𑁪𑁮. 𑀣𑁂𑀬𑁆𑀬𑀲𑀁𑀯𑀸𑀲𑀓𑀯𑀢𑁆𑀣𑀼𑀓𑀣𑀸

𑁧𑁧𑁦. 𑀧𑀸𑀭𑀺𑀚𑀜𑁆𑀜𑀧𑀢𑁆𑀢𑀲𑁆𑀲𑀸𑀢𑀺 𑀧𑀭𑀺𑀳𑀸𑀬𑀢𑀻𑀢𑀺 𑀧𑀭𑀺𑀚𑀸𑀦𑀺, 𑀇𑀲𑁆𑀲𑀭𑀺𑀬𑀪𑁄𑀕𑀸𑀤𑀺, 𑀢𑀲𑁆𑀲 𑀪𑀸𑀯𑁄 𑀧𑀸𑀭𑀺𑀚𑀜𑁆𑀜𑀁, 𑀇𑀲𑁆𑀲𑀭𑀺𑀬𑀪𑁄𑀕𑀸𑀤𑀺𑀓𑁆𑀔𑀬𑁄, 𑀢𑀁 𑀧𑀢𑁆𑀢𑁄𑀢𑀺 𑀧𑀸𑀭𑀺𑀚𑀜𑁆𑀜𑀧𑀢𑁆𑀢𑁄, 𑀢𑀲𑁆𑀲. ‘‘𑀧𑀸𑀭𑀺𑀚𑀼𑀜𑁆𑀜𑀧𑀢𑁆𑀢𑀲𑁆𑀲𑀸’’𑀢𑀺𑀧𑀺 𑀉𑀓𑀸𑀭𑁂𑀦 𑀲𑀳 𑀧𑀸𑀞𑁄 𑀅𑀢𑁆𑀣𑀺. 𑀔𑀻𑀡𑀓𑁄𑀮𑀜𑁆𑀜𑁄𑀢𑀺 𑀏𑀢𑁆𑀣 𑀓𑀼𑀮𑁂 𑀚𑀸𑀢𑀸 𑀓𑁄𑀮𑀜𑁆𑀜𑀸, 𑀡𑁆𑀬𑀧𑀘𑁆𑀘𑀬𑁄, 𑀦𑀓𑀸𑀭𑀸𑀕𑀫𑁄. 𑀔𑀻𑀡𑀸 𑀓𑁄𑀮𑀜𑁆𑀜𑀸 𑀅𑀲𑁆𑀲𑀸𑀢𑀺 𑀔𑀻𑀡𑀓𑁄𑀮𑀜𑁆𑀜𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸𑀢𑀺𑀧𑀓𑁆𑀔𑀧𑀺𑀢𑀺𑀧𑀓𑁆𑀔𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀫𑀸𑀢𑀺𑀧𑀓𑁆𑀔𑀧𑀺𑀢𑀺𑀧𑀓𑁆𑀔𑀢𑁄𑀢𑀺 𑀫𑀸𑀢𑀼𑀬𑀸 𑀧𑀓𑁆𑀔𑁄 𑀫𑀸𑀢𑀺𑀧𑀓𑁆𑀔𑁄, 𑀧𑀺𑀢𑀼𑀦𑁄 𑀧𑀓𑁆𑀔𑁄 𑀧𑀺𑀢𑀺𑀧𑀓𑁆𑀔𑁄, 𑀫𑀸𑀢𑀺𑀧𑀓𑁆𑀔𑁄 𑀘 𑀧𑀺𑀢𑀺𑀧𑀓𑁆𑀔𑁄 𑀘 𑀫𑀸𑀢𑀺𑀧𑀓𑁆𑀔𑀧𑀺𑀢𑀺𑀧𑀓𑁆𑀔𑀸. 𑀨𑀸𑀢𑀺𑀁 𑀓𑀸𑀢𑀼𑀦𑁆𑀢𑀺 𑀏𑀢𑁆𑀣 𑀨𑀸-𑀥𑀸𑀢𑀼 𑀯𑀟𑁆𑀠𑀦𑀢𑁆𑀣𑁄𑀢𑀺 𑀆𑀳 ‘‘𑀯𑀟𑁆𑀠𑁂𑀢𑀼’’𑀦𑁆𑀢𑀺. ‘‘𑀧𑀼𑀘𑁆𑀙𑀺𑀬𑀫𑀸𑀦𑁄’’𑀢𑀺 𑀇𑀫𑀺𑀦𑀸 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄𑀢𑀺 𑀏𑀢𑁆𑀣 𑀅𑀦𑀼𑀢𑁆𑀬𑀽𑀧𑀲𑀕𑁆𑀕𑀯𑀲𑁂𑀦 𑀬𑀼𑀚𑀲𑀤𑁆𑀤𑁄 𑀧𑀼𑀘𑁆𑀙𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺.

𑀣𑁂𑀬𑁆𑀬𑀲𑀁𑀯𑀸𑀲𑀓𑁄𑀢𑀺 𑀣𑁂𑀦𑀦𑀁 𑀣𑁂𑀬𑁆𑀬𑀁 𑀦𑀓𑀸𑀭𑀲𑁆𑀲 𑀬𑀓𑀸𑀭𑀁 𑀓𑀢𑁆𑀯𑀸, 𑀣𑁂𑀬𑁆𑀬𑀸𑀬 𑀲𑀁𑀯𑀸𑀲𑀓𑁄 𑀇𑀫𑀲𑁆𑀲𑀸𑀢𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄. 𑀏𑀢𑁆𑀣 𑀘 𑀦 𑀓𑁂𑀯𑀮𑀁 𑀯𑀲𑁆𑀲𑀕𑀡𑀦𑀸𑀤𑀺𑀓𑁄𑀬𑁂𑀯 𑀲𑀁𑀯𑀸𑀲𑁄 𑀦𑀸𑀫 𑀳𑁄𑀢𑀺, 𑀅𑀣 𑀔𑁄 𑀣𑁂𑀬𑁆𑀬𑀸𑀬 𑀮𑀺𑀗𑁆𑀕𑀕𑀳𑀡𑀫𑁆𑀧𑀺 𑀲𑀁𑀯𑀸𑀲𑁄𑀬𑁂𑀯 𑀦𑀸𑀫. 𑀢𑀲𑁆𑀫𑀸 𑀢𑀲𑁆𑀲 𑀢𑀺𑀯𑀺𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀬𑁄’’𑀢𑀺𑀆𑀤𑀺. 𑀢𑀢𑁆𑀣 𑀮𑀺𑀗𑁆𑀕𑀁 𑀣𑁂𑀦𑁂𑀢𑀻𑀢𑀺 𑀮𑀺𑀗𑁆𑀕𑀣𑁂𑀦𑀓𑁄, 𑀏𑀲𑁂𑀯 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁄𑀢𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄. 𑀮𑀺𑀗𑁆𑀕𑀫𑀢𑁆𑀢𑀲𑁆𑀲𑁂𑀯𑀸𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁂𑀦 𑀲𑀁𑀯𑀸𑀲𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺.

𑀯𑀺𑀤𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀤𑁂𑀲𑀢𑁄 𑀯𑀺𑀬𑁄𑀕𑀁 𑀤𑁂𑀲𑀁. 𑀯𑀺𑀲𑀤𑁆𑀤𑁄 𑀳𑁂𑀢𑁆𑀣 𑀯𑀺𑀬𑁄𑀕𑀢𑁆𑀣𑀯𑀸𑀘𑀓𑁄. 𑀅𑀣 𑀯𑀸 𑀯𑀺 𑀤𑀽𑀭𑀁 𑀤𑁂𑀲𑀁. 𑀯𑀺𑀲𑀤𑁆𑀤𑁄 𑀳𑁂𑀢𑁆𑀣 𑀤𑀽𑀭𑀢𑁆𑀣𑀯𑀸𑀘𑀓𑁄. 𑀫𑀼𑀲𑀸𑀢𑀺 𑀅𑀪𑀽𑀢𑀢𑁆𑀣𑁂 𑀤𑀼𑀢𑀺𑀬𑀦𑁆𑀢𑀦𑀺𑀧𑀸𑀢𑁄, 𑀅𑀪𑀽𑀢𑀁 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀸𑀳𑀢𑀻𑀢𑀺 𑀅𑀜𑁆𑀜𑁂 𑀦𑀺𑀯𑀸𑀭𑁂𑀢𑀺. 𑀲𑀁𑀯𑀸𑀲𑀣𑁂𑀦𑀓𑁄 𑀦𑀸𑀫𑀸𑀢𑀺 𑀏𑀢𑁆𑀣 𑀓𑁄 𑀲𑀁𑀯𑀸𑀲𑁄 𑀦𑀸𑀫, 𑀦𑀦𑀼 𑀏𑀓𑀓𑀫𑁆𑀫𑀸𑀤𑀺𑀓𑁄𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄’’𑀢𑀺𑀆𑀤𑀺. 𑀪𑀺𑀓𑁆𑀔𑀼𑀯𑀲𑁆𑀲𑀕𑀡𑀦𑀸𑀤𑀺𑀓𑁄𑀢𑀺 𑀆𑀤𑀺𑀲𑀤𑁆𑀤𑁂𑀦 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀲𑀸𑀤𑀺𑀬𑀦𑀁 𑀆𑀲𑀦𑀧𑀝𑀺𑀩𑀸𑀳𑀦𑀁 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀻𑀲𑀼 𑀲𑀦𑁆𑀤𑀺𑀲𑁆𑀲𑀦𑀦𑁆𑀢𑀺 𑀇𑀫𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀓𑀺𑀭𑀺𑀬𑀪𑁂𑀤𑁄’’𑀢𑀺 𑀇𑀫𑀺𑀦𑀸 𑀲𑀁 𑀏𑀓𑀢𑁄 𑀯𑀲𑀺𑀬𑀢𑀺 𑀅𑀦𑁂𑀦𑀸𑀢𑀺 𑀲𑀁𑀯𑀸𑀲𑁄𑀢𑀺 𑀯𑀘𑀦𑀢𑁆𑀣𑁂𑀦 𑀓𑀺𑀭𑀺𑀬𑀪𑁂𑀤𑁄 𑀲𑀁𑀯𑀸𑀲𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀫𑁆𑀳𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀸𑀭𑀸𑀚𑀺𑀓𑀸𑀤𑀺𑀝𑁆𑀞𑀸𑀦𑁂 𑀧𑀦 𑀏𑀓𑀓𑀫𑁆𑀫𑀸𑀤𑀺𑀓𑁄 𑀲𑀁𑀯𑀸𑀲𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀮𑀺𑀗𑁆𑀕𑀲𑁆𑀲 𑀘𑁂𑀯 𑀲𑀁𑀯𑀸𑀲𑀲𑁆𑀲 𑀘𑀸’’𑀢𑀺 𑀇𑀫𑀺𑀦𑀸 𑀉𑀪𑀬𑀣𑁂𑀦𑀓𑁄𑀢𑀺 𑀏𑀢𑁆𑀣 𑀉𑀪𑀬𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣𑀸𑀢𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑀝𑁆𑀞𑀸𑀦𑁂. 𑀭𑀸𑀚…𑀧𑁂… 𑀪𑀬𑁂𑀳𑀺 𑀯𑀸𑀢𑀺 𑀏𑀢𑁆𑀣 𑀪𑀬𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀭𑀸𑀚𑀪𑀬𑁂𑀦 𑀘 𑀤𑀼𑀩𑁆𑀪𑀺𑀓𑁆𑀔𑀪𑀬𑁂𑀦 𑀘 𑀓𑀦𑁆𑀢𑀸𑀭𑀪𑀬𑁂𑀦 𑀘 𑀭𑁄𑀕𑀪𑀬𑁂𑀦 𑀘 𑀯𑁂𑀭𑀺𑀪𑀬𑁂𑀦 𑀘𑀸𑀢𑀺 𑀳𑀺 𑀅𑀢𑁆𑀣𑁄. 𑀘𑀻𑀯𑀭𑀕𑀳𑀡𑀢𑁆𑀣𑀦𑁆𑀢𑀺 𑀘𑀻𑀯𑀭𑀸𑀳𑀭𑀡𑀢𑁆𑀣𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀯𑀸𑀲𑀤𑁆𑀤𑁄 𑀳𑁂𑀢𑁆𑀯𑀢𑁆𑀣𑀁 𑀯𑀸 𑀲𑀫𑁆𑀧𑀤𑀸𑀦𑀢𑁆𑀣𑀁 𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀬𑀁 𑀕𑀸𑀣𑀸 𑀯𑀺𑀪𑀢𑁆𑀢𑀺𑀬𑀸 𑀉𑀧𑁆𑀧𑀝𑀺𑀧𑀸𑀝𑀺𑀢𑁆𑀢𑀸 𑀪𑀕𑁆𑀕𑀭𑀻𑀢𑀺𑀲𑀗𑁆𑀔𑀸𑀢𑀸 𑀅𑀮𑀗𑁆𑀓𑀸𑀭𑀤𑁄𑀲𑀸 𑀦 𑀫𑀼𑀢𑁆𑀢𑀸. 𑀮𑀺𑀗𑁆𑀕𑀦𑁆𑀢𑀺 𑀲𑀫𑀡𑀮𑀺𑀗𑁆𑀕𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂.

𑀦𑀸𑀥𑀺𑀯𑀸𑀲𑁂𑀢𑀻𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀬𑀸𑀯𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁, 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀇𑀥 𑀬𑁄 𑀭𑀸𑀚…𑀧𑁂… 𑀪𑀬𑁂𑀦 𑀯𑀸 𑀘𑀻𑀯𑀭𑀕𑀳𑀡𑀢𑁆𑀣𑀁 𑀯𑀸 𑀮𑀺𑀗𑁆𑀕𑀁 𑀆𑀤𑀺𑀬𑀢𑀺, 𑀲𑁄 𑀲𑀼𑀤𑁆𑀥𑀫𑀸𑀦𑀲𑁄 𑀳𑀼𑀢𑁆𑀯𑀸 𑀬𑀸𑀯 𑀲𑀁𑀯𑀸𑀲𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀸𑀯 𑀏𑀲𑁄 ‘‘𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀫𑀸’’𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺.

𑀢𑀢𑁆𑀭𑀸𑀢𑀺 𑀢𑀸𑀲𑀼 𑀕𑀸𑀣𑀸𑀲𑀼. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀏𑀯𑀦𑁆𑀢𑀺 𑀮𑀺𑀗𑁆𑀕𑁂 𑀕𑀳𑀺𑀬𑀫𑀸𑀦𑁂. 𑀢𑀲𑁆𑀫𑀺𑀦𑁆𑀢𑀺 𑀚𑀦𑁂. 𑀅𑀦𑁄𑀲𑀭𑀺𑀢𑁆𑀯𑀸𑀯𑀸𑀢𑀺 𑀅𑀦𑁄𑀓𑁆𑀓𑀫𑀺𑀢𑁆𑀯𑀸𑀯. 𑀮𑀺𑀗𑁆𑀕𑀁 𑀅𑀧𑀦𑁂𑀢𑁆𑀯𑀸𑀢𑀺 𑀲𑀬𑀁 𑀕𑀳𑀺𑀢𑀁 𑀲𑀫𑀡𑀮𑀺𑀗𑁆𑀕𑀁 𑀯𑀺𑀦𑀸𑀲𑁂𑀢𑁆𑀯𑀸. 𑀧𑀩𑁆𑀩𑀚𑀺𑀢𑀸𑀮𑀬𑀦𑁆𑀢𑀺 𑀧𑀩𑁆𑀩𑀚𑀺𑀢𑀙𑀸𑀬𑀁. 𑀧𑀼𑀩𑁆𑀩𑁂𑀢𑀺 𑀲𑀁𑀯𑀸𑀲𑀣𑁂𑀦𑀓𑁂.

𑀲𑀩𑁆𑀩𑀧𑀸𑀲𑀡𑁆𑀟𑀺𑀬𑀪𑀢𑁆𑀢𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀧𑀸𑀲𑀡𑁆𑀟𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀸𑀦𑀺 𑀪𑀢𑁆𑀢𑀸𑀦𑀺.

𑀲𑀢𑁆𑀢𑁂 𑀯𑀳𑀢𑀻𑀢𑀺 𑀲𑀢𑁆𑀢𑀯𑀸𑀳𑁄. 𑀯𑀺𑀭𑀫𑀺𑀢𑀩𑁆𑀩𑀦𑁆𑀢𑀺 𑀯𑁂𑀭𑀁, 𑀢𑀁 𑀧𑀯𑀢𑁆𑀢𑁂𑀢𑀻𑀢𑀺 𑀯𑁂𑀭𑀺𑀓𑁄. 𑀓𑀸𑀬𑁂𑀦 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀻𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀬𑀸𑀦𑀺. 𑀢𑀦𑁆𑀢𑀺 𑀢𑀼𑀯𑀁. 𑀳𑀻𑀦𑀸𑀬𑀸𑀯𑀢𑁆𑀢𑀪𑀸𑀯𑀦𑁆𑀢𑀺 𑀳𑀻𑀦𑀸𑀬 𑀕𑀺𑀳𑀺𑀪𑀸𑀯𑀸𑀬 𑀆𑀯𑀢𑁆𑀢𑀪𑀸𑀯𑀁.

𑀉𑀧𑁆𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀧𑀩𑁆𑀩𑀚𑀯𑀺𑀬𑁄𑀕𑀁 𑀓𑀢𑁆𑀯𑀸. 𑀢𑀫𑀢𑁆𑀣𑀦𑁆𑀢𑀺 𑀉𑀧𑁆𑀧𑀩𑁆𑀩𑀚𑀺𑀢𑀲𑀗𑁆𑀔𑀸𑀢𑀫𑀢𑁆𑀣𑀁. 𑀅𑀲𑁆𑀲𑀸𑀢𑀺 𑀫𑀳𑀸𑀲𑀸𑀫𑀡𑁂𑀭𑀲𑁆𑀲.

𑀫𑀳𑀦𑁆𑀢𑁄 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀧𑀕𑁂𑀯 𑀤𑀳𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀩𑁆𑀬𑀢𑁆𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁄𑀢𑀺 𑀲𑀸𑀫𑀡𑁂𑀭𑁄.

𑀯𑀘𑁆𑀙𑀕𑁄𑀭𑀓𑁆𑀔𑀸𑀤𑀻𑀦𑀻𑀢𑀺 𑀏𑀢𑁆𑀣 𑀯𑀘𑁆𑀙𑁄𑀢𑀺 𑀢𑀭𑀼𑀡𑀕𑁄𑀡𑁄. 𑀲𑁄 𑀳𑀺 𑀫𑀸𑀢𑀼𑀲𑀦𑁆𑀢𑀺𑀓𑁂 𑀯𑀲𑀢𑀻𑀢𑀺 𑀯𑀘𑁆𑀙𑁄. 𑀫𑀸𑀢𑀼𑀬𑀸 𑀯𑀺𑀬𑁄𑀕𑀓𑀸𑀮𑁂 𑀯𑀸 𑀯𑀲𑁆𑀲𑀢𑀻𑀢𑀺 𑀯𑀘𑁆𑀙𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀤𑀫𑁆𑀫𑀕𑀯𑀚𑀭𑀕𑁆𑀕𑀯𑀸𑀧𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀸. 𑀕𑁄 𑀯𑀼𑀘𑁆𑀘𑀢𑀺 𑀔𑁂𑀢𑁆𑀢𑀪𑀽𑀫𑀺. 𑀯𑀘𑁆𑀙𑁄 𑀘 𑀕𑁄 𑀘 𑀯𑀘𑁆𑀙𑀕𑀯𑀸, 𑀢𑁂𑀲𑀁 𑀭𑀓𑁆𑀔𑀦𑀁 𑀯𑀘𑁆𑀙𑀕𑁄𑀭𑀓𑁆𑀔𑁄, 𑀲𑁄 𑀆𑀤𑀺 𑀬𑁂𑀲𑀁 𑀓𑀲𑀺𑀓𑀫𑁆𑀫𑀸𑀤𑀻𑀦𑀦𑁆𑀢𑀺 𑀯𑀘𑁆𑀙𑀕𑁄𑀭𑀓𑁆𑀔𑀸𑀤𑀻𑀦𑀺. ‘‘𑀲𑀽𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀇𑀫𑀺𑀦𑀸 𑀕𑀳𑀝𑁆𑀞𑀫𑁆𑀧𑀺 𑀲𑀘𑁂 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂𑀬𑁂𑀯𑀸𑀢𑀺 𑀲𑀸𑀫𑀡𑁂𑀭𑀓𑀸𑀮𑁂𑀬𑁂𑀯. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂𑀢𑀺 𑀯𑀺𑀦𑀬𑁂 𑀯𑀼𑀢𑁆𑀢𑀲𑁆𑀲 𑀣𑁂𑀬𑁆𑀬𑀲𑀁𑀯𑀸𑀲𑀓𑀲𑁆𑀲 𑀯𑀺𑀦𑀺𑀘𑁆𑀙𑀬𑁂. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺 𑀮𑀺𑀗𑁆𑀕𑀲𑁆𑀲 𑀅𑀧𑀦𑀻𑀢𑀢𑁆𑀢𑀸.

𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺 𑀲𑀮𑀺𑀗𑁆𑀕𑁂 𑀞𑀺𑀢𑀢𑁆𑀢𑀸. 𑀅𑀬𑀫𑁆𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺 𑀓𑀸𑀲𑀸𑀬𑁂 𑀲𑀉𑀲𑁆𑀲𑀸𑀳𑀢𑁆𑀢𑀸. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺 𑀓𑀸𑀲𑀸𑀬𑁂 𑀥𑀼𑀭𑀲𑁆𑀲 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸.

𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺 𑀲𑀮𑀺𑀗𑁆𑀕𑁂 𑀞𑀺𑀢𑀢𑁆𑀢𑀸. 𑀦𑁂𑀯 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺 𑀓𑀸𑀲𑀸𑀬𑁂 𑀲𑀉𑀲𑁆𑀲𑀸𑀳𑀢𑁆𑀢𑀸. 𑀫𑁂𑀣𑀼𑀦𑀲𑁂𑀯𑀦𑀸𑀤𑀻𑀳𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺 𑀓𑀸𑀲𑀸𑀬𑁂 𑀥𑀼𑀭𑀲𑁆𑀲 𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀑𑀯𑀝𑁆𑀝𑀺𑀓𑀦𑁆𑀢𑀺 𑀅𑀥𑁄𑀯𑀝𑁆𑀝𑁂𑀦 𑀓𑀭𑀡𑀁. 𑀭𑀓𑁆𑀔𑀢𑀺 𑀢𑀸𑀯𑀸𑀢𑀺 𑀢𑀸𑀯 𑀭𑀓𑁆𑀔𑀢𑀺 𑀯𑀻𑀫𑀁𑀲𑀦𑁂𑀦 𑀦𑀺𑀯𑀸𑀲𑀺𑀢𑀢𑁆𑀢𑀸. 𑀮𑀺𑀗𑁆𑀕𑀦𑁆𑀢𑀺 𑀲𑀫𑀡𑀮𑀺𑀗𑁆𑀕𑀁. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀳𑁄𑀢𑀺 𑀕𑀺𑀳𑀺𑀮𑀺𑀗𑁆𑀕𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸.

𑀯𑀻𑀫𑀁𑀲𑀢𑀺 𑀯𑀸 𑀲𑀫𑁆𑀧𑀝𑀺𑀘𑁆𑀙𑀢𑀺 𑀯𑀸 𑀭𑀓𑁆𑀔𑀢𑀺𑀬𑁂𑀯 𑀑𑀤𑀸𑀢𑀯𑀢𑁆𑀣𑀲𑁆𑀲 𑀅𑀦𑁆𑀢𑁄𑀓𑀸𑀲𑀸𑀬𑀪𑀸𑀯𑀢𑁄. ‘‘𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀲𑀸𑀧𑀻’’𑀢𑀺𑀆𑀤𑀺.

𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀲𑀸𑀫𑀡𑁂𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀴𑀺𑀬𑀫𑁆𑀧𑀻𑀢𑀺 𑀧𑀦𑁆𑀢𑀺𑀬𑀫𑁆𑀧𑀺. 𑀲𑁂𑀦𑁄 𑀫𑀁𑀲𑀧𑁂𑀲𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺 𑀯𑀺𑀬 𑀪𑀢𑁆𑀢𑀧𑀺𑀡𑁆𑀟𑁂 𑀧𑀢𑁆𑀢𑀁 𑀉𑀧𑀦𑀸𑀫𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺 𑀯𑀲𑁆𑀲𑀸𑀦𑀁 𑀅𑀕𑀡𑀦𑀢𑁆𑀢𑀸.