𑁪𑁦. 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑀓𑀣𑀸

𑁧𑁦𑁩. 𑀑𑀕𑀡𑁂𑀦𑀸𑀢𑀺 𑀏𑀢𑁆𑀣 𑀑𑀢𑁆𑀬𑀽𑀧𑀲𑀕𑁆𑀕𑁄 𑀮𑀸𑀫𑀓𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀧𑀭𑀺𑀳𑀻𑀦𑀕𑀡𑁂𑀦𑀸’’𑀢𑀺. 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀭𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀘𑀸𑀬𑀁 𑀯𑀼𑀟𑁆𑀠𑀢𑀭’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀬𑀦𑁆𑀢𑀺 𑀅𑀩𑁆𑀬𑀢𑁆𑀢𑁄 𑀪𑀺𑀓𑁆𑀔𑀼. 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸. 𑀆𑀬𑀲𑁆𑀫𑀢𑁄𑀢𑀺 𑀆𑀬𑀲𑁆𑀫𑀦𑁆𑀢𑀁, 𑀉𑀧𑀬𑁄𑀕𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀆𑀬𑀲𑁆𑀫𑀢𑁄 𑀯𑀸 𑀑𑀯𑀸𑀤𑀦𑁆𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼. 𑀆𑀧𑀼𑀘𑁆𑀙𑀦𑁂𑀲𑀽𑀢𑀺 𑀤𑀺𑀲𑀸𑀧𑀓𑁆𑀓𑀫𑀦𑀸𑀤𑀺𑀅𑀢𑁆𑀣𑀸𑀬 𑀆𑀧𑀼𑀘𑁆𑀙𑀦𑁂𑀲𑀼. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀦𑀺𑀲𑁆𑀲𑀬𑀯𑀲𑀦𑀝𑁆𑀞𑀸𑀦𑁂. 𑀢𑀦𑁆𑀢𑀺 𑀢𑀢𑁆𑀢𑀓𑀁 𑀲𑀼𑀢𑀁. 𑀢𑀲𑁆𑀲𑀸𑀢𑀺 𑀲𑀼𑀢𑀲𑁆𑀲.