𑁫𑁮. 𑀅𑀮𑀚𑁆𑀚𑀻𑀦𑀺𑀲𑁆𑀲𑀬𑀯𑀢𑁆𑀣𑀼𑀓𑀣𑀸

𑁧𑁨𑁦. ‘‘𑀅𑀮𑀚𑁆𑀚𑀻𑀦𑀁 𑀑𑀯𑀸𑀤’’𑀦𑁆𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑀺𑀢𑁂 𑀲𑀸𑀫𑁆𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑁂𑀯. 𑀢𑀁 𑀦𑀬𑀁 𑀅𑀤𑀲𑁆𑀲𑁂𑀢𑁆𑀯𑀸 ‘‘𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀪𑀺𑀓𑁆𑀔𑀽𑀳𑀺 𑀲𑀪𑀸𑀕𑀢’’𑀦𑁆𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀽𑀳𑀺 𑀲𑀫𑀸𑀦𑁄 𑀲𑀻𑀮𑀸𑀤𑀺𑀕𑀼𑀡𑀲𑀗𑁆𑀔𑀸𑀢𑁄 𑀪𑀸𑀕𑁄 𑀇𑀫𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑀪𑀸𑀕𑁄, 𑀢𑀲𑁆𑀲 𑀪𑀸𑀯𑁄 𑀪𑀺𑀓𑁆𑀔𑀼𑀲𑀪𑀸𑀕𑀢𑀦𑁆𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀮𑀚𑁆𑀚𑀺𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸 𑀪𑀸𑀯𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀦𑀯𑀝𑁆𑀞𑀸𑀦𑀦𑁆𑀢𑀺 𑀅𑀪𑀺𑀦𑀯𑀝𑁆𑀞𑀸𑀦𑀁. 𑀕𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀣𑁂𑀭𑁄𑀢𑀺 𑀦𑀺𑀲𑁆𑀲𑀬𑀤𑀸𑀬𑀓𑁄 𑀣𑁂𑀭𑁄. 𑀕𑀳𑁂𑀢𑀼𑀓𑀸𑀫𑁄𑀢𑀺 𑀦𑀺𑀲𑁆𑀲𑀬𑀁 𑀕𑀳𑁂𑀢𑀼𑀓𑀸𑀫𑁄. 𑀆𑀘𑀸𑀭𑀦𑁆𑀢𑀺 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑀲𑁆𑀲 𑀆𑀘𑀸𑀭𑀁. 𑀢𑀤𑀳𑁂𑀯𑀸𑀢𑀺 𑀢𑀲𑁆𑀫𑀺𑀁 𑀕𑀢𑀅𑀳𑀦𑀺 𑀏𑀯. 𑀆𑀪𑁄𑀕𑀲𑁆𑀲 𑀓𑀢𑀢𑁆𑀢𑀸, 𑀅𑀭𑀼𑀡𑀼𑀕𑁆𑀕𑀫𑀦𑀲𑁆𑀲 𑀘 𑀅𑀚𑀸𑀦𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑀸𑀧𑀢𑁆𑀢𑀻’’𑀢𑀺. 𑀅𑀭𑀼𑀡𑀼𑀕𑁆𑀕𑀫𑀦𑀁 𑀅𑀚𑀸𑀦𑀦𑁆𑀢𑁄𑀧𑀺 𑀆𑀪𑁄𑀕𑀲𑁆𑀲 𑀅𑀓𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀭𑀼𑀡𑀼𑀕𑁆𑀕𑀫𑀦𑁂 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀻’’𑀢𑀺 𑀧𑀤𑁂𑀦 𑀘𑀢𑀼 𑀧𑀜𑁆𑀘 𑀙 𑀤𑀺𑀯𑀲𑀸𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀅𑀦𑀺𑀲𑁆𑀲𑀺𑀢𑁂𑀦 𑀯𑀲𑀺𑀢𑀩𑁆𑀩𑀪𑀸𑀯𑁂𑀦 𑀲𑀫𑀸𑀦𑀨𑀮𑀢𑁆𑀢𑀸. 𑀢𑁂𑀦𑀸𑀳 ‘‘𑀲𑀢𑁆𑀢𑀸𑀳𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺. 𑀮𑀤𑁆𑀥𑀧𑀭𑀺𑀳𑀸𑀭𑁄𑀢𑀺 𑀮𑀤𑁆𑀥𑁄 𑀧𑀭𑀺𑀳𑀸𑀭𑁄 𑀆𑀧𑀢𑁆𑀢𑀺𑀅𑀧𑀦𑀬𑀦𑀁 𑀬𑁂𑀦𑀸𑀢𑀺 𑀮𑀤𑁆𑀥𑀧𑀭𑀺𑀳𑀸𑀭𑁄.