𑁫𑁬. 𑀅𑀧𑀢𑁆𑀢𑀓𑀸𑀤𑀺𑀯𑀢𑁆𑀣𑀼𑀓𑀣𑀸

𑁧𑁧𑁮. 𑀬𑁄 𑀧𑀺𑀡𑁆𑀟𑁄 𑀳𑀢𑁆𑀣𑁂𑀲𑀼 𑀮𑀩𑁆𑀪𑀢𑀻𑀢𑀺 𑀬𑁄𑀚𑀦𑀸. 𑀢𑀤𑀢𑁆𑀣𑀸𑀬𑀸𑀢𑀺 𑀢𑀲𑁆𑀲 𑀧𑀺𑀡𑁆𑀟𑀲𑁆𑀲 𑀅𑀢𑁆𑀣𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀸𑀢𑀺 𑀏𑀢𑁆𑀣 𑀲𑁂𑀬𑁆𑀬𑀣𑀸𑀧𑀺𑀲𑀤𑁆𑀤𑁄 𑀉𑀧𑀫𑀢𑁆𑀣𑁄, 𑀢𑀺𑀢𑁆𑀣𑀺𑀬𑀲𑀤𑁆𑀤𑁄 𑀆𑀚𑀻𑀯𑀓𑀦𑀸𑀫𑀓𑁂 𑀢𑀺𑀢𑁆𑀣𑀺𑀬𑁂 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀧𑀺 𑀆𑀚𑀻𑀯𑀓𑀦𑀸𑀫𑀓𑀸 𑀢𑀺𑀢𑁆𑀣𑀺𑀬𑀸’’𑀢𑀺. 𑀢𑀲𑁆𑀫𑀸 𑀆𑀚𑀻𑀯𑀓𑀲𑀗𑁆𑀔𑀸𑀢𑁂 𑀢𑀺𑀢𑁆𑀣𑀺𑀬𑁂 𑀉𑀧𑀫𑀁 𑀓𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀆𑀳 ‘‘𑀲𑀽𑀧𑀩𑁆𑀬𑀜𑁆𑀚𑀦𑁂𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑁂𑀢𑀺 𑀆𑀚𑀻𑀯𑀓𑀸. 𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀻𑀢𑀺 𑀧𑀢𑁆𑀢𑀘𑀻𑀯𑀭𑁂𑀲𑀼 𑀅𑀲𑀦𑁆𑀢𑁂𑀲𑀼𑀧𑀺 𑀓𑀫𑁆𑀫𑀯𑀸𑀘𑀸𑀬 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀧𑀭𑀺𑀓𑀺𑀢𑁆𑀢𑀺𑀢𑀢𑁆𑀢𑀸 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀸𑀘𑀺𑀢𑀓𑁂𑀦𑀸𑀢𑀺 𑀏𑀢𑁆𑀣 𑀬𑀸𑀘𑀺𑀢𑁄 𑀳𑀼𑀢𑁆𑀯𑀸 𑀕𑀳𑀺𑀢𑁄 𑀬𑀸𑀘𑀺𑀢𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸𑀘𑀺𑀢𑁆𑀯𑀸 𑀕𑀳𑀺𑀢𑁂𑀦𑀸’’𑀢𑀺. ‘‘𑀈𑀤𑀺𑀲𑁂𑀦 𑀳𑀻’’𑀢𑀺𑀆𑀤𑀺𑀦𑀸 𑀤𑁄𑀲𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀸. 𑀢𑀲𑁆𑀲𑀸𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲. 𑀦𑀺𑀭𑀧𑁂𑀓𑁆𑀔𑁂𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀳𑀻𑀢𑀺 𑀬𑁄𑀚𑀦𑀸. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀩𑁆𑀭𑀳𑁆𑀫𑀤𑁂𑀬𑁆𑀬𑁂𑀦 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑀸𑀦𑀁 𑀧𑀢𑁆𑀢𑀘𑀻𑀯𑀭𑀸𑀦𑀁 𑀅𑀧𑀢𑁆𑀢𑀘𑀻𑀯𑀭𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺. 𑀧𑀡𑁆𑀟𑀼𑀧𑀮𑀸𑀲𑀦𑁆𑀢𑀺 𑀲𑀫𑀡𑀼𑀤𑁆𑀤𑁂𑀲𑀪𑀸𑀯𑀸𑀧𑁂𑀓𑁆𑀔𑀁. 𑀲𑁄 𑀳𑀺 𑀭𑀽𑀴𑁆𑀳𑀺𑀯𑀲𑁂𑀦 𑀧𑀡𑁆𑀟𑀼𑀧𑀮𑀸𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀬𑀣𑀸 𑀧𑀡𑁆𑀟𑀼𑀧𑀮𑀸𑀲𑁄 𑀦 𑀳𑀭𑀺𑀢𑁄, 𑀦𑀸𑀧𑀺 𑀲𑀼𑀓𑁆𑀔𑁄 𑀳𑁄𑀢𑀺, 𑀏𑀯𑀁 𑀲𑁄𑀧𑀺 𑀧𑀩𑁆𑀩𑀚𑀸𑀧𑁂𑀓𑁆𑀔𑁄 𑀦 𑀕𑀺𑀳𑀻 𑀳𑁄𑀢𑀺, 𑀦𑀸𑀧𑀺 𑀲𑀸𑀫𑀡𑁂𑀭𑁄, 𑀢𑀲𑁆𑀫𑀸 𑀲𑀫𑀡𑀼𑀤𑁆𑀤𑁂𑀲𑀪𑀸𑀯𑀸𑀧𑁂𑀓𑁆𑀔𑁄 ‘‘𑀧𑀡𑁆𑀟𑀼𑀧𑀮𑀸𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑀯𑀲𑀦𑁆𑀢𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀸𑀫𑀝𑁆𑀞𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀅𑀦𑀸𑀫𑀲𑀺𑀢𑀩𑁆𑀩𑀕𑁆𑀕𑀁 𑀧𑀺𑀡𑁆𑀟𑀧𑀸𑀢𑀁. 𑀲𑀸𑀫𑀡𑁂𑀭𑀪𑀸𑀕𑀲𑀫𑀓𑁄𑀢𑀺 𑀲𑀸𑀫𑀡𑁂𑀭𑁂𑀳𑀺 𑀮𑀤𑁆𑀥𑁂𑀦 𑀪𑀸𑀕𑁂𑀦 𑀲𑀫𑀁 𑀧𑀯𑀢𑁆𑀢𑁄. 𑀅𑀲𑁆𑀲𑀸𑀢𑀺 𑀧𑀡𑁆𑀟𑀼𑀧𑀮𑀸𑀲𑀲𑁆𑀲. 𑀲𑀸𑀫𑀡𑁂𑀭𑀲𑁆𑀲 𑀲𑀩𑁆𑀩𑀁 𑀧𑀝𑀺𑀚𑀕𑁆𑀕𑀦𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀯𑀺𑀬, 𑀅𑀲𑁆𑀲 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.