𑁭. 𑀧𑀩𑁆𑀩𑀚𑁆𑀚𑀸𑀓𑀣𑀸

𑁩𑁧. 𑀧𑁄𑀭𑀸𑀡𑀸𑀦𑀼𑀧𑁄𑀭𑀸𑀡𑀸𑀦𑀦𑁆𑀢𑀺 𑀧𑀼𑀭𑀸𑀡𑁂 𑀘 𑀅𑀦𑀼𑀧𑀼𑀭𑀸𑀡𑁂 𑀘 𑀪𑀯𑀸𑀦𑀁. 𑀏𑀓𑀲𑀝𑁆𑀞𑀻𑀢𑀺 𑀏𑀓𑁄 𑀘 𑀲𑀝𑁆𑀞𑀺 𑀘, 𑀏𑀓𑁂𑀦 𑀯𑀸 𑀅𑀥𑀺𑀓𑀸 𑀲𑀝𑁆𑀞𑀺 𑀏𑀓𑀲𑀝𑁆𑀞𑀺.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀏𑀓𑀲𑀝𑁆𑀞𑀺𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑁂𑀲𑀼. 𑀧𑀼𑀩𑁆𑀩𑀬𑁄𑀕𑁄𑀢𑀺 𑀧𑀼𑀩𑁆𑀩𑁂 𑀓𑀢𑁄 𑀉𑀧𑀸𑀬𑁄, 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑁄𑀢𑀺 𑀅𑀢𑁆𑀣𑁄. 𑀯𑀕𑁆𑀕𑀩𑀦𑁆𑀥𑁂𑀦𑀸𑀢𑀺 𑀲𑀫𑀽𑀳𑀁 𑀓𑀢𑁆𑀯𑀸 𑀩𑀦𑁆𑀥𑁂𑀦. 𑀢𑁂𑀢𑀺 𑀧𑀜𑁆𑀘𑀧𑀜𑁆𑀜𑀸𑀲 𑀚𑀦𑀸. 𑀛𑀸𑀧𑁂𑀲𑁆𑀲𑀸𑀫𑀸𑀢𑀺 𑀟𑀬𑁆𑀳𑀺𑀲𑁆𑀲𑀸𑀫. 𑀦𑀻𑀳𑀭𑀺𑀁𑀲𑀽𑀢𑀺 𑀕𑀸𑀫𑀢𑁄 𑀦𑀻𑀳𑀭𑀺𑀁𑀲𑀼. 𑀢𑁂𑀲𑀽𑀢𑀺 𑀧𑀜𑁆𑀘𑀧𑀜𑁆𑀜𑀸𑀲𑀚𑀦𑁂𑀲𑀼. 𑀧𑀜𑁆𑀘 𑀚𑀦𑁂 𑀞𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀸𑀢𑀺 𑀧𑀜𑁆𑀘𑀳𑀺 𑀚𑀦𑁂𑀳𑀺 𑀅𑀯𑀲𑁂𑀲𑀸. 𑀲𑁄𑀢𑀺 𑀬𑀲𑁄 𑀤𑀸𑀭𑀓𑁄. 𑀢𑁂𑀧𑀻𑀢𑀺 𑀘𑀢𑁆𑀢𑀸𑀭𑁄𑀧𑀺 𑀚𑀦𑀸. 𑀢𑀢𑁆𑀣𑀸𑀢𑀺 𑀲𑀭𑀻𑀭𑁂. 𑀢𑁂 𑀲𑀩𑁆𑀩𑁂𑀧𑀻𑀢𑀺 𑀬𑀲𑀲𑁆𑀲 𑀫𑀸𑀢𑀸𑀧𑀺𑀢𑀼𑀪𑀭𑀺𑀬𑀸𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑁂𑀧𑀺 𑀢𑁂 𑀲𑀳𑀸𑀬𑀓𑀸. 𑀢𑁂𑀦𑀸𑀢𑀺 𑀧𑀼𑀩𑁆𑀩𑀬𑁄𑀕𑁂𑀦.

𑀆𑀫𑀦𑁆𑀢𑁂𑀲𑀻𑀢𑀺 𑀓𑀣𑁂𑀲𑀺.

𑁩𑁨. 𑀤𑀺𑀩𑁆𑀩𑁂𑀲𑀼 𑀯𑀺𑀲𑀬𑁂𑀲𑀼 𑀪𑀯𑀸 𑀤𑀺𑀩𑁆𑀩𑀸 𑀮𑁄𑀪𑀧𑀸𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀺𑀩𑁆𑀩𑀸 𑀦𑀸𑀫𑀸’’𑀢𑀺𑀆𑀤𑀺. 𑀮𑁄𑀪𑀧𑀸𑀲𑀸𑀢𑀺 𑀮𑁄𑀪𑀲𑀗𑁆𑀔𑀸𑀢𑀸 𑀩𑀦𑁆𑀥𑀦𑀸. 𑀅𑀲𑀯𑀦𑀢𑀸𑀢𑀺 𑀏𑀢𑁆𑀣 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀲𑀯𑀦𑀢𑀸𑀬𑀸’’𑀢𑀺. 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀏𑀢𑁆𑀣 𑀓𑁂𑀦 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀲𑁂𑀲𑀸𑀥𑀺𑀕𑀫𑀢𑁄’’𑀢𑀺. 𑀯𑀺𑀲𑁂𑀲𑀸𑀥𑀺𑀕𑀫𑀢𑁄𑀢𑀺 𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀫𑀢𑁄.

𑁩𑁩. 𑀅𑀦𑁆𑀢𑀁 𑀮𑀸𑀫𑀓𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑀸𑀫𑀓𑀸’’𑀢𑀺. ‘‘𑀳𑀻𑀦𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀦𑁆𑀢𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀆𑀫𑀦𑁆𑀢𑀦𑀧𑀤𑀫𑁂𑀢𑀁. 𑀢𑀦𑁆𑀢𑀺 𑀭𑀸𑀕𑀧𑀸𑀲𑀁. 𑀳𑀻𑀢𑀺 𑀲𑀘𑁆𑀘𑀁. 𑀲𑁄𑀢𑀺 𑀫𑀸𑀭𑁄 𑀧𑀸𑀧𑀺𑀫𑀸. 𑀅𑀦𑁆𑀢𑀮𑀺𑀓𑁆𑀔𑁂 𑀘𑀭𑀦𑁆𑀢𑀸𑀦𑀁 𑀧𑀜𑁆𑀘𑀸𑀪𑀺𑀜𑁆𑀜𑀸𑀦𑀫𑁆𑀧𑀺 𑀩𑀦𑁆𑀥𑀦𑀢𑁆𑀢𑀸 𑀅𑀦𑁆𑀢𑀮𑀺𑀓𑁆𑀔𑁂 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀦𑁆𑀢𑀮𑀺𑀓𑁆𑀔𑀘𑀭𑁄𑀢𑀺 𑀯𑀘𑀦𑀢𑁆𑀣𑁂𑀦 𑀭𑀸𑀕𑀧𑀸𑀲𑁄 ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄’’𑀢𑀺 𑀫𑀸𑀭𑁂𑀦 𑀧𑀸𑀧𑀺𑀫𑀢𑀸 𑀯𑀼𑀢𑁆𑀢𑁄.

𑁩𑁪. 𑀦𑀸𑀦𑀸𑀚𑀦𑀧𑀤𑀢𑁄𑀢𑀺 𑀏𑀓𑀺𑀲𑁆𑀲𑀸𑀧𑀺 𑀤𑀺𑀲𑀸𑀬 𑀦𑀸𑀦𑀸𑀚𑀦𑀧𑀤𑀢𑁄. ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀧𑀩𑁆𑀩𑀸𑀚𑁂𑀣𑀸’’𑀢𑀺𑀆𑀤𑀺𑀫𑁆𑀳𑀺 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀩𑁆𑀩𑀸𑀚𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂 𑀧𑀝𑀺𑀓𑁆𑀔𑀺𑀢𑁆𑀢𑀸 𑀧𑀼𑀕𑁆𑀕𑀮𑀸𑀢𑀺 𑀬𑁄𑀚𑀦𑀸. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁. ‘‘𑀦 𑀪𑀺𑀓𑁆𑀔𑀯𑁂…𑀧𑁂… 𑀧𑀩𑁆𑀩𑀸𑀚𑁂𑀢𑀩𑁆𑀩𑁄’’𑀢𑀺 𑀧𑀸𑀴𑀺𑀁 (𑀫𑀳𑀸𑀯. 𑁮𑁯) 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑁂𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀧𑀼𑀕𑁆𑀕𑀮𑁂. 𑀲𑁄𑀧𑀺 𑀘𑀸𑀢𑀺 𑀲𑁄𑀧𑀺 𑀘 𑀧𑀼𑀕𑁆𑀕𑀮𑁄. 𑀅𑀦𑀼𑀜𑁆𑀜𑀸𑀢𑁄𑀬𑁂𑀯 𑀧𑀩𑁆𑀩𑀸𑀚𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀘𑀸𑀢𑀺 𑀧𑀼𑀕𑁆𑀕𑀮𑀲𑁆𑀲 𑀘, 𑀅𑀣 𑀯𑀸 𑀢𑁂𑀲𑀜𑁆𑀘 𑀫𑀸𑀢𑀸𑀧𑀺𑀢𑀽𑀦𑀁. 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀳𑁂𑀲. 𑀅𑀦𑀼𑀚𑀸𑀦𑀦𑀮𑀓𑁆𑀔𑀡𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀘𑀲𑀤𑁆𑀤𑁄 𑀯𑀸𑀓𑁆𑀬𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀲𑀘𑁂 𑀅𑀘𑁆𑀙𑀺𑀦𑁆𑀦𑀓𑁂𑀲𑁄 𑀳𑁄𑀢𑀺 𑀘, 𑀲𑀘𑁂 𑀏𑀓𑀲𑀻𑀫𑀸𑀬 𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀅𑀢𑁆𑀣𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀧𑀻𑀢𑀺 𑀅𑀢𑁆𑀢𑀦𑀸 𑀅𑀧𑀭𑁂𑀧𑀺. 𑀪𑀡𑁆𑀟𑀽𑀢𑀺 𑀫𑀼𑀡𑁆𑀟𑁄, 𑀲𑁄𑀬𑁂𑀯 𑀓𑀫𑁆𑀫𑀁 𑀪𑀡𑁆𑀟𑀼𑀓𑀫𑁆𑀫𑀁. 𑀢𑀲𑁆𑀲𑀸𑀢𑀺 𑀪𑀡𑁆𑀟𑀼𑀓𑀫𑁆𑀫𑀲𑁆𑀲. 𑀑𑀓𑀸𑀲𑁄𑀢𑀺 𑀧𑀩𑁆𑀩𑀚𑁆𑀚𑀸𑀬 𑀔𑀡𑁄. ‘‘𑀑𑀓𑀸𑀲𑀁 𑀦 𑀮𑀪𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀘𑁂’’𑀢𑀺𑀆𑀤𑀺.

𑀅𑀯𑀼𑀢𑁆𑀢𑁄𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀯𑀼𑀢𑁆𑀢𑁄 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀸𑀚𑁂𑀢𑀻𑀢𑀺 𑀏𑀢𑁆𑀣 𑀧𑀩𑁆𑀩𑀚𑁆𑀚𑀸 𑀘𑀢𑀼𑀩𑁆𑀩𑀺𑀥𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸𑀢𑀺. 𑀢𑀢𑁆𑀣 𑀓𑁂𑀲𑀫𑀲𑁆𑀲𑀼𑀳𑀭𑀡𑀁 𑀢𑀸𑀧𑀲𑀧𑀩𑁆𑀩𑀚𑁆𑀚𑀸 𑀦𑀸𑀫 𑀯𑀓𑁆𑀓𑀮𑀸𑀤𑀺𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀇𑀲𑀺𑀧𑀩𑁆𑀩𑀚𑁆𑀚𑀸𑀢𑀺𑀧𑀺 𑀢𑀲𑁆𑀲𑀸𑀬𑁂𑀯 𑀦𑀸𑀫𑀁. 𑀓𑁂𑀲𑀫𑀲𑁆𑀲𑀼𑀳𑀭𑀡𑀫𑁂𑀯 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸 𑀦𑀸𑀫 𑀓𑀸𑀲𑀸𑀬𑀸𑀤𑀺𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀓𑁂𑀲𑀫𑀲𑁆𑀲𑀼𑀳𑀭𑀡𑀜𑁆𑀘 𑀓𑀸𑀲𑀸𑀬𑀘𑁆𑀙𑀸𑀤𑀦𑀜𑁆𑀘 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸 𑀦𑀸𑀫 𑀲𑀭𑀡𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀉𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀢𑀺𑀯𑀺𑀥𑀸 𑀏𑀳𑀺𑀪𑀺𑀓𑁆𑀔𑀼𑀉𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀲𑀭𑀡𑀕𑀳𑀡𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸𑀢𑀺. 𑀢𑀢𑁆𑀣 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸𑀬𑀁 𑀓𑁂𑀲𑀫𑀲𑁆𑀲𑀼𑀳𑀭𑀡𑀸𑀤𑀺 𑀲𑀩𑁆𑀩𑀁 𑀏𑀓𑀢𑁄𑀯 𑀲𑀫𑁆𑀧𑀚𑁆𑀚𑀢𑀺 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀢𑁄 𑀯𑀘𑀦𑁂𑀦 𑀅𑀪𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸. 𑀲𑀭𑀡𑀕𑀳𑀡𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀲𑀤𑀺𑀲𑀸𑀬𑁂𑀯. 𑀓𑁂𑀲𑀫𑀲𑁆𑀲𑀼𑀳𑀭𑀡𑀜𑁆𑀘 𑀓𑀸𑀲𑀸𑀬𑀘𑁆𑀙𑀸𑀤𑀦𑀜𑁆𑀘 𑀲𑀭𑀡𑀕𑀳𑀡𑀜𑁆𑀘 𑀜𑀢𑁆𑀢𑀺𑀘𑀢𑀼𑀢𑁆𑀣𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀧𑀩𑁆𑀩𑀚𑁆𑀚𑀸 𑀦𑀸𑀫 𑀓𑀫𑁆𑀫𑀯𑀸𑀘𑀸𑀕𑀳𑀡𑀢𑁄 𑀧𑀞𑀫𑀫𑁂𑀯 𑀯𑀚𑀺𑀢𑀩𑁆𑀩𑀢𑁆𑀢𑀸. 𑀢𑀢𑁆𑀣 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀸𑀚𑁂𑀢𑀻’’𑀢𑀺. 𑀉𑀧𑀚𑁆𑀛𑀸𑀬𑀁 𑀉𑀤𑁆𑀤𑀺𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀝𑁆𑀞𑀸𑀦𑀦𑀺𑀬𑀫𑀁 𑀓𑀢𑁆𑀯𑀸. 𑀧𑀩𑁆𑀩𑀚𑁆𑀚𑀸𑀓𑀫𑁆𑀫𑁂 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀫𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀳𑀭𑁂𑀦 𑀪𑀺𑀓𑁆𑀔𑀼𑀦𑀸 𑀓𑁂𑀲𑀘𑁆𑀙𑁂𑀤𑀦𑀁 𑀓𑀸𑀲𑀸𑀬𑀘𑁆𑀙𑀸𑀤𑀦𑀁 𑀲𑀭𑀡𑀤𑀸𑀦𑀦𑁆𑀢𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀓𑀸𑀢𑀩𑁆𑀩𑀸𑀦𑀺𑀬𑁂𑀯. 𑀓𑁂𑀘𑀺 ‘‘𑀲𑀭𑀡𑀸𑀦𑀺 𑀧𑀦 𑀲𑀬𑀁 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀧𑀸𑀞𑀁 𑀇𑀥𑀸𑀦𑁂𑀢𑁆𑀯𑀸 𑀤𑀳𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀭𑀡𑀸𑀦𑀺 𑀦 𑀤𑀸𑀢𑀩𑁆𑀩𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀤𑀳𑀭𑀲𑁆𑀲 𑀪𑀺𑀓𑁆𑀔𑀼𑀢𑁆𑀢𑀸, 𑀪𑀺𑀓𑁆𑀔𑀽𑀦𑀁 𑀧𑀩𑁆𑀩𑀸𑀚𑁂𑀢𑀼𑀁 𑀮𑀪𑀦𑀢𑁆𑀢𑀸 𑀘. 𑀉𑀧𑀚𑁆𑀛𑀸𑀬𑁄 𑀘𑁂 𑀓𑁂𑀲𑀘𑁆𑀙𑁂𑀤𑀦𑀜𑁆𑀘 𑀓𑀸𑀲𑀸𑀬𑀘𑁆𑀙𑀸𑀤𑀦𑀜𑁆𑀘 𑀅𑀓𑀢𑁆𑀯𑀸 𑀧𑀩𑁆𑀩𑀚𑁆𑀚𑀢𑁆𑀣𑀁 𑀲𑀭𑀡𑀸𑀦𑀺𑀬𑁂𑀯 𑀤𑁂𑀢𑀺, 𑀦 𑀭𑀼𑀳𑀢𑀺 𑀧𑀩𑁆𑀩𑀚𑁆𑀚𑀸 𑀧𑀩𑁆𑀩𑀚𑁆𑀚𑀸𑀬 𑀅𑀓𑀢𑁆𑀢𑀩𑁆𑀩𑀢𑁆𑀢𑀸. 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀭𑀼𑀳𑀢𑀺 𑀉𑀧𑀲𑀫𑁆𑀧𑀤𑀸 𑀅𑀧𑀢𑁆𑀢𑀘𑀻𑀯𑀭𑀸𑀦𑀁 𑀉𑀧𑀲𑀫𑁆𑀧𑀤𑀲𑀺𑀤𑁆𑀥𑀺𑀢𑁄, 𑀓𑀫𑁆𑀫𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀘. 𑀔𑀡𑁆𑀟𑀲𑀻𑀫𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀝𑁆𑀞𑀁 𑀩𑀤𑁆𑀥𑀲𑀻𑀫𑀁. 𑀧𑀩𑁆𑀩𑀸𑀚𑁂𑀢𑁆𑀯𑀸𑀢𑀺 𑀓𑁂𑀲𑀘𑁆𑀙𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸’’𑀢𑀺 𑀓𑀸𑀲𑀸𑀬𑀘𑁆𑀙𑀸𑀤𑀦𑀲𑁆𑀲 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸. 𑀲𑀸𑀫𑀡𑁂𑀭𑀲𑁆𑀲 𑀲𑀭𑀡𑀤𑀸𑀦𑀲𑁆𑀲 𑀅𑀭𑀼𑀳𑀢𑁆𑀢𑀸 ‘‘𑀲𑀭𑀡𑀸𑀦𑀺 𑀧𑀦 𑀲𑀬𑀁 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀲𑀁 𑀧𑀩𑁆𑀩𑀸𑀚𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀆𑀡𑀢𑁆𑀢𑀺𑀬𑀸𑀢𑀺 𑀪𑀺𑀓𑁆𑀔𑀽𑀦𑀁 𑀆𑀡𑀢𑁆𑀢𑀺𑀬𑀸. 𑀬𑁂𑀦 𑀓𑁂𑀦𑀘𑀻𑀢𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀲𑀼 𑀬𑁂𑀦 𑀓𑁂𑀦𑀘𑀺.

‘‘𑀪𑀩𑁆𑀩𑀭𑀽𑀧𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀳𑁂𑀢𑀼𑀓𑁄’’𑀢𑀺. 𑀲𑀳𑁂𑀢𑀼𑀓𑁄𑀢𑀺 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁂𑀳𑀺 𑀲𑀳 𑀧𑀯𑀢𑁆𑀢𑁄. 𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀬𑀲𑁂𑀦 𑀘 𑀓𑀺𑀢𑁆𑀢𑀺𑀬𑀲𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀑𑀓𑀸𑀲𑀁 𑀓𑀢𑁆𑀯𑀸𑀧𑀻𑀢𑀺 𑀑𑀓𑀸𑀲𑀁 𑀓𑀢𑁆𑀯𑀸 𑀏𑀯. 𑀲𑀬𑀫𑁂𑀯𑀸𑀢𑀺 𑀦 𑀅𑀜𑁆𑀜𑁄 𑀆𑀡𑀸𑀧𑁂𑀢𑀩𑁆𑀩𑁄. 𑀏𑀢𑁆𑀢𑁄𑀬𑁂𑀯𑀸𑀢𑀺 𑀤𑀲𑁆𑀲𑀦𑀝𑁆𑀞𑀸𑀦𑀢𑁄𑀬𑁂𑀯. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀔𑀚𑁆𑀚𑀼 𑀯𑀸𑀢𑀺 𑀓𑀡𑁆𑀟𑀼𑀯𑀦𑀁 𑀯𑀸. ‘‘𑀓𑀘𑁆𑀙𑀼 𑀯𑀸’’𑀢𑀺𑀧𑀺 𑀧𑀸𑀞𑁄, 𑀧𑀸𑀫𑀁 𑀯𑀸𑀢𑀺 𑀅𑀢𑁆𑀣𑁄. 𑀧𑀺𑀴𑀓𑀸 𑀯𑀸𑀢𑀺 𑀨𑁄𑀝𑀸 𑀯𑀸. 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑀧𑀫𑀸𑀡𑁂𑀦 𑀖𑀁𑀲𑀺𑀢𑁆𑀯𑀸 𑀦𑁆𑀳𑀸𑀧𑀦𑀫𑀢𑁆𑀢𑁂𑀦. 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀸𑀢𑀺 𑀕𑀺𑀳𑀺𑀪𑀸𑀯𑀁 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑀸. 𑀓𑀢𑀜𑁆𑀜𑀽𑀢𑀺 𑀓𑀢𑀲𑁆𑀲𑀽𑀧𑀓𑀸𑀭𑀲𑁆𑀲 𑀚𑀸𑀦𑀦𑀲𑀻𑀮𑀸. 𑀓𑀢𑀯𑁂𑀤𑀺𑀦𑁄𑀢𑀺 𑀓𑀢𑀜𑁆𑀜𑀽𑀧𑀓𑀸𑀭𑀲𑁆𑀲 𑀯𑁂𑀤𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄.

𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀸𑀢𑀺 𑀬𑀸𑀯𑀤𑀢𑁆𑀣𑀁 𑀲𑀼𑀧𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀻𑀢𑁆𑀯𑀸 𑀘𑀺𑀢𑁆𑀢𑀓𑁂𑀴𑀺𑀁 𑀓𑀭𑁄𑀦𑁆𑀢𑁄 𑀅𑀦𑀼𑀓𑁆𑀓𑀡𑁆𑀞𑀺𑀢𑁄 𑀯𑀺𑀳𑀭𑀸𑀳𑀻𑀢𑀺𑀆𑀤𑀺𑀓𑀸 𑀓𑀣𑀸. 𑀦𑀓𑀣𑁂𑀢𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣𑀔𑁆𑀯𑀲𑁆𑀲𑀸’’𑀢𑀺. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀆𑀘𑀺𑀓𑁆𑀔𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀘𑀺𑀓𑁆𑀔𑀦𑁆𑀢𑁂𑀦 𑀘𑀸’’𑀢𑀺𑀆𑀤𑀺. 𑀯𑀡𑁆𑀡…𑀧𑁂… 𑀯𑀲𑁂𑀦𑀸𑀢𑀺 𑀯𑀡𑁆𑀡𑁄 𑀘 𑀲𑀡𑁆𑀞𑀸𑀦𑀜𑁆𑀘 𑀕𑀦𑁆𑀥𑁄 𑀘 𑀆𑀲𑀬𑁄 𑀘 𑀑𑀓𑀸𑀲𑁄 𑀘, 𑀢𑁂𑀲𑀁 𑀯𑀲𑁂𑀦, 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀨𑀮𑀚𑁄𑀢𑀓𑁄, 𑀆𑀘𑀺𑀓𑁆𑀔𑀦𑀲𑁆𑀲 𑀨𑀮𑀁 𑀯𑀓𑁆𑀔𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄. 𑀧𑀼𑀩𑁆𑀩𑁂𑀢𑀺 𑀧𑀼𑀩𑁆𑀩𑀪𑀯𑁂, 𑀧𑀩𑁆𑀩𑀚𑀦𑀢𑁄 𑀧𑀼𑀩𑁆𑀩𑁂 𑀯𑀸. 𑀓𑀡𑁆𑀝𑀓𑀯𑁂𑀥𑀸𑀧𑁂𑀓𑁆𑀔𑁄 𑀧𑀭𑀺𑀧𑀓𑁆𑀓𑀕𑀡𑁆𑀟𑁄 𑀯𑀺𑀬 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀇𑀦𑁆𑀤𑀸𑀲𑀦𑀻𑀢𑀺 𑀲𑀓𑁆𑀓𑀲𑁆𑀲 𑀯𑀚𑀺𑀭𑀸𑀯𑀼𑀥𑁄. 𑀲𑁄 𑀳𑀺 𑀇𑀦𑁆𑀤𑁂𑀦 𑀅𑀲𑀻𑀬𑀢𑀺 𑀔𑀺𑀧𑀻𑀬𑀢𑀻𑀢𑀺 𑀇𑀦𑁆𑀤𑀸𑀲𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀦𑁆𑀤𑀸𑀲𑀦𑀺 𑀧𑀩𑁆𑀩𑀢𑁂 𑀘𑀼𑀡𑁆𑀡𑀬𑀫𑀸𑀦𑀸 𑀯𑀺𑀬 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀘𑀼𑀡𑁆𑀡𑀬𑀫𑀸𑀦𑀁𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀔𑀼𑀭𑀕𑁆𑀕𑁂𑀬𑁂𑀯𑀸𑀢𑀺 𑀔𑀼𑀭𑀲𑁆𑀲 𑀓𑁄𑀝𑀺𑀬𑀫𑁂𑀯. 𑀔𑀼𑀭𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀢𑁆𑀢𑀸, 𑀢𑀲𑁆𑀫𑀸. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲.

𑀕𑀺𑀳𑀺𑀕𑀦𑁆𑀥𑀦𑁆𑀢𑀺 𑀕𑁂𑀳𑁂 𑀞𑀺𑀢𑀲𑁆𑀲 𑀚𑀦𑀲𑁆𑀲 𑀕𑀦𑁆𑀥𑀁. 𑀅𑀣𑀸𑀧𑀻𑀢𑀺 𑀬𑀤𑀺𑀧𑀺 𑀅𑀘𑁆𑀙𑀸𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲. 𑀆𑀘𑀭𑀺𑀬𑁄 𑀯𑀸𑀢𑀺 𑀲𑀭𑀡𑀤𑀸𑀦𑀸𑀘𑀭𑀺𑀬𑁄 𑀯𑀸 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀯𑀸 𑀑𑀯𑀸𑀤𑀸𑀘𑀭𑀺𑀬𑁄 𑀯𑀸. 𑀢𑀁𑀬𑁂𑀯 𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀫𑁂𑀯 𑀯𑀸. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀯𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀪𑀺𑀓𑁆𑀔𑀼𑀦𑀸 𑀏𑀯.

𑀅𑀦𑀸𑀡𑀢𑁆𑀢𑀺𑀬𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀦𑀸𑀡𑀢𑁆𑀢𑀺𑀬𑀸. 𑀇𑀫𑀺𑀦𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀦𑀸𑀡𑀢𑁆𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀦𑀺𑀯𑀸𑀲𑀦𑀸𑀤𑀻𑀦𑀺 𑀦 𑀓𑀸𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀼𑀦𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀪𑀺𑀓𑁆𑀔𑀼𑀦𑀸. 𑀢𑀲𑁆𑀲𑁂𑀯𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲𑁂𑀯. 𑀉𑀧𑀚𑁆𑀛𑀸𑀬𑀫𑀽𑀮𑀓𑁂𑀢𑀺 𑀉𑀧𑀚𑁆𑀛𑀸𑀬𑀫𑀽𑀮𑀓𑁂 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂. 𑀅𑀬𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀝𑁆𑀞𑀸𑀦𑁂. 𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. 𑀅𑀣𑀸𑀢𑀺 𑀯𑀦𑁆𑀤𑀸𑀧𑀦𑀢𑁄 𑀧𑀘𑁆𑀙𑀸, 𑀯𑀦𑁆𑀤𑀸𑀧𑀦𑀲𑁆𑀲 𑀅𑀦𑀦𑁆𑀢𑀭𑀸 𑀯𑀸. ‘‘𑀏𑀯𑀁 𑀯𑀤𑁂𑀳𑀻’’𑀢𑀺 𑀧𑀸𑀴𑀺𑀦𑀬𑀦𑀺𑀤𑀲𑁆𑀲𑀦𑀫𑀼𑀔𑁂𑀦 ‘‘𑀬𑀫𑀳𑀁 𑀯𑀤𑀸𑀫𑀺, 𑀢𑀁 𑀯𑀤𑁂𑀳𑀻’’𑀢𑀺 𑀅𑀝𑁆𑀞𑀓𑀣𑀸𑀦𑀬𑀁 𑀦𑀺𑀤𑀲𑁆𑀲𑁂𑀢𑀺. 𑀅𑀣𑀸𑀢𑀺 𑀢𑀤𑀦𑀦𑁆𑀢𑀭𑀁. 𑀅𑀲𑁆𑀲𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀲𑁆𑀲, 𑀤𑀸𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀧𑀤𑀫𑁆𑀧𑀻𑀢𑀺 𑀢𑀻𑀲𑀼 𑀯𑀸𑀓𑁆𑀬𑀧𑀤𑁂𑀲𑀼 𑀏𑀓𑀁 𑀯𑀸𑀓𑁆𑀬𑀧𑀤𑀫𑁆𑀧𑀺, 𑀦𑀯𑀲𑀼 𑀯𑀸 𑀯𑀺𑀪𑀢𑁆𑀬𑀦𑁆𑀢𑀧𑀤𑁂𑀲𑀼 𑀏𑀓𑀧𑀤𑀫𑁆𑀧𑀺. 𑀏𑀓𑀓𑁆𑀔𑀭𑀫𑁆𑀧𑀻𑀢𑀺 𑀘𑀢𑀼𑀯𑀻𑀲𑀢𑀓𑁆𑀔𑀭𑁂𑀲𑀼 𑀏𑀓𑀓𑁆𑀔𑀭𑀫𑁆𑀧𑀺.

𑀏𑀓𑀢𑁄 𑀲𑀼𑀤𑁆𑀥𑀺𑀬𑀸𑀢𑀺 𑀏𑀓𑀲𑁆𑀲𑁂𑀯 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑀲𑁆𑀲 𑀞𑀸𑀦𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀚𑁆𑀛𑀦𑁂𑀦. 𑀉𑀪𑀢𑁄 𑀲𑀼𑀤𑁆𑀥𑀺𑀬𑀸𑀯𑀸𑀢𑀺 𑀉𑀪𑀬𑁂𑀲𑀁 𑀲𑀭𑀡𑀤𑀸𑀦𑀸𑀘𑀭𑀺𑀬𑀲𑀸𑀫𑀡𑁂𑀭𑀸𑀦𑀁 𑀲𑀼𑀚𑁆𑀛𑀦𑁂𑀦 𑀏𑀯. 𑀞𑀸𑀦𑀓𑀭𑀡𑀲𑀫𑁆𑀧𑀤𑀦𑁆𑀢𑀺 𑀉𑀭𑀆𑀤𑀺𑀝𑁆𑀞𑀸𑀦𑀸𑀦𑀜𑁆𑀘 𑀲𑀁𑀯𑀼𑀢𑀸𑀤𑀺𑀓𑀭𑀡𑀸𑀦𑀜𑁆𑀘 𑀲𑀫𑁆𑀧𑀤𑀁. 𑀯𑀢𑁆𑀢𑀼𑀦𑁆𑀢𑀺 𑀞𑀸𑀦𑀓𑀭𑀡𑀲𑀫𑁆𑀧𑀤𑀁 𑀯𑀢𑁆𑀢𑀼𑀁. 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀬𑁄𑀚𑀦𑀸.

𑀇𑀫𑀸𑀦𑀻𑀢𑀺 𑀲𑀭𑀡𑀸𑀦𑀺. 𑀘𑀲𑀤𑁆𑀤𑁄 𑀉𑀧𑀦𑁆𑀬𑀸𑀲𑁄, 𑀧𑀦𑀲𑀤𑁆𑀤𑁄 𑀧𑀤𑀸𑀮𑀗𑁆𑀓𑀸𑀭𑁄. 𑀏𑀓𑀲𑀫𑁆𑀩𑀦𑁆𑀥𑀸𑀦𑀻𑀢𑀺 𑀏𑀓𑀢𑁄 𑀲𑀫𑁆𑀩𑀦𑁆𑀥𑀸𑀦𑀺. 𑀅𑀦𑀼𑀦𑀸𑀲𑀺𑀓𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 ‘‘𑀩𑀼𑀤𑁆𑀥𑀁’’𑀇𑀢𑀺 ‘‘𑀲𑀭𑀡𑀁’’𑀇𑀢𑀺 𑀧𑀤𑀸𑀦𑀜𑁆𑀘 ‘‘𑀲𑀭𑀡𑀁’’𑀇𑀢𑀺 ‘‘𑀕𑀘𑁆𑀙𑀸𑀫𑀺’’𑀇𑀢𑀺 𑀧𑀤𑀸𑀦𑀜𑁆𑀘 𑀅𑀦𑁆𑀢𑀭𑀸 𑀯𑀺𑀘𑁆𑀙𑁂𑀤𑀫𑀓𑀢𑁆𑀯𑀸 𑀏𑀓𑀲𑀫𑁆𑀩𑀦𑁆𑀥𑀫𑁂𑀯 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀢𑀺𑀡𑁆𑀡𑀁 𑀧𑀤𑀸𑀦𑀫𑀦𑁆𑀢𑀭𑀸 𑀩𑁆𑀬𑀯𑀥𑀸𑀦𑀲𑁆𑀲 𑀓𑀲𑁆𑀲𑀘𑀺 𑀅𑀓𑁆𑀔𑀭𑀲𑁆𑀲 𑀅𑀪𑀸𑀯𑀢𑁄. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸. 𑀫𑀓𑀸𑀭𑀦𑁆𑀢𑀁 𑀓𑀢𑁆𑀯𑀸 𑀤𑀸𑀦𑀓𑀸𑀮𑁂 𑀢𑀺𑀡𑁆𑀡𑀁 𑀧𑀤𑀸𑀦𑀫𑀦𑁆𑀢𑀭𑀸 𑀏𑀓𑀲𑀫𑁆𑀩𑀦𑁆𑀥𑀫𑀓𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀯 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸? 𑀢𑀺𑀡𑁆𑀡𑀁 𑀧𑀤𑀸𑀦𑀫𑀦𑁆𑀢𑀭𑀸 𑀩𑁆𑀬𑀯𑀥𑀸𑀦𑀲𑁆𑀲 𑀦𑀺𑀲𑁆𑀲𑀭𑀲𑁆𑀲 𑀫𑀓𑀸𑀭𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀯𑀘𑀦𑀁, ‘‘𑀦𑀢𑁆𑀣𑀻’’𑀢𑀺𑀧𑀤𑁂 𑀓𑀢𑁆𑀢𑀸, ‘‘𑀦 𑀯𑀼𑀢𑁆𑀢’’𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀢𑀣𑀸𑀢𑀺 ‘‘𑀅𑀳𑀁 𑀪𑀦𑁆𑀢𑁂 𑀩𑀼𑀤𑁆𑀥𑀭𑀓𑁆𑀔𑀺𑀢𑁄’’𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦, 𑀅𑀯𑀤𑀦𑁆𑀢𑀲𑁆𑀲 𑀲𑀭𑀡𑀁 𑀦 𑀓𑀼𑀧𑁆𑀧𑀢𑀺, 𑀩𑀼𑀓𑀸𑀭𑀤𑀓𑀸𑀭𑀸𑀤𑀻𑀦𑀁 𑀩𑁆𑀬𑀜𑁆𑀚𑀦𑀸𑀦𑀁 𑀞𑀸𑀦𑀓𑀭𑀡𑀲𑀫𑁆𑀧𑀤𑀁 𑀳𑀸𑀧𑁂𑀦𑁆𑀢𑀲𑁆𑀲𑁂𑀯 𑀲𑀭𑀡𑀁 𑀓𑀼𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀢𑀺𑀓𑁆𑀔𑀢𑁆𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀺𑀓𑁆𑀔𑀢𑁆𑀢𑀼𑀢𑁄 𑀅𑀥𑀺𑀓𑀁 𑀧𑀦 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀲𑀼. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁. 𑀲𑀸𑀢𑀺 𑀉𑀧𑀲𑀫𑁆𑀧𑀤𑀸. 𑀧𑀩𑁆𑀩𑀚𑁆𑀚𑀸 𑀧𑀦 𑀅𑀦𑀼𑀜𑁆𑀜𑀸𑀢𑀸 𑀏𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀢𑁄𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀩𑁆𑀩𑀸𑀧𑁂𑀓𑁆𑀔𑁄. 𑀲𑀸𑀢𑀺 𑀧𑀩𑁆𑀩𑀚𑁆𑀚𑀸. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀓𑁂𑀲𑀘𑁆𑀙𑁂𑀤𑀦𑀓𑀸𑀲𑀸𑀬𑀘𑁆𑀙𑀸𑀤𑀦𑀲𑀭𑀡𑀤𑀸𑀦𑁂𑀦. 𑀳𑀻𑀢𑀺 𑀨𑀮𑀚𑁄𑀢𑀓𑁄.

𑀏𑀲𑀸𑀢𑀺 𑀏𑀲𑁄 𑀲𑀸𑀫𑀡𑁂𑀭𑁄𑀢𑀺 𑀅𑀢𑁆𑀣𑁄. ‘‘𑀕𑀢𑀺𑀫𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀡𑁆𑀟𑀺𑀢𑀚𑀸𑀢𑀺𑀓𑁄’’𑀢𑀺. 𑀅𑀣𑀸𑀢𑀺 𑀏𑀯𑀁 𑀲𑀢𑀺. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂𑀢𑀺 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀝𑁆𑀞𑀸𑀦𑁂𑀬𑁂𑀯. 𑀬𑀣𑀸 𑀪𑀕𑀯𑀢𑀸 𑀉𑀤𑁆𑀤𑀺𑀝𑁆𑀞𑀸𑀦𑀺, 𑀢𑀣𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀻𑀢𑀺 𑀬𑁄𑀚𑀦𑀸. 𑀏𑀢𑀦𑁆𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀚𑀸𑀢𑀭𑀽𑀧 𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀯𑁂𑀭𑀫𑀡𑀻’’𑀢𑀺 𑀯𑀘𑀦𑀁.

𑀢𑀦𑁆𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑀁. 𑀬𑀣𑀸𑀧𑀸𑀴𑀺𑀬𑀸𑀯𑀸𑀢𑀺 𑀏𑀯𑀲𑀤𑁆𑀤𑁄 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄, 𑀢𑁂𑀦 𑀬𑀣𑀸𑀧𑀸𑀴𑀺𑀬𑀸𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀺. 𑀬𑀣𑀸𑀧𑀸𑀴𑀺𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀣𑀸 𑀏𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀸𑀦𑀻𑀢𑀺 𑀯𑀸𑀤𑀁 𑀦𑀺𑀯𑀸𑀭𑁂𑀢𑀺. 𑀬𑀣𑀸𑀧𑀸𑀴𑀺𑀁 𑀯𑀺𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀣𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀉𑀤𑁆𑀤𑀺𑀲𑀦𑁆𑀢𑁄𑀧𑀺 𑀦𑀺𑀤𑁆𑀤𑁄𑀲𑁄𑀬𑁂𑀯. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀸𑀦𑀻𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀺. 𑀬𑀸𑀯𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁 𑀦 𑀚𑀸𑀦𑀸𑀢𑀺, 𑀦 𑀓𑀼𑀲𑀮𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀢𑀺𑀓𑀸𑀯𑀘𑀭𑁄𑀬𑁂𑀯𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀫𑀻𑀧𑁂 𑀅𑀯𑀘𑀸𑀭𑁄𑀯. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑁆𑀢𑀺 𑀤𑀲𑀲𑀺𑀓𑁆𑀔𑀸𑀧𑀤𑀯𑀺𑀦𑀺𑀫𑀼𑀢𑁆𑀢𑀁 𑀓𑀧𑁆𑀧𑀺𑀬𑀁 𑀧𑀭𑀸𑀫𑀸𑀲𑀸𑀤𑀺𑀜𑁆𑀘 𑀅𑀓𑀧𑁆𑀧𑀺𑀬𑀁 𑀅𑀧𑀭𑀸𑀫𑀸𑀲𑀸𑀤𑀺𑀜𑁆𑀘. 𑀢𑁂𑀦𑀸𑀧𑀻𑀢𑀺 𑀲𑀸𑀫𑀡𑁂𑀭𑁂𑀦𑀸𑀧𑀺. 𑀦𑀸𑀲𑀦𑀗𑁆𑀕𑀸𑀦𑀻𑀢𑀺 𑀮𑀺𑀗𑁆𑀕𑀦𑀸𑀲𑀦𑀅𑀗𑁆𑀕𑀸𑀦𑀺. 𑀲𑀸𑀥𑀼𑀓𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀲𑀸𑀥𑀼𑀓𑀁 𑀅𑀲𑀺𑀓𑁆𑀔𑀦𑁆𑀢𑀲𑁆𑀲 𑀮𑀺𑀗𑁆𑀕𑀦𑀸𑀲𑀦𑀜𑁆𑀘 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀜𑁆𑀘 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.