𑁪𑁯. 𑀢𑀺𑀭𑀘𑁆𑀙𑀸𑀦𑀕𑀢𑀯𑀢𑁆𑀣𑀼

𑁧𑁧𑁧. 𑀤𑁂𑀯𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄𑀧𑀺 𑀲𑁄 𑀦𑀸𑀕𑁄 𑀓𑀲𑁆𑀫𑀸 𑀦𑀸𑀕𑀬𑁄𑀦𑀺𑀬𑀸 𑀅𑀝𑁆𑀝𑀻𑀬𑀢𑀻𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑀼𑀪𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘𑀸𑀧𑀺𑀲𑀤𑁆𑀤𑁄 𑀳𑁂𑀢𑁆𑀣 𑀲𑀫𑁆𑀪𑀸𑀯𑀦𑀸𑀚𑁄𑀢𑀓𑁄, 𑀧𑀦𑀲𑀤𑁆𑀤𑁄 𑀕𑀭𑀳𑀢𑁆𑀣𑀚𑁄𑀢𑀓𑁄. 𑀓𑀼𑀲𑀮𑀯𑀺𑀧𑀸𑀓𑁂𑀦𑀸𑀢𑀺 𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑁂𑀦. 𑀢𑀲𑁆𑀲𑀸𑀢𑀺 𑀦𑀸𑀕𑀲𑁆𑀲. 𑀲𑀚𑀸𑀢𑀺𑀬𑀸𑀢𑀺 𑀲𑀫𑀸𑀦𑀚𑀸𑀢𑀺𑀬𑀸 𑀦𑀸𑀕𑀺𑀬𑀸. 𑀉𑀤𑀓𑀲𑀜𑁆𑀘𑀸𑀭𑀺𑀫𑀡𑁆𑀟𑀽𑀓𑀪𑀓𑁆𑀔𑀦𑁆𑀢𑀺 𑀉𑀤𑀓𑁂 𑀲𑀜𑁆𑀘𑀭𑀡𑀲𑀻𑀮𑀁 𑀫𑀡𑁆𑀟𑀽𑀓𑀲𑀗𑁆𑀔𑀸𑀢𑀁 𑀪𑀓𑁆𑀔𑀁 𑀧𑀸𑀢𑀼𑀪𑀯𑀢𑀻𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀦𑀸𑀕𑁄. 𑀅𑀝𑁆𑀝𑀻𑀬𑀢𑀻𑀢𑀺 𑀅𑀭𑀫𑀡𑀁 𑀧𑀻𑀴𑀺𑀬𑀢𑀺. 𑀳𑀭𑀸𑀬𑀢𑀻𑀢𑀺 𑀏𑀢𑁆𑀣 𑀳𑀭𑁂𑀥𑀸𑀢𑀼 𑀮𑀚𑁆𑀚𑀦𑀢𑁆𑀣𑁄𑀢𑀺 𑀆𑀳 ‘‘𑀮𑀚𑁆𑀚𑀢𑀻’’𑀢𑀺. 𑀏𑀓𑀸𑀭𑀦𑁆𑀢𑁄 𑀥𑀸𑀢𑀼 𑀪𑀽𑀯𑀸𑀤𑀺𑀕𑀡𑀺𑀓𑁄 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀭𑀓𑀸𑀭𑀦𑁆𑀢𑀥𑀸𑀢𑀼). 𑀚𑀺𑀕𑀼𑀘𑁆𑀙𑀢𑀻𑀢𑀺 𑀏𑀢𑁆𑀣 𑀕𑀼𑀧𑀥𑀸𑀢𑀼𑀬𑀸 𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀪𑀸𑀯’’𑀦𑁆𑀢𑀺. ‘‘𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺𑀧𑀤𑀲𑁆𑀲 ‘‘𑀦𑀺𑀓𑁆𑀔𑀦𑁆𑀢𑁂’’𑀢𑀺𑀧𑀤𑁂𑀦 𑀬𑁄𑀚𑀺𑀢𑀩𑁆𑀩𑀢𑁆𑀢𑀸 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺’’𑀦𑁆𑀢𑀺. 𑀅𑀣 𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀸𑀫𑀺𑀬𑁄𑀕𑀢𑁆𑀢𑀸 ‘‘𑀦𑀺𑀓𑁆𑀔𑀦𑁆𑀢𑁂’’𑀢𑀺 𑀏𑀢𑁆𑀣 𑀪𑀸𑀯𑀢𑁆𑀣𑁂 𑀫𑀸𑀦𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀦𑀺𑀓𑁆𑀔𑀫𑀦𑁂’’𑀢𑀺. 𑀇𑀫𑀺𑀦𑀸 𑀦𑀺𑀓𑁆𑀔𑀦𑁆𑀢𑁂𑀢𑀺 𑀏𑀢𑁆𑀣 𑀦 𑀅𑀦𑁆𑀢𑀧𑀘𑁆𑀘𑀬𑁄, 𑀫𑀸𑀦𑀧𑀘𑁆𑀘𑀬𑀲𑁆𑀲𑁂𑀯 𑀅𑀦𑁆𑀢𑀪𑀸𑀯𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀲𑁆𑀲𑀝𑁆𑀞𑁄𑀢𑀺 𑀲𑀢𑀺𑀯𑀺𑀲𑁆𑀲𑀚𑁆𑀚𑀺𑀢𑁄. 𑀢𑀲𑁆𑀫𑀺𑀦𑁆𑀢𑀺 𑀪𑀺𑀓𑁆𑀔𑀼𑀫𑁆𑀳𑀺. 𑀓𑀧𑀺𑀫𑀺𑀤𑁆𑀥𑀯𑀲𑁂𑀦𑁂𑀯𑀸𑀢𑀺 𑀓𑀧𑀺𑀦𑁄 𑀫𑀺𑀤𑁆𑀥𑀯𑀲𑁂𑀦 𑀏𑀯. 𑀅𑀣 𑀯𑀸 𑀓𑀧𑀺𑀫𑀺𑀤𑁆𑀥𑀯𑀲𑁂𑀦 𑀦𑀺𑀤𑁆𑀤𑀸𑀬𑀦𑁆𑀢𑁄 𑀇𑀯 𑀦𑀺𑀤𑁆𑀤𑀸𑀬𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀧𑀝𑀺𑀦𑀺𑀧𑀚𑁆𑀚𑀻𑀢𑀺 𑀧𑀼𑀦 𑀦𑀺𑀧𑀚𑁆𑀚𑀺. 𑀯𑀺𑀲𑁆𑀲𑀭𑀫𑀓𑀸𑀲𑀻𑀢𑀺 𑀏𑀢𑁆𑀣 𑀯𑀺𑀲𑀤𑁆𑀤𑁄 𑀯𑀺𑀭𑀽𑀧𑀢𑁆𑀣𑀚𑁄𑀢𑀓𑁄, 𑀲𑀭𑀲𑀤𑁆𑀤𑁄 𑀲𑀤𑁆𑀤𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀭𑀽𑀧𑀁 𑀫𑀳𑀸𑀲𑀤𑁆𑀤𑀫𑀓𑀸𑀲𑀻’’𑀢𑀺.

‘‘𑀅𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑀼𑀫𑁆𑀳𑁂 𑀔𑁄𑀢𑁆𑀣𑀸𑀢𑀺 𑀏𑀢𑁆𑀣 ‘‘𑀢𑀼𑀫𑁆𑀳𑁂 𑀔𑁄 𑀅𑀢𑁆𑀣𑀸’’𑀢𑀺 𑀧𑀤𑀯𑀺𑀪𑀸𑀕𑀁 𑀓𑀢𑁆𑀯𑀸 𑀑𑀓𑀸𑀭𑀢𑁄 𑀧𑀭𑀲𑁆𑀲 𑀅𑀓𑀸𑀭𑀲𑁆𑀲 𑀮𑁄𑀧𑀁 𑀤𑀲𑁆𑀲𑁂𑀢𑀺. ‘‘𑀅𑀓𑀸𑀭𑀲𑁆𑀲𑀸𑀮𑁄𑀧’’𑀦𑁆𑀢𑀺𑀧𑀺 𑀧𑀸𑀞𑁄. 𑀏𑀯𑀜𑁆𑀳𑀺 𑀲𑀢𑀺 𑀅𑀓𑀸𑀭𑀲𑁆𑀲 𑀅𑀮𑁄𑀧𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀫𑀺𑀦𑀸 ‘‘𑀢𑀼𑀫𑁆𑀳𑁂 𑀔𑁄 𑀅𑀢𑁆𑀣𑀸’’𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀅𑀓𑀸𑀭𑁂 𑀧𑀭𑁂 𑀑𑀓𑀸𑀭𑀲𑁆𑀲 𑀯𑀓𑀸𑀭𑀁 𑀓𑀢𑁆𑀯𑀸 𑀢𑀼𑀫𑁆𑀳𑁂 𑀔𑁆𑀯𑀢𑁆𑀣𑀸’’𑀢𑀺 𑀧𑀸𑀞𑁄 𑀤𑀲𑁆𑀲𑀺𑀢𑁄. 𑀓𑀲𑁆𑀫𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀯𑀺𑀭𑀽𑀴𑁆𑀳𑀺𑀥𑀫𑁆𑀫𑀸𑀢𑀺 𑀆𑀳 ‘‘𑀛𑀸𑀦…𑀧𑁂… 𑀅𑀪𑀩𑁆𑀩𑀢𑁆𑀢𑀸’’𑀢𑀺. ‘‘𑀪𑀯𑀣𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑀸𑀢𑀺 𑀏𑀢𑁆𑀣 𑀅𑀲𑀥𑀸𑀢𑀼 𑀲𑀢𑁆𑀢𑀢𑁆𑀣𑀯𑀸𑀘𑀓𑁄 𑀣𑀯𑀺𑀪𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀚𑀸𑀢𑀺𑀬𑀸𑀢𑀺 𑀏𑀢𑁆𑀣 𑀲𑀫𑀸𑀦𑀸 𑀚𑀸𑀢𑀺 𑀏𑀢𑀺𑀲𑁆𑀲𑀸𑀢𑀺 𑀲𑀚𑀸𑀢𑀻𑀢𑀺 𑀯𑀼𑀢𑁆𑀢𑁂 𑀦𑀸𑀕𑀻 𑀏𑀯𑀸𑀢𑀺 𑀆𑀳 ‘‘𑀦𑀸𑀕𑀺𑀬𑀸 𑀏𑀯𑀸’’𑀢𑀺. 𑀫𑀦𑀼𑀲𑁆𑀲𑀺𑀢𑁆𑀣𑀺𑀆𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀧𑁂𑀢𑀺𑀢𑁆𑀣𑀻𑀤𑁂𑀯𑀺𑀢𑁆𑀣𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂 𑀧𑀘𑁆𑀘𑀬𑀸’’𑀢𑀺 𑀤𑁂𑀲𑀦𑀸 𑀲𑀸𑀯𑀲𑁂𑀲𑀤𑁂𑀲𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺. 𑀏𑀢𑁆𑀣𑀸𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀯𑀢𑁆𑀣𑀼𑀫𑁆𑀳𑀺. 𑀅𑀪𑀺𑀡𑁆𑀳𑀦𑁆𑀢𑀺 𑀅𑀪𑀺𑀓𑁆𑀔𑀡𑀁 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀅𑀢𑁆𑀣𑁄.

𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀏𑀢𑁆𑀣 𑀓𑀺𑀁 𑀅𑀧𑀸𑀬𑀧𑀭𑀺𑀬𑀸𑀧𑀦𑁆𑀦𑁄 𑀤𑀼𑀕𑁆𑀕𑀢𑀺𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑁄𑀯𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀦𑀸𑀕𑁄 𑀯𑀸 𑀳𑁄𑀢𑀽’’𑀢𑀺𑀆𑀤𑀺.