𑁫𑁭. 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀯𑀢𑁆𑀣𑀼𑀓𑀣𑀸

𑁧𑁧𑁯. 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀯𑀢𑁆𑀣𑀽𑀲𑀼 𑀳𑀢𑁆𑀣𑀸 𑀙𑀺𑀦𑁆𑀦𑀸 𑀬𑀲𑁆𑀲𑀸𑀢𑀺 𑀳𑀢𑁆𑀣𑀘𑁆𑀙𑀺𑀦𑁆𑀦𑁄𑀢𑀺𑀆𑀤𑀺𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. 𑀫𑀡𑀺𑀩𑀦𑁆𑀥𑁂𑀢𑀺 𑀧𑀓𑁄𑀝𑁆𑀞𑀦𑁆𑀢𑁂. 𑀲𑁄 𑀳𑀺 𑀬𑀲𑁆𑀫𑀸 𑀏𑀢𑁆𑀣 𑀫𑀡𑀺𑀲𑀗𑁆𑀔𑀸𑀢𑀁 𑀅𑀮𑀗𑁆𑀓𑀸𑀭𑀯𑀺𑀓𑀢𑀺𑀁 𑀩𑀦𑁆𑀥𑀢𑀺, 𑀢𑀲𑁆𑀫𑀸 𑀫𑀡𑀺𑀩𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀧𑁆𑀧𑀭𑁂𑀢𑀺 𑀓𑀧𑁄𑀡𑀺𑀬𑀁. 𑀲𑀸 𑀳𑀺 𑀧𑀭𑁂𑀲𑀁 𑀧𑀺𑀝𑁆𑀞𑀻𑀲𑀼 𑀓𑀧𑀢𑀺 𑀳𑀺𑀁𑀲𑀢𑀺 𑀅𑀦𑁂𑀦𑀸𑀢𑀺 ‘‘𑀓𑀧𑁆𑀧𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀳𑀢𑁆𑀣𑀸 𑀙𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀅𑀬𑀁 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀓𑁄 𑀯𑀸 𑀧𑀸𑀤𑁄𑀢𑀺 𑀬𑁄𑀚𑀦𑀸. 𑀳𑁂𑀝𑁆𑀞𑀸 ‘‘𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀳𑀢𑁆𑀣𑀸’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀽𑀲𑀼 𑀳𑀢𑁆𑀣𑀧𑀸𑀤𑁂𑀲𑀼 𑀤𑁆𑀯𑁂 𑀯𑀸𑀢𑀺 𑀏𑀓𑁄 𑀳𑀢𑁆𑀣𑁄, 𑀏𑀓𑁄 𑀧𑀸𑀤𑁄𑀢𑀺 𑀤𑁆𑀯𑁂 𑀯𑀸. 𑀓𑀡𑁆𑀡𑀸𑀢𑀺 𑀲𑀤𑁆𑀤𑀕𑁆𑀕𑀳𑀸. 𑀢𑁂 𑀳𑀺 𑀓𑀡𑁆𑀡𑀢𑀺 𑀲𑀯𑀢𑀺 𑀏𑀢𑁂𑀳𑀻𑀢𑀺 𑀓𑀡𑁆𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀡𑁆𑀡𑀸𑀩𑀤𑁆𑀥𑁂𑀢𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀲𑁆𑀲 𑀆𑀩𑀤𑁆𑀥𑁂. 𑀲𑀗𑁆𑀖𑀸𑀝𑁂𑀢𑀼𑀦𑁆𑀢𑀺 𑀲𑀗𑁆𑀖𑀝𑀦𑀁 𑀓𑀸𑀢𑀼𑀁, 𑀆𑀩𑀦𑁆𑀥𑀦𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀚𑀧𑀤𑀓𑁂𑀢𑀺 𑀅𑀚𑀧𑀤𑀲𑀡𑁆𑀞𑀸𑀦𑁂 𑀞𑀸𑀦𑁂. 𑀦𑀸𑀲𑀸𑀢𑀺 𑀖𑀸𑀦𑀸𑀦𑀺. 𑀢𑀸𑀦𑀺 𑀳𑀺 𑀦𑀸𑀲𑀢𑀺 𑀅𑀩𑁆𑀬𑀢𑁆𑀢𑀲𑀤𑁆𑀤𑀁 𑀓𑀭𑁄𑀢𑀺 𑀏𑀢𑀸𑀳𑀻𑀢𑀺 𑀦𑀸𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑀸𑀲𑀺𑀓𑀸𑀢𑀺 𑀦𑀸𑀲𑀸𑀬𑁂𑀯. 𑀲𑀡𑁆𑀞𑀸𑀧𑁂𑀢𑀼𑀦𑁆𑀢𑀺 𑀲𑀼𑀝𑁆𑀞𑀼 𑀞𑀧𑁂𑀢𑀼𑀁, 𑀧𑀓𑀢𑀺𑀬𑀸 𑀞𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀦𑀔𑀲𑁂𑀲𑀦𑁆𑀢𑀺 𑀦𑀔𑁄𑀬𑁂𑀯 𑀲𑁂𑀲𑁄 𑀙𑀺𑀦𑁆𑀦𑀗𑁆𑀕𑀼𑀮𑀺𑀢𑁄𑀢𑀺 𑀦𑀔𑀲𑁂𑀲𑁄, 𑀢𑀁. 𑀅𑀕𑁆𑀕𑁂 𑀧𑀼𑀭𑁂 𑀉𑀝𑁆𑀞𑀳𑀢𑀻𑀢𑀺 𑀅𑀗𑁆𑀕𑀼𑀝𑁆𑀞𑁄. ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀦𑀔𑀲𑁂𑀲𑀁 𑀅𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀯𑀘𑀦𑀁 𑀅𑀢𑀺𑀤𑀺𑀲𑀢𑀺. 𑀓𑀡𑁆𑀟𑀭𑀦𑀸𑀫𑀓𑀸𑀢𑀺 𑀫𑀳𑀸𑀲𑀺𑀭𑀦𑀸𑀫𑀓𑀸. 𑀢𑁂 𑀳𑀺 𑀓𑀁 𑀲𑀭𑀻𑀭𑀁 𑀥𑀸𑀭𑁂𑀦𑁆𑀢𑀻𑀢𑀺 𑀓𑀡𑁆𑀟𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 𑀥𑀓𑀸𑀭𑀲𑁆𑀲 𑀟𑀓𑀸𑀭𑀁 𑀓𑀢𑁆𑀯𑀸. 𑀬𑁂𑀲𑀽𑀢𑀺 𑀓𑀡𑁆𑀟𑀭𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁.

𑀬𑀲𑁆𑀲 𑀯𑀕𑁆𑀕𑀼𑀮𑀺𑀧𑀓𑁆𑀔𑀓𑀸 𑀯𑀺𑀬 𑀅𑀗𑁆𑀕𑀼𑀮𑀺𑀬𑁄 𑀲𑀫𑁆𑀩𑀦𑁆𑀥𑁄 𑀳𑁄𑀦𑁆𑀢𑀺, 𑀅𑀬𑀁 𑀨𑀡𑀳𑀢𑁆𑀣𑀓𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀢𑀦𑁆𑀢𑀺 𑀨𑀡𑀳𑀢𑁆𑀣𑀓𑀁. 𑀙𑀴𑀗𑁆𑀕𑀼𑀮𑀸𑀤𑀬𑁄𑀧𑀺 𑀨𑀡𑀳𑀢𑁆𑀣𑀓𑁂𑀬𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀬𑀲𑁆𑀲𑀧𑀺 𑀙 𑀅𑀗𑁆𑀕𑀼𑀮𑀺𑀬𑁄’’𑀢𑀺𑀆𑀤𑀺. 𑀬𑀲𑁆𑀲𑀧𑀺 𑀙 𑀅𑀗𑁆𑀕𑀼𑀮𑀺𑀬𑁄 𑀳𑁄𑀦𑁆𑀢𑀺, 𑀅𑀬𑀫𑁆𑀧𑀺 𑀨𑀡𑀳𑀢𑁆𑀣𑀓𑁄 𑀦𑀸𑀫 𑀉𑀧𑀘𑀸𑀭𑁂𑀦.

𑀔𑀼𑀚𑁆𑀚𑁄𑀢𑀺 𑀏𑀢𑁆𑀣 𑀔𑀼𑀚𑁆𑀚𑁄 𑀲𑀭𑀻𑀭𑁄 𑀬𑀲𑁆𑀲𑀢𑁆𑀣𑀻𑀢𑀺 𑀔𑀼𑀚𑁆𑀚𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀼𑀚𑁆𑀚𑀲𑀭𑀻𑀭𑁄’’𑀢𑀺. 𑀓𑀲𑁆𑀫𑀸 𑀔𑀼𑀚𑁆𑀚𑁄𑀢𑀺 𑀆𑀳 ‘‘𑀉𑀭𑀲𑁆𑀲 𑀯𑀸’’𑀢𑀺𑀆𑀤𑀺. 𑀬𑀲𑁆𑀲 𑀧𑀦 𑀯𑀗𑁆𑀓𑀁, 𑀅𑀬𑀫𑁆𑀧𑀺 𑀔𑀼𑀚𑁆𑀚𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀯𑀗𑁆𑀓𑀦𑁆𑀢𑀺 𑀘 𑀓𑀼𑀝𑀺𑀮𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄𑀢𑀺 𑀉𑀚𑀼𑀁 𑀕𑀢𑁆𑀢𑀁 𑀉𑀚𑀼𑀕𑀢𑁆𑀢𑀁, 𑀩𑁆𑀭𑀳𑁆𑀫𑀼𑀦𑁄 𑀉𑀚𑀼𑀕𑀢𑁆𑀢𑀁 𑀯𑀺𑀬 𑀉𑀚𑀼𑀕𑀢𑁆𑀢𑀁 𑀇𑀫𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄, 𑀫𑀳𑀸𑀧𑀼𑀭𑀺𑀲𑁄.

𑀲𑀁𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀚𑀗𑁆𑀖𑀯𑀸𑀫𑀦𑀲𑁆𑀲 𑀳𑀻’’𑀢𑀺𑀆𑀤𑀺. 𑀬𑁂𑀲𑀦𑁆𑀢𑀺 𑀉𑀪𑀺𑀦𑁆𑀦𑀁 𑀓𑀸𑀬𑀸𑀦𑀁. 𑀪𑀽𑀢𑀸𑀦𑀦𑁆𑀢𑀺 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀲𑀸𑀘𑀓𑀧𑁂𑀢𑀸𑀦𑀁. 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀧𑀭𑀺𑀯𑀝𑀼𑀫𑁄𑀢𑀺 𑀧𑀭𑀺𑀲𑀫𑀦𑁆𑀢𑀢𑁄 𑀯𑀝𑁆𑀝𑀼𑀮𑀲𑀭𑀻𑀭𑁄.

𑀕𑀮𑀕𑀡𑁆𑀟𑀻𑀢𑀺 𑀏𑀢𑁆𑀣 𑀕𑀮𑁂 𑀕𑀡𑁆𑀟𑁄 𑀬𑀲𑁆𑀲𑀢𑁆𑀣𑀻𑀢𑀺 𑀕𑀮𑀕𑀡𑁆𑀟𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲𑀸’’𑀢𑀺𑀆𑀤𑀺. 𑀏𑀢𑀦𑁆𑀢𑀺 ‘‘𑀕𑀮𑀕𑀡𑁆𑀟𑀻’’𑀢𑀺 𑀏𑀢𑀁 𑀯𑀘𑀦𑀁. 𑀢𑀢𑁆𑀣𑀸𑀢𑀺 𑀕𑀮𑀕𑀡𑁆𑀟𑀺𑀧𑀩𑁆𑀩𑀸𑀚𑀦𑁂. 𑀬𑀦𑁆𑀢𑀺 𑀯𑀘𑀦𑀁.

𑀲𑀺𑀧𑀤𑀻𑀢𑀺 𑀏𑀢𑁆𑀣 𑀲𑀺𑀣𑀺𑀮𑀁 𑀧𑀤𑀁 𑀇𑀫𑀲𑁆𑀲𑀸𑀢𑀺 𑀲𑀺𑀧𑀤𑀻𑀢𑀺 𑀯𑀼𑀢𑁆𑀢𑁂 𑀪𑀸𑀭𑀧𑀸𑀤𑁄𑀬𑁂𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀪𑀸𑀭𑀧𑀸𑀤𑁄 𑀯𑀼𑀘𑁆𑀘𑀢𑀻’’𑀢𑀺. 𑀪𑀸𑀭𑀁 𑀧𑀸𑀤𑀁 𑀬𑀲𑁆𑀲𑀸𑀢𑀺 𑀪𑀸𑀭𑀧𑀸𑀤𑁄. 𑀏𑀢𑁂 𑀤𑁆𑀯𑁂 𑀣𑀽𑀮𑀧𑀸𑀤𑀭𑁄𑀕𑀻𑀲𑀼 𑀯𑀢𑁆𑀢𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀜𑁆𑀚𑀸𑀢𑀧𑀺𑀴𑀓𑁄𑀢𑀺 𑀲𑀜𑁆𑀚𑀸𑀢𑀨𑁄𑀝𑁄. 𑀉𑀧𑀦𑀸𑀳𑀦𑁆𑀢𑀺 𑀪𑀼𑀲𑀁 𑀩𑀦𑁆𑀥𑀦𑀁. 𑀉𑀤𑀓𑀆𑀯𑀸𑀝𑁂𑀢𑀺 𑀉𑀤𑀓𑁂𑀦 𑀧𑀼𑀡𑁆𑀡𑀸𑀬𑀁 𑀓𑀸𑀲𑀼𑀬𑀁. 𑀉𑀤𑀓𑀯𑀸𑀮𑀺𑀓𑀸𑀬𑀸𑀢𑀺 𑀉𑀤𑀓𑀢𑀺𑀦𑁆𑀢𑁂𑀦 𑀫𑀭𑀼𑀦𑀸. 𑀬𑀣𑀸 𑀲𑀺𑀭𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁 𑀫𑀺𑀮𑀸𑀧𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀈𑀤𑀺𑀲𑀦𑁆𑀢𑀺 𑀲𑀺𑀭𑀸𑀧𑀜𑁆𑀜𑀸𑀬𑀦𑀚𑀗𑁆𑀖𑀢𑁂𑀮𑀦𑀸𑀴𑀺𑀓𑀲𑀪𑀸𑀯𑀁. 𑀢𑀣𑀸𑀢𑀺 𑀬𑀣𑀸 𑀧𑀩𑁆𑀩𑀚𑁆𑀚𑀸𑀓𑀸𑀮𑁂 𑀓𑀭𑁄𑀢𑀺, 𑀢𑀣𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀸𑀧𑀭𑁄𑀕𑀻𑀢𑀺 𑀏𑀢𑁆𑀣 𑀧𑀸𑀧𑀭𑁄𑀕𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀭𑀺𑀲’’𑀇𑀢𑀺𑀆𑀤𑀺. 𑀢𑀢𑁆𑀣 𑀅𑀭𑀺𑀲𑁄 𑀘 𑀪𑀕𑀦𑁆𑀤𑀭𑁄 𑀘 𑀧𑀺𑀢𑁆𑀢𑀜𑁆𑀘 𑀲𑁂𑀫𑁆𑀳𑁄 𑀘 𑀓𑀸𑀲𑁄 𑀘 𑀲𑁄𑀲𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀢𑁂 𑀆𑀤𑀬𑁄 𑀬𑁂𑀲𑀁 𑀢𑁂𑀢𑀺 𑀅𑀭𑀺𑀲…𑀧𑁂… 𑀲𑁄𑀲𑀸𑀤𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂 𑀆𑀩𑀸𑀥𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀧𑀺𑀢𑁆𑀢𑀲𑁂𑀫𑁆𑀳𑀲𑀤𑁆𑀤𑁂𑀳𑀺 𑀢𑀁𑀲𑀫𑀼𑀝𑁆𑀞𑀸𑀦𑁄 𑀭𑁄𑀕𑁄 𑀕𑀳𑁂𑀢𑀩𑁆𑀩𑁄. ‘‘𑀦𑀺𑀘𑁆𑀘𑀸𑀢𑀼𑀭𑁄’’𑀢𑀺 𑀇𑀫𑀺𑀦𑀸 𑀧𑀸𑀧𑀭𑁄𑀕𑀻𑀢𑀺 𑀏𑀢𑁆𑀣 𑀫𑀦𑁆𑀢𑀼𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀈𑀧𑀘𑁆𑀘𑀬𑀲𑁆𑀲 𑀦𑀺𑀘𑁆𑀘𑀬𑁄𑀕𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀧𑀭𑀺𑀲𑀤𑀽𑀲𑀦𑁄𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀦𑀸𑀫𑀧𑀭𑀺𑀬𑀸𑀬𑁄, 𑀧𑀭𑀺𑀲𑀤𑀽𑀲𑀦𑁄 𑀦𑀸𑀫𑀸𑀢𑀺 𑀳𑀺 𑀅𑀢𑁆𑀣𑁄. 𑀬𑁄 𑀅𑀢𑁆𑀢𑀦𑁄 𑀯𑀺𑀭𑀽𑀧𑀢𑀸𑀬 𑀧𑀭𑀺𑀲𑀁 𑀤𑀽𑀲𑁂𑀢𑀺, 𑀅𑀬𑀁 𑀧𑀭𑀺𑀲𑀤𑀽𑀲𑀦𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀙𑀲𑀭𑀻𑀭𑀤𑁄𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀭𑀺𑀲𑀤𑀽𑀲𑀦𑀪𑀸𑀯𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀅𑀢𑀺𑀤𑀻𑀖𑁄 𑀯𑀸’’𑀢𑀺𑀆𑀤𑀺. 𑀅𑀢𑀺𑀤𑀻𑀖𑁄 𑀯𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀧𑀭𑁂𑀲𑀁 𑀤𑁆𑀯𑀗𑁆𑀕𑀼𑀮𑀸𑀤𑀺𑀫𑀢𑁆𑀢𑀤𑀻𑀖𑁄, 𑀅𑀣 𑀔𑁄 𑀤𑀺𑀕𑀼𑀡𑀸𑀤𑀺𑀤𑀻𑀖𑁄𑀯𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀜𑁆𑀜𑁂𑀲’’𑀦𑁆𑀢𑀺𑀆𑀤𑀺. 𑀦𑀸𑀪𑀺𑀧𑀤𑁂𑀲𑁄𑀢𑀺 𑀅𑀢𑁆𑀢𑀦𑁄 𑀦𑀸𑀪𑀺𑀧𑀤𑁂𑀲𑁄. 𑀬𑀣𑀸 𑀳𑀺 𑀅𑀢𑀺𑀤𑀻𑀖𑁂 𑀧𑀭𑀯𑀘𑀦𑁂𑀦 𑀅𑀢𑀺𑀤𑀻𑀖𑀲𑁆𑀲 𑀲𑀭𑀽𑀧𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀣𑀸 𑀅𑀢𑀺𑀭𑀲𑁆𑀲𑀸𑀤𑀻𑀲𑀼𑀧𑀺 𑀅𑀢𑀺𑀭𑀲𑁆𑀲𑀲𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀳𑁄𑀤𑀭𑁄𑀢𑀺 𑀫𑀳𑀸𑀉𑀤𑀭𑁄. 𑀓𑀧𑁆𑀧𑀲𑀻𑀲𑁄 𑀯𑀸𑀢𑀺 𑀳𑀢𑁆𑀣𑀺𑀲𑀻𑀲𑁄 𑀯𑀺𑀬 𑀬𑀼𑀕𑀲𑀻𑀲𑁄 𑀯𑀸. 𑀓𑀧𑁆𑀧𑀲𑀤𑁆𑀤𑁄 𑀳𑁂𑀢𑁆𑀣 𑀬𑀼𑀕𑀢𑁆𑀣𑀯𑀸𑀘𑀓𑁄. 𑀓𑀡𑁆𑀡𑀺𑀓𑀓𑁂𑀲𑁄 𑀯𑀸𑀢𑀺 𑀓𑀡𑁆𑀡𑀺𑀓𑀲𑀤𑀺𑀲𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. ‘‘𑀚𑀸𑀢𑀺𑀧𑀮𑀺𑀢𑁂𑀳𑀻’’𑀢𑀺 𑀇𑀫𑀺𑀦𑀸 𑀚𑀭𑀸𑀯𑀸𑀢𑁂𑀦 𑀧𑀳𑀢𑀁 𑀧𑀮𑀺𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀧𑀓𑀢𑀺𑀢𑀫𑁆𑀩𑀓𑁂𑀲𑁄𑀢𑀺 𑀏𑀢𑁆𑀣 𑀧𑀓𑀢𑀺𑀲𑀤𑁆𑀤𑁂𑀦 𑀓𑁂𑀦𑀘𑀺 𑀧𑀬𑁄𑀕𑁂𑀦 𑀢𑀫𑁆𑀩𑀓𑁂𑀲𑀁 𑀦𑀺𑀯𑀢𑁆𑀢𑁂𑀢𑀺. 𑀆𑀯𑀝𑁆𑀝𑀲𑀻𑀲𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀢𑀻𑀢𑀺 𑀆𑀯𑀝𑁆𑀝𑁄, 𑀓𑁂𑀲𑀸𑀯𑀝𑁆𑀝𑁄, 𑀲𑁄 𑀏𑀢𑀲𑁆𑀲 𑀲𑀻𑀲𑁂 𑀅𑀢𑁆𑀣𑀻𑀢𑀺 𑀆𑀯𑀝𑁆𑀝𑀲𑀻𑀲𑁄. 𑀉𑀤𑁆𑀥𑀕𑁆𑀕𑁂𑀳𑀻𑀢𑀺 𑀉𑀤𑁆𑀥𑀁 𑀓𑁄𑀝𑀻𑀳𑀺. 𑀚𑀸𑀮𑀩𑀤𑁆𑀥𑁂𑀦 𑀯𑀺𑀬𑀸𑀢𑀺 𑀚𑀸𑀮𑁂𑀦 𑀩𑀤𑁆𑀥𑁂𑀦 𑀇𑀯.

𑀲𑀫𑁆𑀩𑀤𑁆𑀥𑀪𑀫𑀼𑀓𑁄 𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀤𑁆𑀥𑀪𑀫𑀼𑀓𑁄 𑀯𑀸. 𑀫𑀓𑁆𑀓𑀝𑀪𑀫𑀼𑀓𑁄𑀢𑀺 𑀫𑀓𑁆𑀓𑀝𑀲𑁆𑀲 𑀪𑀫𑀼 𑀯𑀺𑀬 𑀪𑀫𑀼 𑀏𑀢𑀲𑁆𑀲𑀸𑀢𑀺 𑀫𑀓𑁆𑀓𑀝𑀪𑀫𑀼𑀓𑁄. 𑀯𑀸𑀲𑀺𑀓𑁄𑀡𑁂𑀦𑀸𑀢𑀺 𑀢𑀘𑁆𑀙𑀦𑀻𑀓𑁄𑀝𑀺𑀬𑀸. 𑀯𑀺𑀲𑀫𑀘𑀓𑁆𑀓𑀮𑁄𑀢𑀺 𑀏𑀢𑁆𑀣 𑀘𑀓𑁆𑀓𑀸𑀓𑀸𑀭𑁂𑀦 𑀮𑀸𑀢𑀺 𑀧𑀯𑀢𑁆𑀢𑀢𑀺, 𑀘𑀓𑁆𑀓𑀸𑀓𑀸𑀭𑀁 𑀯𑀸 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀘𑀓𑁆𑀓𑀮𑁄. 𑀓𑁂𑀓𑀭𑁄𑀢𑀺 𑀯𑀮𑀺𑀭𑁄. 𑀲𑁄 𑀳𑀺 𑀓𑀼𑀘𑁆𑀙𑀺𑀢𑀁 𑀓𑀭𑁄𑀢𑀻𑀢𑀺 𑀓𑁂𑀓𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀓𑁆𑀓𑀝𑀲𑁆𑀲𑁂𑀯𑀸𑀢𑀺 𑀓𑀓𑁆𑀓𑀝𑀲𑁆𑀲 𑀇𑀯. 𑀫𑀽𑀲𑀺𑀓𑀓𑀡𑁆𑀡𑁄𑀢𑀺 𑀆𑀔𑀼𑀓𑀡𑁆𑀡𑁄. 𑀚𑀝𑀼𑀓𑀓𑀡𑁆𑀡𑁄𑀢𑀺 𑀯𑀕𑁆𑀕𑀼𑀮𑀺𑀓𑀡𑁆𑀡𑁄. 𑀅𑀯𑀺𑀤𑁆𑀥𑀓𑀡𑁆𑀡𑁄𑀢𑀺 𑀅𑀘𑁆𑀙𑀺𑀤𑁆𑀤𑀓𑀡𑁆𑀡𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑁄𑀢𑀺 𑀅𑀯𑀺𑀤𑁆𑀥𑀓𑀡𑁆𑀡𑁄. 𑀓𑀡𑁆𑀡𑁂 𑀪𑀕𑀦𑁆𑀤𑀭𑁄 𑀏𑀢𑀲𑁆𑀲𑀸𑀢𑀺 𑀓𑀡𑁆𑀡𑀪𑀕𑀦𑁆𑀤𑀭𑁄, 𑀲𑁄𑀬𑁂𑀯 𑀓𑀡𑁆𑀡𑀪𑀕𑀦𑁆𑀤𑀭𑀺𑀓𑁄. 𑀕𑀡𑁆𑀟𑁄 𑀓𑀡𑁆𑀡𑁂 𑀏𑀢𑀲𑁆𑀲𑀸𑀢𑀺 𑀕𑀡𑁆𑀟𑀓𑀡𑁆𑀡𑁄. 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑁂𑀦𑀸𑀢𑀺 𑀧𑀕𑁆𑀖𑀭𑀺𑀢𑀧𑀽𑀬𑁂𑀦. 𑀝𑀗𑁆𑀓𑀺𑀢𑁄 𑀓𑀡𑁆𑀡𑁄 𑀬𑀲𑁆𑀲𑀸𑀢𑀺 𑀝𑀗𑁆𑀓𑀺𑀢𑀓𑀡𑁆𑀡𑁄. 𑀕𑁄𑀪𑀢𑁆𑀢𑀦𑀸𑀴𑀺𑀓𑀸𑀬𑀸𑀢𑀺 𑀕𑀼𑀦𑁆𑀦𑀁 𑀪𑀢𑁆𑀢𑀧𑀸𑀦𑀢𑁆𑀣𑀁 𑀓𑀢𑀸𑀬 𑀦𑀸𑀴𑀺𑀓𑀸𑀬. 𑀩𑀺𑀴𑀸𑀭𑀓𑁆𑀔𑀺 𑀯𑀺𑀬 𑀅𑀢𑀺𑀧𑀺𑀗𑁆𑀕𑀮𑀁 𑀅𑀓𑁆𑀔𑀺 𑀏𑀢𑀲𑁆𑀲𑀸𑀢𑀺 𑀅𑀢𑀺𑀧𑀺𑀗𑁆𑀕𑀮𑀓𑁆𑀔𑀺. 𑀫𑀥𑀼𑀯𑀡𑁆𑀡𑁄 𑀯𑀺𑀬 𑀧𑀺𑀗𑁆𑀕𑀮𑀁 𑀅𑀓𑁆𑀔𑀺 𑀏𑀢𑀲𑁆𑀲𑀸𑀢𑀺 𑀫𑀥𑀼𑀧𑀺𑀗𑁆𑀕𑀮𑀓𑁆𑀔𑀺. 𑀦𑀺𑀧𑁆𑀧𑀔𑀼𑀫𑀓𑁆𑀔𑀻𑀢𑀺 𑀏𑀢𑁆𑀣 𑀧𑀔𑀼𑀫𑀁 𑀯𑀼𑀘𑁆𑀘𑀢𑀺 𑀅𑀓𑁆𑀔𑀫𑁆𑀳𑀺 𑀚𑀸𑀢𑀁 𑀮𑁄𑀫𑀁. 𑀢𑀜𑁆𑀳𑀺 𑀅𑀓𑁆𑀔𑀺𑀦𑁄 𑀧𑀓𑁆𑀔𑀤𑁆𑀯𑀬𑁂 𑀚𑀸𑀢𑀢𑁆𑀢𑀸 𑀧𑀔𑀼𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀢𑁆𑀣𑀺 𑀧𑀔𑀼𑀫𑀁 𑀅𑀓𑁆𑀔𑀺𑀫𑁆𑀳𑀺 𑀏𑀢𑀲𑁆𑀲𑀸𑀢𑀺 𑀦𑀺𑀧𑁆𑀧𑀔𑀼𑀫𑀓𑁆𑀔𑀺. 𑀅𑀲𑁆𑀲𑀼𑀧𑀕𑁆𑀖𑀭𑀡𑀁 𑀅𑀓𑁆𑀔𑀺𑀫𑁆𑀳𑀸 𑀏𑀢𑀲𑁆𑀲𑀸𑀢𑀺 𑀅𑀲𑁆𑀲𑀼𑀧𑀕𑁆𑀖𑀭𑀡𑀓𑁆𑀔𑀺. 𑀧𑀼𑀧𑁆𑀨𑀁 𑀲𑀜𑁆𑀚𑀸𑀢𑀁 𑀬𑀲𑁆𑀲 𑀅𑀓𑁆𑀔𑀺𑀦𑁄𑀢𑀺 𑀧𑀼𑀧𑁆𑀨𑀺𑀢𑀁. 𑀧𑀼𑀧𑁆𑀨𑀺𑀢𑀁 𑀅𑀓𑁆𑀔𑀺 𑀬𑀲𑁆𑀲𑀸𑀢𑀺 𑀧𑀼𑀧𑁆𑀨𑀺𑀢𑀓𑁆𑀔𑀺. 𑀅𑀓𑁆𑀔𑀺𑀧𑀸𑀓𑁂𑀦𑀸𑀢𑀺 𑀅𑀓𑁆𑀔𑀺𑀦𑁄 𑀤𑀮𑀧𑀭𑀺𑀬𑀦𑁆𑀢𑁂𑀲𑀼 𑀧𑀘𑁆𑀘𑀦𑀓𑁂𑀦 𑀭𑁄𑀕𑁂𑀦.

𑀘𑀺𑀧𑀺𑀝𑀦𑀸𑀲𑀺𑀓𑁄𑀢𑀺 𑀅𑀦𑀼𑀦𑁆𑀦𑀢𑀦𑀸𑀲𑀺𑀓𑁄. 𑀲𑀼𑀓𑀢𑀼𑀡𑁆𑀟𑀲𑀤𑀺𑀲𑀸𑀬𑀸𑀢𑀺 𑀲𑀼𑀯𑀸𑀦𑀁 𑀫𑀼𑀔𑁂𑀦 𑀲𑀤𑀺𑀲𑀸𑀬.

𑀧𑀝𑀗𑁆𑀕𑀫𑀡𑁆𑀟𑀽𑀓𑀲𑁆𑀲𑁂𑀯𑀸𑀢𑀺 𑀧𑀝𑀗𑁆𑀕𑀦𑀸𑀫𑀓𑀲𑁆𑀲 𑀫𑀡𑁆𑀟𑀽𑀓𑀲𑁆𑀲 𑀫𑀼𑀔𑀦𑀺𑀫𑀺𑀢𑁆𑀢𑀁 𑀇𑀯 𑀫𑀼𑀔𑀦𑀺𑀫𑀺𑀢𑁆𑀢𑀁𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀉𑀓𑁆𑀔𑀮𑀺𑀫𑀼𑀔𑀯𑀝𑁆𑀝𑀺𑀲𑀤𑀺𑀲𑁂𑀳𑀻𑀢𑀺 𑀉𑀓𑁆𑀔𑀮𑀺𑀬𑀸 𑀫𑀼𑀔𑀯𑀝𑁆𑀝𑀺𑀦𑀸 𑀲𑀤𑀺𑀲𑁂𑀳𑀺. 𑀪𑁂𑀭𑀺𑀘𑀫𑁆𑀫𑀲𑀤𑀺𑀲𑁂𑀳𑀻𑀢𑀺 𑀪𑁂𑀭𑀺𑀬𑀸 𑀫𑀼𑀔𑁂 𑀦𑀳𑀺𑀢𑀘𑀫𑁆𑀫𑁂𑀦 𑀲𑀤𑀺𑀲𑁂𑀳𑀺. 𑀏𑀴𑀫𑀼𑀔𑁄𑀢𑀺 𑀏𑀴𑀸𑀬 𑀦𑀺𑀘𑁆𑀘𑀧𑀕𑁆𑀖𑀭𑀺𑀢𑀁 𑀫𑀼𑀔𑀫𑁂𑀢𑀲𑁆𑀲𑁂𑀢𑀺 𑀏𑀴𑀫𑀼𑀔𑁄. 𑀉𑀧𑁆𑀧𑀓𑁆𑀓𑀫𑀼𑀔𑁄𑀢𑀺 𑀉𑀧𑁆𑀧𑀓𑁆𑀓𑀁 𑀓𑀼𑀣𑀺𑀓𑀁 𑀫𑀼𑀔𑀫𑁂𑀢𑀲𑁆𑀲𑀸𑀢𑀺 𑀉𑀧𑁆𑀧𑀓𑁆𑀓𑀫𑀼𑀔𑁄. 𑀲𑀗𑁆𑀔𑀢𑀼𑀡𑁆𑀟𑀓𑁄𑀢𑀺 𑀲𑀗𑁆𑀔𑀲𑁆𑀲 𑀢𑀼𑀡𑁆𑀟𑁂𑀦 𑀲𑀤𑀺𑀲𑁄 𑀑𑀝𑁆𑀞𑁄 𑀏𑀢𑀲𑁆𑀲𑀸𑀢𑀺 𑀲𑀗𑁆𑀔𑀢𑀼𑀡𑁆𑀟𑀓𑁄.

𑀅𑀝𑁆𑀞𑀓𑀤𑀦𑁆𑀢𑀲𑀤𑀺𑀲𑁂𑀳𑀻𑀢𑀺 𑀅𑀝𑁆𑀞𑀓𑀦𑀸𑀫𑀓𑀲𑁆𑀲 𑀦𑀗𑁆𑀕𑀮𑀲𑁆𑀲 𑀤𑀦𑁆𑀢𑁂𑀳𑀺 𑀲𑀤𑀺𑀲𑁂𑀳𑀺. 𑀤𑀦𑁆𑀢𑁂 𑀧𑀺𑀤𑀳𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀦𑁆𑀢𑀦𑁆𑀢𑀭𑁂𑀢𑀺 𑀤𑀦𑁆𑀢𑀯𑀺𑀯𑀭𑁂, 𑀤𑀦𑁆𑀢𑀫𑀚𑁆𑀛𑁂 𑀯𑀸. 𑀓𑀮𑀦𑁆𑀤𑀓𑀤𑀦𑁆𑀢𑁄 𑀯𑀺𑀬𑀸𑀢𑀺 𑀓𑀸𑀴𑀓𑀸𑀦𑀁 𑀤𑀦𑁆𑀢𑁄 𑀯𑀺𑀬.

𑀫𑀳𑀸𑀳𑀦𑀼𑀓𑁄𑀢𑀺 𑀫𑀳𑀦𑁆𑀢𑁄 𑀳𑀦𑀼 𑀏𑀢𑀲𑁆𑀲𑀸𑀢𑀺 𑀫𑀳𑀸𑀳𑀦𑀼𑀓𑁄. 𑀘𑀺𑀧𑀺𑀝𑀳𑀦𑀼𑀓𑁄𑀢𑀺 𑀅𑀦𑀼𑀦𑁆𑀦𑀢𑀳𑀦𑀼𑀓𑁄. 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀓𑁄𑀢𑀺 𑀦𑀢𑁆𑀣𑀺 𑀫𑀲𑁆𑀲𑀼 𑀘 𑀤𑀸𑀞𑀺 𑀘 𑀏𑀢𑀲𑁆𑀲𑀸𑀢𑀺 𑀦𑀺𑀫𑁆𑀫𑀲𑁆𑀲𑀼𑀤𑀸𑀞𑀺𑀓𑁄. 𑀪𑀝𑁆𑀞𑀅𑀁𑀲𑀓𑀽𑀝𑁄𑀢𑀺 𑀪𑀝𑁆𑀞𑁄 𑀧𑀢𑀺𑀢𑁄 𑀅𑀁𑀲𑀓𑀽𑀝𑁄 𑀇𑀫𑀲𑁆𑀲𑀸𑀢𑀺 𑀪𑀝𑁆𑀞𑀅𑀁𑀲𑀓𑀽𑀝𑁄. 𑀕𑁄𑀥𑀸𑀕𑀢𑁆𑀢𑁄𑀢𑀺 𑀕𑁄𑀥𑀸𑀬 𑀕𑀢𑁆𑀢𑀁 𑀯𑀺𑀬 𑀕𑀢𑁆𑀢𑀁 𑀇𑀫𑀲𑁆𑀲𑀸𑀢𑀺 𑀕𑁄𑀥𑀸𑀕𑀢𑁆𑀢𑁄. 𑀲𑀩𑁆𑀩𑀁𑀧𑁂𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀏𑀢𑀁 ‘‘𑀓𑀘𑁆𑀙𑀼𑀕𑀢𑁆𑀢𑁄’’𑀢𑀺𑀆𑀤𑀺𑀯𑀘𑀦𑀁. 𑀏𑀢𑁆𑀣𑀸𑀢𑀺 ‘‘𑀓𑀘𑁆𑀙𑀼𑀕𑀢𑁆𑀢𑁄’’𑀢𑀺𑀆𑀤𑀺𑀯𑀘𑀦𑁂. 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀪𑀝𑁆𑀞𑀓𑀝𑀺𑀓𑁄𑀢𑀺 𑀪𑀝𑁆𑀞𑀸 𑀧𑀦𑁆𑀦𑀸 𑀓𑀝𑀺 𑀏𑀢𑀲𑁆𑀲𑀸𑀢𑀺 𑀪𑀝𑁆𑀞𑀓𑀝𑀺𑀓𑁄. 𑀅𑀘𑁆𑀘𑀼𑀕𑁆𑀕𑀢𑁂𑀳𑀺 𑀆𑀦𑀺𑀲𑀤𑀫𑀁𑀲𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸𑀢𑀡𑁆𑀟𑀺𑀓𑁄𑀢𑀺 𑀯𑀸𑀢𑁂𑀦 𑀧𑀽𑀭𑀺𑀢𑁄 𑀅𑀡𑁆𑀟𑀓𑁄𑀲𑁄 𑀏𑀢𑀲𑁆𑀲𑀸𑀢𑀺 𑀯𑀸𑀢𑀡𑁆𑀟𑀺𑀓𑁄. 𑀲𑀗𑁆𑀖𑀝𑁆𑀝𑀦𑀚𑀸𑀡𑀼𑀓𑁄𑀢𑀺 𑀅𑀦𑁆𑀢𑁄 𑀦𑀢𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑀦𑀁 𑀚𑀸𑀡𑀼 𑀏𑀢𑀲𑁆𑀲𑀸𑀢𑀺 𑀲𑀗𑁆𑀖𑀝𑁆𑀝𑀦𑀚𑀸𑀡𑀼𑀓𑁄. 𑀯𑀺𑀓𑀝𑁄𑀢𑀺 𑀢𑀺𑀭𑀺𑀬𑀕𑀫𑀦𑀧𑀸𑀤𑁄. 𑀉𑀧𑀟𑁆𑀠𑀧𑀺𑀡𑁆𑀟𑀺𑀓𑀲𑁆𑀲 𑀅𑀢𑁆𑀣𑀁 𑀲𑀳 𑀪𑁂𑀤𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄 𑀤𑀼𑀯𑀺𑀥𑁄’’𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀯𑀺𑀥𑁄 𑀲𑁄 𑀉𑀧𑀟𑁆𑀠𑀧𑀺𑀡𑁆𑀟𑀺𑀓𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀲𑁄 𑀉𑀧𑀟𑁆𑀠𑀧𑀺𑀡𑁆𑀟𑀺𑀓𑁄 𑀳𑁂𑀝𑁆𑀞𑀸 𑀑𑀭𑀽𑀴𑁆𑀳𑀸𑀳𑀺 𑀫𑀳𑀦𑁆𑀢𑀻𑀳𑀺 𑀚𑀗𑁆𑀖𑀧𑀺𑀡𑁆𑀟𑀺𑀓𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀸 𑀉𑀧𑀭𑀺 𑀆𑀭𑀽𑀴𑁆𑀳𑀸𑀳𑀺 𑀫𑀳𑀦𑁆𑀢𑀻𑀳𑀺 𑀚𑀗𑁆𑀖𑀧𑀺𑀡𑁆𑀟𑀺𑀓𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀸𑀢𑀺 𑀤𑀼𑀯𑀺𑀥𑁄𑀢𑀺 𑀬𑁄𑀚𑀦𑀸. 𑀧𑀺𑀝𑁆𑀞𑀺𑀓𑀧𑀸𑀤𑁄𑀢𑀺 𑀧𑀺𑀝𑁆𑀞𑀺𑀬𑀁 𑀉𑀝𑁆𑀞𑀺𑀢𑁄 𑀧𑀸𑀤𑁄 𑀏𑀢𑀲𑁆𑀲𑀸𑀢𑀺 𑀧𑀺𑀝𑁆𑀞𑀺𑀓𑀧𑀸𑀤𑁄. 𑀕𑀡𑁆𑀟𑀺𑀓𑀗𑁆𑀕𑀼𑀮𑀺 𑀯𑀸𑀢𑀺 𑀕𑀡𑁆𑀟𑁂𑀦 𑀉𑀝𑁆𑀞𑀺𑀢𑁄 𑀅𑀗𑁆𑀕𑀼𑀮𑀺 𑀏𑀢𑀲𑁆𑀲𑀸𑀢𑀺 𑀕𑀡𑁆𑀟𑀺𑀓𑀗𑁆𑀕𑀼𑀮𑀺. 𑀲𑀩𑁆𑀩𑁄𑀧𑁂𑀲𑀸𑀢𑀺 𑀏𑀲 𑀲𑀩𑁆𑀩𑁄𑀧𑀺 𑀚𑀦𑁄. 𑀧𑀭𑀺𑀲𑀁 𑀤𑀽𑀲𑁂𑀢𑀻𑀢𑀺 𑀧𑀭𑀺𑀲𑀤𑀽𑀲𑀦𑁄.

𑀧𑀼𑀩𑁆𑀩𑀸𑀤𑀻𑀳𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀯𑀢𑁆𑀣𑀽𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀤𑁆𑀯𑀻𑀳𑀺 𑀯𑀸 𑀅𑀓𑁆𑀔𑀻𑀳𑀺, 𑀏𑀓𑁂𑀦 𑀯𑀸 𑀅𑀓𑁆𑀔𑀺𑀦𑀸𑀢𑀺 𑀬𑁄𑀚𑀦𑀸. 𑀉𑀪𑀬𑀫𑁆𑀧𑀻𑀢𑀺 𑀤𑁆𑀯𑀺𑀦𑁆𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀉𑀪𑀬𑀫𑁆𑀧𑀺 𑀯𑀘𑀦𑀁. 𑀧𑀸𑀴𑀺𑀬𑀁 ‘‘𑀅𑀦𑁆𑀥𑀁 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀓𑀸𑀡𑀁 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀚𑀘𑁆𑀘𑀦𑁆𑀥𑁄’’𑀢𑀺 𑀇𑀫𑀺𑀦𑀸 𑀤𑁆𑀯𑁂𑀅𑀓𑁆𑀔𑀺𑀓𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀡𑀻𑀢𑀺 𑀓𑀼𑀡𑀦𑀁 𑀲𑀁𑀓𑁄𑀘𑀦𑀁 𑀓𑀼𑀡𑀁, 𑀢𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀓𑀼𑀡𑀻. 𑀔𑀜𑁆𑀚𑁄𑀢𑀺 𑀔𑀜𑁆𑀚𑀢𑀺 𑀕𑀢𑀺𑀯𑁂𑀓𑀮𑁆𑀮𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀔𑀜𑁆𑀚𑁄. 𑀓𑀼𑀡𑁆𑀟𑀧𑀸𑀤𑀓𑁄𑀢𑀺 𑀏𑀢𑁆𑀣 𑀓𑀼𑀡𑁆𑀟𑁄𑀢𑀺 𑀔𑀜𑁆𑀚𑀲𑁆𑀲𑁂𑀯 𑀦𑀸𑀫𑀁. 𑀔𑀜𑁆𑀚𑁄 𑀳𑀺 𑀓𑀼𑀟𑀢𑀺 𑀕𑀫𑀦𑀁 𑀧𑀝𑀺𑀳𑀦𑀢𑀻𑀢𑀺 𑀓𑀼𑀡𑁆𑀟𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸 𑀓𑀼𑀡𑁆𑀟𑀧𑀸𑀤𑀓𑁄? 𑀓𑀲𑁆𑀫𑀸 𑀧𑀺𑀝𑁆𑀞𑀺𑀧𑀸𑀤𑀫𑀚𑁆𑀛𑁂𑀦 𑀘𑀗𑁆𑀓𑀫𑀦𑁆𑀢𑁄𑀢𑀺 𑀆𑀳 ‘‘𑀫𑀚𑁆𑀛𑁂 𑀲𑀁𑀓𑀼𑀝𑀺𑀢𑀧𑀸𑀤𑀢𑁆𑀢𑀸’’𑀢𑀺. 𑀇𑀫𑀺𑀦𑀸 𑀳𑀺 𑀓𑀼𑀡𑁆𑀟𑀧𑀸𑀤𑀲𑁆𑀲 𑀘 𑀧𑀺𑀝𑁆𑀞𑀺𑀧𑀸𑀤𑀫𑀚𑁆𑀛𑁂𑀦 𑀘𑀗𑁆𑀓𑀫𑀦𑀲𑁆𑀲 𑀘 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀏𑀲𑁂𑀯 𑀦𑀬𑁄 𑀅𑀦𑀦𑁆𑀢𑀭𑀯𑀸𑀓𑁆𑀬𑁂𑀧𑀺. 𑀲𑀩𑁆𑀩𑁄𑀧𑁂𑀲𑀸𑀢𑀺 𑀏𑀲 𑀲𑀩𑁆𑀩𑁄𑀧𑀺 𑀚𑀦𑁄.

𑀧𑀓𑁆𑀔𑀳𑀢𑁄𑀢𑀺 𑀏𑀢𑁆𑀣 𑀏𑀓𑁄 𑀧𑀓𑁆𑀔𑁄 𑀳𑀢𑁄 𑀯𑀺𑀦𑀸𑀲𑁄 𑀏𑀢𑀲𑁆𑀲𑀸𑀢𑀺 𑀧𑀓𑁆𑀔𑀳𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑁄 𑀳𑀢𑁆𑀣𑁄 𑀯𑀸’’𑀢𑀺𑀆𑀤𑀺. ‘‘𑀧𑀓𑁆𑀔𑀧𑀸𑀢𑁄’’𑀢𑀺𑀧𑀺 𑀧𑀸𑀞𑁄, 𑀲𑁄 𑀅𑀧𑀸𑀞𑁄𑀬𑁂𑀯. 𑀧𑀓𑁆𑀔𑀲𑀤𑁆𑀤𑁄 𑀳𑀺 𑀓𑁄𑀝𑁆𑀞𑀸𑀲𑀯𑀸𑀘𑀓𑁄, 𑀦 𑀧𑀗𑁆𑀕𑀼𑀮𑀧𑀭𑀺𑀬𑀸𑀬𑁄, 𑀧𑀻𑀞𑀲𑀩𑁆𑀩𑀻 𑀯𑀼𑀘𑁆𑀘𑀢𑀻𑀢𑀺 𑀧𑀻𑀞𑁂𑀦 𑀲𑀩𑁆𑀩𑀢𑀺 𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀧𑀻𑀞𑀲𑀩𑁆𑀩𑀻 𑀯𑀼𑀘𑁆𑀘𑀢𑀺. ‘‘𑀚𑀺𑀡𑁆𑀡𑀪𑀸𑀯𑁂𑀦 𑀤𑀼𑀩𑁆𑀩𑀮𑁄’’𑀢𑀺 𑀇𑀫𑀺𑀦𑀸 𑀚𑀻𑀭𑀡𑀁 𑀚𑀭𑀸, 𑀢𑀸𑀬 𑀤𑀼𑀩𑁆𑀩𑀮𑁄 𑀚𑀭𑀸𑀤𑀼𑀩𑁆𑀩𑀮𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀩𑀮𑀯𑀸 𑀳𑁄𑀢𑀻𑀢𑀺 𑀆𑀕𑀦𑁆𑀢𑀼𑀓𑀭𑁄𑀕𑀸𑀦𑀫𑀪𑀸𑀯𑁂𑀦 𑀩𑀮𑀯𑀸 𑀳𑁄𑀢𑀺, ‘‘𑀯𑀘𑀻𑀪𑁂𑀤𑁄 𑀦𑀧𑁆𑀧𑀯𑀢𑁆𑀢𑀢𑀻’’𑀢𑀺 𑀇𑀫𑀺𑀦𑀸 𑀫𑀼𑀔𑀫𑀢𑁆𑀢𑀫𑁂𑀯 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺, 𑀦 𑀯𑀘𑀻𑀪𑁂𑀤𑁄 𑀏𑀢𑁆𑀣 𑀚𑀦𑁂𑀢𑀺 𑀫𑀽𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀯𑀘𑀻𑀪𑁂𑀤𑁄 𑀦 𑀧𑀯𑀢𑁆𑀢𑀢𑀺, 𑀅𑀬𑀁 𑀫𑀽𑀕𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀫𑀫𑁆𑀫𑀦𑀦𑁆𑀢𑀺 𑀔𑀮𑀺𑀢𑀯𑀘𑀦𑀁. 𑀬𑁄 𑀏𑀓𑀫𑁂𑀯 𑀅𑀓𑁆𑀔𑀭𑀁 𑀘𑀢𑀼𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀯𑀤𑀢𑀺, 𑀢𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀩𑀥𑀻𑀭𑁄𑀢𑀺 𑀲𑀼𑀢𑀺𑀳𑀻𑀦𑁄. 𑀲𑁄 𑀳𑀺 𑀳𑀦𑀦𑀁 𑀲𑁄𑀢𑀧𑀲𑀸𑀤𑀲𑁆𑀲 𑀦𑀸𑀲𑀦𑀁 𑀯𑀥𑁄, 𑀢𑀁 𑀈𑀭𑀢𑀺 𑀕𑀘𑁆𑀙𑀢𑀻𑀢𑀺 𑀩𑀥𑀻𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀲𑀼𑀡𑀸𑀢𑀺, 𑀅𑀬𑀁 𑀩𑀥𑀻𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀦𑀝𑁆𑀞𑀧𑀲𑀸𑀤𑀢𑀁 𑀤𑀲𑁆𑀲𑁂𑀢𑀺. 𑀉𑀪𑀬𑀤𑁄𑀲𑀯𑀲𑁂𑀦𑀸𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁 𑀅𑀦𑁆𑀥𑀫𑀽𑀕𑀩𑀥𑀺𑀭𑀧𑀩𑁆𑀩𑀸𑀚𑀦𑁂 𑀢𑀺𑀤𑁄𑀲𑀯𑀲𑁂𑀦𑀧𑀺 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀢𑀺 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀚𑀦𑁂. 𑀑𑀲𑀸𑀭𑀡𑀁 𑀅𑀧𑀢𑁆𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀣𑀺, 𑀢𑀁 𑀧𑀼𑀕𑁆𑀕𑀮𑀁 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑀘𑁂𑀢𑀺 𑀬𑁄𑀚𑀦𑀸. 𑀑𑀲𑀸𑀭𑁂𑀢𑀻𑀢𑀺 𑀲𑀗𑁆𑀖𑁂 𑀧𑀯𑁂𑀲𑁂𑀢𑀺.