𑁧𑁦. 𑀤𑀼𑀢𑀺𑀬𑀫𑀸𑀭𑀓𑀣𑀸

𑁩𑁫. 𑀫𑀬𑁆𑀳𑀦𑁆𑀢𑀺𑀧𑀤𑀲𑁆𑀲 ‘‘𑀅𑀦𑀼𑀧𑁆𑀧𑀢𑁆𑀢𑀸 𑀲𑀘𑁆𑀙𑀺𑀓𑀢𑀸’’𑀢𑀺𑀧𑀤𑁂𑀲𑀼 𑀙𑀝𑁆𑀞𑀻𑀓𑀢𑁆𑀢𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀬𑀸 𑀔𑁄𑀢𑀺 𑀅𑀢𑁆𑀣𑁄’’𑀢𑀺. ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 ‘‘𑀫𑀬𑁆𑀳’’𑀦𑁆𑀢𑀺𑀧𑀤𑀲𑁆𑀲 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺𑀧𑀤𑁂𑀲𑀼 𑀲𑀫𑁆𑀩𑀦𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺 𑀏𑀢𑁆𑀣 𑀓𑀸𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀢𑁂𑀦 𑀳𑁂𑀢𑀼𑀦𑀸’’𑀢𑀺. ‘‘𑀧𑀼𑀦𑀸’’𑀢𑀺𑀆𑀤𑀺𑀦𑀸 ‘‘𑀫𑀬𑁆𑀳’’𑀦𑁆𑀢𑀺𑀧𑀤𑀁 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸, 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸’’𑀢𑀺𑀧𑀤𑁂𑀲𑀼 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀪𑀸𑀯𑁂𑀦 𑀬𑁄𑀚𑁂𑀢𑁆𑀯𑀸 𑀧𑀼𑀦 ‘‘𑀅𑀦𑀼𑀧𑁆𑀧𑀢𑁆𑀢𑀸, 𑀲𑀘𑁆𑀙𑀺𑀓𑀢𑀸’’𑀢𑀺 𑀧𑀤𑁂𑀲𑀼 𑀓𑀢𑁆𑀢𑀼𑀢𑁆𑀣𑁂 𑀲𑀸𑀫𑀺𑀪𑀸𑀯𑁂𑀦 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.