𑁫𑁯. 𑀕𑀫𑀺𑀓𑀸𑀤𑀺𑀦𑀺𑀲𑁆𑀲𑀬𑀯𑀢𑁆𑀣𑀼𑀓𑀣𑀸

𑁧𑁨𑁧. ‘‘𑀓𑀭𑀡𑀻𑀬𑀦𑀺𑀲𑁆𑀲𑀬𑁄’’𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀬𑀕𑀳𑀡𑀁 𑀦𑀺𑀲𑁆𑀲𑀬𑁄 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦, 𑀲𑁄 𑀓𑀭𑀡𑀻𑀬𑁄 𑀇𑀫𑀲𑁆𑀲𑀸𑀢𑀺 𑀦𑀺𑀲𑁆𑀲𑀬𑀓𑀭𑀡𑀻𑀬𑁄𑀢𑀺 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦𑀺𑀲𑁆𑀲𑀬𑀁 𑀅𑀮𑀪𑀫𑀸𑀦𑁂𑀦𑀸𑀢𑀺 𑀏𑀢𑁆𑀣 𑀓𑀺𑀁 𑀦𑀺𑀲𑁆𑀲𑀬𑀲𑁆𑀲 𑀅𑀮𑀪𑀦𑀁 𑀦𑀸𑀫𑀸𑀢𑀺 𑀆𑀳 ‘‘𑀅𑀢𑁆𑀢𑀦𑀸’’𑀢𑀺𑀆𑀤𑀺. 𑀯𑀼𑀢𑁆𑀣𑀧𑀼𑀩𑁆𑀩𑀦𑁆𑀢𑀺 𑀯𑀲𑀺𑀢𑀧𑀼𑀩𑁆𑀩𑀁. 𑀏𑀓𑀭𑀢𑁆𑀢𑀁 𑀯𑀲𑀦𑁆𑀢𑁂𑀦𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀤𑁆𑀯𑀺𑀭𑀢𑁆𑀢𑀸𑀤𑀺𑀓𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀲𑁆𑀲𑀫𑀦𑁆𑀢𑁄 𑀯𑀸 𑀲𑀢𑁆𑀣𑀁 𑀧𑀭𑀺𑀬𑁂𑀲𑀦𑁆𑀢𑁄 𑀯𑀸 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀦𑀸𑀯𑀸𑀬 𑀕𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀦𑀸𑀯𑀸𑀬 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀲𑁆𑀲.

𑀬𑀸𑀘𑀺𑀬𑀫𑀸𑀦𑁂𑀦𑀸𑀢𑀺 𑀏𑀢𑁆𑀣 𑀩𑀳𑀼𑀓𑀢𑁆𑀢𑀼𑀧𑀲𑀗𑁆𑀕𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑁂𑀦 𑀕𑀺𑀮𑀸𑀦𑁂𑀦𑀸’’𑀢𑀺. ‘‘𑀫𑀸𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀬𑀸𑀘𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀤𑀻𑀦𑀺 𑀦𑀺𑀯𑀢𑁆𑀢𑁂𑀢𑀺.

𑀨𑀸𑀲𑀼 𑀳𑁄𑀢𑀻𑀢𑀺 𑀏𑀢𑁆𑀣 𑀆𑀯𑀸𑀲𑀲𑀧𑁆𑀧𑀸𑀬𑀸𑀤𑀺𑀯𑀲𑁂𑀦 𑀨𑀸𑀲𑀼 𑀳𑁄𑀢𑀻𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀧𑀝𑀺𑀮𑀸𑀪𑀯𑀲𑁂𑀦𑀸’’𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀇𑀫𑀁 𑀧𑀭𑀺𑀳𑀸𑀭𑀦𑁆𑀢𑀺 𑀇𑀫𑀁 𑀨𑀸𑀲𑀼𑀯𑀺𑀳𑀸𑀭𑀧𑀭𑀺𑀳𑀸𑀭𑀁. 𑀣𑀸𑀫𑀕𑀢𑀸𑀬 𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀬𑁄𑀚𑀦𑀸. 𑀲𑀫𑀣𑁄 𑀯𑀸 𑀢𑀭𑀼𑀡𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀏𑀢𑀲𑁆𑀲𑁂𑀯𑀸𑀢𑀺 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀺𑀓𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄. 𑀢𑀲𑁆𑀲 𑀦𑀺𑀲𑁆𑀲𑀸𑀬𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀑𑀯𑀸𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑀁 𑀦𑀺𑀲𑁆𑀲𑀬𑀤𑀸𑀬𑀓𑀁 𑀦𑀺𑀲𑁆𑀲𑀸𑀬𑀸𑀢𑀺 𑀳𑀺 𑀅𑀢𑁆𑀣𑁄. 𑀬𑀢𑁆𑀢𑀓𑁄 𑀓𑀸𑀮𑁄 𑀆𑀲𑀴𑁆𑀳𑀻𑀧𑀼𑀡𑁆𑀡𑀫𑀸 𑀅𑀢𑁆𑀣𑀺, 𑀢𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀬𑁄𑀚𑀦𑀸. ‘‘𑀆𑀲𑀴𑁆𑀳𑀻𑀧𑀼𑀡𑁆𑀡𑀫𑀸’’𑀢𑀺 𑀏𑀢𑁆𑀣 ‘‘𑀬𑀸𑀯𑀸’’𑀢𑀺 𑀦𑀺𑀧𑀸𑀢𑀧𑀬𑁄𑀕𑀢𑁆𑀢𑀸 𑀅𑀪𑀺𑀯𑀺𑀥𑀺𑀅𑀯𑀛𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂.

𑁧𑁨𑁨. 𑀧𑀸𑀴𑀺𑀬𑀁 𑀕𑁄𑀢𑁆𑀢𑁂𑀦𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀦𑀸𑀫𑁂𑀦𑁂𑀯, 𑀅𑀣 𑀔𑁄 𑀕𑁄𑀢𑁆𑀢𑁂𑀦𑀧𑀺 𑀲𑀸𑀯𑁂𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 ‘‘𑀆𑀬𑀲𑁆𑀫𑀢𑁄 𑀧𑀺𑀧𑁆𑀧𑀮𑀺𑀲𑁆𑀲𑀸’’𑀢𑀺 𑀦𑀸𑀫𑀁 𑀲𑀸𑀯𑁂𑀢𑁆𑀯𑀸𑀢𑀺𑀧𑀺 ‘‘𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲𑀸’’𑀢𑀺 𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸𑀧𑀺 𑀅𑀦𑀼𑀲𑀸𑀯𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀳𑀸𑀓𑀲𑁆𑀲𑀧𑀲𑁆𑀲𑀸’’𑀢𑀺𑀆𑀤𑀺. 𑀇𑀫𑀺𑀦𑀸 ‘‘𑀓𑁄𑀦𑀸𑀫𑁄 𑀢𑁂 𑀉𑀧𑀚𑁆𑀛𑀸𑀬𑁄? 𑀉𑀧𑀚𑁆𑀛𑀸𑀬𑁄 𑀫𑁂 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀦𑀸𑀫𑀸’’𑀢𑀺𑀆𑀤𑀻𑀲𑀼 𑀕𑁄𑀢𑁆𑀢𑀫𑁆𑀧𑀺 𑀦𑀸𑀫𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑁧𑁨𑁩. 𑀏𑀓𑀸𑀦𑀼𑀲𑀸𑀯𑀦𑁂𑀢𑀺 𑀧𑀤𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀪𑀸𑀯𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 𑀆𑀳 ‘‘𑀏𑀓𑀢𑁄 𑀅𑀦𑀼𑀲𑀸𑀯𑀦𑁂’’𑀢𑀺. 𑀢𑀢𑁆𑀣 𑀏𑀓𑀢𑁄𑀢𑀺 𑀏𑀓𑀓𑁆𑀔𑀡𑁂, 𑀏𑀓𑀧𑀳𑀸𑀭𑁂𑀦 𑀯𑀸. 𑀯𑀓𑁆𑀔𑀢𑀺 𑀳𑀺 ‘‘𑀏𑀓𑀓𑁆𑀔𑀡𑁂’’𑀢𑀺 𑀘 ‘‘𑀏𑀓𑀧𑀳𑀸𑀭𑁂𑀦𑁂𑀯𑀸’’𑀢𑀺 𑀘. 𑀇𑀫𑀺𑀦𑀸 𑀏𑀓𑀢𑁄 𑀅𑀦𑀼𑀲𑀸𑀯𑀦𑀫𑁂𑀢𑁂𑀲𑀦𑁆𑀢𑀺 𑀏𑀓𑀸𑀦𑀼𑀲𑀸𑀯𑀦𑀸𑀢𑀺 𑀅𑀲𑀫𑀸𑀦𑀸𑀥𑀺𑀓𑀭𑀡𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀏𑀓𑁂𑀦𑀸𑀢𑀺 𑀏𑀓𑁂𑀦 𑀅𑀦𑀼𑀲𑀸𑀯𑀦𑀸𑀘𑀭𑀺𑀬𑁂𑀦. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲. ‘‘𑀏𑀓𑀓𑁆𑀔𑀡𑁂’’𑀢𑀺 𑀇𑀫𑀺𑀦𑀸 ‘‘𑀏𑀓𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀦𑀁 𑀉𑀧𑀲𑀫𑁆𑀧𑀸𑀤𑁂𑀢𑀼𑀁.

𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀏𑀓𑁂𑀦 𑀏𑀓𑀲𑁆𑀲, 𑀅𑀜𑁆𑀜𑁂𑀦 𑀇𑀢𑀭𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀏𑀓𑀢𑁄 𑀅𑀦𑀼𑀲𑀸𑀯𑀦𑁂 𑀓𑀸𑀢𑀼𑀦𑁆𑀢𑀺 ‘‘𑀏𑀓𑁂𑀦 𑀏𑀓𑀲𑁆𑀲, 𑀅𑀜𑁆𑀜𑁂𑀦 𑀅𑀜𑁆𑀜𑀲𑁆𑀲, 𑀇𑀢𑀭𑁂𑀦 𑀇𑀢𑀭𑀲𑁆𑀲𑀸’’𑀢𑀺 𑀏𑀯𑀁 𑀢𑀻𑀳𑀺 𑀆𑀘𑀭𑀺𑀬𑁂𑀳𑀺 𑀢𑀺𑀡𑁆𑀡𑀁 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀦𑀁 𑀏𑀓𑀓𑁆𑀔𑀡𑁂 𑀅𑀦𑀼𑀲𑀸𑀯𑀦𑁂 𑀓𑀸𑀢𑀼𑀁. 𑀢𑀜𑁆𑀘 𑀔𑁄𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 ‘‘𑀅𑀦𑀼𑀲𑀸𑀯𑀦𑁂 𑀓𑀸𑀢𑀼’’𑀦𑁆𑀢𑀺 𑀧𑀤𑀲𑁆𑀲𑁂𑀯 𑀅𑀢𑁆𑀣𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑀼𑀲𑀸𑀯𑀦𑀓𑀺𑀭𑀺𑀬’’𑀦𑁆𑀢𑀺. 𑀤𑁆𑀯𑁂 𑀯𑀸 𑀢𑀬𑁄 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄. 𑀲𑀘𑁂 𑀏𑀓𑁂𑀦𑀸𑀘𑀭𑀺𑀬𑁂𑀦 𑀤𑁆𑀯𑁂 𑀅𑀦𑀼𑀲𑀸𑀯𑁂𑀢𑀺, ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀘 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀘𑀸’’𑀢𑀺 𑀅𑀦𑀼𑀲𑀸𑀯𑁂𑀢𑀩𑁆𑀩𑀸. 𑀲𑀘𑁂 𑀢𑀬𑁄 𑀅𑀦𑀼𑀲𑀸𑀯𑁂𑀢𑀺, ‘‘𑀅𑀬𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀘 𑀅𑀬𑀁 𑀥𑀫𑁆𑀫𑀭𑀓𑁆𑀔𑀺𑀢𑁄 𑀘 𑀅𑀬𑀁 𑀲𑀗𑁆𑀖𑀭𑀓𑁆𑀔𑀺𑀢𑁄 𑀘𑀸’’𑀢𑀺 𑀅𑀦𑀼𑀲𑀸𑀯𑁂𑀢𑀩𑁆𑀩𑀸. 𑀬𑀣𑀸 𑀏𑀓𑁂𑀦𑀸𑀘𑀭𑀺𑀬𑁂𑀦 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀏𑀓𑀢𑁄 𑀅𑀦𑀼𑀲𑀸𑀯𑁂𑀢𑀩𑁆𑀩𑀸, 𑀏𑀯𑀁 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀏𑀓𑁄 𑀅𑀦𑀼𑀲𑀸𑀯𑁂𑀢𑀩𑁆𑀩𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦 𑀓𑀭𑀡𑀪𑀽𑀢𑁂𑀦, 𑀏𑀓𑁄 𑀉𑀧𑀚𑁆𑀛𑀸𑀬𑁄 𑀳𑀼𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄. ‘‘𑀏𑀓𑀧𑀳𑀸𑀭𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀏𑀓𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑁆𑀯𑁂 𑀢𑀺𑀲𑁆𑀲𑁄 𑀓𑀫𑁆𑀫𑀯𑀸𑀘𑀸𑀢𑀺 𑀤𑁆𑀯𑀻𑀳𑀺 𑀆𑀘𑀭𑀺𑀬𑁂𑀳𑀺 𑀤𑁆𑀯𑁂, 𑀢𑀻𑀳𑀺 𑀆𑀘𑀭𑀺𑀬𑁂𑀳𑀺 𑀢𑀺𑀲𑁆𑀲𑁄 𑀓𑀫𑁆𑀫𑀯𑀸𑀘𑀸. 𑀏𑀓𑁂𑀦 𑀉𑀧𑀚𑁆𑀛𑀸𑀬𑁂𑀦 𑀅𑀦𑀼𑀲𑀸𑀯𑀦𑁂 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀆𑀘𑀭𑀺𑀬𑀸 𑀯𑀝𑁆𑀝𑀦𑁆𑀢𑀺, 𑀦𑀸𑀦𑀼𑀧𑀚𑁆𑀛𑀸𑀬𑁂𑀦 𑀅𑀦𑀼𑀲𑀸𑀯𑀦𑁂 𑀧𑀦 𑀦𑀸𑀦𑀸𑀘𑀭𑀺𑀬𑀸 𑀏𑀯 𑀯𑀝𑁆𑀝𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺. 𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑀪𑀽𑀢𑁄 𑀢𑀺𑀲𑁆𑀲𑀢𑁆𑀣𑁂𑀭𑁄. 𑀲𑀼𑀫𑀦𑀢𑁆𑀣𑁂𑀭𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀪𑀽𑀢𑀲𑁆𑀲 𑀲𑀼𑀫𑀦𑀢𑁆𑀣𑁂𑀭𑀲𑁆𑀲. 𑀇𑀤𑀦𑁆𑀢𑀺 𑀦𑀸𑀦𑀼𑀧𑀚𑁆𑀛𑀸𑀬𑁂𑀦 𑀏𑀓𑀲𑁆𑀲𑀸𑀘𑀭𑀺𑀬𑀲𑁆𑀲𑀸𑀦𑀼𑀲𑀸𑀯𑀦𑀁. 𑀏𑀲 𑀧𑀝𑀺𑀓𑁆𑀔𑁂𑀧𑁄𑀢𑀺 ‘‘𑀦 𑀢𑁆𑀯𑁂𑀯 𑀦𑀸𑀦𑀼𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀏𑀲𑁄 𑀧𑀝𑀺𑀓𑁆𑀔𑁂𑀧𑁄.