𑁬𑁪. 𑀘𑀢𑁆𑀢𑀸𑀭𑁄𑀦𑀺𑀲𑁆𑀲𑀬𑀸𑀤𑀺𑀓𑀣𑀸

𑁧𑁨𑁮. 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀲𑀫𑀦𑀦𑁆𑀢𑀭𑀫𑁂𑀯, 𑀦 𑀓𑀸𑀮𑀦𑁆𑀢𑀭𑁂𑀢𑀺 𑀅𑀢𑁆𑀣𑁄. 𑀏𑀓𑀧𑁄𑀭𑀺𑀲𑀸𑀢𑀺 𑀏𑀢𑁆𑀣 𑀧𑁄𑀭𑀺𑀲𑀲𑀤𑁆𑀤𑁄 𑀉𑀧𑀭𑀺 𑀯𑀺𑀢𑁆𑀣𑀢𑁂 𑀪𑀼𑀚𑀧𑀫𑀸𑀡𑁂 𑀘 𑀧𑁄𑀲𑀧𑀫𑀸𑀡𑁂 𑀘 𑀯𑀢𑁆𑀢𑀢𑀺. 𑀧𑀼𑀭𑀺𑀲𑀲𑁆𑀲 𑀧𑀫𑀸𑀡𑀸 𑀧𑁄𑀭𑀺𑀲𑀸, 𑀧𑀫𑀸𑀡𑀢𑁆𑀣𑁂 𑀡𑀧𑀘𑁆𑀘𑀬𑁄. 𑀙𑀸𑀬𑀸𑀢𑀺 𑀆𑀢𑀧𑀸𑀪𑀸𑀯𑁄. 𑀫𑁂𑀢𑀩𑁆𑀩𑀸𑀢𑀺 𑀧𑀫𑁂𑀢𑀩𑁆𑀩𑀸. ‘‘𑀯𑀲𑁆𑀲𑀸𑀦𑁄’’𑀢𑀺𑀆𑀤𑀺 ‘‘𑀉𑀢𑀼𑀧𑀫𑀸𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀆𑀘𑀺𑀓𑁆𑀔𑀡𑀸𑀓𑀸𑀭𑀤𑀲𑁆𑀲𑀦𑀁. 𑀉𑀢𑀼𑀦𑁄 𑀧𑀫𑀸𑀡𑀦𑁆𑀢𑀺 𑀅𑀢𑁆𑀣𑀁 𑀦𑀺𑀯𑀸𑀭𑁂𑀦𑁆𑀢𑁄 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀅𑀭𑀢𑀺 𑀧𑀼𑀦𑀧𑁆𑀧𑀼𑀦𑀁 𑀕𑀘𑁆𑀙𑀢𑀻𑀢𑀺 𑀉𑀢𑀼, 𑀧𑀫𑀺𑀬𑀢𑀺 𑀲𑀁𑀯𑀘𑁆𑀙𑀭𑁄 𑀧𑀭𑀺𑀘𑁆𑀙𑀺𑀚𑁆𑀚𑀺𑀬𑀢𑀺 𑀅𑀦𑁂𑀦𑀸𑀢𑀺 𑀧𑀫𑀸𑀡𑀁. 𑀬𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀅𑀧𑀭𑀺𑀧𑀼𑀡𑁆𑀡𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲𑀸𑀢𑀺 𑀤𑀺𑀯𑀲𑀪𑀸𑀕𑀲𑁆𑀲. 𑀬𑁄 𑀉𑀢𑀼 𑀅𑀧𑀭𑀺𑀧𑀼𑀡𑁆𑀡𑁄, 𑀢𑀲𑁆𑀲 𑀉𑀢𑀼𑀦𑁄𑀢𑀺 𑀧𑀸𑀞𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄. ‘‘𑀉𑀢𑀼𑀧𑀫𑀸𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀤𑀺𑀯𑀲𑀪𑀸𑀕𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄’’𑀢𑀺 𑀧𑀤𑀸𑀦𑀁 𑀅𑀧𑀭𑀫𑁆𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀬𑀁 𑀦𑀸𑀫 𑀉𑀢𑀽𑀢𑀺 𑀅𑀬𑀁 𑀉𑀢𑀼 𑀯𑀲𑁆𑀲𑀸𑀦𑁄 𑀦𑀸𑀫𑀸𑀢𑀺 𑀯𑀸 𑀳𑁂𑀫𑀦𑁆𑀢𑁄 𑀦𑀸𑀫𑀸𑀢𑀺 𑀯𑀸 𑀕𑀺𑀫𑁆𑀳𑁄 𑀦𑀸𑀫𑀸𑀢𑀺 𑀯𑀸. 𑀧𑀼𑀩𑁆𑀩𑀦𑁆𑀳𑁄𑀢𑀺 𑀅𑀳𑀲𑁆𑀲 𑀧𑀼𑀩𑁆𑀩𑁄 𑀧𑀼𑀩𑁆𑀩𑀦𑁆𑀳𑁄. 𑀢𑀢𑁆𑀣 𑀧𑀘𑁆𑀙𑀺𑀫𑀦𑀬𑁄𑀯 𑀧𑀸𑀲𑀁𑀲𑀢𑀭𑁄. 𑀓𑀲𑁆𑀫𑀸? 𑀧𑀼𑀭𑀺𑀫𑀦𑀬𑁂 𑀉𑀢𑀼𑀧𑀭𑀺𑀧𑀼𑀡𑁆𑀡𑁂 𑀤𑀺𑀯𑀲𑀪𑀸𑀕𑀸𑀘𑀺𑀓𑁆𑀔𑀡𑀲𑁆𑀲 𑀅𑀪𑀸𑀯𑀸, 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀧𑀭𑀺𑀧𑀼𑀡𑁆𑀡𑀁 𑀯𑀸 𑀅𑀧𑀭𑀺𑀧𑀼𑀡𑁆𑀡𑀁 𑀯𑀸 𑀉𑀢𑀼𑀧𑀫𑀸𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀉𑀧𑀲𑀫𑁆𑀧𑀦𑁆𑀦𑀤𑀺𑀯𑀲𑀪𑀸𑀕𑁄𑀯 ‘‘𑀧𑀼𑀩𑁆𑀩𑀦𑁆𑀳𑁄’’𑀢𑀺 𑀯𑀸 ‘‘𑀲𑀸𑀬𑀦𑁆𑀳𑁄’’𑀢𑀺 𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀲𑀁𑀕𑀻𑀢𑀻𑀢𑀺 𑀏𑀢𑁆𑀣 𑀲𑀁 𑀏𑀓𑀢𑁄 𑀓𑀢𑁆𑀯𑀸 𑀕𑀸𑀬𑀺𑀢𑀩𑁆𑀩𑀸 𑀓𑀣𑁂𑀢𑀩𑁆𑀩𑀸𑀢𑀺 𑀲𑀁𑀕𑀻𑀢𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀫𑁂𑀯 𑀲𑀩𑁆𑀩𑀁 𑀏𑀓𑀢𑁄 𑀓𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀺𑀦𑁆𑀢𑀺 𑀓𑀺𑀁 𑀉𑀢𑀼𑀁. 𑀇𑀤𑀁 𑀦𑀸𑀫𑀸𑀢𑀺 𑀇𑀤𑀁 𑀦𑀸𑀫 𑀉𑀢𑀼𑀁. 𑀯𑀤𑁂𑀬𑁆𑀬𑀸𑀲𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀯𑀼𑀟𑁆𑀠𑀦𑀯𑀓𑀪𑀸𑀯𑀸𑀤𑀺𑀜𑀸𑀧𑀦𑀢𑁆𑀣𑀁 𑀓𑀣𑁂𑀬𑁆𑀬𑀸𑀲𑀺.

𑁧𑁨𑁯. 𑀤𑀼𑀢𑀺𑀬𑀦𑁆𑀢𑀺 𑀲𑀳𑀸𑀬𑀁 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀧𑀼𑀭𑀺𑀲𑀁 𑀯𑀸. 𑀅𑀓𑀭𑀡𑀻𑀬𑀸𑀦𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑁂𑀳𑀺 𑀅𑀓𑀢𑁆𑀢𑀩𑁆𑀩𑀸𑀦𑀺. 𑀧𑀡𑁆𑀟𑀼𑀧𑀮𑀸𑀲𑁄𑀢𑀺 𑀏𑀢𑁆𑀣 𑀧𑀡𑁆𑀟𑀽𑀢𑀺 𑀲𑁂𑀢𑀧𑀻𑀢𑀫𑀺𑀲𑁆𑀲𑁄 𑀯𑀡𑁆𑀡𑁄, 𑀧𑀮𑀸𑀲𑀲𑀤𑁆𑀤𑁄 𑀧𑀡𑁆𑀡𑀯𑀸𑀘𑀓𑁄, 𑀦 𑀳𑀭𑀺𑀢𑀯𑀸𑀘𑀓𑁄, 𑀦𑀸𑀧𑀺 𑀓𑀺𑀁𑀲𑀼𑀓𑀤𑀼𑀫𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀡𑁆𑀟𑀼𑀯𑀡𑁆𑀡𑁄 𑀧𑀡𑁆𑀡𑁄’’𑀢𑀺. 𑀧𑀡𑁆𑀟𑀼𑀧𑀮𑀸𑀲𑁄𑀢𑀺 𑀲𑀫𑀸𑀲𑁄𑀧𑀺 𑀩𑁆𑀬𑀸𑀲𑁄𑀧𑀺 𑀬𑀼𑀢𑁆𑀢𑁄𑀬𑁂𑀯. 𑀲𑀫𑀸𑀲𑀓𑀸𑀮𑁂 𑀧𑀡𑁆𑀟𑀼 𑀬𑀲𑁆𑀲𑀢𑁆𑀣𑀻𑀢𑀺 𑀧𑀡𑁆𑀟𑀼, 𑀲𑁄𑀬𑁂𑀯 𑀧𑀮𑀸𑀲𑁄 𑀧𑀡𑁆𑀟𑀼𑀧𑀮𑀸𑀲𑁄𑀢𑀺 𑀓𑀸𑀢𑀩𑁆𑀩𑁄. 𑀧𑀼𑀧𑁆𑀨𑀨𑀮𑀸𑀤𑀺𑀁 𑀩𑀦𑁆𑀥𑀢𑀻𑀢𑀺 𑀩𑀦𑁆𑀥𑀦𑀦𑁆𑀢𑀺 𑀯𑀘𑀦𑀢𑁆𑀣𑁂𑀦 𑀩𑀦𑁆𑀥𑀦𑀲𑀤𑁆𑀤𑁄 𑀯𑀡𑁆𑀝𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀯𑀡𑁆𑀝𑀢𑁄’’𑀢𑀺. 𑀧𑀼𑀣𑀼𑀲𑀺𑀮𑀸𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁬𑁦) 𑀏𑀢𑁆𑀣 𑀧𑀼𑀣𑀼𑀲𑀤𑁆𑀤𑁄 𑀫𑀳𑀦𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀳𑀸𑀲𑀺𑀮𑀸’’𑀢𑀺.

𑁧𑁩𑁦. 𑀢𑀲𑁆𑀲𑀸𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀲𑀸𑀫𑀕𑁆𑀕𑀻𑀢𑀺 𑀲𑀗𑁆𑀖𑀲𑀸𑀫𑀕𑁆𑀕𑀻. 𑀢𑁂𑀦𑀸𑀢𑀺 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸. 𑀲𑀫𑁆𑀪𑁄𑀕𑁂𑀢𑀺 𑀆𑀫𑀺𑀲𑁂𑀦 𑀘 𑀥𑀫𑁆𑀫𑁂𑀦 𑀘 𑀲𑀫𑁆𑀪𑁄𑀕𑀳𑁂𑀢𑀼. 𑀏𑀢𑁆𑀣 𑀲𑀳𑀲𑁂𑀬𑁆𑀬𑀸𑀧𑀺 𑀲𑀗𑁆𑀕𑀳𑀺𑀢𑀸 𑀆𑀧𑀢𑁆𑀢𑀺𑀪𑀸𑀯𑀢𑁄. 𑀅𑀦𑀸𑀧𑀢𑁆𑀢𑀻𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑀓𑀪𑀸𑀯𑀢𑁄 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺, 𑀅𑀮𑀚𑁆𑀚𑀺𑀮𑀓𑁆𑀔𑀡𑀸𑀪𑀸𑀯𑀢𑁄 𑀤𑀼𑀓𑁆𑀓𑀝𑁂𑀦 𑀅𑀦𑀸𑀧𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀤𑁆𑀯𑀸𑀲𑀢𑁆𑀢𑀢𑀺𑀅𑀥𑀺𑀓𑀯𑀢𑁆𑀣𑀼𑀲𑀢𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀫𑀳𑀸𑀔𑀦𑁆𑀥𑀓𑀲𑁆𑀲

𑀅𑀢𑁆𑀣𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.