𑁫𑁪. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀯𑀢𑁆𑀣𑀼𑀓𑀣𑀸

𑁧𑁧𑁬. 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀏𑀢𑁆𑀣 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀦𑀓𑀫𑁆𑀫𑀢𑁄 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀇𑀢𑁆𑀣𑀺…𑀧𑁂… 𑀓𑀫𑁆𑀫𑀢𑁄 𑀘𑀸’’𑀢𑀺 𑀇𑀫𑀺𑀦𑀸 𑀉𑀪𑀬𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀉𑀪𑀢𑁄 𑀓𑀫𑁆𑀫𑀢𑁄 𑀧𑀯𑀢𑁆𑀢𑀦𑁆𑀢𑀺 𑀧𑀸𑀞𑀲𑁂𑀲𑁄 𑀬𑁄𑀚𑁂𑀢𑀩𑁆𑀩𑁄. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀚𑀦𑀲𑁆𑀲. 𑀓𑀭𑁄𑀢𑀺𑀧𑀺 𑀓𑀸𑀭𑁂𑀢𑀺𑀧𑀻𑀢𑀺 𑀏𑀢𑁆𑀣 𑀓𑀭𑀥𑀸𑀢𑀼𑀬𑀸 𑀲𑀼𑀤𑁆𑀥𑀓𑀫𑁆𑀫𑀓𑀸𑀭𑀺𑀢𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀯𑀻𑀢𑀺𑀓𑁆𑀓𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀼𑀤𑁆𑀥𑀓𑀫𑁆𑀫𑀁 𑀤𑀲𑁆𑀲𑁂𑀢𑀺, ‘‘𑀧𑀭’’𑀦𑁆𑀢𑀺 𑀇𑀫𑀺𑀦𑀸 𑀓𑀸𑀭𑀺𑀢𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸. 𑀢𑀲𑁆𑀲 𑀤𑀼𑀯𑀺𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀯𑀺𑀥𑁄’’𑀢𑀺𑀆𑀤𑀺. 𑀢𑀢𑁆𑀣 𑀇𑀢𑁆𑀣𑀺𑀪𑀸𑀯𑁂𑀦 𑀮𑀓𑁆𑀔𑀺𑀢𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄. 𑀏𑀲 𑀦𑀬𑁄 𑀇𑀢𑀭𑀢𑁆𑀣𑀸𑀧𑀺.

𑀢𑀢𑁆𑀣𑀸𑀢𑀺 𑀤𑀼𑀯𑀺𑀥𑁂𑀲𑀼 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁂𑀲𑀼. 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢𑀁. 𑀏𑀲𑁂𑀯 𑀦𑀬𑁄 ‘‘𑀧𑀼𑀭𑀺𑀲𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀧𑀸𑀓𑀝𑀁 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀲𑀪𑀸𑀯𑀢𑁄 𑀧𑀸𑀓𑀝𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀧𑀼𑀦 𑀧𑀝𑀺𑀘𑁆𑀙𑀦𑁆𑀦𑀁 𑀧𑀸𑀓𑀝𑀦𑁆𑀢𑀺 𑀭𑀸𑀕𑀯𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀧𑀸𑀓𑀝𑀁. 𑀧𑀭𑀁 𑀕𑀡𑁆𑀳𑀸𑀧𑁂𑀢𑀻𑀢𑀺 𑀧𑀭𑀫𑁂𑀯 𑀕𑀡𑁆𑀳𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀓𑀸𑀭𑀡𑀁. 𑀏𑀢𑁂𑀲𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀁, 𑀓𑀺𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁂. 𑀯𑀺𑀘𑀸𑀭𑀡𑀓𑁆𑀓𑀫𑁄𑀢𑀺 𑀯𑀻𑀫𑀁𑀲𑀦𑀸𑀦𑀼𑀓𑁆𑀓𑀫𑁄. ‘‘𑀢𑀢𑁆𑀣 𑀯𑀺𑀘𑀸𑀭𑀓𑁆𑀓𑀫𑁄’’𑀢𑀺𑀧𑀺 𑀧𑀸𑀞𑁄. 𑀯𑀺𑀘𑀸𑀭𑀡𑀓𑁆𑀓𑀫𑁄 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬 𑀯𑁂𑀤𑀺𑀢𑀩𑁆𑀩𑁄, 𑀇𑀥 𑀧𑀦 𑀓𑀺𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀇𑀤𑀫𑀺𑀥 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣 𑀇𑀤𑀦𑁆𑀢𑀺 𑀦𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀓𑀸𑀭𑀡𑀁. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀁 𑀯𑀺𑀦𑀬𑀝𑁆𑀞𑀓𑀣𑀸𑀬𑀁.