𑁩𑁫. 𑀓𑀫𑁆𑀫𑀸𑀭𑀪𑀡𑁆𑀟𑀼𑀯𑀢𑁆𑀣𑀼𑀆𑀤𑀺𑀓𑀣𑀸

𑁯𑁮. 𑀢𑀼𑀮𑀸𑀥𑀸𑀭𑀫𑀼𑀡𑁆𑀟𑀓𑁄𑀢𑀺 𑀫𑀸𑀦𑀪𑀡𑁆𑀟𑀥𑀸𑀭𑁄 𑀫𑀼𑀡𑁆𑀟𑀓𑁄. 𑀇𑀫𑀺𑀦𑀸 𑀓𑀫𑁆𑀫𑀸𑀭𑀪𑀡𑁆𑀟𑀽𑀢𑀺 𑀏𑀢𑁆𑀣 𑀓𑀫𑁆𑀫𑀸𑀭𑀲𑀤𑁆𑀤𑁄 𑀢𑀼𑀮𑀸𑀥𑀸𑀭𑀧𑀭𑀺𑀬𑀸𑀬𑁄, 𑀪𑀡𑁆𑀟𑀼𑀲𑀤𑁆𑀤𑁄 𑀫𑀼𑀡𑁆𑀟𑀓𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀼𑀮𑀸𑀥𑀸𑀭𑁄 𑀳𑀺 𑀅𑀮𑀗𑁆𑀓𑀸𑀭𑀯𑀺𑀓𑀢𑀺𑀓𑀭𑀡𑀢𑁆𑀣𑀸𑀬 𑀓𑀫𑁆𑀫𑀁 𑀅𑀭𑀢𑀺 𑀚𑀸𑀦𑀸𑀢𑀻𑀢𑀺 𑀓𑀫𑁆𑀫𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀫𑀼𑀡𑁆𑀟𑀓𑁄 𑀪𑀡𑁆𑀟𑀻𑀬𑀢𑀺 ‘‘𑀫𑀼𑀡𑁆𑀟𑁄’’𑀢𑀺 𑀧𑀭𑀺𑀪𑀸𑀲𑀻𑀬𑀢𑀻𑀢𑀺 𑀪𑀡𑁆𑀟𑀽𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀅𑀧𑀮𑁄𑀓𑁂𑀢𑀼𑀦𑁆𑀢𑀺 𑀏𑀢𑁆𑀣 𑀅𑀧𑀧𑀼𑀩𑁆𑀩𑁄 𑀮𑁄𑀓𑀲𑀤𑁆𑀤𑁄 𑀆𑀧𑀼𑀘𑁆𑀙𑀦𑀢𑁆𑀣𑁄𑀢𑀺 𑀆𑀳 ‘‘𑀆𑀧𑀼𑀘𑁆𑀙𑀺𑀢𑀼’’𑀦𑁆𑀢𑀺. ‘‘𑀪𑀡𑁆𑀟𑀼𑀓𑀫𑁆𑀫𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 𑀪𑀡𑁆𑀟𑀼𑀓𑀫𑁆𑀫𑀸𑀬𑀸𑀢𑀺 𑀏𑀢𑁆𑀣 𑀢𑀤𑀢𑁆𑀣𑁂 𑀘𑀢𑀼𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀢𑀺 ‘‘𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑀼’’𑀦𑁆𑀢𑀺𑀆𑀤𑀺𑀯𑀘𑀦𑁂. 𑀲𑀻𑀫𑀸𑀧𑀭𑀺𑀬𑀸𑀧𑀦𑁆𑀦𑁂𑀢𑀺 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀉𑀧𑀘𑀸𑀭𑀲𑀻𑀫𑀸𑀬 𑀯𑀸 𑀧𑀭𑀺𑀬𑀸𑀧𑀦𑁆𑀦𑁂. 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁. 𑀏𑀢𑁆𑀣 𑀘𑀸𑀢𑀺 𑀆𑀧𑀼𑀘𑁆𑀙𑀦𑁂 𑀘. 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀧𑀜𑁆𑀘𑀲𑀼 𑀯𑀸𑀓𑁆𑀬𑁂𑀲𑀼 𑀬𑀁𑀓𑀺𑀜𑁆𑀘𑀺 𑀯𑀸𑀓𑁆𑀬𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀺𑀲𑀤𑁆𑀤𑁂𑀦 ‘‘𑀇𑀫𑀲𑁆𑀲 𑀫𑀼𑀡𑁆𑀟𑀓𑀫𑁆𑀫𑀁 𑀆𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀸𑀓𑁆𑀬𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀢𑁂𑀲𑀦𑁆𑀢𑀺 𑀯𑀻𑀲𑀢𑀺𑀆𑀤𑀻𑀦𑀁 𑀪𑀺𑀓𑁆𑀔𑀽𑀦𑀁. ‘‘𑀤𑀳𑀭𑀪𑀺𑀓𑁆𑀔𑀽 𑀯𑀸 𑀲𑀸𑀫𑀡𑁂𑀭𑁂 𑀯𑀸’’𑀢𑀺 𑀇𑀤𑀁 𑀆𑀲𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀕𑀺𑀳𑀺𑀫𑁆𑀧𑀺 𑀧𑁂𑀲𑁂𑀢𑁆𑀯𑀸 𑀆𑀧𑀼𑀘𑁆𑀙𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? ‘‘𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀁 𑀯𑀺𑀦𑀸 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑁂𑀯, 𑀲𑀼𑀧𑀩𑁆𑀩𑀚𑀺𑀢𑁄𑀢𑀺 𑀆𑀳 ‘‘𑀧𑀩𑁆𑀩𑀸𑀚𑁂𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺.

𑀆𑀧𑀼𑀘𑁆𑀙𑀺𑀢𑀁 𑀧𑀕𑁂𑀯𑀸𑀢𑀺 𑀬𑁄𑀚𑀦𑀸. 𑀔𑀡𑁆𑀟𑀲𑀻𑀫𑀸𑀬𑀦𑁆𑀢𑀺 𑀯𑀺𑀳𑀸𑀭𑀲𑀻𑀫𑀸𑀬 𑀯𑀸 𑀉𑀧𑀘𑀸𑀭𑀲𑀻𑀫𑀸𑀬 𑀯𑀸 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀸𑀬𑀁 𑀔𑀡𑁆𑀟𑀲𑀻𑀫𑀸𑀬𑀁. 𑀬𑁄 𑀧𑀦𑀸𑀢𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀧𑀦. 𑀯𑀺𑀩𑁆𑀪𑀦𑁆𑀢𑀓𑁄 𑀯𑀸𑀢𑀺 𑀦𑀯𑀯𑀺𑀩𑁆𑀪𑀦𑁆𑀢𑀓𑁄 𑀯𑀸. 𑀧𑀩𑁆𑀩𑀚𑀺𑀢𑀸𑀦𑀁 𑀤𑁆𑀯𑀗𑁆𑀕𑀼𑀮𑀓𑁂𑀲𑁄 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀤𑁆𑀯𑀗𑁆𑀕𑀼𑀮𑀓𑁂𑀲𑁄 𑀯𑀸’’𑀢𑀺. 𑀤𑁆𑀯𑀻𑀳𑀺 𑀅𑀗𑁆𑀕𑀼𑀮𑀻𑀳𑀺 𑀅𑀢𑀺𑀭𑀺𑀢𑁆𑀢𑁄 𑀓𑁂𑀲𑁄 𑀇𑀫𑀲𑁆𑀲𑀸𑀢𑀺 𑀤𑁆𑀯𑀗𑁆𑀕𑀼𑀮𑀸𑀢𑀺𑀭𑀺𑀢𑁆𑀢𑀓𑁂𑀲𑁄. 𑀏𑀓𑀲𑀺𑀔𑀸𑀫𑀢𑁆𑀢𑀥𑀭𑁄𑀧𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑁧𑁦𑁦. 𑀫𑀸𑀭𑀩𑁆𑀬𑀸𑀥𑀺𑀦𑀸𑀢𑀺 𑀫𑀸𑀭𑀡𑀸𑀩𑀸𑀥𑁄. 𑀲𑁄 𑀳𑀺 𑀲𑀢𑁆𑀢𑀸𑀦𑀁 𑀫𑀸𑀭𑀡𑀝𑁆𑀞𑁂𑀦, 𑀯𑀺𑀯𑀺𑀥𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀆𑀤𑀳𑀝𑁆𑀞𑁂𑀦 𑀫𑀸𑀭𑀩𑁆𑀬𑀸𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀅𑀳𑀺𑀯𑀸𑀢𑀓𑀭𑁄𑀕𑁂𑀦𑀸𑀢𑀺 𑀏𑀢𑁆𑀣 𑀅𑀳𑀺𑀯𑀺𑀲𑀲𑀤𑀺𑀲𑁂𑀦 𑀯𑀸𑀢𑁂𑀦 𑀧𑀯𑀢𑁆𑀢𑁄 𑀭𑁄𑀕𑁄 𑀅𑀳𑀺𑀯𑀸𑀢𑀓𑀭𑁄𑀕𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀬𑀢𑁆𑀭 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀢𑁆𑀭𑀸𑀢𑀺 𑀬𑀲𑁆𑀫𑀺𑀁 𑀓𑀼𑀮𑁂. 𑀲𑁄 𑀭𑁄𑀕𑁄 𑀢𑀲𑁆𑀫𑀺𑀁 𑀓𑀼𑀮𑁂 𑀤𑁆𑀯𑀺𑀧𑀤𑁂 𑀘𑀢𑀼𑀧𑁆𑀧𑀤𑁂 𑀧𑀞𑀫𑀁 𑀕𑀡𑁆𑀳𑀸𑀢𑀺, 𑀧𑀘𑁆𑀙𑀸 𑀕𑁂𑀳𑀲𑀸𑀫𑀺𑀓𑁂 𑀕𑀡𑁆𑀳𑀸𑀢𑀻𑀢𑀺 𑀥𑀫𑁆𑀫𑀧𑀤𑀅𑀝𑁆𑀞𑀓𑀣𑀸𑀬𑀁 (𑀥. 𑀧. 𑀅𑀝𑁆𑀞. 𑁧.𑀲𑀸𑀫𑀸𑀯𑀢𑀻𑀯𑀢𑁆𑀣𑀼) 𑀯𑀼𑀢𑁆𑀢𑀁. 𑀢𑀣𑀸𑀢𑀺 𑀬𑀣𑀸 𑀅𑀜𑁆𑀜𑁄 𑀪𑀺𑀢𑁆𑀢𑀺𑀁 𑀯𑀸 𑀙𑀤𑀦𑀁 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑁆𑀯𑀸 𑀢𑀺𑀭𑁄𑀕𑀸𑀫𑀸𑀤𑀺𑀕𑀢𑁄 𑀯𑀸 𑀳𑀼𑀢𑁆𑀯𑀸 𑀫𑀼𑀘𑁆𑀘𑀢𑀺, 𑀢𑀣𑀸. 𑀏𑀢𑁆𑀣 𑀘 𑀓𑀼𑀮𑁂 𑀧𑀺𑀢𑀸𑀧𑀼𑀢𑁆𑀢𑀸 𑀫𑀼𑀘𑁆𑀘𑀺𑀁𑀲𑀽𑀢𑀺 𑀅𑀢𑁆𑀣𑁄.

𑀓𑀸𑀓𑀼𑀟𑁆𑀟𑁂𑀧𑀓𑀦𑁆𑀢𑀺 𑀏𑀢𑁆𑀣 𑀓𑀸𑀓𑁂 𑀉𑀟𑁆𑀟𑀸𑀧𑁂𑀢𑀻𑀢𑀺 𑀓𑀸𑀓𑀼𑀟𑁆𑀟𑁂𑀧𑀓𑁄, 𑀓𑀸𑀓𑁂 𑀯𑀸 𑀉𑀟𑁆𑀟𑀸𑀧𑁂𑀢𑁆𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀓𑀸𑀓𑀼𑀟𑁆𑀟𑁂𑀧𑀓𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀯𑀸𑀫𑀳𑀢𑁆𑀣𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀉𑀟𑁆𑀟𑀸𑀧𑁂𑀢𑁆𑀯𑀸𑀢𑀺 𑀉𑀤𑁆𑀥𑀁 𑀆𑀓𑀸𑀲𑀁 𑀕𑀫𑀦𑀸𑀧𑁂𑀢𑁆𑀯𑀸. 𑀢𑀦𑁆𑀢𑀺 𑀓𑀸𑀓𑀼𑀟𑁆𑀟𑁂𑀧𑀓𑀁.

𑁧𑁦𑁨. 𑀇𑀢𑁆𑀢𑀭𑀲𑀤𑁆𑀤𑁄 𑀅𑀧𑁆𑀧𑀫𑀢𑁆𑀢𑀓𑀯𑀸𑀘𑀓𑁄 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄𑀢𑀺 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀓𑁄’’𑀢𑀺. ‘‘𑀓𑀢𑀺𑀧𑀸𑀳𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.