𑁬𑁩. 𑀉𑀧𑀲𑀫𑁆𑀧𑀤𑀸𑀯𑀺𑀥𑀺𑀓𑀣𑀸

𑁧𑁨𑁬. 𑀢𑀁 𑀉𑀧𑀚𑁆𑀛𑀦𑁆𑀢𑀺 𑀢𑀁 𑀉𑀧𑀚𑁆𑀛𑀸𑀬𑀁. ‘‘𑀉𑀧𑀚𑁆𑀛𑀸’’𑀢𑀺 𑀘 ‘‘𑀉𑀧𑀚𑁆𑀛𑀸𑀬𑁄’’𑀢𑀺 𑀘 𑀳𑀺 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁 𑀬𑀣𑀸 ‘‘𑀲𑀪𑀸 𑀲𑀪𑀸𑀬’’𑀦𑁆𑀢𑀺. 𑀏𑀢𑁆𑀣 𑀉𑀧𑀚𑁆𑀛𑀸𑀲𑀤𑁆𑀤𑁄 𑀭𑀸𑀚𑀸𑀤𑀺𑀕𑀡𑁄 (𑀭𑀼𑀧𑀲𑀺𑀤𑁆𑀥𑀺 𑁫𑁯𑁯 𑀲𑀼𑀢𑁆𑀢𑁂; 𑀲𑀤𑁆𑀤𑀦𑀻𑀢𑀺 𑁧𑁧𑁪𑁦 𑀲𑀼𑀢𑁆𑀢𑁂), 𑀉𑀧𑀚𑁆𑀛𑀸𑀬𑀲𑀤𑁆𑀤𑁄 𑀧𑀼𑀭𑀺𑀲𑀸𑀤𑀺𑀕𑀡𑁄. 𑀲𑀪𑀸𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀲𑀪𑀸𑀬𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑁄 𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀯𑀸. ‘‘𑀯𑀺𑀢𑁆𑀣𑀸𑀬𑀦𑁆𑀢𑀻’’𑀢𑀺 𑀲𑀤𑁆𑀤𑁄 𑀦𑀸𑀫𑀥𑀸𑀢𑀽𑀢𑀺 𑀆𑀳 ‘‘𑀯𑀺𑀢𑁆𑀣𑀤𑁆𑀥𑀕𑀢𑁆𑀢𑀸 𑀳𑁄𑀦𑁆𑀢𑀻’’𑀢𑀺. 𑀯𑀺𑀢𑁆𑀣𑀲𑀤𑁆𑀤𑁄 𑀳𑀺 𑀤𑀩𑁆𑀩𑀯𑀸𑀘𑀓𑀢𑁆𑀢𑀸 𑀦𑀸𑀫𑀲𑀤𑁆𑀤𑁄, 𑀯𑀺𑀓𑀸𑀭𑁂𑀦 𑀣𑀤𑁆𑀥𑁄 𑀕𑀢𑁆𑀢𑁄 𑀏𑀢𑁂𑀲𑀦𑁆𑀢𑀺 𑀯𑀺𑀢𑁆𑀣𑀸, 𑀤𑁆𑀥𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸, 𑀢𑀢𑁄 𑀆𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀦𑁆𑀢𑀺 𑀬𑀁 𑀅𑀦𑁆𑀢𑀭𑀸𑀬𑀚𑀸𑀢𑀁. 𑀢𑀯 𑀲𑀭𑀻𑀭𑁂𑀢𑀺 𑀢𑀼𑀬𑁆𑀳𑀁 𑀓𑀸𑀬𑁂. ‘‘𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 ‘‘𑀚𑀸𑀢’’𑀦𑁆𑀢𑀺 𑀏𑀢𑁆𑀣 𑀚𑀦𑀥𑀸𑀢𑀼𑀬𑀸 𑀚𑀦𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀯𑀺𑀚𑁆𑀚𑀫𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀚𑀦𑀻𑀥𑀸𑀢𑀼𑀬𑀸 𑀧𑀸𑀢𑀼𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀦𑁆𑀢𑀦𑁆𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑀁. 𑀇𑀢𑀺𑀆𑀤𑀺 𑀓𑀣𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.