𑁪𑁮. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀓𑀣𑀸

𑁧𑁧𑁦. 𑀧𑀓𑁆𑀓𑀫𑀢𑀻𑀢𑀺 𑀧𑀓𑁆𑀓𑀦𑁆𑀢𑁄, ‘‘𑀧𑀯𑀺𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀓𑀫𑀼𑀥𑀸𑀢𑀼𑀬𑀸 𑀧𑀤𑀯𑀺𑀓𑁆𑀔𑁂𑀧𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀇𑀘𑁆𑀙𑀸𑀓𑀦𑁆𑀢𑀺𑀅𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀲𑁄𑀢𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄. 𑀢𑀢𑁆𑀭𑀸𑀢𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁂. 𑀉𑀧𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀢𑀺𑀢𑁆𑀣𑀺𑀬𑀸𑀦𑀁. ‘‘𑀢𑀺𑀢𑁆𑀣𑀺𑀬𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀩𑁆𑀩𑁂𑀯 𑀮𑀤𑁆𑀥𑀺𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀮𑀺𑀗𑁆𑀕𑁂 𑀆𑀤𑀺𑀦𑁆𑀦𑀫𑀢𑁆𑀢𑁂’’𑀢𑀺. 𑀓𑀼𑀲𑀘𑀻𑀭𑀸𑀤𑀻𑀦𑀻𑀢𑀺 𑀏𑀢𑁆𑀣 𑀓𑀼𑀲𑁄 𑀯𑀼𑀘𑁆𑀘𑀢𑀺 𑀲𑀮𑀸𑀓𑀸. 𑀘𑀻𑀭𑁄𑀢𑀺 𑀧𑀦𑁆𑀢𑀺, 𑀆𑀯𑀮𑀻𑀢𑀺 𑀅𑀢𑁆𑀣𑁄. 𑀓𑀼𑀲𑁂 𑀭𑀚𑁆𑀚𑀼𑀦𑀸 𑀆𑀯𑀼𑀦𑀺𑀢𑁆𑀯𑀸 𑀓𑀢𑁄 𑀘𑀻𑀭𑁄 𑀓𑀼𑀲𑀘𑀻𑀭𑁄, 𑀲𑁄 𑀆𑀤𑀺 𑀬𑁂𑀲𑀁 𑀢𑀸𑀦𑀻𑀢𑀺 𑀓𑀼𑀲𑀘𑀻𑀭𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀨𑀮𑀓𑀘𑀻𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀼𑀲𑀢𑀺𑀡𑁂𑀳𑀺 𑀓𑀢𑁄 𑀘𑀻𑀭𑁄 𑀓𑀼𑀲𑀘𑀻𑀭𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀦𑀕𑁆𑀕𑁄𑀢𑀺 𑀅𑀘𑁂𑀮𑀓𑁄. 𑀆𑀚𑀻𑀯𑀓𑁄𑀢𑀺 𑀅𑀘𑁂𑀮𑀓𑀯𑀢𑀫𑀸𑀤𑀸𑀬 𑀚𑀻𑀯𑀢𑀻𑀢𑀺 𑀆𑀚𑀻𑀯𑀓𑁄. 𑀢𑁂𑀲𑀦𑁆𑀢𑀺 𑀆𑀚𑀻𑀯𑀓𑀸𑀦𑀁. 𑀑𑀯𑀤𑀺𑀢𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀺𑀦𑁆𑀢𑀺 𑀓𑀺𑀁 𑀯𑀢𑀁. 𑀮𑀼𑀜𑁆𑀘𑀸𑀧𑁂𑀢𑀻𑀢𑀺 𑀅𑀧𑀦𑀬𑀸𑀧𑁂𑀢𑀺. 𑀫𑁄𑀭𑀧𑀺𑀜𑁆𑀙𑀸𑀤𑀻𑀦𑀻𑀢𑀺 𑀏𑀢𑁆𑀣 𑀧𑀺𑀜𑁆𑀙𑀁 𑀯𑀼𑀘𑁆𑀘𑀢𑀺 𑀧𑀓𑁆𑀔𑁄. 𑀲𑁄 𑀳𑀺 𑀧𑀺𑀜𑁆𑀙𑀢𑀺 𑀆𑀓𑀸𑀲𑁂 𑀕𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀧𑀺𑀜𑁆𑀙𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀺𑀙𑀺 𑀕𑀢𑀺𑀬𑀦𑁆𑀢𑀺 𑀥𑀸𑀢𑀼𑀧𑀸𑀞𑁄. 𑀫𑁄𑀭𑀲𑁆𑀲 𑀧𑀺𑀜𑁆𑀙𑀁 𑀫𑁄𑀭𑀧𑀺𑀜𑁆𑀙𑀁, 𑀢𑀁 𑀆𑀤𑀺 𑀬𑁂𑀲𑀁 𑀢𑀸𑀦𑀻𑀢𑀺 𑀫𑁄𑀭𑀧𑀺𑀜𑁆𑀙𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀉𑀮𑀽𑀓𑀧𑀺𑀜𑁆𑀙𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀸𑀯 𑀦 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀬𑀸𑀯 𑀮𑀤𑁆𑀥𑀺𑀁 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀦𑀦𑁆𑀢𑀺 𑀯𑀻𑀫𑀁𑀲𑀫𑀸𑀦𑀁 𑀪𑀺𑀓𑁆𑀔𑀼𑀁. 𑀮𑀤𑁆𑀥𑀻𑀢𑀺 𑀢𑀺𑀢𑁆𑀣𑀺𑀬𑀮𑀤𑁆𑀥𑀺. 𑀭𑀓𑁆𑀔𑀢𑀻𑀢𑀺 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀢𑁄 𑀭𑀓𑁆𑀔𑀢𑀺. 𑀮𑀤𑁆𑀥𑀺𑀬𑀸 𑀅𑀪𑀸𑀯𑁂𑀦 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁆𑀙𑀺𑀤𑁆𑀤𑀘𑀻𑀯𑀭𑁄𑀢𑀺 𑀏𑀢𑁆𑀣 𑀆𑀓𑀸𑀭𑁄 𑀓𑁄𑀥𑀢𑁆𑀣𑁄, 𑀅𑀟𑁆𑀟𑀢𑁆𑀣𑁄 𑀯𑀸 𑀳𑁄𑀢𑀺, 𑀙𑀺𑀤𑁆𑀤𑀲𑀤𑁆𑀤𑁄 𑀤𑀽𑀲𑀦𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀫𑀸 𑀆𑀓𑁄𑀥𑁂𑀦 𑀅𑀟𑁆𑀟𑁂𑀦 𑀯𑀸 𑀙𑀺𑀤𑁆𑀤𑁄 𑀤𑀽𑀲𑀺𑀢𑁄𑀢𑀺 𑀅𑀘𑁆𑀙𑀺𑀤𑁆𑀤𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀅𑀘𑁆𑀙𑀺𑀦𑁆𑀦𑁄’’𑀢𑀺𑀧𑀺 𑀧𑀸𑀞𑁄. 𑀅𑀘𑁆𑀙𑀺𑀤𑁆𑀤𑀁 𑀘𑀻𑀯𑀭𑀫𑁂𑀢𑀲𑁆𑀲𑀸𑀢𑀺 𑀅𑀘𑁆𑀙𑀺𑀤𑁆𑀤𑀘𑀻𑀯𑀭𑁄. 𑀢𑀺𑀢𑁆𑀣𑀸𑀬𑀢𑀦𑀦𑁆𑀢𑀺 𑀢𑀺𑀢𑁆𑀣𑀻𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀉𑀧𑀲𑁆𑀲𑀬𑀦𑁆𑀢𑀺 𑀅𑀢𑁆𑀣𑁄.