𑁪𑁨. 𑀲𑀺𑀓𑁆𑀔𑀸𑀧𑀤𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼𑀓𑀣𑀸

𑁧𑁦𑁬. 𑀦𑀸𑀲𑀦𑀯𑀢𑁆𑀣𑀽𑀢𑀺 𑀮𑀺𑀗𑁆𑀕𑀦𑀸𑀲𑀦𑀸𑀬 𑀅𑀥𑀺𑀝𑁆𑀞𑀸𑀦𑀁, 𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀙𑀺𑀫𑀸𑀦𑀁 𑀧𑀜𑁆𑀘𑀦𑁆𑀦𑀦𑁆𑀢𑀺 𑀬𑁄𑀚𑀦𑀸. 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀽𑀢𑀺 𑀤𑀡𑁆𑀟𑀓𑀫𑁆𑀫𑀲𑁆𑀲 𑀓𑀸𑀭𑀡𑀁.

𑁧𑁦𑁭. 𑀅𑀧𑁆𑀧𑀢𑀺𑀲𑁆𑀲𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀽𑀦𑀁 𑀯𑀘𑀦𑀲𑁆𑀲 𑀧𑀝𑀺𑀫𑀼𑀔𑀁 𑀆𑀤𑀭𑁂𑀦 𑀅𑀲𑀯𑀦𑀁 𑀪𑀺𑀓𑁆𑀔𑀽 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀦 𑀞𑀧𑁂𑀦𑁆𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀽 𑀚𑁂𑀝𑁆𑀞𑀓𑀝𑁆𑀞𑀸𑀦𑁂’’𑀢𑀺𑀆𑀤𑀺. ‘‘𑀲𑀫𑀸𑀦𑀚𑀻𑀯𑀺𑀓𑀸’’𑀢𑀺 𑀇𑀫𑀺𑀦𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸𑀢𑀺 𑀏𑀢𑁆𑀣 𑀲𑀪𑀸𑀕𑀲𑀤𑁆𑀤𑁄 𑀲𑀫𑀸𑀦𑀲𑀤𑁆𑀤𑀧𑀭𑀺𑀬𑀸𑀬𑁄, 𑀯𑀼𑀢𑁆𑀢𑀺𑀲𑀤𑁆𑀤𑁄 𑀚𑀻𑀯𑀺𑀓𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀲𑀓𑁆𑀓𑀢𑀻𑀢𑀺 𑀏𑀢𑁆𑀣 𑀲𑀓𑁆𑀓 𑀕𑀢𑀺𑀬𑀦𑁆𑀢𑀺𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀴𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀧𑀼𑀩𑁆𑀩𑁄 𑀲𑀓𑁆𑀓𑀲𑀤𑁆𑀤𑁄 𑀕𑀢𑁆𑀬𑀢𑁆𑀣𑁄𑀢𑀺 𑀆𑀳 ‘‘𑀧𑀭𑀓𑁆𑀓𑀫𑀢𑀻’’𑀢𑀺. 𑀓𑀺𑀦𑁆𑀢𑀻𑀢𑀺 𑀓𑀺𑀫𑁂𑀯. 𑀇𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀏𑀯𑀲𑀤𑁆𑀤𑀢𑁆𑀣𑁄, 𑀓𑁂𑀦 𑀏𑀯 𑀉𑀧𑀸𑀬𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀓𑁆𑀓𑁄𑀲𑀢𑀺 𑀘𑁂𑀯𑀸𑀢𑀺 𑀚𑀸𑀢𑀺𑀆𑀤𑀻𑀳𑀺 𑀅𑀓𑁆𑀓𑁄𑀲𑀢𑀺 𑀘𑁂𑀯. 𑀪𑁂𑀤𑁂𑀢𑀻𑀢𑀺 𑀪𑁂𑀤𑀸𑀧𑁂𑀢𑀺. 𑀆𑀯𑀭𑀡𑀁 𑀓𑀸𑀢𑀼𑀦𑁆𑀢𑀺 𑀏𑀢𑁆𑀣 𑀆𑀯𑀭𑀡𑀲𑀤𑁆𑀤𑁄 𑀦𑀺𑀯𑀸𑀭𑀡𑀲𑀤𑁆𑀤𑀯𑁂𑀯𑀘𑀦𑁄𑀢𑀺 𑀆𑀳 ‘‘𑀦𑀺𑀯𑀸𑀭𑀡𑀁 𑀓𑀸𑀢𑀼’’𑀦𑁆𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑀭𑀺𑀯𑁂𑀡𑁂, 𑀲𑁂𑀦𑀸𑀲𑀦𑁂 𑀯𑀸. 𑀯𑀲𑁆𑀲𑀕𑁆𑀕𑁂𑀦𑀸𑀢𑀺 𑀯𑀲𑁆𑀲𑀕𑀡𑀦𑀸𑀬. (𑀢𑀲𑁆𑀲𑀸𑀢𑀺 𑀧𑀭𑀺𑀯𑁂𑀡𑀲𑁂𑀦𑀸𑀲𑀦𑀲𑁆𑀲. 𑀉𑀧𑀘𑀸𑀭𑁂𑀢𑀺 𑀆𑀲𑀦𑁆𑀦𑁂). 𑀫𑀼𑀔𑀤𑁆𑀯𑀸𑀭𑀺𑀓𑀦𑁆𑀢𑀺 𑀫𑀼𑀔𑀲𑀗𑁆𑀔𑀸𑀢𑁂𑀦 𑀤𑁆𑀯𑀸𑀭𑁂𑀦 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀁. ‘‘𑀯𑀤𑀢𑁄𑀧𑀻’’𑀢𑀺 𑀇𑀫𑀺𑀦𑀸 𑀯𑀘𑀻𑀧𑀬𑁄𑀕𑁂𑀦 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, ‘‘𑀦𑀺𑀓𑁆𑀔𑀺𑀧𑀢𑁄𑀧𑀻’’𑀢𑀺 𑀇𑀫𑀺𑀦𑀸 𑀓𑀸𑀬𑀧𑀬𑁄𑀕𑁂𑀦. 𑀅𑀦𑀸𑀘𑀸𑀭𑀲𑁆𑀲𑀸𑀢𑀺 𑀤𑀡𑁆𑀟𑀓𑀫𑁆𑀫𑁂 𑀅𑀦𑀸𑀘𑀸𑀭𑀲𑁆𑀲. 𑀏𑀢𑁆𑀢𑀓𑁂 𑀦𑀸𑀫 𑀤𑀡𑁆𑀟𑀓𑀫𑁆𑀫𑁂𑀢𑀺 𑀏𑀢𑁆𑀢𑀓𑁂 𑀦𑀸𑀫 𑀉𑀤𑀓𑀸𑀳𑀭𑀸𑀧𑀦𑀸𑀤𑀺𑀲𑀗𑁆𑀔𑀸𑀢𑁂 𑀤𑀡𑁆𑀟𑀓𑀫𑁆𑀫𑁂. 𑀇𑀤𑀦𑁆𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀺𑀁. 𑀮𑀘𑁆𑀙𑀲𑀻𑀢𑀺 𑀮𑀪𑀺𑀲𑁆𑀲𑀲𑀺. ‘‘𑀏𑀢𑁆𑀢𑀓𑁂 𑀦𑀸𑀫 𑀤𑀡𑁆𑀟𑀓𑀫𑁆𑀫𑁂’’𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺. 𑀤𑀡𑁆𑀟𑀓𑀫𑁆𑀫𑀦𑁆𑀢𑀺 𑀤𑀡𑁆𑀟𑁂𑀦𑁆𑀢𑀺 𑀤𑀫𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀡𑁆𑀟𑁄, 𑀲𑁄𑀬𑁂𑀯 𑀓𑀢𑁆𑀢𑀩𑁆𑀩𑀢𑁆𑀢𑀸 𑀓𑀫𑁆𑀫𑀦𑁆𑀢𑀺 𑀤𑀡𑁆𑀟𑀓𑀫𑁆𑀫𑀁 𑀆𑀯𑀭𑀡𑀸𑀤𑀺. 𑀅𑀧𑀭𑀸𑀥𑀸𑀦𑀼𑀭𑀽𑀧𑀦𑁆𑀢𑀺 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀧𑀭𑀸𑀥𑀲𑁆𑀲 𑀅𑀦𑀼𑀭𑀽𑀧𑀁. 𑀢𑀫𑁆𑀧𑀻𑀢𑀺 𑀉𑀤𑀓𑀤𑀸𑀭𑀼𑀯𑀸𑀮𑀺𑀓𑀸𑀤𑀺𑀆𑀳𑀭𑀸𑀧𑀡𑀫𑁆𑀧𑀺. 𑀢𑀜𑁆𑀘 𑀔𑁄𑀢𑀺 𑀢𑀜𑁆𑀘 𑀓𑀭𑀡𑀁. 𑀑𑀭𑀫𑀺𑀲𑁆𑀲𑀢𑀻𑀢𑀺 𑀓𑀸𑀬𑁂𑀦 𑀑𑀭𑀫𑀺𑀲𑁆𑀲𑀢𑀺. 𑀯𑀺𑀭𑀫𑀺𑀲𑁆𑀲𑀢𑀻𑀢𑀺 𑀯𑀸𑀘𑀸𑀬 𑀯𑀺𑀭𑀫𑀺𑀲𑁆𑀲𑀢𑀺. 𑀉𑀡𑁆𑀳𑀧𑀸𑀲𑀸𑀡𑁂 𑀯𑀸𑀢𑀺𑀆𑀤𑀻𑀲𑀼 𑀯𑀸𑀲𑀤𑁆𑀤𑁂𑀦 𑀅𑀜𑁆𑀜𑀸𑀦𑀺𑀧𑀺 𑀅𑀢𑁆𑀢𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.