𑁪𑁧. 𑀭𑀸𑀳𑀼𑀮𑀯𑀢𑁆𑀣𑀼𑀓𑀣𑀸

𑁧𑁦𑁫. 𑀓𑀧𑀺𑀮𑀯𑀢𑁆𑀣𑀽𑀢𑀺 𑀏𑀢𑁆𑀣 𑀓𑀧𑀺𑀮𑁄𑀢𑀺 𑀓𑀴𑀸𑀭𑀯𑀡𑁆𑀡𑁄 𑀇𑀲𑀺 𑀯𑀼𑀘𑁆𑀘𑀢𑀺, 𑀲𑁄 𑀯𑀲𑀢𑀺 𑀏𑀢𑁆𑀣𑀸𑀢𑀺 𑀓𑀧𑀺𑀮𑀯𑀢𑁆𑀣𑀼, 𑀅𑀲𑁆𑀲𑀫𑁄. 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀸𑀧𑀺𑀢𑀢𑁆𑀢𑀸 𑀦𑀕𑀭𑀫𑁆𑀧𑀺 𑀓𑀧𑀺𑀮𑀯𑀢𑁆𑀣𑀽𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁬𑁭; 𑀲𑀼. 𑀦𑀺. 𑀅𑀝𑁆𑀞. 𑁨.𑁩𑁬𑁨) 𑀯𑀼𑀘𑁆𑀘𑀢𑀺. 𑀅𑀬𑀦𑁆𑀢𑀺 𑀯𑀓𑁆𑀔𑀫𑀸𑀦𑀓𑀣𑀸. 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀢𑀺 𑀏𑀢𑁆𑀣 𑀲𑀼𑀤𑁆𑀥𑁄𑀤𑀦𑁄𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀦𑀸𑀫𑀁. 𑀅𑀣 𑀯𑀸 𑀲𑀼𑀤𑁆𑀥𑀁 𑀑𑀤𑀦𑀁 𑀇𑀫𑀲𑁆𑀲𑀸𑀢𑀺 𑀲𑀼𑀤𑁆𑀥𑁄𑀤𑀦𑁄, 𑀲𑁄𑀬𑁂𑀯 𑀫𑀳𑀸𑀭𑀸𑀚𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸. 𑀯𑀺𑀳𑀭𑀢𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸. 𑀭𑀸𑀚𑀕𑀳𑀦𑁆𑀢𑀺 𑀭𑀸𑀚𑀕𑀳𑀦𑀕𑀭𑀁. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀆𑀬𑀸𑀘𑀸𑀫𑀻𑀢𑀺 𑀳𑀺 𑀅𑀢𑁆𑀣𑁄. 𑀫𑁂𑀢𑀺 𑀫𑀫, 𑀧𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀦𑀸𑀤𑀭𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀲𑁄𑀢𑀺 𑀅𑀫𑀘𑁆𑀘𑁄. 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀏𑀯𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀦𑀺𑀲𑀻𑀤𑀦𑀓𑀸𑀮𑁂. 𑀅𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀲𑁆𑀲 𑀅𑀫𑀘𑁆𑀘𑀲𑁆𑀲. 𑀢𑀢𑁄𑀢𑀺 𑀬𑀸𑀘𑀦𑀓𑀸𑀭𑀡𑀸. 𑀦𑀦𑁆𑀢𑀺 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀅𑀫𑀘𑁆𑀘𑀁. 𑀢𑀢𑁆𑀣𑁂𑀯𑀸𑀢𑀺 𑀭𑀸𑀚𑀕𑀳𑁂𑀬𑁂𑀯. 𑀢𑁂𑀧𑀻𑀢𑀺 𑀅𑀝𑁆𑀞 𑀤𑀽𑀢𑀸𑀧𑀺. 𑀢𑁂𑀢𑀺 𑀦𑀯 𑀤𑀽𑀢𑀸.

𑀅𑀣𑀸𑀢𑀺 𑀢𑀢𑁄 𑀧𑀘𑁆𑀙𑀸. 𑀏𑀓𑀤𑀺𑀯𑀲𑀚𑀸𑀢𑀓𑀦𑁆𑀢𑀺 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀚𑀸𑀢𑀓𑀁. 𑀲𑁄𑀢𑀺 𑀓𑀸𑀴𑀼𑀤𑀸𑀬𑀻𑀅𑀫𑀘𑁆𑀘𑁄. 𑀧𑀩𑁆𑀩𑀚𑀺𑀢𑁆𑀯𑀸𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 ‘‘𑀅𑀧𑀩𑁆𑀩𑀚𑀺𑀢𑁆𑀯𑀸𑀧𑀻’’𑀢𑀺 𑀅𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀣𑁂𑀯𑀸𑀢𑀺 𑀬𑀣𑀸 𑀦𑀯 𑀤𑀽𑀢𑀸 𑀲𑀧𑀭𑀺𑀯𑀸𑀭𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀢𑀣𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀓𑀸𑀴𑀼𑀤𑀸𑀬𑀻. 𑀲𑀫𑁆𑀪𑀢𑁂𑀲𑀽𑀢𑀺 𑀲𑀫𑁆𑀪𑀭𑀺𑀢𑁂𑀲𑀼 𑀕𑀳𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑁂𑀲𑀽𑀢𑀺 𑀯𑀺𑀲𑁆𑀲𑀝𑁆𑀞𑀸 𑀓𑀫𑁆𑀫𑀦𑁆𑀢𑀸 𑀏𑀢𑁂𑀲𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑀸, 𑀢𑁂𑀲𑀼. 𑀲𑀼𑀧𑀼𑀧𑁆𑀨𑀺𑀢𑁂𑀲𑀽𑀢𑀺 𑀲𑀼𑀦𑁆𑀤𑀭𑀧𑀼𑀧𑁆𑀨𑀲𑀜𑁆𑀚𑀸𑀢𑁂𑀲𑀼. 𑀧𑀝𑀺𑀧𑀚𑁆𑀚𑀦𑀓𑁆𑀔𑀫𑁂𑀢𑀺 𑀧𑀝𑀺𑀧𑀚𑁆𑀚𑀦𑀢𑁆𑀣𑀸𑀬 𑀔𑀫𑁂 𑀬𑁄𑀕𑁆𑀬𑁂. 𑀕𑀫𑀦𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀝𑁆𑀞𑀺𑀫𑀢𑁆𑀢𑀸𑀳𑀻𑀢𑀺 (𑀩𑀼. 𑀯𑀁. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸 𑁨) 𑀲𑀝𑁆𑀞𑀺𑀧𑀫𑀸𑀡𑀸𑀳𑀺. 𑀏𑀢𑀦𑁆𑀢𑀺 𑀏𑀢𑀁 𑀲𑀁𑀯𑀡𑁆𑀡𑀲𑁆𑀲 𑀓𑀸𑀭𑀡𑀁 𑀓𑀺𑀦𑁆𑀢𑀺 𑀧𑀼𑀘𑁆𑀙𑀺. 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀁 𑀓𑀸𑀮𑁄𑀢𑀺 𑀬𑁄𑀚𑀦𑀸. 𑀢𑁂𑀦 𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑀕𑀯𑀸 𑀧𑀓𑁆𑀓𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀯𑀼𑀢𑁄𑀢𑀺 𑀧𑀭𑀺𑀲𑀫𑀦𑁆𑀢𑀢𑁄 𑀯𑀼𑀢𑁄 𑀆𑀯𑀼𑀢𑁄 𑀦𑀺𑀯𑀼𑀢𑁄 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑀼𑀭𑀺𑀢𑀘𑀸𑀭𑀺𑀓𑀦𑁆𑀢𑀺 𑀅𑀚𑀯𑀦𑀘𑀸𑀭𑀺𑀓𑀁.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦. 𑀪𑀕𑀯𑀢𑀺 𑀧𑀓𑁆𑀓𑀦𑁆𑀢𑁂 𑀘 𑀲𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑀢𑁄𑀢𑀺 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀺𑀬𑀸 𑀧𑀸𑀝𑀺𑀧𑀤𑀤𑀺𑀯𑀲𑀢𑁄. 𑀉𑀢𑁆𑀢𑀫𑀪𑁄𑀚𑀦𑀭𑀲𑀲𑁆𑀲𑀸𑀢𑀺 𑀉𑀢𑁆𑀢𑀫𑀪𑁄𑀚𑀦𑀭𑀲𑁂𑀦. 𑀤𑀲𑁆𑀲𑀣𑀸𑀢𑀺 𑀤𑀤𑁂𑀬𑁆𑀬𑀸𑀣. 𑀢𑁂𑀦𑁂𑀯𑀸𑀢𑀺 𑀲𑀤𑁆𑀥𑀸𑀬 𑀉𑀧𑁆𑀧𑀸𑀤𑀦𑀓𑀸𑀭𑀡𑁂𑀦𑁂𑀯. 𑀦𑀦𑁆𑀢𑀺 𑀓𑀸𑀴𑀼𑀤𑀸𑀬𑀺𑀁. 𑀪𑀕𑀯𑀸 𑀞𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑁄 𑀅𑀕𑁆𑀕𑁄. 𑀬𑀤𑀺𑀤𑀦𑁆𑀢𑀺 𑀬𑁄 𑀅𑀬𑀁. 𑀏𑀢𑀤𑀕𑁆𑀕𑁂𑀢𑀺 𑀏𑀢𑀤𑀕𑁆𑀕𑀝𑁆𑀞𑀸𑀦𑁂.

𑀲𑀸𑀓𑀺𑀬𑀸𑀧𑀺 𑀔𑁄 𑀧𑀳𑀺𑀡𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀸𑀢𑀺𑀲𑁂𑀝𑁆𑀞𑀦𑁆𑀢𑀺 𑀜𑀸𑀢𑀻𑀦𑀁 𑀲𑁂𑀝𑁆𑀞𑀁, 𑀜𑀸𑀢𑀺𑀬𑁂𑀯 𑀯𑀸 𑀲𑁂𑀝𑁆𑀞𑀁, 𑀪𑀕𑀯𑀦𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀦𑀺𑀕𑁆𑀭𑁄𑀥𑀲𑀓𑁆𑀓𑀲𑁆𑀲𑀸𑀢𑀺 𑀦𑀺𑀕𑁆𑀭𑁄𑀥𑀦𑀸𑀫𑀓𑀲𑁆𑀲 𑀲𑀓𑁆𑀓𑀲𑁆𑀲. 𑀢𑀢𑁆𑀣𑀸𑀢𑀺 𑀦𑀺𑀕𑁆𑀭𑁄𑀥𑀲𑀓𑁆𑀓𑀲𑁆𑀲 𑀆𑀭𑀸𑀫𑁂. 𑀧𑀘𑁆𑀘𑀼𑀕𑁆𑀕𑀫𑀦𑀦𑁆𑀢𑀺 𑀧𑀝𑀺𑀫𑀼𑀔𑀁 𑀉𑀝𑁆𑀞𑀳𑀺𑀢𑁆𑀯𑀸 𑀕𑀫𑀦𑀁. 𑀢𑀢𑁄𑀢𑀺 𑀧𑀳𑀺𑀡𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀸𑀚𑀓𑀼𑀫𑀸𑀭𑁂 𑀘 𑀭𑀸𑀚𑀓𑀼𑀫𑀸𑀭𑀺𑀓𑀸𑀬𑁄 𑀘 𑀧𑀳𑀺𑀡𑀺𑀁𑀲𑀽𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀭𑀸𑀚𑀓𑀼𑀫𑀸𑀭𑀭𑀸𑀚𑀓𑀼𑀫𑀸𑀭𑀺𑀓𑀸𑀦𑀁. 𑀢𑀢𑁆𑀭𑀸𑀢𑀺 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀫𑀸𑀦𑁄 𑀚𑀸𑀢𑀺 𑀲𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀫𑀸𑀦𑀚𑀸𑀢𑀺𑀓𑀸, 𑀫𑀸𑀦𑁂𑀦, 𑀫𑀸𑀦𑁄 𑀯𑀸 𑀣𑀤𑁆𑀥𑁄 𑀏𑀢𑁂𑀲𑀦𑁆𑀢𑀺 𑀫𑀸𑀦𑀣𑀤𑁆𑀥𑀸. 𑀢𑁂𑀢𑀺 𑀲𑀸𑀓𑀺𑀬𑀸, 𑀆𑀳𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑀢𑁂𑀲𑀽𑀢𑀺 𑀲𑀸𑀓𑀺𑀬𑁂𑀲𑀼. 𑀦𑁂𑀢𑀺 𑀜𑀸𑀢𑀬𑁄. 𑀯𑀼𑀝𑁆𑀞𑀸𑀬𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸. 𑀢𑁂𑀲𑀦𑁆𑀢𑀺 𑀜𑀸𑀢𑀻𑀦𑀁. 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂𑀢𑀺 𑀓𑀡𑁆𑀟𑀦𑀸𑀫𑀓𑁂𑀦 𑀉𑀬𑁆𑀬𑀸𑀦𑀧𑀸𑀮𑁂𑀦 𑀭𑁄𑀧𑀺𑀫𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀆𑀲𑀦𑁆𑀦𑁂. 𑀭𑀸𑀚𑀸𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸. 𑀯𑁄𑀢𑀺 𑀢𑀼𑀫𑁆𑀳𑀸𑀓𑀁, 𑀧𑀸𑀤𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀦𑁆𑀢𑀺 𑀯𑀦𑁆𑀤𑀦𑀸. 𑀚𑀫𑁆𑀩𑀼𑀘𑁆𑀙𑀸𑀬𑀸𑀬𑀸𑀢𑀺 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬. 𑀇𑀢𑀺 𑀆𑀳𑀸𑀢𑀺 𑀬𑁄𑀚𑀦𑀸.

𑀲𑀺𑀔𑀸𑀧𑁆𑀧𑀢𑁆𑀢𑁄𑀢𑀺 𑀅𑀕𑁆𑀕𑀧𑁆𑀧𑀢𑁆𑀢𑁄, 𑀓𑁄𑀝𑀺𑀧𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀦𑀺𑀲𑀻𑀤𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑁄𑀓𑁆𑀔𑀭𑀯𑀲𑁆𑀲𑀦𑁆𑀢𑀺 𑀧𑀤𑀼𑀫𑀯𑀦𑁂 𑀯𑀼𑀝𑁆𑀞𑀯𑀲𑁆𑀲𑀲𑀤𑀺𑀲𑀁. 𑀢𑀫𑁆𑀩𑀯𑀡𑁆𑀡𑀦𑁆𑀢𑀺 𑀮𑁄𑀳𑀺𑀢𑀯𑀡𑁆𑀡𑀁. 𑀢𑀦𑁆𑀢𑀺 𑀅𑀧𑀢𑀦𑀁 𑀪𑀕𑀯𑀸 𑀓𑀣𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀓𑀧𑀺𑀮𑀯𑀢𑁆𑀣𑀼𑀁 𑀧𑀢𑁆𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑁂 𑀤𑀺𑀯𑀲𑁂. 𑀇𑀦𑁆𑀤𑀔𑀻𑀮𑁂𑀢𑀺 𑀦𑀕𑀭𑀲𑁆𑀲 𑀉𑀫𑁆𑀫𑀸𑀭𑁂. 𑀓𑀣𑀦𑁆𑀢𑀺 𑀓𑁂𑀦𑀸𑀓𑀸𑀭𑁂𑀦 𑀘𑀭𑀺𑀁𑀲𑀼 𑀦𑀼 𑀔𑁄𑀢𑀺 𑀬𑁄𑀚𑀦𑀸. 𑀅𑀕𑀫𑀁𑀲𑀼 𑀓𑀺𑀁 𑀘𑀭𑀺𑀁𑀲𑀼 𑀓𑀺𑀦𑁆𑀢𑀺 𑀬𑁄𑀚𑀦𑀸. 𑀲𑀧𑀤𑀸𑀦𑀘𑀸𑀭𑀦𑁆𑀢𑀺 𑀖𑀭𑀧𑀝𑀺𑀧𑀸𑀝𑀺𑀔𑀡𑁆𑀟𑀦𑀯𑀺𑀭𑀳𑀺𑀢𑁂𑀦 𑀲𑀳 𑀧𑀯𑀢𑁆𑀢𑀁 𑀘𑀸𑀭𑀁. 𑀢𑀢𑁄𑀢𑀺 𑀆𑀯𑀚𑁆𑀚𑀦𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀫𑁂𑀯 𑀯𑀁𑀲𑁄𑀢𑀺 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀬𑀫𑁂𑀯 𑀯𑀁𑀲𑁄. 𑀅𑀬𑀁 𑀧𑀯𑁂𑀡𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀼𑀲𑀺𑀓𑁆𑀔𑀦𑁆𑀢𑀸𑀢𑀺 𑀅𑀦𑀼 𑀧𑀝𑀺𑀪𑀸𑀕𑀁 𑀲𑀺𑀓𑁆𑀔𑀦𑁆𑀢𑀸. 𑀦𑀺𑀯𑀺𑀝𑁆𑀞𑀕𑁂𑀳𑀢𑁄𑀢𑀺 𑀦𑀺𑀯𑀸𑀲𑀦𑀢𑁆𑀣𑀸𑀬 𑀯𑀺𑀲𑀺𑀢𑀕𑁂𑀳𑀢𑁄. 𑀅𑀬𑁆𑀬𑁄𑀢𑀺 𑀅𑀥𑀺𑀧𑁄 𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄𑀢𑀺 𑀲𑀩𑁆𑀩𑀮𑁄𑀓𑀲𑁆𑀲 𑀲𑀺𑀤𑁆𑀥𑁄 𑀅𑀢𑁆𑀣𑁄 𑀅𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀲𑀺𑀤𑁆𑀥𑀢𑁆𑀣𑁄, 𑀲𑁄𑀬𑁂𑀯 𑀓𑀼𑀫𑀸𑀭𑁄 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄. 𑀲𑀻𑀳𑀧𑀜𑁆𑀚𑀭𑀦𑁆𑀢𑀺 𑀯𑀸𑀢𑀧𑀸𑀦𑀁. 𑀢𑀜𑁆𑀳𑀺 𑀲𑀻𑀳𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀧𑀜𑁆𑀚𑀭𑀢𑁆𑀢𑀸 𑀲𑀻𑀳𑀧𑀜𑁆𑀚𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀲𑁆𑀲𑀦𑀩𑁆𑀬𑀸𑀯𑀝𑁄𑀢𑀺 𑀤𑀲𑁆𑀲𑀦𑁂, 𑀤𑀲𑁆𑀲𑀦𑀢𑁆𑀣𑀸𑀬 𑀯𑀸 𑀩𑁆𑀬𑀸𑀯𑀝𑁄. 𑀭𑀸𑀳𑀼𑀮𑀫𑀸𑀢𑀸𑀧𑀺 𑀤𑁂𑀯𑀻 𑀆𑀭𑁄𑀘𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀧𑀸𑀮𑀳𑀢𑁆𑀣𑁄𑀢𑀺 𑀓𑀧𑀸𑀮𑁄 𑀳𑀢𑁆𑀣𑁂𑀲𑀼 𑀅𑀲𑁆𑀲 𑀪𑀕𑀯𑀢𑁄𑀢𑀺 𑀓𑀧𑀸𑀮𑀳𑀢𑁆𑀣𑁄, 𑀳𑀼𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀦𑀸𑀯𑀺𑀭𑀸𑀕𑀲𑀫𑀼𑀚𑁆𑀚𑀮𑀸𑀬𑀸𑀢𑀺 𑀦𑀸𑀦𑀸𑀞𑀸𑀦𑁂𑀲𑀼 𑀯𑀺𑀭𑀸𑀕𑀸𑀬 𑀲𑀫𑀼𑀚𑁆𑀚𑀮𑀸𑀬. 𑀯𑀺𑀭𑁄𑀘𑀫𑀸𑀦𑀁 𑀪𑀕𑀯𑀦𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀉𑀡𑁆𑀳𑀻𑀲𑀢𑁄𑀢𑀺 𑀲𑀺𑀭𑁄𑀯𑁂𑀞𑀦𑀢𑁄. 𑀢𑀜𑁆𑀳𑀺 𑀉𑀧𑀭𑀺𑀲𑀻𑀲𑁂 𑀦𑀳𑀢𑀺 𑀩𑀦𑁆𑀥𑀢𑀺, 𑀦𑀳𑀻𑀬𑀢𑀺 𑀩𑀦𑁆𑀥𑀻𑀬𑀢𑀻𑀢𑀺 𑀯𑀸 𑀉𑀡𑁆𑀳𑀻𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀭𑀲𑀻𑀳𑀕𑀸𑀣𑀸𑀳𑀺 𑀦𑀸𑀫𑀸𑀢𑀺 𑀦𑀭𑀲𑀻𑀳𑀕𑀸𑀣𑀸𑀦𑀸𑀫𑀓𑀸𑀳𑀺. 𑀢𑀸 𑀳𑀺 𑀬𑀲𑁆𑀫𑀸 𑀦𑀭𑁄𑀬𑁂𑀯 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀻𑀳𑁄 𑀲𑁂𑀝𑁆𑀞𑁄, 𑀦𑀭𑀸𑀦𑀁, 𑀦𑀭𑁂𑀲𑀼 𑀯𑀸 𑀲𑀻𑀳𑁄 𑀲𑁂𑀝𑁆𑀞𑁄𑀢𑀺 𑀦𑀭𑀲𑀻𑀳𑁄, 𑀢𑀲𑁆𑀲 𑀧𑀓𑀸𑀲𑀓𑀸 𑀕𑀸𑀣𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀭𑀲𑀻𑀳𑀕𑀸𑀣𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀜𑁆𑀜𑁄𑀢𑀺 𑀲𑀲𑁆𑀲𑀼𑀭𑀭𑀜𑁆𑀜𑁄, 𑀫𑀸𑀢𑀼𑀮𑀭𑀜𑁆𑀜𑁄 𑀯𑀸. 𑀲𑀁𑀯𑀺𑀕𑁆𑀕𑀳𑀤𑀬𑁄𑀢𑀺 𑀘𑀮𑀦𑀘𑀺𑀢𑁆𑀢𑁄. 𑀲𑀡𑁆𑀞𑀸𑀧𑀬𑀫𑀸𑀦𑁄𑀢𑀺 𑀲𑀼𑀝𑁆𑀞𑀼 𑀞𑀸𑀧𑀬𑀫𑀸𑀦𑁄. 𑀢𑀼𑀭𑀺𑀢𑀢𑀼𑀭𑀺𑀢𑀦𑁆𑀢𑀺 𑀢𑀼𑀭𑀺𑀢𑀢𑁄 𑀢𑀼𑀭𑀺𑀢𑀁, 𑀅𑀢𑀺𑀲𑀻𑀖𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀪𑀦𑁆𑀢𑁂𑀢𑀺 𑀓𑀺𑀁 𑀓𑀸𑀭𑀡𑀸 𑀪𑀦𑁆𑀢𑁂. 𑀅𑀳𑀼𑀯𑀢𑁆𑀣𑀸𑀢𑀺 𑀳𑀺𑀬𑁆𑀬𑀢𑁆𑀢𑀦𑀻𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑀗𑁆𑀔𑀸𑀢𑀸𑀬 𑀢𑁆𑀣𑀯𑀺𑀪𑀢𑁆𑀢𑀺𑀬𑀸 𑀳𑀽𑀥𑀸𑀢𑀼𑀲𑁆𑀲 𑀊𑀓𑀸𑀭𑀲𑁆𑀲 𑀉𑀯𑀸𑀤𑁂𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀏𑀯𑀁𑀲𑀜𑁆𑀜𑀺𑀦𑁄 𑀅𑀳𑀼𑀯𑀢𑁆𑀣𑀸𑀢𑀺 𑀬𑁄𑀚𑀦𑀸. 𑀯𑀁𑀲𑀘𑀸𑀭𑀺𑀢𑁆𑀢𑀫𑁂𑀢𑀦𑁆𑀢𑀺 𑀏𑀢𑀁 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀯𑀁𑀲𑀢𑁄 𑀧𑀯𑁂𑀡𑀺𑀢𑁄 𑀘𑀸𑀭𑀺𑀢𑁆𑀢𑀁. 𑀢𑀢𑁆𑀣 𑀘𑀸𑀢𑀺 𑀫𑀳𑀸𑀲𑀫𑁆𑀫𑀢𑀔𑀢𑁆𑀢𑀺𑀬𑀯𑀁𑀲𑁂 𑀘. 𑀅𑀬𑀦𑁆𑀢𑀺 𑀫𑀳𑀸𑀲𑀫𑁆𑀫𑀢𑀔𑀢𑁆𑀢𑀺𑀬𑀯𑀁𑀲𑁄. 𑀅𑀦𑁆𑀢𑀭𑀯𑀻𑀣𑀺𑀬𑀦𑁆𑀢𑀺 𑀯𑀻𑀣𑀺𑀬𑀸 𑀫𑀚𑁆𑀛𑁂. 𑀞𑀺𑀢𑁄𑀯 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀉𑀢𑁆𑀢𑀺𑀝𑁆𑀞𑁂𑀢𑀺 𑀉𑀤𑁆𑀤𑀺𑀲𑁆𑀲, 𑀉𑀝𑁆𑀞𑀳𑀺𑀢𑁆𑀯𑀸 𑀯𑀸 𑀧𑀺𑀡𑁆𑀟𑀸𑀬 𑀢𑀺𑀝𑁆𑀞𑀦𑁂. 𑀥𑀫𑁆𑀫𑀁 𑀲𑀼𑀘𑀭𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀘𑀭𑀺𑀢𑀩𑁆𑀩𑀁 𑀪𑀺𑀓𑁆𑀔𑀸𑀘𑀭𑀺𑀬𑀲𑀗𑁆𑀔𑀸𑀢𑀁 𑀥𑀫𑁆𑀫𑀁. 𑀘𑀭𑁂𑀢𑀺 𑀘𑀭𑁂𑀬𑁆𑀬. 𑀥𑀫𑁆𑀫𑀘𑀸𑀭𑀻𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀘𑀭𑀡𑀲𑀻𑀮𑁄 𑀲𑀫𑀡𑁄. 𑀲𑀼𑀔𑀁 𑀲𑁂𑀢𑀻𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁂𑀲𑀇𑀭𑀺𑀬𑀸𑀧𑀣𑀸𑀧𑀺 𑀮𑀓𑁆𑀔𑀡𑀳𑀸𑀭𑀯𑀲𑁂𑀦 𑀕𑀳𑁂𑀢𑀩𑁆𑀩𑀸 𑀲𑀫𑀸𑀦𑀓𑀺𑀘𑁆𑀘𑀢𑁆𑀢𑀸. 𑀅𑀲𑁆𑀫𑀺𑀜𑁆𑀘 𑀮𑁄𑀓𑁂 𑀧𑀭𑀫𑁆𑀳𑀺 𑀘 𑀮𑁄𑀓𑁂𑀢𑀺 𑀬𑁄𑀚𑀦𑀸.

𑀦 𑀢𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑁂𑀢𑀺 𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑀲𑀗𑁆𑀔𑀸𑀢𑀁 𑀤𑀼𑀝𑁆𑀞𑀼 𑀘𑀭𑀺𑀢𑀩𑁆𑀩𑀁 𑀢𑀁 𑀥𑀫𑁆𑀫𑀁 𑀦 𑀘𑀭𑁂𑀬𑁆𑀬.

𑀏𑀢𑁆𑀣 𑀘 𑀧𑀞𑀫𑀕𑀸𑀣𑀁 𑀅𑀦𑁆𑀢𑀭𑀯𑀻𑀣𑀺𑀬𑀁 𑀓𑀣𑁂𑀢𑁆𑀯𑀸 𑀭𑀸𑀚𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀤𑀼𑀢𑀺𑀬𑀕𑀸𑀣𑀁 𑀧𑀺𑀢𑀼𑀦𑀺𑀯𑁂𑀲𑀦𑁂 𑀓𑀣𑁂𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀭𑀸𑀚𑀸𑀦𑀁 𑀲𑀓𑀤𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀫𑁆𑀫𑀧𑀸𑀮𑀚𑀸𑀢𑀓𑀁 𑀲𑀼𑀢𑁆𑀯𑀸𑀢𑀺 𑀧𑀼𑀦 𑀅𑀧𑀭𑀲𑁆𑀫𑀺𑀁 𑀤𑀺𑀯𑀲𑁂 (𑀚𑀸. 𑀅𑀝𑁆𑀞. 𑁪.𑁯𑁮 𑀆𑀤𑀬𑁄; 𑀥. 𑀧. 𑀅𑀝𑁆𑀞. 𑁧.𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼) 𑀥𑀫𑁆𑀫𑀧𑀸𑀮𑀚𑀸𑀢𑀓𑀁 (𑀚𑀸. 𑀅𑀝𑁆𑀞. 𑁪.𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀯𑀡𑁆𑀡𑀦𑀸) 𑀲𑀼𑀢𑁆𑀯𑀸. 𑀫𑀭𑀡𑀲𑀫𑀬𑁂𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂, 𑀫𑀭𑀡𑀲𑀫𑀬𑀲𑀫𑀻𑀧𑁂 𑀯𑀸, 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁.

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀭𑀺𑀯𑀺𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀁 𑀇𑀢𑁆𑀣𑀸𑀕𑀸𑀭𑀦𑁆𑀢𑀺 𑀲𑀩𑁆𑀩𑁄 𑀑𑀭𑁄𑀥𑁄. 𑀲𑁄 𑀳𑀺 𑀇𑀢𑁆𑀣𑀻𑀦𑀁 𑀅𑀕𑀸𑀭𑀦𑁆𑀢𑀺 𑀇𑀢𑁆𑀣𑀸𑀕𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 𑀅𑀕𑀸𑀭𑀫𑁂𑀯 𑀫𑀼𑀔𑁆𑀬𑀢𑁄 𑀮𑀩𑁆𑀪𑀢𑀺, 𑀭𑀸𑀚𑀺𑀢𑁆𑀣𑀺𑀬𑁄 𑀧𑀦 𑀉𑀧𑀘𑀸𑀭𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀸 𑀧𑀦𑀸𑀢𑀺 𑀭𑀸𑀳𑀼𑀮𑀫𑀸𑀢𑀸 𑀧𑀦. 𑀧𑀭𑀺𑀚𑀦𑁂𑀦𑀸𑀢𑀺 𑀧𑀭𑀺𑀯𑀸𑀭𑁂𑀦. 𑀦𑀦𑁆𑀢𑀺 𑀅𑀬𑁆𑀬𑀧𑀼𑀢𑁆𑀢𑀁. ‘‘𑀭𑀸𑀚𑀸𑀦’’𑀦𑁆𑀢𑀺𑀧𑀤𑀁 ‘‘𑀕𑀸𑀳𑀸𑀧𑁂𑀢𑁆𑀯𑀸’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁, ‘‘𑀧𑀢𑁆𑀢’’𑀦𑁆𑀢𑀺𑀧𑀤𑀁 𑀢𑀢𑁆𑀣𑁂𑀯 𑀥𑀸𑀢𑀼𑀓𑀫𑁆𑀫𑀁. 𑀭𑀸𑀚𑀥𑀻𑀢𑀸𑀬𑀸𑀢𑀺 𑀲𑀼𑀧𑁆𑀧𑀩𑀼𑀤𑁆𑀥𑀭𑀜𑁆𑀜𑁄 𑀥𑀻𑀢𑀸𑀬. 𑀲𑀸𑀢𑀺 𑀭𑀸𑀚𑀥𑀻𑀢𑀸. 𑀕𑁄𑀧𑁆𑀨𑀓𑁂𑀲𑀽𑀢𑀺 𑀘𑀭𑀡𑀕𑀡𑁆𑀞𑀻𑀲𑀼 𑀪𑀕𑀯𑀦𑁆𑀢𑀁 𑀕𑀳𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀪𑀕𑀯𑀢𑁄 𑀕𑁄𑀧𑁆𑀨𑀓𑁂 𑀕𑀳𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀏𑀯𑀜𑁆𑀳𑀺 𑀲𑀢𑀺 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀭𑀸𑀚𑀸 𑀓𑀣𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀘𑁆𑀙𑀭𑀺𑀬𑀦𑁆𑀢𑀺 𑀦 𑀅𑀘𑁆𑀙𑀭𑀺𑀬𑀁, 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀦 𑀬𑁄𑀕𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀚𑀥𑀻𑀢𑀸 𑀬𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑀺, 𑀇𑀤𑀁 𑀅𑀦𑀘𑁆𑀙𑀭𑀺𑀬𑀦𑁆𑀢𑀺 𑀬𑁄𑀚𑀦𑀸.

𑀢𑀁𑀤𑀺𑀯𑀲𑀫𑁂𑀯𑀸𑀢𑀺 𑀢𑀲𑁆𑀫𑀺𑀁 𑀤𑀼𑀢𑀺𑀬𑀤𑀺𑀯𑀲𑁂𑀬𑁂𑀯. 𑀓𑁂𑀲𑀯𑀺𑀲𑀚𑁆𑀚𑀦𑀦𑁆𑀢𑀺 𑀭𑀸𑀚𑀘𑀽𑀴𑀸𑀫𑀡𑀺𑀩𑀦𑁆𑀥𑀦𑀢𑁆𑀣𑀁 𑀓𑀼𑀫𑀸𑀭𑀓𑀸𑀮𑁂 𑀩𑀦𑁆𑀥𑀺𑀢𑀲𑀺𑀔𑀸𑀯𑁂𑀡𑀺𑀲𑀗𑁆𑀔𑀸𑀢𑀲𑁆𑀲 𑀓𑁂𑀲𑀲𑁆𑀲 𑀯𑀺𑀲𑀚𑁆𑀚𑀦𑀁, 𑀫𑁄𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀝𑁆𑀝𑀩𑀦𑁆𑀥𑁄𑀢𑀺 𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸𑀢𑀺 𑀦𑀮𑀸𑀝𑁂 𑀲𑀼𑀯𑀡𑁆𑀡𑀫𑀬𑀲𑁆𑀲 𑀧𑀝𑁆𑀝𑀲𑁆𑀲 𑀩𑀦𑁆𑀥𑀦𑀁. 𑀖𑀭𑀫𑀗𑁆𑀕𑀮𑀦𑁆𑀢𑀺 𑀅𑀪𑀺𑀦𑀯𑀖𑀭𑀁 𑀧𑀯𑁂𑀲𑀦𑀫𑀗𑁆𑀕𑀮𑀁. 𑀆𑀯𑀸𑀳𑀫𑀗𑁆𑀕𑀮𑀦𑁆𑀢𑀺 𑀆𑀯𑀸𑀳𑁂 𑀧𑀯𑀢𑁆𑀢𑀁 𑀫𑀗𑁆𑀕𑀮𑀁. 𑀙𑀢𑁆𑀢𑀫𑀗𑁆𑀕𑀮𑀦𑁆𑀢𑀺 𑀭𑀸𑀚𑀙𑀢𑁆𑀢𑀼𑀲𑁆𑀲𑀸𑀧𑀦𑀓𑀸𑀮𑁂 𑀧𑀯𑀢𑁆𑀢𑀁 𑀫𑀗𑁆𑀕𑀮𑀁. 𑀫𑀗𑁆𑀕𑀮𑀁 𑀯𑀢𑁆𑀯𑀸𑀢𑀺 𑀫𑀗𑁆𑀕𑀮𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸. 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 𑀚𑀦𑀧𑀤𑀫𑁆𑀳𑀺 𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸. 𑀢𑀼𑀯𑀝𑁆𑀝𑀁 𑀔𑁄𑀢𑀺 𑀔𑀺𑀧𑁆𑀧𑀫𑁂𑀯. 𑀲𑁄𑀧𑀻𑀢𑀺 𑀦𑀦𑁆𑀤𑀭𑀸𑀚𑀓𑀼𑀫𑀸𑀭𑁄𑀧𑀺. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀓𑀧𑀺𑀮𑀯𑀢𑁆𑀣𑀼𑀧𑀢𑁆𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑁂 𑀤𑀺𑀯𑀲𑁂. 𑀥𑀫𑁆𑀫𑀧𑀤𑀅𑀝𑁆𑀞𑀓𑀣𑀸𑀬𑀁 (𑀥. 𑀧. 𑀅𑀝𑁆𑀞. 𑁧.𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼; 𑀣𑁂𑀭𑀕𑀸. 𑀅𑀝𑁆𑀞. 𑁧.𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀧𑀦 ‘‘𑀢𑀢𑀺𑀬𑀤𑀺𑀯𑀲𑁂 𑀦𑀦𑁆𑀤𑀁 𑀧𑀩𑁆𑀩𑀸𑀚𑁂𑀲𑀻’’𑀢𑀺 𑀯𑀼𑀢𑁆𑀢𑀁.

𑀲𑀢𑁆𑀢𑀫𑁂 𑀤𑀺𑀯𑀲𑁂𑀢𑀺 𑀓𑀧𑀺𑀮𑀯𑀢𑁆𑀣𑀼𑀧𑀢𑁆𑀢𑀤𑀺𑀯𑀲𑀢𑁄𑀬𑁂𑀯 𑀲𑀢𑁆𑀢𑀫𑁂 𑀤𑀺𑀯𑀲𑁂. 𑀏𑀢𑀁 𑀲𑀫𑀡𑀁 𑀧𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀩𑁆𑀭𑀳𑁆𑀫𑀭𑀽𑀧𑀯𑀡𑁆𑀡𑀦𑁆𑀢𑀺 𑀩𑁆𑀭𑀳𑁆𑀫𑀼𑀦𑁄 𑀭𑀽𑀧𑀲𑀗𑁆𑀔𑀸𑀢𑁄 𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀇𑀫𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀭𑀽𑀧𑀯𑀡𑁆𑀡𑁄, 𑀢𑀁. 𑀅𑀬𑀦𑁆𑀢𑀺 𑀅𑀬𑀁 𑀲𑀫𑀡𑁄. 𑀢𑁆𑀬𑀲𑁆𑀲𑀸𑀢𑀺 𑀢𑁂 𑀅𑀲𑁆𑀲. 𑀢𑁂𑀢𑀺 𑀦𑀺𑀥𑀬𑁄. 𑀅𑀲𑁆𑀲𑀸𑀢𑀺 𑀲𑀫𑀡𑀲𑁆𑀲. 𑀦𑀦𑁆𑀢𑀺 𑀲𑀫𑀡𑀁. 𑀬𑀸𑀘𑀸𑀢𑀺 𑀬𑀸𑀘𑀸𑀳𑀺. 𑀅𑀬𑀁 𑀤𑁆𑀯𑀺𑀓𑀫𑁆𑀫𑀺𑀓𑀥𑀸𑀢𑀼. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀧𑀼𑀢𑁆𑀢𑁄 𑀧𑀺𑀢𑀼𑀲𑀦𑁆𑀢𑀓𑀲𑁆𑀲 𑀲𑀸𑀫𑀺𑀓𑁄, 𑀇𑀢𑀺 𑀢𑀲𑁆𑀫𑀸 𑀫𑁂 𑀤𑁂𑀳𑀻𑀢𑀺 𑀬𑁄𑀚𑀦𑀸. 𑀅𑀦𑀼𑀭𑀽𑀧𑀁 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀻𑀢𑀺 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺.

𑀦 𑀯𑀺𑀲𑀳𑀢𑀻𑀢𑀺 𑀦 𑀲𑀫𑀢𑁆𑀣𑁂𑀢𑀺. 𑀅𑀬𑀁 𑀓𑀼𑀫𑀸𑀭𑁄 𑀧𑀺𑀢𑀼𑀲𑀦𑁆𑀢𑀓𑀁 𑀬𑀁 𑀥𑀦𑀁 𑀇𑀘𑁆𑀙𑀢𑀺, 𑀢𑀦𑁆𑀢𑀺 𑀬𑁄𑀚𑀦𑀸. 𑀯𑀝𑁆𑀝𑀸𑀦𑀼𑀕𑀢𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀁 𑀅𑀦𑀼𑀕𑀢𑀁. 𑀲𑀯𑀺𑀖𑀸𑀢𑀓𑀦𑁆𑀢𑀺 𑀯𑀺𑀖𑀸𑀢𑀓𑁂𑀳𑀺 𑀧𑀜𑁆𑀘𑀳𑀺 𑀯𑁂𑀭𑁂𑀳𑀺 𑀲𑀳𑀺𑀢𑀁. 𑀅𑀲𑁆𑀲𑀸𑀢𑀺 𑀓𑀼𑀫𑀸𑀭𑀲𑁆𑀲. 𑀦𑀦𑁆𑀢𑀺 𑀓𑀼𑀫𑀸𑀭𑀁. 𑀅𑀬𑀦𑁆𑀢𑀺 𑀓𑀼𑀫𑀸𑀭𑁄. 𑀤𑀸𑀬𑀚𑁆𑀚𑀦𑁆𑀢𑀺 𑀤𑀸𑀬𑀲𑀗𑁆𑀔𑀸𑀢𑀁 𑀫𑀸𑀢𑀸𑀧𑀺𑀢𑀽𑀦𑀁 𑀥𑀦𑀁 𑀆𑀤𑀤𑀸𑀢𑀻𑀢𑀺 𑀤𑀸𑀬𑀸𑀤𑁄, 𑀧𑀼𑀢𑁆𑀢𑁄, 𑀢𑀲𑁆𑀲 𑀇𑀤𑀦𑁆𑀢𑀺 𑀤𑀸𑀬𑀚𑁆𑀚𑀁, 𑀫𑀸𑀢𑀸𑀧𑀺𑀢𑀽𑀦𑀁 𑀥𑀦𑀁.

‘‘𑀓𑀣𑀸𑀳𑀁 𑀪𑀦𑁆𑀢𑁂 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀫𑀻’’𑀢𑀺 𑀓𑀲𑁆𑀫𑀸 𑀆𑀳, 𑀦𑀦𑀼 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀩𑀸𑀭𑀸𑀡𑀲𑀺𑀬𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀅𑀦𑀼𑀜𑁆𑀜𑀸𑀢𑀁 𑀧𑀩𑁆𑀩𑀚𑁆𑀚𑀁 𑀦 𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀬𑀸 𑀲𑀸 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀅𑀦𑀼𑀜𑁆𑀜𑀸𑀢𑀸𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀢𑁄. 𑀉𑀧𑀲𑀫𑁆𑀧𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀫𑀢𑀻𑀢𑀺 𑀯𑀺𑀯𑀺𑀥𑀸 𑀇𑀘𑁆𑀙𑀸. 𑀇𑀫𑀜𑁆𑀘 𑀧𑀦𑀢𑁆𑀣𑀦𑁆𑀢𑀺 𑀇𑀫𑀫𑁂𑀯 𑀯𑀺𑀫𑀢𑀺𑀲𑀗𑁆𑀔𑀸𑀢𑀫𑀢𑁆𑀣𑀁. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀢𑁄 𑀢𑀁 𑀅𑀚𑁆𑀛𑀸𑀲𑀬𑀦𑁆𑀢𑀺 𑀬𑁄𑀚𑀦𑀸.

‘‘𑀅𑀣 𑀔𑁄…𑀧𑁂… 𑀧𑀩𑁆𑀩𑀸𑀚𑁂𑀲𑀻’’𑀢𑀺 𑀏𑀢𑁆𑀣 𑀓𑀺𑀁 𑀓𑀼𑀫𑀸𑀭𑀲𑁆𑀲 𑀓𑁂𑀲𑀘𑁆𑀙𑁂𑀤𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀬𑁂𑀯 𑀓𑀭𑁄𑀢𑀻𑀢𑀺 𑀆𑀳 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄’’𑀢𑀺𑀆𑀤𑀺. 𑀑𑀯𑀸𑀤𑀸𑀘𑀭𑀺𑀬𑁄𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀻𑀲𑀼 𑀲𑁂𑀔𑀺𑀬𑀯𑀢𑁆𑀢𑁂𑀲𑀼, 𑀆𑀪𑀺𑀲𑀫𑀸𑀘𑀸𑀭𑀺𑀓𑁂𑀲𑀼 𑀘 𑀑𑀯𑀸𑀤𑀓𑁄 𑀆𑀘𑀭𑀺𑀬𑁄. 𑀅𑀣 𑀓𑀲𑁆𑀫𑀸 ‘‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀬𑀁. 𑀦 𑀆𑀘𑀭𑀺𑀬𑁄𑀢𑀺 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄 𑀘 𑀑𑀯𑀸𑀤𑀸𑀘𑀭𑀺𑀬𑁄 𑀘 𑀦 𑀇𑀲𑁆𑀲𑀭𑁄.

𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁂𑀦 𑀳𑀤𑀬𑁂𑀦𑀸𑀢𑀺 𑀏𑀢𑁆𑀣 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀳𑀤𑀬𑁄 𑀳𑀼𑀢𑁆𑀯𑀸𑀢𑀺 𑀳𑀺 𑀬𑁄𑀚𑀦𑀸. 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀯𑀘𑀦𑀁.

𑀢𑀢𑁆𑀣𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀥𑀦’’𑀦𑁆𑀢𑀺 𑀯𑀸 ‘‘𑀅𑀜𑁆𑀜’’𑀦𑁆𑀢𑀺 𑀯𑀸 ‘‘𑀲𑀸𑀯𑀚𑁆𑀚’’𑀦𑁆𑀢𑀺 𑀯𑀸 ‘‘𑀅𑀦𑀯𑀚𑁆𑀚’’𑀦𑁆𑀢𑀺 𑀯𑀸 𑀯𑀺𑀲𑁂𑀲𑀫𑀓𑀢𑁆𑀯𑀸 𑀲𑀸𑀫𑀜𑁆𑀜𑁂𑀦. 𑀦 𑀘 𑀩𑀼𑀤𑁆𑀥𑀸𑀦𑀦𑁆𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀦 𑀓𑁂𑀯𑀮𑀁 𑀅𑀧𑀝𑀺𑀭𑀽𑀧𑀫𑁂𑀯, 𑀅𑀣 𑀔𑁄 𑀩𑀼𑀤𑁆𑀥𑀸𑀦𑀜𑁆𑀘 𑀦 𑀆𑀘𑀺𑀡𑁆𑀡𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀦𑁆𑀢𑀺 𑀬𑀁 𑀯𑀭𑀁. 𑀢𑀣𑀸 𑀦𑀦𑁆𑀤𑁂𑀢𑀺 𑀏𑀢𑁆𑀣 𑀢𑀣𑀸𑀲𑀤𑁆𑀤𑀲𑁆𑀲 𑀉𑀧𑀫𑁂𑀬𑁆𑀬𑀢𑁆𑀣𑀚𑁄𑀢𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀣𑁂𑀯 𑀓𑀺𑀭𑀸’’𑀢𑀺𑀆𑀤𑀺. 𑀬𑀣𑁂𑀯 𑀩𑁄𑀥𑀺𑀲𑀢𑁆𑀢𑀁 𑀩𑁆𑀬𑀸𑀓𑀭𑀺𑀁𑀲𑀼, 𑀏𑀯𑀁 𑀦𑀦𑁆𑀤𑀫𑁆𑀧𑀺 𑀭𑀸𑀳𑀼𑀮𑀫𑁆𑀧𑀺 𑀩𑁆𑀬𑀸𑀓𑀭𑀺𑀁𑀲𑀼 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀬𑀁 𑀧𑀦 𑀬𑀣𑀸 𑀪𑀕𑀯𑀢𑀺 𑀫𑁂 𑀪𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀅𑀳𑁄𑀲𑀺, 𑀢𑀣𑀸 𑀦𑀦𑁆𑀤𑁂 𑀧𑀩𑁆𑀩𑀚𑀺𑀢𑁂 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀅𑀳𑁄𑀲𑀺, 𑀢𑀣𑀸 𑀭𑀸𑀳𑀼𑀮𑁂 𑀧𑀩𑁆𑀩𑀚𑀺𑀢𑁂 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀁 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀦𑁂𑀫𑀺𑀢𑁆𑀢𑀓𑀸𑀢𑀺 𑀲𑀼𑀪𑀸𑀲𑀼𑀪𑀦𑀺𑀫𑀺𑀢𑁆𑀢𑀁 𑀓𑀣𑁂𑀦𑁆𑀢𑀻𑀢𑀺 𑀦𑁂𑀫𑀺𑀢𑁆𑀢𑀓𑀸. 𑀧𑀼𑀢𑁆𑀢𑀲𑁆𑀲𑀸𑀢𑀺 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑀲𑁆𑀲. 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀧𑀩𑁆𑀩𑀚𑁆𑀚𑀸𑀳𑁂𑀢𑀼 𑀧𑀩𑁆𑀩𑀚𑁆𑀚𑀸𑀓𑀸𑀭𑀡𑀸, 𑀧𑀩𑁆𑀩𑀚𑁆𑀚𑀸𑀦𑀺𑀫𑀺𑀢𑁆𑀢𑀁 𑀯𑀸. 𑀢𑀢𑁄𑀢𑀺 𑀪𑀕𑀯𑀢𑁄 𑀧𑀩𑁆𑀩𑀚𑁆𑀚𑀢𑁄. 𑀢𑀫𑁆𑀧𑀻𑀢𑀺 𑀦𑀦𑁆𑀤𑀫𑁆𑀧𑀺. 𑀇𑀢𑀻𑀢𑀺 𑀈𑀤𑀺𑀲𑀁. 𑀪𑀕𑀯𑀢𑁄 𑀧𑀩𑁆𑀩𑀚𑁆𑀚𑀸𑀬 𑀫𑀳𑀦𑁆𑀢𑀁 𑀇𑀘𑁆𑀙𑀸𑀯𑀺𑀖𑀸𑀢𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀢𑀫𑁆𑀧𑀻𑀢𑀺 𑀭𑀸𑀳𑀼𑀮𑀫𑁆𑀧𑀺. 𑀢𑁂𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀳𑁂𑀢𑀼𑀦𑀸. 𑀅𑀲𑁆𑀲𑀸𑀢𑀺 𑀭𑀜𑁆𑀜𑁄. 𑀉𑀧𑁆𑀧𑀚𑁆𑀚𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁄𑀢𑀺 𑀲𑁄𑀓𑀼𑀧𑁆𑀧𑀢𑁆𑀢𑀺𑀢𑁄 𑀯𑀭𑀬𑀸𑀘𑀦𑀢𑁄 𑀯𑀸.

𑀲𑁄𑀢𑀺 𑀭𑀸𑀚𑀸. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫. 𑀅𑀳𑀫𑁆𑀧𑀺 𑀦𑀸𑀫 𑀬𑁄 𑀬𑀸𑀤𑀺𑀲𑁄 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄 𑀲𑀫𑀸𑀦𑁄, 𑀲𑁄 𑀢𑀸𑀤𑀺𑀲𑁄 𑀅𑀳𑀫𑁆𑀧𑀺 𑀦 𑀲𑀓𑁆𑀓𑁄𑀫𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀢𑀺 𑀫𑀬𑀸 𑀅𑀧𑀭𑁂. 𑀤𑀼𑀓𑁆𑀔𑀦𑁆𑀢𑀺 𑀜𑀸𑀢𑀺𑀯𑀺𑀬𑁄𑀕𑀤𑀼𑀓𑁆𑀔𑀁. 𑀦𑀺𑀬𑁆𑀬𑀸𑀦𑀺𑀓𑀓𑀸𑀭𑀡𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀕𑀭𑀳𑀉𑀧𑀯𑀸𑀤𑀅𑀓𑁆𑀓𑁄𑀲𑀢𑁄 𑀦𑀺𑀬𑁆𑀬𑀸𑀦𑀺𑀓𑀁 𑀓𑀸𑀭𑀡𑀁.

𑀢𑀢𑁆𑀣𑀸𑀢𑀺 ‘‘𑀅𑀦𑀦𑀼𑀜𑁆𑀜𑀸𑀢𑁄’’𑀢𑀺𑀆𑀤𑀺𑀯𑀘𑀦𑁂. 𑀚𑀦𑁂𑀢𑀻𑀢𑀺 𑀚𑀦𑀦𑀻, 𑀫𑀸𑀢𑀸. 𑀚𑀦𑁂𑀢𑀻𑀢𑀺 𑀚𑀦𑀓𑁄, 𑀧𑀺𑀢𑀸. 𑀇𑀫𑀺𑀦𑀸 𑀧𑁄𑀲𑀸𑀯𑀦𑀺𑀓𑀫𑀸𑀢𑀸𑀧𑀺𑀢𑀭𑁄 𑀦𑀺𑀯𑀢𑁆𑀢𑁂𑀢𑀺. 𑀫𑀸𑀢𑀸 𑀯𑀸 𑀫𑀢𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁄 𑀏𑀯 𑀯𑀸𑀢𑀺 𑀧𑀼𑀢𑁆𑀢𑁄 𑀏𑀯 𑀯𑀸. 𑀅𑀦𑀼𑀜𑁆𑀜𑀸𑀢𑁄𑀫𑁆𑀳𑀻𑀢𑀺 𑀯𑀤𑀢𑀻𑀢𑀺 𑀲𑀘𑁆𑀘𑁂𑀦 𑀯𑀸 𑀅𑀮𑀺𑀓𑁂𑀦 𑀯𑀸 ‘‘𑀅𑀦𑀼𑀜𑁆𑀜𑀸𑀢𑁄𑀫𑁆𑀳𑀻’’𑀢𑀺 𑀯𑀤𑀢𑀺. 𑀫𑀸𑀢𑀸 𑀯𑀸 𑀲𑀬𑀁 𑀧𑀩𑁆𑀩𑀚𑀺𑀢𑀸𑀢𑀺 𑀬𑁄𑀚𑀦𑀸. 𑀧𑀺𑀢𑀲𑁆𑀲𑀸𑀢𑀺 𑀧𑀺𑀢𑀸 𑀅𑀲𑁆𑀲. 𑀅𑀲𑁆𑀲𑀸𑀢𑀺 𑀧𑀼𑀢𑁆𑀢𑀲𑁆𑀲. 𑀯𑀺𑀧𑁆𑀧𑀯𑀼𑀢𑁆𑀣𑁄𑀢𑀺 𑀫𑀸𑀢𑀼𑀬𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀯𑀸𑀲𑁄.

𑀘𑀽𑀴𑀫𑀸𑀢𑀸𑀤𑀻𑀦𑀦𑁆𑀢𑀺𑀆𑀤𑀺𑀲𑀤𑁆𑀤𑁂𑀦 𑀫𑀳𑀸𑀫𑀸𑀢𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀧𑁄𑀲𑀦𑀓𑀸𑀢𑀺 𑀯𑀟𑁆𑀠𑀦𑀓𑀸. 𑀢𑁂𑀲𑀼𑀧𑀻𑀢𑀺 𑀧𑁄𑀲𑀦𑀓𑀫𑀸𑀢𑀸𑀧𑀺𑀢𑀭𑁂𑀲𑀼𑀧𑀺.

𑀬𑀁 𑀧𑀦 𑀧𑀼𑀢𑁆𑀢𑀁 𑀦𑀸𑀦𑀼𑀚𑀸𑀦𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀻𑀯𑀲𑁆𑀲𑁂𑀯𑀸𑀢𑀺 𑀢𑀲𑁆𑀲 𑀚𑀻𑀯𑀲𑁆𑀲 𑀏𑀯, 𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲, 𑀦 𑀤𑁂𑀲𑀦𑁆𑀢𑀭𑀕𑀫𑀦𑀸𑀤𑀻𑀦𑀫𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁.

𑀫𑀳𑀸𑀓𑀦𑁆𑀢𑀸𑀭𑁄𑀢𑀺 𑀓𑁂𑀦 𑀉𑀤𑀓𑁂𑀦 𑀢𑀭𑀺𑀢𑀩𑁆𑀩𑁄𑀢𑀺 𑀓𑀦𑁆𑀢𑀸𑀭𑁄, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑁄𑀯 𑀫𑀼𑀔𑁆𑀬𑀢𑁄 𑀮𑀩𑁆𑀪𑀢𑀺, 𑀯𑀸𑀴𑀓𑀦𑁆𑀢𑀸𑀭𑁄 𑀘𑁄𑀭𑀓𑀦𑁆𑀢𑀸𑀭𑁄 𑀅𑀫𑀦𑀼𑀲𑁆𑀲𑀓𑀦𑁆𑀢𑀸𑀭𑁄 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑁄 𑀫𑀭𑀼𑀓𑀦𑁆𑀢𑀸𑀭𑁄𑀢𑀺 𑀇𑀫𑁂 𑀧𑀜𑁆𑀘 𑀓𑀦𑁆𑀢𑀸𑀭𑀸 𑀭𑀽𑀴𑁆𑀳𑀻𑀯𑀲𑁂𑀦. 𑀫𑀳𑀦𑁆𑀢𑁄 𑀓𑀦𑁆𑀢𑀸𑀭𑁄 𑀫𑀳𑀸𑀓𑀦𑁆𑀢𑀸𑀭𑁄.

𑀬𑀸𑀯𑀢𑀓𑁂𑀢𑀺 𑀏𑀢𑁆𑀣 𑀬𑀸𑀯𑀲𑀤𑁆𑀤𑁄 𑀧𑀫𑀸𑀡𑀢𑁆𑀣𑁄𑀢𑀺 𑀆𑀳 ‘‘𑀬𑀢𑁆𑀢𑀓𑁂’’𑀢𑀺.