑀫𑀁 𑀪𑀼𑀜𑁆𑀚𑀦𑁆𑀢𑀻𑀢𑀺 𑀕𑀸𑀫𑀪𑁄𑀚𑀓𑀸. 𑀩𑀮𑀺𑀦𑁆𑀢𑀺 𑀓𑀭𑀁. 𑀲𑁄 𑀳𑀺 𑀢𑀁 𑀦𑀺𑀲𑁆𑀲𑀸𑀬 𑀕𑀸𑀫𑀪𑁄𑀚𑀓𑀸 𑀩𑀮𑀦𑁆𑀢𑀺 𑀚𑀻𑀯𑀦𑁆𑀢𑀺 𑀅𑀦𑁂𑀦𑀸𑀢𑀺 𑀩𑀮𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀫𑁆𑀧𑀺 𑀏𑀓𑀁 𑀧𑀤𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀕𑀸𑀫𑀔𑁂𑀢𑁆𑀢𑁂𑀢𑀺 𑀭𑀜𑁆𑀜𑁄 𑀆𑀡𑀸 𑀔𑀺𑀧𑀺𑀬𑀢𑀺 𑀏𑀢𑁆𑀣𑀸𑀢𑀺 𑀔𑁂𑀢𑁆𑀢𑀁, 𑀕𑀸𑀫𑁄𑀬𑁂𑀯 𑀔𑁂𑀢𑁆𑀢𑀁 𑀕𑀸𑀫𑀔𑁂𑀢𑁆𑀢𑀁, 𑀢𑀲𑁆𑀫𑀺𑀁. 𑀅𑀬𑀫𑁆𑀧𑀻𑀢𑀺 𑀅𑀬𑀁 𑀧𑀤𑁂𑀲𑁄𑀧𑀺. 𑀲𑁄𑀧𑀻𑀢𑀺 𑀧𑀤𑁂𑀲𑁄𑀧𑀺. 𑀯𑀺𑀲𑀼𑀁𑀕𑀸𑀫𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑁄𑀧𑀺 𑀯𑀺𑀲𑀼𑀁𑀕𑀸𑀫𑁄 𑀕𑀸𑀫𑀲𑀻𑀫𑀸 𑀳𑁄𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀯𑀺𑀲𑀼𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀦𑁆𑀦𑁄 𑀕𑀸𑀫𑁄 𑀯𑀺𑀲𑀼𑀁𑀕𑀸𑀫𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀲𑀼𑀁 𑀕𑀸𑀫𑁄 𑀳𑁄𑀢𑀺, 𑀢𑀲𑁆𑀫𑀸. 𑀲𑀸 𑀘𑀸𑀢𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀘. 𑀇𑀢𑀭𑀸𑀢𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀢𑁄 𑀅𑀜𑁆𑀜𑀸 𑀧𑀓𑀢𑀺𑀕𑀸𑀫𑀦𑀕𑀭𑀦𑀺𑀕𑀫𑀲𑀻𑀫𑀸 𑀘𑀸𑀢𑀺 𑀬𑁄𑀚𑀦𑀸.

𑀏𑀯𑀦𑁆𑀢𑀺 ‘‘𑀅𑀲𑀫𑁆𑀫𑀢𑀸𑀬 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀧𑀸𑀞𑁂𑀦. 𑀢𑀦𑁆𑀢𑀺 𑀲𑀻𑀫𑀧𑀭𑀺𑀘𑁆𑀙𑁂𑀤𑀁. 𑀅𑀧𑀭𑀺𑀘𑁆𑀙𑀺𑀦𑁆𑀦𑁂𑀢𑀺 𑀭𑀸𑀚𑀽𑀳𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑁂. ‘‘𑀅𑀝𑀯𑀺𑀧𑀤𑁂𑀲𑁂’’𑀢𑀺 𑀇𑀫𑀺𑀦𑀸 𑀦𑀢𑁆𑀣𑀺 𑀕𑀸𑀫𑁄 𑀏𑀢𑁆𑀣𑀸𑀢𑀺 𑀅𑀕𑀸𑀫𑀓𑁄𑀢𑀺 𑀯𑀘𑀦𑀢𑁆𑀣𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀯𑀺𑀚𑁆𑀛𑀸𑀝𑀯𑀺𑀲𑀤𑀺𑀲𑁂𑀢𑀺 𑀯𑀺𑀕𑀢𑀁 𑀅𑀕𑁆𑀕𑀺𑀦𑁄 𑀛𑀸𑀬𑀦𑀫𑁂𑀢𑁆𑀣𑀸𑀢𑀺 𑀯𑀺𑀚𑁆𑀛𑀸, 𑀘𑁄𑀭𑀸𑀤𑀬𑁄 𑀫𑀦𑀼𑀲𑁆𑀲𑁂 𑀆𑀪𑀼𑀲𑁄 𑀝𑀯𑀦𑁆𑀢𑀺 𑀧𑀻𑀴𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀝𑀯𑀺. 𑀯𑀺𑀚𑁆𑀛𑀸 𑀘 𑀲𑀸 𑀆𑀝𑀯𑀺 𑀘𑁂𑀢𑀺 𑀯𑀺𑀚𑁆𑀛𑀸𑀝𑀯𑀺, 𑀢𑀸𑀬 𑀲𑀤𑀺𑀲𑁂 𑀯𑀺𑀚𑁆𑀛𑀸𑀝𑀯𑀺𑀲𑀤𑀺𑀲𑁂. 𑀏𑀢𑁆𑀣 𑀧𑀼𑀭𑀺𑀫𑀦𑀬𑁂 𑀕𑀸𑀫𑀸𑀤𑀻𑀳𑀺 𑀆𑀲𑀦𑁆𑀦𑁄 𑀯𑀸 𑀳𑁄𑀢𑀼, 𑀅𑀦𑀸𑀲𑀦𑁆𑀦𑁄 𑀯𑀸 𑀢𑁂𑀳𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀝𑀯𑀺𑀧𑀤𑁂𑀲𑁄 𑀕𑀳𑁂𑀢𑀩𑁆𑀩𑁄. 𑀧𑀘𑁆𑀙𑀺𑀫𑀦𑀬𑁂 𑀤𑀽𑀭𑁄 𑀫𑀦𑀼𑀲𑁆𑀲𑀸𑀦𑀁 𑀅𑀦𑀸𑀕𑀫𑀦𑀧𑀣𑁄 𑀆𑀝𑀯𑀺𑀧𑀤𑁂𑀲𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀲𑀫𑀦𑁆𑀢𑀸𑀢𑀺 𑀲𑀫𑀦𑁆𑀢𑀢𑁄. 𑀅𑀬𑀁 𑀲𑀻𑀫𑀸𑀢𑀺 𑀅𑀬𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸. 𑀢𑀢𑁆𑀣𑀸𑀢𑀺 𑀲𑀢𑁆𑀢𑀲𑀼 𑀅𑀩𑁆𑀪𑀦𑁆𑀢𑀭𑁂𑀲𑀼. 𑀲𑀫𑀦𑁆𑀢𑀸 𑀞𑀺𑀢𑀲𑁆𑀲 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀅𑀩𑁆𑀪𑀦𑁆𑀢𑀭𑁂 𑀅𑀦𑁆𑀢𑁄𑀓𑁄𑀝𑁆𑀞𑀸𑀲𑁂 𑀚𑀸𑀢𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀳𑀢𑁆𑀣𑀧𑀫𑀸𑀡𑀁.

𑀬𑀸 𑀓𑀸𑀘𑀺 𑀦𑀤𑀻 𑀅𑀲𑀻𑀫𑀸𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀤𑀻𑀲𑀻𑀫𑀮𑀓𑁆𑀔𑀡𑀧𑀢𑁆𑀢𑀸𑀢𑀺 𑀦𑀤𑀻𑀲𑀻𑀫𑀮𑀓𑁆𑀔𑀡𑀁 𑀧𑀢𑁆𑀢𑀸. 𑀇𑀫𑀺𑀦𑀸 𑀲𑀻𑀫𑀮𑀓𑁆𑀔𑀡𑀁 𑀅𑀧𑀢𑁆𑀢𑀸 𑀦𑀤𑀻 𑀩𑀦𑁆𑀥𑀺𑀬𑀫𑀸𑀦𑀸 𑀲𑀻𑀫𑀸𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀯𑀥𑀸𑀭𑀡𑁂𑀦 ‘‘𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀽𑀦𑀁 𑀩𑀦𑁆𑀥𑀦𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀏𑀢𑁆𑀣𑀸𑀢𑀺 𑀦𑀤𑀺𑀬𑀁. 𑀏𑀢𑁆𑀣𑀸𑀢𑀺 𑀚𑀸𑀢𑀲𑁆𑀲𑀭𑀲𑀫𑀼𑀤𑁆𑀤𑁂𑀲𑀼. 𑀬𑁂𑀦 𑀓𑁂𑀦𑀘𑀻𑀢𑀺 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺 𑀬𑁂𑀦 𑀓𑁂𑀦𑀘𑀺. 𑀔𑀡𑀺𑀢𑁆𑀯𑀸 𑀅𑀓𑀢𑁄 𑀲𑀬𑀁𑀚𑀸𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀁. 𑀔𑀡𑀺𑀢𑁆𑀯𑀸 𑀅𑀓𑀢𑀢𑁆𑀢𑀸𑀢𑀺 𑀳𑀺 𑀅𑀢𑁆𑀣𑁄. 𑀲𑀬𑀁𑀚𑀸𑀢𑁄𑀢𑀺 𑀲𑀬𑀫𑁂𑀯 𑀚𑀸𑀢𑁄𑀢𑀺 𑀏𑀯𑀓𑀸𑀭𑁄 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀦 𑀓𑁂𑀦𑀘𑀺 𑀔𑀡𑀺𑀢𑁆𑀯𑀸 𑀅𑀓𑀢𑁄’’𑀢𑀺. 𑀲𑁄𑀩𑁆𑀪𑁄𑀢𑀺 𑀲𑀁 𑀉𑀪𑁄𑀢𑀺 𑀧𑀤𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣 𑀲𑀁𑀲𑀤𑁆𑀤𑁄 𑀲𑀫𑀦𑁆𑀢𑀢𑁆𑀣𑀯𑀸𑀘𑀓𑁄, 𑀉𑀪𑀲𑀤𑁆𑀤𑁄 𑀧𑀽𑀭𑀡𑀢𑁆𑀣𑀯𑀸𑀘𑀓𑁄. 𑀢𑀲𑁆𑀫𑀸 𑀲𑀫𑀦𑁆𑀢𑀢𑁄 𑀆𑀕𑀢𑁂𑀦 𑀉𑀤𑀓𑁂𑀦 𑀉𑀪𑀢𑀺 𑀧𑀽𑀭𑀢𑀺 𑀏𑀢𑁆𑀣𑀸𑀢𑀺 𑀲𑁄𑀩𑁆𑀪𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀢𑁄 𑀆𑀕𑀢𑁂𑀦 𑀉𑀤𑀓𑁂𑀦 𑀧𑀽𑀭𑀺𑀢𑁄 𑀢𑀺𑀝𑁆𑀞𑀢𑀻’’𑀢𑀺.

𑀢𑀢𑁆𑀣𑀸𑀢𑀺 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼, 𑀆𑀥𑀸𑀭𑁂 𑀪𑀼𑀫𑁆𑀫𑀁. 𑀬𑀁𑀲𑀤𑁆𑀤𑁄 𑀞𑀸𑀦𑀯𑀺𑀲𑀬𑁄𑀢𑀺 𑀆𑀳 ‘‘𑀬𑀁 𑀞𑀸𑀦’’𑀦𑁆𑀢𑀺. 𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲. 𑀯𑀓𑁆𑀔𑀢𑀺 𑀳𑀺 ‘‘𑀣𑀸𑀫𑀫𑀚𑁆𑀛𑀺𑀫𑁂𑀦𑀸’’𑀢𑀺. ‘‘𑀲𑀫𑀦𑁆𑀢𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑀦𑁆𑀢𑀸𑀢𑀺 𑀏𑀢𑁆𑀣 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀉𑀤𑀓𑀼𑀓𑁆𑀔𑁂𑀧𑁂𑀦𑀸’’𑀢𑀺 𑀇𑀫𑀺𑀦𑀸 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀏𑀢𑁆𑀣 𑀓𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀬𑀢𑀺 𑀏𑀢𑁆𑀣𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑁄. ‘‘𑀧𑀭𑀺𑀘𑁆𑀙𑀺𑀦𑁆𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀅𑀓𑁆𑀔𑀥𑀼𑀢𑁆𑀢𑀸𑀢𑀺 𑀏𑀢𑁆𑀣 𑀅𑀓𑁆𑀔𑁄𑀢𑀺 𑀧𑀸𑀲𑀓𑁄. 𑀲𑁄 𑀳𑀺 𑀅𑀓𑀢𑀺 𑀓𑀼𑀝𑀺𑀮𑀁 𑀕𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀅𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺, 𑀥𑀯𑀦𑁆𑀢𑀺 𑀫𑀭𑀺𑀬𑀸𑀤𑀫𑀢𑀺𑀓𑁆𑀓𑀫𑁆𑀫 𑀓𑀻𑀴𑀸𑀤𑀺𑀧𑀲𑀼𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀥𑀼𑀢𑁆𑀢𑀸, 𑀅𑀓𑁆𑀔𑁂𑀲𑀼 𑀥𑀼𑀢𑁆𑀢𑀸 𑀅𑀓𑁆𑀔𑀥𑀼𑀢𑁆𑀢𑀸. 𑀤𑀸𑀭𑀼𑀕𑀼𑀴𑀦𑁆𑀢𑀺 𑀲𑀸𑀭𑀤𑀸𑀭𑀼𑀫𑀬𑀁 𑀕𑀼𑀴𑀁. ‘‘𑀯𑀸𑀮𑀼𑀓𑀁 𑀯𑀸’’𑀢𑀺 𑀇𑀫𑀺𑀦𑀸 ‘‘𑀉𑀤𑀓𑀼𑀓𑁆𑀔𑁂𑀧𑀸’’𑀢𑀺 𑀏𑀢𑁆𑀣 𑀉𑀧𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂. 𑀅𑀬𑀦𑁆𑀢𑀺 𑀧𑀤𑁂𑀲𑁄. 𑀢𑀲𑁆𑀲𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑀲𑁆𑀲.

𑀏𑀢𑁆𑀣𑀸𑀢𑀺 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼. 𑀫𑀼𑀔𑀤𑁆𑀯𑀸𑀭𑀦𑁆𑀢𑀺 𑀲𑀫𑀼𑀤𑁆𑀤𑀸𑀤𑀻𑀦𑀁 𑀫𑀼𑀔𑀲𑀗𑁆𑀔𑀸𑀢𑀁 𑀤𑁆𑀯𑀸𑀭𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀸𑀬 𑀦𑀤𑀺𑀬𑀁. 𑀣𑁂𑀭𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. ‘‘𑀬𑁄𑀚𑀦𑀁…𑀧𑁂… 𑀯𑀝𑁆𑀝𑀢𑀻’’𑀢𑀺 𑀬𑀁 𑀧𑀦 𑀯𑀘𑀦𑀁 𑀫𑀳𑀸𑀲𑀼𑀫𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀧𑀻𑀢𑀺 𑀬𑁄𑀚𑀦𑀦𑀤𑀺𑀬𑀫𑁆𑀧𑀺. 𑀧𑀝𑀺𑀓𑁆𑀔𑀺𑀢𑁆𑀢𑀸𑀓𑀸𑀭𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺. 𑀦𑀤𑀺𑀬𑀸 𑀧𑀫𑀸𑀡𑀦𑁆𑀢𑀺 𑀦𑀤𑀺𑀬𑀸 𑀕𑀫𑁆𑀪𑀻𑀭𑀧𑀫𑀸𑀡𑀫𑁂𑀯, 𑀦 𑀆𑀬𑀸𑀫𑀯𑀺𑀢𑁆𑀣𑀸𑀭𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀦 𑀬𑁄𑀚𑀦𑀁 𑀯𑀸 𑀅𑀤𑁆𑀥𑀬𑁄𑀚𑀦𑀁 𑀯𑀸’’𑀢𑀺 𑀯𑀘𑀦𑀫𑁆𑀧𑀺 𑀇𑀤𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀆𑀬𑀸𑀫𑀯𑀺𑀢𑁆𑀣𑀸𑀭𑀧𑀫𑀸𑀡𑀁 𑀦 𑀯𑀼𑀢𑁆𑀢𑀁, 𑀧𑀪𑀯𑀢𑁄 𑀧𑀦 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀆𑀬𑀸𑀫𑀯𑀺𑀢𑁆𑀣𑀸𑀭𑀯𑀲𑁂𑀦 𑀓𑀫𑁆𑀫𑀁 𑀓𑀸𑀢𑀼𑀁 𑀧𑀳𑁄𑀦𑀓𑀦𑀤𑀻𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀸 𑀦𑀤𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲𑀸𑀢𑀺 ‘‘𑀢𑀺𑀫𑀡𑁆𑀟𑀮’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲. 𑀧𑀪𑀯𑀢𑁄𑀢𑀺 𑀲𑀫𑀼𑀤𑀸𑀕𑀫𑀢𑁄. 𑀏𑀢𑁆𑀣𑀸𑀢𑀺 𑀦𑀤𑀺𑀬𑀁. 𑀲𑀩𑁆𑀩𑁂𑀳𑀺 𑀪𑀺𑀓𑁆𑀔𑀽𑀳𑀺 𑀞𑀧𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀏𑀓𑀉𑀤𑀓𑀼𑀓𑁆𑀔𑁂𑀧𑀢𑁄.

𑀓𑀺𑀢𑁆𑀢𑀓𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑀢𑀺𑀢𑁆𑀣𑀺𑀓𑀸’’𑀢𑀺. 𑀢𑀺𑀢𑁆𑀣𑁂𑀦 𑀲𑀫𑀁 𑀧𑀭𑀺𑀧𑀽𑀭𑀢𑀻𑀢𑀺 𑀲𑀫𑀢𑀺𑀢𑁆𑀣𑀺𑀓𑀸. 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 ‘‘𑀅𑀦𑀺𑀯𑀸𑀲𑁂𑀢𑁆𑀯𑀸𑀧𑀻’’𑀢𑀺 𑀤𑀲𑁆𑀲𑁂𑀢𑀺. 𑀉𑀤𑀓𑀲𑀸𑀝𑀺𑀓𑀁 𑀅𑀦𑀺𑀯𑀸𑀲𑁂𑀦𑁆𑀢𑁄𑀧𑀺 𑀯𑀢𑁆𑀣𑁂𑀦 𑀅𑀯𑀺𑀦𑀸𑀪𑀸𑀯𑀢𑁄 𑀅𑀜𑁆𑀜𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀦𑀸𑀯𑀸𑀬 𑀞𑀢𑁆𑀯𑀸 𑀓𑀭𑀺𑀬𑀫𑀸𑀦𑁂 𑀓𑀺𑀁 𑀕𑀘𑁆𑀙𑀦𑁆𑀢𑀺𑀬𑀸𑀧𑀺 𑀦𑀸𑀯𑀸𑀬 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀕𑀘𑁆𑀙𑀦𑁆𑀢𑀺𑀬𑀸 𑀧𑀦𑀸’’𑀢𑀺𑀆𑀤𑀺. ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀬𑀲𑁆𑀫𑀸. 𑀢𑀦𑁆𑀢𑀺 𑀉𑀤𑀓𑀼𑀓𑁆𑀔𑁂𑀧𑀫𑀢𑁆𑀢𑀁. 𑀏𑀯𑀁 𑀲𑀢𑀺…𑀧𑁂… 𑀅𑀦𑀼𑀲𑀸𑀯𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀕𑀘𑁆𑀙𑀦𑁆𑀢𑀺𑀬𑀸 𑀦𑀸𑀯𑀸𑀬 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀺. 𑀦 𑀓𑁂𑀯𑀮𑀁 𑀦𑀸𑀯𑀸𑀬𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑁄𑀦𑀤𑀺𑀬’’𑀦𑁆𑀢𑀺𑀆𑀤𑀺.

𑀭𑀼𑀓𑁆𑀔𑀲𑁆𑀲𑀸𑀢𑀺 𑀅𑀦𑁆𑀢𑁄𑀦𑀤𑀺𑀬𑀁 𑀚𑀸𑀢𑀲𑁆𑀲 𑀭𑀼𑀓𑁆𑀔𑀲𑁆𑀲. 𑀲𑀸𑀔𑀸 𑀯𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸𑀢𑀺 𑀯𑀺𑀳𑀸𑀭𑀲𑀻𑀫𑀕𑀸𑀫𑀲𑀻𑀫𑀸𑀲𑀼 𑀞𑀺𑀢𑀸𑀦𑀁 𑀳𑀢𑁆𑀣𑀧𑀸𑀲𑀸𑀦𑀬𑀦𑀩𑀳𑀺𑀓𑀭𑀡𑀯𑀲𑁂𑀦 𑀲𑀻𑀫𑀁 𑀯𑀸 𑀲𑁄𑀥𑁂𑀢𑁆𑀯𑀸. 𑀚𑀸𑀢𑀭𑀼𑀓𑁆𑀔𑀲𑁆𑀲 𑀧𑀯𑀺𑀝𑁆𑀞𑀲𑀸𑀔𑀸𑀬 𑀯𑀸 𑀧𑀸𑀭𑁄𑀳𑁂 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀩𑀳𑀺𑀦𑀤𑀺𑀢𑀻𑀭𑁂 𑀚𑀸𑀢𑀭𑀼𑀓𑁆𑀔𑀲𑁆𑀲. 𑀢𑀢𑁆𑀣𑀸𑀢𑀺 𑀔𑀸𑀡𑀼𑀓𑁂.

𑀢𑀲𑁆𑀲𑀸𑀢𑀺 𑀧𑀸𑀲𑀸𑀡𑀤𑀻𑀧𑀓𑀲𑁆𑀲. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀢𑀺 𑀧𑀼𑀩𑁆𑀩𑁂 𑀦𑀤𑀻𑀦𑀺𑀫𑀺𑀢𑁆𑀢𑀝𑁆𑀞𑀸𑀦𑁂 ‘‘𑀅𑀦𑁆𑀯𑀤𑁆𑀥𑀫𑀸𑀲’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑀅𑀝𑁆𑀞. 𑁧𑁩𑁮) 𑀯𑀼𑀢𑁆𑀢𑀧𑁆𑀧𑀓𑀸𑀭𑁂. 𑀲𑁄𑀢𑀺 𑀧𑀸𑀲𑀸𑀡𑀤𑀻𑀧𑀓𑁄. 𑀧𑀼𑀦 𑀲𑁄𑀢𑀺 𑀧𑀸𑀲𑀸𑀡𑀤𑀻𑀧𑀓𑁄𑀬𑁂𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑀆𑀯𑀭𑀡𑀦𑁆𑀢𑀺 𑀧𑀸𑀴𑀺𑀁. 𑀢𑀦𑁆𑀢𑀺 𑀆𑀯𑀭𑀡𑀁. 𑀆𑀯𑀭𑀡𑁂𑀦 𑀯𑀸 𑀓𑁄𑀝𑁆𑀞𑀓𑀩𑀦𑁆𑀥𑁂𑀦 𑀯𑀸 𑀳𑁂𑀢𑀼𑀪𑀽𑀢𑁂𑀦, 𑀧𑀘𑁆𑀙𑀺𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁄𑀘𑀺 𑀆𑀯𑀭𑀡𑀧𑁆𑀧𑀤𑁂𑀲𑁄 𑀅𑀚𑁆𑀛𑁄𑀢𑁆𑀣𑀭𑀺𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀆𑀯𑀭𑀡𑀧𑁆𑀧𑀤𑁂𑀲𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. ‘‘𑀳𑁂𑀝𑁆𑀞𑀸𑀧𑀸𑀴𑀺 𑀩𑀤𑁆𑀥𑀸’’𑀢𑀺 𑀇𑀤𑀁 𑀦𑀤𑀺𑀁 𑀯𑀺𑀦𑀸𑀲𑁂𑀢𑁆𑀯𑀸 𑀢𑀴𑀸𑀓𑀓𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀏𑀢𑁆𑀣𑀸𑀢𑀺 𑀦𑀤𑀺𑀬𑀁, 𑀢𑀴𑀸𑀓𑁂 𑀯𑀸. 𑀙𑀟𑁆𑀟𑀺𑀢𑀫𑁄𑀤𑀓𑀦𑁆𑀢𑀺 𑀢𑀴𑀸𑀓𑀭𑀓𑁆𑀔𑀦𑀢𑁆𑀣𑀁 𑀏𑀓𑁂𑀦 𑀯𑀸𑀭𑀺𑀫𑀕𑁆𑀕𑁂𑀦 𑀙𑀟𑁆𑀟𑀺𑀢𑀁 𑀉𑀤𑀓𑀁. 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂𑀢𑀺 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑀢𑁆𑀢𑀸 𑀯𑀲𑁆𑀲𑀦𑁆𑀢𑀓𑀸𑀮𑁂𑀧𑀺 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂. 𑀲𑀸𑀢𑀺 𑀦𑀤𑀺𑀢𑁄 𑀦𑀻𑀳𑀝𑀫𑀸𑀢𑀺𑀓𑀸. 𑀓𑀸𑀮𑀦𑁆𑀢𑀭𑁂𑀦𑀸𑀢𑀺 𑀅𑀜𑁆𑀜𑁂𑀦 𑀓𑀸𑀮𑁂𑀦. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀕𑀸𑀫𑀦𑀺𑀕𑀫𑀸𑀦𑀁 𑀉𑀧𑀭𑀺 𑀧𑀢𑀺𑀢𑁆𑀯𑀸. 𑀧𑀯𑀢𑁆𑀢𑀢𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀓𑀸𑀭𑁂 𑀯𑀲𑁆𑀲𑀓𑀸𑀮𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀩𑁆𑀪𑁄𑀘𑁆𑀙𑀺𑀦𑁆𑀦𑀸 𑀲𑀦𑁆𑀤𑀢𑀺. 𑀯𑀺𑀳𑀸𑀭𑀲𑀻𑀫𑀦𑁆𑀢𑀺 𑀯𑀺𑀳𑀸𑀭𑀲𑀫𑁆𑀩𑀦𑁆𑀥𑀁 𑀩𑀤𑁆𑀥𑀲𑀻𑀫𑀁.

𑀲𑀫𑀼𑀤𑁆𑀤𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦𑀤𑀺𑀫𑀧𑁂𑀓𑁆𑀔𑀢𑀺. 𑀢𑀢𑁆𑀣𑀸𑀢𑀺 𑀧𑀤𑁂𑀲𑁂. 𑀑𑀢𑀭𑀺𑀢𑁆𑀯𑀸𑀢𑀺 𑀳𑁂𑀝𑁆𑀞𑀸 𑀢𑀭𑀺𑀢𑁆𑀯𑀸. ‘‘𑀑𑀲𑀭𑀺𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀲𑀡𑁆𑀞𑀳𑀦𑁆𑀢𑀻𑀢𑀺 𑀉𑀤𑀓𑁂𑀦 𑀲𑀫𑀁 𑀢𑀺𑀝𑁆𑀞𑀦𑁆𑀢𑀺. 𑀲𑁄𑀢𑀺 𑀧𑀤𑁂𑀲𑁄. 𑀉𑀤𑀓𑀦𑁆𑀢𑀢𑁄𑀢𑀺 𑀉𑀤𑀓𑀓𑁄𑀝𑀺𑀢𑁄. 𑀢𑀢𑁆𑀣𑀸𑀢𑀺 𑀲𑀫𑀼𑀤𑁆𑀤𑁂. 𑀩𑀸𑀥𑀢𑀻𑀢𑀺 𑀧𑀻𑀴𑀬𑀢𑀺. 𑀢𑁂𑀲𑀽𑀢𑀺 𑀦𑀸𑀯𑀸𑀅𑀝𑁆𑀝𑀓𑁂𑀲𑀼. 𑀢𑀦𑁆𑀢𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑀁. 𑀊𑀫𑀺𑀬𑁄𑀢𑀺 𑀯𑀻𑀘𑀺𑀬𑁄. 𑀢𑀸 𑀳𑀺 𑀧𑀭𑀁𑀧𑀭𑀸𑀯𑀲𑁂𑀦 𑀉𑀕𑁆𑀕𑀦𑁆𑀢𑁆𑀯𑀸 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑁂 𑀫𑀺𑀬𑀦𑁆𑀢𑀺 𑀳𑀺𑀁𑀲𑀦𑁆𑀢𑀺, 𑀅𑀦𑁆𑀢𑁄 𑀧𑀓𑁆𑀔𑀺𑀧𑀦𑁆𑀢𑀻𑀢𑀺 𑀯𑀸 𑀊𑀫𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑁂. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀉𑀤𑀓𑁂𑀦𑁂𑀯 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀑𑀢𑁆𑀣𑀭𑀻𑀬𑀢𑀻𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀤𑀻𑀧𑀓𑀧𑀩𑁆𑀩𑀢𑁄. ‘‘𑀤𑀽𑀭𑁂’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀘𑁆𑀙𑀯𑀥𑀸𑀦𑀁 𑀅𑀦𑀸𑀕𑀫𑀦𑀧𑀣𑁂’’𑀢𑀺. 𑀫𑀘𑁆𑀙𑀯𑀥𑀸𑀦𑀦𑁆𑀢𑀺 𑀓𑁂𑀯𑀝𑁆𑀝𑀸𑀦𑀁. 𑀢𑁂 𑀳𑀺 𑀬𑀲𑁆𑀫𑀸 𑀫𑀘𑁆𑀙𑁂 𑀳𑀦𑀦𑁆𑀢𑀺, 𑀢𑀲𑁆𑀫𑀸 𑀫𑀘𑁆𑀙𑀯𑀥𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀫𑀘𑁆𑀙𑀩𑀦𑁆𑀥𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄. 𑀫𑀘𑁆𑀙𑁂 𑀩𑀦𑁆𑀥𑀦𑁆𑀢𑀻𑀢𑀺 𑀫𑀘𑁆𑀙𑀩𑀦𑁆𑀥𑀸𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀅𑀦𑀸𑀕𑀫𑀦𑀧𑀣𑁂𑀢𑀺 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀢𑀤𑀳𑁂𑀯 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀦 𑀆𑀕𑀫𑀦𑀧𑀣𑀺𑀓𑁂 𑀤𑁂𑀲𑁂. 𑀦𑀢𑁆𑀣𑀺 𑀆𑀕𑀫𑀦𑀧𑀣𑁄 𑀏𑀢𑁆𑀣𑀸𑀢𑀺 𑀅𑀦𑀸𑀕𑀫𑀦𑀧𑀣𑁄, 𑀤𑁂𑀲𑁄. 𑀢𑀲𑁆𑀫𑀺𑀁 ‘‘𑀅𑀕𑀫𑀦𑀧𑀣𑁂’’𑀢𑀺𑀧𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄. 𑀓𑀲𑁆𑀫𑀸? 𑀅𑀕𑀫𑀦𑀧𑀣𑀲𑁆𑀲 𑀦𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀕𑀦𑁆𑀢𑁆𑀯𑀸 𑀳𑀺 𑀧𑀼𑀦 𑀅𑀦𑀸𑀕𑀫𑀦𑀧𑀣𑁄𑀬𑁂𑀯𑀸𑀥𑀺𑀧𑁆𑀧𑁂𑀢𑁄. 𑀢𑁂𑀲𑀦𑁆𑀢𑀺 𑀫𑀘𑁆𑀙𑀯𑀥𑀸𑀦𑀁. 𑀕𑀫𑀦𑀧𑀭𑀺𑀬𑀦𑁆𑀢𑀲𑁆𑀲𑀸𑀢𑀺 𑀕𑀫𑀦𑀓𑁄𑀝𑀺𑀬𑀸. 𑀑𑀭𑀢𑁄𑀢𑀺 𑀑𑀭𑀪𑀸𑀕𑁂 𑀞𑀺𑀢𑁄 𑀤𑀻𑀧𑀓𑁄 𑀯𑀸 𑀧𑀩𑁆𑀩𑀢𑁄 𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣𑀸𑀢𑀺 𑀑𑀭𑀪𑀸𑀕𑁂 𑀞𑀺𑀢𑁂𑀲𑀼 𑀤𑀻𑀧𑀓𑀧𑀩𑁆𑀩𑀢𑁂𑀲𑀼. 𑀑𑀢𑁆𑀣𑀭𑀺𑀢𑁆𑀯𑀸𑀢𑀺 𑀧𑀓𑀢𑀺𑀉𑀤𑀓𑁂𑀦 𑀑𑀢𑁆𑀣𑀭𑀺𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀑𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁂 𑀲𑀫𑀼𑀤𑁆𑀤𑁂.

𑀓𑀭𑁄𑀦𑁆𑀢𑁂𑀳𑀺𑀧𑀺 𑀓𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀲𑀭𑁂. 𑀅𑀬𑀦𑁆𑀢𑀺 𑀅𑀬𑀁 𑀲𑀭𑁄, 𑀦 𑀚𑀸𑀢𑀲𑁆𑀲𑀭𑁄 𑀳𑁄𑀢𑀺. 𑀅𑀬𑀁 𑀲𑀭𑁄 𑀕𑀸𑀫𑀔𑁂𑀢𑁆𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀲𑀭𑁂. 𑀬𑀢𑁆𑀣 𑀧𑀦𑀸𑀢𑀺 𑀬𑀲𑁆𑀫𑀺𑀁 𑀲𑀭𑁂 𑀧𑀦. 𑀢𑀲𑁆𑀲𑀸𑀢𑀺 𑀚𑀸𑀢𑀲𑁆𑀲𑀭𑀲𑁆𑀲. 𑀢𑀢𑁆𑀣𑀸𑀢𑀺 𑀧𑀤𑁂𑀲𑁂. 𑀲𑀘𑁂 𑀕𑀫𑁆𑀪𑀻𑀭𑀁 𑀉𑀤𑀓𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀅𑀝𑁆𑀝𑀓𑁂. 𑀏𑀢𑁆𑀣𑀸𑀢𑀺 𑀚𑀸𑀢𑀲𑁆𑀲𑀭𑁂, 𑀞𑀺𑀢𑁂𑀲𑀼 𑀧𑀺𑀝𑁆𑀞𑀺𑀧𑀸𑀲𑀸𑀡𑀤𑀻𑀧𑀓𑁂𑀲𑀽𑀢𑀺 𑀬𑁄𑀚𑀦𑀸. 𑀧𑀳𑁄𑀦𑀓𑀚𑀸𑀢𑀲𑁆𑀲𑀭𑁄𑀢𑀺 𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀼𑀁 𑀧𑀳𑁄𑀦𑀓𑁄 𑀚𑀸𑀢𑀲𑁆𑀲𑀭𑁄. ‘‘𑀲𑀼𑀓𑁆𑀔𑀢𑀻’’𑀢𑀺 𑀯𑀢𑁆𑀯𑀸 𑀢𑀤𑁂𑀯 𑀲𑀫𑀢𑁆𑀣𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦𑀺𑀭𑀼𑀤𑀓𑁄’’𑀢𑀺. 𑀢𑀢𑁆𑀣𑀸𑀢𑀺 𑀚𑀸𑀢𑀲𑁆𑀲𑀭𑁂. 𑀲𑀘𑁂 𑀦𑀺𑀭𑀼𑀤𑀓𑀫𑀢𑁆𑀢𑁂𑀦 𑀕𑀸𑀫𑀔𑁂𑀢𑁆𑀢𑀁 𑀕𑀘𑁆𑀙𑀢𑀺. 𑀓𑀤𑀸 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀲𑀘𑁂 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀚𑀸𑀢𑀲𑁆𑀲𑀭𑁂. 𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀉𑀤𑀓𑀫𑀸𑀢𑀺𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀤𑀸 𑀔𑀡𑀦𑁆𑀢𑀺, 𑀢𑀤𑀸𑀢𑀺 𑀧𑀸𑀞𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄. ‘‘𑀢𑀁 𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀔𑀡𑀦𑀝𑁆𑀞𑀸𑀦𑀫𑁂𑀯 𑀕𑀳𑁂𑀢𑀩𑁆𑀩𑀁, ‘‘𑀏𑀢𑁆𑀣𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑁄𑀬𑁂𑀯 𑀚𑀸𑀢𑀲𑁆𑀲𑀭𑁄 𑀕𑀳𑁂𑀢𑀩𑁆𑀩𑁄. 𑀦 𑀓𑁂𑀯𑀮𑀁 𑀅𑀚𑀸𑀢𑀲𑁆𑀲𑀭𑀫𑀢𑁆𑀢𑀁 𑀳𑁄𑀢𑀺, 𑀅𑀣 𑀔𑁄 𑀕𑀸𑀫𑀔𑁂𑀢𑁆𑀢𑀦𑁆𑀢𑀺 𑀆𑀳 ‘‘𑀕𑀸𑀫𑀲𑀻𑀫𑀸𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻’’𑀢𑀺.

𑀦𑀦𑁆𑀢𑀺 𑀚𑀸𑀢𑀲𑁆𑀲𑀭𑀁. 𑀧𑀽𑀭𑁂𑀢𑁆𑀯𑀸𑀢𑀺 𑀫𑀢𑁆𑀢𑀺𑀓𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸. 𑀧𑀸𑀴𑀺𑀦𑁆𑀢𑀺 𑀆𑀯𑀭𑀡𑀁. 𑀲𑀩𑁆𑀩𑀫𑁂𑀯 𑀦𑀦𑁆𑀢𑀺 𑀲𑀓𑀮𑀫𑁂𑀯 𑀢𑀁 𑀚𑀸𑀢𑀲𑁆𑀲𑀭𑀁. 𑀮𑁄𑀡𑀻𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀲𑁄𑀩𑁆𑀪𑁄𑀬𑁂𑀯 𑀚𑀸𑀢𑀲𑁆𑀲𑀭𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀅𑀣 𑀔𑁄 𑀮𑁄𑀡𑀻𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀤𑀓𑀝𑁆𑀞𑀸𑀦𑁄𑀓𑀸𑀲𑁂𑀢𑀺 𑀉𑀤𑀓𑀲𑁆𑀲 𑀞𑀸𑀦𑁂 𑀑𑀓𑀸𑀲𑁂.

𑁧𑁪𑁮. 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑀻𑀢𑀺 𑀏𑀢𑁆𑀣 ‘‘𑀲𑀻𑀫𑀸𑀬 𑀲𑀻𑀫’’𑀦𑁆𑀢𑀺 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑀢𑁆𑀢𑀸 𑀢𑁂𑀲𑀁 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀭𑁂𑀲’’𑀦𑁆𑀢𑀺. ‘‘𑀩𑀤𑁆𑀥𑀲𑀻𑀫’’𑀦𑁆𑀢𑀺 𑀇𑀫𑀺𑀦𑀸 ‘‘𑀲𑀻𑀫’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀯𑀺𑀲𑁂𑀲𑀢𑁄 𑀩𑀤𑁆𑀥𑀲𑀻𑀫𑀸𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀲𑀁𑀲𑀝𑁆𑀞𑀯𑀺𑀝𑀧𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀆𑀲𑀦𑁆𑀦𑀢𑁆𑀢𑀸 𑀲𑀁𑀲𑀝𑁆𑀞𑁄 𑀯𑀺𑀝𑀧𑁄 𑀏𑀢𑁂𑀲𑀦𑁆𑀢𑀺 𑀲𑀁𑀲𑀝𑁆𑀞𑀯𑀺𑀝𑀧𑀸. ‘‘𑀲𑀁𑀲𑀝𑁆𑀞𑀯𑀺𑀝𑀧𑀸’’𑀢𑀺 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀫𑀽𑀮𑀸𑀦𑀺𑀧𑀺 𑀲𑀁𑀲𑀝𑁆𑀞𑀸𑀦𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀽𑀢𑀺 𑀤𑁆𑀯𑀻𑀲𑀼 𑀭𑀼𑀓𑁆𑀔𑁂𑀲𑀼. 𑀯𑀺𑀳𑀸𑀭𑀲𑀻𑀫𑀸 𑀘𑀸𑀢𑀺 𑀧𑁄𑀭𑀸𑀡𑀓𑀯𑀺𑀳𑀸𑀭𑀲𑀻𑀫𑀸 𑀘. 𑀅𑀦𑁆𑀢𑁄 𑀓𑀢𑁆𑀯𑀸𑀢𑀺 𑀲𑀻𑀫𑀸𑀬 𑀅𑀦𑁆𑀢𑁄 𑀓𑀢𑁆𑀯𑀸. 𑀅𑀣 𑀧𑀘𑁆𑀙𑀸𑀢𑀺 𑀏𑀢𑁆𑀣 ‘‘𑀧𑀘𑁆𑀙𑀸’’𑀢𑀺 𑀇𑀫𑀺𑀦𑀸 𑀅𑀣𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀓𑁂 𑀅𑀓𑀁𑀲𑀽𑀢𑀺 𑀆𑀳 ‘‘𑀏𑀯𑀁 𑀙𑀩𑁆𑀩𑀕𑁆𑀕𑀺𑀬𑀸 𑀅𑀓𑀁𑀲𑀽’’𑀢𑀺. 𑀢𑁂𑀦𑀸𑀢𑀺 𑀓𑀭𑀡𑁂𑀦.

𑀅𑀚𑁆𑀛𑁄𑀢𑁆𑀣𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑁂𑀲’’𑀦𑁆𑀢𑀺𑀆𑀤𑀺. 𑀢𑀲𑁆𑀲𑀸𑀢𑀺 𑀩𑀤𑁆𑀥𑀲𑀻𑀫𑀸𑀬. 𑀧𑀤𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀧𑀳𑁄𑀦𑀓𑀁 𑀏𑀓𑀤𑁂𑀲𑀁. 𑀅𑀦𑁆𑀢𑀫𑀲𑁄 𑀏𑀓𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀞𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁 𑀓𑀸𑀢𑀼𑀁 𑀧𑀳𑁄𑀦𑀓𑀁 𑀧𑀤𑁂𑀲𑀁. 𑀓𑀫𑁆𑀫𑀁 𑀓𑀸𑀢𑀼𑀁 𑀅𑀧𑁆𑀧𑀳𑁄𑀦𑀓𑀧𑀤𑁂𑀲𑀁 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀩𑀦𑁆𑀥𑀦𑁆𑀢𑀸 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀦𑁆𑀢𑀺 𑀦𑀸𑀫. 𑀲𑀻𑀫𑀸𑀬 𑀉𑀧𑀘𑀸𑀭𑁄𑀢𑀺 𑀧𑀘𑁆𑀙𑀸 𑀩𑀦𑁆𑀥𑀺𑀢𑀩𑁆𑀩𑀸𑀬 𑀲𑀻𑀫𑀸𑀬 𑀉𑀧𑀘𑀸𑀭𑁄. ‘‘𑀯𑀟𑁆𑀠𑀦𑁆𑀢𑁄 𑀲𑀻𑀫𑀸𑀲𑀗𑁆𑀓𑀭𑀁 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀘𑁂 𑀅𑀯𑀟𑁆𑀠𑀦𑀓𑁄 𑀧𑀸𑀲𑀸𑀡𑁄 𑀳𑁄𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀻𑀫𑀸𑀦𑀁 𑀦𑀺𑀫𑀺𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁭𑁭. 𑀉𑀧𑁄𑀲𑀣𑀪𑁂𑀤𑀸𑀤𑀺𑀓𑀣𑀸

𑁧𑁪𑁯. 𑀧𑀦𑁆𑀦𑀭𑀲𑀺𑀓𑀲𑁆𑀲 𑀧𑀼𑀩𑁆𑀩𑀓𑀺𑀘𑁆𑀘𑀲𑁆𑀲 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸 𑀘𑀸𑀢𑀼𑀤𑁆𑀤𑀲𑀺𑀓𑀲𑁆𑀲𑁂𑀯 𑀧𑀼𑀩𑁆𑀩𑀓𑀺𑀘𑁆𑀘𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀚𑁆𑀚𑀼𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑁄’’𑀢𑀺.

‘‘𑀅𑀥𑀫𑁆𑀫𑁂𑀦 𑀯𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀅𑀥𑀫𑁆𑀫𑁂𑀦 𑀯𑀕𑁆𑀕𑀦𑁆𑀢𑀺 𑀏𑀢𑁆𑀣 𑀅𑀥𑀫𑁆𑀫𑀁 𑀦𑀸𑀫 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀲𑀼𑀢𑁆𑀢𑀼𑀤𑁆𑀤𑁂𑀲𑀉𑀧𑁄𑀲𑀣𑀫𑀓𑀢𑁆𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀓𑀭𑀡𑀜𑁆𑀘 𑀢𑀺𑀡𑁆𑀡𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀫𑀓𑀢𑁆𑀯𑀸 𑀲𑀼𑀢𑁆𑀢𑀼𑀤𑁆𑀤𑁂𑀲𑀓𑀭𑀡𑀜𑁆𑀘. 𑀯𑀕𑁆𑀕𑀁 𑀦𑀸𑀫 𑀲𑀩𑁆𑀩𑁂𑀯 𑀅𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀏𑀓𑀲𑁆𑀲 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀳𑀭𑀡𑀁. 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀦𑀸𑀫 𑀲𑀗𑁆𑀖𑀫𑀚𑁆𑀛𑀁𑀬𑁂𑀯 𑀆𑀕𑀘𑁆𑀙𑀢𑀺, 𑀦 𑀕𑀡𑀫𑀚𑁆𑀛𑀁, 𑀦 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑀁. 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀦𑁆𑀢𑀺 𑀏𑀢𑁆𑀣 𑀅𑀥𑀫𑁆𑀫𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀫𑀕𑁆𑀕𑀁 𑀦𑀸𑀫 𑀲𑀩𑁆𑀩𑁂𑀲𑀁 𑀲𑀦𑁆𑀦𑀺𑀧𑀢𑀦𑀁. 𑀥𑀫𑁆𑀫𑁂𑀦 𑀯𑀕𑁆𑀕𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀁 𑀦𑀸𑀫 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀼𑀤𑁆𑀤𑁂𑀲𑀉𑀧𑁄𑀲𑀣𑀓𑀭𑀡𑀜𑁆𑀘 𑀢𑀺𑀡𑁆𑀡𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀓𑀭𑀡𑀜𑁆𑀘. 𑀯𑀕𑁆𑀕𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁭𑁮. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀣𑀸

𑁧𑁫𑁦. 𑀇𑀫𑀁 𑀦𑀺𑀤𑀸𑀦𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑁆𑀲 𑀇𑀫𑀁 𑀦𑀺𑀤𑀸𑀦𑀁. 𑀲𑀼𑀢𑀸 𑀔𑁄 𑀧𑀦𑀸𑀢𑀺 𑀏𑀢𑁆𑀣 𑀲𑀼𑀬𑁆𑀬𑀺𑀢𑁆𑀣𑀸𑀢𑀺 𑀲𑀼𑀢𑀸, 𑀲𑀼𑀬𑁆𑀬𑀲𑁆𑀲𑀦𑁆𑀢𑀻𑀢𑀺 𑀯𑀸 𑀲𑀼𑀢𑀸, 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀬𑁄. 𑀲𑀼𑀢𑀸 𑀘 𑀲𑀼𑀢𑀸 𑀘 𑀲𑀼𑀢𑀸𑀢𑀺 𑀲𑀭𑀽𑀧𑁂𑀓𑀲𑁂𑀲𑁄 𑀓𑀸𑀢𑀩𑁆𑀩𑁄. 𑀅𑀯𑀲𑁂𑀲𑀦𑁆𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑀸𑀤𑀺𑀢𑁄 𑀅𑀯𑀲𑁂𑀲𑀁 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀺. 𑀲𑀼𑀢𑁂𑀦𑀸𑀢𑀺 𑀲𑀼𑀢𑀲𑀤𑁆𑀤𑁂𑀦. ‘‘𑀅𑀢𑁆𑀣𑁂 𑀅𑀲𑀫𑁆𑀪𑀯𑀢𑁄 𑀲𑀤𑁆𑀤𑁂 𑀯𑀼𑀢𑁆𑀢𑀯𑀺𑀥𑀸𑀦𑀁 𑀳𑁄𑀢𑀻’’𑀢𑀺 𑀳𑀺 𑀧𑀭𑀺𑀪𑀸𑀲𑀢𑁄 ‘‘𑀲𑀼𑀢𑁂𑀦𑀸’’𑀢𑀺 𑀏𑀢𑁆𑀣 𑀲𑀤𑁆𑀤𑁄𑀯 𑀕𑀳𑁂𑀢𑀩𑁆𑀩𑁄. 𑀢𑁂𑀦 𑀦𑀬𑁂𑀦𑀸𑀢𑀺 𑀢𑁂𑀦 𑀦𑀺𑀤𑀸𑀦𑀼𑀤𑁆𑀤𑁂𑀲𑀦𑀬𑁂𑀦.

𑀅𑀝𑀯𑀺𑀫𑀦𑀼𑀲𑁆𑀲𑀪𑀬𑀦𑁆𑀢𑀺 𑀅𑀝𑀯𑀺𑀬𑀁 𑀦𑀺𑀯𑀲𑀦𑁆𑀢𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀪𑀬𑀁, 𑀯𑀦𑀘𑀭𑀓𑀪𑀬𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀚𑀦𑁆𑀢𑀭𑀸𑀬𑁄𑀢𑀺𑀆𑀤𑀻𑀲𑀼 𑀏𑀯𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀤𑀯𑀤𑀸𑀳𑁄𑀢𑀺 𑀤𑀸𑀬𑀁 𑀤𑀳𑀢𑀻𑀢𑀺 𑀤𑀯𑀤𑀸𑀳𑁄 𑀆𑀓𑀸𑀭𑀲𑁆𑀲 𑀭𑀲𑁆𑀲𑀁, 𑀬𑀓𑀸𑀭𑀲𑁆𑀲 𑀘 𑀯𑀓𑀸𑀭𑀁 𑀓𑀢𑁆𑀯𑀸. 𑀦𑀦𑁆𑀢𑀺 𑀪𑀺𑀓𑁆𑀔𑀼𑀁. 𑀏𑀓𑀁 𑀯𑀸 𑀪𑀺𑀓𑁆𑀔𑀼𑀦𑁆𑀢𑀺 𑀬𑁄𑀚𑀦𑀸. 𑀧𑀞𑀫𑁄 𑀯𑀸 𑀉𑀤𑁆𑀤𑁂𑀲𑁄𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑁄. 𑀏𑀢𑁆𑀣𑀸𑀢𑀺 𑀧𑀜𑁆𑀘𑀲𑀼 𑀉𑀤𑁆𑀤𑁂𑀲𑁂𑀲𑀼. 𑀬𑀲𑁆𑀫𑀺𑀦𑁆𑀢𑀺 𑀉𑀤𑁆𑀤𑁂𑀲𑁂. 𑀲𑁄𑀧𑀻𑀢𑀺 𑀉𑀤𑁆𑀤𑁂𑀲𑁄𑀧𑀺. 𑀲𑀼𑀢𑁂𑀦𑁂𑀯 𑀲𑀸𑀯𑁂𑀢𑀩𑁆𑀩𑁄𑀢𑀺 𑀲𑀼𑀢𑀧𑀤𑁂𑀦𑁂𑀯 𑀲𑀗𑁆𑀖𑀲𑁆𑀲 𑀲𑀸𑀯𑁂𑀢𑀩𑁆𑀩𑁄𑀢𑀺 𑀏𑀯𑀲𑀤𑁆𑀤𑁄 ‘‘𑀦 𑀯𑀺𑀢𑁆𑀣𑀸𑀭𑁂𑀦𑀸’’𑀢𑀺 𑀤𑀲𑁆𑀲𑁂𑀢𑀺.

𑀅𑀦𑀚𑁆𑀛𑀺𑀝𑁆𑀞𑀸𑀢𑀺 𑀏𑀢𑁆𑀣 𑀉𑀧𑀲𑀕𑁆𑀕𑀯𑀲𑁂𑀦 𑀇𑀲𑀼𑀥𑀸𑀢𑀼𑀲𑁆𑀲 𑀇𑀘𑁆𑀙𑀸𑀓𑀦𑁆𑀢𑀺𑀢𑁄 𑀅𑀜𑁆𑀜𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀸𑀡𑀢𑁆𑀢𑀸, 𑀅𑀬𑀸𑀘𑀺𑀢𑀸 𑀯𑀸’’𑀢𑀺. 𑀏𑀢𑁆𑀣 ‘‘𑀅𑀦𑀸𑀡𑀢𑁆𑀢𑀸’’𑀢𑀺 𑀇𑀤𑀁 𑀣𑁂𑀭𑁂𑀦 𑀅𑀦𑀸𑀡𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀬𑀸𑀘𑀺𑀢𑀸’’𑀢𑀺 𑀇𑀤𑀁 𑀲𑀫𑁆𑀫𑀼𑀢𑀺𑀮𑀤𑁆𑀥𑁂𑀦 𑀦𑀯𑀓𑁂𑀦 𑀅𑀬𑀸𑀘𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀸𑀢𑀺 ‘‘𑀅𑀦𑀚𑁆𑀛𑀺𑀝𑁆𑀞𑀸 𑀥𑀫𑁆𑀫𑀁 𑀪𑀸𑀲𑀦𑁆𑀢𑀻’’𑀢𑀺 𑀯𑀘𑀦𑁂. 𑀥𑀫𑁆𑀫𑀚𑁆𑀛𑁂𑀲𑀓𑁂𑀢𑀺 𑀥𑀫𑁆𑀫𑀓𑀣𑀦𑀢𑁆𑀣𑀸𑀬 𑀅𑀚𑁆𑀛𑁂𑀲𑀢𑀻𑀢𑀺 𑀥𑀫𑁆𑀫𑀚𑁆𑀛𑁂𑀲𑀓𑁄, 𑀢𑀲𑁆𑀫𑀺𑀁. 𑀆𑀧𑀼𑀘𑁆𑀙𑀺𑀢𑁆𑀯𑀸 𑀯𑀸 𑀢𑁂𑀦 𑀲𑀗𑁆𑀖𑀢𑁆𑀣𑁂𑀭𑁂𑀦 𑀬𑀸𑀘𑀺𑀢𑁄 𑀳𑀼𑀢𑁆𑀯𑀸 𑀯𑀸𑀢𑀺 𑀬𑁄𑀚𑀦𑀸. 𑀯𑀸𑀭𑀧𑀝𑀺𑀧𑀸𑀝𑀺𑀬𑀸𑀢𑀺 𑀯𑀸𑀭𑀸𑀦𑀼𑀓𑁆𑀓𑀫𑁂𑀦. 𑀤𑁂𑀳𑀻𑀢𑀺 𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀯𑀸-𑀲𑀤𑁆𑀤𑁄 ‘‘𑀪𑀡’’ 𑀇𑀢𑀺𑀧𑀤𑁂𑀦 𑀘 ‘‘𑀓𑀣𑁂𑀳𑀺’’ 𑀇𑀢𑀺𑀧𑀤𑁂𑀦 𑀘 𑀬𑁄𑀚𑁂𑀢𑀩𑁆𑀩𑁄. ‘‘𑀪𑀡’’ 𑀇𑀢𑀺 𑀯𑀸 ‘‘𑀓𑀣𑁂𑀳𑀺’’𑀇𑀢𑀺 𑀯𑀸 ‘‘𑀤𑁂𑀳𑀺’’𑀇𑀢𑀺 𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀢𑀻𑀳𑀺𑀧𑀺 𑀯𑀺𑀥𑀻𑀳𑀻𑀢𑀺 𑀑𑀲𑀸𑀭𑀡𑀓𑀣𑀦𑀲𑀭𑀪𑀜𑁆𑀜𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀲𑀚𑁆𑀚𑀦𑁂𑀳𑀺. 𑀏𑀢𑁆𑀣 𑀘 𑀲𑀼𑀢𑁆𑀢𑀲𑁆𑀲 𑀑𑀲𑀸𑀭𑀺𑀬𑀢𑁂 𑀉𑀘𑁆𑀘𑀸𑀭𑀺𑀬𑀢𑁂 𑀑𑀲𑀸𑀭𑀡𑀁, 𑀅𑀢𑁆𑀣𑀲𑁆𑀲 𑀓𑀣𑀺𑀬𑀢𑁂 𑀓𑀣𑀦𑀁, 𑀲𑀼𑀢𑁆𑀢𑀲𑁆𑀲 𑀘 𑀢𑀤𑀢𑁆𑀣𑀲𑁆𑀲 𑀘 𑀲𑀭𑁂𑀦 𑀪𑀡𑀺𑀬𑀢𑁂 𑀲𑀭𑀪𑀜𑁆𑀜𑀁. 𑀑𑀲𑀸𑀭𑁂𑀳𑀻𑀢𑀺 𑀲𑀼𑀢𑁆𑀢𑀁 𑀉𑀘𑁆𑀘𑀸𑀭𑁂𑀳𑀺. 𑀓𑀣𑁂𑀳𑀻𑀢𑀺 𑀅𑀢𑁆𑀣𑀁 𑀓𑀣𑁂𑀳𑀺. 𑀲𑀭𑀪𑀜𑁆𑀜𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 𑀘 𑀢𑀤𑀢𑁆𑀣𑀲𑁆𑀲 𑀘 𑀲𑀭𑁂𑀦 𑀪𑀡𑀦𑀁. 𑀦𑀦𑁆𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁. 𑀲𑀚𑁆𑀛𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 ‘‘𑀲𑀚𑁆𑀛𑀸𑀬𑀁 𑀓𑀭𑁄𑀫𑀻’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀅𑀚𑁆𑀛𑁂𑀲𑀦𑀝𑁆𑀞𑀸𑀦𑁂.

𑀦𑀺𑀲𑁆𑀲𑀺𑀢𑀓𑁂𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄. 𑀲𑁄𑀢𑀺 𑀲𑀗𑁆𑀖𑀢𑁆𑀣𑁂𑀭𑁄, ‘‘𑀯𑀢𑁆𑀢𑀩𑁆𑀩𑁄’’𑀢𑀺𑀧𑀤𑁂 𑀓𑀫𑁆𑀫𑀁, ‘‘𑀯𑀤𑀢𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼 𑀓𑀢𑁆𑀢𑀸. 𑀆𑀭𑀤𑁆𑀥𑀦𑁆𑀢𑀺 𑀲𑀗𑁆𑀖𑁂𑀦 𑀆𑀭𑀤𑁆𑀥𑀁. 𑀞𑀧𑁂𑀢𑁆𑀯𑀸𑀢𑀺 𑀥𑀫𑁆𑀫𑀲𑀯𑀦𑀁 𑀞𑀧𑁂𑀢𑁆𑀯𑀸. 𑀑𑀲𑀸𑀭𑁂𑀢𑁆𑀯𑀸𑀢𑀺 𑀧𑀞𑀫𑀁 𑀲𑀼𑀢𑁆𑀢𑀁 𑀑𑀲𑀸𑀭𑁂𑀢𑁆𑀯𑀸. 𑀧𑀼𑀦 𑀓𑀣𑁂𑀦𑁆𑀢𑁂𑀦𑀸𑀢𑀺 𑀧𑀘𑁆𑀙𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑁂𑀦. 𑀅𑀝𑁆𑀞𑀧𑁂𑀢𑁆𑀯𑀸𑀬𑁂𑀯 𑀯𑀸𑀢𑀺 𑀲𑀼𑀢𑁆𑀢𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀘 𑀅𑀦𑁆𑀢𑀭𑀸 𑀅𑀝𑁆𑀞𑀢𑁆𑀯𑀸 𑀏𑀯 𑀯𑀸. 𑀓𑀣𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀚𑀸𑀢𑀁 𑀓𑀣𑁂𑀢𑀩𑁆𑀩𑀁. 𑀓𑀣𑁂𑀦𑁆𑀢𑀲𑁆𑀲…𑀧𑁂… 𑀦𑀬𑁄𑀢𑀺 𑀧𑀞𑀫𑀁 𑀅𑀢𑁆𑀣𑀁 𑀓𑀣𑁂𑀢𑁆𑀯𑀸 𑀧𑀼𑀦 𑀲𑀼𑀢𑁆𑀢𑀜𑁆𑀘 𑀅𑀢𑁆𑀣𑀜𑁆𑀘 𑀲𑀭𑁂𑀦 𑀪𑀡𑀦𑁆𑀢𑀲𑁆𑀲 𑀧𑀼𑀦 𑀆𑀕𑀢𑁂𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀅𑀢𑁆𑀣𑁄.

𑀉𑀧𑀦𑀺𑀲𑀺𑀦𑁆𑀦𑀓𑀣𑀸𑀬𑀧𑀻𑀢𑀺 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁂𑀦 𑀓𑀣𑀸𑀬𑀧𑀺. 𑀢𑁂𑀦𑀸𑀢𑀺 𑀲𑀗𑁆𑀖𑀢𑁆𑀣𑁂𑀭𑁂𑀦. 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑀸𑀢𑀺 𑀫𑀦𑀼𑀲𑁆𑀲𑁂𑀳𑀺 𑀚𑀸𑀦𑀦𑀪𑀺𑀓𑁆𑀔𑀼𑀦𑀸. 𑀲𑀗𑁆𑀖𑀢𑁆𑀣𑁂𑀭𑁄 𑀪𑀡𑀢𑀺, 𑀢𑀼𑀡𑁆𑀳𑀻 𑀯𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀅𑀦𑀼𑀫𑁄𑀤𑀦𑀸𑀤𑀻𑀲𑀼𑀧𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀥𑀫𑁆𑀫𑀓𑀣𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀗𑁆𑀖𑀢𑁆𑀣𑁂𑀭𑁄 𑀅𑀦𑀼𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀺𑀳𑀸𑀭𑀅𑀦𑁆𑀢𑀭𑀖𑀭𑁂𑀲𑀼.

𑀲𑀚𑁆𑀛𑀸𑀬𑀦𑁆𑀢𑀺 𑀲𑀬𑀁 𑀇𑀲𑁆𑀲𑀭𑁂𑀦 𑀅𑀬𑀦𑀁 𑀉𑀘𑁆𑀘𑀸𑀭𑀡𑀁, 𑀓𑁂𑀦𑀘𑀺 𑀅𑀦𑀚𑁆𑀛𑀺𑀝𑁆𑀞𑁄 𑀲𑀬𑀁 𑀅𑀥𑀺𑀇𑀲𑁆𑀲𑀭𑁂𑀦 𑀅𑀬𑀦𑀁 𑀉𑀘𑁆𑀘𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀣𑁂𑀭𑁄𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑁄 𑀣𑁂𑀭𑁄. 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻𑀢𑀺 𑀔𑁂𑀤𑀯𑀺𑀭𑀳𑀺𑀢𑀁 𑀕𑀫𑀺𑀲𑁆𑀲𑀸𑀫𑀺. 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀧𑀞𑀫𑀣𑁂𑀭𑀫𑁆𑀧𑀺 𑀧𑀼𑀦 𑀆𑀕𑀢𑀢𑁆𑀣𑁂𑀭𑀫𑁆𑀧𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀁. 𑀏𑀓𑁂𑀦 𑀲𑀗𑁆𑀖𑀢𑁆𑀣𑁂𑀭𑁂𑀦 𑀅𑀦𑀼𑀜𑁆𑀜𑀸𑀢𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀲𑁆𑀫𑀻𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀢𑁆𑀣𑁂𑀭𑀢𑁄 𑀅𑀜𑁆𑀜𑀲𑁆𑀫𑀺𑀁 𑀣𑁂𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀧𑀼𑀦 𑀆𑀕𑀢𑀁 𑀣𑁂𑀭𑀁. 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀸 𑀲𑀫𑁆𑀫𑀦𑀺𑀢𑀩𑁆𑀩𑁄’’𑀢𑀺. 𑀓𑀺𑀁 𑀲𑀫𑁆𑀫𑀢𑁂𑀦 𑀧𑀭𑀺𑀲𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀧𑀼𑀘𑁆𑀙𑀦𑁆𑀢𑁂𑀦 𑀧𑀦𑀸’’𑀢𑀺𑀆𑀤𑀺.

𑁧𑁫𑁩. 𑀫𑁂𑀢𑀺 𑀫𑀬𑁆𑀳𑀁. 𑀇𑀢𑁄𑀢𑀺 𑀧𑀼𑀕𑁆𑀕𑀮𑀢𑁄, 𑀉𑀧𑁆𑀧𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀫𑁆𑀳𑀸𑀓𑀦𑁆𑀢𑀺 𑀧𑀤𑀲𑁆𑀲 𑀧𑀼𑀭𑁂 𑀅𑀫𑁆𑀳𑀸𑀓𑀦𑁆𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀧𑀼𑀭𑁂𑀲𑀤𑁆𑀤𑁄 𑀧𑀞𑀫𑀢𑁆𑀣𑁄𑀢𑀺 𑀆𑀳 ‘‘𑀧𑀞𑀫𑀁 𑀅𑀫𑁆𑀳𑀸𑀓’’𑀦𑁆𑀢𑀺. 𑀧𑀝𑀺𑀓𑀘𑁆𑀘𑁂𑀯𑀲𑀤𑁆𑀤𑁄 𑀧𑀕𑁂𑀯𑀧𑀭𑀺𑀬𑀸𑀬𑁄, ‘‘𑀧𑀞𑀫𑀢𑀭𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀪𑀽𑀢𑀫𑁂𑀯𑀸𑀢𑀺 𑀯𑀺𑀚𑁆𑀚𑀫𑀸𑀦𑀫𑁂𑀯, 𑀢𑀣𑀫𑁂𑀯 𑀯𑀸.

𑁮𑁨. 𑀅𑀥𑀫𑁆𑀫𑀓𑀫𑁆𑀫𑀧𑀝𑀺𑀓𑁆𑀓𑁄𑀲𑀦𑀸𑀤𑀺𑀓𑀣𑀸

𑁧𑁫𑁪. 𑀅𑀥𑀫𑁆𑀫𑀓𑀫𑁆𑀫𑀦𑁆𑀢𑀺 𑀅𑀪𑀽𑀢𑀓𑀫𑁆𑀫𑀁. 𑀧𑀝𑀺𑀓𑁆𑀓𑁄𑀲𑀺𑀢𑀼𑀦𑁆𑀢𑀺 𑀏𑀢𑁆𑀣 𑀓𑀼𑀲𑀥𑀸𑀢𑀼 𑀅𑀧𑀦𑀬𑀦𑀢𑁆𑀣𑁄𑀢𑀺 𑀆𑀳 ‘‘𑀯𑀸𑀭𑁂𑀢𑀼’’𑀦𑁆𑀢𑀺. 𑀤𑀺𑀝𑁆𑀞𑀺𑀦𑁆𑀢𑀺 𑀮𑀤𑁆𑀥𑀺𑀁. 𑀢𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀪𑀡𑀺𑀬𑀫𑀸𑀦𑁂𑀢𑀺 𑀬𑁄𑀚𑀦𑀸. 𑀦 𑀲𑀼𑀡𑀦𑁆𑀢𑀻𑀢𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀲𑀼𑀡𑀦𑁆𑀢𑀺. 𑀣𑁂𑀭𑀸𑀥𑀻𑀦𑀦𑁆𑀢𑀺 𑀣𑁂𑀭𑁂𑀦 𑀅𑀥𑀻𑀦𑀁 𑀆𑀩𑀦𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀣𑁂𑀭𑀸𑀬𑀢𑁆𑀢𑀦𑁆𑀢𑀺 𑀣𑁂𑀭𑁂𑀦 𑀆𑀬𑀢𑁆𑀢𑀁, 𑀣𑁂𑀭𑀲𑁆𑀲 𑀲𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂.

𑁮𑁩. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀅𑀚𑁆𑀛𑁂𑀲𑀦𑀸𑀤𑀺𑀓𑀣𑀸

𑁧𑁫𑁫. 𑀦𑀯𑀯𑀺𑀥𑀜𑁆𑀘𑀸𑀢𑀺 𑀤𑀺𑀯𑀲𑀯𑀲𑁂𑀦 𑀢𑀺𑀯𑀺𑀥𑀁, 𑀓𑀸𑀭𑀓𑀯𑀲𑁂𑀦 𑀢𑀺𑀯𑀺𑀥𑀁, 𑀓𑀢𑁆𑀢𑀩𑁆𑀩𑀸𑀓𑀸𑀭𑀯𑀲𑁂𑀦 𑀢𑀺𑀯𑀺𑀥𑀜𑁆𑀘𑀸𑀢𑀺 𑀦𑀯𑀓𑁄𑀝𑁆𑀞𑀸𑀲𑀜𑁆𑀘, 𑀦𑀯𑀧𑀓𑀸𑀭𑀜𑁆𑀘 𑀯𑀸. 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕’’𑀦𑁆𑀢𑀺𑀆𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀁. 𑀤𑀼𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀯𑀲𑁂𑀦 𑀤𑀼𑀯𑀺𑀥𑀁. 𑀦𑀯𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀧𑀜𑁆𑀘𑀯𑀺𑀥𑀁, 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀦𑀯𑀯𑀺𑀥𑀁. 𑀏𑀢𑁆𑀣𑀸𑀢𑀺 ‘‘𑀬𑁄 𑀢𑀢𑁆𑀣 𑀪𑀺𑀓𑁆𑀔𑀼 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄’’𑀢𑀺 𑀧𑀸𑀞𑁂. 𑀲𑀼𑀯𑀺𑀲𑀤𑀸𑀢𑀺 𑀲𑀼𑀝𑁆𑀞𑀼 𑀩𑁆𑀬𑀢𑁆𑀢𑀸, 𑀲𑀼𑀤𑁆𑀥𑀸 𑀯𑀸. 𑀏𑀢𑁆𑀢𑀓𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀭𑀳𑀸𑀬𑀁, 𑀅𑀥𑀺𑀓𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀸𑀫𑀦𑁆𑀢𑀸 𑀆𑀯𑀸𑀲𑀸𑀢𑀺 𑀏𑀢𑁆𑀣 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀸𑀫𑀦𑁆𑀢𑀁 𑀆𑀯𑀸𑀲’’𑀦𑁆𑀢𑀺. 𑀬𑁄 𑀲𑀓𑁆𑀓𑁄𑀢𑀻𑀢𑀺 𑀩𑀳𑀽𑀲𑀼 𑀦𑀯𑁂𑀲𑀼 𑀬𑁄 𑀲𑀓𑁆𑀓𑁄𑀢𑀺.

𑁮𑁪. 𑀧𑀓𑁆𑀔𑀕𑀡𑀦𑀸𑀤𑀺𑀉𑀕𑁆𑀕𑀳𑀡𑀸𑀦𑀼𑀚𑀸𑀦𑀦𑀓𑀣𑀸

𑁧𑁫𑁬. 𑀓𑀢𑀺𑀦𑀁 𑀧𑀽𑀭𑀡𑀻𑀢𑀺 𑀓𑀢𑀺𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀻. 𑀓𑁄 𑀤𑀺𑀯𑀲𑁄𑀢𑀺 𑀓𑀺𑀢𑁆𑀢𑀓𑁄 𑀤𑀺𑀯𑀲𑁄. 𑀅𑀬𑁆𑀬𑀸𑀬𑀢𑁆𑀢𑀦𑁆𑀢𑀺 𑀅𑀬𑁆𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀬𑀢𑁆𑀢𑀁 𑀆𑀩𑀤𑁆𑀥𑀁. 𑀲𑀁𑀳𑀭𑀺𑀢𑁆𑀯𑀸𑀢𑀺 𑀧𑀼𑀦 𑀲𑀮𑀸𑀓𑀁 𑀲𑀁𑀳𑀭𑀺𑀢𑁆𑀯𑀸. 𑀅𑀬𑀁 𑀧𑀸𑀞𑁄 𑀓𑁂𑀲𑀼𑀘𑀺 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺. 𑀓𑀸𑀮𑀯𑀢𑁄𑀢𑀺 𑀏𑀢𑁆𑀣 𑀯𑀦𑁆𑀢𑀼𑀧𑀘𑁆𑀘𑀬𑁄 𑀲𑁆𑀯𑀢𑁆𑀣𑁄𑀢𑀺 𑀆𑀳 ‘‘𑀓𑀸𑀮𑀲𑁆𑀲𑁂𑀯𑀸’’𑀢𑀺. 𑀏𑀯𑀲𑀤𑁆𑀤𑁄 𑀧𑀦 𑀲𑀫𑁆𑀪𑀯𑀢𑁄 𑀬𑀼𑀚𑁆𑀚𑀺𑀬𑀢𑀺. 𑀧𑀕𑁂𑀯𑀸𑀢𑀺 𑀧𑀸𑀢𑁄𑀯.

𑁧𑁫𑁮. 𑀲𑀸𑀬𑀫𑁆𑀧𑀻𑀢𑀺 𑀲𑀸𑀬𑀦𑁆𑀳𑁂𑀧𑀺. 𑀧𑀺𑀲𑀤𑁆𑀤𑁂𑀦 𑀅𑀜𑁆𑀜𑀫𑁆𑀧𑀺 𑀲𑀭𑀡𑀓𑀸𑀮𑀁 𑀲𑀫𑁆𑀧𑀺𑀡𑁆𑀟𑁂𑀢𑀺.

𑁧𑁫𑁯. 𑀆𑀡𑀸𑀧𑁂𑀢𑀼𑀦𑁆𑀢𑀺 𑀏𑀢𑁆𑀣 𑀅𑀦𑀸𑀡𑀸𑀧𑁂𑀢𑀩𑁆𑀩𑀪𑀺𑀓𑁆𑀔𑀽 𑀅𑀧𑀦𑁂𑀢𑁆𑀯𑀸 𑀆𑀡𑀸𑀧𑁂𑀢𑀩𑁆𑀩𑀪𑀺𑀓𑁆𑀔𑀽 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀓𑀺𑀜𑁆𑀘𑀺 𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀲𑀤𑀸𑀓𑀸𑀮𑀫𑁂𑀯 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀥𑀫𑁆𑀫𑀓𑀣𑀺𑀓𑀸𑀤𑀻𑀲𑀽𑀢𑀺𑀆𑀤𑀺𑀲𑀤𑁆𑀤𑁂𑀦 𑀕𑀡𑀯𑀸𑀘𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀸𑀭𑁂𑀦𑀸𑀢𑀺 𑀧𑀭𑀺𑀬𑀸𑀬𑁂𑀦. 𑀲𑀫𑁆𑀫𑀼𑀜𑁆𑀘𑀦𑀺𑀦𑁆𑀢𑀺 𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀘𑀦𑀺𑀁 𑀯𑀸 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀘𑀦𑀺𑀁 𑀯𑀸. 𑀲𑀫𑀁, 𑀲𑀼𑀝𑁆𑀞𑀼 𑀯𑀸 𑀫𑀼𑀜𑁆𑀘𑀢𑀺 𑀲𑁄𑀥𑁂𑀢𑀺 𑀇𑀫𑀸𑀬𑀸𑀢𑀺 𑀲𑀫𑁆𑀫𑀼𑀜𑁆𑀘𑀦𑀻, 𑀢𑀸𑀮𑀼𑀚𑁄 𑀧𑀞𑀫𑁄. 𑀢𑀫𑁆𑀧𑀻𑀢𑀺 𑀲𑀸𑀔𑀸𑀪𑀗𑁆𑀕𑀫𑁆𑀧𑀺.

𑁧𑁬𑁦. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀲𑀫𑁆𑀫𑀚𑁆𑀚𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀧𑀼𑀦 𑀆𑀳𑀭𑀺𑀢𑀩𑁆𑀩𑀸𑀦𑀻𑀢𑀺 𑀲𑀗𑁆𑀖𑀺𑀓𑀸𑀯𑀸𑀲𑀁 𑀆𑀲𑀦𑀸𑀦𑀺 𑀧𑀼𑀦 𑀆𑀳𑀭𑀺𑀢𑀩𑁆𑀩𑀸𑀦𑀺. 𑀢𑀝𑁆𑀝𑀺𑀓𑀸𑀬𑁄𑀧𑀻𑀢𑀺 𑀯𑁂𑀡𑀼𑀆𑀤𑀺𑀫𑀬𑀸 𑀢𑀝𑁆𑀝𑀺𑀓𑀸𑀬𑁄𑀧𑀺.

𑁧𑁬𑁧. 𑀓𑀧𑀮𑁆𑀮𑀺𑀓𑀸 𑀯𑀸𑀢𑀺 𑀓𑀧𑀸𑀮𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀸 𑀧𑀤𑀻𑀧𑀓𑀧𑀸𑀮𑀸 𑀯𑀸. 𑀢𑀦𑁆𑀢𑀺 𑀢𑁂𑀮𑀸𑀤𑀺𑀁. 𑀧𑀭𑀺𑀬𑁂𑀲𑀺𑀢𑀩𑁆𑀩𑀸𑀦𑀻𑀢𑀺 𑀅𑀦𑀯𑀚𑁆𑀚𑀧𑀭𑀺𑀬𑁂𑀲𑀦𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀸𑀦𑀺.

𑁮𑁬. 𑀤𑀺𑀲𑀁𑀕𑀫𑀺𑀓𑀸𑀤𑀺𑀯𑀢𑁆𑀣𑀼𑀓𑀣𑀸

𑁧𑁬𑁩. 𑀲𑀁𑀕𑀳𑁂𑀢𑀩𑁆𑀩𑁄𑀢𑀺𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀺𑀭𑀺𑀬𑀸𑀧𑀤𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀁𑀕𑀳𑁂𑀢𑀩𑁆𑀩𑁄’’𑀢𑀺𑀆𑀤𑀺. 𑀲𑀁𑀕𑀳𑀲𑀤𑁆𑀤𑀲𑁆𑀲 𑀲𑀗𑁆𑀔𑁂𑀧𑀕𑀳𑀡𑁂𑀲𑀼𑀧𑀺 𑀯𑀢𑁆𑀢𑀦𑀢𑁄 𑀇𑀥 ‘‘𑀅𑀦𑀼𑀕𑁆𑀕𑀳𑀢𑁆𑀣𑁂’’𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 ‘‘𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀣𑀸𑀓𑀭𑀡𑀯𑀲𑁂𑀦𑀸’’𑀢𑀺. 𑀉𑀧𑀮𑀸𑀧𑁂𑀢𑀩𑁆𑀩𑁄𑀢𑀺 𑀲𑀗𑁆𑀖𑁂𑀦 𑀩𑀳𑀼𑀲𑁆𑀲𑀼𑀢𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀉𑀧𑀕𑀦𑁆𑀢𑁆𑀯𑀸 𑀮𑀸𑀧𑁂𑀢𑀩𑁆𑀩𑁄 𑀓𑀣𑀸𑀧𑁂𑀢𑀩𑁆𑀩𑁄. 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄𑀢𑀺 𑀲𑀗𑁆𑀖𑁂𑀦 𑀩𑀳𑀼𑀲𑁆𑀲𑀼𑀢𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀉𑀧 𑀅𑀘𑁆𑀘𑀦𑁂𑀦 𑀧𑀽𑀚𑀦𑁂𑀦 𑀞𑀸𑀧𑁂𑀢𑀩𑁆𑀩𑁄. ‘‘𑀲𑀩𑁆𑀩𑁂𑀲𑀁 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀢𑁆𑀯𑀸 𑀢𑀤𑁂𑀯 𑀲𑀫𑀢𑁆𑀣𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀇𑀥 𑀦𑁂𑀯 𑀣𑁂𑀭𑀸, 𑀦 𑀤𑀳𑀭𑀸 𑀫𑀼𑀘𑁆𑀘𑀦𑁆𑀢𑀻’’𑀢𑀺. 𑀢𑁂𑀦𑀸𑀢𑀺 𑀩𑀳𑀼𑀲𑁆𑀲𑀼𑀢𑁂𑀦 𑀪𑀺𑀓𑁆𑀔𑀼𑀦𑀸. 𑀏𑀯𑀫𑁆𑀧𑀺 𑀲𑀢𑀻𑀢𑀺 𑀏𑀯𑀁 𑀅𑀲𑀸𑀤𑀺𑀬𑀦𑁂𑀧𑀺 𑀲𑀢𑀺. 𑀲𑀸𑀬𑀁 𑀧𑀸𑀢𑀦𑁆𑀢𑀺 𑀲𑀸𑀬𑀜𑁆𑀘 𑀧𑀸𑀢𑁄 𑀘 𑀲𑀸𑀬𑀁𑀧𑀸𑀢𑀁. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀦𑀢𑁆𑀣𑀸𑀬 𑀯𑀸. 𑀢𑁂𑀦𑀸𑀢𑀺 𑀩𑀳𑀼𑀲𑁆𑀲𑀼𑀢𑁂𑀦 𑀪𑀺𑀓𑁆𑀔𑀼𑀦𑀸. 𑀢𑁂𑀲𑀦𑁆𑀢𑀺 𑀫𑀳𑀸𑀣𑁂𑀭𑀸𑀦𑀁. 𑀅𑀲𑁆𑀲𑀸𑀢𑀺 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀲𑀤𑁆𑀥𑀺𑀁𑀘𑀭𑀸𑀢𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀘𑀭𑀦𑁆𑀢𑀻𑀢𑀺 𑀲𑀤𑁆𑀥𑀺𑀁𑀘𑀭𑀸. 𑀅𑀣𑀸𑀧𑀻𑀢𑀺 𑀬𑀤𑀺𑀧𑀺. 𑀏𑀓𑁄 𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀯𑀤𑀢𑀻𑀢𑀺 𑀬𑁄𑀚𑀦𑀸. 𑀏𑀲𑁄 𑀘 𑀅𑀳𑀜𑁆𑀘𑀸𑀢𑀺 𑀫𑀬𑀁. 𑀦𑀸𑀫𑀢𑀼𑀫𑁆𑀳𑀅𑀫𑁆𑀳𑀲𑀤𑁆𑀤𑁂𑀲𑀼 𑀳𑀺 𑀏𑀓𑀲𑁂𑀲𑁂𑀦 𑀓𑀢𑁆𑀢𑀩𑁆𑀩𑁂𑀲𑀼 𑀧𑀭𑁄𑀯 𑀕𑀳𑁂𑀢𑀩𑁆𑀩𑁄. 𑀯𑀺𑀳𑀭𑀦𑁆𑀢𑀽𑀢𑀺 𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀲𑁄 𑀆𑀯𑀸𑀲𑁄 𑀕𑀦𑁆𑀢𑀩𑁆𑀩𑁄𑀢𑀺 𑀏𑀢𑁆𑀣 𑀓𑀺𑀫𑀢𑁆𑀣𑀸𑀬 𑀕𑀦𑁆𑀢𑀩𑁆𑀩𑁄, 𑀓𑀺𑀁 𑀅𑀦𑀼𑀤𑀺𑀯𑀲𑀁 𑀕𑀦𑁆𑀢𑀩𑁆𑀩𑁄𑀢𑀺 𑀆𑀳 ‘‘𑀉𑀧𑁄𑀲𑀣𑀓𑀭𑀡𑀢𑁆𑀣𑀸𑀬 𑀅𑀦𑁆𑀯𑀤𑁆𑀥𑀫𑀸𑀲𑀁 𑀕𑀦𑁆𑀢𑀩𑁆𑀩𑁄’’𑀢𑀺. 𑀲𑁄 𑀘 𑀔𑁄𑀢𑀺 𑀆𑀯𑀸𑀲𑁄. 𑀉𑀢𑀼𑀯𑀲𑁆𑀲𑁂𑀬𑁂𑀯𑀸𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀬𑁂𑀯. 𑀉𑀢𑀼𑀯𑀲𑁆𑀲𑁂𑀬𑁂𑀯 𑀕𑀦𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑀲𑁆𑀲 𑀜𑀸𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀲𑁆𑀲𑀸𑀦𑁂 𑀧𑀦𑀸’’𑀢𑀺𑀆𑀤𑀺. 𑀬𑀦𑁆𑀢𑀺 𑀓𑀫𑁆𑀫𑀁. 𑀢𑀢𑁆𑀣𑀸𑀢𑀺 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑁂. 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀪𑀺𑀓𑁆𑀔𑀼. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀧𑀭𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂. 𑀫𑀸𑀲𑀤𑁆𑀯𑀬𑀦𑁆𑀢𑀺 𑀲𑀸𑀯𑀡𑀫𑀸𑀲𑀧𑀼𑀡𑁆𑀡𑀫𑀺𑀢𑁄 𑀬𑀸𑀯 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀻, 𑀢𑀸𑀯 𑀫𑀸𑀲𑀤𑁆𑀯𑀬𑀁 𑀯𑀲𑀺𑀢𑀩𑁆𑀩𑀁. 𑀇𑀤𑀁 𑀧𑀼𑀭𑀺𑀫𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀧𑀓𑁆𑀓𑀫𑀦𑀸𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀧𑀘𑁆𑀙𑀺𑀫𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯 𑀧𑀓𑁆𑀓𑀫𑀦𑀸𑀤𑀺𑀁 𑀓𑀭𑁄𑀢𑀺, 𑀫𑀸𑀲𑀢𑁆𑀢𑀬𑀫𑁆𑀧𑀺 𑀯𑀲𑀺𑀢𑀩𑁆𑀩𑀁.

𑁮𑁭. 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀓𑀣𑀸

𑁧𑁬𑁪. 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀧𑀝𑀺𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀬𑁂𑀦 𑀓𑁂𑀦𑀘𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀯𑀺𑀜𑁆𑀜𑀸𑀧𑁂𑀢𑀺. 𑀉𑀪𑀬𑀣𑀸𑀢𑀺 𑀉𑀪𑀬𑁂𑀳𑀺 𑀓𑀸𑀬𑀯𑀸𑀘𑀸𑀲𑀗𑁆𑀔𑀸𑀢𑁂𑀳𑀺 𑀆𑀓𑀸𑀭𑁂𑀳𑀺. 𑀓𑀸𑀬𑀯𑀸𑀘𑀸𑀳𑀺 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑁂𑀢𑀺 𑀅𑀔𑀺𑀮𑀸 𑀕𑀺𑀮𑀸𑀦𑀸. 𑀳𑀢𑁆𑀣𑀧𑀸𑀲𑁂𑀢𑀺 𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑀫𑁆𑀳𑀺. 𑀲𑀘𑁂 𑀤𑀽𑀭𑁂 𑀳𑁄𑀦𑁆𑀢𑀻𑀢𑀺 𑀲𑀘𑁂 𑀩𑀳𑀽 𑀕𑀺𑀮𑀸𑀦𑀸 𑀅𑀜𑁆𑀜𑀫𑀜𑁆𑀜𑀁 𑀤𑀽𑀭𑁂 𑀳𑁄𑀦𑁆𑀢𑀺. 𑀢𑀁 𑀤𑀺𑀯𑀲𑀦𑁆𑀢𑀺 𑀢𑀲𑁆𑀫𑀺𑀁 𑀲𑀗𑁆𑀖𑀅𑀧𑁆𑀧𑀳𑁄𑀦𑀓𑀤𑀺𑀯𑀲𑁂.

𑀢𑀢𑁆𑀣𑁂𑀯 𑀧𑀓𑁆𑀓𑀫𑀢𑀻𑀢𑀺 𑀏𑀢𑁆𑀣 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀣𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀢𑀢𑁄𑀯𑀸’’𑀢𑀺, 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀝𑁆𑀞𑀸𑀦𑀢𑁄 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀓𑀫𑀼𑀥𑀸𑀢𑀼𑀬𑀸 𑀧𑀤𑀯𑀺𑀓𑁆𑀔𑁂𑀧𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀓𑀢𑁆𑀣𑀘𑀻’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀓𑀫𑁆𑀫𑀁. 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀻𑀢𑀺𑀆𑀤𑀻𑀲𑀼 𑀧𑀝𑀺𑀚𑀸𑀦𑀦𑀸𑀓𑀸𑀭𑀢𑁆𑀣𑀲𑁆𑀲 𑀇𑀢𑀺𑀲𑀤𑁆𑀤𑀲𑁆𑀲 𑀮𑁄𑀧𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸𑀫𑀡𑁂𑀭𑁄 𑀅𑀳’’𑀦𑁆𑀢𑀺 𑀏𑀯𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀪𑀽𑀢𑀁𑀬𑁂𑀯𑀸𑀢𑀺 𑀯𑀺𑀚𑁆𑀚𑀫𑀸𑀦𑀁𑀬𑁂𑀯. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼.

𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀲𑀗𑁆𑀖𑀧𑁆𑀧𑀢𑁆𑀢𑁄 𑀯𑀺𑀩𑁆𑀪𑀫𑀢𑀻’’𑀢𑀺𑀆𑀤𑀻𑀲𑀼. 𑀏𑀢𑁆𑀣𑀸𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀳𑀭𑀡𑁂. 𑀩𑀳𑀽𑀦𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀏𑀓𑁂𑀦 𑀏𑀓𑀲𑁆𑀲𑀸𑀧𑀺, 𑀩𑀳𑀽𑀳𑀺 𑀏𑀓𑀲𑁆𑀲𑀸𑀧𑀺, 𑀩𑀳𑀽𑀳𑀺 𑀩𑀳𑀽𑀦𑀫𑁆𑀧𑀺 𑀆𑀳𑀝𑀸 𑀧𑀸𑀭𑀺𑀲𑀼𑀤𑁆𑀥𑀺 𑀆𑀳𑀝𑀸𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑁄 𑀪𑀺𑀓𑁆𑀔𑀼. 𑀬𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀢𑀲𑁆𑀲𑁂𑀯𑀸𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑀲𑁆𑀲𑁂𑀯. 𑀇𑀢𑀭𑀸 𑀧𑀦𑀸𑀢𑀺 𑀇𑀢𑀭𑁂𑀲𑀁 𑀧𑀸𑀭𑀺𑀲𑀼𑀤𑁆𑀥𑀺 𑀧𑀦. 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸𑀢𑀺 𑀏𑀢𑁆𑀣 𑀩𑀺𑀴𑀸𑀮𑁄𑀢𑀺 𑀆𑀔𑀼𑀪𑀼𑀚𑁄. 𑀲𑁄 𑀳𑀺 𑀩𑀺𑀴𑀸𑀲𑀬𑀁 𑀆𑀔𑀼𑀁 𑀕𑀡𑁆𑀳𑀺𑀢𑀼𑀁 𑀅𑀮𑀢𑀺 𑀲𑀫𑀢𑁆𑀣𑁂𑀢𑀻𑀢𑀺 𑀩𑀺𑀴𑀸𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀔𑀮𑀺𑀓𑀸𑀢𑀺 𑀏𑀢𑀁 𑀲𑀢𑁆𑀢𑀸𑀦𑀁 𑀩𑀦𑁆𑀥𑀦𑀽𑀧𑀓𑀭𑀡𑀯𑀺𑀲𑁂𑀲𑀲𑁆𑀲 𑀦𑀸𑀫𑀁. 𑀩𑀺𑀴𑀸𑀮𑀲𑁆𑀲 𑀲𑀗𑁆𑀔𑀮𑀺𑀓𑀸 𑀢𑁂𑀦 𑀲𑀫𑁆𑀩𑀦𑁆𑀥𑀲𑀫𑁆𑀩𑀦𑁆𑀥𑀺𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀢𑁆𑀢𑀸𑀢𑀺 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸. 𑀇𑀤𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀗𑁆𑀔𑀮𑀺𑀓𑀸𑀬 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀢𑀸𑀬 𑀲𑀤𑀺𑀲𑀸 𑀩𑀺𑀴𑀸𑀮𑀲𑀗𑁆𑀔𑀮𑀺𑀓𑀸 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀲𑀗𑁆𑀔𑀮𑀺𑀓𑀸𑀬 𑀧𑀞𑀫𑀁 𑀯𑀮𑀬𑀁 𑀤𑀼𑀢𑀺𑀬𑀁𑀬𑁂𑀯 𑀯𑀮𑀬𑀁 𑀧𑀸𑀧𑀼𑀡𑀸𑀢𑀺, 𑀦 𑀢𑀢𑀺𑀬𑀁, 𑀏𑀯𑀫𑁂𑀯 𑀧𑀞𑀫𑀁 𑀤𑀺𑀦𑁆𑀦𑀸 𑀧𑀸𑀭𑀺𑀲𑀼𑀤𑁆𑀥𑀺 𑀤𑀼𑀢𑀺𑀬𑀫𑁂𑀯 𑀧𑀸𑀧𑀼𑀡𑀸𑀢𑀺, 𑀦 𑀢𑀢𑀺𑀬𑀦𑁆𑀢𑀺.

𑀆𑀕𑀦𑁆𑀢𑁆𑀯𑀸𑀢𑀺 𑀲𑀗𑁆𑀖𑀲𑁆𑀲 𑀳𑀢𑁆𑀣𑀧𑀸𑀲𑀁 𑀆𑀕𑀦𑁆𑀢𑁆𑀯𑀸. 𑀧𑀸𑀴𑀺𑀬𑀁 𑀲𑀼𑀢𑁆𑀢𑁄 𑀦 𑀆𑀭𑁄𑀘𑁂𑀢𑀻𑀢𑀺𑀆𑀤𑀻𑀲𑀼 𑀳𑁂𑀢𑁆𑀯𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀲𑀼𑀢𑁆𑀢𑁂𑀦 𑀦𑀸𑀭𑁄𑀘𑁂𑀢𑀻𑀢𑀺 𑀳𑀺 𑀅𑀢𑁆𑀣𑁄. 𑀧𑀸𑀭𑀺𑀲𑀼𑀤𑁆𑀥𑀺𑀳𑀸𑀭𑀓𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀢𑁆𑀣 𑀆𑀧𑀢𑁆𑀢𑀻𑀢𑀺 𑀅𑀦𑁆𑀯𑀬𑀢𑁆𑀣𑀁 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂…𑀧𑁂… 𑀆𑀧𑀚𑁆𑀚𑀢𑀻’’𑀢𑀺. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀉𑀪𑀺𑀦𑁆𑀦𑀫𑁆𑀧𑀻𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀬𑀓𑀲𑁆𑀲, 𑀢𑀁𑀳𑀸𑀭𑀓𑀲𑁆𑀲 𑀘𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺.

𑁮𑁮. 𑀙𑀦𑁆𑀤𑀤𑀸𑀦𑀓𑀣𑀸

𑁧𑁬𑁫. 𑀙𑀦𑁆𑀤𑀤𑀸𑀦𑁂𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀉𑀧𑁄𑀲𑀣𑁄 𑀓𑀢𑁄 𑀳𑁄𑀢𑀻𑀢𑀺 𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀬𑀓𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀘 𑀉𑀧𑁄𑀲𑀣𑁄 𑀓𑀢𑁄 𑀳𑁄𑀢𑀺. 𑀅𑀜𑁆𑀜𑀦𑁆𑀢𑀺 𑀉𑀧𑁄𑀲𑀣𑀓𑀫𑁆𑀫𑀢𑁄 𑀅𑀜𑁆𑀜𑀁. 𑀬𑀁 𑀧𑀦 𑀓𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀫𑁆𑀫𑀫𑁆𑀧𑀻𑀢𑀺 𑀉𑀧𑁄𑀲𑀣𑀓𑀫𑁆𑀫𑀢𑁄 𑀅𑀜𑁆𑀜𑀁 𑀓𑀫𑁆𑀫𑀫𑁆𑀧𑀺. 𑀏𑀢𑁆𑀣 𑀘 𑀢𑀤𑀳𑀼𑀧𑁄𑀲𑀣𑁂 𑀅𑀢𑁆𑀢𑀦𑁄 𑀘 𑀲𑀗𑁆𑀖𑀲𑁆𑀲 𑀘 𑀲𑀘𑁂 𑀉𑀧𑁄𑀲𑀣𑀓𑀫𑁆𑀫𑀁 𑀳𑁄𑀢𑀺, 𑀧𑀸𑀭𑀺𑀲𑀼𑀤𑁆𑀥𑀺𑀬𑁂𑀯 𑀤𑀸𑀢𑀩𑁆𑀩𑀸. 𑀅𑀣 𑀅𑀜𑁆𑀜𑀁 𑀓𑀫𑁆𑀫𑀁 𑀳𑁄𑀢𑀺, 𑀙𑀦𑁆𑀤𑁄𑀬𑁂𑀯 𑀤𑀸𑀢𑀩𑁆𑀩𑁄. 𑀬𑀤𑀺 𑀉𑀧𑁄𑀲𑀣𑀓𑀫𑁆𑀫𑀜𑁆𑀘 𑀅𑀜𑁆𑀜𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀧𑀸𑀭𑀺𑀲𑀼𑀤𑁆𑀥𑀺 𑀘 𑀙𑀦𑁆𑀤𑁄 𑀘 𑀤𑀸𑀢𑀩𑁆𑀩𑁄. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀤𑀳𑀼𑀧𑁄𑀲𑀣𑁂 𑀧𑀸𑀭𑀺𑀲𑀼𑀤𑁆𑀥𑀺𑀁 𑀤𑁂𑀦𑁆𑀢𑁂𑀦 𑀙𑀦𑁆𑀤𑀫𑁆𑀧𑀺 𑀤𑀸𑀢𑀼’’𑀦𑁆𑀢𑀺. 𑀲𑀻𑀫𑀸𑀬 𑀯𑀸𑀢𑀺 𑀩𑀤𑁆𑀥𑀲𑀻𑀫𑀸𑀬 𑀯𑀸. 𑀅𑀘𑁆𑀙𑀺𑀢𑀼𑀦𑁆𑀢𑀺 𑀉𑀧𑀯𑁂𑀲𑀺𑀢𑀼𑀁. ‘‘𑀆𑀲 𑀉𑀧𑀯𑁂𑀲𑀦𑁂’’𑀢𑀺 𑀳𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀲𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀁. 𑀲𑀸𑀫𑀕𑁆𑀕𑀻 𑀯𑀸𑀢𑀺 𑀓𑀸𑀬𑀲𑀸𑀫𑀕𑁆𑀕𑀻 𑀯𑀸.

𑁧𑁬𑁭. 𑀲𑀭𑀢𑀺𑀧𑀺 𑀉𑀧𑁄𑀲𑀣𑀁, 𑀦𑀧𑀺 𑀲𑀭𑀢𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀏𑀓𑀤𑀸 𑀲𑀭𑀢𑀺, 𑀏𑀓𑀤𑀸 𑀦 𑀲𑀭𑀢𑀻’’𑀢𑀺. ‘‘𑀏𑀓𑀦𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀦𑁂𑀯 𑀲𑀭𑀢𑀻𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀲𑀫𑁆𑀫𑀼𑀢𑀺𑀮𑀤𑁆𑀥𑁄𑀧𑀺 𑀅𑀮𑀤𑁆𑀥𑁄𑀧𑀺 𑀉𑀫𑁆𑀫𑀢𑁆𑀢𑀓𑁄 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀺.

𑁯𑁧. 𑀲𑀗𑁆𑀖𑀼𑀧𑁄𑀲𑀣𑀸𑀤𑀺𑀓𑀣𑀸

𑁧𑁬𑁮. ‘‘𑀲𑀫𑁆𑀫𑀚𑁆𑀚𑀺𑀢𑁆𑀯𑀸’’𑀢𑀺 𑀧𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀲𑁄 𑀤𑁂𑀲𑁄𑀢𑀺 𑀏𑀢𑁆𑀣 ‘‘𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 ‘‘𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄’’𑀢𑀺𑀆𑀤𑀺𑀯𑀘𑀦𑀁. 𑀢𑁂𑀦𑀸𑀢𑀺 𑀢𑁂𑀦 𑀳𑁂𑀢𑀼𑀦𑀸. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀲𑀫𑁆𑀫𑀚𑁆𑀚𑀦𑀻…𑀧𑁂… 𑀯𑀼𑀘𑁆𑀘𑀢𑀺’’ 𑀇𑀢𑀺 𑀆𑀳𑀽𑀢𑀺 𑀬𑁄𑀚𑀦𑀸.

𑀲𑀫𑁆𑀫𑀚𑁆𑀚𑀦𑀻𑀢𑀺 𑀲𑀫𑁆𑀫𑀚𑁆𑀚𑀦𑀓𑀭𑀡𑀁. 𑀧𑀤𑀻𑀧𑁄𑀢𑀺 𑀧𑀤𑀻𑀧𑀼𑀚𑁆𑀚𑀮𑀦𑀁. 𑀉𑀤𑀓𑀦𑁆𑀢𑀺 𑀉𑀤𑀓𑀝𑁆𑀞𑀧𑀦𑀁. 𑀆𑀲𑀦𑁂𑀦𑀸𑀢𑀺 𑀆𑀲𑀦𑀧𑀜𑁆𑀜𑀸𑀧𑀦𑁂𑀦. ‘‘𑀇𑀢𑀻’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀉𑀧𑁄𑀲𑀣𑀲𑁆𑀲𑀸𑀢𑀺 𑀦𑀯𑀯𑀺𑀥𑀲𑁆𑀲 𑀉𑀧𑁄𑀲𑀣𑀲𑁆𑀲 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺. 𑀯𑀼𑀘𑁆𑀘𑀢𑀻𑀢𑀺 𑀓𑀣𑀺𑀬𑀢𑀺. 𑀇𑀤𑀁 ‘‘𑀏𑀢𑀸𑀦𑀻’’𑀢𑀺 𑀓𑀫𑁆𑀫𑀲𑁆𑀲 𑀘 ‘‘𑀧𑀼𑀩𑁆𑀩𑀓𑀭𑀡’’𑀦𑁆𑀢𑀺 𑀆𑀓𑀸𑀭𑀲𑁆𑀲 𑀘 𑀅𑀪𑁂𑀤𑀢𑁆𑀢𑀸 𑀆𑀲𑀦𑁆𑀦𑀁 𑀆𑀓𑀸𑀭𑀫𑀧𑁂𑀓𑁆𑀔𑀺𑀢𑁆𑀯𑀸 𑀏𑀓𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀅𑀓𑁆𑀔𑀸𑀢𑀸𑀦𑀻’’𑀢𑀺 𑀇𑀤𑀁 𑀧𑀦 ‘‘𑀇𑀫𑀸𑀦𑀺 𑀘𑀢𑁆𑀢𑀸𑀭𑀻’’𑀢𑀺 𑀓𑀫𑁆𑀫𑀫𑀧𑁂𑀓𑁆𑀔𑀺𑀢𑁆𑀯𑀸 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀦𑁆𑀢𑀺 𑀙𑀦𑁆𑀤𑀓𑁆𑀔𑀸𑀦𑀜𑁆𑀘 𑀧𑀸𑀭𑀺𑀲𑀼𑀤𑁆𑀥𑀺𑀓𑁆𑀔𑀸𑀦𑀜𑁆𑀘 𑀉𑀢𑀼𑀓𑁆𑀔𑀸𑀦𑀜𑁆𑀘. 𑀪𑀺𑀓𑁆𑀔𑀼𑀕𑀡𑀦𑀸𑀢𑀺 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀅𑀓𑁆𑀔𑀸𑀦𑀁. 𑀑𑀯𑀸𑀤𑁄𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀬𑀸𑀘𑀺𑀢𑀲𑁆𑀲 𑀑𑀯𑀸𑀤𑀲𑁆𑀲 𑀅𑀓𑁆𑀔𑀸𑀦𑀁. 𑀏𑀢𑀸𑀦𑀻𑀢𑀺 𑀏𑀢𑀸𑀦𑀺 𑀧𑀜𑁆𑀘. 𑀧𑀼𑀩𑁆𑀩𑀓𑀭𑀡𑀢𑁄 𑀧𑀘𑁆𑀙𑀸𑀢𑀺 𑀧𑀼𑀩𑁆𑀩𑀓𑀭𑀡𑀲𑁆𑀲 𑀓𑀭𑀡𑀢𑁄 𑀧𑀘𑁆𑀙𑀸. 𑀏𑀢𑁆𑀣 𑀘 ‘‘𑀧𑀼𑀩𑁆𑀩𑀓𑀭𑀡𑀢𑁄 𑀧𑀘𑁆𑀙𑀸 𑀓𑀢𑁆𑀢𑀩𑁆𑀩𑀸𑀦𑀻’’𑀢𑀺 𑀇𑀤𑀁 𑀓𑀢𑁆𑀢𑀩𑁆𑀩𑀸𑀓𑀸𑀭𑀲𑁆𑀲𑁂𑀯 𑀯𑀺𑀲𑁂𑀲𑀦𑀁, 𑀦 𑀅𑀢𑁆𑀣𑀲𑁆𑀲. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀢𑁄 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀓𑀭𑀡𑀁 𑀦𑀸𑀫, 𑀉𑀧𑁄𑀲𑀣𑀓𑀭𑀡𑀢𑁄 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀢𑁆𑀢𑀸 𑀧𑀼𑀩𑁆𑀩𑀓𑀺𑀘𑁆𑀘𑀁 𑀦𑀸𑀫𑀸𑀢𑀺.

𑀉𑀧𑁄𑀲𑀣𑁄𑀢𑀺 𑀉𑀧𑁄𑀲𑀣𑀤𑀺𑀯𑀲𑁄. 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽𑀢𑀺 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽. 𑀓𑀫𑁆𑀫𑀧𑀢𑁆𑀢𑀸𑀢𑀺 𑀉𑀧𑁄𑀲𑀣𑀓𑀫𑁆𑀫𑀲𑁆𑀲 𑀧𑀢𑁆𑀢𑀸 𑀬𑀼𑀢𑁆𑀢𑀸 𑀅𑀦𑀼𑀭𑀽𑀧𑀸. 𑀢𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀏𑀓𑀲𑀻𑀫𑀸𑀬𑀁 𑀞𑀺𑀢𑀸 𑀘 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀪𑀸𑀕𑀸𑀧𑀢𑁆𑀢𑀺𑀬𑁄𑀢𑀺 𑀯𑀢𑁆𑀣𑀼𑀲𑀪𑀸𑀕𑀸 𑀆𑀧𑀢𑁆𑀢𑀺𑀬𑁄. 𑀯𑀚𑁆𑀚𑀦𑀻𑀬𑀸𑀢𑀺 𑀯𑀚𑁆𑀚𑁂𑀢𑀩𑁆𑀩𑀸. 𑀧𑀼𑀕𑁆𑀕𑀮𑀸𑀢𑀺 𑀕𑀳𑀝𑁆𑀞𑀸𑀤𑀺𑀧𑀼𑀕𑁆𑀕𑀮𑀸. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀉𑀧𑁄𑀲𑀣𑀲𑀻𑀫𑀫𑀸𑀴𑀓𑁂. 𑀏𑀢𑀸𑀦𑀺 𑀘𑀢𑁆𑀢𑀸𑀭𑀻𑀢𑀺 𑀧𑀸𑀞𑀲𑁂𑀲𑁄.

𑀆𑀕𑀢𑁂𑀳𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀻𑀢𑀺 𑀬𑁄𑀚𑀦𑀸. 𑀧𑀦𑁆𑀦𑀭𑀲𑁄𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀣 𑀔𑁄 ‘‘𑀅𑀚𑁆𑀚 𑀫𑁂 𑀉𑀧𑁄𑀲𑀣𑁄 𑀧𑀦𑁆𑀦𑀭𑀲𑁄’’𑀢𑀺𑀧𑀻𑀢𑀺 𑀤𑀲𑁆𑀲𑁂𑀢𑀺.

𑁯𑁨. 𑀆𑀧𑀢𑁆𑀢𑀺𑀧𑀝𑀺𑀓𑀫𑁆𑀫𑀯𑀺𑀥𑀺𑀓𑀣𑀸

𑁧𑁬𑁯. 𑀪𑀕𑀯𑀢𑀸…𑀧𑁂… 𑀓𑀸𑀢𑀩𑁆𑀩𑁄𑀢𑀺 𑀇𑀤𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻𑀢𑀺𑀆𑀤𑀺𑀯𑀘𑀦𑁂𑀦𑁂𑀯 𑀘𑀸’’𑀢𑀺𑀆𑀤𑀺𑀳𑁂𑀢𑀼𑀢𑁆𑀢𑀬𑁂𑀦 ‘‘𑀦 𑀲𑀸𑀧𑀢𑁆𑀢𑀺𑀓𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄’’𑀢𑀺 𑀬𑀣𑀸𑀭𑀼𑀢𑀁 𑀅𑀧𑀜𑁆𑀜𑀢𑁆𑀢𑀫𑁆𑀧𑀺 𑀅𑀢𑁆𑀣𑀢𑁄 𑀲𑀺𑀤𑁆𑀥𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀢𑀼𑀢𑁆𑀢𑀬𑀁 ‘‘𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀇𑀤𑀁 𑀲𑀼𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀆𑀧𑀢𑁆𑀢𑀺𑀁. 𑀢𑀼𑀫𑁆𑀳𑀫𑀽𑀮𑁂𑀢𑀺 𑀢𑀼𑀫𑁆𑀳𑀁 𑀲𑀦𑁆𑀢𑀺𑀓𑁂. 𑀦𑀺𑀕𑁆𑀕𑀳𑀺𑀢𑀮𑁄𑀧𑀜𑁆𑀳𑀺 𑀯𑀸𑀓𑁆𑀬𑀫𑁂𑀯, 𑀦 𑀲𑀫𑀸𑀲𑁄. ‘‘𑀢𑀼𑀫𑁆𑀳’’ 𑀇𑀢𑀺 𑀘 ‘‘𑀢𑀼𑀬𑁆𑀳’’ 𑀇𑀢𑀺 𑀘 𑀦𑀯𑀓𑀢𑁆𑀣𑁂𑀭𑀸𑀦𑀁 𑀯𑀢𑁆𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀫𑀢𑁆𑀢𑀫𑁂𑀯, 𑀦 𑀇𑀘𑁆𑀙𑀺𑀢𑀢𑁆𑀣𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀁. 𑀯𑀼𑀢𑁆𑀢𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀧𑀸𑀴𑀺𑀦𑀬𑁂𑀦𑁂𑀯 𑀲𑀼𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀦𑀬𑁂𑀦𑀧𑀺 𑀲𑀼𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀲𑁆𑀲𑀲𑀻’’𑀢𑀺 𑀇𑀤𑀜𑁆𑀘 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀢𑁆𑀢𑀩𑁆𑀩𑀸𑀓𑀸𑀭𑀁 𑀧𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. ‘‘𑀆𑀫 𑀧𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀧𑀦 𑀲𑀼𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀸𑀴𑀺𑀦𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻𑀢𑀺 𑀏𑀢𑁆𑀣 𑀧𑀦 𑀯𑀢𑁆𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀭𑀽𑀲𑀼 𑀩𑀳𑀼𑀯𑀘𑀦𑀲𑁆𑀲 𑀓𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀁𑀯𑀭𑁂𑀬𑁆𑀬𑀸𑀣𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀦 𑀆𑀧𑀢𑁆𑀢𑀺𑀤𑁂𑀲𑀓𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀭𑀸𑀢𑀺 ‘‘𑀬𑀤𑀸 𑀦𑀺𑀩𑁆𑀩𑁂𑀫𑀢𑀺𑀓𑁄’’𑀢𑀺 𑀧𑀸𑀞𑁂. 𑀲𑀽𑀭𑀺𑀬𑁂 𑀫𑁂𑀖𑀘𑁆𑀙𑀦𑁆𑀦𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀪𑁄𑀚𑀦𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸. 𑀢𑀸𑀢𑀺 𑀆𑀧𑀢𑁆𑀢𑀺𑀬𑁄.

𑀲𑀪𑀸𑀕𑀸 𑀆𑀧𑀢𑁆𑀢𑀻𑀢𑀺 𑀏𑀢𑁆𑀣 𑀤𑁆𑀯𑀻𑀲𑀼 𑀯𑀢𑁆𑀣𑀼𑀲𑀪𑀸𑀕𑀆𑀧𑀢𑁆𑀢𑀺𑀲𑀪𑀸𑀕𑀸𑀲𑀼 𑀯𑀢𑁆𑀣𑀼𑀲𑀪𑀸𑀕𑀸𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀤𑁆𑀯𑁂𑀧𑀺 𑀚𑀦𑀸’’𑀢𑀺𑀆𑀤𑀺. 𑀬𑀁 𑀆𑀧𑀢𑁆𑀢𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀸𑀦𑁄 𑀪𑀸𑀕𑁄 𑀏𑀢𑀸𑀲𑀦𑁆𑀢𑀺 𑀲𑀪𑀸𑀕𑀸. 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀧𑀢𑁆𑀢𑀺𑀲𑀪𑀸𑀕𑀸𑀧𑀺 𑀯𑀢𑁆𑀣𑀼𑀯𑀺𑀲𑀪𑀸𑀕𑀢𑁆𑀢𑀸 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀤𑁂𑀲𑀺𑀢𑀸𑀯𑀸𑀢𑀺 𑀆𑀧𑀢𑁆𑀢𑀺𑀢𑁄 𑀪𑀺𑀓𑁆𑀔𑀼 𑀯𑀼𑀝𑁆𑀞𑀸𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀁 𑀤𑀼𑀓𑁆𑀓𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀦𑀲𑀤𑁆𑀤𑁄 𑀕𑀭𑀳𑀢𑁆𑀣𑀚𑁄𑀢𑀓𑁄 𑀲𑀼𑀤𑁂𑀲𑀺𑀢𑀸𑀬 𑀕𑀭𑀳𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀲𑀼𑀤𑁂𑀲𑀺𑀢𑀸𑀯, 𑀧𑀦 𑀢𑀣𑀸𑀧𑀻𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀤𑀼𑀓𑁆𑀓𑀝𑀁. 𑀦𑀸𑀦𑀸𑀯𑀢𑁆𑀣𑀼𑀓𑀦𑁆𑀢𑀺 𑀤𑁂𑀲𑀦𑀸𑀧𑀝𑀺𑀕𑁆𑀕𑀳𑀡𑀯𑀲𑁂𑀦 𑀦𑀸𑀦𑀸𑀯𑀢𑁆𑀣𑀼𑀓𑀁.

𑁧𑁭𑁦. 𑀲𑀪𑀸𑀕𑁄𑀬𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀯𑀺𑀲𑀪𑀸𑀕𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀲𑁆𑀲𑀸𑀢𑀺 𑀯𑀺𑀲𑀪𑀸𑀕𑀲𑁆𑀲. 𑀇𑀢𑁄𑀢𑀺 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀢𑁄.

𑁯𑁫. 𑀅𑀦𑀸𑀧𑀢𑁆𑀢𑀺𑀧𑀦𑁆𑀦𑀭𑀲𑀓𑀸𑀤𑀺𑀓𑀣𑀸

𑁧𑁭𑁨. 𑀢𑁂 𑀦 𑀚𑀸𑀦𑀺𑀁𑀲𑀽𑀢𑀺 𑀏𑀢𑁆𑀣 𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀲𑀻𑀫𑀁 𑀑𑀓𑁆𑀓𑀦𑁆𑀢𑀸𑀢𑀺 𑀯𑀸 𑀑𑀓𑁆𑀓𑀫𑀦𑁆𑀢𑀻𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁. 𑀑𑀓𑁆𑀓𑀦𑁆𑀢𑀸𑀢𑀺 𑀯𑀸𑀢𑀺 𑀧𑀯𑀺𑀲𑀺𑀢𑁆𑀣 𑀇𑀢𑀺 𑀯𑀸. 𑀢𑁂𑀲𑀦𑁆𑀢𑀺 𑀘𑀢𑀼𑀦𑁆𑀦𑀁 𑀯𑀸 𑀅𑀢𑀺𑀭𑁂𑀓𑀸𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁. 𑀯𑀕𑁆𑀕𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀯𑀕𑁆𑀕𑀸, 𑀓𑀲𑁆𑀫𑀸 𑀲𑀫𑀕𑁆𑀕𑀲𑀜𑁆𑀜𑀺𑀦𑁄𑀢𑀺 𑀆𑀳 ‘‘𑀢𑁂𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀢𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁. 𑀲𑀻𑀫𑀁 𑀑𑀓𑁆𑀓𑀦𑁆𑀢𑀢𑁆𑀢𑀸𑀢𑀺 𑀲𑀻𑀫𑀁 𑀧𑀯𑀺𑀲𑀺𑀢𑀢𑁆𑀢𑀸, 𑀯𑀕𑁆𑀕𑀸 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑀕𑁆𑀕𑁄 𑀇𑀢𑀺 𑀲𑀜𑁆𑀜𑀸 𑀲𑀫𑀕𑁆𑀕𑀲𑀜𑁆𑀜𑀸, 𑀲𑀸 𑀏𑀢𑁂𑀲𑀫𑀢𑁆𑀣𑀻𑀢𑀺 𑀲𑀫𑀕𑁆𑀕𑀲𑀜𑁆𑀜𑀺𑀦𑁄.

𑁧𑁭𑁫. 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀢𑀺 𑀧𑀤𑀲𑁆𑀲 ‘‘𑀇𑀘𑁆𑀙𑀸𑀧𑀓𑀢𑁄’’𑀢𑀺 𑀧𑀤𑁂𑀦 𑀲𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀬𑀣𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀉𑀧𑁄𑀲𑀣𑀓𑀫𑁆𑀫𑀢𑁄 𑀧𑀼𑀩𑁆𑀩𑀪𑀸𑀕𑁂. 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸𑀧𑀻𑀢𑀺 𑀓𑀧𑁆𑀧𑀢𑁂𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸𑀧𑀺. ‘‘𑀅𑀪𑀺𑀪𑀽𑀢𑀸’’𑀢𑀺 𑀇𑀫𑀺𑀦𑀸 𑀧𑀓𑀢𑀸𑀢𑀺 𑀏𑀢𑁆𑀣 𑀧𑀧𑀼𑀩𑁆𑀩𑀓𑀭𑀥𑀸𑀢𑀼𑀬𑀸 𑀉𑀧𑀲𑀕𑁆𑀕𑀯𑀲𑁂𑀦 𑀅𑀪𑀺𑀪𑀯𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁧𑁭𑁬. 𑀬𑀣𑀸 𑀳𑁂𑀝𑁆𑀞𑀸 𑀯𑀕𑁆𑀕𑀸𑀯𑀕𑁆𑀕𑀲𑀜𑁆𑀜𑀻𑀧𑀦𑁆𑀦𑀭𑀲𑀓𑀸𑀤𑀻𑀲𑀼 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀏𑀯𑀫𑀓𑀢𑁆𑀯𑀸 𑀓𑀲𑁆𑀫𑀸 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀆𑀳 ‘‘𑀅𑀓𑀼𑀲𑀮𑀩𑀮𑀯𑀢𑀸𑀬𑀸’’𑀢𑀺.

𑁧𑁦𑁦. 𑀲𑀻𑀫𑁄𑀓𑁆𑀓𑀦𑁆𑀢𑀺𑀓𑀧𑁂𑀬𑁆𑀬𑀸𑀮𑀓𑀣𑀸

𑁧𑁭𑁭. 𑀆𑀯𑀸𑀲𑀺𑀓𑁂𑀦𑀆𑀕𑀦𑁆𑀢𑀼𑀓𑀧𑁂𑀬𑁆𑀬𑀸𑀮𑁂 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁂𑀤𑀺𑀢𑀩𑁆𑀩𑀸𑀓𑀸𑀭𑀁 𑀲𑀳 𑀉𑀧𑀫𑀸𑀬 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸’’𑀢𑀺𑀆𑀤𑀺. 𑀆𑀕𑀦𑁆𑀢𑀼𑀓𑁂𑀦𑀆𑀯𑀸𑀲𑀺𑀓𑀧𑁂𑀬𑁆𑀬𑀸𑀮𑁂 𑀧𑀦 𑀆𑀦𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀭𑀺𑀫𑀧𑁂𑀬𑁆𑀬𑀸𑀮𑁂𑀢𑀺 𑀆𑀯𑀸𑀲𑀺𑀓𑁂𑀦𑀆𑀕𑀦𑁆𑀢𑀼𑀓𑀧𑁂𑀬𑁆𑀬𑀸𑀮𑁂. 𑀆𑀕𑀦𑁆𑀢𑀼𑀓𑁂𑀦𑀆𑀕𑀦𑁆𑀢𑀼𑀓𑀧𑁂𑀬𑁆𑀬𑀸𑀮𑁂 𑀧𑀦 𑀬𑁄𑀚𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀘 𑀧𑁂𑀬𑁆𑀬𑀸𑀮𑀦𑁆𑀢𑀺 𑀲𑀤𑀺𑀲𑀦𑀬𑀲𑁆𑀲 𑀘 𑀢𑀁𑀚𑀸𑀦𑀦𑀜𑀸𑀡𑀲𑁆𑀲 𑀘 𑀧𑀸𑀢𑀩𑁆𑀩𑀁 𑀭𑀓𑁆𑀔𑀦𑀁 𑀧𑁂𑀬𑁆𑀬𑀁, 𑀧𑁂𑀬𑁆𑀬𑀁, 𑀧𑁂𑀬𑁆𑀬𑁂 𑀯𑀸, 𑀧𑁂𑀬𑁆𑀬𑀸𑀬 𑀯𑀸 𑀅𑀮𑀢𑀺 𑀲𑀫𑀢𑁆𑀣𑁂𑀢𑀻𑀢𑀺 𑀧𑁂𑀬𑁆𑀬𑀸𑀮𑀦𑁆𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄.

𑁧𑁭𑁮. 𑀆𑀯𑀸𑀲𑀺𑀓𑀸𑀦𑀁 𑀘𑀸𑀢𑀼𑀤𑁆𑀤𑀲𑁄 𑀳𑀼𑀢𑁆𑀯𑀸 𑀓𑀲𑁆𑀫𑀸 𑀆𑀕𑀦𑁆𑀢𑀼𑀓𑀸𑀦𑀁 𑀧𑀦𑁆𑀦𑀭𑀲𑁄𑀢𑀺 𑀆𑀳 ‘‘𑀬𑁂𑀲’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀬𑁂𑀲𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁. 𑀢𑀺𑀭𑁄𑀭𑀝𑁆𑀞𑀢𑁄𑀢𑀺 𑀆𑀯𑀸𑀲𑀺𑀓𑀸𑀦𑀁 𑀭𑀝𑁆𑀞𑀲𑁆𑀲 𑀅𑀜𑁆𑀜𑀭𑀝𑁆𑀞𑀢𑁄. 𑀢𑀺𑀭𑁄𑀚𑀦𑀧𑀤𑀢𑁄𑀢𑀺 𑀏𑀓𑀭𑀝𑁆𑀞𑁂𑀧𑀺 𑀅𑀜𑁆𑀜𑀚𑀦𑀧𑀤𑀢𑁄. 𑀘𑀸𑀢𑀼𑀤𑁆𑀤𑀲𑀺𑀓𑀁 𑀅𑀓𑀁𑀲𑀽𑀢𑀺 𑀲𑀜𑁆𑀜𑀸𑀦𑀸𑀦𑀢𑁆𑀢𑀯𑀲𑁂𑀦 𑀘𑀸𑀢𑀼𑀤𑁆𑀤𑀲𑀺𑀓𑀁 𑀅𑀓𑀁𑀲𑀼. 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀫𑀢𑀺𑀁 𑀯𑀢𑁆𑀢𑀺𑀢𑀩𑁆𑀩𑀁. 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀦𑁆𑀢𑀺 ‘‘𑀦 𑀘𑀸𑀢𑀼𑀤𑁆𑀤𑀲𑁄’’𑀢𑀺 𑀯𑀢𑁆𑀯𑀸 𑀦 𑀯𑀸𑀭𑀺𑀢𑀩𑁆𑀩𑀁. 𑀦 𑀅𑀓𑀸𑀫𑀸𑀢𑀺 𑀏𑀢𑁆𑀣 𑀓𑀫𑀼𑀥𑀸𑀢𑀼 𑀇𑀘𑁆𑀙𑀢𑁆𑀣𑁄, 𑀓𑀭𑀡𑀢𑁆𑀣𑁂 𑀘 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀦 𑀅𑀦𑀺𑀘𑁆𑀙𑀸𑀬 𑀤𑀸𑀢𑀩𑁆𑀩𑀸’’𑀢𑀺.

𑁧𑁦𑁧. 𑀮𑀺𑀗𑁆𑀕𑀸𑀤𑀺𑀤𑀲𑁆𑀲𑀦𑀓𑀣𑀸

𑁧𑁭𑁯. ‘‘𑀆𑀯𑀸𑀲𑀺𑀓𑀸𑀦𑀁 𑀆𑀓𑀸𑀭’’𑀦𑁆𑀢𑀺 𑀇𑀫𑀺𑀦𑀸 𑀆𑀯𑀸𑀲𑀺𑀓𑀸𑀓𑀸𑀭𑀦𑁆𑀢𑀺 𑀧𑀤𑀲𑁆𑀲 𑀙𑀝𑁆𑀞𑀻𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 ‘‘𑀆𑀯𑀸𑀲𑀺𑀓𑀮𑀺𑀗𑁆𑀕’’𑀦𑁆𑀢𑀺𑀆𑀤𑀻𑀲𑀼. 𑀬𑁂𑀦𑀸𑀢𑀺 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺𑀦𑀸, 𑀕𑀡𑁆𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀆𑀯𑀸𑀲𑀺𑀓𑀸𑀦𑀁. 𑀆𑀘𑀸𑀭𑀲𑀡𑁆𑀞𑀸𑀦𑀦𑁆𑀢𑀺 𑀆𑀘𑀸𑀭𑀲𑀡𑁆𑀞𑀺𑀢𑀺𑀁. 𑀲𑁄 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺𑀓𑁄 𑀆𑀓𑀸𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺𑀁, 𑀕𑀫𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀮𑀻𑀦𑁂 𑀆𑀯𑀸𑀲𑀺𑀓𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺 𑀮𑀺𑀗𑁆𑀕𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀅𑀤𑀺𑀲𑁆𑀲𑀫𑀸𑀦𑁂’’𑀢𑀺 𑀇𑀫𑀺𑀦𑀸 𑀮𑀻𑀦𑁂𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀚𑀸𑀦𑀸𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀕𑀫𑀬𑀢𑀻𑀢𑀺 𑀧𑀤𑀲𑁆𑀲 𑀜𑀸𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺𑀁. 𑀢𑁂𑀢𑀺 𑀆𑀯𑀸𑀲𑀺𑀓𑀸. 𑀢𑀁 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺 𑀦𑀺𑀫𑀺𑀢𑁆𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀬𑁂𑀦𑀸𑀢𑀺 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺𑀦𑀸. 𑀢𑁂𑀢𑀺 𑀆𑀯𑀸𑀲𑀺𑀓𑀸 𑀉𑀤𑁆𑀤𑀺𑀲𑀺𑀬𑀦𑁆𑀢𑀺, 𑀲𑁄 𑀲𑀼𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑀸𑀤𑀺𑀓𑁄 𑀉𑀤𑁆𑀤𑁂𑀲𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀫𑁂𑀳𑀺 𑀧𑀤𑁂𑀳𑀺 𑀆𑀓𑀺𑀭𑀺𑀬𑀦𑁆𑀢𑀺 𑀧𑀓𑀸𑀲𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀓𑀸𑀭𑁄, 𑀮𑀻𑀦𑁂 𑀕𑀫𑀬𑀢𑀺 𑀩𑁄𑀥𑁂𑀢𑀻𑀢𑀺 𑀮𑀺𑀗𑁆𑀕𑀁. 𑀦𑀺𑀫𑀺𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀚𑁆𑀚 𑀜𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀦𑀺𑀫𑀺𑀢𑁆𑀢𑀁, 𑀉𑀤𑁆𑀤𑀺𑀲𑀺𑀬𑀦𑁆𑀢𑀺 𑀅𑀧𑀤𑀺𑀲𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀤𑁆𑀤𑁂𑀲𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀫𑁂𑀢𑀦𑁆𑀢𑀺 ‘‘𑀆𑀯𑀸𑀲𑀺𑀓𑀸𑀓𑀸𑀭’’𑀦𑁆𑀢𑀺𑀆𑀤𑀺 𑀏𑀢𑀁 𑀲𑀩𑁆𑀩𑀁. 𑀬𑀣𑀸𑀬𑁄𑀕𑀦𑁆𑀢𑀺 𑀧𑀸𑀴𑀺𑀬𑀁 𑀬𑁄𑀕𑀸𑀦𑀼𑀭𑀽𑀧𑀁. 𑀢𑀢𑁆𑀣𑀸𑀢𑀺 𑀆𑀕𑀦𑁆𑀢𑀼𑀓𑀸𑀓𑀸𑀭𑀸𑀤𑀻𑀲𑀼. ‘‘𑀅𑀫𑁆𑀳𑀸𑀓𑀁 𑀇𑀤’’𑀦𑁆𑀢𑀺 𑀦 𑀜𑀸𑀢𑀩𑁆𑀩𑀦𑁆𑀢𑀺 𑀅𑀜𑁆𑀜𑀸𑀢𑀁, 𑀢𑀤𑁂𑀯 𑀅𑀜𑁆𑀜𑀸𑀢𑀓𑀁, 𑀦𑀺𑀲𑀻𑀤𑀦𑀸𑀤𑀺. ‘‘𑀅𑀫𑁆𑀳𑀸𑀓𑀁 𑀇𑀤’’𑀦𑁆𑀢𑀺 𑀅𑀚𑀸𑀦𑀦𑀁 𑀦𑀸𑀫 𑀅𑀢𑁆𑀢𑀦𑁄 𑀅𑀲𑀦𑁆𑀢𑀓𑀢𑁆𑀢𑀸, 𑀅𑀜𑁆𑀜𑁂𑀲𑀫𑁂𑀯 𑀲𑀦𑁆𑀢𑀓𑀢𑁆𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀅𑀜𑁆𑀜𑁂𑀲𑀁 𑀲𑀦𑁆𑀢𑀓’’𑀦𑁆𑀢𑀺. 𑀉𑀤𑀓𑀦𑀺𑀲𑁆𑀲𑁂𑀓𑀦𑁆𑀢𑀺 𑀲𑀺𑀜𑁆𑀘𑀦𑀯𑀺𑀭𑀳𑀺𑀢𑀁 𑀉𑀤𑀓𑀁. 𑀩𑀳𑀼𑀯𑀘𑀦𑀲𑁆𑀲𑀸𑀢𑀺 ‘‘𑀥𑁄𑀢𑀸𑀦’’𑀦𑁆𑀢𑀺 𑀏𑀢𑁆𑀣 𑀙𑀝𑁆𑀞𑀻𑀩𑀳𑀼𑀯𑀘𑀦𑀲𑁆𑀲. 𑀏𑀓𑀯𑀘𑀦𑀦𑁆𑀢𑀺 ‘‘𑀥𑁄𑀢𑀲𑁆𑀲𑀸’’𑀢𑀺 𑀏𑀓𑀯𑀘𑀦𑀁. 𑀧𑀘𑁆𑀙𑀺𑀫𑀧𑀸𑀞𑁂 𑀫𑀮𑀁 𑀥𑀼𑀦𑀸𑀢𑀺 𑀅𑀦𑁂𑀦𑀸𑀢𑀺 𑀥𑁄𑀢𑀁, 𑀥𑁄𑀢𑀜𑁆𑀘 𑀢𑀁 𑀉𑀤𑀓𑀜𑁆𑀘𑁂𑀢𑀺 𑀥𑁄𑀢𑀉𑀤𑀓𑀁, 𑀢𑀫𑁂𑀯 𑀦𑀺𑀲𑁆𑀲𑁂𑀓𑀁 𑀥𑁄𑀢𑀉𑀤𑀓𑀦𑀺𑀲𑁆𑀲𑁂𑀓𑀁.

𑁧𑁮𑁦. 𑀲𑀫𑀸𑀦𑀲𑀁𑀯𑀸𑀲𑀓𑀤𑀺𑀝𑁆𑀞𑀺𑀦𑁆𑀢𑀺 𑀧𑀤𑀲𑁆𑀲 𑀇𑀢𑀺𑀮𑁄𑀧𑀲𑀫𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀸𑀦𑀲𑀁𑀯𑀸𑀲𑀓𑀸 𑀏𑀢𑁂𑀢𑀺 𑀤𑀺𑀝𑁆𑀞𑀺’’𑀦𑁆𑀢𑀺. 𑀏𑀢𑁂𑀢𑀺 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽. ‘‘𑀮𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸 𑀦 𑀧𑀼𑀘𑁆𑀙𑀦𑁆𑀢𑀻𑀢𑀺 𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑀦𑁆𑀢𑀺 𑀢𑁂𑀲𑀁 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑀁. ‘‘𑀫𑀤𑁆𑀤𑀺𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀦𑀸𑀪𑀺𑀯𑀺𑀢𑀭𑀦𑁆𑀢𑀻𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀪𑀺𑀪𑀯𑀺𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀘 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀸𑀦𑀸𑀲𑀁𑀯𑀸𑀲𑀓𑀪𑀸𑀯𑀲𑁆𑀲 𑀫𑀤𑁆𑀤𑀦𑀁 𑀦𑀸𑀫 𑀮𑀤𑁆𑀥𑀺𑀦𑀺𑀲𑁆𑀲𑀚𑁆𑀚𑀸𑀧𑀦𑀦𑁆𑀢𑀺 𑀆𑀳 ‘‘𑀢𑀁 𑀤𑀺𑀝𑁆𑀞𑀺𑀁 𑀦 𑀦𑀺𑀲𑁆𑀲𑀚𑁆𑀚𑀸𑀧𑁂𑀦𑁆𑀢𑀻’’𑀢𑀺.

𑁧𑁦𑁩. 𑀦𑀕𑀦𑁆𑀢𑀩𑁆𑀩𑀕𑀦𑁆𑀢𑀩𑁆𑀩𑀯𑀸𑀭𑀓𑀣𑀸

𑁧𑁮𑁧. 𑀲𑀪𑀺𑀓𑁆𑀔𑀼𑀓𑀸𑀢𑀺 𑀧𑀤𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺 𑀪𑀺𑀓𑁆𑀔𑀽 𑀏𑀢𑀲𑁆𑀫𑀺𑀫𑀸𑀯𑀸𑀲𑁂𑀢𑀺 𑀲𑀪𑀺𑀓𑁆𑀔𑀼𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁 𑀆𑀯𑀸𑀲𑁂’’𑀢𑀺𑀆𑀤𑀺. 𑀬𑀦𑁆𑀢𑀺 𑀆𑀯𑀸𑀲𑀁. 𑀢𑀤𑀳𑁂𑀯𑀸𑀢𑀺 𑀢𑀤𑀳𑀼𑀧𑁄𑀲𑀣𑁂 𑀏𑀯. 𑀇𑀫𑀺𑀦𑀸 𑀲𑀘𑁂 𑀲𑀓𑁆𑀓𑁄𑀢𑀺, 𑀢𑀤𑀳𑁂𑀯 𑀕𑀦𑁆𑀢𑀼𑀁, 𑀲𑁄 𑀕𑀦𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀢𑁆𑀯𑀸 𑀧𑀦 𑀕𑀦𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀜𑁆𑀜𑀢𑁆𑀭𑀸’’𑀢𑀺 𑀦𑀺𑀧𑀸𑀢𑁄 ‘‘𑀯𑀺𑀦𑀸’’𑀢𑀺 𑀦𑀺𑀧𑀸𑀢𑀲𑁆𑀲 𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀯𑀺𑀦𑀸’’𑀢𑀺. 𑀅𑀢𑁆𑀢𑀘𑀢𑀼𑀢𑁆𑀣𑁂𑀦 𑀯𑀸 𑀅𑀢𑁆𑀢𑀧𑀜𑁆𑀘𑀫𑁂𑀦 𑀯𑀸 𑀲𑀗𑁆𑀖𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀅𑀢𑁆𑀢𑀘𑀢𑀼𑀢𑁆𑀣𑁂𑀦 𑀯𑀸’’𑀢𑀺 𑀇𑀤𑀁 𑀉𑀧𑁄𑀲𑀣𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀧𑀜𑁆𑀘𑀫𑁂𑀦 𑀯𑀸’’𑀢𑀺 𑀇𑀤𑀁 𑀧𑀯𑀸𑀭𑀡𑀸𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀳𑀸𑀭𑁂𑀢𑀺 𑀯𑀺𑀳𑀸𑀭𑀲𑀻𑀫𑀸𑀬 𑀫𑀳𑀸𑀲𑀻𑀫𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀯𑀺𑀳𑀸𑀭𑀲𑀻𑀫𑀸𑀦𑀁 𑀅𑀪𑁂𑀤𑁂𑀦 𑀯𑀼𑀢𑁆𑀢𑀁. 𑀲𑀻𑀫𑀸𑀧𑀻𑀢𑀺 𑀔𑀡𑁆𑀟𑀲𑀻𑀫𑀸𑀧𑀺. 𑀦 𑀕𑀦𑁆𑀢𑀩𑁆𑀩𑀸𑀢𑀺 𑀲𑀗𑁆𑀖𑀲𑁆𑀲 𑀕𑀭𑀼𑀓𑀢𑁆𑀢𑀸 𑀦 𑀕𑀦𑁆𑀢𑀩𑁆𑀩𑀸. 𑀏𑀢𑁆𑀣𑀸𑀢𑀺 𑀔𑀡𑁆𑀟𑀲𑀻𑀫𑀸𑀤𑀻𑀲𑀼. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀕𑀡𑀼𑀧𑁄𑀲𑀣𑀝𑁆𑀞𑀸𑀦𑀢𑁄 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀲𑀗𑁆𑀖𑀼𑀧𑁄𑀲𑀣𑀝𑁆𑀞𑀸𑀦𑀢𑁄 𑀧𑀦 𑀦 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀲𑁆𑀲𑀝𑁆𑀞𑀉𑀧𑁄𑀲𑀣𑀸 𑀆𑀯𑀸𑀲𑀸𑀧𑀺 𑀅𑀜𑁆𑀜𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀆𑀭𑀜𑁆𑀜𑀓𑁂𑀦𑀸𑀧𑀻𑀢𑀺 𑀅𑀭𑀜𑁆𑀜𑁂 𑀏𑀓𑀓𑁂𑀦 𑀦𑀺𑀯𑀸𑀲𑁂𑀦𑀧𑀺. 𑀢𑀢𑁆𑀣𑀸𑀢𑀺 𑀅𑀜𑁆𑀜𑀯𑀺𑀳𑀸𑀭𑁂. 𑀉𑀧𑁄𑀲𑀣𑀦𑁆𑀢𑀺 𑀲𑀗𑁆𑀖𑀼𑀧𑁄𑀲𑀣𑀜𑁆𑀘 𑀕𑀡𑀼𑀧𑁄𑀲𑀣𑀜𑁆𑀘.

𑁧𑁮𑁨. 𑀬𑀦𑁆𑀢𑀺 𑀆𑀯𑀸𑀲𑀁. 𑀢𑀢𑁆𑀣𑀸𑀢𑀺 𑀢𑀁 𑀆𑀯𑀸𑀲𑀁. 𑀕𑀦𑁆𑀢𑀼𑀁 𑀲𑀓𑁆𑀓𑁄𑀫𑀺 𑀇𑀢𑀺 𑀚𑀸𑀦𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀆𑀯𑀸𑀲𑁂. 𑀇𑀫𑀺𑀦𑀸 𑀦𑁂𑀯 𑀓𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑁂𑀯 𑀓𑀢𑁄 𑀪𑀯𑀺𑀲𑁆𑀲𑀢𑀺 𑀇𑀢𑀺 𑀚𑀸𑀦𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑁧𑁦𑁫. 𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑀲𑀦𑁆𑀤𑀲𑁆𑀲𑀦𑀓𑀣𑀸

𑁧𑁮𑁩. 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑀫𑁂𑀯𑀸𑀢𑀺 𑀉𑀧𑁄𑀲𑀣𑀲𑀗𑁆𑀖𑀸𑀤𑀻𑀦𑀁 𑀳𑀢𑁆𑀣𑀧𑀸𑀲𑀲𑁆𑀲 𑀉𑀧𑀕𑀫𑀦𑀫𑁂𑀯. 𑀇𑀤𑀁 𑀧𑀸𑀭𑀺𑀯𑀸𑀲𑀺𑀬𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀁 𑀦𑀸𑀫 𑀦 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀧𑀸𑀭𑀺𑀯𑀸𑀲𑀺𑀬𑀧𑀸𑀭𑀺𑀲𑀼𑀤𑁆𑀥𑀺𑀤𑀸𑀦𑀲𑁆𑀲. 𑀅𑀦𑀼𑀧𑁄𑀲𑀣𑁂𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀅𑀜𑁆𑀜𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂’’𑀢𑀺. 𑀢𑀢𑁆𑀣 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀤𑁆𑀯𑀻𑀳𑀺 𑀉𑀧𑁄𑀲𑀣𑁂𑀳𑀺 𑀅𑀜𑁆𑀜𑀲𑁆𑀫𑀺𑀁. 𑀬𑀸 𑀲𑀗𑁆𑀖𑀲𑀸𑀫𑀕𑁆𑀕𑀻 𑀓𑀭𑀺𑀬𑀢𑀺, 𑀢𑀣𑀸𑀭𑀽𑀧𑀺𑀦𑁆𑀢𑀺 𑀬𑁄𑀚𑀦𑀸. 𑀓𑁄𑀲𑀫𑁆𑀩𑀓𑀪𑀺𑀓𑁆𑀔𑀽𑀦𑀦𑁆𑀢𑀺 𑀓𑁄𑀲𑀫𑁆𑀩𑀺𑀬𑀁 𑀦𑀺𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁. 𑀲𑀸𑀫𑀕𑁆𑀕𑀻 𑀯𑀺𑀬 𑀬𑀸 𑀲𑀸𑀫𑀕𑁆𑀕𑀻𑀢𑀺 𑀬𑁄𑀚𑀦𑀸. ‘‘𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀅𑀜𑁆𑀜𑀢𑁆𑀭𑀸𑀢𑀺 𑀦𑀺𑀧𑀸𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑁂 𑀧𑀦𑀸𑀢𑀺 𑀪𑀺𑀓𑁆𑀔𑀽 𑀧𑀦 𑀲𑀫𑀕𑁆𑀕𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑁄𑀲𑀣𑁂𑀬𑁂𑀯𑀸𑀢𑀺 𑀉𑀧𑁄𑀲𑀣𑀤𑀺𑀯𑀲𑁂𑀬𑁂𑀯.

𑀇𑀢𑀺 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.