𑁮𑁩. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀅𑀚𑁆𑀛𑁂𑀲𑀦𑀸𑀤𑀺𑀓𑀣𑀸

𑁧𑁫𑁫. 𑀦𑀯𑀯𑀺𑀥𑀜𑁆𑀘𑀸𑀢𑀺 𑀤𑀺𑀯𑀲𑀯𑀲𑁂𑀦 𑀢𑀺𑀯𑀺𑀥𑀁, 𑀓𑀸𑀭𑀓𑀯𑀲𑁂𑀦 𑀢𑀺𑀯𑀺𑀥𑀁, 𑀓𑀢𑁆𑀢𑀩𑁆𑀩𑀸𑀓𑀸𑀭𑀯𑀲𑁂𑀦 𑀢𑀺𑀯𑀺𑀥𑀜𑁆𑀘𑀸𑀢𑀺 𑀦𑀯𑀓𑁄𑀝𑁆𑀞𑀸𑀲𑀜𑁆𑀘, 𑀦𑀯𑀧𑀓𑀸𑀭𑀜𑁆𑀘 𑀯𑀸. 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 ‘‘𑀅𑀥𑀫𑁆𑀫𑁂𑀦 𑀯𑀕𑁆𑀕’’𑀦𑁆𑀢𑀺𑀆𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀁. 𑀤𑀼𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀯𑀲𑁂𑀦 𑀤𑀼𑀯𑀺𑀥𑀁. 𑀦𑀯𑀯𑀺𑀥𑀦𑁆𑀢𑀺 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀧𑀜𑁆𑀘𑀯𑀺𑀥𑀁, 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀦𑀯𑀯𑀺𑀥𑀁. 𑀏𑀢𑁆𑀣𑀸𑀢𑀺 ‘‘𑀬𑁄 𑀢𑀢𑁆𑀣 𑀪𑀺𑀓𑁆𑀔𑀼 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄’’𑀢𑀺 𑀧𑀸𑀞𑁂. 𑀲𑀼𑀯𑀺𑀲𑀤𑀸𑀢𑀺 𑀲𑀼𑀝𑁆𑀞𑀼 𑀩𑁆𑀬𑀢𑁆𑀢𑀸, 𑀲𑀼𑀤𑁆𑀥𑀸 𑀯𑀸. 𑀏𑀢𑁆𑀢𑀓𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀕𑀭𑀳𑀸𑀬𑀁, 𑀅𑀥𑀺𑀓𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀸𑀫𑀦𑁆𑀢𑀸 𑀆𑀯𑀸𑀲𑀸𑀢𑀺 𑀏𑀢𑁆𑀣 𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀸𑀫𑀦𑁆𑀢𑀁 𑀆𑀯𑀸𑀲’’𑀦𑁆𑀢𑀺. 𑀬𑁄 𑀲𑀓𑁆𑀓𑁄𑀢𑀻𑀢𑀺 𑀩𑀳𑀽𑀲𑀼 𑀦𑀯𑁂𑀲𑀼 𑀬𑁄 𑀲𑀓𑁆𑀓𑁄𑀢𑀺.