𑁪𑁩. 𑀅𑀦𑀸𑀧𑀼𑀘𑁆𑀙𑀸𑀯𑀭𑀡𑀯𑀢𑁆𑀣𑀼𑀆𑀤𑀺𑀓𑀣𑀸

𑁧𑁦𑁮. 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸𑀢𑀺 𑀏𑀢𑁆𑀣 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸. 𑀲𑀩𑁆𑀩𑀣𑀸 𑀓𑀺𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺. 𑀤𑀡𑁆𑀟𑀓𑀫𑁆𑀫𑀫𑀲𑁆𑀲𑀸𑀢𑀺 𑀤𑀡𑁆𑀟𑀓𑀫𑁆𑀫𑀁 𑀅𑀲𑁆𑀲. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀲𑀤𑁆𑀥𑀺𑀁 𑀉𑀧𑀚𑁆𑀛𑀸𑀬𑁂𑀦 𑀯𑀺𑀳𑀭𑀦𑁆𑀢𑀻𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸. 𑀦𑀺𑀲𑁆𑀲𑀬𑀸𑀘𑀭𑀺𑀬𑀸𑀤𑀻𑀦𑀁 𑀅𑀦𑁆𑀢𑁂 𑀲𑀫𑀻𑀧𑁂 𑀯𑀲𑀦𑁆𑀢𑀻𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀸, 𑀉𑀧𑀲𑀫𑁆𑀧𑀦𑁆𑀦𑀸𑀬𑁂𑀯.

𑀅𑀧𑀮𑀸𑀴𑁂𑀦𑁆𑀢𑀻𑀢𑀺 𑀏𑀢𑁆𑀣 𑀮𑀴 𑀉𑀧𑀲𑁂𑀯𑀸𑀬𑀦𑁆𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁮 𑀴𑀓𑀸𑀭𑀦𑁆𑀢𑀥𑀸𑀢𑀼) 𑀣𑁂𑀭𑁂 𑀮𑀴𑀢𑁄 𑀉𑀧𑀲𑁂𑀯𑀢𑁄 𑀅𑀧𑀕𑀫𑁂𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀥 𑀧𑀦 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀼𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺. 𑀅𑀧𑀮𑀸𑀴𑁂𑀢𑀩𑁆𑀩𑀸𑀢𑀺 𑀅𑀜𑁆𑀜𑀁 𑀮𑀴𑀢𑁄 𑀉𑀧𑀲𑁂𑀯𑀢𑁄 𑀅𑀧𑀕𑀫𑁂𑀢𑀩𑁆𑀩𑀸. 𑀧𑀭𑀺𑀲𑀪𑀽𑀢𑁂 𑀲𑀸𑀫𑀡𑁂𑀭𑀽𑀧𑀲𑀫𑁆𑀧𑀦𑁆𑀦𑁂𑀢𑀺 𑀬𑁄𑀚𑀦𑀸. 𑀆𑀤𑀻𑀦𑀯𑀦𑁆𑀢𑀺 𑀤𑀼𑀲𑁆𑀲𑀻𑀮𑀁 𑀦𑀺𑀲𑁆𑀲𑀸𑀬 𑀯𑀲𑀦𑀲𑁆𑀲 𑀤𑁄𑀲𑀁. 𑀦𑁆𑀳𑀸𑀬𑀺𑀢𑀼𑀁 𑀆𑀕𑀢𑁂𑀦 𑀢𑀬𑀸 𑀕𑀽𑀣𑀫𑀓𑁆𑀔𑀦𑀁 𑀓𑀢𑀁 𑀯𑀺𑀬 𑀤𑀼𑀲𑁆𑀲𑀻𑀮𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂𑀦 𑀤𑀼𑀲𑁆𑀲𑀻𑀮𑀁 𑀓𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀤𑀼𑀲𑁆𑀲𑀻𑀮’’𑀦𑁆𑀢𑀺 𑀧𑀤𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀧𑁂𑀓𑁆𑀔𑀁, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀫𑀚𑁆𑀛𑁂 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀧𑀤𑀸𑀧𑁂𑀓𑁆𑀔𑀓𑀸𑀮𑁂 𑀯𑀼𑀢𑁆𑀢𑀓𑀫𑁆𑀫𑀁, 𑀧𑀘𑁆𑀙𑀺𑀫𑀧𑀤𑀸𑀧𑁂𑀓𑁆𑀔𑀓𑀸𑀮𑁂 𑀅𑀯𑀼𑀢𑁆𑀢𑀓𑀫𑁆𑀫𑀁. 𑀲𑁄𑀢𑀺 𑀲𑀸𑀫𑀡𑁂𑀭𑀽𑀧𑀲𑀫𑁆𑀧𑀦𑁆𑀦𑁄. 𑀉𑀧𑀚𑁆𑀛𑀸𑀬𑀁 𑀯𑀸𑀢𑀺 𑀲𑀸𑀫𑀡𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀬𑀁 𑀯𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀢𑀻𑀲𑀼 𑀦𑀸𑀲𑀦𑀸𑀲𑀽𑀢𑀺 𑀲𑀁𑀯𑀸𑀲𑀮𑀺𑀗𑁆𑀕𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀲𑀗𑁆𑀔𑀸𑀢𑀸𑀲𑀼 𑀢𑀻𑀲𑀼 𑀦𑀸𑀲𑀦𑀸𑀲𑀼. 𑀬𑁄𑀢𑀺 𑀲𑀸𑀫𑀡𑁂𑀭𑁄. 𑀦𑀸𑀦𑀸𑀆𑀧𑀢𑁆𑀢𑀺𑀬𑁄𑀢𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀻𑀢𑀺 𑀏𑀢𑁆𑀣 𑀧𑀸𑀡𑀔𑀸𑀤𑀓𑁂𑀳𑀺 𑀲𑀢𑁆𑀢𑁂𑀳𑀺 𑀓𑀼𑀣𑀺𑀬𑀢𑀺 𑀳𑀺𑀁𑀲𑀺𑀬𑀢𑀻𑀢𑀺 𑀓𑀼𑀦𑁆𑀣𑁄, 𑀓𑀼𑀁 𑀧𑀣𑀯𑀺𑀁 𑀯𑀸 𑀥𑀸𑀭𑁂𑀢𑀻𑀢𑀺 𑀓𑀼𑀦𑁆𑀥𑁄.

𑀓𑀺𑀫𑀺𑀬𑁂𑀯 𑀧𑀺𑀮𑁆𑀮𑀺𑀓𑀁 𑀧𑁄𑀢𑀓𑀁 𑀓𑀺𑀧𑀺𑀮𑁆𑀮𑀺𑀓𑀁 𑀫𑀺𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸. 𑀧𑀺𑀮𑁆𑀮𑀺𑀓𑀲𑀤𑁆𑀤𑁄 𑀳𑀺 𑀧𑁄𑀢𑀓𑀧𑀭𑀺𑀬𑀸𑀬𑁄. 𑀓𑀺𑀫𑀻𑀦𑀁, 𑀓𑀺𑀫𑀻𑀲𑀼 𑀯𑀸 𑀧𑀺𑀮𑁆𑀮𑀺𑀓𑀁 𑀓𑀺𑀧𑀺𑀮𑁆𑀮𑀺𑀓𑀁. 𑀦𑀸𑀲𑁂𑀢𑀩𑁆𑀩𑀢𑀁𑀬𑁂𑀯𑀸𑀢𑀺 𑀮𑀺𑀗𑁆𑀕𑁂𑀦 𑀦𑀸𑀲𑁂𑀢𑀩𑁆𑀩𑀪𑀸𑀯𑀫𑁂𑀯. 𑀢𑀸𑀯𑀤𑁂𑀯𑀸𑀢𑀺 𑀢𑀲𑁆𑀫𑀺𑀁 𑀫𑀸𑀭𑀡𑀪𑀺𑀦𑁆𑀤𑀦𑀓𑁆𑀔𑀡𑁂𑀬𑁂𑀯. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀘 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀯𑀲𑁆𑀲𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀓𑀺𑀡𑁆𑀡𑀤𑁄𑀲𑁄𑀯𑀸𑀢𑀺 𑀮𑀺𑀗𑁆𑀕𑀦𑀸𑀲𑀦𑀤𑁄𑀲𑁂𑀦 𑀘 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀤𑁄𑀲𑁂𑀦 𑀘 𑀆𑀓𑀼𑀮𑀤𑁄𑀲𑁄𑀯. 𑀯𑀺𑀭𑀚𑁆𑀛𑀺𑀢𑁆𑀯𑀸𑀢𑀺 𑀯𑀺𑀭𑀸𑀥𑁂𑀢𑁆𑀯𑀸. 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑀲𑁆𑀲𑁂𑀯 𑀲𑀸𑀫𑀡𑁂𑀭𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀲𑀭𑀡𑀕𑀫𑀦𑀉𑀧𑀲𑀫𑁆𑀧𑀤𑀓𑀫𑁆𑀫𑀯𑀸𑀘𑀸𑀦𑀁 𑀲𑀤𑀺𑀲𑀢𑁆𑀢𑀸. 𑀪𑀺𑀓𑁆𑀔𑀼𑀦𑀸 𑀲𑀫𑀸𑀤𑀺𑀦𑁆𑀦𑀁 𑀯𑀺𑀬 𑀇𑀫𑀺𑀦𑀸𑀧𑀺 𑀲𑀫𑀸𑀤𑀺𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺 𑀏𑀯𑀫𑀺𑀚𑁆𑀛𑀦𑁂, 𑀲𑀫𑀸𑀤𑀺𑀦𑁆𑀦𑁂 𑀯𑀸. 𑀤𑀴𑁆𑀳𑀻𑀓𑀭𑀡𑀢𑁆𑀣𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀤𑀴𑁆𑀳𑀻𑀓𑀭𑀡𑀢𑁆𑀣𑀁. 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀦𑁆𑀢𑀺 𑀲𑀸𑀫𑀡𑁂𑀭𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁. 𑀮𑀘𑁆𑀙𑀢𑀻𑀢𑀺 𑀮𑀪𑀺𑀲𑁆𑀲𑀢𑀺. 𑀲𑀗𑁆𑀖𑁂𑀦 𑀤𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀮𑁄𑀓𑁂𑀢𑁆𑀯𑀸𑀢𑀺 𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀇𑀫𑀺𑀦𑀸 𑀙𑀺𑀦𑁆𑀦𑀯𑀲𑁆𑀲𑀓𑀁 𑀤𑀲𑁆𑀲𑁂𑀢𑀺.

𑀅𑀤𑀺𑀦𑁆𑀦𑀸𑀤𑀸𑀦𑁂 𑀢𑀺𑀡𑀲𑀮𑀸𑀓𑀫𑀢𑁆𑀢𑁂𑀦𑀸𑀧𑀺 𑀯𑀢𑁆𑀣𑀼𑀦𑀸 𑀅𑀲𑀫𑀡𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀯𑀺𑀓𑀸𑀭𑁂𑀦 𑀧𑀝𑀺𑀧𑀚𑁆𑀚𑀦𑀢𑁄. 𑀪𑀡𑀺𑀢𑁂𑀢𑀺 𑀪𑀡𑀦𑁂. 𑀚𑀸𑀦𑀺𑀢𑁆𑀯𑀸𑀢𑀺 𑀚𑀸𑀦𑀺𑀢𑁆𑀯𑀸 𑀏𑀯. 𑀏𑀯𑀓𑀸𑀭𑁄 𑀳𑁂𑀢𑁆𑀣 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀅𑀚𑀸𑀦𑀺𑀢𑁆𑀯𑀸’’𑀢𑀺. 𑀬𑀸𑀦𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀞𑀧𑀦𑀢𑁆𑀣𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀞𑀧𑀦𑀢𑁆𑀣𑀸𑀬. 𑀅𑀬𑀦𑁆𑀢𑀺 𑀧𑀸𑀭𑀸𑀚𑀺𑀓𑁄. 𑀯𑀺𑀲𑁂𑀲𑁄𑀢𑀺 𑀪𑀺𑀓𑁆𑀔𑀽𑀦𑀁 𑀧𑀸𑀘𑀺𑀢𑁆𑀢𑀺𑀬𑀢𑁄 𑀯𑀺𑀲𑁂𑀲𑁄.

𑀧𑀝𑀺𑀧𑀓𑁆𑀔𑀯𑀲𑁂𑀦𑀸𑀢𑀺 ‘‘𑀅𑀦𑀭𑀳𑀁 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀘 ‘‘𑀤𑁆𑀯𑀸𑀓𑁆𑀔𑀸𑀢𑁄’’𑀢𑀺𑀆𑀤𑀺𑀦𑀸 𑀘 ‘‘𑀤𑀼𑀧𑁆𑀧𑀝𑀺𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀘 𑀧𑀝𑀺𑀯𑀺𑀭𑀼𑀤𑁆𑀥𑀯𑀲𑁂𑀦 𑀕𑀭𑀳𑀦𑁆𑀢𑁄 𑀲𑀸𑀫𑀡𑁂𑀭𑁄 𑀦𑀺𑀯𑀸𑀭𑁂𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀡𑁆𑀟𑀓𑀦𑀸𑀲𑀦𑀸𑀬𑀸𑀢𑀺 𑀓𑀡𑁆𑀟𑀓𑀦𑀸𑀫𑀓𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀬. 𑀢𑀁 𑀮𑀤𑁆𑀥𑀺𑀦𑁆𑀢𑀺 𑀅𑀯𑀡𑁆𑀡𑀪𑀸𑀲𑀦𑀤𑀺𑀝𑁆𑀞𑀺𑀁. 𑀅𑀘𑁆𑀘𑀬𑀦𑁆𑀢𑀺 𑀅𑀢𑀺𑀓𑁆𑀓𑀫𑀁, 𑀤𑁄𑀲𑀁 𑀯𑀸. 𑀤𑁂𑀲𑀸𑀧𑁂𑀢𑀩𑁆𑀩𑁄𑀢𑀺 ‘‘𑀅𑀘𑁆𑀘𑀬𑁄 𑀫𑀁 𑀪𑀦𑁆𑀢𑁂 𑀅𑀘𑁆𑀘𑀕𑀫𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀸𑀧𑁂𑀢𑀩𑁆𑀩𑀸. 𑀢𑀁 𑀬𑀼𑀢𑁆𑀢𑀦𑁆𑀢𑀺 ‘‘𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀢𑀁 𑀯𑀘𑀦𑀁 𑀧𑀢𑀺𑀭𑀽𑀧𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀇𑀥𑀸𑀢𑀺 𑀔𑀦𑁆𑀥𑀓𑁂, ‘‘𑀲𑀸𑀫𑀡𑁂𑀭𑀁 𑀦𑀸𑀲𑁂𑀢𑀼’’𑀦𑁆𑀢𑀺𑀯𑀘𑀦𑁂 𑀯𑀸.

‘‘𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀅𑀜𑁆𑀜𑀢𑀭𑀤𑀺𑀝𑁆𑀞𑀺𑀓𑁄 𑀲𑀸𑀫𑀡𑁂𑀭𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀤𑀲𑀲𑀼 𑀦𑀸𑀲𑀦𑀗𑁆𑀕𑁂𑀲𑀼. ‘‘𑀓𑀸𑀫’’𑀦𑁆𑀢𑀺𑀧𑀤𑁂𑀦 𑀧𑀼𑀦𑀭𑀼𑀢𑁆𑀢𑀺𑀦𑀺𑀭𑀢𑁆𑀣𑀓𑀤𑁄𑀲𑀸𑀭𑁄𑀧𑀦𑁂𑀦 𑀕𑀭𑀳𑀁 𑀤𑀲𑁆𑀲𑁂𑀢𑀺. ‘‘𑀧𑀦𑀸’’𑀢𑀺𑀧𑀤𑁂𑀦 𑀢𑁂𑀲𑀁 𑀤𑁄𑀲𑀸𑀦𑀁 𑀧𑀳𑀸𑀦𑁂𑀦 𑀲𑀫𑁆𑀪𑀸𑀯𑀦𑀁 𑀤𑀲𑁆𑀲𑁂𑀢𑀺. 𑀅𑀩𑁆𑀭𑀳𑁆𑀫𑀘𑀸𑀭𑀺𑀁 𑀲𑀸𑀫𑀡𑁂𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀲𑀫𑁆𑀧𑀸𑀤𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀉𑀧𑀲𑀫𑁆𑀧𑀸𑀤𑀦𑀁 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄 𑀲𑀸𑀫𑀡𑁂𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀩𑁆𑀩𑀚𑁆𑀚𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀕𑀭𑀳𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀕𑁂𑀯 𑀉𑀧𑀲𑀫𑁆𑀧𑀤’’𑀦𑁆𑀢𑀺. 𑀏𑀢𑀫𑀢𑁆𑀣𑀦𑁆𑀢𑀺 𑀏𑀢𑀸𑀤𑀺𑀲𑀫𑀢𑁆𑀣𑀁.