𑁫𑁦. 𑀫𑀸𑀢𑀼𑀖𑀸𑀢𑀓𑀸𑀤𑀺𑀯𑀢𑁆𑀣𑀼𑀓𑀣𑀸

𑁧𑁧𑁨. 𑀦𑀺𑀓𑁆𑀔𑀦𑁆𑀢𑀺𑀦𑁆𑀢𑀺 𑀏𑀢𑁆𑀣 ‘‘𑀇𑀫𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲𑀸’’𑀢𑀺 𑀙𑀝𑁆𑀞𑀻𑀬𑁄𑀕𑀢𑁆𑀢𑀸 𑀪𑀸𑀯𑀢𑁆𑀣𑁂 𑀢𑀺𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀦𑀺𑀓𑁆𑀔𑀫𑀦’’𑀦𑁆𑀢𑀺. 𑀅𑀧𑀯𑀸𑀳𑀦𑀦𑁆𑀢𑀺 𑀅𑀧𑀸𑀬𑀧𑀝𑀺𑀲𑀦𑁆𑀥𑀺𑀯𑀳𑀦𑀢𑁄 𑀅𑀧𑀕𑀫𑀦𑀁. 𑀬𑁂𑀦𑀸𑀢𑀺 𑀫𑀦𑀼𑀲𑁆𑀲𑀪𑀽𑀢𑁂𑀦 𑀬𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀻 𑀳𑀼𑀢𑁆𑀯𑀸 𑀪𑀽𑀢𑀸, 𑀫𑀦𑀼𑀲𑁆𑀲𑀺𑀢𑁆𑀣𑀻𑀪𑀸𑀯𑀁 𑀯𑀸 𑀪𑀽𑀢𑀸 𑀧𑀢𑁆𑀢𑀸. 𑀇𑀫𑀺𑀦𑀸 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀆𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. ‘‘𑀚𑀦𑀺𑀓𑀸’’𑀢𑀺 𑀇𑀫𑀺𑀦𑀸 𑀧𑁄𑀲𑀸𑀯𑀦𑀺𑀓𑀫𑀸𑀢𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀲𑀬𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀫𑀸𑀢𑀸𑀬𑁂𑀯, 𑀅𑀣 𑀔𑁄 𑀧𑀼𑀢𑁆𑀢𑁂𑀦𑀸𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀢𑀸𑀢𑀺 𑀲𑀦𑁆𑀢𑁂𑀦. 𑀫𑀦𑀼𑀲𑁆𑀲𑀚𑀸𑀢𑀺𑀓𑁂𑀦𑁂𑀯 𑀲𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀏𑀯 𑀳𑀼𑀢𑁆𑀯𑀸 𑀯𑁄𑀭𑁄𑀧𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀦𑀦𑁆𑀢𑀭𑁂 𑀪𑀯𑁂 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀆𑀦𑀦𑁆𑀢𑀭𑀺𑀬𑀁, 𑀫𑀸𑀢𑀼𑀖𑀸𑀢𑀓𑀓𑀫𑁆𑀫𑀁, 𑀢𑁂𑀦 𑀚𑀸𑀢𑀺𑀲𑀸𑀫𑀜𑁆𑀜𑀫𑁆𑀧𑀺 𑀅𑀚𑀦𑀺𑀓𑀁 𑀖𑀸𑀢𑁂𑀦𑁆𑀢𑁄 𑀘 𑀚𑀦𑀺𑀓𑀫𑁆𑀧𑀺 𑀚𑀸𑀢𑀺𑀪𑁂𑀤𑀁 𑀖𑀸𑀢𑁂𑀦𑁆𑀢𑁄 𑀘 𑀦 𑀅𑀦𑀦𑁆𑀢𑀭𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀦 𑀯𑀸𑀭𑀺𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑁄𑀲𑁂𑀢𑀺 𑀯𑀤𑁆𑀥𑁂𑀢𑀻𑀢𑀺 𑀧𑁄𑀲𑀸𑀧𑀦𑀺𑀬𑀸, 𑀲𑀸 𑀏𑀯 𑀧𑁄𑀲𑀸𑀯𑀦𑀺𑀓𑀸 𑀧𑀓𑀸𑀭𑀲𑁆𑀲 𑀯𑀓𑀸𑀭𑀁, 𑀬𑀓𑀸𑀭𑀲𑁆𑀲 𑀘 𑀓𑀓𑀸𑀭𑀁 𑀓𑀢𑁆𑀯𑀸, 𑀧𑁄𑀲𑀸𑀯𑀦𑀺𑀓𑀸 𑀘 𑀲𑀸 𑀫𑀸𑀢𑀸 𑀘𑁂𑀢𑀺 𑀧𑁄𑀲𑀸𑀯𑀦𑀺𑀓𑀫𑀸𑀢𑀸. 𑀅𑀲𑁆𑀲𑀸𑀢𑀺 𑀧𑀼𑀢𑁆𑀢𑀲𑁆𑀲. 𑀇𑀤𑀁 𑀧𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁. 𑀢𑀢𑁆𑀣 𑀧𑀼𑀩𑁆𑀩𑀧𑀤𑁂 𑀪𑀸𑀯𑀲𑀫𑁆𑀩𑀦𑁆𑀥𑁄, 𑀧𑀘𑁆𑀙𑀺𑀫𑀧𑀤𑁂 𑀲𑀸𑀫𑀺𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀣𑀸 𑀏𑀲𑁂𑀯 𑀦𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀘𑁂𑀧𑀻’’𑀢𑀺𑀆𑀤𑀺. 𑀯𑁂𑀲𑀺𑀬𑀸𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀸𑀬 𑀓𑀸𑀬𑀘𑀺 𑀇𑀢𑁆𑀣𑀺𑀬𑀸 𑀧𑀼𑀢𑁆𑀢𑀲𑁆𑀲𑀸𑀧𑀺 𑀕𑀳𑁂𑀢𑀩𑁆𑀩𑀢𑁆𑀢𑀸. ‘‘𑀅𑀬𑀁 𑀫𑁂 𑀧𑀺𑀢𑀸’’𑀢𑀺 𑀅𑀚𑀸𑀦𑀦𑀫𑁂𑀯 𑀳𑀺 𑀧𑀫𑀸𑀡𑀁. 𑀅𑀦𑁂𑀦𑀸𑀢𑀺 𑀇𑀫𑀺𑀦𑀸 𑀧𑀼𑀢𑁆𑀢𑁂𑀦. ‘‘𑀧𑀺𑀢𑀼𑀖𑀸𑀢𑀓𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀫𑀸𑀢𑀼𑀖𑀸𑀢𑀓𑁂𑀧𑀺 ‘‘𑀅𑀬𑀁 𑀫𑁂 𑀫𑀸𑀢𑀸’’𑀢𑀺 𑀅𑀚𑀸𑀦𑀺𑀢𑁆𑀯𑀸 𑀖𑀸𑀢𑁂𑀦𑁆𑀢𑁄𑀧𑀺 𑀫𑀸𑀢𑀼𑀖𑀸𑀢𑀓𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁧𑁪. 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀦𑀼𑀲𑁆𑀲𑀚𑀸𑀢𑀺𑀬𑀁 𑀳𑀻’’𑀢𑀺𑀆𑀤𑀺. 𑀅𑀧𑀩𑁆𑀩𑀚𑀺𑀢𑀦𑁆𑀢𑀺 𑀕𑀺𑀳𑀺𑀪𑀽𑀢𑀁. 𑀧𑀩𑁆𑀩𑀚𑁆𑀚𑀸 𑀘𑀲𑁆𑀲𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀉𑀧𑀲𑀫𑁆𑀧𑀤𑀸𑀧𑀺 𑀯𑀸𑀭𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲𑀸𑀢𑀺 𑀅𑀭𑀳𑀦𑁆𑀢𑀖𑀸𑀢𑀓𑀲𑁆𑀲. 𑀅𑀯𑀲𑁂𑀲𑀦𑁆𑀢𑀺 𑀅𑀭𑀳𑀦𑁆𑀢𑀢𑁄 𑀅𑀯𑀲𑁂𑀲𑀁. 𑀅𑀲𑁆𑀲𑀸𑀢𑀺 𑀅𑀭𑀺𑀬𑀖𑀸𑀢𑀓𑀲𑁆𑀲. 𑀆𑀦𑀦𑁆𑀢𑀭𑀺𑀬𑁄 𑀦 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸 𑀧𑀦𑀲𑁆𑀲 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸𑀢𑀺 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄. 𑀏𑀢𑁆𑀣𑀸𑀢𑀺 𑀫𑀸𑀢𑀼𑀖𑀸𑀢𑀓𑀸𑀤𑀺𑀓𑀫𑁆𑀫𑁂𑀲𑀼. 𑀯𑀥𑀸𑀬𑀸𑀢𑀺 𑀢𑀤𑀢𑁆𑀣𑁂 𑀘𑀢𑀼𑀢𑁆𑀣𑀻𑀢𑀺 𑀆𑀳 ‘‘𑀯𑀥𑀢𑁆𑀣𑀸𑀬𑀸’’𑀢𑀺. ‘‘𑀫𑀸𑀭𑁂𑀢𑀼’’𑀦𑁆𑀢𑀺 𑀇𑀫𑀺𑀦𑀸 ‘‘𑀯𑀥𑀢𑁆𑀣𑀸𑀬𑀸’’𑀢𑀺 𑀏𑀢𑁆𑀣 𑀳𑀦𑀥𑀸𑀢𑀼 𑀳𑀺𑀁𑀲𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀦𑀻𑀬𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀑𑀦𑀻𑀬𑀦𑁆𑀢𑀻𑀢𑀺 𑀏𑀢𑁆𑀣 𑀑𑀢𑁆𑀬𑀽𑀧𑀲𑀕𑁆𑀕𑁄 𑀥𑀸𑀢𑁆𑀯𑀢𑁆𑀣𑀸𑀦𑀼𑀯𑀢𑁆𑀢𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀦 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀢𑁆𑀣𑁄𑀢𑀺 𑀬𑁄𑀚𑀦𑀸. ‘‘𑀲𑀘𑀸 𑀘 𑀇𑀢𑀺 𑀅𑀬𑀁 𑀦𑀺𑀧𑀸𑀢𑁄 𑀯𑀼𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀪𑀬𑀧𑀻𑀴𑀺𑀢𑀢𑁆𑀢𑀸 𑀘 𑀦𑀺𑀭𑀼𑀢𑁆𑀢𑀻𑀲𑀼 𑀅𑀓𑀼𑀲𑀮𑀢𑁆𑀢𑀸 𑀘 𑀤𑀯𑀸𑀪𑀡𑀦𑁂𑀦 𑀭𑀯𑀸𑀪𑀡𑀦𑁂𑀦 𑀅𑀬𑀁 𑀦𑀺𑀧𑀸𑀢𑁄 𑀘𑁄𑀭𑁂𑀳𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀘𑁂 𑀘 𑀇𑀘𑁆𑀘𑁂𑀯 𑀯𑀸 𑀧𑀸𑀞𑁄’’𑀢𑀺 𑀇𑀫𑀺𑀦𑀸 𑀢𑁂𑀳𑀺 𑀢𑀣𑀸 𑀯𑀼𑀢𑁆𑀢𑁂𑀧𑀺 𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀸 𑀧𑁄𑀢𑁆𑀣𑀓𑀸𑀭𑀽𑀴𑁆𑀳𑀓𑀸𑀮𑁂 𑀯𑀸 𑀬𑀣𑀸𑀪𑀽𑀢𑀁 𑀲𑀗𑁆𑀕𑀻𑀢𑀢𑁆𑀢𑀸, 𑀧𑁄𑀢𑁆𑀣𑀓𑀸𑀭𑀽𑀴𑁆𑀳𑀢𑁆𑀢𑀸 𑀘 𑀬𑀣𑀸𑀪𑀽𑀢𑁄 𑀧𑀸𑀞𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀤𑁂𑀲𑀼. 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀲𑁆𑀲𑀸𑀢𑀺 ‘‘𑀲𑀘𑀚𑁆𑀚 𑀫𑀬’’𑀦𑁆𑀢𑀺 𑀧𑀸𑀞𑀲𑁆𑀲. ‘‘𑀲𑀘𑁂 𑀅𑀚𑁆𑀚 𑀫𑀬’’𑀦𑁆𑀢𑀺 𑀇𑀫𑀺𑀦𑀸 𑀏𑀓𑀸𑀭𑀮𑁄𑀧𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀺. ‘‘𑀲𑀘𑁂𑀚𑁆𑀚 𑀫𑀬’’𑀦𑁆𑀢𑀺 𑀅𑀓𑀸𑀭𑀮𑁄𑀧𑀲𑀦𑁆𑀥𑀺𑀦𑀸𑀧𑀺 𑀧𑀸𑀞𑁄 𑀅𑀢𑁆𑀣𑀺.

𑁧𑁧𑁫. 𑀧𑀓𑀢𑀢𑁆𑀢𑀦𑁆𑀢𑀺 𑀧𑀓𑀢𑀺𑀬𑀸 𑀲𑀻𑀮𑀲𑀗𑁆𑀔𑀸𑀢𑁄 𑀅𑀢𑁆𑀢𑀸 𑀲𑀪𑀸𑀯𑁄 𑀏𑀢𑀺𑀲𑁆𑀲𑀸𑀢𑀺 𑀧𑀓𑀢𑀢𑁆𑀢𑀸, 𑀢𑀁. 𑀓𑀸𑀬𑀲𑀁𑀲𑀕𑁆𑀕𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀭𑀸𑀚𑀺𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀻𑀮𑀯𑀺𑀦𑀸𑀲𑀁 𑀧𑀸𑀧𑁂𑀢𑀻’’𑀢𑀺. 𑀅𑀦𑀺𑀘𑁆𑀙𑀫𑀸𑀦𑀁𑀬𑁂𑀯 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀘𑁆𑀙𑀫𑀸𑀦𑀦𑁆𑀢𑀺 𑀑𑀤𑀸𑀢𑀯𑀢𑁆𑀣𑀯𑀲𑀦𑀁 𑀇𑀘𑁆𑀙𑀫𑀸𑀦𑀁. 𑀬𑀲𑁆𑀫𑀸 𑀅𑀪𑀺𑀓𑁆𑀔𑀼𑀦𑀻 𑀳𑁄𑀢𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀻𑀮𑀯𑀺𑀧𑀦𑁆𑀦𑀁 𑀪𑀺𑀓𑁆𑀔𑀼𑀦𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑁄 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺 𑀯𑀺𑀬, 𑀪𑀺𑀦𑁆𑀤𑀢𑀻𑀢𑀺 𑀬𑁄𑀚𑀦𑀸. 𑀉𑀤𑁆𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀢𑁄 𑀯𑀺𑀭𑀳𑀺𑀢𑀁. 𑀉𑀩𑁆𑀩𑀺𑀦𑀬𑀦𑁆𑀢𑀺 𑀯𑀺𑀦𑀬𑀢𑁄 𑀯𑀺𑀭𑀳𑀺𑀢𑀁. 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀦𑁆𑀢𑀺 𑀅𑀧𑀮𑁄𑀓𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁.

𑀬𑁄 𑀤𑁂𑀯𑀤𑀢𑁆𑀢𑁄 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀢𑀺 𑀯𑀺𑀬, 𑀉𑀧𑁆𑀧𑀸𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀤𑀼𑀝𑁆𑀞𑀘𑀺𑀢𑁆𑀢𑁂𑀦𑀸𑀢𑀺 𑀏𑀢𑁆𑀣 𑀦 𑀬𑀁𑀓𑀺𑀜𑁆𑀘𑀺 𑀤𑀼𑀝𑁆𑀞𑀘𑀺𑀢𑁆𑀢𑀁 𑀤𑀼𑀝𑁆𑀞𑀘𑀺𑀢𑁆𑀢𑀁 𑀦𑀸𑀫, 𑀅𑀣 𑀔𑁄 𑀯𑀥𑀓𑀘𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀥𑀓𑀘𑀺𑀢𑁆𑀢𑁂𑀦𑀸’’𑀢𑀺. 𑀲𑀭𑀻𑀭𑁂𑀢𑀺 𑀲𑀭𑀻𑀭𑀩𑁆𑀪𑀦𑁆𑀢𑀭𑁂. 𑀢𑀣𑀸𑀕𑀢𑀲𑁆𑀲 𑀳𑀺 𑀅𑀪𑁂𑀚𑁆𑀚𑀓𑀸𑀬𑀢𑁆𑀢𑀸 𑀧𑀭𑀽𑀧𑀓𑁆𑀓𑀫𑁂𑀦 𑀘𑀫𑁆𑀫𑀘𑁆𑀙𑁂𑀤𑀁 𑀓𑀢𑁆𑀯𑀸 𑀮𑁄𑀳𑀺𑀢𑀲𑁆𑀲 𑀉𑀧𑁆𑀧𑀸𑀤𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑁄 𑀧𑀦 𑀚𑀻𑀯𑀓𑁄 𑀨𑀸𑀲𑀼𑀁 𑀓𑀭𑁄𑀢𑀺 𑀯𑀺𑀬, 𑀨𑀸𑀲𑀼𑀁 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. 𑀮𑁄𑀳𑀺𑀢𑀜𑁆𑀘𑀸𑀢𑀺 𑀧𑀽𑀢𑀺𑀮𑁄𑀳𑀺𑀢𑀜𑁆𑀘.